Efesas

Efesas

¹ Pania ko Pol, ne qani usuia o God rai aposol iana o Kraes Jisas. Tangara ka inuni na apuna tangaa o God na inuni na ogaoga i Efesas, ani ainuni namu raronimwora rai rao isuria ana o Kraes Jisas. ² Au fagarafe woi o God emaka mina Arafa o Jisas Kraes ki koro tangagamu, mwarao maka mui ogaoga iga ka marapefa. ³ Ai fagaakausia ko God emana na Arafa iaka o Jisas Kraes rainigi ka arani mafatanifa o Kraes ne toraia mai pania i Heven tangagia suria igia ka faku iga ko Kraes. ⁴ Inago wau mamaunga nai tatagarafia na ano kaa, mo God ke qani usuigia rai oga faku afainia ana o Kraes makai apuna mina ogafa kaa ki tataragani nikao. ⁵ O God ke komanigia tefa make takosia woi igia kai faku afainia ko Kraes, rai tao manga karena o God mereana ne taugia. Mo God ke oqania ka agua kaa. ⁶ O God kaa ke koro tefa wau tangagia suria na tagaranifa iana karena ne oqania aerisia kaa, nga ngai ke igia kai fafagaakausia ko God. ⁷ - ⁸ Kraes ke mafata rainia mereana ke mae rai fagataraganisigia ana, ne fagaararia woi na aerafa iaka ke tawo kasi. O Kraes ke tanua ka agua kaa suria o God ne koro tangagia. O God ke nafunia ka apena takofa rafa mina tako matafa ana, ⁹ mo God ke fagaqao tangagia ka takofa punufi iana rainia tagaranifa iana o Kraes. ¹⁰ Hoi iga na mataina nga iana o God ne takosia, o God ke pagai tatanui ka arani mwarao ne takosi, mo Kraes ke pagai taura faku ka arani mwarao i Heven mina ano kaa. Mo Kraes ke mai tao rai qauta na arani mwarao. ¹¹ O God kaa ke tatanui raorao mwa ka arani taa ne oqania, hoi ngaia ngai ke o Kraes ne usuigia rai kare iana kaa. ¹² Hoi ke rao ke tanu manga ngai ke, maka igami na Jiu kami tako gatagata inago rainia ko Kraes rai fagatafigami ana, ke araria nami fafagaakausia ko God suria ngaia kena ke tefa getea nga. ¹³ Kraes ke toraia mai ka mworafa tangagamu nikao, na tarofa koro isuria God ne fagatafigamu. Igamu kamu naka ka fagauguringa iamiu iga ko Kraes ki wategamu ka Figona Apuna ne qani woisia ne fafagaqao rainigamu woi ne nafunigamu ko God. ¹⁴ Nga na Figona Apuna kena ke tanugia ka tako gatagata woi igia kai taawora ka taa o God ne nakai tangara na kare iana. Hoi, igia ke kafu tataraganisigia wau, maka kafu fafagaakausia ko God suria ngaia ke tefa getea nga. ¹⁵ Inau kau qani rongoa ka tangamworanifa iamiu iga na Arafa o Jisas mina oqa korofa iamiu tangara na inuni na apuna tangaa o God. ¹⁶ Ua ke marefa noga qai marape rai wagewagesigamu ana makau tatakosigamu raorao mwa iga na fagarafenga iaku. ¹⁷ Au nongia ko God iana Arafa iaka o Jisas Kraes, me Emaka ne tefa getea nga ki wawategamu ka Figona iana. Nga na Figona ne tanugamu kamu takotako matafa maka mu gigirara menamenai ko God. ¹⁸ Au fagarafe woi o God ki tafangi ka mangatamiu nai rea ana ka mawetana iana maka mu gigirara ka tako gatagatanifa o God ne oqani wategamu ana mataina ne usuigamu. Hoi maka mu kafu rorogoi ka mafatanifa koro tangagamu, afainira ka inuni na apuna tangaa o God. ¹⁹ Au oqanigamu mu gigirara ka apena ramwofa rafa o God ne wategia, igia na ani na rao isuria kaa, nga na ramwofa kaa ke tagara rainia ²⁰ na mataina ne ragaia o Kraes pania na maefa make fagaogasia ke oga ina apanana i otona i Heven. ²¹ Nga ngai ke, o Kraes ke uraura ke arafa tangara ka ramwofa iata na arani enjel mina ataro, mina arani mwarao na nafunia na ramwofa ina arani agua i afaafa, mina arafanga ina ano kaa ina mataina kaa, mina mataina ne pagai arao mai nikao. ²² O God ke naka ka arani mwarao irugufanana ramwofa iana o Kraes, make tanua ko Kraes ke tao rai qauna na siosi, manga ngaia ne tao rai qauta na arani mwarao nikao. ²³ Nga na siosi ka apena o Kraes, nga na apena kena ke fafagaofua, mo Kraes ke fafagaofura ka arani mwarao igi.

¹ Igamu kena kamu qani oga mai iga ka maefa suria ka aerafa iamiu make marefa mu tautau woita. ² Iga na mataina ngai kana, kamu rao suri ka taufa aera iga na ano kaa maka mu rao suria ka Ataro. Ngaia ke arafa tangaa ka qaiawoa mina figona iana ke nafunia ka ramwofa tangara ka arani inuni na marefa nai tau woita iana o God. ³ Inago mai migia maka oga mangara inuni gena nikao. A rao suri mwa ka oqanifa iaka mereaka. Agua ne oqani wau na apeka mina mangataka. Igia ka fagamangariaga ko God maka nanau mwa tangaa ka fagaetangifa. ⁴ - ⁵ Igia ka mae suria ka aerafa iaka. Hoi mako God ke faitakoi wau, make oqa koro wau tangagia, ke fagatafigia afainia ko Kraes, mina korofa iana God kana ke fagatafigia kaa. ⁶ O God ke ragaigia afaraga pania ka maefa tangaa ka tafinga afainia ko Kraes, make wategia ka agua rai oga afainia ana o Kraes Jisas i afaafa i Heven. ⁷ O God ke tanua ka agua kaa suria ne oqani fagaqao ana rainia ka mataina ne mamaunga rao kana, ka korofa mina ramwofa iana tangagia suria na taa o Kraes Jisas ne qani tanua. ⁸ A korofa mwa iana o God ke fagatafigamu rainia fagauguringa iamiu. Nga na mafatanifa iana God tangagamu ngai ke, marefa ka taa mu tanua mereamiu. ⁹ Marefa ka mwarao namu tagarafia rai fagatafigamu ana, kamu kasikasigamu akau rainia. ¹⁰ O God ke qani fagananaura ka tagaranifa koro tangagia rai tanui ana. Hoi ngaia ngai ke, o God ke tagarafigia mataina ne fagaworaigia, rai fakugia ana fainia ko Kraes Jisas. ¹¹ Siana rai qono rainia ana woi igamu kena ka ani na inuni marefa na Jiu. E mwora wau ngaira na qani woisigamu woi marefa mu nafunia ka fara fagagiraranifa o God ne watera na Jiu na qaqaeaga rainia kana. ¹² Iga na mataina ngai kena, ki igamu ke marefa mu girara ko Kraes. Igamu kena ka mafuara tangara na inuni Israel, make marefa mu nafunia nikao ka mwarao o God ne woisi ne watera. Igamu kena kamu oga ina ano kaa ke marefa mu nafunia ka takofa gatagata make marefa mu girara ko God, ¹³ maka mu fagatauria wau ko God. Hoi minga o Kraes Jisas kena ke mafata rainia na gapu mauri iana manga na nafuia make toraigamu fagarangia ko God. ¹⁴ Ngaia o Kraes kena ke fagamarapera ka Jiu mina ani na inuni marefa na Jiu, make fagafakugia rainia ne fogea wato ka para ni faimaerongai ana ne woegia. Kraes ke mafata rainia ka apena mereana, ¹⁵ rai fagaerisi ana ka Lo iana o Mosis afainigi ka faifataninga mina tamasinga iana igi. Ngaia o Kraes ke toraira faku ka Jiu mina ainuni marefa na Jiu mangara na inuni ne etagai ia, ina mataina ne fagafakugia iga na marapefa. ¹⁶ Iga na taotao woro o Kraes ke fagafatongia ka faimaerongai ana iaka. Ngaia ke fagamarapegia afainia ko God rai fagafakura ana na Jiu mina ainuni marefa na Jiu rai ape ne etagai mwa. ¹⁷ Kraes ke rao mai ke tarofainia ka marapefa tangagamu na inuni marefa na Jiu namu fagatauria o God, mina marapefa tangagami na Jiu nami fagarangia o God. ¹⁸ Hoi maki suria o Kraes, igia fato ka gira rao mai ana tangaa ke Emaka iga ka Figona ne etagai. ¹⁹ Igamu na inuni marefa na Jiu ke marefa mu taotao rai mafuara mina ainuni fagatau. Igamu kena ka inuni i finua faku afainira ka arani inuni rao nikao iga na aunaoqa iana o God. ²⁰ Igamu kena ke manga na ruma para na akea ia, afainira na aposol mina maurukari na manga na auu ni funoto, afainia ko Kraes Jisas na romana fau wau nga. ²¹ Ngaia o Kraes ke taua faku na mwarao na akea kena, make tagarafia ka ruma apuna ni wogasifa iana Arafa. ²² Hoi ngaigamu kamu tao rai tana apanana na ruma na akea kena, mo Kraes ke akegamu tangai agua ne taotao iga na Figona iana o God.

¹ Hoi ki ngaia ngai ke inau o Pol nau fagarafe tangagamu tangaa ko God. O Kraes Jisas ke tanuau rai peresin iana, rai tamanigamu ana, kigamu na ani na inuni marefa na Jiu. ² Igamu kamu qani rongoa ka korofa iana o God ne ono sikifiau rai tamanigamu ana. ³ Hoi iga na leta kaa, ke tamasia sisitai suria ngatakena o God ne fagaqao rai tangau na takofa pupunufi iana. ⁴ Manga mu totomania ka leta kaa, mu gira rogoia ana nikao ngatakena nau tako matafa wau rainigi na pupunufinga rainia ko Kraes. ⁵ Inago wau ke marefa ko otai ni girara tako matafa ana rai ka pupunufinga gaa, hoi kina mataina kaa na Figona iana o God ke woisia tangara ka aposol na apuna mina maurukari iana. ⁶ Hoi nga na pupunufinga kaa ka tarofa koro ne tanua na inuni ne marefa na Jiu ka mai tao rai waro ni inuni ne etagai mina ape ne etagai afainira na Jiu. Ngaira gena maka tawoa ka tafinga o God ne qani surua tangara na Jiu, suria ngaira ka faku afainia ko Kraes Jisas. ⁷ God ke oqa koro tangau mina ramwofa iana ke tanuau rai kare iana rai tarofainia ana ka tarofa koro. ⁸ Inau kau sisitai wau nga panira ka arani kare iana o God. Hoi ko God ke koro make tanuau rai tarofainia ana ka korofa iana o Kraes gena ke ma nai girara fagatakera ana, tangara ka inuni marefa na Jiu. ⁹ Ngaia o God ne qani fagaworai na arani mwarao ke oqaniau rai tamania ana ka arani inuni rai tako matafa ana rai ka arani takofa pupunufinga ne qani taotao i mangatana. ¹⁰ Ua o God ke tagarafia ka siosi rai fagaqao ana rai ka arani takofa koro iana tangara ka arani enjel afainira ki tana ramwofa nikao i afaafa. ¹¹ God kaa ke tanua ka agua kaa suria ka qani takotakofa iana mai inago. Hoi make girara rai tanui ana ka taa ne takosi gena rainigi ka arani mwarao o Kraes Jisas na Arafa iaka ne qani tanui. ¹² Hoi ko Kraes ke wategia ka tako nganganiaganifa mina gatagatanifa rai rao mai ana tangaa ko God iga ka fagauguringa. ¹³ Ngaia ngai ke siana kamui anumwanumwa iga ka mataina nau apeape mamasiaga kaa, suria na ape mamasiaganifa iaku kaa rai tamanigamu ana. ¹⁴ Hoi suria na agua ngai ke, au qogurai uwa iga ka fagarafenga tangaa ke Emaka. ¹⁵ Arani inuni i Heven mi ano kaa ka nafunia ka tafinga mwa rainia ki ngaia. ¹⁶ God ke girara wategamu ana ka arani mwarao koro, makau fagarafe woi na Figona iana ki fafagagatanigamu rai rao isuria ana, ¹⁷ mo Kraes ki mai oga i maurifamiu rainia ka fagauguringa iamiu. Au fagarafe woi mu uraura nganganiaga maki wagawagaraga iga ka faikomanifa, ¹⁸ migamu mina arani inuni na apuna tangaa o God kai takotako matafa rainia ka faikomanifa iana o Kraes ne aqaoqao wau, qorafu wau, akau wau make wato rafaera wau. ¹⁹ Au oqanigamu namu girara nga ka faikomanifa iana o Kraes, manga ne koro tefa wau suria ne marefa nai girara fagatake ana. Hoi mina maurifamiu ke wowonusi ka taa rainigi ko God. ²⁰ - ²¹ Au fagarafe woi o Kraes Jisas mina siosi kai mamafata rainia tarai mwa ka fagaakaufia ana o God. Nga na ramwofa iana ke tatamanigia rai tanui ana tefa wau nga rainia ka taa nai nongia kee na tatakosia. Amen.

¹ Inau kau oga ina ruma ni fagaetangifa suria nau rao suria ka Arafa, hoi o God ke onigamu nikao makau nongigamu rafaera wau rai oga otooto ana iga ka agua ne arari tangara na kare iana. ² Mui fafagamwarufigamu maka mui fafaga_marapegamu mwa. Mui nanafunia ka gatagatanifa. Mui fafagaqaonga rainia ka faikomanifa iga ka tagara faku ana iamiu fairifui. ³ Mui rarapasigamu nga kamu nanaka ka Figona iana o God ki fafagafakugamu. Mu tanua ka agua kena, iga ka oga marapefa. ⁴ Igamu fato kena ki iga ka ape ne etagai mwa. Nga na Figona iana God mwa ne etagai, ke wategamu na tako gatagata ne etagai mwa rainia ka fagatafinga, a mataina ngaia God ne qani ono sikifigamu rai kare iana ia. ⁵ Igia ka nafunia ka Arafa ne etagai, a tangamworanifa ne etagai mina fagamaanu apunanifa ne etagai. ⁶ O God mwa ne etagai ke emaka igia fato na arani inuni. Ngaia togo ke arafa tangagia fato, make tatagara afainigia, make e oga afainigia fato nikao. ⁷ Kraes ke qani woto rainigi ka mafatanifa iana tangagia suria ka takofa iana mereana. ⁸ Manga na Segesegefa Apuna ne woi, “A mataina ne akau tangaa na agua ne akau aera, ngaia ke toraira fura ka ani na rakura make mafata rai ka mafatanifa tangara ka inuni.” ⁹ A mataina ne woi, “ne akau aera,” nga ne fagaararia ngai kena woi o Kraes ke qani wato fato mai noga irarona na ano kaa. ¹⁰ E kaa ke fagaararia woi ngaia ne wato mai irarona na ano kaa, ki ngaia mwa nikao ne akau irarona i Heven, maki fafagawonusia ka arani agua fato gena. ¹¹ Kraes ke ono sikifira ki tana inuni rai aposol, maurukari, ani rai tarofaini ana mwa na tarofa koro, ani rai onoono suria ana mwa na kare iana mina fagausuri. ¹² Kraes ke ono sikifira rai fagananaura ana ka kare iana tangai tagaranifa mina fagagatani ana na apena. ¹³ Raorao maki igia kai fakufaku fato iga ka tangamworanifa mina giraranifa iaka rainia ki Karena o God. Hoi maki igia ka kafu ainuni rafaga manga o Kraes ia, maka kafu qaqao manga ngaia fato nga. ¹⁴ Igia ki siana rai tanu ana mangara na kere kare ira. Siana kai nanakara ka inuni kai fafagaqekaqekagia rainigi ka fagausuringa ni qaqanganifa iata, ki manga na afe mina roga ne atani tawogia raorao mwa ia. ¹⁵ Koro mwa igia kai oqaoqa koro, ka kai tamasi mwora raorao mwa. Hoi maki igia kai rafa kai akau iga ka arani tara makai manga o Kraes na qauna na siosi. ¹⁶ Nga o Kraes ke taura faku make tanua ka arani ape faitigi gena ka tatagara menamenai wau nga, manga ne rafarafa akau make gatagata suria iga ka faikomanifa. ¹⁷ Hoi, inau nani nau arao suria na Arafa, kau naka ka tamasinga gatagata wau tangagamu, siana rai oga ana mangara na afuroto ira, a takofa iata ke atani wau mwa. ¹⁸ - ¹⁹ A mangatata ke taotao iga ka rotorotoaganifa, minga ira ka qaufau, maka marefa nai nafunia ka takofa, make marefa nai nafunia ka tafinga ne rao mai pania ko God. Ngaira gena ke marefa nai nafunia ka fataminga rainia ka taa ne koro, maka nafunia mwa ka mamaongoga ana rai tanui ana ka atani wau mwa na mwarao ne marefa ni koro. ²⁰ - ²¹ Iga na giraranifa rainia ko Kraes agua manga ngai gana ke marefa nai fagausuringainia tangagamu. I ngaia ka mworanifa rai fagarongogamu ana mina fagausurigamu ana. ²² A qani woi tangagamu woi na takofa ni qekafa iamiu gena ke fafagaerisigamu, make ararigamu mui nakai wau ka arani taufa aera iamiu gena. ²³ Naka ka Figona Apuna ki orisi ka takofa iamiu, ²⁴ maka mu tawoa ka tafinga faoru, ne rao suria na takofa iana o God. A tafinga kena ke oto wau make apuna mwora wau. Maki mwarao maka mui orisi rai ainuni faoru. Igamu kena ka tagarafigamu manga o God ia, nga ngai ke namui ogaoga otooto maka mui apuna iga ka taufa iamiu. ²⁵ Igia kaa ki gaa ka ape faku mwa. Mui fato rai fagafagaparu ana maka mui tamasi mwora mwa faitangai. ²⁶ Manga mu mangariaga, siana kamu naka ka mangariaga iamiu ki tanugamu kamu tatanui ka aerafa. Siana kamu mangariaga suria ka tangiana fagaenani. ²⁷ Siana rai mafata rainia ana ka mataina tangaa ka Ataro. ²⁸ Manga na fanagoa kigamu, mui fatofato rai fafanago ana, maka mui tatagara rafa, maka mui nanafuni ka mwarao rako rai mafata ana tangara ka inuni ne marefa ni tonga nafuninga iata. ²⁹ Siana kamu tamasi aera, maaka mui tatamasi mwa ka mwarao ne koro rai tamanira ana ka inuni. Tamasi ka woita ne araria ne tatamanira na inuni ne rongogamu. ³⁰ Siana rai tanua ana ka Figona Apuna iana o God ki fafaitakoi, suria na Figona kena ke fagaqao woi o God ke nafunigamu make fafagataraganisigamu iga ka qotona tangiana. ³¹ Mui fato rai oqa aera ana, mina mangariaga ana rai tanui ana ka agua ma ni oto. Siana rai fainafunafu ana mina tamasi aerisira ana ki tana inuni. Mui fato rai faikekesi ana ³² maaka mui korokoro maka mui fafaitakoi, maka mui tako kasi ka aerafa iata na inuni, manga o God ne tako kasi na aerafa iamiu suria mwa iga o Kraes.

¹ Ua ngaia ngai kena igamu ki karena o God ne oqanigamu, mui tanua manga ngaia ne tanui gaa. ² Mui naka ka oqa korofa tangara ka inuni, manga o Kraes ne oqa koro tangagamu, make mafata rainia mereana ana. Ngaia ke manga na mwarao ni wogasifa ne sigini koro o God ne oqania. ³ Igamu kena ka inuni i apena o God, hoi nga ngai ke siana kai wowoisigamu woi namu tanua ka agua ni oraoraga ana kamu qaoqao aera, maka mu mamamaongoga. ⁴ Siana rai tamasi ana rai ka woita ne rongo aera, kamu qekaqeka rai tamasia ana, kamu tatanui nai fagamamana ana rainigi. Hoi maka mu tatamasi mwa ka woita ni tangasifa. ⁵ Iga na mamaongoga ana, mina tanui ana na mwarao ne qao aera kee na tanui ana na aerafa, ki tana tara rai wogasira ana na mwarao purua mwa, igamu ke ararigamu namu girara woi na inuni na tatanui na mwarao manga ngai ge, ke marefa wau nai girara nafunia ana ka arafanga iana o Kraes mo God. ⁶ Siana kamu rongora ka inuni na foroforogamu rai na tamasinga iata ne topatopa. O God ke fafagaetangira ka arani inuni ne ma nai tautau woita iana maka wowoisia na woita ni qekafa gena. ⁷ Ua nga ngai ke, siana rai tanui ana ka mwarao afainira ka inuni manga ngai gena. ⁸ Igamu kamu qani oga mai inago mangara na inuni na oga iga na rotorotoaganifa ia, hoi mina mataina kaa igamu ka inuni tangaa na mawetana, suria na Arafa ke nafunigamu. Ua nga ngai ke, mui ogaoga mangara na inuni iga na mawetana, ⁹ maka mui fagaqao rainia ka mawetana iamiu. Mui korokoro, maka mui otooto maka mui wowoi mwora, ¹⁰ manga mu oqani oga koro ana i maana na Arafa. ¹¹ Siana rai tanui ana ka mwarao aera na tatanui iga na rotorotoaganifa. Hoi maka mui fafagaqao rai tangara ngatakena ne aera rainira. ¹² E qao mamaakiga nikao rai tamasi ana ka taa na tatanui punufi iga na rotorotoaganifa. ¹³ Hoi nga mwa na mawetana ke fafagaqao rainigi ka arani mwarao gaa ka onoono girara. ¹⁴ A mawetana ke fafagaqao rainigi ka arani mwarao, nga ngai ke ne woi kaa, “Mui rite, kamui afaraga panigi ka maurufa iamiu, maka mui afaraga pania ka maefa. Hoi mo Kraes ke mamawe ke totogarigamu.” ¹⁵ A ogafa namiu ki mangara na inuni na nafunia na takofa koro ira maki siana kamu mangara na qeka ira. ¹⁶ Nga na mataina ne aera wau nga ke e gaa, ke arararia mui nanafuni ka arani kere mataina gena rai tanui ana ka korofa. ¹⁷ Siana rai qeka ana, maka mui garia mwa ka taa ka Arafa ne oqanigamu namu tanua. ¹⁸ Siana rai tono ka qeka ana suria ne fafagaerisigamu, hoi maka mui fafagawonusia ka maurifamiu mwa rainia ka Figona Apuna. ¹⁹ A mataina mu fakufaku, mui kikiuri ka Sam, akiu apuna, mina tana kiu rai kasia akau ana na Arafa, afainia ka maurifamiu fato. ²⁰ Iga ka atana o Jisas Kraes na Arafa iaka, mui tangasia raorao mwa ko God Emaka rainigi ka arani mwarao. ²¹ Suria namu takotako fagafigaia ko Kraes, maka mui tautau woita fairifui. ²² A fefene namu auragi mui tautau woita iata ko wani iamiu manga no tanua tangaa na Arafa ia. ²³ Igamu na mwane namu auragi ka qauna na fefene iamiu, manga o Kraes na qauna na siosi na apena mereana. Ngaia nikao ke fagatafia ka siosi. ²⁴ Fefene namu auragi ke araria namui tautau woita iata ko wani iamiu raorao mwa, manga na siosi ne tautau woita iana o Kraes. ²⁵ A mwane namu auragi kamui kokomanira ka fefene iamiu manga o Kraes ne komania na siosi, ke mafata rainia mereana. ²⁶ Ngaia o Kraes ke fagaapunaria ka siosi rainia ka ramwofa iga na woita iana, make usuusua rainia ka wai. ²⁷ O Kraes ke tanua ka agua kaa rai nafunia ana ka siosi apuna ne qao koro, ke marefa ki tana mwarao ni qaoqao aera, kee ni togotogo, kee ni rururunguaga, ke tana agua aera. ²⁸ Iga na agua ngai ke ki ngatakena ka mwane ne auragi ne araria ne kokomania ka fefene iana manga ngaia ne komania mereana. A mwane ne komania na fefene iana ke fagaqao rainia woi ne komania mereana. ²⁹ Marefa noga ko otai ni maerongania sio mwa na apena mereana. Igia ka garia ka faioqanifa tangaa, mina ono suria ana, manga o Kraes ne taanua tangaa na siosi, ³⁰ suria igia fato ki iga apena o Kraes. ³¹ A Segesegefa Apuna ke woi, “a mwane ke arao pania ke emana me enana, make auragi, ke taotao rai ainuni ne etagai afainia ka fefene iana.” ³² Nga na apena pupunifinga rafa ngai ke, hoi makau tako matafa rainia woi ne tatamasi rainiraurua ko Kraes mina siosi. ³³ Ua nga ngai ke, na mwane ne auragi ki kokomania ka fefene iana, manga ne komania mereana, mina fefene ne auragi ki takotako fagaakaufia ko wani iana.

¹ Kere kare igamu kena ka Arafa ke nafunigamu mina mataina namu tautau woita iata enamiu me emamiu mu tatanui na mwarao ne otooto. Iga na nagonagona na faifataninga afainia na fagataupusinga, ² ke woi, “Mui takotako fagafigaira ke emamiu me enamiu, ³ maka mu nafunia ka tafinga mina wagefa ne qorafu ina ano kaa.” ⁴ Igamu emata, siana rai fagamangariagara ana ki karemiu, mui taura akau menamenai. Mui fagausurira maka mui fafagaotora rainia ka Arafa. ⁵ Igamu na inuni namu tagara purua, mui tautau woita iata ka mwane rafa iamiu. Mui fagaqao rainia ka tako fagaakaufira ana mina mwora ana tangara, manga mu tanua tangaa o Kraes. ⁶ Siana rai fagakoro maamiu ana, maaka mui tautau woita raorao mwa ina arani mataina, siana woi nga nai reregamu nga. Igamu kena ka inuni ni tagaranifa iana o Kraes, nga ngai ke mu tatanui nga ka mwarao afainia ka maurifamiu fato nga tangaa ko God, takena nga ne oqanigamu namu tatanui. ⁷ Mui tatagara afainia ka wagefa tangara ka mwane rafa iamiu, manga ngaira gena ka Arafa ia, marefa ka inuni purua mwa. ⁸ Mui gigirara na Arafa ke wawatera ka worita ka arani inuni ne tatanui ka agua ne koro, manga ngaira gena ka inuni tagaranifa purua ana mwa, kee ainuni ne taraganisira. ⁹ Ani namu nafunira na inuni ni tagaranifa purua, mui nafunia ka takofa fagafigaigamu ana fairifui afainira ka kare iamiu. Siana rai fagamaagusira ana, suria nga igamu afainira na kare iamiu gena, kamu nafunia faku ka Arafa i Heven, marefa ko otai ni ono qao aerisia. ¹⁰ Hoi rai fagafatongi ana, mui naka ka apena gatagatanifa rafa iana na Arafa ki fagagatanigamu. ¹¹ Mui nakai ka arani mwarao rai roqofigamu ana o God ne wategamu, maka mui girara rai ura pusigamu ana panigi ka arani fagafiunga iana na Ataro. ¹² Igia ke ma nai fafainafunafu afainia ka inuni. Igia ka fafainafunafu afainia ka ataro aera mina arafanga iga na rotorotoaganifa i ano kaa mina ramwofa aera ina qaiawoa kana. ¹³ Ua ngaia ngai ke, mui nakai ka arani mwarao rai roqofigamu ana o God ne wategamu, maka mui gira ura pusigamu mereamiu ana iga tangi ne aera kana. A mataina ni fainafunafu ana kena ke fatofato, maka mu gira ura nganganiaga ana. ¹⁴ Mui nanau! Mui naka ka mworafa ki manga na fogofogosimiu ia rifuia ka kaomiu maka mui naka ka otofa iana o God ki pusi ka aparagaimatamiu. ¹⁵ Hoi mui nanau rai tarofainia ana ka tarofa koro rainia na marapefa, ki manga na puti tangai na uwamiu. ¹⁶ Mui nakai nikao ka tangamworanifa iamiu ki manga na qauata pusigamu ia pania ka magee ne wawatawata iana na Ataro. ¹⁷ Mui naka ka fagatafinga ki manga na roqo rai qofia ana ka qaumiu, maka mui taua ka aora iana Figona nikao, ngaia kena ka woita iana o God. ¹⁸ Mui fafagarafe maka mui nongia o God rai tamanigamu, maka mui fafagarafe ina arani mataina iga ka ramwofa iana na Figona. Hoi, mui onoono menamenai aera maka mui fafagarafe tatarau tangara ka arani inuni na apuna tangaa o God. ¹⁹ Mui fafagarafe tangau nikao ki mwarao mako God ki wawateau ka woita rai tamasi ana, mi siana qai mamaagu mataina nau tatamasia na agua pupunufi iga na tarofa koro. ²⁰ Inau ka kasiau mai rai tanua ana ka tagarafa kaa, nga na mwarao na kasiau rainia iga na peresin kaa ngai ke. Ua nga ngai ke mui fafagarafe tangau qai nganganganiaga qai tamasi manga ngatakena ne arariau qai tamasi. ²¹ - ²² Au oqanigamu namu girara ka agua rainiau. Ngaia ngai ke nau kasia wau o Tikikas tangagamu kena. Ngaia kena ka goaka koro mina mwane ni tagaranifa ne tagara mwora tangaa na Arafa. Ngaia ke wowoisia wau ngatakena inau nau tatagara make fafagagatagata ka mangatamiu akau nikao. ²³ Au fagarafe woi o God emaka mina Arafa o Jisas Kraes ki mafata rainia ka marapefa, oqa korofa, mina tangamworanifa tangara ka arani inuni na arao suria. ²⁴ Hoi naka ko God ki koro tangara ka ani na inuni na kokomania tarai mwa na Arafa iaka o Jisas Kraes.