Kolosi

Kolosi

¹ Inau o Pol na aposol iana o Kraes Jisas ne usuiau o God. Inau mo Timoti na goaka kamuru sege wau kaa ² tangagamu na goamirua na apuna namu ogaoga i Kolosi, na mwora wau rai rao suria ana o Kraes. Au fagarafe woi o God emaka ki koro tangagamu, mwarao maka mui ogaoga iga ka marapefa. ³ Iga na mataina nami fafagarafe tangagamu, mi tatangasia raorao mwa ko God Emana na Arafa iaka o Jisas Kraes, ⁴ suria igami kami rongoa ka fagauguringa iamiu iga o Kraes mina faikomanifa iamiu tangara na inuni na apuna tangaa o God. ⁵ Igamu kamu tanua ka agua kaa ngai ke suria na mwarao namu tako nganganiaga iga kena ke taotao mwa tangagamu i Heven. Migamu kamu qani rongoa na mataina na mworana tamasinga na tarofa koro ⁶ ne taugamu. Nga na tarofa koro kaa ke rao ofu ana ka ano kaa, ne kasi guana nga nikao ngai ke, make rao mai tangagamu iga na nagonagona na tangiana namu rongoa na tamasinga mwora maka mu girara rainia na korofa iana o God kena, ⁷ namu rongoa pania ko Epafras. Nga ngaia kaa ka goamami ne tagara faku afainigami tangaa ko Kraes, mi ngaia kaa ka mwane ne tagara mwora nga tangagia. ⁸ Ngaia kaa nikao make woisigamu tangagami rainia na faikomanifa na Figona Apuna ne qani wategamu ia. ⁹ Hoi ngaia ngai ke, iga na nagonago na tangiana nami rongogamu, make marefa mi marape rai fagarafe ana tangagamu. E mwora, igami kami fafagarafe raorao mwa tangagamu rai nongia ana ko God ki fafagaregamu rai ka arani mwarao ne oqani maki wawategamu ka tako matafa ana mina giraranifa na Figona iana ne wawategamu. ¹⁰ Ua maka mui ogaoga iga ka ogafa ne oto i maana na Arafa, ki korokoro tangaa, ki mwarao maka mu fafagaqao rai ka arani agua koro maka mu gigirara menamenai wau nga ko God. ¹¹ Maka mi fafagarafe woi na apena ramwofa iana ki fafagagataganigamu kamu nganganiaga. Ki igamu kamu wawagewage rai ura nganganiagana nga. ¹² Maka mi fagarafe woi igamu kamu tatangasia ko God ne nakagamu kamu nafuni na wotowoto ne qani woisi tangara na inuni na apuna tangaa iga na arafanga ni mawetana . ¹³ Nga o God ke toraigia fura pania ka agua ne rotorotoaga make tawogia qanu iga ka arafanga iana na Kare manimani iana, ¹⁴ ne qono rainia ka aerafa iaka make fagataraganisigia. ¹⁵ Ngaia o Kraes kaa ke manga na God ne marefa nai gira rea ana kaa. Nga ngaia ke tefa nga tangai ka arani mwarao na fagaworai. ¹⁶ Arani mwarao na fagaworai ina afaafana kana mina ano kaa ka faiworafi mwa iga ki ngaia. E fagaworai ka arani mwarao na gira regi ana, mina arani mwarao ne ma nai gira regi ana, mangara na enjel mina arani mwarao na nafuni ramwofa. Arani mwarao ka fagaworai mwa iga ko Kraes, mina arani mwarao ka tagarafi tangaa ki ngaia. ¹⁷ Ngaia o Kraes ki inago nga tangai ka arani mwarao, mi ngaia ke taura faku ka arani mwarao. ¹⁸ Nga ngaia ka qauna na siosi, na apena mereana. Ngaia maka faganegana nga na afaraganifa pania na maefa, hoi ka arani mwarao gaa ke arafa tangai fato. ¹⁹ Ua o God ke oqania ka ramwofa iana mina maurifana mereana ni tao nga afainia ko Kraes. ²⁰ Mo God ke oqania ko Kraes rai fagamarape ana iga ki ngaia na nafuia ke afe na gapuna iga na taotao woro, rai nakura aporo ana ka arani mwarao ina afaafana kana mina ano kaa tangaa ko God. ²¹ Igamu kena kamu fagatauria wau nga ko God inago. A takofa iamiu ke tanugamu ke maeronganigamu maka mu taniu ka mwarao ne aera. ²² Hoi mi ngaia o Kraes ke tao rai inuni make mae, nga ngai ke o God ke toraigamu aporo mai rai oga menamenai ana afainia kena. Ngaia o God ke tanugamu kamu gira ura ana i matona kena mangara na inuni na apuna make marefa ka mwarao ni aera namu taniu i maana. ²³ Ua kamui uraura nganganiaga maki wagawagaraga ka fagauguringa iamiu. Siana kamui arao pania ka tako nganganiaganifa namu qani tawoa iga na tarofa koro namu rongoa ia. Nga na tarofa koro namu rongoa ia ka qani tarofainia tangara ka arani inuni ina ano kaa, mi inau kau tagara wau rai tarofainia ana kaa. ²⁴ Iga na ape mamasiaganifa iana o Kraes inago ke tamanigia. Hoi ina mataina kaa inau kau apeape mamasiaga rai tamania ana ka siosi nikao, na apena o Kraes, makau wagewage mwa rai ape mamasiaga ana tangagamu. ²⁵ Nga na takofa iana o God ngai ke rai tanuau ana qai tao rai kare iana tangaa ka siosi iana make kasiau rai tamasi ana ka woita iana fato nga tangagamu. ²⁶ Inago wau, ka woita iana o God kaa ke punufi wau nga panira ka arani qaunga ni inuni, hoi kina mataina kaa ka tatamasia fura tangara ka inuni na apuna tangaa o God. ²⁷ God ke tanua ka agua kaa suria ne oqanigamu na inuni marefa na Jiu rai girara ana ka komana mwarao ne punufi kaa. Hoi nga na mwarao ne punufi kaa, ko Kraes ne ogaoga iga ki igamu, maka mu tako nganganiaga woi ngaia ke totoraigamu i afaafa tangaa ko God. ²⁸ Igami kami tarofainia ka tamasinga rainia ko Kraes, maka mi fafagausuri iga ka tako matafa ana, mina fagafinarura ka arani inuni, ki mwarao makai rafarafa iga ka tangamworanifa iata iga o Kraes, makami gira tanura ana ka uraura i matona o God. ²⁹ Nga ngai ke inau kau tagara rafa wau kaa iga na apena ramwofa rafa ne wateau kaa.

¹ Au oqanigamu woi namu girara ka mwakomwoaganifa iaku tangagamu rai tamanigamu ana, mina tamanira ana na inuni i Leodisia afainira ka inuni ne mamaungara nai rereau. ² Inau kau tanua ka tagaranifa kaa, rai fagagatania ana ka takofa iamiu fato gena, mina fakugamu ana iga ka faikomanifa. Hoi ki iga na agua ngai ke, ka takofa iamiu kamu gigirara menamenai wau ka giraranifa rainia ko Kraes, o God ne tanua ke tao punufi inago ia. ³ Nga iga o Kraes ka arani mwarao koro rainia na giraranifa iana o God ne tao punufi mai inago igi. ⁴ Au tamasi wau tangagamu ka agua kaa, rainia ne marefa qai oqania ki tana inuni ni mai fafagaqekagamu rainigi ka woita mamaki iana. ⁵ Hoi ki na mataina kaa, ki inau ke marefa qai ogaoga afainigamu, mina takotakofa iaku mwa ki afainigamu ngai ke, makau wagewage wau woi igamu kamu ogaoga menamenai mina tangamworanifa iamiu ki gatagata nga iga ko Kraes. ⁶ Igamu kamu qani tawoa noga ko Kraes Jisas manga na Arafa iamiu ia. Nga ngai ke mui fakufaku afainia. ⁷ Igamu kamui fakufaku menamenai afainia ko Kraes manga na apenagai ne wagawagaraga ia, kee na ruma na akea iga na mwako nganganiaga ia. Mui nganganiaga iga ka tangamworanifa iamiu, manga na qani fagausurigamu ia, maka mui tamasi tangasi tangaa ko God raorao mwa. ⁸ Mi igamu kamu onoono menamenai wau, siana ki tana inuni ni mai fafagaqekagamu rai na tamasinga purua iana, na takofa mwa iana na inuni. A tamasinga ngai ge ke marefa ni rao mai pania ko Kraes, make rao mai panira mwa ka inuni mina arani ataro iga na ano kaa. ⁹ Hoi mu girara ko Kraes ne tonga apena manga igia na inuni, mi ngaia ke manga o God ia. ¹⁰ Nga o Kraes ke akau tefarira ka arani enjel mina arani ataro rao, mi ngaia ke qani wategamu na tafinga mwora tangagamu na inuni namu faku afainia. ¹¹ Hoi, ngaia ke qani fara fagagiraragamu, maake marefa ka fara fagagirara ana rainia na apemiu. Nga ngaia o Kraes ke tawora panigamu na taufa aera iamiu rai fara fagagiraragamu ana. ¹² Ua igamu namu maanu apuna, ke manga na qani afunigamu ia afainia ko Kraes. Hoi maka mu afaraga afainia iga ka tafinga suria na fagauguringa iamiu iga na ramwofa iana o God ne ragaia o Kraes pania na maefa. ¹³ Inago wau ki igamu kamu manga na inuni na qani mae ira, suria na aerafa iamiu mina taufa aera iamiu ne mangara na afuroto. Hoi nga o God ke fagatafigamu afainia ko Kraes, make qono rai ka aerafa iaka. ¹⁴ O God ke fagafatongi wau nga ka arani mwarao iga na Lo iana o Mosis ne fagaqao woi igia ka aera. Ngaia ke tawora nga panigia, iga na mataina o Kraes ne mae iga na taotao woro. ¹⁵ Nga ngai kana ko Kraes ke puu qau wato rainigi ka arani ataro mina mwane rafa iga na apanana iana o Satan, make tawora panira ka ramwofa iata rai fagamaakira ana i matota na arani inuni. ¹⁶ Siana kamu rongora ka ani mwa na inuni na totogirigamu rai na mwarao mu ngaura, kee mu totono. Siana rai rongora ana woi mu tautau suri ka tangina rafa, na farunga ni fagaifa faoru, kee na Sabbat. ¹⁷ Arani mwarao ngai ge ka nununi mwa na mwarao. Hoi mi ngaia o Kraes ka mworana. ¹⁸ Siana ka fafagaqekaqekagamu ka inuni na wowoi na fagamwarufira maka wowoi na wogasira ka enjel. Ngaira gena ka qeka. Ngaira gena ka qaqaqaeaga rainigi ka takofa purua iata, maka tatamasi mwa ka maurutanga na regi. ¹⁹ Ngaira gena ka afoka pania ko Kraes. Nga o Kraes ka qauna fato nga na siosi, na apena. Ngaia ke mafata rainia na nganganiaganifa tangaa na apena, make taura faku fato ka ratoni na apena mina warogini. Iga na agua ngai ke ka apena o Kraes ke rafa ke akau menamenai manga o God ne oqania. ²⁰ Suria igamu kamu manga mu qani mae afainia ko Kraes, a ramwofa iata na ataro ke ma ni nafuni ramwofa tefarigamu. Hoi ki siana kamu arao surira ka ataro mina rao suri ana ka agua manga gaa, ²¹ “Siana kamu fafatatagia ka mwarao kaa! Siana kamu ngaura! Siana kamu taura!” ²² A mwarao ngai ge ka lo rainigi na ngaufa na ngaura rao mwa make fatofato. Mina lo gaa ka fagausuringa iata na inuni mwa. ²³ E mwora ngaia. Tana inuni ka takosi ka agua gaa ke koro mwa, mina inuni ngai ge ka wowogasi mwa iga ka taufa iata mereata. Maka wowoi na fagamwarufira mereata maka mamarumu rai ape mamasiaga ana, hoi maka agua ngai ge ke ma ni gira tamanira ana. Ngaira ka arao suri mwa ka taufa aera ne oqani na apeta.

¹ Igamu kamu qani tafi aporo afainia ko Kraes. Hoi, mui nakai ka maurifamiu tangai ka mwarao i afaafa i Heven, na agua ne oga iga o Kraes i rimana i otona o God. ² Mui nakai ka takotakofa iamiu tangai ka mwarao i afaafa, siana rai takosi ana ka mwarao ina ano kaa, ³ suria igamu kena ke manga namu mae ia, ka tafingamiu ke tanu manga ne tao punufi afainia ko Kraes, iga ko God. ⁴ A tafinga mwora iamiu ke rao mai pania ko Kraes, hoi ka mataina ne totoranga mai, igamu maka mu uraura mawe afainia iga ka rarafana ramwofa iana. ⁵ Hoi mui kasigi wau ka qani taufa aera iamiu, na taufa iata na inuni ina ano kaa. Ngaira ka tatanui ka agua ni oraoraga ana, mina arani agua ne qao aera, mina wanasira ana na inuni. Maka tatakosi raorao mwa ka aerafa, maka mamaongoga, nga ne manga na wowogasira na nunuta na mwarao ira ngai gena. ⁶ Hoi ka agua manga ngai ge ko God ke tanua ke mangariaga tangara ka inuni ne marefa nai tautau woita iana. ⁷ Nga ngai gi na mwarao namu tataniu inago ngai ge, mina taufananamiu make manga ngai ge. ⁸ Ua ki na mataina kaa, igamu kamui kasikasi wau nga ka agua gaa panigamu. Siana rai mangariaga ana, faimaerongai ana, mina mamaramwanega ana. Siana rai tamasi aerisira ana ka inuni, kee na fagamiamira ana. ⁹ Siana rai qaqangagamu ana faitangai, suria na qani taufa gena kamu fato noga panigi. Hoi ki siana rai tatanui ana ka agua aera gena. ¹⁰ Igamu kamu nafunia noga ka taufa faoru, mo God ne tanua ka taufa faoru gena ne akau mai, ke tanugamu kamu gigirara menamenai wau nga ki ngaia maka mu akau mai manga ngaia ia. ¹¹ O Kraes ki maurifata fato na arani inuni na tangamworani, fenakara woi ngaira gena ka Jiu kee na inuni marefa na Jiu, kee manga ngaira gena ka fara fagagirara kee ne marefa. Manga ngaira gena ke ma nai sukuru menamenai kee na maramara ai toro, kee na inuni ne tatagara purua mwa, kee na inuni ne taraganisira, ngaia o Kraes ke tefa wau nga rainira. ¹² God ke oqa koro tangagamu fato make qani usuigamu mangara na kare iana mereana, namu apuna tangaa. Ua kamui fafaitakoi, mui korokoro, mui fafagamwarufigamu, mui maramarapeaga maka mui fagamaeape mwa. ¹³ Mui korokoro tangara ka inuni faitangai maake rao ka ani ne tanua na aerafa tangara ka inuni ke araria mu qono rai rao mwa. Arafa ke qani qono rai ka aerafa iamiu hoi ki igamu maka mui qoqono rai ka aerafa iamiu faitangai. ¹⁴ Nga na faikomanifa ke araria namu taua afainigi ka taufa koro gaa, suria nga na faikomanifa ke taura faku ka arani mwarao koro menamenai wau nga. ¹⁵ Mui toraia nga ko Kraes ki tefa i maurifamiu, rai tanugamu ana kamu ogaoga iga ka marapefa, suria o God ke usuigamu rai oga faku ana manga na ape ne etagai ia, maka mui tatangasia raorao mwa. ¹⁶ Mui nakai ka tamasinga rainia ko Kraes gaa ki fagawonusi ka maurifamiu fato nga, maka mui gira fagausurigamu ana mina fagaotogamu ana faitangai afainia ka tako matafa ana. Mui kikiuri ka Sam, mina kiu ni fagarafenga, mina kiu na Figona Apuna ne wategamu maka mui tatangasia ko God iga ka maurifamiu. ¹⁷ Mui takotako fagafigaia ka atana na Arafa o Jisas iga ka arani woita namu tatamasi, mina arani mwarao namu tatanui, hoi maka mui tatangasia ko God Emaka rainia ki ngaia nikao. ¹⁸ Igamu na fefene namu auragi, ke ararigamu namu arao surira ka inuni iamiu na mwane, suria namu faku afainia ka Arafa. ¹⁹ Igamu na mwane namu auragi, ke ararigamu namu oqaoqa koro tangara ka inuni iamiu na fefene, maki siana kamui tamasi aerisira. ²⁰ Igamu na kere kare, kamui tautau woita iata ke emamiu me enamiu, suria na Arafa ke koro tangaa ka agua ngai ke. ²¹ Igamu emata na kere kare, siana kamui fafagamangarira ki karemiu, maka mu fafagaera mangatata. ²² Igamu na inuni namu tatagara purua mwa, mui tautau woita iata ka mwane rafa iamiu ina ano kaa. Hoi ina mataina na qoqoretainigamu, mi tana fitangimiu kamu fafagakoro maata rai tagara ana, make ma ni araria namu tau tanu manga kana. Mui tatagara afainia ka maurifamiu fagaenani tangara ka mwane rafa iamiu suria namu takotako fagafigaia ka Arafa. ²³ Mui tatagarafi ka tagaranifa iamiu iga ka marumufa, manga mu tatagara tangaa na Arafa mereana ia, marefa woi na mwane rafa iamu ina ano kaa mwa. ²⁴ E mwora wau, nga na Arafa o Kraes kamu tatagara tangaa kena, maka mu girara woi igamu kamu pagai tawora ka roguni na tagarafa iamiu, woi ne qani woisia ne wawatera na kare iana. ²⁵ Hoi ko otai ne tanua na agua aera, ka Arafa ke oriorisia aporo ka aerafa ne tanua kena. Ngaia ke ma ni gira ono tagapasi ana rainia ka inuni.

¹ Igamu na mwane rafa namu fafagatagara, mui onoono suria menamenai ka kare iamu iga na tarana ne oto, suria namu girara igamu kena maka mu nafunia ka mwane rafa nikao i Heven. ² Siana nga kamui marape rai fagarafe ana. A mataina namu fafagarafe, mui onoono menamenai maka mui tatangasia ko God. ³ Mui fafagarafe rai tamanigami ana nikao, ko God ki fafagamwatakugami rai tarofainia ana ka woita iana, mina fakania ana ka taufa rainia ko Kraes ne qani tao punufi mai. Inau kau qani fagaqao mai noga rainigi ka taufa gana, nga ngai ke inau kau ogaoga ina peresin kaa. ⁴ Mui fafagarafe mai tangau qai tatamasia ka tamasinga kaa taragani tangara ka inuni, suria nga na mwarao ne araria nau tanua ngai ke. ⁵ A mataina igamu afainira na inuni ma nai tangamworani, mui takotakosia nga na mataina koro nga rai mera tamasi ana ngai kana. ⁶ Mui tamasi tangara nga iga ka korofa, ki mwarao makai oqani rongora ana ka woita iamiu, maka mui gigirara menamenai nga rai aramira ana ka fagatenga iata. ⁷ Nga o Tikikas ka goaka koro ne tagara mwora nga ne tagara tangaa na Arafa afainigami, mi ngaia ke tatamasiau tangagamu. ⁸ Au kasia wau rai tamasigami ana ki fagagatanigamu. ⁹ Ngaia o Onesimas na goamiu ne wora kena ia ke takua mai. Ngaia ka goamami koro na fagauguri koro rainia. Ngairaurua karu wau tatamasi ka arani mwarao nami tatanui gaa. ¹⁰ O Aristakas ka kasia ina peresin afainiau kaa, ngaia ke kasia wau na tamasinga koro iana tangagamu kaa, mo Mak nikao na goana rao o Banabas. Rao ko Mak ke arao wau tangagamu, maka mu kakanasia, manga nau qani woisia tangagamu ia. ¹¹ O Josua na onia rainia ko Jastas, make kasia mai ka tamasinga koro iana. Ngaira na mwane gaa ka Jiu mwa ne eoru na tatagara afainiau tangaa na arafanga iana o God. Nga ngaira gaa ka fafagakoro mangataku wau nga. ¹² O Epafras na goamiu ne wora kena ia, na kare iana o Kraes Jisas make kasi tamasinga wau tangagamu kaa. Ngaia kaa make fafagarafe raorao mwa tangagamu wau kena, kamu nganganiaga ana iga ka tangamworanifa iamiu, kamu gigirara menamenai ka faioqanifa iana o God gena. ¹³ Inau kau woi tangagamu woi o Epafras ke tagara rafa wau rai tamanigamu ana mina tamanira ana ka inuni i Laodisia mi Helapolis. ¹⁴ A goaka koro o Luk na dokta make kasia ka tamasinga koro iana tangagamu, mo Dimas nikao. ¹⁵ Mui mamafata rainia ka tamasinga koro iaku gaa tangara ka inuni na arao suria na Arafa i Laodisia, mi tangaa wau ka Nimfa mina inuni na arao suria na Arafa na fakufaku rai fagarafe ana ina ruma iana. ¹⁶ Imurina namu totomania na leta kaa fato, maka mui kasia tangaa ka siosi i Laodisia rai tomania ana, maka mui totomania nikao ka leta nau kasia rao tangara. ¹⁷ Mui fafagatakosia ko Akipas ki tanua ka tagaranifa na Arafa ne qani watea ke tatagarafia kena. ¹⁸ Nga inau o Pol mereaku kau segera na tamasinga koro gaa. Siana rai qono rainiau ana, inau kaa ki na peresin ngai ke. A korofa iana o God ki afainigamu.