2 Timoti

¹ Inau o Pol ke kasiau mai ko God tangai tagara ana tangaa ko Kraes Jisas rai rao suri ana ka takofa iana. Mo God ke woisia tangagia ka mworanifa woi na arani inuni na fakufaku afainia ko Kraes Jisas ka pagai tafitafi tarai nga. ² Timoti, igo kena ke manga i kareku koro ia. Au fagarafe woi o God emaka mina Arafa iaka Kraes Jisas ki koro tangago, maki faitakoi tangago, mwarao makui ogaoga iga ka marapefa. ³ Au wawagewage tangaa ko God nau tatagara tangaa afainia ka takofa ne taragani, mangara na iuraku na tanua inago ira. Iga na qongiana mina tangiana kau tatakosigo raorao mwa iga ka fagarafenga iaku. ⁴ Au takosia ka ainangita iamu, makau oqani wau rego ana suria ne tanuau kau wagewage mwora wau nga. ⁵ Au tatakosia raorao mwa ka romana na fagauguringa iana iuramu ka Lois inago ia, mina fagauguringa iana enamu ka Iunis, hoi inau kau girara woi igo nikao mako nafunia. ⁶ Ina mataina nau tau qofigo, o God ke watego ka mafatanifa. Hoi ki nga ngai ke nau nongigo rai rapasia ana kui tatagara nga rainia kaa. ⁷ A figona iana o God ke marefa ni tanugia kai mamaagu. Nga na Figona kana ke wategia ka ramwofa, make tatamanigia ka fafaikomani, make tatamanigia ka tautau surigia otooto mereaka. ⁸ Ui tatamasia nga ka Arafa iaka make siana rai maaki ana. Inau ka kasiau ina peresin, suria nau tagara tangaa ka Arafa, maaki siana ko maakitainiau. Nakagaurua karu ape mamasiaga suria naru tatarofainia ka tarofa koro iga ka ramwofa iana o God. ⁹ God ke fagatafigia make usuigia rai kare iana rai apuna ana. Fagaenagona ki igia ke marefa wau ka agua koro nai tanua tangaa, Nga mwa o God ke takosi rai fagatafigia ana, Suria ngaia ke koro wau tangagia. Hoi ki inago wau nga mo God ke qani takosia tangaa ko Kraes Jisas rai fagaqao ana rainia ka korofa tangagia. ¹⁰ Hoi mina mataina kaa, ke fagaqao tangagia ka korofa iana, rainia ne kasi mai ko Kraes Jisas na fagatafi iaka. Mo Jisas ke fagafatongia noga ka ramwofa iana na maefa, make fagaqao tangagia iga na tarofa koro ki ngatakena nai tawoa ka tafinga fuu. ¹¹ A tagaranifa iaku tangai mwane ni tamasia ana ka tarofa koro kaa, mina aposol mina fagausuri tangara na inuni. ¹² Nga ngai ke nau apeape mamasiaga kaa. Hoi make marefa qai mamaaki! Au girara ko otai nau tangamworani rainia makau fafagauguria nikao rainia ka maurifaku. Au girara woi ngaia ke onoono suriau raorao make taua ka tangiana ni fagaetangifa. ¹³ Hoi kui fafagausuri suriau takena nga nau fafagausuri, maku nakai ka fagauguringa mina oqa korofa iana o Kraes Jisas rai fagaararinga tangago. ¹⁴ Ui onoono suria menamenai ka fagausuringa iga na tarofa koro ne watego o God, onoono suria iga ka faitamaninga iana na Figona Apuna ne ogaoga afainigia kaa. ¹⁵ O girara ko Faegelus mo Hemogenes mi tana fitangita na inuni ina provins i Esia ka mwarao ni tangainiau wau ngaira. ¹⁶ - ¹⁷ Au fagarafe woi na Arafa ki koro tangaa ko Onesiforus mina arani inuni i ruma iana. Ngaia ke arao mai i Rom, make gari tangau raorao make kafu rogoiau. Make fafagakoro mangataku raorao mwa make marefa ni mamaakitainiau ina peresin. ¹⁸ Igo ko girara ngatakena ne tatamaniau raorao mwa i Efesas ia. Hoi kau fagarafe woi na Arafa ki fagaqao rainia ka faitakoifa tangaa ki ngaia iga ka tangiana ni fagagetangifa kana.

¹ Timoti, kareku, ui nakaa ka korofa iana o Kraes Jisas ki fafagagatanigo. ² Igo ko rongoau raorao mwa nau fafagausuri i matonga ni ainuni ne rako, ua ki na mataina kaa kau oqanigo no wowoi tangara rai ka mwarao gaa tangara ka inuni no fagaugurira na gira tamasi ana tangara ki tana inuni. ³ Rai tao ana rai mwane koro ni fainafunafu ana iana o Kraes Jisas, ki igo kui fifinasugo rai gatagata ana afainigami iga ka ape mamasiaga ana nikao. ⁴ A mwane ni fainafunafu ana ke marefa ni atani wau mwa ina tagaranifa. Ngaira ka oqani fagakoro mangatata ana ka mwane rafa iata. ⁵ Ngatakena nikao e asa mwa ko otai ni gira tari ka tefa ana iga na taritari ana manga ne marefa ni tautau suri ka tamasinga rai rao suri ana. ⁶ A mwane ne tatagara iga na mwou ki ngaia ka mwane ne ngaua inago na mwarao ne fasia iga na mwou kena. ⁷ Rao ko tatakosi ka agua nau tamasi tangago gaa, Arafa ke tatamanigo rai tako matafa ana menamenai nga. ⁸ Naka mwa ka takofa iamu iga ko Jisas Kraes! Ngaia kana ki iga ka woraworanifa iana o Deved, make afaraga pania ka maefa. A tamasinga kena ka tarofa koro nau gira tamasi ana, ⁹ hoi ki ngaia ngai ke inau ka purupusiau ina peresin maka mamaragasiau mangara na aoraora ira. Ua nga mwa na tarofa koro iana o God ke marefa nai purupusia ina peresin. ¹⁰ Mi inau kau marumu mwa rai taua ana ka taa mwa ne worawora tangau rai tamanira ana ka kare iana o God ne usuira kai tafitafi iga ko Kraes Jisas makai ogaoga tarai i Heven. ¹¹ Ua ka mworana na tamasinga ke kaa, Rao ki igia ka mae afainia ko Kraes, migia ka pagai tafitafi afainia. ¹² Rao ki igia ka ferefere nganganiaga rainia ka tangamworanifa iaka, igia maka onoono suri afainia iga ka arafanga iana. Rao ki igia ka fafagarigia, ki ngaia nikao make fafagarigigia. ¹³ Rao ki igia ke marefa nai mworamwora tangaa, mi ngaia ke mworamwora maunga tangagia, suria o Kraes ke marefa ni gira fagarigia ana mereana. ¹⁴ Ui fafagatakosira rai ka agua gaa. Ui tamasi rafaera wau nga tangara kui wowoi, woi o God ke rerera mai ki siana kai fafaitogiri rai ka woita mwa. Nga na faitogiri ana gena ke marefa ni gira tamanira ana, make kafu fafagaerisira wau nga ka inuni na rongora gena. ¹⁵ Ui ofongia kui tatagara menamenai, ki oqaoqanigo ko God. Ui fafagausuri nga menamenai ka woita iana mwora o God gaa, siana kui mamaaki rai. ¹⁶ Ui rao panigi ka tamasinga ne marefa ni koro maki oto, ne totoraira mwa ka inuni ka fafagatauria o God gaa. ¹⁷ Nga na tamasinga gena ke manga na agaru ia. Nga o Haemenaesas mo Filetus karu tamasi manga ngai ke raorao mwa, ¹⁸ makaru fagatau wau pania ka mworafa. Ka fagaerisi ka tangamworanifa iata tana inuni iga ka fagausuringa woi na inuni ka afaraga aporo fato noga pania ka maefa. ¹⁹ Hoi ka fau ogaoga o God ne qani nakaa ke nganganiaga wau. Iga ka segesegefa manga kaa, “Arafa ke girara ko otai na kare iana. Hoi ka inuni ne wowogasia na Arafa ka ririri nga panigi ka aerafa.” ²⁰ Iga na arani ruma rafa gena, ki tana apira ka tagarafi rainigi ka gol kee na mwarao ne oraora na woisi rai na silfa, mina mwarao gaa ki tani ka manimanira wau. Iga na ruma gena nikao ka garao mina penapena ne marefa ni oqani manimanira ana ke taotao iga gena. ²¹ Hoi ki ngatakena nga na inuni ngai ge. Ainuni ne marefa nai tatanui na aerafa ka gira fagaapunarira ana mereata maka manimanira mereata tangai mwa ka agua koro. A maurifata ke qaqao koro i maana na Arafa iata, maka gira tanui ana tangaa ka arani agua koro. ²² Ui gawa panigi ka faiofongifa ne taura raorao mwa na inuni faoru. Ui fakufaku afainira ka inuni ne taragani na mangatata na wowogasia na Arafa ira, makui tatanui raorao mwa ka agua ni otooto, makui fafagauguria raorao mwa ko God. Ui kokomanira ki tana inuni makui nanafunia ka marapefa. ²³ Ui rao panigi ka atani wau mwa na faitogiri mara qeka ana suria ne gira toraigo ana tangaa ka aerafa. ²⁴ Ainuni na tatagara tangaa na Arafa ke marefa nai gira faitogiri ana. Ngaira gena kai korokoro tangara ka arani inuni, maki gira fagausuri ana, maki marape mwa. ²⁵ Ui fafagamwarufigo ina mataina no fafagaotora na inuni na togirigo. Nga mwa wari o God ke gira ririra ana ka inuni gena nai girara ana ka mworanifa, ²⁶ makai takotako matafa kai gawagawa pania ka tou iana o Satan. Hoi mina mataina kaa ko Satan ke taura nganganiaga wau nga ka tatanui mwa ka faioqanifa iana.

¹ Ui gigirara, inagona na tangiana ni fagaetangifa ke qaraqara wau nga ka ogafanata na inuni. ² Ainuni ka tatakosira mwa mereata maka takosi rurugua mwa. Ngaira gena ka qaqaqaeaga wau maka kasikasira akau mereata, tamasi aerisira ka inuni, marefa nai tautau woita iata ke enata me emata, marefa nai tatangasia ko God, make marefa nai gira rao suri ana ka taufa iana na Arafa. ³ Marefa nai fafaikomani, faimaerongai mwa. A woita iata ke marefa ni koro, marefa nai gira tau surira ana mereata, kee nai fafaitakoi. Ainuni gaa ke ma nai oqania ka arani agua ne koro. ⁴ Ngaira ka fafagakoro maani inuni, marefa nai girara ono suri mwarao ana, maka kasikasira akau mereata. Marefa nai girara oqa koro ana tangaa ko God maka oqaoqa koro tangai ka mwarao tangai na apeta mereata. ⁵ Ngaira gena maka fafagaqao woi na inuni na arao suria na Arafa, maake marefa nai marumu tangaa ka ramwofa iana o God ki orisi ka ogafanata gena. Siana rai tanui ana ka mwarao afainira ka inuni manga ngai ge. ⁶ Tana mwane ka fafagaqekaqekara ka inuni rai qanu ana i ruma iata tangai ura tefarira ana ka fefene ne mwarumwarusiga na takofa iata gena. Ngaira na fefene ne rakosira ka aerafa iata make tanui ka takofa iata rai ka atani wau mwa na takotakofa, ⁷ maka oqani nai gigirara ka mwarao faoru maake marefa nai gira rogoi ana ka mwarao ni mwora. ⁸ Hoi ka mwane gaa ka mangara o Janis mo Jampris naru ngaroitainia ko Mosis ia, maka maerongania ka mworafa. A takofa iata ke matoro, mina fagauguringa iata ke marefa ni mwora. ⁹ Hoi make marefa nai gira guru fagatau ana rainia ka qekafa iata. Suguia mwa ka arani inuni nai gigirara ka taa rainira, mangara o Janis mo Jampris na rogoira ira. ¹⁰ Timoti, o girara ka taa nau fagausurigo rai mi ngatakena nau ogaoga ia. O girara ka mwarao nau oqani tanui ana mina fagauguringa iaku iga na Arafa. Igo ko regi ngatakena nau nafunia na marapefa mina faikomanifa mi ngatakena nau nganganiaga mwa rainigi ina mataina ne fato igi. ¹¹ Arani fafara ana mina arani mwarao na tanuau rai kau ape mamasiaga iga na finua rafa i Antiok, Aekoniam mi Listra mina Arafa ke fagatafiau panigi ka arani mwarao gana. ¹² Aa ka inuni na oqani rao suria ana na taufa iana o God mina faku afainia ko Kraes Jisas ka tautau fagaqao maata. ¹³ Hoi mina inuni na aera mina mwane na fafagausuri qaqanga ana, ka aera ka aerataga wau nga, na fafagaqekaqekara ki tana inuni mi ngaira ke fafagaqekara ko Satan. ¹⁴ Ui mworamwora tangai ka fagausuringa na tamasi tangago mi tangai ka mwarao no raronimwora rainigi, suria no girara ko otai ne fagausurigo rai. ¹⁵ A mataina no sisitai, ka fagausurigo rai girara ana ka Segesegefa Apuna ne gira mafata rainia ana ka tako matafa ana rai fagauguria ana ko Kraes Jisas ne fagatafigo. ¹⁶ Arani mwarao iga na Segesegefa Apuna ka woita iana o God, ngai gi gaa ke koro fato tangai fagausuri ana ka mworafa, mina tamanigia ana rai ono girara ana ka aerafa iaka, mina fagausurigia ana rai tanui ana ka mwarao ne oto. ¹⁷ Nga na Segesegefa Apuna ke fafagananaura menamenai ka kare iana o God rai tanui ana ka arani tagaranifa koro.

¹ A mataina o Kraes Jisas ne arao mai manga na arafa ni finua, ngaia ke fafagagetara ka arani inuni, ani na tafitafi mina ani na mae fato noga. Hoi ko God mo Kraes karu girarau, nga ngai ke inau nau mimigo tamasi kaa, ² ui tatamasia nga ka woita iana o God, manga na inuni ka oqania, kee ne marefa. Ui fafagaotora ka inuni maku usui ka aerafa iata. Hoi makui fafagagatagata mangatata ina mataina no fafagausurira, makui marape mwa. ³ E pagai arao mai ka mataina na inuni ke marefa nai oqani rongora ana ka fagausuringa koro. Nga mwa na onoono tangara ka mwane ni fagausuringa na koro tangara rai tamasi ana ka mwarao na oqani wau nai rongora ana. ⁴ Ngaira ka riri panigi ka mworafa maka oqania mwa rai rongora ana ka tamatamasinga ne ma ni mwora. ⁵ Hoi kui marape mwa maku mamarumu rai ape mamasiaga ana. Ui tatagara ramworamwoga rai tamasia ana ka tarofa koro makui tatanui ka tagarafa iamu menamenai. ⁶ E kaa ka mataina noga tangau rai maefa ke arao mai kana. A maurifaku ke manga na tonofa na mafata rainia rai riringia ana ina raperape. ⁷ Inau kau rapasia rai tari ana nga menamenai makau fagafatongia noga ka tarifa kena. Au fafagauguria raorao mwa ka Arafa. ⁸ Ua ka mwarao rai roqofia ana na qauna, a worina na inuni ne oto, ke taotao noga tangau. Iga na tangiana ni fagagetanifa kana, ki ngaia na Arafa ne fafagagarara menamenai, ke wawateau ka mwarao ngai ke. Mi ngaia ke marefa ni tanua tangau mwa, maaki tangara ka arani inuni nikao na oqania ki ngaia ni aporo mai. ⁹ Ui rarapasia kui arao mai mafarufaru, ¹⁰ suria o Dimas ke tongai suri wau ka mwarao ina ano kaa ngai gi make rao paniau tangaa ki Tesalonaeka. Mo Kresens make rao tangaa ki Galesia, mo Taetas ke rao noga tangaa ki Dalmesia. ¹¹ Nga mwa o Luk ke ogaoga afainiau kaa. O Mak make faitamani rafa wau ina tagaranifa iaku, hoi kui rorogoia makui totoraia mai afainigo. ¹² O Titikas kau kasia noga ke rao i Efesas. ¹³ Ua a mataina no arao mai, mako totoraia mai ka gafu nau naka wau afainia ko Kapas i Troas, mina puka iaku, tefa nga ka puka na tagarafi rainia na gawona na sip ia. ¹⁴ Aleksanda ne tatagarafi na apapagani na aeani ia ke tanui wau ka arani agua ne marefa ni koro tangau. Hoi nga mwa na Arafa ke oriorisi aporo tangaa rainigi ka taa ne tanui gena. ¹⁵ Nga o wani kaa, ke ura pusi na mwarao mi tamasi igi, hoi kui rerea ko wani ngai kena. ¹⁶ Ina mataina na fagakotiau inago ia, ke marefa wau ko otai ni tamaniau. E mwora na arani inuni ka mwaraoni tangainiau. Hoi kau tako gatagata marefa ka taa nai tanura rainira. ¹⁷ Nga mwa na Arafa ke ura afainiau. Ngaia ke wateau ka nganganiaganifa rai tamasia ana fato nga ka tamasinga iana, ka inuni ne marefa na Jiu kai gira rongoa ana. Make tamaniau ke marefa nai gira rigoiau ana. ¹⁸ Arafa ke fafagatafiau panigi ka arani aerafa, make totoriau menamenai irarona na arafanga iana i Heven. Ai fafagaakausia ki ngaia taraitarai mwa! Amen. ¹⁹ Ui mafata rainia ka tamasinga koro iaku kaa tangaa ka Prisila mo Akuila mo Onesiforus mina arani inuni i ruma iana. ²⁰ Erastus ke oga wau i Korint. Mo Trofimus ke matoro, makau rao mai pania i Maelitas. ²¹ Ui rarapasia kui arao mai nga maki kafu taua ka mataina iga na tangi aera kana. O Iubiulas, mo Piudens, mo Laenas mika Klodia ka kasigi wau na tamasinga iata gaa, afainira fato ka arani kare iana na Arafa gaa. ²² Inau kau fagarafe woi na Arafa ki kokoa afainigo, maki korokoro tangago.