2 Tesalonaeka

¹ O Saelasi, mo Timoti mi inau o Pol, kami sege wau tangagamu kaa, na inuni ina siosi i Tesalonaeka. Igamu na inuni ne nafunigamu o God Emaka, mo Jisas Kraes na Arafa iaka, ² igami kami fagarafe woi o God emaka mina Arafa o Jisas Kraes ki koro tangagamu, mwarao maka mui ogaoga iga ka marapefa. ³ A goaku, arani mataina raorao mwa igami kami nafunia ka mwarao koro rai tangasia ana ko God rainigamu, suria na raronimworanifa iamiu iga God, mina faikomanifa iamiu tangagamu faitangai ki guru mwa ki qau ki akau mai. ⁴ Ngaia ngai ke, igami nami tamasi ageage aera wau rainigamu tangara na siosi iana o God gena, woi igamu kamu maramarapeaga aera wau nga, maka mu tatangamworani nganganiaga nga. Fenaka manga woi igamu ka fafagamamasiaga apemiu, mi igamu kamu uraura nganganiaga iga ka tangamworanifa iamiu. ⁵ A mwarao fato ngai ge ke fagaqao rainia woi God ke fafagageta menamenai aera wau ka inuni. Igamu kamu oqania ko God rai arafa ana tangagamu, ngaia ngai ke namu ape mamasiaga ina mataina kaa. Hoi ke fagaqao rainia ka ogafanamiu namu arari rai oga afainia ana ina arafanga iana. ⁶ O God ke pagai tanua ka agua ne oto, ngaia ke pagai fafagaetangira ka inuni na fafagamamasiaga apemiu. ⁷ - ⁸ Ngaia ke pagai fafagafatongi ka fafaranifa gena panigamu, migami nikao. Ngaia ke pagai tanua nikao ka agua ngai ke, ina mataina na Arafa o Jisas Kraes ne arao mai pania i Heven iga ka watawatana na giu, afainira ka enjel na ramwo tefa wau. Make pagai arao mai, ke fafagaetangira ka inuni ne marefa nai girara o God, make marefa nai taua na tarofa koro rainia na Arafa o Jisas Kraes. ⁹ God ke kakamarira wau nga iga ka fagaetangifa, make kasira fura fagaetagai nga pania ki ngaia mina ramwofanana. ¹⁰ Mwarao fato ngai ge ke pagai worawora mai iga ka tangiana ngai kana, iga ka mataina na Arafa ne aporo mai, mina kare iana fato ka fafagaakausia, rai tako fagafigaia ana. Igamu nikao, suria namu qani tangamworani rainigi ka mwarao mi qani tarofainigi tangagamu igi. ¹¹ O God iaka ke ono sikifiagamu, hoi mi igami kami fafagarafe woi o God ki fafagakorogamu, woi igamu kamu araria rai tagara ana tangaa. Igami kami fafagarafe nikao woi o God ki tatamanigamu rainia ka ramwofa iana, kamui tatanui ka arani mwarao koro namu oqani, suria igamu kamu tangamworani rainia. ¹² Hoi, maki suria o God mina Arafa iaka o Jisas Kraes naru koro tefa wau tangagamu, igamu kamu pagai fagaakausia ka atana na Arafa iaka o Jisas, mi ngaia nikao ke pagai fagaakausia ka atamiu.

¹ Hoi, inau kau oqani tamasia ana wau ka Arafa iaka o Jisas Kraes ne pagai aporo mai, make fakugia woi igia kai ogaoga faku afainia. Hoi a goaku, inau kau nongigamu wau nga, ² siana kamu fafagatata rai qagatatako ana, kee namu anumwanumwa rainia ki tana inuni na wowoi, woi ne qani rao mai noga ka tangiana ne aporo mai iga na Arafa. Wari tana inuni ka woisia ka agua ngai ke, woi na rongoa nga pania ka Figona Apuna, kee tana inuni wari ka woi, woi igami kami woisia ka agua ngai ke iga ki tana leta nami segea. ³ Siana nga kamu arao suria ki tana inuni ne fafagaqekaqekagamu! Inago mai, ka inuni rako wau ka totora getera pania ko God, make kafu arao mai ka “Mwane ne Tofea na Lo.” Hoi mi muri mai nikao make mataro mai ka tangiana ne aporo mai igaa na Arafa. Mo God ke pagai kasia rao ina Hel nga ka mwane ngai ke. ⁴ Hoi o wani ngai ke ke pagai kasikasia akau mereana, make tamasi aerisira ka arani ataro, kee na mwarao na inuni na wowogasira. Ngaia ke pagai qauqanu i ruma apuna iana o God, make wowoi, woi ngaia ko God! ⁵ Hoi, mu fea, marefa namui takosia ka agua nau tamasia fato noga tangagamu kaa, ina mataina nau ogaoga fainigamu ia? ⁶ Hoi ki igamu kamu girara fato noga ka mwarao ne ura pusia o wani ne aera wau kena, ne ma ni rao mai. Ua ki murina mo wani ngai ke ke pagai fafagaqao mereana rainia iga ka mataina tangaa ne pagai arao mai. ⁷ Aerafa iana na mwane kena ke tagara noga ina mataina kaa, maake aqaqa maunga, raorao make taua ka mataina o God ne tawoa fura na mwane ne ura pusia na Mwane ne Tofea na Lo gena. ⁸ Hoi, ki na mataina kaa, ka Mwane ne Tofea na Lo igi, ke ranga mawe noga. Hoi ngaia ngai ke ka mwane o Jisas na Arafa iaka ke nafuia funuia rainia mwa ka rogaroga ne furafura mai pania na farana. Aa, mataina o Jisas ne aporo mai nikao, ke kakamaria fato wau nga rainia ka ramwofa iana. ⁹ Hoi inago, ka Mwane ne Tofea na Lo igi, ke arao mai afainia ka ramwofa iana o Satan, make mai tatanui ka atani wau mwa na mwarao ne qao riariaga mina apeni na agua rafaera wau mina fagaqaonga ni qaqanganifa nikao, woi na inuni kai papanga rai. ¹⁰ Make tatagara nikao rainigi ka aeratagani na agua ne fagafagaparura ka inuni na maemae. Ngaira ka maemae suria ngaira ke marefa wau nai marumu rai rao suria ana ka tamasinga mwora iana o God, na Arafa ne gira fagatafira ana. ¹¹ Ngaia ngai ke, o God ke fafagaqonoqonora, woi nai tatangamworani rainigi ka tamasinga ni qaqanganifa. ¹² Ngaira fato gena ke pagai fafagaetangira ko God, suria ne marefa nai rao suria ka tamasinga mwora iana o God, maaka oqania wau nga rai tanui ana ka aerafa. ¹³ Ua a goaku, Arafa iaka ke oqanigamu tefa wau, make e araria woi nami tatangasia ko God raorao mwa rainigamu. Suria o God ke qani ono sikifigamu, woi igamu ke fafagatafigamu, rainia na Figona Apuna ngaia ke fafagaapunarigamu, maka mu tatangamworani rainia ka tamasinga mwora iana na Arafa. ¹⁴ Rainia ka tarofa koro nami tarofainia, God ke qani onigamu rai oga ana afainia ka Arafa iaka o Jisas Kraes i Heven. ¹⁵ Hoi, a goaku, mui uraura nganganiaga, maka mui taura nganganiaga ka tamasinga mwora nami fafagausurigamu rainigi gaa, manga nami tatamasi wau tangagamu, kee mi segera wau tangagamu iga na leta gaa. ¹⁶ God emaka ke oqanigia tefa wau. Ngaia ke koro tefa wau tangagia, make fafagaramworigia raorao mwa, make tatanui ka takofa iaka ka fafatami koro rainia. Igami kami nongia, woi na Arafa iaka o Jisas Kraes mo God emaka, ¹⁷ woi naru faganganganiaga mangatamiu, makaru tatamanigamu raorao mwa rai tanui ana ka mwarao koro mina tamasi ana ka tamasinga ne koro.

¹ Hoi na goaku, mui fafagarafe tangagami, manga woi ni tatamania ka tamasinga rainia na Arafa ki taura ofu ana mafarufaru ka finua, mina inuni kai takotako fagafigaia manga ne wora fato noga tangagamu kena. ² Mui fafagarafe nikao, ki tanua ko God ki fafagatafigami panira ka inuni aera ne ma nai tangamworani rainia na tarofa koro kaa. ³ Arafa ke mworamwora raorao mwa, mi ngaia ke fafagaramworigamu, make onoono surigamu pania ka ramwofa iana na ataro. ⁴ Mina Arafa iaka ke tanugami kami takotako nganganiaga rainigamu, woi igamu kamu rao suria mwa ka agua nami tamasia fato noga tangagamu, maka mu tatanui raorao mwa. ⁵ Naka ka Arafa woi ni fafagaotora ka takofa iamiu, kamu onoono girara ka faikomanifa iana God, maka mu maramarapeaga manga o Kraes ia. ⁶ A goaku, iga na atana na Arafa iaka o Jisas Kraes, igami kami tamasi raramwofaga aera wau tangagamu, woi igamu ki siana kamu fakufaku afainira ki tana inuni na tangamworani na maemaega aera wau rai tanui ana na tagaranifa, make marefa nai gira rao suri ana na tamasinga nami qani tamasi fato wau noga tangagamu gena. ⁷ Igamu mereamiu kamu girara menamenai aera wau, woi igamu ke araria namu arao surigami rai ka agua gaa, rainia na mataina nami ogaoga fainigamu ia, igami ke marefa wau nami maemaega rai tanui ana ka tagaranifa. ⁸ Make marefa nami ngaura purua ka ngaufa panira ka inuni. Igami mereamami kami worira na arani mwarao fato gena. Arani mataina raorao mwa, manga woi na qongiana mi igami kami tatagara rafaera wau iga, rainia ne marefa nami oqania woi tana inuni igamu kami fafagatakougania. ⁹ E ararigami mwa woi igami kami oga fagaugurigamu, make marefa. Igami kami tagara mereamami rai fagaqao ana rainia ka agua ngai ke tangagamu, woi igamu kamu arao suria. ¹⁰ Mataina mi ogaoga fainigamu maunga, igami kami qani woisia fato noga tangagamu manga ngai ke, “Manga tana inuni ne maemaega rai tanui ana na tagaranifa, siana kamu wawatea na ngaufa ke ngaua.” ¹¹ Suria igami kami rongoa woi tana inuni igamu gena ka maemaega aera wau rai tanui ana ka tagaranifa. A ogaoga purua mwa, maka rifurifu raorao mwa rai tamasira ana ka inuni. ¹² Hoi, ki iga na atana na Arafa iaka o Jisas Kraes, igami kami tamasi raramwofaga wau tangara ka inuni ngai gena, woi ngaira kai ogaoga menamenai, makai tatagara rafa ki totogoata ka ngaufa iata mereata. ¹³ Hoi, ki igamu na goaku, igamu ki siana ki maemae na apemiu rai tanui ana ka mwarao koro. ¹⁴ Wari tana inuni i finua iamiu gena, ke marefa nai tautau woita iamami iga ka tamasinga iga na leta kaa. Hoi, make manga ngai kena, mui onoono girara woi otai ke e kena, maki siana kamu fakufaku afainia ki igamu, ki mwarao maki maaki rainigi ka agua iana mereana. ¹⁵ Siana kamu mamaerongania, minga kamui fafagausuria mwa ki tagara, suria ngaia kena ka goamiu. ¹⁶ Arafa ke tatamanira ka inuni na ogaoga iga na marapefa. Hoi kami fagarafe woi ngaia ki tatamanigamu kamu ogaoga iga ka marapefa raorao mwa, maki ogaoga afainigamu. ¹⁷ Inau mwora O POL, kau segea wau ka tamasinga koro kaa rainia ka rimaku mereaku. E kaa ki takena nga nau segea na ataku iga na arani leta iaku. ¹⁸ Au fagarafe woi na korofa iana na Arafa iaka o Jisas Kraes ki afainigamu fato.