2 Pita

¹ Inau ko Saemon Pita na kare iana mina aposol iana o Jisas Kraes. Au sege wau tangagamu ki igamu ne wategamu o God na romana tangamworanifa, manga igami nikao nami nafunia. Igia fato ka nafunia ka tangamworanifa suria o God mo Jisas Kraes na Fagatafi ne oto wau. ² Igamu kamu girara koro wau ko God mo Jisas na Arafa iaka fato. Ua inau kau fagarafe woi o God ki korokoro tefa wau tangagamu maki wategamu ka marapefa wau nga. ³ Iga na ramwofa iana o God, o Kraes ke wategia ka arani mwarao na oqani igi tangai oga suri ana ka faioqanifa iana o God. Hoi arani mwarao gaa ka nafunia rainia igia ka girara koro ko Jisas Kraes ne onigia tangaa ka rarafa iana mina ogafa iana koro. ⁴ Iga na taufa ngai ke, ngaia ke wategia ka romana mwarao koro wau ne qani surua fato tangagia, ki mwarao maki igia kai nanafunia ka taufa iana o God, migia kai gira taragani ana panigi ka ani mwa na agua aera iata na inuni ina ano kaa na wawanasi raorao mwa. ⁵ Rainia ka agua kaa, mu nafunia ka tangamworanifa iamiu, maka mui rarapasia kamui ogaoga menamenai, kamui nafunia ka takofa koro. ⁶ Migamu kamui tautau surigamu otooto mereamiu, kamui maramarapeaga mwa, maka mui arao suria ka taufa koro iana o God. ⁷ Mui korokoro tangara ka arani goaka maka mui kokomanira nikao ka arani inuni. ⁸ Hoi ke rao ke manga na agua ngai ge ka tefatefa iga ka ogafanamiu, ke marefa namu ogaoga purua mwa, make kasikasi guani iga ka ogafanamiu namu gigirara ka Arafa iaka o Jisas Kraes. ⁹ Hoi mina ani mwa na inuni ne marefa ni nafunia ka agua manga ngai ge iga ka ogafanana, ke manga na inuni ne aera na maana, ne guru, make qono rainia wau woi na fagataraganisi fato noga pania ka aerafa iana inago igi. ¹⁰ A goaku igamu, o God ke qani onigamu make usuigamu tangaa mereana. Hoi mui rarapasia rai fafagaqao ana iga ka ogafanamiu. Manga namu tanua manga ngai ke, ke marefa mu gira tapasu ana maka mu apuri, ¹¹ mo God ke wagewagesigamu wau nga rai qanu ana irarona arafanga iana na Arafa iaka, na Fagatafi o Jisas Kraes, ne taotao tarai. ¹² Ua, manga namu girara fato noga kena maka mu uraura gatagata iga na fagausuringa mwora namu rongora fato noga igi, maakau oqani fagatakosigamu ana rai ka agua gaa. ¹³ A takofa iaku ke manga kaa, mataina nau tafitafi maunga kaa ke koro wau qai ngiura ka takofa iamiu rainira ka agua gaa tangagamu. ¹⁴ Au girara inau ke marefa qai ogaoga qorafu ina ano kaa, manga na Arafa iaka o Jisas Kraes ne qani fagarongoau ia. ¹⁵ Ua nga ngai ke, inau ke araria nga nau rarapasia, ka mataina qai maemae migamu ki siana kamui qoqono rai ka agua gaa. ¹⁶ Mataina igami nami tamasia fura tangagamu o Jisas Kraes na Arafa iaka ngaia ke aporo mai nikao afainia ka apena ramwofa rafa, igami ke marefa mi atani arao suri ka fagausuringa ni qaqanganifa. Marefa. Igami kami rea mereamami rainia ka maamami ka apena ramwofa rafa iana o Kraes. ¹⁷ Iga na mataina kena o God emaka ia ke fagaakausia ka atana o Kraes make watea ka rarafana, make tamasi mai pania ki Heven ke woi, “Ngaia kaa ki kareku nau komania tefa, mi inau kau wagewage wau afainia.” ¹⁸ Igami mereamami kami rongoa ka tamasinga kaa ne wato mai i Heven mataina igami afainia ko Jisas iga ka fungana apuna ia. ¹⁹ Panigi ka arani mwarao gaa igami kami tangamworani gatagata wau iga ka woita iata na maurukari ira. Hoi koro wau manga igamu nikao kamui tau akau gatagata ka woita gaa, suria ne manga na mawetana ne sina iga na agua ne rotorotoaga. A mawetana kena ke sinasina raorao make taua ka maworoarotagana na tangiana, mina feegu ni tangi ke akau mai ke sinasina irarona mangatamiu. ²⁰ Migamu kamui takotako qao koro rainia ka mwarao gaa suria marefa ka maurukari ni arao suria ka takofa iana mereana rai segera ana ka woita rainia na agua ne pagai arao mai iga na Segesegefa Apuna. ²¹ A tamasinga iata na maurukari ira, ke marefa nai gira tamasia ana iga ka faioqanifa iata, hoi minga na Figona Apuna ke fagaotora rai tamasi fura ka tamasinga pania ko God.

¹ Mataina inago ke rako wau ka maurukari na akau mai qaiawogata na inuni Israel, miga na tarana ngai ke nikao, ngaira na fagausuri na qaqangara ka akau mai qaiawogamiu, ka tamasia fura ka fagausuringa ni qaqanganifa ne fafagaerisia ka tangamworanifa iamiu. Make manga ngai kena na Arafa ke fagatafira pania ka aerafa iata, mi ngaira ka riria ka murita tangaa nikao, mi panigi na mwarao gaa ke fagaerisira mereata mafarufaru wau. ² Make rako wau ka inuni na arao suria na taufa aera iata, ke tanura ka inuni ka tamasi aerisia ka tarofa koro ne mwora kaa. ³ Suria na fagausuri na qaqangara ira ka oqania ka rurugua tefa wau maka tanui ka ani mwa na fagausuringa ni qaqanganifa rai tawora ana ka rurugua iamiu. Mo God ke qani takosia rai fagaetangira ana make pagai kakamarira wau nga. ⁴ Migia ka girara, inago na mataina na enjel na tanua na agua ne aera, o God ke maengira ka rao ina Hel rai fagamamasiaga apeta ana. Mi iga na agua rotorotoaga kena ka taotao raorao ke taua ka tangina ni fagaetangifa iana o God. ⁵ Mi inago nikao, ko Noa ke tarofainia ka taufa ne oto, mina mataina na inuni ira na tofea, mo God ke fagaetangira ke kasia mai ka wai ne mwaganu ke nafuira fato wau nga. Mo Noa mwa afainira ka inuni ne epiu ki ngaira noga ka tafi. ⁶ Mina finua ne erua iraurua i Sodom mi Gomora, ko God ke fagaetangiraurua rainia ka giu ne fanuraurua karu aera wau nga. Iga na taufa ngai ke, ke fagaqao tangagia ka mwarao ne pagai worawora mai tangara na inuni na tofea ko God. ⁷ Hoi o God ke fagatafia ko Lot panira ka inuni na aera i finua rafa i Sodom. Ngaia kena ka mwane ne oto, make marefa ni fatami koro rainia ka taufa aera iata na inuni na aera wau gena. ⁸ O Lot ka mwane ne oto, mi iga na arani tangaiana ke fatami aera wau nga rainia ka agua aera ne reregi make rongora panira na inuni ne ogaoga afainira gena. ⁹ Arani mwarao gaa ke fagaqao rainia ka inuni na tangamworani rainia ka Arafa, hoi ngaia ke gira fagatafira ana pania ka mataina ne qaraqara ne arao mai, mina ainuni marefa nai oto, ngaia ke gira fagaetangira ana raorao make taua ka tangina ngaia ne fafagagetara ka arani inuni fato. ¹⁰ Arani inuni ne taura nga na fagaetangifa kaa ka inuni na oqania wau nai tanui ka agua aera, mo otai na onoono qau wato rainia na ramwofa iana o God. Ngaira ka mamaramwanega wau, ka oqania mwa nai arao suria ka takofa iata mereata. Ngaira ke marefa nai tako fagafigaira ka enjel i Heven, rai tamasi fagaerisira ana. ¹¹ E mangara na enjel na ogaoga i afaafa, ka nafunia ka ramwofa ne tefa, maake marefa nai gira tamasi fagaerisira ana ka inuni manga ngai gana i matona na Arafa. ¹² Ngaira ke marefa nai takotako menamenai, maka tamasi aerisi ka mwarao ne ma nai girara. Hoi, ko God ke fafagaetangira mangara na inuni na nanafuira na qoo ira. Maaka mu girara na qoo ka mwarao tangai roira ka nafuira ana. ¹³ Ngaira ka tanura ka fafara wau suria ngaira gaa ka qani tanura tana inuni ka fafara wau inago. Ngaira gaa ka oqania wau nai farufaru iga ka gupuna tangiana, mina mataina na arao mai ka ngaungau afainigamu maka fafagamaakigamu rai ka taufa aera iata gena, rainia na wagewage wau rainia ka qaqanganifa iata. ¹⁴ Arani mataina nikao ngaira ka onoono tangaa raorao mwa ka fefene ne qaqagararanga, ke asa wau nai fato pania ka aerafa iata gena, mi ngaira ka fafagaqekaqekara ka inuni ne marefa nai gatagata iga ka tangamworanifa iata. Mi ngaira ka girara wau ka agua ni mamaongoga ana. Ngaia ngai ke o God ne qani tamasi woi ne fafagaetangira na inuni gaa. ¹⁵ Mi ngaira ka qani fura pania ka otofana tara, ka rao suria ka taufa iana na maurukari o Belam i karena o Beo. O Belam ke tanui ka agua ne marefa ni oto suria ne oqani rurugua wau. ¹⁶ Mina donki iana ke woi pusia siana rai rao suria ana ka taufa aera iana. Manga na donki kena ke ma ni gira tamasi ana, maake mea tamasi ko Belam manga na inuni ia make tamasi maana ko Belam rai ura pusia ana pania ka agua ni qekafa ne tatanui. ¹⁷ Ngaira na inuni gaa ke manga na wai ne mamata na qaurungana ia maka manga na roto ne atani rogasira raorao mwa na roga ia. God ke qani fagananaua fato ka agua ne rorotoaga wau tangara. ¹⁸ Ngaira ka tamasi qaqaeaga wau iga ka tamasinga ni qekafa iata, maka gira fagaqekaqekara ana ka inuni rai ka agua aera na oqani tanui ana rainigi na apeta. Panigi na agua gaa, ngaira ka okeokera aporo ka inuni na oqani gawa panigi ana na agua aera gena. ¹⁹ Ngaira ka woi tangara ka inuni woi ne taragani mwa tangara rai tanui ana ka mwarao na oqani, mi ngaira gena ke marefa nai taragani. Ngaira gena ke rafasira noga ka taufa aera na arao suri gena. ²⁰ Manga na inuni kai girara menamenai ko Jisas Kraes na Arafa ne fagatafira, ka ki ngaira kai gawa panigi ka taufa aera ina ano kaa, maake manga ne rakurakura igi ka taufa aera gena, ki nga na taufa aera gena ke rafasira ka tafingata, ke aera ke tetefaria wau nga ki inago. ²¹ Make koro wau tangara ne marefa nai ono girara ka ani kaa na taufa ne oto, suria ne aera wau tangara nai ono girara ka ani kaa na taufa mi ngaira ka rongoa ka faifataninga ne apuna, maaka kafu riri ka murisigaia ka tara ne oto kaa. ²² Ainuni na riri aporo tangai na taufa aera iata gaa, ke manga na woita ne woi ia “A aoo ne momoa fato make aporo ke ngaura nikao ka moana igi.” “A qoo na mamaanufia ke qao koro, maake aporo mwa ke furifuri ina mwani piapia.”

¹ A goaku, nga na ruata na leta nau segea tangagamu ngai ke. A leta ne erua kaa, kau segea rai ngiura ana ka takofa iamiu, kamu takotako menamenai. ² Au oqanigamu mui tatakosia nikao ka tamasinga iata na maurukari na apuna ira na woisia inago wau, migamu kamui tatakosia nikao ka tamasinga iana na Arafa ne fagatafigia. Igami na aposol nami qani tamasia fura na tamasinga kaa tangagamu fato ia. ³ Mataina kaa igamu kamui girara menamenai ka mwarao kaa, mina mataina ne fafagarangi na aporofa iana na Arafa ne pagai arao mai, mi tana inuni ka tatanui ka agua aera na oqani tanui ana maka fafagamamana wau rainigamu. ⁴ Mi ngaira ka tamasi manga kaa tangagamu, “Ifai ngaia o Jisas? Ngaia ke suru tangai aporo mai ana, ma ki ifai ke kokoa iga na mataina kaa? Emaka ira ka qani mae fato wau mina arani mwarao gaa ke marefa ni orisi ne tagaenani mwa na mataina na ano kaa na fagaworaia ia.” ⁵ Mi ngaira gena ka tako mara mwarao purua rainigi ka mwarao gaa. Iga na mataina inago, mo God ke tamasi rao mwa mina wawaiaro kana mina ano kaa karu wora mai. Ngaia ke fagaworaia ka ano kaa pania ka rarona wai, mi pania na wai ngaia ke fagaworaia ka arani mwarao ina ano kaa. ⁶ Miga na agua ngai ke, ano kaa ke fagaerisia wau nga rainia ka apena mwaganu rafa. ⁷ Mi pania na tamasinga iana o God, ka wawaiaro mina ano kaa naru taotao maunga rai nasia ana ka giu ne fafanuraurua. A wawaiaro mina ano kaa karu nanasia raorao make taua ka mataina o God ne fafagagetara ka arani inuni make fafagaerisira ko otai ne ma nai arao suria. ⁸ Arani goaku, a mwarao ne etagai mwa igamu namu takotako fagafigaia. Iga na takofa iana na Arafa iaka, ka tangiana ne etagai ke tagaenani mwa manga na qera ni farisi ne etagai ia (1,000), mina qera na farisi ne etagai ke tangaenani mwa manga na tangiana ne etagai iga ka takofa iana. ⁹ Nga ngai ke na Arafa ke marumu maunga rai nasigamu ana kaa. Tana inuni ka tako woi na Arafa ke arigurigu wau rai fagamworai ana ka surufa iana. Hoi maake marefa ni manga ngai kana, suria na Arafa ke ma ni oqania ki tana inuni ni maemae, maake oqania ka arani inuni kai ririri aporo tangaa. ¹⁰ Hoi mina tangiana ni aporofa mai iana na Arafa ke arao mai manga na mwane ne arao mai rai fanago ana ia mi igia ke marefa nai girara ka mataina tangaa na raofa mai iana kena. Mi iga na tangiana kena ka apena rongo rafa ana ke rorongo rafa mina wawaiaro kana ke mamarefa rao, mina apena giu rafa ke fafanunu rao ka arani mwarao iga na wawaiaro kana, mina ano kaa afainigi ka arani mwarao iga ke mamarefa rao mwa nikao. ¹¹ Hoi nga ngai ke, na arani mwarao ina ano kaa ke pagai fafagaerisi maka mamarefa rao. Hoi kamui fafagaapunarigamu kamui arao suria ka agua manga o God ne oqania. ¹² Manga namu nanasia ka tangiana rafa iana o God kana, kamui tatagara rafa rai tanu ana ka tangiana kana ki mafarufaru mai. Iga na tangiana kana ka giu ke fafagaerisia wau nga ka wawaiaro kana mina arani mwarao iga ke makaka rao mwa manga na wai ia. ¹³ Mo God ke qani suru rai fagaworaia ana ka wawaiaro faoru mina ano faoru, mina arani inuni ka otooto ngai kana. Hoi, ki igia ka nanasi nga rai regi ana ka mwarao faoru gaa. ¹⁴ Ua na goaku, mataina namu nanasia na tangiana kena, mui ofongia ki otooto wau nga ka mangatamiu maki tataragani ki mwarao maka mu ogaoga iga ka marapefa afainia ko God. ¹⁵ Arafa iaka ke ariro iga ka aporofa mai iana suria ne oqani mafata rainia ana ka mataina kai ririri ka inuni ki mwarao maki fafagatafira. Nga o God ke mafata rainia ka takofa koro tangaa na goaka o Pol ke segera tangagamu na tamasinga gaa nikao. ¹⁶ O Pol ke segea ka agua kaa iga ka arani leta iana. Iga na leta iana ki tana woita iga igi ke asa aera wau nga, mi tana inuni ke marefa nai nafuni ka giraranifa rainigi, suria na tangamworanifa iata ke ma ni gatagata. Ngaia ngai ke na aoriorisi raorao mwa na woita iana maaka arao iga na tara getea, mi ngaira ka atani wau mwa rai fakani ana ki tana Segesegefa Apuna nikao. Mi iga na taufa ngai ke ngaira ka fagaerisira wau nga mereata. ¹⁷ Hoi ki nga ngai ke na goaku igamu, igamu kamu qani girara fato noga ka woita gaa. Mui reregamu nga mereamiu, fagaraia maka taufa aera iata na inuni na tofega ke toraigamu pania ka mworafa, ke tanugamu kamu wotawota pania ka tangamworanifa iamiu. ¹⁸ Ina arani tangiana, kigamu kamui ogaoga iga ka korofa iana na Arafa iaka o Jisas Kraes, kamui gigirara nga ki ngaia menamenai, ne fagatafigia fato. Hoi ki igia ina mataina kaa, kai fagaakausia ko Jisas, tarai tarai. Amen.