2 Korint

¹ Inau o Pol na mwane ne tanuau o God rai aposol iana o Kraes Jisas. Inau mo Timoti na goaka, kamuru sege tangagamu, na siosi iana o God i Korint afainira ka inuni na apuna tangaa o God na ogaoga ina arani finua i Akaea. ² Au fagarafe woi o God emaka mina Arafa o Jisas Kraes ki koro tangagamu, mwarao maka mui ogaoga igaa ka marapefa. ³ Ai fagaakausia ko God Emana na Arafa iaka o Jisas Kraes, ngaia ke faitakoi tangara ka inuni mina God ne fafagakoro mangatata na inuni, ⁴ ne fafagakoro mangataka igaa na arani mataina aera iaka. Hoi suria o God ke fagakoro mangataka, ki igia kai fafagakoro mangatata ka inuni ne taura na mataina aera. ⁵ Igami kami fafara wau manga ngaia o Kraes ia, minga mwa o God ke mafata rainia na faitamaninga tangagami suria mi faku afainia ko Kraes. ⁶ Suria mi rorogoi ne qaraqara tangagami, mo God ke gira fagakoro mangatamiu ana, make fafagatafigamu. Hoi igaa na mataina o God ne fafagakoro mangatamami, migami makami gira fagakoro mangatamiu ana nikao, maka mu gira marape ana mwa igaa ka ape mamasiaganifa manga igami nikao kaa. ⁷ Mina tangamworanifa iamami ke nganganiaga rainigamu, suria mi girara woi igamu kamu ape mamasiaga afainigami, hoi ki igamu nikao mo God ke fafagakoro mangatamiu manga ne fagakoro mangatamami nikao. ⁸ Arani goaku, mi oqanigamu mu girara ka mataina ne qara mi tarafua ina provins i Esia. Arani mwarao gana ke qara aera wau tangagami, raorao maka mi takosia woi igami kami maemae. ⁹ Mi fatami girara ka arani mataina woi igami kami pagai maemae, hoi maka agua ngai kena ke wora tangagami ki siana kami fafagaugurigami mereamami, maaka mi fafagauguria ko God ne gira ragaira aporo ana na inuni pania ka maefa. ¹⁰ God ke fagatafigami ina mataina mi fagani mae ia, make fafagatafigami nikao. Igaa ngaia kami fagauguri togotogo rainia, ne fafagatafigami tatarau, ¹¹ maka mu tamanigami rai fagarafenga. Ki mwarao maka inuni rako ka pagai tamasi tangasia ko God suria ne fagatafigami pania ka maefa igaa ka aramifa igaa na fagarafenga iata. ¹² Mi tamasi kasigami akau suria na takofa iamami ke fagaqao woi igami kaa ke marefa mi susukasuka, maka mi rao suria mwora nga ka taufa iana o God. A mataina nami ogaoga ina ano kaa mi qani tanui manga ngaia kaa mai, mina mataina mi ogaoga afainigamu kaa maka mi tanua ka agua gaa tefa wau nikao. Igami ke marefa mi arao suria ka takotakofa iana na inuni ina ano kaa, hoi maka mi arao suria mwa ka takofa koro iana o God tangagami. ¹³ Hoi maka mi sege wau tangagamu rainigi ka mwarao namu gira tomani ana mina tako matafa ana rai. Au tangamworani woi ¹⁴ ma mu giraragami menamenai, maaka mi girara woi igamu kamu pagai gigiraragami menamenai. Hoi mina mataina na Arafa o Jisas ne aporo mai, igamu kamu pagai tamasi fagaakaufigami mi igami kami gira tamasi fagaakaufigamu ana nikao. ¹⁵ Au tako nganganiaga woi igamu kamu tatakosia ka tagarafa iamami tangagamu ke oto, makau takosia qai rao wau qai regamu nikao, kigamu kamu nanafunia ka wagefa igaa ka ruata na raofa iaku wau tangagamu. ¹⁶ Au takosia rai rao wau ka regamu ana mataina nau wau arao i Masedonia makau mai reregamu nikao mataina nau aporo mai, maka mu kafu kasiau kau arao tangaa ki Jiudia. ¹⁷ Manga ifai? Mu tako woi nau tamasi purua mwa ngai kee suria ne marefa qai rao suri ka takotakofa iaku? Marefa. Inau ke marefa qai tako fairuagai. E rao kau oqania kau woi “Aa” e asa mwa qai orisi takofa qai woi tangagamu “Marefa.” ¹⁸ Au tamasi mwora ngai kee manga o God ne tamasi mwora raorao mwa ia, mina mwarao nau woisi wau gaa ke marefa qai woi “Aa” make “Marefa” tangagamu fagaetagai. ¹⁹ Inau afainia ko Saelas mo Timoti ki igami eoru mi tarofainia ki Karena o God, o Jisas Kraes. O God ne ma ni tako fairuagai rainia ko Jisas woi Karena, make wowoi “Aa” raorao mwa. ²⁰ Arani surufa iana o God, ko Kraes ke fagamworai. Nga ngai kee na wowoi kaa “Aa, Amen” igaa na atana kaa nai fagaakausia ana ko God. ²¹ Hoi ko God ke fagagatanigia faku rai ura gatagata ana afainia ko Kraes, mi ngaia o God mereana ke ategia make wategia ka ramwofa kaa rai tagara ana, ²² make naka ka Figona Apuna iana rai fagaqaonga iana manga kaa rai fagaqao ana woi igia ke nafunigia, mina Figona Apuna iana ke tao i maurifaka rai fagaqao woi na arani surufa iana ke fafagamworai igaa ki igia. ²³ God ke girara ka mwarao nau wowoisi rao gaa ke mwora, suria ne girara ka mangataku. Marefa qai aporo wau i Korint, suria ne marefa qai oqani fagaqarasia ana tangagamu. ²⁴ Marefa mi oqani ura tefari ana ka tangamworanifa iamiu, suria mi girara ka agua mu ura gatagata igaa kena igaa ka fagauguringa iamiu tangaa ko God, makami oqani tagara afainigamu ana kamu gira oga wagewage ana igaa ka tangamworanifa iamiu.

¹ Hoi au takosia ka raofa iaku ke marefa qai wau fafagaerisi mangatamiu. ² Manga nau fafagaera mangatamiu, ko otai ke fafagawage apeku? Hoi ki nga igamu ka inuni namu fafagawage apeku. ³ Nga ngai kee nau sege wau tangagamu kaa, suria ne marefa qai oqania mu fafagaera mangataku ina mataina nau arao tangagamu. Nga igamu ka inuni namu fafagawage apeku. Au tangamworani manga nau wawagewage, mi igamu nikao maka mu wawagewage. ⁴ Mataina nau qani sege wau tangagamu ia, ke aera ka mangataku, au faitakoi wau makau angi. Marefa qai fafagaera mangatamiu, maakau oqani fagagiraragamu ana kamui gigirara ka oqa korofa rafa iaku tangagamu fato. ⁵ Hoi ani na mwane ne tanugamu kamu fatami aera ke marefa ni tanuau qai fatami aera geteau. Marefa qai oqani tamasia rafa ana ko wani kena. Hoi ki ngaigamu fato ke fagaerisigamu kena. ⁶ Nga ne arari rao noga ngai kana rainia ne rako wau ka inuni na fagaetangia noga rai ka aerafa ne tanua kena. ⁷ Ua kina mataina kaa ke koro tangagamu nga namu qoqono rai ka aerafa iana ki mwarao maki korokoro aporo ka mangatana, ma ni koro ni fafaitakoi ki rurumakaka wau nga tarai. ⁸ Au nongigamu, mu fagagirarara rainia ka oqa korofa iamiu tangaa. ⁹ Au sege wau suria nau oqania mwa qai rogoia ne fea mu tautau woita igaa ka arani mwarao. ¹⁰ Otai mwa mu qoqono rainia na aerafa iana, mi inau nikao makau qoqono rainia ka aerafa iana, manga na aerafa ke taotao maunga ni qono rai ana. Au qono rainia ka aerafa ina apanana iana o Kraes suria nau oqani tamanigamu ana. ¹¹ Manga ngai kee, ko Satan ke marefa ni gira ura tefarigia ana, suria igia ka qani girara fato ka takotakofa aera iana. ¹² Hoi, a mataina nau taua i Troas rai tarofainia ana ka tarofa koro iana o Kraes makau rogoia ka Arafa ne naka ka tara tangau, ¹³ minga ke marefa qai nafunia ka marapefa i mangataku, suria ne marefa qai rogoia ka tamaku o Taetas igana, makau fagaomira rao mwa ka inuni i Troas makau rao tarai i Masedonia. ¹⁴ Maaka mi fagakorokoro wau tangaa ko God! Ngaia ke tamanigami afainia ko Kraes ne tefaria ka mae kaa ina arani agua ne toraigami rao igaa. God ke usuigami ni tamasia ana ka tarofa rainia ko Kraes ki rao ki taura ka arani agua, ke manga na waiwai sigini ia. ¹⁵ Igami ke manga na mangate ne sigini koro wau ia ne suungia o Kraes tangaa o God, ne tataka tangara na inuni na Arafa ne fafagatafira mina inuni na tarupe pania ko God. ¹⁶ Tangara ka inuni na tarupe pania ko God ka mangate kaa ke sigini aera, make toraia mai ka maefa tangara. Hoi mina ainuni ne fafagatafira o God, ka mangate kaa ke sigini koro wau, ke toraia mai ka tafinga tangara. Hoi ka mwane taa ke araria na tagarafa kaa? ¹⁷ Igami ke marefa mi mangara tana inuni na mamaongoga ira na tatamasia na woita iana o God suria na oqani tawo rurugua ana mwa. Nga o God mereana ke usuigami, maka mi tamasi mwora raorao mwa i maana o God. Mi tatamasia ka woita iana suria igami ka mwane ni tagaranifa iana o Kraes.

¹ Manga ifai? Mi rongo manga mi kasikasigami akau nikao? Marefa. Igami ke marefa mi mangara tana inuni, na oqania nga na leta rai fagagirara ana woi ngaira mwora ka mwane iana o God ni tagarafa. Igami ke marefa mi oqani ka mwarao manga na leta panigamu, kee panira ki tana inuni tangagamu. ² Nga igamu ke manga na leta ne fafagaqao rainigi na taufanamami, na segea i maurifamami tangara ka arani inuni nai totomania makai gigirara. ³ E oto wau suria nga o Kraes mereana ke segea na woita. Nga igamu kamu fagaqao mai woi na tagaranifa iamami gaa ke mwora. A leta kaa, ko Kraes ke marefa ni segea rainia ka supuru ina fau ne afetafeta, maake segea rainia ka Figona iana o God ne tafitafi ina mangatana na inuni. ⁴ Mi tako togotogo woi igami ka mwane ni tagarafa iana mwora, suria o Kraes ke faganganinganira ka tangamworanifa iamami tangaa ko God. ⁵ Igami mereamami kaa ke marefa mi nafunia ki tana mwarao rao, kami wowoi nga igami kami araria nga ka tagarafa kaa, mako God mereana ke tanugami kami araria na tagarafa kaa. ⁶ Nga o God mereana ke tagarafigami kami araria na tagarafa kaa rai tarofainia ana ka fakunga faoru. A fakunga faoru tangagia kaa ke marefa ka mwarao iana na Lo na qani segea ke taotao maaka mwarao iana na Figona Apuna, suria na Lo na segea ke tanura ka inuni ka maemae, mina Figona Apuna ke mamafata rainia ka tafinga. ⁷ Hoi na Lo iana o God ka segera igaa ka fau afetafeta, nga na Lo gena ke fagaqao rainigi ka ramwofa iana o God, ne tanui ka maana o Mosis ke togatoga. Suria na maana ne togatoga kena, ka inuni i Israel ke marefa nai gira ono togotogo ana i maana, hoi imurina make kafu togatoga sisitai mwa. Nga igi na Lo ne segera o Mosis ke fagaqao woi na arani inuni ka maemae. ⁸ Fenaka o God ke qani fagaqao rainia ka rarafana i maana o Mosis ia, mina tagaranifa iana Figona Apuna ke qao koro tefaria ka tagarafa iana na Lo. ⁹ Manga o God ke fagaqao rainia ka rarafana igaa na Lo ne usui maata na inuni, make fagaqao rainia ka rarafana ne tefa wau rainia na tagarafa ni fagaotora ana na inuni. ¹⁰ Hoi ka qao korofanana na Lo ke fato noga suria na tagarafa iana Figona Apuna ke qao koro tefa wau nga. ¹¹ Mataina na Lo ne rao mai ke qao koro, hoi mina ramwofa iana ke wato rao mwa. A tagarafa iana na Figona Apuna ke qao koro wau nga make taotao tarai. ¹² Nga ngai kee, igami ke nganganiaga ka takofa iamami make susu ka oqamami. ¹³ Marefa mi manga o Mosis ne qofigi na maana panira na inuni i Israel woi siana kai qoreqore togotogo rainia ka rarafana ne fatofato rao kena. ¹⁴ Hoi, ainuni i Israel gena ke qono taku ka mangatata. Nga ngai kaa ne mai taua na mataina kaa, na inuni na totomania na puka igaa na Lo make tanu manga na gafu na naka pusi na maata ira. Hoi ke rao ka inuni ne fakufaku afainia ko Kraes, o God ke gagaia pania ka gafu kena. ¹⁵ Ki ngaeka kaa, arani mataina na totomania na Lo iana o Mosis mina inuni Israel gena ka qofi ka mangatata. ¹⁶ Hoi mina mataina taa mwa na inuni ne ririri tangaa na Arafa, mo God ke gagaia ka gafu pania ka maana. ¹⁷ Hoi, ka Arafa kaa ka Figona Apuna, mina mataina na Figona Apuna ne ogaoga i maurifaka, igia ka gira taragani ana wau nga. ¹⁸ Igia na arani inuni ne marefa na mwarao ni pusi na maaka, igia ka fafagaqao rainia ka rarafana na Figona Apuna iana na Arafa, mi ngaia ke fafagaqao rainia ka ramwofa iana ne tefa irarona maurifaka, ke oriorisigia ka qaqao manga ngaia nikao.

¹ God ke koro wau tangagami ke wategami na tagarafa kaa, nga ngai kaa ne marefa mi nanaka wau kaa. ² Igami ke marefa mi tatanui ka aerafa mina agua ni maakia na fafagaqafi igi. Miki igami ke marefa mi pagai susukasuka, kee marefa mi foroforoa ka woita iana o God. Marefa ngaia. Igami kami tatamasia raorao mwa ka mworana woita ki mwarao mo God mina ainuni kai gira ono girara ana ka tagaranifa iamami. ³ Manga na tarofa koro mi tamasia kaa ke aqa, make aqa mwa tangara ka inuni na tarupe. ⁴ Nga na Ataro igaa na ano kaa ke fagagurugurura ka takofa iata na inuni ne ma nai tangamworani igaa na Arafa. Nga ngai kee ne marefa nai gira ono girara ana ka mawetana iana na tarofa koro, na rarafana o Kraes. Mo Kraes kaa ke manga wau nga o God ia. ⁵ Igami kaa ke marefa mi tatarofainigami mereamami, maaka mi tatarofainia mwa woi ngaia o Jisas Kraes ka Arafa. Mi igami kaa ka mwane ni tagarafa iamiu suria igami kami arao suria ko Jisas kaa. ⁶ O God ke woi, “Naka ka mawetana ki sina igaa ka rotorotoaganifa kana!” Nga ngaia ke mafata rainia na mawetana tangai na maurifamami gaa, make tanugami kami ono girara ka rarafana o God ne sina mai i maana o Kraes. ⁷ Hoi ki igami ke manga na potere o God ne fagawonusi rai na rarafana mina ramwofa iana. E kaa ke fagaqao woi na mwarao ngai gee ke marefa ki igami mereamami, maaki nga mwa igaa ka ramwofa iana o God. ⁸ Igami kami tatarafua raorao mwa ka qaiawoa ne asaasa make ma ni fagaerisigami, make maka mwarao mi gira tanua ana maake marefa ni watowato ka takofa iamami. ⁹ A tautau fagaqao maamami maake marefa ni gira mwarao ni tangainigami ana ka Arafa, a nanafuigami maake marefa nai gira fagaerisigami ana wau nga. ¹⁰ Arani mataina, kami apeape mamasiaga manga o Jisas ne qani ape mamasiaga ne mae ia, mina tafingana o Jisas nikao ki gira fagaqao ana i apemami. ¹¹ Hoi ki igami kaa ki na arani mataina ka oqani nafu funuigami ana rainia mwa ka apanana iana o Jisas, mina tafingana ki fagaqao mai i apemami ne gira mae ana gaa. ¹² Nga ngai kee, ne woi na amaefa tangagami raorao mwa, ki mwarao maki igamu kamu tafitafi igaa ko God. ¹³ A Segesegefa Apuna ke woi, “Au tamasi manga kaa suria nau tangamworani.” Igami makami tangamworani manga ke nikao, hoi ki igami nikao maka mi tamasi kaa suria nami tangamworani, ¹⁴ suria mi girara ko God ne qani ragaia afaraga na Arafa o Jisas pania na maefa, ke pagai raragaigami afaraga manga o Jisas, make totoraigami mi igamu tangaa ka finua iana. ¹⁵ Arani mwarao gaa tangaa ka korofa iamiu, ka mataina na korofa iana o God ne rao ke taura na inuni rako gena ki tanura ka inuni kai tamasi fagakorokoro makai fafagaakaufia ka Arafa o God. ¹⁶ Nga o God ne gira ragaia aporo ana na inuni, nga ngai kee ne marefa mi gira naka ana wau na tagarafa kaa, manga na apemami ke mwarumwarusiga gogogo ke qau ke watowato, mina maurifamami ke faoru raorao mwa igaa ka arani tangiana. ¹⁷ Raorao mwa kami apeape mamasiaga ina mataina kaa, maaka ape mamasiaga ana iamami gaa ke tatamanigami rai nafunia ana ka tafinga koro afainia ko God i Heven tarai tarai. A mwarao koro gaa ke rafa tefaria ka fafaranifa gaa. ¹⁸ Ki igami kami qore togotogo rao tangai ka mwarao ne marefa nai gira regi ana make marefa ka mwarao nai reregia, suria na mwarao na reregi gaa tangaa rao mwa ka kere mataina sisitai mwa, e pagai fatofato, mina mwarao marefa nai reregi gaa ka mwarao ne taotao tarai.

¹ Hoi igia ka nafunia ka ape ne manga na rofu na gira toringi ana maka girara ka mataina na apeka ne maemae, igia ka gira rao ana i afaafa ka ogaoga igaa ka ape faoru o God ne wawategia. Marefa ka inuni ke tagarafia na ape faoru kaa, nga mwa o God ke tatagarafi na mwarao gaa ke taotao tarai tarai. ² Mataina kaa ka apeka ke osiosiga wau maka oqani oga ana igaa ka ape faoru i afaafa. ³ Suria na mataina na ogaoga igaa na ape faoru kana, ka maurifaka ke manga na mwane ne gafu rai na gafu koro ia, ke marefa ni rurupa tori. ⁴ Mataina na ogaoga igaa na ape ina ano kaa, igia ka gegege suria na mamaeaga maake marefa nai oqani rao pania ka ape kaa. Marefa. Igia ka oqania mwa ka ape i Heven ni mai qofigia fato wau, ka ape faoru igaa na tafinga ki orisia fato wau nga ka ape ne gira maefa gaa. ⁵ Hoi ngaia o God ke tagarafigia tangai oga tarai ana make mafata rainia ka Figona Apuna tangagia rai fagagiraragia ana woi na mwarao ka pagai arao mai imuri. ⁶ Hoi nga ngai kee igia ka takotako nganganiaga raorao mwa. Hoi ki igia ka girara ka mataina na ogaoga maunga igaa na apeka, igia ka fagatau wau pania ka Arafa i afaafa. ⁷ Ki igia kaa ka ogaoga suria ka fagauguringa iaka, marefa ka mwarao nai reregi rai maaka. ⁸ Igia ka tako nganganiaga, maka oqania nai rao pania ka ape ina ano kaa makai oga afainia ka Arafa, ⁹ maka apena mwarao rafa ke manga kaa, manga igia ka ogaoga ina ano kaa kee i Heven igaa, ka oqania mwa nai fafagakoro mangatana ka Arafa tatarau mwa. ¹⁰ Ki igia fato ka rao ka uraura i matona o Kraes ke fafagagaragia mereana make worigia ki igia fato, surigi ka arani mwarao na tanui i maurifaka ina ano kaa, manga ne aera kee ne koro. ¹¹ Suria igami kami maagutainia ka Arafa, mi rarapasira ka inuni nai tatangamworani rainia kaa. God ke giraragami menamenai wau, makau oqanigamu woi mu giraragami menamenai wau nga. ¹² Igami ke marefa mi kasikasigami akau woi mui reregigami ngai kee, maaka mi oqani fagaqaosigamu rainigi ka mwarao mi tanui, kigamu kamu qaqaeaga rainigami, ki manga mu nafunia ka mwarao ni tamasia ana tangara ka inuni na tamasi qaeqaeaga rainia na ape i metara ne qao koro wau kaa, make marefa nai tako rafa rainigi ka mangatata. ¹³ E fea? Manga na inuni ka woi igami kami qeka, miki tangaa mwa igaa ka apanana iana na Arafa. Manga igami kigaa ka takotakofa koro, miki tangaa mwa ka korofa iamiu. ¹⁴ Nga na oqa korofa iana o Kraes ngai kee ne taugami kami manga kaa, ko Kraes tagaina mwa ke orisigia ki igia fato make mae, kamu ono girara igia fato ki rarona na maefa iana kaa. ¹⁵ Kraes ke mae tangara ka arani inuni fato, ki igia na inuni mauri ki siana kai arao suri na takotakofa iaka mereaka, makai arao suria ka mangatana na mwane ne mae tangagia make afaraga aporo kaa. ¹⁶ Ua ki na mataina kaa ke marefa mi fafagagarara ka inuni suria ka takotakofa ina ano kaa. Inago, mi fagagara ko Kraes suria ka takotakofa kaa, kina mataina kaa ke marefa mi tanua manga ngai kana noga. ¹⁷ Hoi mina na inuni ne fakufaku afainia ko Kraes, God ke oriorisia ke faoru aporo. Arani mwarao inago ke fatofato mina mwarao faoru ke arao mai. ¹⁸ Arani agua gaa ko God ke tanui tangagia. E toraigia aporo mai tangaa rainia ka agua ne tanua o Kraes, make wategami na tagarafa kaa rai toraira ana ka inuni nai aporo mai ana tangaa ko God. ¹⁹ God ke tagarafira ka arani inuni ina ano kaa tangai aporo mai ana tangaa, rainia ka maefanana o Kraes, make qono rai wau ka aerafa iata, make fagaugurigami rai tarofania ana ki ngatakena nga na inuni na fafaikorokoro afainia nikao. ²⁰ Nga igami kaa kami tamasi rainia ko Kraes, hoi make manga o God mereana ne onira na inuni. Igami kaa kami ura rai tamasi ana mwa tangaa ko Kraes ngai kee, woi igamu kamu naka ko God ki riririgamu kamu aporo mai tangaa ki ngaia nikao. ²¹ God ke tanua ko Kraes na mwane marefa ni aerafaga ke qanufia ka aerafa tangagia, ki igia ka fakufaku afainia ko Kraes kai akau mai kai otooto i maana o God.

¹ Igami kami tagara faku afainia ko God, kami fagakanukanugamu, siana kamui takotako purua rainia na korofa iana o God ne wategamu kena, ² suria ne woi, “E taua ka mataina iaku nau korokoro tangagamu, kau rongogamu, mina tangiana tangaa na fagatafinga, kau tatamanigamu.” Mui rongoa! Au woi tangagamu wau, nga noga na mataina kaa ka mataina o God ne koro tangagamu, nga ngai kee noga ka tangiana o God ne fafagatafigamu. ³ Igami ke marefa mi oqani fagaera mangatata ana ka inuni, rea wau maka tangatangaera ana ka tagarafa iamami tangaa ko God. ⁴ Maaka igaa na arani mwarao nami tatanui, kami fagaqao rainia woi igami ka kare iana o God mwora wau nga, suria mi marumu mwa ni qanufi ana ka aerafa, arani fafaranifa mina arani mataina ne qaraqara gaa, ⁵ igaa na raramwosigami ana, a kasigami ina peresin, a rurufa na inuni ka gogogofigami, maka mi tagara rafa wau, marefa mi mauru igaa ka qongiani mina ngaufa. ⁶ Taufananami ki igaa na taraganifa, maka mi girara ko God, ma mi gira mangariaga ana farufaru, maka mi koro tangara ka inuni, mi nafunia ka Figona Apuna maka mi oqa koro mwora nga. ⁷ Mi tatamasia ka mworana woita maka mi nafunia ka ramwofa iana o God. Mi taura i rimamami otomami mi mafamami ka mwarao ni fainafunafu ana igaa na otofa ina taufanamami. ⁸ Tana inuni ka tako fagaakaufigami, mi tana inuni ka ono qau wato rainigami, tana inuni ka tamasi kasigami akau mi tana ani ka tamasi fagaerisigami. Tana inuni ka tanugami manga na mwane ni sukasukanifa, mi igami kami tatamasia raorao mwa ka mworanifa. ⁹ A giraragami menamenai wau maaka tanugami manga na ma nai giraragami ia. A tako woi mi magafuru, maka mi mauri kami ogaoga kaa. A nafuigami make marefa nai nafuigami kami mae. ¹⁰ Manga mi fafaitakoi wau, minga kami wawagewage wau ina arani mataina, marefa ni tonga nafuninga iamami minga kami fagaarafara kai inuni rako wau igaa na apanana iana Arafa, marefa ni tonga mwarao iamami maaki nga igami kami nafuni ka arani mwarao igaa na apanana iana Arafa. ¹¹ Hoi na goamami i Korint, nga na arani mwarao kami tamasi mawe tangagamu gaa, maka mi fagaqao rainia suria mi oqa koro tangagamu wau. ¹² Igamu kamu regigami nami oqa koro tangagamu, mi nga igamu ke marefa mi rea na oqa korofa iamiu tangagami kaa. ¹³ Au migamu tamasi manga i kareku ia ngai kee. Igamu kamui fagaqao rainia ka mangata koro mi fagaqaosigamu rainia ia, ki igamu kamu fagaqao mai woi igamu kamu oqa koro tangagami mwora. ¹⁴ Siana kamui fakufaku afainira ka inuni ne ma nai tangamworani. Manga ifai a korofa ke gira faku afainia ana ka aerafa? Fea, a mwawetana ke gira faku afainia ana ka rotorotoaganifa, naa? ¹⁵ E asa mwa ko Kraes ni arao faku ka mangatana afainia ko Satan, make ma ni araria ka mwane ne tangamworani ki gira nafunia ana ka mangata faku afainia ka inuni ne ma nai tangamworani. ¹⁶ E asa mwa ka nunuta na mwarao purua na wogasira nai taotao igaa na Ruma ni Wogasifa iana o God, naa? Nga igia kaa ka Ruma ni Wogasifa iana o God ne tafi. Manga o God mereana ne woi, “Inau kau ogaoga afainira ka kare iaku, makau afarofaro afainira. Nga inau kau taotao rai God iata, mi ngaira ka taotao rai kare iaku.” ¹⁷ Mina Arafa ke woi, “Mui nakara wau ka inuni getera gena, maka mui siki fura panira. Siana kamu fakugamu afainigi na mwarao ne marefa ni koro gena, makau aganarigamu. ¹⁸ Inau kau taotao rai emamiu, mi igamu kamu taotao rai kareku na mwane mina fefene. Nga inau o God na faufugana kau woisia na agua kaa.”

¹ A goaku koro, suria o God ke tamasia ka mwarao gaa tangagia, igia ke araria nai fagataraganisigia, kai oga mai panigi ka aerafaga ne fagaerisi na apeka mina mangataka gaa, suria igia kai tako fagafigaia ko God, kai arao suria mwora nga ka agua ne apuna. ² Mui naka ka kere qaiawoa tangagami i maurifamiu gena! Igami ke marefa mi tanua ki tana mwarao ni aerisia ki tana inuni. Mi igami ke marefa mi kakatofira ki tana inuni kai tatanui na agua ne aera, kee mi fagaqekara ka inuni rai tawora ana ka mwarao iata. ³ Marefa qai woisia ka mwarao kaa nai tangatangaeramiu ana, marefa. Au qani woi tangagamu fato noga ia, igami kami oqa koro wau tangagamu, manga nami tafitafi kee nami maemae maki igia ka faku mwa. ⁴ Hoi igamu kamu fagagatagata apeku. Au tangamworani rainigamu, makau qaqaeaga wau rainigamu. Fenaka na aerafa ke taugami, inau kau wagewage wau. ⁵ Mataina inago rao mi rao mai i Masidonia, marefa wau ka mamarofa tangagami rainia ne rako wau ka aerafa ina arani agua, ainuni ka fafaisurasura fainigami wau raorao maka mi maagu mereamami rao mwa. ⁶ Mo God ne fafagagatagatanira na inuni ne watowato na maurifata, ke fagagatagatanigami rainia ka raofa mai iana o Taetas. ⁷ Marefa ka raofa mai iana mwa kami wagewage rainia, maka tarofa rainia woi namu koro tangaa. E woi tangagami woi igamu kamu oqania wau rai reau ana, mina faitakoifa rainia na aerafa iamiu, minga takena mu nanau rai ura pusiau ana, ki inau kau amani wagewage rafa wau. ⁸ Au takoigamu ngaia. Ina mataina nau qani segea wau na leta tangagamu ia, au tanugamu kamu fatami aera rainia. Igamu kamu fatami aera suria rao mwa ka kere mataina sisitai mwa, hoi mi inau ke marefa qai fatami aera rainia. ⁹ Hoi ki inau kau wagewage wau, marefa qai wagewage suria nau fagaera mangatamiu, miki suria mwa na faitakoifa iamiu gena ke totoraigamu rao ke orisi ka mangatamiu, mu ogaoga faitakoi suria ngatakena o God ne oqania tangagamu. Hoi ka leta iaku kaa ke marefa ni fafagaerisigamu. ¹⁰ Mataina namu fafaitakoi rainigi na aerafa iamiu igaa na faioqanifa iana o God, igamu kamu riri pania ka aerafa iamiu. Mo God ke fafagatafigamu, make ma mu gira maaki ana igaa ka taufa faoru iamiu. Hoi maake manga namu fafaitakoi igaa na takofa iamiu mereamiu, make ma mu gira tawo ana ka tafinga, maka mu maemae. ¹¹ Mui rea ka agua ne wora tangagamu kaa, na mataina mu fafaitakoi igaa na faioqanifa iana o God, nga ngai kee mu marumu rai tanui ana ka mwarao, maka mu rarapasia kamu fagaotora ka mwarao ne aera. Igamu kamu panga rainia ka aerafa iata tana inuni, maka mu tako rafa rainia ko God, migamu kamu oqani ka fagaetangira ana ka inuni na tanui na aerafa gena. Mu faitakoi tangau, maka mu oqania nga rai tamaniau ana. Igaa na arani mwarao gaa ke fagaqao woi igamu ke marefa mu qanu igaa ka aerafaga kena. ¹² Mataina nau segea wau na leta ia, marefa qai sege suria nai takosia ana mwa ko wani ne tanua na aerafa tangaa tana inuni, kee o wani na tanua ke aera tangaa kena, make manga kaa, au sege wau tangagamu, woi namu nafunia ka takotakofa gatagata igaa ka apanana iana o God rai tau woita iamami ana. ¹³ Rainigi ka arani mwarao gaa igami kami wagewage wau. Tana mwarao nikao ne fagawage apemami, ki ngatakena nami rea na wagefa iana o Taetas, suria na maurifana ke koro rainia mu tamania. ¹⁴ Au tamasi qaqaeaga tangaa ko Taetus rainigamu woi na taufa iamiu ke koro wau, hoi namu fagamworaia ngaia. Manga na tamasi qaqaeagana iamami rainigamu kamu fagamworai noga gena, ua arani mwarao nami tamasi tangagamu ke mwora wau nga. ¹⁵ Taetus ke oqa koro wau tangagamu suria ne takosia namu tautau woita iana maka mu tako fagaakaufia afainia ka maagufa, maka mu onoono suria koro na mataina ne rao wau tangagamu. ¹⁶ Inau kau wagewage wau rainia nau fagaugurigamu wau nga.

¹ Hoi, na goaku igamu, mi oqania mui girara ka korofa o God ne mafata rainia tangara na siosi ina provins i Masedonia tangara tana inuni. ² Apena faiofongifa rafa na qani qanufi, make ma ni tonga nafuninga iata, maaka wagewage mwa maka gira mafata ana rai tamanira ka inuni. ³ Au woisia wau mwora woi ngaira ka mafata rai ka arani mwarao na takosi rai mafata rai ana, minga ka mafata rai nga tefaria ki ngatakena mafatanifa iata. Nga ngaira mereata ⁴ ka nongigami rafa wau, woi igami kami nanakara wau ki ngaira nikao makai gira tamanira ana ka inuni na apuna tangaa o God irarona finua i Jiudia. ⁵ Igami kami panga rainia wau rainigi na mwarao na matafa rai, maka mafata rainira mereata inago tangaa ko God, mi muri mai maka mafata rainira mereata tangagami rai tau suria ana ka faioqanifa iana o God. ⁶ Igami kami fagakanukanua ko Taetus na mwane ne anega na tagarafa ni fakua ana na rurugua, ki tagara mwa ki arao rai tamanigamu ana ki fagaofua ka tagarafa kena. ⁷ Igamu kamu tanui ka mwarao koro aera wau, maka mu mwora wau igaa ka tangamworanifa, maka mu tamasi koro wau, maka mu girara tefa wau, maka mu oqani rai tamanira ki tana inuni, maka mu komanigami tefa wau. Hoi maka mui mamafata rafa wau nikao tangara ka inuni i Jiudia. ⁸ Inau ke marefa qai girugamu woi mui arao suria, makau oqania mwa qai tamasi rai fagatakegamu ana afainira ka inuni i Masidonia rai ofongia ana ka faikomanifa iamiu ke mwora. ⁹ Igamu kamu qani girara woi ne koro rai arao suria ana ka korofa iana na Arafa iaka o Jisas Kraes, e arafanga manga ngai kana, make tanua mereana ke marefa ka nafuninga iana tangagamu na inuni, rai fagarafagamu ana rainia ka mwatareafanana. ¹⁰ A takotakofa iaku ke manga kana, e koro tangagamu manga namu fafagafatongia ka agua namu qani anega ina farisi ne fato. Nga igamu kamu anega kamu katofia ka agua kaa, mi nga igamu kamu anega rai tanu ana nikao. ¹¹ Hoi mui fafagafatongia ka tagarafa kaa. Nga igamu kamu aganaria rai tanu ana, hoi mui fafagafatongia rai mafata ana suria ki ngatakena na mwarao namu nafuni. ¹² Manga igamu kamu marumu rai mafata ana, o God ke wawagewage wau rai ka mwarao namu nafuni namu mamafata rai gena, marefa ni gira tako qao aera ana rainia ka mwarao ne marefa mu nafuni rai mafata rai ana. ¹³ Takotakofa iaku ke marefa qai fafagaqarasia tangagamu mina tatamanira ana ki tana inuni, marefa. Au oqania woi na inuni kai ogaoga afaiworagi mwa. ¹⁴ Ina mataina kaa kamu nafuni ka mwarao ne rako wau, ke koro wau manga mui tamanira ka inuni marefa nai nafuni mwarao rako. Ka mataina mu aqouqou rai ki tana mwarao mi ngaira ka nanafuni rako, ka gira tamanigamu ana. Nga na mangamangata manga kani ka inuni ka gira oga afaiaworagi ana. ¹⁵ Manga na Segesegefa Apuna ne woi ia, “Ainuni ne ruguni rako mai na ngaufa, ngaia ke marefa ni gira nafuni matara rao. Mina ainuni ne opaopa mai sisitai mwa na ngaufa, ngaia ke marefa ni gira aqouqou ana.” ¹⁶ Mi tamasi korokoro tangaa ko God rainia ne naka ka takotakofa manga nau nafunia kaa i mangatana o Taetus rai tamanigamu ana. ¹⁷ Marefa ni marumusia mwa ka nongifa iamami, maka faioqanifa iana mereana mina marumufa iana rai regamu ana, ¹⁸ maka mi kasia wau nikao ka goaka afainia ko Taetus. Igaa na arani siosi ngaira ka fagaakaufia, suria ngaia nikao make tatarofainia ka tarofa koro. ¹⁹ Tana mwarao nikao ka siosi ka usu atea ki ngaia ne takugami rai torai ana ka rurugua na fakua ia. Mi tagarafia ka tagarafa kaa rai fagaakaufia ana ka Arafa, mina fagaqao ana woi igami kami oqani tamanira ana ka goaka. ²⁰ Mi ono suria ka mafatanga iata gaa menamenai nami rao kaa rai ura pusia ana ka woita aera ni akau mai panira ka inuni. ²¹ Hoi kigami kami onoono suria menamena nga, rai tanua ana ki otooto i maana na Arafa mi maata na inuni nikao. ²² Maka mi kasia wau nikao ki tana goamami afainiraurua. A mwane nami ofongia rainigi na arani tagarafa, maka mi girara woi ngaia ke marumu wau rai tamanigamu ana ina mataina kaa suria ne fagaugurigamu. ²³ Mu girara ko Taetus, ngaia ka tamaku ne tatagara afainiau rai tamanigamu ana, mi tana goaka iraurua ka mwane na kasiaraurua mai na siosi gaa na taufanataurua ke fagaakaufia ka atana o Kraes. ²⁴ Hoi ki igamu kamu kokomanira ka mwane ne eoru gena, i maata fato na inuni ina siosi, rai fagaqao ana woi ne ararigami rai qaqaeaga ana rainigamu.

¹ Marefa qai oqani sege wau ana rainia ka rurugua namu fakua tangara na inuni na apuna tangaa o God. ² Suria nau girara ka marumufa iamiu ni faitamani ana makau kasikasigamu akau tangara ka inuni i Masidonia, makau woi tangara, e anega ina farisi ne fato ke mai taua na mataina kaa, igamu na inuni i Akaea kamu nanau mwa ni faitamani ana, mina marumufa iamiu ke watera ki tana inuni ka apena takotakofa rafa ni mafata ana. ³ Nga ngai kee nau fagatora wau o Timoti mina mwane ne erua afainia, ki siana kami tamasi purua mwa, mataina mi kasigamu akau igaa na agua manga gaa. Maki manga nau woisia ia ki igamu kamui nanau ngatakena igamu kamu mamafata. ⁴ Ki manga tana inuni i Masidonia ka arao mai afainiau ka rorogoigamu woi ne marefa mui nanau, maka mi mamaaki suria mi nafunia ka tangamworanifa rainigamu, migamu nikao maka mu mamaaki wau. ⁵ Nga ngai kee nau takosia woi ne araria qai fagatorara ka goaka wera eoru gaa kai qainago wau tangagamu, kai tanua ka fagananaufa rainia ka mafatanga mu qani woisia woi mu pagai fakua ia, mi muri kau kafu matarofigamu wau. Hoi ka mafatanifa iamiu ne nanau fato noga, ke fafagaqao rainia woi igamu kamu mafata suria ka faioqanifa iamiu mereamiu, make marefa woi mi qonasigamu. ⁶ Mui tatakosia ka mwarao kaa, ‘Otai ne fasifasi sisitai, ke opaoparia ka mauatagana sisitai, mo otai ne fasifasi farisi rafa, ke opaoparia ka mauatagana rako.’ ⁷ Ainuni ke araria ne mamafata ngatakena ne takosia mereana ne mamafata. Siana ka qoqonasigamu maka mu kafu mamafata, suria o God ke kokomanira ka inuni na mamafata fainia na mangamangata koro. ⁸ Ko God ke gira wategamu ana ka arani mwarao tangagamu, igaa ka arani mwarao ina arani mataina, kamu nanafunia ka arani mwarao mu oqani gena, maka mu gira mafata ana tangara ka arani tagarafa koro kaa. ⁹ Manga na Segesegefa Apuna ne woi ia, “Ainuni ne fafagagofia na mafatanga iana tangara na inuni ne marefa na agata, ka otofa iana ke tao tarai tarai.” ¹⁰ Mo God ne mafata rai fafasinga ni fasi ana, mina ngaufa ni ngaura ana ke mamafata tangagamu make wawategamu rafa wau ka mauatagana, hoi ki igamu maka mu gira mamafata ana tangara ka inuni ne marefa na agata. Hoi mo God ke tanua ka tagarafa koro iamiu ne oto ke rafarafa tefa wau. ¹¹ God ke mamafata tangagamu ina arani mataina, ke totonga nafuninga iamiu kamu mamafata tatarau ina arani mataina, ka inuni kai gira tamasi tangasia ana ko God rainigi ka mafatanga iamiu nami pagai wawatera gaa. ¹² Hoi ka tagarafa koro namu tanua kaa ke tatamanira mwora nga ka awanuna o God, make tanura nikao ka pagai tamasi tangasia wau nga ko God. ¹³ Ka tagarafa koro iamiu kaa ke fagaqao rainigamu tangara ka arani inuni, ka tamasi tangasia ko God rainigamu suria mu rao suria ka woita iamiu rainia na tarofa koro iana o Kraes kaa, maka mu koro wau ni tamanira ana, mina tamanira ana ki tana inuni rao nikao. ¹⁴ Ngaira ka gira fagarafe tangagamu ana maka gira takosigamu ana rainia ka korofa rafa iana o God ne fagaqaosigamu rainia kani. ¹⁵ Igia kai tamasi kasia akau ko God rainia ka mafatanga iana ne wategia ne tefaria rao nikao ka mwarao na gira fakania ana.

¹ Tana inuni igamu gena ka woi, “Mataina o Pol ne arao panigia ke tamasi raramwofaga wau tangagia, hoi mina mataina ne arao mai tangagia ngaia ke qoqonunuaga.” Mui rongo mai. O Kraes ka mwane ne koro make marefa ni gira mangariaga mafarufaru ana. Inau kau arao suria mwa ka taufa iana makau nongigamu kaa. ² siana kamu qoqonasiau woi inau qai tamasi raramwofaga tangagamu ina mataina nau arao mai kau taugamu, maki tangara ki tana inuni na wowoi igami kami arao suria ka taufa ina ano kaa. ³ E mwora igami kami ogaoga ina ano kaa, maake marefa mi oqani arao suri ana ka taufa iata inuni ina ano kaa igaa na fainafunafu ana. ⁴ A mwarao na fafainafunafu rainigi gaa, ke marefa ka mwarao ni fainafunafu ana ina ano kaa, maka mwarao ni fainafunafu ana igaa na ramwofa iana o God, ngai gi gaa rai fogera ana wato ka para ura iana ataro. ⁵ Igami kami fafagamunira ka arani tamasinga qaqaeagana iata na inuni na tamasi aerisia na giraranifa rainia ko God kaa, maka mi gira orisia ana ka takotakofa iata kai arao suria ka mangatana o Kraes, ⁶ maka mataina mu fafagaqao rainia woi igamu kamu tautau woita iana o Kraes, mi igami kami nanau mwa rai fagaetangi ana ko otai ne tofega. ⁷ Igamu kena ke araria mu onoono girara menamenai ka mwarao namu regi, manga tana inuni ke tako woi ngaia ka kare iana o Kraes, ngaia ke araria ni tako girara nikao, suria igami maka kare iana o Kraes nikao. ⁸ Ngaia na Arafa ke ono sikifigami rai tamanigamu ana igaa ka tangamworanifa iamiu, miki marefa rai fagaerisia ana ka tangamworanifa iamiu. Make manga nau tamasi rarasiau tangagamu rainia mwa ka ramwofa kaa, inau ke asa mwa qai maaki rainia. ⁹ Marefa qai oqani fagamaagusigamu ana rainigi ka woita igaa na leta iaku gaa. ¹⁰ Suria tana inuni ka woi na segesegefa iana o Pol gaa ke raramwofaga wau, make manga ne uraura sugugia ia, mina mataina ne mai ogaoga afainigia ke qoqonuaga mina woita iana gana ka mwarao purua mwa. ¹¹ Ainuni manga ngai gena ke araria nai tako girara woi, a mwarao nami tamasi igaa na leta nami segera tangagamu na mataina nami ogaoga fagataurigamu, mina mwarao nami tanui na mataina nami ogaoga afainigamu ka agua ngai ge ke faiaworagi mwa. ¹² Ki igami ke marefa mi oqani ategami mereamami kee na fagafakugami ana mereamami afainira ki tana inuni na wowoisira mereata maka gira fagatakera ana mereata sio mwa, ka giraranifa ke marefa afainira. ¹³ Igami ke marefa mi gira tamasi rarasigami ana rainia ka mwarao marefa mi tanui. Mi tamasi rarasigami mwa rainia ka tagaranifa iana o God ne fagatoragami ni tagarafia ana kaa, ka tagarafa rai tamanigamu ana. ¹⁴ Rao ki igami ke marefa mi qani rao mai tangagamu, igami kami tawatawa rarasigami mwa. Make ma ni manga kana, suria mi qani rao wau kami taugamu afainia ka tarofa koro iana o Kraes. ¹⁵ Igami ke marefa mi gira tamasi rarasigami ana rainigi ka tagarafa iata tana inuni, manga nami tanui mereamami. Hoi maka mi oqania mwa woi na tangamworanifa iamiu ki rafa ki nganganiaga, ke tanugami kami gira tamanira ana ki tana inuni i finua iamiu gena kai tatangamworani nikao. ¹⁶ Kami gira tarofainia ana ka tarofa koro tangara ka inuni fura wau panigamu gena, suria marefa mi oqani tamasi rarasigami ana rainia ka tagarafa na qani fagaofura tana inuni. ¹⁷ A Segesegefa Apuna ke woi, “Naka ko otai ne tamasi qaqaeaga kena ki tamasi qaqaeaga mwa igaa ka mwarao na Arafa ne qani tanui.” ¹⁸ Hoi o God ke ma ni oqania ka inuni ne kasikasia akau mereana, maaka ainuni na Arafa mereana ne kasia akau.

¹ Koro mwa mui nakau qai tamasi rao manga na qeka ia sisitai rao mwa. ² Inau kaa kau faikekesi rainigamu ngai kee, manga o God ne faikekesi rainigamu kana, makau wonoigamu tangaa ka mwane ne etagai ni auragia ana, ngaia ko Kraes, ki inau qai mamafata rainigamu tangaa manga na kare weru ia. ³ Maaki inau kaa kau tako aera sisitai rainigamu ngai kee, rea mwa maka fagaqekaqekara ka mangatamiu, kamu kasi ka mangamangata koro iamiu ne taragani gena mina oqa koro ana iamiu tangaa o Kraes. Ma ni koro ne manga na mataina na mwaa aera ne sukaia ka Ivi rainia na woita ni sukasuka ana iana igi. ⁴ Mu fagamarumungainira ki tana inuni na arao mai ka tatarofainia tangaagamu na Jisas getea rao pania ko Jisas mi tarofainia kaa, mina nafunia ka figona getea rao pania na Figona Apuna namu qani nafunia kena, kee na tarofa getea pania na tarofa koro namu qani rongoa kena. ⁵ Inau kau girara woi na arani mwane namu woisira woi na “aposol koro” gena, ki ngaira ke ma nai rafa tefariau. ⁶ Manga ne marefa qai gira tamasi menamenai ana, maka apanana igaa na tarofa koro kau girara tefa wau, ka arani mataina kami fafagaqao rainia ka giraranifa iamami ke taragani tangagamu kigamu. ⁷ Inau ke marefa qai nongigamu rai woriku mataina nau tatamasia na tarofa koro iana o God tangagamu. Agua ngai kee, kau kasiau wato mereaku makau fagaakaufigamu kigamu. E fea, mu woi mwa nau tanua ka aerafa ngai kee? ⁸ Miki tana siosi gaa ka woriau rai tagara ana i qaiawogamiu, make manga nau fanago panira gaa rai tamanigamu ana, ⁹ maka mataina nau aqouqou rai mwarao ina mataina nau ogaoga afainigamu kaa, ke marefa qai fagatakougania ki tana inuni igamu, suria na goaka na rao mai pania i Masidonia ka mafata tangaau rainigi na arani mwarao fato nau oqani. Inago ki inau ke ma qai fagatakouganigamu, mina mataina ne arao mai kana make marefa. ¹⁰ Hoi au tamasi mwora ngai kee igaa ka tamasinga iana o Kraes nau nafunia mwora kaa, marefa ki tana inuni irarona provins i Akaea ni uraura pusiau rai tamasi qaqaeaga ana kaa woi inau ke marefa qai tawoa ka rurugua panira. ¹¹ Manga ifai? Au tamasi manga kaa suria ne marefa qai oqa koro tangaagamu? Marefa! O God ke girarau woi inau kau oqa koro wau tangagamu. ¹² Inau kau tarofainia ka tarofa koro ne ma ni woriau, manga nau tanua raorao mwa ia. Hoi ka inuni gena ke marefa nai gira qaqaeaga ana rai tanui ka mwarao manga igami nami tatanui. ¹³ A mwane ngai gena ke marefa ka aposol mwora, ngaira gena ka mwane na susukasuka rainigi ka tagarafa iata, maka rarapasira mereata nai qaoqao mangara na aposol iana mwora o Kraes ira. ¹⁴ Hoi, ka mwarao ngai kee ka mwarao ne marefa ni araria nai papanga rainia suria o Satan make tanua mereana ke qaoqao manga na enjel igaa na maweta ia. ¹⁵ Ke marefa nai papanga rainia, manga na kare iana ka tanura mereata ka qaoqao manga na mwane igaa na otofana ira, maki ina qotona ngaira ka fafagaetangira rainigi ka mwarao na tatanui gena. ¹⁶ Au oqania qai woisia wau nikao, suria tana inuni ka woi nau qeka. Inau ke marefa ka qeka, hoi make manga namu woi manga kana, makau oqania mui rongoau, kamu nakau qai tamasi manga na qeka ia rao sisitai nikao. ¹⁷ Igaa na tawatawa rasiau ana kaa, inau ke marefa qai tamasi manga ngatakena na Arafa ne oqaniau qai tamasi, makau tamasi manga mwa na qeka ia ngai kee. ¹⁸ Miki suria mwa tana inuni ka tamasi kasira akau igaa ka mangamangata koro inago kaa, ki inau nikao makau tamasi manga ngai kana. ¹⁹ Fenaka mu tako woi igamu kamu girara wau, maka mu gira rongora ana ka inuni na qeka gena. ²⁰ E mwora wau, igamu kamu marapesira, manga na atani okegamu raorao mwa, kee na fafagaqekagamu, kee na sukasukaigamu, kee na tamasi qau wato rainigamu, kee na fififita qarigamu. ²¹ Au maaki wau, suria igami kami mwarumwarusiga wau rai tatanui ana ka agua manga ngai gana. Hoi au tamasi rarasiau rainigi ki tana mwarao tana inuni gaa na tamasi rarasira rainigi gaa, manga nau tamasi manga nai inuni na qeka, makau tako gatagata ni tamasi manga kaa ana. ²² Ngaira ka wowoi, ngaira gana ka ai Hibru, mi inau nikao. Ngaira ka wowoi na inuni Israel ki ngaira, mi inau kaa nikao. Ngaira ka wowoi na waro ni inuni igaa o Ebraham ki ngaira, mi inau kaa nikao. ²³ Ngaira ka wowoi ngaira gana ka kare iana o Kraes, nga inau kaa ka kare iana mwora o Kraes. Nga inau kaa kau tagara rafa wau tefarira, a kasiau ina peresin tana mataini, a raramwosi aerisia wau, nga inau kaa kau fagani maemae raorao mwa ina arani mataina. Ngaia ngai kee nau rongo manga na mwane ne qeka kaa. ²⁴ Fagaerima ka mwane rafa iata na Jiu ka woisia ka raramwosiau, a ramwosiau fagatangafuru ne eoru matara esiwa (39). ²⁵ Fagaeoru ka mwane rafa iata na Rom ka woisia ka raramwosiau rainia ka mata, fagaetagai ka arifarifau rai fau, fagaeoru kau kokoro igaa ka faka, fagaetagai kau tare irarona na asi suria ka qongiana mina tangiana igaa ina awoa tatara. ²⁶ Igaa na arani raofa iaku gaa, au fagani mae igaa ka wai afeafe, maka fagani nafuiau ka fanagoa. Au fagani mae i rimata na Jiu, makau fagani mae i rimata na inuni marefa na Jiu. Au fagani mae ina finua rafa igi, mina mwani qai mwou mi i asi kana nikao, makau fagani mae i rimata na mwane na gogoaniau suka gena. ²⁷ Au tagara rafa wau, au tagara raorao miki tana mataini ke marefa qai nanafunia ka mataina ni maurufa. Au fafatamia ka magaua mina mamata ana ka rioku miki raorao mwa ke marefa qai ngaungau miki qai totono. Au marato wau makau aqouqou rai gafu. ²⁸ Tana mwarao nikao, ki ina arani tangiana kaa kau tatakosira raorao mwa ka arani siosi. ²⁹ Mataina tana inuni ne watowato igaa na maurifana, inau nikao make watowato ka maurifaku, mataina tana inuni na totoraira na inuni na tangamworani tangai aerafa, inau kau mangariaga wau. ³⁰ E fea mui oqaniau qai tamasi qaqaeaga? Hoi makau tatamasia ka mwarao ne fagaqao rainiau woi inau kau mwarumwarusiga. ³¹ O God ne Emana na Arafa iaka o Jisas, na fafagaakaufia tarai tarai kaa, ke girarau inau ke marefa qai sukasuka. ³² Irarona i Damaskas, tana mwane rafa i rufagana arafa ni finua o Aretas ke oqani roiau ana, make kasira ka kare iana ka ono suria ka arani maana para ne rifuia na finua rafa kena. ³³ Hoi mi tana inuni na tangamworani ka tamaniau, maka togoniau igaa ka qasu maka kuuniau wato i metara igaa ka warara igaa na para rafa kena, makau gawa kau rao pania.

¹ Inau kau tamasi qaqaeaga manga kaa, manga ne marefa ka korofa ni wawategia, makau tatamasia ka maurutaifa iaku mina mwarao ne punufi ne fagareau rainia na Arafa. ² Au girara ki tana kare iana na Arafa ne akau ina aoruta i Heven ina qaiawoa i afaafa noga, e akau ina tangafuru i farisi matara efai (14) ne fato wau. Marefa qai girara wari na apena ke rao kaa, kee wari na maurutaifa iana, ngaia mwa o God ke girara. ³ Au wowoisia rao nikao, au girara o wani kana ke akau i Heven i afaafa noga, make marefa qai girara menamenai wari na apena ke rao kaa, kee wari na maurutaifa, nga o God mwa ke girara. ⁴ Ngai kana kee ke oga ke rongora ka mwarao ne tefaria rao nikao ka mwarao na gira fakania ana, make apuna wau nikao tangaa ka inuni ni tamasi usu rainigi. ⁵ Ki inau kau gira tamasi kasia akau ana ko wani kaa, make marefa qai kasiau akau ki inau mereaku, makau tatamasia mwa woi inau kaa ka mwane nau mwarumwarusiga wau. ⁶ Manga nau oqani tamasi rarasiau ana, marefa qai tamasi ka agua ni sukasukanifa manga na qeka ia, maakau tatamasia mwa ka mworanifa. Marefa qai tatamasi ka mwarao nau rongora i Heven, suria marefa qai oqania ki tana inuni ni takotako fagaakaufiau rainia ka maurutanga kana, makau oqanira nai takosi mwa ka mwarao nau tanui mina woita nau tamasi. ⁷ Hoi a mwarao ne sugiau kaa ke manga na sutana mori ia, a mwarao kaa ka enjel iana o Satan ni fagamakukuau ana. A mwarao kaa ke tanuau ke marefa qai rararasiau rafa wau kaa rainigi ka apena mwarao rafa inagoka rao gana, ne fagaqaosiau rainigi o God gaa. ⁸ Au nongia wau nga ka Arafa fagaeoru rainia ka mwarao kaa ni tawoa rao paniau, ⁹ maake woi tangaau, “Marefa. Nga na korofa iaku ki ngaia ka arani mwarao no oqani gena suria na ramwofa iaku ke rafarafa wau manga namu mwarumwarusiga.” Hoi makau wagewage rai tamasi qaqaeaga ana rainia ka mwarumwarusigafanaku kaa, ka ramwofa iana o Kraes ki ogaoga afainiau. ¹⁰ Nga ngai kee, suria mwa na apanana iana o Kraes, au nafunia ka mwarumwarusiga ana i maurifaku, a tamasi aerisiau kai inuni makau tatarafu ka mwarao ne qara, mina inuni ka fafagaetangiau, mina arani mwarao ne asaasa wau, mi inau kau oga wagewage igaa ka mwarao gaa, suria nga na mataina nau mwarumwarusiga, ki nga na mataina nau nanafunia na ramwofa iana o Kraes. ¹¹ Au tanuau manga na qeka ia mereaku, nga igamu kamu gusu rainiau tangaa kaa, nga igamu ke araria mu tamasi gusu rainiau rainia ka tagarafa koro nau tanua gaa, fenaka inau ke manga na mwarao purua ia, maka mwane namu woisira rai ‘aposol koro’ gena ke ma nai tefariau. ¹² Au fagaworai ka fagaqaonga mina mwarao ne qao riariaga i qaiawogamiu fainia ka apena fagagatagataganifa, ke fagaqao rainia mwora woi inau ka aposol. ¹³ Nga ngai kee nau tamanigamu manga nau tanua tangara tana siosi gaa, maka mwarao ne etagai ne ma qai tanua tangagamu ke marefa qai fagatakougamu rai rurugua. Qaimiu! Rao kamu takosia woi nau tanua ka mwarao ne aera, au nongigamu mu qono rainia wau. ¹⁴ Hoi inau kau nanau rai regamu ana nikao, igaa ka aoruta na raofa wau iaku, make marefa qai fafagatakouganigamu, suria na mwarao nau oqania mwa ki igamu kena, marefa qai oqania ka nafuninga iamiu gena. Ki igaa na arani mwarao gaa, ka kere kare ke marefa nai gira garitainira ana tangara ke enana me emana, make enana me emana karu gira garitainira ana tangara ki kareta. ¹⁵ Ki inau kau wagewage rafa wau rai mafata rai ka nafuninga iaku tangagamu mina mafata rainiau ana rai tamanigamu ana. Manga na oqa korofa iaku ke rafa wau tangagamu, ke fea igamu kamu oqa koro tangaau sisitai rao mwa? ¹⁶ Manga ne manga ngai kee, hoi make ma qai fagatakouganigamu, maaki tana inuni ka woi inau kau fafagaqekaqekagamu rainigi ka woita ni sukasukanifa. ¹⁷ E fea? Au sukaigamu rainigi ka rurugua iamiu rainia ka mwane nau kasia wau ia? ¹⁸ Au nongia ko Taetas ni arao wau, makau kasia mai afainia ki tana goaka. Kee mu woi o Taetas ke sukaigamu rainigi ka rurugua iamiu? Tangagamu kamu girara, igamirua o Taetas kamuru nafunia ka mangamangata ne etagai mina takotakofa ne etagai igaa na tagarafa kaa. ¹⁹ Wari mu qani tako mai woi igami kami segera na mwarao gaa igi ki woi ni fafagaqao woi igami kami oto wau naa? Marefa! Mi tamasi manga ngatakena o Kraes ne oqanigami i matona o God. Arani mwarao nami tatanui gaa, na goaku igamu, kami fagaofura ni tamanigamu ana. ²⁰ Suria inau kau tako aera wau rainia na mataina nau arao wau, makau rorogoigamu wau marefa ki ngatakena nau oqaoqanigamu, maka mu reregiau, marefa ki ngatakena mu oqaniau qai qaoqao. Au tako aera wau suria na faisurasura ana wari ki qaiawogamiu, mina faikekesi ana, mina mangaringari farufaru ana, mina takosigamu ana mwa mereamiu, mina tamasira aerisira ki tana inuni, maka mu tamatamasira ka inuni, mina qaqaeaga ana mina arani mwarao ke marefa ni rao igaa ka otomigana. ²¹ Au tako rafa wau ngai kee, rea wau maka mataina nau aporo wau, mo God iaku ke fafagamaakiau i maamiu, makau tatakoira ka inuni na qani tanui na aerafa, make ma nai riri panigi na taufa aera gena. Ngaira ka qaqaga tatanu, maka tanu mangara na aoo ira.

¹ E kaa nga na aoruta nau arao wau kau taugamu ngai kee. Make manga na Segesegefa Apuna ne woi ia, “Mataina tana inuni ne tatamasia rao tana inuni ke fafagamworaia rainia ka tamani tamasinga ne erua me eoru.” ² Igaa na ruata na raofa wau iaku ia, kau qani tamasi fagafinarura ko otai mwa ne marefa ni marape ni tanui ana na aerafa. Mina mataina inau ne marefa afainigamu kena ki inau kau fafagaruatani woisia wau ana. Inau ke ma qai gira takoira ana ka ani na qani tanui inago na aerafa ira, afainira ka ani na tanui ina mataina kaa. ³ Au tanua ka agua kaa suria mu oqania ka fagaqaonga ni fagaqao woi o Kraes ke tamasi tangagamu igaa na woita iaku gaa. Ngaia ke fagaqao rainia ka ramwofa iana make marefa ni gira mwarumwarusiga ana. ⁴ Fenaka ne mwarumwarusiga wau ina mataina na rapusia igaa na taotaoworo, miki ngaia kina mataina kaa ke oga igaa ka ramwofa iana o God. Igami nami faku afainia ko Kraes, maka mi mwarumwarusiga, maaka mi pagai ogaoga afainia igaa ka ramwofa iana o God rai fagaotogamu ana. ⁵ Mui ofofongigamu mereamiu kamui rogoia manga igamu kamu mwora igaa ka tangamworanifa iamiu. Igamu kamu gigirara woi o Kraes Jisas ki afainigamu, nga mwa ne marefa mu tangamworani rainia ki ngaia. ⁶ Au tangamworani mu gira girara ana woi igami kami tangamworani nga rainia ki ngaia. ⁷ Hoi igami kami fagarafe tangaa ko God woi igamu ki siana kamu tatanui ka aerafa. Marefa mi takosia woi na inuni kai reregami woi mi oto. Marefa. Maka mi oqanigamu rai tanui ana ka mwarao koro, fenakara tana inuni ka tako woi igami ke marefa ka aposol mwora. ⁸ Marefa mi gira tanua ana ka mwarao rai fagaerisia ana ka mworanifa, maka mi gira tamania ana mwa ka mworanifa ki qau mwa ki arao. ⁹ Fenaka igami kami mwarumwarusiga, minga kami wawagewage mwa suria igamu kamu nganganiaga igaa ka tangamworanifa iamiu, maka mi fagarafe woi igamu kamu mworamwora igaa ka tangamworanifa iamiu. ¹⁰ Nga ngai kee nau segera wau na mwarao gaa, ina mataina nau mamaunga afainigamu. Hoi ka mataina nau taugamu wau ma qai oqani tangatangaeramiu ana rainia na ramwofa ne wateau na Arafa kaa, suria na ramwofa kaa rai tamanigamu rai tangamworani ana, maake marefa rai fagaerisigamu ana. ¹¹ A goaku, nga na fagafatongina woita iaku ngai kee. Mui fufukaringa tangai ka mwarao nau woisi gaa, maka mui rarapasia kamu akau mai menamenai nga. Mui ofongia kamui ogaoga igaa ka mangamangata ne etagai, maka mui oga igaa ka marapefa. Hoi ki igaa na agua kaa ko God, ne wategia na faikomanifa mina marapefa, ki ogaoga afainigamu. ¹² Mui kanakanasigamu fairifui manga igaa na kastom iaka, namu sisiginigamu mangara mwa na afarigoata ira. Arani inuni na apuna tangaa o God ka kasi wau ka tamasinga koro iata tangagamu. ¹³ Naka ka korofa iana Arafa o Jisas Kraes, mina oqa korofa iana o God, mina fakunga iana na Figona Apuna ki afainigamu fato.