1 Timoti

¹ Inau o Pol. God na fagatafi iaka mo Kraes Jisas karu tamasi gatagata tangau rai aposol iana o Kraes Jisas na fagauguria. ² Au sege wau tangago o Timoti, i kareku mwora ina fagauguringa iamami. Au fagarafe woi o God emaka mina Arafa iaka Kraes Jisas ki koro tangago, maki faitakoi tangago, mwarao makui ogaoga iga ka marapefa. ³ A mataina nau rao i Masedonia ia, au nongigo woi nui ogaoga mwa i Efesas rai mera tamasi ana ki tana mwane gena woi siana kai fafagausuringai ka fagausuringa ni qaqanganifa nikao. ⁴ Ki siana kai parisuri tamasi aigunua ana mina woraworanifa iata mai ne qorafu rafa aera, suria na mwarao gena ke nakanaka tara rai faitogiri ana. A mwarao ngai gena ke marefa ni gira tamanira ana ka inuni kai tatagara kai fafagauguria ko God. ⁵ Rao ka arao suri ka tamasinga iaku, ngaira ka kokomanira ki tana inuni. Nga na faikomanifa ngai ke ke rao mai pania ka mangata koro, a takotakofa koro mina fagauguringa mwora. ⁶ Tana inuni ka riri taragani panigi ka agua gaa maka riri tangai ka tamasinga ne marefa ni tonga takotakofa tangai. ⁷ Ngaira ka oqani tao rai mwane ni fagausuringa ana tangaa na Lo iana o Mosis, hoi make marefa nai gigirara ka mwarao na tatamasi, kee na mwarao na tako gatagata rai woisi ana. ⁸ Igia ka girara woi na Lo iana o Mosis ke koro rao, ke manga na inuni ke taua menamenai. ⁹ A girara nikao woi na Lo kena ke marefa nai tagarafia rai fagaotora ana ka inuni na koro, hoi minga rai fagaotora ka inuni na tofera na Lo mina inuni na tora getera, mina inuni na aera wau nga, mina inuni ma nai tako rafa rainia ko God, make marefa nai tako rafa rainia na wogasifa, mi fagaotora ana ka inuni na nafuira funuira ke enata ke emata, maka nafuira funuira ka inuni. ¹⁰ A Lo kena ka segea rai fagaotora ana ka inuni na tanui na agua aera qaiawogana na mwane mina fefene, kee na agua aera qaiawogana mwane mina mwane, kee na inuni na fafanagora tana inuni, kee na fafagaparu, kee na fafagaparu ina kot. Mi tana mwarao rao nikao ne uraura pusia na fagausuringa ne oto. ¹¹ A fagausuringa kena ke oto afainia ka tarofa koro ne mafata rainia mai tangau pania ka romana God i afaafa. ¹² Au tangasia ko Kraes Jisas na Arafa iaka ne wateau ka nganganiaganifa. Ngaia ke usuiau rai tanu ana ka tagaranifa iana suria ngaia ke fagauguriau rainia. ¹³ Ina mataina inago ia kau tamasi aerisia ko God, makau mamaramwanega, makau raramwosira ka inuni na rao suria o God, hoi mo God ke takoiau suria inau ke ma qai girara ka arani mwarao nau tanui gena, make marefa qai tangamworani rainia ki ngaia. ¹⁴ Ngaia ke koro wau tangau, make faganafuniau rainia ka tangamworanifa mina oqa korofa suria nau faku afainia ko Kraes Jisas. ¹⁵ ‘Kraes Jisas ke rao mai ina ano kaa rai fagatafia ana ka inuni ne aera.’ A tamasinga kaa ke mwora ne araria nai tatangamworani rainia. Nga inau kau aera wau nga tefarira ka arani inuni. ¹⁶ Hoi fenaka manga nau aera wau nga tefaria ko otai nikao, mo God ke takoiau make nakau kau tao rai fagaqao ana rainia ka marapefa iana o Kraes Jisas. Ngaia ke tanua ka agua kena, suria ne oqanira ki tana inuni kai nanakai ka fagauguringa iga ko Kraes mina nafunia ana ka tafinga tarai. ¹⁷ Ngaia o God ke Arafa tarai, Ne ma ni gira mae ana. Marefa ko otai ni gira rea ana. Ngaia etagai na togo ko God, Rai wogasia ana tarai tarai. Amen. ¹⁸ Timoti, i kareku, a fagausuringa nau watego gaa ke tao iga ka woita iata tana maurukari na qani woisi rainigo igi. Rao ko tautausuri ka fagausuringa gaa, igo nga no fafaisuasua menamenai ngai kena rai tamania ana ka taufa koro, ¹⁹ rai taua nganganiaga ana ka fagauguringa mina takofa ne taragani. Tana inuni ka ngaroitai ka mwarao gaa maka fagaerisi ka tangamworanifa iata. ²⁰ I qaiawoagata na inuni gena ko Haemeneas mo Aleksanda. Au mafata rainiraurua ko warua gena noga tangaa ko Satan, woi naru onoono girara ki siana karu pagai tamasi aerisia ko God.

¹ Ua iga na nagonagona, au fagakakanugo rai fagarafe ana tangara ka arani inuni, mina nongia ana ko God ki tatamanira, maki ono korofira ki ngaira fato, makui tatangasia ko God rainira ka inuni gena. ² Fagarafe tangara ka arafa ni finua mi tana mwane rafa rao nikao, kami ogaoga marape makami ogaoga menamenai afainira ka inuni rai rao suria ana ko God mina oga otooto ana. ³ Nga na fagarafenga manga ngai ke ke koro, make qao koro i maana o God na fagatafi iaka. ⁴ God ke oqani fagatafira ana ka arani inuni mina fagagirara ana rainia ka mworafa. ⁵ Ngaia etagai na togo ka God mwa, mo Kraes Jisas ki ngaia mwa etagai ke gira toraigia ana tangaa ko God. Jisas kana ka inuni mwora, ne mafata rainia mereana rai fagatafigia ana ki igia fato. ⁶ God ke fagaqao nga rainia tangagia ka agua kaa iga ka mataina nga ne oto. ⁷ Ngaia ngai ke, o God ne usuiau tangai mwane rai tamasi ana mina aposol tangai tarofainia ana ka tarofa koro. Au wowoisia wau ka mworafa ngai ke. Marefa qai fafagaparu. O God ke kasiau rai fagausurira ana ka inuni ne marefa na Jiu rainia ka tangamworanifa mwora. ⁸ Au oqania ka arani mwane iga na arani agua, kai tagarai ka rimata ne marefa nai tanui ka mwarao ne aera, makai fagarafe suria ne marefa nai mangariaga kee nai faitogiri afainira ki tana inuni. ⁹ Au oqanira ka fefene nai fafagaotora mereata, siana kai tatanui na agua ni qaqaeaga ana. Au oqanira nai gafugafu menamenai, siana kai qaqaeaga rai fifirigi ana ka qauta, kee nai qaqaeaga rai faagara ana ka fafaaga na tanui rai na gol mina guni na fafaaga ne mwaromwarora. Ngaira ke marefa ni araria nai gafugafu rai ka gafu ne akau rafa wau na maeni. ¹⁰ A fefene na woi na arao suria o God ke ararira nai tatanui ka agua koro. ¹¹ Make ararira nai marape kai rongorongo. ¹² E ararira nai manapu mwa, siana kai fafagausurira ka inuni iata, kee nai kasira mereata akau tefarira. ¹³ Hoi ngaia o Adam ke tagarafia ko God inagona ka Ivi. ¹⁴ Hoi o Satan ke marefa ni fagaqekaqeka ko Adam, minga ka fefene ia ke fagaqekaqeka rai tanua ana na aerafa ia. ¹⁵ Hoi ke mangara na fefene na fafagauguria ko God, maka kokomanira ka tana inuni, maka fafagaotora ka ogafa iata, mo God ke fafagatafira ka fefene na tatagarafira kareta.

¹ A tamasinga kaa ke mwora ngaia, “Manga otai ne oqania rai tao ana rainia na mwane rafa ina siosi, nga na tagaranifa koro ne oqani tanu ana ngai ke.” ² Ngaia ngai ke na mwane rafa ina siosi ke ma nai gira arangainia ana, make auragia mwa ka fefene ne etagai. Ngaia ke maramarapeaga, make gira tau suri ana mereana, maka takotako fagaakaufia. Hoi make gira ono suri ana ka inuni na arao mai i ruma iana, make gira fagausuri ana nikao. ³ Ngaia ke marefa ka mwane tangai tonofa rafa, kee ni nafunafu. Maaka mwane ne korokoro tangara na inuni, make marefa ni gira faitogiri ana, make marefa ni oqaoqania rafa ka sirani. ⁴ A mwane rafa ina siosi ka mwane na gira ono surira ana mereata ki kareta makai fafagausurira ki kareta kai tautau woita mina rao suri ana. ⁵ Rao ke marefa nai girara ono isurira ana ki kareta mereata, make tautanu fea ka onoono suria na kare iana o God? ⁶ Ngaira gena ke marefa ka mwane nai kafu arao isuria na Arafa. Rao ke manga ngaia kena ke qaqaqaeaga wari, mo God ke pagai fafagaetangia manga ne pagai tanua nikao tangaa o Satan. ⁷ Hoi nikao, ka mwane ngai kana ka mwane na takotako fagaakaufia na inuni ne marefa ina siosi. Ua make marefa nai gira tamasi aerisia ana, make naka tara tangaa ka rikisi tou iana Ataro. ⁸ Ngatakena nikao, a mwane ne fafaitamani ina siosi ka mwane ne fafagaqao nga rainia ka ogafa koro na ogaoga isuri. Ngaia ka mwane ne mworamwora, marefa nai totono rafa, kee na mwane ni parapara na faaga i mangatata. ⁹ Mi ngaia ke nanafunia ka takotakofa ne taragani make taura nganganiaga ka fagausuringa ne mafata rai tangara o God. ¹⁰ Ui onoono menamenai rainia noga ka ogafanana, hoi ke rao ke marefa ni nafunia ka mwarao ni togoria mereana ni aera, mako kafu nanaka ke tatagara ina siosi. ¹¹ Ngatakena nikao, a fefene maka fafagaqao rainia nikao ka ogafa koro ne ogaoga isuri. Ngaia ke marefa ka fefene nai tamatamasia na inuni. Maaka fefene ne maramarapeaga, maka mworamwora iga ka arani mwarao na tatanui. ¹² A mwane ne fafaitamani ina siosi ke auragia mwa ka fefene ne etagai, make onoono surira nga ki kareta mereata mi tana inuni rao nikao i pasita. ¹³ Otai ne tatagara menamenai ina siosi ka inuni ka takotako fagafigaia, make gigirara nga ka mangatana mereana woi ngaia ke tangamworani iga ko Kraes Jisas. ¹⁴ Fenaka ki inau kau takosi wau rego ana tana mataina mwa kaa, makau segera wau mwa ka fagausuringa gaa, ¹⁵ rao kau ariro marefa qai arao wau mafarufaru, mako gira girara ana mwa ki ngatakena na ogafanata na kare iana o God. Suria ngaira gena ka siosi iana o God ne tafitafi ka fafagaqao rainia na mworafa. ¹⁶ Igia ka girara woi na tara ne fagaqao rainia ko God tangagia ke tefa wau nga, Kraes ke rao mai manga na inuni ia, Mina Figona Apuna ke woisia ngaia ke mwora, Mina enjel maka rea. Kraes ka tarofainia tangara ka inuni gena, Mina inuni ina ano kaa ka fagauguria, Mo God ke toraia akau i Heven.

¹ A Figona Apuna ke tamasia menamenai wau woi i tana mataina ne arao mai ke rakorako aera ka inuni na pagai riri panigi ka fagauguringa iata. Ngaira ka arao surira ka figona aera na fafagaqekara maka arao isuri ka fagausuringa iata na ataro. ² Ngaira gena ka fafagaqekaqekara nikao rainigi ka qaqanganifa iata na inuni marefa nai girara woi ngaira gena kai aera. ³ Nga na qaqanganifa gaa ka wowoi pusia ka inuni rai auragifa, kee nai ngaura ki tana ngaufa. Hoi ka inuni na tangamworani iga ko God, ka girara ka mworafa, woi o God ke fagaworai ka arani ngaufa gaa. Hoi ke araria mwa na tatangasia ko God rai ka ngaufa gena maka ngaura. ⁴ Arani mwarao o God ne fagaworai ke koro fato. Hoi ke rao ko mamafata rainia na tangasifa iamiu tangaa, maka mu kafu tawora. ⁵ Ua ngaufa gena ke fagaapunari fato noga rai ka woita iana o God mina fagarafenga iamiu. ⁶ Rao ko fafagausuringai ka fagausuringa gaa tangara ki tana inuni na arao isuria na Arafa, nga igo ka mwane ni tagaranifa koro iana o Kraes Jisas. Igo ko fafagaqao rainigi ka fagausuringa rainigi na fagauguringa iaka no mia rafa mina fagausuringa koro no tautau suri gena. ⁷ Siana rai rongora ana ki tana tamatamasinga ne ma ni oto i maana o God, mina qaqanganifa iata na inuni na qeka. Hoi makui fafagaqao rai rao suri ana ka taufa iana o God. ⁸ E koro nai fagagatani ana ka apeta, Hoi minga na rao suri ana o God ke koro wau nga iga ka arani tarani. E tamasia ka tafinga ina mataina kaa mina mataina rao maunga kana tarai mwa. ⁹ Nga na woita gaa ke mwora wau ke marefa ni araria nai qoqono rai. ¹⁰ Nga na mwarao na tatagara ka mwakomwoaga wau rainia ke ngai ke. Igia kai tako fagaetagai rainia ki ngaia o God ne tafitafi kena suria ngaia kena nikao ke fafagatafira ka arani inuni fato, tefa nga tangagia ki igia na inuni na tangamworani kaa. ¹¹ Ui fafagausuringai ka mwarao gaa makui woi tangara ka arani inuni tangai tanui ana ka arani mwarao no tamasi gena. ¹² Siana ko tanura ka inuni kai onoono qau wato rainigo suria igo kena ka mwane faoru maunga. Hoi makui fafagaqao tangara rainia ka taufa koro iga ngatakena no tamasi mina ogafanamu, mi ngatakena na oqa korofa, iga na fagauguringa mina ogafa koro iamu, ki ngaira nikao makai arao suri ka taufa iamu. ¹³ Ui totomania rao noga ka Segesegefa Apuna gena tangara ka inuni gena, makui tatarofainia tangara mina fagausurira ana, makau kafu mataro wau. ¹⁴ Ui tatagara rai ka mafatanifa na watego na mataina na maurukari na tamasi na woita pania ko God mina mwane rafa ina siosi na tau qofigo ira. ¹⁵ Arani mwarao gaa kui tatakosi mako tatanui raorao mwa, ka arani inuni nikao makai reregi no tatanui koro raorao mwa. ¹⁶ Ui onoono menamenai wau nga ngatakena na ogafanamu mako fafagatogoa ka fagausuringa iamu. Manga no fagagatagata rai tanui ana ka mwarao gaa, ko fafagatafigo mereamu mina inuni na rongogo nikao.

¹ Siana kamu tamasi rafaera tangara ka mwane na wora inagomiu, maakui mia tamasi menamenai mwa manga no mimia tamasi emamu mereamu ia. Makui tatanui tangara ka kere mwane manga no tatanui tangaa na goamu mereamu aira. ² Hoi makui fafarigoata tangara ka fefene rafa mangara enamu aira nikao. Ui takotako fagafigaira ka fefene faoru, kui fafarigoata tangara manga na goamu na fefene ira. ³ Ui onoono surira ka fefene ne nao ne marefa nai nafuni nafuninga. ⁴ Hoi ke rao ke manga na fefene ne nao kena ke nafuni kare, ki sinamapu nikao, make araria nai onoono i suria ka nao ia rai tagaranifa iata tangaa o God. Ngaira i karena ira mi sinamapu aira ka onoono suria ka nao ia manga ngaia nikao ne ono surira inago ira. Nga na mwarao o God ne oqanira nai tatanui ngai ge. ⁵ Nga na fefene ne nao ne marefa nai nafuni nafuninga ira make marefa ni tonga goata ira, ka fafagauguria raorao mwa ko God aira, maka fafagarafe nikao tatarau iga ka qongiana mina tangiana rai nongi ana ka faitamaninga pania ko God. ⁶ Fenaka na fefene ne nao na ogaoga mamaongoga gena ka tafitafi maungara, mi ngaira ka tao rai mwarao purua mwa i maana o God. ⁷ Ui tamasia tangara ka arani inuni ina siosi gena, woi siana ka inuni metara nai tangatangaerata. ⁸ Manga na inuni ne marefa nai gira ono surira ana na goata, mi kareta, ki nga ne riri noga pania ka tangamworanifa iana. Ngaia kena nga ne aerataga wau nga tefarira rao ka inuni na afuroto. ⁹ A fefene ne nao na segea na atana iga na puka tangara na fefene na nao, ki ngaia kena ka farisina ke tangafuru ne eono make matara (60+), make auragia ka mwane ne etagai mwa. ¹⁰ Ingaia kana kai gigirara menamenai wau nga ne gira tanui ana ka mwarao ne koro, manga rai ono suri kare ana, mina wagewagesira ka inuni na arao mai i ruma iana, mina manufi ana ka uwata na inuni na apuna tangaa o God, mina faitamani ana ka inuni na oqania na faitamaninga, make oqania raorao mwa rai tanui ana ka arani mwarao koro. ¹¹ Siana rai segera ana ka atata na fefene na nao na faofaoruga maungara. Ngaira gena ka nafunia maunga ka takofa rai auragira ana ka mwane. Hoi make riri pania ka fagamworamwora tangaa ko Kraes. ¹² Agua ngai ke, ki ngaia ke tanua ka agua ma ni oto suria ne fagaerisia ka fagamworamwora ana iana rai tagara ana iga ka siosi. ¹³ Tana mwarao rao nikao, ki ngaira gena ka maemaega maka kafu qanuqanufi ruma mwa. Nikao ngaira ka oga mwa rai tamatamasi inuni ana, mina rifurifu raorao mwa, mina tamasia ana ka mwarao ne ma ni araria nai tatamasi. ¹⁴ Hoi ki inau kau fafatanira ka fefene na nao na faofaoruga gaa nai auragi ana, kai nafuni kare, kai onoono surira ka ruma iata. Ua make marefa ki tana maerongaka ni nafuni mwarao rai tamasi aerisigia ana. ¹⁵ Hoi ki tana fefene na nao na faofaoruga ira ka riri noga ka rao suria ko Satan. ¹⁶ Rao ka fefene ne arao suria na Arafa ke nafunia na fefene ne nao i ruma iana, ngaia kena ke araria mwa ne tatamania. Nga ne tanua na agua manga ngai ke ka siosi ke marefa ni totoramatogoa rai takosira ana, hoi mina siosi mwa ke gira tamanira ana ka fefene na nao na oqania wau na faitamani ana. ¹⁷ A mwane rafa na tatagarafi koro na tagaranifa ina siosi ke ararira na nanafuni ka worita ni afafaritama, tangara mwa ki ngaira nikao na tatarofainia mina fagausuri ana. ¹⁸ Ke manga na Segesegefa Apuna ne woi, “Siana kamu rakua ka farana puruka na mataina namu fafagatagarafia nai puri qatori ana na guuni na ngaufa panigi ka gawoni.” Hoi ko girara nikao ka woita ne woi “A mwane na tatagara ke ararira nai nanafuni ka worita.” ¹⁹ Siana rai rongora ana ka tamasinga rai tangatangaerata ana na mwane rafa ina siosi, nga mwa na inuni ne erua kee ne eoru na akau afainia na agua kena faku mwa mako kafu tatakosia. ²⁰ Hoi ke rao ki tana mwane rafa gena ka tatanui mwa ka aerafa, ke ararira nai tamasi rafaera nga tangaa kai rongoa ka arani inuni, kai fafagamakukura. ²¹ I maana o God mo Kraes Jisas mina arani enjel iana ne usuira, ki inau kau naka woita wau tangago rai rao suri ana ka fagausuringa iaku! Ui onoono korosira fato ka arani inuni, mi siana rai nafunia ana ka faitamaninga tagapasi. ²² Siana rai fagatata ana rai tau qofira ana ka inuni rai mwane rafa ina siosi. Siana rai tanui ana ka aerafa suria tana inuni ka tanui, hoi makui oga panegai panigi ka aerafa gena. ²³ Siana rai tonomi ana mwa ka wai. Ui tawoa ka kere nongana na waen mwa rai tamania ana ka oqamu, maki tatamanigo siana kui matoro tatarau. ²⁴ Aerafa iata tana inuni ke mwataku mwa rai regi ana, mina fagaetangifa ke mamaunga wau. Hoi mi tana inuni ka aerafa iata ka kafu fafagaqao rai tana mataina. ²⁵ Hoi ke manga na mwarao koro na tatanui ka gira regi ana, mi tana ani ne marefa nai girara ne taotao punufi maungai ka pagai reregi.

¹ Ua, ainuni na tagara purua, ke araria nai takotako fagafigaira ka mwane rafa iata. Hoi ki manga ngai ke, ke marefa ka inuni nai gira tamasi aerisia ana ka atana o God, mina fagausuringa iaka. ² Ainuni na tagara purua tangaa na mwane rafa ne girara na Arafa ke marefa ni araria ni wowoi, “Marefa qai oqani mwakomwoaga ana tangaa ka mwane rafa iaku suria ne girara na Arafa.” Ainuni na tagara purua na girara na Arafa ke araria nai tatagara rafa wau nga tangai tamani ana ka mwane rafa iata ne girara na Arafa ia, suria ngaira ka kokomania maka tagai tangamworani faku mwa. Nga ke gaa ka mwarao no fafagausuringai nga mako tatamasi tangara nga ka inuni rai tanui ana. ³ A fagausuringa mwora iana na Arafa iaka o Jisas Kraes ke rao suria ka takofa iana o God. Hoi mina tana inuni ke marefa nai oqania maka fafagausuringai mwa ka fagausuringa ni qaqanganifa. ⁴ Nga na inuni ngai gena ne marefa ni faku na takofa iata gena, maka kasikasira akau mereata. Marefa nai girara mina mangatata gena ke matoro, nga ngai kana na oqani rai faitogiri ana rai na woita gena. Ngaira ka tatanui ka faikekesi ana, faikinakina ana, a tamasia ana ka woita marefa ni koro mina faifinaru ana, ⁵ mina faitogiri ana. Ngaira gena ka mangatata gena ke aera wau, make ma nai gira ono girara ana ka mworafa. Ainuni gaa ka tako woi nga na tangamworani ana rainia ko God ka tara tangai nafuni mwarao ana. ⁶ Hoi minga ke rao ke manga na inuni ke arao suria ka taufa iana o God, make marefa ni wawanasi ki tana mwarao, ngaia nga ne nafunia fato noga na ogafa koro ngaia. ⁷ Igia ke marefa nai torai mai ka mwarao tangaa ka ano kaa, make marefa wau nga nai gira torai ana ka mwarao afainigia ina mataina na arao. ⁸ Hoi, manga na nafuni ngaufa mina gafu noga kaa, ke araria nai wawagewage rainigi. ⁹ Ainuni na oqani woi nai nafuni mwarao rako, ka gira apuri ana iga ka arani faiofongifa mina rikiriki tou ka toutou iga. Ngaira gena ka wanasi ka mwarao ni qekafa ni fafagaerisira maki okera tangaa ka ogafaera, mo God ke fafagaetangira nikao. ¹⁰ Ainuni na oqani na faaga rafa wau ana ke gira tanui ana ka arani aerafa. Tana inuni ka oqani rafa wau ka faaga maka kasi wau mwa ka tangamworanifa mwora maka tanura ka ape rorofiaga mwa. ¹¹ Timoti, igo kena ko God ke nafunigo. Ua ui gawa panigi ka arani mwarao ne aera wau gena. Ui ofongia rai oga otooto ana, kui arao suri ka taufa iana o God, makui fafagauguria. Ui fafaikomani, makui nganganganiaga iga ka ogafa iamu, kui ogaoga iga ka marapefa. ¹² God ne onigo woi nui nafunia ka tafinga mwora. Migo ko tamasia noga ka raronimworanifa iamu iga na matonga ni inuni. Hoi ui rapasia nga kui arao suria ka raronimworanifa iamu rainia na Arafa. Mako kafu tawoa ka tafinga fuu. ¹³ Hoi iga na maana o God, ne mafata rainia tangagia na tafinga fato, mi maana o Jisas Kraes ne tamasia mereana na fagauguringa iana tangaa o Pontias Paelat, inau kau naka wau tangago, ¹⁴ ui tautau woita rai tanui ana ka arani mwarao na woisi tangago gaa, raorao make aporo mai ka Arafa iaka o Jisas Kraes. ¹⁵ Ngaia o God kena ke koro wau nga, mi ngaia kena ke Arafa, make arafa tangara ka arani arafa ni finua mina arani mwane rafa. Iga na mataina o God ne qani takosia, ke pagai kasia aporo mai ko Jisas Kraes. ¹⁶ Nga mwa o God ke oga tarai mwa! Ngaia ke oga iga ka mawetana ne marefa ko otai ni gira rao mai ana fagarangia. Make marefa ka inuni ni rea noga o God kee ni gira rea ana ki ngaia. O God kai fafagaakaufia, mina ramwofa iana ke taotao tarai mwa. Amen. ¹⁷ Ui mira tamasi ka inuni na nafuni mwarao ina ano kaa, ki siana kai qaqaeaga, kee nai fafagauguri ka nafuninga ne pagai fatofato rao gena. Woi tangara kai fafagauguria ko God, ne onoono fagakorofigia afainigi ka arani mwarao na oqani tangai wagewage ana. ¹⁸ Ui mira tamasi rai tanui ana ka arani mwarao koro na gira tanui ana tangai tamanira ana ka arani inuni. Ui fafagatakosira nga kai mamarumu rai mafata ana tangara ka inuni. ¹⁹ Hoi ki ngai ke ngaira ka nakanaka gatagata ka worita mereata, tangaa ki tana mataina ne arao mai, hoi maka kafu gira tawoa ana ka tafinga fuu ne mwora wau. ²⁰ Timoti, ui onoono suri menamenai ka fagausuringa na naka wau tangago gaa. Siana rai fufukaringa ana tangai ka tamasinga ne marefa ni koro, mina tamasinga qekaqekaga ne rongo koro make marefa wau ni mwora. ²¹ Tana inuni gena na raronimwora rainigi na tamasinga gena, ka qani fagamarefagara noga ka fagauguringa iata. Inau kau fagarafe woi na korofa iana Arafa ki afainigamu fato.