1 Tesalonaeka

¹ Igami, o Saelas, mo Timoti mi inau o Pol, kami sege wau tangagamu kaa na siosi i Tesalonaeka. Igamu naru nafunigamu o God Emaka mo Jisas Kraes na Arafa iaka. Igami kami fagarafe woi na korofa mina marapefa iana o God ki taotao afainigamu. ² Igami kami tatangasia raorao mwa ko God rainigamu fato, makami tatakosigamu raorao mwa mataina nami fafagarafe. ³ Mi fagarafe tangaa ko God Emaka, rainia ka tagaranifa koro iamiu iga na tangamworanifa iamiu, mina mwakomwoaganifa iamiu iga na oqa korofa tangaa ko God, mina nganganiaganifa iamiu rai nasi ana mwa ka Arafa iaka o Jisas Kraes. ⁴ A goaku igamu, igami kami girara woi o God ke komanigamu, make qani ono sikifigamu kamu mangara na kare iana ira. ⁵ Rainia na mataina nami tatamasia na tarofa koro kaa ia, ke marefa nami tamasi mwa purua. Makami fafagaqao rainia ka ramwofa iana Figona Apuna, makami fagaqao tangagamu woi igami kami raronimwora nganganiaga nga rainia ka tarofa koro kaa. Igami kami ogaoga afainigamu inago ia tangai tamanigamu ana, kamu girara menamenai wau ka taufa iamami. ⁶ Mataina namu raronimwora rainia na tarofa koro kaa, kamu arao suri ka taufa iamami gaa mina Arafa. Fenaka namu fafafara rainia, minga kamu raronimwora nga rainia ka tarofa koro kaa mina Figona Apuna ke tanugamu kamu wawagewage. ⁷ Ki mwarao maka inuni na tangamworani ina provins i Masedonia mi Akaea ira nikao makai arao suri ka taufa iamiu. ⁸ Suria na tarofa koro rainia na Arafa ke rao mai panigamu tangara ka inuni i Masedonia mi Akaea, mina mataina kaa nikao ka agua rainia na raronimworanifa iamiu rainia ko God ke rao ofu ana ka arani finua fato. Make manga ngai kena, ke marefa ni ararigami woi igami kami wowoisia nikao ki tana mwarao tangara woi igamu kamu tangamworani fato noga. ⁹ Arani inuni ka tamasia ki ngatakena nga namu kanakanasigami mataina nami mataro wau, maka tamasia ki ngatakena nga igamu namu kasi panigamu na nunuta na mwarao namu wowogasira, maka mu rao suria o God mwora ne mauri kaa. ¹⁰ Ngaira ka tamasia nikao ki ngatakena nga igamu namu nanasia i karena ne pagai aporo mai pania ki Heven. Ngaia o God ne ragaia afaraga aporo ko Jisas pania na maefa ia, ke fafagatafigia pania ka fagaetangifa iana o God ne pagai arao mai.

¹ A goaku, igamu mereamiu kamu qani girara woi na raofa iamami wau kaa ke marefa nami arao wau purua. ² Igamu kamu girara nikao woi igami ka qani fagafafara apemami i Filipae, maka rorotaigami. Fenaka na inuni na rako ke marefa nai oqanigami, mo God ke fagaramworigami woi nami rao kami tarofainia ka tarofa koro iana tangagamu. ³ Mataina nami tatawatawa tangagamu ia, ke marefa nami fafagaparugamu, suria na mangatamami ke taragani wau nga, make marefa nami katofi fagaqekaqekagamu ana. ⁴ Marefa. Ngaia o God ke qani usuigami fato noga rai inuni na araria na tarofa koro tangai tarofainia ana. Igami ke marefa woi nami ofongia rai rao suri ana ka faioqanifa iata na inuni, makami arao suria mwa ka taa o God ne oqania, mi ngaia o God make ofofongia ka mangatamami nikao. ⁵ Igamu kamu qani girara menamenai aera wau woi igami ke marefa nami rao mai rai ososogamu ana, kami fagaparugamu rai tawora ana ka mwarao koro iamiu. Marefa nga. O God make girara ka agua kaa. ⁶ Igami ke marefa nami kakatofigamu mi tana inuni woi nai fafagaakausigami. Fenaka ne ararigami woi nami nongira ki tana mwarao panigamu suria igami ka aposol iana o Kraes, make marefa. ⁷ Mataina nami oga afainigamu, igami kami koro tangagamu makami komanigamu manga na fefene ne ono surira karena ira. ⁸ Igami kaa, kami takoigamu wau, ngaia ngai ke nami oqani tarofaini ana na tarofa koro kaa tangagamu ia, makami fafagaqao rainia nikao ka ogafa iaka faku faitangai suria nami nafunia ka faikomanifa tangagamu. ⁹ A goaku, igamu namu qani girara menamenai aera wau, woi manga ifai ki igami kami fatamia na tagaranifa! Mataina mi tatawatawa tangagamu rainia na tarofa koro ne arao mai pania ko God, igami kami tagara suri ka tangiani mina qongiani, rainia igami ke marefa nami oqania woi igamu kamui tatakou rainigami. ¹⁰ Igamu kamu qani girara mo God mereana ke qani girara nikao, woi na taufa iamami tangagamu na inuni namu raronimwora, ke koro, make oto, make marefa ko otai ni gira togirigami ana. ¹¹ Igamu kamu qani girara, woi igami kami tamanigamu menamenai aera wau ki igamu fato, manga na mwane ne tatamanira karena ira. ¹² Igami kami fagagatani ka takofa iamiu ni akau mai nganganiaga nikao, makami fagaramworigamu, makami fagakakanugamu, woi igamu kamui arao suri ka agua ne koro ne oto i maana o God. Ki ngaia God ne onigamu, kamu qau qanu iga ka arafanga iana rai oga afainia ana. ¹³ Igami kami tatangasia raorao mwa ko God rainigamu rainigi ka woita namu rongora nami tamasi fato noga ia, maka mu girara woi ngai gi gaa ka tamasinga iana o God, marefa woi na tamasinga iata na inuni mwa. Hoi mina tamasinga iana God gaa ke oriorisi ka mangatamiu, igamu na inuni namu raronimwora. ¹⁴ A goaku, igamu kamu tanui ki ngatakeni nga na agua na tanui na inuni iga na siosi iana God i Jiudia na faku afainia ko Kraes Jisas. Hoi ki igamu nikao maka fagamamasiaga apemiu ka inuni i apemiu mereamiu mwa, mangara na Jiu na fagamamasiaga apeta sio mwa na inuni ina siosi ira. ¹⁵ Ngaira na Jiu ka nafuia funuia ka Arafa o Jisas maka nafuira funuira na maurukari ira, maka gogofigami gaa, maka mimira faimangari ki tana inuni, maka tatanui ka mwarao o God marefa ni oqani. ¹⁶ Ngaira ka ofongia, woi nai fagaqarasigami ki siana kami tarofainia tangara ka inuni ne marefa na Jiu rai fagatafira ana, mi ngaira ka rao rafaera wau nikao rainigi ka aerafa iata. Hoi mina mangariaganifa iana o God ke rao mai afurira. ¹⁷ Ua a goaku igamu, a kere mataina rao ke na maengigami panigamu, migami ke marefa mi qono rainigamu wau, mi oqani wau regamu ana raorao mwa makami rapa wau rai taugamu ana. ¹⁸ Mi oqania wau nami rao mai. Inau mereaku o Pol, makau rarapasigamu raorao mwa, mo Satan ke uraura pusigami raorao mwa. ¹⁹ Hoi mina mataina na Arafa iaka o Jisas ne arao aporo mai, igia ka pagai uraura i maana. Ua mi tangamworani woi igami kami wawagewage wau afainigamu. Iga na mataina ngai kana, igamu kamu fafagaqao woi na tagaranifa iamami ke koro wau nga. ²⁰ E mwora wau, igami kami wagewage rainigamu suria mu fagaqao rai ka tagaranifa iamami woi ne koro wau.

¹ Imurina mai na mataina kaa, kigami kami tako rafaera wau rainigamu, suria igami ke marefa noga nami gira regamu ana. Hoi ki igami kami takosia woi igamirua kamuru ogaoga aporo i Atene, ² ki igamirua kamuru kasia wau mwa ko Timoti rai rao wau ana tangagamu, rai fagagatanigamu ana mina fagakoro mangatamiu ana iga ka fagauguringa iamiu. Ngaia o Timoti nikao minga ka goaka ne tatagara afainigami tangaa ko God rai tarofainia ana ka tarofa koro rainia ko Kraes. ³ Ma ni koro nga ki tana fitangimiu ni kasia na tangamworanifa iana iga ka mataina ne asaasa ne taugamu. Igamu kamu girara fato noga, woi God ke qani nakai fato noga ka mataini ne asaasa tangagia. ⁴ Iga na mataina nami ogaoga fainigamu maunga, igami kami qani tamasia fato noga tangagamu woi na inuni ka pagai fafagamamasiaga apeka. Mi igami kami ape mamasiaga fato noga, manga mu girara kena. ⁵ Hoi ngaia ngai ke nau tako rafaera wau rainia ka tangamworanifa iamiu, makau kasia wau o Timoti kaa ke rea wau mako Satan ke ofongigamu, ke tanua woi na tagaranifa iamami ke tao rai mwarao purua mwa. ⁶ Hoi, o Timoti ke aporo mai pania ka raofa iana wau tangagamu ia, make mai fagarongogami rainia ka tangamworanifa mina faikomanifa iamiu. Make mai woisia nikao tangagami, woi igamu kamu takotako koro rainigami, maka mu oqani aerisia wau nikao woi namu regami. Manga igami nikao makami oqania wau rai wau regamu ana. ⁷ Hoi ka goaku igamu, arani mataina ne qaraqara raorao mwa tangagami, maka fafagamamasiaga apemami, maka mu fafagagatanigami rainia ka fagauguringa iamiu. ⁸ Hoi ngai ke igami kami nafunia ka tafinga ne mauri koro aera wau suria igamu, kami girara woi igamu kamu oga nganganiaga iga ka Arafa. ⁹ Rainia na tangamworanifa iamiu, igami kami tangasia wau ko God iaka raorao mwa suria igamu kamu tanugami kami fatami koro wau ina mataina nami fafagarafe tangaa ko God. ¹⁰ Iga na arani mataina, manga woi na qongiana, mi igami kami fagarafe wau, woi mi rao wau noga kami regamu nikao, rainia igami kami oqania woi nami fagausurigamu rainigi ki tana agua mamaungai namu gigirara iga na raronimworanifa iamiu. ¹¹ Igami kami fagarafe, woi God Emaka mina Arafa o Jisas karu fafagamwatakugami kami pagai wau reregamu. ¹² Naka ka Arafa ki tanugamu kamu fafaikomani wau nga faitangai, maka mu kokomanira ka arani inuni getera, manga na faikomanifa iamami ne tefa wau nikao tangagamu kaa. ¹³ Iga na agua ngai ke, ki ngaia mwa o God ke tatamanigamu kamu tataragani, ke marefa ko God ni pagai usuusui maamiu. Hoi ina mataina Arafa iaka o Jisas ne aporo mai afainira na arani kare iana na apuna ira, ki igamu nikao maka mu pagai uraura afainira i maana o God Emaka.

¹ Hoi a goaku, igami kami qani fagausurigamu fato noga, rainia ki ngatakena nga na ani taa na ogafa kamu arao suria, kamu tanua na Arafa ke wawagewage rainigamu, nga ngai ke namu ogaoga noga iga kaa. Makami nongigamu, makami fagakanukanugamu iga ka atana Arafa iaka o Jisas, woi igamu kamu rarapasia kamu arao suria nga ka ani kaa na ogafa ne koro. ² Rainia igamu kamu qani girara fato noga ka fagausuringa iga na ramwofa iana na Arafa iaka o Jisas, nami qani fagausuringai tangagamu ia. ³ Arafa ne oqania tefa wau, woi na ogafanamiu ni apuna raorao mwa, migamu ki siana kamu tatanui ka agua ni oraoraga ana. ⁴ Arani mwane mui takotako fagafigaira menamenai ka fefene iamiu, iga ka agua ne oto i maana na Arafa, ⁵ maki siana mwa pania na apena, mangara na inuni afuroto ne marefa nai girara na Arafa ia. ⁶ Siana kamu fafagaerisia ka goamiu rai rangafa fainia ka inuni iana. Igami kami qani fagarongogamu rainia ka agua ngai ke, ngaia na Arafa ke pagai mafata rainia ka apena fagaetangifa rafa tangara ka inuni na tatanui na agua manga ngai gena, ⁷ suria na Arafa ke marefa ni onigia tangai oga qao aera ana, maake oqania nai apuna raorao mwa. ⁸ Hoi ke manga kaa, otai wau mwa ne ngangaroitainia na fagausuringa kaa ke marefa ni ngangaroitania ka fagausuringa iana inuni. Marefa. Ngaia o God nga ne ngangaroitania ia, ngaia o God ne mamafata rainia na Figona Apuna iana tangagamu ia. ⁹ Marefa ni arari mi segesege wau tangagamu rainia nikao ki tana mwarao rainia na faikomanifa, suria na Arafa ke qani fagausurigamu fato noga rai faikomani ana faitangai, ¹⁰ maka mu fafagaqao rainia ka faikomanifa iamiu tangara ka goaka ina provins i Masedonia. Igami na goaku igamu, kami fagakanukanugamu woi mui fafagaqao wau nga nikao rainia ka faikomanifa iamiu. ¹¹ Mui ofongia nga kamui marape, maka mui tatagara tangagamu mereamiu, maka mui tagara rai ka rimamiu mereamiu, manga nami woisia wau noga ia. ¹² Iga na agua ngai ke ka inuni ne marefa nai girara na Arafa ka pagai takotako fagaakausigamu rainigi, make marefa mui gira oga fagauguria ana ki tana inuni. ¹³ A goaku igamu, igami kami oqanigamu woi igamu kamu girara ka mwarao ne tarafura na inuni na maemae. Hoi ki igamu ki siana ki rogurogu ka oqamiu mangara na inuni marefa nai tangamworani rainia na tafinga fuu. ¹⁴ Igia kaa ka tangamworani woi o Jisas ke mae make tafi aporo pania ka maefa. Hoi igia ka tangamworani nikao woi ina mataina o God ne pagai totoraia aporo mai nikao ko Jisas, ngaia ke totoraira nikao ka inuni na tangamworani maka mae. ¹⁵ Hoi a tamasinga nami wowoisia fura wau tangagamu ke rao suria mwa ka fagausuringa iana na Arafa iaka. Igia na inuni na tafitafi maungagia, iga na mataina na Arafa ne aporo mai nikao, marefa nai gira akau ana woi nai qaqainagota ka inuni na mae fato. ¹⁶ Suria na mataina o God ne watowato mai pania i Heven, ke tamasi rafa tangara, mina a mwane rafa iata na enjel ke ngerengere, mina afuri iana Arafa ke angiangi. Hoi mina inuni na tangamworani rainia Kraes na mae fato noga, ngaira gena ka tafitafi aporo inago. ¹⁷ Mina murina mai, kigia na ani na tafitafi maungagia ina mataina ngai kena, Arafa ke pagai totoraigia akau faku afainira nikao. Hoi maka arao worosia ka Arafa ka tatarafua ina qaiawoa, hoi maki muri igia ka gira oga fainia ana tarai ka Arafa. ¹⁸ Hoi mui fafagakanukanugamu mereamiu fairifu rainigi ka woita gaa.

¹ A goaku igamu, arani mwarao ne akau mai iga na mataina kana mina tangiani gana, ke marefa ni araria mwa nai segera wau tangagamu. ² Rainia igamu mereamiu kamu girara menamenai wau, woi na Tangiana iana Arafa ne pagai arao mai iga kana, ke manga na mwane ne fafanago ne arao mai iga na qongiana ia. ³ A mataina ngai kana ka arani inuni ka wowoi, woi na arani mwarao ke tao koro wau mi ngaira ka koa menamenai wau. Imurina mai maka gagaparira mwa mina fagaetangifa ke pagai taura mai, manga na fefene ne apara ne gaparia mwa ne riki na gairina ia. Ki ngaira gena ke marefa nai pagai gawagawa pania. ⁴ Hoi mi igamu na goaku, ke marefa namu ogaoga iga ka rotorotoaganifa, siana kamu papanga rainia ka Tangiana kena, manga na fanagoa namu papanga rainia ia. ⁵ Igamu fato kaa, ka inuni iga na mawetana, namu ogaoga iga na tangiana. Igia kaa ke marefa ka inuni iga na qongiana mina rotorotoaganifa. ⁶ Hoi igia kaa ki siana kai mauru mwa mangara tana inuni ira, make ararigia nai rite makai tautau surigia. ⁷ Nga na qongiana ka mataina na mauru iga na inuni, minga na qongiana nikao ka tono ka qekaqeka iga na inuni ira. ⁸ Hoi mi igia kaa, ka inuni iga na tangiana, ke araria nai tautau surigia. Igia kaa kai nanafunia nga ka fagauguringa rainia ko God, mina faikomanifa ne manga na qauata tangai ura pusia ana na mangataka ia. Makai koa mwa kai nanasia ka Arafa tangai fagatafigia ana. Nga ngai ke ke manga na qofina qau ia. ⁹ Rainia ko God ke marefa ni usuigia rai fafafara ana rainia ka fagaetangifa iana, minga kai tawoa ka tafinga iga na Arafa iaka o Jisas Kraes. ¹⁰ Ngaia ke mai mae tangagia woi nai ogaoga faku mwa afainia, manga na tafitafi maungia, kee na maemae fato noga ina mataina ne aporo mai iga. ¹¹ Rainigi na agua gaa, mui fafagakanukanugamu fairifui, maka mui fafagagatanigamu, manga namu tanua noga ina mataina kaa kee. ¹² A goaku igamu, igami kami nongigamu nganganiaga nga woi igamu kamui takotako fagafigaira ka inuni na totoraigamu ina siosi, suria na Arafa ke qani usuira woi ngaira ka fafagaotogamu, maka fafagausurigamu. ¹³ Rainigi na tagaranifa na tatanui gena, igamu kamui takotako fagafigaira menamenai wau, maka mui kokomanira nikao, maka mui ogaoga menamenai fairifui. ¹⁴ A goaku, igami kami nongigamu wau nga, woi mui tamasi rafa tangara ka inuni na maemaega rai tanui ana na tagaranifa, maka mui fagagatanira ka inuni na maagu wau, maka mui tatamanira ka inuni na mwarumwarusiga, maka mui fagamaeape mwa afainira ka arani inuni. ¹⁵ Siana kamui qarua aporo na aerafa tangaa na inuni ne tanua na aerafa tangagamu, minga kamui rapasia ka korofa tangagamu fato fairifui mi tangara na arani inuni nikao. ¹⁶ Mui wawagewage raorao mwa, ¹⁷ maka mui fafagarafe raorao mwa. ¹⁸ Manga na agua taa ne worawora tangagamu, maka mui tatangasia raorao mwa ko God. Nga na agua o God ne oqanigamu namu tanua ngai ke, igamu na inuni namu faku afainia ko Kraes Jisas. ¹⁹ Siana kamu sisirifia funuia ka tagaranifa iana Figona Apuna, ²⁰ siana kamu ngangaroitainia na woita pania ko God nai inuni na tatamasia. ²¹ Mui ofofongia ka arani mwarao gaa menamenai, kamui taura gatagata ka ani koro, ²² maka mui kasigi wau ka arani mwarao ne aera. ²³ Igami kami nongia ko God ne mamafata rainia na marapefa, ngaia ki fafagaapunarigamu wau nga, make onoonosuri ka maurifamiu mina apemiu, ki siana ko otai ni gira sufigamu ana, raorao make taua ka mataina ne aporo mai iga na Arafa iaka o Jisas Kraes. ²⁴ Igamu ke araria namu fafagauguria ko God ne onigamu ia, suria ne tatanui manga ne qani woisigi. ²⁵ A goaku igamu, mui fafagarafe tangagami nikao. ²⁶ Mui kanakanasigamu fairifui manga iga na kastom iaka, namu sisiginigamu mangara mwa na afarigoata ira. ²⁷ Iga na atana na Arafa, au naka wau nga tangagamu, kamu totomania ka leta kaa tangara ka arani kare iana fato na Arafa. ²⁸ Au fagarafe woi na Arafa iaka o Jisas Kraes ki korokoro tangagamu.