1 Pita

¹ Inau o Pita na aposol iana o Jisas Kraes. Inau kau sege tangagamu kigamu na inuni o God ne ono sikifigamu rai kare iana, namu taka rainigamu mangara na mafuara iga na provins i Pontas, Galesia, Kapodosia, Esia mi Bitinia. ² Inago mai o God o Mama ke usuigamu fato rai kare iana mina Figona iana ke fafagaapunarigamu maka mu tau woita iana Jisas Kraes tangai tamusigamu rainia ka gapuna kamu qaqao koro panigi ka aerafa iamiu. Au fagarafe woi o God ki koro tangagamu, mwarao maka mui ogaoga iga ka marapefa wau nga. ³ Ai fagaakausia ko God, Emana na Arafa iaka Jisas Kraes. Ngaia ke faitakoi rafa wau tangagia, make wategia ka tafinga faoru rainia ne ragaia ko Jisas Kraes pania ka maefa. Ua ki igia ka tako gatagata nga rainia ka tafinga ngai ke. ⁴ O God ke fagananaura ka mwarao tangagamu i Heven ne marefa ni pagai kakaga, maki aera kee ni fatofato rao mwa. ⁵ Igamu kamu tangamworani fato rainia ko God. Mi ngaia ke onoono surigamu menamenai rainia ka ramwofa iana, raorao make taua ka tangiana ni fagaetangifa, mo God ke fafagatafigamu manga ne qani oqania. ⁶ Mu wagewage mwa rainigi ka agua gaa, manga namu rorogoi ne qaraqara tangagamu ka arani mwarao, maaki iga mwa ka kere mataina mwa ngai kena. ⁷ A tangamworanifa iamiu ka pagai ofongi manga na gol na ofofongia iga na giu ia. Ka faiofongifa gena ka kafu fafagaqao rainia ka tangamworanifa iamiu woi ne koro tefaria ka gol ne pagai aera. Arani mwarao gaa ke fagaqao rai woi igamu ka fafagaakausigamu maka takotako fagafigaigamu maka onoono akau rainigamu, a mataina ne aporo mai o Jisas Kraes. ⁸ Igamu ke marefa mu rea ko Kraes maka mu komania tefa wau, ke mai taua na mataina kaa. Igamu ke marefa mu rea maka mu mamarumu kamu tangamworani rainia. Kigamu kamu wagewage rafa wau. A wagefa iamiu ka apena wagefa rafa ⁹ suria o God ke fafagatafigamu manga taa kena nga namu tangamworani rainia kena. ¹⁰ Mina maurukari inago ka tamasia fura fato woi o God ke koro tangagamu, maka ngaira ka rapasia rai rogoia ana menamenai rainia ka tara o God ne fafagatafigamu. ¹¹ Figona Apuna iana o Kraes ke oga irarona apeta mi ngaira ka tamasia fura tangara ka inuni woi o Kraes ke fafara tefa wau inago mi murina mai ngaia ke arafa tefa nga, mina maurukari gaa ka rapasia nai rogoia ana ngatakena mina mataina taa ka mwarao gaa ke worawora. ¹² Hoi o God ke fagaqao tangara rainia ka mworana tamasinga ngaira na tamasia fura, marefa woi rai tamanira mereata ana mwa maaka tamanigamu nikao ina mataina kaa. Mina Figona Apuna o God ne kasia mai, ngaia ke watera ka ramwofa tangara ka inuni ina mataina kaa. Ki ngaira, ka tatamasia ka tarofa koro kaa tangagamu, mina enjel nikao maka oqania rai girara menamenai ana ka agua rainia na tamasinga kena. ¹³ Hoi, igamu kamui ogaoga nanau nga maka mui fafagaotora ka takofa iamiu, maka mui takotako gatagata iga ka mwarao koro o God ne mamafata rainia tangagamu ina mataina o Jisas ne aporo mai. ¹⁴ Iga na mataina inago igamu ne mamaunga mu nafunia ka takofa koro, igamu kamu rao suria ka taufa ne aera iga ka takofa iamiu mereamiu. Ki siana kamui tatanui nikao ka mwarao gena maka mui arao suria ko God iga ka mataina kaa. ¹⁵ O God ne usuigamu kaa, ke apuna. Hoi igamu nikao maka mui apuna iga ka ogafanamiu. ¹⁶ Iga na Segesegefa Apuna o God ke qani woisia fato mai noga, ke woi “Suria inau kau apuna, ogafanamiu ki apuna nga nikao.” ¹⁷ Igamu kamu gira fagarafe ana tangaa ko God maka mu gira onia ana rai emamiu nikao. Maaki ngaia ke fafagagetara mwora ka arani inuni suria ka mwarao ngaira mereata na tanui. Ua kigamu kamu oga manga namu mafuara ia iga ka ano kaa, maka mu takotako rafa rainia ko God. ¹⁸ Igamu kamu girara fato ngatakena o God ne worigamu pania ka taufa ne aera namu tawoa panira na mwane rafa iamiu inago. Ngaia ke marefa ni worigamu rainia ka mwarao ne girara mwa ne aera, manga na faaga ne girara kakaga ana. ¹⁹ Marefa, i ngaia ke worigamu rainia ka gapuna koro iana o Kraes. Kraes ke manga na karena sip ne mafata rainia ka nafuia make qao koro wau, make marefa ni nafunia ka mwarao aera afainia. ²⁰ Mataina o God ne mamaunga ni fafagaworaia na ano kaa, ngaia ke qani usuia fato noga ko Kraes, rai fagatafigamu ana make rao fato mai noga ina mataina kaa, suguia mwa ni taua ka tangina ni fagaetangifa. ²¹ Hoi ki ngaia o Kraes ke tamanigamu kamu tangamworani rainia ko God ne fagatafia aporo o Kraes pania na maefa, make fagaarafa nikao. Ngaia ngai ke igamu kamu girara ka tangamworanifa rainia ko God, maka mu tako gatagata rainia. ²² Igamu kamu fagakorogamu mereamiu rainia namu qani rao suria ka mworana tamasinga. Migamu kamu girara komanira ana ka goamiu, mina mataina kaa kamui kokomanigamu faitangai nga iga ka mangatamiu fato. ²³ Tamasinga iana o God ia ke nafunia ka tafinga make taotao tarai, make tatamanigamu kamu worawora nikao iga ka tafinga faoru suria o God ke Emamiu mi ngaia ke marefa ni girara mae ana suria ngaia ke kokoa tarai tarai. ²⁴ Segesegefa Apuna ke tamasia manga kaa, “Arani inuni ke mangara na mafe ira. Mina qao korofanata ke manga na takana mafe. A mafe ke girara maefa, mina takana ia ke girara wotafa rao mwa. ²⁵ Hoi mina woita iana na Arafa ke taotao tarai.” Minga na woita iana kaa, ka tarofa koro na qani tamasia fato wau noga tangagamu fato.

¹ Hoi igamu, siana kamui arao suria ka taufa ne aera. Siana kamui fafagaqekaqekara ka inuni, kee na fagafuni, kee mui rarafaira, maka mui tamasi fagaaerisira ki tana inuni nikao. ² Hoi ke araria igamu kamu rongoa raorao mwa ka woita mwora iana o God, mangara na kare meramera na oqani susufa ira. Ua migamu kamu tatangamworani nga, mo God ke fafagatafigamu. ³ Igamu kamu rogoia fato noga ka Arafa ne koro tefa wau. ⁴ Mu rao mai tangaa ko Jisas Kraes. Nga ngaia ke manga na fau manimani ne nafunia na tafinga ia mina ainuni ke marefa nai oqania. Mo God ke usuia fato noga, make tako fagafigaia. ⁵ Migamu nikao maka mu akau mai manga na fau ne nafunia na tafinga. O God ke tanugamu kamu manga na ruma apuna ia. Migamu gena ka inuni ni raperapega namu apuna, miga ka atana o Jisas Kraes kamu mafata rainia ka wogasifa tangaa ko God ki wawagewage rainigi. ⁶ Arani mwarao gaa ke mwora wau suria na Segesegefa Apuna ke woisia manga kaa, “Inau kau qani usuia fato ka fau ne etagai ne koro wau. Inau kau fagaogasia ka fau koro tangaa na ruma i Saeon. Mi tana inuni ka tangamworani rainia mi ngaira ke marefa nai maaki rainia.” ⁷ Ua igamu na rongoisuri iana na Arafa, ka fau kena ka mwarao manimani tangagamu. Mina ani ma nai tangamworani make marefa nai tako woi na fau kena ka mwarao manimani. Make ma nai oqania ka fau ia na tagarafia rainia na ruma kena. Mina fau ngaia ke tao rai apena fau manimani rafa tangaa ka ruma ia. ⁸ E rako wau ka inuni na tapasu iga na fau kena maka apuri mereata. Ngaira ke marefa nai oqani tau woita ana iana ko God, ngaia ngai kena o God ne fagaapurisira gena. ⁹ Igamu kena ko God ke ono sikifigamu fato tangai waro ni inuni iana mereana, migamu ka inuni raperape iana na arafa ni finua, migamu ka inuni apuna. Ngaia ke usuigamu rai tamasi ana fura ka tagarafa koro ngaia ne tanui. God ke onigamu fato, migamu kamu fura mai pania ka finua ne rotorotoaga, kamu qanu mai irarona mawetana ne qao riariaga. ¹⁰ “Inago, igamu ke marefa ka inuni i apena o God, make mamaunga mu onoono girara ka faitakoifa iana. Hoi ina mataina kaa, igamu ka inuni mwora iana o God, make mwora wau ngaia ke koro tefa wau tangagamu.” ¹¹ Ua na goaku, igamu kamu oga ina ano kaa manga na mafuara ira suria igamu ke marefa mu nafunia ka finua kaa manga na finua iamiu mwora ia. Inau kau tamasi fagagatanigamu, siana kamui arao suria ka taufa ne aera iga ka takofa iamiu, suria na takofa ne aera gena ke faisuara fainia ka tafinga faoru iamiu. ¹² Tana inuni ne marefa nai tangamworani iga o God, ngaira ka tamasi fagaerisigamu. Hoi igamu kamui rapasia ka taufa iamiu ki otooto koro i maata na inuni gena, mi ngaira kai rea ka taufa koro iamiu ia makai kasia akau rainia ko God ina tangina ni fagaetangifa. ¹³ Hoi suria igamu kamu tangamworani rainia ka Arafa Jisas maka mui arao suria ka arani faifataninga iga ka finua namu ogaoga iga. Migamu kamui otooto isuria ka apena arafa ni finua i Rom otai ne akau tefaria na arani inuni. ¹⁴ Migamu kamui otooto isurira nikao ka Primia ne usuira na arafa ni finua na usuira gena, suria ngaira ke watera ka fagaetangifa tangara ka inuni na fagaerisia na faifataninga, mi ngaira ka tangasira wau ka inuni na arao suria na taufa koro. ¹⁵ O God ke oqanigamu rai fagamarapera ana ka tawatawanifa ni qeka iata nai inuni ne ma nai tako matafa, iga ka agua koro namu tatanui. ¹⁶ Ua igamu kamui ogaoga mangara na inuni ne taraganisira. Siana kamui takotako woi ne taraganisigamu mwa rai tanui ana ka mwarao ne aera gaa, maaka mui oga nga mangara na kare iana o God. ¹⁷ Migamu kamui takotako fagaakaufira ka arani inuni, maka mui kokomanira ki tana goamiu na tatangamworani. Kamui wowogasia ko God, maka mui tako fagafigaia nikao ka arafa ni finua rafa i Rom. ¹⁸ Igamu na inuni ni tagaranifa, kamui tautau woita iata ka inuni na onoono surigamu, maka mui takotako fagaakaufira. Mui tatanui ka agua gaa tangara ka ani na koro maka tatakoigamu, mi tangara na ani na mamaramwanega nikao. ¹⁹ Manga ngaira gena ka fagaetangigamu purua maka mui ura akau gatagata suria igamu kamu takosia o God, ngaia ke koro tangagamu. ²⁰ Manga igamu kamu ura akau gatagata mataina ngaira na fagaetangigamu rainia ka mwarao aera mu tanui, make koro mwa ngai kena. Maake manga igamu maka mu ura akau gatagata mataina ngaira na fagaetangigamu maka mu tanui ka mwarao koro, o God ke fagakorofigamu rainigi ka mwarao ngai gena. ²¹ God ke usuigamu fato rai tanua ana ka ani ngai kena suria inago noga o Kraes ke fafara wau rai tamanigamu ana. Ke fagaregamu rainia ka taufa iana kamu arao suria. ²² Kraes ke marefa ni tanui ka mwarao aera, make marefa ka qaqanganifa iga ka tamasinga ni fura i farana. ²³ Mina mataina kena ainuni ka tamasi aerisia mi ngaia ke marefa ni tamasi aporo tangara. Mataina ngaira na taufaga qaomaana iga, marefa ka woita aera woi ni woisia aporo tangara. Ngaia ke raronimwora iga o God, otai ne fagagetara na inuni rainia ka taufa ne oto. ²⁴ Mataina o Kraes ne mae iga ka taotao woro, Ngaia ke torai ka aerafa iaka i apena mereana. Migia kai maemae iga ka taufa iga na aerafa, makai tafitafi nikao iga ka taufa ne oto. Suria ngaia ke taua ka mwamwariaganifa i apena, ngaia ke fagakorofigamu aporo. ²⁵ Inago noga ki igamu ke mangara na sip na tarupe fato. Mataina kaa, ki igamu kamu aporo mai nikao kamu arao suria ka mwane ne ono surira na sip. Ani na Mwane ne onoono suri na maurifamiu.

¹ Iga na tarana ngai ke, igamu na fefene mu auragi ke araria namu fagamwarufigamu tangara ko wani iamiu, suria ka manga tana wani iamiu ke marefa nai tangamworani rainia ka tamasinga iana o God, make koro tefa wau manga nui totoraira mai kai tatangamworani rainia ka taufa iamiu, marefa ki iga ka tamasinga iamiu. ² Mataina na rerea na taufa iamiu ne qaqao koro mina tako fagafigaia ana o God, makai tatangamworani. ³ Siana rai takosi rafa ana rai tanu ana ka apemiu ki qaqao koro i metara, manga no rakua ka furufuru i qaumu, mina naka ana ka ani mwa na mwarao na tagarafia rainia na rurugua mina gafu ana rainia ka gafu koro. ⁴ Mina qao korofa mwora iamiu ke rao mai pania ka mangatamiu. Ani ngai ke ke qara wau ni fatofato suria ne faganega mai iga ka tafinga ni fagamwarufinga mina marapefa ne qao koro wau i maana o God. ⁵ Mataina inago ka fefene na apuna ngaira na raronimwora rainia ko God, ngaira ka fagaqao korora mereata rai fagamwarufira ana tangara ko waniata. ⁶ Mi ka Sera nikao make tanua manga ngai kena. Ngaia ke tau woita iana ko Ebraham, ke tanua rai arafa iana. Make manga igamu kamu tanui ka mwarao koro, maki siana kamu mamaagu, suria igamu kamu manga i karena na fefene ka Sera. ⁷ Hoi ki igamu na mwane namu auragi, ke araria namu takotako rafa rainira ka fefene iamiu suria ne marefa nai nafunia ka ramwofa manga igamu na mwane namu ramwo wau gena. Hoi igamu kamui tako fagaakaufira, suria o God make suru tangara nikao. Make mafata rainia ka tafinga tangagamu fato suria na apena faikomanifa iana. Hoi ke koro wau tangagamu mu tanui manga ngai kena, ki siana ka ani mwa na mwarao nikao ni fafagaerisia ka fagarafenga iamiu. ⁸ Hoi, migamu fato ke araria namu nafunia ka mangata ne etagai kamui tatakoira ka arani inuni, maka mu kokomanigamu fato nga mangara na afaigoata mwora. Make koro tangagamu rai fagamwarufigamu ana fato. ⁹ Mataina tana inuni ne tanua na mwarao aera tangagamu migamu, ki siana nga kamui oriorisia aporo tangaa. Mina mataina tana inuni ne tamasi aera tangagamu siana nga kamui tamasi aera nikao tangaa, maaka mui tanua ka korofa tangaa suria o God ke qani ono sikifigamu, make qani suru rai fagakorofigamu ana. ¹⁰ Hoi, a Segesegefa Apuna ke woisia manga kaa, “Fea no oqania ka tafinga koro mina oga ana iga ka wagefa iga ka arani tangiana? Siana ko tamasi aera mako qaqangago. ¹¹ Ui kasigi ka taufa aera iamu panigo nga, makui tanui ka taufa ne koro. Makui rarapasia rai nafunia ana ka marapefa afainira ki tana inuni ¹² suria na Arafa iaka ke onoono surira ka inuni koro make rongora ka fagarafenga iata. Mina Arafa ke ura pusira ka ani na inuni na tanui na mwarao aera.” ¹³ Manga igamu kamu tanui ka mwarao koro, marefa ko otai ni girara fagaerisigamu ana. ¹⁴ Make manga tana inuni ke fafagagiraragamu rainia ka taufa iamiu ne oto, ua o God ke ono korofigamu. Siana rai maagutainira ana ka inuni gena, migamu ki siana kamui takotako rafa rainira. ¹⁵ Make koro tangagamu namu naka ko Kraes na Arafa iamiu, ki manga na romana mwarao i mangatamiu. Igamu kamui ogaoga nanau mwa rai aramira koro ana ka inuni na fafagategamu rainia ngatakena nga na takofa iamiu ne gatagata iga o Kraes. ¹⁶ Mui aramira iga ka taufa ne marape make koro, maka mui otooto raorao mwa kai fafatami koro rainigi ka mangatamiu. Manga na inuni ka tamasi aerisigamu rainigi ka korofa namu tatanui suria namu arao suria o Kraes, makai mamaaki rainigi ka woita iata. ¹⁷ Manga o God ke oqanigia tangai fafara ana rainigi ka mwarao ne oto na tatanui, e koro mwa, maake aera wau manga igia ka tatanui ka taa ma ni otooto maka fafafara rainigi. ¹⁸ “Kraes ke qani mae fato rainigi ka arani aerafa iaka. Ngaia ka mwane ne oto wau make mae tangara ka inuni na aera. Make toraigamu tangaa ko God ina mataina na nafuia ka apena ke mae, mo God ke fagatafia aporo nikao iga ka Figona iana.” ¹⁹ Hoi mo Kraes ke rao ke tamasia ka woita iana o God tangara ka ataro na ogaoga ina peresin. ²⁰ Ngaira ngai ge ka atarota na inuni ne ma nai tautau woita iana o God iga na mataina iana o Noa. O God ke ma ni girara mafarufaru rai fagaetangira ana. Noa ke tagarafia ka apena faka rafa wau mo God ke fagatafira ka inuni ne ewaru mwa iga ka wai. ²¹ Mina wai kaa, ke manga na fagamaanu apuna ana ne fagatafigamu nikao ina mataina kaa. Mina fagamaanu apuna ana kaa, ke marefa rai manufi ana na puniga i apemiu nga. A fagamaanu apuna kaa ka mwarao rainia na ririfa aporo ana tangaa o God mina fatami koro ana i mangatamiu, suria o Jisas Kraes ne tafi aporo pania ka maefa. ²² Jisas ke akau i Heven ke oga iotona o God, make rafa tefarira ka arani enjel mina tana ramwofa nikao.

¹ Mataina o Kraes ne ogaoga maunga ina ano kaa, ngaia ke fafara ka apena, hoi igamu nikao maka mui nafunia ka takofa ne etagai nga manga ngaia ne nafunia. Ka ani mwa na inuni ka fafara ka apena, make marefa ni arao suria ka taufa ne aera. ² Otai mu ogaoga maunga ina ano kaa siana kamui arao suria ka mwarao aera iga ka takofa iamiu ne oqania tefa wau. Siana. Maaka mui arao suria ka ata o God ne oqania mwa. ³ Inago noga igamu kamu rao suria ka taufa iata na inuni afuroto. Inago kamu tanui ka aerafa afainira ka ani mwa nai inuni, maka mu oqania tefa wau ka mwarao aera, mi igamu kamu qeka rai tonofa maka mu tono rafa wau kamu tanui ka mwarao ne aera wau nga, maka mu tanui nikao na mwarao aera manga na wogasira ana na nunuta na mwarao mwa. ⁴ Mina mataina kaa ke marefa mu tatanui ka mwarao aera afainira ka afuroto gena mi ngaira ka panga rainigamu maka tamasi aerisigamu. ⁵ Mi murina, ngaira ka tatamasia fura ka tafinga iata mereata i maana o God ne oga nasira ke fagagetara ka inuni na tafitafi maunga, mo otai na qani mae fato. ⁶ Hoi ngaia ngai ke ka inuni na qani mae fato maka rongoa nikao ka tarofa koro kaa. Mataina ngaira na tafitafi maungara make taura ka maefa mangara na arani inuni ne taura, mina mataina kaa ngaira ka nafunia ka tafinga i Heven manga o God. ⁷ Arani mwarao ina ano kaa ke suguia mwa ni fato. Hoi, ke koro tangagamu namu takotako menamenai maka mui fagagatagata tangai fagarafenga. ⁸ Nga na mwarao rafa wau nga, igamu kamui kokomanigamu mwora faitangai, suria nga na faikomanifa ke fafagafatongia ka aerafa ne rako. ⁹ Igamu kamui wagewagesira ka fitangimiu na arao mai i ruma iamiu maki siana rai osiosiga ana rainira. ¹⁰ God ke mafata rainia tangagamu fato ka romana ramwofa rai tanui ana ka tagarafa koro iana. Hoi igamu kamui tatagara nga rainia ka romana ramwofa kaa rai tamanira ana ka arani inuni. ¹¹ Manga o God ke watego ka mafatanifa rai tamasi ana, makui tamasi fura ka tamasinga iana. Manga ne watego ka mafatanifa iga na faitamanifa, makui tanua iga ka ramwofa ne watego kena. Ua, panigi na tagaranifa koro manga gaa, arani inuni kai kasia akau ko God iga ka atana o Jisas Kraes, mi ngaira kai fafagaakausia suria ka apena ramwofa iana mina rarafana ma ni tonga qotona, amen. ¹² Ua a goaku, ina mataina mu fafara wau rainia ka mwarao ne arao mai ke ofongigamu, siana kamui pangapanga ne mai taugamu, siana kamui wowoi ma ni girara taugamu ana. ¹³ Mu wawagewage suria igamu kamu faku afainia ka fafaranifa iana o Kraes, suria na mataina ne aporo mai maka mu wagewage wau rainia ka rarafana iana. ¹⁴ Manga na inuni ka tamasi aerisigamu suria igamu ka kare iana o Kraes, igamu kamui wagewage nga rainia mwa, suria na Figona Apuna iana o God ne nafunia ka apena ramwofa ke qani oga afainigamu. ¹⁵ Maake aera wau manga tana fitangimiu ki nafuia ka inuni ki mae, kee ni fanago, kee ni fagaerisia ki tana faifataninga, kee ni arao rifuia ka inuni ki fagaerisia ka tagarafa iata, maka inuni ke fagaetangigamu rai tanu ana ka mwarao aera manga ngai kena. ¹⁶ Make manga tana inuni ke fafara suria ngaira ka kare iana o Kraes, ngaira ki siana kai mamaaki rainia ka fafarana kena. Suria ne araria nai wagewage nai onigamu ana manga na Kristin ira, makai fafagaakausia mwa ko God. ¹⁷ Ina mataina kaa o God ke faganega rai fagagetara ana kai ainuni. Ainuni na tangamworani rainia ko God, ke fafagagetara inago. Make manga igia ko God ke fagagetagia inago, e qara wau tangara ka inuni marefa nai tangamworani rainia na tarofa koro iana. ¹⁸ Iga na Segesegefa Apuna ke woisia manga kaa, “Ainuni na oto ngaira ka rao noga iga ka ogafa ne qara nga, mi murina o God ke kafu fafagatafira. Hoi manga na inuni marefa nai tau woita iana o God mo otai na oga iga ka taufa iana na aerafa, ke qara wau nga tangara.” ¹⁹ Hoi ngaira na ani na fafara suria ka faioqanifa iana o God tangara, kai naka ka tafinga iata i rimana o God, suria ngaia ke tagarafira make mworamwora tangara. Ngaira kai tatanui mwa ka agua koro.

¹ Inau nikao maki tana mwane rafa iga na siosi, nau rea na fafaranifa iana o Kraes. Mi inau nikao makau kafu tawoa ka rarafa iana o God mataina o Kraes ne aporo mai. Hoi kau oqania qai fagagatanigamu ka mwane rafa iga ka siosi manga kaa, ² igamu kamui onoono surira menamenai nga ka inuni o God ne nakara i rimamiu. Ngaira ka mangara na sip tangagamu namu onoono surira ira. Hoi, igamu kamui mamarumu rai ono surira ana menamenai, manga o God ne oqania. Marefa ni koro tangagamu rai tanu ana ka tagarafa kaa rai nafuni ana ka rurugua mwa. Marefa. Igamu kamui tanua ka tagarafa kena, suria igamu kamu marumu kamu tamani ira. ³ Siana kamu rafa ira ka inuni na oga i rimamiu. Make koro tangagamu rai fagaqao ana rainia ka taufa koro. Mi ngaira kai arao surigamu manga na sip na arao suria na mwane ne onoono surira ira. ⁴ Mina mataina na mwane rafa iata na mwane na onoono surira na sip ira ne aporo mai, ngaia ke girara mafata raini ana ka mwarao ne qao koro wau tangagamu, ne marefa ni fatofato. ⁵ Iga na tarana ngai ke, igamu na mwane faoru, mui tautau woita iata ka inuni rafa. Migamu na arani inuni fato kamui fagamwarufigamu faitangai, suria na Segesegefa Apuna ke woisia manga ngai ke, “O God ke ura pusia ka ani na inuni na qaqaeaga, maake oqa koro tangara ka inuni na fagamwarufira.” ⁶ Hoi ki igamu kamui fagamwarufigamu mereamiu irugufanana rimana o God ne nafunia na ramwofa ne tefa. Ki iga ka mataina koro iana ki fafagaakausigamu. ⁷ Hoi, arani aoqasuanifa iamiu kamui fafagauguria rainia, suria ngaia ke onoono surigamu. ⁸ Igamu kamui oga nanau nga maka mui onoono menamenai rainia ka maeronga iamiu ia o Satan. Ngaia ke ririfuigamu iga ka arani mataina rai fagaerisigamu ana. Ke manga tana laeon ne magau wau ke arao rifurifu make ngerengere rafa wau. ⁹ Hoi, igamu kamui ura pusia maka mu ura akau gatagata iga ka tangamworanifa iamiu, suria igamu kamu girara ka goamiu iga ka arani finua ina ano kaa, ka fafara wau iga ka mwarao mwa ne etagai ne taugamu kena. ¹⁰ Migamu namu fafara wau suria ka kere mataina mwa, mo God ke fafagakoroa ka tangamworanifa iamiu, make wategamu ka ramwofa rai ura akau gatagata ana. O God ke tatamanigamu rainia ka faikomanifa rafa iana. Mi igamu kamu faku afainia ko Kraes, ngaia ke ono sikifigamu kamu nafunia ka fagaqaonga rainia ka apena ramwofa iana marefa ni fatofato iga ka ani mwa na mataina. ¹¹ Migia kai kasia akau rainia ka apena ramwofa iana raorao mwa ne marefa ni fatofato. Amen. ¹² Saelas ke tamaniau kau segea ka qouqou gana leta kaa tangagamu. Mi inau kau girara ngaia ki tana goaku nau raronimwora wau nga rainia. Iga na leta kaa ia inau kau oqania rai fagagatania ana ka takofa iamiu, makau woi tangagamu nikao rainia ka tara ia o God ne fagaregia rainia ka apena faikomanifa iana. Ngaia ka mwora na tara ia migamu kamui ura akau gatagata iga ki ngaia. ¹³ Arani inuni iga na sios i Babilon ka woisia ka tamasinga ni fagaakausinga tangagamu. God ke ono sikifigira manga igamu ia nikao. Mo Mak ne manga i kareku ke kasia ka tamasinga iana tangagamu. ¹⁴ Mui kanakanasigamu fairifui manga iga na kastom iaka, namu sisiginigamu mangara mwa na afarigoata ira, suria mui komanigamu fairifui. Marapefa afainigamu fato na kare iana o Kraes. Amen.