Tiito

Ritashandighi irya Pauro

ku-Tiito

Obhotangati

Ritashandighi reno, ndyaandëkirwë na omotomwa Pauro. Pauro yaakörrë na Tiito emeremo ighya Waryobha kwi-ghinga irya Kerete. Hano Pauro yaaruurë Kerete iyö, ho yaandëkëëyë Tiito ritashandighi reno, akamoraghërrya igha, aimererrenga bhuuya abhakumya. Pauro yaahaayë Tiito emeremo ighya ukushaaghora abhaghaaka abha ekanisa. Kora akamosaasaama igha, atogheke abhakumya abha Yëësu bhatakatimbooshoka, ko bhoora Kerete hayö, bhaaibhökirë-ho abhantö bhano bhëëghyanga abhantö amangʼana agha obhorongo.

Kasi ekenene ritashandighi reno, ndituubhaini bhököngʼu na sembaara isyëndë isya ritashandighi irya mbere reno Pauro yaandëkëëyë Timoteo. Abhantö nkokanya bharë igha, amatashandighi abhërë ghano, ngaandëkirwë enkaagha ëmwë. Hano oraatune okomanya bhuuya engʼana nyabhorebhe eno ërëngë mu-ritashandighi irya Tiito reno, ndakosabha igha, omaahe mu-ritashandighi irya mbere, reno Pauro yaandëkëëyë Timoteo.

Amakëërërryö

¹Ritashandighi reno, nö-öni Pauro ndyandëkirë, öni ömököri uwa emeremo uwa Waryobha, ono ndëngë omotomwa uwa Yëësu Kiristo. Naatomwa ndaghërri abhantö bhano bhaashaaghorwa na Waryobha, okore bhamukumi na okomanya obhoheene ubhwa Yëësu Kiristo. Obhoheene bhuyö, mbo bhokoraghërrya abhantö bhasooke Waryobha, ²na mboraabhahaane ubhweseghe ubhwa öbhöhöru ubhwa amakora ghonswe igho. Waryobha ono atakorongoha, we yaaraghaini öbhöhöru bhuyö, kora ekebhara ketaraabhombwa. ³Bhoono eno yo enkaagha eno Waryobha ahanshirë igha ööröki harabhu igho Amangʼana aghaaye Amaiya. Waryobha Ömötöörya uwëëtö yaahanshirë igha, angʼaane emeremo ighya okoraareka amangʼana ghayö. ⁴Tiito nu-uwe nkwandekera. Uwe m-maheene igha, m-moona uwaane örë ku-mukumo ghono tokosanga.

Örööbhö na omorembe bheno bhikurwa ku-Waryobha Taata uwëëtö, na ku-Kiristo Yëësu Ömötöörya uwëëtö, bhebhe hamwë na uwe.

Tiito aratëëbhibhwa ukushaaghoraabhaghaaka abhatangati abha ekanisa

⁵Hano naaruurë Kerete hayö, naakutighirë-ho igha, omarërri okokora amangʼana ghaara ghaatighaayë, hamwë na ukushaaghora abhaghaaka abha ekanisa mu-mighi ghyonswe igho, kya bhono naakoraghërrya. ⁶Omoghaaka omotangati uwa ekanisa, ni-igha abhe ömöntö ono atakotemwa amasoro. Abhe umushaasha nyamokari ömwë igho,1:6 Abhe umushaasha nyamokari ömwë igho. Ensonga iyaako iyëndë ni-igha, atakaabha omosooraare. abhe na abhaana abhakumya, bhano bhatarë abhamangarru, handë bhano bhatakwighwa. ⁷Ko bhoora igha, omoghaaka omotangati uwa ekanisa, uyö we umwimërërri ono yaaghöötibhwa emeremo ighya Waryobha, ku bhuyö ni-igha, atakaabha ömöntö uwa okotemwa amasoro. Atakaabha na ekeghaaka, atakaabha ömöntö uwa enkoro, atakaabha ömörëëbhi, atakaabha umutindi, kora atakaabha na oronamba urwa seehera. ⁸Kasi asërëëninga abhantö, abhe ömöntö ono ahanshirë amangʼana amaiya, abhe ömöntö ono akogheera ngʼora amangʼana, ömöntö uwa heene, ömöhörëëru, ono akwirebherra umwene. ⁹Aghootenga bhuuya amangʼana agha obhoheene agha Yëësu Kiristo, kya bhono yëëghibhwa. Hayö ho araatore okotogheka abhantö ko amëëghyö agha obhoheene, na okohengera bhonswe igho bhano bhakunyeera senkaani amëëghyö ghayö.

¹⁰Nkökötëëbhya ndë igho, ko bhoora igha, bhaaho abhantö abhaaru Kerete hayö, bhano bhatakwighwera engʼana, bhano bhakoghamba amangʼana ghano ghataana ubhwera, kora m-barongo, ekenene, na-Bhayahudi bhaara bhakokangʼasërrya eteemo iyaabho iya Ikiyahudi. Abhantö bhayö, ni-igha bhakaanibhwi ukwëghya, ¹¹ko bhoora ukwëghya ukwabho, nkusirya körë abhantö mu-mighi ighyabho ghyonswe igho. Bharëëghya amangʼana ghano ghataana enshera, okore bhanyoore seehera, ko enshera engogho eno ëkösöökya. ¹²Yaare-ho Omokerete ömörööti uwaabho abheene, ono yaaghambirë igha, “Abhakerete m-barongo nkaagha syonswe igho, mbatuubhaini kya sityënyi sengogho isya mwi-sisi, m-booro, kora m-bahobhaaru!” ¹³Amangʼana ghayö m-maheene. Ku bhuyö okaaninga abhantö bhayö bhököngʼu, okore bhaghoote amëëghyö agha obhoheene. ¹⁴Bhatakaitegherranga amaghano agha Ikiyahudi, ghano ghataana ubhwera bhwobhwonswe bhoora, bheena amaraghërryö agha abhantö bhano bhaatigha obhoheene.

¹⁵Mbe, abhantö bhayö nkwëghya bharë igha, bheeho ëbhëntö ibhinyanku. Kasi öni ndaghamba igha, ëbhëntö bhyonswe igho bhyasendoorwa, ku bhuyö m-biiya, ko bhano bhaana eteemo inshiiya ku-Waryobha. Kasi ko abhanyanku na bhano bhatakukumya, ëbhëntö bhyonswe igho m-binyanku, ko bhoora igha, amaitegherro aghaabho na senkoro isyabho, nsishööyë ubhunyanku. ¹⁶Abheene nkoghamba bharë igha, mbamanyirë Waryobha, kasi amangʼana ghano bhakokora nkwörökya gharë igha, nkumwanga bharë. Abhantö bhayö, m-basëësëëbhya abha senkoro, m-batëëyu, tebhaana ubhwera ubhwa okokora amangʼana amaiya hë.

Amëëghyö agha obhoheene

¹Kasi bhoono uwe Tiito, wëëghinga abhantö amëëghyö agha obhoheene. ²Ötëëbhi abhaghaaka igha, bhagheerenga ngʼora amangʼana, bhaisooke, bhairebherre, bhabhe na umukumo ughwa obhoheene, bhaghömërringa, kora bhabhe na righonshe.

³Abhakungu bhonswe bhakorenga kya igho, obhatëëbhi igha, bhabhe na eteemo eno ëkötöönia Waryobha. Bhatakaabha abhaghambi abha abhantö, bhatakaabha abharëëbhi, kasi bhatönibhwi ukwörökërrya abhantö eteemo inshiiya, ⁴okore bhëëghinga abhakari abhaana abhake bhahanshe abhashaasha abhaabho na abhaana abhaabho. ⁵Ghwiki ni-igha, abhakari abhaana abhake, bhagheerenga ngʼora amangʼana, bhabhe abharöngë, bhanaghi bhuuya, amangʼana agha mu-sinyumba isyabho, bhabhe abhantö abha heene, bhano bhakosooka bhashaasha abhaabho. Obhatëëbhi bhakore igho, okore engʼana iya Waryobha etakaaserwa.

⁶Kora abhamura bhonswe obhakaani, okore bhagheere ngʼora amangʼana ghonswe igho. ⁷Uwe Tiito, ko amangʼana ghonswe igho, obhe ëkërëngyö ikya abhantö ökörëngya okokora amangʼana amaiya. Obhe ömöntö uwa obhoheene na ono onaghirë kö-mëëghyö aghaaho. ⁸Amëëghyö aghaaho ghabhe agha heene, ghano ghatakotemwa amasoro na abhantö. Nyoore abhantö bharatuna okoghanyeera senkaani, bhasooke ko bhoora mbaraabhorwe engʼana, iya okotoghamba obhoghogho.

⁹Ötëëbhinga abhaghorwa igha, bhasookenga abhanene abhaabho na okobhakorra amangʼana ghonswe igho bhuuya, bhatakaabhanyeera senkaani. ¹⁰Bhatakaabheebheranga, kasi bhabhe abhantö abha heene, okore eteemo iyaabho irute abhantö, bhashomerwe na amëëghyö agha Waryobha Ömötöörya uwëëtö.

¹¹Wëëghinga abhantö amangʼana ghayö, ko bhoora, örööbhö urwa Waryobha rono rököhönia abhantö bhonswe igho, harabhu igho rörë. ¹²Örööbhö ruyö, nkutwörökërrya rörë igha, twange amangʼana amaghogho na oronamba urwa ko-kebhara kono. Ku bhuyö, enkaagha eno tökërëngë ko-kebhara kono, togheerenga ngʼora amangʼana, tobhe abhantö abha heene, na tobhe abhantö abha eteemo iya okosooka Waryobha. ¹³Tokorenga igho enkaagha tukwitengʼera urusikö urwa obhongʼoore. Urusikö roora Yëësu Kiristo arikyora, amaahekane ku-bhuhika ubhwaye. Uyö we Waryobha uwëëtö, Omonene uwëëtö, na m-Mötöörya uwëëtö. ¹⁴Yaairuusiri ko okoghera iya bhëëtö, okore atutunguri ukurwa mo-bhosarya ubhwëtö bhonswe igho. Yaatunirë igha atosaabhuure, okore tobhe abhantö abhaaye abha heene, bhano bhairuusya okokora amangʼana amaiya.

¹⁵Mbe, bhoono wëëghinga abhantö amangʼana ghayö ghonswe igho. Oona ubhwera bhwonswe igho ubhwa okotogheka na okokaania abhantö, ku bhuyö, otakaaserwa na ömöntö wowonswe oora.

Okokora amangʼana amaiya

¹Uhiitökinga abhakumya igha, bhasookenga na ukwighwera abhatangati na abha ubhwera. Bhabhe na eteemo iya okokora amangʼana amaiya. ²Obhatëëbhi igha, bhatakaatoka ömöntö wowonswe oora, bhatakaabha abhatindi, kasi bhabhe abhahaabhu, na abhaihöötu ko-bhantö bhonswe igho.

³Kora bhëëtö bhonswe kare hayö, hano waanyöörrë totaraakumya Yëësu, m-bakangi twaarë, abhatëëyu, kora ntwaangʼainirwë, tokabha abhaghorwa abha oronamba, na amangʼana amaaru agha ko-kebhara kono, ghano ghaaturutanga. Tokabha abhantö abhaghogho na abha orongʼeera. Tokabha abhantö abha okoreghana na abhantö abhandë. ⁴Kasi Waryobha Ömötöörya uwëëtö, akatokorra öbhöntö ubhwa heene, kora akatwörökya righonshe iryaye, akatötöörya. ⁵Ti-igha öbhöntö ubhwa heene ubhwëtö, mbo bhwaaghërrë akatokorra ghayö, kasi n-ko okoghera iya ikyabhera ikyaye, nkyo kyaaghërrë akatokorra igho. Atosaabhuurrë obhoghogho ubhwëtö, kuyö nko ukwebhorwa bhohya. Ghwiki atohaayë öbhöhöru bhohya okohetera ku-Mwika Ömöhörëëru. ⁶Waryobha yaatöhömërrëëyë bhököngʼu Umwika Ömöhörëëru, ko okohetera ku-Yëësu Kiristo Ömötöörya uwëëtö. ⁷Ni-igho Waryobha yaakörrë, kora akatokora tobhe abhantö abha heene, kö örööbhö urwaye, okore toraaghere umwandö ughwa öbhöhöru ubhwa amakora ghonswe igho, kya bhono tukwitengʼera.

⁸Amangʼana ghayö nkötëëbhëri, na-agha obhoheene. Nkutuna ndë igha oghakangʼasërri ko-bhantö, okore bhano bhonswe igho bhakukumya Waryobha, bhaghanaghi, na bhaiköngʼërri okokora amangʼana amaiya. Amangʼana ghayö m-maiya, kora ngaana ubhwera ko-bhantö bhonswe igho. ⁹Hamwë na ghayö ghonswe igho, ni-igha wihëënëri-ho senkaani isya ekekangi, amariina agha abhakörö, ubhutindi na senkaani ko amangʼana agha amaraghërryö agha Mosa. Amangʼana ghayö ghonswe igho teghaana ubhwera hë. ¹⁰Ömöntö ono akösëëghërrya abhantö, omokaani, hano oraamokaani urwa kabhërë, unyoore igha takwighwa hë, tighana nawe këmwë. ¹¹Nomanyirë igha ömöntö kya uyö, yaatigha obhoheene, ku bhuyö ëbhëbhë ibhyaye, bhyamara okomobhotorra ikiina igha, m-mosarya.

Amangʼana agha okomarërrya na okoragha

¹²Ndööshë igha ngende Niköpöri, nikare-yo enkaagha iya embeho. Kasi nendaatome Aritema handë Tikiiko ku-uwe hayö. Hano ömwë uwaabho arihika hayö, wuushe ukwangoha tomaahane Niköpöri eera. ¹³Wiköngʼërri ökötöörrya umushaasha oora Zeena omomanyi uwa amaraghërryö. Apöörö wonswe ömötöörri. Obhahaane ëbhëntö bhyonswe igho, bheno bheraabhatöörri ko-roghendo urwabho. Bhatakaasuuhwa na kyokyonswe keno bhakutuna. ¹⁴Abhakumya bharikyëtö bhonswe, bheeghe okokora amangʼana amaiya, okore bhatöörri abhahabhë. Hano bharaakorenga igho, mbaraabhe abhantö abha ubhwera tebhahete bhosa igho hë.

¹⁵Abhantö bhonswe igho bhano bharëngë hamwë na öni hano, bharakökëërya. Bhoono na uwe wonswe, ötökëërri abhaghonshe abhëëtö bhonswe igho. Örööbhö urwa Waryobha, robhe hamwë na bhëënyu bhonswe igho.