Okohonyora ukwa Yohana

Okohonyora ukwa Yohana

Obhotangati

Umwandëki uwa eketabho keno, araitobhora igha we Yohana, ghwiki araibherekera igha, ömököri uwa emeremo uwa Waryobha (Maaha Okohonyora 1:1, 1:9). Abhamanyi abha amangʼana agha Ibhibhuria abhaaru, nkokanya bharë igha Yohana uyö, nö-ömwë uwa abheegha abha Yëësu yaarë (Maaha mo-ketabho ikya Mataayo 10:2; Maariko 3:17). Yohana uyö, we yaandëkirë eketabho ikya Yohana. Ghwiki we umwandëki uwa amatashandighi ghonswe igho atatö agha Yohana.

Abhantö nkokanya bharë igha, eketabho keno, ni-ikya umuhiko ku-kwandekwa ko-bhetabho bhyonswe igho, mu-Muuma Eehya. Eketabho keno, nkushumaashera kërë amangʼana ghano Yohana yöörökiibhwi, enkaagha eno yaarë mo-kebhohe, kwi-ghinga reno rekobherekerwa igha Paatimo (Maaha Okohonyora 1:9). Righinga riyö, ndyo abhabhohe bhaahirwanga-ko. Kaisaari, omokama uwa Abharuumi ono yaabherekerwanga igha Domitiano, uyö m-mubhisa uwa Abhakiristo yaarë, kora we yaahirrë Yohana mo-kebhohe kwi-ghinga kuyö.

Eketabho keno, Yohana yaandëkëëyë Abhakiristo abha amakanisa muhungatë agha omokowa ughwa Asia Enke. Reero eno ahasë hayö nkobherekerwa harë igha ikyaro ikya Bhuturuki. Abhakiristo bhayö, bhaarenga na ëhëghërë enene eno yaasëmööywë na Kaisaari Domitiano. Ikibhuno ikya ëhëghërë iyö, n-ko bhoora bhaaikërëëyi engʼana iya Waryobha na okoghoota-ko amangʼana agha Yëësu Kiristo.

Mbe, Yohana akabhandekera, okore abhatërëmi, akabhatëëbhya igha, bhaghömërri inyanko iyö igho, na hano irihwera. Akabhatëëbhya igha, bho bhaghömërri ëhëghërë iyö, ni-iya akabhagha akake igho, na umuhiko ughwako Waryobha narishibhya abhabhisa abhaabho bhonswe igho.

Yohana yaarööshë amangʼana agha amamaaho ghano, arëngë maiso. Yëësu yaamwörökëri amangʼana agha enkaagha eno yaaheta, na eno iriisha. Amangʼana aghandë ghano Yohana yaatoora harabhu igho mo-ketabho mono, na-mangʼana ghaara agha ukukwa na ukuryoka ukwa Yëësu Kiristo (Maaha Okohonyora 1:18). Obhoheene amangʼana ghano, ngo imitimö ighya umukumo ughwa Abhakiristo (Maaha mo-ketabho ikya 1 Abhakörintö 15:14-17).

Senkaagha isyëndë ebherooto ibhyëndë, bherabhanga ibhya ikibhisirë, kasi Waryobha nkohonyorra arë abhakumya abhaaye. Eketabho ikya okohonyora ukwa Yohana, nkötërëmya kërë abheegha abha Yëësu Kiristo, okore bhaghëndërri ököghömërrya.

Yohana arashumaashera amangʼana agha eketabho keno

¹Kono no-kohonyora ukwa Yëësu Kiristo. Waryobha yaahaayë Yëësu Kiristo okore ööröki abhaköri abha emeremo abhaaye amangʼana ghano heene ghakaangöhirë ukwikora. Yëësu wonswe akatëëbhya maraika uwaaye ahonyorre Yohana, ömököri uwaaye uwa emeremo. ²Yohana akaimererra amangʼana ghonswe igho ghano yaarööshë. Amangʼana ghayö yaarööshë, na-agha obhoheene bhono bhwahönyööywë na Yëësu Kiristo. Obhoheene bhuyö, mbo engʼana iya Waryobha. ³Nyakara abhantö bhonswe igho bhano bhakosomera bharikyabho amangʼana ghayö, agha öbhörööti. Nyakara bhano bhakwitegherra na ököröndërrya ghano ghandëkirwë muyö, ko bhoora enkaagha iya ukwebhoka kwagho, haangʼë ërë.

Amakëërërryö

⁴Öni Yohana, ritashandighi reno, m-bëënyu nkwandekera abhasoorani abha Yëësu abha amakanisa muhungatë ghano gharëngë ikyaro ikya Asia Enke.1:4 Asia Enke yo reero eno ekobherekerwa igha ikyaro ikya Bhuturuki.

Munyoore örööbhö na omorembe ukurwa ku-Waryobha ono aaho, ho yaarë ukurwa okosemoka, nanyabhoono ho arë, na ukurwa ku-Miika muhungatë bhano bharëngë bhöröngë ubhwa ikitumbë ikya ekekama, ⁵na ukurwa ku-Yëësu Kiristo umwimërërri uwa heene. Uyö we yaaryökiibhwi mbere, okore abhe omokama uwa abhakama bhonswe igho ko-kebhara.

Yëësu Kiristo natohanshirë, kora yatotashora ukurwa mö-bhëbhë ibhyëtö ku ukutukwera. ⁶Atökörrë tobhe obhokama na abhasëngëri, okore tutighinkanere Waryobha. Waryobha uyö, n-Suwaabho. Ubhuhika na obhotoro, bhebhe ku-Yëësu amakora na amakora! Amina.

⁷Motamaaha! Nariisha arëngë ko-masaarö!1:7a Maaha mo-ketabho ikya Daniëri 7:13.

Kera ömöntö naremomaaha,

kora abhantö bhaara bhaamöbhëtirë ritimö, bhayö bhonswe mbaremomaaha.

Amakabhira ghonswe igho ko-kebhara ngarikuura ko okoghera iya Yëësu.1:7b Maaha mo-ketabho ikya Zakaria 12:10; Yohana 19:34.

Yëë. Amina.

⁸Omonene Waryobha araghamba igha, “Öni nö-öni Esemoko na Umuhiko.1:8 Esemoko na Umuhiko, mu-Kiyunaani ni-igha Arufa na Omegha. Arufa në-hërufi iya mbere kö-sëhërufi isyabho, na Omegha në-hërufi iya umuhiko. Öni ho ndë, ho naarë ukurwa okosemoka, nanyabhoono ho ndë. Nö-öni neena obhotoro bhwonswe igho.”

Yohana aramaaha Omoona uwa Ömöntö

⁹Öni nö-öni Yohana umukumya murikyënyu. Nkötöörrania ndë hamwë na bhëënyu ököghömërrya inyanko ko okoghera iya Yëësu na Obhokama ubhwaye. Öni naarëbhërrëëywë kwi-ghinga reno rekobherekerwa igha Paatimo. Naarëbhërrëëywë iyö, okore igha, ntakaaraareka engʼana iya Waryobha na ntakaimererra amangʼana agha Yëësu. ¹⁰Mbe, Umwika Ömöhörëëru akanyitoomera urusikö nyabhorebhe urwa Omonene Yëësu.1:10 Urusikö urwa Omonene Yëësu ruyö nu-rusikö urwa Jumapiri rono Yëësu yaaryökirë mo-bhaku. Kamwë igho, nkaighwa nyuma iyaane iyö, engamba enene kya iya orotera. ¹¹Engamba iyö yaaghambirë igha, “Andeka mo-ketabho amangʼana ghonswe igho ghano oraamaahe. Omare otomane eketabho kiyö mo-makanisa muhungatë agha Ëfësö, Simirina, Perighamo, Tiyatira, Saridi, Firadërifia, na Raodikia.”

¹²Nkaisyörya mmaahe uyö yaashumaashirë na öni, nkamaaha ebhetangora muhungatë ibhya esahaabhu ibhya okotoora-ko setara. ¹³Ghatëghatë iya setara siyö, nkamaaha-ho ömöntö anga kya Omoona uwa Ömöntö.1:13 Omoona uwa Ömöntö. Maaha mo-faharaasa. Aibhöhirë engansho entambë, na mu-kikubha, yaaibhöhirë umushibhi omoghare ughwa esahaabhu. ¹⁴Situukya isyaye ne-ndabhu shaa syaarë kya simbushe, ghwiki nsyaatuubhaini kya righörö rirabhu shaa. Amaiso aghaaye, ghaamekamekanga kya ëbhëmörë ibhya omorro. ¹⁵Amaghörö aghaaye ghaamekamekanga bhököngʼu kya ishabha eno ighuutirwë na omorro. Engamba iyaaye, yaarenga kya amanshë amaaru ghano ghakoghera mö-sënkörömöri. ¹⁶Ömöntö uyö, yaarë na sinyota muhungatë mo-kobhoko ukwa bhoryo. Umushonge umwöghë nyambagha ibhërë, ghwaarwanga mu-munywa ughwaye. Ubhusyö ubhwaye, bhwaamekamekanga kya omobhasö ömörörö kai.

¹⁷Hano naamörööshë, nkaghwa hansë bhubhuumaayë ko-maghörö aghaaye, ukwörökya igha, nëmösöökirë, nkabha kya ono nkuurë. Kasi akantoorra okobhoko ukwaye ukwa bhoryo eno arantëëbhya igha, “Otakoobhoha! Öni nö-öni uwa mbere na nö-öni embotorra. ¹⁸Nö-öni öbhöhöru! Naarenga nkuurë, kasi bhoono tamaaha, möhöru ndë, amakora ghonswe igho. Nö-öni neena sefongoro isya uruku na isya mu-kyaro ikya abhaku.1:18 Mu-kyaro ikya abhaku. Maaha mo-faharaasa engʼana, Ikyaro ikya abhaku.¹⁹Bhoono andeka amangʼana ghayö örööshë, ghayö ghakwebhoka bhoono igho, na amangʼana ghaara gharyebhoka mbere iyö. ²⁰Mo-kobhoko ukwane ukwa bhoryo, waarööshë-mo sinyota muhungatë, ghwiki okamaaha ebhetangora muhungatë ibhya esahaabhu ibhya okotoora-ko setara, ensonga iya ikibhisirë kiyö ni-igha, sinyota muhungatë seera, na-bhamaraika abha makanisa muhungatë. Ebhetangora muhungatë ibhya esahaabhu ibhya okotoora-ko setara, bhiyö na-makanisa muhungatë.”

Ritashandighi ko abhantö abha ekanisa iya Ëfësö

¹Ömöntö uyö arëngë kya m-Moona uwa Ömöntö akaghëndërrya ököntëëbhya igha, “Andekera maraika uwa ekanisa iya Ëfësö, ömötëëbhi igha,

Ghano ngo nkoghamba öni ono ngötërrëëyë sinyota muhungatë mo-kobhoko ukwane ukwa bhoryo. Öni nö-öni nkoghenda ghatëghatë iya ebhetangora muhungatë ibhya esahaabhu bheera ibhya okotoora-ko setara. Mwitegherre ghano nkobhatëëbhya.

²Nemanyirë amangʼana aghëënyu ghano mokokora, na omotono ughwënyu, na ököghömërrya ukwënyu. Kora timukwikererrania na abhantö abhaghogho, ko bhoora mwaashaashiri bhaara bhakwibherekera igha m-batomwa, mokamaaha igha, te-bhatomwa hë, m-barongo. ³Kora nemanyirë igha, mworeka bhököngʼu na amangʼana aghaane, kasi mwaaghömërrya nanyabhoono temoraarosa hë. Mwitegherre ghano nkobhatëëbhya!

⁴Kasi moona engʼana eno ikunnyankya. Ni-igha, mwatigha righonshe iryënyu reno mwaarë naryo ekembere. ⁵Muhiite ghano mwaakoranga haara mwaankumiri. Mohongore ëbhëbhë ibhyënyu, mokore kya ghaara mwaakörrë ko-nkaagha eera. Hano motaahongore ëbhëbhë ibhyënyu, nindiisha nduusi-ho eketangora ikyënyu ikya okotoora-ko setara. ⁶Kasi eeho engʼana eno mokokora bhuuya. Mwaregha amangʼana amaghogho ghano Abhanikorai2:6 Abhanikorai n-dikomo irya idiini ryaarë, reno ryaarondyanga seteemo sengogho na amëëghyö agha obhorongo. bhakokora. Ghayö ngo kora öni wonswe nkoregha bhököngʼu.

⁷Ono aana amatwë, aitegherre amangʼana ghano Umwika Ömöhörëëru akötëëbhya amakanisa. Ömöntö wowonswe ono arekera amangʼana ghayö na aghömërri righonshe irya mbere reera, nindimwikërrya araaghere sehagho isya ömötë ghono ghokohaana abhantö öbhöhöru. Ömötë ghuyö, mu-ryobha iyö ghörë mu-bhusitaani iya Waryobha.”2:7 Maaha mo-ketabho ikya Okosemoka 2:9.

Ritashandighi ko abhantö abha ekanisa iya Simirina

⁸Ömöntö uyö akaghëndërrya okoghamba igha, “Andekera maraika uwa ekanisa iya Simirina, ömötëëbhi igha,

Öni nö-öni uwa mbere na nö-öni embotorra. Naakuurë, nkaryoka, na bhoono igho m-möhöru ndë! Mwitegherre ghano nkobhatëëbhya!

⁹Nemanyirë inyanko iyëënyu, na öbhötöbhu ubhwënyu. Kasi obhoheene, bhëënyu m-baamë mörë! Kora nemanyirë kya bhono bhakobhatoka bhayö bhakwibherekera igha m-Bayahudi, kasi te-bho hë. Bhayö na-bhasoorani abha Oghosambwa.2:9 Oghosambwa. Maaha mo-faharaasa.¹⁰Motakoobhoha inyanko iyö murinyoora. Motamaaha! Oghosambwa ngorebhashaashya, kora ghotoore bharikyënyu mo-kebhohe, na bhëënyu murinyankibhwa sinsikö ikömi. Kasi mobhe abhantö abha heene ku-öni, nokaanyoora igha nkukwa, mukwe. Ko bhoora öni, nendebhatuha ibhirighi ibhya öbhöhöru ubhwa amakora ghonswe igho.

¹¹Ono aana amatwë, aitegherre amangʼana ghano Umwika Ömöhörëëru akötëëbhya amakanisa. Ömöntö wowonswe ono arekera amangʼana ghayö, tarikunibhwa na omorro ughwa amakora ghonswe igho kora hake hë. Omorro ghuyö, ngwo uruku urwa kabhërë.”2:11 Maaha mo-ketabho ikya Okohonyora 20:6, 20:14, 21:8. 

Ritashandighi ko abhantö abha ekanisa iya Perighamo

¹²Ömöntö uyö akaghëndërrya okoghamba igha, “Andekera maraika uwa ekanisa iya Perighamo, ömötëëbhi igha,

Neena umushonge umwöghë nyambagha ibhërë. Mwitegherre ghano nkobhatëëbhya!

¹³Öni nemanyirë ahasë hayö mömënyirë, hayö, ho Oghosambwa ghokotonga. Nokaanyoora ni-igho amangʼana gharë, kasi nkunkumya mökërë. Kora enkaagha eno umwimërërri uwaane uwa heene Antipa yaaitirwë mu-mughi ughwënyu muyö Oghosambwa ghömënyirë, temwanyikaanirë hë. Antipa uyö, nu-mwimërërri uwaane uwa heene yaarë.

¹⁴Kasi amangʼana gharëngë kö-bhëënyu amake igho, ghano ghakunnyankya. Bhaaho abhantö bhano bhakosoorana amëëghyö agha Bharaamu, mö-bhëënyu muyö. Bharaamu uyö, yëëghëri Bharaaki okotegha Abhaisiraëri, okore bhakore ëbhëbhë ibhya okorya ibhyakorya bheno bhimwënsëywë ëbhëtöndö, na okokora obhosooraare.2:14 Maaha mo-ketabho ikya Okobhara 22:1–25:3, 31:16.¹⁵Ghwiki abhandë ni-ighoigho bhakokora ko okosoorana amëëghyö amaghogho agha Abhanikorai. ¹⁶Mbe, mohongore ëbhëbhë ibhyënyu! Hano moraange okobhehongora, m-böngöbhöngö ndaashe na umushonge, ghono ghukurwa mu-munywa ughwane, okore nkore riihë na abhantö bhayö.

¹⁷Ono aana amatwë, aitegherre amangʼana ghano Umwika Ömöhörëëru akötëëbhya amakanisa. Ömöntö wowonswe ono arekera amangʼana ghayö, ndimutuha ituho ekerengere ikya ibhyakorya ibhya emana2:17 Emana ni-bhyakorya bheno Abhaisiraëri bhaaryanga enkaagha eno bhaarenga ku-riköngö. Maaha mo-ketabho ikya Ukurishoka 16:31-34. eno yaabhiswa. Ghwiki nendemohaana reghena rirabhu. Reghena riyö, nurinyoora ryandëkirwë-ko iriina reehya. Taaho ömöntö ono aremanya iriina riyö hë. Kasi ono arehaanwa reghena riyö, we aremanya.”

Ritashandighi ko abhantö abha ekanisa iya Tiyatira

¹⁸Ömöntö uyö akaghëndërrya okoghamba igha, “Andekera maraika uwa ekanisa iya Tiyatira, ömötëëbhi igha,

Öni nö-öni Omoona uwa Waryobha.2:18 Omoona uwa Waryobha. Maaha mo-faharaasa. Neena amaiso kya ëbhëmörë ibhya omorro, na amaghörö agha okomekameka kya ishabha eno yaaghuutwa mo-morro. Mwitegherre ghano nkobhatëëbhya!

¹⁹Nemanyirë righonshe iryënyu, amangʼana ghano mokokora, umukumo ughwënyu, öbhököri ubhwënyu ubhwa emeremo, na ököghömërrya ukwënyu. Ghwiki nkomaaha ndë igha, bhoono, m-buuya mokokora, ko bhoora möhëtërëëyë ghaara mwaakoranga kare.

²⁰Kasi moona engʼana eno ikunnyankya. Bhëënyu nkwikererrania mörë na amangʼana agha omokari oora Yëzëbhëëri. Uyö akwibherekera igha m-mörööti, kasi të-mörööti hë. Nkwikërrya mörë igha angʼaine abhaköri abha emeremo abhaane, ko ököbhëëghya bhakore obhosooraare, na okorya ibhyakorya bheno bhimwënsëywë ëbhëtöndö. ²¹Öni namohaana umweya, okore ahongore ëbhëbhë ibhyaye, kasi takutuna ukutigha obhosooraare ubhwaye hë. ²²Motamaaha! Ku ikibhuno kiyö, nendaamohaane inyanko iya öbhörööyë bhono bhoraaghire ange ukurwa kö-bhörrë. Na abhantö bhonswe igho bhano bhakokora nawe obhosooraare, nendaabhanyanki bhököngʼu, hano bhatahöngööyë amangʼana aghaabho amaghogho. ²³Ghwiki obhoheene ni-igha, nendaaite abhasoorani abhaaye. Hayö ho abhantö abha ekanisa bhareemanya igha, öni nkwitaaha ndë enkoro na amaitegherro agha ömöntö. Nendehaka kera ömöntö mö-bhëënyu, ko okorengʼaana na ghano yaakora.

²⁴Kasi bhaaho abhantö abhandë abha heene mö-bhëënyu Tiyatira hayö. Abhantö bhayö tebhakosoorana amëëghyö agha Yëzëbhëëri hë, kora tebhamanyirë ëbhëntö bhiyö abhandë bhakoghamba igha ni-bhibhisirë ibhya mönsë. Kasi obhoheene ni-igha, ibhibhisirë bhiyö, na-mëëghyö agha Oghosambwa. Bhëënyu keno nkobhatëëbhya ni-igha, tëmbëngëri umurigho ughwöndë hë, ²⁵kasi moghoterre bhuuya amaiya ghayö moonagho, okohekera hano ndiisha.

²⁶Ömöntö wowonswe ono arekera amangʼana ghayö na aghëndërri okokora bhono nkutuna okohekera umuhiko,

“Nendemohaane ubhwera ubhwa okotonga ibhyaro bhyonswe igho.

²⁷Areetonga kö öbhöbhë ko okobhatemera inyimbo iya ikyoma,

narebhabhondora kya sinyöngö.”2:26-27 Maaha mo-ketabho ikya Zabhuri 2:8-9.

Narehaanwa ubhwera kya bhoora öni naahaaywë na Taata. ²⁸Ömöntö wowonswe ono arekera inyanko iyö, nendemohaana inyota iya nyinkyo.2:28 Nendemohaana inyota iya nyinkyo. Ensonga yaamo no-kohaanwa ekemanyërryö ikya ukwörökya igha, abhaahirë.

²⁹Ono aana amatwë, aitegherre amangʼana ghano Umwika Ömöhörëëru akötëëbhya amakanisa. ”

Ritashandighi ko-bhantö abha ekanisa iya Saridi

¹Mbe, ömöntö uyö arëngë kya m-Moona uwa Ömöntö akaghëndërrya okoghamba igha, “Andekera maraika uwa ekanisa iya Saridi, ömötëëbhi igha,

Öni nö-öni nkotongera Imiika muhungatë abha Waryobha, na nö-öni neena sinyota muhungatë seera. Mwitegherre ghano nkobhatëëbhya!

Nemanyirë amangʼana aghëënyu ghonswe igho, monga kya abhahöru, kasi mwamara ukukwa. ²Mobhooke! Motogheke amangʼana amaiya amake ghayö ghakeeho, ko bhoora kora ghonswe n-haangʼë gharë ghakwe. Ndööshë igha, amangʼana aghëënyu teghanga kya bhono Waryobha uwaane akutuna hë. ³Muhiite ghano mwëëghiibhwi, moghakumi na moghanaghi. Mbe, mogharöndërri bhuuya, kora mohongore ëbhëbhë ibhyënyu. Hano motaabhe maiso, nindiisha kya umwibhi, kora temoremanya enkaagha eno ndiisha hë.

⁴Kasi bhaaho abhasoorani abhake igho Saridi hayö, bhano bhataraakönia singibho isyabho ko okokora ëbhëbhë. Mbe, mbarebha hamwë na öni, bhaibhöhiibhwi singibho sendabhu, ko bhoora abhantö bhayö, mbaingʼarëëyë okokorrwa ghayö. ⁵Ömöntö wowonswe ono arekera amangʼana ghayö, nindimwibhöhya singibho sendabhu kya bhayö. Tindiruusya iriina iryaye mo-Ketabho ikya Öbhöhöru.3:5 Eketabho ikya Öbhöhöru ne-ketabho keno amariina agha abhantö abha Waryobha ghaandekwa-mo. Maaha mo-ketabho ikya Okohonyora 20:12. Kasi nindimwikërrya mbere iya Taata Waryobha na abhamaraika abhaaye igha, ono nu-uwaane.

⁶Ono aana amatwë, aitegherre amangʼana ghano Umwika Ömöhörëëru akötëëbhya amakanisa. ”

Ritashandighi ko-bhantö abha ekanisa iya Firadërifia

⁷Mbe, ömöntö uyö anga kya Omoona uwa Ömöntö, akaghëndërrya okoghamba igha, “Andekera maraika uwa ekanisa iya Firadërifia, ömötëëbhi igha,

Öni m-Möhörëëru ndë uwa obhoheene, ghwiki nö-öni neena orofongoro urwa omokama Daudi.3:7a Orofongoro urwa omokama Daudi. Ensonga iyaamo ni-igha, ekemanyërryö ikya ubhwera. Maaha mo-faharaasa engʼana, Daudi.

Hano nsiikirë ekesaku, taaho ömöntö ono araatore ukukyeghora hë.

Hano nighööyë ekesaku, taaho ömöntö ono araatore ukukisiika.3:7b Maaha mo-ketabho ikya Isaaya 22:22.

Mwitegherre ghano nkobhatëëbhya! ⁸Nemanyirë amangʼana aghëënyu ghonswe igho. Motamaaha! Öni nabheeghorra-ho ekesaku, kasi taaho ömöntö ono akotora ukukisiika. Nokaanyoora singuru isyënyu ne-nke, kasi mwaikërrya amëëghyö aghaane, kora temwanyangirë hë. ⁹Motamaaha! Nendaakohaane abhasoorani abha inyumba iya esango iya Oghosambwa, bhano bhakwibherekera igha m-Bayahudi nabho te-Bhayahudi hë, kora m-barongo. Mbe, nendaabhakore bhaashe bhabhatemere hansë ibhiru. Ho bhayö bhonswe igho bhareemanya igha, öni nembahanshirë.

¹⁰Enkaagha iya inyanko niriisha ko-kebhara kyonswe igho, na abhantö bhonswe igho mbarishaashwa. Kasi bhëënyu, nendebharenda ko-nkaagha iyö, ko bhoora mwaaghömërrya inyaanyi kya bhoora naabharaghërrëëyi. ¹¹M-böngö ndaashe! Monaghi bhuuya amangʼana amaiya ghayö moonagho, okore ömöntö atakaabharuusya ibhirighi ibhyënyu ibhya obhobhaahi.

¹²Ömöntö wowonswe ono arekera amangʼana ghayö, nendemokora abhe umutimö ughwa Inyumba iya Waryobha3:12 Inyumba iya Waryobha. Maaha mo-faharaasa. uwaane, na tarirwa-mo röndë hë. Kora nindimwandeka iriina irya Waryobha na iriina irya umughi ughwa Waryobha. Umughi ghuyö ngo Yërusarëëmu omohya, ghono ghuriika ukurwa mu-ryobha ku-Waryobha. Kora nindimwandeka iriina iryane reehya.

¹³Ono aana amatwë, aitegherre amangʼana ghano Umwika Ömöhörëëru akötëëbhya amakanisa. ”

Ritashandighi ko-bhantö abha ekanisa iya Raodikia

¹⁴Mbe, ömöntö uyö anga kya Omoona uwa Ömöntö, akaghëndërrya okoghamba igha, “Andekera maraika uwa ekanisa iya Raodikia, ömötëëbhi igha,

Öni nö-öni nkobherekerwa igha, Amina, umwimërërri uwa heene. Nö-öni ömösëmöri uwa ëbhëntö bhyonswe igho bheno bhyaabhombwa na Waryobha. Mwitegherre ghano nkobhatëëbhya!

¹⁵Öni nemanyirë amangʼana aghëënyu ghano mokokora. Nemanyirë igha, m-bahyöku mörë. Nyakara mokaabhaayë omorro handë ekemeesha! ¹⁶Kasi ko bhono mörëngë abhahyöku, temoona omorro handë ekemeesha hë, nendaabhahongore murwe mu-munywa ughwane. ¹⁷Moraghamba igha, ‘M-baamë törë. Twaniibha bhököngʼu. Ëbhëntö bhyonswe igho ntoonabhyo, tetokobhorwa ëkëntö hë!’ Kasi temomanyirë igha m-batëntëëru mörë, m-bakwabherwa mörë, öbhötöbhu na ubhuhukuru nu-bhwënyu, kora n-kengʼaabhi mörë. ¹⁸Ku bhuyö nkobharaghërrya ndë igha, moghore ku-öni esahaabhu eno yaghuutwa mo-morro, okore mwamehe. Ghwiki moghore singibho sendabhu, okore mubhisi ekengʼaabhi ikyënyu motakaashe mosooke. Moghore iryogho irya okohaka mo-maiso, okore momaahe.

¹⁹Nkokaania ndë na ukuhiinya bhano nhanshirë. Mbe, mokore omotono ughwa okohongora ëbhëbhë ibhyënyu. ²⁰Motamaaha! Mo-kesaku ndë nimërëëyë ndabherekera. Ömöntö ono araaighwe engamba iyaane na anyeghorre-ho ekesaku, nendaasohe mu-nyumba iyaaye, nsange nawe ibhyakorya.

²¹Ömöntö wowonswe ono arekera amangʼana ghayö, nindimwikërrya aikare hamwë na öni ku-kitumbë ikyane ikya ekekama, kya bhono öni wonswe naakërrë, nkaikara na Taata ku-kitumbë ikyaye ikya ekekama.

²²Ono aana amatwë, aitegherre amangʼana ghano Umwika Ömöhörëëru akötëëbhya amakanisa. ”

Waryobha aratöönibhwa mu-ryobha

¹Hano ghayö ghaahööyë, nkarekera amaiso ighörö. Ë! Nkamaaha ekesaku kighökirë mu-ryobha! Mbe, engamba kya iya orotera eno yaantëëbhëri ekembere,4:1 Maaha mo-ketabho ikya Okohonyora 1:10. ghwiki akaghamba igha, “Nshö, riina kighörö eno, okore nkwöröki amangʼana ghano gharëngë igha, ni-igha ghabhe hano ghayö gharaahwe.”

²Kamwë igho, Umwika Ömöhörëëru akanyitoomera, nkamaaha ikitumbë ikya ekekama mu-ryobha iyö, kikarëëywë. ³Uyö yaaikaayë-ko, yaamekamekanga bhököngʼu kya amaghena agha öbhöghöri agha erangë enkangaaru inshiiya. Ikitumbë kiyö, nkyaarenga kiinaarrwë na riitë irya abhaasi, reno ryaamëkirëmëkirë bhököngʼu kya amaghena agha öbhöghöri agha erangë iya urunyënyi. ⁴Bhyaare-ho ibhitumbë ibhyëndë ibhya ekekama merongo ëbhërë na bhine, bhiinaarrë ikitumbë ikya ekekama ikya mbere keera. Ku-bhitumbë bhiyö, bhaaikaaye-ko abhaghaaka merongo ëbhërë na abhane. Bhaibhöhirë singibho sendabhu na ibhirighi ibhya ekekama ibhya esahaabhu ko-metwe. ⁵Ikitumbë ikya ekekama kiyö, kyaamësyanga na okobhaghatya kya enkobha. Mbere iyaakyo haara, bhyaare-ho ëbhëmörë muhungatë bheno bhyookanga. Ëbhëmörë bhiyö, ni-Miika muhungatë bhaara abha Waryobha. ⁶Mbere iya ikitumbë haara, kyaare-ho ëkëntö kenga inyansha iya ikyowa. Ëkëntö kiyö kyaatuubhaini kya reghena reno rekomekameka bhököngʼu.

Ghatëghatë iya ikitumbë ikya ekekama na abhaghaaka bhayö, bhyaare-ho ëbhëntö ibhine bheno bhekoheeshera. Ëbhëntö bhiyö bhyaarë mbaara syonswe igho. Bhyaarë na amaiso ahasë honswe igho. ⁷Ikya mbere, nkyaatuubhaini na ëndwë, ikya kabhërë kyaatuubhaini na ekeghaini ikya engʼombe, ikya katatö kyaarë na ekesosa ikya ömöntö, na ikya kane kyaatuubhaini na ritöönyi reno rikwibhurruka. ⁸Ëbhëntö ibhine bheera bhekoheeshera, mbyaarë na amabhabha asansabha. Amabhabha ghaara, ghaarë na amaiso ahasë honswe igho.4:8a Amabhabha ghaara, ghaarë na amaiso ahasë honswe igho. Ensonga iyaako iyëndë ni-igha, Ëbhëntö bheera bhyaarë na amaiso ömöbhërë ghonswe igho. Ëbhëntö bhiyö bhyaarëëtyanga ubhutikö na omobhasö, tibhyakiranga hë. Bhyaarëëtyanga igha,

“Ömöhörëëru, Ömöhörëëru, Ömöhörëëru,

no-Monene Waryobha uwa obhotoro bhwonswe igho,4:8b Maaha mo-ketabho ikya Isaaya 6:3.

ono aaho, ho yaarë ukurwa okosemoka, nanyabhoono ho arë.”

⁹Ëbhëntö ibhine bhiyö bhekoheeshera, bhyaatöönianga, bherasooka na ukukumya oora yaaikaayë ku-kitumbë ikya ekekama, ono aaho amakora ghonswe igho. ¹⁰Enkaagha eno Waryobha yaakumibhwanga na ëbhëntö bheno bhekoheeshera bheera, abhaghaaka merongo ëbhërë na abhane bhakaighwësya hansë bhubhuumaayë ko-maghörö aghaaye, bhakasaasaama Waryobha ono aaho amakora ghonswe igho. Kora mbyaaruusyanga ibhirighi ibhyabho ibhya ekekama bherabhetoora mbere iya ikitumbë ikya ekekama keera na eno bheraghamba igha,

¹¹“Omonene uwëëtö, Waryobha uwëëtö, wingʼarëëyë ökötöönibhwa,

okosookwa na okobha na obhotoro bhwonswe igho.

Ko bhoora nu-uwe waabhömbirë ëbhëntö bhyonswe igho,

ëbhëntö bhiyö mbyaabhömbirwë ko okohansha ukwaho, kora höbhërë.”

Omoona Ringʼöndi na eketabho

¹Mbe, nkamaaha eketabho mo-kobhoko ukwa bhoryo ukwa oora yaaikaayë ku-kitumbë ikya ekekama. Eketabho kiyö kyaarenga kyaandëkirwë sembaara syonswe igho ibhërë, ghwiki kyaarenga kenantërrëëywë imihuri muhungatë ighya ubhurimbo. ²Ghwiki nkamaaha maraika uwa obhotoro araraareka bhököngʼu, akabhöörya igha, “Nawë aingʼarëëyi okonaanora imihuri ghiyö, akondokore eketabho keno?” ³Kasi tiyatöökirë-ho ömöntö kora ömwë mu-ryobha iyö, handë ko-kebhara, kora mu-kyaro ikya abhaku ono yaingʼarëëyë okokehonyora akesome.

⁴Mbe, nkasimya ukukuura bhököngʼu ko bhoora tiyaatöökirë ömöntö wowonswe igho, ono yaaingʼarëëyi okokondokora handë okosoma eketabho kiyö. ⁵Ho ömwë uwa abhaghaaka bhaara akantëëbhya igha, “Otakaakuura! Maaha! Ëndwë iya Ekesaku ikya Yuuda,5:5 Mo-ketabho ikya Okosemoka 49:9 ekesaku ikya Yuuda kerabherekerwa ëndwë, na omokama Daudi na Yëësu, mmo-kesaku kiyö bhaarwërëëyë. umwebhorwa uwa omokama Daudi, akërrë. Aingʼarëëyi okonaanora ubhurimbo ku-mihuri muhungatë ko-ketabho kiyö na okokehonyora.”

⁶Mbe, nkamaaha ghatëghatë haara haarenga na ikitumbë ikya ekekama, Omoona Ringʼöndi5:6 Omoona Ringʼöndi. Maaha mo-faharaasa. aimërëëyë. Yaarenga ainaarwë na ëbhëntö ibhine bheera na abhaghaaka merongo ëbhërë na abhane bhaara. Hano wamaaha Omoona Ringʼöndi uyö, yaarenga kya ono ashinshirwë. Yaarenga na amatera muhungatë na amaiso muhungatë. Amaiso ghayö, ni-Miika muhungatë abha Waryobha bhano bhaarenga bhatömirwë kera ahasë ko-kebhara kyonswe igho. ⁷Omoona Ringʼöndi uyö akaghya, akaghegha eketabho kiyö, ukurwa mo-kobhoko ukwa bhoryo ukwa ono yaarenga aikaayë ku-kitumbë ikya ekekama. ⁸Hano yaamarrë okoghegha eketabho kiyö, ëbhëntö ibhine bhiyö bhekoheeshera na abhaghaaka merongo ëbhërë na abhane bhaara, bhakaghwa bhubhuumaayë bhöröngë ubhwa Omoona Ringʼöndi. Kera ömwë uwaabho yaarenga na ritungu na amabhaköri agha esahaabhu ghaishööyë ëkörösö. Ëkörösö iyö yo amasabhi agha abhantö abha Waryobha.⁹Bhakarëëtërya Omoona Ringʼöndi rirëëtyö reehya igha,

“Uwe wingʼarëëyi okoghegha eketabho kiyö

na okonaanora-ko ubhurimbo ubhwa ku-mihuri ighya-ko,

ko bhoora uwe waashinshirwë.

Okaghorra Waryobha ko amaanyinga aghaaho,

abhantö abha amakabhira ghonswe igho, ebheghambo bhyonswe igho,

sihiiri syonswe igho na ibhyaro bhyonswe igho.

¹⁰Uwe waakörrë abhantö bhano bhabhe abha Obhokama ubhwa Waryobha uwëëtö,

bhabhe abhasëngëri abha okomokorra emeremo,

mbaraatonge ekebhara keno.”

¹¹Mbe, nkaighwa na nkamaaha abhamaraika abhaaru, ëbhëkwë na ëbhëkwë, kora tootore okobhabhara hë. Abhamaraika bhayö bhaarenga bhainaarrë ikitumbë ikya ekekama keera, ëbhëntö ibhine bheno bhekoheeshera bheera na abhaghaaka bhaara. ¹²Nkabhaitegherra bhararëëtya bhököngʼu igha,

“Omoona Ringʼöndi ono yaashinshwa,

aingʼarëëyi okohaanwa obhotoro, ubhwamë na obhongʼaini.

Singuru, okosookwa, ubhuhika na sinkuma ni-bhyaye!”

¹³Mbe, nkaighwa ëbhëntö bhyonswe igho mu-ryobha iyö, ko-kebhara, mu-kyaro ikya abhaku na mu-nyansha bherarëëtya kwa korengerrania igha,

“Uyö aikaayë ku-kitumbë ikya ekekama,

na Omoona Ringʼöndi uyö,

bhakumibhwi, bhasookwe,

bhahaanwe ubhuhika na obhotoro amakora na amakora!”

¹⁴Na ëbhëntö ibhine bheno bhekoheeshera bheera, bhekaikërrya bharaghamba igha, “Amina!” Abhaghaaka bhaara bhakaghwa hansë bhubhuumaayë, bhakasaasaama Waryobha na Omoona Ringʼöndi.

Omoona Ringʼöndi aranaanora ubhurimbo ku-mihuri muhungatë

¹Mbe, nkamaaha Omoona Ringʼöndi uyö, aranaanora ubhurimbo ku-muhuri ughwa mbere, mu-mihuri muhungatë gheera. Nkaighwa ëkëmwë ikya ibhine bheera bhekoheeshera, kerabhaghatya kya enkobha, kekaghamba igha, “Nshö!” ²Mbe, nkamaaha efaraasi endabhu na ömöntö aikaayë-ko. Ömöntö uyö, yaarenga aghöötërrëëyë obhota, kora okanyoora ahaaywë ikirighi ikya ekekama. Akarwa mu-ryobha abhaahirë, okore aghëndërri okobhaaha.

³Mbe, Omoona Ringʼöndi uyö, akanaanora ubhurimbo ku-muhuri ughwa kabhërë. Nkaighwa ëkëntö ikya kabhërë keera kekoheeshera keraghamba igha, “Nshö!” ⁴Mbe, ekatora efaraasi iyëndë enkangaaru. Na ömöntö ono yaaikaayë-ko araghëghëndya, akahaanwa umushonge omonene na obhotoro ubhwa okoreeta riihë ko-kebhara, okore kera ömöntö aite murikyaye.

⁵Mbe, Omoona Ringʼöndi, akanaanora ubhurimbo ku-muhuri ughwa katatö, nkaighwa ëkëntö ikya katatö keera kekoheeshera keraghamba igha, “Nshö!” Nkarekera-yo amaiso, nkamaaha efaraasi imwamu. Ömöntö ono yaaikaayë-ko araghëghëndya yaarenga na ebherengero bhibhërë mo-kobhoko ukwaye. ⁶Nkaighwa ëkëntö kya engamba, erarwera ghatëghatë iya ëbhëntö ibhine bheera bhekoheeshera, eraghamba igha, “Ehoorohooro iya urusikö urughima, neraaghore rikopo irya engano reno rekoreengʼaana na ikiiro ëmwë igho, handë rikopo rinene irya ishairi6:6a Ishairi. Iyö nituubhaini kya engano. reno rekoreengʼaana na sikiiro isatö isyene igho. Kasi otakaasarya amaghuta, handë idivai.”6:6b Idivai. Maaha mo-faharaasa.

⁷Mbe, Omoona Ringʼöndi akanaanora ubhurimbo ku-muhuri ughwa kane, nkaighwa ëkëntö ikya kane keera kekoheeshera keraghamba igha, “Nshö!” ⁸Mbe, nkarekera-yo amaiso, nkamaaha efaraasi iya erangë endabhöku. Na ömöntö ono yaaikaayë-ko araghëghëndya yaabherekerwanga igha, Uruku, ono yaaghendanianga hamwë na ikyaro ikya abhaku. Bhonswe igho bhakahaanwa ubhwera ubhwa ukwita ritabhë irya kane irya abhantö ko-kebhara, ku-riihë, inshara, amarööyë na ku sityënyi sëmbë isya mwi-sisi.

⁹Mbe, Omoona Ringʼöndi akanaanora ubhurimbo ku-muhuri ughwa kataano, nkamaaha senkoro isya abhantö mö-ngönköörë iya riighyö. Abhantö bhayö mbaaitirwë, ko bhoora bhaakumiri na ukwimererra engʼana iya Waryobha. ¹⁰Mbe, imiika ghiyö ghekakora ikituri gheraghamba igha, “Ë Omonene Waryobha ömötöngi uwa bhyonswe igho, ono örëngë Ömöhörëëru na uwa heene, n-kwakë okotegheta? N-dööhë orebhotorra ikiina abhantö abha ko-kebhara na okomara ikisiiyomba ikya ukutwita?” ¹¹Mbe, bhonswe igho bhayö bhaaitirwë, bhakahaanwa sengansho sendabhu. Bhakatëëbhibhwa igha, bhaghanye hake igho okohekera hano abhakumya bharikyabho, abhaköri abha emeremo bharikyabho, bhaitwe kya bho, okore ekerengere ikyabho kehekerane.

¹²Mbe, nkamaaha Omoona Ringʼöndi aranaanora ubhurimbo ku-muhuri ughwa kasansabha ghoora. Hano yaanaanööyë-ko, ikirighiti ekenene bhököngʼu kekeebhoka. Iryobha rekaisyörya erangë, rekamwama twi kya amakara, umwëri ghokakangaara bhököngʼu kya amaanyinga. ¹³Sinyota sekaghwa ko-kebhara bhoghoghoghogho igho, okanya igha n-sehagho sendere seharatökirë ukurwa kö-mötë hano ghwasingisibhwa na rikama rirörö. ¹⁴Ighörö iyö, hakaihëënia kya ekarataasi, kya hano ömöntö yaaringa risenke. Singuku na amaghinga bhyonswe igho bhekaruusibhwa-ho.

¹⁵Ho abhakama abha ko-kebhara, abhatöngi, abhatangati abha riihë, abhaamë, abhantö abha ibhyeo, hamwë na abhantö bhonswe igho, mbakaabha abhaghorwa handë abhatöönööni, bhonswe igho bhayö, bhakaibhisa mo-masana na mo-marengo agha mu-singuku. ¹⁶Bhakatëëbhya singuku siyö na amarengo ghayö igha, “Mutughwere! Mutubhise, okore oora ikaayë ku-kitumbë ikya ekekama, atakaatörëghërrya. Mutubhise, totakaasha okomaaha amangʼana ghayö agha okorerra ukwa Omoona Ringʼöndi. ¹⁷Ko bhoora urusikö oronene urwa okorerra okonene ukurwa ku-Waryobha na Omoona Ringʼöndi, ruhikirë! M-maheene, taaho ömöntö wowonswe ono akotora ököghömërrya hë.”

Abhantö abha Waryobha bharatoorrwa imihuri

¹Hano ghayö ghaahööyë, nkamaaha abhamaraika abhane, kera ömwë aimërëëyë ko-robhareka örömwë urwa sembaara inye seera isya ekebhara. Abhamaraika bhayö bhaarebherranga rikama ukurwa sembaara syonswe igho inye isya ekebhara, okore rikama retakaaherra ukuusha ko-kebhara handë ukughya ku-nyansha handë ukusingisya ömötë ghwoghwonswe ghoora. ²Abhamaraika bhayö, bhaarenga bhahaaywë obhotoro ubhwa okosarya ikyaro na inyansha. Mbe, nkamaaha maraika uwöndë aratiira ighörö ukurwa röghörö, aghëghirë umuhuri ughwa Waryobha ömöhöru. Akakongera abhamaraika abhane bhaara ³araghamba igha, “Moghanye! Motakaasarya ikyaro, inyansha handë ëmëtë, moghanye okohekera hano toremara okotoora imihuri ku-bhusyö ubhwa kera ömököri uwa emeremo uwa Waryobha uwëëtö.”

⁴Mbe, nkatëëbhibhwa ekerengere ikya abhantö bhano bhaarenga bhatöörëëywë imihuri ighya Waryobha ku-bhusyö. Bhaarenga abhantö eraaki ëmwë, ëbhëkwë merongo ene na bhine (144,000), ukurwa mo-bhesaku bhyonswe igho ikömi na bhibhërë ibhya Abhaisiraëri.

⁵Ukurwa mo-kesaku ikya Yuuda, abhantö ëbhëkwë ikömi na bhibhërë,

ikya Ruubhëëni abhantö ëbhëkwë ikömi na bhibhërë,

ikya Ghaadi abhantö ëbhëkwë ikömi na bhibhërë.

⁶Ekesaku ikya Asheeri abhantö ëbhëkwë ikömi na bhibhërë,

ikya Nafutaari abhantö ëbhëkwë ikömi na bhibhërë,

ikya Manase abhantö ëbhëkwë ikömi na bhibhërë.

⁷Ekesaku ikya Simeoni abhantö ëbhëkwë ikömi na bhibhërë,

ikya Raawi abhantö ëbhëkwë ikömi na bhibhërë,

ikya Isakaari abhantö ëbhëkwë ikömi na bhibhërë.

⁸Ikya Zabhurööni abhantö ëbhëkwë ikömi na bhibhërë,

ikya Yusufu abhantö ëbhëkwë ikömi na bhibhërë,

na ikya Bhenjamini abhantö ëbhëkwë ikömi na bhibhërë.

Rikomo rinene irya abhantö abha amakabhira aghandë

⁹Hano ghayö ghaahööyë, nkamaaha rikomo rinene irya abhantö bhano otaatore okobhara. Abhantö bhayö, bhaarë abha ibhyaro bhyonswe igho, abha amakabhira ghonswe igho, abha sihiiri na abha ebheghambo bhyonswe igho. Bhaimërëëyë mbere iya ikitumbë ikya ekekama na mbere iya Omoona Ringʼöndi. Bhaatöörrë sengansho sendabhu kora bhaarenga na amasagharya agha emetende mo-mabhoko aghaabho, ukwörökya igha bhashömëëywë. ¹⁰Bhaakonganga bhököngʼu bharaghamba igha,

“Öbhöhönia nku-Waryobha uwëëtö

ono aikaayë ku-kitumbë ikya ekekama bhukurwa,

na ko Omoona Ringʼöndi.”

¹¹Abhamaraika bhonswe igho bhayö, bhaarenga bhaimërëëyë bhainaarrë ikitumbë ikya ekekama, abhaghaaka bhaara na ëbhëntö ibhine bheera bhekoheeshera. Bhakaighwësya hansë bhubhuumaayë mbere iya ikitumbë ikya ekekama kiyö, bharasaasaama Waryobha, ¹²bharaghamba igha,

“Amina!

Waryobha uwëëtö aana ubhuhika,

na obhongʼaini,

naana singuru na obhotoro bhwonswe igho,

tumukumi

na okomosooka

amakora na amakora.

Amina!”

¹³Mbe, ömwë mo-bhaghaaka bhaara, akamböörya igha, “Kasi, okaamanya abhantö bhayö bhatöörrë sengansho sendabhu m-baabho wë? Omanyirë hano bharwërëëyë?”

¹⁴Nkamohonshora igha, “Omonene, uwe nu-uwe omanyirë.”

Akantëëbhya igha, “Abhantö bhayö, m-baara bhaaghömërrëëyi inyanko enene eera. Bhaafura sengansho isyabho ko amaanyinga agha Omoona Ringʼöndi, sekarabha shaa. ¹⁵Nkyo kekoghera bharëngë mbere iya ikitumbë ikya ekekama ikya Waryobha, bharasaasaama ubhutikö na omobhasö mu-nyumba iya Waryobha. Waryobha ono akwikara ku-kitumbë ikya ekekama, naraabhe hamwë nabho, abharende. ¹⁶Tebharebha na inshara handë inyonta ghwiki hë. Kora tebharebharrwa omobhasö ghwiki hë, handë ukunyahaarwa na orooha rworwonswe roora. ¹⁷Ko bhoora Omoona Ringʼöndi ono arëngë haangʼë na ikitumbë ikya ekekama, narebha omokaraabhërri uwaabho. Narebhatangata ukughya mo-seseeka isya amanshë agha öbhöhöru, na Waryobha narebheeya amaisöri.”

Omoona Ringʼöndi aranaanora ubhurimboku-muhuri ughwa muhungatë

¹Mbe, Omoona Ringʼöndi uyö, akanaanora ubhurimbo ku-muhuri ughwa muhungatë, mu-ryobha hakakerrana kiri, ku-ribhagha irya ritënë irya esa. ²Ho naamarrë, nkamaaha abhamaraika muhungatë bhaara bhaaimërëëyë mbere iya Waryobha, kera ömwë uwaabho akahaanwa orotera.

³Maraika uwöndë akaasha, akaimerra mbere iya riighyö. Yaarenga aghöötërrëëyë ribhaköri irya esahaabhu, irya okosambera-mo ëkörösö. Akahaanwa ëkörösö insharu, okore aghishooghani na amasaasaamo agha abhantö bhonswe igho abha Waryobha, amare abhiruusi ikimwenso bhyonswe igho ku-riighyö irya esahaabhu reno rërëngë mbere iya ikitumbë ikya ekekama. ⁴Iryöki irya ëkörösö hamwë na amasaasaamo agha abhantö abha Waryobha, bhitiirrë kighörö mbere iya Waryobha, ukurwa mo-kobhoko ukwa maraika uyö.

⁵Mbe, maraika uyö akaghegha ribhaköri iryaye, akariishörya amakara agha omorro ukurwa ku-riighyö, akagharekera ko-kebhara. Ikirumo ikya enkobha, kekaruma, kekabha-ho ëkëmësyö, ekebhara kekarighita.

Abhamaraika abhane bharahuuta sentera

⁶Mbe, abhamaraika muhungatë bhano bhaarenga na sentera muhungatë, bhakaisëëmya ukuhuuta sentera isyabho.

⁷Maraika uwa mbere, akahuuta orotera urwaye. Hayö mbe ho imbura iya righörö, na omorro ghono ghwishooghaini amaanyinga bhekarekerwa ko-kebhara. Omorro ghuyö, ghokasamba ikitweno ikya katatö ikya ekebhara, ghokasikya ëmëtë na amanyanki orobhaara ruyö.

⁸Maraika uwa kabhërë, akahuuta orotera urwaye. Hayö ho ëkëntö kenga inguku enene bhököngʼu, eno ekooka omorro, kekarekerwa mu-nyansha. Hano kyaaitëmirë ku-nyansha, ikitweno ikya katatö ikya inyansha, kekaisyörya, kekabha amaanyinga. ⁹Ëbhëntö bheno bhyaarë orobhareka ruyö urwa inyansha, bhekakwa, na amaato ghonswe igho ghano ghaarë orobhareka ruyö, ghakasareka.

¹⁰Maraika uwa katatö wonswe akahuuta orotera urwaye. Mbe, inyota enene bhököngʼu ekaghwa ukurwa mu-ryobha. Yaarenga engʼangʼirë kya ëkëmörë, ekaghwera ikitweno ikya katatö ikya imyoro na ikya ebheseekaani. ¹¹Inyota iyö yaabherekerwanga igha, Nyabhörrö. Ekasyörya ikitweno ikya katatö ikya amanshë, ghakarora kai. Mbe, abhantö bhakakwa abhaaru, ko bhoora amanshë ghayö, m-marörö ghaarë.

¹²Maraika uwa kane, wonswe akahuuta orotera urwaye. Ho orobhaara urwa iryobha na urwa umwëri na urwa sinyota rokatemwa, kekabha ikisuntë. Ikitweno ikya katatö ikya omobhasö kekabhorwa obhorabhu ubhwako na ikya ubhutikö kyonswe kekabhorwa obhorabhu.

¹³Mbe, nkamaaha ritöönyi rinene rerabhurruka ighörö. Ryaakoranga ikituri reraghamba igha, “Haahö! Haahö! Haahö bhëënyu abhamënyi abha ko-kebhara kono, hano sirihuutwa sentera isatö siyö sitighaayë. Abhamaraika bhayö, haangʼë bharë bhahuute sentera siyö!”

Maraika uwa kataano arahuuta orotera urwaye

¹Mbe, maraika uwa kataano oora, akahuuta orotera urwaye. Nkamaaha inyota erarwa ku-risaarö ekaghwa ko-kebhara. Ekahaanwa orofongoro urwa mu-bhwina ubhwa mu-kyaro ikya abhaku. ²Ekeeghora-ho ubhwina ubhwa mu-kyaro ikya abhaku. Rekarwa-mo iryöki iryaru, kya irya öghöbhëri oghonene. Kora, ko okoghera iya iryöki riyö, iryobha na amasaarö bhekaghubhwa tibhyamaahekaini hë. ³Mbe, singighë sekarwera mu-ryöki muyö, sekaroomaana ko-kebhara. Sekahaanwa obhotoro ubhwa okoroma kya ëbhëtörömööni. ⁴Singighë siyö, sekaraghërribhwa igha, setakaasarya ubhunyanki handë ëmëtë ghyoghyonswe gheera. Kasi sinyahaare abhantö bhano bhataarenga na imihuri ighya Waryobha ku-bhusyö.9:4 Maaha mo-ketabho ikya Okohonyora 7:2-3.⁵Singighë siyö, syaahaaywë obhotoro ubhwa okoteesa abhantö ku-ribhagha irya imyëri etaano igho, kasi setakaabhaita. Na öbhörrö ubhwasyo, mbwaarë kya hano ömöntö yaromwa na ëkëtörömööni. ⁶Sinsikö siyö abhantö mbareghambanga igha, nyakara ukukwa, kasi tebharikwa hë. Mbarighombanga ukukwa, kasi uruku ndorebhangʼosanga.

⁷Singighë siyö, syaarë kya sefaraasi seno syaasëëmiibhwi ukughya ku-riihë. Ko-metwe ighaasyo, syaatöörrë ëbhëntö kya ibhirighi ibhya ekekama ibhya esahaabhu, na ubhusyö ubhwasyo mbwatuubhaini kya ubhusyö ubhwa ömöntö. ⁸Nsyaarë na situukya sentambë, kya isya abhakari. Syaarë na amaino kya agha ëndwë. ⁹Syaarenga sëtöörrë ëbhëntö kya sidirii isya ibhyoma mu-bhikubha. Hano syaabhurrukanga, amabhabha aghaasyo ghaaherranga, kya okoherra ukwa ëmëkökötëëni imyaru ighya sefaraasi seno sekokenya ukughya ku-riihë. ¹⁰Na hano emekera ighyasyo ghëkörömirë, öbhörrö ubhwako n-kya ubhwa ëkëtörömööni. Emekera ghiyö, ghyaarenga na öbhösöngö ubhwa ukunyankya abhantö imyëri etaano.¹¹Syaarë na omokama. Omokama uwaasyo, we yaarë maraika omonene uwa mu-bhwina ubhwa mu-kyaro ikya abhaku. Maraika uyö ku-Kiëbhuraania yaabherekerwanga igha, Abhadoni na ku-Kiyunaani igha, Aporioni. Ensonga iyaamo ni-igha, “Umusikya.”

¹²Ikyateko ikya mbere këhööyë, kasi momanye igha bhekeeho ibhyateko bhibhërë bheno bhikuusha.

Maraika uwa kasansabha arahuuta orotera urwaye

¹³Mbe, maraika uwa kasansabha, wonswe akahuuta orotera urwaye. Nkaighwa engamba erarwera ko-matera ane agha riighyö irya esahaabhu reno rërëngë mbere iya Waryobha. ¹⁴Engamba iyö, ekatëëbhya maraika uwa kasansabha ono yaaghöötërrëëyë orotera urwaye mo-kobhoko, ekamötëëbhya igha, “Tashora abhamaraika abhane bhano bhaabhöhirwë ko-mooro omonene ughwa Yufurati.” ¹⁵Abhamaraika abhane bhayö, bhakatashorwa, okore bhaite ikitweno ikya katatö ikya abhantö bhonswe igho ko-kebhara. Bhaarenga bhasëëmiibhwi ko-esa iyöiyö, iya urusikö ruyöruyö, urwa umwëri ghuyöghuyö, ughwa omooka ghuyöghuyö. ¹⁶Ghakaasha amakomo agha abhasirikare ghano ghaarë ko-sefaraasi. Nkaighwa igha, ngaarë ekerengere ikya abhasirikare simiriöni amaghana abhërë. ¹⁷Nkamaaha abhantö bhano bhaarë ko-sefaraasi bhaarenga bhatöörrë ëbhëntö kya sidirii9:17 Sidirii. Në-bhëntö bheno abhasirikare abha Ikiruumi bhaatooranga ku-bhikubha, okorebherra ibhyöghë ibhya abhabhisa bhetakaabhanyahaara. isya omorro mu-bhikubha ibhyabho, nsyaarë na erangë enkangaaru kaa, iya ubhurru na iya mayaai. Nkamaaha emetwe ighya sefaraasi siyö, ngyaarë kya emetwe ighya sëndwë. Mu-minywa ighyabho, syaarwanga-mo sensasë isya omorro, iryöki na ubhurutu ubhwa ikibhiriiti. ¹⁸Bhakaitwa abhantö ikitweno ikya katatö ikya ku-bhyateko ibhitatö bhiyö. Ibhyateko ibhitatö bheera n-sensasë isya omorro, iryöki na ubhurutu ubhwa ikibhiriiti ukurwa mu-minywa ighyasyo. ¹⁹Obhotoro ubhwa sefaraasi seera mbwaarë mu-minywa na ko-mekera. Ko bhoora emekera ighyasyo ngyaarë kya sinshoka isya emetwe ighya ukunyahaara abhantö.

²⁰Abhantö bhano bhataakuurë ku-bhyateko bheno bhyanyöörrë bharikyabho, tebhaahöngööyë obhoghogho ubhwabho hë. Mbaaghëndërrëëyi okosaasaama amasambwa na ëbhëtöndö, bheno bhaakörrë abheene ko esahaabhu, seehera, sishabha, amaghena na ëmëtë. Ëbhëtöndö bhiyö tebhekomaaha hë, tibhikwighwa hë, kora tebhekoghenda hë. ²¹Tebhaahöngööyë ëbhëbhë ibhyabho ibhya ubhwiti ubhwa abhantö, öbhöröghi, kora obhosooraare na ubhwibhi.

Maraika na eketabho ekeke

¹Hano ghayö ghaahööyë, nkamaaha maraika uwöndë uwa obhotoro, araika ukurwa mu-ryobha. Maraika uyö, yaarenga aibhöhiibhwi amasaarö, na ko-motwe ughwaye, riitë irya abhaasi ryaarenga riköönyirë-ko. Ubhusyö ubhwaye, bhwaamësyamësyanga kya iryobha, na amaghörö aghaaye ngaarë kya imitimö gheno gheekoka omorro. ²Yaarenga na eketabho ekeke mo-kobhoko ukwaye, keno kyaarenga këhönyööywë. Maraika uyö yaarenga aimërëëyë, ököghörö ukwa bhoryo, kotashirë ku-nyansha kighörö, na ukwa bhömösi, kotashirë ku-rirobha. ³Akabherekera, emberekera iyaaye, yaarë kya ëndwë eno ikuruma. Hano maraika uyö yaabhërëkëëyë, ikirumo kekamohonshora ku ukuruma mara muhungatë. ⁴Hano ibhirumo muhungatë bhiyö bhyaarumirë, nkatuna igha nandeke amangʼana agha ibhirumo bhiyö, kasi nkaighwa engamba erarwa mu-ryobha eraghamba igha, “Otakaandeka amangʼana agha ikirumo kiyö! Kiyö ni-kibhisirë!”

⁵Ho maraika uyö naarööshë aimërëëyë atashirë ku-nyansha kighörö na ku-rirobha, akainyökya okobhoko ukwaye ukwa bhoryo ighörö mu-ryobha. ⁶Akatyana iriina irya Waryobha ono aaho amakora ghonswe igho, ono yaabhömbirë mu-ryobha, ekebhara, inyansha na ëbhëntö bhyonswe igho bheno bheemo. Akaghamba igha, “Enkaagha iya okoghanyerra ëhööyë. ⁷Hano maraika uwa muhungatë araahuute orotera urwaye, ho Waryobha yakamarërri ësëëmyö iyaaye iya ikibhisirë. Nkeraahekeranibhwi kya bhoora yaarenga araarëkëëyë abhaköri abha emeremo abhaaye, abharööti.”

⁸Mbe, engamba eera yaarwërëëyë mu-ryobha, ekamberekera ghwiki, ekantëëbhya igha, “Kaghi ko maraika oora aimërëëyë atashirë ku-rirobha na ku-nyansha kighörö, ogheghe eketabho ekeke keera kerambööywë mo-kobhoko ukwaye.”

⁹Mbe, nkaghya, nkamötëëbhya igha angʼaane eketabho ekeke keera, akantëëbhya igha, “N-keno hano! Kegheghe okeraaghere. ‘Nkeraashomerre mu-munywa ughwaho kya öbhöökë,’10:9 Maaha mo-ketabho ikya Ezekieri 3:3. kasi nkeraakokebherre mo-nda.” ¹⁰Nkaghegha eketabho ekeke keera ukurwa mo-kobhoko ukwa maraika uyö, nkakerya. Kyaashomerranga mu-munywa ughwane kya öbhöökë, kasi hano naakëmërrë, kekankebherra mo-nda.

¹¹Nkatëëbhibhwa igha, “Ni-igha ghwiki okore öbhörööti ko amangʼana agha abhantö abhaaru, ibhyaro ibhyaru, ebheghambo ibhyaru, na abhakama abhaaru.”

Abhaimërërri abhabhërë abha Waryobha

¹Mbe, nkahaanwa umunyaamunsi ghono ghwaarë kya orotanka urwa okorengera obhotambë. Nkatëëbhibhwa igha, “Kaghi orenge mu-nyumba iya Waryobha, na ahasë aha ukumwensera. Kora obhare abhantö bhonswe igho bhano bhakosaasaama muyö. ²Kasi otakaarenga öbhööri ubhwa inyumba iya Waryobha, ko bhoora bhuyö, mbo Abhakyaro bhategherwa. Bhakyaro bhayö, mbaretasha Yërusarëëmu umughi ömöhörëëru ghuyö, ku-ribhagha irya imyëri merongo ene na ibhërë. ³Nendaatome abhaimërërri abhaane bhabhërë, bhano ndaahaane obhotoro ubhwa okokora öbhörööti sinsikö ëkëkwë ëkëmwë amaghana abhërë na merongo esansabha. Abhaimërërri bhayö, nurinyoora bhaibhöhirë singibho isya amaghonera, ukwörökya igha bhasorombaayë.” Sinsikö siyö, nsengʼana kya imyëri merongo ene na ibhërë.

⁴Abhaimërërri abhabhërë bhayö, në-mëzëituuni ëbhërë na ebhetangora bhibhërë ibhya okotoora-ko setara, seno sekobha mbere iya Omonene Waryobha ono akotonga ekebhara.11:4 Maaha mo-ketabho ikya Zakaria 4:1-14.⁵Hano ömöntö wowonswe oora akaatunirë okobhanyahaara, nakaaitirwë na omorro ghono ghukurwa mu-minywa ighya abhaimërërri bhayö. Ni-igho arikwa ömöntö wowonswe igho ono arituna okobhanyahaara. ⁶Abhaimërërri bhayö, mbaana ubhwera ubhwa okokaania imbura etakaatwa enkaagha eno bhakokora öbhörööti. Na enkaagha yoyonswe igho eno bharaatune, bharatora ukusyörya amanshë ghabhe amaanyinga na okoreeta inyanko yoyonswe eera ko-kebhara kono.

⁷Hano bharemara ukwimererra engʼana iya Waryobha, ughutyënyi ghoora ghwaariinirë ukurwa mu-bhwina ubhwa mu-kyaro ikya abhaku, nguriitana nabho. Ngorebhakera, ghobhaite. ⁸Ibhihundughu ibhya abhaimërërri bhayö, nurinyoora bheraayë ko-mohanda ughwa umughi omonene ughwa Yërusarëëmu. Umughi ghuyö, n-goora Omonene uwaabho yaahanëkirwë-mo ko-mosarabha. Eteemo iyaagho n-kya iya umughi ughwa Sodoma na ikyaro ikya Miisiri. ⁹Abhantö abha ibhyaro bhyonswe igho, abha amakabhira ghonswe igho, abha sihiiri syonswe igho na ebheghambo bhyonswe igho ekebhara ikighima, mbaremaaherra ibhihundughu bhiyö ibhya abhaimërërri abhabhërë bhayö, ku-sinsikö isatö na ritënë. Taaho ömöntö ono arikërërribhwa igha abhabheeke. ¹⁰Uruku urwa abharööti abhabhërë bhayö, ndoreghera abhantö ko-kebhara bhashomerwe, bhakore inyangi kora bhatuhane. Mbarekora igho ko bhoora abharööti bhayö, bhaanyankëri bhököngʼu abhantö bhano bhataakumyanga Waryobha ko-kebhara kono.

¹¹Hano sinsikö isatö siyö na ritënë syaahööyë, Waryobha akabhahuuha umwika ughwa öbhöhöru, bhakabha abhahöru, bhakeemoka. Bhonswe igho bhano bhaabharööshë, bhakoobhoha bhököngʼu. ¹²Abharööti bhayö, bhakaighwa engamba enene erarwera mu-ryobha, eraghamba igha, “Muushe ighörö eno!” Mbe, bhakaghya mu-ryobha bharëngë ku-risaarö na eno abhabhisa abhaabho bharabhamaaherra. ¹³Enkaagha iyöiyö, kekabha-ho ikirighiti ekenene, kora rokasareka orobhaara örömwë urwa ikömi urwa umughi ghonswe igho. Kirighiti kiyö, kyaaghërrë abhantö ëbhëkwë muhungatë, bhakakwa na abhandë bhonswe igho bhano bhaatighaayë, bhakoobhoha, bhakatöönia Waryobha uwa mu-ryobha.

¹⁴Motamaaha, ikyateko ikya kabhërë, këhööyë, ikyateko ikya katatö haangʼë kërë kiishe.

Maraika uwa muhungatë arahuuta orotera urwaye

¹⁵Mbe, maraika uwa muhungatë akahuuta orotera urwaye. Ho naaighuurë sengamba sindito mu-ryobha iyö, seno syaaghambanga igha,

“Öbhötöngi ubhwa ekebhara

bhobhaayë mo-mabhoko agha Omonene Waryobha uwëëtö

na Kiristo uwaaye ono yaashaaghööyë ökötöörya abhantö.

Omonene Waryobha, naraatonge amakora ghonswe igho.”

¹⁶Ho abhaghaaka merongo ëbhërë na abhane, bhano bhaarenga bhaikaayë ku-bhitumbë ibhyabho mbere iya Waryobha, bhakatema hansë ibhiru bhakasaasaama Waryobha ¹⁷bharaghamba igha,

“Torakukumya Omonene Waryobha uwa obhotoro bhwonswe igho,

ono ooho, waare-ho ukurwa okosemoka.

Ko bhoora ko obhotoro ubhwaho obhonene,

bhoono nkotonga örë.

¹⁸Abhakyaro bhaakörërërrëëyë,

kasi bhoono enkaagha iya ikisiiyomba ihikirë.

Bhoono ne-nkaagha iya okobhotorra ikiina abhaku.

Yo enkaagha iya ukutuha abhaköri abha emeremo abhaaho abharööti,

abhantö abhaaho bhonswe igho bhano bhakösöökirë,

abha ibhyeo na bhano bhataana ibhyeo.

Eno yo enkaagha iya ukusikya

abhantö bhonswe igho bhano bhakosarya ekebhara.”

¹⁹Mbe, ekesaku ikya okosohera mu-risengerro irya Waryobha11:19a Mu-risengerro irya Waryobha. Maaha mo-faharaasa engʼana, Risengerro irya Waryobha. mu-ryobha iyö, kekeghorwa. Risandeko irya Imuuma iya Waryobha,11:19b Risandeko irya Imuuma iya Waryobha. Maaha mo-faharaasa. rekamaahekana mu-nyumba iya Waryobha. Nkamaaha örömësyö na nkaighwa ikirumo ikya enkobha. Ikyaro kekarighita, ekatwa imbura iya righörö ririto.

Omokari na Ughushoka

¹Mbe, kekeebhoka ekemanyërryö ikya ököröghöörya bhököngʼu, ighörö iyö. Nkamaaha omokari aibhöhiibhwi iryobha, na eno amaghörö aghaaye, ghatashirë ku-mwëri. Ghwiki, yaarenga atöörrë ikirighi ikya ekekama ko-motwe ughwaye. Ikirighi kiyö, kyaarë na sinyota ikömi na ibhërë. ²Omokari uyö, ne-nda yaarë, ekahekera-ho enkaagha aitoorani, ebhesa bhekamukuurya.

³Mbe, ghwiki kekeebhoka ekemanyërryö ikyëndë ikya ököröghöörya ighörö iyö. Tamaaha! Ghwaare-ho ughushoka oghonene oghokangaaru. Ughushoka ghuyö ngwaarë na emetwe muhungatë, na amatera ikömi, na kera omotwe ughwaryo ngwaarë na ikirighi ekeke ikya ekekama. ⁴Omokera ughwa ughushoka ghuyö, ghokahorotora ikitweno ikya katatö ikya sinyota ukurwa mu-ryobha ghokaserekera hansë. Ughushoka ghuyö ghokaimerra mbere iya omokari uyö yaatunanga ukwebhora, okore hano omoona areebhorwe, ghomomere. ⁵Mbe, omokari uyö akeebhora omoona uwa ikishaasha. “Omoona uyö, naretonga ibhyaro bhyonswe igho na inyimbo iya ekekama iya ikyoma.”12:5 Maaha mo-ketabho ikya Zabhuri 2:9. Omoona uyö, akasaköribhwa, akahirwa ku-Waryobha, ku-kitumbë ikya Waryobha ikya ekekama. ⁶Omokari uyö, akangʼosera ku-riköngö, ahasë hano waanyöörrë Waryobha yaamösëëmërya-yo igha, amutughe iyö ku-sinsikö ëkëkwë ëkëmwë amaghana abhërë, na merongo esansabha.

⁷Mbe, riihë rekeebhoka mu-ryobha iyö. Mikaëri maraika omonene, hamwë na abhamaraika abha orobhareka urwaye, bhakaitana na ughushoka ghuyö, na abhamaraika abhaagho. ⁸Kasi ughushoka na abhamaraika abhaagho bhakakerwa. Ku bhuyö bhakarughibhwa ukurwa mu-ryobha iyö. ⁹Ughushoka oghonene ghuyö, ghokarekerwa ko-kebhara hamwë na abhamaraika abhaagho. Ghuyö, ngwo ughushoka ughwa kare ghoora ghokobherekerwa igha, Nyangasheka handë igha Oghosambwa. Ghuyö, ngo ghwaangʼainirë abhantö bhonswe igho ko-kebhara kono, okore bhakore ëbhëbhë.

¹⁰Mbe, nkaighwa engamba ukurwa mu-ryobha eraghamba bhököngʼu igha,

“Bhoono, Waryobha uwëëtö ahönëri abhantö abhaaye.

Aimërëëyi-ho Obhokama ubhwaye ko obhotoro ubhwaye!

Kiristo wonswe öörökëri ubhwera ubhwaye,

ko bhoora umushöngëri uwa abhakumya bharikyëtö,

ono akobhashongera mbere iya Waryobha ubhutikö na omobhasö, arëkëëywë hansë.

¹¹Abhakumya bharikyëtö, bhaanyöörrë singuru isya okobhaaha Oghosambwa

okohetera ko amaanyinga agha Omoona Ringʼöndi,

na ko okoghera iya ubhwimërërri bhono bhaamwimërërrëëyë,

ko bhoora tebhaatöniibhwi na öbhöhöru ubhwabho hë.

Mbaaikërëëyi ukukwa, ko okoghera iya ukukumya Omoona Ringʼöndi.

¹²Ku bhuyö ni-igha mushomerwe,

bhonswe igho bhano mömënyirë ighörö mu-ryobha!

Kasi haahö, ekebhara na inyansha,

ko bhoora Oghosambwa ghörëkëëywë kö-bhëënyu iyö

na eno ghörërëëyë bhököngʼu, ko bhoora ngomanyirë igha, sinsikö isyagho, ne-nke sitighaayë.”

¹³Hano ughushoka ghuyö ghwaarööshë igha ghörëkëëywë ko-kebhara, ghokaseeta omokari oora yaarenga aitooraini omoona uwa ikishaasha. ¹⁴Kasi Waryobha yaahaayë omokari uyö amabhabha abhërë, kya agha öghötöönyi oghonene, okore aibhurruke aghende ku-riköngö iyö ko okongʼosa ughushoka ghuyö. Hayö ho ahasë hano araatughwe na okorendwa ku-sinsikö ëkëkwë ëkëmwë amaghana abhërë, na merongo esansabha,

¹⁵Mbe, ughushoka ghuyö, ghokaruusya amanshë amaaru kya omoghera mu-munywa ughwaryo, okore omokari uyö, ahete na engera. ¹⁶Kasi rirobha rekatöörrya omokari uyö. Rirobha rekaasama kya umunywa, rekamera amanshë ghayö ghonswe igho, ghano ghaaruurë mu-munywa ughwa ughushoka ghuyö. ¹⁷Ughushoka ghuyö, ghokarererra bhököngʼu omokari uyö. Ghokaghya ukwitana na abhaana abha omokari uyö bhano bhaatighaayë. Abhaana bhayö, na-bhantö bhano bhakoghoota amaraghërryö agha Waryobha, na ukwimererra Yëësu. ¹⁸Mbe, ughushoka ghuyö, ghokaimerra mbareka iya inyansha.

Ughutyënyi ughwa mbere

¹Mbe, nkamaaha ughutyënyi ghorarwa mu-nyansha. Ughutyënyi ghuyö, ngwaarë na emetwe muhungatë, na amatera ikömi, na kera retera, ndyaarenga na ikirighi ekeke ikya ekekama. Na kera omotwe, ngwaarenga ghwaandëkirwë-ko iriina irya okotoka Waryobha. ²Ughutyënyi ghuyö naarööshë, ghwaarenga kya ëngwë, kasi amaghörö aghaagho, ghaarë kya agha ityënyi eno ekobherekerwa igha idubhu, na umunywa ughwaryo, ghwaarë kya ughwa ëndwë. Ughushoka ghoora, ghokahaana ughutyënyi singuru isyagho, ikitumbë ikyagho ikya ekekama, na ubhwera bhwonswe igho.³Omotwe öghömwë ughwa ughutyënyi ghuyö, ghwaarenga ghoharaghirwë oroghoma urwa nyende. Kasi oroharagho ruyö, rokahwena! Engʼana iyö, ekaröghöörya abhantö bhonswe igho ko-kebhara, bhakasoorana ughutyënyi ghuyö. ⁴Kora bhakasengerra ughushoka ghuyö, ko bhoora ghwaahaayë ughutyënyi obhotoro ubhwa okotonga. Bhakasengerra na ughutyënyi ghoora ghwonswe eno bharaghamba igha, “Taaho ömöntö kya ughutyënyi ghono hë! Handë ono akaatora ukwitana nagho.”

⁵Mbe, ughutyënyi ghuyö, ghokahaanwa obhotoro ubhwa ukwihasha ko amangʼana agha okotoka Waryobha. Ughutyënyi ghuyö, ghwaahaaywë ubhwera ubhwa okokora ghayö, ku-myëri merongo ene na ibhërë. ⁶Ughutyënyi ghuyö, ghokatoka Waryobha, iriina iryaye na ahasë hano akwikara, ko bhoora igha, ghokatoka abhamënyi abha mu-ryobha bhonswe igho. ⁷Ughutyënyi ghuyö ghokaikërërribhwa ghokore riihë na abhantö abha Waryobha, ghobhabhaahe. Ghokahaanwa na ubhwera ubhwa okotonga abhantö abha amakabhira ghonswe igho, sihiiri syonswe igho, ebheghambo bhyonswe igho na ibhyaro bhyonswe igho. ⁸Abhantö bhonswe igho abha ko-kebhara kono, bhano amariina aghaabho ghatandëkirwë mo-ketabho ikya Öbhöhöru, mbareghosengerra. Eketabho kiyö, ni-ikya Omoona Ringʼöndi ono yaanshinshirwë, nkyaandëkirwë ukurwa okosemoka ukwa ekebhara.

⁹Ono aana amatwë, aitegherre.

¹⁰Ömöntö ono yaaitengʼerwanga igha agheghwe këghötërëëyë,

naregheghwa këghötërëëyë.

Ömöntö ono yaaitengʼerwanga igha aitwe na umushonge,

nariitwa na umushonge.

Ku bhuyö ni-igha abhantö abha Waryobha, bhaghömërri inyaanyi iyö, na bhaghëndërri okobha na umukumo.

Ughutyënyi ughwa kabhërë

¹¹Mbe, nkamaaha ughutyënyi ughwöndë ghorarwa mu-rirobha. Ughutyënyi ghuyö, ngwaarë na amatera amake igho abhërë, kya agha ekemaanwa ikya ringʼöndi, kasi engamba iyaaghwo, yaarë kya iya ughushoka. ¹²Ghokakora amangʼana ku ubhwera bhonswe igho ubhwa ughutyënyi ughwa mbere ghoora, na ko okoghera iya ughwene ghuyö. Ughutyënyi ughwa kabhërë ghuyö, ghokasingʼirrya abhantö bhonswe igho abha ko-kebhara, bhasengerre ughutyënyi ughwa mbere ghoora ghwaarë na oroghoma urwa nyende rono rwaahwënirë. ¹³Ughutyënyi ughwa kabhërë ghuyö ghwaakörrë ebhemanyërryö ibhya amakono agha ököröghöörya, kora ghokaghera omorro ghwike ukurwa mu-ryobha, ghuushe ko-kebhara, na eno abhantö bharamaaha bhuuya igho. ¹⁴Ghokangʼaina abhatakumya ko-kebhara okohetera kö ebhemanyërryö ibhya amakono bheno ghwaakörrë ko okoghera iya ughutyënyi ughwa mbere ghoora. Ghokatëëbhya abhantö igha, bhakore ritöndö ko okoghera iya okosooka ughutyënyi ughwa mbere ghoora ghwaaharaghirwë oroghoma urwa nyende na umushonge, kasi ghwiki, ghokabha öghöhöru.

¹⁵Mbe, ughutyënyi ghuyö, ghokahaanwa obhotoro ubhwa okohootera umwika ughwa öbhöhöru mu-ritöndö irya ughutyënyi ughwa mbere ghoora. Ghwaakörrë igho, okore ritöndö riyö reghambe na okohamera igha, bhaitwe bhaara bhonswe igho bhaangirë okoghosengerra.

¹⁶Ughutyënyi ughwa kabhërë ghuyö ghokasingʼirrya abhantö bhonswe igho, abha ibhyeo na bhano bhataarë na ibhyeo, abhaamë na abhatöbhu, abhatöönööni na abhaghorwa, bhatoorrwe ekemanyërryö ko-kobhoko ukwa bhoryo handë ku-bhusyö. ¹⁷Ku bhuyö ni-igha, ömöntö taaghore handë ököghörya kyokyonswe keera hë, hano ataana eharama iya iriina irya ughutyënyi handë risaabhu irya seherufi isya ughutyënyi ghoora.

¹⁸Engʼana eno, nö-bhöngʼaini ikutuna. Omongʼaini, asesore ensonga iya risaabhu irya ughutyënyi ghuyö, ko bhoora igha, ni-risaabhu irya kinyabhantö. Risaabhu irya-ko na-maghana asansabha merongo esansabha na isansabha.

Omoona Ringʼöndi na abhantö abhaaye 144,000

¹Mbe, hano naarëkëëyë amaiso, nkamaaha Omoona Ringʼöndi aimërëëyë ku-nguku iya Sayuuni, hamwë na abhantö eraaki ëmwë ëbhëkwë merongo ene na bhine. Abhantö bhayö bhaarenga bhandëkirwë iriina irya Omoona Ringʼöndi na irya Suwaabho, ku-bhusyö. ²Nkaighwa engamba ukurwa mu-ryobha kya okoherra ukwa amanshë amaaru, na kya ekebhaghatyö ikirito kya enkobha. Ghwiki engamba iyö, yaarë kya abhatëmi abha amatungu abhaaru bhano bhakorengerrania.

³Abhantö eraaki ëmwë ëbhëkwë merongo ene na bhine bhayö, bhaarenga bhaimërëëyë mbere iya ikitumbë ikya ekekama keera, na bhöröngë ubhwa ëbhëntö ibhine bheno bhekoheeshera na mbere iya abhaghaaka merongo ëbhërë na abhane bhaara. Bhaarëëtyanga rirëëtyö reehya, na taaho ömöntö uwöndë ono yaatöörrë ukwegha rirëëtyö riyö hë, kasi na abhantö bhayö bhaarenga bhatunguribhwi ukurwa ko-kebhara abheene igho. ⁴Abhantö bhayö, nkosoorana bharë Omoona Ringʼöndi ahasë hohonswe igho hano akughya. Tebhaarenga bhainyankuhiri ko okotaara na abhakari, ku bhuyö, nsi-ntindë bhaarë. Bhaatunguriibhwi ukurwa mo-bhantö abhandë, bhakakorwa ikimwenso ikya obhotongore ku-Waryobha bhaana Omoona Ringʼöndi. ⁵Tebhakaaghambirë obhorongo hë, kora tebhaarë na risoro ryoryonswe igho hë.

Abhamaraika bhatatö bhararaareka engʼana iya Waryobha

⁶Mbe, nkamaaha maraika uwöndë araibhurruka ighörö iyö. Maraika uyö, yaarë na Amangʼana Amaiya agha amakora ghonswe igho, agha ökötëëbhya abhantö bhonswe igho abha ko-kebhara kono, abha ibhyaro bhyonswe igho, amakabhira ghonswe igho, abha ebheghambo bhyonswe igho, na abha sihiiri syonswe igho. ⁷Mbe, maraika uyö akakonga araghamba igha, “Mosookenga Waryobha na mömötööni, ko bhoora enkaagha iyaaye iya okobhotorra abhantö ikiina, ihikirë. Mosengerre Waryobha, we yaabhömbirë mu-ryobha, rirobha, inyansha, na ebheseekaani.”

⁸Mbe, maraika uwöndë uwa kabhërë, akaroobhera-ko araghamba igha, “Umughi omonene ughwa Bhaabhëëri,14:8 Bhaabhëëri. Maaha mo-faharaasa. ghötëmööywë këmwë! Umughi ghono ghwaakörrë abhantö bhonswe igho bhakanywa idivai iyaagho ëndörö. Idivai ëndörö iyö, no-bhosooraare ubhwagho.”

⁹Mbe, maraika uwöndë uwa katatö, wonswe akaroobhera ko-bhandë bhaara. Akaghamba bhököngʼu igha, “Hano ömöntö araasengerre ughutyënyi ghuyö na ritöndö irya-ko, na atoorrwe ekemanyërryö ku-bhusyö handë ko-kobhoko, ¹⁰ömöntö uyö wonswe naraanywe idivai iya okorerra ukwa Waryobha. Idivai iyö, në-ndörö kya amarwa ghano ghataghörröywë na amanshë. Waryobha umwene naraamotoorre mo-kekombe ikya okorerra ukwaye anywe. Ömöntö uyö naraateeswe mo-morro ömörörö kai, na ubhurutu ubhwa ikibhiriiti, bhöröngë ubhwa abhamaraika abhahörëëru na bhöröngë ubhwa Omoona Ringʼöndi. ¹¹Iryöki irya omorro ghuyö ghokobhateesa, ndiriighundenga ukughya ighörö iyö amakora ghonswe igho. Abhantö bhayö, tebharishomerwa röndë hë, mbokaabha ubhutikö handë omobhasö, ko bhoora bhaasëngërrëëyë ughutyënyi na ritöndö irya-ko, bhakatoorrwa ekemanyërryö ikya iriina irya ughutyënyi ghuyö.”

¹²Bhoono enkaagha eno, yo iya ököghömërrya ukwa abhantö abha Waryobha bhano bhakoghoota amaraghërryö agha Waryobha, na ukukumya Yëësu.

¹³Nkaighwa engamba erarwa mu-ryobha, eraghamba igha, “Andeka igha, nyakara abhantö bhano bhakukwa ukurwa bhoono igho na eno bhakumiri Omonene Yëësu.”

Mbe, Umwika Ömöhörëëru uwa Waryobha akaghamba igha, “Tigha bhamuunye inyanko iyaabho eno bhaanyoora, ko bhoora amangʼana aghaabho amaiya ghano bhaakora, ngarebhasoorana.”

Okogheswa ukwa ekebhara

¹⁴Mbe, nkarekera-yo amaiso ghwiki, nkamaaha risaarö rirabhu. Ku-risaarö kuyö, yaarenga aikaayë-ko ömöntö kya Omoona uwa Ömöntö.14:14 Omoona uwa Ömöntö. Maaha mo-faharaasa. Maaha mo-ketabho ikya Daniëri 7:13. Ömöntö uyö, yaarenga atöörrë ikirighi ikya ekekama ikya esahaabhu ko-motwe ughwaye. Mo-kobhoko ukwaye, yaaghöötërrëëyë-mo righasi iryöghë.

¹⁵Ho maraika uwöndë akarwa mu-nyumba iya Waryobha, akakonga bhököngʼu aratëëbhya oora yaaikaayë ku-risaarö igha, “Taghoota righasi iryaho oghese, ko bhoora righesa irya ekebhara rebhaayë, na enkaagha iya okoghesa ihikirë.” ¹⁶Mbe, ömöntö oora yaaikaayë ku-risaarö, akarekera righasi iryaye ko-kebhara, akaghesa.

¹⁷Ghwiki maraika uwöndë akarwa mu-ryobha iyö, mu-nyumba iya Waryobha, na eno aghöötërrëëyë righasi iryöghë. ¹⁸Mbe, maraika ono akwimererra omorro, akarwera ku-riighyö irya okosambera-ko ëkörösö. Maraika uyö akakonga, akatëëbhya maraika nyaighasi iryöghë uyö igha, “Taghoota righasi iryaho iryöghë, otabhore ebhesaghara ibhya sezabhibhu isya ko-kebhara, ko bhoora sehagho isyako syaatöbhirë.” ¹⁹Mbe, maraika uyö akarekera righasi iryaye, akaghesa sezabhibhu isya ko-kebhara, akasetoora mö-këntö ekenene ikya okometera-mo. Ëkëntö kiyö këröörökya okorerra ukwa Waryobha. ²⁰Sezabhibhu sekameterwa mö-këntö kiyö, kebhara iya umughi omonene. Sekarwa amaanyinga. Amaanyinga ghayö, ghakabha omoghera omotambë. Obhotambë ubhwagho, mbwaarë kya sikiromiita amaghana atatö, na obhotambë ubhwa okosekera, n-kya imiita ëmwë na ritënë.

Rirëëtyö irya Omoona Ringʼöndi na Mosa

¹Mbe, nkamaaha ekemanyërryö ikyëndë ekenene ikya ököröghöörya mu-ryobha iyö. Naarööshë-yo abhamaraika muhungatë, abha ibhyateko muhungatë ibhya okomarërrya, ko bhoora igha, ibhyateko bhiyö, mbyo bhekaamarërrëëyi okorerra ukwa Waryobha. ²Ghwiki nkamaaha ëkëntö keno kenga inyansha iya ikyowa eno yishooghaini na omorro. Ku-nyansha hayö, bhaaimërëyë-ho abhantö bhaara bhabhaahirë ughutyënyi ghoora, ritöndö iryagho hamwë na risaabhu irya iriina iryagho. Abhantö bhayö, bhaarenga bhaghöötërrëëyë amatungu mo-mabhoko aghaabho, ghano bhaarenga bhahaaywë na Waryobha, okore bhamosengerre. ³Bhaarëëtyanga rirëëtyö reera irya Omoona Ringʼöndi na Mosa ömököri uwa emeremo uwa Waryobha, bharaghamba igha,

“Omonene Waryobha uwa obhotoro bhwonswe igho,

amangʼana aghaaho m-marito, nköröghöörya gharë.

Uwe nu-uwe Omokama uwa ibhyaro bhyonswe igho,

senshera isyaho, ne-heene, kora n-sya obhoheene.

⁴Ë Omonene, ni-igha abhantö bhonswe igho bhakwobhohe,

kora bhatööni iriina iryaho,

ko bhoora nu-uwe umwene ömöhörëëru.

Abhantö abha ibhyaro bhyonswe igho mbariisha, bhakosengerre,

ko bhoora amangʼana aghaaho agha heene, nkomaahekana gharë harabhu igho.”

Abhamaraika muhungatë abha ibhyateko

⁵Hano ghayö ghaahööyë, nkarekera-yo amaiso nkamaaha mu-nyumba iya Waryobha, mu-righutu irya ukwimererra okobha-ho ukwa Waryobha, haighööywë. ⁶Abhamaraika muhungatë bhaara, abha ibhyateko muhungatë, bhakarwa-mo. Bhaarenga bhaibhöhirë singibho sinshiiya, isya öbhöghöri obhonene seno sekomekameka. Bharenga bhaibhöhëëyë imishibhi ëmëgharë ighya esahaabhu ku-bhikubha ibhyabho. ⁷Ömwë uwa ëbhëntö ibhine bheera bhekoheeshera, akahaana abhamaraika muhungatë bhayö kera ömwë ribhaköri irya esahaabhu reno riishööyë okorerra ukwa Waryobha ömöhöru amakora ghonswe igho. ⁸Mu-nyumba iya Waryobha hakaishora iryöki irya ubhuhika ubhwa Waryobha na obhotoro ubhwaye. Taaho ömöntö ono araatore okosoha mu-risengerro irya Waryobha, okohekera hano ibhyateko muhungatë ibhya abhamaraika bhaara bherehwa.

Amabhaköri muhungatë agha okorerra ukwa Waryobha

¹Mbe, nkaighwa engamba enene ukurwa mu-nyumba iya Waryobha, eratëëbhya abhamaraika muhungatë bhaara igha, “Moghende mohomorre ko-kebhara okorerra ukwa Waryobha kono körëngë mo-mabhaköri muhungatë ghayö.” ²Mbe, maraika uwa mbere akaghya, akahomorra ko-kebhara ribhaköri iryaye riyö irya okorerra ukwa Waryobha. Hayö na hayö igho, abhantö bhano bhaarë na eharama iya ughutyënyi, na bhano bhaasëngërrëëyë ritöndö iryagho, bhakabha na amahutë amaghogho, ghano ghakotakunya bhököngʼu.

³Ho maraika uwa kabhërë wonswe akahomorra ribhaköri iryaye ku-nyansha. Amanshë ghakabha kya amaanyinga agha umuku, ëbhëntö bhyonswe igho bhekakwa mu-nyansha muyö.

⁴Mbe, maraika uwa katatö, wonswe akahomorra ku-myoro na ebheseekaani ribhaköri iryaye, amanshë ghayö ghonswe igho, ghakabha amaanyinga. ⁵Nkaighwa maraika umwimërërri uwa amanshë araghamba igha,

“Ë Waryobha Ömöhörëëru,

uwe ho waarë ukurwa kare na kora bhoono igho hö örë,

uwe nu-uwa heene örë,

na öbhöbhötöri ubhwaho ubhwa ikiina bhono, nu-bhwa heene.

⁶Ko bhoora igha, abhantö abhaghogho bhaaitirë abhantö abhaaho na abharööti abhaaho,

uwe Waryobha obhashibhiri ko okobhahaana amaanyinga, bhanywe.

Ubhushibhu bhuyö, mbobhaingʼarëëyë!”

⁷Mbe, nkaighwa engamba erarwera ku-riighyö eraghamba igha, “M-maheene, Omonene Waryobha uwa obhotoro bhwonswe igho, ubhushibhu ubhwaho, m-bwa heene, na ubhwa obhoheene.”

⁸Ho maraika uwa kane, wonswe akahomorra ribhaköri iryaye ku-ryobha. Iryobha rekahaanwa obhotoro ubhwa okosamba abhantö na omobhasö ughwaryo. ⁹Abhantö bhakasambwa bhörrö. Bhakatoka Waryobha ko bhoora yaarë na ubhwera ubhwa ibhyateko bhiyö. Kasi abhantö bhayö, tebhaahöngööyë ëbhëbhë ibhyabho, handë igha bhatööni Waryobha hë.

¹⁰Mbe, maraika uwa kataano, akahomorra ribhaköri iryaye ku-kitumbë ikya ekekama ikya ughutyënyi ghoora. Ikisuntë kekakura kamwë igho, ko-bhokama ubhwa ughutyënyi ghuyö, na abhantö bhakairomaroma bhörrö sëndëmë isyabho, ko bhoora bhaanyaharekanga. ¹¹Bhakatoka Waryobha uwa mu-ryobha, ko okoghera iya öbhörrö na amahutë amaghogho ghano bhanyöörrë. Kora tebhaahöngööyë amangʼana aghaabho amaghogho hë.

¹²Mbe, maraika uwa kasansabha, wonswe akahomorra ribhaköri iryaye ko-mooro omonene ughwa Yufurati, omooro ghuyö, ghokooma. Ku bhuyö ekakorwa-ho enshera iya okoheta-ko abhakama abha ukurwera röghörö.

¹³Mbe, nkamaaha amasambwa atatö, ghano ghaatuubhaini na ebhekere. Rimwë rekarwa mu-munywa ughwa ughushoka, iryëndë, rekarwa mu-munywa ughwa ughutyënyi, na iryëndë, rekarwa mu-munywa ughwa ömörööti uwa obhorongo16:13 Ömörööti uwa obhorongo erakyorra ughutyënyi ughwa kabhërë ghoora, ghono ghwaatörrë ukurwa ku-rirobha, na emeremo ighyagho, ni-ighya ukushinshighania abhantö ghyaarë, ko amangʼana aghaaryo. Maaha mo-ketabho ikya Okohonyora 13:11-15. oora. ¹⁴Amasambwa ghayö, ghaarenga na obhotoro ubhwa okokora ebhemanyërryö ibhya amakono, na emeremo ighyagho, nu-kughya okokomania abhakama bhonswe igho ko-kebhara, okore bhakore riihë ku-rusikö oronene roora, urwa Waryobha uwa obhotoro bhwonswe igho.

¹⁵Omonene Yëësu araghamba igha, “Momaahe! Nindiisha kya bhoora umwibhi akuusha igho atarëkëëyë amangʼana. Yaamara okongʼoorwa ömöntö ono akwiraarerra eno aibhöhirë singibho isyaye bhuuya, okore atakaasha okoghenda kengʼaabhi na ökösöökërribhwa mo-bhantö.”

¹⁶Mbe, amasambwa ghayö ghakakomania abhakama bhonswe igho na abhasirikare abhaabho ahasë hano hakobherekerwa ku-Kiëbhuraania igha, Harimagedoni.

¹⁷Mbe, maraika uwa muhungatë akahomorra ribhaköri iryaye ighörö iyö. Ghwiki nkaighwa engamba enene, erarwera ku-kitumbë ikya ekekama mu-nyumba iya Waryobha, eraghamba igha, “Bhoono ghahööyë!” ¹⁸Bhekabha-ho ëbhëmësyö na ebhebhaghatyö ibhya enkobha. Ekebhara kekarighita bhököngʼu. Ikirighiti kiyö, n-kenene kyaarë okokera ibhirighiti bhyonswe igho, ukurwa hano ömöntö yaabhömbirwë. ¹⁹Mbe, umughi omonene ghoora ghokobherekerwa igha Bhaabhëëri ghokaahokana sembaara isatö, na imighi emenene ighya ibhyaro ibhyëndë, ghekasareka ghyonswe igho. Waryobha tiyëëbhirë umughi omonene ghoora Bhaabhëëri, ku bhuyö akaghusingʼirrya ghunywe ekekombe ikya idivai iya okorerra ukwaye. ²⁰Ikirighiti kiyö nkyaaghërrë amaghinga ghonswe igho ghakasika, na singuku syonswe igho, tisyamaahekaini ghwiki hë. ²¹Imbura iya righörö ekatwa. Amaghena amanene agha righörö agha ubhurito kya ubhwa sikiiro merongo etaano kera rimwë, ghakarwa mu-ryobha, ghakaghwera abhantö. Abhantö bhakatoka Waryobha ku kibhuno ikya ibhyateko bhiyö ibhya imbura iya righörö, ko bhoora ibhyateko bhiyö, m-beghogho bhököngʼu bhyaarë.

Omosooraare na ughutyënyi oghokangaaru

¹Mbe, ömwë mo-bhamaraika muhungatë, bhayö bhaarë na amabhaköri agha okorerra ukwa Waryobha, akaasha ku-öni, akantëëbhya igha, “Nshö hano nkwöröki ubhushibhu ubhwa omokari omosooraare, uyö, nu-mughi ghoora ghwaahaghaashwa ko-manshë amaaru. ²Omosooraare uyö, we abhakama abha ko-kebhara bhaakörrë nawe obhosooraare, na abhantö abha ko-kebhara kono, bhakaghootwa na obhosooraare ubhwaye bhuyö, kya hano ömöntö aghöötirwë na amarwa.”

³Mbe, Umwika Ömöhörëëru uwa Waryobha akanyitoomera. Maraika akantangata ukughya ku-riköngö. Hano naahikirë iyö, nkamaaha omokari aikaayë ku-ghutyënyi oghokangaaru. Ughutyënyi ghuyö, ghwaarenga na emetwe muhungatë, na amatera ikömi. Kö-möbhërë ughwa ughutyënyi ghuyö, ghaarenga gharomaini-ko amariina agha okotoka Waryobha. ⁴Omokari uyö, yaarenga aibhöhirë singibho sinshiiya isya erangë këësërö na isya erangë enkangaaru. Ghwiki yaarenga atöörrë esahaabhu, ebheghera ibhya öbhöghöri na iruuru. Mo-kobhoko ukwaye, yaaghöötërrëëyë ekekombe ikya esahaabhu, keno kyaaishööyë amanyënyëëri na amangʼana amanyanku agha obhosooraare ubhwaye bhuyö. ⁵Ku-bhusyö ubhwa omokari uyö, ryarenga ryandëkirwë-ko iriina irya ikibhisirë. Iriina reno ryaandëkirwë-ko ni-igha,

umughi omonene bhaabhëëri,

nyakuwaabho abhasooraare

na amanyënyëëri ghonswe igho agha ko-kebhara.

⁶Nkamaaha omokari uyö, abhaaye kya ono aghöötirwë na amarwa, ko bhoora yaarenga anyööyë amaanyinga agha abhantö abha Waryobha, bhano bhaaitirwë ku ikibhuno ikya ukwimererra amangʼana agha Yëësu. Hano naamörööshë, nkaroghoora bhököngʼu!

⁷Kasi maraika uyö akamböörya igha, “N-kwakë öröghöörrë? Tigha nkötëëbhi ensonga iya ikibhisirë ikya omokari uyö, na iya ughutyënyi nyametwe muhungatë, na amatera ikömi ghayö. ⁸Ughutyënyi ghuyö örööshë, ngö-höru ghwaarë, kasi bhoono ghwaakwa. Kora n-haangʼë ghörë ghurwe mu-bhwina ubhwa mu-kyaro ikya abhaku, kasi Waryobha naraaghusiki. Abhantö bhonswe igho abha ko-kebhara kono, bhano amariina aghaabho ghatandëkirwë mo-Ketabho ikya Öbhöhöru, hano waanyöörrë ekebhara ketaraabhombwa, mbareroghoora okomaaha ughutyënyi ghuyö, ko bhoora igha, ho ghwaarenga, ghokakwa, kasi ghwiki ngurikyora.”

⁹Maraika uyö akaghëndërrya akaghamba igha, “Hano, haratuna ömöntö uwa obhongʼaini. Emetwe muhungatë ghiyö örööshë, ghiyö ne-bhekereghe muhungatë bheno omokari uyö akwikara-ko. ¹⁰Ghwiki emetwe muhungatë ghiyö, nkwimererra ghërë abhakama muhungatë. Mo-bhakama muhungatë bhayö, abhataano, bhaamara ukukwa, ömwë, nkotonga akërë. Kasi omokama uwöndë ono araaroobhere-ko, hano ariisha, Waryobha naremohaana umweya, atonge ku-ribhagha ike igho. ¹¹Ughutyënyi ghuyö ghwaarenga ghöhöru kasi ghokakwa, ngwo omokama uwa monaane. Omokama uwa monaane uyö mmo-bhakama muhungatë bhayö yaarë, kasi wonswe Waryobha narimusikya.

¹²“Amatera ikömi ghayö örööshë, nkwimererra gharë abhakama ikömi bhano bhataraatonga. Bhonswe igho bhayö, mbarehaanwa ubhwera ubhwa okotonga hamwë na ughutyënyi ghuyö, ku-ribhagha irya esa ëmwë igho. ¹³Abhakama ikömi bhayö, mbarebha na ikiina këmwë. Mbarehaana ughutyënyi obhotoro na ubhwera ubhwabho bhwonswe igho. ¹⁴Mbareghootana na ughutyënyi ghuyö, okore bhaitane na Omoona Ringʼöndi. Kasi Omoona Ringʼöndi hamwë na abhantö abhaaye, narebhabhaaha, ko bhoora we Omonene uwa abhanene na Omokama uwa abhakama. Abhantö abhaaye bhayö, m-baara Waryobha yaabhërëkëëyë, akabhashaaghora, abhantö bhayö, m-ba heene.” ¹⁵Maraika akaghëndërrya ukushumaasha, akantëëbhya igha, “Amanshë ghayö örööshë omosooraare aikaayë-ko, ne-bheghambo bhyonswe igho ghakwemererra, sihiiri syonswe igho na ibhyaro bhyonswe igho.

¹⁶“Amatera ikömi ghayö örööshë, hamwë na ughutyënyi ghuyö, mbereregha omosooraare uyö. Mbaremosensa ëbhëntö ibhyaye bhyonswe igho, bhamutighe kengʼaabhi kya mutyënyi. Mbaremorya, na bheno bheretama, mbarebhetabhuta mo-morro. ¹⁷Waryobha umwene we yaakörrë bhabhe na ikiina ëkëmwë ikya okohaana ughutyënyi ghuyö obhotoro ubhwabho ubhwa okotonga. Ni-igho bharekora okohekera hano ësëëmyö iya Waryobha erehekerana. ¹⁸Omokari uyö örööshë, uyö we akwimererra umughi omonene ghoora ghokotonga abhakama bhonswe igho abha ko-kebhara kono.”

Umughi ughwa Bhaabhëëri ghoratemorwa

¹Hano ghayö ghaahööyë, nkamaaha maraika uwöndë ono yaarë na ubhwera obhonene, araika ukurwa mu-ryobha. Yaarenga na emerengaari gheno ghyaamërëkëri ekebhara. ²Akakonga bhököngʼu igha,

“Ghötëmööywë!

Umughi omonene ughwa Bhaabhëëri, ghötëmööywë!

Bhoono ghobhaayë ahasë aha ukwibhisa,

amasambwa, na ëbhëhwë ebheghogho ibhya seteemo syonswe igho.

Obhaayë ahasë aha amanyönyi amanyanku agha ökösëësëëbhya enkoro.

³Bhaabhëëri ghötëmööywë, ko bhoora abhantö abha ibhyaro bhyonswe igho,

bhaanywa idivai ëndörö iya oronamba urwa obhosooraare ubhwaye,

abhakama abha ekebhara bhaakörrë nawe amaigha.

Abhaköri abha ibhyashara abha ko-kebhara

bhaamëhëëyë ko-ronamba urwaye rono rotaana orotonga.”

⁴Mbe, nkaighwa engamba iyëndë ukurwa mu-ryobha iyö eraghamba igha,

“Bhare abhantö abhaane, murwe mu-mughi ghuyö,

okore motakaaghootana nagho okokora ëbhëbhë,

motakaasha okohombanibhwa hamwë mu-bhushibhu ubhwagho.

⁵Ko bhoora ëbhëbhë ibhyaye, bhyaruhirë,

kora bhyahikirë mu-ryobha.

Waryobha n-haangʼë arë aghushibhi, ko amangʼana aghaagho amaghogho.

⁶Momokorre ighoigho, kya bhoora we yaakörëëyë abhandë.

Kora ni-igha mumwëngëri kabhërë ko amangʼana amaghogho ghayö yaakörëëyë abhandë.

Mogheghe ekekombe ikyaye

momotoorre-mo mara kabhërë iya öbhörrö bhono yaabhatöörëëyë bhëënyu.

⁷Mumushibhi na momoteese ko okorengʼaana na bhono yaakörrë akaameha igho, akaghya sinkuma.

Ko bhoora igha, nkwihasha arë mo-maitegherro aghaaye araghamba igha,

‘Nikaayë kya omokama omokari, ko bhoora tëndëngë musinö hë, tendebhaabhayera röndë hë!’

⁸Ku bhuyö ibhyateko bhyonswe igho, mbirimunyoora ku-rusikö örömwë,

ibhyateko ibhya uruku, ikikuuro na ibhya inshara.

Naresambwa mo-morro asikibhwi,

ko bhoora Omonene Waryobha ono akobhotora ibhiina, n-wa obhotoro.”

⁹Abhakama abha ekebhara bhano bhaakörrë nawe amaigha, na okosanga ubhwamë ubhwaye, hano bharemaaha iryöki irya ukusika ukwa umughi ghuyö, mbarikuura, bharasenkemerra umughi ghuyö. ¹⁰Abhakama bhayö, mbariitasha hare na umughi ghuyö, ko okoobhoha inyaanyi iya umughi ghuyö. Mbarikuuranga bharaghamba igha, “Haahö, haahö umughi omonene Bhaabhëëri, umughi ughwa singuru! Ko bhoora ko-nkaagha iya esa ëmwë igho, ushibhiibhwi.”

¹¹Abhaköri abha ibhyashara abha ko-kebhara, mbarikuura na okosenkemerra, ko bhoora taaho ghwiki ömöntö uwa okoghora ëbhëntö ibhyabho hë. ¹²Ömöntö uwa okoghora ëbhëntö ibhya öbhöghöri ibhya esahaabhu, seehera, iruuru, ebheghera ibhya öbhöghöri taatooke hë. Ömöntö uwa okoghora eketambaara ikiiya ikya öbhöghöri, singibho isya erangë këësërö, isya ehariri na senkangaaru, taatooke hë. Ghwiki ömöntö uwa okoghora kera eteemo iya ömötë ughwa ëkörösö, kera ëkëntö ikya amaino agha sinshöghu, kera ëkëntö ikya ömötë ughwa öbhöghöri, ikya ishabha, ikyoma na ëkëntö ikya emaarumaaru, taatooke hë. ¹³Ömöntö uwa okoghora omodarasiini, ebherongo, ihiriki, amaghuta agha öbhöghöri, ëkörösö, idivai, amaghuta agha okohensherra, obhose ubhuuya na engano, taatooke hë. Ömöntö uwa okoghora sengʼombe, amangʼöndi, sefaraasi na ëmëkökötëëni ighya ukurutwa na sefaraasi, abhaghorwa na öbhöhöru ubhwa abhantö, taatooke hë.

¹⁴Mbe, abhaköri abha ibhyashara mbareghamba igha, “Ëbhëntö bheno waahanshirë bhisikirë. Ëbhëntö ibhya öbhöghöri, bhisikirë, tebheeho hë, kora turibhinyoora röndë hë.” ¹⁵Abhaköri abha ibhyashara ibhya ëbhëntö bhiyö, bhano bhaamëhirë ku ibhyashara ibhya ku-mughi ghuyö, mbariitasha hare, ko okoobhoha inyaanyi iyaagho, eno bharakuura na okobhaabhayera. ¹⁶Mbareghambanga igha, “Haahö, haahö, ghore umughi omonene. Waaibhohanga singibho sinshiiya isya öbhöghöri obhonene, na isya erangë këësërö na enkangaaru. Waaikonanga na esahaabhu, ebheghera ibhya öbhöghöri na iruuru, ¹⁷kasi bhoono kamwë igho, ubhwamë bhuyö bhwonswe igho, bhusikiibhwi!”

Abhaghöbhya abha amaato bhonswe igho, abhantö bhonswe igho bhano bhakoheta ku-nyansha, abhantö bhonswe igho bhano bhakokora emeremo mo-maato, mbariimerra hare iyö. ¹⁸Hano bharemaaha iryöki irya ukusikibhwa ukwa umughi ghuyö, mbarikuura bhököngʼu bharaghamba igha, “Teghooho umughi omonene ughwöndë kya umughi ghono hë!” ¹⁹Abhantö bhayö, mbariyerorra urutu ko-metwe ighyabho, ukwörökya igha, bhabhaabhayëëyë. Mbarikuura eno bharaghamba igha, “Haahö, haahö, umughi omonene ghono. Umughi ghono ngwo ghwaakora bhëëtö bheene maato bhonswe igho, twameha ko okoghera iya ubhwamë ubhwagho. Kasi bhoono ghusikirë kamwë igho.”

²⁰Mushomerwe abhamënyi abha mu-ryobha, na bhëënyu abhantö abha Waryobha, abhatomwa na abharööti, bhonswe igho mushomerwe, ko bhoora Waryobha ashibhiri umughi ghuyö, ko okoghera iya ghaara umughi ghuyö ghwaabhakörëëyë.

²¹Mbe, maraika uwa singuru, akainyökya reghena kya oroghena oronene urwa okoseera, akarerekera mu-nyansha, akaghamba igha,

“Ku singuru sinsharu kya igho, ni-igho Bhaabhëëri arerekerwa,

umughi omonene ghuyö, toremaahwa ghwiki hë.

²²Taaho ömöntö ono ariighwa-mo abhantö bhararëëtya,

handë ukwighwa-mo ritungu, ekerongwe handë setarumbeeta.

Tarebha-mo umunfundi wowonswe oora hë,

ömöntö tariighwa ömöntö arasya muyö hë!

²³Kora emerengaari ighya etara tegheremoreka-mo hë.

Kora inyangi iya öbhötëti terebha-mo hë.

Ko bhoora abhaköri abha ibhyashara abhaaho,

m-banene abha ibhyaro bhaarë,

na ko okoghera iya ubhuturutumbi ubhwaho,

ibhyaro bhyonswe igho, bhekangʼainwa.

²⁴Mu-mughi muyö, ghaare-mo amaanyinga agha abharööti na agha abhantö abhandë abha Waryobha,

hamwë na amaanyinga agha abhantö bhonswe igho bhano bhaaitirwë ko-kebhara kono.”

Waryobha aratöönibhwa

¹Hano ghayö ghaahööyë, nkaighwa engamba kya iya rikomo rinene mu-ryobha iyö, erakonga igha,

“Waryobha akumibhwi!

Öbhöhönia, ubhuhika na obhotoro, ni-ibhya Waryobha uwëëtö,

²ko bhoora okobhotora ibhiina ukwaye, n-kwa obhoheene, na n-kwa heene.

Abhötörëëyë omosooraare bhököngʼu oora ikiina,

ono yaasarya ekebhara ko obhosooraare ubhwaye.

Waryobha amarrë ikisiiyomba

ko okoghera iya amaanyinga agha abhaköri abha emeremo abhaaye.”

³Bhakaghamba urwa kabhërë igha,

“Waryobha akumibhwi!

Iryöki irya umughi ghuyö

nkwighunda rërë ukughya ighörö iyö amakora ghonswe igho.”

⁴Abhaghaaka merongo ëbhërë na abhane bhaara, bhakaighwësya hansë bhubhuumaayë hamwë na ëbhëntö ibhine bheno bhekoheeshera, bhakasaasaama Waryobha. Waryobha ono aikaayë ku-kitumbë ikya ekekama, we bhaasaasaamanga igha, “Amina! Waryobha akumibhwi!”

⁵Mbe, nkaighwa engamba iyëndë erarwera ku-kitumbë ikya ekekama hayö eraghamba igha,

“Mukumi Waryobha uwëëtö, bhëënyu abhaköri abha emeremo abhaaye bhonswe igho.

Mumukumi bhano mokomosooka,

abha ibhyeo na kora bhano bhataana ibhyeo!”

⁶Mbe, nkaighwa engamba kya iya rikomo rinene. Engamba iyö, yaarë okanya igha m-manshë amaaru ghakoghera. Ghwiki yaarë kya enkobha eno ekobhaghatya, ekaghamba igha,

“Waryobha akumibhwi!

Ko bhoora Omonene Waryobha uwëëtö uwa obhotoro bhwonswe igho we akotonga.

⁷Ni-igha tushomerwe,

tukirirri na ökömötöönia.

Ko bhoora inyangi iya obhoghabhöri ubhwa Omoona Ringʼöndi ihikirë,

na umwenga uwaaye amarrë ukwisëëmya.

⁸Umwenga uyö ahaaywë singibho sinshiiya isya öbhöghöri

seno sekomekameka.”

Singibho sinshiiya siyö ensonga yaamo, na-mangʼana amaiya ghano abhantö abha Waryobha bhakokora.

⁹Mbe, maraika uyö, akantëëbhya igha, “Andeka igha, nyakara bhano bharaarekwa ku-nyangi iya obhoghabhöri ubhwa Omoona Ringʼöndi.” Ghwiki akantëëbhya igha, “Amangʼana ghayö ngambirë, na-mangʼana amaheene agha Waryobha.”

¹⁰Mbe, ho naaghööyë hansë bhubhuumaayë ko-maghörö agha maraika uyö, okore mmosaasaame. Kasi akantëëbhya igha, “Tigha otakaakora igho! Öni wonswe murikyaho ndë, ömököri uwa emeremo hamwë na abhakumya bharikyaho, bhano bhakwimererra amangʼana agha Yëësu. Sengerra Waryobha! Ko bhoora ukwimererra amangʼana agha Yëësu kuyö nkwo esemoka iya öbhörööti.”

Ömöghëndya uwa efaraasi endabhu

¹¹Hano ghayö ghaahööyë, nkamaaha mu-ryobha haighökirë. Nkamaaha efaraasi endabhu. Ono yaaikaayë-ko, yaabherekerwanga igha, “Uwa heene” na “Uwa Obhoheene.” Nkobhotora arë ibhiina na ukwitana riihë ubhwa heene. ¹²Amaiso aghaaye, ngaarë kya emerengaari ighya omorro. Yaarenga aibhöhiibhwi ibhirighi ebheke ibhyaru ibhya ekekama ko-motwe ughwaye. Yandëkirwë iriina reno reetaamanyirwë na uwöndë, kasi nu-mwene igho we yaaremanyirë. ¹³Yaarenga aibhöhiibhwi engansho eno yaarenga ishöshirë amaanyinga. Yaabherekerwanga igha, “Engʼana iya Waryobha.” ¹⁴Abhasirikare abha mu-ryobha mbaamosooraini, bhariinirë ko-sefaraasi sendabhu, bhaibhöhëëyë singibho sinshiiya isya öbhöghöri, sendabhu shaa. ¹⁵Umushonge umwöghë, nkurwa ghörë mu-munywa ughwaye, okore abhaahe Abhakyaro. Narebhatonga ku ubhwera obhonene. Uyö we akotashera sezabhibhu mö-këntö ikya okosemetera-mo. Ëkëntö kiyö këröörökya okorerra ukwa Waryobha uwa obhotoro bhwonswe igho. ¹⁶Ömöntö uyö, yaarë na iriina ryandëkirwë ko-ngansho orobhareka urwa ku-kiimo ikyaye igha,

omokama uwa abhakama, omonene uwa abhanene.

¹⁷Mbe, nkamaaha maraika ömwë aimërëëyë ku-ryobha kighörö. Maraika uyö akakonga bhököngʼu, aratëëbhya ibhinyönyi bhonswe igho bheno bhyaaibhurrukanga kighörö igha, “Muushe, mwikomani ku-nyangi enene iya Waryobha. ¹⁸Muushe moraaghere ibhihundughu ibhya abhakama, ibhya abhatangati abha riihë, ibhya abhantö abha singuru. Moraaghere sinyama isya sefaraasi na isya abhaghëndya abha sefaraasi siyö. Moraaghere sinyama isya abhantö bhonswe igho, abhaghorwa na abhatöönööni, abha ibhyeo na bhano bhataana ibhyeo.”

¹⁹Mbe, nkamaaha ughutyënyi ghuyö na abhakama abha ko-kebhara na abhasirikare abhaabho bhaaikomaini hamwë. Bhaatunanga igha, bhaitane na uyö yaaikaayë ko-faraasi endabhu hamwë na abhasirikare abhaaye. ²⁰Kasi ughutyënyi ghuyö hamwë na ömörööti uwaaye uwa obhorongo oora yaaghökörëëyë amakono, bhaaghëghirwë këghötërëëyë. Ko amakono aghaaye ghayö, ömörööti uyö, yaangʼainirë abhantö bhano bhaarë na ekemanyërryö ikya ughutyënyi ghuyö, na bhano bhaasengerranga ritöndö iryagho. Bhonswe igho bhabhërë bhayö, mbaatabhutirwë bharëngë bhahöru mu-nyansha eno ikwibhugha omorro na ubhurutu ubhwa ikibhiriiti. ²¹Abhantö bhano bhaatighaayë, mbaaitirwë na umushonge ughwa oora yaarenga aikaayë ko-faraasi endabhu. Umushonge ghuyö, n-goora ghwaarwanga mu-munywa ughwaye. Ibhinyönyi bhonswe igho bhekarya sinyama isya ibhihundughu bhiyö, bhekeeghota.

Oghosambwa ghorabhohwa imyoka ëkëkwë ëkëmwë

¹Mbe, nkamaaha maraika araika ukurwa mu-ryobha. Maraika uyö yaarenga na orofongoro urwa ubhwina ubhwa mu-kyaro ikya abhaku na ekeraangʼani ekenene mo-kobhoko ukwaye. ^2-3Akaghoota ughushoka ghoora. Ughushoka ghuyö, ngo inshoka iya kare eera ekobherekerwa igha, Nyangasheka, handë igha Oghosambwa. Akaghobhoha na ekeraangʼani, akaghotabhuta mu-bhwina ubhwa mu-kyaro ikya abhaku, akasiika-ho ekesaku, akamaameka-ko umuhuri ughwa ubhurimbo, okore ghotakaasha okongʼaina ghwiki Abhakyaro. Oghosambwa ghuyö ngorebhohwa imyoka ëkëkwë ëkëmwë. Hano ribhagha riyö rerehwa, ni-igha ghuruusibhwi mo-kebhohe ko-nkaagha enke igho.

⁴Mbe, nkamaaha ibhitumbë ibhya ekekama bhikarëëywë na bhayö bhaarenga bhahaaywë ubhwera ubhwa okobhotorra abhantö ibhiina ibhyabho. Bhayö, n-senkoro isya abhantö bhano bhaabhotorwa ëbhëghöti, ku kwimererra amangʼana agha Yëësu, na okoraareka engʼana iya Waryobha. Tebhasëngërrëëyë ughutyënyi ghuyö, handë ritöndö iryagho hë. Tebhaikërëëyi okotoorrwa ekemanyërryö ikya ughutyënyi ghuyö ku-bhusyö handë ko-mabhoko aghaabho hë. Abhantö bhayö, mbaaryökirë bhakatonga hamwë na Kiristo imyoka ëkëkwë ëkëmwë. ⁵(Abhaku abhandë tebhariryoka hë, okohekera hano imyoka ëkëkwë ëkëmwë gherehwa.) ⁶Kono nko ukuryoka ukwa mbere ukwa abhaku. Nyakara bhano bhariryökibhwa ko-nkaagha iyö, bhayö m-bahörëëru. Ko bhoora uruku urwa kabhërë terorebha na singuru ko-bhayö hë. Mbarebha abhasëngëri abha Waryobha na Kiristo, kora mbaretonga hamwë na Kiristo ku-ribhagha riyö irya imyoka ëkëkwë ëkëmwë.

Oghosambwa ghorasikibhwa

⁷Hano imyoka ëkëkwë ëkëmwë gherehwa, Oghosambwa ngorehaaterwa ukurwa mo-kebhohe. ⁸Mbe, hano ghorehaaterwa, nguriisha ghongʼaine Abhakyaro abha ko-kebhara kyonswe igho, Ghööghu bheena Maghööghu. Oghosambwa ngorebhakomania bhaitane riihë, nabho m-baaru bharebha kya omosense ughwa ku-nyansha. ⁹Mbareghendanga ko-kebhara kyonswe igho, na bharainaara umughi ghono Waryobha ahanshirë. Abhantö abha Waryobha mu-mughi muyö bhamënyirë. Kasi hano bharekora igho, omorro nguriika ukurwa mu-ryobha, ghobhasiki. ¹⁰Mbe, Oghosambwa ghono ghwaabhangʼainirë, ngoretabhutwa mu-nyansha iyö ikwibhugha omorro na ubhurutu ubhwa ikibhiriiti. Muyö mo ughutyënyi ghoora na ömörööti uwa obhorongo oora, bhaarëkëëywë-mo. Muyö mo bhareteeswanga ubhutikö na omobhasö, amakora ghonswe igho.

Embotorra iya ibhiina

¹¹Mbe, nkamaaha Waryobha aikaayë ku-kitumbë ekenene ekerabhu ikya ekekama. Mu-ryobha na ekebhara, bhekamwihëënërya-ho, kora tibhyamaahekana ghwiki hë. ¹²Nkamaaha abhaku bhonswe igho, abha ibhyeo na bhano bhataana ibhyeo bhaimërëëyë bhöröngë ubhwa ikitumbë ikya ekekama keera. Ho ebhetabho bheno bhyandëkirwë amangʼana agha abhantö bhonswe igho, bhekakondokorwa. Na eketabho ikyëndë kekakondokorwa, eketabho kiyö, n-keera kekobherekerwa igha, Eketabho ikya Öbhöhöru. Abhaku bhakabhotorrwa ibhiina ko okorengʼaana na amangʼana aghaabho ghano ghaandëkirwë mo-bhetabho bhiyö. ¹³Inyansha ekahongora abhaku bhano bhaare-mo. Uruku na ikyaro ikya abhaku bhyonswe bhekahongora abhaku abha-mo. Kera ömöntö akabhotorrwa ikiina okorengʼaana na amangʼana aghaaye. ¹⁴Hano ghayö ghaahööyë, uruku bheena ikyaro ikya abhaku, bhekatabhutwa mu-nyansha iyö ikwibhugha omorro. Inyansha iyö ikwibhugha omorro, yo uruku urwa kabhërë. ¹⁵Mbe, ömöntö wowonswe ono iriina iryaye retaandëkirwë mo-ketabho ikya öbhöhöru, uyö wonswe yaatabhutirwë mu-nyansha iyö ikwibhugha omorro.

Ekebhara ekehya

¹Hano ghayö ghaahööyë, nkamaaha mu-ryobha ahahya na ekebhara ekehya, ko bhoora mu-ryobha aha mbere na ekebhara ikya mbere, bhyaarenga bhisikiibhwi, kora inyansha tiyaare-ho ghwiki hë. ²Mbe, nkamaaha umughi ömöhörëëru, ghoraika ukurwa mu-ryobha, ku-Waryobha, ghuyö ngo Yërusarëëmu omohya. Umughi ghuyö, ngwaakönirwë kya bhono umwenga yasëëmibhwa araghanya ömötëti. ³Nkaighwa engamba enene, erarwera ku-kitumbë ikya ekekama eraghamba igha, “Taighwa! Waryobha hamwë amënyirë na abhantö abhaaye. Naraaikare hamwë nabho. Mbaraabhe abhantö abhaaye, wonswe naraabhe Waryobha uwaabho. ⁴Narebheeya amaisöri. Enkaagha iyö, uruku terorebha-ho hë, kora okobhaabhayera tekorebha-ho hë. Ikikuuro tekerebha-ho hë handë ukunyahaareka, ko bhoora amangʼana agha kare ghaara, nurinyoora ghaahwa.”

⁵Mbe, oora yaarenga aikaayë ku-kitumbë ikya ekekama akaghamba igha, “Bhoono ëkëntö kyokyonswe igho, nkokekora ndë bhohya!” Mbe, ghwiki akantëëbhya igha, “Andeka amangʼana ghayö, ko bhoora n-ga ukukumibhwa na n-ga obhoheene.” ⁶Ghwiki akantëëbhya igha, “Ghahekeraini! Öni nö-öni Esemoko na Umuhiko,21:6 Esemoko na Umuhiko. Ikiyunaani keraghamba igha, Arufa na Omegha, ensonga yaamo igha ukusimirya ko-A okohekera ko-Z. Maaha mo-ketabho ikya Okohonyora 1:8. nö-öni nkosemora amangʼana ghonswe igho na okoghamarërrya. Kera ömöntö ono aana inyonta, nendaamohaane amanshë agha bhosa anywe, ghano ghakurwa mo-bheseekaani ibhya amanshë agha öbhöhöru. ⁷Ömöntö wowonswe ono araakere, nendaamohaane ghayö ghonswe igho. Naraabhe omoona uwaane, na öni wonswe nendaabhe Waryobha uwaaye. ⁸Kasi bhoono abhoobha, bhano bhatakukumya Waryobha, bhano bhakösësëëbhya enkoro iya Waryobha, abhaiti, abhasooraare, abhaturutumbi, bhano bhakosengerra ëbhëtöndö, na abharongo, bhonswe igho bhayö, mbaretoorwa mu-nyansha eno ikwibhugha omorro, na ubhurutu ubhwa ikibhiriiti. Na ruyö ndwo uruku urwa kabhërë.”

Yërusarëëmu eehya

⁹Ho ömwë uwa abhamaraika muhungatë bhaara bhaarë na amabhaköri muhungatë ghano ghaishööyë ibhyateko muhungatë ibhya umuhiko, akaasha akantëëbhya igha, “Nshö hano nkwöröki umwenga, ono araabhe mokaa Omoona Ringʼöndi.” ¹⁰Mbe, Umwika Ömöhörëëru akanyitoomera, maraika uyö akanhira ku-nguku enene, entambë. Akaanyörökya Yërusarëëmu umughi ömöhörëëru, ghoraika ukurwa ighörö mu-ryobha, ku-Waryobha. ¹¹Umughi ghuyö, ngwaarë na emerengaari ighya Waryobha ghesekanirë, ko bhoora igha ngyaamekamekanga kya reghena irya öbhöghöri reno rekobherekerwa igha yasipi, reramësya kya ikyowa. ¹²Ghwaarë na obhogho obhotambë bhököngʼu, na ibhihiita ikömi na bhibhërë. Kera ikihiita, nkyaarendwanga na maraika, na nkyaandëkirwë iriina irya ekabhira ëmwë, mo-makabhira ikömi na abhërë agha Isiraëri. ¹³Kera orobhareka, rwaarë na ibhihiita bhitatö, röghörö, ghöösi, syömya, na nyansha. ¹⁴Obhogho ubhwa umughi ghuyö, mbwaarenga bhohaghaashirwë ko-maghena ikömi na abhërë, agha umusingi. Na kera reghena, ndyaandëkirwë-ko iriina irya omotomwa ömwë, mo-bhatomwa ikömi na bhabhërë bhaara abha Omoona Ringʼöndi.

¹⁵Mbe, maraika uyö yaashumaashanga na öni, yaarë na orotanka urwa esahaabhu urwa okorengera ëbhëntö. Yaarë naro, okore arenge umughi ghuyö, ebhesaku ibhyagho, na obhogho ubhwagho. ¹⁶Mbe, akarenga umughi ghuyö, obhotambë na obhoghare ubhwa umughi ghuyö mbyaarengʼaini. Akanyoora igha, n-sikiromiita ëbhëkwë bhibhërë na amaghana ane. ¹⁷Akarenga obhoghare ubhwa obhogho bhuyö, akanyoora igha, na-makubha righana imwë merongo ene na inye. Yaarengeranga ekerengero keno kyaamanyekaini ko-bhantö.

¹⁸Obhogho bhuyö bhwaarenga bhohaghaashëëywë amaghena agha öbhöghöri agha yasipi iya erangë iya urunyënyi. Umughi ghuyö, ngwaarenga ghohaghaashëëywë esahaabhu inshiiya, iya okomekameka kya ikyowa. ¹⁹Obhorosa ubhwa obhogho ubhwa umughi ghuyö, mbwaakönirwë na amaghena agha öbhöghöri agha seteemo nsharu. Reghena irya mbere ryaarë irya yasipi iya erangë iya urunyënyi, irya kabhërë, ni-irya yakuuti iya erangë iya ubhurru, irya katatö, irya karikedoni iya erangë iya urunyënyi. Reghena irya kane, ryaarë irya izumaridi iya erangë iya urunyënyi, ²⁰irya kataano, rerabherekerwa igha, saridöniki iya erangë enkangaaru, irya kasansabha, rerabherekerwa igha, akiki iya erangë enkangaaru. Reghena irya muhungatë, ryaarë kirisorito iya erangë iya mayaai, irya monaane, rerabherekerwa igha, zabharajadi iya erangë iya ubhurru bhono bhwishooghaini na erangë iya urunyënyi. Reghena irya kenda, rerabherekerwa igha, yakuuti iya mayaayi, irya ikömi, rerabherekerwa igha, kirisopiraso iya erangë iya urunyënyi inkwerranu, irya ikömi na kamwë, rerabherekerwa igha, hiakinito iya erangë enkangaaru eno ishooghaini na iya amashungwa, na irya ikömi na kabhërë, rerabherekerwa igha, ametisito iya erangë këësërö. ²¹Ibhihiita ikömi na bhibhërë bhiyö bhyonswe igho, ni-ibhya iruuru bhyaarë. Kera ekesaku kyaakörëëywë iruuru ëmwë igho! Omohanda omonene ughwa mu-mughi muyö, ghwaakörëëywë esahaabhu inshiiya, eno ekomekameka kya ikyowa.

²²Mu-mughi muyö tenaarööshë-mo inyumba iya Waryobha hë, ko bhoora Omonene Waryobha uwa obhotoro bhwonswe igho na Omoona Ringʼöndi mmu-mughi muyö bhamënyirë. Ku bhuyö inyumba iya Waryobha teena ubhwera hë. ²³Umughi ghuyö, tëghötöndörrëywë na emerengaari ighya iryobha handë ighya umwëri, ko bhoora ubhuhika ubhwa Waryobha, mbwo bhokobharra umughi ghuyö, na Omoona Ringʼöndi we ëkëmörë. ²⁴Abhantö abha ibhyaro bhyonswe igho, mbariikara mo-bhorabhu ubhwa emerengaari ighya umughi ghuyö, na abhakama abha ko-kebhara mbarihira-mo ëbhëntö ibhyabho ibhya öbhöghöri. ²⁵Ibhihiita bhyonswe igho ibhya umughi ghuyö, tibhirisiikwanga hë, ko bhoora ubhutikö tebhorebhanga-ho hë. ²⁶Abhantö bhonswe igho abha ko-kebhara kono, mbarihira ubhwamë ubhwabho na ëbhëntö ibhyabho ibhya öbhöghöri mu-mughi muyö. ²⁷Kasi ikinyanku kyokyonswe keera, tekeresoha mu-mughi muyö hë. Ömöntö wowonswe uwa amanyënyëëri handë omorongo, uyö taresoha-mo hë. Kasi abhantö bhano bharesoha mu-mughi ghuyö, m-baara urinyoora amariina aghaabho ghaandekwa mo-Ketabho ikya Öbhöhöru ikya Omoona Ringʼöndi.

Omooro ughwa amanshë agha öbhöhöru

¹Mbe, maraika uyö, akaanyörökya omooro ughwa amanshë agha öbhöhöru, ghono ghwaarabherranga kya ikyowa. Ghwaarweranga mwi-rungu irya ikitumbë ikya ekekama ikya Waryobha na Omoona Ringʼöndi. ²Omooro ghuyö, gwaahetanga ghatëghatë iya omohanda omonene ughwa mu-mughi ghuyö. Ghwaare-ho ömötë ughwa öbhöhöru ghono ghwaatahatirë humbu na humbu. Ömötë ghuyö, ngwaamanga sehagho kera umwëri, ko-mooka mara ikömi na kabhërë. Amatö agha ömötë ghuyö n-dyogho ryaarë irya ukuhwënia Abhakyaro.

³Umughi ghuyö, teghorebha-mo na ëkëntö kyokyonswe keno kyaihiimwa na Waryobha. Na ikitumbë keera ikya ekekama ikya Waryobha, bhaana Omoona Ringʼöndi, nkeraabhenga mu-mughi muyö. Abhaköri abha emeremo abha Waryobha, mbaremosengerra. ⁴Mbaremomaaha, kera ömöntö naryandekwa iriina irya Waryobha ku-bhusyö ubhwaye. ⁵Ubhutikö tebhorebha mu-mughi ghuyö röndë hë. Abhantö tebharëtönibhwa na setara, handë emerengaari ighya iryobha hë, ko bhoora Omonene Waryobha, we arebha obhorabhu ubhwabho. Abhantö bhayö, mbaretonga amakora ghonswe igho.

Amangʼana agha umuhiko

⁶Mbe, maraika uyö akantëëbhya igha, “Amangʼana ghano, na-agha obhoheene, kora n-ga ukukumibhwa. Omonene Waryobha ono akuhuuha abharööti Umwika uwaaye, yaatömirë maraika uwaaye ökwörökya abhaköri abha emeremo abhaaye amangʼana ghano gharaabhe bhöngö hano.”

⁷Yëësu araghamba igha, “Itegherra! M-böngö ndaashe. Waryobha naraangʼoore bhano bhakoghoota na ököröndërrya amangʼana agha öbhörööti ubhwa mo-ketabho mono.”

⁸Öni Yohana, nö-öni naaighuurë na ukwimaahera amangʼana ghayö bhuuya. Na hano naaghaighuurë na okoghamaaha, naaghööyë bhubhuumaayë, bhöröngë ubhwa maraika uyö yaanyörökyanga amangʼana ghayö, nkatuna igha mosengerre. ⁹Kasi we akantëëbhya igha, “Tigha, otakaakora igho! Öni wonswe m-mököri uwa emeremo murikyaho ndë. N-kya abhakumya bharikyaho abharööti ndë, na abhandë bhonswe igho bhano bhakoghoota engʼana iya eketabho keno. Ku bhuyö sengerra Waryobha umwene igho!”

¹⁰Mbe, maraika uyö akantëëbhya igha, “Amangʼana ghano agha öbhörööti ubhwa mo-ketabho mono, otakaaghabhisa, ko bhoora ghonswe igho ghano ghaghambirwë muyö, enkaagha iyaagho haangʼë ërë. ¹¹Mbe, ömöntö ono akokora amangʼana amaghogho, we ataghëndërrya okokora amaghogho ghayö, na ono akokora amangʼana amanyanku, wonswe aghëndërri okokora amangʼana amanyanku ghayö. Ömöntö uwa heene, wonswe aghëndërri okobha ömöntö uwa heene, ömöhörëëru wonswe, aghëndërri okobha ömöhörëëru.”

¹²Yëësu araghamba igha, “Itegherra! M-böngö ndaashe. Nkuusha ndë na rihaki irya kera ömöntö, ko okorengʼaana na bhono yaakora. ¹³Öni nö-öni Esemoko na Umuhiko, nö-öni nkosemora amangʼana ghonswe igho, na okoghamarërya.”

¹⁴Mbe, nyakara abhantö bhano bhakufura singibho isyabho, okore bhaikërërribhwi bhasohe mu-mughi omohya ghuyö, okohetera mu-bhihiita ibhyagho, na bharaagherenga sehagho isya ömötë ughwa öbhöhöru. ¹⁵Kasi abhaturutumbi bhonswe igho, abhasooraare, abhaiti abha abhantö, bhano bhakosengerra ëbhëtöndö, na bhonswe igho bhano bhakorongoha, mbarebha kebhara iya umughi ghuyö, kya sësëësë.

¹⁶“Öni Yëësu, nö-öni umwebhorwa uwa omokama Daudi, nkomekameka ndë kya entorrona. Ntömirë maraika uwaane, aashe abhatëëbhi bhëënyu abhasoorani abhaane, amangʼana ghano ko okoghera iya amakanisa.”

¹⁷Umwika Ömöhörëëru uwa Waryobha, na umwenga uwa Omoona Ringʼöndi, nkobherekera bharë Omonene igha, “Nshö!” Na abhantö bhonswe igho bhano bharaaighwe amangʼana ghayö, bhaghambe igha, “Nshö!” Wowonswe ono aana inyonta, ono akutuna amanshë, aashe anywe amanshë agha öbhöhöru bhosa igho.

Amangʼana agha umuhiko

¹⁸Nkötëëbhya ndë ömöntö wowonswe ono araaighwe amangʼana agha öbhörööti agha mo-ketabho mono igha, hano ömöntö wowonswe arëngërërri-mo amangʼana aghaaye, Waryobha wonswe naraamwëngëri ibhyateko bheno bheghambirwë mo-ketabho mono. ¹⁹Ömöntö wowonswe ono araaruusi engʼana yoyonswe igho ukurwa mo-mangʼana agha öbhörööti ubhwa eketabho keno, Waryobha wonswe naraamuruusiri-ho obhoheene ubhwa okomenya mu-mughi ömöhörëëru, na obhoheene ubhwa okorya sehagho isya ömötë ughwa öbhöhöru.

²⁰Na ono akuruusya ubhwimërërri ubhwa amangʼana ghano, araghamba igha, “M-maheene, m-böngö ndaashe.”

Amina. Otaasha Omonene Yëësu!

²¹Örööbhö urwa Omonene Yëësu, robhe hamwë na bhëënyu bhonswe igho. Amina.