Abhafiripi

Ritashandighi irya Pauro

ko-Bhafiripi

Obhotangati

Pauro omotomwa uwa Waryobha, we umwandëki uwa ritashandighi reno. Yaandëkëëyë ekanisa eno yaarenga mu-mughi ghono ghwaabherekerwanga igha Firipi. Eramaahekana igha, Pauro yaandëkirë ritashandighi reno enkaagha eno yaarë mo-kebhohe mu-mughi ughwa Ruumi (Maaha mo-ketabho ikya Abhafiripi 1:13-14). Pauro yaandëkëëyë abhantö bhano bhaakumiri Yëësu Kiristo enkaagha eno yaabharaarëkëëyë Amangʼana Amaiya agha Yëësu Kiristo. Abhantö bhayö, bhöörökëri righonshe ko-Pauro kö ökömötöörrya ko-bhohabhë ubhwaye.

Keno kyaaghërrë Pauro akabhandekera ritashandighi reno, yaatunanga abhakumi ko ekehaheeno keno bhaamohahënëëyë okohetera ko Epafurodito. Ghwiki yaatunanga abharaghërri amangʼana agha okokora, na okobhatogheka, okore Yëësu Kiristo abhe ëkërëngyö ikyabho ikya ököghömërrya. Engʼana iyëndë eno yaatunanga abhakaani, ni-iya amëëghyö amaghogho agha Abhayahudi (Maaha Abhafiripi 3:2-3). Ko bhoora amëëghyö ghayö, ngakaabhakörrë bhaserane na abhakumya bharikyabho mo-kanisa.

Ritashandighi reno ndemanyekaini igha, ni-ritashandighi irya ukushomerwa, ko bhoora engʼana iya ukushomerwa, n-hare kaaru ikukyorrwakyorrwa mono. Ukushomerwa kuyö, mo-bhakumya abha Yëësu Kiristo körë.

Amakëërërryö

¹Ritashandighi reno nö-öni Pauro ndyandëkirë tohamwë na murikyane Timoteo. Uyö we nkokora hamwë nawe emeremo ighya Kiristo Yëësu. Torandekera abhaimërërri, abhashemaasi, na abhantö abha Waryobha bhonswe igho bhano mörëngë Firipi hayö, bhano mwabha ëkëntö ëkëmwë na Kiristo Yëësu.

²Örööbhö na omorembe ukurwa ku-Waryobha Taata uwëëtö, na ko-Monene uwëëtö Yëësu Kiristo bhebhe hamwë na bhëënyu.

Pauro arasabhera Abhafiripi

³Hano nabhahiita nkaagha syonswe igho, nkumya Waryobha, Omonene uwaane. ⁴Ghwiki hano nabhasabhera, nkobhasabhera ndë nshömëëywë, ⁵ko bhoora bhëënyu mwabha ëkëntö ëkëmwë na öni, ko okoraareka Amangʼana Amaiya agha Yëësu Kiristo. Mwaakörrë igho ukurwa urusikö roora mwaakumiri okohekera urusikö urwa reero. ⁶Neena obhoheene igha, Waryobha ono yaasyora emeremo imiiya mo-senkoro isyënyu, naraaghëghëndërri, kora nareghemarërrya urusikö roora Kiristo Yëësu arikyora.

⁷M-buuya nkokora okobhatemera omotwe bhëënyu bhonswe igho ko amangʼana ghayö, ko bhoora nembahanshirë bhököngʼu. Nkosanga mörë na öni örööbhö urwa Waryobha, ukukiinanera Amangʼana Amaiya na okoghaimererra hamwë na bhëënyu, nokaanyoora igha mo-kebhohe ndë, handë igha temo-kebhohe ndë hë. ⁸Waryobha namanyirë igha no-bhoheene nkoghamba, hano nakangʼasërrya igha, nkwighomba ndë okomaahana na bhëënyu ghwiki. Nembahanshirë ku righonshe reerareera Kiristo Yëësu abhahanshirë.

⁹Nkobhasabhera ndë ku-Waryobha igha, righonshe iryënyu rëghëndërri ukwaruha bhököngʼu, kora mobhe na obhongʼaini na okomanya amangʼana, ¹⁰okore momanye amangʼana amaiya agha okokora. Hayö ho moraarongehe, kora temoobhe na amasoro okohekera urusikö roora Kiristo arikyora. ¹¹Öbhöhöru ubhwënyu mburishore amangʼana agha obhoheene ghano ghakotooka okohetera ku-Yëësu Kiristo. Ëkëntö kiyö nkeraaghere Waryobha atöönibhwi na ukukumibhwa ko-ghayö.

Öbhöhöru nu-bhwa ukutighinkanera Kiristo

¹²Mbe, abhakumya bharikyëtö, nkutuna ndë momanye bhuuya igha, amangʼana ghonswe igho ghano ghaannyoora, ngaasangania bhököngʼu ököntöörrya okoromaania Amangʼana Amaiya. ¹³Ko bhuyö bhonswe igho, abhasirikare abharëndi abha ughunyumba ughwa omokama, hamwë na abhantö abhandë bhonswe igho, mbaamanyirë ikibhuno ikya okobhohwa ukwane igha, n-ko bhoora nkutighinkanera Kiristo. ¹⁴Hamwë na ghayö ghonswe igho, nemanyirë igha, okobhohwa ukwane kono, kwaghera senkoro isya abhakumya bharikyëtö abhaaru, syanagha ko-Monene Yëësu. Ku bhuyö nkoraarekera bharë abhantö engʼana iya Waryobha ku singuru syonswe igho, kora tebhaana entarëki hë.

¹⁵No-bhoheene igha, bhaaho abhandë bhano bhakoraareka amangʼana agha Kiristo, ku rikenge na riihë. Kasi abhandë hobharë, bhano bhakoraareka kwa nkoro nshiiya. ¹⁶Nyankoro nshiiya, bho nkokora bharë igho, ku righonshe reno bhanaryo ku-öni, ko bhoora mbamanyirë bhuuya igha, Waryobha yaantoora mo-kebhohe, okore nkiinanere Amangʼana Amaiya. ¹⁷Kasi nyaihë bho nkoraareka bharë amangʼana agha Kiristo bhaana rikenge, te-kwa nkoro nshiiya hë. Bho nkutuna bharë bhankorerre, okore inyaanyi iyaane ebhe enene mo-kebhohe.

¹⁸Kasi ngʼana teraasareka hë! Ko bhoora amangʼana agha Kiristo nkoraarekwa gharë, nekaabha kwa nkoro ngogho, handë kwa nkoro inshiiya. Ko okoghera iya engʼana iyö, öni nkushomerwa ndë. Ghwiki nendaaghëndërri ukushomerwa. ¹⁹Nemanyirë igha nendaahone ko-ghonswe igho ghano ghaanyoora, ko bhoora mokonsabhera ku-Waryobha, na kora Umwika uwa Yëësu Kiristo nköntöörrya arë. ²⁰Ndaghanya kwa inyonta enene na ukwitengʼera igha, tënsöökërribhwi kwa nshera yoyonswe igho hë. Bhoono kya bhono yaarë sinsikö syonswe igho, nendaaghëndërri kwiköngʼërya mo-nkoro, okore Kiristo atöönibhwi ko ghano ghonswe igho nkokora, nekaakwa, handë hone.

²¹Ko bhoora öni nenkaabha möhöru, öbhöhöru ubhwane mboraabhe ubhwa okomanya, okohansha, ukutighinkanera na ökötöönia Kiristo. Kora nenkaakwa, ukukwa ukwane nkoraabhe ehoorohooro enene ku-öni. ²²Kasi hano ndaaghëndërri okobha möhöru, nendaaghëndërri okokora bhököngʼu emeremo gheno nkokora. Kasi bhoono öni temanyirë igha n-dëëhë ndaashaaghore hë. ²³Ndarutanwa ghatë iya amangʼana abhërë ghayö. Öni nkwighomba ndë igha, hano nkaarwa ko-kebhara kono, ngende kwikara hamwë na Kiristo. Ko-robhaara urwane, iyö yo engʼana inshiiya bhököngʼu. ²⁴Kasi ndamaaha igha, n-kenene ngëndërri ukwikara ko-kebhara kono, ko okoghera iya bhëënyu. ²⁵Ko bhoora neena obhoheene ubhwa engʼana iyö, nemanyirë igha nendaaghëndërri okobha ko-kebhara kono. Ghwiki nendaabhe hamwë na bhëënyu bhonswe igho, okore mbatöörri mukiine ku-mukumo ughwënyu na mushomerwe. ²⁶Enkaagha eno ndebha hamwë na bhëënyu, murishomerwa bhököngʼu ku-Kiristo Yëësu, ko bhoora igha, nurinyoora antöörri nkyore kö-bhëënyu.

²⁷Engʼana enene ni-igha, mobhe na eteemo eno ekorengʼana na Amangʼana Amaiya agha Kiristo. Hano ndaashe okobhamaaha handë nange ukuusha, kasi nighwenga igha, nköghëndërrya mörë okonagha, kora moona öbhömwë. Nkunyankera mörë hamwë umukumo ghono ghokotooka ko Amangʼana Amaiya. ²⁸Kora motakoobhohanga abhabhisa bhëënyu, okokora igho, nkwo kukwörökya igha, bho nko-nshera iya ukusikibhwa bharë, kasi bhëënyu nko-nshera iya ökötööribhwa mörë. Ghayö ghonswe igho ne-meremo ighya Waryobha. ²⁹Ko bhoora tukukumya Kiristo ukwene igho mwaahaanwa, kasi kora inyanko yonswe mwatoorrwa-ho ko okoghera iya we. ³⁰Moraitana riihë reerareera naitananga kya bhoora mwaarööshë. Ghwiki kora bhoono nkwighwa mörë igha nköghëndërrya ndë ukwitana.

Ukwegha ubhwihöötu ubhwa Yëësu Kiristo

¹Mbe, hano oraanyoore moraisegha mo-senkoro isyënyu igha m-bantö abha Kiristo mörë, moraröörisibhwa ku righonshe iryaye, moona öbhömwë na Umwika Ömöhörëëru, mohanshirwë na nkomaaherwa mörë amaabhë na Kiristo, ²mbe, mohekerani ukushomerwa ukwane! Mobhe na ubhwighwerrani na mohanshane bhëënyu abheene ko abheene. Mobhe ëkëntö ëkëmwë mo-senkoro isyënyu na mo-maitegherro aghëënyu. ³Motakaakora engʼana yoyonswe igho kwa kwiroterra handë kwa ikiheemere. Kasi mwihoote na okomaaha abhandë igha mbo abhantö okokera bhëënyu. ⁴Kera ömöntö, atakaaroonerra amangʼana aghaaye umwene igho hë, kasi ni-igha aroonerre kora agha abhandë.

⁵Mobhe na enkoro eeraeera Kiristo Yëësu yaarë nayo.

⁶Nokaanyoora igha we yaarenga na eteemo yonswe igho iya Waryobha,

kasi yaarööshë igha, ti-bhuuya ukukundirrya engʼana iyö.

⁷Kasi akatigha ghonswe igho ghayö,

akaisuuhya, akabha kya omoghorwa,

ku bhuyö akeebhorwa aana ekesosa ikya ömöntö,

akabha ömöntömöntö.

⁸Mbe, hano yaabhaayë na ekesosa ikya ömöntö,

akaihoota,

akaighwera Waryobha,

kora akaikërrya ukukwa,

uruku urwa ko-mosarabha!

⁹Ku bhuyö Waryobha yaamuryökëri, kora akamokora abhe ighörö, okokera ëbhëntö bhyonswe igho,

ko okomohaana iriina rinene okokera amariina ghonswe igho,

¹⁰okore ëbhëntö bhyonswe igho,

bhesooke iriina irya Yëësu,

ibhya mu-ryobha,

ibhya ko-kebhara

na ibhya mu-kyaro ikya abhaku.2:10 Ikyaro ikya abhaku. Maaha mo-faharaasa.

¹¹Na kera ömöntö aikërri igha, Yëësu Kiristo we Omonene,

ko okokora igho, Waryobha Taata atöönibhwinga.

Abhakumya bhabhe kya emerengaari ko-kebhara

¹²Mbe, abhaghonshe abhaane, enkaagha eno naarë kö-bhëënyu hayö, mwaaighweranga Waryobha. Kora bhoono enkaagha eno ndëngë hare na bhëënyu, mwëngëri okokora ghano ghaingʼarëëyi ko-bhantö bhano Waryobha yaatöörya. Mokore ghayö kwa ukurighita kono kokoreetwa na ukwobhoha Waryobha. ¹³Mbe, mokorenga igho, ko bhoora Waryobha we akoghera morahansha okokora ghano akutuna mokore, kora nkobhahaana arë obhotoro ubhwa okoghakora.

¹⁴Amangʼana ghonswe igho ghano mokokora, mokorenga motakwibhëmbëërya handë ukunyeerana senkaani, ¹⁵okore mobhe abhaana abharöngë abha Waryobha, bhano bhataana risoro. Ghwiki bhano motakoghambwa bhoghogho mo-bhantö abha reero eno, bhano bhaishora amaghogho na obhorangara. Bhëënyu momaahekane mo-bhantö bhayö, kya emerengaari gheno ghëkömërëkya ekebhara. ¹⁶Moghoote na okoraareka engʼana iya Waryobha eno ekobhahaana öbhöhöru ubhwa amakora ghonswe igho. Mokore igho okore nishekomaaha ikuughë urusikö roora Kiristo arikyora, ko bhoora emeremo gheno naatönirë okokora mö-bhëënyu, tighyaheta bhosa hë.

¹⁷Nenkaruusya öbhöhöru ubhwane, bhobhe kya ikimwenso ikya idivai2:17 Ikimwenso ikya idivai. Abhasëngëri mbaaterekanga idivai na itugho eno yaakorwanga ikimwenso ebhaho. Ikimwenso ikya idivai kiyö nkyo kyaabherekerwanga igha, ikimwenso ikya ukunywebhwa. Maaha mo-ketabho ikya Okobhara 15:1-12. hamwë na umukumo ughwënyu ghono ghokokorwa ikimwenso ku-Waryobha, öni nendaashomerwe nsange hamwë na bhëënyu bhonswe igho. ¹⁸Bhëënyu bhonswe mushomerwe bhuyöbhuyö, kora mukirirri hamwë na öni.

Pauro aratoma Timoteo

¹⁹Hano Omonene Yëësu araahanshe, ndaitengʼera okotoma Timoteo aashe kö-bhëënyu iyö bhöngö hano, okore hano arikyora, antëëbhi amangʼana aghëënyu, enkoro iyaane esambaaroke. ²⁰Ko bhoora teneena ömöntö uwöndë ono akobhaighwera bhörrö heeneheene kya Timoteo. ²¹Ngambirë igho, ko bhoora abhandë bho na-mangʼana aghaabho agheene ghabhatönëri, kasi amangʼana ghano Yëësu Kiristo akutuna ghakorwe, teghabhatönëri hë. ²²Kasi mmomanyirë bhono Timoteo akwiyörökya igha, m-möntö uwa heene. Yaakora emeremo ighya okoraareka Amangʼana Amaiya hamwë na öni, kya omoona na suwaabho. ²³Ku bhuyö nkwitengʼera ndë igha, m-böngö ndaamotome kö-bhëënyu iyö, hano ndaamanyërri amangʼana agha ekebhohe ikyane bhono gharaabhe. ²⁴Ghwiki nkwitengʼera ndë igha, Omonene Yëësu m-böngö araangʼaane umweya niishe kö-bhëënyu iyö.

Pauro aratoma Epafurodito

²⁵Bhoono nkomaaha ndë igha, m-buuya ntome Epafurodito kö-bhëënyu, we nu-mukumya murikyane, nkokora arë emeremo ighya Waryobha hamwë na öni. Ntoona omotono kya abhasirikare ku ukwitanera Amangʼana Amaiya. Ghwiki uyö, we mwaatömirë ku-öni, aashe ukuntighinkanera, na ököntöörrya ëbhëntö bheno bhikunsuuha. ²⁶Mmohaayë umweya aashe kobhamaaha, ko bhoora nkwighomba arë amaahane na bhëënyu bhonswe igho. Kora ghwiki enkoro iyaaye eraighwa bhoghogho ko bhoora mwaaighwa igha m-mörööyë yaarë kobhanga. ²⁷Obhoheene m-mörööyë umusingu yaarë. Kasi bhoono Waryobha yaamwabhera. Ti-igha nu-mwene igho Waryobha yaabhera hë, kasi kora öni wonswe yaanyabhëëyë, okore ntakaabhaabhayera bhököngʼu.

²⁸Ku bhuyö nehanshirë bhököngʼu igha, mmotome aashe kö-bhëënyu, hano moraamomaahe ghwiki, mushomerwe, enkoro iyaane etereme. ²⁹Umukumya murikyënyu ono uwa Omonene Yëësu, ni-igha mömösërëëni mushömëëywë bhököngʼu. Mosookenga abhantö, bhano bhanga kya ono. ³⁰Ngambirë igho ko bhoora hake yaarë akwe, ko okoghera iya emeremo ighya Kiristo. Ghwiki yaairëëyë ebheraasi öbhöhöru ubhwaye, okore anhikiri öni ekehaheeno keno bhëënyu mwaakërrwë ukukinhikirya ko bhoora hare naarë.

Pauro araitengʼera Kiristo

¹Mbe, bhoono abhakumya bharikyëtö, nkobhatëëbhya ndë igha, mushomerwe ko bhoora m-bantö abha Omonene Yëësu mörë. Tenkorosa ukukyorra amangʼana ghaara naabhandëkëëyë, ko bhoora amangʼana ghayö, ngo orobhagho urwa umukumo ughwënyu.

²Mwiyangarre na abhantö abhaghogho bhano bhakösöhya amaraghërryö agha Mosa mo-kanisa iyëëtö, ko bhoora bhakokangʼasërrya igha, abhantö bhano bhakutuna okobha Abhakiristo ni-igha bhasaarwe. ³Bhëëtö ko bhoheene m-bëëtö abhantö abha Waryobha ko bhoora Umwika Ömöhörëëru nkötötöörrya arë okosengerra Waryobha.3:3 Bhëëtö ko bhoheene m-bëëtö abhantö abha Waryobha ko bhoora Umwika Ömöhörëëru nkötötöörrya arë okosengerra Waryobha. Senakara isyëndë syandëkirwë igha, M-bëëtö toona esaaro iya heene, bhëëtö bhano tokosengerra Waryobha ko okotangatwa na Umwika Ömöhörëëru. Kiristo Yëësu we tukwikumirya na ukwesegha. Titukwesegha amangʼana aghëëtö agha kinyamöbhërë igha ngo ghakotohaana öbhötöörya, ⁴kora öni umwene, neena engʼana iya ukwesegha kinyamöbhërë. Kasi nyoore aaho ömöntö ono akwimaaha igha aana amangʼana agha kinyamöbhërë, ghano ghaingʼarëëyi ukweseghwa, öni nenagho amaaru agha ukwesegha okomokera. ⁵Hano naibhööywë, naamarrë sinsikö muhungatë, urwa monaane nkasaarwa. Öni nu-Mwisiraëri ndë, uwa ekesaku ikya Bhenjamini, Umwëbhuraania ekenaina. Ko okoghoota amaraghërryö agha Mosa, öni naaghaghöötirë bhuuya, ko bhoora m-Mofarisaayo3:5 M-Mofarisaayo. Maaha mo-faharaasa engʼana, Abhafarisaayo. naarë. ⁶Naarenga na omotono ko-mangʼana ghaara naakanyanga igha, ngo Waryobha akutuna, ku bhuyö nkateesa Abhakiristo. Ko obhoheene ubhwa okoghoota amaraghërryö, tenaarenga na risoro ryoryonswe igho hë.

⁷Kasi, ghonswe igho ghano naitengʼeranga igha ngaana ubhwera, bhoono igho nkoghamaaha ndë igha teghaana ubhwera hë, ko okoghera iya öbhömwë ubhwane na Kiristo. ⁸Kora te-ghayö agheene igho hë, kasi nkomaaha ndë igha, kera ëkëntö tekeena ubhwera hë, hano nakerengʼania na ehoorohooro iya okomanya Kiristo Yëësu, Omonene uwaane. Ko bhoora naahaatera ghonswe igho ghayö, ko okoghera iyaaye. Nkoghamaaha ndë igha, ghayö n-kya amatokoore, okore mbe ömöntö uwa Kiristo. ⁹Ghwiki ni-igha ngootane nawe këmwë. Tinkwitengʼera ghwiki ukunyoora obhoheene ubhwane ko okoghera iya ököröndërrya amaraghërryö, kasi Waryobha yaamara okoghamba igha, m-möntö uwa heene ndë ko okoghera igha, neneena umukumo ku-Kiristo. Obhoheene bhuyö, nku-Waryobha bhukurwera, bhuusha ko bhaara bhakukumya Kiristo.

¹⁰Nkutuna ndë mmanye Kiristo bhököngʼu, mbe na obhotoro ubhwa ukuryoka ukwaye. Mbe na öbhömwë nawe, nteseke na ukukwa kya igho ghaaikörrë ku-Kiristo. ¹¹Nkutuna ndë amangʼana ghayö, okore mbe mo-bhantö bhaara Waryobha ariryökya ukurwa mo-bhaku.

Ököghömërrya okohekera umuhiko ughwa emeremo

¹²Öni tinkwihasha igha naamara okokora ghonswe igho ghayö, handë igha Waryobha yaamara okonkora igha m-möntö uwa heene ndë këmwë, ti-igho hë, kasi nkwiköngʼërrya ndë, okore nnyoore ghayö. Ko bhoora ghayö ngo Kiristo Yëësu yaamberekerra. ¹³Abhakumya bharikyëtö, tinkwibhara igha naamara koghoota amangʼana ghayö. Ëkëntö ëkëmwë keno nkokora, nu-kutigha ukwitegherra ghano ghaaheta, kasi ndaiköngʼërrya, okore nnyoore ghano gharëngë mbere. ¹⁴Nkwiköngʼërrya ndë nhike ku-muhiko, okore ntuhwe ituho iyaane. Ituho iyö, yo Waryobha akobherekerra abhantö mu-ryobha, ko okohetera ku-Kiristo Yëësu.

¹⁵Ku bhuyö bhëëtö bhonswe igho abhahangarru abha umukumo, ni-igha twikererrani ko-mangʼana ghayö. Nyoore moona amaitegherro ghano ghatanga kya ghayö ngambirë, Waryobha naraabhahonyorre moghamanye bhono gharë. ¹⁶Bhoono engʼana enene, ni-igha toghoote amangʼana ghaara Waryobha yaatwörökya.

Abhakumya bheeghe eteemo iya Pauro

¹⁷Abhakumya bharikyëtö, mweghe eteemo iyaane. Mosoorane bhano bhaana eteemo kya eno mwaamaaha kö-bhëëtö. ¹⁸Naamara okobhatëëbhya hare kaaru engʼana eno nkutuna okoghamba, tigha ghwiki ngikyorre na eno ndakuura amaisöri, bhaaho abhantö abhaaru, bhano bhakwanga amangʼana agha öbhötöörya ubhwa Kiristo, bhono bhwaamaahekana ko-mosarabha. ¹⁹Abhantö bhayö mbarekamba bhasikibhwi, ko bhoora bhaakora igha, oronamba urwabho ndwo waryobha uwaabho. Amangʼana agha sënsöni ghano bhakokora igha ngo bhakwiheemera. Amangʼana ghano bhakwitegherra na-agha ko-kebhara kono.

²⁰Kasi bhëëtö, m-bantö abha mu-ryobha törë, kora nkwitengʼera törë bhököngʼu ukuusha ukwa Ömötöörya, Omonene uwëëtö Yëësu Kiristo. ²¹We aana obhotoro ubhwa okotoora ëbhëntö bhyonswe igho, bhebhe hansë iya öbhötöngi ubhwaye. Ko obhotoro bhuyö, narisyörya ëmëbhërë ighyëtö ëmëtëntëëru gheno, ghebhe na ubhuhika kya bhoora ömöbhërë ughwaye ghörë.

¹Ku bhuyö abhakumya bharikyëtö, nembahanshirë, kora nkwighomba ndë mbamaahe. Bhëënyu mbo ukushomerwa ukwane, na m-bëënyu ituho iyaane eno naahaanwa ko okoghera iya meremo gheno naakora. Ni-igho ikutunwa igha bhaghonshe abhaane, monaghe ko-Monene.

Pauro araraghërrya

²Nkobhasaasaama ndë bhököngʼu Ewodia na Sintike igha, mwighwerrane, mobhe ikiina ëkëmwë, ko bhoora bhëënyu bhonswe igho, m-basoorani abha Omonene Yëësu mörë. ³Kora uwe ömöntö uwa heene, ömököri uwa emeremo murikyane, ndakosabha ötöörri abhakari abhabhërë bhayö, bhabhe ikiina ëkëmwë. Bhayö bhonswe igho bhabhërë, mbaarë na omotono bhököngʼu hamwë na öni ughwa okoraareka Amangʼana Amaiya agha Yëësu Kiristo ko-bhantö. Ghwiki abhakari bhayö, mbaakörrë emeremo hamwë na Kërëmënti na abhantö abhandë, abhaköri abha emeremo bharikyane. Amariina agha abhantö bhayö bhonswe igho, ngaandëkirwë mo-Ketabho ikya Öbhöhöru.

⁴Mushomerwenga nkaagha syonswe igho, ko bhoora bhëënyu na-abha Omonene Yëësu mörë. Ghwiki ndakyorra okoghamba igha, mushomerwenga! ⁵Obhohaabhu ubhwënyu bhomanyekane ko-bhantö bhonswe igho. Omonene Yëësu haangʼë arë aashe. ⁶Motakaanyankeranga engʼana yoyonswe eera, kasi ko-ghonswe igho, ni-igha mosaasaamenga na okosabha Waryobha keno mukutuna. Hano mwamosaasaama, mosangania ukumukumya. ⁷Mbe, hayö ho omorembe ukurwa ku-Waryobha ghono ghöhëtërëëyë obhongʼaini bhonswe igho ubhwa abhantö, ghoraabhaikarre ghonaghi senkoro na sehakëri isyënyu, ko bhoora bhëënyu, m-bantö abha Kiristo Yëësu mörë.

⁸Mbe, bhoono abhakumya bharikyëtö, amangʼana agha obhoheene, amangʼana ghano ghaingʼarëëyi okosookwa, amangʼana agha heene, amangʼana ghano ghataraaishooghana na obhoghogho, amangʼana ghano ghakushomera abhantö na amangʼana amaiya, amangʼana ghano ghaingʼarëëyi, na amangʼana ghano abhantö bhakukumya, ghayö ngo amangʼana agha ukwitegherra mo-metwe ighyënyu. ⁹Möghëndërri okokora amangʼana ghaara mweegha ku-öni, mokaghaikërrya, mokaghaighwa kora mokamaaha ndaghakora. Hayö ho Waryobha ono akobhahaana omorembe, araaghëndërri okobha hamwë na bhëënyu.

Pauro arakumya Abhafiripi

¹⁰Mbe, nshömëëywë bhököngʼu ko okoghootana ukwane na Omonene Yëësu, ko bhoora ghwiki mokaambirë musimiri okontemera omotwe. Nemanyirë igha, sinsikö syonswe igho mwaantemeranga omotwe, kasi mokabhorwa enshera iya okonhaheenera. ¹¹Motakaakanya igha, obhohabhë bhono neenabho, mbo bhokoghera ndaghamba amangʼana ghayö, ti-igho hë. Öni naamara ukwegha ukwiswa na keno ukunyoora neenakyo. ¹²Keno nkoghamba ni-igha, naamara ukwegha okomenya kinyabhötöbhu, handë kinyabhwamë. Neegha engʼana iya ukwiswa na amangʼana kya bhono gharë, nekaabha enkaagha iya ukweghota handë okoramboka, enkaagha iya okobha na ëbhëntö ibhyaru handë ukusuuhwa na ëbhëntö. ¹³Nkotora ndë okokora ghonswe igho ghayö, ko bhoora Kiristo we akongʼaana singuru isya okokora ghayö.

¹⁴Nokaanyoora ni-igho ërë, kasi m-buuya mwaakörrë okosanga na öni inyanko eno naarenga nayo. ¹⁵Bhëënyu Abhafiripi momanyirë igha, enkaagha eno mwaaighuurë urwa mbere Amangʼana Amaiya ghano naabharaarëkëëyë, hano naaruurë mo-mokowa ughwënyu ughwa Makedonia, ekanisa iyëënyu iyeene igho, yo yaghootaini na öni ko amangʼana agha okohaahenerana. ¹⁶Kora hano naarë mu-mughi ughwa Tësarönikë, mwaandeteranga ëbhëntö ibhya ököntöörrya. ¹⁷Motakaakanya igha nkobhatëëbhya ndë igho, okore möghëndërri okondeetera ëbhëntö, ti-igho hë. Kasi keno nkutuna ni-igha, Waryobha abhangʼoore okohetera ökösërëënia ukwënyu.

¹⁸Bhoono ëbhëntö bhyonswe igho bheno mwaahaayë Epafurodito okondeetera, naabhinyöörrë. Kora ëbhëntö bhiyö m-byaru okokera obhohabhë ubhwane. Ekehaheeno kiyö kyabha ikimwenso keno kikurumbaasa bhuuya, keno kikwikërërribhwa na okongʼarra Waryobha. ¹⁹Mbe, Waryobha uwaane naraabhahaane ghonswe igho ghano moonagho obhohabhë, okorengʼaana na ubhwamë ubhwaye obhonene. Naraakore igho ko okohetera ku ubhuhika ubhwa Kiristo Yëësu.

²⁰Waryobha Taata uwëëtö, atöönibhwi amakora na amakora! Amina!

Amakëërërryö agha okomarërrya

²¹Mökëëri abhantö abha Waryobha bhonswe igho bhano bhakukumya Kiristo Yëësu. Abhakumya bhano bhakutighinkana hamwë na öni hano, bhonswe bharabhakëërya. ²²Kora abhantö abha Waryobha bhonswe igho bhano bhamënyirë mu-mughi ghono, bharabhakëërya, ekenene m-baara abha yeeka wa Kaisaari.4:22 Kaisaari. Maaha mo-faharaasa.

²³Örööbhö urwa Omonene uwëëtö Yëësu Kiristo robhe hamwë na bhëënyu bhonswe igho.