Firimoni

Ritashandighi irya Pauro

ku-Firimoni

Obhotangati

Ritashandighi reno, ndyaandëkirwë na omotomwa Pauro, kö-möntö ono yaabherekerwanga igha Firimoni. Eramaahekana igha, Firimoni yaamënyirë mu-mughi ghono ghwaabherekerwanga igha Korosaai (Maaha mo-ketabho ikya Abhakorosaai 4:9). M-mwamë yaarë, kora yaarë na omoghorwa. Ghwiki m-Mukiristo yaarë na Abhakiristo mbaasikaneranga mu-nyumba iyaaye. Pauro na Firimoni, mbaamanyaini bhuuya.

Pauro yaandëkirë ritashandighi reno enkaagha eno yaarenga mo-kebhohe mu-mughi ughwa Ruumi. Yaandëkirë ritashandighi reno, ko okoghera iya Onesimo, omoghorwa uwa Firimoni. Eramaahekana igha omoghorwa uyö, yaatörökirë ukurwa wa Firimoni, akaghya Ruumi, akasikana-yo na Pauro. Pauro akamötëëbhya Amangʼana Amaiya agha Yëësu Kiristo. Ho Onesimo yaakumiri amangʼana ghayö yaatëëbhiibhwi na Pauro.

Enkaagha iyö, hano omoghorwa wowonswe igho yaatorokanga ukurwa ko-monene uwaaye, amare aghootwe, yaashibhibhwanga. Bhoono Pauro akatoma Onesimo aghi ku-Firimoni, omonene uwa Onesimo. Pauro akahaana Onesimo ritashandighi aherre Firimoni. Pauro yaasabhirë Firimoni mu-ritashandighi muyö igha, aikërri Onesimo kya ömöntö uwaaye, ghwiki igha, kya umukumya murikyaye ku-Kiristo.

Amakëërërryö

¹Ritashandighi reno Firimoni, nö-öni Pauro nkwandëkëëyë. Öni mo-kebhohe ndë, ko okoghera iya okoraareka Amangʼana Amaiya agha Kiristo Yëësu. Öni toona umukumya murikyane Timoteo, torakökëërya uwe omoghonshe uwëëtö, ömököri uwa emeremo murikyëtö. ²Torakëërya na umusubhaati Afia, bhaana Arikipo umwitani murikyëtö uwa riihë irya okoraareka Amangʼana Amaiya agha Yëësu Kiristo. Torakëërya hamwë na abhakumya bhano bhakusikaneranga ka waaho kuyö.

³Örööbhö na omorembe ukurwa ku-Waryobha Taata uwëëtö, na ko-Monene Yëësu Kiristo, bhebhe hamwë na bhëënyu.

Righonshe na umukumo ughwa Firimoni

⁴Nkukumya ndë Waryobha senkaagha syonswe igho, hano nakosabhera, ⁵ko bhoora nkwighwa ndë igha, nköghëndërrya örë kukumya Omonene Yëësu, kora nohanshirë abhakumya bhonswe igho. ⁶Nkosabha ndë Waryobha igha, umukumo ghuyö okosanga hamwë na bhëëtö, ghökötöörri omanye bhuuya amangʼana amaiya ghonswe igho ghano tukunyoora ukurwa ku-Kiristo. ⁷Umukumya murikyane, righonshe iryaho ryaanshomera bhököngʼu, kora ryaantogheka, ko bhoora okosambaarokya senkoro isya abhakumya.

Pauro arasaasaama Firimoni igha aabhere Onesimo

⁸Mbe, nokaanyoora igha neena ubhwera bhono naahaanwa na Kiristo, ubhwa okokohamera igha okore bhono ukutunwa igha okore, ⁹kasi ko okoghera iya righonshe, ndööshë igha, m-buuya bhököngʼu nkosaasaame. Öni omoghaaka Pauro na bhoono m-mobhohe ndë ko okoghera iya Kiristo Yëësu, ¹⁰ndakosabha engʼana ëmwë igho ko okoghera iya Onesimo.1:10 Onesimo. Ensonga iyaaryo ono aingʼarëëyë okokora engʼana nyabhorebhe. Onesimo uyö, n-kya omoona uwaanewaane, ko bhoora mmötöörri ukukumya Yëësu Kiristo na eno ndëngë mo-kebhohe. ¹¹Ekembere tiyaarenga na teemo nshiiya ku-uwe hë, kasi bhoono igho, naingʼarëëyë kö-bhëëtö bhonswe igho.

¹²Bhoono ndamukyörya ku-uwe, kasi nemohanshirë kya enkoro iyaane. ¹³Kora nkutuna ndë igha hano akaghëndërrya okobha na öni hano, okore antöörringa ghaara uwe okaantörri enkaagha eno ndëngë mo-kebhohe, ko okoghera iya okoraareka Amangʼana Amaiya. ¹⁴Kasi bhoono ndööshë igha, okokora engʼana igho otanyikërërrëëyi, ti-bhuuya hë. Kora tinkutuna nkusingʼirri igha öntöörri, kasi ni-igha okore bhuuya bhono uwe umwene ukutuna.

¹⁵Mbe, okaanyoora Onesimo yaaruurë waaho ku-ribhagha ike igho, okore umunyoore ghwiki abhe na uwe makora ghonswe igho. ¹⁶Ukurwa bhoono igho, tarëngë kya omoghorwa ku-uwe hë. Kasi nakërrë omoghorwa. Uyö m-mura uwëënyu omoghonshe. Öni nemohanshirë bhököngʼu, kasi uwe, noraamohanshe bhököngʼu konkera. Noraamohanshe igha m-moghorwa uwaaho, na ko bhoora igha m-Mukiristo murikyaho.

¹⁷Mbe, nyoore omanyirë igha öni na uwe n-këntö këmwë törëngë, umwikërri kya bhono okaanyikërëëyi öni. ¹⁸Nyoore Onesimo yaarenga akosarëëyi engʼana yoyonswe igho, handë igha aana isiirë iyaaho, öni nendaakohake isiirë iyö. ¹⁹Öni Pauro, nandëkirë na okobhoko ukwane umwene igha, nendaakohake. Kasi otakaashe webhe igha oona isiirë iyaane, ko bhoora naakoraarekera engʼana iya Waryobha okabha Umukiristo. ²⁰Bhoono umukumya murikyane, nkorra engʼana iyö ko okoghera iya Omonene Yëësu. Nkëndya enkoro iyaane kya wamwëtö ku-Kiristo.

²¹Nkukwandekera ndë manyirë igha, noraaghaikërri. Kora noraakore okokera bhuyö nkosabhirë.

²²Hamwë na ghayö, ndasabha önsëëmëri ahasë aha ukwikara, ko bhoora ko okohetera amasabhi aghëënyu, nkwesegha ndë igha Waryobha naraantöörri niishe kö-bhëënyu iyö.

Amakëërërryö agha okoragha

²³Epafura arakökëërya. Wonswe hamwë törë nawe mo-kebhohe mono ko okoghera iya okoraareka Amangʼana Amaiya agha Kiristo Yëësu. ²⁴Kora abhaköri abha emeremo bharikyane, Maariko bhaana Arisitariko, Dema na Ruuka, bhonswe bharakökëërya. ²⁵Örööbhö urwa Omonene Yëësu Kiristo robhe na bhëënyu bhonswe igho.