Yaakobho

Ritashandighi irya Yaakobho

ko-bhano bhaanyaraghana

Obhotangati

Ritashandighi reno, ndyaandëkirwë na Yaakobho. Abhasömi abhaaru nkoghamba bharë igha, Yaakobho ono, no-oora yaarë omoke uwa Yëësu (Maaha mo-ketabho ikya Maariko 6:3). Yaakobho, yaamanyekaini bhököngʼu mo-bheegha abha Yëësu Yërusarëëmu haara. Yaakobho uyö, m-motangati uwa ekanisa iya Yërusarëëmu yaarë (Maaha mo-ketabho ikya Amangʼana agha Abhatomwa 15:13, 21:18; Abhagharatia 1:19, 2:9).

Ritashandighi reno, Yaakobho yaandëkëëyë abheegha abha Yëësu abha Ikiyahudi, bhano bhaanyaraghaini mu-bhyaro ibhyëndë, tërëngë igha nkö-möntö nyabhorebhe handë igha ni-rikomo nyabhorebhe irya abheegha abha Yëësu yaandëkëëyë hë. Yaakobho yaandëkirë ritashandighi iryaye reno, okore atëëbhi Abhakiristo igha, bhaghömërringa hano bhashaashwa, bhabhe na obhongʼaini ubhwa heene, bhono bhukurwa ku-Waryobha. Nkwëghya arë mangʼana agha ubhwamë, öbhötöbhu, na okonaghya örörëmë. Na ikyëndë keno akwëghya, nu-mukumo ughwa amangʼana amaiya. Na ghwiki nkwëghya arë igha, ömöntö nkobharwa arë igha nu-uwa heene ku umukumo ughwaye ghono ghoona amangʼana amaiya. Akamarërrya ko okoghamba igha, ömöntö nkobharwa arë igha nu-uwa heene ko okoghera iya umukumo ughwaye ughwa amangʼana amaiya.

Amakëërërryö

¹Nö-öni Yaakobho omoghorwa uwa Waryobha, na uwa Omonene Yëësu Kiristo nandëkirë ritashandighi reno. M-bëënyu nkökëërya abhantö abha amakabhira ikömi na abhërë, bhano mwanyaraghana ko-kebhara kono! Ritashandighi reno m-bëënyu nkwandekera.

Mushomerwenga hano mwashaashwa

²Abhakumya bharikyane, mushomerwenga hano mwashaashwa ukushaashwa kwokwonswe koora, ³ko bhoora, mmomanyirë igha, ukushaashwa ukwa umukumo ughwënyu, nkoraaghere möghömërri. ⁴Ni-igha möghömërringa okohekera umuhiko ughwako, okore mobhe abhantö abha heene, motakaasuuhwa na engʼana yoyonswe igho hë.

⁵Kasi hano oraanyoore ömöntö mö-bhëënyu muyö, asuuhirwë na obhongʼaini, asaasaame Waryobha, naraamohaane. Ko bhoora Waryobha m-mohaani ko-bhantö bhonswe igho, kora takohamera ömöntö hë. ⁶Kasi hano ömöntö yasaasaama, abhe na umukumo, atakaabha na emetwe imyaru eno arasaasaama Waryobha. Nkoghamba ndë igho ko bhoora igha, okosaasaama ukwa nyametwe imyaru, nkobha körë kya riyengo irya ku-nyansha, reno rikuhirwa ahasë honswe igho na rikama. ⁷Ömöntö uwa eteemo iyö, atakaitegherra igha nanyoora ëkëntö ukurwa ko-Monene Waryobha. ⁸Ömöntö kya nyametwe imyaru uyö, nkohagha arë ko-mangʼana aghaaye ghonswe igho.

⁹Abhakumya abhatöbhu bhano bhakoserwa, bhashomerwenga ko bhoora Waryobha narebhahönönökya. ¹⁰Kasi Umukiristo umwamë, ni-igha ashomerwe hano Waryobha yamuhiinya, ko bhoora narisika kya ëbhëmörë ibhya mwi-sisi. ¹¹Hano iryobha ryatora na emerengaari ighyaryo ghëmërëki, ëmëröngö nkooma ghërë, kora ëbhëmörë nkosangoka bhërë, tëbhëkötëghërya ghwiki hë. Ni-igho kora ömöntö umwamë wonswe, mmo-meremo ighya ubhwamë ubhwaye akukwera.

¹²Nyakara ömöntö ono aköghömërrya hano yaashaashwa, ko bhoora hano araaghömërri ukushaashwa kuyö, Waryobha narimutuha ituho iya öbhöhöru ubhwa amakora ghonswe igho, bhono yaaraghaini okohaana bhonswe igho bhano bhamohanshirë.

¹³Hano ömöntö yashaashwa, atakaghamba igha, “Waryobha we akunshaashya,” ko bhoora Waryobha, takushaashibhwa igha akore amaghogho hë, kora takushaashya ömöntö wowonswe oora hë. ¹⁴Kasi ömöntö nkushaashwa arë, ko kötëghëribhwa na okongʼainwa na oronamba urwaye umwene. ¹⁵Hano oronamba rwakongʼa, nkoreeta rörë ëkëbhë, hano ëkëbhë kyonswe kyakongʼa kereeta uruku.

Motakaingʼainanga kö-bhöntö ubhwa heene ubhwa Waryobha

¹⁶Abhakumya bharikyane abhaghonshe, motakangʼainwa. ¹⁷Ëkëntö ikiiya kyokyonswe keno tokohaanwa, mu-ryobha kikurwa, ku-Waryobha Ömöbhömbi uwa emerengaari. We takwisyöryasyörya kya ikiiriiri hë. ¹⁸Kya bhono we umwene yaatunanga, akatokora tobhe abhaana abhaaye, ko okohetera ko-ngʼana iyaaye iya obhoheene, okore tobhe abhatangi abhaaye, ku-bhyonswe igho bheno yaabhömbirë.

Mwighwenga engʼana iya Waryobha na moghenaghi

¹⁹Abhakumya bharikyane abhaghonshe, munyitegherre bhuuya! Mobhe abhangö abha ukwighwa engʼana, kasi motakaaheetanga okoghamba engʼana, handë ukwangoha okorerra, ²⁰momanye igha, hano ömöntö arërëëyë, takokora amangʼana agha heene ku-Waryobha hë. ²¹Ku bhuyö mwibhashe amangʼana agha ubhunyanku, mohaatere amangʼana amaghogho ghano moonagho. Mwihoote kora mwikërri amangʼana amaiya ghano Waryobha yaatoora mo-senkoro isyënyu, ghayö ngo ghakotora okobhatöörya.

²²Motakaakanya igha, ukwighwa engʼana iya Waryobha ukwene igho, nkwisa körë, keno kikutunwa, no-kokora bhono engʼana ekoraghërrya. ²³Ko bhoora ömöntö wowonswe ono akwitegherra engʼana iya Waryobha, kasi aanga okokora bhono engʼana ikutuna igha akore, uyö nkobha arë kya ömöntö ono akwimaaha mu-kyowa. ²⁴Na hano yaamara ukwimaaha mu-kyowa, nkurwa arë ku-kyowa hayö kamwë igho, ebha kya igho arë. ²⁵Kasi ömöntö ono akwitaaha amaraghërryö ghano ghataana risoro, ghano ghakomokorra öbhötöönööni, abhe ömököri uwa amangʼana ghayö yaaighwa, uyö we araangʼoorwe na Waryobha ko ghaara akokora.

²⁶Hano ömöntö araaimaahe igha na-mangʼana agha idiini akokora, kasi takorebherra örörëmë urwaye hë, uyö nkwingʼaina arë, ubhweseghe ubhwa idiini iyaaye igha aratëghërya Waryobha, m-bwa bhosa. ²⁷Amangʼana amaiya agha idiini ghano ghakushomera Taata uwëëtö Waryobha, ghano akomaaha igha teghaana isoro hë, nö-kötöörrya sentakaana na abhasinö mu-sinyanko isyabho, na ukwibhasha ëbhëbhë ibhya ko-kebhara kono.

Motakaabha na ekeroterro

¹Abhakumya bharikyane, kya bhoora mukukumya Omonene uwëëtö Yëësu Kiristo uwa ubhuhika, motakaabha na ekeroterro ko-bhantö. ²Toghambe igha, ömöntö ono aibhöhirë singibho sinshiiya, na atöörrë ku-kyara ikitwangʼa ikya esahaabhu, aishirë asöhirë mu-nyumba iya esango iyëënyu. Hano akomara ömötöbhu wonswe asohe aibhöhirë amatati. ³Momare mösërëëni uyö aibhöhirë bhuuya, momosooke na mömötëëbhi igha, “Ikara hano ho ahaiya.” Kasi mötëëbhi ömötöbhu oora igha, “Uwe imerra haara,” handë igha, “Ikara hansë ko-maghörö aghaane hano.”

⁴Hano moraakore igho, noraanyoore mwörökëri igha, mmoona ekeroterro, öbhöbhötöri ubhwënyu ubhwa ibhiina, m-boghogho.

⁵Abhakumya bharikyane abhaghonshe, munyitegherre bhuuya. Waryobha yaashaaghora abhatöbhu abha ko-kebhara kono, okore bhabhe abhaamë abha umukumo, kora bharaaghere umwandö ughwa Obhokama bhono yaaraghaini bhano bhamohanshirë. ⁶Kasi bhëënyu, nkosera mörë bhököngʼu abhatöbhu! Kanaa, abhaamë bhayö, te-bho bhakobhabhandërryanga, kora bhabhahira ko abhaahokania abha ibhiina? ⁷Te-bho bhakotoka iriina iriiya irya Yëësu Kiristo reno mokobherekerrwa?

⁸Mo-Maandeko Amahörëëru, amaraghërryö agha Obhokama ubhwa Waryobha gharaghamba igha, “Ohanshe murikyaho, kya bhono wihanshirë uwe umwene.”2:8 Maaha mo-ketabho ikya Amangʼana agha Abharaawi 19:18. Hano moraakore igho, m-buuya oraanyoore mökörrë. ⁹Kasi, hano moraakore ekeroterro ko-bhantö, noraanyoore mökörrë ëkëbhë, na hayö ho amaraghërryö gharaabhashongere igha, m-basarya mörë.

¹⁰Hano ömöntö araaghoote amaraghërryö ghonswe igho, kasi rimwë remoterroke, naraabharwe igha, mosarya uwa ghonswe igho. ¹¹Ko bhoora Waryobha ono yaatöörrë-ho amaraghërryö ghano ghakoghamba igha, “Otakaabha omosooraare,”2:11a Maaha mo-ketabho ikya Ukurishoka 20:14; Eheetoko iya Etoraati 5:18. we uyöuyö yaatoora-ho kora ghano ghakoghamba igha, “Otakaita.”2:11b Maaha mo-ketabho ikya Ukurishoka 20:13; Eheetoko iya Etoraati 5:17. Ku bhuyö nokaanyoora igha törëngë mosooraare hë, kasi waita, mo-bhasarya abha amaraghërryö okobharrwa.

¹²Ku bhuyö, mushumaashenga na okokora amangʼana, momanyirë igha, Waryobha narebhabhotorra ibhiina ko-maraghërryö ghano ghakoreeta öbhötöönööni. ¹³Waryobha takwabhera ömöntö wowonswe ono ataana amaabhë hë. Kasi naryabhera abha amaabhë urusikö urwa okobhabhotorra ibhiina!

Ukukumya na okokora amangʼana amaiya

¹⁴Abhakumya bharikyane, ömöntö ono akoghamba igha aana umukumo, kasi takokora amangʼana amaiya hë, n-hoorohooro kë araanyoore? Obhoheene ni-igha, umukumo ughwaye ghuyö, tëghömötööri hë. ¹⁵Hano oraanyoore umukumya murikyaho wowonswe igho, ataana singibho handë ibhyakorya, ¹⁶na Umukiristo murikyënyu amötëëbhi igha, “Kaghi na omorembe, Waryobha akohaane ribhereera na ibhyakorya,” kasi tamwibhöhëri hë, handë okomohaana ëkëntö ikya okorya hë, ömöntö kya uyö n-kë oraanyoore akörrë? ¹⁷Ni-igho ekobha hano mwabha na umukumo, kasi temokokora amangʼana amaiya hë, hayö nkunyoora örë umukumo ughwënyu ghuyö, ghwamara ukukwa.

¹⁸Kasi ömöntö uwöndë aratora okoghamba igha, “Uwe, oona umukumo na öni na amangʼana amaiya nkokora.” Mbe, öni nendaamötëëbhi igha, “Nnyörökya umukumo ughwaho ghuyö ghotaana amangʼana amaiya, na öni nkwöröki umukumo ughwane ko amangʼana amaiya ghano nkokora.”

¹⁹Nkukumya örë igha, Waryobha nö-ömwë igho. M-maheene ni-igho ërë! M-buuya okokora! Kasi amasambwa ghonswe nkukumya gharë ighoigho, kora nkurighita gharë na okoobhoha!

²⁰Kana, m-mushiimushiimu örë! Nkutuna örë wörökibhwi igha, umukumo ghono ghotaana amangʼana amaiya, teghoona ubhwera hë? ²¹Ndarra Waryobha yaabharëëyë ghuuka Ibhurahimu2:21a Ibhurahimu. Maaha mo-faharaasa. igha m-möntö uwa heene, ko amangʼana amaiya ghaara yaakörrë, ko okokora Isaaka omoona uwaaye abhe ikimwenso ko-hasë aha ukumwensera ku-Waryobha!2:21b Maaha mo-ketabho ikya Okosemoka 22:1-19.²²Kasi tokomaaha igha umukumo ughwa Ibhurahimu, ngwaaraini hamwë na ghano yaakoranga? Ku bhuyö umukumo ughwaye, ngwaaimërëëyë ko mangʼana ghaara yaakoranga.

²³Ghayö ngaakörrwë, kora ghakandekwa mo-Maandeko Amahörëëru igha, “Ibhurahimu yaakumiri Waryobha, kiyö nkyo kyaaghërrë Waryobha akamobhara igha wa heene.”2:23 Maaha mo-ketabho ikya Okosemoka 15:6. Akabherekerwa igha, m-mosaani uwa Waryobha.

²⁴Mbe, moramaaha igha Waryobha nkobharra arë ömöntö igha n-wa heene, ko okokora amangʼana amaiya, kasi tërëngë igha nu-mukumo ughwene igho, ghono ghotaana amangʼana amaiya hë.

²⁵Kora Rahaabhu omoraaya oora, wonswe Waryobha yaamobharëëyë igha m-möntö uwa heene ko amangʼana amaiya ghano yaakörrë. Akasërëënia abhashamishya bhaara, akabhatöörya bhakakyora ko okohetera enshera iyëndë.2:25 Maaha mo-ketabho ikya Yoshua 2:1-21, 6:22-25.

²⁶Ku bhuyö hano oraanyoore ömöntö aana umukumo, kasi takokora amangʼana amaiya hë, umukumo ughwaye ghuyö, ghwakwa, ghwabha kya ikihundughu keno ketaana umwika.

Okonaghya örörëmë

¹Bhëënyu abhakumya bharikyane, abhëëghya abha engʼana iya Waryobha bhatakaaruha mö-bhëënyu. Ko bhoora momanyirë igha, bhëëtö abhëëghya abha engʼana iya Waryobha nturiitaahwa bhököngʼu na Waryobha okokera abhandë bhonswe igho. ²Obhoheene ni-igha, bhëëtö bhonswe igho, hare kaaru ukunyoora toraituuratuura ko bhoghambi ubhwëtö. Hano oraanyoore aaho ömöntö wowonswe ono atakwituuratuura ko bhoghambi ubhwaye, uyö m-möntö uwa heene, aratora okorebherra ömöbhërë ughwaye ghwonswe igho.

³Momaahe mbe igha, nkotoora törë ikyoma ekeke keno kikumbirwë mu-minywa ighya sefaraasi, okore sitwighwere. Ku bhuyö, nkusyörya törë ëmëbhërë ighyasyo, situhira ahasë honswe igho hano tukutuna. ⁴M-maheene, tigha mbarëngëri engʼana iyëndë. Iryato ryonswe, nokaanyoora igha ni-nene bhököngʼu, na nköghëndibhwa rërë na rikama rirörö, kasi nkusyöribhwa rërë na insika enke igho, ukughya ahasë hohonswe igho hano ömöghöbhya akutuna abhate.⁵Mbe, örörëmë urwa ömöntö rwonswe ni-igho rörë, n-këntö ekeke kö-möbhërë ughwa ömöntö, kasi nkoghera rörë ömöntö aihasha bhököngʼu. Maaha kya bhono omorro omoke ghokokora öbhöhë ghusikya risisi rinene! ⁶Na örörëmë urwa ömöntö rwonswe n-kya omorro, ni-igho rwishööyë obhoghogho bhonswe igho, na nkö-möbhërë rörë. Roratora koromaania obhoghogho kö-möntö, nkusikya rörë öbhöhöru ubhwëtö kya mo-morro ghotakurima.

⁷Abhantö bharatora ukutugha sityënyi syonswe igho, ibhinyönyi, sinshoka, sinswë, na bhyonswe igho bheno bhërëngë mo-manshë. ⁸Kasi taaho ömöntö ono akotora ukutugha örörëmë hë, ndo-ghogho, terokotongwa hë, ndoona öbhösöngö ubhwa ukwita.

⁹Mbe, örörëmë nkoghera rörë tukumya Taata Waryobha Omonene uwëëtö. Örörëmë ruyöruyö, ndwo rokoghera toraihiima abhantö bhano bhaabhombwa na Waryobha ku ituubho iyaaye. ¹⁰Mu-munywa ghuyöghuyö, mo ghakurwa amangʼana agha ökötöönia, na agha ukwihiima abhantö. Abhakumya bharikyane, ghayö teghaingʼarëëyi ghabhe igho hë. ¹¹Terooho orobheere urwa ekeseekaani rono rukurwa amanshë amaiya na agha ömöönyö hë! ¹²Abhakumya bharikyane, ömötë ghono ghokobherekerwa igha umutiini, ghoratora ukwama sehagho isya ëmëzëituuni? Handë omozabhibhu, ngotora ukwama sehagho isya umutiini? Orobheere urwa ekeseekaani ikya amanshë agha ömöönyö, terokotora ukurwa amanshë amaiya hë.

Obhongʼaini ubhwa mu-ryobha

¹³Mbe, nyoore aaho ömöntö mö-bhëënyu ono aana obhongʼaini, ono amanyirë amangʼana, ömöntö uyö ööröki abhantö okomanya ukwaye na obhongʼaini ubhwaye ko okokora amangʼana amaiya. Aihoote ubhwihöötu bhono bhukwörökya abhantö obhongʼaini bhono aanabho.

¹⁴Kasi hano oraanyoore igha moona orongʼeera, öbhörrö na ekeroterro mo-senkoro isyënyu, na eno moraikumya igha m-bangʼaini mörë, bhuyö m-borongo. ¹⁵Obhongʼaini ubhwa eteemo iyö, m-boghogho, tibhukurwa ku-Waryobha hë, kasi nu-bhwa kinyabhantö, ubhwa ko-kebhara kono, bhono bhukurwera ko-Ghosambwa. ¹⁶Ahasë honswe igho hano orongʼeera rörë bheena ekeroterro, hayö ho ribheeha na amangʼana amaghogho aghandë ghonswe igho gharëngë.

¹⁷Kasi, obhongʼaini bhono bhukurwa ku-Waryobha, m-buuya, mboona omorembe, na obhohaabhu, nkwitegherra bhörë bhuuya amangʼana agha abhantö. Obhongʼaini bhuyö, nkokora bhörë amangʼana amaiya, kora mboona ikyabhera, tebhoona ekeroterro, handë ubhwahöri ubhwa abhantö, handë ubhwihunaania. ¹⁸Hano abhantö abha omorembe bhaabhusura imbusiro iya omorembe, omanye igha nö-bhöntö ubhwa heene bhareghesa.

Mwighwere Waryobha

¹Momanyirë ubhutindi na riihë bheno bhërëngë mö-bhëënyu muyö hano bhikurwera? Nkurwera bhërë ko-ronamba urwa mo-nkoro iya ömöntö, rono rukwitana na amaitegherro agha ömöntö uyö. ²Hano mwabha na oronamba urwa ëkëntö nyabhorebhe, moratora ukwita hano kyabhabhora. Morabha na orongʼeera kö-bhëntö ibhya abhandë, na hano mwabhorwa enshera iya ukubhinyoora, nkobheehana mörë, mwitana. Ëbhëntö bheno mukutuna timukubhinyoora hë, ko bhoora igha, temokobhesabha ku-Waryobha hë! ³Kora hano mwasabha, timukubhinyoora hë, ko bhoora no-ronamba urwënyu ndwo rokoghera morabhesabha.

⁴Bhëënyu tëmörëngë abhantö abha heene ku-Waryobha hë, n-kya abhakari abhasooraare mörë. Kasi temomanyirë igha hano ömöntö yaghootana obhosaani na ekebhara, nkobha arë umubhisa uwa Waryobha? Ömöntö wowonswe ono araatune okoghootana obhosaani na ekebhara, uyö nkobha arë umubhisa uwa Waryobha. ⁵Kasi nkokanya mörë igha, Amaandeko Amahörëëru m-bosa ghakoghamba igha, Umwika ono Waryobha yaatohaana araighwa öbhörrö bhököngʼu?4:5 Umwika ono Waryobha yaatohaana araighwa öbhörrö bhököngʼu. Ensonga iyaamo iyëndë ni-igha, Waryobha araighomba bhököngʼu Umwika ono yaatoha.⁶Hamwë na ghayö ghonswe igho, kasi nkutwëngërya arë örööbhö, nkyo kekoghera Amaandeko Amahörëëru gharaghamba igha,

“Waryobha nkwanga arë abhantö bhano bhakwiheema,

kasi örööbhö urwaye na-bhahaabhu akohaana.”4:6 Maaha mo-ketabho ikya Sengero 3:34.

⁷Ku bhuyö, mwighwerenga Waryobha. Kasi mwangenga Oghosambwa4:7 Oghosambwa. Maaha mo-faharaasa. na amangʼana aghaako, ho ghoraabhangʼosenga. ⁸Musuntarrenga Waryobha, ho wonswe araabhasuntarre. Bhëënyu abha ëbhëbhë, mutighe ëbhëbhë ibhyënyu, mokore amangʼana amaiya, bhëënyu bhano motashirë eno na eno, momosoorane ko senkoro isyënyu syonswe igho. ⁹Mwighwe öbhörrö, mukuure, mosenkemerre. Okoseka ukwënyu, kusyöribhwi kobhe ikikuuro, na ukushomerwa ukwënyu, kobhe okobhaabhayera ukwënyu. ¹⁰Ömöntö ono akwisuuhya ko-monene Waryobha, nkömönënëhya arë.

Motakaaghambananga bhoghogho

¹¹Abhakumya bharikyane, motakaashërëngyanga amangʼana agha bharikyënyu. Ko bhoora ömöntö wowonswe ono akushërëngya amangʼana agha murikyaye, handë okomobhotorra ikiina, uyö nkunyoora arë asërrë amaraghërryö agha Waryobha. Hano oraasere amaraghërryö, uwe tokoghasooka hë, kasi nkunyoora örë wikörrë umwahokania uwa amaraghërryö. ¹²Waryobha umwene, we akotoora-ho amaraghërryö, na we umwahokania uwaaho. We akotora ökötöörya ömöntö na ukumusikya. Kasi uwe nu-uwe wë ono okobhotorra ikiina murikyaho?

Motakaihashanga

¹³Bhoono bhëënyu bhano mokoghamba igha, “Reero handë isho, nturighya mu-mughi nyabhorebhe, twikare iyö omooka umughima torakora ibhyashara, tunyoore ehoorohooro.” ¹⁴Amakëëyë teghamanyëëywë hë! Kasi nkokanya mörë igha öbhöhöru ubhwënyu n-këntö? Sinsikö isya ömöntö sengʼana ekesaanyi ikya ensaaghi! ¹⁵Mutighenga okoghamba igho, kasi moghambenga igha, “Hano Omonene Waryobha araahanshe igha tobhe abhahöru, ntoraakore ëkëntö nyabhorebhe.” ¹⁶Kasi bhoono bhëënyu, moraighegha igha moonabhyo kora moraiheema. Ukwiheema kuyö n-koghogho. ¹⁷Ku bhuyö ni-igha, ömöntö ono amanyirë okokora amangʼana amaiya kasi takoghakora hë, hayö në-këbhë akokora.

Yaakobho arakaania abhaamë abhamangarru

¹Bhoono bhëënyu abhaamë, munyitegherre bhuuya! Mukuure, mobhaabhayere bhököngʼu, ko okoghera iya inyanko enene eno murinyoora. ²Ubhwamë ubhwënyu bhwaghunda, na singibho isyënyu syareebhwa na rikonde. ³Esahaabhu iyëënyu na seehera isyënyu, seena ikutu, na ikutu iyö, nerebha ekemanyërryö ikiiya kö-bhëënyu bhono mokosarya ëbhëntö ibhya ubhwamë ubhwënyu, ku bhuyö Waryobha naraabhashibhi bhörrö kya hano omorro ghwasikya ëkëntö. Hayö nkwikomanërya mörë emongo ku-sinsikö seno isya umuhiko.

⁴Mwitegherre mbatëëbhi, mwaanga okohaka ehoorohooro ko abhaköri abhëënyu abha emeremo bhano bhaabhaghësëëyë ibhyakorya kö-mëghöndö ighyënyu. Ehoorohooro iyö, erabhakorra ko-Monene Waryobha uwa obhotoro bhwonswe igho! ⁵Mwikaayë morashomerwa na ubhwamë ubhwënyu ubhwaru bhono moonabho ko-kebhara kono, ko okokora igho, mwisëëmëri ku-rusikö urwa okobhotorrwa ikiina kya itugho ënöru iya okoghooghwa. ⁶Möbhötööyë ibhiina na ukwita abhantö abha heene bhano bhatakwitanga amangʼana aghëënyu.

Möghömërri Omonene Yëësu nkuusha arë

⁷Ku bhuyö abhakumya bharikyane, möghömërringa okohekera enkaagha eno Omonene Yëësu ariisha. Bhëënyu temokomaaha igha ömörëmi nkoghanyërrya arë ibhyakorya ibhyaye kö-möghöndö, takobhehoobherra hë? Kasi nkoghanya arë ömöghöndö ughwaye ghöhëësi ibhyakorya ibhiiya. Ku bhuyö nköghömërrya arë okohekera hano ömöghöndö ughwaye ghurinyoora imbura iya mbere na iya omooka.

⁸Ku bhuyö na bhëënyu bhonswe möghömërringa, na okoterema mo-senkoro isyënyu, ko bhoora igha, Omonene haangʼë arë akyore. ⁹Abhakumya bharikyane, motakaatemananga amasoro motakaasha okobhotorwa ikiina. Motamaaha! Umwahokania ono arebhotorra abhantö bhonswe igho ibhiina ibhyabho, haangʼë arë akyore.

¹⁰Abhakumya bharikyane, momaahere ko-bharööti bhano bhaaghambanga ku ubhwera ubhwa Omonene Waryobha. Bhayö bhabhe ëkërëngyö ikya ököghömërrya inyaanyi. ¹¹Momaahe mbe, abhantö bhano tukwitegherra igha bhangʼoorwa m-baara bhaaghömërrya inyanko. Mwaighwa amangʼana agha ököghömërrya ukwa Ayubhu, na ghwiki mmomanyirë bhono Omonene Waryobha yaamökörëëyë amaiya ku-muhiko.5:11 Maaha mo-ketabho ikya Ayubhu 42:10-13. Ghayö ghonswe igho nkwörökya gharë igha, Omonene Waryobha wa heene naana amaabhë.

¹²Abhakumya bharikyane, engʼana enene okokera ghonswe igho, ni-igha motakaatyananga ëkëntö kyokyonswe keera, nkekaabha ekebhara handë mu-ryobha. Kasi hano mwikërëëyi engʼana, mughikërri këmwë. Na hano mwangirë engʼana, mughyanga këmwë. Moghambenga obhoheene, hano motakörrë igho, mobhotorrwa ikiina.

Mosabhenga Waryobha eno moona umukumo

¹³Hano oraanyoore ömöntö aana inyanko mö-bhëënyu muyö, ni-igha asaasaame Waryobha. Na hano oraanyoore ömöntö ashömëëywë mö-bhëënyu muyö, ni-igha arëëti amarëëtyö agha ukukumya Waryobha.

¹⁴Hano oraanyoore ömöntö aröörrë, ömörööyë uyö ni-igha arekerre amangʼana abhaghaaka abhatangati abha ekanisa, okore bhaashe bhamohake amaghuta na okomosabhera ku iriina irya Omonene Yëësu. ¹⁵Hano abhantö bhayö bharaamosabhere ku umukumo, naraahwene. Omonene Yëësu naraamöghörröki, na hano oraanyoore akörrë ëbhëbhë, naraabherwe. ¹⁶Ku bhuyö, mohongorranenga ëbhëbhë ibhyënyu na okosabherana ku-Waryobha, okore muhwënibhwinga amarööyë aghëënyu. Okosabha ukwa ömöntö uwa heene, nkoona singuru sinsharu isya okokora amangʼana amarito.

¹⁷Ömörööti Ëriya, m-möntö yaarë kya bhëëtö. Ömörööti uyö, akakora omotono ughwa okasaasaama igha imbura etakaatwa ku-kyaro ikya Isiraëri. Imbura ekamara imyoka etatö na imyëri esansabha etatöönyirë ku-kyaro kiyö.5:17 Maaha mo-ketabho ikya 1 Abhakama 17:1.¹⁸Mbe, ghwiki akasaasaama Waryobha igha imbura etwe. Imbura ekatwa, abhantö bhakanyoora ibhyakorya.5:18 Maaha mo-ketabho ikya 1 Abhakama 18:42-45.

¹⁹Abhakumya bharikyane, hano oraanyoore ömöntö mö-bhëënyu muyö atëëyirë ko amangʼana agha obhoheene ubhwa Waryobha, ömöntö amukyöri, ²⁰amanye igha, noraanyoore akyörri ömöntö uwa ëbhëbhë ukurwa mö-bhëbhë ibhyaye. Noraanyoore ahönëri ömöntö uyö uruku, na ömöntö uyö, naraabherwe ëbhëbhë ibhyaru bheno aanabhyo.