Abhaëfësö

Ritashandighi irya Pauro

ko-Bhaëfësö

Obhotangati

Ritashandighi irya Abhaëfësö reno, ndyaandëkirwë enkaagha ëmwë na ritashandighi irya Abhakorosaai. Pauro we yaandëkirë ritashandighi reno. Pauro aratötëëbhya igha, ritashandighi reno mmo-kebhohe yaaryandëkëëyë (Maaha mo-ketabho ikya Abhaëfësö 3:1, 4:1, 6:20). Ko bhoora Tikiiko yaarenga na oroghendo urwa ukughya iyö, ku bhuyö Pauro akamotomerania aghi na ritashandighi reno (Maaha Abhaëfësö 6:22).

Umughi ughwa Ëfësö m-monene ghwaarë ko-mokowa ughwa Asia Enke ko-nkaagha iya öbhötöngi ubhwa Abharuumi. Umughi ughwa Ëfësö, ngwaamanyekaini bhököngʼu ko okoghera iya risengerro irya risambwa irya ekekari irya Abhayunaani. Risambwa riyö ryaabherekerwanga igha, Aritëmi (Maaha mo-ketabho ikya Amangʼana agha Abhatomwa 19:23-31). Ekanisa iya Ëfësö, yaarë na umukumo omonene hano yaasëmökirë. Kasi ekahika-ho enkaagha, ekabhorwa singuru isya umukumo ughwayo ughwa mbere (Maaha mo-ketabho ikya Okohonyora 2:1-7).

Pauro nkoraghërrya arë bhuuya, kya igho Waryobha yaashaaghora abhantö na okobhatöörya bharwe mö-bhëbhë ibhyabho. Araghamba igha, ekanisa, n-kya ömöbhërë ughwa ömöntö, na Yëësu Kiristo we omotwe ughwa ömöbhërë ghuyö. Ghwiki nkoghamba arë igha, ekanisa nituubhaini kya inyumba, na Yëësu Kiristo n-kya reghena irya mo-koona irya umusingi (Maaha Abhaëfësö 1–3). Pauro nkwörökërrya arë bhuuya enshera iya Umukiristo ukwikara mo-bhantö kikiristo (Maaha Abhaëfësö 4–6).

Amakëërërryö

¹Nö-öni Pauro omotomwa uwa Kiristo Yëësu ku righonshe irya Waryobha. Ritashandighi reno, m-bëënyu nkwandekera abhantö abha Waryobha bhano mököghëndërrya ukukumya Kiristo Yëësu Ëfësö hayö, ko okobha na öbhömwë nawe. ²Örööbhö na omorembe ukurwa ku-Waryobha Taata uwëëtö, na ko-Monene uwëëtö Yëësu Kiristo, bhebhe hamwë na bhëënyu.

Waryobha atökörëëyë amangʼana amaiya okohetera ku-Yëësu Kiristo

³Bhamurë, ni-igha tukumi Waryobha uwa Omonene uwëëtö Yëësu Kiristo, na we Suwaabho Omonene uwëëtö uyö. Waryobha yaatokorra amangʼana amaiya agha obhongʼoore bhwonswe igho ubhwa ahasë hano hatakomaahwa, ko okohetera kö-bhömwë ubhwëtö na Yëësu Kiristo. ⁴Keno Waryobha yaakörrë, nu-kutwahora tobhe abhantö abhaaye ko okohetera kö-bhömwë ubhwëtö na Yëësu Kiristo. Yaakörrë igho, kora ataraabhomba ëbhëntö bhyonswe igho ibhya ko-kebhara kono. Waryobha yaatwahora okore tobhe abhahörëëru abhaaye bhano totaana risoro ryoryonswe reera. Ko okoghera iya righonshe iryaye, ⁵yaasëëmëri ukurwa kare igha atokore tobhe abhaana abhaaye. Yaakörrë igho, ko okohetera ko keno Yëësu Kiristo yaakörrë, ni-igho yaatunirë igha akore, na engʼana iyö ekamushomera. ⁶Ku bhuyö ni-igha tumukumi, ko okoghera iya örööbhö urwaye urwa ököröghöörya, rono yaatohaayë bhosa igho okohetera ku-Kiristo Yëësu ono Waryobha ahanshirë.

⁷Ko okohetera amaanyinga agha Kiristo Yëësu, Waryobha yatutungurya, igha, atwabhëëyë ëbhëbhë ibhyëtö okorengʼaana na ubhwaru ubhwa örööbhö urwaye. ⁸Örööbhö n-dwaru bhököngʼu atohaayë, kora aghërrë tobhe na obhongʼaini bhwonswe igho, na okomanya bhuuya amangʼana. ⁹Atöhönyörrëëyë ësëëmyö iyaaye eno yaatunanga aghehekerani okohetera ku-Yëësu Kiristo, ko bhoora yaashömëëywë okokora igho. ¹⁰Ësëëmyö iyaaye ni-igha hano enkaagha inshiiya irihika, naretoora hamwë ëbhëntö bhyonswe igho, ibhya mu-ryobha na ibhya ko-kebhara kono, kora akore Kiristo Yëësu abhe omotangati uwa ëbhëntö bhiyö.

¹¹Ghwiki Waryobha yaatushaaghööyë bhëëtö Abhayahudi tobhe abhantö abhaaye, ko okotohaana öbhömwë na Yëësu Kiristo. Yaatushaaghööyë ko bhoora igha, iyö në-sëëmyö iyaaye yaarë ukurwa kare. Akakora ëbhëntö bhyonswe igho bhebhe kya bhono akutuna. ¹²Akakora igho okore bhëëtö Abhayahudi bhano törëngë abha mbere ukwesegha Yëësu Kiristo, tukumi Waryobha na ökömötöönia.

¹³Hano na bhëënyu bhonswe mwaaighuurë engʼana iya obhoheene iya Amangʼana Amaiya agha bhono Waryobha akobhahönia, mokaikërrya. Waryobha akabhatoorra-ko umuhuri ughwaye. Eharama iyö, nu-Mwika Ömöhörëëru ono Waryobha yaabhahaana kya bhoora yaaraghaini igha, nakaabhahaayë. Yaakörrë igho, ukwörökya igha, bhëënyu bhonswe m-bantö abhaaye mörë. ¹⁴Umwika Ömöhörëëru uyö, n-kya ekebhete ikya Waryobha kö-bhëëtö igha, Waryobha naretohaana ëbhëntö ibhyëndë bhyonswe igho, bheno yaaraghaini igha, aretohaana. Umwika Ömöhörëëru uyö, we ono Waryobha yaatoora-ho okohekera hano aritutungurya bhëëtö abhantö abhaaye. Ku bhuyö ni-igha tumukumi ku ubhuhika ubhwaye.

Pauro arasabhera Abhakiristo abha Ëfësö

¹⁵Nkukumya ndë Waryobha ko okoghera iya amangʼana ghonswe igho ghano yaatokorra. Kerenga naighwa kya bhono mukukumya Omonene Yëësu, na bhono mohanshirë abhantö abha Waryobha bhonswe igho, ¹⁶kora tenakatighirë ukukumya Waryobha ko okoghera iya bhëënyu. Hano nasaasaama Waryobha, nkobhasabhera ndë. ¹⁷Nkosaasaama ndë Waryobha uwa Omonene uwëëtö Yëësu Kiristo, we Taata uwëëtö uwa ubhuhika obhonene, igha abhahaane obhongʼaini ubhwa mu-ryobha, na aihonyore kö-bhëënyu, okore momomanyërri bhuuya. ¹⁸Ghwiki nkobhasabhera ndë igha, abhatöörri momanye obhoheene, okore momanye ubhweseghe bhono yaaraghaini kö-bhëënyu hano yaabhabhërëkëëyë. Momanye ubhwaru ubhwa obhongʼoore ubhwaye bhono yaaraghaini igha akaahaayë abhantö abhaaye. ¹⁹Nkosaasaama ndë igha, abhahaane obhotoro ubhwaye bhono bhokokera ëbhëntö bhyonswe igho, kö-bhëëtö bhano tukukumya Kiristo Yëësu. Obhotoro bhuyö mbwo bhökötötöörrya ukumukumya. Obhotoro bhuyö m-boora bhoora ubhwa singuru sinsharu seera, ²⁰seno Waryobha yaaryökëëyi Kiristo Yëësu ukurwa mo-bhaku, akamwikarya bhoryo ubhwaye, ahasë hano hatakomaahwa.1:20 Maaha mo-ketabho ikya Zabhuri 110:1.²¹Kiristo uyö, nkotonga arë abhatöngi bhonswe igho kighörö iyö, abha ubhwera, abha singuru, abhanene na ibhyeo bhonswe igho bheno bhemanyekaini te-kokebhara kono aheene igho hë, kasi kora na ko-kebhara keno kiriisha. ²²Waryobha akatoora ëbhëntö bhyonswe igho mu-bhwera ubhwa Yëësu Kiristo. Akamokora abhe we omotwe ughwa ekanisa iyö, yo Abhakiristo.1:22 Maaha mo-ketabho ikya Zabhuri 8:6; Mataayo 28:18; Abhaëfësö 4:15; Abhakorosaai 1:18.²³Ekanisa n-kya ömöbhërë ughwa Kiristo, netahatëëyë öbhömënyi ubhwa Yëësu Kiristo. Yëësu Kiristo uyö, we omohekerano ughwa öbhöhöru ubhwa ëbhëntö bhyonswe igho.1:23 Maaha mo-ketabho ikya Abharuumi 12:5; 1 Abhakörintö 12:27; Abhaëfësö 4:10; Abhakorosaai 1:19.

Waryobha nkötötöörya arë okohetera kö örööbhö urwaye

¹Bhëënyu n-kya abhaku mwaarë, ko bhoora motaighweranga Waryobha, mokaghëndërrya okokora ëbhëbhë. ²Enkaagha iyö, mwaakoranga amangʼana agha ko-kebhara kono. Kora mwaasorananga omotangati omoghogho uyö, Omonene uwa singuru isya ighörö isya amasambwa. Uyö we bhoono igho akokora emeremo mo-bhantö bhano bhatakwighwera Waryobha.2:2 Maaha mo-ketabho ikya Abhaëfësö 6:12; Abhakorosaai 1:13; Tiito 3:3.³Bhëëtö bhonswe igho Abhayahudi na bhëënyu Abhakyaro, tetwaighweranga Waryobha hë. Hano waanyöörrë totaraakumya Yëësu Kiristo, ntwaarë kya bhayö bhatakwighwera Waryobha. Twaakoranga amangʼana ghano ëmëbhërë ighyëtö na sehakëri isyëtö bhyaatunanga tokore. Ntwaarë kya bhono abhantö abhandë bharëngë ko-kebhara kono. Ntwaaibhööywë na esemoko iya obhoghogho. Twaarërërrëëywë na Waryobha, kora nakaatushibhiri.

⁴Kasi bhoono ko bhoora Waryobha naana amaabhë bhököngʼu, natohanshirë ku righonshe iryaye reno retaana umuhiko. ⁵Ntwaarë kya abhaku ko okoghera ukwa obhosarya ubhwëtö, akatohaana öbhöhöru obhohya kya bhono yaahaana Yëësu Kiristo. Amaabhë agha Waryobha, ngo ghaaghërrë akabhatöörya.2:5 Maaha mo-ketabho ikya Ruuka 15:24, 15:32; Abharuumi 6:4, 6:13; Abhaëfësö 5:14.⁶Waryobha akaturyökya ukurwa mo-bhaku2:6 Akaturyökya ukurwa mo-bhaku. Tu-uruku urwa ömöbhërë hë, kasi nu-urwa ukwanga okomanya Waryobha. hamwë na Kiristo Yëësu, akatwikarya totonge hamwë na Kiristo ko-hasë hano hatakomaahwa. Yaakörrë igho ko okotohaana öbhömwë na Kiristo Yëësu. ⁷Waryobha yaakörrë ghayö, okore aashe ukwörökya ekebhara ubhwamë ubhwa örööbhö urwaye, rono rotakorengʼaanibhwa na kyokyonswe keera ko amaabhë aghaaye, kö-bhëëtö bhano toona öbhömwë na Kiristo Yëësu. ⁸N-ko okoghera iya örööbhö urwa amaabhë aghaaye, nkyo kyaaghërrë Akabhatöörya ku umukumo ghono moonagho ku-Yëësu Kiristo. Tiyabhatöörya ko okoghera igha mwaamokorra ëkëntö kyokyonswe keera, ti-igho hë, kasi iyö ni-tuho eno Waryobha yaabhahaana. ⁹Tiyabhatöörya ko okoghera iya ëkëntö ikiiya kyokyonswe keera mwaakora hë, ku bhuyö ömöntö wowonswe oora atakaihasha. ¹⁰Ko bhoora igha Waryobha yaatobhomba, na kö bhömwë ubhwëtö na Kiristo Yëësu, yaatobhomba bhohya, okore eteemo iyëëtö ebhe iya okokora amangʼana amaiya ghano yaatösëëmëëyi ukurwa kare igha toghakore.

Waryobha atökörrë Abhayahudi na Abhakyaro tobhe ëkëntö këmwë okohetera ku-Kiristo Yëësu

¹¹Mbe, ku bhuyö muhiite kya igho mwaarë kare. Esemoko iyëënyu, ti-iya abhantö abha Waryobha yaarë hë, kasi ni-iya Abhakyaro yaarë. Abhayahudi mbaabhabherekeranga igha “Abharëësya.” Kasi esaaro, nö-möntö akoghekora kö-möbhërë ughwa ömöntö. ¹²Muhiite igha enkaagha iyö, temwamanyirë Yëësu Kiristo hë. Temwagherrwanga hamwë na Abhaisiraëri, abhantö abha Waryobha. M-baghëni mwaarë ko-maraghanio agha imuuma2:12 Imuuma. Maaha mo-faharaasa. ghano Waryobha yaaraghaini Abhaisiraëri. Temwaarë na ubhweseghe bhwobhwonswe bhoora hë, mwaamënyirë ko-kebhara kono kya abhantö bhano bhatamanyirë Waryobha. ¹³Kasi bhoono ko okobha na öbhömwë na Kiristo Yëësu, bhëënyu bhano mwaarë hare na Waryobha kare hayö, bhoono Waryobha abharëëtirë haangʼë nawe, okohetera ukweteka ukwa amaanyinga agha Kiristo Yëësu hano yaakuurë. ¹⁴Ko bhoora Yëësu Kiristo uyö yaatohaana omorembe, akatokora bhëëtö bhano twaarë amakomo abhërë, Abhakyaro na Abhayahudi, tobhe ikomo imwë. Yaakörrë igho ku ukuruusya-ho ekerebherro keno kyaare-ho na okotemora urughito urwa ubhubhisa rono rwaatwahokanianga. ¹⁵Ghwiki akaruusya-ho amaraghërryö, imighiro ighya Waryobha na seteemo syonswe igho isya amaraghërryö agha Mosa. Akakora bhohya amakomo abhërë ghayö agha abhantö, Abhayahudi na Abhakyaro, bhakabha ëkëntö këmwë, ku bhuyö akabhareetera omorembe. ¹⁶Yëësu Kiristo yaatoora hamwë amakomo abhërë ghayö, ghakabha rikomo imwë ko okohanekwa ukwaye ko-mosarabha. Akaghaighwerrania ghonswe igho abhërë ku-Waryobha, akasikya ubhubhisa bhono bhwaare-ho ko-Bhayahudi na Abhakyaro.

¹⁷Mbe, Kiristo akaasha, akaraareka amangʼana agha omorembe kö-bhëënyu bhano mwaarë hare na Waryobha, na ko bhano bhaarë haangʼë na Waryobha. ¹⁸Ko bhoora Yëësu Kiristo yaahanëkirwë ko-mosarabha, okore bhëëtö bhonswe igho, Abhakyaro na Abhayahudi tunyöörrë enshera iya ukusuntarra Waryobha Taata uwëëtö, okohetera ku-Mwika Ömöhörëëru ömwë uyöuyö.

¹⁹Mbe, ukurwa bhoono igho, bhëënyu tërëngë igha, m-baghëni mörë, handë igha abhangʼaanyëri abha ku-kyaro ikyëndë, kasi bhëënyu ni-komo imwë mörë na abhantö abha Waryobha. Bhoono bhëënyu na abhantö abha mu-nyumba iya Waryobha mörë. ²⁰Bhëënyu mobhaayë kya inyumba eno yaahaghaashwa ku-musingi, na umusingi ghuyö, na-bhatomwa na abharööti, na Kiristo Yëësu umwene n-kya reghena irya mo-koona iya umusingi ghuyö. ²¹Ko okobha na öbhömwë nawe, inyumba yonswe igho nkoghootana ërë bhuuya eneneha ebha inyumba ëhörëëru ko okoghera iya Omonene.2:21 Maaha mo-ketabho ikya Abhakorosaai 2:19.²²Ko bhoora mwabha na öbhömwë na Yëësu Kiristo, nkokomwa mörë hamwë na Abhakiristo abhandë, okore mobhe inyumba eno Waryobha araamenye-mo ko okohetera Umwika Ömöhörëëru uwaaye.

Waryobha arahira Pauro okoraareka Amangʼana Amaiya ko-Bhakyaro

¹Ko okoghera iya amangʼana ghayö ngambirë, öni Pauro nëmböhirwë ko okokorra Kiristo Yëësu emeremo kö-bhëënyu Abhakyaro. Nkobhasabhera ndë ku-Waryobha. ²Nemanyirë igha, mwaighwa emeremo gheno Waryobha yaangʼaana kö örööbhö urwaye urwa amaabhë aghaaye, okore mbaraarekere bhëënyu Abhakyaro engʼana iyaaye. ³Waryobha yaanhönyörrëëyë ësëëmyö iyaaye, kya bhuyö mbandëkëëyë hake igho. ⁴Hano moraasome amangʼana ghayö mbandëkëëyë, moratora okomanyërrya kya bhono öni manyirë ësëëmyö iyö, iya amangʼana agha Yëësu Kiristo. ⁵Ësëëmyö iyö, tiyaarenga eraahonyorwa ko-rekora ryoryonswe reera hë, kasi bhoono Waryobha aghëhönyööyë ko-bhantö bhano yaahora igha bhabhe abhatomwa abhaaye, na ko abharööti abhaaye. Abhahönyörrëëyë okohetera Umwika Ömöhörëëru. ⁶Ësëëmyö iya Waryobha ni-igha, umwandö n-gömwë Abhakyaro bhakosanga na Abhayahudi. Abhantö bhonswe igho bhano bhakukumya Amangʼana Amaiya, bhabhaayë kya ömöbhërë öghömwë, kora nkosanga bharë riraghano reerareera, reno Waryobha yaakörrë okohetera ku-Kiristo Yëësu.

⁷Bhoono öni emeremo ighyane, no-koraareka Amangʼana Amaiya kö örööbhö urwa amaabhë agha Waryobha ghano yaankörëëyë ko obhotoro ubhwaye. ⁸Öni m-möntö moke ndë3:8a M-möntö moke ndë. To-omoke uwa ukwebhorwa hë, kasi no-moke ku ubhwera hano yairengʼaania na abhantö abhandë abha Waryobha. ko-bhantö abhahörëëru bhonswe igho abha Waryobha, kasi naahaaywë örööbhö urwa amaabhë aghaaye, okore ndaarekere Abhakyaro ubhwamë ubhwa Yëësu Kiristo.3:8b Ubhwamë ubhwa Yëësu Kiristo nu-bhwamë bhwa Amangʼana Amaiya agha Yëësu Kiristo, ko bhoora taaho ömöntö ono akotora okoghamanyërrya ghonswe igho. Ubhwamë bhuyö, tebhoona ekerengere hë. N-këköngʼu okomanyërribhwa na abhantö. ⁹Ghwiki angʼaayë emeremo ighya okoraghërrya bhuuya abhantö bhonswe igho, okore bhamanye ësëëmyö eno yaarenga ibhisirwë ukurwa okosemoka na Waryobha umwene ömöbhömbi uwa ëbhëntö bhyonswe igho. ¹⁰Yaakörrë igho, okore okohetera mo-kanisa ko bhoono igho, obhongʼaini ubhwa Waryobha ubhwa seteemo nsharu, bhomanywe na abhatöngi na abha ubhwera bhano bhakotonga ahasë hano hatakomaahwa. ¹¹Waryobha yaakörrë igho, ko okoghera iya ësëëmyö iyaaye eno yaatunanga ukurwa okosemoka ehekerane ko-keera Omonene uwëëtö Kiristo Yëësu yaakörrë. ¹²Mbe, ko bhoora igha ntoona öbhömwë na Yëësu Kiristo, na ghwiki igha nkumukumya törë, ku bhuyö ntoona ubhweseghe ubhwa ukughya këtöönööni ku-Waryobha. ¹³Ku bhuyö bhoono nkobhasabha ndë igha, motakaakwa emetwe ku-nyanko eno nkunyoora ko okoghera iya bhëënyu, kasi keno mokaakora, nu-kwiheemera inyanko iyö.

Pauro arasabhera Abhakiristo abha Ëfësö

¹⁴Hano naitegherra ësëëmyö enene iya Waryobha iyö, nkotema ndë hansë ibhiru mbasaasaamera ko-Taata uwëëtö Waryobha. ¹⁵Uyö we esemoko iya ëbhëntö bhyonswe igho, ibhya mu-ryobha na ibhya ko-kebhara kono. ¹⁶Nkobhasaasaamera ndë ku-Waryobha igha, ku ubhuhika ubhwaye ubhwaru bhono aanabho, Umwika Ömöhörëëru abhahaane singuru, mokongʼe mo-senkoro isyënyu, ¹⁷okore Yëësu Kiristo amenye këmwë mo-senkoro isyënyu ku umukumo ghono moonagho. Ndabhasabha igha, möghëndërri okohanshana. Righonshe n-kya imiri, imiri nkokora ghërë ëmëtë ghenagha, kora ghwiki n-kya inyumba eno ehaghaashirwë ku-musingi. ¹⁸Nkosaasaama ndë igha, bhëënyu na abhantö abha Waryobha bhonswe igho, mobhe na obhotoro ubhwa okomanyërrya bhuuya igha, Yëësu Kiristo natohanshirë bhököngʼu okokera bhono tukwitegherra. ¹⁹Nkosabha ndë igha, momanye righonshe iryaye riyö rekokera obhotoro ubhwa okomanya ukwa ömöntö. Nkosaasaama ndë igha, Waryobha abhahaane na abhaishöri bhököngʼu eteemo iyaaye.

²⁰Bhoono tigha tötööni Waryobha, ono akotora okokora amangʼana amaaru okokera ghano ghonswe igho tokomosabha igha akore, handë ghano tukwitegherra. Nkokora arë ko obhotoro ubhwaye bhono bhokokora emeremo mo-senkoro isyëtö. ²¹Tötööni Waryobha uwa ubhuhika bhono bhokomaahekana mo-kanisa, na ku-Kiristo Yëësu, senkaagha syonswe igho, amakora ghonswe igho ukurwa okosemoka, Amina.

Abhakumya mbaana öbhömwë ku-Yëësu Kiristo

¹Mbe, öni m-mobhohe ndë ko bhoora nkokorra Omonene Yëësu emeremo. Ku bhuyö ndabhasaasaama igha, mokore amangʼana ghano ghakwikererrania na keera kyaaghërrë Waryobha akabhabherekera igha mobhe abhantö abhaaye. ²Mwihoote ko-ghonswe igho ghano mokokora, mobhe abhahaabhu, möghömërri na ököghömërrania ukwa okohanshana. ³Mokore omotono ughwa ököghëndërrya okobha na öbhömwë bhono Umwika Ömöhörëëru uwa Waryobha akohaana abhantö, bhaikarana bhuuya ko omorembe. ⁴Bhëëtö Abhakiristo n-kya bhono ömöbhërë ughwa ömöntö ghörë, ntoona Umwika Ömöhörëëru ooraoora, na ubhweseghe m-mboorabhoora toonabho bhono Waryobha yaatoraghaini hano yaatöbhërëkëëyë. ⁵Bhonswe igho ntoona Omonene ömwë ooraoora, umukumo ughwëtö n-gömwë, na obhobhatiisyo bhwonswe m-bömwë. ⁶Bhonswe igho nkosaasaama törë Waryobha, we Taata uwëëtö bhonswe igho. We ömötöngi uwëëtö bhonswe igho, nkokora arë emeremo ighyaye okohetera kö-bhëëtö, na mmö-bhëëtö bhonswe igho amënyirë.

⁷Kasi kera ömöntö mö-bhëëtö mono yaahaanwa obhotoro obhohagharë na Yëësu Kiristo, ubhwa okomokorra emeremo. Yaatwenaini obhotoro bhuyö, kya bhono yaatunanga. ⁸Kiyö nkyo kekoghera Amaandeko Amahörëëru gharaghamba igha,

“Hano yaainyökirë ukughya ighörö,

yaaghëghirë abhabhisa këghötërëëyë,

akatuha abhantö ituho.”4:8 Maaha mo-ketabho ikya Zabhuri 68:18; Abhakorosaai 2:15.

⁹Mbe, ensonga iya engʼana iyö igha, “Yaainyökirë ukughya ighörö,” në-ëëhë? Ensonga iyaamo ni-igha, yaatangatirë ukwika hansë akaasha ko-kebhara kono, ataraainyoka. ¹⁰Ku bhuyö, Yëësu ono yaaishirë ko-kebhara kono, we uyöuyö ono yaainyökirë ukughya ighörö iyö, okoheteera amasaarö. Yaakörrë igho, okore abhenga ahasë honswe igho. ¹¹Uyö we yaahaayë abhantö abhandë obhotoro ubhwa okobha abhatomwa, abhandë bhabhe abharööti, abhandë bhabhe abhainjirisiti, na abhandë akabhahaana obhotoro ubhwa okobha abhakaraabhërri, bhakaraabherrenga na ukwëghya. ¹²Yaakörrë igho, okore abhantö bhayö bhasëëmi abhantö abha Waryobha, bhakorrenga Waryobha emeremo. Ghwiki ikyëndë ni-igha, Abhakiristo bhanaghe. Abhakiristo bhayö, mbo bhakobherekerwa igha, ömöbhërë ughwa Kiristo. ¹³Engʼana iyö, neraaghëndërri igho, okohekera hano bhëëtö bhonswe igho, torebha abhamwë ku umukumo ughwëtö, na okomanya Omoona uwa Waryobha.4:13 Omoona uwa Waryobha. Maaha mo-faharaasa. Ntorebha abhakumya bhano bhaahera ku umukumo ughwëtö. Ghwiki ntoraabhe abhantö abha heene kya Kiristo ono arëngë uwa heene. ¹⁴Kiyö nkyo keraaghere twange okobha kya abhaana abhake abha ukutuumibhwa tuumibhwa ahasë honswe igho na rikama irya amëëghyö agha obhorongo agha abhantö abhangʼaini, ko obhongʼaini ubhwabho. ¹⁵Kasi ikya okokora no-koteebhania obhoheene ubhwa Waryobha ku righonshe. Tobhe abhantö abhakörö ko amangʼana ghonswe igho. Tutuubhane na Kiristo ko bhoora Kiristo n-kya omotwe ko abhasoorani abhaaye.4:15 Maaha mo-ketabho ikya Abhaëfësö 1:22, 5:23; Abhakorosaai 1:18.¹⁶Yëësu Kiristo uyö, nkoroobhania arë abhantö abhaaye bhonswe igho, bhaghootana hamwë kya igho imyaho ighya ömöbhërë ughwa ömöntö gheghotaini. Hano imyaho ghyonswe igho ighya kö-möbhërë ghyatoorrani, ghekore emeremo ighyako bhuuya, ömöbhërë ghonswe igho nkukiina ghörë ghobha na singuru na okohansha imyaho ighya kö-möbhërë kuyö.

Twisyöri seteemo isyëtö

¹⁷Mbe, keno nkutuna mbatëëbhi ni-igha, mwitegherre bhuuya amangʼana aghaane ghano. Omonene Yëësu Kiristo yaangʼaana ubhwera, ku bhuyö nkobhakaania ndë igha, motakaaghëndërrya okokora amangʼana kya Abhakyaro. Bho nkokora bharë amangʼana bhono abheene bhakutuna. Amaitegherro aghaabho, teghaana ubhwera bhwobhwonswe bhoora hë. ¹⁸Tebhaamanyërrëëyi bhuuya amangʼana agha Waryobha hë, kora tebharëngë haangʼë na öbhöhöru obhohya ubhwa Waryobha hë. Ko bhoora igha, tebhamanyirë Waryobha hë. Ghayö ghonswe igho, n-ko okoghera iya ikisiraani ikyabho. ¹⁹Ku bhuyö tebhaana sënsöni hë. Bhaasareka ko okokora amangʼana agha seteemo syonswe igho isya obhosooraare. Kora nkutuna bharë bhaghëndërri okokora igho bhököngʼu.

²⁰Kasi bhëënyu, ti-igho mweegha amangʼana agha Yëësu Kiristo hë. ²¹Keno mwaaighwa ko amangʼana agha Yëësu, na keno abhëëghya abhëënyu bhaabhëëghya, m-maheene igha bhuyö no-bhoheene ubhwa ukurwa ku-Yëësu Kiristo, ubhwa amangʼana aghaaye kya igho gharë. ²²Abhëëghya abhëënyu bhaabhëëghya igha, mutighe seteemo isyënyu isya kare seera, seno syaabhasikyanga, isya ubhunyanku ubhwa oronamba rono rwaabhangʼënërryanga. ²³Bhakabhatëëbhya igha, mutighe Waryobha abhakore bhohya mo-maitegherro aghëënyu. ²⁴Ghwiki igha, mobhe na eteemo eehya iya ituubho iya Waryobha ko bhoheene ubhwa heene na öbhöhörëëru.

²⁵Mbe, ku bhuyö mutighe obhorongo, kasi moteebhaninga obhoheene, ko bhoora bhëëtö bhonswe igho, n-kya imyaho ighya ömöbhërë öghömwë. ²⁶Hano mwarerra, okorerra ukwënyu kuyö, kotakaaghera mokore ëbhëbhë,4:26 Maaha mo-ketabho ikya Zabhuri 4:4. iryobha retakaaghwa mökërëërëëyë. ²⁷Motakaahaana Oghosambwa4:27 Oghosambwa. Maaha mo-faharaasa. umweya ughwa okobhashaasha ko engʼana kya iyö. ²⁸Umwibhi atakaghëndërrya ukwibha ghwiki, kasi nyakara akore omotono ughwa okokora emeremo imiiya na amabhoko aghaaye umwene, okore anyoore ëkëntö ikya ukutwenera ono aana obhohabhë. ²⁹Motakaaghambanga amangʼana amaghogho. Kasi moghambenga amangʼana amaiya ghano ghakotogheka mukumo ughwa bharikyënyu. ³⁰Motakaaghera Umwika Ömöhörëëru abhaabhayere, ko bhoora Umwika Ömöhörëëru uyö, we umuhuri ghono Waryobha yaabhatoorra-ko ukwörökya igha m-bantö abhaaye mörë. Uyö we ekemanyërryö igha, rooho urusikö rono Waryobha arebhatungurya këmwë.4:30 Maaha mo-ketabho ikya Isaaya 63:10; Abhaëfësö 1:13. ³¹Muruusi mo-senkoro isyënyu öbhörrö bhwonswe igho, okoregha, okorerra, riihë, amatöki, na obhoghogho bhwonswe igho. ³²Mokorrane amangʼana amaiya, mohanshane na mwabherane kya bhono Waryobha yaabhabhëëyë okohetera ku-Yëësu Kiristo.

Pauro araraghërrya abhakumya bhabhe na eteemo eno Waryobha akutuna

¹Mbe, ku bhuyö ni-igha mweghe eteemo iya Waryobha, ko bhoora igha bhëënyu, m-baana abhaghonshe abha Waryobha mörë. ²Mohanshe abhantö abhandë, kya bhono Yëësu Kiristo yaatohanshirë akatukwera, akabha esadaaka na ikimwenso ikyëtö ikya ukurumbaasa bhuuya ku-Waryobha.

³Kasi motakaakora amangʼana ghano gharaaghere abhantö bhabhaghambe igha, m-basooraare mörë, m-banyanku mörë, handë igha m-bahobhaaru mötë, ko bhoora igha, amangʼana ghayö teghaingʼarëëyë ko-bhantö abha Waryobha abhahörëëru kya bhëënyu. ⁴Kora amangʼana agha sënsöni na agha ubhusheema handë senkaani, ghayö teghakokorwa na abhantö kya bhëënyu hë, kasi bhoono engʼana iya okokora, nu-kukumya Waryobha ko-keno yaabhakorra.5:4 Maaha mo-ketabho ikya Abhaëfësö 5:20; Abhakorosaai 3:15, 3:17.⁵Omohoobhaaru, uyö n-kya ono akosengerra amasambwa. Ku bhuyö momanye igha, ömöntö kya uyö, bhaana omosooraare na umunyanku, tebhaana umwandö ghwoghwonswe ghoora hë mo-Bhokama ubhwa Yëësu Kiristo na Waryobha.

⁶Motakaikërrya ömöntö wowonswe oora, abhangʼaine ko amangʼana aghaaye agha obhokangi ghano akoghamba. Ko bhoora igha, Waryobha narishibhya abhantö bhano bhatakumwighwera, bhano bhakokora amangʼana amaghogho kya ghayö ngambirë. ⁷Ku bhuyö motakaaghootana na abhantö bhano bhakokora amangʼana kya ghayö. ⁸Nokaanyoora igha kare hayö mmu-kisuntë mwaarë, kasi bhoono igho mösöhirë mo-bhorabhu ko bhoora mobhaayë na öbhömwë na Omonene Yëësu Kiristo. Ku bhuyö mokore amangʼana kya abhantö bhano bharëngë mo-bhorabhu. ⁹Ndabhatëëbhya igho ko bhoora igha, ëbhëntö ibhiiya bhyonswe igho, ibhya heene na ibhya obhoheene, no-bhorabhu bhokobhereeta. ¹⁰Mokore omotono ughwa okomanya na okokora amangʼana ghano ghakushomera Omonene. ¹¹Motakaaghootana okokora amangʼana ghano ghataana ubhwera, ghano ghakokorwa na abhantö abha mu-kisuntë,5:11 Abhantö abha mu-kisuntë. Bhayö na abhantö bhano bhakokora amangʼana ghano ghataana ubhwera ku-Waryobha. kasi mohamere amangʼana kya ghayö. ¹²Amangʼana ghano ghakokorwa bhubhise mo-bhatëëyu bhayö, nkösöökya gharë, në-nsöni okoghaghamba. ¹³Hano obhorabhu bhwamërëkya ëkëntö, abhantö bhonswe igho nkomaaha bharë kya bhono kërë, ¹⁴nkyo kekoghera eraghambwa igha,

“Bhooka uwe ono oraayë,

uryoke urwe mo-bhaku

na obhorabhu ubhwa Yëësu Kiristo mboraakömërëkëri.”5:14 Amangʼana ghayö te-agha mo-Maandeko Amahörëëru agha kare ghaara hë. Kasi na Abhakiristo abha mbere bhaara bhaarëëtyanga. Ku-rirëëtyö reno hano amangʼana agha-ko nkurwera gharë mo-ketabho ikya Isaaya 26:19 na 60:1. Maaha mo-ketabho ikya Abharuumi 13:11.

¹⁵Ku bhuyö mwiyangarre eteemo iyëënyu, motakaabha na eteemo iya ekekangi, kasi mongʼainihe. ¹⁶Mokore emeremo bhuuya ko-nkaagha eno, ko bhoora igha, ikyaro reero eno kyasareka. ¹⁷Ku bhuyö motakaakangiha, kasi mongʼainihe, mokore omotono ughwa okomanya keno Omonene Yëësu akutuna igha mokore. ¹⁸Motakaaghootwa na amarwa,5:18 Motakaaghootwa na amarwa. Amarwa agha enkaagha iyö ghaabherekerwanga igha, idivai handë mvinyo. ko bhoora okoghootwa na amarwa nkoghera körë ömöntö akora amangʼana agha sënsöni. Kasi bhëënyu mutighe Umwika Ömöhörëëru abhatangate ko amangʼana ghonswe igho. ¹⁹Mushumaasheranenga ko-sezabhuri, amarëëtyö na sëtënzi isya mo-nkoro. Mushomerwenga na ökörëëtërya Omonene Yëësu. ²⁰Mukuminga Taata uwëëtö Waryobha nkaagha syonswe igho, ko amangʼana ghonswe igho, ko okoghera iya amangʼana ghano Omonene uwëëtö Yëësu Kiristo yaakora.

Pauro araraghërrya abhashaasha na bhakaabho

²¹Mwihooterane bhëënyu abheene ko bheene, ko bhoora igha, nkosooka mörë Yëësu Kiristo.5:21 Maaha mo-ketabho ikya 1 Peetero 5:5.

²²Bhëënyu abhakari, ni-igha mwihoote ko-bhashaasha abhëënyu kya bhano mukwihoota ko-Monene,5:22 Maaha mo-ketabho ikya Okosemoka 3:16; Abhakorosaai 3:18; 1 Peetero 3:1.²³ko bhoora igha, umushaasha n-kya omotwe ko mokaaye, naana ubhwera ko mokaaye. N-kya bhoora Yëësu Kiristo aana ubhwera ko-kanisa iyaaye, na ekanisa n-kya ömöbhërë ughwa Yëësu Kiristo, na uyö we yaaghëtöörya. ²⁴Mbe, kya bhono ekanisa ekosooka Yëësu Kiristo, abhakari bhonswe ighoigho, bhaighwere bhashaasha abhaabho, ko amangʼana ghonswe igho.

²⁵Bhëënyu abhatëti, ni-igha mohanshe bhakëënyu5:25 Maaha mo-ketabho ikya Abhakorosaai 3:19; 1 Peetero 3:7. kya bhono Yëësu Kiristo yaahanshirë ekanisa iyaaye, kora akaikwera. ²⁶Yaaghikwërëëyë, okore aghesaabhuure. Yaasaabhuurrë ekanisa ko engʼana iya Waryobha na ukughyöghya na amanshë agha obhobhatiisyo,5:26 Maaha mo-ketabho ikya Tiito 3:5.²⁷okore anyoore ekanisa inshiiya, ëhörëëru, eno etaana risoro ryoryonswe reera.5:27 Maaha mo-ketabho ikya Zabhuri 45:13; 2 Abhakörintö 11:2.²⁸Abhashaasha bhonswe ighoigho, ni-igha bhahanshe bhakaabho kya bhono bhahanshirë ëmëbhërë ighyabho. Ömöntö ono akohansha mokaaye, nkunyoora örë aihanshirë umwene. ²⁹Taaho ömöntö ono arëghirë ömöbhërë ughwaye hë, kasi nkughwangarra arë na okoghohaana ibhyakorya, n-kya bhono Yëësu Kiristo wonswe akwangarra ekanisa iyaaye. ³⁰Nkutwangarra arë bhëëtö abhantö abhaaye ko bhoora igha, n-kya ömöbhërë ughwaye törë. ³¹N-kya bhono yandëkirwë mo-Maandeko Amahörëëru igha, “Ku bhuyö umushaasha naraatighe suwaabho na nyakuwaabho, aghootane na mokaaye. Abhantö abhabhërë bhayö, nkobha bharë kya ömöbhërë öghömwë.”5:31 Maaha mo-ketabho ikya Okosemoka 2:24.³²Amangʼana ghano m-marito, te-mahöhö hë. Kasi öni keno nkushumaashera, nu-bhwighwerrani ubhwa Yëësu Kiristo na ekanisa iyaaye, igha n-kya ömöntö na mokaaye.

³³Ndamarërrya amangʼana aghaane ko okoghamba igha, ni-igha umushaasha ahanshe mokaaye, kya bhono ahanshirë ömöbhërë ughwaye umwene, na omokari wonswe asooke mushaasha uwaaye.

Pauro araraghërrya abhaana na abhaibhöri abhaabho

¹Bhëënyu abhaana, ko bhoora igha mmoona öbhömwë ko-Monene Yëësu, ni-igha mwighwere abhaibhöri abhëënyu. Kiyö nkyo ëkëntö ikiiya ikya okokora. ²Ko bhoora mo-Maandeko Amahörëëru yandëkirwë-mo igha, “Osooke suwëënyu na nyakuwëënyu.” Ghuyö ngwo umughiro ghono ghwaabhaayë ughwa mbere ukwëngëribhwa-ko riraghano reno igha, ³“Hano uraaighwere abhaibhöri abhaaho, amangʼana ngaraabhe bhuuya ku-uwe, kora oghote wingʼuure ko-kebhara kono.”6:2-3 Maaha mo-ketabho ikya Ukurishoka 20:12; Eheetoko iya Etoraati 5:16.

⁴Bhëënyu abhaibhöri motakaarërrya abhaana abhëënyu, kasi mobhakiini kö okobharaghërrya eteemo inshiiya na ököbhëëghya engʼana iya Omonene Yëësu.6:4 Maaha mo-ketabho ikya Abhakorosaai 3:21.

Pauro araraghërrya abhaghorwa na abhanene abhaabho

⁵Bhëënyu abhaghorwa, ni-igha mosooke abhanene abhëënyu abha ko-kebhara kono, na ukurighita, na eno mohanshirë mo-senkoro isyënyu. Mobhasooke kya bhono mokosooka Yëësu Kiristo. ⁶Motakaabhaighwera enkaagha eno ukunyoora bhaaho, okore bhabhakumi. Kasi mobhaighwere okanya igha m-baghorwa abha Yëësu Kiristo mörë. Ëkëntö keno Waryobha akutuna igha mokore, mokekore kwa nkoro nshiiya. ⁷Mohanshe emeremo ighyënyu, mushomerwe naghyo. Hano mwakora emeremo ighyënyu momanyenga igha, të-möntö mokokorra hë, kasi no-Monene Yëësu we mokokorra. ⁸Momanye igha, Omonene narituha abhantö bhonswe igho, ko amangʼana amaiya ghonswe igho ghano abhatöönööni handë abhaghorwa bhaakora.6:6-8 Maaha mo-ketabho ikya Abhakorosaai 3:22-25.

⁹Abhanene, bhëënyu bhonswe, mokore bhuuya abhaghorwa abhëënyu. Motakaabhöbhöhërrya, momanye igha, abhaghorwa bhayö na bhëënyu abhanene abhaabho, Omonene uwëënyu nö-ömwë mu-ryobha iyö. Yëësu Kiristo we Omonene uwëënyu bhonswe igho mu-ryobha iyö. Umwene, taana ekeroterro kö-möntö wowonswe oora hë.6:9 Maaha mo-ketabho ikya Abhakorosaai 4:1.

Pauro aratëëbhya Abhakiristo kya igho bharaitanenga riihë na Oghosambwa

¹⁰Amangʼana aghaane ghano nkobhatëëbhya agha okomarërrya ni-igha, monaghe ko-Monene Yëësu, mutighe abhahaane singuru na obhotoro ubhwaye obhonene. ¹¹Momanore ibhyöghë bhyonswe igho ibhya riihë, bheno Waryobha akobhahaana, okore mobhe na obhotoro ubhwa okorebherra obhongʼaini ngʼaini ubhwa Oghosambwa. ¹²Nkobhatëëbhya ndë igho ko bhoora igha, riihë reno tukwitana, ti-irya kinyabhantö hë, kasi nkwitana törë riihë na ëbhëntö bheno bhetakomaahwa, ibhya ubhwera na obhotoro. Nkwitana törë riihë na abhanene abha amangʼana amaghogho, bhano bhakotonga ekebhara keno. Nkwitana törë riihë na amasambwa ghonswe igho ghano ghakokora amangʼana amaghogho, na amatöngi agha ahasë hano hatakomaahwa. ¹³Ku bhuyö ni-igha mogheghe ibhyöghë bhyonswe igho ibhya ukwitanera riihë bheno mokohaanwa na Waryobha, okore hano risambwa reraashe, unyoore moona obhotoro ubhwa okorerebherra, na hano moraamare ghayö, monaghe këmwë.

¹⁴Ku bhuyö ni-igha mwisëëmi ukwitana riihë. Mwibhohe umushibhi mo-bhokende. Umushibhi ghuyö no-bhoheene ubhwa Waryobha. Motoore idirii mu-kikubha. Idirii iyö, no-kokora amangʼana agha heene. ¹⁵Okotoora amabhuuti n-kya ukwisëëmya okoraareka Amangʼana Amaiya agha omorembe. ¹⁶Ëkëntö ikyëndë ni-igha, mogheghe ingubha. Ingubha iyö, nu-mukumo ghono moonagho ku-Waryobha. Iyö yo eraabhatöörri ukurimya imighwë ighya omorro gheno mokorekerrwa na Oghosambwa. ¹⁷Motoore sëngöfiira isya ikyoma, sëngöfiira siyö, nsyo öbhöhönia ubhwënyu. Mogheghe na umushonge ghono Umwika Ömöhörëëru akobhahaana, umushonge, ghuyö ne-ngʼana iya Waryobha.

¹⁸Mosaasaamenga nkaagha syonswe igho, kya bhono Umwika Ömöhörëëru akobhatangata, okore mwiraarerre. Möghëndërri okosaasaamera abhantö abha Waryobha bhonswe igho. ¹⁹Monsaasaamere na öni wonswe, okore Waryobha angʼaane amangʼana amaiya agha okoghamba enkaagha yoyonswe igho, eno ukunyoora ndashumaashera amangʼana agha Yëësu Kiristo, ndaghërri abhantö kö obhokarë, obhoheene bhono bhörëngë mo-Mangʼana Amaiya, bhaghamanye. ²⁰Öni nu-mwimërërri uwa Yëësu Kiristo ndë uwa okoraghërrya abhantö Amangʼana Amaiya, kiyö nkyo kyaaghera abhantö bhakandekera mo-kebhohe. Ku bhuyö monsaasaamere ku-Waryobha igha, angʼaane obhokarë ubhwa okoraareka Amangʼana Amaiya ko obhotoro ubhwane bhwonswe igho.

Pauro arasaasaama Waryobha igha angʼoore Abhakiristo abha Ëfësö

²¹Mbe, Tikiiko nu-mukumya murikyëtö omoghonshe, ömököri uwa emeremo uwa Omonene Yëësu, m-möntö uwa heene. Uyö we araabhatëëbhi amangʼana aghaane ghonswe igho, na ghano ghaannyoora, okore momanye amangʼana aghaane na keno nkokora.6:21 Maaha mo-ketabho ikya Abhakorosaai 4:7; 2 Timoteo 4:12.²²Kiyö nkyo kyaaghërrë nkamotoma kö-bhëënyu iyö, okore momanye ghano ghakutunyoora eno, na ghwiki igha, abhatëëbhi amangʼana ghano gharaabhatogheke.

²³Abhakumya bharikyëtö, Waryobha Taata uwëëtö na Omonene uwëëtö Yëësu Kiristo bhabhahaane omorembe. Bhaghere mohanshane, kora möghëndërri okobha na umukumo ku-Yëësu Kiristo. ²⁴Örööbhö urwa Waryobha robhe kö-bhëënyu bhonswe igho, bhano mohanshirë Omonene uwëëtö Yëësu Kiristo, ku righonshe reno retakohwa röndë.