Abhakorosaai

Ritashandighi irya Pauro

ko-Bhakorosaai

Obhotangati

Korosaai, nu-mughi omoke igho ghono ghwaarë ko-mokowa ughwa Asia Enke. Reero eno Korosaai, ërëngë mu-kyaro ikya Bhuturuki. Ukurwa Korosaai ukughya Ëfësö, yaarenga kya sikiromiita ighana imwë na merongo muhungatë na isaano (175). Ëfësö hayö, ho Pauro yaaraarekanga-ho Amangʼana Amaiya agha Yëësu Kiristo (Maaha mo-ketabho ikya Amangʼana agha Abhatomwa 19). Pauro umwene tiyaahika okoraareka Amangʼana Amaiya agha Yëësu Kiristo Korosaai hayö. Kasi ömöntö ono yaaraareka-ho, yaabherekerwanga igha, Epafura.

Enkaagha eno waanyöörrë Pauro arëngë mo-kebhohe, Epafura yaaishirë ko-Pauro akamötëëbhya amangʼana agha abhëëghya abharongo bhano bhaanyankyanga Abhakiristo abha Korosaai hayö. Abhakiristo abha Korosaai bhaarë manga abhërë, bhaare-ho Abhakiristo Abhayahudi na Abhakiristo Abhaghiriki. Mbe, abhandë bhaatunanga bhaishooghani amëëghyö agha Yëësu Kiristo hamwë na amëëghyö agha sidiini isyabho.

Abhayahudi bhano bhëëghëri amëëghyö agha obhorongo, bhaaikumyanga igha, abheene na-bhantö bhano bhaahorwa na Waryobha. Mbe, ku bhuyö bhakëëghya igha, ömöntö nakaabha Umukiristo, kasi ni-igha asaarwe na aghoote amaraghërryö na seteemo isya Abhayahudi, ho Waryobha araamwikërri. Abhaghiriki bhano bhëëghëri amëëghyö agha obhorongo bhakëëghya igha, Waryobha taana ëkëbhë kyokyonswe keera hë, ku bhuyö takaabhömbirë ekebhara keno hë. Abheene bhaamaahanga igha, ekebhara nkeena ëbhëbhë. Bhaakumyanga igha, ömöbhërë ughwa ömöntö n-gwa ëbhëbhë, ku bhuyö Yëësu takaatörrë okobha na ömöbhërë ughwa ömöntö, na ghwiki igha abhe Waryobha ono yaamënyirë ko-kebhara kono kinyabhantö.

Pauro akaghamba igha, Yëësu Kiristo n-Waryobha. Yaabhömbirë ekebhara, na we Omonene uwa ëbhëntö bhyonswe igho. M-möntö yaarë, kora akamenya ko-kebhara kono, akakwa, okore twabherwe ëbhëbhë ibhyëtö. Engʼana eno Yëësu yaakörrë, yaaisirë, tiyaasuuhirë hë. Ku bhuyö okosaarwa, amaraghërryö agha Mosa na seteemo syonswe igho tebheena moremo hë.

Pauro nkötëëbhya arë Abhakiristo mu-ritashandighi mono igha, ni-igha bhatighe seteemo sengogho isya kare seera, bhabhe na öbhömënyi obhohya bhono bhukushomera Waryobha. Nkwëghya arë arörökërrya abhakari na abhashaasha, abhaibhöri na abhaana abhaabho, abhaghorwa na abhaamë, kya bhono bharaakorranenga.

Amakëërërryö

¹Ritashandighi reno nö-öni Pauro ndyandëkirë, öni omotomwa uwa Kiristo Yëësu ko okohansha ukwa Waryobha umwene, öni hamwë na Timoteo umukumya murikyëtö. ²Nkobhandekera törë bhëënyu abhakumya bharikyëtö abhahörëëru abha Waryobha, bhano mömënyirë mu-mughi ghuyö ghokobherekerwa igha, Korosaai. Twabha ëkëntö ëkëmwë na bhëënyu, ku-mukumo ghono tokosanga ku-Kiristo.

Torasabha munyoore örööbhö na omorembe ukurwa ku-Waryobha Taata uwëëtö.

Amasabhi na umukumo

³Nkobhasabhera törë nkaagha syonswe igho, na torakumya Waryobha, Suwaabho Omonene uwëëtö Yëësu Kiristo. ⁴Nkokora törë igho, ko bhoora twaighwa amangʼana agha umukumo ughwënyu ku-Kiristo Yëësu, na bhono mohanshirë abhantö abha Waryobha bhonswe igho. ⁵Umukumo na righonshe, bhiyö n-ko okoghera iya ubhweseghe ubhwa ituho eno Waryobha yaabhasëëmërya mu-ryobha. Mwaaighuurë amangʼana amaiya agha ubhweseghe bhuyö, enkaagha eno mwaaraarëkëëywë engʼana iya obhoheene iya Yëësu Kiristo. Engʼana iyö, yo Amangʼana Amaiya agha Yëësu Kiristo. ⁶Amangʼana Amaiya ghayö mwaatëëbhiibhwi, nkoromaana gharë ko-kebhara kyonswe igho. Kora nköghëndërrya gharë ukusyörya seteemo isya abhantö, okore bhatëghëri Waryobha. Engʼana iyö, n-kya bhono yaabhaayë kö-bhëënyu ukusimirya hano mwaaighuurë Amangʼana Amaiya agha örööbhö urwa Waryobha, mokamanya bhuuya kya igho örööbhö urwaye urwa heene rörë. ⁷Amangʼana Amaiya ghayö mwëëghibhwa na Epafura. Epafura uyö, m-moghonshe uwëëtö, ömököri uwa emeremo murikyëtö, kora m-möntö uwa heene, ko okokorra Kiristo emeremo ko okoghera iya bhëëtö. ⁸Uyö we yaatötëëbhëri amangʼana agha righonshe iryënyu reno rikurwa ku-Mwika Ömöhörëëru.

⁹Ku bhuyö ukusimirya hano twaaighuurë urwa mbere amangʼana aghëënyu amaiya ghayö, nkobhasabhera törë, kora tetwakasinyirë hë. Torasabha igha, Waryobha abhahaane obhomanyi bhonswe igho ko ghano akutuna igha mokore, abhahaane na obhongʼaini bhonswe igho ubhwa amangʼana ghano ghakurwa ku-Mwika Ömöhörëëru. ¹⁰Amangʼana ghayö, ngo tokobhasabhera, okore mobhe na eteemo eno Omonene Yëësu akutuna igha abhantö abhaaye bhabhe nayo. Mbe, hayö ho moraamötëghëri, ko mangʼana amaiya ghonswe igho ghano mokokora, kora ho moraamanye Waryobha bhököngʼu. ¹¹Torabhasabhera igha, Waryobha abhatöörringa ku singuru isya ubhuhika ubhwaye, okore möghömërringa ghonswe igho motakaarosa. Mushomerwenga ¹²na eno morakumya Taata Waryobha, ko bhoora abhakörrë mobhe abhasangi abha ikitweno ikya umwandö ughwa abhantö abhaaye, mo-Bhokama ubhwaye ubhwa emerengaari. ¹³Waryobha yaatötöörri ukurwa mo-bhokama ubhwa ikisuntë, akatongʼaanyërya mo-Bhokama ubhwa Omoona uwaaye omoghonshe. ¹⁴Twatunguribhwa ko okohetera Omoona uwaaye uyö, ko bhoora twabherwa ëbhëbhë ibhyëtö.

Kiristo naana ubhwera ku-bhyonswe igho

¹⁵Kiristo nkwörökya arë harabhu igho, bhono Waryobha arë,

nokaanyoora igha, takomaahekana hë.

Kiristo uyö we omoona omotangi ono aana ubhwera kö-bhëntö bhyonswe igho.

¹⁶Ko bhoora ëbhëntö bhyonswe igho bhyaabhömbirwë okohetera ku-uyö,

ibhya mu-ryobha na ibhya ko-kebhara,

bheno bhekomaahekana na bheno bhetakomaahekana,

mbokaabha ubhwera handë obhokama, obhonene handë singuru.

Bhyonswe igho mbyaabhömbirwë, ko okoghera iya we.

¹⁷Ho yaarë, kora ëbhëntö bhyonswe igho bhetaraabhombwa,

nkotonga arë ëbhëntö bhyonswe igho, ku-uyö ëbhëntö bhyonswe igho, nkoghootana bhërë.

¹⁸We omotwe ughwa ömöbhërë, ekanisa yo ekobherekerwa igha, ömöbhërë.

Ensonga iya engʼana iyö ni-igha, we okosemoka ukwa ekanisa,

ghwiki we uwa mbere ukuryoka ukurwa mo-bhaku,

okore abhe omonene uwa ëbhëntö bhyonswe igho.

¹⁹Ko bhoora Waryobha yaatëghëribhwa igha, obhoheene ubhwaye bhonswe igho bhobhe ku-Kiristo.1:19 Maaha mo-ketabho ikya Abhakorosaai 2:9.

²⁰Ghwiki Waryobha akaighwerrania ëbhëntö bhyonswe igho nawe, ko okohetera ku-Kiristo,

ëbhëntö ibhya ko-kebhara kono, kora na bheno bhërëngë mu-ryobha.

Yaakörrë igho, ko okoreeta omorembe okohetera amaanyinga agha Yëësu, ghano ghaitëkirë ko-mosarabha.

²¹Kare hayö, hano bhëënyu motaarenga moraakumya Waryobha, hare mwaarë nawe, kora mokabha abhabhisa abhaaye, ko okoghera iya amaitegherro na seteemo isyënyu sengogho. ²²Kasi bhoono Waryobha yaabhaighwerrania nawe, ko okohetera ukukwa ukwa Kiristo. Yaakörrë igho, okore igha abhareete mbere iyaaye mörëngë abhahörëëru, motaana imbuura handë risoro ryoryonswe reera. ²³Kasi ni-igha möghëndërri okobha na umukumo, mohangarre, mobhe na singuru, motakaikërrya ukutigha ubhweseghe bhono mwaanyoora mo-Mangʼana Amaiya ghano mwaaighwa. Amangʼana Amaiya ghayö, ghaaraarekwa ko-bhantö bhonswe igho abha ko-kebhara kono. Na öni Pauro naabha umutighinkani uwa Amangʼana Amaiya ghayö.

Emeremo ighya Pauro mo-makanisa

²⁴Bhoono nkushomerwa ndë ku-nyaanyi eno nkunyoora kö-möbhërë ughwane ko okoghera iya bhëënyu, ko bhoora nkosanga inyaanyi iya Yëësu Kiristo eno ëköghëndërrya ko okoghera iya ömöbhërë ughwaye, ömöbhërë ghuyö ngo ekanisa.1:24 Maaha mo-ketabho ikya 2 Abhakörintö 4:10-12; Abhafiripi 3:10.²⁵Waryobha yaangʼaana emeremo ighya ukutighinkanera ekanisa iyaaye, okore ndaarekere abhantö engʼana iyaaye bhono ërë. ²⁶Engʼana iyö iya ikibhisirë, yaabhisirwë ukurwa kare, amakora ghonswe igho. Kasi bhoono yatoorwa harabhurabhu igho ko-bhantö abha Waryobha.1:26 Maaha mo-ketabho ikya Abhaëfësö 3:3-6.²⁷Bhayö mbo Waryobha yaahanshirë igha abhahonyorre engʼana enene iyö iya ubhuhika eno yaakörrë ko okoghera iya Abhakyaro. Engʼana iya ikibhisirë iyö yo Kiristo ono arëngë mo-senkoro isyënyu, ghwiki we akobhahaana ubhweseghe igha moraasange ubhuhika ubhwa Waryobha.

²⁸Ku bhuyö nkoraareka törë amangʼana agha Kiristo, torakaania abhantö na ukwëghya abhantö bhonswe igho, kwa obhongʼaini bhonswe igho, okore tobhareete bhonswe igho mbere iya Waryobha, kö-bhömwë ubhwa heene na Kiristo. ²⁹Ko okoghera iya engʼana iyö, neena omotono ughwa okokora emeremo bhököngʼu, ku singuru seno Kiristo akongʼaana.

¹Nkutuna ndë momanye bhono neena omotono ko-meremo, ko okoghera iya bhëënyu, na bhaara abha mu-mughi ughwa Raodikia, hamwë na abhandë bhonswe igho bhano motaakaandööshë. ²Nkokora ndë igho, okore senkoro isyabho setereme, bhabhe ëkëntö ëkëmwë ku righonshe, bhanyoore obhongʼaini bhono bhoraaghere bhamanye bhuuya igha, Yëësu Kiristo we ësëëmyö iya Waryobha. ³Ku-Yëësu nko emongo iya imbumbure yonswe igho iya obhongʼaini na obhomanyi ërëngë.

⁴Bhoono nkobhandekera ndë ghayö, okore ömöntö wowonswe igho atakaabhangʼaina ko okobhangʼënërrya. ⁵Nokaanyoora tëndëngë hamwë na bhëënyu kinyamöbhërë, kasi enkoro iyaane hamwë ërë na bhëënyu. Nkushomerwa ndë ko bhoora mmanyirë igha, nköghëndërrya mörë okobha na öbhömwë, na umukumo ughwënyu ngotashirë sehaama ku-Kiristo.

Okohaghaasha öbhöhöru ku-Yëësu Kiristo

⁶Bhoono ko bhoora mwaakumya Kiristo Yëësu igha m-Monene uwëënyu, möghëndërri okobha na öbhömwë nawe. ⁷Mohangarre mönsë iyaaye, mwihaghaashe ko-we na umukumo kya bhono mwëëghibhwa. Ghwiki mobhe abhantö bhano mukukumya bhököngʼu Waryobha. ⁸Mwangarre, ömöntö wowonswe igho atakaabhasirya ëkëkööri ko okohetera amëëghyö agha amangʼana agha kare ghaara, agha amasambwa ghano ghakotonga ekebhara keno. Amëëghyö ghayö, nkwitengʼera gharë seteemo isya abhantö na amasambwa ghano ghakotonga ekebhara keno,2:8 Amasambwa ghano ghakotonga ekebhara keno. Ensonga iyaamo iyëndë ni-igha, seteemo isya ko-kebhara kono. ta-mëëghyö agha Kiristo hë. ⁹Ngambirë igho ko bhoora obhoheene bhonswe igho ubhwa Waryobha nku-Kiristo bhokomaaherwa kinyamöbhërë. ¹⁰Bhëënyu mwaanyoora obhoheene bhonswe igho ko okoghera iya okobha na öbhömwë na Yëësu Kiristo, uyö we Omonene uwa obhokama na ubhwera bhonswe igho, kora ko bheno bhërëngë ighörö iyö. ¹¹Hano mwaabhaayë na öbhömwë na Kiristo, mwaangʼaabhööyë esemoko iya öbhököri ubhwa ëbhëbhë, Yëësu Kiristo akabhasaara. Yaabhasaarrë esaaro eno etakosaarwa na abhantö, kasi we umwene akoghekora. ¹²Mbe, hano mwaabhatiisiibhwi, mwaakurë hamwë na Kiristo, kora ghwiki mokaryoka hamwë nawe ko bhoora mwaaisëghirë obhotoro ubhwa Waryobha ono yaamuryökëri ukurwa mo-bhaku. ¹³Bhëënyu n-kya abhaku mwaarë ko okoghera iya ëbhëbhë ibhyënyu, kora temwarenga moraasaarwa esaaro iya ëbhëbhë ibhëënyu. Kasi Waryobha yaabhahaana öbhöhöru hamwë na Kiristo, hano yaatwabhëëyë ëbhëbhë ibhyëtö bhyonswe igho. ¹⁴Waryobha akaruusya-ho amaandeko agha isiirë ghano ghaatushongeranga, akagharuusya-ho këmwë ko okoghatemerra ko-mosarabha. ¹⁵Ko okohetera omosarabha, Waryobha akaruusya amasambwa obhokama ubhwagho na ubhwera ubhwagho akaghakera ku ukukirirrya, akaghasöökërrya harabhu igho.

¹⁶Mbe, ömöntö wowonswe igho atakaabhabhotorra ikiina ko mangʼana agha ibhyakorya, handë ukunywa ëkëntö nyabhorebhe, handë sinyangi isya sidiini, sinyangi isya okotaashwa umwëri, handë urusikö urwa Obhotooro.2:16 Urusikö urwa Obhotooro. Maaha mo-faharaasa engʼana, Obhotooro.¹⁷Ghayö ghonswe igho ni-kiiriiri ikya ghano ghakwitengʼerwa igha, ngaraashe, kasi Yëësu Kiristo we obhoheene. ¹⁸Bhaaho abhantö bhano bhakokangʼasërrya amangʼana agha ubhwihöötu ubhwa okomaahwa na abhantö na agha okosengerra abhamaraika. Motakabhaikërrya, bhatakaasha okobharuusya ituho iyëënyu iya amakora ghonswe igho. Abhantö bhayö nkwiheema bharë ko bhoora bhakoghamba igha, bhaamaaha amangʼana ghayö mo-bherooto. Kasi obhoheene ni-igha, amaitegherro aghaabho amaghogho agha bhunyakyaro, ghabhakangihya. ¹⁹Abhantö bhayö, bhaiyahora ukurwa ku-Kiristo ono arëngë omotwe ughwa ömöbhërë. Ukurwa ku-uyö ömöbhërë ghonswe igho nkoraaghëribhwa ghörë, kora ghoroobhanibhwa na imyaho na imiki, ghukiina bhuuya kya bhono Waryobha akutuna.

²⁰Mbe bhëënyu, ko bhoora igha mwaakwa hamwë na Kiristo, yaabhatungurya ukurwa mö-bhëhwë ebheghogho bheno bhekotonga ekebhara keno.2:20 Ëbhëhwë ebheghogho bheno bhekotonga ekebhara keno. Ensonga iyaamo iyëndë ni-igha, amëëghyö agha ekebhara keno. Bhoono n-kwakë mokobha okanya igha, m-bantö abha ko-kebhara kono mökërë? N-kwakë mokoghoota amaraghërryö ghano ghakoghamba igha, ²¹“Motakaaghoota keno, motakaakera keno, motakaakunia keno!” ²²Amangʼana ghayö ghonswe igho m-mëëghyö agha abhantö ko ëbhëntö bheno bhekosareka hano bhyamara kokorrwa emeremo ibhagha ike igho. ²³No-bhoheene igha, amaraghërryö ghayö, nkomaahekana gharë igha, nga-bhongʼaini, ko bhoora ghaköröndërrya seteemo isya öbhösëngërri seno bhaitoorra-ho abheene, bharaikörya igha m-baihöötu, kora bharabhaaha ömöbhërë kwa ukughusingʼirrya. Kasi amangʼana ghayö, teghakotora okorebherra oronamba urwa ömöbhërë hë.

¹Bhoono ko bhoora mwaaryoka hamwë na Kiristo, mutune amangʼana agha mu-ryobha iyö Kiristo aikaayë, orobhareka urwa bhoryo ubhwa Waryobha, ahasë aha okosookwa. ²Motemerenga omotwe ghano gharëngë mu-ryobha, motakaaitegherra amangʼana agha ko-kebhara kono. ³Ko bhoora bhëënyu mwaakwa ko mangʼana ghayö.3:3 Maaha mo-ketabho ikya Abhakorosaai 2:12, 2:20. Öbhöhöru ubhwënyu bhoono hamwë bhörë na Kiristo ku-Waryobha. Kasi tebhokomaahekana ko-bhantö abhandë hë. ⁴Öbhöhöru ubhwënyu nku-Kiristo bhukurwera. Enkaagha eno aremaahekana, ho na bhëënyu moremaahekana hamwë nawe, na okosanga nawe ubhuhika ubhwaye.

Eteemo eno ëkötëghërya Waryobha

⁵Mbe, ku bhuyö ni-igha, mutighe okokora amangʼana agha ko-kebhara kono, obhosooraare, ubhunyanku, amaitegherro amaghogho, obhoraaghëri, obhohoobhaaru, na oronamba urwa ëbhëntö. Okobha na oronamba urwa ëbhëntö, n-kya okosengerra ëbhëtöndö. ⁶Amangʼana ghayö ngo ghakoreeta ubhushibhu ubhwa okorerra ukwa Waryobha ko-bhantö bhano bhatakumwighwera.3:6 Senakara isyëndë teseena amangʼana ghano igha, ko-bhantö bhano bhatakumwighwera. Maaha mo-ketabho ikya Abhaëfësö 5:6.⁷Kora bhëënyu bhonswe ghayö ngo mwaakoranga kare hayö, enkaagha eno mwaabhaahwanga na amangʼana agha öbhököri ubhwa ëbhëbhë. ⁸Kasi bhoono mutighe këmwë eteemo iya okorerra, na öbhöbhë, obhoghogho, amatöki, bheena amangʼana ghano ghatakongʼarra okoghambwa na bhëënyu. ⁹Motakaatëëbhanianga obhorongo, ko bhoora mwangʼaabhora eteemo iya kare hamwë na amangʼana aghaako, ¹⁰bhoono mwaghöötirë-ko eteemo eehya. Waryobha umwene yaabhömbirë eteemo eehya iyö, kora nköghëndërrya arë kobhakora mutuubhane nawe bhököngʼu, okore momomanye bhuuya. ¹¹Ku bhuyö tekobha bhöndë ku-Muyahudi na kö ömöntö ono atarë Umuyahudi, abhasaarwa handë abhatasaarwa, ömöghëni handë umusheema, omoghorwa handë ömötöönööni.3:11 Maaha mo-ketabho ikya Abharuumi 10:12; Abhagharatia 3:27-28, 6:15. Kasi Kiristo we akomara amangʼana ghonswe igho, ghwiki mo-senkoro isya bhonswe igho arë.

¹²Bhoono ko bhoora m-baahorwa abha Waryobha mörë, kora na-bhahörëëru bhano ahanshirë, mobhe na enkoro iya amaabhë, eteemo inshiiya, ubhwihöötu, obhohaabhu, bheena öbhöghömërrya. ¹³Moghomerraninga, mwabheranenga, nyoore ömöntö aana engʼana na murikyaye, ni-igha mwabherane kya bhono Omonene Yëësu yaabhaabhera. ¹⁴Ekenene ko-ghayö ghonswe igho, ni-igha mohanshane, ko bhoora righonshe nkoreeta rërë öbhömwë ubhwa heene ko bhonswe igho. ¹⁵Omorembe ughwa Kiristo ghobhaahe senkoro isyënyu, ko bhoora bhëënyu bhano mörëngë imyaho ighya ömöbhërë, mwabherekerwa igha mobhe na omorembe. Mobhe abhakumya Waryobha. ¹⁶Engʼana iya Kiristo ebhaikarre ku ubhwaru. Mworokerraninga, morakaanania kwa bhongʼaini bhonswe igho. Mörëëtëringa Waryobha mo-senkoro isyënyu, na ukumukumya ko-sezabhuri, amarëëtyö na sëtënzi isya mo-nkoro.3:16 Maaha mo-ketabho ikya Abhaëfësö 5:19.

¹⁷Ghonswe igho ghano mokoghamba handë okokora, mokorenga okohetera iriina irya Omonene Yëësu Kiristo, na eno morakumya Taata Waryobha ko okohetera ku-uyö.

Amangʼana ghano ghaingʼarëëyi mo-Bhakiristo

¹⁸Bhare abhakari, mwighwerenga abhashaasha abhëënyu, kya bhono ikutunwa ko-bhantö bhano bhakukumya Omonene Yëësu Kiristo.3:18 Maaha mo-ketabho ikya Abhaëfësö 5:22; Tiito 2:5.¹⁹Na bhëënyu abhashaasha, mohanshe bhakëënyu, motakaabhakorra öbhöbhë. ²⁰Na bhëënyu abhaana, mwighwere abhaibhöri abhëënyu ko-ghonswe igho, ko bhoora okokora igho, nkushomera körë Omonene Yëësu Kiristo.3:20 Maaha mo-ketabho ikya Abhaëfësö 6:1.²¹Na bhëënyu bhaataata, motakatendera abhaana abhëënyu, okore bhatakaakwa metwe.3:21 Maaha mo-ketabho ikya Abhaëfësö 6:4.²²Na bhëënyu abhaghorwa, mwighwere abhanene abhëënyu abha ko-kebhara kono, ko-meremo ghyonswe igho. Motakaitangatërrya moraishömya hano bhaaho, okore igha bhabhakumi, kasi mobhasooke senkaagha syonswe igho, kwa nkoro nshiiya, ko bhoora nkosooka mörë Omonene Yëësu. ²³Kyokyonswe igho keno mokokora, mokore kwa enkoro ëmwë ko okoghera iya Omonene, motakaakora morakanya igha m-möntö mokokorra. ²⁴Momanye igha, Omonene ono mukutighinkanera, we Kiristo. Uyö we arebhatuha ituho eera yaaraghaini okobhatuha. ²⁵Kasi wowonswe igho ono akokora amangʼana amaghogho, narishibhibhwa na Waryobha, ko ekerengere ikya obhoghogho bhono yaakora, ko bhoora Waryobha taana ekeroterro hë.3:22-25 Maaha mo-ketabho ikya Abhaëfësö 6:5-8.

¹Na bhëënyu bhonswe bhare bhanene, mokorrenga bhuuya na ubhwa heene abhaghorwa abhëënyu, momanye igha, kora na bhëënyu bhonswe mmoona Omonene uwëënyu mu-ryobha.

Pauro arasabha Abhakorosaai bhamosabheraninga

²Mosaasaamenga nkaagha syonswe igho, moraiyangarra na mukuminga Waryobha. ³Motosabheraninga na bhëëtö hano mwasaasaama Waryobha, okore atokorre enshera iya okoraareka engʼana iyaaye, iya imbumbure iya Yëësu Kiristo eno yaarenga ibhisirwë. Öni mo-kebhohe ndë, ko okoghera iya engʼana iyö. ⁴Ku bhuyö monsabherenga igha, ngëndërri okoraareka engʼana eno harabhurabhu igho, kya bhono mmanyirë igha ni-igho ikutunwa ebhe.

⁵Mbe, ni-igha mobhe abhangʼaini ko-teemo iyëënyu hano wanyoora mörëngë hamwë na abhantö bhano bhataraakumya Yëësu. Umweya ghwoghwonswe igho ghono mukunyoora, mokorenga igho.4:5 Maaha mo-ketabho ikya Abhaëfësö 5:15-16.⁶Mushumaashenga amangʼana amasambaaroku nkaagha syonswe igho, amangʼana ghano ghakötëghërya abhantö, okore momanye bhono moraahonshorenga bhuuya, abhantö bhonswe igho.

Amakëërërryö agha okomarërrya

⁷Umukumya murikyëtö omoghonshe Tikiiko, ömököri uwa emeremo uwa heene, ono nkokora hamwë nawe emeremo ighya Omonene Yëësu, uyö we araabhatëëbhi amangʼana aghaane ghonswe igho. ⁸Kiyö nkyo kyaaghërrë nkamotoma kö-bhëënyu iyö, okore momanye ghano ghakutunyoora eno, na ghwiki igha, abhatëëbhi amangʼana ghano gharaabhatogheke. ⁹Naraashe hamwë na Onesimo, umukumya murikyëtö omoghonshe uwa heene, ono arëngë Omokorosaai murikyënyu. Bhayö mbo bharaabhatëëbhi ghonswe igho ghano ghakwikora eno.

¹⁰Arisitariko, ono arëngë hamwë na öni mo-kebhohe mono, arabhakëërya. Maariko, mubhyara uwa Bharinaabha, wonswe nkobhakëërya arë. Hano arihika kö-bhëënyu iyö, mömösërëëni bhuuya kya bhono naaraghërrya. ¹¹Kora Yëësu oora akobherekerwa igha Yusito, wonswe nkobhakëërya arë. Mo-Bhayahudi bhano bhaakumya Kiristo, m-bano abheene igho, mbo bhakokora emeremo ighya Obhokama ubhwa Waryobha hamwë na öni. Nköntöörrya bharë bhököngʼu. ¹²Epafura Omokorosaai murikyënyu wonswe nkobhakëërya arë, wonswe m-mököri uwa emeremo uwa Kiristo Yëësu. Epafura uyö, naana omotono ughwa okobhasabhera nkaagha syonswe igho, nkobhasabhera arë igha, monaghe ku-mukumo ughwënyu, na mohangarre ko amangʼana ghano Waryobha akutuna igha mokore. ¹³Ndatora ukumwimererra igha, nkokora arë emeremo kwa motono, ko okoghera iya bhëënyu, na ko-bhantö abha umughi ughwa Raodikia na abha umughi ughwa Hierapori. ¹⁴Ruuka ömörëri omoghonshe uwëëtö, bhaana Dema, bharabhakëërya. ¹⁵Mötökëërri abhakumya bharikyëtö abha mu-mughi ughwa Raodikia. Mökëëri umusubhaati Nimufa na ekanisa iyö ikusikanera mu-nyumba iyaaye.

¹⁶Hano moraamare okosoma ritashandighi reno, mobhe na obhoheene igha, ekanisa iya Raodikia yonswe eresome. Kora na bhëënyu bhonswe mutune enshera iya ukunyoora ritashandighi reno naandëkëëyë Abharaodikia ryonswe moresome. ¹⁷Mötëëbhi Arikipo igha, ni-igha akore bhuuya emeremo gheno Omonene yaamohaana. ¹⁸Öni Pauro nkwandeka ndë ghano na okobhoko ukwane umwene, ndabhakëërya. Muhiite igha mo-kebhohe ndë. Örööbhö urwa Waryobha robhe hamwë na bhëënyu.