2 Timoteo

Ritashandighi irya kabhërë irya Pauro

ku-Timoteo

Obhotangati

Ritashandighi reno, ndyaandëkirwë na Pauro omotomwa uwa Yëësu Kiristo. Yaandëkëëyë Timoteo, ömöntö ono yaarenga ömötöörrya uwaaye uwa haangʼë (Maaha mo-ketabho ikya 2 Timoteo 1:2-5, 2:1). Pauro yaandëkirë ritashandighi reno enkaagha eno yaarë Ruumi mo-kebhohe (Maaha 2 Timoteo 1:16-17). Yaabhöhirwë enkaagha iya öbhötöngi ubhwa omokama Neero. Enkaagha iyö, Abhakiristo mbaanyankibhwanga bhököngʼu, ku ikibhuno ikya umukumo ughwabho. Ghwiki, Pauro yaaitegherranga igha, m-böngö akaaitirwë (Maaha 2 Timoteo 4:6-8). Enkaagha iyö, Timoteo yaarenga mu-mughi ghono ghwaabherekerwanga igha Ëfësö, ghono ghwaarë mo-mokowa ughwa Asia Enke (Maaha 2 Timoteo 1:18, 4:12-13, 4:19).

Ikibhuno ikya ukwandeka ritashandighi reno, no-kotogheka Timoteo, okore aisëëmi okoraareka Amangʼana Amaiya agha Yëësu, abhe na omotono, aghömërri amangʼana amaköngʼu ghonswe igho. Pauro yaaraghërrëëyi Timoteo igha, atëëbhi Abhakiristo abha Ëfësö igha, bhabhe na eteemo inshiiya. Bhaghoote bhuuya amëëghyö ghano bhëëghibhwa. Ghwiki akatëëbhya Timoteo igha, ange bhököngʼu amëëghyö agha obhorongo, kasi umwene akore omotono ughwa ukwëghya abhantö obhoheene. Ghwiki, Pauro yaatunanga bhököngʼu okomaahana na Timoteo.

Amakëërërryö

¹Nö-öni Pauro nkwandeka ritashandighi reno. Waryobha ku righonshe iryaye yaatunirë igha, mbe omotomwa uwa Kiristo Yëësu, okore ndaareke amangʼana agha öbhöhöru. Waryobha yaaraghaini igha, ömöntö nkunyoora arë öbhöhöru bhuyö, ku ukukumya Yëësu Kiristo. ²Timoteo nu-uwe nkwandekera. Uwe omoona uwaane omoghonshe ku-mukumo ghono tokosanga hamwë. Örööbhö, ikyabhera na omorembe ukurwa ku-Waryobha Taata uwëëtö na ko-Monene uwëëtö Kiristo Yëësu, bhebhe hamwë na uwe.

Pauro arakumya Waryobha na okotogheka Timoteo

³Öni nkukumya ndë Waryobha ono nkokorra emeremo ko amaitegherro amaiya, kya bhoora abhakörö abhaane bhamokorranga emeremo. Ku bhuyö, nkukuhiita ndë senkaagha syonswe igho ko-masabhi aghaane ubhutikö na omobhasö. ⁴Nkuhiita ndë bhoora waakuurrë amaisöri, roora twaatighaini. Nkwighomba ndë bhököngʼu igha, hano tokamaahana ghwiki, okore nshomerwe bhököngʼu. ⁵Kora ghwiki nkuhiita ndë umukumo ughwaho ughwa obhoheene. Umukumo ghuyö ghöökö uwëënyu Röisi yaarenagho, na nyakuwëënyu Eunike wonswe. Neena obhoheene igha, kora uwe wonswe nonagho. ⁶Ku bhuyö, nkukuhiitökya ndë igha, okore omotono ughwa okokorra emeremo ituho eno Waryobha yaakohaayë, hano naakötöörëëyë amabhoko. ⁷Okorenga igho, ko bhoora igha, umwika ghono Waryobha yaatohaana, tu-ughwa obhoobha hë, kasi nu-ghwa okotohaana singuru, righonshe na obhotoro ubhwa ukwirebherra.

⁸Mbe, bhoono otakaasooka ukwimererra amangʼana agha Omonene uwëëtö Yëësu Kiristo, handë okomaaha sënsöni ko bhoora igha öni mo-kebhohe ndë ko okoghera iya Omonene uwëëtö uyö. Kasi ghömërrya inyaanyi hamwë na öni, ko okoghera iya Amangʼana Amaiya, ku singuru seno okohaanwa na Waryobha. ⁹Waryobha yaatötöörya, akatushaaghora tobhe abhantö abhaaye. Tiyaakörrë igho ko bhoora igha twaakora amangʼana amaiya, ti-igho hë. Kasi yaakörrë igho ko okoghera iya ësëëmyö iyaaye, na örööbhö urwaye. Yaatohaayë örööbhö ruyö, ko okoreeta Kiristo Yëësu ko okoghera iya bhëëtö. Yaakörrë igho kora ataraabhomba ekebhara. ¹⁰Kasi bhoono, Waryobha yöörökëri örööbhö urwaye kö-bhëëtö, ku ukuusha ukwa Kiristo Yëësu Ömötöörya uwëëtö. Uyö, we yaaruusya-ho obhotoro ubhwa uruku, akatohonyorra öbhöhöru ubhwa amakora ghonswe igho, ko Amangʼana Amaiya.

¹¹Öni naashaaghorwa mbe omoraarëki, omotomwa, na umwëghya uwa Amangʼana Amaiya ghayö. ¹²Kiyö nkyo kekoghera ndanyanka. Kasi tenkosookera inyanko iyö hë, ko bhoora nemanyirë ono naakumya. Ghwiki nemanyirë igha, amangʼana agha obhoheene ghano Yëësu Kiristo yaangʼaana,1:12 Amangʼana agha obhoheene ghano Yëësu Kiristo yaangʼaana. Ensonga iyaamo iyëndë ni-igha, eno namohaayë. nkogharenda arë bhuuya okohekera urusikö roora arikyora. ¹³Onaghi bhuuya amëëghyö agha obhoheene ghaara naakwëghëri. Öghëëghinga ko-bhantö, öghëndërri okobha na umukumo na righonshe bheno twaahaanwa ko okobha na öbhömwë na Kiristo Yëësu. ¹⁴Amangʼana amaiya ghano waatëëbhibhwa, ogharende ku singuru isya Umwika Ömöhörëëru ono arëngë mö-bhëëtö.

¹⁵Uwe nomanyirë igha, abhantö bhonswe igho abha mo-mokowa ughwa Asia Enke bhantigha. Mo-bhayö, bhaamo bhaabho Fughero na Herimoghene. ¹⁶Ndasabha igha, Omonene Yëësu aashe kwabhera abhantö abha wa Onesiforo, ko bhoora hare kaaru yaasambaarokyanga enkoro iyaane. Kora tiyasookanga ukuusha okommaaha mo-kebhohe. ¹⁷Hano yaaishirë mu-mughi ughwa Ruumi hano, yaakörrë omotono ughwa ukuntuna akannyoora. ¹⁸Na uwe wonswe nomanyirë bhuuya, amangʼana amaaru ghano yaankörëëyë mu-mughi ughwa Ëfësö hayö. Omonene Yëësu aashe kumwabhera urusikö roora urwa okobhotora ibhiina.1:18 Omonene Yëësu aashe kumwabhera urusikö roora urwa okobhotora ibhiina. Ensonga iyaamo iyëndë ni-igha, Omonene Yëësu asabhere amaabhë Onesiforo ko-Monene Waryobha urusikö urwa okobhotora ibhiina.

Ököghömërrya ko-meremo ighya Waryobha

¹Mbe, uwe omoona uwaane ku-mukumo ghono tokosanga, obhe na singuru kö örööbhö rono tukunyoora ku ukukumya Kiristo Yëësu. ²Amëëghyö ghaara waaighwa ndaghamba harabhu igho mo-bhaimërërri abhaaru, bhoono uwe oghaghööti abhantö abha heene, bhano bharaatore ukwëghya abhantö abhandë.

³Ghömërrya inyaanyi kya umusirikare umuuya uwa Kiristo Yëësu. ⁴Umusirikare umuuya ono akutuna omonene uwaaye ashomerwe, takokora emeremo ighya ubhusirikare na eno araishooghania-mo na gheno ghetarëngë ighya ubhusirikare. ⁵Kora ömöntö ono akokera abhandë kö-mëhöörwë, wonswe takutuhwa igho atakörrë bhuuya, kya bhono amaraghërryö agha ömöhöörwë ghuyö ghakutuna. ⁶Kora ömöntö uwa omotono ko okorema, uyö we aingʼarëëyi okobha uwa mbere ukunyoora ibhyakorya. ⁷Timoteo, witegherre bhuuya amangʼana ghano nkökötëëbhya. Omonene Waryobha nakohaana obhotoro ubhwa okomanya ghonswe igho.

⁸Uhiite Yëësu Kiristo uwa eka iya omokama Daudi.2:8 Daudi. Maaha mo-faharaasa. Maaha mo-ketabho ikya 2 Samwëri 7:12-13. Waryobha yaamuryökëri ukurwa mo-bhaku. Ghayö ngo Amangʼana Amaiya ghano nkoraarekera abhantö. ⁹Ko okoghera iya amangʼana ghayö, öni nkunyanka ndë, na nkobhohwa ndë na iminyorro kya ömöntö omoghogho. Kasi engʼana iya Waryobha yo tekobhohwa hë. ¹⁰Ku bhuyö nköghömërrya ndë ghonswe igho, ko okoghera iya abhantö bhano bhaashaaghorwa na Waryobha igha bhabhe abhantö abhaaye. Nkokora ndë igho, okore abhantö bhayö bhahönibhwi ku ukukumya Kiristo Yëësu, kora bhasange ubhuhika ubhwaye bhono bhotakohwa.

¹¹Engʼana eno ni-iya heene, igha,

“Nyoore twaakwa hamwë na Kiristo,

ntorebha abhahöru hamwë nawe.

¹²Hano toraaghömërri,

ntoretonga hamwë nawe.

Hano toraamwange,

wonswe naritwanga.

¹³Hano toraange okobha abhantö abha heene ku-Yëësu,

umwene nköghëndërrya arë okobha ömöntö uwa heene,

ko bhoora igha, umwene taatore ukwikaana hë.”

Amaraghërryö ko omotomwa uwa heene uwa Waryobha

¹⁴Uhiitöki abhakumya amangʼana ghayö, na okobhakaania mbere iya Waryobha, bhatakaanyeerananga senkaani ko obhongʼana bhoke bhoke. Ko bhoora senkaani siyö, teseena moremo hë, kasi senkaani siyö, nkosarya sërë bhano bhakwitegherra. ¹⁵Okore omotono ughwa ukwëghya engʼana iya obhoheene, kya bhono ikutunwa na Waryobha igha yëghiibhwi. Hayö ho oraabhe ömököri uwa emeremo ono atakosookera emeremo ighyaye. Ghayö ngo Waryobha akutuna.

¹⁶Kasi wibhashe amangʼana amanyanku, teghaana ubhwera bhwobhwonswe bhoora hë, ko bhoora igha amangʼana ghayö, nkotoora gharë abhantö hare bhököngʼu na Waryobha. ¹⁷Amëëghyö aghaabho ghayö, ngaraaromaane kya öbhörööyë obhoghogho ubhwa insisa. Mo-bhantö bhayö, bhaamo Himenayo na Fireto. ¹⁸Abhantö bhayö, bhaasira bhököngʼu. Bhaatigha obhoheene, ko bhoora bhakoghamba igha, ukuryoka ukwa abhaku kwamara okobha-ho kare. Amangʼana ghayö bhakoghamba, nkusirya bharë umukumo ughwa abhantö abhandë. ¹⁹Kasi abhantö bhano bhanaghirë, bho n-kya umusingi umuuya ghono Waryobha yaakora. Ku-musingi kuyö, amangʼana ghandëkirwë igha,

“Omonene Waryobha namanyirë abhantö abhaaye,”2:19a Maaha mo-ketabho ikya Okobhara 16:5.

ghwiki igha,

“Ömöntö wowonswe ono akwibherekera igha nu-uwa Omonene Waryobha,

ni-igha atighe obhoghogho.”2:19b Maaha mo-ketabho ikya Zabhuri 34:14.

²⁰Mu-nyumba enene, bherabhanga-mo ëbhëntö ibhya seteemo nsharu, ëbhëntö ibhya esahaabhu na ibhya seehera, kora ibhya amatoto na ibhya ëmëtë. Ibhyëndë ni-ibhya okokorra emeremo ëmëhagharë, kasi ibhyëndë m-bya okokorra emeremo ghyoghyonswe gheno ghetarëngë ëmëhagharë. ²¹Mbe, hano ömöntö yaisaabhuura atighe obhoghogho bhuyö bhonswe igho, nkobha arë kya ëkëntö keno kyahorwa, ikya okokorra emeremo ëmëhagharë. Naraangʼarre ko-Monene uwaaye. Noraanyoore aisëëmëri okokora emeremo imiiya ghyonswe igho.

²²Wibhashe oronamba urwa ubhumura. Oghoote-ko amangʼana agha heene, obhe na umukumo, righonshe, na omorembe. Onaghi ghayö, hamwë na bhonswe igho bhano bhakosaasaama Omonene Waryobha kwa enkoro inshiiya. ²³Otakaabha na senkaani isya obhokangi seno setaana ubhwera, ko bhoora nomanyirë igha, senkaani kya siyö, ni-ribheeha sekoreeta. ²⁴Ghwiki tiyingʼarëëyë igha ömököri uwa emeremo uwa Omonene Waryobha abhe umutindi. Kasi abhe ömöghömërrya, omohaabhu ko-bhantö bhonswe igho, kora abhe ömöntö ono aana obhotoro ubhwa ukwëghya. ²⁵Ni-igha akaaninga abhantö bhohaabhu igho bhano bhakumunyeera senkaani, okore hanga Waryobha akabhakora bhahongore ëbhëbhë ibhyabho, bhamanye obhoheene. ²⁶Hayö ho bharaasesemoke, bharwe mo-motegho ughwa Oghosambwa.2:26 Oghosambwa. Maaha mo-faharaasa. Oghosambwa ghwabhaghöötya, nkokora bharë bhono ghukutuna.

Sinsikö isya umuhiko ne-ngogho serebha

¹Bhoono Timoteo omanye igha, ereebha-ho inyanko engogho bhököngʼu ku-sinsikö isya umuhiko ughwa ekebhara keno. ²Senkaagha siyö, abhantö mbariihansha, mbarebha na oronamba urwa seehera, mbarebha abhaihashi, mbarebha na ikisiraani, mbarebha abha amatöki, tebharesookanga abhaibhöri abhaabho hë, tebharebha na umukumo hë, handë okosooka Waryobha. ³Kora tebharehansha ömöntö wowonswe oora hë, tebharitunanga ukwighwerrana hë, mbarebha abhaghambi abha abhantö, tebharirebherranga hë, mbarebha abharörö, tebharehanshanga amangʼana amaiya hë. ⁴Abhantö bhayö, mbarekorranga abhantö inikö, mbarebhanga na emetwe ëmëköngʼu, abha ikiheemere. Mbarehansha oronamba urwa ko-kebhara kono, okokera okohansha Waryobha. ⁵Abhantö bhayö, mbaremaahekananga igha nkwighwera bharë Waryobha, kasi mo-senkoro isyabho, nurinyoora bharanga obhotoro ubhwa Waryobha, ubhwa okorera seteemo isya abhantö. Abhantö kya bhayö, obhaibhashe.

⁶Mo-bhayö, bhaamo bhano bhakwihira mu-mighi ighya abhantö kebhongʼaini ngʼaini, na ököngʼënërrya abhakari abhakangi. Abhakari bhayö, m-bano bhaaritoherwa na ëbhëbhë, bhararutwa na oronamba urwaru rwaru igho. ⁷Abhakari bhayö, nkwegha bharë sinsikö syonswe igho, kasi tebhakotora okomanyërrya obhoheene röndë hë. ⁸Abhantö bhayö bhakwihira mu-mighi ighya abhantö, nkorebherra bharë obhoheene, kya bhoora Yane na Yambure,3:8 Yane na Yambure. Eramaahekana igha abhantö bhayö mbo bhaarenga abhakumu abha Omokama Farao uwa ikyaro ikya Miisiri. Maaha mo-ketabho ikya Ukurishoka 7:11-22. bhaarebherranga Mosa. Emetwe ighya abhantö bhayö ghyasareka, bhaatigha ukukumya Waryobha. ⁹Kasi tebharihika hasë hë, ko bhoora ubhusheema ubhwabho mboremanywa na abhantö bhonswe igho, kya igho yaarë ku Yane na Yambure.

Amaraghërryö agha Pauro ku-Timoteo

¹⁰Kasi uwe waaghoota-ko amëëghyö aghaane, eteemo iyaane, ësëëmyö iyaane, umukumo ughwane, na ököghömërrya ukwane, ¹¹righonshe iryane na ököghömërrya ukwane. Kora nomanyirë bhono abhantö bhaanyankyanga na okonteesa, hano naarë mu-mighi gheera ghekobherekerwa igha Antiökia, Iköniö na Risitira. Ghwiki nomanyirë igha, naaghömërrëëyi bhököngʼu amangʼana ghonswe igho ghano bhaankörëëyë, kasi Omonene Yëësu akantöörya ko-ghonswe igho ghayö. ¹²Mbe, bhonswe igho bhano bhakukumya Kiristo Yëësu, na bharatuna igha bhabhe na eteemo iya okosooka Waryobha, bhonswe mbaranyankibhwinga. ¹³Kasi abha ëbhëbhë na bhano bhakongʼaina abhantö, mbarëghëndërrya bhököngʼu okokora ëbhëbhë, mbarengʼainanga na okongʼainwa.

¹⁴Kasi uwe, noona obhoheene igha, amangʼana ghano wëëghibhwa na-agha obhoheene. Bhoono öghëndërri nagho, ko bhoora nomanyirë bhano bhaakwëghëri. ¹⁵Wamanya Amaandeko Amahörëëru ökërëngë moke. Amaandeko ghayö, nkokohaana gharë obhongʼaini bhono bhokoghera ömöntö ahönibhwa ku ukukumya Kiristo Yëësu. ¹⁶Amaandeko Amahörëëru ghonswe igho nku-Waryobha ghaarwa. Ku bhuyö amaandeko ghayö, ngaingʼarëëyë ukwëghya abhantö obhoheene, na okobhakaania okore bhatighe amangʼana amaghogho ghano bhakokora, okobhakaania hano bhasarri, na ököbhöörökya kera ëkëntö keno kingʼarëëyë Waryobha. ¹⁷Amaandeko ghayö, nkösëëmya gharë ömöntö uwa Waryobha okore atore okokora amangʼana amaiya ghyonswe igho.

¹Nkokoraghërrya ndë amangʼana ghano mbere iya Waryobha na mbere iya Kiristo Yëësu, ono arebhotorra ikiina abhahöru na abhaku. Uyö we ariisha atonge ko-Bhokama ubhwaye. ²Bhoono oraarekenga engʼana iya Waryobha na eno wisëëmëri okokora emeremo ighya Waryobha, ko-nkaagha eno amangʼana ghakughya bhuuya, na enkaagha eno ukunyoora ghasarëkirë. Okaaninga abhantö, obhahamerenga na okobhatogheka. Okorenga igho, kö ököghömërrya bhököngʼu na örëëghya. ³Nkökötëëbhya ndë ghayö ko bhoora iriihika-ho enkaagha, eno abhantö bharyanga ukwitegherra amëëghyö agha obhoheene. Mbaritunanga ukwitegherra amangʼana ghano ghakobhashomera agheene igho, na ukwishaaghorra abhëëghya abhaaru abha ököbhëëghya ghano bhakutuna ukwitegherra. ⁴Mbaritigha ukwitegherra obhoheene. Mbarikërrya amaghano ghano ghataana ubhwera bhwobhwonswe bhoora. ⁵Kasi uwe Timoteo, wangarre ko amangʼana ghayö ghonswe igho. Öghömërri inyaanyi, okore emeremo ighya okoraareka Amangʼana Amaiya, okore bhuuya kö-bhököri ubhwaho bhonswe igho, ubhwa emeremo ighya Waryobha.

⁶Nkökötëëbhya ndë ghayö, ko bhoora igha, öbhöhöru ubhwane, haangʼë bhörë bhobhe ikimwenso ku-Waryobha.4:6 Maaha mo-ketabho ikya Ukurishoka 29:38-41. Enkaagha iya ukukwa ukwane haangʼë ërë. ⁷Naitaini bhuuya riihë irya umukumo, oroghendo urwa umukumo ndomarrë, na ghwiki nnaghëri umukumo. ⁸Bhoono keno kitighaayë, no-kohaanwa ikirighi ikya heene. Omonene Yëësu, ono akobhotora ibhiina ubhwa heene, narekengʼaana urusikö roora arikyora. Tö-öni umwene igho hë, kasi na abhandë bhonswe igho bhano bhakwitengʼera bhököngʼu ukukyora ukwaye.

Amasaasaamo agha Pauro ku-Timoteo

⁹Timoteo, kora omotono wangohe ukuusha, ¹⁰ko bhoora Dema, yaantigha. Dema uyö, yaahansha amangʼana agha ko-kebhara kono, akamaaha igha aghende mu-mughi ughwa Tësarönikë. Kiresike, yaghëëyë mo-mokowa ughwa Gharatia, na Tiito, yaghëëyë mo-mokowa ughwa Darimatia. ¹¹Ruuka umwene igho we yatighara hamwë na öni hano. Bhoono hano oraashe eno, uushe na Maariko, ko bhoora naingʼarëëyë ököntöörrya okokora emeremo ighya Waryobha. ¹²Naatömirë Tikiiko Ëfësö iyö. ¹³Hano uriisha, ondeterani na rikööti iryane reno naatighirë wa Karipo eera, mu-mughi ughwa Tiroa, hamwë na ebhetabho ibhyane, ekenene ibhya amaseero bheera.

¹⁴Arekisanda umuturi uwa ibhyoma oora, yaankorra amangʼana amaghogho bhököngʼu. Omonene Yëësu Kiristo naaremobhotorra ikiina okorengʼaana na ghano yaakora. ¹⁵Na uwe wonswe, wiyangarre kö-möntö uyö, ko bhoora igha, yaarebherranga bhököngʼu amëëghyö aghëëtö.

¹⁶Hano naaimërëëyë urwa mbere ukwikoorerra öni umwene mo-bharasa haara, tiyaare-ho ömöntö kora ömwë, ono yaarë orobhareka urwane, bhonswe igho mbaantighirë. Ndasabha Waryobha atakaabhagherra obhosarya ko engʼana iyö. ¹⁷Kasi Omonene Yëësu yaarenga hamwë na öni, akangʼaana singuru isya okoraareka Amangʼana Amaiya, okore Abhakyaro bhonswe bhaighwe. Akanhonia na ruku, ko bhoora igha naarenga kya ono ndëngë mu-munywa ughwa ëndwë. ¹⁸Nemanyirë igha Omonene Yëësu, naraaghëndërri ököntöörya ko-maghogho ghonswe igho na okondenda, okohekera ko-Bhokama ubhwaye ubhwa mu-ryobha. Omonene Yëësu atöönibhwi amakora na amakora! Amina.

Amangʼana agha okoragha

¹⁹Ökëëri Akiira na Purisika mokaaye, na abhantö abha Onesiforo. ²⁰Erasito yaatighaayë Körintö. Turofimo naamutighirë Mireto, m-mörööyë yaarë. ²¹Bhoono ni-igha wangohe ukuusha eno, enkaagha iya embeho itaraabha. Eubhuro, Pude, Rino, na Kiraudia, hamwë na abhakumya bhonswe igho, bharakökëërya.

²²Omonene Yëësu abhe hamwë na uwe. Örööbhö urwaye, robhe hamwë na bhëënyu bhonswe igho.