2 Abhatësarönikë

Ritashandighi irya kabhërë irya Pauro

ko-Bhatësarönikë

Obhotangati

Enkaagha ne-nke igho yaahëtirë-ho ukurwa hano Pauro yaatomaini ritashandighi iryaye irya mbere, akanyoora amangʼana igha, abhakumya abha Tësarönikë, tebhaamanyërrëëyi bhuuya amëëghyö aghaaye aghandë. Abhandë mbaakanyanga igha Yëësu yaamara ukukyora. Na abhandë okanyoora bhatigha okokora emeremo ighyabho ghyonswe igho, bhareesegha igha, Yëësu nakaakyörrë enkaagha yoyonswe eera. Abhandë tebhatunanga okokora emeremo, ko bhoora m-booro bhaarë. Ku bhuyö, Pauro akaandeka ritashandighi irya kabhërë, okore asyöri amaitegherro amaghogho ghayö bhaarë nagho. Mu-ritashandighi irya kabhërë, yaakangʼasërrëëyi-mo igha, Yëësu taraabha uwa ukukyora ko-kebhara kono. Kora akabhakangʼasërrya igha, bhaghëndërri okobha na omotono ko-meremo.

Amakëërërryö

¹Ritashandighi reno nö-öni Pauro ndyandëkirë toona Siriwano1:1 Siriwano. Mo-maandeko aghandë arabherekerwa igha Siira. hamwë na Timoteo. Ekanisa iya umughi ghono ghokobherekerwa igha Tësarönikë, m-bëënyu tukwandekera, abhantö bhano mukukumya Taata uwëëtö Waryobha na Omonene uwëëtö Yëësu Kiristo.

²Taata uwëëtö Waryobha na Omonene uwëëtö Yëësu Kiristo, bhabhahaane örööbhö na omorembe.

Okobhotora ikiina ukwa Waryobha hano Yëësu arikyora

³Abhakumya bharikyëtö, ni-igha tukumi Waryobha senkaagha syonswe igho, ko okoghera iya bhëënyu, ko bhoora umukumo ughwënyu nkoneneha ghörë bhököngʼu, ghwiki okohanshana ukwënyu, nköghëndërrya körë okoneneha. ⁴Ku bhuyö nkwikumya törë mo-makanisa agha Waryobha, ko okoghera iya ököghömërrya ukwënyu, na umukumo ghono moonagho ku-nyanko yonswe igho, na inyaanyi eno mukunyoora.

⁵Ghayö ghonswe igho nkwörökya gharë igha, okobhotora ibhiina ukwa Waryobha, n-kwa heene. Okobhotora ibhiina kuyö nkoraaghere bhëënyu mongʼaarre okosoha mo-Bhokama ubhwaye, bhono mukunyankera. ⁶Ku bhuyö Waryobha m-bwa heene arekora, ku ukunyankya bhano bhakobhanyankya. ⁷Bhëënyu bhano mukunyankibhwa, murimuunya inyanko iyëënyu hamwë na bhëëtö. Ni-igho Waryobha arekora, enkaagha eno Omonene Yëësu aremaahekana ararwa mu-ryobha. Nariisha na ëbhëmörë ibhya omorro hamwë na abhamaraika abhaaye abha obhotoro. ⁸Hayö ho arehaka ikisiiyomba ko bhano bhakwanga Waryobha na bhano bhatakosooka Amangʼana Amaiya agha Omonene uwëëtö Yëësu. ⁹Ubhushibhu bhuyö, mbörëghëndërrya okobhasikya amakora ghonswe igho, kora mbarebha hare na Omonene Yëësu, na ubhuhika ubhwaye obhonene. ¹⁰Urusikö roora Omonene Yëësu arikyora, narëtöönibhwa na abhantö abhaaye, kora naresookwa na abhantö bhonswe igho bhano bhakumukumya. Na bhëënyu bhonswe moreebha-mo, ko bhoora mwikërëëyi engʼana eera twaabhatëëbhëri.

¹¹Ku bhuyö nkobhasabhera törë sinsikö syonswe igho igha, Waryobha uwëëtö abhakore morengʼaane na keno yaabhabhërëkërra. Ghwiki nkobhasabhera törë igha, ko obhotoro ubhwaye, ahekerani amangʼana amaiya ghano mukutuna okokora, na okohekerania emeremo ighyënyu ghyonswe igho ighya umukumo. ¹²Ni-igho tokosabha, okore iriina irya Omonene uwëëtö Yëësu, rëtöönibhwinga okohetera kö-bhëënyu. Kora bhëënyu mötöönibhwinga ko okoghera iya Yëësu. Ghayö ngarebha ko okoghera iya örööbhö urwa Waryobha uwëëtö, na urwa Omonene Yëësu Kiristo.

Ukuusha ukwa kabhërë ukwa Omonene Yëësu

¹Bhoono abhakumya bharikyëtö, tigha tobhandekere amangʼana agha ukuusha ukwa Omonene uwëëtö Yëësu Kiristo, na kya igho turimwisangerra.2:1 Maaha mo-ketabho ikya 1 Abhatësarönikë 4:17. Keno tokobhasabha ni-igha, ²motakaaheeta okobhaabhayera morakanya igha, urusikö urwa ukuusha ukwa Omonene ruhikirë. Mbe, eratora okobha igha mwaaighwa amangʼana nyabhorebhe agha öbhörööti, handë agha obhoraarëki, handë agha ritashandighi reno mokokanya igha ni-ryëtö. ³Motakaikërrya ömöntö wowonswe oora abhangʼaine ko-ngʼana yoyonswe eera, ko bhoora urusikö ruyö urwene teroraahika hë. Tangata sinsikö sihike isya abhantö abhaaru okoteeya bhököngʼu ku-Waryobha, na hano ömötëëyu omonene aremaahekana. Umuhiko ughwa ömötëëyu uyö, nu-kusikibhwa këmwë. ⁴Ömötëëyu uyö nariitanganga kera ëkëntö keno abhantö bhakokora igha nkyo Waryobha, handë amasambwa aghaabho ghano bhakosengerra, kora nariitoora ighörö iya bhyonswe igho. Ghwiki areesoha na ukwikara mu-nyumba iya Waryobha na ukwighegha igha we Waryobha.

⁵Nemanyirë nkuhiita mörë igha, hano naarenga hamwë na bhëënyu, ghayö ghonswe igho ngo naabharaghërryanga. ⁶Mmomanyirë keno kekorebherra ömötëëyu uyö bhoono igho, okore aashe okomaahekana ko-nkaagha iyaako. ⁷Kora bhoono ömötëëyu uyö, nkokora arë emeremo aibhisirë. Kasi tamaahekane hë, okohekera hano ono akomorebherra arëhëënibhwa-ho. ⁸Hayö bhoono, ho ömötëëyu uyö aremaahekana. Kasi hano Omonene Yëësu ariisha, narimwita na umwika ughwa mu-munywa ughwaye, na narimusikya ko okohetera ubhuhika ubhwa ukuusha ukwaye.

⁹Ömötëëyu uyö, nariisha na singuru syonswe igho isya Oghosambwa2:9 Oghosambwa. Maaha mo-faharaasa. na arekora amakono na ebhemanyërryö ibhya obhorongo. ¹⁰Narebhangʼaina ko obhongʼanangʼana ubhwaru, bhonswe igho bhano bharëngë ko-bhesendo ibhya ukusira, ko bhoora bhakwanga ukwikërrya obhoheene, okore bhatööribhwi. ¹¹Nkyo Waryobha yaabhaikërërrya bhatangatwe na singuru isya okobhasirya, okore bhaghëndërri ukukumya obhorongo. ¹²Hayö ho bharebhotorrwa ikiina, abhantö bhonswe igho bhano bhatarikumya obhoheene kasi në-bhëbhë bhaashomerrwanga nabhyo.

Monaghi umukumo ughwënyu

¹³Kasi bhëëtö, ni-igha tukumi Waryobha senkaagha syonswe igho, ko okoghera iya bhëënyu abhakumya bharikyëtö, bhëënyu bhano mohanshirwë na Omonene Yëësu. Ni-igha tokore igho, ko bhoora yaabhashaaghööyë ukurwa okosemoka ukwaye ukwa öbhöbhömbi,2:13 Yaabhashaaghööyë ukurwa okosemoka ukwaye ukwa öbhöbhömbi. Senakara isyëndë syandëkirë igha, yaabhashaaghööyë mobhe abhakumya abha mbere. okore möhönibhwi. Möhönibhwi ko okosaabhuurwa na Umwika Ömöhörëëru ono akosaabhuura, na ko kohetera ukukumya ukwënyu obhoheene. ¹⁴Waryobha yaabhabhërëkëëyë, okore munyoore öbhötöörya bhuyö okohetera ko Amangʼana Amaiya ghano twaabharaarëkëëyë. Abhabhërëkëëyë okore munyoore ubhuhika ubhwa Omonene uwëëtö Yëësu Kiristo. ¹⁵Bhoono abhakumya bharikyëtö, mwimerre monaghe, moghoote amëëghyö ghano mwaaikërëëyi, nekaabha ko-nshera iya obhoraarëki ubhwëtö, handë ko-nshera iya amatashandighi aghëëtö.

¹⁶Omonene uwëëtö Yëësu Kiristo na Waryobha Taata uwëëtö ono atohanshirë, na kö örööbhö urwaye, nkötöröörësya arë amakora ghonswe igho, na okotohaana ubhweseghe ubhurito. Nkosaasaama törë igha, ¹⁷abharöörësi mo-senkoro, kora abhatogheke, okore moghambenga na okokora amangʼana amaiya.

Pauro arasabha bharikyaye bhabhasabheraninga ku-Waryobha

¹Bhoono abhakumya bharikyëtö, motosabheraninga, okore amangʼana agha Omonene Yëësu gharomaane bhöngö. Motosabherenga, okore abhantö bhaghaikërri na bhaghasooke, kya bhoora yaarë kö-bhëënyu. ²Motosaasaamerenga, okore Waryobha atötöörri ko-bhantö abhaghogho na abhaköri abha amangʼana amaghogho, ko bhoora te-bhantö bhonswe igho bhakukumya amangʼana ghayö hë. ³Kasi Omonene Yëësu uwa heene, naraabhatogheke na abharende motakaanyoorwa na mangʼana agha Omoghogho oora. ⁴Omonene uyö, we akotohaana ubhweseghe obhonene kö-bhëënyu igha, nkokora mörë, kora moraaghëndërri okokora ghaara twaabharaghërrëëyi. ⁵Omonene Yëësu, atangate senkoro isyënyu ku righonshe irya Waryobha, na kö ököghömërrya kono tokohaanwa na Kiristo.

Okokaania abhooro bhatighe obhooro

⁶Abhakumya bharikyëtö, nkobharaghërrya törë okohetera ubhwera ubhwa Omonene Yëësu Kiristo igha, mwibhashe abhahiiri abhatereghanu bhonswe igho, bhano bhatakokora kya bhoora twaabharaghërrëëyi. ⁷Keno kekoghera toraghamba igho, n-ko bhoora bhëënyu abheene mmomanyirë igha, ni-igha mweghe eteemo iyëëtö eno twaarenayo kö-bhëënyu hayö. Bhëëtö hano twaarë hayö, te-bhatereghanu twaarë hë. ⁸Bhëëtö tetwaryanga ibhyakorya ibhya ömöntö wowonswe oora bhosa igho hë. Kasi ntwaarenga na omotono ughwa okokora emeremo ubhutikö na omobhasö, okore totakaanyankya ömöntö uwëënyu wowonswe oora. ⁹Ni-igho twaakörrë, kasi ti-igha tetwaingʼarëëyë ukunyoora ëbhëntö kö-bhëënyu, kasi keno twaatunanga ni-igha, tobhakorre ëkërëngyö, okore bhëënyu bhonswe momaahere-ko. ¹⁰Ghwiki hano twaarë hamwë na bhëënyu, ntwaabharaghërrëëyi igha, “Ömöntö wowonswe ono atakutuna okokora emeremo, okorya kwonswe atighe.”

¹¹Nkoghamba törë amangʼana ghayö ko bhoora tukwighwa igha, bhaaho abhantö abhatereghanu kö-bhëënyu hayö, bhano bhatakokora omoremo ghwoghwonswe ghoora, kasi keno kebhatönëri na-mangʼana agha abhantö abhandë. ¹²Abhantö bhayö torabharaghërrya na okobhakaania ku ubhwera ubhwa Omonene Yëësu Kiristo igha, bhakorenga emeremo ighyabho bhahörëërrë, okore bhabhe na ibhyakorya ibhyabho abheene. ¹³Kasi bhëënyu abhakumya bharikyëtö, motakaarosa okokora amangʼana amaiya.

¹⁴Mwangarre ömöntö wowonswe ono atakutuna okoghoota amaraghërryö aghëëtö ghano gharëngë ku-ritashandighi reno, motakaasanga nawe, okore asooke. ¹⁵Kasi motakaamokora kya umubhisa, momokaaninga kya murikyënyu.

Amangʼana agha okoragha

¹⁶Bhoono, Omonene Yëësu umwene, ömösëmöri uwa omorembe, abhahaanenga omorembe senkaagha syonswe igho, ko-senshera syonswe igho. Abhe hamwë na bhëënyu bhonswe igho. ¹⁷Öni nö-öni Pauro ono mbandëkëëyë amangʼana agha öbhökëërërrya bhono ko okobhoko ukwane öni umwene. Kiyö nkyo ekemanyërryö ikyane ko-matashandighi aghaane ghonswe igho, na ni-igho nkwandekanga.

¹⁸Örööbhö urwa Omonene uwëëtö Yëësu Kiristo, robhe hamwë na bhëënyu bhonswe igho.