2 Peetero

Ritashandighi irya kabhërë irya

Peetero

Obhotangati

Ritashandighi irya kabhërë irya Peetero reno, ryaandëkirwë na omotomwa Peetero. Peetero yaandëkëëyë abhakumya bhonswe igho, hano yaarenga mu-mughi ughwa Ruumi, ribhagha ike igho ataraakwa. (Maaha 2 Peetero 1:1).

Peetero yaandëkirë ritashandighi reno, okore arebherre amëëghyö agha obhorongo agha abhantö nyabhorebhe. Amëëghyö ghayö, tegharengerranianga na obhoheene ubhwa Amangʼana Amaiya hë. Peetero arëëghya abhantö kya bhono bharaatore okorebherra amëëghyö agha obhorongo. Arabhatëëbhya igha, ni-igha bhaghoote amëëghyö agha heene ghano ghakoghera ömöntö amanya Waryobha na Omoona uwaaye Yëësu Kiristo. Amëëghyö agha obhoheene ghayö, ngëëghiibhwi na bhano bhaarööshë Yëësu Kiristo na amaiso aghaabho abheene, kora bhakaighwa ghano yëëghyanga.

Mu-ritashandighi reno, Peetero arakangʼasërrya-mo amangʼana agha öbhömënyi ubhwa Ikikiristo, na agha öbhöntö ubhwa heene ko-meremo ighya Waryobha. Nkokangʼasërrya arë ghayö, ko okorengʼaana na amangʼana ghano ghaaghambirwë kora ghakëëghibhwa na abhantö bhano bhaarööshë Omonene Yëësu Kiristo. Nkwanga arë kwa öbhörrö emeremo na seteemo isya abhantö bhano bhaaromanianga amëëghyö agha obhorongo. Ko okomarërrya, Peetero nkutuna arë arebherre amangʼana agha abhantö bhano bhakwëghya igha, Yëësu tarikyora ko-kebhara kono hë. Nkokangʼasërrya arë igha, keno kekoghera Yëësu ataraakyora, n-ko bhoora Waryobha aköghömërrya bhököngʼu abhantö. Waryobha nkomaaha arë igha aghömërri okohekera hano abhantö abhaaru bharimukumya, okore bhatööribhwi.

Amakëërërryö

¹Ritashandighi reno nö-öni Simeoni Peetero ndyandëkirë, öni ömököri uwa emeremo, na ghwiki m-motomwa uwa Yëësu Kiristo ndë. Bhëënyu bhano mwanyoora umukumo ughwa ubhwera, m-bëënyu nkwandekera. Mwaanyoora umukumo ghooraghoora, ghono na bhëëtö bhonswe twaanyoora okohetera ko obhoheene ubhwa Waryobha na ömötöörya uwëëtö Yëësu Kiristo. ²Örööbhö na omorembe bhebhe hamwë na bhëënyu bhököngʼu, ko okohetera ko okomanya Waryobha bhaana Omonene uwëëtö Yëësu.

Okobherekerwa hamwë na ukwahorwa na Waryobha

³Waryobha yaatohaana ghonswe igho ghano tukutuna, okohetera ko obhotoro ubhwaye, okore tobhe na öbhöhöru, kora tomosooke. Yaatohaana ghayö ko enshera iya okomomanya. Ghwiki atöbhërëkëëyë ko okoghera iya ubhuhika na öbhöntö ubhwa heene ubhwaye. ⁴Ko okoghera iya ghayö, yaatohaana imituho emenene ighya ubhwera, kya bhono yaatoraghaini. Imituho ghiyö, nkötötöörrya ghërë ukwibhasha obhoghogho bhono bhokoreetwa na oronamba oroghogho, urwa ko-kebhara kono. Ghwiki nkötötöörrya ghërë, okore tosange eteemo iya Waryobha.

⁵Ku bhuyö mokore omotono, okore umukumo ughwënyu ghwëngëribhwi-ko öbhöntö ubhwa heene, öbhöntö ubhwa heene bhuyö, bhwëngëribhwi-ko obhongʼaini. ⁶Ghwiki obhongʼaini bhuyö, bhwëngëribhwi-ko ukwirebherra, ukwirebherra kuyö, kwëngëribhwi-ko ököghömërrya, ököghömërrya kuyö, kwëngëribhwi-ko okosooka Waryobha. ⁷Okosooka Waryobha kuyö kwëngëribhwi-ko righonshe irya okohanshana bhëënyu abheene ko abheene, okohanshana kuyö, kwëngëribhwi-ko na righonshe irya okohansha abhantö bhonswe igho. ⁸Hano seteemo siyö seraaiyëngëri kö-bhëënyu, nsebhatöörrya, okore ko amangʼana agha okomanya Omonene uwëëtö Yëësu Kiristo, motakaabha kya ëmëtë gheno ghetakwama. ⁹Kasi ömöntö ono ataana seteemo siyö, uyö n-kya umuhukuru, ko bhoora yeebha igha, Waryobha yaamosaabhuura ëbhëbhë ibhyaye.

¹⁰Mbe, abhakumya bharikyane, mokore omotono bhököngʼu, ukwörökya igha, Waryobha yaabhabherekera na okobhaahora. Hano moraakore igho, timutighe umukumo ughwënyu kora hake hë. ¹¹Ku bhuyö mörësërëënibhwa bhököngʼu, mosohe mo-Bhokama ubhwa amakora ghonswe igho, ubhwa Omonene na Ömötöörya uwëëtö Yëësu Kiristo.

¹²Ko okoghera iya ghayö, nendaaghëndërringa okobhahiitökya amangʼana ghayö sinsikö syonswe igho, nokaanyoora, mmoghamanyirë, kora monaghirë ko obhoheene bhono mweegha. ¹³Nkomaaha ndë igha, ni-igha mbahiitökinga amangʼana ghayö, senkaagha syonswe igho seno nkeheeshera ko-kebhara kono. ¹⁴Nkoghamba ndë igho, ko bhoora Omonene uwëëtö Yëësu Kiristo yaanhonyorra igha, nendaarwe ko-kebhara kono, na öni nkomaaha ndë igha, enkaagha iyö, n-haangʼë ërë. ¹⁵Kiyö nkyo kekoghera ndakora omotono ughwa okobhatëëbhya ghayö sinsikö syonswe igho, okore muhiitenga amangʼana aghaane ghayö, hano urinyoora nkuurë.

Abhantö bhano bhaarööshë ubhuhika ubhwa Kiristo

¹⁶Hano twëëghyanga abhantö amangʼana agha obhotoro ubhwa Omonene uwëëtö Yëësu Kiristo na ukuusha ukwaye, tetwaitengʼeranga amaghano agha kare ghano ghaandekwa kinyabhongʼaini ngʼaini. Kasi bhëëtö abheene, ntwaarööshë ubhuhika ubhwaye. ^17-18Bhëëtö hamwë twaarenga na Yëësu ku-nguku ëhörëëru, hano yaasöökirwë kora akahaanwa ubhuhika ukurwa ko-Taata Waryobha. Enkaagha iyö, yo twaaighuurë engamba iya ubhuhika obhonene, ararwa mu-ryobha ku-Waryobha umwene, ekaghamba igha, “Ono no-Moona uwaane1:17-18a Moona uwaane. Maaha mo-faharaasa, Omoona uwa Waryobha. omoghonshe, we aköntëghërya bhököngʼu.”1:17-18b Maaha mo-ketabho ikya Mataayo 17:5; Maariko 9:7; Ruuka 9:35.

¹⁹Kora ntoona amangʼana amaheene bhököngʼu, agha öbhörööti, hano moraaghaghoote, m-buuya oraanyoore mökörrë. Amangʼana ghayö n-kya etara eno ëkömërëkya mu-kisuntë, okohekera hano öröghörö roraasambe, na obhorabhu ubhwa inyota iya nyinkyo bhomoreke mo-senkoro isyënyu. ²⁰Kasi ekenene ni-igha momanye igha, tebhooho öbhörööti mo-Maandeko Amahörëëru, bhono abharööti bhaarahööyë kya bhono abheene bhaatunanga. ²¹Nkoghamba ndë igho, ko bhoora teeho engʼana iya öbhörööti eno yaareetwa na amaitegherro agha ömöntö wowonswe oora. Kasi abharööti bhayö, mbaaghambirë amangʼana ghano ghaaruurë ku-Waryobha ko okotangatwa na Umwika Ömöhörëëru.

Abhëëghya nyangasheka

¹Kasi ko-nkaagha eera iya abharööti abha Isiraëri, bhaibhökirë abharööti abha obhorongo. Ni-ighoigho erebha kö-bhëënyu igha, abhëëghya nyangasheka mbaryebhoka. Abhantö bhayö, mbarësöhya amëëghyö agha ukusirya abhantö, na mbaryanga Omonene ono yaabhatungurya. Ko okokora igho, mbareghera ukusika ukwabho kobhangohere. ²Kora abhantö abhaaru mbareghoota amangʼana aghaabho amaghogho ghayö. Na ko okoghera iya abhantö bhayö, enshera iya obhoheene neretokwa. ³Mbarebhaghaneranga amaghano agha obhorongo, ko oronamba urwabho oroghogho, okore bhanyoore keno bhakutuna kö-bhëënyu. Kasi okobhotorrwa ikiina ukwabho, kwamara kösëëmibhwa ukurwa kare. Ukusikibhwa ukwabho, tekoteghete hë.

⁴Abhamaraika bhano bhaakörrë ëbhëbhë, Waryobha tiyaabhatighirë hë. Kasi yaabhatabhutirë mu-kyaro ikya abhaku,2:4 Ikyaro ikya abhaku. Engʼana eno ku-Kiyunaani ni-igha, Taritarosi reraimererra ahasë aha ikisuntë hano abhaku bhakoghanyera okobhotorrwa ibhiina ibhyabho. Ensonga iya engʼana iyö nituubhaini na engʼana eera igha, Hadesi. Maaha mo-faharaasa. bhakabhohwa-mo na ebheraangʼani mu-kisuntë. Mu-kyaro ikya abhaku muyö, mo bhakoghanyera urusikö urwa okobhotorrwa ikiina. ⁵Ghwiki ni-igha, enkaagha eera iya Nuhu, Waryobha tiyaatighirë ukushibhya abhantö bhano bhatamwighwërëëyë, yaarëëtirë ëhöörö iya amanshë ko-kebhara, abhantö bhakakwa. Akatöörya Nuhu hamwë na abhantö abhandë muhungatë. Nuhu uyö, we yaaraarëkëëyë abhantö abha enkaagha iyaaye igha, bhakore bhono Waryobha akutuna. ⁶Ghwiki Waryobha akasamba imighi ighya Sodoma na Ghomora na omorro, ghekabha riibhu, akaghisikya hamwë na abhantö abha mu-mighi ghiyö. Akabhakora ëkërëngyö ko-bhantö bhano bhatakumwighwera. ⁷Waryobha akatöörya-mo Ruutu ono yaarë ömöntö uwa heene. Ruutu yaaighwanga bhoghogho, hano yaamaahanga seteemo sengogho isya abhasarya bhayö. ⁸Ömöntö uwa heene uyö hano yaamënyirë hamwë nabho, enkoro iyaaye ekabhaabhayera bhököngʼu, ku-sinsikö sinsharu ko okoghera iya amangʼana amaghogho ghayö yaaighwanga na okomaaha. ⁹Ku bhuyö momanye igha, Omonene Waryobha namanyirë enshera iya ökötöörya abhantö abhaaye, bharwe mo-mashaashyo. Kora ghwiki namanyirë bhono arishibhya abhakora amaghogho, urusikö urwa okobhabhotorra ikiina. ¹⁰Ekenene m-baara abha oronamba oroghogho urwa kinyamöbhërë, bhano bhakosera ubhwera ubhwa Waryobha.

Abhantö bhayö, m-baana eteemo iya senkaani na ikiheemere, kora tebhaakoobhoha okotoka ëbhëntö ibhya ubhuhika, bheno bhërëngë mu-ryobha. ¹¹Nokaanyoora abhamaraika mbaana singuru na obhotoro obhonene, kasi bho tebhakushongera na okotoka ëbhëntö ibhya ubhuhika bhiyö ko-Monene Waryobha. ¹²Abhantö bhayö, bho nkotoka bharë ëkëntö kyokyonswe igho, keno bhatamanyirë. Mbatuubhaini kya sityënyi seno setaana obhongʼaini, ko bhoora nkwebhorwa sërë igho, okore seghootwe na okoghooghwa! Ni-igho abhëëghya nyangasheka bhayö bharisika. ¹³Ghwiki mbarishibhibhwa bhanyoore inyanko, kya bhono bhaanyankëri abhandë. Nkushomerwa bharë okokora amangʼana aghaabho agha oronamba urwabho oroghogho, harabhu igho. Kora nkushomerwa bharë okobhatëëbhya amangʼana agha obhorongo, ko-nkaagha eno ukunyoora bhararya hamwë na bhëënyu. Ko okokora amangʼana ghayö, nkobha bharë kya ubhunyanku na amahara ghano gharëngë ku-ngibho endabhu.2:13 Ko okokora amangʼana ghayö, nkobha bharë kya ubhunyanku na amahara ghano gharëngë ku-ngibho endabhu. Senakara isyëndë syandëkirë igha, Kora enkaagha eno bhakosanga na bhëënyu ku-sinyangi isyënyu isya righonshe, nkushomerwa bharë ko-bhoraaghëri ubhwabho.¹⁴Amaiso aghaabho, n-ga kesooraare. Oronamba urwabho oroghogho urwa okokora ëbhëbhë, teroona umuhiko hë. Nköngʼënërrya bharë bhanyamukumo mötëntëëru. Senkoro isyabho, bhaasenarya ukwighomba ëbhëntö. Abhantö bhayö bhaihiimwa! ¹⁵Bhaatigha enshera ëndöngë, bhasira ko okoghoota enshera iya Bharaamu, omoona uwa Bhëöri. Ömöntö uyö, yaahanshirë ukunyoora ehoorohooro ko okokora amangʼana amaghogho. ¹⁶Ko okoghera iya eteemo iyö, Bharaamu yaahamërrëëywë na itikërë. Itikërë ni-tyënyi, kasi yaashumaashirë kya ömöntö ekarebherra ömörööti uyö, atighe okokora amangʼana agha ekekangi.2:16 Maaha mo-ketabho ikya Okobhara 22–24, 31:16.

¹⁷Abhantö bhayö n-kya ibhisima bheno bhetaana amanshë, n-kya indumbë eno ikuhuushwa na ikighumbë. Ahasë aha ikisuntë ekenene ho Waryobha yaabhasëëmërya. ¹⁸Nkoghamba bharë amangʼana agha ikiheemere, ghano ghataana ubhwera. Oronamba urwabho oroghogho urwa kinyamöbhërë, ndo rokoghera bharakemba abhantö bhano bhaakumya bhöngö hano, bhano bhaatigha okokora ghano abhasarya bhakokora. ¹⁹Nkoraghania bharë bhayö bhaakumya bhöngö ko okobhatëëbhya igha, mbaraanyoore öbhötöönööni, kasi bho abheene, m-baghorwa abha obhorangara, ko bhoora, ömöntö nkobha arë omoghorwa uwa ëkëntö kyokyonswe igho keno kekomobhaaha. ²⁰Hano ömöntö yaibhasha ubhunyanku ubhwa ko-kebhara kono, ko okomanya amangʼana agha Omonene Ömötöörya uwëëtö Yëësu Kiristo, amare ghwiki aghöötiibhwi, akerwe ukurwa mu-bhunyanku, nkobha arë na eteemo engogho bhököngʼu, okokera eera yaarë nayo ekembere. ²¹Nyakara hano akaangirë okomanya enshera iya heene iyö, okokera okoghemanya, ghwiki amare atighe amaraghërryö amahörëëru ghano yaahaaywë. ²²Ömöntö uyö, natuubhaini kya oroghero rono bhaarëngëri igha, “Ësëësë ikyörëëyë okorya amaröki aghaayo,”2:22 Maaha mo-ketabho ikya Sengero 26:11. ghwiki oroghero urwöndë nkoghamba rörë igha, “Ëmbëëshë eno yöghiibhwi, eraighaaraghaara ghwiki mo-matoto!” Ni-igho ekobha kö-möntö kya uyö.

Urusikö urwa Omonene

¹Abhaghonshe abhaane, ritashandighi reno nkobhandekera, ni-irya kabhërë. Naakora omotono ughwa okosesemora amaitegherro aghëënyu amaiya, mo-sehakëri isyënyu ko okobhahiitökya mo-matashandighi ghonswe igho abhërë ghayö. ²Nkutuna ndë muhiite amangʼana ghaara abharööti abhahörëëru bhaaghambirë kare hayö, na amangʼana agha umughiro ughwa Omonene Ömötöörya uwëëtö, ghano abhatomwa abhaaye bhaabharëtëëyë.

³Engʼana iya mbere ni-igha momanye igha, ku-sinsikö isya umuhiko, mbariisha abhantö abha inshabhura. Abhantö bhayö, no-ronamba urwabho urwene igho ndo rokobhanyankya. Mbarebhashabhura ⁴bharaghamba igha, “Kiristo yaaraghaini igha nakaakyörrë! Bhoono heegharë? Ukurwa abhakörö abhëëtö bhaakwa, amangʼana m-buyöbhuyö igho gharë, kya bhono ghaarë ukurwa okosemoka ukwa ekebhara!” ⁵Abhantö bhayö, bharaikörya kya bhano bheebha igha, kare Waryobha ne-ngʼana iyeene igho yaaghambirë, mu-ryobha na ekebhara bhekabhombwa. Yaabhömbirë ekebhara ukurwa mo-manshë na ko okohetera amanshë ghayöghayö, ko enshera iya engʼana iyaaye. ⁶Ghwiki okohetera amanshë ghayö, yaasikiri ekebhara ikya enkaagha eera. ⁷Ghwiki ko okohetera engʼana iyöiyö, Waryobha yatigha-ho mu-ryobha na ekebhara, okore bhiishe okosambwa mo-morro. Yabhitigha-ho okore bheghanye urusikö rono arebhotorra ibhiina abhantö bhano bhatakumwighwera, hayö bhoono, ho bharisika.

⁸Kasi abhaghonshe abhaane, motakeebha engʼana eno igha, ko-Monene Waryobha, urusikö örömwë ndongʼana kya imyoka ëkëkwë, na imyoka ëkëkwë, ngengʼana kya urusikö örömwë igho.3:8 Maaha mo-ketabho ikya Zabhuri 90:4.⁹Abhantö abhandë nkokanya bharë igha, Omonene Waryobha nkotegheta arë okohekerania ghano yaaraghaini. Kasi obhoheene takotegheta hë. We nköghömërrya arë ko okoghera iya bhëënyu, ko bhoora takutuna igha, ömöntö kora ömwë, asire hë. Keno akutuna ni-igha, bhonswe igho bhahongore ëbhëbhë ibhyabho. ¹⁰Urusikö urwa Omonene nduriisha igho kya umwibhi. Urusikö ruyö, ighörö iyö, harihëënia ukurwa-ho ku ikirumo ekenene. Ëbhëntö bheno bheemo, mberesambwa na omorro. Ekebhara kyonswe igho nkirisika hamwë na ëbhëntö bhyonswe igho bheno bheemo.

¹¹Mbe, ko bhoora ëbhëntö bhyonswe igho ni-igho bhirisika, bhoono bhëënyu, n-teemo kë mokaabha nayo ko-kebhara kono? Ni-igha mobhe abhahörëëru, mosooke Waryobha. ¹²Moghanyenga urusikö urwa Waryobha, kora morokore rwangohe ukuusha. Urusikö ruyö, ighörö iyö haresambwa na omorro hasike. Ëbhëntö bheno bheemo, mbiriyaaya ko okoghera iya rebherera rirörö bhököngʼu. ¹³Kasi bhëëtö nkoghanya törë mu-ryobha ahahya na ekebhara ekehya, kya bhono yaatoraghaini, ahasë hano haishööyë obhoheene.

¹⁴Ku bhuyö abhaghonshe abhaane, enkaagha eno mokeghanya urusikö ruyö, mokorenga omotono ughwa okobha na enkoro inshiiya bhököngʼu, motakaabha na risoro ku-Waryobha, kora mobhe na omorembe. ¹⁵Momanye igha Omonene nkobhaghömërrya arë, okore munyoore umweya ughwa ököhönibhwa. Ni-igho Pauro umukumya murikyëtö omoghonshe, yaabhandëkëëyë ko obhongʼaini bhono Waryobha yaamohaayë. ¹⁶Mo-matashandighi aghaaye ghonswe igho, na-mangʼana ghayö akushumaashera. Ghaamo amangʼana aghandë mo-matashandighi aghaaye, n-këköngʼu okoghamanya. Abhantö bhano bhataana obhongʼaini na bhanyamukumo mötëntëëru, nkoghasisasisa bharë kya bhono bhakusisasisa Amaandeko aghandë Amahörëëru. Nkwisikya bharë abheene ko okokora amangʼana ghayö.

Amangʼana agha okomarërrya

¹⁷Bhoono abhaghonshe abhaane, momarrë okomanya amangʼana agha abhëëghya nyangasheka bhayö, ku bhuyö mwiraarerre, okore motakangʼainwa na obhongʼaini ubhwa abhasarya bhayö, bhobhakore moghwe kora mutighe obhoheene ubhwënyu ubhwa obhoheene. ¹⁸Kasi möghëndërri okobha mö-rööbhö, mo-bhomanyi ubhwa okomanya Omonene uwëëtö, Ömötöörya uwëëtö Yëësu Kiristo. Atöönibhwi, bhoono igho, na amakora ghonswe igho! Amina.