2 Abhakörintö

Ritashandighi irya kabhërë irya Pauro

ko-Bhakörintö

Obhotangati

Ritashandighi reno, ryaandëkirwë na Pauro, omotomwa uwa Yëësu Kiristo. Reno n-ditashandighi irya kabhërë reno Pauro yaandëkëëyë Abhakiristo abha mu-mughi ghono ghwaabherekerwanga igha Körintö. Pauro uyö, we yaarë ömösëmöri uwa ekanisa iya Körintö iyö. Abhasömi nyabhorebhe bharaghamba igha, Pauro yaandëkëëyë Abhakörintö ritashandighi iryëndë handë amatashandighi aghandë, kasi tetonagho hë (Maaha mo-ketabho ikya 2 Abhakörintö 2:3-4).

Pauro nkoraghërrya arë mu-ritashandighi mono, keno kyaaghërrë akakubhya ësëëmyö iya oroghendo urwaye, urwa ukughya okotaarra Abhakörintö. Ghwiki nkoraghërrya arë keno kyaaghërrë akaandeka ritashandighi reno ryaaritöhëëyë Abhakörintö. Hamwë na ghayö, Pauro nkwörökya arë igha, ashömëëywë ko okoghera iya amangʼana ghano yaaighwa ukurwa ku-Tiito igha, Abhakiristo abha Körintö iyö, bhahöngööyë ëbhëbhë ibhyabho.

Keno kyaaghërrë Pauro akaandeka ritashandighi reno, n-ko bhoora yaatunanga öörökërri Abhakiristo abha Körintö keno kikutunwa bhakore ku-mukumo ughwabho. Arabhatëëbhya-mo igha, bhaiyangarre ko engʼana iya abhëëghya abharongo, bhano bhaisöhya bhubhise mo-kanisa, bhoono nkwëghya bharë amangʼana agha obhorongo. Abhëëghya bhayö, bhaaghambanga igha, Pauro tarëngë omotomwa uwa heene uwa Yëësu Kiristo hë. Abheene mbo bhaaikoranga igha, mbo abhatomwa abhanene abha Yëësu Kiristo. Pauro araimererra engʼana iyö, ko okoghamba igha, umwene we omotomwa uwa heene, kora naana ubhwera ukurwa ku-Yëësu Kiristo. Ni-igho akokora kö ökötëëbhya Abhakörintö igha, ubhuhika ubhwa Waryobha nkohekerana bhörë ko ghano abhantö bhakomaaha igha, m-matëntëëru. Ghwiki engʼana iyëndë no-koraghërrya Abhakörintö bhahaaheenere abhakumya abha Yërusarëëmu.

Amakëërërryö

¹Ritashandighi reno nö-öni Pauro ndyandëkirë. Öni no-motomwa uwa Kiristo Yëësu ndë, ku righonshe irya Waryobha. Öni na umukumya murikyane Timoteo, torabhakëërya bhëënyu bhano mörëngë mo-kanisa iya Waryobha eno ërëngë mu-mughi ughwa Körintö. M-bëënyu tökökëërya, hamwë na abhahörëëru abha Waryobha bhonswe igho, bhano bharëngë mo-mokowa ughwa Akaaya.

²Örööbhö na omorembe ukurwa ku-Waryobha Taata uwëëtö, na ko-Monene uwëëtö Yëësu Kiristo, bhebhe hamwë na bhëënyu.

Waryobha nköröörësya arë ömöntö mu-nyanko

³Akumibhwi Waryobha, Suwaabho Omonene uwëëtö Yëësu Kiristo, Taata nyamaabhë, Waryobha ono aköröörësya ko amangʼana ghonswe igho. ⁴We akötöghösörrya mu-nyanko iyëëtö yonswe igho, okore na bhëëtö bhonswe töghösörri abhandë bhano bharëngë mu-nyaanyi yoyonswe eera, kya bhono bhëëtö tököghösörribhwa na Waryobha. ⁵Mbe, kya bhono tukunyoora inyanko insharu ko okoghera iya Yëësu Kiristo, ni-ighoigho Waryobha arëtöghösörrya bhököngʼu okohetera ku-Yëësu Kiristo. ⁶Nokaanyoora toranyanka, kasi n-ko okoghera iya ököröörësibhwa ukwënyu na ököhönibhwa ukwënyu. Ghwiki igha, hano twaghösörribhwa, na bhëënyu bhonswe nköghösörribhwa mörë. Ököröörësibhwa kuyö, nko koraaghere möghömërri inyanko kya eeraeera na bhëëtö bhonswe tukunyoora. ⁷Toona ubhweseghe bhököngʼu kö-bhëënyu, ko bhoora tomanyirë igha, ko bhono mukunyanka kya bhëëtö, ni-ighoigho kora mörëröörësibhwa kya bhëëtö.

⁸Keno tukutuna abhakumya bharikyëtö, ni-igha momanye inyaanyi eno twaanyöörrë mo-mokowa ughwa Asia Enke. Twaanyöörrë inyaanyi indito eno yaatökërrë, kora ntwaakanyanga igha, ntokaakuurë. ⁹Obhoheene ntwaarenga kya abhantö bhano bhaabhotorrwa ikiina igha bhakwe. Engʼana iyö yaaikörrë, okore totakaisegha singuru isyëtö, kasi tweseghe Waryobha ono akuryökya abhaku. ¹⁰Waryobha uyö, we yaatöhönia, tokahona rwa ukwaghura, kora naraaghëndërri ökötöhönia. Bhëëtö we tukwitengʼera igha, ni-igho araakorenga nkaagha syonswe igho. ¹¹Kora bhëënyu nkötötöörrya mörë okotosabhera ku-Waryobha. Waryobha nkwighwa arë amasabhi aghëënyu, kora nkotongʼoora arë. Ku bhuyö abhantö abhaaru mbaraamukumi ko okoghera iya örööbhö urwaye kö-bhëëtö.

Pauro arakubhya oroghendo urwa ukughya Körintö

¹²Mbe, ikibhuno keno kekoghera toraikumya, ni-igha, amaitegherro aghëëtö nkutwimererra gharë igha, eteemo iyëëtö m-buuya ërë ko-kebhara kono, ekenene n-ku ubhwighwerrani ubhwëtö na bhëënyu, ko obhorabhu na obhoheene bhono bhukurwa ku-Waryobha. Tetwakörrë igho ko obhongʼaini ubhwa ko-kebhara kono, kasi nö-rööbhö urwa Waryobha, ndwo rwaaghërrë tokakora ghayö. ¹³Tetokobhandekera amangʼana ghano gharaabhataami okomanyërrya, kasi mmoraaghasome moghamanyërri. Neena ubhweseghe igha, moraamanyërri bhuuya amangʼana ghayö, ¹⁴nokaanyoora igha, bhoono igho, amangʼana te-ghonswe igho momanyirë hë. Kasi nkwitengʼera ndë igha moremanya bhuuya igha, bhëëtö mbo esemoko iya ukwikumya ukwënyu, kya bhono bhëënyu bhonswe mörëngë esemoko, iya ukwikumya ukwëtö, urusikö roora Omonene Yëësu Kiristo arikyora.

¹⁵Naarenga na obhoheene ubhwa amangʼana ghayö, kiyö nkyo kyaaghërrë nkatuna igha niishe kö-bhëënyu ekembere, okore munyoore umweya ughwa okomaahana na bhëëtö harë kabhërë. ¹⁶Naatunanga nhetere kö-bhëënyu hayö, enkaagha iya ukughya Makedonia, mmare nkyore kö-bhëënyu hayö, okore nnyoore omosorro kö-bhëënyu ughwa ukunhira Yudea. ¹⁷Hano naakubhiri ësëëmyö iyaane iya ukuusha kö-bhëënyu, tenaakörrë igho ntaitëghërrëëyë igha, n-kë nkokora hë. Motakaakanya igha, naakubhiri oroghendo ruyö, ko okohansha ukwane öni umwene, igha nikërri engʼana igha “Yëë,” ghwiki nteme hayö nange igha “A a.”

¹⁸Kasi ko bhono Waryobha arëngë uwa obhoheene, amangʼana ghano twaabhatëëbhëri, teghaarenga agha ömöntö ukwikërrya igha “Yëë,” ghwiki atema hayö aanga igha “A a.” ¹⁹Nkoghamba ndë igho, ko bhoora Yëësu Kiristo, Omoona uwa Waryobha,1:19 Omoona uwa Waryobha. Maaha mo-faharaasa. ono öni, Siriwano, na Timoteo tokoraareka kö-bhëënyu, tiyaarenga ömöntö uwa ukwishooghania amangʼana agha ukwikërrya igha, “Yëë,” ghwiki ateme hayö ange igha, “A a.” Kasi ku-uyö, nkaagha sonswe igho ni-igha, “Yëë.” ²⁰Ni-igho ërë, ko bhoora ghonswe igho ghano Waryobha yaaraghania okohetera ku-Yëësu Kiristo, na-agha obhoheene. Kiyö nkyo kekoghera toraghamba “Amina,” ko okoghera iya ökötöönia Waryobha. ²¹Mbe, Waryobha ono yatwahora, we akotokora toranagha ku-Yëësu Kiristo, bhëëtö hamwë na bhëënyu. ²²Waryobha, we yaatomaameka umuhuri ughwaye, kora akatohaana Umwika Ömöhörëëru mo-senkoro isyëtö, abhe ekebhete ikya ghonswe igho ghano aretohaana.

²³Tenaishirë Körintö iyö, ko bhoora ntatunanga munyahaareke mo-senkoro isyënyu. Ghayö nkoghamba no-bhoheene, kora Waryobha wonswe namanyirë igha, no-bhoheene nkobhatëëbhya. ²⁴Ti-igha nkobhaaha törë umukumo ughwënyu, kasi bhëëtö na-bhaköri abha emeremo hamwë na bhëënyu, ko okoghera iya ukushomerwa ukwënyu, ko bhoora umukumo ughwënyu ghwanagha.

¹Mbe, ku bhuyö nkamaaha igha, m-buuya ntakaasha kö-bhëënyu, okore ntakaaghera mobhaabhayere ghwiki. ²Naarööshë igha ebhe igho, ko bhoora igha, hano ndaghere mobhaabhayere, taaho ömöntö ono araaghere öni nshomerwe hë, bhëënyu m-bëënyu abha okoghera öni nshomerwe, kasi bhoono noraanyoore momarrë okobhaabhayera mo-senkoro isyënyu. ³Kiyö nkyo kyaaghërrë nkabhandekera igha, tiniishe hë, okore enkoro iyaane, etakaabhaabhayera ko okoghera iya abhantö bhano nkwesegha igha, bhakaaghërrë nshomerwe. Nemanyirë igha, öni hano nashomerwa, na bhëënyu bhonswe nkushomerwa mörë. ⁴Naabhandëkëëyë ritashandighi reera ko okoghera ukwa inyanko na inyaanyi indito iya amaisöri amaaru këmwë eno naarë nayo mo-nkoro iyaane. Keno naatunanga, ti-igha mobhaabhayere mo-senkoro isyënyu hë, kasi naatunanga momanye kya bhono mbahanshirë bhököngʼu.

Ukwabhera omosarya

⁵Mbe, ömöntö ono yaaghera murikyaye akabhaabhayera, tö-öni umwene yaaghera mbabhayere hë, kasi yaaghera na bhëënyu bhonswe igho, mobhaabhayere. Kasi bhoono, tinkutuna igha, naaruhi amangʼana hë. ⁶Ubhushibhu bhono ömöntö uyö yaanyoora ukurwa kö-bhëënyu abhantö abhaaru, mbwisirë. ⁷Bhoono ömöntö uyö, ni-igha mumwabhere, kora mömöröörësinga, okore atakaabhaabhayera bhököngʼu, kora aheteerani. ⁸Ndabhasaasaama igha, momokore amanye igha mmomohanshirë. ⁹Engʼana iyëndë eno yaaghërrë nkabhandekera ritashandighi reera, ni-iya okomaaha nyoore mmunyighwera ko amangʼana ghonswe igho. ¹⁰Ömöntö wowonswe igho ono bhëënyu mukwabhera, öni wonswe marrë kumwabhera. Engʼana yoyonswe igho eno yaare-ho iya ukwabherwa ömöntö, iyö nabhëëyë mbere iya Yëësu Kiristo ko okoghera iya bhëënyu, ¹¹okore Oghosambwa2:11 Oghosambwa. Maaha mo-faharaasa. ghotakaatobhaaha, ko bhoora obhongʼaini ubhwagho, ntobhomanyirë.

Pauro mu-mughi ghono ghokobherekerwa igha Tiroa

¹²Mbe, hano naahikirë Tiroa okoraareka Amangʼana Amaiya agha Yëësu Kiristo, naanyöörrë Omonene amarrë okonkorra-ho umweya ughwa okokorra-ho emeremo. ¹³Kasi öni tenaighuurë bhuuya mo-nkoro iyaane hë, ko bhoora ntanyöörrë-ho Tiito, umukumya murikyane. Ku bhuyö nkaragha abhantö abha Tiroa hayö, nkatanora, ukughya Makedonia.

Obhobhaahi okohetera obhotoro ubhwa Yëësu Kiristo

¹⁴Kasi tukumi Waryobha ono aköghëndërrya okototangata senkaagha syonswe igho ku ukushengera obhobhaahi ubhwa Yëësu Kiristo. Waryobha nkoghera arë abhantö ahasë honswe igho, bhamanya Yëësu Kiristo okohetera kö-bhëëtö, nkobha ërë kya ukurumbaasa ukwa ikirumba ikiiya. ¹⁵Ni-igho ërë ko bhoora bhëëtö ni-kirumba ikiiya ikya Yëësu Kiristo ku-Waryobha, ko-bhantö bhano bhakötööribhwa, na ko bhano bhakusira. ¹⁶Ko bhano bhakusira, bhëëtö ni-kirumba ikya uruku keno kekoreeta uruku. Kasi ko bhano bhaköhönibhwa, bhëëtö ni-kirumba ikiiya, ikya öbhöhöru keno kekoreeta öbhöhöru. Bhoono nawë akotora okokora emeremo kya ghiyö? ¹⁷Bhëëtö tëtörëngë kya abhantö abhandë abhaaru bhano bhakokorra ibhyashara engʼana iya Waryobha, okore bhanyoore ehoorohooro. Kasi bhëëtö, ntwaatomwa na Waryobha, ku bhuyö bhëëtö ko obhotoro ubhwa Yëësu Kiristo, nkoraareka törë engʼana iya Waryobha kwa ubhwihöötu tomanyirë igha, Waryobha nkotomaaha arë.

Abhaköri abha emeremo abha Imuuma Eehya

¹Kanaa, nkokanya mörë igha nkusimya törë ghwiki ukwikumya kö-bhëënyu? Bhëëtö tëtörëngë kya abhantö abhandë, igha toratuna ritashandighi irya ukwiyörökya kö-bhëënyu, handë irya ukurwa kö-bhëënyu. ²Ko bhoora bhëënyu, m-bëënyu ritashandighi iryëtö, reno ryandëkirwë mo-senkoro isyëtö, reno remanyekaini, kora nkosomwa rërë na abhantö bhonswe igho. ³Nkomaahekana mörë bhuuya igha, bhëënyu n-kya ritashandighi irya Yëësu Kiristo mörë, reno rikwörökya emeremo gheno twaakora kö-bhëënyu. Ritashandighi riyö, tiryandekwa na ubhwino hë, kasi ndyandekwa na Umwika uwa Waryobha ömöhöru. Kora tëmörëngë kya ritashandighi reno ryandekwa ko-bhebhaau ibhya amaghena,3:3 Maaha mo-ketabho ikya Ukurishoka 24:12; Eheetoko iya Etoraati 9:10-11. kasi mo-senkoro isya abhantö.

⁴Nkoghamba törë amangʼana ghayö, ko bhoora toona ubhweseghe ku-Waryobha okohetera ku-Yëësu Kiristo. ⁵Tërëngë igha nkokanya törë igha, kyokyonswe keno tokokora, n-ko obhotoro ubhwëtö abheene, a a, n-ko obhotoro ubhwa Waryobha. ⁶Uyö, we yaatokora tobhe abhaköri abha emeremo abha Imuuma3:6 Imuuma. Maaha mo-faharaasa. Eehya, eno ikurwa ku-Mwika uwa Waryobha. Imuuma iyö, tërëngë igha na-maraghërryö ghano ghaandekwa hë, ko bhoora amaraghërryö ghano ghaandekwa, gho nu-ruku ghakoreeta, kasi Umwika uwa Waryobha, we nö-bhöhöru akoreeta.

Ubhuhika ubhwa Imuuma Eehya

⁷Amaraghërryö ngaatöörrwë-ho ku ukwandekwa ko-sembaau isya amaghena. Nokaanyoora ngaamarrë ghakareeta uruku, kasi ubhuhika ubhwako, m-bonene bhököngʼu bhwaarë, kora Abhaisiraëri tebhaatörrë okomaaherra ubhusyö ubhwa Mosa,3:7 Mosa. Maaha mo-faharaasa. Maaha mo-ketabho ikya Ukurishoka 34:29-30. ko okoghera iya emerengaari ighya-ko. Emerengaari ghiyö, n-gya ibhagha ike igho ghyaarë. Mbe, hano okomaaha igha emeremo ighya keera kyaarëëtirë uruku, nkyaarenga na emerengaari ëmërörö bhököngʼu, ⁸bhoono momanye igha, emeremo ighya Umwika uwa Waryobha, ngeraabhe na ubhuhika obhonene bhököngʼu. ⁹Hano okomaaha igha, omoremo ughwa okobhotorra abhantö ikiina ngoona ubhuhika ubhwako, bhoono n-kwakë omoremo ghono ghokoghera abhantö bharakorwa okobha abha heene ku-Waryobha, ghwange okobha na ubhuhika obhonene bhököngʼu? ¹⁰Ku bhuyö tomanye igha, ubhuhika ubhwa Imuuma iya Kare, m-bukwerranu ko okoghera iya ubhuhika ubhurito bhököngʼu ubhwa Imuuma Eehya bhono bhooho bhoono igho. ¹¹Hano okomaaha igha keera kyaarë ikya enkaagha nke igho, nkyaarë na ubhuhika, ku bhuyö ikya senkaagha syonswe igho, nkeena ubhuhika obhonene bhököngʼu.

¹²Nkoghamba törë ko bhokarë, ko okoghera iya ubhweseghe bhuyö toonabho. ¹³Bhëëtö tetonga kya Mosa, ono yaakundikiryanga ubhusyö ubhwaye na ikikundikiryö, okore Abhaisiraëri bhatakaamaaha emerengaari gheno ghyaarë ku-bhusyö ubhwaye, kya igho ghyaahwererranga. ¹⁴Sehakëri isya Abhaisiraëri, ni-ndito syaarë. Ko bhoora igha, kora bhoono igho, hano Imuuma iya Kare yasomwa, ikikundikiryö keerakeera, nkobhakundikirya kërë. Ikikundikiryö kiyö, tikikuruusibhwa-ko hë, ko bhoora nkuruusibhwa-ko kërë hano ömöntö yaabha na öbhömwë na Yëësu Kiristo. ¹⁵M-maheene igha, kora nanyabhoono hano ebhetabho ibhya Mosa bhyasomwa, ikikundikiryö kiyö, nkukundikirya kërë sehakëri isyabho, bhanga okomanyërrya. ¹⁶Kasi enkaagha yoyonswe igho eno ömöntö araakumi Omonene, ikikundikiryö kiyö nkuruusibhwa-ko kërë. ¹⁷Mbe, Omonene we Umwika. Ahasë hano Umwika uwa Omonene arë, hayö ho öbhötöönööni bhörë. ¹⁸Bhëëtö bhonswe igho bhano totakundikiiyi ubhusyö, m-bëëtö emerengaari ighya Omonene ghekohetera-mo kya ikyowa. Omonene ono ërëngë igha we Umwika, nkutusyörya arë, tutuubhane nawe, ukurwa ko-merengaari okohekera ko-merengaari ëmërörö bhököngʼu.

Öbhöbhömbi na öbhötëntëëru ubhwa ëbhëntö

¹Mbe, ko bhono Waryobha atohaayë emeremo gheno ku ikyabhera ikyaye, titukukwa omotwe hë. ²Bhëëtö twanga amangʼana agha ubhubhise na agha sënsöni, kora tetokokora amangʼana agha öbhöngënërrya, handë ukwishooghania engʼana iya Waryobha na obhorongo. Kasi keno tokokora, no-koraareka obhoheene harabhurabhu igho, okore abhantö bhonswe igho, bhatomanye mo-maitegherro aghaabho igha, na-bhantö abha heene törë ku-Waryobha. ³Mbe, hano oraanyoore igha, Amangʼana Amaiya ghano tokoraareka ngakundikiiyi ikikundikiryö, ngakundikiiyi ko bhano bhakusira. ⁴Amangʼana Amaiya teghakomanyekana ko-bhantö bhayö, ko bhoora Oghosambwa, oghokama ughwa ekebhara keno, ghoroghaini emetwe ighya abhantö bhano bhatakukumya. Nkyo kekoghera bhatakomaaha obhorabhu ubhwa Amangʼana Amaiya agha emerengaari ighya Yëësu Kiristo, uyö we ituubho iya Waryobha. ⁵Bhëëtö ta-mangʼana aghëëtö tokoraareka hë, kasi na-agha Yëësu Kiristo igha m-Monene, na bhëëtö na-bhaköri abha emeremo abhëënyu törë, ko okoghera iya Yëësu Kiristo. ⁶Waryobha ono yaaghambirë igha, “Obhorabhu bhömërëki ukurwa mu-kisuntë,”4:6 Maaha mo-ketabho ikya Okosemoka 1:3. we uyöuyö akömërëkya mo-senkoro isyëtö, okore atohaane obhorabhu ubhwa obhomanyi ubhwa emerengaari ighya Waryobha gheno ghëkömërëkya ku-bhusyö ubhwa Yëësu Kiristo.

⁷Bhëëtö bhano toona emongo iyö, ntonga kya ëbhëntö bheno bhyaabhombwa ukurwa ku-rirobha. Ku bhuyö emanyekane igha, obhotoro ubhwa ököröghöörya bhono toonabho, nku-Waryobha bhukurwa, tu-bhwëtö hë. ⁸Nkunyanka törë kera ahasë, kasi tetokokerwa hë. Torahaha, kasi titukukwa emetwe hë. ⁹Nkoteeswa törë, kasi Waryobha hamwë arë na bhëëtö. Nkotemwa törë hansë, kasi titukusikibhwa hë. ¹⁰Bhëëtö nkaagha syonswe igho, mu-nyanko iya ukwitwa törë, kya bhono Yëësu yaaitirwë, okore öbhöhöru ubhwa Yëësu bhwonswe, bhomaahekane kö-mëbhërë ighyëtö. ¹¹Ku bhuyö bhëëtö bhano tokeheeshera, nkoghenda törë na uruku nkaagha syonswe igho ko okoghera iya Yëësu Kiristo, okore öbhöhöru ubhwa Yëësu Kiristo bhomaahekane kö-mëbhërë ighyëtö gheno ghikukwa. ¹²Mbe, bhoono ni-igha, bhëëtö nkoghenda törë na uruku, kasi bhëënyu, nö-bhöhöru mukunyoora.

¹³Amaandeko Amahörëëru gharaghamba igha, “Naakumiri, nkyo kyaaghërrë nkaraareka.”4:13 Maaha mo-ketabho ikya Zabhuri 116:10. Na bhëëtö bhonswe nkukumya törë, nkyo kekoghera toraraareka. ¹⁴Nkoghamba törë igho, ko bhoora ntomanyirë igha, Waryobha ono yaaryökya Omonene uwëëtö Yëësu Kiristo, na bhëëtö bhonswe narituryökya ighoigho, bhëëtö na bhëënyu bhonswe igho, naretokora tobhe hamwë na Yëësu Kiristo mbere iya Waryobha. ¹⁵Inyanko yonswe igho eno tukunyoora, n-ko okoghera iya bhëënyu, okore örööbhö urwa Waryobha, rwaruhe na okohekeera abhantö abhaaru, kora abhantö bhayö bhakumi bhököngʼu Waryobha na ökömötöönia.

Ubhuhika ubhwa amakora ghonswe igho

¹⁶Mbe, kiyö nkyo kekoghera totakukwa emetwe, nokaanyoora ëmëbhërë ighyëtö gheno nkughunda ghërë, kasi senkoro isyëtö, nkokorwa sërë bhohya sinsikö syonswe igho. ¹⁷Nkoghamba ndë igho, ko bhoora igha, inyanko iyëëtö ëhöhö eno, iya ribhagha ike igho, nkotoreetera ërë ubhuhika obhonene bhököngʼu ubhwa amakora ghonswe igho. ¹⁸Ku bhuyö, totakaamaaherra ëbhëntö bheno bhekomaahekana ko-maiso, kasi tomaaherre bheno bhetakomaahekana. Bheno bhekomaahekana, m-bya ibhagha ike igho, kasi bheno bhetakomaahekana, m-bya amakora ghonswe igho.

¹Ëmëbhërë ighyëtö gheno too-mo ko-kebhara hano, n-kya ibhighutu. Bhëëtö ntomanyirë igha, hano ibhighutu bhiyö bheresareka, Waryobha naretohaana sinyumba seno sërëngë mu-ryobha, isya amakora ghonswe igho, seno setakohaghaashwa na ömöntö. ²Ko bhoora mu-bhighutu ibhyëtö bhiyö ibhya ko-kebhara kono, nkunyanka törë, ku bhuyö nkwighomba törë tohaanwe sinyumba seehya isya mu-ryobha, kuyö, nko ukwibhöhibhwa ëmëbhërë emehya. ³Hano turibhohibhwa ëmëbhërë emehya ghiyö, tetorebha kengʼaabhi hë. ⁴Ku bhuyö ni-igha, enkaagha eno tökërëngë mu-bhighutu ibhyëtö bheno, nkunyanka törë ko bhono amangʼana m-maaru tokoghania. Tërëngë igha bhoono hayö nkutuna törë turuusibhwi ëmëbhërë gheno ghikukwa, kasi keno tukutuna, nö-kötööribhwa ëmëbhërë gheno ghetakukwa, okore ëmëbhërë gheno ghikukwa, ghemerwe na ëmëbhërë gheno ghetakukwa. ⁵Waryobha we yaatösëëmya ko okoghera iya amangʼana ghayöghayö, kora we yaatohaana Umwika uwaaye, okore abhe ekebhete ikya ukwörökya igha, keno yaaraghania, nkerebha.

⁶Ku bhuyö enkaagha yoyonswe igho ntoona ubhweseghe, kora ntomanyirë igha, hano tokeena ëmëbhërë gheno, n-hare törë na Omonene. ⁷Okomenya ukwëtö ko-kebhara kono, te-ko okoghera iya okomaaha amangʼana na amaiso, kasi n-ku ukwitengʼera Waryobha. ⁸M-maheene igha, ntoona ubhweseghe obhonene, kora nkomaaha törë igha, nyakara tohaaterane na ëmëbhërë gheno, toghende okomenya hamwë na Omonene. ⁹Ntokaabha na ëmëbhërë gheno, handë igha ntokaamenya hamwë na Omonene, kasi keno tokokora no-motono okore ashomerwe. ¹⁰Ko bhoora bhëëtö bhonswe igho, nturimerra mbere iya ikitumbë ikya Yëësu Kiristo ikya okobhotorra ibhiina, okore kera ömöntö, ahakwe ko okorengʼaana na amangʼana ghano yaakora, ko-kebhara kono, nyoore m-maiya handë igha m-maghogho.

Ukwighwerrania abhantö

¹¹Ntomanyirë ubhuuya ubhwa okosooka Omonene Waryobha. Ku bhuyö nkokora törë omotono ughwa ukuruta abhantö, okore bhasooke Waryobha. Waryobha natomanyirë bhuuya kya igho törë. Öni nkwitengʼera ndë igha, bhëënyu bhonswe, mmotomanyirë bhuuya mo-maitegherro aghëënyu. ¹²Ti-igha nkutuna törë ghwiki ukwihanshania kö-bhëënyu, kasi nkutuna törë tobhahaane umweya ughwa ukwihasha ko okoghera iya bhëëtö. Toratuna mobhe na obhotoro ubhwa okohonshora abhantö bhano bhakwihashera amangʼana ghano ghakomaahekana, kasi te-ghaara gharëngë mo-senkoro isyabho hë. ¹³Mbe, nyoore nkomaahekana törë igha m-bashuuru törë, ubhushuuru bhuyö, n-ko okoghera iya Waryobha. Kasi nyoore nkomaahekana törë igha sehakëri isyëtö m-buuya sërë, iyö n-ko okoghera iya bhëënyu. ¹⁴Righonshe irya Yëësu Kiristo, nkototangata rërë, ko bhoora ntomanyirë igha, ömöntö ömwë yaakuurë ko okoghera iya abhantö bhonswe igho, ensonga yaamo ni-igha, abhantö bhonswe igho mbaakuurë. ¹⁵Yëësu Kiristo yaakuurë ko okoghera iya abhantö bhonswe igho, okore abhantö abha öbhömënyi obhohya, bhatakaabha na öbhömënyi ko okoghera iyaabho abheene, kasi bhobhe ko okoghera iya ono yaakuurë akaryoka ko okoghera iyaabho.

¹⁶Ku bhuyö ukusimirya bhoono igho, tetokorengʼaania ubhwera ubhwa ömöntö ko amangʼana agha kinyabhantö, nokaanyoora ekembere ntwaarengʼaaninga kora Yëësu Kiristo ko amangʼana agha kinyabhantö. Kasi bhoono igho, ti-igho tokokora hë. ¹⁷Hano ömöntö yaabha na öbhömwë na Yëësu Kiristo, nkobha arë ömöntö omohya,5:17 Maaha mo-ketabho ikya Abhagharatia 6:15. amangʼana agha kare ghaaheta, bhoono na-mangʼana amahya ghaaho. ¹⁸Mbe, ghonswe igho ghayö, nku-Waryobha ghakurwa, ko bhoora we yaatoma Yëësu Kiristo, okore atwighwerrani na Waryobha umwene.5:18 Maaha mo-ketabho ikya Abharuumi 5:10. Na bhëëtö bhonswe atohaayë emeremo ighya okoraareka engʼana, okore abhantö bhaighwerrane na Waryobha. ¹⁹Nkwo okoghamba igha, Waryobha yaaighwerranianga abhantö nawe, ko okohetera ku-Yëësu Kiristo, atakobhabharra obhosarya ubhwabho. Kora ghwiki atohaayë emeremo ighya okoraareka amangʼana ghayö agha ubhwighwerrani.

²⁰Mbe, bhoono Yëësu Kiristo atötömirë tokore emeremo ighyaye, nërëngë igha, Waryobha ko okohetera amangʼana ghano tokoghamba, nkokangʼasërrya arë igha, abhantö bhaighwerrane nawe. Kiyö nkyo kekoghera torabhasabha ku ukwimererra amangʼana agha Yëësu Kiristo igha, mwighwerrane na Waryobha. ²¹Yëësu Kiristo të-mököri uwa ëbhëbhë yaarë hë, kasi Waryobha yaamobharëëyë ëbhëbhë ibhyëtö bhyonswe igho, okore bhëëtö tobhe abhantö abha heene ku-Waryobha ko okohetera ku-uyö.

¹Mbe, ko bhono tokokora emeremo hamwë na Waryobha, ku bhuyö nkobhasaasaama törë igha, örööbhö urwa Waryobha rono mwanyoora, rotakaaheta bhosa. ²Ngambirë igho ko bhoora, Waryobha nkoghamba arë mo-Maandeko Amahörëëru igha,

“Naakwighwërëëyë ko-nkaagha inshiiya,

naakötöörri ku-rusikö urwa ökötööribhwa.”6:2 Maaha mo-ketabho ikya Isaaya 49:8.

Itegherra mbe wighwe igha, eno yo enkaagha inshiiya, kora ndwo urusikö urwa ökötööribhwa.

Ököghömërrya ko-meremo ighya Waryobha

³Tetokokorra ömöntö wowonswe igho engʼana yoyonswe iya ukumutimba, okore emeremo ighyëtö, ghetakaaghambwa bhoghogho. ⁴Kasi nkwörökya törë abhantö ko amangʼana ghonswe igho igha, bhëëtö, m-baköri abha emeremo abha Waryobha törë. Nkokora törë igho, kö ököghömërrya bhököngʼu, amateeso na inyaanyi, na amangʼana amaköngʼu. ⁵Bhëëtö nkotemwa törë, nkobhohwa törë mo-kebhohe, nkokorrwa törë riihë, toona inyanko iya emeremo ëmëköngʼu, umweko, kora titukunyoora tero hë. ⁶Bhëëtö m-bantö abha heene törë, m-bamanyi abha amangʼana törë, m-baghömërrya törë, kora m-basërëënia törë. Nkokora törë amangʼana ghayö, ko okotangatwa na Umwika Ömöhörëëru, na righonshe reno retaana ubhwiköri, ⁷na ko okoraareka engʼana iya obhoheene. Nkokora törë amangʼana ghayö, ko obhotoro ubhwa Waryobha, ko okohetera ku-bhyöghë ibhyëtö ibhya obhoheene, ibhya okorekera na ibhya ukwikengerrya. ⁸Bhëëtö twamara ukwiruusya igha, abhantö mbakaatosooka, handë bhatosere, mbakaatoghamba bhuuya, handë bhatoghambe bhoghogho, te-ngʼana hë. Nkomaahekana törë igha m-barongo törë, kasi no-bhoheene tokoghamba. ⁹Ntörëngë kya bhano bhatamanyekaini, kasi ntomanyekaini bhököngʼu. Nkoghendania törë na uruku, kasi m-bahöru törë. Nkotemwa törë, kasi tetoraakwa hë. ¹⁰Ntörëngë kya abhantö bhano bhabhaabhayëëyë, kasi nkushomerwa törë sinsikö syonswe igho. Ntonga kya abhatöbhu, kasi m-baaru tukwamëhya. Ntörëngë kya bhano totaana ëkëntö, kasi ëbhëntö bhyonswe igho, ntoonabhyo.

¹¹Bhare Abhakörintö, tobharaghërrëëyi bhuuya, ku righonshe rinene, kora tetobhabhisirë ngʼana hë. ¹²Righonshe iryëtö kö-bhëënyu, terekorebherrwa hë. Kasi bhëënyu, m-bëënyu mwaarebherra righonshe iryënyu kö-bhëëtö. ¹³Bhoono nkushumaasha ndë na bhëënyu kya ono nkushumaasha na abhaana abhaane, ndabhatëëbhya igha, mobhe na righonshe rinene kö-bhëëtö, kya bhono bhëëtö toona righonshe rinene kö-bhëënyu.

Okoghootana na abhantö bhano bhatarëngë abhakumya

¹⁴Motakaaghootana na abhantö bhano bhatarëngë abhakumya. Mwaakarööshë igha, obhoheene na öbhötëëyu bherarengerrania? Handë obhorabhu na ikisuntë bheraikarana hamwë? ¹⁵Ghwiki m-bwighwerrani kë bhooho, ku-Kiristo na Bheriari?6:15 Bheriari. Ensonga iyaamo ni-igha, Oghosambwa. Maaha mo-faharaasa engʼana, Oghosambwa. M-bömwë kë bhooho ku umukumya na ono atakukumya? ¹⁶M-borengerrania kë bhooho, inyumba iya Waryobha6:16a Inyumba iya Waryobha. Maaha mo-faharaasa. na ëbhëtöndö? Bhëëtö mbo inyumba iya Waryobha ömöhöru!6:16b Maaha mo-ketabho ikya 1 Abhakörintö 3:16; Abhaëfësö 2:20-21. N-kya bhoora Waryobha yaaghambirë igha,

“Nendaabhenga ghatë iyaabho, ndaghenda hamwë nabho.

Nendaabhe Waryobha uwaabho, na abheene bhonswe mbaraabhe abhantö abhaane.”6:16c Maaha mo-ketabho ikya Amangʼana agha Abharaawi 26:12; Yeremia 32:38; Ezekieri 37:27.

¹⁷Ku bhuyö Omonene Waryobha yaaghambirë igha,

“Murwe mo-bhantö bhayö, mwitashe hare nabho.

Motakaakunia ëkëntö ikinyanku,

hayö bhoono ho ndaabhasërëëni.6:17 Maaha mo-ketabho ikya Isaaya 52:11; Ezekieri 20:34, 41.

¹⁸Kora nendaabhe Suwëënyu,

na bhëënyu moraabhe abhaana abhaane, abha ikishaasha na abha ekekari.

Ni-igho Omonene Waryobha uwa obhotoro bhwonswe igho akoghamba.”6:18 Maaha mo-ketabho ikya 2 Samwëri 7:14; 1 Amangʼana agha Senkaagha 17:13.

¹Mbe, abhaghonshe abhaane, ko bhono mokomaaha igha m-maaru ghano Waryobha yaatoraghania, ku bhuyö ni-igha twisaabhuure, tutighane na ubhunyanku7:1 Ubhunyanku. Maaha mo-faharaasa engʼana, Ubhwikööni na ubhunyanku. bhwonswe igho, ubhwa kinyamöbhërë na kinyamwika. Tobhe abhahörëëru ko-nshera iya okosooka Waryobha.

Ukushomerwa ukwa Pauro

²Motohaane umweya mo-senkoro isyënyu, ko bhoora titwasarrya ömöntö wowonswe oora hë, taaho ono twaanyahaara ko engʼana nyabhorebhe, handë okomongʼaina. ³Tenkoghamba amangʼana ghayö, ko okobhabhotorra ikiina igha bhëënyu, m-baghogho mörë, a a, ko bhoora nengambirë ekembere hayö igha, bhëënyu mmo-senkoro isyëtö mörë, n-hamwë törë na bhëënyu nekaabha igha nu-ruku handë öbhöhöru. ⁴Neena obhokarë ubhwa ukushumaasha na bhëënyu, kora nkwihasha ndë ko okoghera iya bhëënyu ko bhoora möndöörësëri bhököngʼu. Nokaanyoora mu-nyanko törë, kasi bhoono nshömëëywë bhököngʼu.

⁵Kora enkaagha eno twaahikirë Makedonia haara, tetwanyöörrë umweya ughwa ukumuunya hë, ntwaarenga na inyanko kera ahasë. Kebhara, n-diihë ryaare-yo, mo-senkoro isyëtö, ntwaarenga na entarëki. ⁶Kasi Waryobha ömöröörësya uwa bhano bhabhaabhayëëyë, yaatohaayë singuru hano Tiito yaaishirë. ⁷Ti-igha ntwaashömëëywë ku ukuusha ukwa Tiito ukwene igho, kasi na kya igho mwaamöröörësëri. Yaatötëëbhëri kya bhono mukwighomba okommaaha, na kya bhono mokobhaabhayera, na omotono ughwënyu ghono moonagho ko okoghera iya öni. Ghayö ngo ghakörrë nshömëëywë bhököngʼu.

⁸Nokaanyoora ritashandighi iryane ryaaghërrë mokabhaabhayera, kasi tenkomaaha igha, m-boghogho naakörrë hë. Eeho enkaagha nyabhorebhe nke igho, eno naaighuurë bhobhogho mo-nkoro iyaane igha, ritashandighi riyö, ryaaghërrë mokabhaabhayera, kasi kwa nkaagha enke igho. ⁹Bhoono nshömëëywë, ti-igha n-ko okoghera iya bhono mwaabhaabhayëëyë, a a, kasi n-ko bhono igha, okobhaabhayera ukwënyu, kwaaghërrë mokahongora obhoghogho ubhwënyu. Temwabhaabhayëëyë ko okoghera iya ritashandighi reno twaabhandëkëëyë, kasi mwaabhaabhayëëyë ko okoghera iya keno Waryobha yaatunanga kebhe. Ku bhuyö bhëëtö, tetwabhanyahaarrë ko enshera yoyonswe eera hë ¹⁰Okobhaabhayera kono Waryobha akutuna, n-kono kokoreeta öbhöhöngöri ubhwa ëbhëbhë. Okohongora ëbhëbhë kya kuyö, të-këntö ikya ukwighwera obhoghogho hë, ko bhoora nkoreeta körë öbhöhönia. Kasi okobhaabhayera ukwa ko-kebhara kono, kuyö nu-ruku kokoreeta. ¹¹Maaha! Okobhaabhayera kono kokoreeta keno Waryobha akutuna, kobhahaayë ehoorohooro enene. Okobhaabhayera kuyö, köghërrë mobhaayë na omotono ughwa okokora ghano ghakutunwa, na ukwikoorerra ko ghano mokokora, igha na-agha obhoheene. Okobhaabhayera kuyö, kobhakörrë mörëghirë amangʼana amaghogho, mösöökirë Waryobha, mobhaayë na amaigha agha okommaaha, na okomaaha igha, ömöntö uyö yaasarya, arashibhibhwa. Ko amangʼana ghayö ghonswe igho, momaahekaini igha, temoona isoro ryoryonswe reera ko amangʼana ghayö.

¹²Mbe, nokaanyoora igha naabhandëkëëyë ritashandighi reera, kasi tenaandëkirë ko okoghera iya oora yaasarri, handë ko okoghera iya oora yaakörëëywë bhoghogho. Kasi naatunanga mbahonyorre momaahe bhëënyu abheene kya igho mukwiruusya mbere iya Waryobha, ko okoghera iya bhëëtö. ¹³Ku bhuyö, möghërrë tushömëëywë. Ghwiki ntwaashömëëywë bhököngʼu, hano twaarööshë Tiito ashömëëywë, ko bhoora m-bëënyu mwaaghërrë akashomerwa mo-nkoro iyaaye. ¹⁴Nyoore naaihëëmëëyë Tiito ko engʼana yoyonswe eera ko okoghera iya bhëënyu, temwansöökëri hë, kasi kera engʼana eno twaamötëëbhëri ko amangʼana aghëënyu, n-ya heene yaarë. Mbe, ku bhuyö ukwiheema ukwëtö ku-Tiito ko okoghera iya bhëënyu, n-kwa heene kwaarë. ¹⁵Righonshe irya Tiito kö-bhëënyu, ni-nene, ekenene n-hano yaahiita bhono mwaamwighweranga, na kya igho mwaamösërëënëri, kwa okoobhoha na ukurighita. ¹⁶Bhoono öni, nshömëëywë, ko bhoora nkobheesegha ko amangʼana ghonswe igho.

Ökötöörrya abhantö

¹Mbe, bhoono nkutuna törë bhëënyu abhakumya bharikyëtö, momanye örööbhö urwa Waryobha rono amakanisa agha Makedonia ghaanyoora. ²Abhantö bhayö, m-batöbhu bhököngʼu, kora bhaanyoora amashaasho amaköngʼu agha inyanko, kasi ukushomerwa kono bhaarë nako, n-konene kwaarë. Kora ukushomerwa kuyö, nkwo kwaaghërrë bhakabha abhantö abha ökösërëënia bhököngʼu abhantö. ³Nkobhaimererra ndë igha, bhaaruusiri ëbhëntö ibhyaru okokera obhotoro ubhwabho bhono bhaarë nabho. Kora mbaaruusiri ko okohansha ukwabho abheene. ⁴Bhakatosaasaama bhököngʼu igha, abheene bhonswe bhanyoore umweya ughwa okobha mo-bhantö bhano bhakötöörrya abhahörëëru abha Yërusarëëmu. ⁵Mbaakörrë okokera bhono twaakanyanga igha bhakaakörrë. Ko bhoora mbaaitörrë abheene mo-mabhoko agha Omonene ekembere, ho bhaamarrë, bhakaitoora na kö-bhëëtö, kya bhono Waryobha akutuna. ⁶Ko bhoora Tiito we yaasëmööyë engʼana iyö kö-bhëënyu hayö, ku bhuyö tokamosaasaama igha, aashe iyö abhatöörri, momarërri engʼana iya örööbhö iyö. ⁷Bhëënyu m-baamë mörë abha bhyonswe igho, m-baamë mörë abha umukumo, obhoraarëki ubhwa engʼana, obhomanyi, omotono na righonshe iryënyu kö-bhëëtö, ni-ighoigho tukutuna kora igha mobhe abhaamë abha enkoro iya okokora igho.

⁸Tenkoghamba igho, okore mbahamërri, kasi nkutuna ndë mmaahe nyoore righonshe iryënyu, ni-irya obhoheene ko okobhatëëbhya amangʼana agha omotono ughwa abhantö abhandë. ⁹Bhëënyu mmomanyirë örööbhö urwa Omonene uwëëtö Yëësu Kiristo igha, nokaanyoora m-mwamë yaarë, kasi yaaikërëëyi abhe ömötöbhu ko okoghera iya bhëënyu, okore mwamehe ko okohetera kö-öbhötöbhu ubhwaye. ¹⁰Ëkëntö ikiiya keno nkabharaghërrya ko engʼana iyö, ni-igha, omooka ghwahëtirë, kerenga haara mwaarë abha mbere, ti-ku ukuruusya ëbhëntö ukwene igho, kasi kora igha, mwaaighombanga okokora engʼana iyö. ¹¹Bhoono ni-igha, momarërri keno mwaasëmööyë okokora kya bhono mwaaighombanga, mokore omotono ughwa ukuruusya ëbhëntö ko okorengʼaana na ëbhëntö bheno moonabhyo. ¹²Hano wanyoora ömöntö aana omotono ughwa ökötöörrya, Waryobha nkwikërrya arë ko okorengʼaana na ekerengere kiyö aanakyo. Waryobha tamutune aruusi keno aataanakyo. ¹³Keno nkutuna ti-igha, bhëënyu munyanke kö ökötöörrya abhandë, kasi abhandë bhanyoore ehoorohooro kö-bhëënyu, a a, ¹⁴kasi keno nkutuna ni-igha, morengʼaane bhonswe igho. Enkaagha eno bhëënyu moona ëbhëntö ibhyaru, mobhatöörri ko-bhohabhë ubhwabho bhono bhaanabho, okore hano abheene bhonswe bharebha na ëbhëntö ibhyaru, bhabhatöörri na bhëënyu. Ku bhuyö, kuyö nkwo okorengʼaana. ¹⁵Hayö ho erebha kya bhono Amaandeko Amahörëëru ghakoghamba igha, “Ono yaakomania ibhyaru, tiyaabhaayë na bheno bhyaatighaayë hë, na ono yaakomania bheke, tiyaasuuhwa hë.”8:15 Maaha mo-ketabho ikya Ukurishoka 16:18.

Tiito aratomwa Körintö

¹⁶Nkukumya ndë Waryobha, ono yaakora Tiito abhe na omotono ughwa okobhangarra, kya bhono öni nkobhangarra. ¹⁷Nkoghamba ndë igho, ko bhoora hano twaamötëëbhëri igha, aashe kö-bhëënyu iyö, yaaikërëëyi. Kora nkwighomba arë umwene ukuusha iyö. ¹⁸Hamwë na uyö, nkotoma törë umukumya murikyëtö ono akukumibhwa na amakanisa ghonswe igho, ko-meremo ighyaye, ighya okoraareka Amangʼana Amaiya. ¹⁹Umukumya murikyëtö uyö, kora we yaashaaghorwa na amakanisa igha, ahinanenga na bhëëtö ko-roghendo urwa okohaheenera abhakumya abha Yërusarëëmu. Emeremo ighya örööbhö ghiyö, gheraghera Omonene Waryobha atöönibhwi, ghwiki nkwörökya ërë kya bhono toona omotono ughwa ökötöörrya abhantö abhandë.

²⁰Nkutuna törë twitashe hare na risoro ryoryonswe reera, irya emeremo gheno, ighya ökösërëënia abhantö. ²¹Keno tukutuna, tokokora bhuuya mbere iya Omonene aheene igho, kasi kora na ko-bhantö honswe.

²²Toratoma na umukumya murikyëtö uwöndë hamwë na bhaabho Tiito. Nkomaaha törë igha, umukumya murikyëtö uyö, m-mara kaaru akwörökya igha, aana omotono ughwa okokora emeremo, kora bhoono igho, nkwighomba arë bhököngʼu, ko bhoora aana ubhweseghe obhonene kö-bhëënyu. ²³Mbe, hano ömöntö araatune okomanya amangʼana agha Tiito, Tiito uyö, nö-mököri uwa emeremo murikyane kö-bhëënyu. Na abhandë bhayö, m-barikyëtö, ekanisa yo ebhatömirë okore Kiristo atöönibhwi. ²⁴Ku bhuyö ni-igha, möbhööröki righonshe iryënyu, okore amakanisa ghamanye igha, ntoona ikibhuno ikya ukwihasha ko okoghera iya bhëënyu.

Ekehaheeno ko abhakumya abha Yërusarëëmu

¹Teneena engʼana eno eraaghere mbandekere ko amangʼana agha ökötöörrya abhahörëëru abha Yërusarëëmu, ²ko bhoora, nemanyirë kya bhono mukwighomba okobhatöörrya. Öni naaihashanga ko-bhantö abha Makedonia ko okoghera iya bhëënyu, naabhatëëbhyanga igha, “Abhantö abha Akaaya, mbaaisëëmëri ukuruusya, ukurwa mooka.” Eteemo iyö, yaaghërrë abhantö abhandë abhaaru, bhonswe bhakaighomba ukuruusya. ³Mbe, bhoono ntömirë abhakumya bharikyëtö bhayö, okore ukwihasha ukwëtö ukwa omosorro ughwënyu, kotakaabha ukwa amangʼana agheene igho, kasi mwisëëmi kya bhono naaghambirë igha, mwaamara ukwisëëmya. ⁴Nengambirë igho, ko bhoora hano nkataka nishirë iyö hamwë na Abhamakedonia, nyoore igha temoraisëëmya hë, hayö m-bëëtö toraasooke, ko bhono toona ubhweseghe kö-bhëënyu ko okoghera iya engʼana iyö. Kora na bhëënyu bhonswe, mmoraasooke bhököngʼu. ⁵Ku bhuyö ndööshë igha, ni-igha ntëëbhi abhakumya bharikyëtö bhano, bhatangate ukuusha iyö, okore bhakore ësëëmyö iya omosorro ghono mwaaraghaini, ghobhe ughwa okohansha ukwënyu bhëënyu abheene, te-kwa ukusingʼirribhwa na ömöntö hë.

Ukuruusya ukwa enkoro inshiiya

⁶Muhiite engʼana eno igha, “Ömöntö ono akwëmya hake igho, okoghesa ukwaye kwonswe n-koke igho. Kasi ono akwëmya ahanene, okoghesa ukwaye kwonswe n-kwaru.” ⁷Kera ömöntö aruusi kya bhono akutuna mo-nkoro iyaaye, atakaaruusya kwa okobhaabhayera handë kwa ukusingʼirribhwa, ko bhoora Waryobha, nahanshirë ömöntö ono akuruusya kwa nkoro nshiiya. ⁸Hayö ho Waryobha araabhangʼoore bhököngʼu, okokera bhono mukutuna, okore nkaagha syonswe igho, mobhe na kera ëkëntö keno mukutuna. Ni-igho araabhakorre, okore möghëndërri okokora amangʼana amaiya amaaru agha ökötöörrya abhantö. ⁹Iyö n-kya bhono Amaandeko Amahörëëru ghakoghamba igha,

“Anyaraghaini ëbhëntö, ahaayë abhatöbhu,

obhoheene ubhwaye, m-bwa amakora ghonswe igho.”9:9 Maaha mo-ketabho ikya Zabhuri 112:9.

¹⁰Waryobha we akohaana abhantö imbusiro, bhëmya, na ibhyakorya ibhya okorya, naraabhaane imbusiro insharu iya ukubhusura, igha, naraabhakore mobhe abhantö abha heene ko okohaana abhantö ëbhëntö. ¹¹Moraamëhibhwi kö-bhëntö ibhyaru, okore möghëndërri okobha abhantö abha ökösërëënia abhantö abhandë nkaagha syonswe igho. Hayö ho abhantö bharaakumi Waryobha ko okoghera iya ëbhëntö bheno tokobhaherra. ¹²Engʼana iya ökösërëënia eno mokokora, te-ko okoghera iya obhohabhë ubhwa abhahörëëru ukwene igho hë, kasi neraaghere abhantö abhaaru bhatööni Waryobha bhököngʼu. ¹³Ndabhatëëbhya igha, mbaraatööni Waryobha, ko bhoora emeremo ighyënyu nkwörökya ghërë igha, bhëënyu m-baköri abha emeremo abhaiya mörë. Ghwiki mbaraatööni Waryobha, ko okoghera iya ukwighwera ukwënyu ukwa ukwikërrya Amangʼana Amaiya agha Yëësu Kiristo, na ökösërëënia ukwënyu kono mokobhasërëënia, kora na ko-bhantö bhonswe igho. ¹⁴Engʼana iyö, neraaghere bhaabhasabherenga ku-Waryobha kwa okobhaighomba, ko okoghera iya örööbhö urwaru rono Waryobha yaabhahaana. ¹⁵Waryobha akumibhwi ko okoghera iya ituho iyaaye eno ëhëtërëëyë bhyonswe igho.

Amahonshora agha Pauro ko-bhantö bhano bhakomosera

¹Mbe, ndabhasaasaama ko obhohaabhu na kö öbhöntö ubhwa heene ubhwa Yëësu Kiristo, nö-öni Pauro ono bhakoghamba igha, hano naabha hamwë na bhëënyu, nkobha ndë omohaabhu, kasi hano naabha hare na bhëënyu, ndabha omokarë. ²Ndabhasabha igha, motakaakora mbe omokarë kö-bhëënyu hano ndiisha iyö. Nkoghamba ndë igho, ko bhoora nemanyirë igha, ndatora okobha omokarë ko bhano bhonswe igho bhakokanya igha, öbhömënyi ubhwëtö, m-bwa kinyamöbhërë. ³Bhëëtö nokaanyoora igha nko-kebhara kono tömënyirë, kasi titukwitana riihë kya abhantö abha ko-kebhara kono hë. ⁴Ibhyöghë ibhyëtö bheno toonabhyo ko okoghera iya riihë iryëtö, ti-bhya kinyamöbhërë hë, kasi ibhyöghë ibhyëtö, mbeena obhotoro ubhwa Waryobha, ubhwa ukughwësya obhogho ubhwa umubhisa, na obhokorokombania bhwonswe igho. ⁵Nkotemora bhërë amaitegherro na amangʼana ghonswe igho agha ubhwihashi, ghano ghakoghera abhantö bhanga okomanya Waryobha. Nkoghoota törë këghötërëëyë amaitegherro ghonswe igho okore ghaighwere Yëësu Kiristo. ⁶Hano moraabhe abhantö abha ukwighwera amangʼana agha heene, hayö ho bhëëtö toraabhe na obhotoro ubhwa ukushibhya amangʼana ghonswe igho agha ukwanga ukwighwera Kiristo.

⁷Bhëënyu na-mangʼana agha kebhara agheene igho, ngo mokomaaha. Nyoore aaho ömöntö wowonswe igho ono akwimaaha igha nu-uwa Yëësu Kiristo, mbe, ömöntö uyö amanye igha, kya igho we arëngë uwa Yëësu Kiristo, na bhëëtö bhonswe na-abha Yëësu Kiristo törë. ⁸Nokaanyoora igha nkwihasha ndë bhököngʼu, okoheteera ekerengere ikya ubhwera bhono Omonene Yëësu Kiristo yaatohaana. Nokaanyoora ni-igho, tenkosooka hë, ko bhoora obhotoro bhuyö tebhokobhatemora hë, kasi nkobhakora bhörë igha monaghe ku-mukumo. ⁹Tinkutuna igha, mmaahekane kö-bhëënyu igha, nkutuna ndë ököbhööbhöhërrya okohetera ko-matashandighi aghaane. ¹⁰Nkoghamba ndë igho, ko bhoora abhantö bhandë nkoghamba bharë igha, “Amatashandighi agha Pauro m-marito kora amangʼana aghaaye ngaana singuru, kasi hano aaho umwene, m-mötëntëëru, kora amashumaasho aghaaye, teghaana ubhwera hë.” ¹¹Mbe, abhantö bhano bhakoghamba amangʼana ghayö, bhamanye igha, amangʼana ghano tokobhandekera ko-matashandighi enkaagha eno ukunyoora totarëngë hamwë na bhëënyu, ni-ighoigho tokokora amangʼana aghëëtö kora hano tohamwë na bhëënyu.

¹²Bhëëtö tetootore ukwitoora mu-rikomo rimwë, handë ukwirengʼaania na bhayö bhakwihasha igha, mbaana ubhwera. Nkwirengʼaania bharë abheene ko abheene, kuyö nu-kwiyörökya igha, tebhamanyirë ngʼana hë. ¹³Kasi bhëëtö, titwikumi toheteerani hë. Ekerengo ikyëtö, ne-meremo gheno twaahaanwa na Waryobha, na emeremo ghiyö, ngyo tokokora kö-bhëënyu hayö. ¹⁴Enkaagha eno twaaishirë kö-bhëënyu hayö, tetwahëtërëëyë orotonga urwa ghano twaatörëëywë-ho hë. Bhëëtö, mbo twaatangatirë okobhareetera Amangʼana Amaiya agha Yëësu Kiristo. ¹⁵Ghwiki ni-igha, titukwihashera emeremo ighya abhantö abhandë, okokera ekerengere keno twaahaanwa. Kasi ubhweseghe ubhwëtö ni-igha, hano umukumo ughwënyu ghoraaghëndërri ukwaruha, hayö ho emeremo ighyëtö kö-bhëënyu, gheraagharehe. ¹⁶Ni-igho ërë, okore toraareke Amangʼana Amaiya ku-bhyaro ibhyëndë bheno bhërëngë hare na bhëënyu. Ko bhoora titukutuna ukwihashera emeremo gheno ghyaamara okokorwa ahasë nyabhorebhe na ömöntö uwöndë. ¹⁷Amaandeko Amahörëëru nkoghamba gharë igha, “Ömöntö wowonswe igho ono akwihasha, aikumi ko okoghera iya Omonene Waryobha.”10:17 Maaha mo-ketabho ikya Yeremia 9:24.¹⁸Tërëngë igha ömöntö ono akwihasha umwene we akwikërribhwa na Omonene Waryobha, kasi no-oora Omonene Waryobha umwene akukumya, uyö we akwikërribhwa nawe.

Pauro na abhatomwa abharongo

¹Nyakara mokaanyitëghërrëëyë hake igho, ko bhokangi ubhwane. Ndasabha bhamurë munyitegherre. ²Öni neena rihari reno rikurwa ku-Waryobha, ko bhoora monga kya umwisëkë intindë, ono naaghambera öbhökwë ku-mushaasha ömwë igho, ono akobherekerwa igha, Yëësu Kiristo. ³Kasi bhoono neena entarëki igha, kya bhono Hawa yaangʼainirwë na inshoka engʼaini eera, na bhëënyu bhonswe motakaangʼanwa, mutighe hayö okohansha Kiristo, kwa ubhwihöötu na kwa enkoro inshiiya. ⁴Ngambirë igho, ko bhoora igha, bhëënyu m-bangö mörë abha ukwikërrya amangʼana agha ömöntö ono akuusha okoraareka amangʼana agha Yëësu, ghano ghatarengʼaini na ghano twaabharaarëkëëyë. Ghwiki nkwikërrya mörë umwika uwöndëwöndë igho, handë amangʼana aghandë igho ghano ghatakorengerrania na ghano mwaaikërëëyi ekembere ukurwa kö-bhëëtö.

⁵Tenkokanya igha, öni m-moke ndë ko-bhayö bhakwikora igha, “M-batomwa abhanene.” ⁶Nokaanyoora nkomaahekana ndë igha, temanyirë okoghamba bhuuya hë, kasi obhomanyi ubhwane ubhwa amangʼana, m-bonene. Kiyö nkyo mwaarööshë bhuuya kö-bhëëtö, ahasë honswe igho, na senkaagha syonswe igho hano twaarë kö-bhëënyu hayö.

⁷Naaihöötirë kö-bhëënyu, ko okobharaarekera Amangʼana Amaiya agha Waryobha, ntabhasabhirë ehoorohooro, okore bhëënyu momaahekane igha, mmoona ubhwera obhonene. Bhoono hayö n-këbhë naakörrë? ⁸Enkaagha eno naakörrë emeremo kö-bhëënyu hayö, na-makanisa aghandë ngo ghaanhaheeneranga. Yaarenga kya hano naabharuusyanga ëbhëntö ibhyabho, okore mbatöörri bhëënyu. ⁹Enkaagha eno naarë na obhohabhë hano naarë kö-bhëënyu hayö, tenaritöhëëyë ömöntö wowonswe oora hë, ko bhoora abhakumya bharikyëtö bhano bhaaruurë Makedonia, mbaangʼaayë ëbhëntö bheno naatunanga. Nairebherranga, okore ntakaaritohera ömöntö wowonswe oora kö-bhëënyu, na kora ni-igho ndaaghëndërri okokora. ¹⁰Kya igho obhoheene ubhwa Yëësu Kiristo bhörë mu-öni, taaho ömöntö wowonswe oora uwa mo-mokowa ughwa Akaaya hayö, ono akotora okondebherra ntakaikumya ko engʼana iyö. ¹¹Okoghamba ukwane igho, ensonga yaamo ti-igha tembahanshirë hë. Waryobha namanyirë kya bhono mbahanshirë.

¹²Nendaaghëndërri okokora kya igho nkokora, okore abhantö bhayö bhakwihasha, bhatakaanyoora umweya ughwa ukwihasha igha, nkokora bharë emeremo kya bhëëtö. ¹³Ko bhoora abhantö kya bhayö, m-batomwa abha obhorongo, nkokora bharë emeremo kwa ököngʼënërrya, nkwikora bharë igha, m-batomwa abha Yëësu Kiristo. ¹⁴Engʼana kya iyö ti-iya ököröghöörya hë, ko bhoora kora Oghosambwa, ughwene ghwonswe nkwikora ghörë igha, ngwo maraika uwa obhorabhu. ¹⁵Ku bhuyö te-ngʼana iya ököröghöörya hë, okomaaha abhaköri abha emeremo abhaaye, bharaikora igha, m-baköri abha emeremo abha heene. Kasi umuhiko ughwabho, ngorebhaingʼarra kya amangʼana aghaabho ghano bhakokora.

Pauro araikumirya inyanko iyaaye

¹⁶Nkobhatëëbhya ndë ghwiki igha, ömöntö atakaakanya igha, öni m-mokangi ndë. Hano moraakanye igha m-mokangi ndë, kasi munyikërri ko bhokangi ubhwane bhuyö, okore öni wonswe niikumi hake igho. ¹⁷Amangʼana ghano ndaaghambe agha ukwikumya, ti-igha Omonene we yaantëëbhëri igha ngaghambe, kasi nkoghaghamba ndë ko bhokangi ubhwane. ¹⁸Ko bhoora abhantö m-baaru bhakwikumirya amangʼana agha kinyamöbhërë, öni wonswe tigha niikumi. ¹⁹Ko bhono moona obhongʼaini, nkyo kekoghera morashomerwa ököghömërrya abhantö abhakangi. ²⁰Moraghömërrya ömöntö ono akobhakora mobhe abhaghorwa, ömöntö ono akobheebhera kengʼainingʼaini igho, ono akobharuusya ëbhëntö, ono akwitöönia, moraghömërrya ömöntö ono akobhatema ku-bhusyö. ²¹Nkosooka ndë okoghamba igha, bhëëtö m-batëntëëru twaarë ko engʼana iyö!

Bhoono nkoghamba ndë kya omokangi igha, nyoore aaho ömöntö ono akwimaaha igha, naingʼarëëyë ukwikumirya engʼana yoyonswe eera, tigha ngambe kinyabhokangi igha, öni wonswe ningʼarëëyë ukwikumirya engʼana iyö.

²²Nyoore abheene m-Baëbhuraania, öni wonswe m-Mwëbhuraania ndë. Nyoore m-Baisiraëri, öni wonswe m-Mwisiraëri ndë. Nyoore na-bhebhorwa Ibhurahimu,11:22 Ibhurahimu. Maaha mo-faharaasa. öni wonswe nu-mwebhorwa Ibhurahimu ndë. ²³Bhoono tigha ngambe kinyabhushuuru igha, nyoore abheene m-baköri abha emeremo abha Kiristo, öni nembahëtëërëëyë. Öni naakora omotono ughwa okokora emeremo okobhakera. Naatoorwa mo-kebhohe hare kaaru, naatemwa bhököngʼu imishariti, naahona ukukwa hare kaaru. ²⁴Naatëmirwë na Abhayahudi mara kataano, ebhebhooko merongo etatö na kenda.11:24 Ebhebhooko merongo etatö na kenda. Ko okorengʼaana na amaraghërryö agha Abhayahudi, hano ömöntö yaashibhibhwanga, tiyatemwanga ebhebhooko okoheteera merongo ene hë. Ku bhuyö, ubhushibhu bhono bhwaakorwanga mu-sinyumba isya esango iya Abhayahudi, mbwaarë ubhwa ebhebhooko merongo etatö na kenda igho. Maaha mo-ketabho ikya Eheetoko iya Etoraati 25:2-3.²⁵Naatëmirwë sinyimbo na Abharuumi hare katatö, naatëmirwë na amaghena kamwë, iryato ryasha okonsarekera ku-bhuribha hare katatö, naaikara ku-nyansha ubhutikö na omobhasö. ²⁶Okoghenda kono naaghendanga ndaraareka engʼana iya Waryobha, nkwaarë na ibhiituurotuuro ibhyaru. Naanyöörrë inyanko iya ököhëtibhwa na imyoro, amajambaazi, inyanko ko-Bhayahudi bharikyane, inyanko ko-Bhakyaro. Naanyöörrë inyanko mu-mighi, inyanko mo-masisi, inyanko mu-nyansha, inyanko iya abhahiiri abharongo. ²⁷Naakora emeremo ëmëköngʼu, na nkanyanka, inyanko iya ukwanga okoraara hare kaaru, inyanko iya okosengera na inyanko iya inyonta, naahika okobhorwa ibhyakorya hare kaaru, inyanko iya embeho na iya okobhorwa singibho. ²⁸Hamwë na ghayö ghonswe igho, kasi nkuritoherwa ndë sinsikö syonswe igho, na emeremo ighya amakanisa ghonswe igho. ²⁹Hano ömöntö abhaayë ömötëntëëru, öni wonswe nkobha ndë ömötëntëëru. Hano ömöntö yaghera murikyaye akore ëbhëbhë, öni wonswe nkwighwa ndë öbhörrö.

³⁰Hano eraabhe igha ni-igha niikumi, nendaaikumiri amangʼana agha öbhötëntëëru ubhwane. ³¹Waryobha, Suwaabho Omonene uwëëtö Yëësu Kiristo, ono aingʼarëëyë ukukumibhwa amakora ghonswe igho, namanyirë igha tenkorongoha hë. ³²Hano naarenga mu-mughi ghono ghokobherekerwa igha Damasiko, omotangati uwa omokowa, ono yaarë ko-bhokama ubhwa omokama Areta, yaarendanga umughi ughwa Damasiko ghuyö, okore bhangoote. ³³Kasi abhantö nyabhorebhe, bhakanhëtërya mu-ridirisha irya ku-ndighi, ndëngë mo-kekapo ekenene, nkamoterroka.

Pauro araimaaha igha m-mötëntëëru

¹Ni-igha niikumi, nokaanyoora igha ti-bhuuya hë. Kasi nendaahekeere amamaaho ghano nkomaaha na obhohonyoro ubhwa amangʼana ukurwa ko-Monene. ²Mmanyirë Umukiristo ömwë, Umukiristo uyö, yöönyööywë ukughya ighörö iyö, imyoka ikömi na inye gheno ghyaaheta. Yaainyökiibhwi, akihikibhwa mu-ryobha irya katatö,12:2 Mu-ryobha irya katatö. Ahasë hayö, ho Abhayahudi bhaaghambanga igha, ho Waryobha amënyirë. hanga yaainyökiibhwi arëngë mö-möbhërë ughwaye muyö, hanga yaaghëëyë igho atarëngë mö-möbhërë ughwaye muyö, Waryobha we amanyirë. Kasi öni temanyirë hë. ³Öni temanyirë nyoore ömöntö uyö yöönyööywë arëngë mö-möbhërë ughwaye, handë igha tiyaarë mö-möbhërë ughwaye muyö hë, Waryobha we amanyirë. Kasi keno mmanyirë ni-igha, ömöntö uyö ⁴yöönyööywë, akahika Paradiso.12:4 Paradiso. Kare hayö iyö ni ibhusitaani iya omokama yaarë, ghwiki rekabha na ensonga iya ibhusitaani iya Ëdëëni. Kasi ko-nkaagha iya Pauro, ensonga iyaako yaarë igha, ahasë hano Waryobha amënyirë. Hano yaarë Paradiso iyö, akaighwa amangʼana ghano ömöntö ataatore okoghamba, amangʼana ghano ömöntö atakutunwa igha aghaghambe. ⁵Bhoono nendaaikumi ko okoghera iya ömöntö uyö, kasi te-ko okoghera iyaane öni umwene. Ëkëntö keno ndaaikumiri, nö-bhötëntëëru ubhwane. ⁶Kora hano okaanyöörrë ndatuna ukwikumya, tenkaabhaayë omokangi hë, ko bhoora no-bhoheene okaanyöörrë ndaghamba. Kasi nkwirebherra ndë, okore ömöntö wowonswe oora, atakaasha okomaaha igha, neena ubhwera okokera bhono bhakwighwa na bhono bhakomaaha.

⁷Naahaaywë inyanko kö-möbhërë ughwane, eno enga kya reehwa. Inyanko iyö, ni-iya umihiri uwa amangʼana uwa Oghosambwa, ono yaatömirwë anyanki, okore ntakaikumya bhököngʼu ko okoghera iya amangʼana ghayö nööröökiibhwi. ⁸Naasabhirë Omonene hare katatö, okore anduusiri-ho inyanko iyö. ⁹Kasi Omonene akantëëbhya igha, “Örööbhö urwane ndukwisirë, ko bhoora mö-bhötëntëëru muyö, mo obhotoro ubhwane bhokomaahwa.” Ku bhuyö nendaaikumi ku ukushomerwa bhököngʼu, ko okoghera iya öbhötëntëëru ubhwane, okore obhotoro ubhwa Yëësu Kiristo, bhobhe hamwë na öni. ¹⁰Ku bhuyö öbhötëntëëru ubhwane nkunshomera bhörë, hamwë na okotokwa, inyanko, amateeso, inyaanyi ko okoghera iya Kiristo, ko bhoora hano naabha ömötëntëëru, ho nkobha na singuru.

Entarëki iya Pauro ko-Bhakörintö

¹¹Ngambirë igho kya omokangi, ko bhoora bhëënyu m-bëënyu möghërrë ngambirë kya omokangi. Ko bhoora yaarenga igha bhëënyu munkumi. Nokaanyoora igha tiningʼarëëyi hë, kasi öni te-moke ndë, okokera bhayö bhakwihasha igha, “M-batomwa abhanene.” ¹²Hano naarë kö-bhëënyu hayö, naaiyörökëri igha, m-motomwa ndë, ko bhoora naakörrë amakono, ebhemanyërryö na amangʼana agha ököröghöörya kö ököghömërrya kwonswe igho. ¹³Tekeeho ëkëntö keno naakora ko-makanisa aghandë, kasi nkanga okokekora kö-bhëënyu hayö. Nyoore eeho engʼana eno naabhasarëëyi, nu-kwanga okobharitohera. Nyoore bhuyö mbo obhoghogho ubhwane bhamurë, munyabhere.

¹⁴Motamaaha, nkwisëëmya ndë niishe iyö urwa katatö, kasi tembaritohere hë. Të-bhëntö ibhyënyu nkutuna hë, kasi m-bëënyu nkutuna. Ngambirë igho, ko bhoora igha, ta-bhaana igha mbo bhakobheeka ëbhëntö ko okoghera iya abhaibhöri abhaabho, kasi abhaibhöri mbo bhakobheeka ëbhëntö ko okoghera iya abhaana abhaabho. ¹⁵Öni nendaashomerwe ukuruusya ëbhëntö ibhyane, na ukwiruusya öni umwene, okore mbatöörri. Kasi bhoono, nkomaahekana ërë igha, enkaagha eno öni nköghëndërrya okobhahansha bhököngʼu, ho bhëënyu mukusuuhya righonshe iryënyu ku-öni.

¹⁶Öni tenabharitöhëëyë ko-ngʼana yoyonswe eera hë, kasi abhandë mö-bhëënyu muyö nkoghamba bharë igha, “Pauro mongʼaini, yaabhangʼënërrëëyi.” ¹⁷Bhoono m-bongʼaini naakörrë ubhwa okobharuusya kyokyonswe keera ko-bhantö bhano naatömirë bhaashe kö-bhëënyu hayö? ¹⁸Naasaasaamirë Tiito aashe kö-bhëënyu. Naatömirë umukumya murikyëtö aashe nawe hamwë kö-bhëënyu iyö. Tiito yaabharuusiri ëkëntö kyokyonswe keera? Kasi temokomaaha igha, öni na Tiito n-këntö këmwë törë ko okokora emeremo? Eteemo iyëëtö në-ëmwë.

¹⁹Kasi nkokanya mörë igha, nkwikoorerra törë kö-bhëënyu. Bhëëtö nkoghamba törë amangʼana ghano mbere iya Waryobha, ntoona öbhömwë na Kiristo. Amangʼana ghayö ghonswe igho tokokora, abhaghonshe abhëëtö, n-ko okoghera iya okobhatöörrya, okore monaghe ku-mukumo ughwënyu. ²⁰Bhoono nkoobhoha ndë igha, ndatora ukuusha, nyoore morakora amangʼana ghano ghatakunshomera. Engʼana kya iyö eratora okokora mbakorre engʼana eno etaabhashomere. Ndatora ukunyoora morabheehana, moona rikenge, okorerrana, okokora ikisiiyomba, okohaamërrania, obhoghambi ubhwa abhantö, ubhwihëëmi, na riihë. ²¹Ghwiki nkoobhoha ndë igha, hano ndiisha, Waryobha nareghera nsooke kö-bhëënyu. Ndebhaabhayera hano ndemaaha abhantö abhaaru, bhano bhaakora ëbhëbhë mö-bhëënyu, tebhakaahöngööyë ëbhëbhë ibhyabho hë. Kasi mbakeena amangʼana aghaabho amaghogho ghaara agha obhosooraare, na amangʼana aghandë agha sënsöni ghano bhaarë nagho ukurwa kare.

Rikaaniö irya umuhiko

¹Oroghendo rono nu-urwa katatö, öni ukuusha kö-bhëënyu iyö. Amaandeko Amahörëëru gharaghamba igha, “Kera engʼana iya obhosarya, ni-igha yemererrwe na abhantö abhabhërë handë abhatatö, abha ukwitegherra ikiina kiyö.”13:1 Maaha mo-ketabho ikya Eheetoko iya Etoraati 19:15.²Hano naaishirë kö-bhëënyu hayö urwa kabhërë, naakaanëri bhaara bhaakörrë ëbhëbhë. Bhoono igho, n-hare ndë, kasi nkötëëbhya ndë bhaara bhaakora ëbhëbhë na abhandë bhonswe igho ku ukukyorra amangʼana ghaaraghaara igha, hano ndiisha, tindyabhera ömöntö hë. ³Nendekora igho, ko bhoora mukutuna ekemanyërryö ikya ukwörökya igha, m-maheene Yëësu Kiristo nkoghamba arë okohetera ku-öni? Yëësu Kiristo uyö, të-mötëntëëru hë, kasi naana singuru, we uyö akokora emeremo mö-bhëënyu. ⁴No-bhoheene igha, Yëësu Kiristo yaahanëkirwë ko-mosarabha kö-bhötëntëëru ubhwa kinyabhantö, kasi bhoono igho, m-möhöru ko obhotoro ubhwa Waryobha. Amangʼana ni-igho gharë igha, bhëëtö m-batëntëëru törë ku-Yëësu Kiristo, kasi moremaaha igha, ntorebha abhahöru ko obhotoro ubhwa Waryobha.

⁵Mwiyitaahe bhëënyu abheene, mwimmaahe nyoore m-maheene mmoona umukumo. Kasi temomanyirë igha, Yëësu Kiristo mö-bhëënyu muyö arë? Hano oraanyoore igha ti-igho ërë hë, hayö momanye igha, ubhwitaahi ubhwënyu, tëbhöhëkërëëyë ekerengere keno kikutunwa hë. ⁶Kasi ndaitengʼera igha, bhëënyu bhoono momarrë okomanya igha, bhëëtö twahekeera ekerengere. ⁷Nkosaasaama törë Waryobha motakaakora engʼana engogho yoyonswe eera, te-ko okoghera igha toratuna tomaahekane igha bhëëtö töhëkëëyë ekerengere kiyö. Kasi keno tukutuna, ni-igha bhëënyu mokore amangʼana amaiya, nokaanyoora bhëëtö tonga kya bhano twakerwa. ⁸Ngambirë igho, ko bhoora tetootore okokora engʼana yoyonswe eera, iya okorebherra obhoheene, kasi no-kokora ëkëntö ko okoghera iya obhoheene. ⁹Nkushomerwa törë, hano twabha abhatëntëëru kasi bhëënyu mobha na singuru. Nkosaasaama törë Waryobha igha, abhahekerani. ¹⁰Nkobhandekera ndë amangʼana ghano ntaraasha kö-bhëënyu iyö, okore hano ndiisha, ntakaasha okomaaha amangʼana ghano ghareghera nderre kora mbööröki ubhwera ubhwane bhono neenabho ko-Monene. Nkoghamba ndë igho, ko bhoora Omonene tiyangʼaana ubhwera ubhwa okobhasarya, kasi nu-bhwa okokora umukumo ughwënyu ghonaghe.

Amangʼana agha okomarërrya

¹¹Bhoono abhakumya bharikyane, nkomarërrya ndë ko okobharagha na eno ndabhatëëbhya igha, mohekerane ko amangʼana aghëënyu, mobhe abhantö abha ököröörësania, mobhe ikiina ëkëmwë, mobhe na omorembe. Hayö ho Waryobha uwa righonshe na omorembe araabhe hamwë na bhëënyu. ¹²Mokeerani ku ukwibhaarana ököhörëëru. Abhahörëëru abha Waryobha bhonswe igho bhano bha hano, bharabhakëërya. ¹³Örööbhö urwa Omonene uwëëtö Yëësu Kiristo, na righonshe irya Waryobha na öbhömwë ubhwa Umwika Ömöhörëëru, bhebhe hamwë na bhëënyu bhonswe igho.