1 Timoteo

Ritashandighi irya mbere irya Pauro

ku-Timoteo

Obhotangati

Ritashandighi reno, Pauro omotomwa uwa Yëësu Kiristo we yaandëkëëyë ömöntö ono yaabherekerwanga igha, Timoteo, uwa mu-mughi ughwa Risitira. Timoteo m-mwehwa uwa Abhayahudi yaarë, nyakuwaabho m-Muyahudi yaarë, na suwaabho m-Muyunaani yaarë (Maaha mo-ketabho ikya Amangʼana agha Abhatomwa 16:1). Timoteo yaatööriibhwi okohetera ko-meremo ighya Pauro, nkyo kekoghera Pauro arabherekera Timoteo igha, “Uwe m-maheene igha m-moona uwaane örë, ku umukumo ghano tokosanga” (Maaha mo-ketabho ikya 1 Timoteo 1:2). Timoteo yaaghendanianga na Pauro ukughya ko-meremo ighya okoraareka Amangʼana Amaiya agha Yëësu Kiristo (Maaha Amangʼana agha Abhatomwa 7:14-15, 18:5). Enkaagha eno waanyöörrë Pauro ataraandeka ritashandighi reno, yaahaayë Timoteo ukwimererra abhakumya mu-mughi ughwa Ëfësö (Maaha 1 Timoteo 1:3).

Keno kyaaghërrë Pauro akaandeka ritashandighi reno, yaatunanga atëëbhi Timoteo bhono abhaghaaka abha ekanisa na abhashemaasi bhakushaaghorwa na ukwëghibhwa. Pauro yaatunanga igha, Timoteo na abhatangati bhayö bhonswe igho, bhabhe abhahaabhu, bhëëghinga abhantö amangʼana agha obhoheene kora bhabhe na eteemo inshiiya mo-bhakumya. Amangʼana aghandë ghano Pauro yaatunanga ni-igha, Timoteo abhe ëkërëngyö ikiiya ko-bhantö bhonswe igho. Ghwiki igha, atöörringa abhakumya amangʼana amaköngʼu ghano ghaare-ho, kora abhe na omotono ughwa ukwanga amëëghyö ghonswe igho agha obhorongo.

Amakëërërryö

¹Ritashandighi reno nö-öni Pauro ndyandëkirë. Öni no-motomwa uwa Kiristo Yëësu ndë. Naanyoora obhotomwa bhuyö ko bhoora igha, Waryobha Ömötöörya uwëëtö, bhaana Kiristo Yëësu ono tukwesegha, mbo bhaaraghërrëëyi igha, mbe omotomwa uwa Kiristo Yëësu. ²Timoteo nu-uwe nkwandekera. Uwe m-maheene igha m-moona uwaane örë, ku umukumo ghano tokosanga. Örööbhö, ikyabhera na omorembe ukurwa ko-Taata uwëëtö Waryobha na ku-Kiristo Yëësu Omonene uwëëtö, bhebhe hamwë na uwe.

Ukwanga amëëghyö agha obhorongo

³Hano naatanööyë ukurwa Ëfësö hayö nkaghya mo-mokowa ughwa Makedonia, naakosaasaamirë igha wikare hayö, okore okaani abhantö bhatighe ukwëghya amëëghyö agha obhorongo. ⁴Obhakaani bhatakaaikërrya amaghano ghano ghataana ubhwera bhwobhwonswe bhoora, na ököröndërrya amariina agha abhakörö, nagho ghatakohwa röndë hë. Amangʼana ghayö, n-senkaani isyene igho ghakoreeta mo-bhantö. Teghakötöörrya abhantö bhakumi Waryobha kya bhono ësëëmyö iyaaye iya ukutungurya abhantö ërë. ⁵Ensonga iya amaraghërryö ghano ni-igha, abhakumya bhahanshane, kwa nkoro nshiiya, amaitegherro amaiya na umukumo ughwa heene. ⁶Kasi abhëëghya abhandë bhahaatëëyë ghayö, bhaisyörri, ghano bhakoghamba, n-gano ghataana ubhwera. ⁷Nkutuna bharë bhabhe abhëëghya abha amaraghërryö agha Mosa,1:7 Abhëëghya abha amaraghërryö agha Mosa. Maaha mo-faharaasa. nokaanyoora ghaara bhakoghamba na okokangʼasërrya, tebhaghamanyërrëëyi hë.

⁸Kasi bhëëtö ntomanyirë igha, amaraghërryö agha Mosa m-buuya gharë, hano ömöntö yakora bhwaheene kya bhono ghakutuna. ⁹Ghwiki ni-igha ntomanyirë bhuuya igha, amaraghërryö teghatöörëëywë-ho abhantö abha heene hë. Kasi ghayö, ngaatoorwa-ho ko okoghera iya abhantö bhano bhatakokora bhono amaraghërryö ghakutuna igha bhakore, abhatëëyu, abhamangarru, abhasarya, na ko bhano bhatakwighwera Waryobha, abha ëbhëbhë, abhaiti abha abhaibhöri abhaabho, na abhaiti abha abhantö. ¹⁰Amaraghërryö agha Mosa ghayö, ngaatöörrwë-ho ko okoghera iya abhasooraare, abhashaasha bhano bhakuturamya abhashaasha bharikyabho, bhano bhakoghonyera abhantö, bhabhaghoota, bhaghya kobhaghörya, abharongo, na bhano bhakutyanera amangʼana agha obhorongo. Amaraghërryö ngaatoorwa-ho ko okoghera iya amangʼana ghonswe igho ghano ghatakorengerrania na amëëghyö agha obhoheene. ¹¹Amëëghyö agha obhoheene, gharëngë mo-Mangʼana Amaiya ghano ghakwörökya ubhuhika ubhwa Waryobha uwa obhongʼoore bhwonswe igho. Amangʼana ghayö, ngo naahaaywë na Waryobha igha, ndaarekere abhantö.

Örööbhö urwa Kiristo Yëësu ko-Pauro

¹²Nkukumya ndë Kiristo Yëësu Omonene uwëëtö. Uyö we yaangʼaana singuru isya okoraareka Amangʼana Amaiya. Keno kekoghera ndamukumya, n-ko bhoora yaandööshë igha, ningʼarëëyë okobha ömököri uwaaye uwa emeremo. ¹³Nokaanyoora naamotokanga kora naateesanga abhantö abhaaye kare hayö, na naarenga na ekeghaaka, kasi Yëësu yaanyabhera. Yaanyabhëëyë ko bhoora amangʼana ghayö naaghakörrë ko obhokangi ubhwane, na ko bhoora ntaarë na umukumo. ¹⁴Omonene Kiristo Yëësu yaansakërya örööbhö oronene, kora akangʼaana umukumo na righonshe ko okobha hamwë nawe.

¹⁵Engʼana eno nemanyekaini igha, “Kiristo Yëësu yaaishirë ko-kebhara kono, okore atööri abha ëbhëbhë.” Obhoheene, ni-igho amangʼana gharë, ku bhuyö ni-igha abhantö bhaikërri. Mo-bhantö abha ëbhëbhë, öni wa ëbhëbhë ndë okokera bhonswe igho. ¹⁶Kasi Yëësu Kiristo yaanyabhëëyë! Yaanyöörökëri ököghömërrya ukwaye kya bhono körë ku-öni uwa ëbhëbhë okokera bhonswe igho. Yaakörrë igho, okore mbe ëkërëngyö ko-bhantö bhano bharaamukumi na ukunyoora öbhöhöru ubhwa amakora ghonswe igho. ¹⁷Mbe, Waryobha we Omokama ono ataana umuhiko, takukwa hë, takomaahekana hë, taaho ono arëngë kya umwene uyö hë. Asookwenga na ökötöönibhwa amakora na amakora. Amina.

Pauro arahaana Timoteo amaraghërryö

¹⁸Timoteo, omoona uwaane ku-mukumo ghono tokosanga, ndakoraghërrya ko okorengʼaana na amangʼana agha öbhörööti, ghano ghaaghambirwë ku-uwe. Amangʼana ghayö ghakötörri witane riihë irya emeremo ighya Waryobha bhuuya. ¹⁹Onaghi umukumo ughwaho, na obhe na amaitegherro amaiya. Abhantö abhandë bhaasera okokora amangʼana ghano bhamanyirë igha n-ga heene, ukwanga okokora ghayö, kwaghera bhaatigha umukumo ughwabho. ²⁰Mo-bhantö bhayö, bhaamo Himenayo1:20a Maaha mo-ketabho ikya 2 Timoteo 2:17-18. na Arekisanda. Naateghera Oghosambwa1:20b Oghosambwa. Maaha mo-faharaasa. abhantö bhayö,1:20c Naateghera Oghosambwa abhantö bhayö. Ensonga iyaamo ni-igha Pauro yaabhaangirë igha bhatakaaghëndërrya okobha öbhömwë na abhakumya mo-kanisa. okore bheeghe, bhatakaatokanga Waryobha.

Amëëghyö agha bhono ekanisa eraasaasaamenga

¹Ëkëntö ekenene, nkobhasabha ndë igha, mosabherenga abhantö bhonswe igho, ko-masabhi aghëënyu ghonswe igho. Ghwiki ni-igha, mukuminga Waryobha ko okoghera iya abhantö bhonswe igho. ²Ndabhakangʼasërrya igha, mosabherenga abhakama na abhatangati bhonswe igho, okore tobhe na omorembe, tosooke Waryobha na okobha na eteemo inshiiya. ³Engʼana iyö ni-nshiiya, kora nkushomera ërë Waryobha Ömötöörya uwëëtö. ⁴Keno Waryobha akutuna ni-igha abhantö bhonswe igho bhatööribhwi kora bhamanye obhoheene. ⁵Waryobha nö-ömwë igho, kora umwighwerrania uwa abhantö na Waryobha, wonswe nö-ömwë igho, uyö nö-möntö ono akobherekerwa igha Kiristo Yëësu. ⁶Yëësu uyö, yaairuusiri umwene igha akwe, okore atunguri abhantö bhonswe igho. Kiyö nkyo ekemanyërryö keno Waryobha yaatohaayë ko-nkaagha eno umwene yaasëëmëri. ⁷Kiyö nkyo ikibhuno keno kyaaghërrë Waryobha akaanyahora igha mbe omotomwa na Omoraarëki uwa Amangʼana Amaiya. M-maheene nkobhatëëbhya, tenkorongoha hë. Waryobha yaanyahööyë okobha umwëghya uwa Abhakyaro, okore ndaarekenga amangʼana agha umukumo na obhoheene.

⁸Ku bhuyö keno nkutuna ni-igha, ahasë honswe igho, hano moraasikanenga okosaasaama, abhashaasha bhainyökinga amabhoko aghaabho kighörö. Bhakorenga igho kwa amaitegherro amaiya, bhatakaarerranga, handë ukunyeerana senkaani. ⁹Kora abhakari bhonswe nkutuna ndë igha, bhaaibhohenga singibho isyabho bhuuya. Bhabhe na eteemo inshiiya, bhaairebherrenga. Ikuughë iyaabho etakaabha iya ukusuka situukya, handë iya okotoora ëbhëntö ibhya esahaabhu na bheno bhekomekameka, handë singibho isya öbhöghöri obhonene. ¹⁰Kasi bhabhe na eteemo inshiiya eno erengʼaini na iya abhakari bhano bhakwighwera Waryobha. ¹¹Abhakari bheeghenga amangʼana bhaana esooko, na bhabhe abhaighwa abha amangʼana. ¹²Öni tinkutuna igha abhakari bhaabhaahenga abhashaasha, handë ököbhöörökërrya, kasi ni-igha bhaaitegherrenga bhahörëërrë. ¹³Keno kekoghera ndaghamba igho ni-igha, Adamu we yaabhömbirwë mbere, ho bhoono Hawa wonswe akabhombwa. ¹⁴Ghwiki ni-igha, Adamu tiyaangʼainirwë hë, kasi omokari we yaangʼainirwë, akabha omosarya uwa amaraghërryö ghaara Waryobha yaabharaghërrëëyi.2:14 Maaha mo-ketabho ikya Okosemoka 3:1-6.¹⁵Kasi abhakari,2:15 Abhakari. Eratora okobha igha, n-Hawa akushumaashera handë igha no-mokari wowonswe oora. ukwebhora ukwabho nkwo korebhatöörya, hano bharaaghëndërri okobha na umukumo, righonshe, öbhöhörëëru na okobha na eteemo inshiiya.

Eteemo iya abhaimërërri abha ekanisa

¹Engʼana eno nemanyekaini igha, “Hano ömöntö aighömbirë emeremo ighya ubhwimërërri ubhwa ekanisa, uyö ne-meremo imiiya ukunyoora aighömbirë.” ²Mbe, umwimërërri uwa ekanisa, ni-igha abhe ömöntö ono atakotemwa amasoro. Abhe umushaasha nyamokari ömwë igho,3:2 Abhe umushaasha nyamokari ömwë igho. Ensonga iyaamo iyëndë ni-igha, atakaabha omosooraare. airebherrenga, ömöntö uwa obhongʼaini, ono akosookwa, omohaani, abhe ömöntö ono amanyirë ukwëghya abhantö engʼana iya Waryobha. ³Atakaabha umunywi uwa amarwa, atakaabha umutindi, abhe ömöntö omohaabhu ono ahanshirë amangʼana agha omorembe. Kora atakaabha ömöntö ono ahanshirë seehera. ⁴Abhe ono akwimererra bhuuya umughi ughwaye, ömöntö ono akwörökërrya abhaana abhaaye eteemo inshiiya, iya ukwighwera abhantö na okobhasooka. ⁵Hano ömöntö yatamwa ukwimererra bhuuya umughi ughwaye umwene, iyakë araatore okonaghya abhakumya abha ekanisa iya Waryobha? ⁶Kora atakaabha ömöntö ono yatööribhwa bhöngö hano, okore atakaasha okobha na ikiheemere. Ukwiheema kuyö, nkomokorerra abhotorrwe ikiina kya bhono Oghosambwa ghwaabhötörëëywë ikiina. ⁷Kasi abhe ömöntö ono akoghambwa bhuuya kora na bhano bhatarëngë Abhakiristo, okore atakaasha okobha na risoro na ököghöötibhwa ko-motegho ughwa Oghosambwa.

Eteemo iya abhashemaasi

⁸Abhashemaasi3:8 Abhashemaasi. Ensonga iyaamo na-bhantö bhano bhakokora emeremo mo-kanisa bharatoorania na abhatangati abha ekanisa. Kare hayö mbo bhaatöörryanga Abhakiristo abha obhohabhë. bhonswe, bhabhe na eteemo inshiiya, bhatakaabha abhaihunaania, bhatakaabha abhanywi abha amarwa, bhatakaahansha seehera. ⁹Kasi, bhabhe abhantö bhano bhakonaghya kwa amaitegherro amaiya obhoheene ubhwa umukumo ughwëtö bhono bhwahonyorwa. ¹⁰Bhayö bhonswe, ni-igha tangata bhashaashibhwi. Hano oraanyoore igha m-buuya bharë, bhakore emeremo ghiyö. ¹¹Bhakaabho3:11 Bhakaabho. Ensonga iyaamo iyëndë ni-igha, abhashemaasi abhakari. bhonswe bhabhe na eteemo inshiiya, bhatakaabha abhaghambi abha abhantö, bhagheerenga ngʼora amangʼana, ghwiki ni-igha bhabhe abhantö abha heene ko amangʼana ghonswe igho. ¹²Umushemaasi wonswe, abhe umushaasha nyamokari ömwë igho, abhe ömöntö ono akoghambera abhaana abhaaye na abhantö abhaaye bhonswe igho. ¹³Abhashemaasi bhano bhakokora emeremo ighya öbhötöörrya bhuuya, bhasookwenga, okore bharaareke amangʼana agha umukumo ghono bhaanagho ku-Kiristo Yëësu ko obhokarë.

Obhoheene ubhwa umukumo ughwëtö

¹⁴Nkukwandekera ndë ritashandighi reno, nokaanyoora igha m-böngö ndaashe iyö. ¹⁵Kasi hano ndaateghete, unyoore omanyërrëëyi bhono Waryobha akutuna abhantö abhaaye bhabhe. Abhantö bhayö, mbo ekanisa iya Waryobha ömöhöru, na ekanisa, yo intimö na umusingi ughwa obhoheene. ¹⁶Obhoheene bhono Waryobha öörökëri nu-bhwa ököröghöörya. Obhoheene bhuyö ni-igha,

Kiristo yaaiyörökëri aana ömöbhërë kya bhëëtö,

akaimererrwa na Umwika Ömöhörëëru igha mwihöötu.

Akamaahwa na abhamaraika,

amangʼana aghaaye ghakaraarekwa mu-bhyaro bhyonswe igho,

akakumibhwa na abhantö abha ko-kebhara kono,

akagheghwa ukughya mu-bhuhika ighörö iyö.

Abhëëghya abha obhorongo

¹Bhoono Umwika Ömöhörëëru nkoghamba arë amangʼana aharabhu igho igha, hano sinsikö isya umuhiko sirihika, abhantö abhandë mbaritigha umukumo ughwa heene, bhaghoote-ko amëëghyö agha obhorongo agha amasambwa. ²Amëëghyö ghayö, nkwëghibhwa gharë na abhaihunaania abharongo. Abhëëghya abharongo bhayö, tebhaamanyërrëëyi igha, në-bhëbhë bhakokora kasi tebhakokora ëbhëbhë hë, ko bhoora amaitegherro aghaabho ghasareka. ³Abhantö bhayö, nkwëghya bharë igha abhantö bhatakaatetana, bhatighe okorya ibhyakorya nyabhorebhe. Kasi ibhyakorya bhiyö, Waryobha yaabhëbhömbirë akatohaana, okore abhakumya tumukumi ko bhoora igha, ntomanyirë obhoheene. ⁴Ëbhëntö bhyonswe igho ibhya Waryobha, m-biiya, tekeeho ikya ukughirwa hë. Abhakumya bhabhegheghe ku ukukumya Waryobha, ⁵ko bhoora engʼana iya Waryobha na okosaasaama ukwëtö, nkosaabhuura bhërë ibhyakorya bhiyö.

Ömököri uwa emeremo umuuya uwa Yëësu Kiristo

⁶Hano örëëghi abhakumya amangʼana ghano, noraanyoore orakorra Kiristo Yëësu emeremo ubhwa heene, kora noraanyoore wëghiibhwi bhuuya ku umukumo na ko amëëghyö amaiya ghano waaghoota. ⁷Wange amaghano ghano ghataana ubhwera bhwobhwonswe bhoora, kasi obhe na omotono ughwa okokora kya bhono Waryobha akutuna obhe. ⁸Emanyekaini igha, “Okonarya ömöbhërë ghobhe na singuru, n-kuuya hake igho. Kasi okotonerra okokora kya bhono Waryobha akutuna, n-kuuya bhököngʼu, ko bhoora igha, nkotohaana körë riraghano irya ukunyoora öbhöhöru ubhwa bhoono igho na bhoora bhuriisha.” ⁹Obhoheene ni-igho amangʼana gharë, ku bhuyö ni-igha abhantö bhaghaikërri. ¹⁰Engʼana iyö, yo ekoghera toranyanka na torakora omotono ko-meremo, ko bhoora igha, Waryobha ömöhöru we tukwitengʼera. Uyö we Ömötöörya uwa abhantö bhonswe igho, ekenene m-Mötöörya uwa bhano bhakumukumya.4:10 Ekenene m-Mötöörya uwa bhano bhakumukumya. Ensonga iyaamo iyëndë ni-igha, Ömötöörya uwa abhantö bhonswe igho, bhano bhakumukumya.

¹¹Wëëghi na okoraghërrya abhakumya amangʼana ghayö. ¹²Ömöntö wowonswe oora atakaakosera igha m-mumura ökërë, kasi okore omotono ughwa okobha ëkërëngyö ko abhakumya, ko bhoghambi ubhwaho, eteemo iyaaho, righonshe iryaho, umukumo ughwaho, otakaabha na risoro. ¹³Ughinga orakora omotono ughwa okosomera abhantö Amaandeko Amahörëëru. Öghëndërri okoraareka na ukwëghya abhantö okohekera hano ndiisha iyö. ¹⁴Otakaatigha okokorra emeremo, ituho eera Waryobha yaakohaayë okohetera ko mangʼana agha öbhörööti, enkaagha eno abhaghaaka abha ekanisa bhaakötöörëëyë amabhoko. ¹⁵Onaghi okokora amangʼana ghayö mo-nkoro iyaaho, okore abhantö bhonswe igho bhamaahe amaghëndërryö aghaaho. ¹⁶Öghëndërri ukwiraarerra, ko amangʼana agha eteemo iyaaho, na amëëghyö aghaaho. Hano oraakore igho, noraaitööri uwe umwene na bhano bhakwitegherra amangʼana ghayö.

Amaraghërryö ko sembaasi isya abhantö mo-kanisa

¹Otakaabheeha abhaghaaka, kasi obharaghërringa kya hano waraghërrya bhasuwëënyu. Abhamura, obharaghërri kya hano waraghërrya abhamura abhëënyu. ²Abhakungu, obharaghërri kya hano waraghërrya bhanyakuwëënyu, na abhaisëkë, kya bhono okoraghërrya abhaisëkë abhëënyu. Ughinga orakora engʼana iyö kwa enkoro inshiiya.

³Osookenga abhasinö bhano bhataana uwa ököbhötöörya, obhatöörringa. ⁴Kasi hano oraanyoore igha, umusinö aana abhaana handë abhaishökörö, ni-igha abhantö abhaaye bhayö, bhamötöörringa kya bhono Waryobha akutuna. Hano bharaamutughe, ho oraanyoore bharahaka amangʼana amaiya ghaara abhaibhöri abhaabho bhaabhakorranga. Kiyö nkyo Waryobha akutuna. ⁵Umusinö ono ataana ömöntö uwa ökömötöörrya, nkwitengʼera arë Waryobha, nkomosaasaama arë na okomosabha ubhutikö na omobhasö igha amötöörri. ⁶Kasi umusinö ono ahanshirë oronamba urwa ko-kebhara kono, uyö n-kya ömöntö ono yaakwa nokaanyoora igha m-möhöru, ko bhoora taana ubhwighwerrani na Waryobha hë. ⁷Amangʼana ghayö ghonswe igho ötëëbhi abhakumya, okore bhatakaasha okotemwa amasoro. ⁸Kasi ömöntö wowonswe ono atakötöörrya abhantö abhaaye, ekenene abha waaye ka, uyö yaamara ukutigha amangʼana agha umukumo, uyö, m-möntö m-moghogho okokera bhano bhataana umukumo ku-Waryobha.

⁹Umusinö abharrwe mo-bhasinö, hano oraanyoore ahikiri imyoka merongo esansabha, na unyoore igha tiyaakakörrë obhosooraare hë.5:9 Tiyaakakörrë obhosooraare hë. Ku-Kiyunaani yandëkirwë igha, Omokari uwa umushaasha ömwë umwene igho. Abhandë bharakanya igha, ensonga iyaamo ni-igha, kö-bhöhöru ubhwaye bhwonswe igho tiyaakaröghëëyë emeghango ëbhërë hë.¹⁰Abhe uwa eteemo inshiiya, abhe igha, nö-möntö ono yöörökërryanga abhaana abhaaye eteemo inshiiya, yaasërëënianga abhaghëni, yaatighinkananga ukwisaabhya abhantö abha Waryobha amaghörö aghaabho.5:10 Maaha mo-ketabho ikya Yohana 13:1-17. Umusinö uyö, abhe ono yaatöörryanga bhano bhaanyankibhwanga, ghwiki abhe ono yaakora amangʼana amaiya. ¹¹Kasi abhasinö bhano bhataraaghota, otakaikërrya bhandekwe amariina aghaabho ko amangʼana agha ökötöörrya abhasinö, ko bhoora ëmëbhërë nkobhakera ghërë, bhatigha hayö amangʼana agha Kiristo, bhatuna obhotetwa. ¹²Hayö noraanyoore bhabhaayë na risoro irya okobhotorrwa ikiina na Waryobha, ko bhoora bhatighirë riraghano iryabho ku-Kiristo, irya ukwikara igho bhatatëtirwë urwa kabhërë. ¹³Abhasinö kya bhayö, nkunyoora örë bhaana eteemo iya ubhworo na ubhwërëëri ubhwa mu-mighi ighya abhantö. Bhayö n-nyangasheka, abhashërëngya abha amangʼana agha abhantö abhandë, nkoghamba bharë amangʼana ghano ghatabhatönëri, na ghano ghataana enshera. ¹⁴Bhoono öni nkutuna ndë igha, abhasinö bhano bhataraaghota, bhatetwenga, bheebhore, bhatughe imighi ighyabho, okore umubhisa uwëëtö wowonswe oora, atakatoghamba bhoghogho. ¹⁵Tokomaaha igha abhasinö abhandë bhatimbooshoka, bhaghoota-ko amangʼana agha Oghosambwa?

¹⁶Mbe, hano oraanyoore omokari umukumya aana abhasinö mo-bhahiiri abhaaye, ni-igha abhatöörri, okore ekanisa etakaaritoherwa. Hayö ho ekanisa eraanyoore umweya ughwa ökötöörrya abhasinö sentakaana.

¹⁷Abhaghaaka abhatangati abha ekanisa bhano bhakwimererra bhuuya ekanisa, bhasookwenga na bhakorrwenga bhuuya,5:17 Bhasookwenga na bhakorrwenga bhuuya. Ku-Kiyunaani yandëkirwë igha, bhasookwe kabhërë. ekenene, abha omotono ughwa okoraareka engʼana iya Waryobha na ukwëghya abhantö. ¹⁸Keno këghërrë ngambirë igho ni-igha, Amaandeko Amahörëëru ghandëkirwë igha, “Otakaabhoha engʼombe umunywa, hano yakohoorra engano.”5:18a Maaha mo-ketabho ikya Eheetoko iya Etoraati 25:4. Ghwiki yandëkirwë igha, “Ömököri uwa emeremo naingʼarëëyi okohakwa ehoorohooro iyaaye.”5:18b Maaha mo-ketabho ikya Ruuka 10:7.

¹⁹Otakaikërrya amangʼana agha ukushongerwa ukwa omoghaaka uwa ekanisa, hano oraanyoore ghataana obhoheene ubhwa abhaimërërri abhabhërë handë abhatatö.5:19 Maaha mo-ketabho ikya Eheetoko iya Etoraati 17:6, 19:15.²⁰Kasi abhaghaaka abha ekanisa bhano bhaköghëndërrya okokora ëbhëbhë, obhakaani harabhu igho abhandë bhonswe bhaighwe, okore bhoobhohe.

Amangʼana ghano Pauro yaakaanëri Timoteo

²¹Nkokoraghërrya ndë mbere iya Waryobha, na mbere iya Kiristo Yëësu na abhamaraika abhaahorwa igha, onaghi amangʼana ghayö nkwandëkëëyë. Otakaaheeta okobhotora ibhiina. Otakaabha na ekeroterro. ²²Otakaaheeta okotoora ömöntö ko-meremo ighya Waryobha, ko bhoora hano oraatoore-ko ömököri uwa ëbhëbhë, uwe wonswe noraanyoore wikererraini nawe kö ëbhëbhë ibhyaye. Ku bhuyö ni-igha wangarre, okore öghëndërri okobha ömöntö ono otaana risoro.

²³Ukurwa bhoono igho, otakaanywanga amanshë agheene igho hë, kasi ughusanga-ko idivai5:23 Idivai. Kare haara abhantö bhaamitanga sehagho isya sezabhibhu bhamara bhatereka amanshë aghaako. Ko bhoora amanshë agha ukunywa ghaakorranga abhantö amarööyë, ku bhuyö mbaashinanga-mo idivai. Maaha mo-faharaasa. nke igho, ko okoghera iya öbhörööyë ubhwaho ubhwa enda, na amarööyë aghandë ghano ghakukunyankya.

²⁴Abhantö abhandë ëbhëbhë ibhyabho, nkomaahekana bhërë harabhu igho kora bhataraabhotorrwa ikiina. Kasi abhandë, ëbhëbhë ibhyabho mbiibhisirë, mberemaahwa mbere iyö. ²⁵Ni-igho igha, amangʼana amaiya ghonswe nkomaahwa gharë harabhu igho. Na ghaara ghaibhisirë, ngaretomboka ghabhe harabhu igho.

Amaraghërryö ko abhaghorwa bhano bhaakumya

¹Abhaghorwa bhano bhaakumya Waryobha, ni-igha bhasookenga abhanene abhaabho, okore Waryobha atakaatokwanga, handë amëëghyö aghëëtö ghatakaaserwa. ²Hano oraanyoore abhaghorwa bhaana abhanene abhaabho bhano bhaakumya Yëësu, engʼana iyö, etakaaghera bhabhasere. Kasi bhabhakorre emeremo bhuuya bhököngʼu, ko bhoora bhayö, m-bakumya bharikyabho bhakötöörrya emeremo, kora m-baghonshe abhaabho. Okaani abhantö, na ököbhëëghya amangʼana ghayö bhuuya.

Amëëghyö agha obhorongo na ubhwamë ubhwa heene

³Ömöntö wowonswe ono akwëghya abhantö amangʼana agha obhorongo, amëëghyö ghano ghatakorengerrania na ghaara agha obhoheene agha Omonene uwëëtö Yëësu Kiristo, kora teghakwikererrania na amëëghyö ghano ghakoraghërrya abhantö igha bhasooke Waryobha. ⁴Abhantö bhayö, nkwibhaaka arë bhosa igho, kora tamanyirë engʼana hë. Ömöntö kya uyö, nu-mwingʼangʼo aanagho ughwa senkaani isya ebhengʼanangʼana igho, bheno bhetaana ubhwera. Amangʼana ghayö, ngo ghakoreeta orongʼeera, riihë, amatöki, na amaitegherro amaghogho. ⁵Kora nkoghera gharë abhantö bhanga ukwighwerrana. Abhantö kya bhayö, emetwe ghyabhasarekera, tebhaana obhoheene hë. Nkokanya bharë igha, okosooka Waryobha ne-nshera iya okoneebhera-mo.

⁶M-maheene, okosooka Waryobha, nkoghera körë ömöntö aameha bhököngʼu, hano yaanga kobha na oronamba, aiswe na ëbhëntö bheno aanabhyo. ⁷Hano twaaibhööywë ko-kebhara kono, tetwaishirë-mo na ëkëntö kyokyonswe igho hë. Kora hano turiwa-mo, titurirwa-mo na kyokyonswe keera hë. ⁸Mbe, hano toraabhe na ibhyakorya na singibho, twiswe na bhiyö. ⁹Kasi bhano bhakwighomba ukwameha, nkushaashibhwa bharë, bhaghöötibhwa ko-metegho na oronamba urwabho, urwa ekekangi. Oronamba ruyö, nkobhasarya rörë, kora robhasikya. ¹⁰Esemoko iya amangʼana amaghogho ghonswe igho, no-kohansha seehera. Abhandë okohansha seehera, kwabhangʼaina bhaatigha umukumo, bhaikorerra öbhörrö ubhurito, kya ömöntö ono aibhëtirë na ekegheso.

Pauro arakaania Timoteo

¹¹Kasi bhoono uwe ömöntö uwa Waryobha, ni-igha ongʼose amangʼana ghayö. Oghoote-ko amangʼana agha heene, osooke Waryobha na obhe na umukumo, righonshe, öghömërri na wihoote. ¹²Amangʼana ngakakongʼa bhono bhonswe gharaakongʼe, kasi uwe, obhe na omotono ughwa okosoorana Waryobha, onaghi öbhöhöru ubhwa amakora ghonswe igho. Öbhöhöru bhuyö, yo engʼana eno waabherekerrwa, urusikö rono waaikërëëyi umukumo ughwaho ghono waarë nagho ku-Yëësu Kiristo, mbere iya abhaimërërri abhaaru bhaara. ¹³Ndakokangʼasërrya mbere iya Waryobha ono akohaana ëbhëntö bhyonswe igho öbhöhöru, na mbere iya Kiristo Yëësu ono yaaimërërrëëyë obhoheene ku-Pontio Piraato, ¹⁴ni-igha onaghi amaraghërryö ghayö, oghaikërri, otakaateeya okohekera hano Omonene uwëëtö Yëësu Kiristo ariisha. ¹⁵Yëësu uyö, nariisha enkaagha eno Waryobha yaasëëmya. Waryobha umwene igho, we akötöönibhwa. Uyö umwene igho, we ömötöngi, Omokama uwa abhakama bhonswe igho, na Omonene uwa abhanene bhonswe igho. ¹⁶Waryobha umwene igho, we atarikwa. Naikaayë mo-bhorabhu bhono ömöntö ataatore ukubhusuntarra. Kora taaho ömöntö ono yakamörööshë hë, handë ono akotora okomomaaha. Obhotoro na okosookwa bhebhe ku-Waryobha amakora ghonswe igho. Amina.

¹⁷Ötëëbhi abhaamë igha, bhatakaihasha handë ukwesegha ubhwamë ubhwa ko-kebhara kono. Ubhwamë bhuyö, m-bwa ribhagha ike igho. Kasi ubhweseghe ubhwabho, bhobhenga ku-Waryobha, ono akötösërëënia ko okotohaana ëbhëntö bhyonswe igho, okore tushomerwe nabhyo. ¹⁸Ghwiki obhatëëbhi igha, bhakore amangʼana amaiya. Bhabhe abhaamë, abha okokora amangʼana amaiya. Bhabhe abhahaani, bhasangenga na abhantö abhandë ëbhëntö ibhya ubhwamë ubhwabho. ¹⁹Ko okokora ghayö, mbaraaibhekere emongo eno eraabhe kya umusingi ömököngʼu ughwa inyumba ku-sinsikö siyö sikuusha. Hayö ho bharinyoora öbhöhöru ubhwa obhoheene.

²⁰Timoteo, onaghi bhuuya ghonswe igho ghano Waryobha yaakohaana. Wibhashe amangʼana amanyanku, teghaana ubhwera bhwobhwonswe bhoora hë. Otakaisohya mo-senkaani isya ekekangi, seno abhandë bhakokanya igha, nsyo obhongʼaini. ²¹Abhantö abhandë bhano bhaghoota-ko senkaani isya ekekangi siyö, bhatimbööshökirë, bhatighirë umukumo.

Mbe, örööbhö robhe hamwë na bhëënyu bhonswe igho.