1 Abhatësarönikë

Ritashandighi irya mbere irya Pauro

ko-Bhatësarönikë

Obhotangati

Ritashandighi reno, ndyaandëkirwë na omotomwa Pauro. Ndyaandëkirwë enkaagha eno yaarenga hamwë na Siriwano bhaana Timoteo. Yaandëkëëyë abhakumya bhano bhaarë mu-mughi ghono ghwaabherekerwanga igha Tësarönikë. Pauro, no-motomwa uwa Yëësu Kiristo yaarë, yaaraarekanga Amangʼana Amaiya agha Yëësu Kiristo, ko-Bhayahudi, na ko-bhantö bhano bhataarë Abhayahudi.

Hano Pauro na bharikyaye bhaahikirë mu-kyaro ikya Bhughiriki, akaraareka na okotogheka ekanisa mu-mughi omonene ghono ghwaabherekerwanga igha, Tësarönikë, mu-kyaro ikya Makedonia. (Maaha mo-ketabho ikya Amangʼana agha Abhatomwa 17). Sëhamatë sinsharu isya abhantö sekaikërrya amangʼana aghaaye. Hano Pauro yaatöghëkirë ekanisa iya Tësarönikë haara, inyanko enene ekaanyoora abhakumya abha haara. Inyanko iyö, yaakorwanga na Abhayahudi. Pauro akamaaha igha emokere-mo këmwë aruho. Hano yaaruurë iyö, tiyaakyörrë-yo ghwiki hë. Keno yaakörrë, no-kotoma murikyaye ono yaabherekerwanga igha Timoteo, aghende Tësarönikë, okore atërëmi abhakumya abha iyö. Pauro umwene akaghëndërrya ukughya ko-sembaara isyëndë, okoraareka Amangʼana Amaiya. Hano yaahëtirë enkaagha enke igho, Timoteo akakyora ko-Pauro, akamoherra amangʼana agha umukumo na kya igho abhakumya abha Tësarönikë bhaköghëndërrya. Hano Pauro yaaighuurë amangʼana ghayö, akashomerwa bhököngʼu, akabhandekera ritashandighi irya okobhakumya, na ököbhöngërërrya amëëghyö aghandë. Yaabhatërëmëri, okore bhaghëndërri ökötëghërya Waryobha. Mu-ritashandighi irya mbere reno Pauro yaandëkëëyë Abhatësarönikë, yaandëkirë-mo amangʼana agha okobhakora bhaghömërri mu-nyanko, na agha okobha na obhoheene igha, Yëësu narikyora, na abhakumya mbariikara hamwë na Yëësu. Pauro yaaghambirë engʼana eno ku ubhweseghe na ko obhoheene igha, Yëësu narikyora.

Amakëërërryö

¹Ritashandighi reno, nö-öni Pauro ndyandëkirë toona Siriwano1:1 Siriwano mo-ketabho ikya Amangʼana agha Abhatomwa arabherekerwa Siira. hamwë na Timoteo. Ekanisa iya umughi ghono ghokobherekerwa igha Tësarönikë, m-bëënyu tukwandekera, abhantö bhano mukukumya Taata uwëëtö Waryobha na Omonene uwëëtö Yëësu Kiristo.

Waryobha abhahaane örööbhö na omorembe.

Umukumo ughwa Abhatësarönikë

²Nkukumya törë Waryobha senkaagha syonswe igho, ko okoghera iya bhëënyu bhonswe igho, kora titukusinya okobhasabhera hë. ³Hano twabhasabhera ko-Taata uwëëtö Waryobha, nkuhiita törë umukumo ughwënyu ko amangʼana ghano mokokora. Torahiita omotono ughwa righonshe ghono moonagho, na kya igho monaghirë ku ubhweseghe bhono moonabho ko-Monene uwëëtö Yëësu Kiristo.

⁴Bhëënyu abhakumya bharikyëtö, ntomanyirë igha, Waryobha nabhahanshirë, nkyo këghërrë abhashaaghööyë mobhe abhantö abhaaye. ⁵Ntomanyirë igha, Amangʼana Amaiya ghano twaabharaarëkëëyë, te-mangʼana agheene igho ghaarë hë, kasi ntwaaraarëkirë ku singuru, na okohetera ku-Mwika Ömöhörëëru, eno toona obhoheene igha, amangʼana ghayö na-agha obhoheene. Bhëënyu mmönyirë bhuuya kya igho twaarë hamwë na bhëënyu, okore tobhatöörri. ⁶Nokaanyoora mwaatëësirwë bhököngʼu ku ikibhuno ikya umukumo ughwënyu, kasi mwaaikërëëyi engʼana iyö ku ukushomerwa kono kukurwera ku-Mwika Ömöhörëëru. Nkö-bhëëtö na ko-Monene Yëësu nko mwëëghëëyë ököghömërrya ghayö. ⁷Ku bhuyö, mobhaayë ëkërëngyö ikiiya ko-bhakumya bhonswe igho abha mo-mokowa ughwa Makedonia, na ughwa Akaaya. ⁸Ko okoghera iya bhëënyu, abhantö bhaighuurë Amangʼana agha Omonene Yëësu. Tërëngë igha nko-bhantö abha Makedonia na abha Akaaya abheene igho hë, kasi umukumo ughwënyu ku-Waryobha, ngomanyekaini ahasë honswe igho. Ku bhuyö tetoona engʼana iyëndë iya okohoorrera-ko hë. ⁹Ahasë honswe igho hano tukughya, abhantö nkushumaashera bharë kya bhono mwatwikërëëyi hano twaahikirë kö-bhëënyu. Nkoghamba bharë kya bhono mwaatighirë ëbhëtöndö ibhyënyu, mokaisyörrya Waryobha ömöhöru na uwa obhoheene, okore momokorre emeremo. ¹⁰Bhoono nkoghanya mörë Omoona uwa Waryobha,1:10 Omoona uwa Waryobha. Maaha mo-faharaasa. Yëësu, aike ukurwa mu-ryobha. Uyö we Waryobha yaaryökëri, ghwiki we akötötöörya okore Waryobha atakaasha ukutushibhya hano arebhotorra abhantö bhonswe igho ibhiina ibhyabho.

Emeremo ighya Pauro na bharikyaye Tësarönikë

¹Abhakumya bharikyëtö, bhëënyu abheene mmomanyirë igha, ukuusha kö-bhëënyu hayö, tekwaare kwa bhosa hë. ²Ghwiki mmomanyirë igha, enkaagha eno waanyöörrë totaraahika kö-bhëënyu, ntwaanyankiibhwi bhököngʼu, kora tokatokwa mu-mughi ghoora ghokobherekerwa igha Firipi. Nokaanyoora twaarëbhërrëywë bhököngʼu igha totakaasha kö-bhëënyu, kasi Waryobha yaatohaayë singuru isya okoraareka Amangʼana aghaaye Amaiya kö-bhëënyu.

³Amangʼana ghano tokobhakangʼasërrya, ta-agha okobhasirya ëkëkööri, handë okobharaarekera ko obhoghogho, handë okobhangʼaina. ⁴Kasi nkoraareka törë ko bhoora Waryobha yaarööshë igha ntwingʼarëëyi okokora igho. Ku bhuyö akatohaana emeremo ighya okoraareka Amangʼana Amaiya. Ta-bhantö tukutuna ökötëghërya hë, kasi keno tukutuna nö-kötëghërya Waryobha, ko bhoora we akwitaaha ghonswe igho ghano gharëngë mo-senkoro isya abhantö.

⁵Mmomanyirë igha, tetwaghambanga amangʼana okore motohanshe, handë amangʼana agha obhongʼaini ngʼaini ghano ghatarë agha obhoheene, okore igha tunyoore ehoorohooro. Waryobha we umwimërërri uwëëtö ko-ghayö ghonswe igho nkoghamba! ⁶Ghwiki titwatunanga igha abhantö bhatukumi hë, nekaabha igha m-bëënyu, handë igha na-bhantö abhandë igho. Ko bhoora igha bhëëtö na-bhatomwa abha Kiristo törë, ntokaatörrë ukutuna ëbhëntö nyabhorebhe kö-bhëënyu, kasi tetwakörrë igho hë. ⁷M-bahaabhu twaarë kö-bhëënyu kya omokari ono akorera abhaana abhaaye. ⁸Ntwaabhahanshirë bhököngʼu. Ku bhuyö ntwaashömëëywë, te-Mangʼana Amaiya agheene igho twaabhatëëbhëri ukurwa ku-Waryobha hë, kasi ntwaakörrë ghonswe igho ghano ghakotora okobhatöörrya, ko bhoora bhëënyu m-baghonshe abhëëtö mörë.

⁹Abhakumya bharikyëtö, ndamanya nkuhiita mörë omotono ughwëtö na ukunyanka ukwëtö, kono twaarë nako ko okokora emeremo ubhutikö na omobhasö. Ntwaakoranga igho, okore totakaanyankya ömöntö wowonswe mö-bhëënyu, hano twaraareka Amangʼana Amaiya agha Waryobha. ¹⁰Bhëënyu mbo abhaimërërri abhëëtö, na Waryobha namanyirë igha, eteemo iyëëtö kö-bhëënyu abhakumya bharikyëtö, në-hörëëru yaarë, iya obhoheene, tetwatëmirwë amasoro hë. ¹¹Ghwiki mmomanyirë igha, enkaagha iyö twaarenga hamwë na bhëënyu, ntwaabhakorranga kya bhono omoghaaka akokorra abhaana abhaaye. ¹²Ntwaabhatoghekanga mo-senkoro, torabhatërëmya na okobhakangʼasërrya, okore igha, mokore ghano Waryobha ahanshirë. Waryobha uyö, we akobhabherekera okore mosohe mo-Bhokama na mu-bhuhika ubhwaye.

¹³Bhëëtö tetokorosa ukukumya Waryobha hë, ko bhoora hano mwaaighuurë engʼana iyaaye eno twaabharaarëkëëyë, temwaghëghöötirë okanya igha nkö-möntö iruurë hë. Kasi mwaaghëghöötirë igha, ni-iya Waryobha, na maheene ni-igho ërë. Engʼana iyö, nkokora ërë emeremo mo-senkoro isyënyu, bhëënyu bhano mukukumya. ¹⁴Abhakumya bharikyëtö, ghaara ghaanyöörrë abhakumya abha Kiristo Yëësu mo-makanisa agha Waryobha mo-mokowa ughwa Yudea, ni-ighoigho na bhëënyu ghaabhanyöörrë. Abhantö abhëënyu bhaabhanyankëri, kya hano bhayö bhaanyankiibhwi na Abhayahudi bharikyabho. ¹⁵Abhayahudi bhayö, bhaaitirë abharööti abha kare, na mbo bhaaitirë Omonene Yëësu. Ghwiki mbo bhaatunyankëri. Abhantö bhayö, nkörërrya bharë Waryobha, kora m-babhisa abha abhantö bhonswe igho, ¹⁶ko bhoora bhakotokaania okoraareka Amangʼana Amaiya ko-Bhakyaro. Keno bhakutuna ni-igha, Abhakyaro bhatakaatööribhwa. Ku bhuyö ni-igho bhaköghëndërrya okohekerania ëbhëbhë bhyonswe igho bheno bhakokora senkaagha syonswe igho. Kasi bhoono öbhöbhë ubhwa Waryobha, bhobhahëkërëëyë!

Pauro na bharikyaye bharaighomba okotaarra Abhatësarönikë

¹⁷Abhakumya bharikyëtö, ukutighana ukwëtö na bhëënyu n-kwa akabhagha akake igho kwaarë. Ghwiki ukutighana kuyö nu-kwa ömöbhërë ughwene igho kwaarë, tu-kwa senkoro kwaarë hë. Ko-nkaagha yonswe igho iyö, ntwaaighombanga bhököngʼu igha tomaahane na bhëënyu ghwiki. ¹⁸Ho twaatunirë igha tuushe iyö, ekenene öni Pauro naatunanga ukuusha iyö, kasi Oghosambwa2:18 Oghosambwa. Maaha mo-faharaasa. ghokatorebherra. ¹⁹Naatunanga niishe iyö ko bhoora igha hano Omonene Yëësu ariisha, m-bëënyu morebha ikibhuno ikya ubhweseghe na ukushomerwa ukwëtö, na morebha ikirighi ikyëtö ikya obhobhaahi. ²⁰M-maheene, m-bëënyu mokoghera toraikumya na torashomerwa.

Pauro aratoma Timoteo Tësarönikë

¹Mbe, hano twaakërrwë ököghömërrya, ku ukwanga okomanya ghano ghakwikora Tësarönikë hayö, tokamaaha igha, öni na Siriwano tutighare ku-mughi ghono ghokobherekerwa igha Atene, ²kasi totome murikyëtö Timoteo, okore aashe abhatogheke mo-senkoro isyënyu, na okobhatërëmya ku-mukumo ughwënyu. Timoteo uyö, nö-mököri uwa emeremo murikyëtö uwa Waryobha ko okoraareka Amangʼana Amaiya agha Kiristo. ³Ntwaakörrë igho, okore ömöntö wowonswe atakaakwa omotwe ku ikibhuno ikya inyaanyi eno mukunyoora. Bhëënyu mmomanyirë igha, ni-igha tohetere mu-nyaanyi muyö. ⁴Ghayö mmoghamanyirë, ko bhoora enkaagha eno twaarë na bhëënyu, ntwaabhahitökyanga igha, ntoraanyankibhwi. Bhoono ni-igho ërë.

⁵Ho yaahikirë-ho enkaagha eno naakërrwë ököghömërrya, nkatoma Timoteo kö-bhëënyu, okore mmanyërri amangʼana agha umukumo ughwënyu. Naakörrë igho, ko bhoora naakanyanga igha, handë umushaashi uwa amangʼana oora aratora okobhashaashya na okobhasirya. Hayö ho bhoono emeremo ghyonswe igho gheno twaakörrë kö-bhëënyu, ghekaahëtirë bhosa igho.

Amangʼana amaiya ukurwa Tësarönikë

⁶Kasi bhoono Timoteo atöhëkërëëyë ukurwa kö-bhëënyu hayö, atötëëbhëri amangʼana amaiya agha umukumo na righonshe iryënyu. Atötëëbhëri igha, nkutuhiita mörë bhuuya ukughya iyö, na amaigha ghabharëëyë agha okomaahana na bhëëtö, kya bhono na bhëëtö bhonswe amaigha ghatörëëyë agha okomaahana na bhëënyu.

⁷Abhakumya bharikyëtö, amangʼana agha umukumo ughwënyu, ghatöghëkirë senkoro isyëtö ku-nyanko eno twaarë nayo. ⁸Bhoono töhëshëëyë, ko bhono mwitöghëkirë, monaghirë ko-Monene Yëësu. ⁹Bhoono n-kë tokaahaka Waryobha ko okoghera iya umukumo ughwënyu, handë ku ikibhuno ikya ukushomerwa okonene kono toonako ku-Waryobha, okoghera iya bhëënyu? ¹⁰Nkotonerra törë okosaasaama Waryobha ubhutikö na omobhasö, atötöörri tomaahane ghwiki na bhëënyu, okore töbhëngërërri keno kikusuuha ku-mukumo ughwënyu.

¹¹Taata uwëëtö Waryobha umwene we tokosaasaama, na Omonene uwëëtö Yëësu, bhatösëëmëri enshera iya ukuusha iyö. ¹²Omonene abhëngëri na ököbhëngërërrya righonshe irya okohanshana bhëënyu abheene ko abheene na okohansha abhandë bhonswe igho, kya bhono toona righonshe rinene kö-bhëënyu. ¹³Ghwiki ni-igha atogheke senkoro isyënyu, okore mobhe abhantö abhahörëëru na motakaabha na risoro ku-Waryobha Taata uwëëtö, enkaagha eno Omonene uwëëtö Yëësu ariisha hamwë na abhahörëëru abhaaye bhonswe igho.3:13 Hamwë na abhahörëëru abhaaye bhonswe igho. Ensonga iyaamo iyëndë ni-igha, maraika, handë okobha, Abhakiristo bhano bhaakwa.

Eteemo eno Waryobha ahanshirë

¹Bhoono abhakumya bharikyëtö, mwaamaahera kö-bhëëtö kya bhono ikutunwa ukwikara bhuuya, okore mötëghëri Waryobha. M-maheene ni-igho mokokora. Torabhasabha na okobhasaasaama ku ubhwera ubhwa Omonene Yëësu igha, möghëndërri bhököngʼu okokora igho. ²Ko bhoora mmomanyirë bhuuya amaraghërryö ghano twaabharaghërrëëyi ku ubhwera ubhwa Omonene Yëësu.

³Waryobha nkutuna arë mobhe abhantö abhahörëëru, nkwo okoghamba igha, motakaakora obhosooraare. ⁴Bhëënyu bhonswe igho ni-igha mwihoosherre, kö öbhöhörëëru na ukwisooka. ⁵Motakaabha na oronamba kya urwa Abhakyaro, bho tebhamanyirë Waryobha hë. ⁶Ömöntö wowonswe oora atakaasarrya murikyaye ko amangʼana kya ghayö, handë okomongʼaina. Twaabhatëëbhëri na okobhakaania igha, bhonswe igho bhano bhakokora amangʼana kya ghayö, Omonene Yëësu narebhashibhya. ⁷Waryobha tiyaatöbhërëkëëyë igha tokore obhosooraare, kasi yaatöbhërëkëëyë okore tobhe abhahörëëru. ⁸Ömöntö wowonswe ono akwanga amëëghyö ghano, tigha nu-mwëghya uyö akwanga, kasi nkwanga arë Waryobha ono yaabhahaana Umwika Ömöhörëëru.

⁹Bhoono, tërëngë igha tobhandekere amangʼana agha okohanshana, ko bhoora bhëënyu abheene mwëghibhwa na Waryobha kya bhono ikutunwa mohanshane. ¹⁰M-maheene ni-igho mokokorra bharikyënyu bhonswe igho, abha mo-mokowa ghwonswe igho ughwa Makedonia. Bhoono torabhasaasaama, abhakumya bharikyëtö, mohanshane bhuyöbhuyö kora mökëri hayö. ¹¹Mobhe na omorembe. Ömöntö wowonswe igho, atakaatönibhwa na amangʼana agha abhandë, kasi akore emeremo ighyaye umwene, kya bhoora twaabharaghërrëëyi. ¹²Hayö ho mörööröki eteemo inshiiya ko-bhantö bhano bhatarëngë Abhakiristo. Ghwiki temoobhe abhantö abha ukwesegha ëbhëntö ibhya abhandë hë.

Ubhweseghe ubhwa ukuryoka

¹³Bhëënyu abhakumya bharikyëtö, keno tukutuna ni-igha momanye amangʼana agha Abhakiristo bhano bhaakwa, okore motakaabhaabhayera kya abhantö abhandë bhano bhataana ubhweseghe ubhwa ukuryoka. ¹⁴Bhëëtö Abhakiristo ntomanyirë igha Yëësu yaakuurë, akamara akaryoka. Ku bhuyö, nkwesegha törë igha, Waryobha narereeta Yëësu hamwë na abhantö bhonswe igho bhano bhaakwa na eno bharamukumya.

¹⁵Mbe, ghano tokobhatëëbhya ngo amëëghyö agha Omonene Yëësu igha, bhëëtö bhano urinyoora tökërëngë abhahöru enkaagha eno arikyora, tetoretangatera bhano bhaakwa hë. ¹⁶Ko bhoora Omonene Yëësu umwene naariika ukurwa mu-ryobha. Nareraghërrya kwa nguru, abhantö mbariighwa engamba iya maraika omonene, na orotera urwa Waryobha ndurihuutwa. Ho abhakumya abha Kiristo bhonswe igho bhano bhaakwa, bhariryökibhwa mbere. ¹⁷Ho na bhëëtö bhano urinyoora tökërëngë abhahöru, ntoresaköribhwa hamwë nabho ukughya ku-risaarö, okore tusikane na Omonene Yëësu ighörö iyö. Mbe, nturiikara hamwë nawe amakora ghonswe igho. ¹⁸Bhoono motoghekanenga ko amangʼana ghayö.

Ukwisëëmya urusikö urwa Omonene Yëësu rotaraahika

¹Abhakumya bharikyëtö, törööshë igha, totakaabhandekera amangʼana agha senkaagha na ribhagha irya ukukyora ukwa Omonene Yëësu. ²Ko bhoora bhëënyu abheene mmomanyirë igha, urusikö urwa ukuusha ukwa Omonene Yëësu, ndorebhasha abhantö kya hano umwibhi yaasha ubhutikö. ³Enkaagha eno abhantö bhakokanya igha, “Omorembe ghooho, na kora amangʼana ghonswe igho m-buuya ghakughya,” hayö ho obhosarya bhukwebhokera. Obhosarya bhuyö mborebhabhasha kya hano ebhesa bhyatakya omokari ono arëngë enda. Ku bhuyö, tebharëtööribhwa kora hake igha hë.

⁴Kasi bhëënyu, abhakumya bharikyëtö, urusikö ruyö terorebhabhasha kya umwibhi hë, ko bhoora bhëënyu ko amangʼana ghayö, tëmörëngë mu-kisuntë hë. ⁵Ko bhoora bhëënyu bhonswe igho, mmoona emerengaari, ghwiki m-baana abha obhorabhu mörë. Bhëëtö, tëtörëngë abhantö abha amangʼana agha ubhutikö handë agha mu-kisuntë hë. ⁶Bhoono totakaaraara sentero kya abhandë, tobhe maiso, na ukwirebherra. ⁷Abhantö bhano bhakoraara sentero, nu-bhutikö bhakoraara. Kora abhanywi abha amarwa, nu-bhutikö bhakoghanywa.

⁸Kasi ko bhoora bhëëtö m-bantö abha mo-bhorabhu törë, twirebherre. Tobhe na umukumo hamwë na righonshe, bhiyö bhebhe kya ingubha iya ökökëngërrya ibhikubha ibhyëtö. Ghwiki tweseghe Waryobha igha natötöörya, hayö ho toraabhe kya bhano tötöörrë sëngöfiira isya ikyoma ko-metwe. ⁹Waryobha tiyaatushaaghööyë, okore atusiki ku ukutushibhya hë. Kasi yaatushaaghööyë, okore töhönibhwi okohetera ko-Monene uwëëtö Yëësu Kiristo. ¹⁰Uyö we yaakuurë okoghera iya bhëëtö, okore twikare hamwë nawe, enkaagha eno tökërëngë abhahöru, kora hano urinyoora tukuurë. ¹¹Ku bhuyö abhakumya bharikyëtö, motoghekane na ökötöörrania bhököngʼu.

Eteemo inshiiya ko abhakumya

¹²Bhoono abhakumya bharikyëtö, torabhasabha igha, mosookenga bhaara bhakobhatöörrya, na eno bharabhatangata na okobhaghambera ku ubhwera ubhwa Omonene Yëësu. ¹³Mobhahanshe na okobhasooka bhököngʼu ko okorengʼaana na emeremo ighyabho. Mokorranenga amangʼana agha omorembe, bhëënyu abheene ko abheene.

¹⁴Abhakumya bharikyëtö, torabhasaasaama igha, mokaaninga abhooro na okotogheka bhano bhaakwa emetwe. Ghwiki motoghekenga bhano bhataana singuru na ököghömërrya abhantö bhonswe igho. ¹⁵Mwangarre, ömöntö wowonswe oora atakaahaka murikyaye obhoghogho ko-ngʼana engogho eno oraanyoore amökörëëyë. Kasi senkaagha syonswe igho, mokorranenga ubhwa heene bhëënyu abheene ko abheene na okokorra igho abhantö bhonswe igho. ¹⁶Mushomerwenga senkaagha syonswe igho, ¹⁷mosaasaamenga ko-senkaagha syonswe igho.¹⁸Mukuminga Waryobha ko amangʼana ghonswe igho. Ko bhoora ni-igho Waryobha akutuna mokorenga kya bhoora Kiristo Yëësu yaatwörökërrëëyi.

¹⁹Motakaarebherra Umwika Ömöhörëëru. ²⁰Motakaasera amangʼana agha öbhörööti, ²¹kasi moghashaashi, moghoote ghano gharëngë bhuuya. ²²Engʼana iyëndë ni-igha, mwibhashe amangʼana amaghogho ghonswe igho. ²³Waryobha ono akotohaana omorembe, abhasaabhuure ko amangʼana ghonswe igho. Abharende senkoro isyënyu na öbhöhöru ubhwënyu na ëmëbhërë ighyënyu, okore motakaatemwanga amasoro, okohekera enkaagha iya ukuusha ukwa Omonene uwëëtö Yëësu Kiristo. ²⁴Waryobha ono akobhabherekera, naraabhakorre ghayö, ko bhoora arëngë uwa heene.

Amangʼana agha okoragha

²⁵Abhakumya bharikyëtö, motosabherenga ku-Waryobha. ²⁶Mokeerani abhakumya bharikyëtö bhonswe igho ku ukwibhaarana ököhörëëru. ²⁷Nkobhatema ndë imuuma ku ubhwera ubhwa Omonene Yëësu igha, ritashandighi reno mosomere abhakumya bharikyëtö bhonswe igho.

²⁸Örööbhö urwa Omonene uwëëtö Yëësu Kiristo, robhe hamwë na bhëënyu bhonswe igho.