1 Peetero

Ritashandighi irya mbere irya

Peetero

Obhotangati

Ritashandighi reno, ni-irya mbere reno ryandëkirwë na Peetero omotomwa uwa Yëësu Kiristo. Peetero yaandëkëëyë abhakumya bhonswe igho bhano bhaanyaraghaini, bhakaghya okomenya ku-bhyaro ibhya abhandë (Maaha 1 Peetero 1:1). Nkobherekera arë abhantö bhano akwandekera igha, m-baghëni, handë igha, m-bahëti. Peetero yaandëkirë ritashandighi reno, ko-nkaagha eno yaarenga Ruumi, ahasë hayö yaahabhërëkëëyë igha, Bhaabhëëri (Maaha 1 Peetero 5:13).

Peetero nkoghamba arë harabhu igho igha, yaandëkirë ritashandighi reno, okore akaani abhakumya na okobhatëëbhya igha, örööbhö urwa Waryobha, ndwo roraabhanaghi ku umukumo ughwabho. Peetero nkokobhakobha arë abhakumya ko amangʼana aghaaye, okore bhabhe na öbhömënyi ubhwa heene ku-Waryobha. Ghwiki nkoraghërrya arë seeka isya Ikikiristo sebhe na ubhwighwerrani, kora sesooke abhatöngi. Engʼana iyëndë eno akobhatëëbhya, ni-iya okobhatërëmya, okore bhatakaakwa emetwe, kasi bhaghömërri ko-nkaagha iya inyanko, ko bhoora umuhiko ughwa ekebhara, haangʼë ghörë. Aramarërrya ko okoraghërrya igha, bhabhe na ubhwighwerrani mo-kanisa.

Amakëërërryö

¹Ritashandighi reno, nö-öni Peetero omotomwa uwa Yëësu Kiristo ndyandëkirë.

M-bëënyu abhaahorwa abha Waryobha nandëkëëyë, bhano mwanyaraghana ukughya okomenya ku-bhyaro ibhya abhandë, mo-mekowa ighya Ponto, Gharatia, Kapadokia, Asia Enke na Bhitinia. ²Taata Waryobha yaabhamanyirë, akabhashaaghora ukurwa kare, ko okoghera iya ësëëmyö iyaaye. Umwika uwaaye Ömöhörëëru, akabhakora mobhe abhahörëëru, okore mwighwere Yëësu Kiristo na okosaabhuurwa ko amaanyinga aghaaye.1:2 Okore mwighwere Yëësu Kiristo na okosaabhuurwa ko amaanyinga aghaaye. Ikiyunaani keraghamba igha, ku ukuminshiribhwa amaanyinga aghaaye. Okorengʼaana na Ukurishoka 24:3-8, Abhaisiraëri mbaaminshiribhwanga amaanyinga agha engʼombe ukwörökya igha mbaraaighwerre imuuma iyaabho. Peetero nkoghamba arë igha, amaanyinga agha Yëësu n-kya omobhaaso ughwa riraghano reehya ghatë iya Waryobha na abhantö abhaaye. Maaha mo-ketabho ikya Abhaëbhuraania 9:18-21.

Waryobha abhëngëri örööbhö na omorembe.

Umukumo ughwëtö

³Tukumi Waryobha, Suwaabho Omonene uwëëtö Yëësu Kiristo. Nkumukumya törë ko okoghera iya ubhwaru ubhwa ikyabhera ikyaye, keno kyaaghërrë akatwebhora bhohya, okohetera ku ukuryökya Yëësu Kiristo ukurwa mo-bhaku. Ku bhuyö, bhoono tunyöörrë ubhweseghe ubhwa öbhöhöru. ⁴Bhoono nkoghanya törë umwandö ghono Waryobha abhëëkirë mu-ryobha iyö, ko okoghera iya abhantö abhaaye. Obhongʼoore bhuyö, tibhukughunda hë, tebhokosareka hë, handë ukwoma. ⁵Bhëënyu Waryobha nkobharenda arë ko obhotoro ubhwaye, okore munyoore öbhöhönia, bhono bhoremaahekana ku-sinsikö isya umuhiko. Keno kekoghera arabharenda, nu-mukumo ughwënyu ghono moonagho ku-Yëësu Kiristo.

⁶Mbe, mushomerwe bhököngʼu ko okoghera iya amangʼana ghayö, nokaanyoora bhoono igho, ni-igha mohetere mo-mashaashyo amaaru, ghano gharaaghere mobhaabhayere ku-ribhagha riike reno. ⁷Amashaasho ghayö, nkokora gharë umukumo ughwënyu ghomaahekane igha, n-gwa heene, kya bhono esahaabhu yonswe ikushaashwa mo-morro. Umukumo ughwënyu ngoona ubhwera obhonene okokera esahaabhu eno ekosareka. Ku bhuyö, Yëësu Kiristo hano ariisha, na ukwiyörökya harabhu igho, narebhakora mukumibhwi, mobhe na ubhuhika, kora mosookwe. ⁸Bhëënyu temwakaamörööshë hë, kasi momohanshirë. Kora nokaanyoora igha temokomomaaha bhoono igho hë, kasi nkumukumya mörë. Ku bhuyö, nkushomerwa mörë bhököngʼu moona ubhuhika bhono bhotakoghambwa, ⁹ko bhono mukunyoora öbhötöörya ubhwënyu. Öbhötöörya bhuyö, mbo ësëëmyö iya umukumo ughwënyu.

¹⁰Abharööti abha kare bhaakörrë omotono ughwa okomanyërrya öbhöhönia bhuyö, bhakaroota amangʼana agha örööbhö urwa Waryobha rono robhahëkërëëyë bhëënyu. ¹¹Mbaarë na Umwika uwa Kiristo, uyö we yaaröötirë igha, Kiristo nakaatëësirwë, na hano inyaanyi iyö erehwa, narinyoora ubhuhika. Abharööti bhayö, bhaatunanga bhököngʼu bhamanye amangʼana ghayö igha, n-dööhë gharebha, na iyakë gharebha. ¹²Waryobha yaahönyörrëëyë abharööti bhayö igha, amangʼana ghano bhaarootanga, te-ghaabho ghaarë hë, kasi na-ghëënyu ghaarë. Ghaara bhaaghambirë, ngo mwaaraarëkëëywë na abhantö bhano bhaabharëëtëëyë Amangʼana Amaiya agha Yëësu Kiristo. Bhonswe mbaabhatëëbhëri Amangʼana Amaiya ghayö, ko obhotoro ubhwa Umwika Ömöhörëëru ono yaatömirwë ukurwa mu-ryobha. Amangʼana ghayö, kora abhamaraika nkutuna bharë bhököngʼu igha bhaghamanye.

Okomenya kinyabhöhörëëru

¹³Ku bhuyö mwisëëmi na mwiraarerre, kora mongʼainihe. Ubhweseghe ubhwënyu bhwonswe igho, bhobhe kö örööbhö rono morehaanwa enkaagha eno Yëësu Kiristo ariisha aiyöröki harabhu igho. ¹⁴Ko bhoora igha, bhoono m-baana abha Waryobha mörë, ni-igha mosooke Waryobha. Motakaikërrya ghwiki okobha na oronamba oroghogho rono mwaarenga naro kare, hano mwaarenga motaraamanya Amangʼana Amaiya agha Yëësu Kiristo. ¹⁵Kasi kya bhono Waryobha ono yaabhabherekera, m-Möhörëëru, mbe, ku bhuyö na bhëënyu bhonswe ni-igha mobhe abhahörëëru ko seteemo isyënyu syonswe igho, ¹⁶ko bhoora Waryobha nkoghamba arë mo-Maandeko Amahörëëru igha, “Mobhe abhahörëëru, ko bhoora öni m-Möhörëëru ndë.”1:16 Maaha mo-ketabho ikya Amangʼana agha Abharaawi 11:44-45, 19:2, 20:7.

¹⁷Waryobha ono mokobherekera igha n-Suwëënyu ko-masaasaamo aghëënyu, momanye igha, taana ekeroterro kö ömöntö wowonswe igho hë. Narebhotorra abhantö bhonswe igho ibhiina, ko okorengʼaana na ghano bhaakora. Ku bhuyö mosooke Waryobha ko-nkaagha eno mökëmënyirë ko-kebhara kono, kya abhaghëni. ¹⁸Bhëënyu mwaakoranga amangʼana ghano ghataana ubhwera. Amangʼana ghano mwaakoranga, n-gaara abhakörö abhëënyu bhaaghambirë. Bhoono momanye igha, Waryobha tiyaabhatungurya ukurwa ko-teemo iyö okohetera ko ëbhëntö bheno bhekosareka, kya seehera na esahaabhu. ¹⁹Kasi yaabhatungurya okohetera ko amaanyinga ghano ghaana ubhwera obhonene. Amaanyinga ghayö, na-agha Yëësu Kiristo, uyö we yaarë kya ekemaanwa ikya ringʼöndi1:19 Ekemaanwa ikya ringʼöndi. Maaha mo-faharaasa engʼana, Omoona Ringʼöndi. keno ketaana ekebheera handë risoro. ²⁰Waryobha yaamwahööyë ukurwa kare kora ekebhara ketaraabhombwa, ko okoghera iya ësëëmyö iyaaye. Kasi akaghanya okohekera ko-nkaagha iya umuhiko eno, akamoreeta, akamotoora harabhu igho ko-bhantö bhonswe igho abha ko-kebhara kono. Yaakörrë ghayö ghonswe igho, ko okoghera iya bhëënyu. ²¹Bhëënyu nkukumya mörë Waryobha, okohetera ku-Yëësu Kiristo. Waryobha, we yaamuryökëri ukurwa mo-bhaku, akamohaana ubhuhika. Kiyö nkyo kekoghera morakumya Waryobha na ukumwesegha.

²²Öbhömënyi ubhwënyu, nkorengʼaana bhörë na amëëghyö agha heene agha amangʼana agha Yëësu Kiristo. Ku bhuyö senkoro isyënyu syasaabhuurwa, na bhoono nkotora mörë okohansha abhakumya bharikyënyu këmwëkëmwë. Mbe, mohanshane bhököngʼu, ²³ko bhono mwibhööywë bhohya. Ukwebhorwa bhohya kuyö, te-koora ukwa abhaibhöri abhëënyu hë, abhaibhöri abhëënyu bhayö nkukwa bharë, kasi mwebhorwa bhohya okohetera ko Engʼana iya Waryobha ëhöru, engʼana iyö, neraaghëndërri okobha-ho amakora ghonswe igho. ²⁴Amaandeko Amahörëëru ghandëkirwë igha,

“Abhantö bhonswe igho n-kya amatö,

na ubhwikööni ubhwabho n-kya ëbhëmörë.

Amatö, nkooma gharë, na ëbhëmörë nkosangoka bhërë,

²⁵kasi engʼana iya Omonene, neraaghëndërri okobha-ho amakora ghonswe igho.”1:24-25 Maaha mo-ketabho ikya Isaaya 40:6-8.

Engʼana iyö, yo Amangʼana Amaiya ghano mwaaraarekerwa.

¹Mbe, mutighe obhoghogho bhonswe igho, seteemo syonswe igho isya okongʼaina abhantö, ubhwiköri, na rikenge, kora motakaaghambanga bhoghogho abhantö. ^2-3Bhoono momarrë okomanya igha Omonene Yëësu Kiristo, n-wa heene.2:2-3 Maaha mo-ketabho ikya Zabhuri 34:8. Mbe, mwighombenga amabheere amaiya agha öbhöhörëëru, kya bhono ebhengʼerre bhikutuna amabheere agha bhanyakuwaabho, na bhëënyu bhonswe ighoigho, okore mobhe na singuru, monaghe kora mohone.

Abhaahorwa abha Waryobha

⁴Yëësu we reghena rihöru irya okohaghaashera. Reghena riyö, ndyo abhantö bhaangirë, kasi Waryobha akarishaaghora, kora ndeena ubhwera obhonene ku-Waryobha. Mbe, musuntarre Yëësu. ⁵Momanye igha, bhëënyu bhonswe n-kya amaghena amahöru mörë, mwahaghaashwa mobhe inyumba ëhörëëru. Ghwiki nkobhakora arë mobhe abhasëngëri bhano bhaahööywë okokora ibhimwenso ëbhëhörëëru, bheno bhikushomera Waryobha okohetera ku-Yëësu Kiristo.⁶Ko bhoora Amaandeko Amahörëëru gharaghamba igha,

“Motamaaha umughi ughwa Sayuuni,2:6a Sayuuni. Ni-riina iryëndë irya umughi ughwa Yërusarëëmu, umughi ghono risengerro irya Waryobha ryaahaghaashirwë-mo. ndatoora-mo reghena irya mo-koona iya umusingi,

ghwiki ndyo reghena irya ubhwera obhonene reno naashaaghora.

Na ömöntö wowonswe ono araakumi uyö igha we reghena riyö,

tarësökërribhwa hë!”2:6b Maaha mo-ketabho ikya Isaaya 28:16.

⁷Yëësu Kiristo naana ubhwera obhonene kö-bhëënyu bhano mukumukumya. Kasi, ko bhano bhatakumukumya, Amaandeko Amahörëëru gharaghamba igha,

“Reghena reno abhahaghaashi bhaangirë,

ndyo rebhaayë reghena rinene irya ko-koona iya umusingi ughwa inyumba.”2:7 Maaha mo-ketabho ikya Zabhuri 118:22.

⁸Ghwiki, nkoghamba gharë igha,

“Reghena riyö, ndyo irya ukwituuratuura-ko,

ni-ritare irya ukughwësya abhantö.”2:8 Maaha mo-ketabho ikya Isaaya 8:14.

Abhantö bharaituuratuura-ko, ko bhoora bhatakukumya engʼana iya Waryobha. Kiyö nkyo bhaasëëmëribhwa ukurwa kare.

⁹Kasi bhëënyu no-roghanda urwahorwa mörë, abhasëngëri abha Obhokama, rikomo irya abhahörëëru, abhantö abha Waryobha umwene, okore moraarekenga amangʼana amarito agha Waryobha. We yaabhabhërëkëëyë murwe mu-kisuntë, mosohe mo-bhorabhu ubhwaye obhonene bhono bhököröghöörya.2:9 Maaha mo-ketabho ikya Ukurishoka 19:6; Isaaya 43:20-21.¹⁰Kare hayö, te-bhantö abha Waryobha mwaarë hë, kasi bhoono, m-bantö abhaaye mörë. Kora temwabherwanga na Waryobha hë, kasi bhoono, abhabhëëyë.2:10 Maaha mo-ketabho ikya Hosea 2:23.

Eteemo iya abhantö abha Waryobha

¹¹Abhaghonshe abhaane, bhëënyu m-baghëni bhahëti mörë ko-kebhara kono. Ku bhuyö, ndabhasaasaama igha, motakaikërrya okobhaahwa na oronamba oroghogho urwa ëmëbhërë ighyënyu. Oronamba oroghogho ruyö, nkurutana rörë na bhëënyu, okore robhabhaahe. ¹²Mobhe na eteemo inshiiya mo-bhantö bhano bhatamanyirë Waryobha, okore hano bhareghambanga igha m-baghogho mörë, bhamaahe amangʼana aghëënyu amaiya ghano mokokora. Bhoono hayö, ho bharëtöönia Waryobha ko okoghera iya bhëënyu, urusikö rono ariisha.

¹³Mosookenga abhatöngi, ko okoghera iya okosooka Omonene. Mosooke omokama uwa ikyaro ikyënyu, ko bhoora uyö we omotangati omonene. ¹⁴Ghwiki ni-igha mosooke abhatangati abha mekowa, ko bhoora omotangati omonene uyö, we yaabhashaaghora. Yaabhashaaghora, okore bhashibhinga abhantö bhano bhakokora amangʼana amaghogho, na ukukumya bhano bhakokora amangʼana amaiya. ¹⁵Keno Waryobha akutuna ni-igha, mokore amangʼana amaiya, okore murimi amangʼana agha obhokangi ghano abhantö bhakoghamba.

¹⁶Momenye këtöönööni, kasi öbhötöönööni bhuyö, bhotakaaghera mokore amangʼana amaghogho. Momenye öbhömënyi bhono bhukwörökya abhantö igha, m-baköri abha emeremo abha Waryobha mörë. ¹⁷Mosooke abhantö bhonswe igho, na mohanshe abhakumya bharikyënyu. Mwighwere Waryobha, na mosooke omokama uwëënyu.

Amaraghërryö ko-bhaghorwa

¹⁸Bhëënyu abhaghorwa, mosookenga bhököngʼu abhanene abhëënyu, motakaasooka abhahaabhu na abha heene abheene igho hë, kasi mosookenga kora na abhanene bhëënyu abharörö bhonswe. ¹⁹Möghömërri inyaanyi eno mukunyoora bhosa igho motasarri engʼana. Ghayö nkobhanyoora gharë, ko okoghera iya okosooka Waryobha. Hano moraakore igho, Waryobha naraabhangʼoore. ²⁰Hano moraaghömërri inyaanyi eno mwingʼarëëyi, ko okoghera iya okokora amangʼana amaghogho, hayö tëmötëghëri Waryobha hë. Kasi hano moraaghömërri inyaanyi ko okoghera iya okokora amangʼana amaiya, hayö ho moraatëghëri Waryobha.

²¹Ni-igha möghömërri, ko bhoora Yëësu Kiristo umwene yaatësëkirë ko okoghera iya bhëënyu. Ko okokora ghayö, akabhateghera ëkërëngyö, okore mweghenga okokora kya igho. ²²Tiyaakörrë ëkëbhë kyokyonswe igho, handë okoghamba obhorongo bhwobhwonswe bhoora hë.2:22 Maaha mo-ketabho ikya Isaaya 53:9.²³Hano yaatökirwë, tiyaatökirë hë. Hano yaatëësirwë, tiyöbhöhërrëëyi hë. Kasi ghonswe igho, akateghera Waryobha abhotore ikiina bhwaheene. ²⁴Yëësu yaaghëghirë ëbhëbhë ibhyëtö kö-möbhërë ughwaye, kora akahanekwa ko-mosarabha. Yaakörrë igho, okore ëbhëbhë bhetakaatobhaaha ghwiki, okore tobhe na öbhömënyi bhono bhökötëghërya Waryobha. Bhëëtö twaahona ko okohetera okotemwa ukwaye. ²⁵Mwaarenga kya amangʼöndi ghano ghasirrë, kasi bhoono, mwakyörrë ko-mokaraabhërri uwëënyu na we omonaghya uwëënyu.

Amaraghërryö ko abhakari na abhashaasha

^1-2Na bhëënyu abhakari bhonswe, ni-igha mwighwere bhashaasha abhëënyu, okore nyoore bhaaho abhashaasha bhano bhatakosoorana amëëghyö agha Waryobha, bharutwe na eteemo iyëënyu inshiiya. Ku bhuyö bharatora ukukumya Waryobha bhatatëëbhiibhwi engʼana. ³Motakaabha abhantö abha ubhwikööni bhono bhokomaahwa ubhwene igho, kya ubhwa ukusuka situukya, okotoora ëbhëntö ibhya esahaabhu, handë singibho isya öbhöghöri obhonene. ⁴Kasi ubhwikööni ubhwënyu, bhusimiri mo-senkoro isyënyu. Ubhwikööni bhono bhotakosareka, handë okoghota. Ubhwikööni bhuyö, no-kobha na enkoro inshiiya na obhohaabhu, bhuyö mbo ubhwikööni bhono bhoona ubhwera obhonene ku-Waryobha. ⁵Ni-igho bhaaikoonanga kare, abhakari bhano bhaaitengʼeranga Waryobha na ukwighwera bhashaasha abhaabho. ⁶Saara mokaa Ibhurahimu,3:6 Ibhurahimu. Maaha mo-faharaasa. we ëkërëngyö. Yaaighweranga mushaasha uwaaye, kora yaamobherekeranga igha, “Omonene uwaane.” Kora bhëënyu bhonswe, hano moraakorenga amangʼana amaiya motakoobhoha kyokyonswe igho, hayö noraanyoore mobhaayë urwebhoro urwa Saara.

⁷Na bhëënyu abhashaasha, ni-igha mwikarane na abhakari abhëënyu kwa bhongʼaini, momanye igha, tebhaana singuru kya seno monasyo. Mwikare na bhakëënyu kwa okosookana, ko bhoora bhonswe mbarerya umwandö ughwa örööbhö urwa öbhöhöru. Ku bhuyö abhashaasha mokore igho, okore amasabhi aghëënyu, ghatakaarebherrwa.

Mokore omotono ughwa okokora amangʼana amaiya

⁸Ko okomarërrya, nkobhatëëbhya ndë bhonswe igho igha, mobhe kiina këmwë, motakaabha na amaitegherro abhërë. Mohanshane kya abhantö abha enda ëmwë, mwabheranenga kora mwihootenga. ⁹Motakaahakanga ikisiiyomba ko abhantö, handë okotoka ömöntö ono akötökirë, kasi engʼana inshiiya ko-bhantö kya bhayö, no-kobhakorra ubhwa heene. Ghayö ngo mwaabherekerrwa igha mokore, okore mongʼoorwe. ¹⁰N-kya bhono Amaandeko Amahörëëru ghakoghamba igha,

“Hano ömöntö araatune igha amenye bhuuya na ashomerwe,

atakaangʼaina abhantö na okobhaghamba bhoghogho.

¹¹Ghwiki ni-igha atakaakora amangʼana amaghogho, akore amangʼana amaiya.

Akore omotono ughwa ukwikarana bhuuya na bharikyaye ko omorembe,

¹²ko bhoora Omonene Waryobha nkomaaha arë abhantö bhano bhakokora bhwaheene,

kora nkwighwa arë amasabhi aghaabho.

Kasi bhano bhakokora amangʼana amaghogho, bhayö nkobhahërrya arë enkoonwe.”3:10-12 Maaha mo-ketabho ikya Zabhuri 34:12-16.

¹³Hano moraakore omotono ughwa okokora amangʼana amaiya, nawë araabhanyanki? ¹⁴Kasi hano moraanyankibhwi ko okoghera iya okokora amangʼana agha heene, Waryobha naraabhangʼoore. Ku bhuyö, motakaabha na entarëki handë okoobhoha bhano bhakobhanyankya. Mötööninga Yëësu Kiristo, uyö we Omonene uwa öbhöhöru ubhwënyu. ¹⁵Mwisëëmi nkaagha syonswe igho okohonshora ömöntö wowonswe ono araabhabhööri keno mukwesegha. Mokorenga igho kwa obhohaabhu na esooko, ¹⁶kora mobhenga na amaitegherro amaiya, okore hano bharaabhahange engʼana ko amangʼana ghayö mokokora ko okoghera iya Kiristo, bhasooke abheene. ¹⁷Nyakara ömöntö unyankibhwi ko okoghera iya okokora amangʼana amaiya, hano oraanyoore Waryobha ni-igho akutuna, kasi otakaanyankibhwa ko okoghera iya okokora amangʼana amaghogho.

¹⁸Yëësu Kiristo wonswe n-kamwë igho yaakuurë ko okoghera iya ëbhëbhë ibhyëtö, okore atwighwerrani na Waryobha, kasi tiyaarë na ëbhëbhë bhyobhyonswe igho hë. M-möntö uwa heene yaarë. Yaaitirwë kinyamöbhërë, kasi ko obhotoro ubhwa Umwika Ömöhörëëru, akanyoora ghwiki öbhöhöru. ¹⁹Na ko obhotoro ubhwa Umwika Ömöhörëëru, akaghya okoraarekera senkoro seno syaarë mo-kebhohe, isya abhantö bhano bhaakwa. ²⁰Senkoro siyö ni-isya abhantö bhano bhataighwërëëyë Waryobha, enkaagha eno Nuhu yaahaghaashanga esafina. Waryobha yaaghömërrëëyi obhoghogho ubhwabho okohekera hano esafina yaahaghaashirwë, kasi bhano bhahönirë ku-muhiko ughwa ëhöörö iyö, m-bake igho bhaarë, abhantö monaane abheene igho. ²¹Amanshë agha ëhöörö iyö në-kërëngyö ikya obhobhatiisyo bhono bhokobhatöörya bhëënyu reero eno, ti-igha nu-kuruusya ubhunyanku kö-möbhërë hë, kasi no-kobha na enkoro inshiiya ku-Waryobha. Amangʼana ghayö, nkobha gharë okohetera ukuryoka ukwa Yëësu Kiristo. ²²Yëësu Kiristo yaaghëëyë mu-ryobha, na bhoono igho, naikaayë okobhoko ukwa bhoryo ubhwa Waryobha, ahasë hano hakosookwa bhököngʼu. Nkotonga arë abhamaraika, ëbhëntö ëbhëtöngi bhyonswe igho, na bheno bheena obhotoro.

Öbhömënyi bhono bhukushomera Waryobha

¹Mbe, ko bhoora Yëësu Kiristo yaatëësirwë kö-möbhërë ughwaye, bhëënyu bhonswe mwisëëmi okoteeseka kya we. Nkoghamba ndë igho, ko bhoora igha, ömöntö ono amarrë koteeseka kö-möbhërë ughwaye, uyö takobhaahwa na ëbhëbhë hë. ²Ku bhuyö ömöntö kya uyö, öbhömënyi ubhwa öbhöhöru ubhwaye bhonswe igho bhono akeenabho ko-kebhara kono, naraakorenga amangʼana ghano Waryobha akutuna, taabhe na oronamba oroghogho hë. ³Kare hayö, mwaarenga na oronamba oroghogho, obhosooraare, na ubhunywi ubhwa amarwa. Mwaahanshirë sinyangi isya okorya, ubhunywi ubhwa okoheterania, na okosengerra ëbhëtöndö, engʼana iyö m-mughiro ku-Waryobha. Amangʼana ghayö mwaaghakörrë ibhagha itambë bhököngʼu. Bhoono motakaaghëndërrya ghwiki okokora igho. ⁴Bhoono abhantö bhano bhatamanyirë Waryobha, nkoroghoora bharë, hano bhamaaha igha, temokosanga nabho ghwiki okokora amangʼana amaghogho ghaara, ku bhuyö, nkobhatoka bharë. ⁵Kasi ni-igha, abhantö bhayö na-bheene bharikoorerra ku-Waryobha. Waryobha amarrë ukwisëëmya igha, abhotorre ibhiina abhantö bhonswe igho, abhahöru na bhano bhaakwa. ⁶Kiyö nkyo ikibhuno keno kyaaghërrë abhantö bhano bhaakuurë, bhakaraarekerwa Amangʼana Amaiya. Mbaaraarëkëëywë, okore nokaanyoora igha bhaabhotorrwa ibhiina kö-bhömënyi ubhwabho kya abhandë, kasi ko obhotoro ubhwa Umwika Ömöhörëëru, bhabhe abhahöru kya bhono Waryobha arëngë möhöru.

⁷Umuhiko ughwa amangʼana ghonswe igho, ghwaahikirë haangʼë. Ku bhuyö, mongʼainihe na ukwiyangarra ko-mangʼana ghonswe igho, okore mosaasaamenga. ⁸Engʼana enene okokera ghonswe igho, ni-igha mohanshane bhököngʼu, hano moraahanshane, moraabherane bhököngʼu obhosarya ubhwënyu bhono mokokorrana.4:8 Maaha mo-ketabho ikya Sengero 10:12.⁹Mösërëëninga bharikyënyu motakwibhëmbëërya.

¹⁰Kera ömöntö naana ituho iyaaye eno yaahaanwa na Waryobha. Bhoono ni-igha aghekorre emeremo bhuuya ko ökötöörrya bharikyaye. Akorenga igho kya umwimërërri umuuya uwa örööbhö urwa Waryobha urwa seteemo nsharu. ¹¹Hano ömöntö aana amangʼana agha okoghamba, aghambe ko obhotoro bhono bhuruurë ku-Waryobha. Na hano araakorre bharikyaye emeremo, abhakorre ko obhotoro bhono bhukurwa ku-Waryobha. Hano moraakore igho, Waryobha naraakumibhwi ko amangʼana ghonswe igho, ko okoghera iya Yëësu Kiristo, uyö we aana ubhuhika na öbhötöngi ko makora na amakora. Amina.

Ukunyankera Yëësu

¹²Abhaghonshe abhaane, motakaaroghoora ko okoghera iya inyaanyi indito eno mukunyoora, iyö nu-mukumo ughwënyu ikushaashya. Motakaakanya igha engʼana iyö ekobhanyoora ne-ehya. ¹³Kasi bhoono bhëënyu mushomerwe igha, nkunyoora mörë inyaanyi, kya bhoora Kiristo yaanyöörrë. Bhoono ni-igha, mushomerwenga, okore muushe kushomerwa bhököngʼu, hano ariisha na ubhuhika ubhwaye bhötöörwë harabhu igho. ¹⁴Hano moraatokwe ko okoghera iya iriina irya Yëësu Kiristo, momanye igha mmoraangʼoorwe. Engʼana iyö nköbhöörökya ërë igha, Umwika uwa Waryobha uwa ubhuhika, hamwë arë na bhëënyu. ¹⁵Mbe, ömöntö atakaanyoora inyaanyi ko okoghera iya ubhwiti ubhwa abhantö, ubhwibhi, okokora amangʼana amaghogho handë okosarekania abhantö. ¹⁶Ömöntö wowonswe ono araanyoore inyaanyi ko bhoora igha m-mosoorani uwa Yëësu Kiristo, atakaasooka. Kasi atööni Waryobha igha, ni-riina riyö akobherekerrwa. ¹⁷Momanye igha, enkaagha iya okobhotora ibhiina ihikirë, na Waryobha naraasimi okobhotorra ibhiina abhantö abhaaye. Mbe, hano okobhotora ibhiina koraasimiri kö-bhëëtö abhantö abhaaye, bhoono iyakë erebha ko bhano bhakwanga Amangʼana Amaiya agha Waryobha? ¹⁸Amaandeko Amahörëëru gharaghamba igha,

“Hano oraanyoore igha n-këköngʼu ko abhantö abha heene ökötööribhwa,

bhoono iyakë erebha ko-bhantö abha ëbhëbhë bhano bhatakwighwera Waryobha?”4:18 Maaha mo-ketabho ikya Sengero 11:31.

¹⁹Ku bhuyö, bhano bhakunyoora inyaanyi ko okokora ghano Waryobha akutuna, bhamanye igha, Waryobha m-Möbhömbi uwa heene. Ku bhuyö, bho bhaitoore mo-mabhoko aghaaye, bhaghëndërri okokora amangʼana amaiya.

Okonaghya abhantö abha Waryobha

¹Bhoono nkushumaasha ndë na bhëënyu abhaghaaka abha ekanisa. Öni m-moghaaka murikyënyu ndë, ono naamaaha na amaiso aghaane bhono Kiristo yaatëësirwë. Ghwiki öni m-mosangi murikyënyu ndë, uwa ubhuhika bhono bhoraamaahekane bhöngö hano. Ku bhuyö nkobhasaasaama ndë igha, ²mobhe abhakaraabhërri abha heene abha ekanisa eno mwaahaanwa na Waryobha. Ghwiki ni-igha, monaghi ekanisa kwa enkoro inshiiya kya bhono Waryobha akutuna, kasi te-kwa ukusingʼirribhwa hë. Motakaakora emeremo ighyënyu kwa oronamba oroghogho urwa ukunyoora seehera, kasi mobhe na omotono. ³Motakaabha abhakaraabhërri abharörö ko bhano mokotangata, kasi öbhömënyi ubhwënyu, bhobhe ëkërëngyö ikiiya ko-bhantö. ⁴Hano Yëësu Kiristo Omokaraabhërri Omonene uwa ekanisa aremaahekana harabhu igho, murituhwa ituho iya ubhuhika. Ituho eno etakughunda.

⁵Ghwiki na bhëënyu abhamura, ni-igha mosooke abhaghaaka abha ekanisa. Bhëënyu bhonswe igho abhaghaaka na abhamura, ighoigho. Mobhe abhantö abhahaabhu, mutighinkaneranenga. Mokore igho, ko bhoora Amaandeko Amahörëëru gharaghamba igha,

“Waryobha nkwanga arë abhantö bhano hakwiheema,

kasi örööbhö urwaye na-bhahaabhu akohaana.”5:5 Maaha mo-ketabho ikya Sengero 3:34.

⁶Mbe, mwisuuhi mobhe hansë iya obhotoro ubhwa Waryobha, narebhariinia hano enkaagha iyaaye irihika. ⁷Moteghere Waryobha inyanko iyëënyu yonswe igho, ko bhoora nkobhaighwera arë öbhörrö bhököngʼu.

Kumya Waryobha wange Oghosambwa

⁸Mwiraarerre, mobhe maiso nkaagha syonswe igho, ko bhoora umubhisa uwëënyu, Oghosambwa,5:8 Oghosambwa. Maaha mo-faharaasa. nkwinaaranaara ghörë kya ëndwë eno ikuruma, eratuna ömöntö yaakere.⁹Mbe, mwange amangʼana agha Oghosambwa. Morebherre Oghosambwa ko okonaghya umukumo ughwënyu ku-Waryobha. Momanye igha, abhakumya bharikyënyu ahasë honswe igho ko-kebhara kono, nkunyankibhwa bharë kya bhëënyu.

¹⁰Waryobha uwa örööbhö rwonswe igho, yaabhabherekera, okore moghootane nawe ku-bhuhika ubhwaye ubhwa amakora ghonswe igho, ko bhoora ntoona öbhömwë na Yëësu Kiristo. Moraanyanke akabhagha akake igho, kasi we narebhatogheka, abhahaane singuru, na okobhaimererra. ¹¹Waryobha we aana obhotoro amakora ghonswe igho! Amina.

Amakëërërryö

¹²Siriwano5:12 Siriwano. Ghwiki nkobherekerwa arë igha, Sira. umukumya murikyëtö ono öni manyirë bhuuya igha, m-möntö uwa heene, we antöörëëyi okobhandekera ritashandighi iryëngʼë reno. Nkutuna ndë mbatërëmi ko okobhatëëbhya obhoheene igha, amangʼana ghano, obhoheene nö-rööbhö urwa Waryobha. Ku bhuyö ni-igha monaghe ko okohetera örööbhö ruyö! ¹³Abhakumya bharikyënyu abha ekanisa eno ërëngë Bhaabhëëri,5:13 Bhaabhëëri ni-riina reno abhantö abhandë bhaareghambanga bhatigha okotobhora igha nu-mughi ughwa Ruumi. Maaha mo-faharaasa. abhaahorwa bharikyënyu, bharabhakëërya. Omoona uwaane uwa ku-mukumo ono akobherekerwa igha Maariko, wonswe nkobhakëërya arë. ¹⁴Mokeerani ku righonshe irya heene.5:14 Mokeerani ku righonshe irya heene. Ikiyunaani keraghamba igha, Mokeerani ku ukumumuntana ku righonshe. Ukumumuntana ku righonshe, ne-teemo iya amakëërërryö agha Ikiyahudi.

Abhakumya abha Kiristo, omorembe ghobhe kö-bhëënyu bhonswe igho.