1 Yohana

Ritashandighi irya mbere irya

Yohana

Obhotangati

Amatashandighi agha Yohana ghonswe igho atatö, teghakotobhora umwandëki uwa amatashandighi ghayö hë. Kasi nkomaahekana ërë igha, umwandëki uwa amatashandighi ghayö ghonswe igho, no-oora yaandëkirë eketabho ikya Yohana, na eketabho ikya Okohonyora. Yohana uyö, yaandëkirë amatashandighi ghayö, enkaagha eno yaarenga mu-mughi ghono ghwaabherekerwanga igha Ëfësö. Umughi ghuyö, mo-mokowa ughwa Asia Enke ghwaarë. Reero eno ahasë hayö nkobherekerwa harë igha, Bhuturuki. Hano umwandëki uyö yaghamba mo-matashandighi ghayö igha, “Bhëëtö,” hayö nkunyoora örë araishumaashera umwene na abhatomwa bharikyaye.

Hano Yohana yaandëkirë amatashandighi ghano, waanyöörrë yaghota. Taaho ömöntö ono amanyërrëëyi bhuuya, enkaagha eno amatashandighi ghayö ghaandëkirwë.

Mo-matashandighi atatö ghano, na-Bhakiristo bhano bhaasikananga mo-makanisa hagharë hagharë ghano ghaarë mo-mokowa ughwa Asia Enke haara, mbo yaandëkëëyë. Yohana yaabhahanshirë bhököngʼu, kora mo-matashandighi aghaaye mono, nkobhabherekera arë igha, “Abhaana abhaane abhaghonshe” (Maaha 1 Yohana 2:1).

Mu-ritashandighi irya mbere, Yohana yaandëkëëyë Abhakiristo bhayö, okore abhatongere, bhamanye ubhukiristo kya igho bhörë. Ikyëndë ni-igha, nkobhakaania arë bhaiyangarre ko amangʼana agha amëëghyö agha obhorongo. Bhaare-ho abhëëghya nyabhorebhe, bhano waanyöörrë bhahaaterana na amakanisa, bhakabha bhoono bharainaaranaara ahasë hayö na eno bharëëghya amëëghyö agha obhorongo. Engʼana iyëndë ni-igha, Yohana nkokangʼasërrya arë obhoheene ubhwa okobha na umukumo ku-Yëësu, okore abhatogheke kora abhatërëmi mo-senkoro isyabho ko amangʼana agha umukumo. Yohana nkushumaashera arë righonshe, ukwabherana, okotoorrania, ukutigha ëbhëbhë, na okomenya öbhömënyi ubhwa ökötëghërya Waryobha. Engʼana iyëndë eno Yohana ataatighirë okoghamba handë ukwëghya, nö-bhöhöru ubhwa amakora ghonswe igho.

Yëësu we engʼana iya öbhöhöru

¹Nkobharaarekera törë amangʼana agha ono akobherekerwa igha, Engʼana iya öbhöhöru, ono yaarenga-ho ukurwa okosemoka.1:1 Maaha mo-ketabho ikya Okosemoka 1:1; Yohana 1:1-3. Bhëëtö ntwaamwighuurë, kora tokamomaaha na amaiso aghëëtö abheene. Tokamwitaaha, kora tokamoghootaghoota na amabhoko aghëëtö. ²Engʼana iya öbhöhöru uyö, we Waryobha yaahönyööyë ko-bhantö, kora bhëëtö bhonswe ntwaamörööshë. Ku bhuyö ghano tokobhatëëbhya, no-bhoheene ubhwa amangʼana aghaaye. Torabhatëëbhya igha, ömöntö uyö akohaana abhantö öbhöhöru, ho arë amakora ghonswe igho. Ömöntö uyö, yaarenga hamwë na Taata Waryobha, kasi bhoono Waryobha yamohonyora kö-bhëëtö.1:2 Maaha mo-ketabho ikya Yohana 1:14.³Uyö twaamaaha na ukumwighwa, we tokobharaarekera amangʼana aghaaye. Torabharaarekera, okore mobhe na öbhömwë na bhëëtö ubhwa ukumukumya. Bhëëtö ntoona öbhömwë na Taata Waryobha, bhaana Omoona uwaaye Yëësu Kiristo.1:3 Omoona uwaaye Yëësu Kiristo. Maaha mo-faharaasa, Omoona uwa Waryobha.⁴Nkobhandekera törë ghano, okore bhëëtö bhonswe igho tushomerwe bhököngʼu.

Okomenya mo-bhorabhu

⁵Mbe, engʼana eno Yëësu Kiristo yaatötëëbhya, yo tokobharaarekera igha, Waryobha we obhorabhu, ikisuntë tëkërëngë mu-Waryobha hë. ⁶Ku bhuyö hano toraaghambe igha ntoona öbhömwë na Waryobha, eno toraghëndërrya okomenya mu-kisuntë ikya obhoghogho, hayö nkorongoha törë. Ghwiki hayö noraanyoore tutighirë okokora amangʼana agha obhoheene. ⁷Kasi hano oraanyoore mo-bhorabhu tömënyirë, kya bhono Waryobha amënyirë-mo, hayö ntoraabhe na öbhömwë bhëëtö abheene ko bheene. Kora hayö ho ukunyoora amaanyinga agha Omoona uwaaye Yëësu Kiristo gharatosaabhuura ëbhëbhë ibhyëtö bhyonswe igho.

⁸Hano toraaghambe igha tetoona ëbhëbhë bhyobhyonswe igho hë, hayö noraanyoore toraingʼaina bhëëtö abheene, kora tetomanyirë obhoheene hë. ⁹Kasi hano toraatëëbhi Waryobha igha twaakora ëbhëbhë, Waryobha naraatwabhere ëbhëbhë ibhyëtö. Naraatosaabhuure obhoghogho ubhwëtö bhwonswe igho, ko bhoora we n-wa heene, kora nkokora arë ubhwa heene. ¹⁰Hano toraaghambe igha tetwakakörrë ëbhëbhë, hayö n-kya hano toraaghambe igha, Waryobha m-morongo. Kora noraanyoore twikaanirë engʼana iyaaye.

Yëësu Kiristo we akotosabhera

¹Bhëënyu abhaana abhaane abhaghonshe, nkobhandekera ndë amangʼana ghano, okore motakaakora ëbhëbhë. Kasi ömöntö wowonswe igho hano araakore ëbhëbhë, amanye igha ntoona ono akotosabhera ko-Taata Waryobha. Uyö we Yëësu Kiristo, ömöntö uwa heene. ²Uyö we ikimwenso ikya ukutwighwerrania na Waryobha ku ukuruusya-ho ëbhëbhë ibhyëtö. Ghwiki të-bhëbhë ibhyëtö ibhyene igho hë, kasi kora na ëbhëbhë ibhya abhantö bhonswe igho abha ko-kebhara kono.

³Mbe, kasi engʼana eno ikwörökya igha ntomanyirë Waryobha, no-kosooka imighiro ighyaye. ⁴Ömöntö wowonswe igho ono akoghamba igha namanyirë Waryobha, kasi takoghoota imighiro ighya Waryobha hë, m-morongo, tamanyirë obhoheene hë. ⁵Kasi ömöntö ono akosooka engʼana iya Waryobha, uyö we aishööyë righonshe irya Waryobha. Ni-igho tokomanya igha ntoona öbhömwë na Waryobha. ⁶Hano ömöntö yaghamba igha aana öbhömwë na Waryobha, ni-igha abhe kya bhono Yëësu yaarë.

Umughiro ughwa okohanshana

⁷Abhaghonshe abhaane, umughiro ghono nkobhandekera te-mohya hë, kasi nu-ghwa kare ghooraghoora, ghono mwaarenga momanyirë ukurwa hano mwaasimiri ukukumya Yëësu Kiristo.2:7 Maaha mo-ketabho ikya Yohana 13:34. Umughiro ughwa kare ghuyö, ngo engʼana iya okohanshana eno mwaighwa. ⁸Nokaanyoora ngambirë igha, umughiro ghuyö nkobhandekera n-gwa kare, kasi ghwiki m-mohya. Obhoheene ubhwa obhohya ubhwa umughiro ghuyö, bhwaamaahekana kö-bhömënyi ubhwa Yëësu Kiristo. Öbhömënyi bhono bhëënyu moonabho, bhonswe nkwörökya bhörë igha, m-maheene umughiro ghuyö m-mohya. Ngambirë igho, ko bhoora igha, ikisuntë ikya obhoghogho na ukwanga okomanya, nkwihëënia bhërë, na obhorabhu ubhwa heene bhomarrë okorabherra.

⁹Ömöntö wowonswe igho ono akoghamba igha mo-bhorabhu arë, na eno arëghirë umukumya murikyaye, uyö mu-kisuntë akërë. ¹⁰Ömöntö wowonswe igho, ono ahanshirë umukumya murikyaye, uyö mo-bhorabhu arë. Taana engʼana mo-nkoro iyaaye, eno eraamutimbe akore ëbhëbhë. ¹¹Kasi ono arëghirë umukumya murikyaye, mu-kisuntë akërë. Kora mu-kisuntë akoghenda. Tamanyirë hasë akughya hë, ko bhoora ikisuntë kyaamukundikirya amaiso.

¹²Bhëënyu abhaana abhaane abhaghonshe, nkobhandekera ndë,

ko bhoora mwaabherwa ëbhëbhë ibhyënyu ko okohetera ku-Yëësu Kiristo.

¹³Bhëënyu bhaataata, nkobhandekera ndë

ko bhoora momanyirë Yëësu Kiristo,

ono yaarenga-ho ukurwa okosemoka.

Nkobhandekera ndë bhëënyu abhamura,

ko bhoora mwabhaaha Oghosambwa.2:13 Oghosambwa. Maaha mo-faharaasa.

Nkobhaadekera ndë bhare abhaana,

ko bhoora mmomanyirë Taata Waryobha.

¹⁴Nkobhandekera ndë bhëënyu bhaataata,

ko bhoora mmomanyirë Yëësu Kiristo,

ono yaarenga-ho ukurwa okosemoka.

Nkobhandekera ndë bhëënyu abhamura,

ko bhoora moona singuru,

kora nköghëndërrya mörë okoghoota engʼana iya Waryobha,

mwabhaaha na Oghosambwa.

¹⁵Motakaahansha okokora amangʼana amaghogho kya abhantö bhano bhatakwighwera Waryobha. Ndakyorra okobhatëëbhya igha, motakaahansha obhoghogho bhwobhwonswe bhoora ubhwa ko-kebhara kono.2:15 Motakaahansha okokora amangʼana amaghogho kya abhantö bhano bhatakwighwera Waryobha. Ndakyorra okobhatëëbhya igha, motakaahansha obhoghogho bhwobhwonswe bhoora ubhwa ko-kebhara kono. Sesesoro isyëndë nsyandëkirwë igha, Mutighe okohansha ekebhara, handë amangʼana ghano agha ko-kebhara. Ömöntö ono ahanshirë amangʼana amaghogho agha ko-kebhara kono, taatore okohansha Taata Waryobha hë. ¹⁶Ngambirë igho ko bhoora igha, obhoghogho ubhwa ko-kebhara kono, tibhukurwa ku-Waryobha hë, nko-kebhara kono bhukurwa. Obhoghogho bhuyö, n-kya oronamba urwa ömöbhërë, ukwighomba okobha na kyokyonswe igho keno okomaaha, na ikiheemere ikya ubhwamë. ¹⁷Ekebhara hamwë na oronamba urwa abhantö mberaahete, kasi wowonswe igho ono akokora ghano ghakushomera Waryobha, naraabhe na öbhöhöru ubhwa amakora ghonswe igho.

Mwiraarerrenga abhabhisa abha Yëësu Kiristo hobharë

¹⁸Bhëënyu abhaana abhaane abhaghonshe, seno nsyo sinsikö isya umuhiko! Mwaatëëbhibhwa igha umubhisa uwa Kiristo2:18 Umubhisa uwa Kiristo. Ensonga iyaamo ni-igha, ono akwanga Kiristo. nkuusha arë, na kora bhoono igho, abhabhisa abhaaru abha Yëësu Kiristo bhaamara ukuusha. Amangʼana ghayö, ngo ghakoghera toramanya igha, seno nsyo sinsikö isya umuhiko. ¹⁹Abhantö bhayö, mo-makanisa aghëëtö bhaarwa, kasi tebhaarë na öbhömwë ubhwa heene na bhëëtö hë. Singa bhaarë na öbhömwë ubhwa heene na bhëëtö, mbakaatighaayë kö-bhëëtö. Kasi mbaatanora, ekabha harabhu igho igha, tebhaarë na öbhömwë na bhëëtö hë.

²⁰Kasi bhëënyu, Yëësu Ömöhörëëru yaabhahaana Umwika uwaaye,2:20 Yëësu Ömöhörëëru yaabhahaana Umwika uwaaye. Ikiyunaani keraghamba igha, mwaahakwa amaghuta. Maaha mo-ketabho ikya 1 Samwëri 16:13. bhoono bhëënyu bhonswe igho, mmomanyirë obhoheene. ²¹Tenkobhandekera ritashandighi reno ko bhoora igha, temomanyirë obhoheene hë. Kasi nkobhandekera ndë ko bhoora igha, mmobhomanyirë bhuuya. Ghwiki mmomanyirë igha, tebhooho obhorongo bhwobhwonswe igho, bhono bhukurwa mo-bhoheene hë. ²²Ömöntö omorongo nö-öhë? Ömöntö omorongo no-ono akoghamba igha, Yëësu ti-Kiristo2:22 Kiristo. Ensonga iya Kiristo no-oora yaashaaghorwa na Waryobha ökötöörya abhantö na okobhatonga ko-Bhokama ubhwaye. Maaha mo-faharaasa. hë. Ömöntö ono akwanga Taata Waryobha, na Yëësu Omoona uwaaye, uyö we umubhisa uwa Kiristo. ²³Ömöntö ono akwanga Omoona uwa Waryobha, uyö taana öbhömwë na Taata Waryobha hë. Kasi, ono akwikërrya Omoona uyö ko-bhantö, uyö naana öbhömwë na Taata Waryobha.

²⁴Bhoono, möghëndërri okonaghya mo-senkoro isyënyu amangʼana ghaara mwëëghibhwa ukurwa hano mwaasimiri ukukumya Yëësu Kiristo. Hano moraaghëndërri okoghoota amëëghyö ghayö, ho moraabhe na öbhömwë na Omoona uwa Waryobha, na Taata Waryobha. ²⁵Riraghano reno yaatoraghaini ni-igha, tunyoore öbhöhöru ubhwa amakora ghonswe igho.

²⁶Nkobhandekera ndë amangʼana ghayö, okore mbakaani ko amangʼana agha abhantö bhaara bhakushaashya okobhasirya. ²⁷Kasi bhëënyu, Yëësu Kiristo yaabhahaana Umwika Ömöhörëëru, ono akwikara mö-bhëënyu. Uyö we aköbhöörökërrya ghonswe igho, na amëëghyö aghaaye na-agha obhoheene, te-agha obhorongo hë. Ku bhuyö, taaho ömöntö uwöndë uwa ököbhöörökërrya,2:27 Maaha mo-ketabho ikya Yohana 14:26. kya bhono Umwika aköbhëëghya, möghëndërri okobha na öbhömwë na Yëësu Kiristo.

²⁸Bhëënyu abhaana abhaane abhaghonshe, möghëndërri okobha na öbhömwë na Yëësu Kiristo. Möghëndërri igho, okore enkaagha eno arikyora, tokarehe, totakaasha okosooka.

²⁹Mmomanyirë igha, Yëësu Kiristo n-wa heene. Ku bhuyö momanye igha, wowonswe igho ono akokora amangʼana agha heene, uyö we omoona uwa Waryobha.

Okomenya kya abhaana abha Waryobha

¹Momaahe bhono Taata Waryobha atohanshirë bhököngʼu, igha bhëëtö tobherekerwe igha, m-baana abhaaye törë! Obhoheene ni-igho törë. Kasi keno kekoghera abhantö abha ko-kebhara kono, bhano bhatakwighwera Waryobha bhatamanyirë igha m-baana abhaaye törë, n-ko bhoora bhatamanyirë Waryobha. ²Abhaghonshe abhaane, ntomanyirë igha, bhoono m-baana abha Waryobha törë, kasi teraamanyekana bhuuya kya bhono torebha hë. Keno tomanyirë ni-igha, hano Yëësu Kiristo arikyora ko-kebhara kono, nturituubhana nawe, ko bhoora ntoremomaaha bhono arë. ³Ömöntö wowonswe igho ono akwitengʼera igha atuubhane na Yëësu Kiristo, aisaabhuure, abhe ömöhörëëru kya Yëësu Kiristo.

⁴Ömöntö wowonswe igho ono akokora ëbhëbhë, uyö nkosarya arë amaraghërryö agha Waryobha. Nkoghamba ndë igho, ko bhoora okokora ëbhëbhë, nko okosarya amaraghërryö. ⁵Mmomanyirë igha Yëësu Kiristo yaaishirë ko-kebhara kono, okore aruusi-ho ëbhëbhë ibhyëtö. Ghwiki we taana ëkëbhë kyokyonswe keera hë. ⁶Ömöntö wowonswe ono aköghëndërrya okobha na öbhömwë na Yëësu Kiristo, taatore ököghëndërrya okokora ëbhëbhë. Kasi ömöntö wowonswe igho ono aköghëndërrya okokora ëbhëbhë, uyö tamanyirë obhotoro ubhwa Yëësu Kiristo hë.

⁷Bhoono abhaana abhaane abhaghonshe, motakaikërrya ömöntö wowonswe igho abhangʼaine. Ömöntö wowonswe ono akokora amangʼana agha obhoheene, uyö m-möntö uwa heene ku-Waryobha kya bhono Yëësu Kiristo arëngë uwa heene. ⁸Kasi ömöntö wowonswe ono aköghëndërrya okokora ëbhëbhë, uyö m-möntö uwa Oghosambwa. Ntomanyirë igho, ko bhoora Oghosambwa n-gököri ughwa ëbhëbhë ukurwa kare. Kiyö nkyo ikibhuno keno kyaaghërrë Omoona uwa Waryobha akaasha ko-kebhara kono, okore asari emeremo ighya Oghosambwa.

⁹Ömöntö wowonswe ono yaamara okobha omoona uwa Waryobha, taköghëndërrya okokora ëbhëbhë hë, ko bhoora naana eteemo iya Waryobha. Taköghëndërrya okokora ëbhëbhë, ko bhoora m-moona uwa Waryobha. ¹⁰Kasi ömöntö ono atakokora amangʼana agha heene, handë ono atahanshirë umukumya murikyaye, uyö temoona uwa Waryobha hë. Ni-igho tokomanyërrya abhaana abha Waryobha bhono bharë, bheena abhaana abha Oghosambwa bhono bharë.

Okohanshana ukwa Abhakiristo

¹¹Ukurwa hano mwaasimiri ukukumya Yëësu Kiristo, mwaaighuurë engʼana eno igha, Abhakiristo ni-igha tohanshane. ¹²Totakaabha kya Kaini, ömöntö uwa Oghosambwa, oora yaaitirë mura waabho omoke.3:12 Maaha mo-ketabho ikya Okosemoka 4:1-8. N-kwakë yaamwitirë? Yaamwitirë ko bhoora ghano Kaini yaakoranga, m-maghogho ghaarë, kasi ghano mura uwaabho omoke uyö yaakoranga, n-ga heene ghaarë.

¹³Ku bhuyö abhakumya bharikyane, motakaaroghoora hano abhantö bhano bhatakwighwera Waryobha bharaabhareghe. ¹⁴Bhëëtö ntomanyirë igha, twaarwa mu-singuru isya uruku, na bhoono ntoona öbhöhöru ubhwa amakora ghonswe igho. Ntomanyirë igho, ko bhoora ntohanshirë abhakumya bharikyëtö. Ömöntö wowonswe igho ono ataana righonshe, uyö nakëghöötërëëywë na singuru isya uruku. ¹⁵Ömöntö wowonswe igho ono akoregha umukumya murikyaye, uyö nu-mwiti. Mmomanyirë bhuuya igha, taaho umwiti ono aana öbhöhöru ubhwa amakora ghonswe igho hë.

¹⁶Hano Yëësu Kiristo yaaruusiri öbhöhöru ubhwaye ko okoghera iya bhëëtö, yaatwörökëri righonshe irya obhoheene. Kora bhëëtö bhonswe ni-igha turuusi öbhöhöru ubhwëtö, ko okoghera iya abhakumya bharikyëtö. ¹⁷Ömöntö wowonswe igho ono aana ëbhëntö ibhya ko-kebhara kono, hano araamaahe umukumya murikyaye aana obhohabhë, ni-igha amötöörri. Kasi hano araange ökötöörrya uwa obhohabhë uyö, ömöntö kya uyö, atakaghamba igha aana righonshe irya Waryobha.

¹⁸Bhëënyu abhaana abhaane abhaghonshe, totakaahanshana ko mangʼana agheene igho hë, kasi tohanshane këmwëkëmwë ko okokorrana ubhwa heene. ¹⁹Hano toraahanshane igho, ho toraabhe na obhoheene igha m-bantö abha heene törë, kora senkoro isyëtö nseraatereme ku-Waryobha. ²⁰Nokaanyoora torashuutwa mo-senkoro isyëtö igha m-ba ëbhëbhë törë, kasi ntoona omorembe, ko bhoora ntomanyirë igha Waryobha, we omonene okokera senkoro isyëtö, kora namanyirë amangʼana ghonswe igho.

²¹Abhaghonshe abhaane, hano oraanyoore totakushuutwa mo-senkoro isyëtö, ntoraakarehe ukuhika haangʼë Waryobha. ²²Kora kyokyonswe igho keno tokomosabha, nkotohaana arë, ko bhoora nkwighwera törë amaraghërryö aghaaye, kora nkokora törë amangʼana ghano ghakumushomera.

²³Umughiro ughwaye ngo ghono igha, totakanga ukukumya Yëësu Kiristo, Omoona uwaaye, kora tohanshane kya bhoora yaatoraghërrëëyi. ²⁴Ömöntö wowonswe igho ono akwighwera imighiro ighya Waryobha, uyö naana öbhömwë nawe. Waryobha wonswe naana öbhömwë na ömöntö kya uyö. Ntomanyirë igha, Waryobha naana öbhömwë na bhëëtö, ko okohetera Umwika Ömöhörëëru ono yaatohaana.

Okoneghora amëëghyö agha obhorongo na agha obhoheene

¹Abhaghonshe abhaane, motakaakumya kera ömöntö ono akoghamba igha aana Umwika Ömöhörëëru uwa Waryobha. Kasi mumwitaahe bhuuya, momaahe nyoore aana Umwika Ömöhörëëru uwa Waryobha. Ni-igha momanyërri obhoheene bhuyö, ko bhoora abharööti abhaaru abha obhorongo, bhaibhoka ko-kebhara kono. ²Enshera iya okomanya igha ömöntö nyabhorebhe nkotangatwa arë na Umwika uwa Waryobha, ni-igha ërë. Ömöntö wowonswe ono akwikërrya igha Yëësu Kiristo yaasha ko-kebhara kono aana ömöbhërë kya gheno tonaghyo, uyö we akotangatwa na Umwika Ömöhörëëru uwa Waryobha. ³Kasi ömöntö wowonswe ono atakwikërrya igha, Yëësu Kiristo yaarë na ömöbhërë kya gheno tonaghyo, uyö takotangatwa na Umwika Ömöhörëëru uwa Waryobha hë. Ömöntö kya uyö, nkotangatwa arë na ëkëhwë ikya umubhisa uwa Kiristo. Na bhëënyu mwaighwa igha, ëkëhwë kiyö, nkuusha kërë, kasi bhoono kyaamara ukuusha ko-kebhara kono.

⁴Bhëënyu abhaana abhaane abhaghonshe, m-baana abha Waryobha mörë. Kora mwaanga amangʼana agha abharööti abha obhorongo bhayö. Mwaanyoora obhotoro ubhwa okokora igho, ko bhoora Umwika Ömöhörëëru uwa Waryobha mö-bhëënyu arë. Umwika Ömöhörëëru uyö, we aana obhotoro okokera ëkëhwë ikya Oghosambwa, kiyö kekotangata abhantö bhano bhatakwighwera Waryobha. ⁵Abharööti abha obhorongo bhayö, m-ba ko-kebhara kono, ku bhuyö nkoghamba bharë amangʼana agha bhunyakyaro. Abhantö abha ko-kebhara kono bhano bhatakwighwera Waryobha, nkobhaitegherra bharë. ⁶Bhëëtö m-baana abha Waryobha törë. Ömöntö wowonswe ono amanyirë Waryobha, nkutwitegherra arë. Kasi ono atarë omoona uwa Waryobha, takutwitegherra hë. Ku bhuyö ni-igho tokotora okomanya na ukwahora abhantö bhano bhakotangatwa na Umwika Ömöhörëëru uwa obhoheene, na bhano bhakotangatwa na ëkëhwë ikya obhorongo.

Righonshe irya Waryobha

⁷Abhaghonshe abhaane, tohanshane, ko bhoora righonshe nku-Waryobha rikurwa. Ömöntö wowonswe ono akohansha bharikyaye, uyö nkobha arë omoona uwa Waryobha, kora namanyirë Waryobha. ⁸Kasi ömöntö wowonswe igho ono atahanshirë bharikyaye, uyö tamanyirë Waryobha hë, ko bhoora Waryobha we arëngë righonshe.

⁹Waryobha yöörökya righonshe iryaye kö-bhëëtö, ko okotoma Omoona uwaaye umumwëmwë ko-kebhara kono. Yaakörrë igho, okore okohetera ku-uyö, tunyoore öbhöhöru ubhwa amakora ghonswe igho. ¹⁰Righonshe rërëngë igha, ti-igha m-bëëtö twaatangatirë okohansha Waryobha, kasi we yaatangatirë okotohansha. Righonshe riyö, ndyo ryaaghërrë akatoma Omoona uwaaye, okore abhe ikimwenso ikya ukutwighwerrania na Waryobha, ku ukuruusya-ho ëbhëbhë ibhyëtö. ¹¹Abhaghonshe abhaane, ko bhoora igha Waryobha ni-igho yaatohanshirë, na bhëëtö bhonswe ni-igha tohanshane. ¹²Taaho ömöntö ono yaakarööshë Waryobha hë. Kasi hano toraahanshane, Waryobha nkobha arë na öbhömwë na bhëëtö, na righonshe iryaye, nkohekerana rërë mö-bhëëtö.

¹³Bhëëtö ntoona öbhömwë na Waryobha, umwene wonswe naana öbhömwë na bhëëtö. Ntomanyirë igho, ko bhoora yatohaana Umwika uwaaye. ¹⁴Bhëëtö twaamaaha Omoona uwa Waryobha, kora nkötëëbhya törë abhantö abhandë obhoheene igha, Taata Waryobha yaatömirë Omoona uwaaye ko-kebhara kono, okore abhe Ömötöörya uwa abhantö bhonswe igho. ¹⁵Ömöntö wowonswe igho ono akwikërrya igha, Yëësu Kiristo m-Moona uwa Waryobha, uyö naana öbhömwë na Waryobha, na Waryobha wonswe, naana öbhömwë na ömöntö kya uyö. ¹⁶Bhëëtö ntomanyirë, kora nkukumya törë igha, Waryobha natohanshirë. Waryobha we righonshe. Ömöntö wowonswe igho ono akobha na righonshe, we aana öbhömwë na Waryobha, na Waryobha wonswe, nkobha arë na öbhömwë na ömöntö kya uyö.

¹⁷Ni-igho righonshe rekohekerana mö-bhëëtö, okore tuushe okobha na obhokarë urusikö roora urwa okobhotorrwa ikiina. Ko bhoora öbhömënyi ubhwëtö ko-kebhara kono, mbutuubhaini kya bhoora Yëësu yaamënyirë ko-kebhara kono. ¹⁸Ömöntö ono aana righonshe, uyö taana entarëki hë. Righonshe irya obhoheene, nkwata rërë entarëki yonswe igho, ko bhoora obhoobha ubhwa okobhotorrwa ikiina, mbo bhokoghera abhantö bhabha na entarëki. Ömöntö ono aana entarëki, uyö righonshe tereraahekerana ko-we hë.

¹⁹Bhëëtö ntohanshirë Waryobha, kora bharikyëtö bhonswe ntobhahanshirë, ko bhoora Waryobha, we yaatangatirë okotohansha. ²⁰Hano ömöntö wowonswe igho araaghambe igha nahanshirë Waryobha, na ambe narëghirë umukumya murikyaye, uyö m-morongo. Keno kekoghera toramanya igha m-morongo, n-ko bhoora atahanshirë umukumya murikyaye ono akomaaha, kasi araghamba igha, nahanshirë Waryobha ono ataakarööshë. ²¹Mbe, Waryobha atohaayë umughiro igha, ömöntö wowonswe igho ono ahanshirë Waryobha, ni-igha ahanshe umukumya murikyaye.4:21 Maaha mo-ketabho ikya Amangʼana agha Abharaawi 19:18; Eheetoko iya Etoraati 6:4-5.

Okokera ëbhëbhë

¹Ömöntö wowonswe igho ono akukumya Yëësu igha n-Kiristo, uyö we omoona uwa Waryobha. Ömöntö wowonswe igho ono ahanshirë umwibhöri, nkohansha arë kora na omoona uwa umwibhöri uyö. ²Nkomanya törë igha ntohanshirë abhaana abha Waryobha, ko okohansha Waryobha na okoghoota imighiro ighyaye. ³Ko bhoora hano ömöntö yahansha Waryobha, nkoghoota arë imighiro ighyaye. Kora imighiro ighyaye të-mëköngʼu ighya okoghoota hë. ⁴Nkoghamba ndë igho ko bhoora igha, kera omoona uwa Waryobha, naana obhotoro ubhwa ukwanga obhoghogho ubhwa ko-kebhara kono. Obhoghogho bhuyö, nkubhwanga törë ku ukukumya Yëësu Kiristo. ⁵Bhoono n-nawë aana obhotoro ubhwa ukwanga obhoghogho ubhwa ko-kebhara kono? No-oora akukumya igha, Yëësu Kiristo m-Moona uwa Waryobha.

Obhoheene ubhwa amangʼana agha Yëësu Kiristo

⁶Yëësu Kiristo yaahonyorwa igha we m-Moona uwa Waryobha, ko enshera iya amanshë agha obhobhatiisyo ubhwaye, na ko-maanyinga agha ukukwa ukwaye. Tiyöörökëri ko obhobhatiisyo na amanshë ibhyene igho hë, kasi kora na ukwëtëkya amaanyinga aghaaye ko-mosarabha. ⁷Umwika Ömöhörëëru we akwimererra ghayö igha m-maheene, ko bhoora we obhoheene. ⁸Bhaaho abhaimërërri bhatatö bhano bhakwimererra obhoheene ubhwa amangʼana agha Yëësu Kiristo, [mu-ryobha iyö, n-Taata, Engʼana, na Umwika Ömöhörëëru, abhatatö bhayö n-këntö këmwë. ⁹Ghwiki ghaaho amangʼana atatö ghano ghakwimererra ko-kebhara kono,]5:8-9 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani. Umwika, amanshë, na amaanyinga, atatö ghayö ghonswe igho, ngo ghakwikererrania ko-kebhara kono. Nyoore torakumya ubhwimërërri ubhwa abhantö, ubhwimërërri ubhwa Waryobha, mboona ubhurito bhököngʼu, ko bhoora bhuyö, mbo obhoheene bhono Waryobha yaatoora-ho, ko mangʼana agha Omoona uwaaye.

¹⁰Ömöntö wowonswe igho ono akukumya Omoona uwa Waryobha, uyö nkunyoora örë akumiri igha, ubhwimërërri bhuyö, nu-bhwa obhoheene. Kasi ono atakukumya Waryobha, nkomokora arë morongo, ko bhoora akwanga ukukumya obhoheene bhono Waryobha yaaghamba ko amangʼana agha Omoona uwaaye. ¹¹Keno kekoghera torabha na obhoheene ubhwa ghano Waryobha yaatötëëbhëri igha m-maheene, nö-bhöhöru ubhwa amakora ghonswe igho bhono yaatohaana. Öbhöhöru bhuyö, ntwaabhunyoora ko okoghera iya ukukumya Omoona uwaaye. ¹²Ömöntö wowonswe igho ono aana öbhömwë na Omoona uwa Waryobha, uyö naana öbhöhöru bhuyö. Kasi ono ataana öbhömwë na Omoona uwa Waryobha, uyö taana öbhöhöru hë.

Obhokarë ku-Waryobha

¹³Mbandëkëëyë amangʼana ghayö, bhëënyu bhano mukukumya Omoona uwa Waryobha, okore momanye igha, mmoona öbhöhöru ubhwa amakora ghonswe igho. ¹⁴Bhëëtö nkokareha törë bhököngʼu ukuhika haangʼë Waryobha, ko bhoora ntomanyirë igha, nkutwighwa arë hano twamosabha ryoryonswe igho okorengʼaana na righonshe iryaye. ¹⁵Mbe, ntomanyirë igha, nkutwitegherra arë, hano twamosabha kyokyonswe igho, kiyö nkyo kekoghera torabha na obhoheene igha naraatohaane ghano tokomosabha.

¹⁶Bheeho ëbhëbhë ibhyëndë bheno bhetakotoora ömöntö hare na Waryobha, amakora ghonswe igho. Hano ömöntö wowonswe igho araamaahe umukumya murikyaye arakora ëbhëbhë kya bhiyö, amosabhere ku-Waryobha. Waryobha naraamohaane öbhöhöru. Ni-igho ekobha ko bhano bhakokora ëbhëbhë kya bhiyö. Kasi bheeho ëbhëbhë ibhyëndë, bheno bhikwahora ömöntö abha hare na Waryobha, amakora ghonswe igho. Öni tenkoghamba igha, asabhere ömököri uwa ëbhëbhë kya bhiyö ku-Waryobha. ¹⁷Okokora engʼana yoyonswe igho eno etaingʼarëëyi ku-Waryobha, nko okokora ëbhëbhë. Kasi hamwë na ghayö, bheeho ëbhëbhë ibhyëndë bheno bhetakwahora ömöntö abhe hare na Waryobha amakora ghonswe igho.

¹⁸Ntomanyirë igha, omoona uwa Waryobha taköghëndërrya okokora ëbhëbhë hë.5:18a Maaha mo-ketabho ikya 1 Yohana 3:9. Keno kekoghera ataköghëndërrya okokora ëbhëbhë, n-ko bhoora Yëësu Kiristo akomorenda.5:18b Yëësu Kiristo akomorenda. Ensonga iyaamo iyëndë ni-igha, omoona wowonswe igho uwa Waryobha, nkwirenda arë. Ku bhuyö Oghosambwa teghokomokora ngʼana hë. ¹⁹Ntomanyirë igha, bhëëtö m-baana abha Waryobha törë. Kasi abhantö abhandë bhonswe igho bhano bhatakwighwera Waryobha, bhayö nkobhaahwa bharë na Oghosambwa. ²⁰Ghwiki ntomanyirë igha, Omoona uwa Waryobha yaamara ukuusha ko-kebhara kono, yaatohaana obhongʼaini ubhwa okomanya Waryobha ubhwa heene. Ntoona öbhömwë na Waryobha uwa heene, ko okohetera kö-bhömwë ubhwëtö na Yëësu Kiristo Omoona uwaaye. Yëësu Kiristo uyö, we Waryobha uwa heene, na uwa öbhöhöru ubhwa amakora ghonswe igho.

²¹Bhëënyu abhaana abhaane abhaghonshe, mwiyangarrenga motakaasengerra ëbhëtöndö.5:21 Motakaasengerra ëbhëtöndö. Ensonga iyaamo iyëndë ni-igha, motakaakora ëbhëbhë.