1 Abhakörintö

Ritashandighi irya mbere irya Pauro

ko-Bhakörintö

Obhotangati

Ritashandighi reno, Pauro omotomwa uwa Yëësu Kiristo we yaandëkëëyë ekanisa eno yaarë mu-mughi ghono ghwaabherekerwanga igha, Körintö. Pauro uyö, we yaasëmööyë ekanisa iyö. Eramaahekana igha, ritashandighi reno, ndyaandëkirwë omooka ughwa merongo etaano na inye (54) ukurwa hano Yëësu Kiristo yaaibhööywë. Pauro yaandëkirë ritashandighi reno, enkaagha eno yaarë mu-mughi ughwa Ëfësö.

Umughi ughwa Körintö, ngwaamanyekaini bhököngʼu ku-kyaro ikya Abhaghiriki, na ko-bhokama bhonswe igho ubhwa Ikiruumi. Umughi ghuyö, ngwaarë haangʼë na morambo ughwa inyansha iya Meditereniani. Abhantö abhaaru abha ukurwa mbaara syonswe igho, mbaaghöryanga na okoghora ëbhëntö ibhyaru mu-mughi ghuyö. Abhantö bhayö, mbaarenga na seteemo isyabho sinsharu, isya okosaasaama na okosengerra ëbhëtöndö ibhya amasambwa. Seteemo siyö, syaaghërrë Abhakiristo bhakasishooghania mu-mukumo ughwabho, ku bhuyö bhakabhöörya Pauro ko amangʼana amahagharëhagharë ghano ghaarenga hayö.

Keno kyaaghërrë Pauro akaandeka ritashandighi reno, n-ko bhoora yaatunanga amanyërri amangʼana ghano yaaighuurë agha rikomo irya abhakumya abha Körintö. Pauro yaabhandëkëëyë arabhörökërrya bhono öbhömënyi ubhwa Abhakiristo bhukutunwa bhobhe, hano bhatetana. Ghwiki ikyëndë keno yaabhatëëbhëri, ne-ngʼana iya amasabhi, imituho ighya Umwika Ömöhörëëru, na ukuryoka ukwa abhaku. Yaabhandëkëëyë amangʼana ghayö, okore atööri ekanisa iya Körintö etakaanyaraghana.

Amakëërërryö

¹Ritashandighi reno nö-öni Pauro ndyandëkirë. Öni naabherekerwa igha mbe omotomwa uwa Kiristo Yëësu, ku righonshe irya Waryobha. Öni na Sositene umukumya murikyane, ²nkobhakëërya törë bhëënyu bhano mörëngë mo-kanisa iya Waryobha, eno ërëngë Körintö hayö. Bhëënyu mwasaabhuurwa na Kiristo Yëësu. Mwabherekerwa igha, mobhe abhantö abha Waryobha, hamwë na bhonswe igho kera ahasë, bhano bhakosaasaama Omonene uwëëtö Yëësu Kiristo, ono arëngë Omonene uwaabho, na uwëëtö na bhëëtö bhonswe.

³Örööbhö na omorembe ukurwa ku-Waryobha Taata uwëëtö, na ko-Monene uwëëtö Yëësu Kiristo, bhebhe hamwë na bhëënyu.

Umukumo ughwa Pauro ku-Waryobha

⁴Nkukumya ndë Waryobha sinsikö syonswe igho, ko okoghera iya bhëënyu, ko okoghera iya örööbhö urwaye rono yaabhahaana okohetera ku-Kiristo Yëësu. ⁵Ko okobha na öbhömwë na Yëësu Kiristo, mwamëhirë ko obhoghambi bhwonswe igho, na ko obhongʼaini bhwonswe igho. ⁶Ghayö nkwörökya gharë igha, amangʼana agha Yëësu Kiristo ghano twaabharaarëkëëyë na-agha obhoheene. ⁷Ku bhuyö, bhoono timukusuuhwa na ituho yoyonswe igho iya Umwika Ömöhörëëru, ko-nkaagha eno mokeeghanya ukukyora ukwa Omonene uwëëtö Yëësu Kiristo. ⁸Waryobha naraabhatogheke okohekera urusikö urwa umuhiko, okore amasoro ghatakaasha okotooka kö-bhëënyu urusikö ruyö, urwa Omonene uwëëtö Yëësu Kiristo. ⁹Waryobha nu-uwa heene, yaabhabherekera, okore mobhe na öbhömwë na Omoona uwaaye, Yëësu Kiristo Omonene uwëëtö.

Öbhömwë ubhwa ekanisa

¹⁰Abhakumya bharikyane, ndabhasaasaama okohetera iriina irya Omonene uwëëtö Yëësu Kiristo igha, mobhe na ubhwighwerrani, hayö ho moraabhe ëkëntö ëkëmwë. Mwangarre motakaahokana, kasi mobhe ëkëntö ëkëmwë, bhanyakiina ëkëmwë. ¹¹Abhakumya bharikyane, abhantö nyabhorebhe abha eka iya Kirowe, bhaantëëbhya igha, timukwighwerrana bhuuya hë. ¹²Mbe, keno nkoghamba ni-igha, kera ömöntö mö-bhëënyu n-gaaye igho akoghamba, uwöndë araghamba igha, “Öni nu-uwa Pauro ndë.” Uwöndë igha, “Öni, nu-uwa Apöörö ndë.” Ghwiki uwöndë aghamba igha, “Öni, nu-uwa Keefa1:12 Keefa. Keefa uyö we Peetero. Ensonga iya iriina Peetero ni-igha, Ritare. ndë.” Uwöndë igha, “Öni, nu-uwa Kiristo ndë.” ¹³Bhoono ndabhabhöörya igha, Kiristo nahokaini? Kasi Pauro, we yaahanëkirwë ko-mosarabha ko okoghera iya bhëënyu? Handë igha, mwaabhatiisiibhwi okohetera iriina irya Pauro?

¹⁴Nkukumya ndë Waryobha igha, Kirisipo bhaana Ghaayo abheene igho, mbo naabhatiisya kö-bhëënyu hayö, tinkuhiita igha naabhatiisya ömöntö uwöndë hë. ¹⁵Ku bhuyö, taaho ömöntö ono akotora okoghamba igha, yaabhatiisibhwa okohetera iriina iryane. ¹⁶Nhitirë igha, naabhatiisya abhantö abha eka iya Sitefana. Tenkomanya ghwiki igha naabhatiisya ömöntö uwöndë wowonswe igho kutigha bhayö. ¹⁷Ko bhoora, Yëësu Kiristo tiyaantömirë igha mbatiisi abhantö. Yaantömirë ndaareke Amangʼana Amaiya, kasi ntakesegha obhongʼaini ubhwane ubhwa okoghamba bhuuya, okore omosarabha ughwa Yëësu Kiristo, ghotakaabhorwa ubhwera ubhwagho.

Kiristo we obhotoro na obhongʼaini ubhwa Waryobha

¹⁸Engʼana iya omosarabha ughwa Yëësu Kiristo ko bhano bhakusira, nkomaaha bharë igha, m-bokangi, kasi ko bhano tökötööribhwa, nkomaaha törë igha, engʼana iyö, no-bhotoro ubhwa Waryobha. ¹⁹N-kya bhono yandëkirwë mo-Maandeko Amahörëëru igha,

“Nendaasiki obhongʼaini ubhwa abhantö abhangʼaini.

Nendaasari na obhomanyi ubhwa amangʼana ubhwa abhamanyi abha amangʼana.”1:19 Maaha mo-ketabho ikya Isaaya 29:14.

²⁰Hai akotooka omongʼaini? Hai akotooka umwëghya uwa amaraghërryö? Hai akotooka umuri uwa senkaani uwa reero eno? Kasi obhongʼaini ubhwa ko-kebhara kono, Waryobha tiyaakora bhomaahekane igha m-bokangi? ²¹Nkoghamba ndë igho ko bhoora igha, Waryobha ko obhongʼaini ubhwaye, yaakörrë igha, abhantö bhatakaamomanya okohetera ko-bhongʼaini ubhwabho abheene. Kasi Waryobha akamaaha igha, atööri abhantö bhano bhakukumya engʼana eno ekoraarekwa, eno abhantö abhandë bhakomaaha igha m-bokangi. ²²Ko bhoora Abhayahudi, bho ne-kemanyërryö bhakutuna, na Abhaghiriki bho, na-mangʼana agha obhongʼaini bhakutuna. ²³Kasi bhëëtö, Yëësu Kiristo we tokoraareka, ono yaahanëkirwë ko-mosarabha. Engʼana iyö, yo Abhayahudi bhakwituuratuura-ko, na ko-Bhaghiriki, m-bokangi. ²⁴Kasi ko bhano Waryobha yaabhabherekera bhabhe abhaaye, mbakaabha Abhayahudi handë abhantö bhano bhatarë Abhayahudi, Yëësu Kiristo, we obhotoro na obhongʼaini ubhwa Waryobha. ²⁵Ko bhoora igha, engʼana iya Waryobha eno ekomaahekana igha ni-iya obhokangi, nkunyoora örë eena obhongʼaini okokera obhongʼaini ubhwa abhantö. Engʼana iya Waryobha eno abhantö bhakomaaha igha m-botaaniinu, neena obhotoro okokera ubhwa abhantö.

²⁶Bhoono abhakumya bharikyane, muhiitoke kya bhono mwaarë, enkaagha eno Waryobha yaabhabhërëkëëyë. Momanye igha, abhantö bhano bhaabherekerwa abha obhongʼaini ubhwa kinyamöbhërë, abha obhotoro, na abha ibhyeo te-bhaaru hë. ²⁷Kasi Waryobha yaashaaghööyë amangʼana agha ekekangi ko-kebhara kono, okore asööki abha obhongʼaini. Ghwiki akashaaghora ëbhëntö bheno bhetaana obhotoro ko-kebhara kono, okore asööki abha obhotoro. ²⁸Waryobha yaashaaghööyë ëbhëntö ebhetaaniinu na bheno bhekoserwa ko-kebhara kono, amangʼana ghano ghataaho, okore asöökërri ghano ghaaho. ²⁹Yaakörrë igho, okore ömöntö wowonswe igho atakaikumya ku-Waryobha. ³⁰Waryobha we abhaghootaini hamwë na Kiristo Yëësu. Uyö, we Waryobha yaamokora abhe obhongʼaini kö-bhëëtö, bhono bhukurwa ku-Waryobha, obhoheene, esaabhuuro na ubhutungurya ubhwa ëbhëbhë ibhyëtö. ³¹N-kya bhono yandëkirwë mo-Maandeko Amahörëëru igha, “Ömöntö wowonswe igho ono akwihasha, aikumi ko okoghera iya Omonene Waryobha.”1:31 Maaha mo-ketabho ikya Yeremia 9:23-24.

Okoraareka amangʼana agha Yëësu Kiristo

¹Abhakumya bharikyane, hano naaishirë kö-bhëënyu hayö, tenaabharaarëkëëyë imbumbure iya Waryobha,2:1 Imbumbure iya Waryobha. Senakara isyëndë syandëkirwë igha, ubhwimërërri ku-Waryobha. ko bhoghambi ubhwa amangʼana amaiya, handë kwa obhongʼaini. ²Ko bhoora hano naahikirë kö-bhëënyu hayö, tenatunanga mmanye kyokyonswe keera hë, kasi ekenene na-mangʼana agha Yëësu Kiristo, yëë, Yëësu Kiristo ono yaahanëkirwë ko-mosarabha. ³Enkaagha iyö, m-mötëntëëru naarë, kora naarenga na entarëki, kora naarighitanga bhököngʼu. ⁴Engʼana iyaane, na okoraareka ukwane, tibhyarenga ibhya obhongʼaini ubhwa ököngʼënërrya sehakëri isya abhantö hë, kasi n-ko ebhemanyërryö ibhya obhotoro ubhwa Umwika Ömöhörëëru. ⁵Naakörrë igho, okore umukumo ughwënyu, ghotakaabha ughwa ukwesegha obhongʼaini ubhwa abhantö, kasi ghwitengʼere obhotoro ubhwa Waryobha.

Obhongʼaini ubhwa ukurwa ku-Mwika Ömöhörëëru

⁶Nokaanyoora ni-igho ërë, kasi nkoghamba törë amangʼana agha obhongʼaini ko-bhantö bhano umukumo ughwabho ghwakongʼa, to-bhongʼaini ubhwa ko-kebhara keno hë, handë ubhwa abhatöngi abha ekebhara keno, bhayö m-manshë mahëti. ⁷Obhongʼaini bhuyö tokoraareka, ni-kibhisirë ikya Waryobha keno yaasëëmëri ukurwa kare, kora ekebhara ketaraabhombwa, okore atokorre ikuughë iya ubhuhika. ⁸Taaho ömötöngi uwa ko-kebhara kono kora ömwë, ono amanyirë obhongʼaini bhuyö. Singa bhakaabhomanyirë, tebhakaahanëkirë Omonene uwa ubhuhika ko-mosarabha hë. ⁹Kasi n-kya bhono Amaandeko Amahörëëru ghakoghamba igha,

“Taaho ömöntö ono yaarööshë, akaighwa,

handë okotoora mo-nkoro iyaaye,

amangʼana ghano Waryobha yaasëëmëëyi abhantö bhano bhamohanshirë.”2:9 Maaha mo-ketabho ikya Isaaya 64:4.

¹⁰Kasi bhëëtö, Waryobha yaatorahorra amangʼana ghayö okohetera ku-Mwika Ömöhörëëru. Ko bhoora Umwika Ömöhörëëru nkwitaaha arë ghonswe igho, kora ibhibhisirë ibhya Waryobha. ¹¹Taaho ömöntö ono akotora okomanya ghano ömöntö uwöndë akwitegherra. Kasi enkoro iyaaye iyeene igho, yo eghamanyirë. Ni-ighoigho igha, amangʼana agha Waryobha, taaho ono aghamanyirë hë, Umwika uwa Waryobha umwene igho we aghamanyirë. ¹²Bhëëtö, tetwahaanwa enkoro iya ko-kebhara kono, kasi nu-Mwika ono akurwa ku-Waryobha we twaahaanwa, okore tomanye amangʼana ghano Waryobha yaatohaana bhosa igho.

¹³Tetokoghamba amangʼana ghayö kya amangʼana ghano ghakwëghibhwa kwa obhongʼaini ubhwa abhantö, kasi nkwëghibhwa gharë na Umwika uwa Waryobha. Torarahora amangʼana agha Umwika uwa Waryobha, ko bhano bhaana Umwika uwa Waryobha.2:13 Torarahora amangʼana agha Umwika uwa Waryobha, ko bhano bhaana Umwika uwa Waryobha. Ensonga iyaamo iyëndë ni-igha, torarahora amangʼana agha Umwika uwa Waryobha ko mangʼana ghano ghaarwa ku-Mwika Ömöhörëëru uwa Waryobha.¹⁴Mbe, ömöntö ono ataana Umwika uwa Waryobha, uyö takotora okoghoota amangʼana ghano ghakurwa ku-Mwika uwa Waryobha, ko bhoora uyö, nkomaaha arë amangʼana ghayö igha, n-ga ekekangi. Kora taatore okoghamanya hë, ko bhoora nkomanywa gharë ko obhotoro ubhwa Umwika Ömöhörëëru. ¹⁵Ömöntö ono akotangatwa na Umwika uwa Waryobha nkwitaaha arë, kasi we takwitaahwa hë. ¹⁶N-kya bhono Amaandeko Amahörëëru ghakoghamba igha,

“Taaho ömöntö ono amanyirë amaitegherro agha Omonene Waryobha hë,

taaho ömöntö ono akotora okomoraghërrya hë.”2:16 Maaha mo-ketabho ikya Isaaya 40:13.

Kasi bhëëtö nkwitegherra törë ghano ghakurwa ku-Kiristo.

Öbhömwë ko-meremo ighya Waryobha

¹Abhakumya bharikyane, tenaashumaashirë na bhëënyu kya hano ömöntö akushumaasha na abhantö bhano bhakotangatwa na Umwika Ömöhörëëru. Kasi naashumaashirë na bhëënyu, kya hano ömöntö akushumaasha na abhantö bhano bhaana esemoko iya öbhököri ubhwa ëbhëbhë. Naashumaashirë na bhëënyu kya ebhengʼerre ko mangʼana agha ukukumya Kiristo. ²Naabhanywënsëri amabheere, ti-bhyakorya naabhahaayë hë, ko bhoora tewanyöörrë moraabha abha okorya ibhyakorya hë. Kora bhoono, temoraabha abha okorya ibhyakorya hë. ³Ko bhoora nanyabhoono, bhëënyu m-bantö abha esemoko iya öbhököri ubhwa ëbhëbhë mörë. Hano okomaaha moona rikenge bheena öbhösëëghërrya, momanye igha, m-bantö abha esemoko iya öbhököri ubhwa ëbhëbhë mörë, kora amangʼana aghëënyu nkoghakora mörë kinyamöbhërë. ⁴Nkoghamba ndë igho ko bhoora hano ömöntö yaghamba igha, “Öni nu-uwa Pauro ndë,” uwöndë igha, “Öni nu-uwa Apöörö ndë,” mbe, bhoono hayö tikunyoora örë morakora amangʼana ghano abhantö abha ko-kebhara kono bhakokora?

⁵Mbe bhoono, Apöörö n-nawë? Na Pauro n-nawë? Bhayö m-baköri abha emeremo abha Waryobha bhano bhaaghërrë mokakumya Waryobha, kera ömöntö mo-bhayö, yaakörrë emeremo gheno yaahaanwa na Omonene. ⁶Öni nëëmya, Apöörö akeeterra amanshë, kasi Waryobha we akukiinia. ⁷Mbe, momanye igha, umwëmya të-këntö hë, kora na umwëtërri uwa amanshë, wonswe të-këntö hë, kasi ekenene n-Waryobha ono akukiinia. ⁸Umwëmya na umwëtërri uwa amanshë, m-bamwë bhayö, kasi kera ömwë uwaabho, narituhwa ko okorengʼaana na inyanko iyaaye. ⁹Nkoghamba ndë igho ko bhoora bhëëtö m-baköri abha emeremo abha Waryobha törë, na ömöghöndö ughwa Waryobha, m-bëënyu, kora m-bëënyu inyumba iyaaye.

¹⁰Waryobha kö örööbhö urwaye rono yaangʼaana, yaantöörrya okohaghaasha umusingi kya omohaghaashi umuuya omongʼaini, ono amanyirë amangʼana, nkatoora-ho umusingi ghono ömöntö uwöndë akohaghaasha-ko. Mbe, kera ömöntö angarre bhuuya bhono akohaghaasha ku-musingi kuyö. ¹¹Ko bhoora taaho ömöntö ono akotora okotoora-ho umusingi ughwöndë, kasi n-goora ghwaamara okotoorwa-ho. Umusingi ghuyö, n-Yëësu Kiristo umwene. ¹²Ömöntö aratora okohaghaashera-ko esahaabhu, ebheghera ibhya seehera, handë amaghena agha öbhöghöri, handë ëmëtë, amatö, handë amanyanki. ¹³Ubhuuya ubhwa omoremo ughwa kera ömöntö, mboremaahekana harabhu igho. Urusikö roora urwa okobhotora ikiina, emeremo ghyonswe igho ngeremaahekana harabhu igho, ko bhoora omoremo ughwa kera ömöntö, ngurishaashibhwa ko okohetera mo-morro ughwa okobhotorra ibhiina. ¹⁴Hano omoremo ughwa ömöntö ghörëhëtibhwa mo-morro ghotame, ömöntö uyö narituhwa. ¹⁵Hano omoremo ughwa ömöntö ghorerongora, ömöntö uyö, tarituhwa hë. Kasi narëtööribhwa kya hano ömöntö ahönirë mo-morro.

¹⁶Kasi motamanyirë igha bhëënyu ni-nyumba iya Waryobha mörë, kora Umwika uwa Waryobha mö-bhëënyu amënyirë? ¹⁷Hano ömöntö araasari inyumba iya Waryobha3:17 Inyumba iya Waryobha. Maaha mo-faharaasa. iyö, Waryobha wonswe naraamosari. Ko bhoora inyumba iya Waryobha në-hörëëru, na inyumba iyö, m-bëënyu.

¹⁸Ömöntö atakaingʼaina umwene. Hano ömöntö araaimaahe igha m-mongʼaini mö-bhëënyu ko-kebhara kono, aikore igha mokangi, okore abhe omongʼaini uwa heene. ¹⁹Aikore igho, ko bhoora obhongʼaini ubhwa ko-kebhara kono, m-bokangi ku-Waryobha. Amaandeko Amahörëëru gharaghamba igha, “Waryobha we akoghashania abhangʼaini ko-bhongʼaini ubhwabho.”3:19 Maaha mo-ketabho ikya Ayubhu 5:13.²⁰Ghwiki igha, “Omonene namanyirë amaitegherro agha abhangʼaini, igha teghaana ubhwera hë.”3:20 Maaha mo-ketabho ikya Zabhuri 94:11.

²¹Mbe, ömöntö wowonswe igho atakaibhaaka igha m-mosoorani uwa ömöntö nyabhorebhe, ko bhoora bhëëtö bhonswe igho na bhëënyu, ²²nekaabha igha m-Pauro, Apöörö, Keefa, ekebhara, öbhöhöru, uruku, bheno bheeho, handë igha, bheno bherebha-ho, bhyonswe igho ni-bhyënyu. ²³Kasi bhëënyu, na-abha Kiristo mörë, na Kiristo wonswe nu-uwa Waryobha.

Emeremo ighya abhatomwa

¹Mbe, abhantö bhamanye igha, bhëëtö m-baköri abha emeremo abha Yëësu Kiristo törë, abharaarëki abha amangʼana agha ibhibhisirë ibhya Waryobha. ²Bhoono keno kikutunwa, nu-bhwimërërri ubhwa heene. ³Ko orobhaara urwane öni, mmokaanshongera, te-ngʼana hë, handë nenkaashongerwa na abhantö abha ubhwera honswe te-ngʼana hë. Kasi öni umwene tinkwishongera hë. ⁴Amaitegherro aghaane m-buuya gharë, kasi engʼana iyö tekoghera nange okobha na obhosarya. Omonene we akombotorra ikiina. ⁵Ku bhuyö motakaabhotora ikiina, enkaagha iyaako etaraabha, moghanye okohekera hano Omonene ariisha. We aremoreka amangʼana agha mu-kisuntë ghonswe igho ghano ghabhisirwë, na okotoora harabhu ghano gharëngë mo-senkoro isya abhantö. Hayö ho bhoono kera ömöntö arinyoora sinkuma seno aingʼarëëyi, ukurwa ku-Waryobha.

⁶Mbe, abhakumya bharikyane, nëndëngëri amangʼana aghaane na Apöörö, okore ghabhe ëkërëngyö keno keraabhatöörri okomanya amangʼana agha ëkërëngyö keno igha, “Motakaataamboka keera Amaandeko Amahörëëru ghakoghamba.” Nkoghamba ndë igho, okore ömöntö mö-bhëënyu muyö, atakaibhaakera murikyaye na okomosera. ⁷Bhoono uwe n-nawë yaakokora obhe uwa heene okokera abhandë? N-kë onakyo keno otaahaanwa na Waryobha? Nyoore waahaanwa, n-kwakë ukwibhaaka kya ono otaahaanwa?

⁸Bhoono ghonswe igho ghano mukutuna, mmoonagho! Mwameha! Mwabhaayë abhakama, bhëëtö totaamo. Nyakara mbe ekaabhaayë maheene igha, m-bakama mörë, okore na bhëëtö bhonswe totonge hamwë na bhëënyu! ⁹Kasi ndamanya bhëëtö abhatomwa, Waryobha yaatokora abhantö abha okoserwa okokera bhonswe igho. Twabha kya abhantö bhano bhaabhotorrwa ikiina igha bhaitwe. Nkoghamba ndë igho, ko bhoora twabha abhantö abha okosekerrwa ko-kebhara kyonswe igho, ko-bhamaraika na ko-bhantö. ¹⁰Abhantö bharatomaaha igha m-bakangi törë, ko okoghera iya okokorra emeremo Yëësu Kiristo, kasi bhëënyu moraikora igha m-bangʼaini mörë, ko okoghera iya Yëësu Kiristo. Bhëëtö m-batëntëëru törë, kasi bhëënyu moraikora igha, mmoona singuru, bhëënyu mmoona emerengaari, kasi bhëëtö nkoserwa törë. ¹¹Kora bhoono, ntoona umweko na inyonta, twaghoterwa singibho, toratemwa sinkundi, nkoghendaghenda törë igho, tetoona ahasë aha okomenya hë. ¹²Nkunyanka törë ukwikorra emeremo na amabhoko aghëëtö abheene. Hano twatokwa, nkongʼoora törë. Hano twateeswa, nköghömërrya törë. ¹³Hano bhatohanga engʼana, nkobhahonshora törë bhuuya. Kora bhoono twakorwa kya amatokoore agha ko-kebhara kono, twabha kya abhantö bhano bhataana ubhwera okokera ëbhëntö bhyonswe igho.

¹⁴Tinkwandeka amangʼana ghano okore mbasöökërri hë, kasi nkobhakaania ndë kya hano nkokaania abhaana abhaane abhaghonshe. ¹⁵Mokaabha na abhëëghya ëbhëkwë ikömi, abha ököbhëëghya amangʼana agha Yëësu Kiristo, kasi bhasuwëënyu, te-bhaaru hë. Kasi suwëënyu ko amangʼana agha Yëësu Kiristo nö-öni, ko bhoora nö-öni naabharaarëkëëyë Amangʼana Amaiya. ¹⁶Mbe, ndabhasaasaama mokorenga bhono öni nkokora. ¹⁷Ku bhuyö ntömirë Timoteo, omoona uwaane omoghonshe ku umukumo ghono tokosanga nawe, m-möntö uwa heene ko-meremo ighya Omonene. Uyö we araabhahiitöki amangʼana aghaane kya bhono nkosoorana Yëësu Kiristo. Naraabhatëëbhi kya bhono nkwëghya kera ahasë mo-makanisa ghonswe igho.

¹⁸Ndaighwa igha mö-bhëënyu muyö bhaamo bhano bhakwihasha bharakanya igha tiniishe kö-bhëënyu iyö hë. ¹⁹Kasi hano Omonene araahanshe, m-böngö ndaashe kö-bhëënyu iyö. Hayö ho ndemanya ta-mangʼana aghaabho agha ukwihasha agheene igho, kasi nendemanya kora na obhotoro ubhwabho bhwonswe kya igho bhörë. ²⁰Nkoghamba ndë igho, ko bhoora Obhokama ubhwa Waryobha, tebhokobha ko amangʼana agheene igho hë, kasi nko-bhotoro. ²¹Bhoono iyakë mukutuna? Niishe na inyimbo? Kasi ni-igha niishe na righonshe bhohaabhu igho?

Obhosooraare tibhukutunwa mo-kanisa hë

¹M-boheene, amangʼana ghaatohekeera igha, obhosooraare bhörëngë mö-bhëënyu muyö. Obhosooraare bhuyö, m-bono bhotakaamaahekaini kora ko-bhantö bhano bhatamanyirë Waryobha. Obhosooraare ubhwa ömöntö okotaara na mokaa suwaabho. ²Bhëënyu moraihashera engʼana iyö. Nyakara mokaabhaabhayëëyë na mughire ömöntö uyö yaakora ghayö, arwe mö-bhëënyu muyö. ³Nokaanyoora ndëngë hare, kasi enkoro iyaane hamwë ërë na bhëënyu. Öni naamara okomobhotorra ikiina ömöntö uyö yaakora ghayö, kya hano nkaabhaayë hamwë na bhëënyu hayö. ⁴Hano mwaikomania hamwë ku iriina irya Omonene uwëëtö Yëësu Kiristo, öni wonswe nkunyoora örë enkoro iyaane n-hamwë ërë na bhëënyu. Kora na obhotoro ubhwa Yëësu Kiristo bhwonswe, nkunyoora örë hamwë bhörë na bhëënyu. ⁵Ni-igha mohaane Oghosambwa5:5a Oghosambwa. Maaha mo-faharaasa. ömöntö uyö, okore esemoko iyaaye iya öbhököri ubhwa ëbhëbhë, isikibhwi,5:5b Esemoko iyaaye iya öbhököri ubhwa ëbhëbhë, isikibhwi. Ensonga iyaamo iyëndë ni-igha, ömöbhërë ghusikibhwi. kasi enkoro iyaaye ëtööribhwi urusikö urwa ukukyora ukwa Omonene Yëësu Kiristo.

⁶Ikiheemere ikyënyu tekeena ubhwera hë. Temomanyirë igha ehamiira enke igho, nkötöndörya ërë ekerengo kyonswe igho ikya obhose? ⁷Ku bhuyö mwisaabhuure, ku ukuruusya ömöntö omoghogho uyö mö-bhëënyu, kya hano ömöntö yaruusya-mo ehamiira iya kare. Hayö bhoono ho moraabhe ekerengo ekehya, kya bhono motaarenga-mo na ehamiira iya kare. Ko bhoora Waryobha yaakörrë Yëësu Kiristo akabha Omoona Ringʼöndi uwa Epasaka5:7 Omoona Ringʼöndi uwa Epasaka. Maaha mo-ketabho ikya Ukurishoka 12:21-23. Maaha mo-faharaasa Omoona Ringʼöndi na Epasaka. iyëëtö, yaamara ukuruusibhwa akabha ikimwenso ko okoghera iya bhëëtö. ⁸Mbe, totakaakora inyangi iya Epasaka na eno ehamiira iya kare eemo, ensonga yaamo ni-igha, obhoghogho na ëbhëbhë. Kasi tobhenga torakora inyangi ko emekaate gheno ghetakotoorwa-mo ehamiira, ghayö, n-senkoro sendabhu bheena obhoheene.

⁹Naabhandekera mu-ritashandighi iryane igha, motakaaghootana hamwë na abhasooraare. ¹⁰Tenkoghamba igha motakaaghootana na abhasooraare abha ko-kebhara kono, handë abhahiti, handë abhasaki, handë abhasëngëri abha ëbhëtöndö. Mbe, hayö nekaabhaayë igha, murwe ko-kebhara kono. ¹¹Kasi naabhandëkëëyë igha, motakaaghootana na ömöntö ono okobherekerwa igha umukumya murikyënyu, hano oraanyoore m-mosooraare, umuhiti, handë ömösëngërri uwa ëbhëtöndö, handë ömötöki, handë ömörëëbhi, handë omosaki. Ömöntö kya uyö, motakaasanga nawe kora ibhyakorya.

¹²Bhoono m-moremo ughwane okobhotorra ikiina abhantö bhano bharëngë kebhara? Te-meremo ighyënyu okobhotorra ikiina bhayö moonabho muyö? ¹³Bhayö bharëngë kebhara, Waryobha umwene we arebhabhotorra ikiina. Kasi bhëënyu mobhotorre ikiina abhantö bhano bharëngë mo-kanisa, kya bhono Amaandeko Amahörëëru ghakoghamba igha, “Muruusi ömöntö omoghogho uyö arëngë mö-bhëënyu muyö.”5:13 Maaha mo-ketabho ikya Eheetoko iya Etoraati 17:7, 19:19, 22:21, 22:24.

Ukushongerana ukwa abhakumya

¹Hano ömöntö mö-bhëënyu muyö yaabha na engʼana na umukumya murikyaye, n-kwakë ahire ikiina ikyaye kiyö ko-bhantö bhano bhatarë abhakumya? N-kwakë atakuhira ikiina kiyö ko-bhahörëëru abha Waryobha? ²Kasi motamanyirë igha abhahörëëru abha Waryobha mbo bharebhotorra ikiina ekebhara keno? Mbe, hano okomaaha igha m-bëënyu morebhotorra ekebhara keno ikiina, n-kwakë motakomara abheene ibhiina ibhyënyu ebheke bhiyö? ³Temomanyirë igha morebhotorra ikiina abhamaraika? Ku bhuyö ni-igha momarenga amangʼana aghëënyu bhëënyu abheene. ⁴Mbe, hano mwanga ukwighwerrana, n-kwakë mukuhira ibhiina ibhyënyu ko-bhantö bhano bhatarëngë abha ekanisa igha bhabhaahokani, kora tebhakosookwa na ekanisa hë? ⁵Nengambirë igho, okore mbasöökërri. Nköbhöörya ndë igha, mö-bhëënyu muyö, taamo ömöntö uwa obhongʼaini kora ömwë hë, ono akotora ukwahokania amangʼana agha ibhiina ibhya abhakumya bharikyaye hë? ⁶N-kwakë motakwahokania ibhiina ibhyënyu abheene? Nkoroghoora ndë igha nkughya mörë ukushongerana ko-bhantö bhano bhatakukumya Waryobha!

⁷Ukushongerana kuyö nkwörökya körë igha, mwakerwa këmwë. Kasi temokomaaha igha, nyakara utighe ömöntö akokorre obhoghogho, handë akuruusi ëbhëntö ibhyaho? ⁸Kasi bhoono bhëënyu, mbo mokokorra obhoghogho na ukuruusya abhantö ëbhëntö ibhyabho, moraruusya kora abhakumya bharikyënyu. ⁹Kasi, motamanyirë igha abhaköri abha amangʼana amaghogho, tebharerya umwandö ughwa Obhokama ubhwa Waryobha hë? Motakaingʼaina, abhasooraare, handë bhano bhakosengerra ëbhëtöndö, abha sintwara, abhashaasha bhano bhakuturamya abhashaasha bharikyabho, ¹⁰abhaibhi, abha oronamba, abharëëbhi, abha amatöki, na abhasaki, tebharerya umwandö ughwa Obhokama ubhwa Waryobha hë. ¹¹Abhandë mö-bhëënyu muyö, ni-igho mwaarë. Kasi bhoono mwoghibhwa obhoghogho ubhwënyu, mwahorwa, mokakorwa abha heene okohetera ku iriina irya Omonene uwëëtö Yëësu Kiristo, na ku-Mwika uwa Waryobha uwëëtö.

Abhakumya bhatakaakora obhosooraare

¹²Abhantö abhandë bharaghamba igha, “Ëbhëntö bhyonswe igho m-buuya bhërë ku-öni,” kasi öni ndaghamba igha, te-bhyonswe igho bheena ehoorohooro hë. Ghwiki nkoghamba bharë igha, “Ëbhëntö bhyonswe igho m-buuya bhërë ku-öni,” kasi öni tentore okobha omoghorwa uwa ëkëntö kyokyonswe igho hë. ¹³Abhantö abhandë bharaghamba igha, enda n-ko okoghera iya ibhyakorya, na ibhyakorya n-ko okoghera iya enda.6:13 Enda n-ko okoghera iya ibhyakorya, na ibhyakorya n-ko okoghera iya enda. Ensonga iya amangʼana ghayö ni-igha, Abhakörintö bhaaghambanga igha, okokora obhosooraare, te-ngʼana ngogho hë. Kasi bhyonswe igho bhibhërë bhiyö, enda na ibhyakorya, Waryobha naribhiruusya-ho. Kasi ömöbhërë te-ko okoghera iya obhosooraare hë, kasi n-ko okoghera iya Omonene uwëëtö, na Omonene n-ko okoghera iya ömöbhërë. ¹⁴Waryobha narituryökya ko obhotoro ubhwaye kya bhono yaaryökëri Omonene Yëësu Kiristo ukurwa mo-bhaku.

¹⁵Kasi temomanyirë igha ëmëbhërë ighyënyu, ni-myaho ighya Yëësu Kiristo? Mbe, bhoono ngeghe imyaho ighya Yëësu Kiristo ngekore ghebhe imyaho ighya omosooraare? A a, ti-igho hë! ¹⁶Temomanyirë igha ömöntö wowonswe igho ono yaghootana na omosooraare, yaabha ömöbhërë öghömwë nawe? N-kya bhono yandëkirwë mo-Maandeko Amahörëëru igha, “Abhabhërë bhayö, nkobha bharë kya ömöbhërë öghömwë.”6:16 Maaha mo-ketabho ikya Okosemoka 2:24.¹⁷Kasi ömöntö ono yaghootana na Omonene, uyö nkobha arë enkoro ëmwë nawe.

¹⁸Ku bhuyö ni-igha mongʼose obhosooraare. Ëbhëbhë ibhyëndë bhyonswe igho bheno ömöntö akokora, n-kebhara iya ömöbhërë ughwaye bhërë, kasi ömöntö ono akokora obhosooraare, uyö nö-möbhërë ughwaye umwene akokorra obhosarya. ¹⁹Kasi, temomanyirë igha, ëmëbhërë ighyënyu ngyo inyumba iya Waryobha, mono amënyirë Umwika Ömöhörëëru ono mwaahaanwa na Waryobha? Tëghërëngë ighyënyu hë, ²⁰ko bhoora mmwaghörrwë öbhöghöri obhonene. Ku bhuyö ni-igha mötööninga Waryobha okohetera kö-mëbhërë ighyënyu ghiyö.

Amaraghërryö agha öbhötëti

¹Mbe, bhoono ko mangʼana ghano mwaanyandëkëëyë igha, “Nyakara umushaasha atakaakunia omokari.”7:1 Umushaasha atakaakunia omokari. Ensonga iyaamo iyëndë ni-igha, m-buuya ömöntö atakaateta.²Kasi ko okoghera iya ukwibhasha obhosooraare, ni-igha kera umushaasha abhe na mokaaye umwene igho, na kera omokari abhe na umushaasha uwaaye umwene igho. ³Umushaasha atakaima mokaaye amangʼana ghaara agha abhantö bhakörö, kora omokari wonswe bhuyöbhuyö. ⁴Omokari atakaabha na ubhwera kö-möbhërë ughwaye, kasi ateghere mushaasha uwaaye ubhwera bhuyö. Umushaasha wonswe ateghere mokaaye ubhwera ubhwa kö-möbhërë ughwaye. ⁵Ömöntö atakaima murikyaye ko amangʼana agha abhantö bhakörö ghaara, kasi n-hano oraanyoore mwikererraini kwa ibhagha ike igho, okore mobhe na umweya ughwa okosaasaama. Hano mokomara, mukyorrane, okore Oghosambwa ghotakaabhashaasha.

⁶Amangʼana ghayö ngambirë, ti-igha m-mughiro, kasi n-ko bhono öni umwene nkomaaha. ⁷Nenkaashömëëywë hano abhantö bhonswe igho bhakaabhaayë kya bhono ndëngë, kasi kera ömöntö, naana ituho iyaaye umwene, ukurwa ku-Waryobha, ömwë ituho eno, na uwöndë iyëndë.

⁸Bhano bhataraateta, na abhasinö, ndabhatëëbhya igha, nyakara bhaikare ighoigho kya öni. ⁹Kasi hano bharaakerwe ököghömërrya, bhatete, nyakara ömöntö otete, otakaasekaana oronamba urwa ömöbhërë.

¹⁰Kasi bhano bhaamara okotetana, ndabharaghërrya, kasi tö-öni hë, Omonene we akobharaghërrya igha, omokari atakaatighana na mushaasha uwaaye.7:10 Maaha mo-ketabho ikya Mataayo 5:32; Maariko 10:9, 10:12.¹¹Kasi nyoore natighana nawe, ni-igha atakaatetwa ghwiki, handë aighwerrane na mushaasha uwaaye. Ghwiki ni-igha, umushaasha wonswe atakaatigha mokaaye.

¹²Mbe, abhantö abhandë to-Monene akobhatëëbhya hë, kasi nö-öni. Ndabhatëëbhya igha, hano oraanyoore umushaasha umukumya ono aana omokari ono atarë umukumya, na omokari uyö araikërrya ököghëndërrya okobha nawe, atakaamutigha. ¹³Kora omokari umukumya wonswe, ono aana mushaasha ono atarë umukumya, na umushaasha uyö araikërrya okobha nawe, atakaamutigha. ¹⁴Nkoghamba ndë igho, ko bhoora umushaasha ono atarë umukumya, nkosaabhuurwa arë okohetera ko mokaaye. Kora omokari ono atarë umukumya, wonswe nkosaabhuurwa arë okohetera ku-mushaasha uwaaye. Hano etakaabhaayë igho, abhaana abhëënyu mbakaanyankuhirë. Kasi bhoono m-bahörëëru abha Waryobha.

¹⁵Kasi ono atarë umukumya hano araatanore, mutighe aghende. Hayö bhoono umushaasha handë omokari umukumya uyö, takorebherrwa na umughiro ughwa bhano bhaatetana. Kasi momanye igha, Waryobha yaatobherekera okore tobhe na omorembe. ¹⁶Ko bhoora ni-igha, uwe omokari umukumya, okaamanya igha oratora ökötöörya mushaasha uwaaho? Handë uwe umushaasha umukumya, okaamanya igha oratora ökötöörya mokaaho?

Mobhe kya bhono mwaarë hano Waryobha yaabhabhërëkëëyë

¹⁷Kera ömöntö amenye ko okorengʼaana na ësëëmyö iya Omonene, aghëndërri okobha kya bhono yaarë hano Waryobha yaamöbhërëkëëyë. Amangʼana ghayö, ngo nkoraghërrya ko-makanisa ghonswe igho. ¹⁸Nyoore aaho ömöntö nyabhorebhe, ono yaabhërëkëëywë na Waryobha amarrë okosaarwa, atighare bhuyöbhuyö. Nyoore aaho ömöntö nyabhorebhe ono yaabhërëkëëywë mo-bhano bhatakosaarwa, atighare bhuyöbhuyö. ¹⁹Okosaarwa handë ukwanga okosaarwa te-ngʼana hë. Kasi ekenene, no-koghoota amaraghërryö agha Waryobha.

²⁰Bhoono ni-igha, kera ömöntö atighare kya bhono yaarenga enkaagha eno Waryobha yaamöbhërëkëëyë. ²¹Nyoore wabhërëkëëywë enkaagha eno waarë omoghorwa, otakaighwa bhoghogho, kasi hano oraanyoore umweya ughwa okobha ömötöönööni, kora igho. ²²Ko bhoora ömöntö ono yaabherekerwa arëngë omoghorwa, m-mötöönööni ko-Monene. Ni-ighoigho kora na ono yaabherekerwa arëngë ömötöönööni, m-moghorwa uwa Kiristo. ²³Waryobha yaabhatungurya kö öbhöghöri obhonene, ku bhuyö, motakaabha abhaghorwa abha abhantö. ²⁴Abhakumya bharikyane, kera ömöntö ku-Waryobha, abhe kya bhono yaarë enkaagha eno yaabhërëkëëywë.

Amaraghërryö ko abhasinö na ko bhano bhataraatetwa

²⁵Bhoono ko amangʼana agha abhahara bhano bhataraatetwa,7:25 Abhahara bhano bhataraatetwa. Ensonga iyaamo iyëndë ni-igha, bhano bhataraateta handë okotetwa. teneena engʼana iya Omonene iya okobharaghërrya. Kasi nkobharaghërrya ndë bhono öni nkomaaha, ko bhoora ko okoghera iya ikyabhera ikya Omonene, m-möntö uwa heene ndë. ²⁶Mbe, nkomaaha ndë igha, engʼana eno ni-nshiiya ko okorengʼaana na inyanko eno eeho, ni-igha, ömöntö abhe kya bhuyö arë. ²⁷Nyoore waateta, otakaatigha mokaaho. Nyoore otaraateta, otakaateta. ²⁸Kasi nyoore noteta, tunyoore osarri hë. Na omohara wonswe nyoore natetwa, tunyoore asarri hë. Kasi, bhano bhaatetana mbaraanyoore inyanko ko-kebhara kono. Keno nkutuna ni-igha motakaanyoora inyanko iyö.

²⁹Abhakumya bharikyane, nkoghamba ndë igha, ribhagha reno ritighaayë ni-ike igho. Ukurwa bhoono igho, bhano bhaateta, bhabhe kya bhano bhataateta. ³⁰Abhantö bhano bhakukuura, bhabhe kya bhano bhatakukuura, bhano bhakushomerwa bhabhe kya bhano bhatakushomerwa, na bhano bhakoghora ëbhëntö, bhabhe kya bhano bhataana ëkëntö. ³¹Abhantö bhano bhakutighinkanera ëbhëntö ibhya ko-kebhara keno, bhabhe kya bhano bhatakutighinkana. Ko bhoora ekebhara keno m-manshë mahëti.

³²Keno nkutuna ni-igha, motakaanyankibhwanga na amangʼana ghayö. Mmomanyirë igha ömöntö ono atatëtirë, amangʼana agha Omonene ngo akutighinkanera, okore atëghëri Omonene. ³³Kasi ömöntö ono atëtirë, amangʼana agha ko-kebhara kono, ngo akutighinkanera, okore atëghëri mokaaye. ³⁴Ku bhuyö amangʼana aghaaye n-ga mbagha ibhërë. Omohara ono ataraatetwa, handë omokari ono ataraatetwa, we nkutighinkanera arë amangʼana agha Omonene, okore abhe ömöhörëëru uwa enkoro na ömöbhërë. Kasi omokari ono yaatetwa, umwene nkutighinkanera arë amangʼana agha ko-kebhara kono, okore atëghëri mushaasha uwaaye. ³⁵Nkoghamba ndë amangʼana ghayö, okore mobhe na ehoorohooro, tërëngë igha nkobhatimbya ndë hë. Kasi keno nkutuna ni-igha mwikarane bhwaheene, mutighinkanerenga Omonene bhuuya, motaköngʼënërribhwa na ëkëntö.

³⁶Ömöntö wowonswe igho ono akomaaha igha ti-bhuuya ukwanga okoteta omohara ono aghambëëyë öbhökwë, kora ömöbhërë ughwaye nkomokera ghörë ukwirebherra,7:36 Kora ömöbhërë ughwaye nkomokera ghörë ukwirebherra. Ensonga iyaamo iyëndë ni-igha, kora nokaanyoora imyoka ighyaye ighya okotetwa ghyaheta. aramaaha igha m-buuya atete, mbe, akore kya bhono akutuna, okore bhatetane. Hayö të-këbhë ukunyoora akörrë hë. ³⁷Hano ömöntö umwene araamaahe igha, taatëtë omohara uyö hë, airebherre bhuuya umwene, amarrë okomaaha igha tekeeho ëkëntö ikya ukumusingʼirrya okoteta, hayö m-buuya oraanyoore akörrë ku ukwanga okoteta omohara uyö. ³⁸Ku bhuyö, ono araatete omohara uyö, m-buuya oraanyoore akörrë, kasi ono araange okoteta omohara uyö, m-buuya bhököngʼu ukunyoora akörrë.7:36-38 Ensonga iyëndë iya senkarra siyö ni-igha, Ömöntö wowonswe igho ono akomaaha igha ti-bhuuya ukwanga umwisëkë uwaaye ono aghambëëywë öbhökwë atakaatetwa, kora imyoka ighyaye ighya okotetwa ghyamara okoheta, na ömöntö uyö aramaaha igha m-buuya umwisëkë uyö atetwe, akore bhono akutuna okore umwisëkë uyö atetwe. Hayö të-këbhë oraanyoore akörrë hë. Na hano oraanyoore ömöntö aikërëëyi mo-motwe ughwaye umwene igha takutuna mwisëkë uwaaye atetwe hë, na teeho engʼana eno ekomobhandërrya igha atetwe, kora nkotora arë okorebherra righonshe iryaye, hayö m-buuya oraanyoore akörrë. Ku bhuyö ömöntö ono akutuna mwisëkë uwaaye ono aghambëëywë öbhökwë igha atetwe, uyö m-buuya oraanyoore akörrë. Na ono atakutuna igha umwisëkë uwaaye atakaatetwa, uyö m-buuya bhököngʼu ukunyoora akörrë.

³⁹Omokari ono atëtirwë, nabhöhirwë na amaraghërryö agha öbhötëti, ko-nkaagha yonswe igho, eno ukunyoora mushaasha uwaaye ataraakwa. Kasi hano mushaasha uwaaye araakwe, hayö nkobha arë ömötöönööni, aratora okotetwa na ömöntö wowonswe igho, ono akutuna, kasi ömötëti uyö, abhe Umukiristo. ⁴⁰Kasi nyakara umusinö uyö aikare igho atatëtirwë. Ghayö na-maitegherro aghaane, ndamanya öni wonswe nu-Mwika uwa Waryobha we akontangata ngambe amangʼana ghayö.

Ibhyakorya bheno bhikumwenserwa ëbhëtöndö

¹Mbe, bhoono tigha nshumaashere amangʼana agha ibhyakorya bheno bhimwënsëywë ëbhëtöndö. Ntomanyirë bhono bhëënyu mokoghamba igha, “Bhëëtö bhonswe igho, ntoona obhomanyi ko amangʼana ghayö.” Kasi obhomanyi, nkoreeta bhörë ikiheemere ko-bhantö. Na righonshe ryo nkoghera rërë umukumo ughwa ömöntö ghonagha. ²Nyoore aaho ömöntö ono akokanya igha, namanyirë engʼana nyabhorebhe, amanye igha, taghemanyirë kya bhono ikutunwa igha aghemanye. ³Kasi hano ömöntö araahanshe Waryobha, uyö namanyekaini ku-Waryobha.

⁴Mbe, ko amangʼana agha okorya ibhyakorya bheno bhimwënsëywë ëbhëtöndö, ntomanyirë igha, ëbhëtöndö, tebheena engʼana ko-kebhara kono hë, na Waryobha nö-ömwë igho. ⁵Nokaanyoora bheeho ëbhëntö bheno bhekobherekerwa igha bhawaryobha, mbekaabha mu-ryobha handë ko-kebhara kono, kya bhono okomaaha igha bhawaryobha m-baaru, na bhano bhakobherekerwa igha abhanene bhonswe m-baaru, ⁶kasi kö-bhëëtö, Waryobha nö-ömwë igho, kora we Taata uwëëtö. Uyö we yaabhömbirë ëbhëntö bhyonswe igho. Kora öbhöhöru ubhwëtö ntonabho okore tutighinkanerenga Waryobha. Kora aaho Omonene ömwë igho, uyö we Yëësu Kiristo, ëbhëntö bhyonswe igho mbyaabhömbirwë okohetera ku-uyö, na öbhöhöru ubhwëtö nku-uyö bhokohetera.

⁷Te-bhantö bhonswe igho bhamanyirë amangʼana ghayö hë, ko bhoora bhaaho abhandë bhano bhaanara amangʼana agha ëbhëtöndö. Abhantö bhayö kora bhoono igho hano bhaarya ibhyakorya bheno bhimwënsëywë ëbhëtöndö, nkorya bharë bhaana amaitegherro agha ikimwenso ikya ëbhëtöndö, nkunyankuha bharë, ko bhoora amaitegherro aghaabho m-matëntëëru. ⁸Ibhyakorya tëbhëkötöörrya ömöntö okobha haangʼë na Waryobha. Ntokatigha okorya, titukusuuhwa na ëkëntö hë, kora ntokaarya, titukunyoora ehoorohooro yoyonswe igho hë.

⁹Kasi mwiyangarre bhuuya, obhomanyi ubhwënyu bhotakaatimba bhanyamukumo mötëntëëru. ¹⁰Ko bhoora hano nyamukumo mötëntëëru araamaahe wikaayë mu-risengerro irya ëbhëtöndö orarya, bhoono taitegherre mo-maitegherro aghaaye igha naingʼarëëyi okorya ibhyakorya bheno bhimwënsëywë ëbhëtöndö? ¹¹Maaha mbe, umukumya murikyaho uyö, nyamukumo mötëntëëru ono Yëësu Kiristo yaakwërëëyë, nasira ko okoghera iya obhomanyi ubhwaho bhuyö.

¹²Ku bhuyö hano mwasarrya abhakumya bharikyënyu na ukunyahaara amaitegherro aghaabho amatëntëëru, hayö n-Yëësu Kiristo we ukunyoora mosarëëyi. ¹³Ku bhuyö, hano ibhyakorya bheraaghere umukumya murikyane aitimbe, obhoheene tenderya inyama ghwiki hë, okore ntakaaghera umukumya murikyane aitimbe.

Ehoorohooro eno abhatomwa bhaingʼarëëyë ukunyoora

¹Kanaa, nkokanya mörë igha tëndëngë mötöönööni hë? Tëndëngë omotomwa hë? Tenaamaaha Omonene uwëëtö Yëësu Kiristo hë? Emeremo gheno naakörrë, të-ghyö ghyaaghërrë mokakumya Omonene uwëëtö? ²Nokaanyoora igha, tëndëngë omotomwa ko abhandë hë, kasi kö-bhëënyu, m-motomwa ndë, ko bhoora bhëënyu mbo ekemanyërryö ikya ukwörökya igha, öni no-motomwa uwa Omonene ndë.

³Riyö ndyo rihonshoro iryane ko bhano bhakunyeera senkaani emeremo ighyane ighya obhotomwa. ⁴Kanaa, ntotaana obhotoro ubhwa okorya na ukunywa? ⁵Ntotaana ubhwera ubhwa ukughya na abhakari abhakumya ko-roghendo urwëtö, kya bhono bhakokora abhatomwa abhandë, hamwë na bhamura bhaabho Omonene uwëëtö Yëësu Kiristo bhaana Keefa? ⁶Kasi nö-öni na Bharinaabha abheene igho, mbo twingʼarëëyë ukwikorra emeremo ko okoghera iya obhohabhë ubhwëtö? ⁷M-musirikare kë ono akwironerra umwene ukughya ku-riihë, na ehoorohooro iyaaye umwene? M-mörëmi kë ono akwëmya emezabhibhu, aanga okorya sehagho isyaghyo? Handë m-monaghya kë uwa situgho ono akwanga ukunywa amabheere agha situgho siyö?

⁸Kasi nkokanya mörë igha, m-mangʼana agha kinyabhantö nkoghamba? Nda ni-igho amaraghërryö agha Mosa ghakoghamba? ⁹Amaraghërryö agha Mosa gharaghamba igha, “Otakaabhoha engʼombe umunywa, hano yakohoorra engano.”9:9 Maaha mo-ketabho ikya Eheetoko iya Etoraati 25:4. Nkokanya mörë igha, hayö Waryobha na-mangʼana agha sengʼombe akushumaashera? ¹⁰Kasi m-bëëtö akushumaashera? Ni-igho ërë! Amaandeko ghayö, ngaandëkirwë ko okoghera iya bhëëtö! Ko bhoora ono akorema, nkorema arë aana ubhweseghe igha, naraaghese. Na ono akohoora wonswe, naana ubhweseghe ubhwa ukunyoora ikitweno ikyaye. ¹¹Hano twaabharaarëkëëyë amangʼana agha Yëësu Kiristo, ntwaarë kya bhano twaabhusuranga. Bhoono m-boghogho kë, hano toraanyoore ëbhëntö ukurwa kö-bhëënyu ibhya ökötötöörrya obhohabhë ubhwëtö, kya bhano tokoghesa? ¹²Hano okomaaha abhandë mbaingʼarëëyë okohaanwa ëbhëntö ukurwa kö-bhëënyu, bhoono bhëëtö bho titwingʼarëëyi bhököngʼu okohaanwa ëbhëntö bhiyö okokera bhayö?

Kasi tetwasabha ëbhëntö bheno twingʼarëëyi ukunyoora, nköghömërrya törë amangʼana ghonswe igho, okore totakaarebherra abhantö ukukumya Amangʼana Amaiya agha Yëësu Kiristo. ¹³Kasi, motamanyirë igha, bhano bhakokora emeremo mu-risengerro irya Waryobha,9:13 Mu-risengerro irya Waryobha. Maaha mo-faharaasa engʼana, Risengerro irya Waryobha. ibhyakorya ibhyabho mu-risengerro muyö bhikurwa? Kora bhano bhakumwensa, ikitweno ikyabho nku-kimwenso kuyö kikurwa? ¹⁴Kora Omonene ni-ighoigho yaaraghërrya igha, bhano bhakoraareka Amangʼana Amaiya, bharaagherenga okohetera ko-meremo ghiyö.

¹⁵Kasi öni, tenaakakörrë igho hë. Kora tërëngë igha nkwandeka ndë igho, okore mongʼaane, ti-igho hë. Ko bhoora nyakara nkwe, kasi ömöntö wowonswe igho, atakaasha ukunduusirya-ho ukwikumya ukwane kono. ¹⁶Ko bhoora nokaanyoora nkoraareka ndë Amangʼana Amaiya, teneena ikiheemere hë, ko bhoora ni-igha ndaareke. Hano ndaange okoraareka Amangʼana Amaiya ghayö, haahö. ¹⁷Hano ndaakore emeremo ghiyö ko okohansha ukwane öni umwene, nendaatuhwe. Kasi hano oraanyoore igha te-ko okohansha ukwane hë, mmanye igha naakumibhwa, nkahaanwa ubhwimërërri. ¹⁸Bhoono ituho iyaane në-ëëhë? Ituho iyaane no-koraareka Amangʼana Amaiya bhosa igho, ntakosabha keno ningʼarëëyë okohaanwa.

Amangʼana ghano abhatomwa bhakutunwa igha bhakore

¹⁹Öni tëndëngë omoghorwa uwa ömöntö wowonswe igho hë, m-mötöönööni ndë. Kasi naikërrya okobha omoghorwa uwa abhantö bhonswe igho, okore ntöörri abhantö abhaaru bhakumi Kiristo. ²⁰Ko-Bhayahudi, m-Muyahudi naarë, okore ntöörri Abhayahudi bhakumi Yëësu Kiristo. Ko abhaghööti abha amaraghërryö, öni wonswe nkabha kya ömöghööti uwa amaraghërryö, nokaanyoora öni umwene tëmöghööti uwa amaraghërryö ndë hë. Naakörrë igho, okore ntöörri abhaghööti abha amaraghërryö, bhakumi Yëësu Kiristo. ²¹Ko bhano bhataana amaraghërryö agha Mosa, nkabha kya ono ntaana amaraghërryö, okore mbatöörri bhakumi Yëësu Kiristo. Ti-igha teneena amaraghërryö ukurwa ku-Waryobha, kasi neena amaraghërryö agha ukurwa ku-Yëësu Kiristo. Naakörrë igho okore ntöörri bhano bhataana amaraghërryö. ²²Ko bhanyamukumo mötëntëëru, nkabha kya ono neena umukumo mötëntëëru, okore mbatöörri. Naakora ghayö ghonswe igho, ko-bhantö bhonswe igho, okore kwa nshera yoyonswe eera, ntööri abhandë mo-bhantö bhayö. ²³Nkokora ndë amangʼana ghayö ghonswe igho, ko okoghera iya Amangʼana Amaiya, okore nsange na abhandë obhongʼoore ubhwa Amangʼana Amaiya ghayö.

²⁴Temomanyirë igha abhantö bhano bhakohambana rikenya, nkokenya bharë bhonswe igho, kasi ono akokera, we umwene igho akutuhwa? Bhoono, mokenye bhököngʼu, okore mutuhwe. ²⁵Ömöntö ono akutuna abhe embaahi ko-mehooyo, nkwirebherra arë amangʼana ghonswe igho. Mbe, bhayö nkokora bharë igho, okore bhanyoore ikirighi keno kekomara kesareka, kasi bhëëtö ntoraanyoore ikirighi keno ketakosareka röndë.²⁶Ku bhuyö öni tenkokenya kya ömöntö ono akokenya bhosa igho, atamanyirë keno akokenyera. Ghwiki tinkwitana kya ömöntö ono akorekera sinkundi bhosa igho. ²⁷Kasi nö-möbhërë ughwane nkunyankya, kora ndairebherra, okore ntakaasha okomara okoraarekera abhandë, öni umwene nangwe.

Motakaasengerra ëbhëtöndö

¹Abhakumya bharikyane, nkutuna ndë momanye igha, abhakörö abhëëtö bhonswe igho, mbaatangatwanga na risaarö,10:1 Maaha mo-ketabho ikya Ukurishoka 13:21-22. bhakaheta bhonswe igho mu-nyansha ghatë, ²bhakabhatiisibhwa bhonswe igho ko nshera iya risaarö na inyansha, bhabhe abha Mosa.10:2 Maaha mo-ketabho ikya Ukurishoka 14:22-29.³Bhonswe igho bhakarya ibhyakorya, bheno bhyaaruurë mu-ryobha.10:3 Maaha mo-ketabho ikya Ukurishoka 16:35.⁴Ghwiki bhonswe igho bhakanywa amanshë ghaaraghaara, ghano ghaaruurë ku-Waryobha. Ko bhoora amanshë ghano bhaanyööyë, n-gano ghaarwanga ku-ritare10:4 Maaha mo-ketabho ikya Ukurishoka 17:1-7; Okobhara 20:2-11. reno ryaabhasoorananga. Ritare riyö, n-Kiristo yaarë. ⁵Kasi abhantö abhaaru mo-bhayö, Waryobha tiyaatëghëriibhwi nabho hë, ku bhuyö akabhasikya ku-riköngö.

⁶Mbe, amangʼana ghayö, ghaabha ëkërëngyö kö-bhëëtö, okore totakaabha na oronamba urwa ukwighomba amangʼana amaghogho kya bhono bho bhaaighömbirë. ⁷Motakaasengerra ëbhëtöndö kya bhono abhandë bhaakörrë. Amaandeko Amahörëëru ko engʼana iyö gharaghamba igha, “Abhantö mbaaikaayë bhakarya na ukunywa, hano bhakomara, bhakaimoka, bhakabhina.”10:7 Maaha mo-ketabho ikya Ukurishoka 32:6.⁸Motakaakora obhosooraare, kya bhono abhandë mo-bhayö bhaakörrë, ekaghera abhantö ëbhëkwë merongo ëbhërë na bhatatö bhakasikibhwa ku-rusikö örömwë.10:8 Maaha mo-ketabho ikya Okobhara 25:1-9.⁹Motakaashaasha Omonene10:9a Omonene. Ibhibhuria isyëndë seraghamba, Waryobha. uwëëtö Yëësu Kiristo, kya bhono abhandë mo-bhayö bhaakörrë, ekaghera bhakaromwa na sinshoka, bhakakwa.10:9b Maaha mo-ketabho ikya Okobhara 21:5-6.¹⁰Motakaibhëmbëërya kya bhono abhandë mo-bhayö bhaaibhëmbëërri, ekaghera bhakasikibhwa na umusikya.10:10 Maaha mo-ketabho ikya Okobhara 16:41-49.

¹¹Mbe, ghayö ghonswe igho ghaabhanyöörrë, ngaandëkirwë, okore ghabhe ëbhërëngyö ibhya okotokaania, bhëëtö bhano törëngë ku-sinsikö isya umuhiko. ¹²Ku bhuyö ono akokanya igha naimërëëyë, angarre atakaaghwa. ¹³Amashaasho ghano mwaanyoora, n-kya ghano abhantö abhandë bhakunyooranga. Kasi momanye igha, Waryobha uwa heene, taatighe mushaashwe okokera obhotoro ubhwënyu. Hano mwashaashwa, Waryobha nkobhahaana arë obhotoro ubhwa ököghömërrya na enshera iya ukurwa-mo.

Ibhyakorya ibhya Omonene uwëëtöna ibhya ukumwensera ëbhëtöndö

¹⁴Ku bhuyö abhaghonshe abhaane, motakaasengerra ëbhëtöndö kora hake hë! ¹⁵Nkushumaasha ndë na abhantö bhano momanyirë amangʼana ghayö, ku bhuyö mwitaahe amangʼana ghayö ngambirë. ¹⁶Hano twakumya Waryobha ko okoghera iya ekekombe ikya obhongʼoore keera, hayö ta-maanyinga agha Yëësu Kiristo ukunyoora torasanga? Omokaate ghono tokobhotora, hayö tö-möbhërë ughwa Yëësu Kiristo ukunyoora torasanga? ¹⁷Ko bhoora omokaate n-gömwë, na bhëëtö bhano tokosanga omokaate ghuyö m-baaru törë, kasi m-möbhërë ghömwë törë.

¹⁸Momaahere ko-Bhaisiraëri. Abhantö bhano bhakorya ikimwenso, nda nkoghootana bharë na ikimwenso kiyö?10:18 Maaha mo-ketabho ikya Amangʼana agha Abharaawi 7:6-10, 7:14-15.¹⁹Bhoono n-kë nkaghamba? Ngambe igha, ibhyakorya bheno bhimwënsëywë ëbhëtöndö, mbeena ubhwera? Handë igha, ëbhëtöndö mbeena ubhwera? ²⁰Ti-igho hë. Keno nkoghamba ni-igha, ibhimwenso bheno abhantö bhano bhatamanyirë Waryobha bhakumwensa, na-masambwa bhakumwensera te-Waryobha hë. Tinkutuna mosange na Waryobha, na eno morasanga na amasambwa. ²¹Temotore okosanga ko-meeza iya Omonene uwëëtö, na eno morasanga ko-meeza iya amasambwa. ²²Kasi, ni-igha twighërri rihari irya Omonene uwëëtö? Kasi nkokanya mörë igha ntoona singuru komokera?

Tokorenga ghano gharaaghere Waryobha atöönibhwi

²³Abhantö bharaghamba igha, “Ëbhëntö bhyonswe igho, m-biiya bhiiki.” Kasi te-bhyonswe igho bheena ubhwera hë. “Ëbhëntö bhyonswe igho m-biiya bhiiki,” kasi te-bhyonswe igho bhekohaghaasha umukumo ughwa ömöntö. ²⁴Ömöntö atakaatönibhwa na ehoorohooro iyaaye umwene igho hë, kasi atönibhwi na ehoorohooro iya murikyaye.

²⁵Kera ëkëntö keno këköghöribhwa mo-moteera, moraagherenga motakaabhöörërryanga ko okoghera iya amaitegherro. ²⁶Ngambirë igho, ko bhoora Amaandeko Amahörëëru gharaghamba igha, “Ekebhara na ëbhëntö bhyonswe igho bheno bheemo, ni-ibhya Omonene.”10:26 Maaha mo-ketabho ikya Zabhuri 24:1.

²⁷Ömöntö ono atarëngë umukumya hano abharaarëkirë, na bhëënyu mwikërëëyi ukughya, moghende moraaghere kera ëkëntö keno moraareeterwe, motakaabhöörërryanga ko okoghera iya amaitegherro. ²⁸Kasi hano ömöntö araabhatëëbhi igha, “Ibhyakorya bheno bhimwënsëywë ëbhëtöndö,” motakaarya ibhyakorya bhiyö, ko okoghera iya ömöntö uyö abhatëëbhëri, na ko okoghera iya amaitegherro. ²⁹Hano naghamba amaitegherro, ta-aghaaho nkoghamba hë, kasi na-agha ömöntö uyö abhatëëbhëri. Ko bhoora igha, n-kwakë öbhötöönööni ubhwane bhobhotorrwe ikiina na amaitegherro agha ömöntö uwöndë? ³⁰Nyoore öni nkorya ndë ibhyakorya bhiyö ku ukukumya Waryobha, n-kwakë ntokwe ko okoghera iya ibhyakorya bheno ndëëyë ndakumya Waryobha?

³¹Mbe, hano mwarya handë ukunywa, handë hano mwakora kyokyonswe keera, mokorenga kwa ökötöönia Waryobha. ³²Motakaabha ikibhuno ikya ukutimba Abhayahudi, abhantö bhano bhatarë Abhayahudi, handë ekanisa iya Waryobha. ³³Mobhe kya öni bhono nkötëghërya abhantö bhonswe igho, ko amangʼana ghonswe igho ghano nkokora. Tenkokora igho ko okoghera iya ehoorohooro iyaane, kasi n-ko okoghera iya ehoorohooro iya abhantö abhaaru okore bhatööribhwi.

¹Ku bhuyö mweghe amangʼana aghaane, kya bhono öni nkwegha amangʼana agha Kiristo.

Bhono ikutunwa tokore enkaagha eno tokosaasaama

²Mbe, nkobhakumya ndë ko bhoora mukunhiita ko mangʼana ghonswe igho, kora nkoghoota mörë amangʼana ghaara, kya bhono naabhatëëbhëri. ³Kasi bhoono nkutuna ndë momanye igha, Yëësu Kiristo we omotwe11:3 Omotwe. Ensonga iyaamo ni-igha, uwa ubhwera. ughwa umushaasha, na umushaasha we omotwe ughwa mokaaye, na Waryobha we omotwe ughwa Yëësu Kiristo. ⁴Kera umushaasha hano yasaasaama Waryobha, handë hano yaghamba amangʼana agha öbhörööti, na eno akundikiiyi ëkëntö ko-motwe, uyö no-motwe ughwaye akösöökya, omotwe ughwaye ghuyö, n-Kiristo. ⁵Kasi kera omokari hano yasaasaama Waryobha, handë hano yaghamba amangʼana agha öbhörööti, atakundikiiyi ëkëntö ko-motwe, nkösöökya arë omotwe ughwaye, omotwe ughwaye ghuyö, m-mushaasha uwaaye, ko bhoora nkobha arë kya omokari ono aghingirrwë11:5 Aghingirrwë. Senkaagha siyö, në-nsöni yaarë omokari ukughingira situukya ko-motwe. situukya. ⁶Hano omokari atakundikiiyi ëkëntö ko-motwe ughwaye, aghingirwe situukya isyaye syengʼehe. Nyoore në-nsöni omokari ukughingira situukya isyaye syengʼehe, handë ukusighingira, akundikiiri ëkëntö ko-motwe ughwaye. ⁷Ti-bhuuya umushaasha akundikiiri ëkëntö ko-motwe, ko bhoora we ni-tuubho na ubhuhika ubhwa Waryobha. Kasi omokari ne-merengaari ighya mushaasha uwaaye. ⁸Nkoghamba ndë igho ko bhoora Waryobha tiyaabhömbirë umushaasha ukurwa ko-mokari hë, kasi yaabhömbirë omokari ukurwa ku-mushaasha. ⁹Kora Waryobha tiyaabhömbirë umushaasha ko okoghera iya omokari hë, kasi yaabhömbirë omokari ko okoghera iya umushaasha. ¹⁰Ko okoghera iya engʼana iyö, na ko okoghera iya abhamaraika, ni-igha omokari abhe na ëkëntö ikya ukwörökya igha, n-hansë iya ubhwera ubhwa uwöndë arë.11:10 Ukwörökya igha, n-hansë iya ubhwera ubhwa uwöndë arë. Ensonga iyaamo iyëndë ni-igha, ukwörökya ubhwera ubhwaye umwene.

¹¹Kasi kö-bhömwë ubhwëtö na Omonene, omokari nkwitengʼera arë mushaasha uwaaye, na umushaasha wonswe nkwitengʼera arë mokaaye. ¹²Mbe, kya bhoora ërëngë igha omokari yaabhömbirwë ukurwa ku-mushaasha, kora umushaasha wonswe nkwebhorwa arë na omokari. Ëbhëntö bhyonswe igho nku-Waryobha bhikurwa. ¹³Bhoono bhëënyu abheene mwitegherre igha, omokari aingʼarëëyi okosaasaama Waryobha atakundikiiyi ëkëntö ko-motwe ughwaye? ¹⁴Kana ëmëbhërë ighyene tighikwörökya igha, në-nsöni umushaasha okobha na situukya sentambë? ¹⁵Kasi omokari okobha na situukya sentambë, iyö ni-kuughë iyaaye, ko bhoora yaahaanwa situukya sentambë, okore sebhe kya ingibho iya okotoora ko-motwe. ¹⁶Kasi hano ömöntö wowonswe araatune okorya senkaani ko amangʼana ghayö, amanye igha, bhëëtö tetoona eteemo iyëndë hë, kora amakanisa agha Waryobha, teghaana eteemo iyëndë hë.

Okosooka ibhyakorya ëbhëhörëëru ibhya Omonene

¹⁷Kasi tembakumi ko amangʼana ghano ndaaraghërri, ko bhoora igha, hano mwaikomania te-ko okoghera iya amangʼana agha ehoorohooro, kasi n-ko okoghera iya amangʼana ghano ghataana ehoorohooro. ¹⁸Nkwighwa ndë igha, hano mwaikomania bhunyikanisa, temokobha na ubhwighwerrani hë. Na öni ko-kerengere nyabhorebhe, nkukumya ndë igha, ni-igho gharë. ¹⁹Ko bhoora ni-igha ukwahokana kobhe mö-bhëënyu, okore bhamanyekane bhano bhaikërribhwa na Waryobha. ²⁰Mbe, hano mwaikomania hamwë, ti-bhyakorya ibhya Omonene ukunyoora morarya hë, ²¹ko bhoora hano mwarya, kera ömöntö mö-bhëënyu muyö, nkotangata arë okorya ibhyakorya ibhyaye, takosanga na abhandë hë. Ku bhuyö, abhandë nkutighara bharë na umweko, na abhandë unyoora bhaghöötirwë na amarwa. ²²Kasi, motaana imighi ighya okorya na ukunywera-mo? Kasi nkosera mörë ekanisa iya Waryobha na ökösöökërrya bhano bhataana ëkëntö? Bhoono iyakë ndaabhatëëbhi? Mbakumi? A a! Tembakumi ko okoghera iya amangʼana ghayö hë.

²³Mbe, amëëghyö ghano naanyöörrë ukurwa ko-Monene Yëësu Kiristo, ngo naabhahaayë igha, ubhutikö bhoora yaakörëëywë inikö, yaaghëghirë omokaate, ²⁴akakumya Waryobha, akaghobhotora, akabhatëëbhya igha, “Ghono ngo ömöbhërë ughwane ghono murimwenserwa. Mobhenga morakora igho, ko okonheetoka!” ²⁵Hano bhaamarrë okorya, akaghegha ekekombe ikya idivai,11:25a Idivai. Maaha mo-faharaasa. akakora kya bhoorabhoora, akaghamba igha, “Ekekombe keno kereemererra Imuuma11:25b Imuuma. Maaha mo-faharaasa. Eehya eno Waryobha arekora okohetera ko-maanyinga aghaane. Mokorenga igho, ko okoheetoka.” ²⁶Momanye igha, hano mwarya omokaate ghono, na ukunywera mo-kekombe keno, hayö nu-ruku urwa Omonene ukunyoora moraraareka okohekera hano ariisha.

²⁷Mbe, ömöntö wowonswe igho ono akorya omokaate ghuyö handë ukunywera mo-kekombe kiyö bhono etaingʼarëëyë, uyö nkunyoora örë aikörëëyë risoro irya obhosarya ko okosera ömöbhërë na amaanyinga agha Omonene. ²⁸Kasi bhoono kera ömöntö aibhööri umwene mo-motwe ughwaye, ataraarya omokaate na ukunywera ekekombe kiyö. ²⁹Ngambirë igho, ko bhoora ömöntö ono akorya omokaate na ukunywera ekekombe kiyö, na eno atamanyirë igha, aana öbhömwë na ömöbhërë ughwa Omonene, uyö nkwitoora arë mo-kobhotorrwa ikiina na Waryobha. ³⁰Ko okoghera iya ghayö, nkyo kekoghera abhantö abhaaru mö-bhëënyu, bhaanyamooroka na abhandë m-barööyë na kora abhandë bhaakwa. ³¹Kasi hano tokaaitëghërrëëyë bhuuya amaitegherro aghëëtö, Waryobha takaatöbhötörrëëyë ikiina hë. ³²Kasi hano twashibhibhwa na Omonene, nkwörökërribhwa törë, okore Waryobha atakaasha ukutushibhya hamwë na ekebhara keno. ³³Ku bhuyö, abhakumya bharikyane, hano mwaikomania okorya, moghanyanenga. ³⁴Nyoore ömöntö aana umweko, araagherenga waaye ka, okore ukwikomania ukwënyu, kotakaabhakorerra mobhotorrwe ikiina. Mbe, hano ndiisha, nendetoora bhuuya amangʼana aghandë ghano ghatighaayë.

Imituho ighya Umwika Ömöhörëëru

¹Bhoono abhakumya bharikyane, nkutuna ndë momanye bhuuya amangʼana agha imituho gheno ghikurwa ku-Mwika Ömöhörëëru. ²Mmomanyirë igha, enkaagha eno mwaarenga motaraamanya Waryobha, mwaangʼainirwë kora mokatangatwa na amatöndö ghano kora ghatakoghamba. ³Ku bhuyö nkutuna ndë bhëënyu momanye igha, taaho ömöntö ono akotangatwa na Umwika uwa Waryobha, amare aghambe igha, “Yëësu aihiimwe.” Ghwiki ömöntö ono atakotangatwa na Umwika Ömöhörëëru uwa Waryobha, takotora okoghamba igha, “Yëësu we Omonene.”

⁴Imituho ighya Umwika Ömöhörëëru n-gya seteemo sinsharu, kasi umutwëni uwa imituho ghiyö, nu-Mwika Ömöhörëëru uyöuyö. ⁵Seeho seteemo sinsharu isya okokora emeremo, kasi Omonene ono tokokorra emeremo, nu-yöuyö. ⁶Kora emeremo ghyonswe ngeeho ighya seteemo nsharu, kasi Waryobha nö-ömwë uyöuyö, we akokora emeremo ghyonswe igho mo-bhantö bhonswe igho. ⁷Umwika Ömöhörëëru nkohonyorra arë kera ömöntö, okore abhantö bhonswe igho bhanyoore ehoorohooro. ⁸Umwika Ömöhörëëru nkohaana arë ömöntö engʼana iya obhongʼaini, uwöndë amohaana engʼana iya obhomanyi ubhwa amangʼana. ⁹Umwika Ömöhörëëru uyöuyö, nkohaana arë uwöndë ituho iya okobha na umukumo ghono ghonaghirë, kasi uwöndë amohaana ituho iya ukuhwënia abharööyë. ¹⁰Nkohaana arë uwöndë obhotoro ubhwa okokora amakono, na uwöndë öbhörööti ubhwa amangʼana ghano ghakurwa ku-Waryobha. Uwöndë obhomanyi ubhwa amangʼana igha, ghano nku-Mwika Ömöhörëëru gharuurë, handë igha nku-risambwa gharuurë. Uwöndë amohaana ituho iya okoghamba ebheghambo ebhehya. Uwöndë amohaana ituho iya okosesora ebheghambo bhiyö. ¹¹Umwika Ömöhörëëru uyöuyö, we akokora emeremo ghiyö ghyonswe igho. Nkohaana arë kera ömöntö ituho bhono akutuna.

Ömöbhërë n-gömwë kasi imyaho ighya-ko m-myaru

¹²Ömöbhërë n-gömwë, imyaho ighya-ko m-myaru. Kasi imyaho imyaru ghiyö, ngyo ghekokora ömöbhërë öghömwë ghuyö. Mbe, kya igho ömöbhërë ghörë, ni-igho ërë na kö-möbhërë ughwa Yëësu Kiristo. ¹³Nkoghamba ndë igho, ko bhoora igha, bhëëtö bhonswe igho, ntokaabha Abhayahudi handë igha Abhakyaro, ntokaabha abhaghorwa handë igha abhatöönööni, ntwaabhatiisiibhwi ku-Mwika Ömöhörëëru uyöuyö, tokanyoora Umwika Ömöhörëëru uyöuyö, okore tobhe ömöbhërë öghömwë.

¹⁴Ömöbhërë teghoona umwaho ghömwë ughwene igho hë, kasi imyaho ighya-ko m-myaru. ¹⁵Hano ököghörö koraaghambe igha, “Öni tëndëngë okobhoko hë, ku bhuyö öni te-wa kö-möbhërë ndë hë,” engʼana iyö neghera kwange okobha umwaho ughwa kö-möbhërë? ¹⁶Na hano ökötwë koraaghambe igha, “Öni tëndëngë iriiso hë, ku bhuyö öni tu-wa kö-möbhërë ndë hë,” engʼana iyö neghera kwange okobha umwaho ughwa kö-möbhërë? ¹⁷Hano ömöbhërë ghwonswe igho ghokaabhaayë iriiso, iyakë ömöntö akaaighuurë amangʼana? Handë igha ömöbhërë ghwonswe igho ghokaabhaayë ökötwë, iyakë ömöntö akaaighuurë ubhunyunku? ¹⁸Kasi bhoono Waryobha yaasëëmya bhuuya imyaho ighya ömöbhërë, kera umwaho yaghösëëmya kya bhono umwene yaatunanga. ¹⁹Singa ömöbhërë ghwonswe igho m-mwaho ghömwë, teghokaabhaayë ömöbhërë hë. ²⁰M-maheene igha, imyaho ighya kö-möbhërë m-myaru, kasi ömöbhërë n-gömwë.

²¹Iriiso tereetore ökötëëbhya okobhoko igha, “Tinkukutuna hë.” Kora omotwe teghootore ökötëëbhya amaghörö igha, “Tenkobhatuna hë.” ²²Kasi ekenene ni-igha, imyaho gheno ghekomaahekana igha m-metaaniinu kö-möbhërë, ghiyö ngyo ghikutunwa bhököngʼu. ²³Ghwiki imyaho gheno ghekomaahekana igha, teghekosookwa hë, ghiyö ngyo tokosooka bhököngʼu. Imyaho ighyëtö gheno ghekomaahekana igha, nkösöökërrya ghërë, ghiyö ngyo tokokarabherra bhököngʼu. ²⁴Kasi imyaho ighyëtö gheno ghetakösöökërrya, ghiyö tegheena obhokaraabhërri bhököngʼu kya ighyëndë ghiyö. Waryobha umwene m-buuya yaasëëmya ömöbhërë. Imyaho gheno ghetakosookwa bhököngʼu, yaaghekora ghesookwenga, ²⁵okore ömöbhërë ghotakaahokana, kasi ni-igha, imyaho ghyonswe igho ghetorraninga. ²⁶Hano umwaho öghömwë ghwanyahaareka, imyaho ghyonswe igho nkunyahaareka ghërë hamwë nagho. Na hano umwaho öghömwë ghwatöönibhwa, ömöbhërë ghwonswe igho nkushomerwa ghörë.

²⁷Mbe, bhëënyu bhonswe igho nö-möbhërë ughwa Kiristo mörë. Kera ömwë uwëënyu, nu-mwaho ughwa kö-möbhërë kuyö. ²⁸Abhatomwa mbo Waryobha yaatoora mo-kanisa abha mbere, abha kabhërë abharööti, abha katatö abhëëghya. Ghwiki yaatoora-mo bhano bhakokora amakono, na abha ituho iya ukuhwënia abharööyë, na abha ökötöörrya abhandë, na bhano bhakotangata bharikyabho, na abha ituho iya okoghamba ebheghambo ebhehya. ²⁹Bhoono nköbhööri-ko igha, abhantö bhonswe igho, m-batomwa? Bhonswe igho, m-barööti? Bhonswe igho, m-bëëghya? Bhonswe igho, m-baköri abha amakono? ³⁰Bhonswe igho, mbaana ituho iya ukuhwënia abharööyë? Bhonswe igho, nkoghamba bharë ebheghambo ebhehya? Bhonswe igho, bhahaanwa obhotoro ubhwa okosesora ebheghambo ebhehya bhiyö? ³¹Mbe, ku bhuyö ni-igha mokore omotono ughwa ukutuna imituho emenene. Kasi ekenene, bhoono tigha mbööröki enshera inshiiya bhököngʼu.

Righonshe

¹Nenkaghamba ko-bheghambo ibhya abhantö, handë ibhya abhamaraika, kasi hano ntaana righonshe, m-bosa, obhoghambi ubhwane bhuyö, n-kituri kya bhosa igho, tebhoona moremo hë. ²Ghwiki nekaabha na obhotoro ubhwa ukuruusya öbhörööti, kora mmanye imbumbure na amangʼana ghonswe igho, nenkaabha na umukumo omonene, ughwa okotora okongʼaanya singuku, kasi nyoore ntaana righonshe, m-bosa. ³Ghwiki kora nenkaghegha ëbhëntö ibhyane nhaane abhatöbhu, handë niiruusi öni umwene nsambwe mo-morro,13:3 Handë niiruusi öni umwene nsambwe mo-morro. Senakara isyëndë syandëkirwë igha, handë niiruusi öni umwene okore nibhaake. kasi nyoore ntaana righonshe, m-bosa.

⁴Ömöntö uwa righonshe, nköghömërrya arë amangʼana, nkösërëënia arë abhantö, takobha na rikenge hë, takwihasha handë ukwiheema hë. ⁵Ömöntö uwa righonshe, taana ekemoghoro hë, takwitegherra na ukutuna amangʼana aghaaye agheene igho hë, takorerra bhöngö hë, handë okobheeka mo-nkoro iyaaye amangʼana amaghogho ghano abhantö bhakomokorra. ⁶Ömöntö uwa righonshe, obhoghogho tibhukumushomera hë, kasi obhoheene mbo akushomerwa nabho. ⁷Ömöntö uwa righonshe, nköghömërrya arë ghonswe igho, naana umukumo nkaagha syonswe igho, naana ubhweseghe ko-ghonswe igho, m-mötërëmu uwa ghonswe igho.

⁸Righonshe terekotemboka hë. Kasi hano oraanyoore öbhörööti bhooho, nkusika bhörë, hano oraanyoore ebheghambo ebhehya bheeho, nkusika bhërë, hano oraanyoore obhomanyi ubhwa amangʼana bhooho, nkusika bhörë. ⁹Ngambirë igho ko bhoora amangʼana ghano tomanyirë, n-kerengere keke igho, na öbhörööti ubhwëtö bhwonswe m-bwa kerengere keke igho. ¹⁰Kasi hano kiriisha keno ketakusuuha, ikisuuhu nkirisika.

¹¹Hano naarë omoona moke, ukushumaasha ukwane n-kwa ikyana kwaarë, na-mangʼana agha ikyana ngo naamanyirë, amaitegherro aghaane n-ga ikyana ghaarë, kasi bhoono nabhaayë ömöntö mökörö, natighirë amangʼana agha ikyana. ¹²Okomaaha kono tokomaaha bhoono igho, n-kwa mawëëriwëëri, n-kya hano ömöntö yamaaha ëkëntö mu-kitu, kasi iriihika-ho enkaagha eno toremaaha bhuuya. Bhoono igho n-kerengere keke igho ikya amangʼana keno mmanyirë, kasi enkaagha iriihika-ho eno ndemanya bhuuya kya igho öni umwene mmanyirwë bhuuya na Waryobha. ¹³Mbe, amangʼana ghano ghaimërëëyë bhoono igho, na-tatö, umukumo, ubhweseghe na righonshe. Ko amangʼana atatö ghayö, ekenene ni-righonshe.

Ituho iya amangʼana agha öbhöröötina ukushumaasha ebheghambo ebhehya

¹Mwiköngʼërri okobha na righonshe. Ghwiki ni-igha mutune bhököngʼu okobha na imituho ighya Umwika Ömöhörëëru, ekenene, ituho iya ukuruusya öbhörööti. ²Ömöntö ono akushumaasha ekeghambo ekehya, te-bhantö akushumaasha nabho hë, kasi nkunyoora örë arashumaasha na Waryobha, ko bhoora ghaara akoghamba, taaho ömöntö akoghamanya hë. Nkunyoora örë arashumaasha amangʼana agha imbumbure, ko obhotoro ubhwa Umwika Ömöhörëëru.14:2 Arashumaasha amangʼana agha imbumbure, ko obhotoro ubhwa Umwika Ömöhörëëru. Ensonga iyaamo iyëndë ni-igha, arashumaasha amangʼana agha imbumbure iya mo-nkoro iyaaye. Arashumaasha amangʼana agha imbumbure iya mo-nkoro iyaaye. ³Kasi ono akuruusya öbhörööti, we nkushumaasha arë na abhantö amangʼana agha okobhatöörrya ku-mukumo ughwabho, agha okobharöörësya na agha okobhatërëmya. ⁴Ömöntö ono akushumaasha ekeghambo ekehya, uyö nu-mwene akwihaghaasha. Kasi ono akuruusya öbhörööti, uyö na-Bhakiristo bharikyaye akohaghaasha.

⁵Öni nkutuna ndë igha, n-hano bhonswe igho mokaashumaasha ebheghambo ebhehya, kasi ekenene ni-igha, n-hano mokaaruusya öbhörööti. Nkoghamba ndë igho ko bhoora ömöntö ono akuruusya öbhörööti, uyö nakërrë umushumaashi uwa ebheghambo ebhehya, hano ataasesore, okore ahaghaashe abhantö abha ekanisa. ⁶Bhoono abhakumya bharikyane, hano nkaasha kö-bhëënyu hayö, mbashumaashere ebheghambo ebhehya, n-hoorohooro kë eno moraanyoore? Kasi hano ndaabhatëëbhi ghano oraanyoore nhönyörrëëywë na Waryobha, handë mbahaane obhomanyi ubhwa engʼana nyabhorebhe, handë mbaraarekere engʼana iya Waryobha, handë mbëëghi, hayö moraanyoore ehoorohooro. ⁷Ni-igho ekobha kora kö-bhëntö ibhya ökörëëtërya. Ëbhëntö bhiyö tebhekoheeshera hë, nkekaabha ekerongwe, handë ritungu. Hano ëbhëntö bhiyö bheraange okobha na emebhari ëmëhagharë, ömöntö namanya rirëëtyö reno rëkörëëtibhwa mu-ritungu muyö? ⁸Na hano orotera rotaahuutirwë bhono emanyekaini, nawë araaisëëmi ukughya ukwitana riihë? ⁹Kora kö-bhëënyu bhonswe ni-igho ërë. Hano moraange okoghamba amangʼana ghano ghamanyekaini ko-bhantö, nawë araamanye keno mokoghamba? Hayö nkushumaasha mörë amangʼana gharaheta na rikama.

¹⁰Ebheghambo m-byaru bheno bhërëngë ko-kebhara kono, kasi tekeeho ekeghambo kora ëkëmwë keno ketaana ubhwera. ¹¹Mbe, hano oraanyoore igha temanyirë ekeghambo ikya uwöndë, nkobha ndë kya ömöghëni ku-mwene ekeghambo uyö, na umwene wonswe nkobha arë ömöghëni ku-öni. ¹²Ni-ighoigho ekobha kora na kö-bhëënyu bhonswe. Ko bhono mukutuna bhököngʼu igha mobhe na ituho iya Umwika Ömöhörëëru, mokore omotono ughwa ukughinyoora, okore ekenene bhëënyu ekanisa, motoghekane. ¹³Mbe, ku bhuyö ni-igha, ömöntö ono akoghamba ekeghambo ekehya, asabhe Waryobha amohaane na obhotoro ubhwa okosesora ekeghambo kiyö. ¹⁴Nkoghamba ndë igho, ko bhoora hano nasaasaama ko ekeghambo ekehya, enkoro iyaane yo ekosaasaama, kasi sehakëri isyane, teseekomanya ëkëntö hë. ¹⁵Bhoono iyakë nkaakora? Nendaasaasaame Waryobha mo-nkoro iyaane ko ekeghambo ekehya, mmare ghwiki nsaasaame ko sehakëri isyane. Nendaarëëti mo-nkoro iyaane ko ekeghambo ekehya, mmare ghwiki ndëëti ko sehakëri isyane. ¹⁶Hano oraakumi Waryobha mo-nkoro iyaaho ko ekeghambo ekehya ikyene igho, ömöntö uwöndë ono atamanyirë, iyakë araaikërri igha “Amina” na ambe tamanyirë keno okoghamba hë? ¹⁷M-maheene igha, ukukumya ukwaho kuyö, koratora kobha kuuya ku-Waryobha, kasi tokohaghaasha umukumo ughwa murikyaho hë.

¹⁸Nkukumya ndë Waryobha ko bhoora nkoghamba ebheghambo ibhyaru okokera bhëënyu bhonswe igho, ¹⁹kasi hano naabha mo-kanisa, ndatuna nshumaashe ko sehakëri isyane ngakaabha amangʼana ataano igho, ghano ghamanyekaini, okore nëëghi abhantö abhandë. Iyö yo engʼana enene okokera ukushumaasha amangʼana ëbhëkwë ikömi, ko ekeghambo ekehya. ²⁰Abhakumya bharikyane, motakaabha na amaitegherro kya agha abhaana. Nyakara mobhe abhaana ko mangʼana amaghogho, kasi mo-sehakëri isyënyu, mobhe abhantö abhakörö. ²¹Amaandeko Amahörëëru gharaghamba igha,

“Nindishumaasha na abhantö bhano, okohetera ko-bhantö abha ebheghambo ebhehya,

na okohetera ku-minywa ighya abhaghëni,

nokaanyoora ni-igho erebha, kasi tebharinyighwera hë.

Ni-igho Omonene Waryobha akoghamba.”14:21 Maaha mo-ketabho ikya Isaaya 28:11-12.

²²Mbe, ebheghambo ebhehya bheno, n-kemanyërryö ikya bhano bhataana umukumo, ti-igha nko-bhano bhaana umukumo. Kasi ituho iya ukuruusya öbhörööti, ne-kemanyërryö ikya bhano bhaana umukumo.

²³Bhoono hano oraanyoore abhakumya mwikomaini hamwë, mbe, bhonswe igho moghambe ebheghambo ebhehya, bhasohe abhantö bhano bhatamanyirë, handë bhano bhataana umukumo, tebhaghambe igha m-bashuuru mörë? ²⁴Kasi hano bhonswe igho moraaruusi öbhörööti, amare asohe ömöntö ono ataana umukumo handë ono atamanyirë, ghano araaighwe kö-bhëënyu bhonswe igho, ngaraaghere amanye obhoghogho ubhwaye, kora ngaraamobhotorre ikiina mo-nkoro iyaaye. ²⁵Imbumbure iya mo-nkoro iyaaye, nkobha ërë harabhu. Bhoono hayö ho araaighwësi hansë bhubhuumaayë asaasaame Waryobha eno araghamba igha, “M-maheene Waryobha hamwë arë na bhëënyu!”

Bhono abhakumya bharasaasaamenga

²⁶Mbe, bhoono abhakumya bharikyane, iyakë nkaghamba? Hano mwasikana hamwë, igha kera ömöntö aana rirëëtyö, aana amëëghyö, aana obhohonyoro, aana ekeghambo ekehya, aana esesoro. Amangʼana ghayö ghonswe igho, ni-igha ghakorwe ko okoghera iya okohaghaashana. ²⁷Hano ömöntö araashumaashe ekeghambo ekehya, ni-igha bhashumaashe abhantö abhabhërë handë abhatatö, bhatakaaruha. Bhashumaashenga ömöntö ömwë ömwë. Kora ni-igha abhe-ho ömöntö uwa okosesora ghayö bhakoghamba. ²⁸Hano oraanyoore ömöntö uwa okosesora ataaho, ni-igha akire mo-kanisa hayö, aighambere umwene na Waryobha uwaaye. ²⁹Abharööti bhonswe bhashumaashe bhabhërë handë bhatatö, abhandë bhaitaahe amangʼana ghayö bhakoghamba. ³⁰Kasi hano uwöndë ono aikaayë araahonyorrwe engʼana, uwa mbere oora, ni-igha akire. ³¹Ko bhoora ni-igha, kera ömöntö anyoore umweya ughwa okoghamba öbhörööti ubhwaye, okore abhantö bhonswe igho bheeghe na bharöörësibhwi. ³²Ituho iya ukuruusya öbhörööti, nkotangatwa ërë na abharööti, ³³ko bhoora Waryobha uwëëtö takoreeta riihë hë, kasi no-morembe akoreeta.

N-kya bhoora ërëngë ko amakanisa ghonswe igho agha abhahörëëru, ³⁴ni-igha abhakari, bhakirenga mo-kanisa, ko bhoora tebhakwikërërribhwa okoghamba mo-kanisa hë, kasi bhabhe abhaighwa, kya bhono amaraghërryö agha Mosa ghakoghamba. ³⁵Hano oraanyoore bharatuna igha bheeghe engʼana, bhabhööri bhashaasha abhaabho ka, ko bhoora në-nsöni omokari ukushumaasha mo-kanisa.

³⁶Engʼana iya Waryobha, nkö-bhëënyu yaarwa? Handë igha m-bëënyu abheene yaahëkërëëyë? ³⁷Hano ömöntö araaimaahe igha m-mörööti, handë igha të-möntö uwa kinyamöbhërë hë, amanye igha ghayö nkobhandekera, na-maraghërryö agha Omonene. ³⁸Kasi hano ömöntö araaghatashere hansë, tigha atashere hansë.

³⁹Ko okoghera iya amangʼana ghayö, abhakumya bharikyane, ni-igha mokore omotono ughwa ukuruusya öbhörööti, kora ekeghambo ekehya motakaakerebherra. ⁴⁰Ekenene ni-igha, amangʼana ghonswe igho, ghatoorwe bhuuya na okokorwa ubhwa heene.

Ukuryoka ukwa Kiristo

¹Bhoono abhakumya bharikyane, nkobhahitökya ndë Amangʼana Amaiya ghano naabharaarëkëëyë, mokaghaghoota kora mwanagha ko Amangʼana Amaiya ghayö. ²Amangʼana Amaiya ghayö, ngo ghakobhahaana öbhötöörya, hano moraaghëndërri ukukumya amangʼana ghayö naabharaarëkëëyë. Hano motaaghaghoote, momanye igha ukukumya ukwënyu n-kwa bhosa.

³Amëëghyö agha ubhwera obhonene ghano naahaaywë naabhëëghya igha, Kiristo yaakuurë ko okoghera iya ëbhëbhë ibhyëtö,15:3 Maaha mo-ketabho ikya Isaaya 53:5-12. kya bhono Amaandeko Amahörëëru ghakoghamba. ⁴Ghwiki Amaandeko Amahörëëru gharaghamba igha, yaabhëëkirwë, kasi urusikö urwa katatö akaryoka.15:4 Maaha mo-ketabho ikya Zabhuri 16:9-10.⁵Akabhooshokera Keefa, ghwiki akabhooshokera abhatomwa abhaaye ikömi na bhabhërë. ⁶Hano yaamarrë, akabhooshokera abhakumya okoheteera ekerengere ikya amaghana ataano, abhakumya bhayö n-hamwë bhaarenga. Abhaaru mo-bhantö bhayö, kora bhoono igho hobharë, kasi abhandë bhaakwa. ⁷Ghwiki akabhooshokera na Yaakobho, kora na abhatomwa bhonswe igho. ⁸Ko okomarërrya, akambooshokera öni wonswe, nkabha kya ömöntö ono aibhööywë, ataraahika. ⁹Öni tondengʼaani na abhatomwa abhandë bhonswe igho hë. Tiningʼarëëyi okobherekerwa omotomwa hë, ko bhoora naanyankëri abhakumya abha Waryobha. ¹⁰Kasi bhono ndëngë bhoono igho, n-ko okoghera ukwa örööbhö urwa Waryobha. Örööbhö urwaye ruyö ku-öni, te-rwa bhosa hë, ko bhoora rwaaghera naakora emeremo okokera abhandë bhonswe igho, te-ko obhotoro ubhwane umwene hë, kasi nö-rööbhö urwa Waryobha ruyö rörëngë hamwë na öni. ¹¹Mbe, nokaanyoora igha nö-öni, handë igha na-bhatomwa abhandë bhayö, amangʼana n-gaaraghaara tokoraareka, na ghayö ngo mwaakumya.

Ukuryoka ukwa abhaku

¹²Mbe, nyoore nkoraareka törë igha, Kiristo yaaryökirë ukurwa mo-bhaku, bhoono n-kwakë abhandë mö-bhëënyu bhakoghamba igha, ukuryoka ukwa abhaku tekooho hë? ¹³Nyoore ukuryoka ukwa abhaku kotaaho, mbe tomanye igha, Kiristo wonswe tiyaaryoka hë. ¹⁴Ghwiki nyoore Yëësu Kiristo ataaryoka, obhoraarëki ubhwëtö tebhoona ubhwera hë, na umukumo ughwënyu n-gwa bhosa, teghoona ubhwera hë. ¹⁵Kora na bhëëtö bhonswe ntoraamaahekane igha, m-baimërërri abharongo abha Waryobha törë, ko bhoora tukwimererra igha, Waryobha yaaryökëri Kiristo ukurwa mo-bhaku, hano oraanyoore igha m-maheene abhaku tebhakuryoka hë. ¹⁶Nyoore abhaku bhatakuryoka, toghambe igha Kiristo wonswe tiyaaryoka hë! ¹⁷Na nyoore Kiristo ataaryoka, umukumo ughwënyu n-gwa bhosa, temoraatööribhwa ukurwa mö-bhëbhë ibhyënyu hë. ¹⁸Mbe, hayö bhoono abhantö bhano bhaakwa bhakumiri Yëësu Kiristo, bhayö mbasira. ¹⁹Ko bhoora igha, nyoore Kiristo nkumwitengʼera törë ko öbhömënyi ubhwa ko-kebhara kono ubhwene igho, bhëëtö m-bantö abha ukwabherwa törë, okokera abhantö bhonswe igho.

²⁰Kasi bhoono obhoheene ni-igha, Kiristo yaaryoka ukurwa mo-bhaku, omotangi uwa bhano bhaakwa. ²¹Momanye igha, ko bhoora uruku rwaareetwa na ömöntö ömwë, ighoigho na ukuryoka ukwa abhaku, m-möntö ömwë yaakoreeta. ²²Mbe, ko bhoora abhantö bhonswe igho nkukwa bharë ko bhoora mbaasëmökirë ukurwa ko-Adamu, ni-ighoigho, na ko okoghera iya okoghootana na Yëësu Kiristo abhantö bhonswe igho mbarekorwa bhabhe abhahöru. ²³Kasi kera ömöntö ko-nkaagha iyaaye, Yëësu Kiristo we omotangi, bhararoobhera-ko abhantö abhaaye hano ariisha. ²⁴Hayö ho umuhiko ughwa ekebhara ghurihika, hano arehaana Taata Waryobha Obhokama ubhwaye. Naremohaana hano urinyoora amarrë okosarya öbhötöngi bhwonswe igho, ubhwera bhwonswe igho na obhotoro bhwonswe igho. ²⁵Ko bhoora ni-igha Kiristo atonge okohekera hano aretashera hansë abhabhisa abhaaye bhonswe igho.15:25 Maaha mo-ketabho ikya Zabhuri 110:1.²⁶Uruku we umubhisa ono aremarerribhwa ukusikibhwa. ²⁷Amaandeko Amahörëëru gharaghamba igha, “Waryobha yaamökörrë atashere hansë ëbhëntö bhyonswe igho.”15:27 Maaha mo-ketabho ikya Zabhuri 8:6. Kasi hano yaghambwa igha, “Yaamökörrë atashere hansë ëbhëntö bhyonswe igho,” obhoheene ni-igha Waryobha taamo hë. Ko bhoora we yaaghera ëbhëntö bhyonswe igho bhetasherwe hansë na Yëësu Kiristo. ²⁸Mbe, hano ëbhëntö bhyonswe igho bheretasherwa hansë, ho na Omoona wonswe ariihoota ku ubhwera ubhwa Waryobha ono yaaghërrë akatashera hansë ëbhëntö bhyonswe igho, okore Waryobha abhe ömötöngi uwa bhyonswe igho.

²⁹Nyoore ukuryoka kotaaho, abhantö bhano bhakobhatiisibhwa ko okoghera iya abhaku, n-kë bhakwesegha? N-kwakë bhakokora igho nyoore ukuryoka kotaaho? ³⁰Na bhëëtö bho, n-kwakë tukwirekera mu-ribhëri nkaagha syonswe igho? ³¹Abhakumya bharikyane, öni nu-ruku nkoghenda narwo nkaagha syonswe igho. Bhuyö m-boheene kya bhono ërëngë obhoheene igha nkwikumya ndë ko okoghera iya bhëënyu, ko bhoora mwaghootana na Omonene uwëëtö Kiristo Yëësu. ³²Nyoore ubhweseghe ubhwane m-bwa kinyabhantö ubhwene igho, n-kwakë naitaini na sityënyi sëmbë Ëfësö?15:32a Sityënyi sëmbë Ëfësö. Ensonga iyaamo ni-igha, abhantö abhabhë bhano bhaamorebherranga okokora emeremo ighya okoraareka Amangʼana Amaiya. N-hoorohooro kë naanyöörrë ko engʼana iyö? Nyoore abhaku bhatakuryoka,

“Toraaghere mbe ëbhëntö reero,

ko bhoora isho nturikwa.”15:32b Maaha mo-ketabho ikya Isaaya 22:13, 56:12.

³³Mwangarre, motakangʼainwa, “Ishumaasho engogho, nkosarya ërë eteemo iya ömöntö.” ³⁴Mokore amangʼana kwa bhongʼaini, motakaakora ëbhëbhë, ko bhoora abhantö abhandë tebhamanyirë Waryobha hë. Nkoghamba ndë amangʼana ghayö okore mbasöökërri.

Ëmëbhërë emehya

³⁵Ömöntö aratora ököbhöörya igha, kana, “Abhaku iyakë bhakuryökibhwa? M-mëbhërë kë bhakuryökibhwa naghyo?” ³⁶Ököbhöörya kya kuyö, n-kwa kekangi! Hano ömöntö yëëmya imbusiro, nda nkukwa ërë kangata emanya okomera? ³⁷Imbusiro yoyonswe igho eno ikwëmibhwa, nekaabha iya engano handë iyëndëyëndë igho, tikutuubhana na ömöröngö ughwako hë. ³⁸Kasi Waryobha nkoghehaana arë ömöbhërë ughwako kya bhono umwene akutuna, kera imbusiro na ömöbhërë ughwako.

³⁹Ëmëbhërë ghyonswe igho tighituubhaini hë. Gheeho ëmëbhërë ighya abhantö, ighya sityënyi, ighya ibhinyönyi na ighya sinswë. ⁴⁰Ghwiki gheeho ëmëbhërë ighya ighörö iyö, na ighya ko-kebhara kono, na ikuughë iya ëmëbhërë ighya ighörö iyö, nekeraini na ikuughë iya ko-kebhara kono. ⁴¹Eeho ikuughë iya iryobha na ikuughë iyëndë iya umwëri, na iyëndë iya sinyota, ikuughë iya inyota nyabhorebhe nekeraini na ikuughë iya inyota iyëndë.

⁴²Mbe, ni-igho ërë kora ko amangʼana agha ukuryoka ukwa abhaku. Ömöbhërë omosarëku ngwo ghokobheekwa, kasi ghuryökibhwa ghono ghotakosareka. ⁴³Nkobheekwa ghörë ghotaana ubhwera, kasi nkuryökibhwa ghörë ghoona ubhwera. Nkobheekwa ghörë ömöbhërë ömötëntëëru, ghuryökibhwa ughwa singuru. ⁴⁴Nkobheekwa ghörë ömöbhërë ughwa esemoko, ghuryökibhwa ömöbhërë omohya ghono torehaanwa na Umwika Ömöhörëëru. Ko bhoora ghooho ömöbhërë ughwa esemoko, na ömöbhërë omohya ghono torehaanwa na Umwika Ömöhörëëru, ghonswe ho ghörë.

⁴⁵Amaandeko Amahörëëru gharaghamba igha, “Adamu ömöntö uwa mbere, yaabhömbirwë akabha na öbhöhöru,”15:45 Maaha mo-ketabho ikya Okosemoka 2:7. kasi Adamu uwa umuhiko we nu-Mwika, ono akohaana abhantö öbhöhöru. ⁴⁶Kasi ömöbhërë ghono ghokotangata, tu-ughwa öbhöhöru hë, nu-ghwa esemoko ghoora, bhoono ho ghomanya kuusha ghono ghotakukwa. ⁴⁷Ömöntö uwa mbere, yaabhömbirwë ukurwa ku-rirobha. Kasi ömöntö uwa kabhërë we mu-ryobha yaaruurë. ⁴⁸Bhono arë ömöntö uwa ku-rirobha, ni-igho bharë na abha ku-rirobha bhonswe, na kya igho arë uwa mu-ryobha, ni-igho bharë na abha mu-ryobha bhonswe. ⁴⁹Na kya igho twaabhaayë na ituubho iya Adamu ömöntö uwa ku-rirobha, ni-ighoigho ghwiki torebha na ituubho iya Yëësu Kiristo uwa mu-ryobha.

⁵⁰Abhakumya bharikyane, keno nkobhatëëbhya ni-igha, ömöbhërë ghono ughwa inyama na amaanyinga, teghootore ukorya umwandö ughwa Obhokama ubhwa Waryobha, handë obhosarëku okorya umwandö ughwa keno ketakosareka.

⁵¹Bhoono tigha mbarome ökötwë, te-bhonswe igho turikwa hë, kasi nturisyöribhwa bhonswe igho. ⁵²Engʼana iyö nirikora kamwë igho, engoko etaraatoosha emere, enkaagha iya ukuhuutwa ukwa orotera urwa umuhiko. Ko bhoora orotera ndurihuutwa, na abhaku mbariryökibhwa bhaana ëmëbhërë gheno ghetakosareka, na bhëëtö bhonswe nturisyöribhwa. ⁵³Momanye igha, ömöbhërë ughwa okosareka ghono, ni-igha ghusyöribhwi ghuruusibhwi obhosarëku ubhwagho. Na ömöbhërë ughwa ukukwa ghono ghusyöribhwi ghuruusibhwi ukukwa ukwagho. ⁵⁴Mbe, ömöbhërë ughwa okosareka ghono, hano ghörëtööribhwa ukwanga okosareka, na ughwa ukukwa ghono ghötööribhwi ukwanga ukukwa, hayö bhoono ho erehekerana engʼana eera yandëkirwë igha,

“Uruku rusikiibhwi, robhaahirwë këmwë.”15:54 Maaha mo-ketabho ikya Isaaya 25:8.

⁵⁵“Bhoono waruku, obhobhaahi ubhwaho hai bhörë?

Obhotoro ubhwaho ubhwa ukunyahaara hai bhörë?”15:55 Maaha mo-ketabho ikya Hosea 13:14.

⁵⁶Obhotoro ubhwa ukunyahaara ubhwa uruku, në-bhëbhë, na obhotoro ubhwa ëbhëbhë, na-maraghërryö. ⁵⁷Kasi bhoono ni-igha tukumi Waryobha ono akotohaana obhotoro ubhwa okobhaaha okohetera ko-Monene uwëëtö Yëësu Kiristo.

⁵⁸Mbe, bhoono abhakumya bharikyane abhaghonshe, ni-igha monaghe, motakaasingisa. Möghëndërri okokora emeremo ighya Omonene uwëëtö bhököngʼu nkaagha syonswe igho, ko bhoora momanyirë igha, emeremo ighyënyu gheno mokokorra Omonene, ti-ghya bhosa hë.

Emesorro ighya ökötöörrya abhakumya

¹Bhoono ko mangʼana agha okosororra abhahörëëru, mokore kya bhono naaraghërrya amakanisa agha Gharatia. ²Urusikö urwa Jumapiri, kera ömöntö mö-bhëënyu, abheeke eheke iyaaye ko bheno akunyoora, okore hano ndiisha, omosorro ghotakaasha okobha-ho. ³Hano ndiisha iyö, nendehaana abhantö bhano murishaaghora ritashandighi irya okobhakora bhamanywe Yërusarëëmu, hano bharihira omosorro ughwënyu. ⁴Hano moremaaha igha m-buuya nhinane nabho, nindihinana nabho.

Ësëëmyö iya Pauro ukughya Körintö

⁵Hano ndirwa Makedonia, ho ndeheterrania niishe kö-bhëënyu iyö. ⁶Hano ndiisha, hamwë ndetora ukwikara wëënyu hayö nkaagha nke igho, handë enkaagha yonswe igho iya embeho, okore monsororre nnyoore obhotoro ubhwa ukughya hano honswe igho ndituna ukughya. ⁷Tinkutuna igha mmaahane na bhëënyu enkaagha eno urinyoora ndaheta, kasi nkutuna ndë igha nnyoore umweya ughwa ukwikara na bhëënyu enkaagha nyabhorebhe, hano Omonene arehansha.

⁸Kasi nendaaikare Ëfësö hano, okohekera enkaagha iya inyangi iya Pentekosite. ⁹Ko bhoora nkomaaha ndë igha, nighörrëywë ikihiita nkore emeremo, nokaanyoora abhabhisa bhano bhakondebherra m-baaru.

¹⁰Hano Timoteo arihika hayö, muushe kömösërëënia bhuuya, okore atakaabha na entarëki yoyonswe eera, ko bhoora nkokora arë emeremo ighya Omonene kya bhono öni wonswe nkoghekora. ¹¹Mbe, ömöntö wowonswe igho, atakamosera. Kasi mömötöörri emoke oroghendo urwaye ukuusha ku-öni aana omorembe, ko bhoora öni na abhakumya bharikyane nkomoghanya törë.

¹²Nasaasaama bhököngʼu Apöörö umukumya murikyëtö igha, bhareetane hamwë na abhakumya abhandë, kasi umwene takutuna aashe bhoono igho hë. Rono arinyoora umweya, nariisha.

Amangʼana agha okoragha

¹³Mwiraarerrenga, mokarehe kora monaghe bhököngʼu ku-mukumo ughwënyu. ¹⁴Mobhenga na righonshe ko amangʼana aghëënyu ghonswe igho, ghano mokokora.

¹⁵Abhakumya bharikyane, mmomanyirë bhuuya igha, abhantö abha wa Sitefana Akaaya hayö, mbo bhaarë abha mbere ukukumya. Bhairuusya ukutighinkanera abhahörëëru. Bhoono bhamurë ndabhasaasaama igha, ¹⁶mwighwerenga abhantö kya bhayö, na abhandë bhano bhaana omotono ughwa okokora hamwë nabho emeremo.

¹⁷Naashömëëywë hano Sitefana hamwë na Foritunato bhaana Akaiko bhaahikirë hano. Naashömëëywë ko bhoora mbaangʼaayë ëbhëntö bheno mokaangʼaayë, bheno naarë nabhyo obhohabhë. ¹⁸Nkoghamba ndë igho, ko bhoora bhaghërrë nkasambaaroka mo-nkoro iyaane, ndamanya na bhëënyu bhonswe mosambaarokire mo-senkoro isyënyu. Mbe, abhantö kya bhayö mobhasërëëninga.

¹⁹Abhantö abha amakanisa agha Asia Enke, bharabhakëërya. Akiira na Purisika, na abhakumya bhano bhakosaasaamera waabho hayö, bharabhakëërya bhököngʼu ku iriina irya Omonene wëëtö Yëësu Kiristo. ²⁰Abhakumya bhonswe igho bharabhakëërya. Mokeerani ku ukwibhaarana ököhörëëru.

²¹Amakëërërryö ghano, nö-öni Pauro ngandëkirë, ku umwandeko ughwane öni umwene. ²²Ömöntö wowonswe ono atahanshirë Omonene Yëësu Kiristo, aihiimwe. Maranata!16:22 Maranata. Ensonga iyaamo ni-igha, Omonene nshö.

²³Örööbhö urwa Omonene uwëëtö Yëësu Kiristo, robhe hamwë na bhëënyu. ²⁴Righonshe iryane rebhe hamwë na bhëënyu kö bhömwë bhono toonabho ku-Kiristo Yëësu.