2 Tēēsālōōnikēēk

Barweetaab Āyēēng’ nyēē kisirchi ꞉Bāwulō

Tēēsālōōnikēēk

Taayta

Siriintēēt, yēē /kikēēsirē āk wōlēē /kikēēsirēē : Inoomēē ꞉barwaani nwaach yoo kāng’ētēē ꞉nyiin kābo taay. Bāwulō ꞉nyēē kisirē barwaani ām Kōōriintō ām ārook lo kung’eetee kisir nyoo bo taay (kasee kāāboorunēētaab nyoo bo taay).

Kiyēē mii āriit āk nyēē āmu : Kimanaaweek ꞉ng’ala ām Tēēsālōōnikē kung’eetee kisir ꞉Bāwulō barweet nyoo kibo taay. Kiiyēnchinē ꞉biiko kereeryaanto kule kikiikōōyēēw kēny ꞉Kiriistō nto alak kōōsōōtē kule kikiikulēēkitiit miisin ꞉chōōnēēnyii nyēē kimēērook /takeeyey yiisyō.

Kiwālchi ꞉Bāwulō bichoo kurubta keey āk yuutēyu kule: Kutoombo kuchōōnii ꞉Kāārārookiintēēt, mākuwōōyiit ꞉rōkōsto ām kōōrēēt. Ām bēsyōōsyēk choo kwoonii yoo iyēēwu ꞉Kiriistō, makuyey ꞉kwiiliintēētaab Kiriistō kuchuunnyo ꞉biiko miisin. Imuuchē kuyēyākiis ꞉ng’aleechu āsiiswēk alak tukul nteenee māmāchāktōōs kuyeyeech kēēnyēbēt (kas kur. 3:10). Ikiimchinē ꞉Bāwulō biikaab Tēēsālōōnikē kutitir ām kaakaaseeng’waa ānkoo kumii ꞉wusiisyēēt ankukanyaan nyēē māmii ꞉ng’uusng’uus tukuuk chēē mākuyēyākiis bēsyōōsyēk choo kwoonii.

Kyoorōōrchi keey ꞉Bāwulō biikaab Tēēsālōōnikē ānkumākyi bērur

¹ Anii Bāwulō, āboontē keey Siila ākoo Tēmētēēwō yu āsirwook barwaani akweek kaniseetaab Tēēsālōōnikē choo ōbooyē Baaba Yēyiin āk Mokoryoontēēt Yēēsu Kiriistō.- 1:1 1Tēēs. 1:1

² Kōōbēruurook ꞉Baaba Yēyiin āk Mokoryoontēēt Yēēsu Kiriistō ānkōōnyōōru kaalyeet.

Kāātiilēy ām bēsyoonoo chōōnii ꞉Yēēsu

³ Mbo ng’eetaabiya, māchāksē kēēbirchinē ꞉acheek Yēyiin kōōnkōy ām āsiiswēk tukul kubo akweek, kuuyu ōtāsē taay ōkoosēē keey Kiriistō miisin ānkōōchoomtōōsii ꞉tukul. ⁴ Kēēng’ērēchēēnook ꞉acheek yoo kyoomchinē kanisoosyek alak wōlēē wuu ꞉soboonwēkwook kuuyu ōtāsē taay ōmuytooy ānkōōkoosēē keey Kiriistō ām wusiisyēēt nyoo ōmiitē ōbuntēē.- 1:4 Filib. 2:16; 1Tēēs. 3:3

⁵ Ibooru ꞉yooto kule man ꞉kiyēē itiilē ꞉Yēyiin, yoo itiilwook kule ōyēmootiin ōwut bāytooyiisyēēnyii nyoo ōmiitē ōnyālilchinē.- 1:5 Filib. 1:28⁶ Makuyey ꞉Yēyiin kiyēē bo manta yoo keenyaliil choo inyāliilook,- 1:6 Room. 12:19; Ng’oong’. 18:6⁷ ānkumākōōmuung’wook akweek choo ōnyālilē āk mbo nkacheek. Mākuyēyākiis ꞉ng’aleechaa yoo tookunēē ꞉Yēēsu barak kuboonto keey malayikaanikyii choo boonto kāāmuukēywēēk- 1:7 Mat. 25:31; 1Tēēs. 4:16-17⁸ āk maat nyēē irikitiitē. +Māchokōōng’woonchi biiko choo ‑mēēnkētē Yēyiin āk choo ‑mēēyēnchinē lōkōōywēkaab Mokoryoontēēt Yēēsu.- 1:8 Room. 2:8⁹ Mākunyōōr ꞉bichoo ng’wooninto nyēbo kibchuulyo, /ankumakeesatee wōlēē mii ꞉Mokoryoontēēt āk wōloo mii ꞉wōōyintaab kāāmuukēywēēkyii. ¹⁰ Yēyāktōōs kuu nyooto yoo chōōnii ꞉Mokoryoontēēt chokunyōōru koonyit ām wōlēē mii ꞉biikyii kōōkoostooy ꞉biiko tukul choo ikoosēē keey inee. +Mōōyēmē ꞉nkakweek āk bichooto, kuuyu kyoocham lōkōōywēk choo kikēēmwoowook.

¹¹ Kiyiitēnyi ꞉nyēē yēyēēch kēēsoowook ākookoy, sukuyēētyēēchook ꞉Yēyiintēēnyoo ōbuur kuu wōloo māktooy ꞉inee ānkōōyēyē kiyoo ōkāsē kule karaam. Kēēsoowook subak kule kukōōnook kāāmuukēywēēk chēē ōmuuchē ōyēchinēē yiisyēēnyii ōkoosēē keey inee. ¹² Yooto, +/makiikaasta kaayneetaab Mokoryoontēēnyoo Yēēsu ām kiyēē ōyēchinē /ankiikaastaak nkakweek. Yēyāktōōs ꞉ng’aleechaa tukul, kuuyu chāmook ꞉Yēyiintēēnyoo āk Mokoryoontēēt Yēēsu Kiriistō.

Choolwookiintēēt nyēē ‑/mākyoomu

¹ Mbo ng’eetaabiya, kēēmāchē kiiboorwook kiy kurubta keey āk chōōnēētaab Mokoryoontēēt Yēēsu Kiriistō āk yoo /kiiruruukyēēch inee. Kēēsoomook kule ² ‑mōōbootyē ām kāāsōōtēywēēkwook, nto ōmuuyē yoo /kēēmwooyē kule kaakuyit ꞉bēsyēētaab Mokoryoontēēt, ānkoo kimwooyē kuu nyooto *꞉wōōrkooyoontēēt ake nto ku biiko alak nto /kēēmwooy kule kikeesir ꞉acheek ng’aleechu ām barweet ake.- 2:2 1Tēēs. 4:15—5:3³ ‑Mookany kooberbeeraak ꞉chiito ake ām keel ake tukul. Māyitu ꞉bēsyoonoo ākoy yoo kaakutay Yēēsu ꞉biikyii alake ānkutook ꞉choolwookiintoonoo +/mākiimukuusēē maataab kibchuulyo.- 2:3 Tān. 8:23-25; 1Yoowa. 2:18⁴ Kwiilē ꞉choolwookiintoonoo kiy ake tukul nyoo kutunkyinē ꞉biiko āk kiy ake tukul nyoo kāsē ꞉biiko kule bo Yēyiin. Imuuchē mbo kōōwut *Kōōtaab Yēyiin ānkuyib keey barak kule inee ku Yēyiin.- 2:4 Isa. 14:13-14; Ēsēk. 28:2

⁵ ‑Mōōsōōtē ꞉akweek yoo kyāāmwoowook ꞉anii ng’aleechu tukul kēēboontē keey? ⁶ Nto yu ōnkētē ꞉akweek kiyoo tākōōkooyē choolwookiintoonoo nto kāākuyityo chokutook ꞉inee ām bēsyōōsyēkyii. ⁷ Mii kuunyiitēnyi kuyēyiisyē ꞉kāāmuukēywēēkaab choolwookiintoonoo ām wung’aan, nteenee makutas taay ꞉kiyoo kookaay yiisyoonoo ākoy /bokiinēmto. ⁸ Yooto nanyuun yēē mākutook ꞉choolwookiintoonooto nteenee makubiirta ꞉Mokoryoontēēt Yēēsu ām muuyēēt nyēē chōōnēē kuutiinyii. Makookarbuusee ꞉Yēēsu choolwookiintoonoo kāāmuukēywēēkyii.- 2:8 Isa. 11:4; Ng’oong’. 19:15⁹ Mākuchōōnto ꞉choolwookiintoonooto kāāmuukēywēēkaab Kibrōkōsyoontēēt ankuchokooberbeer biiko kuyēyē ng’aleek chēē chaang’ chēbo kwōng’uut.- 2:9 Mat. 24:24¹⁰ Yēyiisyēē ng’ālyoo ake tukul nyēbo rōkōs kōōbērbēērē biiko choo mākubootyo. Mākubootyo ꞉bichoo, kuuyu kitay ꞉icheek kucham ng’ālyoontēētaab manta /sikiiraraach. ¹¹ Kunyi, makuyey ꞉Yēyiin icheek kōōyēnchi ng’wiiynan /sikēētēwēch ¹² /ankiiruusta tukul choo king’ērēkyi ng’al chēbo rōkōs āmānāākōōyēnchi ng’aleekaab manta.

Kōōtitiirook ꞉Mokoryoontēēnyoo Yēēsu Kiriistō

¹³ Nto akweek ii, mbo ng’eetaabiya choo chāmook ꞉Mokoryoontēēt, māchāktōōs kēēbirchi Yēyiin kōōnkōy ākookoy kubo akweek. Kikweyaak ꞉Yēyiin ōyēku alak ām chēbo taayta /kiiraraach. Kiitabaanaak ꞉kāāmuukēywēēkaab Tāmirmiryēēt ōyēku cheechii, yoo kyōōkoosēē keey ng’ālyoontēētaab manta.- 2:13 Room. 8:30¹⁴ Kikuurook ꞉Yēyiin kubununēē lōkōōywēk chēē kāroomēch choo kikyoomwook sikeeyemte ꞉tukul lēbkēēyyēētaab Mokoryoontēēnyoo Yēēsu Kiriistō.- 2:14 1Tēēs. 5:9¹⁵ Kunyoo ii, mbo ng’eetaabiya, oyeet keey ānkōōkiilchi kāānēētēywēēchoo kikyoomwook ānkēēsirwook.

¹⁶ Kichameech ꞉Baaba Yēyiin ankuyeyeech kēēbāybāyiitu ākookoy kiikēnēē keey kiyēē karaam. Kōōtitiirook ꞉Mokoryoontēēnyoo Yēēsu Kiriistō nkityōōniin āk Baaba Yēyiin ānkōōkiimook ōyēyē ānkōōmwooyē kiyēē karaam.- 2:16-17 Room. 8:39; 1Tēēs. 1:4

Kimwooy ꞉Bāwulō kule /kēēsoochi

¹ Mbo ng’eetaabiya, ōsoowēēch kutas taay ꞉ng’ālyoontēētaab Mokoryoontēēt koosambaakta areet akeenke ānkunyōōr koonyit, kuu wōloo kiwuu ām wōloo ōmiitē ꞉akweek.- 3:1 Room. 15:30² Ōsooyē subak kusārwēēch ꞉Yēyiin ām wōlēē mii ꞉biich chēē āwēēsēch ānku miyootēch, kuuyu mēēbērē ꞉biiko tukul chēē iyēnchinē manta. ³ Nteenee Mokoryoontēēt ꞉nyēē /kiikoosēē keey. Mākōōtitiirook ānkuriibook ām wōlēē mii ꞉Kibrōkōsyoontēēt.- 3:3 Mat. 5:37; 6:13; Yoowa. 17:15; 1Kōōr. 10:13; 1Tēēs. 5:24⁴ Kiinkētē ām Mokoryoontēēt kule ōyēyē kiyēē kēēmwoowook ānkōōtāsē taay ōyēyē kuu nyooto. ⁵ Kōōrēētootyook ꞉Mokoryoontēēt chamateetaab Yēyiin ānkōōbuur ām muytaayeetaab Kiriistō.

Moomiis ꞉chii nyēē māyēyiisyē

⁶ Mbo ng’eetaabiya, ām kaayneetaab Mokoryoontēēt Yēēsu, kēēmwoowook kule osatee keey ng’eetaabiya ake tukul nyēē kēwēyiin, nyēē mārubē kāānēētēywēēchoo kōkēēmwoowook.- 3:6 1Tēēs. 5:14; 2Tēēs. 3:12; Room. 16:17; 1Kōōr. 11:2⁷ Ōnkētē ꞉akweek kule māchāktōōs ōyēyē kuu wōloo kēēyēytooy ꞉acheek choo kimākēētinyē kēwēynāt yoo kikēēboontē keey. ⁸ ‑Mākyoomē āmnyoo nyēbo chii yoo mānāākēēkwēchi kiy, nteenee kikēēyēyiisyē bēēt āk kwēēmooy simākēēnyikisyook.- 3:8 Yēyuut. 18:3⁹ Ānkoo sinee kiyemaat kēēnyōōru kiy, kikeeyey kuu nyooto sikiineetaak orub kiyēē kēēyēyē.- 3:9 1Kōōr. 9:4, 15; 4:16¹⁰ Yooto kēēboontē keey akweek kikēēmwoowook kule, “‑Mookany kwoomiis ꞉chii nyoo māmāchē kuyēyiis.” ¹¹ Kēēmwooyē kuu nyooto, kuuyu kēēkāsē kule tinyē ꞉biiko alake ām akweek kēwēynātēēt. Māyēyē kiy, nteenee kwoonykwoonyootē biiko mētēwoy ām kiyēē yēyē.- 3:11 1Tēm. 5:13¹² Ām kāāmuukēywēēkaab Mokoryoontēēt Yēēsu Kiriistō kēēmwoochinē bichu kule kōōbuurē nyēē karaam ānkuyēyiisyē sukunyōōr kiyēē āmē.- 3:12 1Tēēs. 4:11¹³ Nto akweek, mbo ng’eetaabiya, ‑mōōchoosyē ōyēyē ng’al chēē kāroomēch.- 3:13 Kala. 6:9¹⁴ Yoo mākoonyitē ꞉chii lōkōōywēchu kēēsirwook, kumāchāktōōs ōnkēt chiichoo ‑āmōōbuurtē keey sukumuy ꞉inee nkit. ¹⁵ ‑Mōōyib chiichooto kuu buunyoo, nteenee ōyisu kuu tuubchēēt.- 3:15 Mat. 18:15-17; 1Tēēs. 5:14

Kāā-āmiisēēt

¹⁶ Kunyoo, kukōōnook ꞉Yēyiin kaalyeet ākookoy ām keel ake tukul, kuuyu inee nkit ꞉nyēē kōōnu kaalyeet. Kuriibook ꞉Yēyiin.- 3:16 2Kōōr. 13:11¹⁷ Āsirwook ꞉anii Bāwulō kāāsubooyiisyooni ām āwunyuu nkit. Wuu nyiitēnyi ꞉wōlēē ātiinkyintooy ꞉anii āwut barwa ake tukul.- 3:17 1Kōōr. 16:21¹⁸ Kōōbēruurook tukul ꞉Mokoryoontēēt Yēēsu Kiriistō.