Paulus wasi atyahy mamuna ikesy
ti ribun matohak mamin ti nus
Korintuske
Tun a khatu malosu kitab ne
Heitlulswo nus Korintus neke nus lanke ma kimin ti lasmyer Akhayake. Ti nus desike iry Korintus-are ribun a lenla rhe ity Ebutke, kali kyalamo rou o rsakitil ti adarare, ode wait ktela raalanare ribun atyat. Paulus neke i ne inety a Brit Eraske a kmuna bai nus Korintuske ne, dendye iry Korintus-are dum a rtohak ti ity Ebut Yesuske (Kis. 18:1-11).
Kyoat Paulus byetik toha nus Korintuske, desikeo iry a Kristen-are wait uskwe khatu mahe tel ma matun a khyeke it a mya, neke ani Apolos (Kis. 18:24–19:1). Apolos neke, i ne isaur Paulus wasi karyake, neke yajar iry a Kristen a mamin ti nus Korintuske (1Kor. 3:6).
Ode hulke enai ne kyelak eta bonyo, iry a Kristen mamin ti nus Korintus desikre rkesy atyahkye ma rosa ti Paulus. Khyali desike mane, Paulus kyesy wasi atyahy ne ma ne. Ode Paulus wasi atyahy ne yal ma hyalas iry Korintus-are ti nam raenanare, neke kisike ksyurat ode ktyerik sir ti wait ktela lema mlaire. Paulus syurat ode tyerik sir, kali ramorif ne lema rety ral sasamke; keskyede ti iry desikre dum a rdakin Apolos dete lemamo usu khatu salik, klala lema rdakin Paulus de. (Matos ti pasal 1:10-12; 3:1-6.)
Paulus dakun o hyalas iry Korintus-are, ti ratanuk a ktela insake ne. Kali ti iry desikre wait atyahy rakeskye, neke rena Paulus kolnye: “Lemamo ity neke lema tasa, mamode ity wait mormyorifare nelnyely e?” Ode rena huruk ma rbohe: “Kolkyabei ma kolnye saw o lai ma wamfwetke Kristen a i, keskyede lai-na lema Kristen a i: desikeo musti mo wamfwet desike ibrai lai desy e?” Nam desikre mumu ne Paulus tyanuk ti pasal 7ke.
Iry a Korintus nekre rena Paulus huruk, ma rbohe, “Bisa ma iry Kristen-are ra heal raabar ti adarare ne ta lema de?” Desikeo Paulus hyalas sir ti atyahy ne dakun.
Ode Paulus syurat ode tyerik iry desikre dakun, kali iry desikre dum a rbitil tenatare ma atat, ti ranal hehe malkyakaw manosy Hulasokwe Memeanke ne.
Ode ti pasal 13ke, Paulus yajar sir ti ktela ralobak irire bain-bain ne. Ode lyosu ti sir ohe ktela loblobak neke eras ma kbyilak ktela ida nekre mumu.
Ti atyahy ne Paulus wasi snuratare, ode nam iajarare ribun a nggora dakun.
Kitab ne kisike kolnye
1. Paulus syalak eraske ba ti Hulasokwe ti eras inal ti iry Korintus-are ne (1:1-9).
2. Paulus iten ma iry matohak mamin ti nus Korintuske, kete it de iilir yor it (1:10–6:20).
3. Paulus wasi snuratke ti ktela insake (7).
4. Snuratke ti kotw a raabar ti adarare ne (8:1–11:1).
5. Snuratke ti wamfwetare ror wamwanire ti ktela rawahuk sir ma rasambayan ne (11:2-16).
6. Ksala rawahuk sir ma raknam o renw ma rnenas ity Ebut Yesuske ti imaty ne (11:17-34).
7. Hulasokwe Memeanke kyal hehe malkyakakwe ma ity ne lema mais (12–14).
8. Iry matohakare ana rmorif huruk kola Yesuske (15).
9. Snuratke ti iry Korintus-are ti khyali kuban a rawahuk ma rasaluk iry matohakare ti nus Yerusalemke (16:1-4).
10. Paulus kyus wasi atyahkye (16:5-24).
1Paulus wasi tun mamuna ti atyahy ikeskye
1-3Waikw o hatnimakw e! Atyahy neke kkwesy ti e, neke ti Hulasokwe wasi iry ribun matohak mamin ti nus Korintuske. Hulasokwe yilik e, ma ei ne wasi iry a e, ma nelnyely a e de, ti minety ral sasamke myor Yesus Kristuske ne. Kola dene Hulasokwe yilik wasi irire mumu, neke iry matohak ti ity Ebut Yesus Kristuske, ti wen kabei ta kabei bo, ma Yesus Kristus neke ika Amam Lan ti sir, kola dene ika Amam Lan ma ity dakun ne.
Yaw neke Paulus yaw, ma Yesus Kristuske syusu yaw ma kuka nyaso ti I, ma ktyoha Hulasokwe ibuke. Yaw neke kor ity wait a Sostenes, ara miru ne myosa atyahy ne ti e. Lemade aramy miten ma lemamo eras manosy ity Amat Hulasokwe, yor Anan ity Ebut Yesus Kristuske kimin a e. Ode aramy miten huruk ma inaka eras manosy Hulasokwe, ode Kristuske, neke kyor ei ne mumu dakun.
Paulus syalak eraske ba ti Hulasokwe ti eras inal ti iry a Korintus-are ne
4Waikw o hatnimakw e, kyaki-kyaki ne kswalak eraske ba ti Hulasokwe khyali e. Hulasow ne, I ne kusakitil ode kuou ti I ne. Ode kswalak eraske ba ti Hulasokwe, kali khwe ohe Hulasokwe syusu rala eraske ti e, neke yal wasi eras sai ta sai ti e, ti minety ral sasamke myor Yesus Kristuske ne. 5Ode khyali myety ral sasamke myor Yesus Kristuske, lemade Hulasokwe yal eras mausw desike ti e de, neke bisa ma mhye ei lulw o lyaw ti sai ta sai bo, ode bisa ma mlyosu Hulasokwe tunanare wasi kbuanare ti irire. 6Hehe malkyakaw a Hulasokwe inal ti e desy1:6 Tunke khatu kibohe, hehe malkyakaw, neke ti tel mabuske desike kbyohe, karunia, dete lemamo talenta dari Roh Kudus. ksyusu ohe, Brit a aramy miabrita ti e desy, ti kihali Kristuske ne mlay. 7Lemadendye Hulasokwe yal hehe malkyakaw desy mumu ti e de, ma lema ktyol ti e elik. Mamode bisa ma myal hehe desy ma mkyarya sai ta sai ti Hulasokwe. Ti kyoat desy dakun o sew kyaki nekre, myal ralamy kusunare ma mikita sew ity Ebut Yesus Kristuske ti ima huruk ne.
8Ode ity Ebut Yesus Kristuske ana yalkyaw wasimy tohtohakke, ma malkyakaw ode kimbwakar,1:8 Tunke khatu kimbwakar neke ti tel mabuske kbyohe, “teguh, kokoh, kuat yang tidak goyang.” nini kyait teike ti kyoat yulak I huruk mai nuske ktem ne. Dendye kyoat a yulak I mai nuske ktem ne huruk, desikeo lema mika salamy, de nelnyely a e ti Hulasokwe. 9Hulasokwe ana yala koldyesy, kali lema bisa ma imluak wasi tnyetakke it elik, de kyaki-kyaki ne nam itetakare yala ma kdi ti mumu. Ode I ne yilik e ma myety ral sasamke myor Anan ity Ebut Yesus Kristuske de.
Paulus iten ma iry matohak mamin ti nus Korintuske kete it de iilir yor it
10Waikw o hatnimakw e! Ity Ebut Yesus Kristuske yal wasi haretke ma yaw, ma kal ralakkwe kralake ma kuten toha e ma musti mo mimorif ne myety ral sasamke, de kete mihe a misakar e. Ode musti mo mryekan a mlakye, ode myohut ti sasam ma mtyoha. 11Waikw o hatnimakw e, ktwanuk koldyesy, kali iry mamin ti Kloe wasi sekye kralake rma ma rahes ma yaw ohe, ei neke it de iilir yor it. 121:12 Kis. 18:24Ode rlosu ohe ti ei neke dum a rbek ti ror yaw, ode dum a rbek ti ror Apolos, ode dum dakun o rbek ti ror Petrus,1:12 Any a Petrus neke tel Yunanike desy. Klala ti tel Ibranike rabuk i o, Kefas. Kefas neke Petrus ani idake desy dakun. Lemade kyoat Paulus ikesy kitab Korintus ne, desikeo kyesy any a Petrus ne o Kefas. klala dum a rbek ti ror Kristuske.
13Waikw e, mryekan o nam miala desikre eras e? Lema eras! Kali nam miala desikre kola dene Kristuske tenanke ti kihe a kisakar i ne! Ta mryekan o yaw ne kmwaty ti tul masanwalw ike ma klwitan eta e e? Ta mryekan o irire ral anikkwe ma rbabtis a e e? Nam desikre mumu neke lema mlay! 141:14 Kis. 18:8; 19:29; Rm. 16:23Dendye kswalak eraske ba ti Hulasokwe, kali ti ei neke lema kbwabtis irire ribun, de cuma mo kbwabtis irkye enaru bo, neke Krispus yor a Gayus. 15Dendye lema irkye it a bisa ma tyanuk ma byohe, “Paulus yal anike ma byabtis ity, ma ttoha i.” Lema koldyesy! 161:16 1Kor. 16:15De nenmo knwenas kal ohe, kola kal Yesuske Anike ma kbwabtis Stefanus yor wasi sekye kralake dakun. Keskye lema knwenas o kyalake kbwabtis iry salik dakun ta lema. 17Kali Kristuske lema yaso yaw ma ti kbwabtis irire bo, de yaso yaw ma musti mo kbwa ti kabrita Brit Eraske, kali karyaakkwe desy. Ode kyoat a kabrita Brit Eraske, desikeo lema kabrita kyor irkye wasi hehe irekanke. Kali kolnye kabrita kyor irkye wasi hehe irekanke, desikemo haret a manosy Kristuske imaty ti tul masanwalw ike ne, lema kika kbuan.
Kristuske imaty ti tul masanwalw ike ne ksyusu haret manosy Hulasokwe ode ksyusu hehei lulw o lyaw manosy Hulasokwe dakun
18Lemade waikw o hatnimakw e! Iry mabasara mamaty rala nekre rrekan ohe, Brit a Yesus Kristuske imaty ti tul masanwalw ike ne, ma isos irkye wasi lim o sal ba ne, neke brit a ktemke desy. Keskyede iry a Hulasokwe iaorif a ity ne, the ohe Brit a Yesus Kristuske imaty ti tul masanwalw ike ne, ne kiaorif a ity ne. Desike ne ksyusu Hulasokwe wasi haret malkyakakwe ma desy. 191:19 Yes. 29:14Kali rkesy ti Kitab Lanke kralake ma kbyohe,
“Hulasokwe ana iskyui-iskyay nam a iry mahei lulw o lyaw nekre rarekanare,
ode ana bya etno eta iry mahei lulw o lyaw nekre wait rekryekire ma lema kdi ti.”
201:20 Ayb. 12:17; Yes. 19:12; 33:18; 44:25Koldyesikemo, kolkyabei ti iry mahei lulw o lyaw nekre de? Ta iry mahe snurat o tnyetak Musa nekre de? Ta iry a mahe tel ma raresitun ti nuske ktem ne de? Klala ti Hulasokwe, desikeo sir ne mumu neke wait hehe desikre ktem bain-bain, kola iry ktemare ne. 21Kali Hulasokwe yohut ma ktyoha wasi hehei lulw o lyakwe ohe, irire lema bisa ma ral wait hehe manosy nuske ktem ne ma rhe Hulasokwe. De yohut ohe, Brit Eras aramy miabrita ne, neke yal ma yaorif iry a matohak ti Iare. Klala ti iry a lema mahe Hulasokwe ne, neke ktyoha sir mo Brit Eras desike brit a ktemke desy. 22Neke iry Yahudi-nare rrekan o Brit Eras desike brit a ktemke desy, kali rbu ma ratos nyatos masalsyalik iare, desikeo nenmo rtohak nam ratomolunare. Ode iry a Yunani-nare rrekan o Brit Eras desike brit a ktemke desy, kali rbu ma ral irkye wasi hehe manosy nuske ktem ne, ma rhe ohe nam ratomolunare mlay ta sal, desikeo nenmo rtohak. 23Keskyede aramy neke, aramy myabrita Kristuske. Kristus neke I ne Hulasokwe isusu I ma ika Raja ode iaorif irkye ne,1:23 Yesuske wasi kmatake, neke ti tel Yunanike o rbohe, Kristus. Klala ti tel Ibranike o rbohe, Mesias. Kmata deru neke mais. Ma ti tel Maslyarkwe kmata deru neke kbuanke o, Iry a Hulasokwe isusu ma ika Raja ode iaorif irkye ne. ma I ne imaty ti tul masanwalw ike ne. Brit aramy miabrita desike ne kyala iry a Yahudi-nare ma ralatare ksunw ksyalik. Ode iry a lema Yahudi-nare rrekan o, Brit aramy miabrita desike, brit a ktemke desy bo.
24Keskyede ti iry a Hulasokwe iilik sir ma wasi iry a sir ne, neke dum a Yahudi sir, ode dum a lema Yahudi sir. Sir neke rhe ohe, Kristus neke Hulasokwe wasi haretke desy, ode Hulasokwe wasi hehei lulw o lyakwe desy. 25Klala iry salik rrekan o Brit Eras desike brit a ktemke desy bo. Keskye mlay bain o Brit Eras aramy miabrita desike ksyusu ohe, Hulasokwe wasi hehei lulw o lyakwe lan, ma kbyilak de kbyilak irkye wasi hehe manosy nuske ktem ne. Ode iry salik dakun neke rrekan ohe, ktela Hulasokwe iala ti Kristuske ne lema malkyakaw. Keskyede ktela Hulasokwe iala ti Kristuske desy ksyusu ohe, Hulasokwe wasi haretke malkyakaw ksyalik, ma kbyilak de kbyilak irkye wasi haretke.
26Lemade waikw o hatnimakw e! Mnyenas wasimy mormyorifare ti kyoat Hulasokwe yabuk e ma mitoha I ne. Kyoat desike irire ti nuske ktem ne rrekan ohe, ti ei neke irkye ru ta telw a rhe ei lulw o lyaw. Ode ti ei ne dakun o irkye ru ta telw rhareta, dete lemamo rety alalan bo. 27Keskye Hulasokwe yilik irire, neke yal sir toha iry mamin nuske ktem ne rarekan ma rabohe ktem a sir ne. Yala koldyesy ma kyala iry mahei lulw o lyaw ti nuske ktem ne ma rmay. Ode Hulasokwe yilik irire dakun, neke yal sir toha iry mamin nuske ktem ne rarekan o, iry desikre lema rber o rtahal ne. Yala koldyesy ma kyala iry mahareta mamin ti nuske ktem ne ma rmay. 28Ode iry a lema manety alalanare, ode iry a rahmway sirare, neke sir ne lema rber o rtahal ma ktyoha nuske ktem ne kibuke, iry nekre Hulasokwe yilik sir de. Hulasokwe yala koldyesy ma ksyusu ohe, nam sai irkye iresi i ti mumu ti nuske ktem ne, mlay bain o lema kika kbuan. 29Kali koldyesike mane lema irkye it elik ti nuske ktem ne, bisa ma byitil tenanke daku Hulasokwe. 30De Hulasokwe myesan a yeti yahuk e ma myety ral sasamke myor Yesus Kristuske, ode kyosy a Kristuske, bisa ma the Hulasokwe wasi hehei lulw o lyakwe. Ode khyali Kristuske imaty ma ilitan eta ity ne, dendye Hulasokwe yohut ma mlay a ity ti I, ode yala ity ma ity neke iry a nelnyely a ity ti I, ode yaditi ity toha haret lim o sal ti kihareta ity ne. 311:31 Yer. 9:24Lemadendye kola dene rkesy ti Kitab Lanke ma kbyohe, “Kete mlyeru animire ti ktela mialanare, de musti mo mlyeru ity Ebutke Anike ti ktela ialanare bo.”
2Paulus yabrita Yesus Kristuske ti imaty ti tul masanwalw ike ne
1Waikw o hatnimakw a matohak e! Mhye ohe kyalake kbwa ti kunait e desy, desikeo klwosu Hulasokwe wasi rekryeky a kihunik i ma irire lenla rahe ne ti e. Ode kyoat klwosu rekryeky desikre ti e, desikeo lema kal tun hehe manosy nuske ktem ne ma ktwanuk ti e. Ode lema kal tun atatare dakun ma ktwanuk ma kal ma krwubut a e. 2Kali khyehyeike kohut ti ralakkwe ohe, kolnye kor a e ti desy nggora, desikeo lema ktwanuk namit-namit ti e. De ktwanuk Yesus Kristuske myesan ti e bo, neke Iry a Hulasokwe isusu ma ika Raja ode iaorif irkye ne, ti rabakw a I ti tul masanwalw ike ma imaty ne. 32:3 Kis. 18:9Ode kyoat kor e ti desy, desikeo kkwoman tenakkwe o lema kala kal ma kabrita Brit Eras ne ti e, ma khyury ma kumtaut ma kamlulurw. 4Dendye kyoat kabrita Brit Eraske ti e ode kajar e, desikeo lema kal tun hehe manosy nuske ktem ne, ma kal ma krwubut a e. Keskyede Hulasokwe Memeanke kamalkyauke kmyesan a kkyarya ti ralamire, ma ei neke bisa ma mtyohak ohe, tun kutanuk desikre mlay. 5Lemade kal ktela maoly desy ma kabrita ode kajar e, mamode ei neke mtyohak Hulasokwe wasi nyanoke, desike ne lema khyali hehe manosy irkye. De kbwu ma ei neke mtyohak Hulasokwe wasi nyanoke, khyali Hulasokwe amalkyauke kmyesan bo.
Hulasokwe Memeanke ksyisy hela Hulasokwe wasi hehei lulw o lyakwe
6Waikw o hatnimakw e! Kolnye aramy mtyanuk nyano manosy Hulasokwe, ti iry a wait tohtohakare malkyakaw ma kimbwakar ne, desikeo aramy myal hehei lulw o lyakwe ma aramy myajar ti sir. Keskye hehei lulw o lyaw aramy minal desike lema kyosy nuske ktem ne, ode lema kyosy mahareta selsel ne dakun, kali ana lema soso bonyo, iry desikre lema ramin ma rhareta de. 7De hehei lulw o lyaw a aramy minal ma miajar desike kyosy a Hulasokwe. Ode hehei lulw o lyaw desike, ksyusu Hulasokwe wasi rekryeky ihunik ti kyoat nuske ktem ne lenla kimin ne. Kyoat desike Hulasokwe yohut ti wasi rekryeky desy de, ma ity neke tor I de tamin ti wasi haretke ode wasi madelafke. 8Keskyede ti iry mahareta mamin ti nuske ktem ne, lema irkye it a hye Hulasokwe wasi hehei lulw o lyaw a, isusu ti wasi rekryeky desy. Kali kolnye iry desikre rhe rekryeky desike kbuanke, desikemo lema rbakw a ity Ebut Yesuske ti tul masanwalw ike. Keskye the ohe, ity Ebut neke wasi haretke ode madelafke mausw ksyalik. 92:9 Yes. 64:4Keskye rekryeky mahunik i desike kola ne rkesy ti Kitab Lanke ma kbyohe,
“Nam a Hulasokwe isosan kita iry a manal ralat a kralanare ti I ne,
neke irire lenla ratos elik, ode lenla rtomolu elik, ode lenla rkoman elik dakun.”
10Keskyede Hulasokwe yal Memeanke, ma ksyisy hela wasi rekryeky ihunik desike ma ity de. Hulasokwe Memean neke bisa ma ksyisy hela nam nekre, kali Memean desike kyatos ode khye nam ribun lan mamin ti lait o lasmyer ne, ma ti kyal nam maba demdemw mamin ti Hulasokwe ralake krala ne mumu. 11Kali lema irkye it hye iry salik ralake kralake, de iry desike myesan a hye ralake kralake bo. Koldyesy dakun o Hulasokwe Memeanke kmyesan a khye Hulasokwe ralake kralake bo. 12Dendye ity neke lema tal hehe manosy nuske ktem ne ma the Hulasokwe ralake kralake. De Hulasokwe yal Memeanke ma ity de, mamode bisa ma the ktela eras ribun Hulasokwe inal ma ity ne, ti kinosy rala eraske ne.
13Lemadendye ktela ribun Hulasokwe inal ma aramy desikre aramy mtyanuk ti e de. Ode kyoat aramy mlyosu ktela ribun desikre ti e, desikeo lema aramy myal tun hehe manosy irkye ma aramy mtyanuk, de aramy myal tun manosy Hulasokwe Memeanke, ma aramy mtyanuk. Lemade kyalamo aramy mlyosu tun Hulasokwe Memeanke kiajar desikre ti iry a Hulasokwe Memeanke kimin ti sir ne. 14Keskyede iry a Hulasokwe Memeanke lema kimin a sir ne, lema rou nam Hulasokwe Memeanke kiajarare, kali rrekan o nam Hulasokwe Memeanke kiajar desikre nam a ktemare desy bo. Ode lema bisa ma rhe nam Hulasokwe Memeanke kiajar desikre kbuanare, kali Hulasokwe Memeanke kmyesan a bisa ma kyala irire ma rhe kbuanare bo. 15Dendye iry a Hulasokwe Memeanke kimin ti sir ne, bisa ma rbihy rhe nam a mlay ribun nekre kbuanare. Klala iry salik a lema bisa ma rbihy rhe iry a Hulasokwe Memeanke kimin ti sir ne ralat a kralanare. 162:16 Yes. 40:13Kola dene rkesy ti Kitab Lanke ma kbyohe,
“Ese bisa ma hye nam ity Ebutke irekanare de?
Ode ese bisa ma syurat I de?”
Keskyede ity a Hulasokwe Memeanke kimin a ity ne, nam tarekanare kola Kristuske irekanke.
3Iry matohak mamin ti nus Korintuske it de iilir yor it
1Waikw o hatnimakw e! Kyoat heit a kunor a e desike, lema bisa ma ktwanuk soru nam ti e, kola nam kutanuk ti iry a Hulasokwe Memeanke kihareta sir ne de. De cuma mo bisa ma ktwanuk ti e, kola dene kutanuk ti iry a nuske ktem ne kihareta sir a nggora ne. Kali ei neke nenmo mtyohak ti Kristuske, dendye wasimy tohtohakke lenla malkyakaw. Lemade nam kutanuk ti e ne, kola ne nam kutanuk ti naman kakanare ne bo. 23:2 Ibr. 5:12-13Neke naman kakanare lenla bisa ma ra kotw a ngkoranare, de renw a suskwe kwenke a nggora. Kola ne e dakun, ma heit a kajar e a kyor tun a mran nekre bo, kola dene suskwe kwenke ne, de lema kajar e a kyor tun a masusmwatare, kola dene kotw a ngkoranare ne. Kali ti kyoat desike wasimy tohtohakke lenla malkyakaw, dendye lenla bisa ma mhye ktela kiba demdemw nekre kbuanare. Ode ma ti kyait senweke dakun, lenla bisa ma mhye kbuanare dakun. 3Kali ei ne myola iry a nuske ktem ne kihareta sir a nggora ne. Ktwanuk koldyesy kali it de syoi rala it, ode it de iilir yor it. Ktela desike ksyusu ohe, mimorif ne myola iry a lema mahe Hulasokwe ne! 43:4 1Kor. 1:12Kali kolnye ti ei neke dum a rbek ti ror yaw, ode dum dakun o rbek ti ror Apolos, desike ne ksyusu ohe, wasimy mormyorifare kola dene iry a lema matohak ti Kristuske ne wait mormyorifare.
Hulasokwe wasi iry a makaryaare mais sir bo
5Koldyesikemo mryekan o esei ne Apolos ne de? Ode esei ne yaw ne de? Aramy neke Hulasokwe wasi makarya aramy bo. Ode kyoat aramy myabrita Brit Eraske ti e, desikeo ei ne mtyohak ti Kristuske. Ode aramy ne dakun o, it o it neke cuma mo aramy mkyarya karya ity Ebutke inal ma aramy ne bo. 63:6 Kis. 18:4-11,24-28Ode ti ara wasimy karya ne, Paulus yaw ne kkway a hinkye, neke kabrita Brit Eraske kmuna ti e. Maktei o Apolos neke mya ma yal werke ma tyubw, neke yajar Hulasokwe tunanare ma ktyabal ti e. Keskyede Hulasokwe I ne iala hiny desy ma kituhw ne, neke yal mormyorif harharkwe ti e ma desy, ma kibai lulkwe ne wasimy tohtohakke kbyaa kbya nini malkyakaw. 7Dendye ti karya ne, iry a matan a hinkye, ode iry a manal werke ma itubw ne, neke kete tleru sir ti wait karya desy. De tleru Hulasokwe Anike, kali I ne iala hiny desike ma kituhw ne. 8Ode iry a matan hinkye, ode iry matubkwe, deruke mais sir bo, kali karyaat desikre wasi kbuanare mais. Ode ana Hulasokwe yal ksewanke ti it o it, ma ktyoha wait karya rakarya desikre. 9Kali aramy miru neke Hulasokwe wasi makarya aramy, ma aramy miru neke mkyarya ti I. Ode ei neke myola ne Hulasokwe wasi boke.
Iry matohak ti Kristus nekre rola sekye ode Hulasokwe wasi makaryaare rola iry masadiri sey desy
Waikw o hatnimakw e! E dakun o myola ne Hulasokwe wasi sekye. 10Ode Hulasokwe ralake eras ma yaw, dendye yilik yaw ma kuka nyaso, ma kabrita Yesus Kristuske ti e a kmuna. Kola dene yal heheke ma yaw, ma kswadiri fanderen sey desy, ode iry salik a rsaur wasikw karya desy, neke rsadiri sekye ti fanderen desy. Keskye iry a masadiri sey desike, musti mo rbihy mamamak ohe rsadiri sey desy kolkyabei. 11Kali irkye it a lema bisa ma syadiri fanderen salik, kali cuma mo fanderen sasasam ne bo, neke Yesus Kristuske. Kbuanke o ity neke musti mo ttohak ti Kristuske myesan bo, kali irkye it a lema bisa yeluk fanderen desy elik.
12Ode kolnye Hulasokwe wasi makaryaare rajar nam a mlaire, desikeo kola dene iry masadiri sekye ti fanderenke kyor blyawan kunkuny o bokbok, dete lemamo hatw permatanare, ma sey rasadiri desike ana malkyakaw. Klala kolnye Hulasokwe wasi makaryaare rajar nam a lema mlaire, desikeo kola dene iry masadiri sekye ti fanderenke kyor aw o tnyei bakbak nekre, dete lemamo alyaw klaanare, dendye sey rasadiri desike ana lema malkyakaw. 13Dendye kolnye akye kisorw sey rasadiri desikre, desikeo sey a lema malkyakaw desikre akye ana knya ma ktei. Klala sey a malkyakaw desikre, akye lema bisa ma knya. Ode kyosy a ktela akye kina ta lema kina ne, irire mumu neke bisa ma ratos ma rhe ohe, karya kabei desike malkyakaw ta lema. Koldyesy dakun o ti sew a Kristuske ima huruk ne kmya, ma yukun tun ti irkye, desikeo ana byihy a it o it neke wasi karyaare, kola dene yal akye ti karya desikre, ma ksyusu ohe karya kabei mlay ta sal. 14Dendye kolnye Kristuske yohut ohe, wasi iry makarya desikre nam raajarare mlay ode kyal nini nam, desikeo ana yal ksewanke ti sir. 15Klala kolnye yohut ohe, wasi iry makarya desikre nam raajarare lema mlay, ode lema kyal nini nam, desikeo ana lema yal ksewanke ti sir. Keskyede sir neke ana Hulasokwe iaorif a sirke bo, kola ne iaditi sir toha akye kralake ne.
163:16 1Kor. 6:19; 2Kor. 6:16Ode lema mhye ohe, miktemtem ne Hulasokwe Seike ne e e? Ode lema mhye o Hulasokwe Memeanke kimin ti ralamy kralanare e? 17Mnyenas! Hulasokwe Seike nelnyelnyely. Ode ei neke Hulasokwe wasi Sey a e. Dendye esei desike iskyui-iskyay Hulasokwe Sey desy, ana Hulasokwe yukun i o ksunw ksyalik.
18Ode ti ei neke dum a mryekan o mhye ei lulw o lyaw de, keskye nam mirekan desikre ktyoha nuske ktem ne kirekanke bo. Dendye kete mryekan koldyesy, kali kolnye mryekan koldyesy, desikeo mmyesan a mikakmet a tenamire ma desy. Kali ti Hulasokwe, iry maoly desikre lema rhe namit-namit! De esei desike byu ma hye bain-bain a hehei lulw o lyaw manosy Hulasokwe, iry desike musti mo lyura ma nuske ktem ne rtanuk ti i ma rbohe, i desike ktem a i. 193:19 Ayb. 5:13Kali hehe manosy nuske ktem ne, Hulasokwe byohe hehe desikre mumu ne ktem bakbakas. Kali rkesy ti Kitab Lanke de, ma kbyohe,
“Kyoat irire rrekan ohe, rhe ei lulw o lyaw ma ktyoha nuske ktem ne kirekanke,
ana Hulasokwe yala wait rekryeky desikre ma lema kdi ti.
Ode iry desikre dakun o rola dene
bitbitikke ti kisbitik a sir ne.”
203:20 Mzm. 94:11Ode rkesy ti Kitab Lanke dakun ma kbyohe,
“Biar ma irire rrekan ohe,
rhe ei lulw o lyaw,
keskye ity Ebutke hye ohe,
nam iry desikre rarekanare lema kika kbuan elik.”
21Lemadendye kete mbyitil tenamire ti mitoha irit-irit ne de, kali Hulasokwe yal wasi makaryaare mumu ti e, ma rety eraske ti e. 22Dendye kete mbyitil tenamire khyali Paulus yaw ne, dete lemamo khyali Apolos, ta khyali Petrus3:22 Any a Petrus neke ti tel Yunanike ma desy. Klala ti tel Ibranike ani a Kefas. Kefas neke Petrus ani idake desy dakun, lemade kyoat Paulus ikesy kitab Korintus ne, desikeo kyesy any a Petrus ne o Kefas. dakun. Kali Hulasokwe yal nam ribun mamin ti nuske ktem ne mumu ma kyety eraske ti e. Dendye mmyaty ta mmyorif, ode nam madi ti e ti senwe, ode nam madi ti e ti taras ana mama ne dakun, neke nam desikre mumu neke, Hulasokwe yal ti e ma wasimy. 23Ode ei neke Kristuske wasi e. Ode Kristus neke Hulasokwe wasi I.
4Kristuske wasi nyasoare
1Dendye waikw o hatnimakw e, musti mo mryekan ohe, yaw neke Paulus, ma kor Apolos neke Kristuske wasi makarya aramy bo. Ode yaso aramy ma aramy mbya ti mlyosu Hulasokwe wasi rekryekire, ti heitlulswo kihunik i desy.4:1 1Kor. 2:12Kola dene makaryaare musti mo kyaki-kyaki ne rkarya ma ktyoha wait amam lanare rabuare, ma ksyusu ohe sir desike ratotomolu tel. 3Keskye kolnye mbyihy a yaw ma myohut ohe, wasikw karya ne eras ta lema, ta kolnye iry salik a rbihy a yaw dakun ti karyaakw ne, desyo krwekan mo lema nam. Ode yaw ne dakun o lema kmwesan a kbwihy tenakkwe ma kohut ohe, karyaakw ne eras ta lema. 4Kali biar ma krwekan ti ralakkwe krala ne ohe, lema kuka salakw, keskyede lema khyali desy mane ksyusu o, yaw ne mlay a yaw. De cuma mo ity Ebutke myesan a bisa ma byihy a yaw, ma yohut ohe, yaw ne sal yaw ta lema. 5Dendye waikw o hatnimakw e, kete mbyihy irire ma myohut ohe wait karyaare eras ta atyat, kolnye lenla kyait sew a ity Ebutke ima huruk ne. Kali ana I ne ilosu nam mahunik i ti kelerakokke, ode ana syisy hela nam mahunik i ma irire rareky ti ralat a kralanare ne. Ode ti sew desy dakun o, ana Hulasokwe byitil it o it ma ktyoha nam raalanare.
6Lemadendye waikw o hatnimakw e! Tun kuhliak a nenmo kukesy ti atyahy ne, neke kal mumu ma ksyusu yaw ode Apolos ti ara karyaamire. Kala koldyesy ma ksyaluk e, mamode ei ne bisa ma myajar ma mmyorif mo mtyoha tunke khatu kibohe, “Kete mbyilak nam rakesy ti Kitab Lanke kralake.” Koldyesikemo ana kete mbyek ti myor Hulasokwe wasi makaryake it, ma mitun bakbak ma mbyitil makarya desy. Klala mihmway Hulasokwe wasi makarya salik.
7Kolkyabei mane bisa ma mires ma mtyanuk ohe, eras e ma mbyilak iry salik ne de? De lema mhye o eras ribun mitot desikre, Hulasokwe yal mumu ti e ma desy e? Koldyesikemo, kyanmwane mibitil tenamire ma atat, kola ne mibohe eras ribun mitot desikre kinosy amalkyaumire kimesan ne de? Mnyenas! Eras ribun mitot desikre, lema kyosy amalkyaumire elik-elik, de kyosy a Hulasokwe myesan bo. 8Ode mryekan o ei neke wasimy heheke malkyakaw mumu de, ma lema ktyol elik e? Ode mryekan o mhye ei lulw o lyaw ti sai ta sai bony e? Mane mibitil tenamire ma atat, ma myala tenamire kola dene mika raja ma mhyareta myor Kristuske, klala aramkye lema! Edo eee! Lema koldyesy elik-elik. Kali kolnye mika raja myor Kristuske de, desikemo aramy mdyakin dakun, ma bisa ma aramy mtyoha e ma taktemtem a thareta tor Kristuske.
9Keskye krwekan mo, ti Kristuske wasi nyasoare mumu ne, Hulasokwe yal aramy ti wen mamin ti lyakwe. Ma aramy neke, irire rala aramy kola iry a rakumak ti yatke kralake ne,4:9 Tunke khatu kibohe, yatke kralake neke ti tel mabuske desikeo kbyohe, dalam perang. ma ana rtunik tnyetak matmyatkye ma aramy ti ribunke khahake. Koldyesike ma nyaso manosy laitare, ror iry mamin nuske ktem ne miktemtem ne misu aramy. 10Ode irire rrekan ohe, aramy neke ktem aramy, kali aramy myabrita Kristuske. Keskyede ei ne mryekan o mhye ei lulw o lyaw, kali myety ral sasamke myor Kristuske de. Ode irire rtomolu e, klala lema rtomolu aramy. Ode irire ralan a e, klala lema ralan aramy. 11Ode kyala kyosy kabei ma ti kyait senwe kyalamo aramy mimlar, ode aramy mbyatu, ode rabit mamin ti ara tenamire ne kisu-kimahy de, ode irire roban de rtaba aramy, ode lema kika ara wasimy sey ma aramy mimin ti. 124:12 Kis. 18:3Ode aramy mkyarya ma ara maslyesamire, neke aramy myal ma mbyuak nam ti ara tenamire. Ode kyoat irire rahmwai aramy, desikeo aramy miten ma ity Ebutke yal eraske ti sir bo. Ode kyoat roban de rtaba aramy dakun o, aramy myalkyaw ara ralamire bo. 13Ode kyoat irire rahes aramy ma ara animire kiray, desikeo aramy mhyalas sir eras-eras bo. Ma ti kyait senwe, iry mamin nuske ktem ne rrekan o, aramy neke myola dene makiny a raotuk bai ketake ma kihon busu ne.
14Lemade waikw o hatnimakw e! Kkwesy nam nekre mumu ti e, neke lema kyala e ma mmyay, kali kanggab a e ne anakw elik a e. Dendye kkwesy nam nekre ti e, ma kswurat a e, kali klwobak a e. 15Kali biar ma irkye ribun sir a ksyalik, neke rajar e ma mimorif ne mtyoha Kristuske, keskyede lema mika amamy ribun, de cuma mo amamy a yaw kmwesan bo. Kali yaw ne kabrita Brit Eraske ti e a kmuna de, ma mtyohak ti Yesus Kristuske. 164:16 1Kor. 11:1; Flp. 3:17Lemadendye kal ralakkwe kralake bain-bain ma kswurat e, ma mimorif ne mo myorif kola wasikw mormyorifke. 17Kali koldyesike mane kaso Timotius ma bya ti yait a e. Timotius neke kanggab i o anakw elik i ma klwobak a i, ode ktwohak a i ti ity Ebutke wasi karya ne. Dendye kolnye bya ti yait e ti desy, desikeo ana lyosu ti e ma minenenas wasikw mormyorifke, ti kutoha Yesus Kristuske ne. Neke wasikw mormyorif desike ktyoha nam kuajar ti ribun matohak mamin ti hnu kabei ta kabei bo.
18Keskyede ti ei neke dum a mbyitil tenamire ma atat, kali mryekan ohe ana lema kmwa ma kait a e de. 19Keskyede ana lema soso bonyo, kmwa ma kait a e, kolnye ity Ebutke byu. Ode ana ti desike nenmo katos iry a mabitil tenatare ma atat ne, ma khwe ohe, sir neke wait haretke kyosy Hulasokwe Memeanke bain-bain ta, cuma mo ratun bakbak bony mane de. 20Kali kolnye Hulasokwe ika Raja ma hyareta wasi irire ralat a kralanare, desikemo lema tatos ti tun ratanukare bo, de musti mo tatos ti wait mormyorifare dakun. Kali Hulasokwe yal wasi haretke ma yala wasi irire ma totnyo yabitare mumu ne eras. 21Dendye kolnye kmwa ma kait a e, desikeo mbyu ma kala sai de? Mbyu ma kmwa o kkwumak obobanke, ma kal ma kajar e, ta mbyu ma kmwa ma kswusu wasikw loblobakke, kyor ral lublubke ti e de?
5Iry matohakare kete mika lui myor iry matohak maala ktela atyatare
1Edo, waikw o hatnimakw e! Ktwomolu britke o, ti iry matohak a e neke irkye it a yala tot atyatke, neke yal ama-na sawa harharkwe ma isaa yor i. Khweran! Kali iry a lema matohak ti Hulasokwe dakun ne lema rala koldyesy, kali rbohe ktela maoly desike atyat!5:1 Ul. 22:302Lemade khyali ktela maoly desy, musti mo mmyay. Keskyede lema mmyay mhye, de mbyitil tenamire ma atat bo. Koldyesike ne lema eras, de musti mo ei neke ralamire ksyal ti ktela maoly desy. Dendye myesak lakhidik iry maala ktela atyat maoly desy ba toha e. 3Ode ktwanuk koldyesy, kali biar ma soso yaw toha e, keskyede ti ralakkwe krala ne, kola dene kumin ti desy ma kunonor a e ne bo. Dendye kohut maktei de, ma iry maala ktela atyat maoly desy, musti mo myukun i. 4Lemade kolnye iry matohak ti ity Ebut Yesuske ne miwahuk a e, desikeo ralakkwe krala ne kinonor a e ti desy dakun. Ode ity Ebut Yesuske wasi haretke kinonor a e dakun. 5Dendye musti mo myal ity Ebut Yesuske wasi haret desy, ma myal ma myesak iry desy ba toha e. Neke myal i ti ngkeskwaure wait uskwe khatuke, ma yala i ma masunkwe kdyan i koldyesy nini tyunik tota atyat desike ba. Mamode ana sew a ity Ebut Yesuske ima huruk ne, desikeo ity Ebutke yaorif iry desy.
6Dendye lema eras ti mibitil tenamire ma atat ne. De musti mo mhye tun a inahliakke ti kibohe, “Biar ma ragi ne tebikan bo, keskye kolnye ral ma rahora teriguke, desikeo terigu desike ana kbyes ma lan.” Neke kbuanke o, biar ma iry matohak ei neke sasam a yala tot atyatke bo, keskyede ana tot atyat iala desike, bisa ma kdyaul a iry matohak ei ne mumu.5:6 Gal. 5:97Koldyesikemo myotuk lakhidik totamy atyat manety lim o sal desikre ba elik! Kola dene iry a Yahudi-nare rbisak ragike ba ti wait sew lan Paskahke. Kolnye myala koldyesy, desikeo ei neke Hulasokwe wasi iry a e, ma nelnyelnyely a e, kola ne terigu a lema ranal ragike ti ne. Ode mlay bain o ei neke nelnyelnyely a e de. Kali Kristuske myaty ma lyitan eta ity, ma syos ity wait lim o sal ba de, kola ne iry a Yahudi-nare rakotal dombake ananke ma raabar ti sew lan Paskahke ne.5:7 Kel. 12:58Lemade waikw o hatnimakw e, mmya ma totuk ity wait tot atyat o lim o sal desikre ba mumu, kola dene iry a Yahudi-nare ti rabisak ragi desy ba ne. Iry a Yahudi desikre ra roty lema ranal ragi tike, ti kyoat rala sew lan Paskahke. Koldyesy dakun o ity neke musti mo tmorif harharw ma ity ralatare nelnyely, ode tala ktela eras o mlay nekre kmyesan bo.5:8 Kel. 13:7; Ul. 16:3
9Waikw e, heit a kkwesy atyahy salik ti e de. Ode ti wasikw atyahy desike kralake, neke kswurat e kolnye: kete mika lui myor wamfwet ta, wamwany a rahury iry salik koy-kay ma rala ktela atyatare ne. 10Keskyede tun kutanuk desike kbuanke o, lema kbwu eta e ma mitun a myor iry a lema matohak ti Kristuske ne. Kali the ohe, iry desikre sir ne kyalamo wamfwetare ror wamwanire it de hyury a it koy-kay ma rala ktela atyatare. Dete lemamo robak ma ramesa nam sai ta sai toha iry salik, ta ral resatare ma rataut irire ma ral lan o hnutat, dete lemamo rsambayan ode rou ti adarare ne. Kali kolnye kbwu eta e ma kete mitun a myor iry maoly desikre, desikemo musti mo mbyetik toha nuske ktem ne elik. Keskye lema ktwanuk koldyesy. 11De tun kutanuk ti atyahy kukesy mamuna desike neke kbuanke o, kete mika lui myor iry a mabohe rtohak ti Kristuske, keskyede ramorif neke rola ne wamfwet ta wamwany a it de hyury a it koy-kay ma rala ktela atyatare. Dete lemamo robak ma ramesa nam sai ta sai toha iry salik, ta rsambayan ode rou ti adarare. Dete lemamo rahmwai irire, ta renw tua ma kyala sir, dete lemamo ral resatare ma rataut irire, ma ral lan o hnutat. Dendye kete mika lui myor iry a mabohe rtohak ti Kristuske, keskye rala ktela atyat maoly desikre. Ode kete miknam a myor sir dakun.
12-13Keskye haretke lema kimin a ity ne, ma tukun iry a lema matohak ti Kristuske ne. De cuma mo Hulasokwe myesan yukun iry desikre bo. Klala ei neke, musti mo myohut ma myukun iry matohak ti Kristuske ne, ti raala lim o sal ne. Kali rkesy ti Kitab Lanke ma kbyohe, “Musti mo myesak iry mahatw desikre ba toha e.”5:12-13 Ul. 13:5; 17:7
6Kete miten iry lema matohak ti Kristuske ne ma rukun iry matohak ti Kristuske ne wait tunare
1Waikw o hatnimakw e! Ti iry matohak e neke, dum a it de yoit sal ti it, ma khyury ma it de iilir yor it. Koldyesikemo kyanmwane minety a wasimy tun desy ba ti iry a lema matohak ti Kristuske ne, ma raohut wasimy tun desy ne de? Ktela miala desike lema mlay! De musti mo miten toha Hulasokwe wasi irire, ma rohut wasimy tunare bo. 2De lema mhye ohe, ana kyait sew a Yesuske ima huruk ne, desikeo Hulasokwe wasi iry a ity ne, ana tohut tun ti iry mamin ti nuske ktem ne e? Ou, ana tohut tun ti nuske ktem ne mumu. Dendye kyanmwane mirekan ohe, tun kakan maola ity wait tun nekre, lema tala tal ma taohut dakun ne de? 3Ode lema mhye ohe, ana Hulasokwe yal haretke ma ity, ma tohut wasi nyaso manosy laitke wait tunare dakun e? Dendye ity neke tala tal ma tohut ity wait tun kakan nekre, ti tamorif sew kyaki nekre dakun. 4Lemadendye kolnye iry matohakare wait tun kakan maoly desikre, desikeo ei ne musti mo mmyesan a myohut wait tun desikre. De kete myety tun desikre ba ti iry a lema matohak ti Yesuske ne, ma rohut tun desikre. Iry desikre ei ne lema myalan sir dakun! 5Ode kyanmwane miala koldyesy ne de? Mryekan o ti iry matohak e mumu ne, lema kika iry mahe ei lulw o lyaw, ma bisa ma yohut wai o hatnima matohakare wait tunare e? Mane minety tun desikre ba ti iry a lema matohakare ma raohut ne de? Ktela miala desike lema mlay! Lemade ktwanuk koldyesy ma kyala e ma mmyay. 6Keskyede ti ei neke it de yoit salke ti it, ma khyury ma it de syorw sala it. Dendye myor waimy matohakare ba ti iry maukun tunke! Ode iry maukun tun desike dakun o lema tyohak ti Yesuske!
7Dendye kolnye ei neke mmyanadu waimy matohakare ti iry a maohut tun lema matohak ti Kristuske ne, desikemo ksyusu ohe sal a e ma desy, kali ktela miala desike lema eras. Klala ktela eraske, neke mlyura ma irire rasal ti e, ta mlyura ma irire rakakmet a e ma ral wasimy namit-namit bo. 8Keskyede ei neke mmyesan a myala atyat maoly desy dakun ti waimy o hatnimamy a matohakare! Neke misal ti sir, ode mikakmet a sir ma myal wait namit-namit dakun. Ktela miala desike atyat a ksyalik!
9Ode mhye deny ohe, iry maala tot atyatare, ana lema ratot nam eras a Hulasokwe isosan kita wasi irire ne, ti wen a Hulasokwe ihareta kola Rajake tike. Dendye kete mryekan ohe nam atyat miala desikre lema nam. Desike ne mmyesan a mikakmet tenamire bony ma desy. Kali iry ana lema matot nam eras toha Hulasokwe ne, neke: iry a maola wamfwet o wamwany a rahury iry salik koy-kay ma rala ktela atyatare ne, ta iry a masambayan ode maou ti adarare ne, dete lemamo iry a maaldoture, ta wamwany a totatare kola wamfwetare ne, ta wamwankye isay wamwankye ne, 10dete lemamo manametke, ta iry a maobak ma mamesa nam sai ta sai bony ne, dete lemamo iry a maenw tua ma kyala sir ne, ta iry a mahmwai iry salik ne, dete lemamo iry a manal resatare ma rataut irire ma ral a lan o hnutat ne. Neke mnyenas! Iry maala ktela atyat maoly desy, ana lema ratot nam eras a Hulasokwe isosan kita wasi irire ne, ti wen a Hulasokwe ihareta tike. 11Ode kyoat lenla mtyohak ti Kristuske, desyo ei neke dum a rala koldyesy dakun de. Keskyede senweke, Hulasokwe syos wasimy lim o sal desikre ba, ma nelnyely a e de. Ode yilik e, ma wasi iry a e, ode yohut ohe ei neke mlay a e de. Hulasokwe yala ktela desikre mumu, kali ity Ebut Yesus Kristuske myaty ma lyitan eta e de, ode kali Memean manosy Hulasow a tasakitil ode taou ti I ne, kkyarya ti ralamy kralanare.
Musti mo tajaga ity tenatare toha ktela atyatare, kali ity tenat nekre Hulasokwe Memeanke seike desy
12Waikw o hatnimakw e! Irire rtanuk ma rbohe, “Bisa ma tala ktela sai ta sai ma ktyoha tabuke bo, kolnye Hulasokwe lema byu eta ktela desikre.”
Desike mlay. Keskyede khwalas sir de kbwohe, ktela taala desikre mumu ne, dum a lema ksyaluk ity. Ode yaw neke lema klwura ma ktela sai ta sai kuala nekre khyareta tenakkwe.6:12 1Kor. 10:23
13Ode irire dum a rtanuk dakun ma rbohe, “Hulasokwe yal koture ma ta ma kimin a ity, neke ity fteitare ksyosan kotw a tana desikre. Ode koture kyor ity tenat nekre mumu ne ana lema kimin ti wen sra eraske, kali ana Hulasokwe ihnutuk nam mamin ti nuske ktem ne mumu ma ktei.”
Dendye mryekan ohe nam sai miala minor tenamire ne, lema nam e? Nam mirekan desike lema mlay! De kolnye mbyu ma myala nam dum, musti mo mnyenas ohe, Hulasokwe yala ity tenat ne, ma lema wamfwetare ror wamwanire it de hyury a it koy-kay, ma rala ktela atyatare, de yala ity tenat ne ma tal ma tleru Anike. Ode ity Ebut Yesuske wasi haretke ma hyareta ity tenat nekre dakun, mane ihaduli nam taala ti ity tenatare ne. 14Ode Hulasokwe yal wasi haretke, ma yala ity Ebut Yesuske ma myorif huruk toha matmyatkye de. Koldyesy dakun o ana yala ity ma tmorif huruk toha matmyatkye dakun. 15Dendye musti mo mhye ohe, ity tenat nekre kiwahuk i ti sasam, neke Kristuske tenanke desy. Lemadendye kete tal ity tenat nekre ma tenaf tor wamfwet atyatare elik. Kali kolnye tala koldyesy, desikemo kola ne tal Yesuske tenanke ma kyenaf kyor wamfwet atyat desikre ma desy. 16Kali rkesy ti Kitab Lanke ma kbyohe, wamwankye isaa yor wamfwetke, desikeo “deruke rawahuk sir ti nam sasamke.”6:16 Kej. 2:24 Dendye musti mo mhye ohe, esei desike yenaf yor wamfwet atyatke, desikeo yor wamfwet atyat desike, deruke rawahuk sir ti nam sasamke de. 17Klala esei desike iwahuk i a yor ity Ebutke ma deruke nam sasam sir, desikeo yor ity Ebutke rety ral sasamke ma desy.
18Lemade ei neke kete wamfwetare ror wamwanire it de hyury a it koy-kay, ma myala ktela atyat nekre, de musti mo soso e toha ktela maoly desike. Kali lim o sal nekre mumu ne atyat, keskye esei desike hyury a wamfwet ta wamwany ma yenaf yor i, desikeo lim o sal iala desike kmyesan kibyata tenanke bo. 19Dendye musti mo mhye ohe, tenamy desikre kola ne Hulasokwe Memeanke seike. Kali Hulasokwe yal Memeanke ti e, ma kimin a e de. Dendye tenamy desikre lema wasimy de, de Hulasokwe wasi.6:19 1Kor. 3:16; 2Kor. 6:1620Kali Hulasokwe syelw a e maktei de, neke yal Ananke ma myaty ma lyitan eta e. Lemadendye nam miala ti tenamire ne, musti mo myala ktela erasare kmyesan bo. Mamode kyosy a ktela eras miala desikre, irire mumu ne ana rleru Hulasokwe Anike.
7Paulus wasi snuratke ti ktela insake
1Waikw o hatnimakw e, kbwu ma khwalas a wasimy atyahy mikesy ma yakwe, ti miena ohe, “Wamwankye it, ma kolnye lema isa mo eras e?”
2Ou, mlay! Keskyede kyalamo wamfwetare ror wamwanire it de hyury a it koy-kay ma it de yenaf a yor it. Ode Hulasokwe byohe ktela maoly desike atyat, ode iry maala ktela maoly desikre, neke rdi ei lim o sal ma desy. Dendye lemamo wamfwet wamwany rawahuk sir ti sasam, ma wamwankye isaa yor sawa bo, ode wamfwetke dakun o isaa yor lai bo.
3Ode wamwany masake kete byu eta sawa, kolnye sawa-na byu ma yenaf yor i. Koldyesy dakun o wamfwet masake kete byu eta lai dakun, kolnye lai-na byu ma yenaf yor i. 4Kali wamfwetke lema hyareta tenanke kmyesan, de lai-na hyareta i. Ode wamwankye dakun o lema hyareta tenanke kmyesan, de sawa-na hyareta i. 5Dendye kolnye misa de, desikeo saw o lai neke kete it de byu eta it, ma lema it de yenaf yor it. Keskyede kolnye mtyanuk maiske de, ma myal klelanke it ma msyambayan ti Hulasokwe, desikeo nenmo bisa ma lema it de yenaf yor it. Keskye kete klenke soso, de musti mo adoko it de yenaf yor it huruk, ma kete khyury ma ngkeskwaure wait uskwe khatuke yala e ma mdyi ei lim o sal, kali ei ne lema mineti myal tenamire ti wasimy dakdyakin atyatare. 6Nam kutanuk desike lema haretke ne ma kal ma khwareta e, de nam desike wasikw snuratke desy bo, ma kal ma kswurat a e. 7Keskye kbwu ma lemamo irire mumu ne rola yaw, ma lema rasa. Keskyede Hulasokwe yal hehe malkyakakwe ma ity,7:7 Ti ayat ne kbyohe, hehe malkyakakwe, neke ti tel mabuske desike kbyohe, karunia, dete lemamo talenta dari Allah. neke lema mais, de it o it wasi de. Neke irire dum a wait hehe malkyakakwe ma rasa, klala dum a wait hehe malkyakakwe ma lema rasa.
8Lemade iry a lema masa e, mtyabal enen som a laimire ramaty e,7:8 Ti ayat neke, kbyohe iry a lema masake, neke ti tel Yunanike, tunke khatu ne kbyohe, wamwany a lema masake. Keskye mahetelare dum a rbohe, tunke khatu desy kbuanke o amam somke dakun. mtyomolu wasikw a snurat ne: Lemamo kete mika sawamy o laimy, de myola yaw bo. 9Keskyede kolnye wamwankye lema bisa ma ineti yal tenanke, desikeo musti mo yal wamfwetke it, ma isaa yor i ma sawa i. Ode wamfwetke dakun o kolnye lema bisa ma ineti yal tenanke, desikeo musti mo yal wamwankye it, ma isaa yor i ma lai i dakun. Kali kolnye lema myala koldyesy, desikemo ana wasimy dakdyakin atyat desikre ktyabal a ktyabal toha, ma khyareta tenamire, ma ana khyury ma mdyi ei lim o sal.
10Klala ti wamwany a manal wamfwetke it ma sawa i, ode wamfwet manal wamwankye it ma lai i dakun ne, neke kal tnyetak ne ti e, keskye tnyetak neke lema kyosy a yaw, de kyosy ity Ebut Yesus Kristuske. Tnyetak neke kduduke kolnye: Wamfwet masake musti mo kete byisak lai ba.7:10 Mat. 5:32; 19:9; Mrk. 10:11-12; Luk. 16:1811Dete kolnye byisak lai ba, desikemo kete isaa de, de musti mo syom koldyesy bo. Keskye kolnye byu ma isa huruk, desikemo musti mo yulak i ma isaa yor lai ibisak ba desy bo. Kola dene wamwanire dakun, ma kolnye wamwankye yal wamfwetke it ma sawa i, desikemo kete byisak sawa desy ba dakun.
12Lemade waikw o hatnimakw e, mtyomolu wasikw a snurat ne, biar ma snurat ne lema kyosy ity Ebut Yesus Kristuske, de kyosy a yaw kmwesan bo, neke kolnye: kyoat wamfwetke it ma isaa yor wamwankye it, neke deruke lenla rtohak ti Yesuske. Keskye senweke wamwany desy tyohak ti Yesuske de, klala sawa-na lema. Lemade kolnye sawa desike byu ma myorif yor lai desy nggora, desikemo wamwany desike kete byisak sawa desy ba. 13Ode ktela ne mais ti wamfwetare dakun, ma kyoat wamfwetke it ma isaa yor wamwankye it, neke deruke lenla rtohak ti Yesuske. Keskye senweke wamfwet desy tyohak ti Yesuske de, klala lai-na lema. Lemade kolnye lai desike byu ma myorif yor sawa desy nggora, desikemo wamfwet desike dakun o kete byisak lai desy ba. 14Kali biar ma wamwany desike lema tyohak ti Yesuske, keskyede Hulasokwe yal eraske ti wamwany desy, kali sawa-na tyohak ti Yesuske. Kola ne wamfwetke dakun, ma biar ma lema tyohak ti Yesuske, keskyede Hulasokwe yal eraske ti wamfwet desy, kali lai-na tyohak ti Yesuske.7:14 Ode khyali iry lema matohak ti Yesuske ne neke isaa yor iry matohak ti Yesuske, dendye sawa ta lay matohak desy bisa ma syaluk i, ma ana tyohak ti Yesuske dakun. Kali kolnye Hulasokwe lema yala koldyesy, desikeo anatare ana Hulasokwe byohe lema nelnyely a sir, kola dene iry a lema matohakare anatare ne. Keskye Hulasokwe yala koldyesy ma naman desikre nelnyely a sir, kali ti enatke ta amatke ne, it a tyohak ti Yesuske de.
15Keskyede kolnye wamfwetke it, ta wamwankye it, ma lema tyohak ti Yesuske, ode byu ma byisak lai ta sawa matohak ti Yesuske ne ba, desikemo lai ta sawa matohak desike kete byu eta de tyoha bo. Kali kolnye koldyesy, desikemo ti iry matohak desy lema kika nam ma kyety eta i ti insa desy. Kali Hulasokwe yilik ity ma tamorif ne, it de ika eras yor it. 16Dendye wamfwet matohak ti Yesus e. Lema the ohe ana ktela sai ne kidi ti ne, ma laimy a lema matohak desikre, ana khyali e, desikeo ana rtohak ti Yesuske dakun. Ma kolnye rtohak ti Yesuske, desikeo ana Hulasokwe yaorif sir. Kola ne dakun ti wamwany matohak ti Yesus e. Lema the ohe ana ktela sai ne kidi ti ne, ma sawamy a lema matohak desikre, ana khyali e, desikeo ana rtohak ti Yesuske dakun. Ma kolnye rtohak ti Yesuske, desikeo ana Hulasokwe yaorif sir.
Mimorif ne musti mo mtyoha wasimy mormyorif a Hulasokwe inal ti e desy ti kyoat nenmo iabuk e ma mitohak ti Yesuske ne
17Waikw o hatnimakw e, ity Ebutke yala ity ma tamorif neke lema mais, de it o it neke ika wena de. Neke dum a raka sawat o lait de, ode dum a lenla. Dum a iry a Yahudi sir, ode dum a iry a lema Yahudi sir. Dum a at a sir, ode dum a lema at a sir. Dendye kyoat Hulasokwe yabuk ity ma ttohak ti Yesuske, desikeo kete tobak a ksala ma teluk ity wait mormyorif a Hulasokwe itutuk ma ity kmuna desy, de toly desy bo. Ode wasikw tnyetak desike kal ma kswurat iry matohakare mumu ti kabei ta kabei bo. 18Dendye kolnye wamwankye it ma ratosa tenanke de,7:18 Tunke khatu ratosa tenanke neke ti tel mabuske kbyohe, sunat. ode kyoat Hulasokwe yabuk i ma tyohak ti Yesuske, desikeo kete iry desike ihunik ohe, ratosa tenanke de. Klala wamwankye it ma lenla ratosa tenanke, ode kyoat Hulasokwe yabuk i ma tyohak ti Yesuske, desikeo kete iry desike nenmo iten ma ratosa tenanke. 19Kali ratosa tenatare ta lema ratosa tenatare, desike ne lema kika kbuan. De nam maka kbuanke, neke ttoha Hulasokwe wasi tnyetakke bo. 20Lemade tamorif neke, musti mo it o it neke ttoha ity wait mormyorif a Hulasokwe inal ma ity kmuna desy, ti kyoat iabuk ity ma tatohak ti Yesuske ne.
21Koldyesy dakun o kolnye irkye it ma at a i de, ode kyoat Hulasokwe yabuk i ma tyohak ti Yesuske, desikemo kete iry desike ralake kakan, ti at a i a nggora ne. Kali ti Yesuske ktela desike lema kiba namit-namit. Keskye kolnye wasi lalanke yal klelan eraske it ti i ma lema at a i de, desikeo bisa ma yal klelan desike bo. 22Kali iry a maka atke ti kyoat Hulasokwe yabuk i ma yety ral sasamke yor ity Ebutke, biar ma ti lasmyerke khaha ne, i desike ika at a nggora, keskye i desike kola dene lema at a i de. Kali ity Ebutke yaditi i toha wasi lim o sal kihareta i desy, ode ity Ebutke yal i ma wasi iry a i de. Klala iry a lema maka atke, ti kyoat Hulasokwe yabuk i, biar ma ti lasmyerke khaha ne, i desike lema ika at, keskye i desike Yesus Kristuske wasi at i de. 23Kali Hulasokwe syelw a e ma ktei de, ti kyoat inal Anan Yesus Kristuske ma myaty ma lyitan eta e ne. Dendye kete mtyomolu ode mtyoha nuske ktem ne, kola dene mika at ti irkye ne. De mtyomolu ode mtyoha Kristuske bo.
24Lemadendye waikw o hatnimakw e, ktwanuk huruk ma it o it neke kete teluk ity wenat mamuna ti lenla tatohak ti Kristuske desy, de ttoha wen mamuna desikre bo. Ma kolnye tasa de, ta lenla tasa, dete lemamo iry a Yahudi ity, ta iry a lema Yahudi ity, dete lemamo at a ity, ta lema at a ity, ta nam sai ta sai Hulasokwe tyutuk ma ity de, desikeo bisa ma ttoha koldyesy, kali Hulasokwe inonor a ity bo.
Snuratke ti iry a lenla masaare
25Waikw o hatnimakw e, kbwu ma ktwanuk ti e, ti khyali iry a lenla masaare. Neke ity Ebut Yesuske lema yal haretke ma yaw ma kswurat sir, keskye ity Ebutke syusu rala eraske ma yaw de, ma ei neke bisa ma mtyohak nam kutanuk ne. Dendye wasikw snuratke ne, ma kal ma kswurat e. 26Neke kolnye: selsel neke masunkwe kdyan a ity, ma tety ti de tety ma ti masunw desy. Dendye krwekan ohe, esei desike lenla isa, lemamo kete yobak ma isa, de yoly desy bo. 27Ode wamwanire kolnye misa de, desikemo kete myobak ma mbyisak sawamire ba. Ode kolnye lenla misa, desikemo kete myobak ma misa dakun. 28Keskyede kolnye wamwany a lenla masake it ma byu ma isa, desikeo wamwany desike bisa ma yal wamfwetke it ma isaa yor i, ma sawa i. Desikemo lema lim o salke desy. Kola ne wamfwet a lenla masake it ma byu ma isa, desikeo wamfwet desike bisa ma yal wamwankye it ma isaa yor i, ma lai i. Desikemo lema lim o salke desy dakun. Keskyede esei desike isa de, desikeo imorif ne ana masunkwe kdyan i, ma yety ti de yety ma ti masunw desy. Dendye kswurat a e ma kete misa kola yaw, mamode soso e toha masunw ana madan e desikre.
29Waikw o hatnimakw e, nam kusurat desy kbuanke o, ity wait seure ti nuske ktem ne kyala ma ktei mane! Dendye kyala kyosy senwe, wamwany a masake musti mo yalkyaw i ma kyarya ti Hulasokwe, de kete cuma mo ryekan sawa-na myesan bo. 30Koldyesy dakun o iry a maserke, kete cuma mo ryekan rala masal desy bo. Ode iry mamahiske, kete cuma mo ryekan ralake ti kimukmuka i ne bo. Ode iry a mahwely namke, kete cuma mo ryekan nam ihwely desikre bo. Kete mryekan koldyesy, mamode bisa ma myalkyaw e ma mkyarya ti Hulasokwe manenen. 31Lemadendye bisa ma myal ktela miala ode mirekan ti nuske ktem ne, ma myal ma mbyuak ti wasimy mormyorifare. Desike lema nam. Keskye kete myal wasimy mormyorifare ti ktela desikre, ma cuma mo mryekan ti ktela desikre bo. Kali ana lema soso bonyo nuske ktem a tamatakit ne kyor nam desikre mumu ne lema kimin de.
32Lemade kbwu ma mimorif ne mo, kete ralamire kakan ti wasimy mormyorifare. Kali kolnye wamwany a lema masake, desikeo bisa ma ryekan ti ity Ebutke bo, ma yobak ma yala ity Ebutke ralake ma kimukmuka I. 33Klala wamwany masake, lema bisa ma ryekan ti ity Ebutke myesan bo, de ana ryekan a ktela kyalamo iala ti nuske ktem ne dakun, ma yobak ma yala sawa-na ralake ma kimukmuka i, 34dendye nam irekanare kilakdu a i. Kola ne wamfwetke dakun. Enen somke ma lai-na myaty de, ta lemamo wamfwet lenla masake, neke bisa ma ryekan ti ity Ebutke bo, kali byu ma tenanke kyor ralake nelnyelnyely ti ity Ebutke. Klala wamfwet masake, lema bisa ma ryekan ti ity Ebutke myesan bo, de ana ryekan a ktela kyalamo iala ti nuske ktem ne dakun, ma yobak ma yala lai-na ralake ma kimukmuka i. 35Ode lema ktwanuk nam desikre mumu ti e ma kbwu eta e ma kete misa, de ktwanuk nam desikre ti e, ti wasimy eraske kmyesan bo. Ode kbwu ma kswaluk e ma bisa ma myala ktela mlaire, ma mkyarya ti ity Ebutke kyor ralamy kusunare, ma kete nam mirekanare kilakdu a i.
36Keskyede kolnye lyalakwe it ma yena wararke it de, keskye ainare kiliku i bonyo, lyalaw desike lenla yal warara desy ma isaa yor i, ma sawa i, de rakita bo. Ode sekwe it bonyo, lyalaw desike ryekan ti ralake ohe, isal ti warara desy de, kali lenla yal warara desike ma isaa yor i, ma sawa i, de klenke soso ma ainare kbyilak de. Dendye kolnye lyalaw desike byu ma yal warara desike ma isaa yor i, lemamo yal i ma isaa yor i ma sawa i bo, kali ktela iala desike lema lim o salke desy. 37Klala kolnye lyalaw desike yohut ti ralake ma lema isaa yor warara desy, desikeo ktela iala desike eras dakun. Asal ma ktela ibrai isa desike kyosy a ia myesan ibuke bo, de kete irire rpaksa i ma kete isa. 38Lemadendye kolnye iry a masaa kyor wararake, neke ktela iala desike eras. Klala iry a lema masaa kyor wararake, ktela iala desike ne eras ma kbyilak dakun.
39Ode wamfwetke it ma isa de, ma kolnye lai-na myorif a nggora, desikemo wait insa desy kyety eta i, ma lema bisa ma ila toha lai. Keskye kolnye lai-na myaty de, desikeo lema kika nam maety eta wamfwet desy de. Dendye kolnye wamfwet desike byu ma isa huruk, desikeo kyosy a i bo. Keskye wamwany ibu desike, musti mo tyohak ti ity Ebut Yesuske dakun. 40Keskyede ktyoha yaw mo, kolnye wamfwet desike lema byu ma isa huruk, desikemo ana wasi inamukmuka ike kbyilak. Ode krwekan ohe, tun kutanuk desy lema kyosy a yaw kmwesan, de kyosy a Hulasokwe Memeanke dakun.
8Kotw o abw a raabar ti adarare
1Waikw o hatnimakw e, senweke kbwu ma ktwanuk ti e, ti khyali kotw o abw a irire raabar ti adarare ne. The ohe ti ei neke dum a mtyanuk ma mbyohe, “Iry matohak ity neke, ity wait heheke kyoat mumu de.” Mlay, keskyede ktwanuk ti e ohe, wasimy hehe desike bisa ma kyala e ma mbyitil tenamire ma atat. Klala kolnye tlobak ity wait o ity hatnimat matohakare, desikeo ity wait loblobak desike ne kialkyaw sir ti wait tohtohakare ne. 2Ode esei desike ryekan o wasi heheke kyoat mumu de, ma lema ktyol ti i elik, desikeo mlay bain, iry desike lenla hye namit-namit. 3Keskyede esei desike yal ralake kralake ti Hulasokwe, iry desike Hulasokwe hye i.
4Lemade waikw e! Kbwu ma ktwanuk kotw a raabar ti adarare ne ti e. Iry matohak ity neke the ohe, lema kika adar mamorifke it ti nuske ktem ne. Ode the dakun o lema kika hulasow salik, de Hulasow a Mlakye ne sasasam I bo. 5Keskye mlay bain o, irire rsambayan ode rou ti adar o wait hulasow mamin ti lait o lasmyerke khaha ne. Neke rtohak ti hulasow ribunke, ode lait o lasmyer ne kebu ribun nekre dakun. 6Keskyede ti iry matohak ity ne, the ohe Hulasokwe sasasam I bo. I neke ity Amat a I, ode I ne iala nam mamin ti lait o lasmyerke khaha ne mumu ne, ode I neke tal ity wait mormyorifare ti I. Ode ity Ebutke dakun o sasasam I bo, neke ity Ebut Yesus Kristuske. Ode kyosy a ity Ebutke, mane nam nekre mumu ne kimin, ode khyali I mane tatot mormyorif harharkwe ne.
7Keskye ti iry matohakare mumu ne, dum a lema rhe ohe, lema kika adar mamorif. Kali heitlulswoke iry desikre rsambayan ode rou ti adarare, keskyede selsel ne rtohak ti Yesuske de. Dendye kyala kyosy lulswo ma ti kyait senwe, kolnye iry desikre ra kotw o abw a iry lema matohakare ranal ma raabar ti adarare ne, desikeo rkoman o ktela raala desike kola dene rasambayan ode raou ti adarare a nggora ne. Dendye kolnye ra kotw o abw desikre, desikeo rkoman o rala lim o sal ma desy, kali wait tohtohakke ti Yesuske, neke lenla malkyakaw. 8Keskye kotw o abw a tana nekre lema khyury ma ity neke tney a Hulasokwe, ta soso ity toha Hulasokwe. Ode kola desy dakun o, kotw o abw a lema tana nekre lema khyury ma ity neke tney a Hulasokwe, ta soso ity toha Hulasokwe dakun. Dendye kolnye ta kotw o abw desikre, ta lema ta kotw o abw desikre dakun, desike mais bo.
9Keskyede musti mo mijaga mamak a e, ma kete ktela mialanare khyury ma iry a wait tohtohakare lenla malkyakaw ti Yesuske ne, rdi ei lim o sal. Kali biar ma mlay ma bisa ma mi kotw o abw desikre, keskye kete mhyury a iry desikre ma rtoha e, ma ra kotw o abw desikre dakun. Kali ti iry desikre dum a rtohak a nggora ohe kolnye rala koldyesy, desikemo rala lim o sal ma desy. 10Ode ktwanuk koldyesy, kali mhye ohe lema kika adar mamorif, dendye kolnye mi kotw o abw a raabar ti adarare ne, desikeo lema kiba nam ti e. Keskyede iry a wait tohtohakke lenla malkyakaw ti Yesuske ne, kolnye ratos e ma mi kotw o abw desikre ti sey a raabar nam o rasambayan ti adarare ne, desikeo kete kyal nini kyala sir ma rares ma ra kotw o abw desikre dakun, biar ma rrekan ohe ktela raala desike kyety a lim o sal. 11Koldyesikemo wasimy hehe mibohe lema kika adar mamorif ne, neke khyury ma iry a wait tohtohak a lenla malkyakaw ti Yesuske ne, ana wait tohtohak desikre kiskyui-kiskyay. Dendye ramres ma rtohak ti Yesuske. Keskyede Yesus Kristuske myaty khyali ity wait o ity hatnimat a wait tohtohak a lenla malkyakaw desikre dakun. 12Dendye ktela miala desy, neke myala lim o sal ti ity wait o ity hatnimat a wait tohtohakare lenla malkyakaw desikre ma desy, kali mhyury a sir ma rala ktela rarekan o kinety a lim o sal ne. Koldyesikemo myala lim o sal ti Kristuske dakun ma desy. 13Lemadendye waikw e! Kolnye kika kotw o abw a kihury ma ity wait o ity hatnimat matohakare rdi ei lim o sal, desikemo ana lema ku kotw o abw desikre nini kmwaty bo. Ma kete yaw ne khwury ma waikw o hatnimakw desikre rdi ei lim o sal.
9Paulus a lyosu ohe i neke Yesuske wasi nyaso i dakun
1Waikw o hatnimakw e! Mryekan o yaw neke kola atke, ma lema bisa ma kala namit-namit ma ktyoha kubuare e? Ode lema mhye ohe yaw neke Yesuske wasi nyaso yaw e? Ode mryekan o yaw ne lenla katos ity Ebut Yesuske elik e? Dendye kete kyal nini mimluak ohe, mitohak neke khyali wasikw karyake ti ity Ebutke. 2Ode biar ma iry salikare lema rou ohe, yaw neke Yesuske wasi nyaso yaw, keskye ei ne musti mo myou ohe, yaw neke Yesuske wasi nyaso yaw. Kali ei neke mtyomolu Brit Eraske toha yaw, mane myety ral sasamke myor ity Ebut Yesuske de. Ktela desike ne ksyusu ohe, yaw neke Yesuske wasi nyaso yaw.
3Dendye ti ei neke, dum a rbihy a yaw ma rbohe, yaw neke Yesuske lema wasi nyaso yaw, desikeo khwalas sir kolnye: 4Kor Barnabas neke Yesuske wasi nyaso aramy. Dendye hakke kimin aramy, ma bisa ma aramy miten hinamy kotw o abw ma myal ma aramy, khyali nam aramy mikarya nekre. 5Ode ana kolnye aramy misaa myor wamfwet a matohak ti Kristuske ne, desikemo hakke kimin aramy, ma ara sawamy desikre bisa ma rlakut ror aramy, ti ara wasimy karya ne. Kola dene nyaso ida nekre, rtabal a Yesuske wainare, ode Petrus, neke hakke kimin a sir dakun ma rala koldyesy. 6Ode kete kyal nini mryekan ohe, kor Barnabas neke cuma mo aramy mmyesan a musti mo aramy mkyarya karya salik dakun, ma ara maslyesamy desikre aramy myal ma mbyuak nam ti ara tenamire, ti kyoat aramy mikarya Hulasokwe wasi karya ne.
7Ode myatos bo, suldat a maba ti mamdiriatke, lema yal wasi malolkye kmyesan ma yal ma byuak nam ti tenanke kmyesan. Ode iry a matan tasy maiskye ti wasi boke, ana nya tasy desike kisike a kmuna. Ode iry a majaga dombanare, ana yenw a dombake susuke kwenke a kmuna. 8Keskye nam kutanuk nekre lema ktyoha irkye irekanke bo, de tnyetak Musake ktyanuk koldyesy dakun. 9Kali rkesy ti tnyetak Musake ma kbyohe, “Kolnye sabkye malmata syosa gandumke ma kiblunke kyaditi toha kisike, desikemo kete myikat eta nunuke, de mlyura i ma nya gandum desy tebikan.”9:9 Ul. 25:4; 1Tim. 5:18
Tnyetak Musake ktyanuk koldyesy, neke lema kbuanke o Hulasokwe cuma mo hyaduli sabire bo. 10Lema koldyesy! De Hulasokwe hyaduli ity dakun. Ode tun a khatu rakesy ti tnyetak Musa desy, neke kbuanke kena ity dakun. Neke ti iry a masaban boke, ode ti iry a masosa gandumke ma kiblunke kyaditi toha kisike ne, neke deruke ana rakita ma ral kisinare toha karya rakarya desy. 11Neke kola ne aramy dakun, ma aramy myabrita Hulasokwe tunanare ma kimin ti ralamy kralanare. Dendye kolnye aramy mikita ma myal nam dum toha e, khyali ara wasimy karya desy, desike ktyoha e mo ktela maoly desike mlay ta sal de?9:11 Rm. 15:2712Ode kolnye iry salik a rma ma nenmo rabrita Brit Eraske ti e, desikeo myal nam ti sir, kali hakke kimin sir, ma musti mo myal nam ti sir. Keskye aramy neke hakke kimin aramy dakun ma kbyilak sir, kali aramy neke mmyuna ma myabrita Brit Eraske ti e a kmuna de. Ode kyanmwane lema minal nam ma aramy dakun ne de?
Keskyede myatos, kyoat aramy minor a eke, desyo lema aramy myal ara wasimy hak desy ma aramy miten namit-namit toha e, ma aramy myal ma mbyuak nam ti ara tenamire. De kolnye masunw sai ta sai kdyan aramy, desyo aramy neke mhyar bo. Ma kete kyal nini aramy miten nam dum toha iry matomolu aramy nekre, desikeo khyury ma ana rabrai ma rtomolu Brit Eras a malosu Kristuske ne.
139:13 Ul. 18:1Waikw o hatnimakw e, mhye ohe iry a makarya ti Hulasokwe Seike ne, ana raknam o renw toha nam mamin ti Hulasokwe Seike. Kola ne iry a rakita ma ranal heal irire ranety ma raabar ti Hulasokwe ne, ma ral heal desikre ti latke ma reh a sir. Iry makarya desikre ana ral tebikan toha heal raabar desikre. 149:14 Mat. 10:10; Luk. 10:7Koldyesy dakun o ity Ebutke yohut de, ma iry maabrita Brit Eraske ne, musti mo raknam o renw toha iry a matomolu Brit Eras desy.
15Ode biar ma haretke kimin a yaw ma bisa ma kuten namit-namit toha e, keskye lema kuten namke it elik. Kali kolnye kabrita Brit Eraske ti e, ode lema kuten nam dum toha e, desikeo ktela desike kyala ralakkwe kralake ma kimukmuka i a ksyalik. Dete kolnye kal nam dum toha e, khyali kuabrita Brit Eraske ne, desike ne lemamo kmwaty bo, kali ana wasikw inamukmuka i desike kitayar. 16Keskye kyoat kabrita Brit Eraske, desikeo lema bisa ma kbwitil tenakkwe ma atat, khyali ktela kuala desy. Kali Hulasokwe yaso yaw, desikeo musti mo ktwoha ma ti kabrita bo. Klala kolnye lema kabrita Brit Eras desy, desikeo ana masunkwe kdyan yaw elik. 17Ode kolnye yaw ne kmwesan a kohut ma kabrita Brit Eras desy, desikemo ana kal ksewanke. Keskyede lema koldyesy, de Hulasokwe I ne iilik yaw ne, ma kkwarya karya desy. Dendye musti mo kkwarya karya desy bo. 18Koldyesikemo ana ksewan sai ma yaw de? Wasikw a ksewanke kolnye: kyoat kabrita Brit Eraske, desikeo lema irkye it a syelw namit-namit ma yaw. Kali biar ma haretke kimin a yaw, ma bisa ma kuten nam dum toha iry matomolu Brit Eras desy, keskye lema kuten namke it elik.
19Ode biar ma lema kuka at ti esei ta esei ma musti mo ktwoha nam ibuke, keskyede kumorif ne kala tenakkwe kola dene kuka at ti irire mumu ne bo. Kala koldyesy, mamode bisa ma kswaluk irire ma rtabal a rtabal ma ribun sir ma rtohak ti Yesus Kristuske. 20Dendye kyoat kor iry a Yahudi-nare, desikeo kala tenakkwe ma kola sir. Kala koldyesy, mamode bisa ma kswaluk sir ma rtohak ti Yesus Kristuske. Ode kyoat kor iry a ramorif mo rtoha tnyetak Musake ne, desikeo kala tenakkwe ma ktwoha tnyetak Musake kola sir dakun. Ma biar ma tnyetak Musa desike lema khyareta yaw, keskye kala koldyesy ma bisa ma kswaluk sir ma rtohak ti Yesus Kristuske. 21Ode kyoat kor iry a lema Yahudi-nare, neke tnyetak Musake lema khyareta sir, desikeo kala tenakkwe ma kola sir dakun. Kala koldyesy, mamode bisa ma kswaluk sir ma rtohak ti Yesus Kristuske. Ode biar ma kala koldyesy, keskyede lema kbwilak Hulasokwe wasi haretke, kali kumorif ne ktwoha Yesus Kristuske wasi haretare. 22Ode kolnye kor iry a wait tohtohakare lenla malkyakaw ti Kristuske ne, desikeo kala tenakkwe ma kola sir dakun, ma bisa ma kswaluk sir ma rtohak malkyakaw ti Kristuske. Dendye kalkyaw yaw ma kal ksala sai ta sai, ma kala tenakkwe ma kola kabei ta kabei bo, ma kswaluk iry desikre, mamode bisa ma dum a rtohak ti Kristuske. 23Ode kala nam desikre mumu, ma irire rtabal a rtabal ma ribun sir, ma bisa ma rtohak Brit Eraske. Mamode kor sir de aramy mitot ara watamire toha Hulasokwe, khyali Brit Eras desy.
24Waikw o hatnimakw e! Mhye ohe kolnye irire raboly, cuma mo irkye sasam a yal juarake bo, biar ma irire ribun raboly dakun. Koldyesy dakun o ei ne musti mo myalkyaw e ma mtyoha Hulasokwe, mamode ana bisa ma mitot ksewanke. 25Ode esei ta esei bo, ma byu ma tyoha inabolkye, musti mo ineti yal tenanke toha nam atyatare, ode ijaga mamak tenanke ti nam salno salik nekre, ode myesan a tyiori9:25 Ti tel Maslyarkwe tunke khatu tyiori ne, neke ti tel mabuske kbyohe, dia latihan. inlalake aduk ma malkyakaw i, mamode bisa ma yal juarake ma yosy a wasi hadiake. Keskyede hadia desike ana lema soso bonyo atyat de. Klala iry matohak ity neke tajaga ity tenatare ma ana tal ksewanke, neke ksewan manal nini namke. 26Lemadendye yaw neke kalkyaw yaw ma kuboly, ma ti kait teike. Kola ne iry a mabukul sirare dakun. Ma it de byukul it, neke lema byukul ti de byukul ma bo. De yalkyaw i ma tyiori bukbukulke aduk, ma ana byukul yal iry a isorw desy, ma kele tyunik i. 27Lemade kalkyaw yaw ma kuneti tenakkwe ti sai ta sai bo, ma bisa ma khwareta kal tenakkwe, kola dene amam lanke ihareta wasi atke ne. Kali kolnye lema kala koldyesy, desikemo kyoat kabrita Brit Eraske ti iry salik nini ktei, desikemo kete kyal nini yaw ne ana lema kutot ksewanke toha Hulasokwe.
10Kete tseak toha iry a Israel-are ma ttoha totnyo yabit atyat raalanare
1Waikw o hatnimakw e! Kena e ohe, mnyenas a ktela Hulasokwe iala ti ity ebnwo matrumat, ti kyoat ranor Musa de rabetik toha Mesir ne ta lema de? Kyoat desike Hulasokwe yala oanke ma kyaoa sir, ode oan desike kyety lulkwe ti sir mumu, ma rlakut a rtoha oan desy. Ode raktemtem mumu neke rlakut ti Tasi Mermer a Hulasokwe iala ma kihe i ma bakbak ti kditlanke ne, ma ti rait seridake o eras-eras sir bo.10:1 Kel. 13:21-22; 14:22-292Ode ktela oanke kiaoa ode kinety lulkwe ti sir desy, ode ktela ralakut ti tasi kihe i ma bakbak desy, neke kola ne ktela deru desike kbyabtis sir ma ksyusu ohe, raktemtem mumu ne iry a matoha Musa sir.10:2 Kyoat a rababtis iry matohak ti Yesuske, neke iry desikre rety ral sasamke ror Kristuske de, ma ksyusu ohe iry a matoha Yesus sir. Neke mais kola iry a Yahudi-nare ti ayat ne ti kibohe, kola ne oanke kyor tasike kibabtis sir ne, ma ksyusu ohe iry a matoha Musa sir.3Ode raktemtem a ra kotw a sasamke. Kotw neke Hulasokwe yal ti sir.10:3 Ti ayat ne kbyohe, kotw neke Hulasokwe yal ti sir, neke tel mabuske ti Kitab Lanke kbyohe, makanan rohani.10:3 Kel. 16:354Ode raktemtem a renw a wer sasamke, neke wer a Hulasokwe inal ti sirke dakun.10:4 Ti ayat ne kbyohe, wer a Hulasokwe inal ti sirke, neke tel mabuske ti Kitab Lanke kbyohe, minuman rohani. Wer desike knyaha kyosy a hatw a Hulasokwe inal ti sirke.10:4 Ti ayat ne kbyohe, hatw a Hulasokwe inal ti sirke, neke tel mabuske ti Kitab Lanke kbyohe, batu karang rohani. Ma hatw desike kitotoha sir bo, kali hatw desike Kristuske I desy.10:4 Kel. 17:6; Bil. 20:115Klala biar ma Hulasokwe yal ktela eras desikre mumu ti sir dakun, keskyede ti sir mumu ne, ribun a Hulasokwe lema dyakin sir ti ralake, khyali wait ktela atyat raalanare. Lemadendye ribun a rmaty rabyatbata ti kabei ta kabei bo, ti wen malosy-loskye.10:5 Bil. 14:29-30
6Waikw o hatnimakw e, heitlulswo ktela desikre mumu ne kdi ti ity ebnwo matrumat, ma ktela desike ne kryeky ti ity ralatare de, mamode tamorif ne kete tdakin ma tala ktela atyatare kola sir.10:6 Bil. 11:47Lemade kete mtyoha iry desikre dum, ma msyakitil o myou ti adarare kola sir. Kola dene rkesy ti Kitab Lanke ma kbyohe, “Iry desikre rsakitil o rou ti adarare, lemade rala kalkal ma raknam o renw, maktei o rmenari ma ramukmuka ramarmara sir.”10:7 Kel. 32:68Ode kete ttoha iry desikre, kali dum a rala ktela atyatare, neke wamfwetare ror wamwanire it de hyury a it koy-kay. Kali kyosy a ktela atyat raala desy, dendye khyury ma irkye ribunke hean-ru a kresi enatelw neke (23.000) rmaty ti sew sasamke.10:8 Bil. 25:1-189Ode kete mhyury ma ity Ebutke10:9 Kitab Korintus a mtu rakesy ti tel Yunanike, neke ti ayat ne dum a rkesy o ity Ebutke, klala dum a rkesy o Kristuske. ika keyer, kola ne iry desikre dum rahury ma ity Ebutke ikeyer ne. Kali kyosy a tun atyat ratanuk ti ity Ebutke, dendye manunure rtutu rhunw a sir.10:9 Bil. 21:5-610Ode kete mikunkunw kola ne iry desikre dum dakun, ma khyury ma Hulasokwe yaso wasi nyaso manosy laitke, ma mya ma tyabahunw a sir.10:10 Bil. 16:41-49
11Lemade ktela desikre mumu ne kdi ti ity ebnwo matrumat, ma kryeky ti ity ralatare de, ma kete tola sir. Ode rkesy nam desikre mumu ti Kitab Lanke de, ma kyal ma ksyurat ity, kali ity neke tmorif ti taras a nuske ktem ne kyala ma ktei mane. 12Lemadendye esei desike ryekan o wasi tohtohakke malkyakaw, ma lema bisa ma dyi ei lim o sal de, musti mo ijaga mamak tenanke, ma kete kyal nini nam dum a khyury a i, ma dyi ei lim o sal. 13Ode mnyenas ohe, hurhury a kena e ma midi ei lim o sal ne, neke mais kola hurhury a kyalamo kena irire mumu ne dakun. Keskye Hulasokwe lema bisa ma imluak wasi tnyetakke it elik, de kyaki-kyaki ne nam ihatetakare yala ma kdi ti. Dendye Hulasokwe lema lyura ma hurhury desike kbyilak amalkyaumire. Lemadendye kolnye hurhury desike khyury a e, desikeo Hulasokwe ana syusu salke ti e, ma ei neke bisa ma myala myal hurhury desy, ma kete mdyi ei lim o sal.
Kete miwahuk e ti adarare wait seire ma miknam o myenw ti desy
14Lemadendye waikw o hatnimakw a kulobak e, kutanuk kobakke o, ei neke kete msyakitil ode myou ti adarare, de musti mo soso e toha ktela desy. 15Ktwanuk ti e kali khwe ohe, ei neke mhye ei lulw o lyaw, ma bisa ma mryekan a mhye mlakye ode salke. Lemade kuten ma ei neke mmyesan a myohut ohe, nam ana kutanuk nekre mlay ta sal. 16Neke kolnye: kyoat tawahuk ity ma tenw tasy maiskye kwen makitkye, ma tnenas Kristuske lara mabo ei lasmyerke khaha ne ti kyoat imaty ne, desikeo tsalak eraske ba ti Hulasokwe, maktei o taktemtem a tenw. Ktela desike ksyusu ohe taktemtem a tety ral sasamke tor Kristuske ma desy. Koldyesy dakun o kyoat a tabiny rotkye ma taktemtem a tana desy, desikeo ksyusu ohe tety ral sasamke tor Kristuske tenanke ma desy.10:16 Mat. 26:26-28; Mrk. 14:22-24; Luk. 22:19-2017Kali biar ma ribun a ity, keskyede kyoat ta roty desy ma tal ma tnenas Kristuske, desikeo ity ne mumu neke tety ral sasamke, khyali taktemtem ne ta roty sasam desy bo.
18Koldyesy dakun o, mnyenas iry a Israel-are wait ktela kyoat raabar heal ti Hulasokwe ne. Neke ral heal a raabar desy ti lat raeh heal tike, ma rabar ti Hulasokwe. Ma raabar maktei bonyo ral heal raabar desy ma ra. Ode ktela rana heal raabar desike ksyusu ohe, rety ral sasamke ror Hulasokwe ma desy.10:18 Im. 7:619Dendye kete mryekan o tun kutanuk desy kbuanke ohe, heal a kisi raabar ti adarare ne, neke mlay ode kika kbuan. Ode kete mryekan dakun o adarare raka memeat ode ratun. Lema koldyesy! 20Lemade mijaga mamak e! Kali heal raabar ti adarare ne, desike ne lema rabar ti Hulasokwe, de rabar ti ngkeskwaure bony ma desy. Dendye lema kbwu ma myala koldyesy, kali lema kou ma myety ral sasamke myor ngkeskwaure.10:20 Ul. 32:1721Ode kolnye miwahuk e ma miknam o myenw, ma mnyenas ity Ebut Yesus Kristuske ti imaty ne, desikeo myety ral sasamke myor Kristuske de. Koldyesikemo kete mbyai sey a rasakitil ode raou ti adarare ne, ma miwahuk e a myor iry masambayan ti adarare ne, ma miknam o myenw myor sir ti desy. Kali kolnye myala koldyesy, desikemo ksyusu ohe, ei neke myety ral sasamke myor ngkeskwaure ma desy. Ktela desike sal a ksyalik, kali lema bisa ma myety ral sasamke myor Kristuske, ode myor ngkeskwaure dakun. 22Kali kolnye myala koldyesy, desikemo mhyury ma ity Ebutke syoi rala e ma desy. Dendye kete mryekan o, wasimy haretke lan ma kbyilak ity Ebutke wasi haretke, ma ana lema yukun e!
Myala nam sai ta sai bo ma nam miala desikre khyury ma irire rleru Hulasokwe Anike
23Kyalamo irire rtanuk ma rbohe, “Bisa ma tala ktela sai ta sai ma ktyoha tabuke bo, kolnye Hulasokwe lema byu eta ktela desikre.” Desike mlay. Keskyede yaw neke kbwohe, ktela taala desikre mumu ne, dum a lema kyety eraske ma ity. Ode ktela taala desikre mumu ne, dum a lema kyala iry matohakare, ma wait tohtohakare malkyakaw.10:23 1Kor. 6:1224Dendye kete mryekan tenamire kmyesan bo, de musti mo mryekan iry salik dakun.
25Lemade bisa ma mi heal sai ta sai a raketa ti wen raketa nam tike. Keskye kyoat mlyiw heal desikre, desikemo kete myena ma mhye ohe, rabar heal desikre ti adarare, dete lemamo lema rabar heal desikre ti adarare. De mlyiw heal desikre ma mi bo, kali mhye ohe ktela miala desike lema sal. 26Kali rkesy ti Kitab Lanke ma kbyohe, “Ity Ebutke wasi nuske ktem ne, ktyabal kisnyo klaran nekre mumu.”10:26 Mzm. 24:1
27Dendye kolnye iry a lema matohak ti Kristuske it a yabuk e, ma mbya ti miknam ti wasi sekye, ode kolnye myou ma mbya, desikemo mbya bo. Ode kyoat minait wasi sekye bonyo, yal kotw sai ta sai ti e ma mi, desikeo mi bo. Ode kete myena ma mhye ohe, rabar kotw desikre ta lema rabar kotw desikre. De mi bo, kali ktela miala desike lema sal. 28Keskye kolnye myala ma mi kotw desikre, ode irkye it a tyanuk ti e ma byohe, “Kotw a miala ma mina desikre, irire rabar ti adarare de.” Kolnye tyanuk koldyesy, desikemo kete mi. Kali mamak de kete iry a matanuk ti e desike ryekan o, ana kyety a lim o sal ti e. 29Ode kubu eta e ma kete mina kotw desikre ne, neke lema khyali e, de khyali iry matanuk ti e desy. Kali biar ma mhye ohe, kolnye mina kotw maoly desikre, desikeo lema lim o salke desy. Keskyede kolnye iry matanuk ti e desike yatos e ma mi kotw desikre, desikeo ryekan o myala lim o sal ma desy. Dendye kete mi.
Koldyesikemo anakyai irire dum a rena de rbohe, “Bisa ma kala sai ta sai ma ktyoha kubuke bo. Ode kyanmwane iry salik a ralat a kralanare bisa ma kibu eta yaw ne de? 30Kali kolnye kswalak eraske ba ti Hulasokwe, maktei o ku kotw desikre, desikemo kete irkye it a yoit salke ma yaw, khyali kotw a kuna desikre.”
31Lemadendye waikw o hatnimakw e, kbwu ma ktwanuk ti e ohe, kolnye taknam ta tenw, dete lemamo tala ktela sai ta sai bo, desikemo musti mo tala nam desikre mumu, neke nam a bisa ma kyala irire ma rleru Hulasokwe Anike. 32De kete khyali nam taala desikre, desikeo khyury ma iry salik a rdi ei lim o sal, biar ma iry desikre, iry a Yahudi-nare ta iry a lema Yahudi-nare, dete lemamo Hulasokwe wasi iry a ribun matohakare dakun. 33Kola dene yaw dakun, ma kalkyaw yaw ma kala irire mumu ma ralatare ksyenan, ti nam kuala nekre mumu. Ode nam kuala nekre lema kala kobak wasikw eraske kmyesan, de kala kobak iry salik wait erasare dakun. Kala koldyesy, ma bisa ma kswaluk irire ma rtohak ti Kristuske, ma Hulasokwe yaorif sir.
11111:1 1Kor. 4:16; Flp. 3:17Lemade kuten ma mimorif ne mo mtyoha wasikw mormyorifke, kola ne kutoha Kristuske wasi mormyorifke dakun ne.
Snuratke ti wamfwetare ror wamwanire ti ktela rawahuk sir ma rasambayan ne
2Waikw o hatnimakw e! Kalan a e, kali minenenas yaw ti wasikw mormyorifke, ode ei neke mkyumak malkyakaw ktela kuajar ti e desikre de. 3Keskyede kbwu ma ktwanuk ktela ida ne ti e dakun, neke kolnye: maka usu khatu11:3 Ti ayat neke tunke khatu kibohe, usu khatu, neke kbuanke o, yosy, dete lemamo byaa lulw. Neke kolnye: Kristus neke yosy a Hulasokwe, khyali Hulasow ne, I ne iaso Kristuske ma imai nuske ktem ne. Ode wamwankye yosy a Kristuske, kali Hulasokwe ika wamwankye toha rayahkwe. Ode wamfwetke yosy wamwankye, kali Hulasokwe ika Hawa toha Adam a lurike. (Myatos Kitab a Kej. 2:21-22.) ti wamfwetke, neke wamwankye, ode maka usu khatu ti wamwankye, neke Kristuske, klala maka usu khatu ti Kristuske, neke Hulasokwe. 4Dendye kolnye wamwankye it a syambayan, dete lemamo lyosu nyano manosy Hulasokwe, ode kolnye yal nam dum ma yeteta usuke khatuke, desikemo yaranran a Kristus maka usu khatu ti i ne ma desy. 5Klala kolnye wamfwetke it a syambayan, dete lemamo lyosu nyano manosy Hulasokwe, ode kolnye lema yal nam dum ma yeteta usuke khatuke, desikemo yaranran a wamwany maka usu khatu11:5 Ti ayat ne tunke khatu kibohe, wamwany maka usu khatu ti i ne, neke ti tel Yunanike, rkesy kolnye, wamfwet desike wasi uskwe khatuke. Ode ti iry mahe tel ti Kitab Lanke rbohe anakyai kbuanke enatelw. Neke wamwany maka usu khatu ti i ne, dete lemamo wamfwet desike lai, dete lemamo wamfwet desike tenanke kmyesan. ti i ne ma desy. Dendye wamfwet desike yola wamfwet a ratkyory hukake ma bakbakar ne, ma kiaran tenanke ne. 6Kali kolnye wamfwetke it ma lema byu ma yal nam dum ma yeteta usuke khatuke, desikeo musti mo kyutin hukake ma kdusa kola wamwanire. Keskye kolnye ryekan o kyutin hukake ma kdusa kola wamwanire, dete lemamo yatkyory hukake ma bakbakar neke kyaran tenanke, desikemo yal nam dum ma yeteta usuke khatu desy lakhidik.
7Klala wamwanire kete ral nam dum ma reteta usut a khatunare, ti kyoat rasambayan ode ralosu nyano manosy Hulasokwe ne. Kali Hulasokwe ika wamwankye ma yola I, ma kolnye irire ratos wamwankye, desikeo rbohe, “Hulasokwe ksunw a I a ksyalik.” Klala kolnye irire ratos wamfwetke, desikeo rbohe, “Wamwankye ksunw a i.”11:7 Kej. 1:26-278Kali khyehyeike Hulasokwe ika wamwankye, neke lema kyosy wamfwetke lurike, de Hulasokwe ika wamfwetke, neke kyosy a wamwankye lurike.11:8 Kej. 2:18-239Ode Hulasokwe lema ika wamwankye ma syaluk wamfwetke, de ika wamfwetke ma syaluk wamwankye. 10Ode nam desikre mumu ne mlay. Dendye wamfwetare musti mo ral nam dum ma reteta usut a khatunare, ma ksyusu ohe wamwanire rhareta sir.11:10 Ti ayat ne, tunke khatu kibohe, wamwanire rhareta sir, neke ti tel Yunanike rkesy ma kbyohe, haretke kimin ti usut a khatunare. Ode iry mahe tel ti Kitab Lanke dum a rbohe, tunke khatu neke kbuanke o, haretke kimin a sir ma rsambayan ode rlosu nyano manosy Hulasokwe. Ode musti mo rala koldyesy, kali Hulasokwe wasi nyaso manosy laitare ratos wamfwet desikre nam raalanare dakun.
11Ode biar ma wamwankye hyareta wamfwetke, keskyede ity neke tety ral sasamke tor ity Ebut Yesuske de. Dendye tamorif ti lasmyerke khaha ne, neke lema wamfwetke bo, ta lema wamwankye bo, de musti mo kika wamfwet ode kika wamwany. 12Kali wamfwet mamunmunake Hulasokwe ika i neke kyosy wamwankye. Keskyede kyala kyosy sew desike ma ti kyait senwe, wamfwetare sir ne radur hahak wamwanire ne. Keskye wamfwet o wamwany nekre, ktyabal sai ta sai ti lait o lasmyerke khaha ne, neke Hulasokwe ika mumu.
13Lemade waikw o hatnimakw e, kuten ma ei neke mmyesan a myohut ohe, kolnye wamfwetare rsambayan ti Hulasokwe, ode lema ral nam dum ma reteta usut a khatunare, desike ne eras ta lema de? 14Ode the ohe, kolnye wamwanire hukatare narnarw, desike ne lema eras, ode kyala wamwany desikre ma irire rahmway sir dakun. 15Klala kolnye wamfwetare hukatare narnarw, desikeo irire ralan sir. Kali Hulasokwe yal huk narnarkwe ti wamfwetare, ma kyeteta usut a keburanare. 16Keskye kolnye iry dum a lema rou ma wamfwetare ral nam dum ma reteta usut a khatunare ti kyoat rasambayan ne, desikeo kbwu ma ktwanuk tunke khatu ne ti sir, neke kolnye: iry matohak a mawahuk sir ma rasambayan ti kabei ta kabei bo, neke kyaki-kyaki ne rala ma ktyoha ktela wamfwetare raeteta usut a khatunare ne. Ode aramy neke lema aramy mika ara wasimy ktela salik toha ktela desy dakun.
Ksala rawahuk sir ma raknam o renw ma rnenas ity Ebut Yesuske ti imaty ne
17Waikw o hatnimakw e! Kala ma kswurat nam dum ti e, keskyede nam ana kutanuk ne lema kyalan e. Kali kyoat miktemtem a miwahuk e ma msyambayan, desikeo lema kyety eraske ti e, de kyety atyatke ti e. 18Kali ktwomolu ohe, kyoat miwahuk e ma misambayan desy, desikeo misali e. Ode krwekan mo anakyai nam kutomolu desike mlay. 19Dendye kyanmwane miala koldyesy ne de? Kete kyal nini ei neke mryekan ohe, musti mo misali e ti luike enai ne, ma ksyusu ohe, ti ei ne mumu neke lui kabei ne ratohak ti Kristuske bain-bain ne de? Misali e koldyesike lema eras! 20Ode kyoat miwahuk e ma mi rotkye, ode myenw tasy maiskye kwen makitkye, desikeo lema mtyoha ktela kyalamo taknam o taenw ma tanenas ity Ebut Yesuske, ti imaty khyali ity ne. 21Kali ti wasimy inawahuk i ma miknam o mienw desy, neke dum a rmesan a ra hinat koture bo, ode lema rbu ma rasakar ti iry a lema maka hinatare. Dendye iry desikre ra hinat kotw desikre ma rbesur, ode renw tasy maiskye kwenke ma kyala sir, klala lema maka hinat koture ramlar bo. 22Kyanmwane miala koldyesy ne de? De lema mika wasimy sey ma miknam o myenw ti, e? Ta mbyu ma myaranran Hulasokwe wasi iry matohakare, ode myala iry a lema manait ei sra o hahare ma rmay e? Ana ktwanuk sai ti e de? Mryekan o ana kalan a e, e? Lema kalan e elik!
23Kali ksala taknam perjamuanke ne, heit a ity Ebutke yajar ma yaw de, ode kajar ti e dakun de. Neke kolnye:
Ti kyoat metdyet a Yudas iala ma iketa Yesuske ne, desikeo Yesuske yal rotkye, 24ode syambayan ma syalak eraske ba ti Hulasokwe ti roty desy. Maktei o byiny a roty desy ode tyanuk ma byohe, “Roty neke tenakkwe ne, ode khyali e, mane kmwaty ma klwitan eta e. Dendye myal, ode mi. Myala kolnye, ma myala mo minenenas Yaw.”
25Ode kyoat rana roty desy maktei, Yesuske yal takwe ma yala koldyesy huruk, ode tyanuk ma byohe, “Tasy maiskye kwen makitkye ne, neke tnyetak harharkwe ti e a myor Hulasokwe ne, nenmo kimin mane. Tnyetak harharw neke kyala kyosy larakkwe kibo ei hahke ne. Lemade kyaki-kyaki ne kolnye myenw koldyesy, desikemo myenw ma minenenas Yaw.”11:25 Kel. 24:6-8; Yer. 31:31-34
26Dendye kyaki-kyaki ne kolnye mi roty desy, ode myenw tasy maiskye kwen makity desy, desikeo kola dene miabrita ity Ebut Yesuske ti imaty ne, nini kyait sew ana ima huruk ne.
27Lemadendye esei ta esei bo, ma nya ity Ebutke hina rotkye, ode yenw hina tasy maiskye kwen makitkye, ma lema ktyoha ksala mlakye ma kyalan ity Ebutke, desikeo iry desike yala lim o sal ma desy. Kali yala ity Ebutke tenanke ode larake ma lema kika kbuan ma desy. 28Koldyesikemo it o it ne musti mo byihy tenanke kmyesan aduk, maktei o nenmo bisa ma nya roty desy, ode yenw tasy maiskye kwen makity desy. 29Kali esei desike nya rotkye, ode yenw tasy maiskye kwen makitkye, keskye yala ity Ebutke tenan desy kola dene lema kika kbuan ne, desikemo ana Hulasokwe yukun i. 30Koldyesike mane ti ei neke ribun a tenatare lema malkyakaw, ode dum a kluruk sir, ode dum a rmaty dakun de.
31Keskyede kolnye it o it ne tbihy ity tenatare mamamak, desikeo ana Hulasokwe lema yukun ity. 32Keskyede selsel ne kolnye ity Ebutke yukun a ity, desike ne eras, kali kyajar a ity ma musti mo tala nam a mlaire. Mamode ana kyait sew a Hulasokwe yukun nuske ktem ne, desikeo Hulasokwe ana lema yukun ity, ti kyoat yukun iry a lema matohakare ne.
33Lemadendye waikw o hatnimakw matohak e, kolnye miwahuk e ma mi rotkye, ode myenw tasy maiskye kwen makitkye, desikeo musti mo it de ikita it aduk, ma miktemtem mumu ne miknam o myenw mais. 34Ode kolnye irkye it a imlar, lemamo iknam o wasi sekye aduk, maktei o nenmo bya ti iwahuk a i yor e. Koldyesikemo ana Hulasokwe lema yukun iry desy.
Ode ktela salno salik lenla mihe desikre, ana kolnye kmwa ma kait a e, desikeo nenmo kaklol ti e ma mhye.
12Hulasokwe Memeanke kyal hehe malkyakakwe ma ity ne lema mais
1Waikw o hatnimakw e! Hulasokwe Memeanke kyal hehe malkyakaure it o it nekre ti e de. Ode senweke kbwu ma ei neke mhye bain-bain ti khyali hehe malkyakaw desikre.12:1 Ti ayat ne kbyohe, hehe malkyakaw, neke ti tel mabuske desike kbyohe, karunia, dete lemamo talenta dari Roh Kudus.2Ode mhye ohe, kyoat lenla mtyohak ti Hulasokwe, desikeo mlyura e ma irire ror e ba ti msyakitil o myou ti adarare. Keskye adarke lema myorif ode lema itun! 3Koldyesike mane kbwu ma mhye ohe, kolnye Hulasokwe Memeanke kimin ti irkye, desikeo iry desike lema bisa ma syoba Yesuske. Ode kolnye Hulasokwe Memeanke lema kimin ti irkye, desikeo iry desike lema bisa ma tyanuk ma byohe, “Yesus neke Amam Lan a I.”
4Waikw o hatnimakw e, Hulasokwe Memeanke kyal hehe malkyakaw ribun salno salik nekre ma ity, keskye nam desikre mumu ne kyosy a Memean sasasam ne bo.12:4 Rm. 12:6-85Ode ksala ribun salno salik nekre tal ma tkaryaa khyali ity Ebutke, keskye nam takarya nekre, neke tkarya ti ity Ebut sasasam ne bo. 6Ode karya takarya ti Hulasokwe ne ribun, keskyede Hulasow ne sasasam I bo, ma I ne inal malkyakakwe ma ity mumu ne, ma bisa ma tala wasi karya desikre mumu.
7Ode Hulasokwe Memeanke kyal hehe malkyakakwe ti matohak ity ne, ma it o it wasi de. Dendye tal hehe malkyakaw desikre ma tala nam sai ta sai, mamode bisa ma kyety eraske ti iry matohakare mumu. 8Neke kolnye: Hulasokwe Memeanke kyal hehe malkyakakwe ti irkye it, ma bisa ma tyanuk tun a kibenw ti hehei lulw o lyakwe. Ode Hulasokwe Memeanke kyal hehe malkyakakwe ti irkye it dakun, ma bisa ma hye Hulasokwe tunanare, ma yajar ti irire. 9Ode Hulasokwe Memeanke dakun o kyal hehe malkyakakwe ti irkye it huruk, ma wasi tohtohakke malkyakaw. Ode Hulasokwe Memeanke kyal hehe malkyakakwe ti iry salik dakun, ma bisa ma nyoha iry a klurukare, ma eras sir. 10Ode Hulasokwe Memeanke kyal hehe malkyakakwe ti iry salik huruk, ma bisa ma yala ktela masalsyalik iare. Ode Hulasokwe Memeanke dakun o kyal hehe malkyakakwe ti iry salik dakun, ma ti lyosu Hulasokwe wasi nyanoke ti irire. Ode Hulasokwe Memeanke kyal hehe malkyakakwe ti iry salik huruk, ma bisa ma hye ohe, nam sai ne kyosy Hulasokwe Memeanke, ode nam sai ne lema kyosy Hulasokwe Memeanke. Ode Hulasokwe Memeanke dakun o kyal hehe malkyakakwe ti iry salik dakun, ma bisa ma yal tel salik lema ihe ne ma yal ma itunak. Ode Hulasokwe Memeanke dakun o, kyal hehe malkyakakwe ti iry salik huruk, ma bisa ma yaklol a tel desikre kbuanare. 11Keskyede cuma mo Hulasokwe Memean sasasam ne, neke ne kiala ktela desikre mumu ne. Ode Hulasokwe Memean desike kyal hehe malkyakakwe ti irire, neke it o it ne lema mais, de ktyoha Hulasokwe Memeanke kibuke.
Iry matohakare ribun a ity, keskyede Kristuske yeti yahuk ity ti sasam
12Waikw o hatnimakw e! Irkye tenan neke cuma mo sasasam bo, keskye kika sima o lwau, kika mata, ode kika molu, ma nam mamin ti irkye tenan neke ribun. Keskye nam desikre mumu ne kiwahuk i ti sasam, neke ne irkye tenanke. Kola dene iry matohak ity ne, ma biar ma ity neke ribun a ity, keskyede Kristuske yeti yahuk ity ti sasam, ma ity ne mumu neke Kristuske tenanke desy.12:12 Rm. 12:4-513Keskye ity mumu neke lema mais ity, neke dum a iry a Yahudi sir, ode dum a iry a lema Yahudi sir. Dum a raka at, ode dum dakun o lema raka at. Ode biar ma koldyesy, keskye ity neke iry sasam ity, kali Hulasokwe yal Memean Sasasam ne ma yal ma byabtis a ity, ma Memean desy kimin a iry matohak ity ne mumu.
14Dendye waikw o hatnimakw e, irkye tenanke neke lema simke kmyesan, ta lema lwakwe kmyesan, ta lema matke kmyesan, ta lema molkwe kmyesan, de nam mamin ti irkye tenanke, neke ribun. 15Dendye kolnye lwakwe bisa ma kitun, desikemo anakyai ktyanuk ma kbyohe, “Yaw ne lema simke ne yaw, dendye lema bisa ma kumin ti ity tenat ne.” Biar ma lwakwe ktyanuk koldyesy, keskye the ohe lwakwe kyosy irkye tenanke. 16Ode anakyai molkwe dakun o ktyanuk ma kbyohe, “Yaw ne lema matke ne yaw, dendye lema bisa ma kumin ti ity tenat ne.” Biar ma molkwe ktyanuk koldyesy, keskye the ohe molkwe kyosy irkye tenanke. 17Lemade kolnye irkye tenanke kika mata bo, desikemo ana ktyomolu kolkya? Ode kolnye irkye tenanke kika molu bo, desikemo bisa ma klyosa nam mahonare kolkya? 18Keskyede Hulasokwe tyenuk nam nekre mumu ma kimin ti irkye tenanke de, ma it o it neke kimin kwenanare, ma ktyoha Hulasokwe ibuke. 19Ode kolnye irkye tenan neke cuma mo simke kmyesan bo, ta lwakwe kmyesan bo, desikeo lema bisa ma tbohe, irkye tenanke desy. 20Kali the ohe nam mamin ti irkye tenan neke ribun, keskye irkye tenanke cuma mo sasam bo.
21Lemadendye kolnye matke bisa ma kitun, desikemo lema bisa ma ktyanuk ti simke ma kbyohe, “Lema khwaduli o!” Ta uskwe lema bisa ma ktyanuk ti lwakwe ma kbyohe, “Lema khwaduli o!” 22Kali nam mamin ti irkye tenan nekre mumu ne kika kbuan. Ode biar ma irire rrekan o nam mamin ti irkye tenanke dum a kiluh, keskye nam maluh desikre musti mo kimin, kali kbuanare lan ti irkye tenanke dakun. 23Ode nam mamin ti irkye tenanke dakun ne, trekan o dum a lema kyety alalan, ode musti mo irire lema bisa ma ratos dakun. Keskye nam desikre tahnabak mamamak, ode tal simbol o rabit ma teteta. 24Klala lema tala koldyesy ti nam mamin ti ity tenat a irire bisa ma raatos ne. Lemadendye Hulasokwe myesan a tyenuk nam mamin ti irkye tenanke, ma it o it ne kimin kwenanare. Hulasokwe tyenuk koldyesy, ma musti mo tseak mamak nam mamin ti ity tenat a tarekan o kiluh ne, ta lema kinety alalan ne. 25Dendye Hulasokwe yala koldyesy, ma nam mamin ti irkye tenanke ne kete kisali i, de kiwahuk i ti sasam, ma it de ksyaluk it. 26Dendye kolnye nam mamin ti irkye tenanke it a ksunw, desikeo irkye tenanke ktem desy mumu ne kkyoman ksunsunuke dakun. Ode kolnye irire rleru namke it ti irkye tenanke, desikeo irkye tenanke ktem desy mumu ne kimukmuka i.
27Lemadendye waikw o hatnimakw e, iry matohakare mumu ne Hulasokwe yeti yahuk ity ti sasam, neke Kristuske tenanke desy. Ma ei neke it o it ne myola ne nam a mamin ti Kristuske tenan desy. 2812:28 Ef. 4:11Ode Hulasokwe yilik wasi irire de, ma it o it ne rkarya ti ribun matohak mawahuk sir nekre. Hehe malkyakaw inal ti sir ne, neke kolnye:
Sasamke, dum a Yesuske wasi nyaso sir.
Enaruke, dum a iry a manety Hulasokwe wasi nyanoare.
Enatelkwe, dum a iry a maajar Hulasokwe tunanare.
Maktei o dum a rala nyatos masalsyalik iare,
ode dum a rnoha kbainare toha irire ma eras sir,
ode dum a rsaluk irire,
ode dum a rety lulkwe ti irire,
ode dum dakun o ratun, desikeo ral tel salno salik a lema rahe nekre, ma ral ma ratunak.
29Lemade Hulasokwe yal hehe malkyakakwe ti iry matohakare mumu ne lema mais. Dendye the ohe ti iry matohakare, lema sir ne mumu ne bisa ma raka nyaso ti Yesuske, ode lema sir ne mumu ne bisa ma rety Hulasokwe wasi nyanoare, ode lema sir ne mumu ne bisa ma rajar Hulasokwe tunanare, ode lema sir ne mumu ne bisa ma rala nyatos masalsyalik iare. 30Ode lema sir ne mumu ne bisa ma rnoha kbainare toha irire ma eras sir, ode lema sir ne mumu ne bisa ma ral tel salno salik lema rahe nekre, ma ral ma ratunak, ode lema sir ne mumu ne bisa ma raklol tel desikre kbuanare. 31Koldyesikemo musti mo myalkyaw e, ma miten Hulasokwe Memeanke ma kyal hehe malkyakaw maka kbuan ma kisaluk irire ne, ma bisa ma myal ma msyaluk iry matohakare. Kali hehe maoly desikre kbuanare lan, ma kbyilak hehe malkyakaw ida manosy Hulasokwe Memeanke.
Keskyede waikw o hatnimakw e, mikita ma kswusu ohe ksala kabei eras ma kbyilak hehe malkyakaw desikre mumu ne.
13Talobak iry ne kbuanke lan ma kbyilak sai ta sai bo
1Waikw o hatnimakw e! Kolnye yaw neke bisa ma kal tel salno salik manosy nuske ktem ne ma kutunak, dete lemamo kal nyaso manosy laitare wait telke ma kutunak dakun, keskyede kolnye lema kulobak iry, desikemo tun kutanuk desikre lema kika kbuan, de kola ne koban dremke knanike ma kduduke lan bony ne. 213:2 Mat. 17:20; 21:21; Mrk. 11:23Ode kolnye wasikw heheke malkyakaw,13:2 Ti ayat ne kbyohe, hehe malkyakaw, neke ti tel mabuske desike kbyohe, karunia, dete lemamo talenta. ma bisa ma khwe nam a Hulasokwe ihunikare mumu, ode bisa ma kety Hulasokwe wasi nyanoare ti irire dakun, keskye kolnye lema kulobak iry, desikeo hehe malkyakaw mamin tenakw neke lema kika kbuan ma yaw. Ode kolnye khwe telke ti sai ta sai bo, ode wasikw tohtohakke malkyakaw ma bisa ma kaditi huarke toha kwenake dakun, keskye kolnye lema kulobak iry, desikeo hehe malkyakaw mamin tenakw neke lema kika kbuan ma yaw dakun. 3Ode kolnye kuhe malolikure, ktyabal wasikw lan o hnutat nekre mumu, ti iry a lema manait ei sra o hahare, ode kolnye kal tenakkwe ti akye ma knyaa khyunw a yaw13:3 Kitab Korintus a mtu rakesy ti tel Yunanike, neke ti ayat ne dum a rkesy tunke khatu ne kolnye, kal tenakkwe ti akye ma knyaa khyunw a yaw. Klala dum dakun neke rkesy tunke khatu ne huruk kolnye, kal tenakkwe ma irire rtabahunw a yaw mamode bisa ma kutani yaw. khyali ktwohak ti Yesuske, keskyede kolnye lema kulobak iry, desikeo nam kuala desikre mumu ne lema kyety untungke tebikan ma yaw elik.
4Dendye iry a mlay bain ma ilobak irire ne, i neke ralake lublub ode ineti manenen ralake ma ikita bo. Ode i neke ralake eras ti irire, ode lema syoi rala, ode lema itun bakbak, ode lema byitil tenanke ma atat. 5Ode i neke dakun o lema yala yalkyaw irire, ode lema ryekan tenanke kmyesan bo, ode lema samlurw o kyeyer, ode lema ryekan a hye ti nam atyat irire raala ti i desikre dakun. 6Ode kolnye irire rala ktela lema mlaire, desikeo lema imukmuka imarmara i. De imukmuka imarmara i, kolnye irire rala ktela mlaire. 7Ode i neke malkyakaw i ma hyar ktela sai ta sai bo. Ode ti ktela sai ta sai bo, lema samlurw o ryekan ohe irire sal sir. Ode lema samlurw o ralake kakan, de ralake lan ti sai ta sai bo. Ode i ne dakun o yalkyaw manenen ralake, ti kyoat masunw sai ta sai kidan i ne.
8Loblobak neke ana kyal nini nam. Klala hehe malkyakaw Hulasokwe inal ti wasi irire ne ana kitayar. Neke dum a rety Hulasokwe wasi nyanoke, ode dum a ratun desikeo ral tel salik ma ratunak, keskye lema rhe kbuanare, ode dum a rhe ei lulw o lyaw. Dendye hehe malkyakaw desikre mumu ne ana kitayar. 9Kali selsel neke hehe Hulasokwe inal ma ity ne, ktyabal Hulasokwe wasi nyano inal ma tanety ne, deruke eras, keskye deruke it o it ne lenla kiktem. 10Keskyede ana kyait sekwe, desikeo Hulasokwe ana yala sai ta sai mumu ma kiktem. Dendye hehe malkyakaw Hulasokwe inal ma ity desikre mumu ti nuske ktem ne ana kitayar, kali lema kiktem.
11Ode lema kiktem ne kolnye: kyoat a kakan yaw nggora, desikeo kutun kola naman kakanare. Ode wasikw ktelanare kola naman kakanare wait ktelanare. Ode nam kurekanare kola naman kakanare dakun. Klala kyait ma lan yaw, desikeo ktela kuala ti kyoat kakan a yaw nggora desikre, kotuk lakhidik ba de. 12Kola ne ity ne dakun, ma tamin ti lasmyerke khaha ne a nggora, desikeo lenla bisa ma the bain-bain nam nekre mumu. Kola ne tatos ity matatare ti tatayal ahwahkwe ne. Keskye kyoat ana ti tsara Hulasokwe o wen sra eraske, desikeo nenmo bisa ma the bain-bain nam nekre mumu. Koldyesy dakun o senweke ti lasmyerke khaha ne, neke the Hulasokwe ralake kralake tebikan bo, keskyede ana kyait sekwe ma tbai wen sra eraske, desikeo nenmo the Hulasokwe ralake kralake mumu, kola ne Hulasokwe ihe ity ralat a kralanare dakun ne.
13Lemadendye ktelake enatelw ne klyakut nini nam, neke: tohtohakke, ode tal ity wait mormyorifare ti Hulasokwe, ode loblobakke. Ktela detelw neke eras. Keskyede eras lan-lanke, neke loblobakke.
14Tal hehe malkyakaw manosy Hulasokwe ma tety wasi nyanoare neke kbuanke lan ma kbyilak ti tanal tel salno salik a lema tahe kbuanare ne
1Waikw o hatnimakw e! Musti mo myalkyaw e ma it de lyobak it. Ode musti mo myalkyaw e dakun ma myal hehe malkyakaw manosy Hulasokwe Memeanke.14:1 Ti ayat ne kbyohe, hehe malkyakaw manosy Hulasokwe Memeanke, neke ti tel mabuske desike kbyohe, karunia, dete lemamo talenta dari Roh Kudus. Keskye kyosy a hehe malkyakaw desikre, desikeo kmunmunmuna neke myal a hehe malkyakaw desy, ma bisa ma myety Hulasokwe wasi nyanoke. 2Kali esei desike yal tel manosy Hulasokwe Memean a lema ihe ne ma yal ma itunak, desikemo lema itun a yor irkye, de itun a yor Hulasokwe ma desy. Ode lema irkye it a bisa ma hye tun itanuk desikre kbuanare, kali Hulasokwe Memeanke khyareta i ma tyanuk ktela mahunik i ma irkye lema ihe nekre. 3Klala esei desike yety Hulasokwe wasi nyanoke, i desike ti lyosu nyano desy ti irire. Ma tun itanuk desikre kyalkyaw irire ti wait tohtohakare, ode kyalkyaw ralatare, ode kyaluka sir dakun. 4Dendye esei desike itun neke yal tel manosy Hulasokwe Memean a lema ihe ne ma yal ma itunak, desikeo yalkyaw wasi tohtohakke kmyesan bo. Klala kolnye yety Hulasokwe wasi nyanoke, i desike yalkyaw ribun matohakare wait tohtohakare ma desy.
5Yaw dakun o kswenan ti kolnye ei ne mumu ne bisa ma myal tel manosy Hulasokwe Memean a lema mihe ne ma myal ma mitunak. Keskye kswenan a ksyalik ti kolnye myety Hulasokwe wasi nyanoke. Kali iry a manety Hulasokwe wasi nyanoke, neke kbuanke lan ma kbyilak iry a manal tel manosy Hulasokwe Memean a lema rahe ne ma ral ma ratunak ne. Keskyede iry manal tel manosy Hulasokwe Memean a lema rahe ma ral ma ratunak ne, neke kbuanke lan dakun, kolnye iry desikre bisa ma raklol tun ratanuk desikre kbuanare, desikeo nenmo tun ratanuk desikre bisa ma kyalkyaw ribun matohakare wait tohtohakare dakun ma desy.
6Lemadendye waikw o hatnimakw e! Kolnye kmwa ma kait a e, ma kal tel manosy Hulasokwe Memean a lema tahe ne, ma kal ma kutun a kor e, desikeo nam kutanuk desy ana lema kika kbuan ti e. Klala kolnye kmwa ma klwosu nam Hulasokwe itanuk ma yaw ne, dete lemamo klwosu nam kinosy Hulasokwe tunanare ma kuhe ne, ta kety Hulasokwe wasi nyanoke ti e, dete lemamo kajar nam lema mihe nekre ti e, desikeo nam desikre mumu ne ana kika kbuan ti e. 7Nam desikre mumu ne kola ne nam madudu nekre, neke hluitke, kyor jukke, ma biar ma nam desikre lema kitun, keskye kolnye irire rofw, ta rritik ma kduduke lema ktyoha inaorake wasi notare, desikeo ana irire lema rhe ohe, inaora sai ne raohw ta raritik ne. 8Kola ne fturkye dakun, ma kolnye inamdiriatke, desikeo musti mo rohw a fturkye ma ktyoha inamdiriatke ksalanare. Kali kolnye rohw a fturkye ma lema ktyoha inamdiriatke ksalanare, desikeo ana irire lema rhe ma musti mo rsosan wait husw o rama ma ti ramdiriat. 9Kola ne e dakun, ma kolnye myal tel salik a irire lema rahe ne ma myal ma mitunak, ode kolnye iry matomolu desikre lema rhe nam mitanuk desikre kbuanare, desikeo nam mitanuk desikre ana kdi hah bo.
10Mlay bain! Telare ribun ti nuske ktem ne, keskye tel desikre mumu ne wasi kbuanare kimin. 11Keskye kolnye lema khwe iry salikke it wasi telke, desikeo kola ne kumwakun ti i ne, kali lema khwe nam itanukke. Ode i dakun o imwakun ma yaw, kali lema hye nam kutanukke. 12Kola ne e dakun. Ma khwe ohe myalkyaw e ma myal hehe malkyakaure toha Hulasokwe Memeanke, keskye eras lan-lanke, neke myalkyaw e ma myal hehe malkyakaw desikre, ma bisa ma myal ma myalkyaw ribun matohakare wait tohtohakare.
13Lemadendye esei desike yal tel manosy Hulasokwe Memean a lema ihe ne ma yal ma itunak, desikemo musti mo syambayan ma iten toha Hulasokwe ma yal hehe malkyakakwe ti i, ma bisa ma yaklol tun desikre kbuanare dakun. 14Ktwanuk koldyesy, kali kolnye kswambayan, ode kal tel manosy Hulasokwe Memean a lema kuhe ne ma kal ma kswambayan, desikeo lema khwe tun kutanuk desikre kibasaranare, kali Hulasokwe Memeanke ne kiala yaw ma kusambayan ne.
15Dendye musti mo ana kala sai de? Bisa ma kal tel manosy Hulasokwe Memean a lema kuhe ne ma kal ma kswambayan. Ode bisa ma kswambayan kor ity wait telke dakun, mamode bisa ma khwe tun kutanuk desikre kibasaranare. Ode kolnye kbwu ma kuora ma klweru Hulasokwe Anike, desikeo bisa ma kuora kor tel manosy Hulasokwe Memean a lema kuhe ne, ode bisa ma kuora kor ity wait telke dakun, mamode bisa ma khwe inaora kuora desike kibasarake. 16Ktwanuk koldyesy, kali kolnye myal tel manosy Hulasokwe Memean a lema mihe desy, ma myal ma msyambayan ma msyalak eraske ba ti Hulasokwe, desikeo iry a matomolu wasimy sambayan desike ana lema rhe wasimy sambayan desike kibasarake. Dendye ana lema bisa ma rou wasimy sambayan desy, ma rtanuk de rbohe, “Amin.” 17Ode biar ma msyambayan ma msyalak eraske ba ti Hulasokwe ne eras kolkyabei dakun, keskye wasimy sambayan desike lema bisa ma kyalkyaw kyal iry matomolu wasimy sambayan desike wait tohtohakare, kali lema rhe o mtyanuk sai.
18Yaw ne kswalak eraske ba ti Hulasokwe, kali kyalamo kal tel manosy Hulasokwe Memean a lema kuhe ne, ma kal ma kutunak neke kbyilak ei ne mumu. 19Keskye kolnye iry matohak ity ne tawahuk ity ma tsambayan, desikeo kbwu ma kal ity wait telke ma ktwanuk tunke khatuke enaru ta enatelw ne bo, ma bisa ma kajar sir, kali ana rhe kbuanare. Kala koldyesy, kali kolnye kal ity wait telke ma kutun, neke kbuanke lan ma kbyilak ti kolnye kutun mo, kal tun a khatu ribun-ribun toha tel manosy Hulasokwe Memean a irire lema rahe kbuanare ne.
20Lemade waikw o hatnimakw matohak e, musti mo nelnyely a e, kola naman kakan a lenla rala rhe tot atyatare ne. Keskye kolnye ti hehe malkyakaw manosy Hulasokwe Memeanke ne, desikeo kete minamana e ti ktela mihe ma mirekanare. De ei neke musti mo lan e ti ktela mihe ma mirekanare ti khyali hehe malkyakaw desy. 2114:21 Yes. 28:11-12Kali rkesy ti Kitab Lanke de, ma ity Ebutke tyanuk ma byohe,
“Ana kaso iry manosy bangsa salik nekre,
ma ral tel salno salik nekre ma ratun a ror wasikw irire, neke ktwanuk ti sir ma desy.
Ode biar ma kala koldyesy dakun,
keskye wasikw irire ana lema ratomolu Yakwe bo.”
22Kali koldyesike mane, bisa ma the ohe tel manosy Hulasokwe Memean a lema tahe ne, neke lema nyatoske ti iry a matohakare, de nyatoske ti iry a lema matohakare ma desy. Klala Hulasokwe yal hehe malkyakakwe ma ity, ma tety wasi nyanoke, neke lema nyatoske ti iry a lema matohakare, de nyatoske ti iry a matohakare ma desy. 23Dendye biar ma koldyesy, keskyede kyoat a ribun matohakare miwahuk e ma msyambayan, ode kolnye ei ne mumu ne myal tel manosy a Hulasokwe Memean a lema mihe ne ma myal ma mitunak, ode kolnye iry a harharure, ta iry a lema matohakare rmai wen desy dakun, ode rtomolu e ma mitun koldyesy, desikeo ana rtanuk ma rbohe, “Iry nekre rhukat de!” 24Keskye kolnye miktemtem neke mlyosu nyano manosy Hulasokwe kyor tel irire rahe nekre, ode kolnye iry a harharure, ta iry a lema matohakare rmai wen desy, ma rtomolu nyano mitanuk desikre, desikeo ana nenmo rhe toha lbwetat ohe, raka wait lim o sal ma ana Hulasokwe yukun sir. 25Ode ana rhe dakun ohe, Hulasokwe hye nam rahunik ti ralat a kralanare ne. Dendye ana nenmo rsakitil ode rou ti Hulasokwe, ode rtanuk ti e ma rbohe, “Mlay bain! Hulasokwe I ne inor a e ne!”
Kolnye iry matohakare rawahuk sir musti mo rtoha ksalake ma it de yalkyaw it
26Lemadendye waikw o hatnimakw e, kolnye miwahuk e ma msyambayan, desikeo it o it neke musti mo myal hehe malkyakaw Hulasokwe inal ti e desy, ma dum a miora ma mlyeru Hulasokwe Anike, ode dum a myajar Hulasokwe tunanare, ode dum a mlyosu nam Hulasokwe itanuk ti e nekre, ode dum a myal tel salik lema mihe ne ma myal ma mitunak, ode dum a myaklol a tel desikre kbuanare. Dendye myal hehe malkyakaw desikre mumu ma it o it neke, myal ma it de yalkyaw it wasi tohtohak. 27Ode kolnye dum a rbu ma ral tel salik a lema rahe ne ma ral ma ratunak, desikemo kete ribun sir a ral ma ratunak, de cuma mo irkye enaru ta enatelw neke ral ma ratunak bo. Ode kete raktemtem a ratun, de it a itun kmuna, maktei o nenmo it a itun huruk. Ode musti mo kika iry ma raklol tun desikre kbuanare dakun. 28Keskyede kolnye lema kika iry ma bisa ma yaklol tun desikre kbuanare, ti kyoat ribun matohakare rawahuk sir ne, desikemo iry a manal tel salik a lema rahe ne ma ratunak desike, musti mo mamwaw sir bo. Dete kolnye rbu ma ral tel desike ma ratunak, desikeo musti mo rtanuk ti ralat a kralanare bo, ma rsalak ba ti Hulasokwe.
29Ode kolnye iry manety Hulasokwe wasi nyanoare ne rbu ma rlosu nyano desikre ti irire, desikeo musti mo irkye enaru ta irkye enatelw ne ratun bo. Klala iry matomolunare musti mo rrekan ode rbihy nyano desikre mamak, ma rhe ohe nyano desikre mlay ta sal. 30Keskyede kolnye Hulasokwe nenmo lyosu wasi nyanoke ti irkye it, neke iry mataklulw ti wen desy dakun, desikeo iry a malmata matun mamuna desike musti mo mamwaw i aduk, ma bisa ma yal klelanke ti iry a nenmo inal nyano manosy Hulasokwe ne, mamode iry desike bisa ma lyosu Hulasokwe wasi nyano desy dakun, ti iry matomolunare. 31Musti mo myala koldyesy, ma ei ne mumu ne it o it ne bisa ma yety Hulasokwe wasi nyanoke, ma ei ne mumu ne bisa ma mhye toha nam miajar desikre, ma wasimy tohtohakke ktyabal ma malkyakaw. 32Ode iry a Hulasokwe inal hehe malkyakakwe ti sir, ma bisa ma rety wasi nyanoare ne, neke bisa ma raneti ralatare ma mamwaw sir aduk, ma rakita klelan a mlakye, ma rlosu nyano ranal toha Hulasokwe ne, ti iry mawahuk sir ti wen desy. 33Kali Hulasokwe lema dyakin ma it de lema tyomolu it ti tasambayan ne, de dyakin ti kolnye tsambayan mo klyakut eras-eras bo. 34Kola dene Hulasokwe wasi irire rala ksala eras maoly desy, ti kyoat rawahuk sir ti hnu kabei ta kabei ma rasambayan ne.
Ode kyoat a rawahuk sir ma rsambayan, desikeo wamfwetare musti mo mamwaw sir. Kete rlura sir ma ratun, de musti mo rnauk tenatare ma babaf ma rtomolu bo, kola ne rakesy ti tnyetak Musake ne. 35Dete kolnye rbu ma rhe namit-namit, desikeo musti mo rakita ma rulak sir bai wait seire aduk, desikeo nenmo bisa ma rena laitare, ma rahes ti sir. Kali lema eras ti kolnye wamfwetare ratun, ti kyoat ribun matohakare rawahuk sir ne.
36Dendye anakyai ti ei neke, dum a lema mbyu ma mtyomolu nam kuajar nekre. De kete mryekan o Hulasokwe tunanare kyosy a e! Dete lemamo Hulasokwe yal tunanare ti e a mmyesan bo! 37Dendye kolnye ti ei neke esei desike ryekan o i ne inety Hulasokwe wasi nyanoke ne, ta iry a Hulasokwe Memeanke kimin a i ne, iry desike musti mo you ohe, nam kukesy nekre, neke ity Ebutke wasi haretke ne. 38Keskyede kolnye iry desike lema byu ma tyomolu nam kutanuk nekre, desikemo kete mtyomolu i dakun.
39Lemadendye waikw o hatnimakw e! Musti mo myalkyaw e ma miten toha Hulasokwe, ma ana yal hehe malkyakakwe ti e, ma bisa ma myety wasi nyanoare. Ode kete mbyu eta irire ma ral tel manosy Hulasokwe Memean a lema rahe ne, ma ral ma ratunak. 40Dendye ei ne musti mo myala nam desikre mumu ma ktyoha ksala erasare, ma kete khyury ma it de lema tyomolu it.
15Yesuske myorif huruk
1Waikw o hatnimakw e, kbwu ma ktwanuk ti e ma mnyenas Brit Eras a kyalake kuabrita ti e desy. Ode ei neke mtyomolu ode myal Brit desy de, ma ti kyait senwe mkyumak malkyakaw Brit Eras desy nggora. 2Dendye kolnye mkyumak malkyakaw Brit Eras kuabrita ti e desy nini nam, desikemo Hulasokwe yaorif e, khyali Brit Eras desy. Keskye kolnye lema mkyumak malkyakaw Brit Eras desy nini nam ti kiba knaru ne, desikemo wasimy tohtohakke ana kdi hah bo.
315:3 Yes. 53:5-12Kali Brit Eras heit a kunal toha ity Ebutke ne, neke kswaur ti e dakun de. Neke Brit desike kisi mamunmunake kolnye: Yesus Kristuske myaty ma syos ity wait lim o sal nekre ba de, ma kola ne rakesy ti Kitab Lanke ne. 415:4 Mzm. 16:8-10; Mat. 12:40; Kis. 2:24-32Ode ramlin a I, ma sekwe enatelw bonyo, Hulasokwe yala I ma myorif huruk toha mamatire, ma kola ne nam rakesy ti Kitab Lanke ne. 515:5 Mat. 28:16-17; Mrk. 16:14; Luk. 24:34-36; Yoh. 20:19Lemade syusu tenanke ti Petrus,15:5 Any a Petrus neke tel Yunanike desy. Klala ti tel Ibranike rabuk i o, Kefas. Kefas neke Petrus anike it desy dakun. Lemade kyoat Paulus ikesy kitab Korintus ne, desikeo kyesy any a Petrus ne o Kefas. maktei o ti wasi matoha I dehean a kresi enaru desy dakun. 6Ode ti sekwe it huruk, desikeo syusu tenanke huruk ti iry matohakare, neke irkye atkwe enasim a kbyilak (500+). Ode ti iry a isusu tenanke ti sir desy, neke ribun a rmorif a nggora nini kyait senwe, klala dum a rmaty de. 7Maktei o syusu tenanke ti Yakobus,15:7 Yakobus a Paulus itanuk i ti ayat ne, neke Yakobus a Yesuske wai i ne, ma i ne ana ika usu khatu ti ribun matohak mamin Yerusalemke. Klala Yesuske wasi nyasoke it ma ani a Yakobus dakun, neke Yohanes wai i. ode syusu tenanke huruk ti wasi nyasoare mumu.
815:8 Kis. 9:3-6Ode lyakwe o nenmo syusu tenanke ma yaw dakun, kola ne naman kakan a lenla kyait wasi hul o sew, desikeo radur ti i ne.15:8 Ti ayat ne Paulus byohe, i ne yola naman kakan a lenla kyait wasi hul o sew, desikeo radur ti i ne, kali Yesuske yilik i ma wasi nyaso i ne, neke lema kola iilik wasi nyaso ida nekre, de kyosy a wen sra eraske Yesuske yilik Paulus, ode byu ti i ma imres ma kete yala atyat iry matohakare de. 915:9 Kis. 8:3Ktwanuk koldyesy kali kolnye kulalau yaw kor Yesuske wasi nyasoare mumu, yaw neke lema kbwer o ktwahal elik, ma irire rbohe Yesuske wasi nyaso yaw. Kali yaw ne koban de ktwaba Hulasokwe wasi iry ribun matohakare, kyoat lenla ktwohak ti Yesuske ne. 10Keskyede Hulasokwe syusu rala eraske ma yaw, dendye senweke kuka nyaso ti Yesuske. Ode Hulasokwe rala eras inal ma yaw desike, lema kdi hah bo, de kika kbuan. Kali yaw neke kalkyaw yaw ma kkwarya ma kbwilak nyaso salik nekre mumu. Keskyede lema amalkyaukkwe desy ma kkwarya wasikw karya desy, de Hulasokwe I ne isaluk yaw ne, ma yal malkyakakwe ma yaw, ma bisa ma kkwarya wasikw karya desy, khyali rala eras inal ma yaw ne. 11Dendye kolnye yaw, ta nyaso salik nekre, neke aramy mmya ma myabrita Brit Eraske ti e, desike lema nam, kali Brit Eras aramy miabrita ti e desike, brit sasamke desy bo. Ode ei ne dakun o, mtyohak Brit Eras desy de.
Iry mamatire ana rmorif huruk
12Lemadendye waikw o hatnimakw e! Aramy myabrita ti e ohe, Hulasokwe yala Yesus Kristuske ma myorif huruk toha mamatire de. Koldyesikemo kyanmwane ti ei neke dum a mbyohe, iry mamatire lema bisa ma ramorif huruk ne de? 13Ode kolnye mlay bain o iry mamatire Hulasokwe lema yala sir ma rmorif huruk, desikemo kyalake Hulasokwe lema yala Kristuske dakun ma myorif huruk. 14Keskyede kolnye Hulasokwe lema yala Kristuske ma myorif huruk, desikemo Brit Eras aramy miabrita ti e ne, lema kika kbuan, ode wasimy tohtohakke lema kika kbuan dakun. 15Ode lema desike kmyesan bo, de kolnye mlay bain o Hulasokwe lema yala mamatire ma rmorif huruk, desikemo aramy neke mikakmet a e ti nam Hulasokwe ialanare. Kali aramy myabrita ohe, Hulasokwe yala Kristuske ma myorif huruk de. Keskye kolnye Hulasokwe lema yala mamatire ma rmorif huruk, desikeo kyalake Hulasokwe lema yala Kristuske dakun ma myorif huruk. 16Dendye kolnye mlay bain-bain ma Hulasokwe lema yala mamatire ma rmorif huruk, desikemo Hulasokwe lema yala Kristuske dakun ma myorif huruk. 17Ode kolnye Kristuske lema myorif huruk, desikeo wasimy tohtohakke lema kika kbuan, ode mimorif neke mhyar wasimy lim o sal desikre nini mmyaty bo. 18Koldyesy dakun o, iry matohak ti Kristuske ne rmaty, desikeo Hulasokwe lema yaorif sir, de rbai mamaty rala bo. 19Ode ohe tal ity wait mormyorifare ti Kristuske ma syaluk ity nini nam, keskye kolnye Kristuske cuma mo syaluk ity ti tamorif ti nuske ktem ne bo, desikemo ity neke tety loblobak ma kbyilak irire mumu.
20Keskyede mlay bain ohe, Hulasokwe yala Kristuske ma myorif huruk toha mamatire de. Ma I ne myorif a kmuna toha mamatire, dendye I ne yeluk nyatos ohe iry mamatire ana rmorif huruk dakun. 21Lemadendye khyali irkye it a wasi lim o sal, desikeo irire mumu ne rmaty. Klala khyali irkye it dakun, desikeo Hulasokwe ana yala mamatire ma rmorif huruk. 22Kali ity mumu ne Adam tesnwo natu ity, dendye ana tmaty mumu. Klala iry manety ral sasamke ror Kristuske ne rmaty, desikeo ana Hulasokwe yala sir mumu ma rmorif huruk. 23Keskyede Hulasokwe yala irire ne it o it ma rmorif huruk toha matmyatkye, desikeo kitoha-kitoha i. Neke Hulasokwe yala Kristuske ma myorif a kmuna, maktei o ti sew ana Kristuske ima huruk ne, desikeo nenmo Hulasokwe yala iry manety ral sasamke ror Kristuske ne ma rmorif huruk.
24Ode ktela iala desikre mumu ne kisakut bonyo, nenmo nuske ktem ne klyodur. Kyoat desike Kristuske yala yal haret mahareta ti laitke ode ti lasmyerke khaha ne mumu, ma iskyui-iskyay wait haret desikre, ma ika Raja ti. Maktei o nenmo yal wasi haret desikre ba mumu ti Ama Hulasokwe. 2515:25 Mzm. 110:1Kali Kristuske musti mo ika Raja ma kyumak haretke, nini Hulasokwe yala yal iry a rasorw a Kristuske ne, ma iry desikre mumu ne Kristuske syaa lwau ti uno matat. 26Dendye nam manosy lyaw lahlahukke ma kisorw a Kristuske ne, neke Hulasokwe yala yal ma ktei de, neke matmyatkye.15:26 Ayat ne kbyohe, Hulasokwe yala yal ma ktei de, neke matmyatkye, neke kbuanke ohe matmyatkye kitayar ode lema kimin de.2715:27 Mzm. 8:7Ode the ohe nam nekre mumu ne ana kdi ti, kali rkesy ti Kitab Lanke ma kbyohe, Hulasokwe yala Kristuske ma ika Raja ma hyareta nam nekre mumu. Keskye the ohe, nam rakesy ti Kitab Lanke ne lema kbuanke o, ana Kristuske hyareta Hulasokwe. Lema koldyesy! De Hulasokwe I ne yala nam desikre mumu ne, ma Kristuske hyareta nam desikre. 28Ode kyoat Hulasokwe yala ma nam desikre mumu ne Ananke hyareta ti ma ktei, desikeo nenmo Ananke yal haret desy mumu ti Ama Hulasokwe. Mamode kyala kyosy sew desy, Hulasokwe myesan a kyumak haretke ti esei ta esei bo. Ode myesan a Lan Lahuk I ti nam desikre mumu.
29Keskye kolnye Hulasokwe lema yala iry mamatire ma rmorif huruk, desikemo kyanmwane irire dum a rbu ma rbabtis sir ma reluk mamatire ne de? Ode kolnye Hulasokwe lema yala iry mamatire ma rmorif huruk, desikeo lema kika kbuan ti rababtis irire ma reluk mamatire ne.
30Ode kolnye Hulasokwe lema yala iry mamatire ma rmorif huruk, desikemo kyanmwane kyaki-kyaki ne aramy minal ara tenamy nekre ti masunw a kibasara matmyatkye ne, ma kidan aramy ne de?! 31Waikw o hatnimakw e, mtyomolu mamak nam kutanuk ne. Mlay bain! Sew kyaki nekre masunkwe kdyan yaw nini nenma kmwaty. Kola dene mlay bain ti mibitil matakkwe dakun ne, kali myety ral sasamke myor ity Ebut Yesus Kristuske de. 3215:32 Yes. 22:13Keskye kolnye iry mamatire lema rmorif huruk, desikeo kbuan sai ma yaw, ti kolnye kou ma kuhalas tel a kor iry mabu ma ratabahunw a yaw ti nus Efesus ne de?15:32 Ti ayat ne kbyohe, iry mabu ma ratabahunw a yaw, neke ti tel Yunanike o kbyohe, heal a mahature. Lemade kolnye iry a ity ne tmaty, ode lema bisa ma tmorif huruk de, lemamo ttoha tun kyalamo irire ratanuk ma kibohe, “Mmya ma taknam o tenw ma tamukmuka ity ti senwe, kali ana bolbol o tmaty de!”
33Lemadendye kete kyal nini irire rakakmet a ea kyor wait tun kakmet a ratanuk ma rabohe, iry mamatire lema rmorif huruk de. De musti mo mnyenas tunke khatuke it ti kibohe, “Kolnye irire raka lui ror iry mahature, desikeo ana rahatw kola sir dakun.” 34Dendye musti mo mhye toha lbwetamy, ma kete myala lim o sal de. Ode musti mo ei neke myay, kali ti ei neke dum a lema mhye Hulasokwe.
Kolnye tmorif toha matmyatkye desikeo ity tenat ne ana kolkya
35Waikw o hatnimakw e, anakyai dum a rena de rbohe, “Kolkyabei mane Hulasokwe yala iry mamatire ma rmorif huruk ne de? Ma kolnye rmorif huruk, desikemo ana tenat nekre kolkya?” 36Keskye iry ktemare sir ne ratanuk koldyesy ne. Kali the ohe, kolnye ttan hinkye it, desikemo hiny desike tluk ei lasmyerke kralake, ma kola ne hiny desike kmyaty de. Maktei o nenmo bisa ma hiny desike ktyuhw huruk. 37Ode kolnye ttan nam dum, desikeo lema ttan kiktemtem, de ttan a khatuke bo. Kola dene ttan gandumke ta hiny salik ne. 38Ode hiny desikre it o it neke, Hulasokwe yala ma ksyalno ksyalik a i. Ode ana Hulasokwe myesan a yala hiny desikre ma ktyuhw, ma ktyoha ibuke. Ma hiny desikre it o it neke, kituhw ne lema mais.
39Kola dene nam mamorif ti lasmyerke khaha ne mumu ne, neke yarutare lema mais, kali irkye tenanke lema kola sabkye tenanke, ode manuke tenanke lema kola maskye tenanke.
40Kola ne nam mamin ti laitke, ode nam mamin ti lasmyerke khaha ne dakun. Kali nam mamin ti laitke wasi kersanke lema mais kola nam mamin ti lasmyerke khaha ne wasi kersanke. 41Kola ne sekwe ranrananke wasi kersanke ksyalik i ti hulke ranrananke wasi kersanke. Ode nam deru neke ranranatare ksyalik i ti thunare ranranatare wait kersanare dakun. Ma thunare ranranatare dakun o it o it neke wasi kersanare ksyalno ksyalik i.
42Koldyesy dakun ti Hulasokwe ana iala ity tenat nekre. Kyoat tmaty, desikeo ramlin ity tenatare ma ana kibtasy. Keskye ti kyoat Hulasokwe yala ity ma tmorif huruk, desikeo ity tenat a Hulasokwe iala ma kimorif huruk ne ana lema kibtasy, de kmyorif nini nam. 43Neke ity tenat a ramlin desike lema eras, klala ity tenat a Hulasokwe iala ma kimorif huruk ne eras a ksyalik. Ode ity tenat a ramlin desike lema malkyakaw, klala ity tenat a Hulasokwe iala ma kimorif huruk ne malkyakaw ksyalik. 44Ode ity tenat a ramlin ei asake kralake ne, neke kyosy lasmyerke. Klala ity tenat a Hulasokwe iala ma kimorif huruk ne, neke kyosy a Hulasokwe Memeanke. Kola dene selsel ne ity tenat nekre kimin ti lasmyerke khaha ne bo. Keskye ana kyait sekwe, Hulasokwe yala ity tenat nekre ma harharw, neke kyosy Memeanke, ma bisa ma tamin ti wen sra eraske.
4515:45 Kej. 2:7Nam kutanuk desikre kola ne nam rakesy ti Kitab Lanke ti kibohe, “Ity Ebut Hulasokwe yala iry a mamunake toha rayahkwe ma myorif, neke ani Adam.” Klala Adam manosy lyakwe, neke Yesus Kristuske, ma I ne inal mormyorif manal nini namke ma ity ne. 46Keskye Hulasokwe lema yal ity tenat mamin ti wen sra eraske a kmuna ma ity, de yal ity tenat mamin ti lasmyerke khaha ne kmuna ma ity aduk, maktei o ana nenmo yal ity tenat mamin ti wen sra eraske ma ity. 47Kola ne iry a mamunake dakun, neke Adam, ma Hulasokwe ika i a kyosy rayahkwe toha lasmyerke khaha ne. Klala Adam manosy lyakwe, neke Kristuske, ma I neke yosy wen sra eraske. 48Koldyesy dakun ti iry mamorif ti lasmyerke khaha ne mumu, neke tenatare kola Adam mamunake tenanke, neke Hulasokwe ika toha rayahkwe. Klala iry mamin ti wen sra eraske, ana tenatare kola Iry manosy wen sra eraske tenanke, neke Kristuske. 49Dendye selsel ne ity tenat neke kola Adam tenan a Hulasokwe ika toha rayahkwe ne. Keskye kyoat a tmaty, maktei o Hulasokwe yala ity ma tmorif huruk, desikeo ana Hulasokwe yala ity tenat ne ma harharw, ma kola Kristuske tenan a manosy wen sra eraske ne.
50Lemade waikw o hatnimakw e, nam kutanuk ne kbuanke kolnye, lema bisa ma tmorif tor Hulasokwe ti wen ihareta tike kyor ity tenat mamin ti nuske ktem ne. Kali nam ana mabtasy nekre, lema bisa ma tety bai wen a namare lema bisa ma kibtasy ti ne.
5115:51 1Tes. 4:15-17Lemadendye waikw o hatnimakw e, musti mo mtyomolu mamak ma klwosu ti e, ti nam a heitlulswo kihunik ike. Neke kyoat Yesuske ana yulak I, desikeo ti iry matohakare mumu ne, ana dum a lema rmaty. Keskye iry mamaty o mamorif nekre, ana Hulasokwe ihihi it o it ne mumu ne ity tenatare. 52Ode ktela desikre mumu kdi ti, ti kyoat ttomolu strompet manosy lyaw lahlahukke ma kdudu.15:52 Anakyai strompet manosy lyaw lahlahukke neke klyosu strompet manosy lyaw lahlahuk a rakesy ti Kitab Wahyuke. Matos ti Why. 10:7 ode Why. 11:15. Ma kyala mait bonyo, iry matohak ti Yesuske ma ramaty ne, Hulasokwe yala sir ma rmorif huruk, ror tenat harharw a lema bisa ma kibtasy ne. Ode ity a matohak a tamorif a nggora ne, lema tmaty, de Hulasokwe ihihi ity tenatare ma harharw dakun. 53Kali ity tenat a kimaty ode kibtasy ne, musti mo Hulasokwe yeluk kyor ity tenat harharw a manal nini namke. 54Dendye kyoat Hulasokwe yeluk ity tenat a kimaty ode kibtasy ne, kyor ity tenat a ana lema kimaty ode lema kibtasy ne, desikeo nam rakesy ti Kitab Lanke kralake ana kdi ti. Neke kbyohe,
Hulasokwe yala yal matmyatkye ma ktei de.15:54 Yes. 25:8
55Hei matmyaty o! Wasimw haretke o ka?
Ode amalkyaumw a kiala ma kisunw ne o ka?15:55 Hos. 13:14
56Kola dene kolnye manunkwe tyutu ity ma tmaty, koldyesy dakun o ity neke musti mo tmaty, kali iry a lim o sal ity. Ode Hulasokwe musti mo yukun ity, kali tbilak tnyetak inal ti Musake. 57Keskye tsalak eraske ba ti Hulasokwe, kali I ne iala ity ma tala tal matmyatkye ne, neke kyosy ity Ebut Yesus Kristuske imaty ma ilitan eta ity toha ity wait lim o sal nekre de.
58Lemadendye waikw o hatnimakw kulobak e, musti mo mtyohak manenen ti Yesus Kristuske, ma wasimy tohtohakke lema kiwaway de kimbwakar, ma kete nam dum a khyury a e ma mila toha wasimy tohtohakke. Ode mkyarya ti ity Ebutke myor ralamy kusunare. Kali mhye ohe tkarya sai ta sai ti ity Ebutke, desikemo ity maslyesatare lema kdi hah elik.
16Snuratke ti iry Korintus-are ti khyali kuban a rawahuk ma rasaluk iry matohakare ti nus Yerusalemke
116:1 Rm. 15:25-26Waikw o hatnimakw e! Kbwu ma ktwanuk ti e, ti khyali kuban a miwahuk ma ana misaluk Hulasokwe wasi iry mamin ti Yerusalem desy. Lemadendye kuten ma mtyoha wasikw snurat ne, neke kola wasikw snurat a kyalake kusurat ti ribun matohak mamin ti propinsi Galatiake. 2Ode kolnye ti sew Minggu-nare, desikeo it o it neke musti mo myal kubanke anana toha maslyesamire, ma myety ba ti msyosan, ma kete kyoat a kala ma kmwa, desikeo nenmo myala ma miwahuk kuban. 3Ode kyoat a kbwa ti kait e ti desy, desikeo nenmo kaso iry a mitohak ma miilik sir nekre, ma rety kuban desikre bai nus Yerusalemke. Ode ana kkwesy atyahkye dakun, ma klwosu sir ti iry matohakare o so. 4Dete kolnye mryekan ma musti mo kbwa dakun, desikemo ana kor sir ma aramy mbya.
Paulus irekkye ne
516:5 Kis. 19:21Waikw o hatnimakw e! Krweky ma kbwu ma ti ksweak e, keskyede ana klwakut a klwola propinsi Makedoniake mumu ma ktei, desikeo nenmo kbwai nus Korintus desy, ma ti ksweak a e. 6Ode kyoat ana kait desy, desikeo anakyai kumin ti desy mingguke sasam ta enaru aduk, dete lemamo anakyai kumin ti desy nini oras a mrinke ksyakut. Mamode kyoat kswaur wasikw laklakutke bai lulkwe, desikeo ei ne bisa ma msyaluk yaw ma kbwai kabei ta kabei bo. 7Ode senwe lenla kbwu ma kbwai desy, kali lema kbwu ma kor e jamke sasam ta enaru bo. De kolnye ity Ebutke you, desikeo kbwu ma ana kor e klenke soso dakun. 816:8 Im. 23:15-21; Ul. 16:9-11Keskyede senweke kbwu ma kumin ti nus Efesus ne aduk, nini sew lan Pentakostake kdi ti.16:8-9 Kis. 19:8-109Kali ti neke Hulasokwe yal klelanare ribun ma yaw, ma kkwarya wasi karya inal ma yaw ne. Ode karyaakw desy lema kdi hah bo, biar ma iry ribunke rba etno eta yaw ti nus Efesus ne dakun.
1016:10 1Kor. 4:17Ode kolnye Timotius bya ti yait e ti desy, desikeo kuten ma myal i a myor ralamy lublubare, ma kete ralake kakan, kali i desike kyarya ti ity Ebutke kola ne yaw dakun. 11Dendye kete mlyura ma irkye it a ihmwai i. De musti mo msyaluk i ti wasi laklakutke, ma bisa ma yulak i ma yait yaw o eras-eras i bo. Kali malmata kukita i a yor iry matohak a malakut manor i nekre, ma rma ma rait yaw.
12Klala ity wait Apolos, neke kalkyaw yaw ma ktwanuk a kdi a klai ne ti i de, ma yor ity wait matohak idanare, ma rbai desy ti rseak a e. Keskye lenla byu ma bya, de kolnye ana kika klelan eraske it, desikeo nenmo bya ti syeak a e ti desy.
13Lemadendye musti mo mijaga mamak e! Ode musti mo mkyumak malkyakaw wasimy tohtohak desy ma kimbwakar! Ode musti mo mires, ma malkyakaw e ti wasimy tohtohakke. 14Ode kolnye myala ktela sai ta sai ti irire, musti mo msyusu wasimy loblobakke ti sir.
15-1616:15-16 1Kor. 1:16Waikw o hatnimakw e, mhye ohe Stefanus yor wasi sekye kralake, sir ne ratohak ti Yesuske a kmuna ti propinsi Akhayake ne. Ode sir neke ral ralat a kralanare bain-bain ma rkarya ma rsaluk Hulasokwe wasi irire. Lemade waikw e, kal ralakkwe kralake ma kuten toha e, ma mtyomolu ode mtyoha Stefanus sir, ror iry a ranal ralat a kralanare bain-bain ma rakarya ti Hulasokwe ne. 17Ode kumukmuka yaw ksyalik, ti kyoat Stefanus, Fortunatus, ode Akhaikus, ramai ne. Kali biar ma lema mimin ma myor yaw ti ne, keskyede detelkwe reluk e ma ror yaw ti ne. 18Kali sir ne raluka ralakkwe kralake, kola dene raluka ralamy kralanare dakun ne. Lemadendye musti mo myalan iry maoly desikre.
Paulus kyus wasi atyahkye
1916:19 Kis. 18:2Waikw o hatnimakw e, ribun matohak a mawahuk sir ma rasambayan ti nus o hnu mamin ti propinsi Asia ne, neke rosa wait salamke ti e. Ode Akwila yor sawa Priskila, ror iry matohak a mawahuk sir ma rasambayan ti Akwila wait sekye ne, neke ral ralat a kralanare bain-bain ma rosa wait salamke ti miktemtem dakun, kali ror e neke myety ral sasamke myor ity Ebut Yesuske de. 20Ode ity wait o ity hatnimat matohak mamin ti ne mumu, neke rosa wait salamke ti e dakun. Ode kolnye it de yait it ma miwahuk a e, desikeo musti mo it de iten alanke ti it, ode musti mo it de syusu wasi loblobakke ti it kyor ralami kusunare dakun.
21Yaw ne Paulus, ma kosa wasikw salamke ti e. Yaw ne kmwesan a kkwesy tun a khatu nekre bony mane.16:21 Kolnye Paulus byu ma kyesy wasi atyahy nekre, desikeo ia tyanuk, ode iry salik a rkesy bo. Keskye kyait ma kyus wasi atyahy nekre, desikeo nenmo ia myesan a kyesy tun a khatu manosy lyaw nekre, ma irire rhe ohe atyahy nekre kyosy a i bain-bain.
22Ode kolnye esei desike lema dyakin ity Ebut Yesuske, lemamo Hulasokwe yukun i ma yotuk i bai mamaty rala. Kuten ma ity Ebutke yulak I ma mya huruk!16:22 Ti ayat neke tunke khatu kibohe, Kuten ma ity Ebutke yulak I ma mya huruk! Neke rkesy ti tel Aramke o, Maranatha!
23Lemade kuten ma eras manosy ity Ebut Yesuske kyor miktemtem mumu.
24Ode klwobak e mumu, ti tanety ral sasamke tor Yesus Kristuske ne.
Teike desy de.