Taytus

Suwat si Pol pa mman si

Taytus

Pahati

Si Taytus ilay bangsa Greek. Pitsayaꞌ na ya ni si Isa Almasi sabap bay ya kale umanat si Pol. Song hallom, lay na ya bay mmeꞌ ni si Pol nabangan iya masaplag umanat mahap pasal si Isa ni kalahat-lahatan. Disu lahat bay tiluꞌ da yana nusa Krit. Song hallom, lay na baw si Pol pawus pa disu lahat. Kuwan si Taytus, lay na doꞌ bay sohoꞌ si Pol pasangkod ndooy ni Krit noan siga jama ma bahau jaꞌ mmeꞌ ni si Isa.

Njawom suwat tuu, lay si Taytus sohoꞌ si Pol meneꞌ kalallahan ndooy ni Krit binuwat pa-mmean ni siga baanan sukuꞌ si Isa. Maka lay gi ya sinohoꞌ naup siga guru palsu ndooy supaya yaꞌ na sila magsian jama man tōꞌ sabanna. Maka meka du tōꞌ si Pol njawom suwat tuu pasal kawul-piil ayad ma subay binogbogan meꞌ sukuꞌ si Isa.

Ituu bay sinuwatan meꞌ si Pol luu na ga tallumpuꞌ-tallun taun paddus si Isa Almasi bay inangkat pa sulgaꞌ.

TAYTUS

^1-4Ituu itu aku, si Pol, disu ata Tuhan saltaꞌ na rasul si Isa Almasi. Itu suwat ku pa mman nu Taytus. Meꞌ ku ngingat, sibuꞌ du ko ka anak ku rahasiyaꞌ sabap meꞌ ta dambuwaꞌ atay pitsayaꞌ ni umanat mahap pasal si Isa. Kamura-murahan binuwanan na pin ko kasannangan ka barakat meꞌ Mmaꞌ tabi Tuhan ka tukang nalamat kitabi, yana si Isa Almasi.

Ndang katoonan nu du, meꞌ aku disu rasul, bay ku kawakilan noan sagannap ma bay peneꞌ Tuhan supaya patakkoꞌ pangando da ni si Isa. Kamura-murahan man sabapan umanat mahap ma pasampay ku, pasōng du dawom da ngakig arat-tabiat Tuhan. Boꞌ na, bong siꞌ ina umanat mahap kinapitsayaan, tatantu jama luu na kasampulnaan nyawa da saumu-umu. Kasampulnaan nyawa ina, ndang lay na bay njanjiꞌ meꞌ Tuhan ni manusiyaꞌ maruhuꞌ-ruhuꞌ lagi. Boꞌ bila ina Tuhan, yana tukang nalamat kitabi, bay nganjanjiꞌ, mastiꞌ mmeꞌ jaꞌ ya ni lapa na.

Dari pag taabut masa ma bay ginantaꞌ meꞌ Tuhan, lay na pinalahil meꞌ na si Isa yana lān man manusiyaꞌ koleꞌ kaallum bahau. Na umanat mahap pasal kaallum bahau ina, yana umanat ma bay sinohoꞌ pinasaplag niyaku.

Arat-tabiat tawop ni jama ma binuwat pa-mmean baanan sukuꞌ si Isa

⁵Na kau ina ndang katoonan nu na du, ngkon nu bay sohoꞌ ku pasangkod nnaa ni Krit supaya tapupus nu pabuwatan ma bay tagnaan ta. Boꞌ lay gi ko bay sohoꞌ ku nguwakilan jama binuwat siga pa-mmean ga baanan sukuꞌ si Isa ni mimon daira nnaa.

⁶Bila ko meneꞌ pa-mmean, subay kalallahan ma yaꞌ luu sutsutan njataꞌ da. Subay disu du nda da. Maka siga anak da subay du pitsayaꞌ ni Papuꞌ Isa. Maka subay yaꞌ luu tuntut njataꞌ da bay buwat maat atawa pun yaꞌ ngasip ni induꞌ-mmaꞌ da. ⁷Tiyap-tiyap pa-mmean ina, meꞌ halling sambat ku na siꞌ, subay yaꞌ luu sutsutan njataꞌ da. Tangge-tingkōꞌ da ndang subay sikatawop ka sila limbang Tuhan ngayaran siga sukuꞌ na. Subay yaꞌ langkaw atay da atawa pasuꞌ kōk da. Maka yaꞌ dari palalango. Subay sila yaꞌ bangis maka subay yaꞌ magnapsu mulakab ni sīn. ⁸Iya pataꞌ ninsila, subay sila pangahulmat ka tigiꞌ buwat mahap ni jama. Subay patong mamiki maka subay sila intong. Subay sutsiꞌ kawul-piil da ka subay sila pandoy ngagak dī da. ⁹Maka subay kuwangkutan da siga tōꞌ sabanna ma bay pinasampay meꞌ ta ninsila. Basta ina sila yaꞌ kuhi papagsiꞌ man siga tōꞌ looy, tapataggu da na sina iman siga pagkahi da. Sampay takaya da mōꞌ salla ni tōꞌ sagannap ma nulang sila.

Kahalan jama ni nusa Krit

¹⁰Na nnaa ina ni Krit, meka sina jama nulang tōꞌ sabanna. Bbuwatan da ina magsian jama ka tōꞌ palsu. Boꞌ nabiat lagi sila mitsala manunsāp, awla na sagannap ma nanggehan hāl meꞌ ngislam. ¹¹Tud subay sila yaꞌ padari nu noan siga jamaa nnaa sabap meka na paglūng magsiꞌ sabapan tōꞌ da. Isi tōꞌ da ina yaꞌ san pataꞌ sinabbut. Sugaꞌ amu-amu sila nōꞌ meꞌ looy sabapan eka sīn takoleꞌ da. ¹²Kadarihan da ina magbēꞌ du ka sambatan disu pagkahi da bangsa Krit ma halul-akka, ilooy ma yuk na, “Kinawnan bangsa Krit, pangandustaꞌ jaꞌ mimon. Maat jaꞌ kasurahan da, huskaw lagi, lagak lagi.” ¹³Na bitsala looy ilay siꞌ, luu du bana na. Sangkon daa ko paagak maintoman sagannap ma ndiyoan nu supaya sila tattap mmeꞌ ni tōꞌ si Isa ma kinapitsayaan meꞌ ta. ¹⁴Amay-amayan nu sila nnaa yaꞌ nohoꞌ maruli pali-pali siga Yahudi atawa pun siga aturan binogbogan meꞌ sagannap ma nuwak tōꞌ sabanna. ¹⁵Jama meꞌ looy ilay ma yaꞌ pitsayaꞌ ni si Isa, ndang yaꞌ du bay sinutsiꞌ meꞌ Tuhan atay da. Yaꞌ luu niyat atay da sutsiꞌ batan ndang lamaꞌ pamiki da. Maka yaꞌ na san luu nulang ni honaꞌ-honaꞌ da bong sila buwat maat. Boꞌ sagannap ma pitsayaꞌ ni si Isa ina, lay na sinutsiꞌ atay da. Sangkon katoonan da na san gi oy sinagid atawa pun kinakan meꞌ da, yaꞌ du luu katamak ninsila. ¹⁶Boꞌ sagannap ma nuwak tōꞌ sabanna, san ina sila māꞌ katoonan da Tuhan, tumatandaꞌ du ni tangge-tingkōꞌ da yaꞌ bana bitsala da. Pabuwatan da ina sinukang meꞌ Tuhan. Yaꞌ sila ngasip niiya. Maka yaꞌ sila tawop pinakoy ni oy-oy pabuwatan mahap.

Tōꞌ ni siga matatoa

¹Sugaꞌ kau Taytus, inaa jaꞌ pasampayun, yana tōꞌ ma sikatuwaꞌ ka kabanahan. ²Baan nu sagannap matatoa ma lalla, subay sila pandoy ngagak dī da. Maka subay sila pahatu-hatu ka patong mamiki mari sila tawop pinag-aratan. Subay sila tattap mmeꞌ ni tōꞌ ma kinapitsayaan meꞌ tabi ka maaseꞌ ni jama, sampay natas njawom katiksaan.

³Damikiyan baan nu du sagannap matatoa ma danda, arat-tabiat da subay moo kabantugan pa Tuhan. Subay sila yaꞌ mitna maka subay yaꞌ minarat ni inuman kalango. Subay sila noan ⁴karandahan ma yaꞌ gi toa mari sila pandoy maasean lla da sampay ga anak da, ⁵maka supaya sila patong mamiki sampay mōꞌ kawul-piil sutsiꞌ. Maka subay karandahan ma yaꞌ gi toa tinoan mari sila hutu buwat ni lumaꞌ ka buwat kaayaran sampay maglillaꞌ ni lla da. Bong siꞌ ina bogbogan da meꞌ naa, malaingkan yaꞌ luu danan man umanat Tuhan ma pasaplag tabi binitsala pa kalaatan.

⁶Damikiyan kalallahan pun ma yaꞌ gi toa, sohoun du sila papatong mamiki. ⁷Labi na kau Taytus, subay bogbogan nu hāp kawul-piil nu mari luu suntuan ayad inakig meꞌ siga soheꞌ nu. Maka mimon tangge-tingkōꞌ nu subay magbēꞌ jaꞌ ka kabanahan ma tinōꞌ meꞌ nu. ⁸Amay-amay bila ko mitsala, subay bana jaꞌ supaya yaꞌ luu man nu tasahawi. Meꞌ naa inaa, alang-kapalang sagannap ma nulang kitabi mitsala kitabi pa kalaatan.

⁹Na ni kapasal siga ata ni baanan sukuꞌ si Isa nnaa, baan nu sila subay sila wā ngasip ni papuꞌ da. Maka subay pagbuli-bulihan da kanaalla buwat paayad mari kasulutan papuꞌ da ninsila. Daa sila meꞌ kasohean ata nganjawap ¹⁰atawa tangan-tanganan. Arapun subay sila makitahan papuꞌ da tud tapangandohan sila. Dari bong ina mahap du mimon kawul-piil da meꞌ naa, tumatandaꞌ na ni jama tud mahap du tōꞌ tabi pasal Tuhan, yana poonan kasalamatan tabi.

¹¹Kitabi itu sikamimon ma pitsayaꞌ ni si Isa, subay ayad kawul-piil tabi pagka luu na bay pinalahil meꞌ Tuhan aseꞌ-tabang na ningkitabi. Batan luu na si Isa bay papitu na pa junyaꞌ supaya luu na dapat man mimon manusiyaꞌ koleꞌ kasalamatan. ¹²Aseꞌ-tabang Tuhan ina ningkitabi matomoꞌ kainagon tabi nimanan kawul-piil ma yaꞌ nulut ni kahandak na sampay nimanan oy-oy napsu ma maat. Maka aseꞌ-tabang Tuhan sina matomoꞌ kainagon tabi papatong mamiki ka buwat kaintongan sampay ngakig arat-tabiat na halloman tabi ni junyaꞌ tuu. ¹³Ilooy ilay siꞌ subay isbat tabi sasang tabi ngagad llaw kagak-gāk ma pinagdautan meꞌ tabi. Awnan ku ilay siꞌ katakka si Isa Almasi, yana Tuhan tabi Sangat Kawasa ma tukang nalamat kitabi. ¹⁴Iya ilay, lay na ga bay nongan umu na kalnaꞌ kitabi supaya tapaddusan na na kitabi man tabiat tabi buwat dusa, maka supaya tapasutsiꞌ na kitabi. Batan kahandak na ina, luu na sukuꞌ na ma tinagi buwat mahap, ma pabiddaꞌ man kasohean manusiyaꞌ.

¹⁵Na Taytus, ituu siꞌ sikamimon ma bay suwat ku ningkau, pasampayun sa ni siga baanan sukuꞌ si Isa nnaa. Buwansangan nu sila mmeꞌ ni tōꞌ tuu. Bong luu pagkahi nu yaꞌ doman mmeꞌ ni tōꞌ tuu, daa pabiyahun. Ndang-ndang luu du kapatut nu naup sila.

Arat-tabiat tawop ni siga sukuꞌ si Isa

¹Paintoman nu siga danganakan ta nnaa nohoꞌ maglillaꞌ ni siga pa-mmean parinta sampay ngasip ni sagannap ma ngantanan saraꞌ. Maka subay sila pinaintoman nohoꞌ wā saddiya buwat mahap. ²Baan nu sila subay sila yaꞌ mitsala soysoy pa kalaatan. Maka daa sila sohoun sasaꞌ-manasaꞌ. Arapun subay lammaꞌ sampay diyoꞌ jaꞌ pangatayan da ni mimon manusiyaꞌ. ³Ndang subay yaꞌ langkaw atay tabi batan jaman tabi ilay yaꞌ gi bay pitsayaꞌ ni si Isa, kitabi pun awam du ni kabanahan. Yaꞌ du tabi bay ngasip ni kahandak Tuhan. Bay du kitabi lingu. Bay jaꞌ kitabi maabak meꞌ tabi koleꞌ parasahan ayad para ni dī tabi. Sibuꞌ du kitabi ka bay pinahata meꞌ jinisan napsu ma maat. Llaw pa dangallaw, maat jaꞌ pamiki tabi ni pagkahi tabi manusiyaꞌ. Tud yaꞌ bay kuhi lakka man jawom atay tabi meꞌ tabi bay sikadangkiꞌ-kadangkiꞌ ka sikalammis-kalammis. ⁴Lipara, pag taabut waktu bay ginantaꞌ meꞌ Tuhan, yana poonan kasalamatan tabi, lay na ya malahil timbang na ka aseꞌ na ni manusiyaꞌ. ^5-6Lay na ya nalamat kitabi. Boꞌ tud kainu-inu silay batan yaꞌ luu kaayaran bay pabuwat tabi gantaꞌ man tabi pataꞌ sinalamat. Arapun kon Tuhan bay nalamat kitabi sabap ehe timbang na ni manusiyaꞌ. Dari man sabapan pabuwatan si Isa Almasi, tukang nalamat kitabi, lay na puwasan Tuhan dusa tabi. Dari ko ngawon, lay na kosoan na atay tabi supaya kinaddoan dusa tabi. Boꞌ lay gi ya nupaatan kitabi ka Rū na, yana Rū Sutsiꞌ bay pinaasok njawom atay tabi. Dari sabapan Rū Sutsiꞌ, sibuꞌ na du kitabi ka lay na pinamaddihan pabalik, batan luu na kaallum tabi bahau. ⁷Ni kaehe aseꞌ Tuhan, lay na kitabi initung meꞌ na intong supaya tatantu tabi luu na kasampulnaan nyawa tabi saumu-umu.

⁸Na siga tōꞌ ku itu tud kanaalla. Sangkon Taytus, sohoun na kinanna ni mimon nnaa ma mangando pa Tuhan. Meꞌ looy ilay, inisbat na meꞌ da buwat jinisan kaayaran ni siga pagkahi da manusiyaꞌ.

Na bitsala ku itu, mahap jaꞌ labbasakayi, boꞌ kasampulnaꞌ ni jama. ⁹Sugaꞌ kasohean jama yaꞌ doman ngahasi bitsala ku. Iya karomanan da magjaw-jawap jaꞌ hāl ma yaꞌ luu pus na. Tigiꞌ sila maglangkaw-langkawan ni hāl usuwan kabboꞌ-bboan maka magsaggaꞌ pasal jinisan aturan agama Yahudi. Sangkon daa na ko palamud. Tud yaꞌ sina luu sōng na, gam pin kalāt gi ni waktu. ¹⁰Bong luu njawom baanan bi tigiꞌ mōꞌ pagsaggaan, sohoun patagong. Bong min duwa na sila bay sinaggong, boꞌ amu-amu yaꞌ ngasip, daa na kam palamud ninsila. ¹¹Batan katoonan bi na du, jama meꞌ looy ilay bingkok maka ndang nabiat buwat dusa. Boꞌ na, muhung jaꞌ sila kalabuan hukuman Tuhan.

Katapusan bitsala si Pol

¹²Na Taytus, yaꞌ na situ hallom, sohoꞌ ku na du pilu si Altemas atawa si Tikikus. Pag mintu luu na takka, pagbuli-bulihan nu deꞌ-dēꞌ pilay pa Nikopolis. Ndooy sa kita sitammu, batan katikmoran pamiki ku ndooy na doꞌ ku pahantiꞌ halloman timpu tanne.

¹³Na pag mintu patuwak na ga si Apolos ka si Abugaw Senas man naa, palangkapan nu sa sila mari yaꞌ luu kulang ninsila. ¹⁴Kuwan siga pagkahi ta sukuꞌ si Isa nnaa, sohoun sila makutuꞌ meꞌ da buwat kaayaran. Maka sohoun sila nulung jama tiksaꞌ. Meꞌ naa ina, mehe kapansahaliyan da ni manusiyaꞌ.

¹⁵Dambuli man inaa, mimon pagkahi ku ntuu lay nohoꞌ masampay salam duwaa da ningkau. Maka pasampayun doꞌ salam duwaa kami ni mimon nnaa ma maaseꞌ ningkami, yana siga pagkahi tabi sukuꞌ Papuꞌ Isa. Kamura-murahan binuwanan na pin kam sikamimon barakat meꞌ Tuhan.

Wassalam