Pilipi

Suwat si Pol pa mman Baanan Sukuꞌ si Isa ndooy ni

Pilipi

Pahati

Pilipi ilay yana disu daira ndooy ni Masidunya. Ndooy ilay meka bangsa Greek ka bangsa Rom maglahat. Sibuwa si Pol takka pa Masidunya, lay ya nagnaꞌ masaplag ndooy ni Pilipi. Ndooy siꞌ, san meka bay nguntra iya, song hallom, luu na baw kasohean jama Pilipi lay takoleꞌ na nohoꞌ pitsayaꞌ ni Papuꞌ Isa (ndaun Salsila siga Rasul si Isa Almasi 16.6-40).

Njawom suwat tuu, si Pol nohoꞌ sagannap ma pitsayaꞌ ni si Isa magpadiyoꞌ meꞌ karuha tabiat Papuꞌ Isa. Disu palbiatan na nohoꞌ sila ngingat siga pagkahi da puntukan labi man dī da (ndaun Pilipi 2.3-8).

Maka njawom suwat tuu si Pol muwan pagsukuhan pa mman baanan sukuꞌ si Isa ndooy ni Pilipi sabap meꞌ da bay mokonan iya sīn man nulung iya.

Si Pol ilay bay nuwat ituu sasang na njawom jīl ndooy ni Rom. Sugaꞌ san meꞌ looy, masi yaꞌ lungay kagakan na batan daran ya nabbut bitsala “gāk” ka “kagakan” atawa “pagakun bi atay bi” njawom suwat tuu.

Maka ni suwat tuu māꞌ du si Pol bong pooy meꞌ ta nammu kasannangan njawom atay ta (ndaun Pilipi 4.4-7).

Ituu bay sinuwatan meꞌ si Pol luu na ga tallumpuꞌ-dambuwaꞌ taun paddus si Isa Almasi bay inangkat pa sulgaꞌ.

PILIPI

¹Ituu itu kami, si Pol ka si Timuti. Kami itu siga ata si Isa Almasi. Itu suwat kami pa mman bi sukuꞌ Tuhan njawman Almasi nnaa ni Pilipi sampay pa mman siga pa-mmean bi ka siga tatabang da. ²Kamura-murahan binuwanan na pin kam kasannangan ka barakat meꞌ Mmaꞌ tabi Tuhan ka Papuꞌ tabi si Isa Almasi.

³Tuktuk bi taintom ku, mehe meꞌ ku magsuku pa Tuhan. ⁴Maka tuktuk kam pakuhan ku duwaa, tud mehe meꞌ ku gāk. ⁵Batan yaꞌ takupan ku mimon bay tulung bi niyaku masaplag umanat mahap labba man bi bohoꞌ bay pitsayaꞌ ni Almasi ngabut sampay batnaa. ⁶Aseꞌ bi ina yana buktiꞌ tud hinalin na pin meꞌ Tuhan pangatayan bi pa kaayaran. Maka tatantu ku pagka Tuhan lay na nagnaꞌ ngahalin pangatayan bi, mastiꞌ ndarahan na pin sina meꞌ na ngabut sampay magjatu na garaꞌ na ningkaam ni llaw Almasi pabeleng. ⁷Pataꞌ du baw situ ku mamiki meꞌ looy siꞌ pasal kaam sabap yaꞌ kam kuhi lakka man jawom atay ku. Batan man maruhuꞌ lagi ngabut sampay batnaa, yaꞌ kam bay jamu nabangan aku. Njawom jīl ku atawa ni poan masaplag sampay nampungan jama ma nual pasal umanat mahap, basta mehe du bay tabang bi niyaku. ⁸Ilu na Tuhan pakale-kale, tud mehe sina meꞌ ku ngintom ningkaam sikamimon, batan ssob ku meꞌ aseꞌ si Isa Almasi ningkaam.

Pakuhan si Pol ga pagkahi na sukuꞌ si Isa duwaa

⁹Aku tu makuhan kaam na pin duwaa, kamura-murahan magsasōng na pin aseꞌ bi pa Tuhan sampay pa mimon manusiyaꞌ. Maka kamura-murahan pasōng na pin pangahati bi ka bistuhan bi ¹⁰mari kam pandoy meneꞌ bong oy pataꞌ subay pabuwat bi llaw pa dangallaw. Batan bong ina mahap pabuwatan bi, mastiꞌ sutsiꞌ jaꞌ kawul-piil bi sampay yaꞌ na luu sutsutan njataꞌ bi pag taabut llaw Almasi pabeleng. ¹¹Kamura-murahan tattap na pin kam buwat kaintongan man tabang si Isa Almasi ni jataꞌ bi, pamaehe sanglit ka kabantugan pa Tuhan.

San si Pol lay tajīl, masi meka jama kale umanat mahap

¹²Siga danganakan, bong yaꞌ katoonan bi, minsan situ ku tatalungkuꞌ njawom jīl, yaꞌ du kasanggalang niyaku. Gam pin ilooy gi poonan man umanat mahap magsasōng na pin meꞌ na patanyag. ¹³Batan sikamimon ntuu sampay siga sundalu ma nganjagahan astanaꞌ sultan, katoonan da na danan ku bay tajīl isu-isu sabap meꞌ ku masaplag pasal Almasi. ¹⁴Sarī gi, sabap meꞌ ku masaplag san ku njawom jīl, kuwan kaekahan danganakan tabi ni lahat tuu, lay gi pasōng pangando da ni Papuꞌ Isa. Dari nawakka na ga sila masampay umanat mahap pasal iya.

¹⁵Sugaꞌ kasohean baw, yaꞌ hilas meꞌ da masaplag pasal Almasi. Ni kadangkiꞌ da, doman jaꞌ sila ngalabihan aku. Sugaꞌ kaekahan baw, mahap maksud da. ¹⁶Sila itu masaplag ni kaaseꞌ da ni Almasi. Maka katoonan da na, aku bay katakdilan njawom jīl supaya luu lawang man ku masaplag sampay nampungan sagannap ma nual pasal umanat mahap. ¹⁷Boꞌ sila itu ma dangkiꞌ niyaku, yaꞌ hilas atay da masaplag pasal Almasi. Doman jaꞌ sila ngalangkawan soheꞌ da. Marean ta, meꞌ da mista tasampunan da lagi katiksaan ku sasang ku ntuu njawom jīl.

¹⁸Sugaꞌ biyahun na luu. Hilas yaꞌ hilas meꞌ da masaplag, basta umanat mahap jaꞌ pasal si Isa Almasi pinasaplag meꞌ da. Inaa sina man ku gāk. Maka disu gi man ku gāk, ¹⁹katoonan ku man sabapan siga duwaa bi maka tabang Rū si Isa Almasi ni jataꞌ ku, pinōꞌ du ku bbos-bbos. ²⁰Kainagon ku yaꞌ luu oy maka oy na pabuwat ku man ku iyaꞌ ni awpan Tuhan. Kamura-murahan batnaa, meꞌ maruhuꞌ na pin, yaꞌ maglumba tawakka ku masaplag umanat mahap. Batan kaallum-kapatoy ku itu, kainagon ku pinaehe Almasi sabapan ku. ²¹Batan bong niyaku, yaꞌ luu maksud ku llum ni junyaꞌ tuu sarī man moo kabantugan ni Almasi. Bong sawpama ku matoy, paluntungan mehe du situ niyaku sabap magti ku pilay pa mman na. ²²Kamasaꞌ, bong itu ku masi binuwanan umu taꞌ junyaꞌ, meka gi kaayaran tapabuwat ku kalnaꞌ iya. Sangkon bong luu pagpenean ku tamban ni junyaꞌ atawa moleꞌ na pa mman Almasi, yaꞌ katoon-toonan ku bong mamooy na peneꞌ ku. ²³Kaawran ku mamiki. Bong siꞌ aku kabean, doman na ku ngambanan junyaꞌ tuu batan mas mahap gi niyaku kapagdambuwaꞌ na ka Almasi. ²⁴Sugaꞌ kalnaꞌ kaam, gam na ku luu na pin ntuu ni junyaꞌ. ²⁵Sangkon tatantu ku humallom gi situ ku ntuu ni junyaꞌ. Meꞌ looy ilay, katabang na pin ku ningkaam supaya magsasōng na pin kagakan bi ka pangando bi ni Almasi. ²⁶Sarī gi, bong itu ku mintu lay na kapilu pa mman bi, magsasōng lagi sina meꞌ bi mudji si Isa Almasi sabapan tabang na mabeleng aku pa mman bi.

²⁷Sugaꞌ san gi oy katuwaꞌ niyaku, inaa puntukan banahan, basta subay pataꞌ jaꞌ kawul-piil bi ka kaam jama ma mmeꞌ ni umanat mahap pasal Almasi. Meꞌ naa ina, luu-yaꞌ ku luu nnaa, taaka ku du sina mintu kaam sama-sama magtuyuꞌ kalnaꞌ Almasi. Maka sibuꞌ-sibuꞌ kam magmaksud maka dambuwaꞌ atay bi nanggehan umanat mahap mari jama pitsayaꞌ ni si Isa.

²⁸Siga danganakan, daa kam tawu san gi oy pabuwat sagannap ma nguntra kaam. Bong ina kam yaꞌ tawu, tabistu na meꞌ banta bi minulkaan sila meꞌ Tuhan bbos-bbos. Boꞌ kaam ina, tabistu da na sinalamat. ²⁹Daa kam tawu batan lay na sina kam sinupaatan meꞌ Tuhan. Boꞌ supaat ma awnan ku ina saꞌ sat pangando bi ni Almasi, arapun sampay hāl meꞌ bi bay pineneꞌ meꞌ Tuhan natasan kabinsanaan kalnaꞌ Almasi. ³⁰Sangkon na ina, kabinsanaan ma bay tasakup bi njataꞌ ku maruhuꞌ sampay ilooy ma bahau jaꞌ bay taaka bi, daa kam jayip bila mintu lay na baw labuꞌ pa jataꞌ bi.

Akigun bi diyoꞌ pangatayan si Isa Almasi

¹Siga danganakan, saꞌ ba, gāk kam sabap tibuuk na kam ka Almasi maka kagamgaman na kam sabapan aseꞌ na ningkaam? Maka saꞌ ba, lungbid na kam ka Rū Sutsiꞌ sampay luuy na kam ni jama? Pagka meꞌ naa, ²junjung ku na ningkaam, magdambuwaꞌ pamiki na kam. Maka magtaayun na kam maasean mimon pagkahi bi. Bong siꞌ ina pakutuꞌ bi jaꞌ meꞌ naa, mehe meꞌ ku gāk ningkaam.

³Daa subay na pin kam magpasanglit atawa malangkaw dī bi man siga soheꞌ bi. Gam pin subay kam magpadiyoꞌ maka ingatun bi pagkahi bi hagaan gi man dī bi. ⁴Daa sat kam ngulihal pa kaayaran ni dī bi sadjaꞌ, arapun ngulihal du kam pa kaayaran ni siga pagkahi bi. ⁵Subay sibuꞌ pamiki bi ka pamiki Isa Almasi.

⁶Bistahun bi doꞌ, minsan sibuꞌ pagkaTuhan na ka Mmaꞌ na, yaꞌ du ya bay palogos nohoꞌ pinaehe.

⁷Gam pin lay gi labbahan na kapatut pagkaTuhan na, boꞌ na bay padari manusiyaꞌ buwat dī na subay ga ata.

⁸Tandaꞌ na magpadiyoꞌ, lay gi ya maglillaꞌ pinapatoy llansang taꞌ tehang man na ngasip ni mimon kahandak Mmaꞌ na.

⁹Sangkon, lay na ya pinatingkat meꞌ Tuhan man sikamimon. Maka lay gi ya binuwanan gallahan hagaan man mimon gallahan.

¹⁰Kon ilay Tuhan bay buwat meꞌ looy supaya sikamimon ni sulgaꞌ ka taꞌ babaw junyaꞌ sampay ni tahanan jama matoy nujud si Isa na bbos-bbos.

¹¹Boꞌ da mangaku na si Isa Almasi yana Papuꞌ, pamaehe sanglit ni Mmaꞌ tabi Tuhan.

Sukuꞌ si Isa meꞌ sapantun sūꞌ taꞌ junyaꞌ

¹²Sangkon siga kakasi ku, yana meꞌ bi bay adil ngasip ni Papuꞌ bay jaman ku nnaa man bi, labihan bi lagi likutan ku ntuu. Subay kam tawu pa Tuhan ka ngisbat iya. Subay kam mmeꞌ ni kahandak na sampay maglillaꞌ niiya sigi-sigi ngahalin pangatayan bi. Meꞌ naa ina, tapajatu na na maksud na bay nalamat kaam. ¹³Yaꞌ sina luu danan na saꞌ takaya bi batan luu na pin Tuhan muwanan kaam dawom ka gaos buwat mimon ma kasulut niiya.

¹⁴Batnaa junjung ku na ningkaam, ni mimon pabuwatan bi daa kam magdubdub atawa magjawap. ¹⁵Meꞌ naa ina, tumatandaꞌ sutsiꞌ na kam maka anak Tuhan na kam ma yaꞌ luu sutsutan njataꞌ bi. Dari sabapan hāp kawul-piil bi sasang bi maglahat ka jama angkat-angkatan batnaa ma bingkok ka sabu, tadalil na sina kam pa siga potean ninag njawom lindom. ¹⁶Labi na bong pasampay bi lagi umanat ma kabuwan kaallum bahau ninsila. Dari pag ina mintu taabut llaw Almasi pabeleng, tud mehe na meꞌ ku gāk, batan kaam na sina buktiꞌ yaꞌ bay lopas hulas-sangsāꞌ ku noan jama kabanahan.

¹⁷Meꞌ ku ngingat, mimon hulas-sangsāꞌ bi man sabapan pangando bi ni si Isa meꞌ karuha jakat ma bay sinongan meꞌ siga imam pa Tuhan mattoꞌ. Kuwan aku itu, bong sawpama lay na ku mintu pinapatoy sabap meꞌ ku masaplag, meꞌ ku ngingat, lahaꞌ ku tumpa meꞌ karuha tubaꞌ anggul ma bay tinumpahan meꞌ siga imam taꞌ kulban da mattoꞌ. Sugaꞌ san gi oy katuwaꞌ aku, masi du ku gāk maka gāk du ku ningkaam. ¹⁸Damikiyan kaam pun, kamura-murahan gāk du kam maka gāk du kam niyaku.

Si Timuti ka si Epaproditus

¹⁹Na bong itu nugut jaꞌ Papuꞌ Isa, yaꞌ hallom, sohoꞌ ku doꞌ si Timuti pa mman bi supaya katoonan ku kahalan bi nnaa. Bong ina mintu tahabal ku ayad kahalan bi, mastiꞌ kagamgaman na ku. ²⁰Pataꞌ du baw tu si Timuti sohoꞌ ku pilu sabap ni mimon pagkahi ku, isu-isu iya magbēꞌ pamiki ka aku doman ngayaran kaam. ²¹Boꞌ ilooy kasohean ntuu, ndaꞌ ku sikamimon sila, mas hagaan gi ninsila kahandak da man kahandak si Isa Almasi. ²²Boꞌ si Timuti itu, katoonan bi na du, ndang kanaalla ya man maruhuꞌ lagi. Ndang tigiꞌ ya nabangan aku masaplag umanat mahap meꞌ karuha anak-anak nabangan mmaꞌ na. ²³Sangkon kamura-murahan tasohoꞌ ku na ya deꞌ-dēꞌ pilu pa mman bi pag mintu lay na katoonan ku bong oy katappakan hukuman ni palkalaꞌ ku. ²⁴Maka kamura-murahan sampay aku tinugutan na du meꞌ Papuꞌ Isa pilu pa mman bi.

²⁵Batnaa, bistahan ku gam na sohoꞌ ku na danganakan tabi si Epaproditus pabeleng pa mman bi, ilooy ma bay sohoꞌ bi nuhiyan tulung bi niyaku. Tud mehe sina tabang na niyaku bilang limbang ku maghulas-sangsāꞌ kalnaꞌ Almasi. Meꞌ ku ngingat, iya disu pagkahi ku sundalu Almasi matangge kabanahan. ²⁶Kon ku itu nohoꞌ iya moleꞌ pa mman bi batan ngintom na konoꞌ ya banahan ningkaam sikamimon. Maka susa ya taggahaꞌ gampang na pin kam pagka lay taaka bi bay ya saki. ²⁷Boꞌ bana du baw situ bay ya saki banahan sampay dak na ga ya matoy. Lipara luu timbang Tuhan niiya sampay na niyaku. Batan bong ilay ya bay matoy, pasampun na baw kasusahan ku ntuu. ²⁸Sangkon papoleꞌ ku na ya deꞌ-dēꞌ pa mman bi supaya gāk na kam saliꞌ-saliꞌ pag mintu kam sitammu. Maka aku pun, kagamgaman na du pamiki ku. ²⁹Pag mintu ya takka pilu, hasiyun bi ya njawom kagakan batan ndang inaa pataꞌ ningkitabi jama danganakan njawman Papuꞌ Isa. Jama meꞌ iya itu subay pinagmaltabatan. ³⁰Iya itu dak na ga bay matoy magtuyuꞌ kalnaꞌ Almasi. Batan lay na ga ya narapan umu na bong pin ku tatabangan na jaꞌ bilang gantiꞌ bi.

Saraꞌ agama binogbogan yaꞌ kasalamat

¹Na siga danganakan ku, pagakun bi atay bi sabap sukuꞌ Papuꞌ Isa na sina kam. Yaꞌ situ ku jamu magsibalik-balik bitsala njawom suwat tuu batan palbiatan ku itu pa kaayaran ningkaam mari kam yaꞌ takoleꞌ pinagsian. ²Iyakin kam sabap luu sina nnaa kasohean mōꞌ tōꞌ palsu. Sila ina tadalil pa idoꞌ pangeket, batan tōꞌ da ina kabinasa ni jama. Baꞌ-bāꞌ da, bong kitabi yaꞌ bay inislam, yaꞌ kitabi dari sukuꞌ Tuhan. ³Sugaꞌ daa kam hidjab. Kitabi ya situ sabana-bana sukuꞌ Tuhan. Batan kitabi na situ pinagmundaan meꞌ Rū Sutsiꞌ numba Tuhan. Maka kitabi itu gāk sabapan pagkatibuuk tabi ka si Isa Almasi. Boꞌ na, poonan tabi salamat sabap meꞌ tabi mangando niiya, saꞌ ga sabapan pabuwatan tabi mogbogan jinisan saraꞌ meꞌ sapantun ngislam.

⁴Kasohean ina, meꞌ da mista, sukuꞌ Tuhan sila sukat sila turunan bangsa Yahudi atawa sabap meꞌ da mogbogan saraꞌ Nabi Musa. Na bong siꞌ ilay bay bana meꞌ looy, labi na aku saꞌ pataꞌ initung sukuꞌ Tuhan. ⁵Batan aku itu porol bangsa Yahudi, disu panubuꞌ Nabi Yaꞌkub ka Boꞌ Benjamin. Sampay pallun kami ka ga induꞌ mmaꞌ ku pallun Hibrani lagi, yana pallun Yahudi porol. Boꞌ na, bay gi ku inislam pag taabut umu ku wawuꞌ ngallaw man ngikut saraꞌ Nabi Musa. Sarī man inaa, sikamimon saraꞌ ka arat Yahudi bay du pingkaꞌ bogbogan ku. Batan jaman looy, aku itu disu Parisi, yana baanan guru ma pinakaadil mogbogan saraꞌ Nabi Musa. ⁶Tandaꞌ ku bay ngamasag mogbogan agama Yahudi, lay na ga ku bay pingkaꞌ ngalaugan sukuꞌ si Isa. Kanna ku ilay, ilooy na bay numan ni kahandak Tuhan. Sangkon, bong ilay siꞌ jama taawnan intong sabap meꞌ da mogbogan saraꞌ, labi na aku saꞌ intong. Tud yaꞌ bay luu sutsutan njataꞌ ku ni hāl mogbogan saraꞌ.

⁷Sugaꞌ mimon ammal-ibarat ku maruhuꞌ ma kanna ku kaboo kaayaran niyaku, binilang na meꞌ ku yaꞌ na luu kapuspusan na. Batan tibuuk na ku ka Almasi. ⁸Sampay mimon-mimon, bilang ku na du yaꞌ na luu hagaꞌ na bong bista ku ka ehe hagaꞌ pagkalungbid ku ka Papuꞌ ku si Isa Almasi. Kalnaꞌ iya, lay na labbahan ku mimon ma bay hagaan niyaku maruhuꞌ. Meꞌ ku ngingat, mimon ilooy siꞌ boboꞌ jaꞌ. Kon meꞌ looy batan ituu na batnaa hagaan niyaku pasal meꞌ ku madara pagkalungbid ku ka Almasi. ⁹Maka ituu gi tu hagaan niyaku ni hāl meꞌ ku initung meꞌ Tuhan intong. Sugaꞌ kaintongan ku itu, saꞌ ga sabap meꞌ ku bay mogbogan saraꞌ agama, arapun sabap meꞌ ku pitsayaꞌ ni si Isa Almasi. Batan kaintongan ku tu, yana ladjikiꞌ man Tuhan niyaku.

¹⁰Kainagon ku magsasōng na pin meꞌ ku toon Almasi. Maka kainagon ku luu na pin kawasa Tuhan njataꞌ ku ngahalin pangatayan ku, meꞌ karuha basag kawasa na bay makallum Almasi pabalik. Maka doman du ku nūs limpaꞌ Almasi bay lumingkaꞌ ni jinisan kamalasahiyan kalnaꞌ Tuhan. Maka doman du ku ngikut tabiat na. Dari meꞌ iya na du ku yaꞌ mean kahandak ku supaya tabean ku na kahandak Tuhan san gi man ku patuhut meꞌ bay kapatoy Almasi. ¹¹Batan doman ku ngabut kaallum ma tumanjataꞌ man oy-oy ma katiksaꞌ ni nyawa ku, yana kaallum ma yaꞌ luu salla na pa Tuhan. ¹²Yaꞌ baw tu ku kabāꞌ ga lay na taabut ku kaallum meꞌ looy atawa yaꞌ na luu salla ku samasakali. Sugaꞌ tuyuan ku na pin ngabut kaallum meꞌ looy batan ndang ilooy silay maksud Almasi bay ngaliyun aku binuwat sukuꞌ na.

¹³Siga danganakan, meꞌ halling sambat ku na siꞌ, yaꞌ du baw tu ku mista ga lay na taabut ku kaallum meꞌ looy. Sugaꞌ oy-oy bay pabuwat ku atawa bay lingkaan ku ma kasanggalang niyaku, palungay ku na. Maksud ku mari sumunsayaꞌ na ku mupusan basag ku ngabut angan-angan ku koleꞌ kaallum meꞌ looy. ¹⁴Aku itu meꞌ sapantun jama lalumbaan magtuyuꞌ sonse pa tōng lumbaan mari takoleꞌ ku haddiya ma ndean meꞌ Tuhan. Batan ndang inaa sina maksud Tuhan bay ngaliyun kitabi pa jawom okoman na. Kahandak Tuhan ina, takoleꞌ tabi na kaallum meꞌ looy man sabapan pagkatibuuk tabi ka si Isa Almasi.

¹⁵Sangkon kaam ma taggu na iman bi, sapatut na dambuwaꞌ pamiki na kam ka aku ni hāl angan-angan tabi. Sugaꞌ bong luu nnaa kasohean yaꞌ numan ni pamiki da bay bitsala ku siꞌ, bbos-bbos pinalahil du sina meꞌ Tuhan kabanahan ningkaam. ¹⁶Sugaꞌ paku ku na ningkaam, basta bogbogan bi na jaꞌ mimon ma ndang katoonan bi numan ni kahandak Tuhan.

¹⁷Siga danganakan, akigun bi jaꞌ kawul-piil ku. Maka bong kam ngita jama ma sibuꞌ arat-tabiat da ka ningkami, akigun bi du. ¹⁸Kon ku tu daran maan kaam meꞌ tuu, batan meka na sina jama mangaku mmeꞌ ni si Isa, sugaꞌ arat-tabiat da yaꞌ magbēꞌ ka bitsala da. Sabap meꞌ da amu-amu buwat dusa, sibuꞌ du sila ka buwat kapatoy Almasi taꞌ tehang kalabbiyan. San kam min meka na bay baan ku pasal jama meꞌ sila, pag batnaa, paintoman ta na pin kam pabalik. Bila itu ku mamikihan sila, kapanangis na ga ku. ¹⁹Ga jama meꞌ looy ilay, sibogan da katiksaan njawom nalkaꞌ sabap tuhan da yana napsu da. Bila sila buwat kalaatan, yaꞌ gi sila iyaꞌ, gam pin pinag-abbu gi meꞌ da. Ilooy du njawom pamiki da hāl junyaꞌ. ²⁰Boꞌ kitabi baw tu sukuꞌ Tuhan, lahat tabi sabanna yana sulgaꞌ. Maka ilooy ma agad tabi lakka man sulgaꞌ du, yana Papuꞌ tabi si Isa Almasi ma tukang nalamat kitabi. ²¹Maka iya du agad tabi nganggantian baran tabi ma sallahan ka baran ma llum saumu-umu meꞌ karuha niiya. Iya ilay buwat meꞌ looy ni kaehe kawasa na magbayaꞌ ni jataꞌ mimon-mimon.

Katapusan palbiatan si Pol

¹Sangkon siga danganakan ku, kakasi ku, kannahun bi bana bay bitsala ku siꞌ mari kam tattog njawman Papuꞌ Isa. Tud ngintom na situ ku ningkaam. Kaam ina yana poonan kagakan ka kabantugan mehe niyaku.

²Sugaꞌ kuwan ga si Yuriya ka si Sintiki, baan bi doꞌ niyaku, junjung ku na ninsila, ddong na sila magsaggaꞌ. Subay sila magsulut batan ndang inaa pataꞌ ni siga danganakan njawman Papuꞌ Isa. ³Maka Susugus, meꞌ kau disu pagkahi ku magkanaalla mmeꞌ ni kahandak Tuhan, subay ko nabang nalassay supaya sikatuwaꞌ na ga danda naa sikaduwa. Sila ina bay magtuyuꞌ-tuyuꞌ nabangan aku masaplag umanat mahap. Maka bay du sila nabangan si Kelemen ka siga limbang ku kasohean maghulas-sangsāꞌ kalnaꞌ Almasi. Sila ilay sikamimon, lay na tabeꞌ awon da njawom Būk Kaallum man ngalista awon sagannap ma luu kasampulnaan nyawa da saumu-umu.

⁴Na siga danganakan, ni mimon kahalan bi, pagakun bi jaꞌ atay bi sabap sukuꞌ Papuꞌ Isa na kam. Sangkon, meꞌ halling ku na siꞌ, pagakun bi atay bi. ⁵Maka subay lammaꞌ pangatayan bi ni jama sikamimon. Intomun bi, tapit na sina Papuꞌ. ⁶Oy-oy jaꞌ katuwaꞌ ningkaam, daa kam susa. Gam pin maku kam pa Tuhan oy-oy jaꞌ gunahan ningkaam maka daa takupan bi muwan pagsukuhan niiya. ⁷Bong ina suhuran bi kasusahan bi pa Tuhan, binuwanan du sina kam meꞌ na kasannangan njawom atay bi ka njawom pamiki bi sabapan pagkatibuuk bi ka si Isa Almasi. Boꞌ kasannangan man Tuhan ina tud kainu-inu, yaꞌ takaya hinati meꞌ manusiyaꞌ.

⁸Dambuli man naa siga danganakan, oy-oy mahap ka tawop sinanglitan, oy-oy ma bana, oy-oy pataꞌ pinabuwat, oy-oy intong atawa sutsiꞌ, oy-oy lingkatan sampay tawop binantug, kannahun bi na pin njawom pamiki bi. ⁹Maka ikutun bi na pin mimon ma bay takoleꞌ bi man ku, labba man siga tōꞌ ku sampay na kawul-piil ma bay tasakup bi njataꞌ ku. Bong siꞌ ina inaa pakutuꞌ bi, mastiꞌ inunungan jaꞌ sina kam meꞌ Tuhan ma muwan kasannangan njawom atay bi.

Gāk si Pol

¹⁰Na ni hāl aseꞌ bi bay nulung aku pabalik bay hallang-hallangan tee siꞌ, mehe meꞌ ku gāk. Maka magsuku du ku ni Papuꞌ Isa. Katoonan ku du ndang hallom na kam gampang niyaku, sugaꞌ maruhuꞌ yaꞌ gi bay luu dapat bi makitahan aseꞌ bi niyaku. ¹¹Sugaꞌ yaꞌ baw ilay luu hantak bitsala ku siꞌ ga muhung gi ku tinulung pabalik ni kahanggaw ku kakatisan balanjaꞌ. Batan luu baw situ pangahati bay takoleꞌ ku bong pooy meꞌ ku magsuku jaꞌ ni mimon kahalan ku. ¹²Sigpit ku atawa njawom sannang, lingantu atawa sso, lay na tatammu ku jalan man ku magsuku ni mimon kahalan ku. Maglabi balanjaꞌ ku atawa kabus ku, sannang jaꞌ du njawom atay ku, ¹³batan man sabapan Papuꞌ Isa nganggaosan aku, yaꞌ luu saꞌ yaꞌ takaya ku. ¹⁴Kamasaꞌ, mahap du baw lay gi ku tatulung bi sasang ku bay njawom tiksaꞌ.

¹⁵Sibuwa ku masaplag umanat mahap nnaa ni Masidunya, taintom bi du silay, pag lakka ku, yaꞌ luu baanan sukuꞌ si Isa bay nulung aku sarī man kaam nnaa ni Pilipi. ¹⁶Damikiyan, jaman ku ndooy ni Tesaloneka, saꞌ sat sakayi ku bay pokonan bi tulung. ¹⁷Na aku tu nabbut meꞌ looy siꞌ, daa kam mista ga luu gi puhung ku nohoꞌ tinulung pabalik. Arapun iya puhung ku, kamura-murahan magsasōng na pin meꞌ bi sinupaatan meꞌ Tuhan sabapan kainagon bi nulung jama. ¹⁸Batnaa, sabapan tulung ma bay pokonan bi man si Epaproditus, luu na labi man balanjaꞌ ku. Tulung bi ilay niyaku binilang jakat ma kasulut banahan pa Tuhan. Bong ibaratan bawu, kahamutan ya.

¹⁹Na Tuhan ma ngayaran aku, mastiꞌ ngayaran kaam du sina. Meꞌ iya ina dapu mimon-mimon sampay yaꞌ na kuhi katis altaꞌ na, mastiꞌ buwanan na jaꞌ sina kam mimon ma gunahan ningkaam man sabapan pagkatibuuk bi ka si Isa Almasi. ²⁰Kamura-murahan pinudji na pin Mmaꞌ tabi Tuhan saumu-umu. Amin.

Katapusan bitsala si Pol

²¹Doꞌ kam beꞌ, pasampayun bi doꞌ salam duwaa ku ni sikamimon sukuꞌ Tuhan nnaa, yana sikamimon ma tibuuk ka si Isa Almasi. Maka siga danganakan tabi pun ntuu mman ku, lay du nohoꞌ masampay salam duwaa da ningkaam. ²²Sampay mimon sukuꞌ Tuhan ntuu, awla na sagannap ma buwat ni jawom astanaꞌ Sultan, lay du nohoꞌ masampay salam duwaa ningkaam. ²³Kamura-murahan luu na pin aseꞌ Papuꞌ tabi si Isa Almasi njataꞌ bi sikamimon.

Wassalam