Suwat si Pol pa mman si
Pilimun
Pahati
Si Pilimun ilay disu jama daira inawnan Kolossa ndooy ni Asiya. Lay na ya bay pitsayaꞌ ni si Isa Almasi pag bay jaꞌ ya kale tōꞌ si Pol. Dari song hallom, lay na sila bagay.
Na si Pilimun ilay, luu ata na inawnan si Onesimas bay patangkaw pa daira Rom. Ni waktu looy siꞌ, kuwan si Pol, lay pinalisu ndooy ni Rom sabap meꞌ na bay masaplag umanat mahap pasal si Isa Almasi.
Na ndooy siꞌ ni Rom, lay sitammu si Onesimas ka si Pol. Yaꞌ katoonan tabi bong pooy meꞌ da bay sitammu, sugaꞌ ndooy na man si Onesimas bay taboo meꞌ si Pol pitsayaꞌ ni si Isa Almasi. Dari pagka mangando na si Onesimas ni si Isa, sapatut na subay ya pabeleng pa mman papuꞌ na, yana si Pilimun. Sat na jaꞌ, tud hanggaw baw si Onesimas batan jaman looy bong luu ata bay patangkaw, tattap bisa pidjalaꞌ njataꞌ na bong bay tatammu. Dari bbuwatan si Pol, lay bay nuwat pa mman si Pilimun, yana suwat tuu na. Njawom suwat tuu pakuhan si Pol si Onesimas kaampunan man si Pilimun. Maka maku ya junjung ni si Pilimun yaꞌ na nohoꞌ ngingat si Onesimas ga ata na sadjaꞌ. Kahandak si Pol subay si Pilimun ngingat si Onesimas danganakan na, kakasi na, sabap saliꞌ-saliꞌ na sila tibuuk ka Papuꞌ Isa.
Dari lay na pabeleng si Onesimas pa mman si Pilimun, sampay iya na bay moo suwat tuu.
Ituu bay sinuwatan meꞌ si Pol luu na ga tallumpuꞌ-dambuwaꞌ taun paddus si Isa Almasi bay inangkat pa sulgaꞌ.
1PILIMUN
1Ituu itu aku si Pol njawom pilisu sabap meꞌ ku masaplag umanat pasal si Isa Almasi. Ituu itu suwat kami ka danganakan ta si Timuti pa mman nu Pilimun. Kau ina kakasi kami saltaꞌ na limbang kami maghulas-sangsāꞌ kalnaꞌ Papuꞌ.
2Salam duwaa ningkaam ka danganakan tabi si Apiya.(1.2a) Meꞌ kaekahan mista, si Apiya disu danda ni lumaꞌ si Pilimun, marean ta nda na. Maka salam duwaa du ni si Alkipus, yana limbang tabi sundalu(1.2b) Soysoy mmeꞌ ni si Isa Almasi ginalla sundalu Almasi sabap sila masampay kabanahan pasal iya san wā luu jama nulang sila. ndiyoan Almasi. Maka salam duwaa du ni mimon sukuꞌ si Isa nnaa ma magpakumpo-kumpo numba ni lumaꞌ bi. 3Kamura-murahan binuwanan na pin kam kasannangan ka barakat meꞌ Mmaꞌ tabi Tuhan ka Papuꞌ tabi si Isa Almasi.
4Tuktuk ku itu makuhan kau duwaa Pilimun, wā ku muwan pagsukuhan pa Tuhan sabapan nu. 5Lay na silay taaka ku basag pangando nu ni Papuꞌ Isa maka ehe aseꞌ nu ni mimon pagkahi ta sukuꞌ Tuhan. 6Maku na pin situ ku duwaa pa Tuhan, kamura-murahan man sabapan nu masampayan jama kabanahan, yaꞌ hallom tahati da na du mimon supaat ma bay takoleꞌ tabi sabapan pagkatibuuk tabi ka Almasi. 7Tud gāk ku danganakan, maka hayang na situ pamiki ku sabapan aseꞌ nu ni siga pagkahi nu sukuꞌ Tuhan nnaa. Dari man sabapan aseꞌ nu ina, mehe na meꞌ da gāk.
Si Pol makuhan si Onesimas kaampunan
8-9Na bong siꞌ kadarihan ningkau, luu situ siꞌ la paku ku. Ni sabana na, meꞌ aku disu rasul Almasi, luu du baw tu kapatut ku nohoꞌ kau buwat ma pataꞌ subay pabuwat nu. Sugaꞌ pagka meꞌ kita ndang jama sikaaseꞌ-kaaseꞌ, gam na ku maku na jaꞌ timbang ningkau. Dari meꞌ aku tu toa laslas na, boꞌ lay gi tajīl sabap meꞌ ku masaplag pasal si Isa Almasi, 10junjung ku na ningkau, buwanan nu na si Onesimas kaampunan san ya bay patangkaw. Iya ina batnaa subay ga anak ku na rahasiyaꞌ sabap aku bay kaboo iya mmeꞌ ni Papuꞌ Isa sasang ku ntuu njawom jīl. 11Bana na maruhuꞌ, agon yaꞌ luu kapansahaliyan na ningkau. Boꞌ batnaa, lay na halin arat-tabiat na. Dari mehe na situ kapansahaliyan na ningkita sikaduwa.
12Batnaa, ilu na sina ya papoleꞌ ku pa mman nu minsan ya meꞌ bigi jantung ku na. 13Gāk situ ku bong siꞌ ya bay dari tattog ntuu supaya ya katabang niyaku bilang gantiꞌ nu sasang ku masi njawom jīl sabapan umanat mahap pasal si Isa. 14Sugaꞌ yaꞌ baw tu siꞌ ku bay doman nohoꞌ iya tamban ntuu bong ko yaꞌ bay matugut. Bong ko doman nabangan aku subay ni kaayad nu maggasad bayaꞌ nulung. Daa jaꞌ paglogosan. 15Marean ta man kahandak Tuhan na du bay kam sakkat ka si Onesimas samantalaꞌ supaya pag takka na pilu, lungbid na kam saumu-umu. 16Maruhuꞌ ilay, ata nu jaꞌ ya. Pag batnaa, hagaan na ya man ata sabap lay na ya dari danganakan nu. Tud kinaasean sina ya meꞌ ku, sugaꞌ bistahan ku labi na kau saꞌ maaseꞌ niiya batan lay na halin arat-tabiat na. Batnaa ina, taasahan nu na ya. Boꞌ na, lay na ya dari danganakan nu tibuuk du ka Papuꞌ.
17Sangkon karomanan ku, bong tud ingat nu du ku limbang nu maghulas-sangsāꞌ kalnaꞌ Tuhan, pag takka si Onesimas pilu, pooy-pooy meꞌ nu ngahasi aku, subay du meꞌ naa meꞌ nu ngahasi iya. 18Bong ya bay buwat dusa ningkau atawa bong ya utangan ningkau, aku sa mayad.
19Batnaa, aku na situ si Pol nuwat janjiꞌ ku ningkau ka tangan ku mismu. Oy-oy utang si Onesimas ningkau, aku sa mayad. Kamasaꞌ, bong siꞌ itu kita tud magbista, sa ehe-ehe utang si Onesimas ningkau, mas mehe gi buddi ku njataꞌ nu. Batan danan nu bay nammu kasampulnaan nyawa ma yaꞌ luu katapusan na sabapan man aku. 20Sangkon danganakan, meꞌ kita dambuwaꞌ atay njawman Almasi, pagakun na atay ku. Duwanun na paku ku pasal si Onesimas. Pakitahan nu na ku kaayaran sabap meꞌ nu mmeꞌ ni Papuꞌ. 21Kamasaꞌ, sasang ku itu nuwat suwat tuu, ndang tatantu ku du pag lay mintu tasambut nu, mastiꞌ duwan nu jaꞌ sina paku ku. Maka bistahan ku san labi gi man naa.
22Doꞌ ko beꞌ ha, ndang hallian nu na ku bilik ni lumaꞌ bi. Kamura-murahan pinōꞌ na du ku sabapan bi magpamakuhan aku duwaa, boꞌ tabi kapagsitammu na pabalik.
23Sarī man naa, luu situ ntuu si Epapras, pagkahi ku du pilisu kalnaꞌ si Isa Almasi, nohoꞌ masampay salam duwaa na ningkau. 24Ga si Malkus pun ka ga si Aristalkus, si Dimas, ka si Lukas, siga pagkahi ku ma maghulas-sangsāꞌ kalnaꞌ Almasi, lay du bay nohoꞌ masampay salam duwaa da ningkau. 25Dambuli man inaa, kamura-murahan binuwanan na pin kam barakat meꞌ Papuꞌ tabi si Isa Almasi.
Wassalam