Umanat mahap pasal si Isa Almasi bay sinuwatan meꞌ si
Malkus
Pahati
Ni Kitab Injil luu mpat salsila pasal kaallum si Isa Almasi jaman na ni junyaꞌ. Disu bay sinuwatan meꞌ si Malkus, yana kitab tuu na situ. Kuwan ilooy ma tallu, bay sinuwatan meꞌ ga si Matiyu, si Lukas ka si Yahiya.
Njawom kitab tuu, si Malkus mahati ningkitabi si Isa yana Almasi, tukang nalamat bay njanjiꞌ meꞌ Tuhan. Maka njawom kitab tuu binaan kitabi bong oy maksud si Isa bay pitu pa junyaꞌ sampay bay dari manusiyaꞌ. Batan ni juran sapū ka ayat mpatpuꞌ-lima ni kitab tuu, yuk si Isa, “Minsan aku, yana Anak Manusiyaꞌ, yaꞌ du tu kon ku bay pitu muhung inintu. Arapun aku tu bay pitu ngintu manusiyaꞌ sampay nongan umu ku lagi supaya meka na jama pinaddusan man hukuman ni dusa da.”
Kaekahan jama mista si Malkus ilay yana si Yahiya Malkus ma bay mmeꞌ ni si Pol ka si Balnabas masaplag umanat mahap pasal si Isa Almasi (ndaun Salsila siga Rasul si Isa Almasi 12.25). Maka si Malkus ilay yana bay soheꞌ si Pitel, disu rasul si Isa (ndaun 1 Pitel 5.13). Meꞌ kaekahan mista, si Pitel ilay, iya na man si Malkus bay koleꞌ salsila tuu pasal Papuꞌ Isa.
Yaꞌ tatantu ta bong sumilan kitab tuu bay sinuwatan meꞌ si Malkus. Meꞌ kaekahan mista, luu na ga duwampuꞌ-lima pa tallumpuꞌ-pitun taun bay pingkaꞌ paddus si Isa Almasi bay inangkat pa sulgaꞌ.
1MALKUS
Umanat si Yahiya ma Tukang Mandi
(Matiyu 3.1-12; Lukas 3.1-18; Yahiya 1.19-28)
1Ituu tu umanat mahap pasal si Isa Almasi, yana Anak Tuhan. Duhuꞌ-duhuꞌ, 2luu bay sinuwatan meꞌ Nabi Isaya njawom kitab, ilooy ma yuk Tuhan ni Almasi,
“Bbos-bbos luu sina sohoꞌ ku duhuꞌ man kau disu sosohoan ku masaplag mari saddiya na jama ni katakka nu.
3Takale du sina mintu suwara na ngahowap ni lahat lau-lau, yuk na, ‘Saddiyahun bi na lān ni katakka Papuꞌ. Paintongun bi na mari tahan na patiluꞌ pa mman bi.’ ”(1.3) Hati na, subay tawbatan da mimon dusa da mari sila saddiya ni katakka Papuꞌ Isa. Ndaun Kitab Nabi Isaya 40.3 ka Kitab Nabi Malakay 3.1.
4Na tunaꞌ looy ilay siꞌ, lay na binakbul batan tud luu du bana bay pōꞌ sosohoan looy, yana si Yahiya ma Tukang Mandi masaplag ni lahat lau-lau yaꞌ maglumaꞌ. Yuk na, “Tawbatan bi na dusa bi, boꞌ bi pinandi mari kam inampun na meꞌ Tuhan.” 5Dari siꞌ, yaꞌ na taambat jama bahuklud pilay pa mman na lakka man Jerusalem sampay man sikaliput Yahudiya. Pag takale da umanat si Yahiya, lay na tawbatan da dusa da ni pag-awpan mimon ndooy. Sampay lay na sila pinandi meꞌ si Yahiya ni Sōng Juldan.
6Pamakoy si Yahiya ilay siꞌ bay pinabuwat ka bū untaꞌ maka kambot na kuwit sapiꞌ.(1.6) Pamakoy si Yahiya ilay sibuꞌ du ka pamakoy Nabi Eliyas mattoꞌ. Makanan na tompang ka gowaꞌ buwani. 7Halling na ni siga jama ndooy, “Luu gi sina pasunuꞌ niyaku tā biddaꞌ na langkaw kawasa-kapatut na man niyaku. Yaꞌ san ku tawop makkasan ingkot tumpaꞌ na. 8Aku tu mandi kaam ka boheꞌ jaꞌ. Boꞌ iya ina mintu, man na mandi kaam, Rū Sutsiꞌ.”(1.8) Hati na, pinatannaan sila meꞌ Papuꞌ Isa Rū Sutsiꞌ, yana Rū Tuhan.
Si Isa pinandi meꞌ si Yahiya
(Matiyu 3.13-17; Lukas 3.21-22)
9Na luu disu llaw, sasang si Yahiya masi mandi jama, luu na baw takka si Isa pa Sōng Juldan lakka man Nasaret ndooy ni Jalil. Pag-anu siꞌ, lay ya nohoꞌ pinandi ni si Yahiya. 10Pag tunga si Isa man jawom boheꞌ, sarunduun takita na langit pabukaꞌ maka luu na Rū Sutsiꞌ duwai meꞌ dagbos atsang nampi taꞌ baran na. 11Maka luu suwara man sulgaꞌ, yuk na, “Kau ina Anak ku, kakasi ku. Kasulutan ku banahan ningkau.”
Si Isa sinasat meꞌ Ibilis
12Na paddus meꞌ looy, magti si Isa binoo meꞌ Rū Sutsiꞌ pa lahat lau-lau yaꞌ maglumaꞌ. 13Ndooy siꞌ, lay na baw ya sinasat meꞌ Ibilis njawom mpatpūꞌ ngallaw-mpatpūꞌ bahangi. Boꞌ luu gi siga sattuwa katawu-tawu ndooy. Sugaꞌ luu na pin siga malaikat ngayaran iya.
14Na song hallom, kuwan si Yahiya, lay na baw sinungkuban sampay lay na tajīl sabap meꞌ na bay nahawi Gubnul Herod pasal dusa na. Kuwan si Isa, lay na pabeleng pa Jalil masaplag umanat mahap man Tuhan, 15yuk na, “Taabut na situ waktu binakbul ilooy ma bay tinunaꞌ mattoꞌ. Batan tapit na katakka pamarinta Tuhan. Sangkon nawbat na kam maka pitsayaꞌ na kam ni umanat mahap ma pinamahalayak na.”
Si Isa meneꞌ mpat lalla nohoꞌ mmeꞌ niiya
16Na disu llaw, sasang si Isa lumān ni bihing Danaw Jalil, lay ya ngita duwa lalla padidilawut ngalambat, yana si Saymon ka danganakan na si Andru. 17Yuk si Isa ninsila, “Tu kam. Mmeꞌ na kam niyaku boꞌ bi toan ku bong pooy meꞌ ngalambat manusiyaꞌ.” 18Pag-anu, lay du magti mbanan da lambat da sampay lay na sila mmeꞌ niiya.
19Pag lanja ga si Isa, ngita na baw ya duwa lalla magdanganakan du munaan pukut da taꞌ kumpit da. Awon da si Yaꞌkub ka si Yahiya, siga anak si Sibidi. 20Pag-anu siꞌ, lay du sila linganan si Isa nohoꞌ mmeꞌ niiya. Dari lay jaꞌ mbanan da mmaꞌ da ka ga tindog da njataꞌ kumpit da, boꞌ da lay na du mmeꞌ niiya.
Si Isa malakka seytan man jawom baran jama
21Pag-anu siꞌ, lay na baw sila pawus pa Kapelniyum. Pag taabut Llaw Pahali,(1.21) Tuktuk llaw Sabtuꞌ yana llaw man siga Yahudi pahali ka pilay pa langga numba Tuhan. lay si Isa pa langga maka lay gi ya magnasihat ndooy. 22Jama siꞌ tu ndooy, tud bay haylan ni tōꞌ na, batan tumatandaꞌ luu kapatut na man Tuhan, saꞌ meꞌ tōꞌ siga guru saraꞌ agama.
23Yaꞌ gi hallom, luu na baw paasok pa jawom langga looy disu lalla sineytan, boꞌ magti ngahowapan si Isa, yuk na, 24“Aha! Kau na hati si Isa, lalla looy man Nasaret, hāꞌ? Manggoy ko pitu? Pakaat nu na baw kami? Katoonan ku du bina bong soy ko. Kau na sina ilooy ma Mahasutsiꞌ lakka man Tuhan.”
25Pag-anu, ilooy ma sinaggong na seytan looy meꞌ si Isa, yuk na “Daa ko hibuk. Pōꞌ na ko man lalla naa.” 26Pag-anu siꞌ, sabapan seytan na, pakuwereg na lalla looy. Maka killahap na seytan na lān na pōꞌ lahi.
27Ni kahaylan ga jama ndooy, yuk da padangan-padangan, “Kapatut oy doꞌ ina meꞌ naa? Ilmuꞌ bahau na baw bitu pinōꞌ meꞌ na. Sampay siga seytan ngasip jaꞌ bong iya nohoꞌ!” 28Dari aka siꞌ pasal iya magti bay magkanatan ni sikaliput Jalil.
Si Isa ngulian matoa si Saymon
(Matiyu 8.14-17; Lukas 4.38-41)
29Pag pōꞌ ga si Isa man langga looy, lay sila pa lumaꞌ ga si Saymon ka si Andru. Ga si Yaꞌkub pun ka si Yahiya luu na du bay mmeꞌ ninsila. 30Na ndooy siꞌ ni lumaꞌ da, kuwan matoa si Saymon ma danda pabāk na jaꞌ ni kabasag lammun na. Dari magti si Isa binaan saki ya. 31Pag-anu siꞌ, pasōng na si Isa pa mman danda looy maka lay na helaꞌ na tangan na binangun. Dari siꞌ, sarunduun du lakka lammun na sampay iya na ga bay motangan sila.
32Pag taabut sumaddop llaw, meka na jama sakihan sampay sagannap ma sineytan bay binoo pa mman si Isa. 33Song hallom, yaꞌ na taambat jama daira looy luu na kumpo ni awpan lumaꞌ si Saymon. 34Dari siꞌ, meka na jama kaniya-kaniya ka jinisan saki da bay kaulian meꞌ si Isa. Maka meka na seytan lay du pinalakka meꞌ na man jawom baran jama. Na siga seytan looy ilay katoonan da bong soy si Isa. Dari bila sila pinōꞌ na, yaꞌ na sila pinadari meꞌ si Isa māꞌ bong soy ya.
Magnasihat si Isa ni sikaliput Jalil
35Na sayu alab lagi, lay bangun si Isa boꞌ na pōꞌ man daira pa lugar ma yaꞌ magjama maku duwaa. 36Yaꞌ gi siꞌ hallom, lay na si Saymon ka ga soheꞌ na duwai miha iya. 37Tatammu da jaꞌ siꞌ, yuk da, “Uy Tuwan, mimon na siꞌ la jama miha kau!”
38Tampung si Isa, “Pawus na doꞌ ba tabi pa siga daira ma tapit supaya tapasaplagan ku na du ga jama ndooy. Batan ndang ituu situ ngkon ku bay pitu pa junyaꞌ.” 39Dari lay na ga si Isa palakka sampay lataꞌ na Jalil man na magnasihat ni siga langga ndooy. Boꞌ lay gi ya malakka siga seytan man jawom baran jama.
Si Isa ngulian disu lalla inipu
40Na disu llaw, luu na baw disu jama inipu pasōng pa mman si Isa boꞌ na sujud ni awpan na maku junjung, yuk na, “Tuwan, bong siꞌ ko la kuhi, katoonan ku mastiꞌ takaya nu jaꞌ ngulian aku.”
41Dari siꞌ, kapaluuy na si Isa ni lalla looy sampay purut na na lalla looy sambayan na halling, “Kuhi ku ba. Kaulian na sina ko.” 42Dari siꞌ sarunduun du lanyap ipu lalla looy sampay lay na kaulian.
43Pag-anu, lay na ya sinohoꞌ moleꞌ, sugaꞌ lay doꞌ ya inamay-amayan meꞌ si Isa, yuk na, 44“Daa ko maꞌ-māꞌ ni jama aku bay ngulian kau. Arapun pilay na jaꞌ ko pa mman imam nohoꞌ maliksaꞌ kuwit nu mari tasaksiꞌ na na yaꞌ na ko inipu. Pag-anu, boꞌ nu nong kulban meꞌ ndang tinaat ni saraꞌ Nabi Musa supaya kinatoonan na meꞌ mimon lay na ko kaulian.”(1.44) Ndaun Kitab Tawrat, Libitikus 14.1-31.45Sugaꞌ pag lakka lalla looy baw siꞌ tu, gam pin nuntut na ya ni jama mimon bong pooy meꞌ na bay kaulian. Pag toklas na, yaꞌ na si Isa sumunsayaꞌ paasok pa jawom siga daira sabap liput na ya meꞌ siga baanan manusiyaꞌ magdogsog-dogsog na. Dari lay na ya kataddasan ndooy ni poan siga daira lawak man kalumaan. Sugaꞌ san meꞌ looy, song paeka na pin manusiyaꞌ lakka man sikaliput lahat looy pilay pa mman na.
2Si Isa ngulian lalla matoy baran na
1Luu jaꞌ siꞌ daka dangoy ngallaw bay pingkaꞌ, lay na baw si Isa pabeleng pa Kapelniyum. Pag taaka jaꞌ siꞌ meꞌ jama luu na ya ni lumaꞌ, 2yaꞌ na baw taambat jama lay bahuklud pilay pa mman na. Yaꞌ hallom, pannoꞌ na lumaꞌ looy sampay yaꞌ na ga luu kapassut man behe lawang. Sasang si Isa njawom masaplag umanat Tuhan ninsila, 3luu na baw takka mpat jama ngalanggung disu lalla matoy baran na ddas ka patulihan na. 4Ni kaeka manusiyaꞌ baw siꞌ tu ndooy, yaꞌ na san kapassut siga lalla looy sika-mpat pa mman si Isa. Dari bbuwatan da, lay dutai pa taꞌ sapaw ngalakkahan kasohean lambahan sapaw man da mapassut lalla looy. Pag-lupus, lay na tonton da lalla looy ddas ka patulihan na. 5Pag ndaꞌ si Isa meꞌ looy na basag pangando da niiya, yuk na ni lalla looy ma matoy baran na, “Nges, puwas na sina dusa nu labbasakayi.”
6Pag lay jaꞌ takale bitsala na meꞌ siga guru saraꞌ agama ma ningkōꞌ ndooy, honaꞌ-honaꞌ da, 7“Uy, pangka bina bitsala na! Buwat ya dī na subay ga Tuhan! Isu-isu Tuhan bina luu kapatut na muwasan dusa!”
8Na si Isa siꞌ tu, ndang katoonan na du njawom pamiki da. Dari yuk na ninsila, “Marean ta kanna bi yaꞌ luu kawasa-kapatut ku muwasan dusa. 9Sugaꞌ subay siꞌ tabista bi pagka luu kawasa-kapatut ku ngulian jama, mastiꞌ luu du kawasa-kapatut ku muwasan dusa. 10Na supaya katoonan bi luu kapatut Anak Manusiyaꞌ(2.10) Papuꞌ Isa nganggalla dī na Anak Manusiyaꞌ sabap minsan ya Anak Tuhan lakka man sulgaꞌ, lay baw ya dari manusiyaꞌ. Pamāꞌ Kitab Nabi Danyel 7.13-14, Anak Manusiyaꞌ yana disu lalla lakka man Tuhan ma bay binuwanan kapatut magsultan ni mimon manusiyaꞌ. Pamarinta na natas saumu-umu maka sinumba ya meꞌ mimon bangsa. muwasan dusa, pakitahan ta doꞌ kam buktiꞌ.” Dari yuk si Isa ni lalla looy ma matoy baran na, 11“Nges, nangge na ko, boꞌ boonun na patulihan nu moleꞌ.”
12Dari magti du nangge lalla looy boꞌ na mūt patulihan na sampay lay na pōꞌ ni pag-awpan da labbasakayi. Mimon siꞌ ndooy tud bay haylan sampay mudji na ga sila Tuhan, maka yuk da, “Yaꞌ gi kitabi la bay pingkaꞌ ngita meꞌ tuu!”
Si Isa nohoꞌ si Libay mmeꞌ niiya
(Matiyu 9.9-13; Lukas 5.27-32)
13Pus meꞌ looy, lay na baw pabeleng si Isa pa bihing Danaw Jalil sampay yaꞌ na taambat manusiyaꞌ bahuklud pa mman na. Dari lay du sila toan na.
14Pag lakka si Isa mandooy, sasang na lumān, lay ya ngita disu tukang ninga sukay ningkōꞌ ni upis na. Awon na si Libay, anak si Alpiyus. Yuk si Isa niiya, “Tu ko. Mmeꞌ na ko niyaku.” Dari siꞌ, nangge na ya sampay lay na mmeꞌ ni si Isa.
15Pag-anu siꞌ, lay na baw boo si Libay si Isa ka ga mulit na pa lumaꞌ na mangan. Ndooy siꞌ, meka du tukang ninga sukay maka ga pagkahi da baldusa bay binoo mmeꞌ paharung mangan. Batan ndang meka na sila mmeꞌ ni si Isa paninggai-paninggai jaꞌ ya.
16Pag tasayu siga guru saraꞌ agama ma tabeꞌ ni palhimpunan siga Parisi(2.16) Siga Parisi yana baanan guru langkaw ma basag mogbogan saraꞌ Nabi Musa. lay si Isa mangan ndooy, tilaw da ni siga mulit na, “Ongoy doꞌ ilay guru bi kuhi paharung mangan ni siga tukang ninga sukay ka ga pagkahi da baldusa?”
17Pag lay jaꞌ takale si Isa tilaw da, iya na ya bay nampung, yuk na, “Siga baldusa ilay meꞌ karuha jama saki. Boꞌ jama saki ina subay inulian meꞌ duktul. Boꞌ sagannap ma yaꞌ saki, san daa na. Intong na, aku itu bay pitu, saꞌ ga maksud ku ngaliyun jama ma mista dī da intong. Arapun aku itu bay pitu ngaliyun sagannap ma mangaku baldusa.”
Si Isa tinilaw pasal puwasa
(Matiyu 9.14-15; Lukas 5.33-35)
18Na luu disu waktu, siga mulit si Yahiya ma Tukang Mandi ka ga mulit siga Parisi saliꞌ-saliꞌ puwasa. Dari buwatan kasohean jama, lay bay pa mman si Isa nilaw, yuk da, “Ongoy ilay siga mulit si Yahiya ka ga mulit siga Parisi puwasa, boꞌ ningkau, niyaꞌ san?”
19Pag tampung si Isa, lay ya ngandalil siga mulit na pa jama ngaluruk ni pangawinan, yuk na, “Yaꞌ bilay sikatuwaꞌ bong siga luruk ni pangawinan puwasa halloman pangantin ma lalla masi dambuwaꞌ ka sila. 20Sugaꞌ luu du sina mintu masa man pangantin ma lalla llakkahan na mman da. Ni masa looy ilay mintu, bohoꞌ da pataꞌ yaꞌ na nginum atawa mangan ni kabasag lindu da.”
Tōꞌ si Isa ka tōꞌ agama Yahudi yaꞌ tapagsilamud
(Matiyu 9.16-17; Lukas 5.36-39)
21Pag-anu, lay na baw si Isa ngandalil pasal tōꞌ na yaꞌ dari llamuran ka tōꞌ agama Yahudi, yuk na, “Yaꞌ sina luu jama nupakan badjuꞌ daan ka kakanaꞌ bahau, batan pag ina mintu pakallos tupak na, paehe jaꞌ geseꞌ na.
22“Damikiyan, yaꞌ du sina dari inisi tubaꞌ anggul bahau ni jawom pangannaan kuwit kambing ma daan na pasal yaꞌ pahenet. Pag lappuꞌ na, passaꞌ jaꞌ pangannaan looy sampay lopas jaꞌ isi na. Sangkon, bong inawnan tubaꞌ anggul bahau, subay bahau jaꞌ du siga pangannaan man ngisi.”
Pasal buwat ni Llaw Pahali
23Na ni disu Llaw Pahali, lay si Isa ka ga mulit na palintas ni tinanom poonan taligu. Sasang da siꞌ lumān, bbuwatan ga mulit na lay ngattuꞌ dangkitiꞌ buwaꞌ tinanom looy, boꞌ lay kakan da isi na. 24Pag takita meꞌ siga Parisi ndooy, yuk da ni si Isa, “Uy, Llaw Pahali bitu batnaa! Yaꞌ dari ngattuꞌ ni llaw tuu!”
25-26Tampung si Isa, “Uy, hantak bitsala bi, maat pabuwatan siga mulit ku meꞌ naa. Bong siꞌ ina bay bana ningkaam, labi na saꞌ maat bay pabuwatan Sultan Daud mattoꞌ. Yaꞌ gi kilay bay tabatsa bi njawom kitab bong oy bay pabuwat na ni bay jaman si Abiyatal panghuluꞌ imam? Saꞌ ba, pag kalingantuhan Sultan Daud ka ga soheꞌ na, lay ya bay paasok pa jawom langga boꞌ na mangan tinapay ma bay sinongan pa Tuhan? Sampay lay gi buwanan na siga soheꞌ na. Mingkan ilay siꞌ, tinapay meꞌ looy tagga ni saraꞌ kinakan leꞌ soysoy sarī man siga imam. Sugaꞌ san meꞌ looy, yaꞌ du bay dari man ga Sultan Daud ndusa.”(2.25-26) Tabatsa tabi salsila pasal bay pabuwatan Sultan Daud siꞌ ni Kitab Sibuwa Lakka man Nabi Samwel 21.1-6.
27Maka yuk si Isa lagi ninsila, “Inawnan Llaw Pahali bina, bay sinukuꞌ meꞌ Tuhan para kaayaran ni manusiyaꞌ, saꞌ ga manusiyaꞌ bay pinapayak para kaayaran ni Llaw Pahali. 28Boꞌ na, aku itu, yana Anak Manusiyaꞌ, luu kapatut ku magbayaꞌ bong oy pataꞌ pinabuwat atawa niyaꞌ ni Llaw Pahali.”
3Si Isa ngulian lalla kimoy tangan na
(Matiyu 12.9-14; Lukas 6.6-11)
1Na ni disu Llaw Pahali, lay na baw si Isa pa langga balik. Ndooy siꞌ, luu disu lalla kimoy tangan na. 2Maka luu du ndooy siga Parisi maimanan si Isa. Kainagon da malkalaꞌ iya bong ya bay nguliꞌ ni Llaw Pahali.
3Pag-anu, yuk si Isa ni lalla looy ma kimoy tangan na, “Tu ko, Nges. Nangge doꞌ ko ntuu ni duhuan.” Lai jaꞌ siꞌ, 4yuk si Isa ninsila sikamimon ndooy, “Mamooy lay la numan ni saraꞌ pasal Llaw Pahali, buwat mahap, atawa buwat maat? Nalamat jama atawa mapatoy sila?” Sugaꞌ lay jaꞌ sila diyam-diyam.
5Si Isa siꞌ tu, sasang na ngandaꞌ ninsila, maglamud na lasu na ka susa na ninsila sabap tumatandaꞌ yaꞌ san luu luuy da ni jama. Pag-anu, yuk si Isa ni lalla looy, “Pa-nnatun na tangan nu.” Pag nnat na, sarunduun du ya kasay.
6Pag ndaꞌ siga Parisi meꞌ looy, magti sila lakka man langga. Pag-anu, boꞌ da isun ka baanan raayat Gubnul Herod bong pooy meꞌ da mapatoy si Isa.
Meka patuhut ni si Isa pa Danaw Jalil
7Na pag lakka si Isa ka ga mulit na mandooy, lay na baw sila pilay pa bihing Danaw Jalil. Jama siꞌ tu sakiyan bay patuhut niiya. Luu na ga jama man Jalil, man Yahudiya, 8man Jerusalem, man Idumeya, sampay man dambilaꞌ Sōng Juldan. Minsan jama man tagan siga daira Tayil ka Saydon, luu na du bay bahuklud pilay. Kon da bay pilay pa mman na sabap lay taaka da siga pakaradjaan kahaylan-haylan bay pabuwat na.
9Pag ndaꞌ si Isa paeka na pin jama ndooy, lay ya nohoꞌ pinatapitan bagung ni mulit na man na dutai, taggahaꞌ tadogsog na baw ya meꞌ baanan jama. 10Batan sagannap ma sakihan ndooy, pag ndaꞌ da ndang meka na bay kaulian meꞌ si Isa, palogos na pin sila papassūt bong pin ya tapurut da jaꞌ. 11Maka tuktuk na takita meꞌ siga jama sineytan, magti sila pahantak ni awpan na sambayan da ngahowap, yuk da, “Kau ina Anak Tuhan!” 12Sugaꞌ luu-luu ngahowap meꞌ looy, magti sila sinaggong meꞌ si Isa yaꞌ nohoꞌ makitau bong soy ya.
Sapu-duwa jama pineneꞌ meꞌ si Isa binuwat rasul na
(Matiyu 10.1-4; Lukas 6.12-16)
13Na paddus mandooy, lay na baw si Isa nukad punu maka luu du bay boo na sagannap ma karomanan na mmeꞌ niiya. 14Takka njataꞌ, lay ya meneꞌ sapu-duwa ninsila binuwat rasul na. Sila siꞌ tu bay pineneꞌ mmeꞌ niiya supaya sila tasohoꞌ na ngalataan lahat masaplag umanat Tuhan song hallom. 15Maka lay gi sila buwanan na kawasa-kapatut malakka siga seytan.
16Na ga ilooy siꞌ sikasapu-duwa bay peneꞌ na, yana ga si Saymon ma bay awnan na si Pitel. 17Pasunuꞌ si Yaꞌkub ka si Yahiya, siga anak si Sibidi. (Meꞌ si Isa ngandē sila, Bowaneljes. Hatiyan na, siga anak guntu.) 18Luu gi si Andru, si Pilip, si Baltolome, si Matiyu, si Tomas maka si Yaꞌkub, yana anak si Alpiyus. Pasunuꞌ si Tadiyus, si Saymon ma bay pingkaꞌ ngatuhan parinta Rom, 19ka si Judas Iskariyut ma bay muwan tipu-akka njataꞌ si Isa song hallom.
Si Isa maka Belsibul
(Matiyu 12.22-32; Lukas 11.14-23; 12.10)
20Pag-anu, lay na baw si Isa ka ga rasul na pilay pa disu lumaꞌ man da pahantiꞌ. Ndooy siꞌ, meka na baw jama kumpo-kumpo pabalik sampay yaꞌ na san luu masa man ga si Isa kasakap mangan.
21Pag taaka ga lūng-kampung si Isa bay kahalan na ndooy, ilooy ma lay sila pilay ngaddoꞌ iya, batan yuk da, “Yaꞌ na ya njawom sayu.”
22Na ndooy siꞌ, luu siga guru saraꞌ agama ma bay takka man Jerusalem bay mitsala si Isa, yuk da, “Lay na bilay ya inasok meꞌ Belsibul,(3.22) Belsibul itu yana disu gallahan Ibilis. panghuluꞌ siga seytan. Ilooy na silay poonan kawasa na malakka siga seytan.”
23Dari ilooy ma lay sila linganan si Isa pa bihing na boꞌ na muwanan sila pamintangan, yuk na, “Pooy lay la meꞌ na sikatuwaꞌ Belsibul malakka pagkahi na seytan? 24Bong nnaꞌ ta pa siga pa-mmean parinta, bong sila wā magsaggaꞌ, basta yaꞌ baw silay hallom tatasan pamarinta da. 25Damikiyan, bong bay luu dampalūng wā sasaꞌ-manasaꞌ, yaꞌ hallom langkat du paglūng da. 26Belsibul pun ina, bong ya magsaggaꞌ ka siga pagkahi na seytan, yaꞌ du natas pamarinta na, mastiꞌ langkat du.
27“Belsibul ilay meꞌ sapantun lalla basag kawasa na wā nganjagahan lumaꞌ na paayad. Yaꞌ luu kaasok lumaꞌ na ngahawasan altaꞌ na bong yaꞌ du bay kalabihan kawasa na. Sugaꞌ bong luu ngantanan kawasa mas mehe man lalla looy, taingkot na lalla looy sampay tahawasan na altaꞌ na.”
28-30Na sabap sila bay māꞌ luu seytan na muwanan iya kawasa, yuk na ninsila, “Baan ta kam banahan, san gi sina oy dusa manusiyaꞌ sampay bitsala da pangka pa Tuhan, dari gi pinuwasan. Sugaꞌ soysoy ina māꞌ pabuwatan Rū Sutsiꞌ yana pabuwatan seytan, mastiꞌ yaꞌ na ya koleꞌ kaampunan labba man junyaꞌ sampay pa ahirat. Inaa na sina dusa ma yaꞌ tapuwasan saumu.”
Sagannap ma inawnan paglūng si Isa
(Matiyu 12.46-50; Lukas 8.19-21)
31Yaꞌ hallom, luu na baw takka nneꞌ si Isa ka ga danganakan na pa lumaꞌ man na nōꞌ. Sasang da ngagad ni poan, lay sila nohoꞌ jama nginganan iya. 32Dari sasang si Isa liput meꞌ baanan jama ndooy ningkōꞌ, ilooy ma luu na pahati niiya, yuk na, “Tuwan, luu la ga nneꞌ nu ka ga danganakan nu ndooy ni poan. Doman konoꞌ sila magbitsala ka kau.”
33Pag tampung si Isa, “Ohoꞌ, sugaꞌ meꞌ ku ngingat, saꞌ sat sila jaꞌ nneꞌ ku ka ga danganakan ku.” 34Pag-anu, ngandaꞌ na baw ya ni sagannap ma lundooy ningkōꞌ ngaliput iya, boꞌ na halling, “Siga jama tuu pun itu bilang ku du nneꞌ ku ka ga danganakan ku. 35Batan sagannap ma mean kahandak Tuhan, sila pun ina bilang ku du ga danganakan ku ka nneꞌ ku.”
4Dalil pasal jama naburan bani
1Pag-anu, lay na baw balik si Isa nōꞌ ndooy ni bihing Danaw Jalil. Sugaꞌ pagka sakiyan na jama ngandogsog iya, lay ya dutai ningkōꞌ taꞌ bagung ma tapit pa bihing. Kuwan baanan ga jama looy siꞌ tu, lay na jaꞌ ndooy ni tapiyan pakale niiya. 2Iya siꞌ bay nōꞌ, meka dalil bay pakoy na. Disu meꞌ tuu, yuk na,
3“Pakale doꞌ kam. Luu disu jama lay naburan bani ni huma na. 4Pag sabud na, kasohean lay tumiluꞌ pa tangngaꞌ lān sampay lay katis kinakan meꞌ siga manuk-manuk. 5Kuwan kasohean bani, lay tumiluꞌ pa jawom kabatuhan dangkitiꞌ du tanaꞌ na. Dari lay pasapput deꞌ-dēꞌ tomoꞌ bani looy sabap yaꞌ bay lawom man da njawom tanaꞌ. 6Sugaꞌ pag pasuꞌ jaꞌ llaw, yaꞌ hallom, lay du lūs tinanom looy sampay lay na ngalayu sabap yaꞌ bay nganggamut pa lawom. 7Kuwan kasohean bani, lay tumiluꞌ pa jawom lumput itingan. Pag tomoꞌ na, yaꞌ kuhi buwaꞌ batan lay limbo meꞌ lumput. 8Kuwan kasohean bani, lay tuwaꞌ ni tanaꞌ mahap. Dari siꞌ, mahap meꞌ da sulig sampay lay na buwaꞌ. Kasohean, eka buwaꞌ na njawom dampoon lipat min tallumpūꞌ; kasohean lipat min nnompūꞌ; kuwan kasohean, sampay lipat min dahatus.”
9Pag-anu, yuk si Isa lagi, “Kaam ma pakale ni bitsala ku, pahamun bi paayad.”
10Pag lay jaꞌ moleꞌ ga baanan jama looy siꞌ, ilooy sa tamban ni si Isa yana ga rasul na sikasapu-duwa ka siga mulit na kasohean. Pag-anu siꞌ, tinilaw na baw ya meꞌ da bong oy kamaatunan dalil looy siꞌ.
11Yuk si Isa ninsila, “Ohoꞌ, baan ta sa kam, batan ndang bay sina sinukuꞌ ningkaam pinahatiyan hāl pamarinta Tuhan ma yaꞌ gi bay lahil maruhuꞌ. Sugaꞌ bong ni siga jama sarī ma yaꞌ pitsayaꞌ niyaku, ngandalil jaꞌ ku man ku noan sila. 12Jama meꞌ sila ina, tuwaꞌ pa sila na bay halling njawom kitab, ilooy ma yuk na, ‘San ina sila ngandaꞌ, yaꞌ du sila kakila. San sila pakale, yaꞌ du sila kuhi kahati. Bong siꞌ ilay saꞌ meꞌ looy, mastiꞌ lay na bay tawbatan da dusa da boꞌ da inampun na meꞌ Tuhan.’ ”(4.12) Kitab Nabi Isaya 6.9-10.
Si Isa makkasan kamaatunan dalil pasal jama naburan bani
(Matiyu 13.18-23; Lukas 8.11-15)
13Pag-anu, yuk si Isa ninsila, “Bong yaꞌ san bay tahati bi dalil looy siꞌ samura-mura na, pooy na baw mintu meꞌ bi kahati bong ku makoy ga dalil sarī?
14“Na kamaatunan dalil looy ilay siꞌ meꞌ tuu: Bani looy ilay siꞌ ma bay sinaburan yana umanat Tuhan pinasaplag. 15Kuwan tanaꞌ ni tangngaꞌ lān man bani looy bay tumiluꞌ, tuwaꞌ pa sagannap ma bay kale umanat Tuhan, sugaꞌ magti ndagmit meꞌ Ibilis man jawom atay da.
16“Kuwan tanaꞌ looy ma njawom kabatuhan man bani looy bay tumiluꞌ, tuwaꞌ pa sagannap ma bay kale umanat Tuhan sampay magti pitsayaꞌ ni kagāk da. 17Sugaꞌ pagka yaꞌ bay nganggamut pa lawom umanat looy njawom atay da, yaꞌ du hallom tatasan da pitsayaꞌ. Pag luu jaꞌ kabinsanaan atawa laug tuwaꞌ njataꞌ da sabap meꞌ da pitsayaꞌ ni umanat Tuhan, siglaꞌ du sila patatak.
18“Kuwan tanaꞌ looy ma meka lumput itingan na man bani looy bay tumiluꞌ, tuwaꞌ pa sagannap ma bay kale umanat Tuhan sampay pitsayaꞌ, 19sugaꞌ wā sila hanggaw ni hāl meꞌ da llum ni junyaꞌ. Taboo-boo sila magsiꞌ meꞌ napsu da ni sīn sampay ni kajinisan. Dari song hallom, umanat Tuhan njawom atay da, bong dalil ta pa tinanom, lay na limbo leꞌ lumput sampay yaꞌ du buwaꞌ.
20“Boꞌ tanaꞌ looy ma mahap man bani looy bay sinaburan, tuwaꞌ pa sagannap ma bay kale umanat Tuhan sampay kinanna meꞌ da banahan. Pag toklas na, jinisan kaayaran takita ni kaallum da. Kaayaran da ina, bong dalil ta pa tinanom, kasohean buwaꞌ lipat min tallumpūꞌ, kasohean lipat min nnompūꞌ, kuwan kasohean sampay lipat min dahatus.”
Kabanahan yaꞌ dari tinapuk
21Pag-anu, yuk si Isa, “Kaam ina, katoonan bi na kabanahan. Sangkon daa na tapukun bi. Bong dalil ta pa palitaan, yaꞌ sina luu jama pus na nantikan palitaan tinangkopan na baw ka undam atawa inannaꞌ ndiyoꞌ kantil. Mastiꞌ gowet na jaꞌ sina pa jataꞌ supaya karantaan mimon njawom lumaꞌ. 22Intong na, pag pōꞌ kabanahan, mimon ma bay llimbuhan, pinalahil na. Damikiyan, mimon ina ma bay sinipuk, kinatoonan na. 23Na kaam ma pakale ni bitsala ku, pahamun bi paayad.”
24-25Yuk si Isa lagi, “Isbatun bi paayad tōꞌ ku. Batan mangkin ina kam magtuyuꞌ ngahati, mangkin pasōng gi pangahati bi. Boꞌ na, sinampunan gi sina meꞌ Tuhan. Sugaꞌ soysoy ina yaꞌ ngisbat bitsala ku, san luu pangahati na dangkitiꞌ, kinaddoan du.”
Pamarinta Tuhan ndalil pa bani sinaburan
26Yuk si Isa lagi, “Meꞌ tuu situ karuha pamarinta Tuhan: Luu jama bay naburan bani njawom huma na. 27Llaw pa dangallaw, sasang na tuli-matiꞌ, bani looy mastiꞌ tomoꞌ jaꞌ maka suligan didihan da na sadjaꞌ. Boꞌ jama looy ilay siꞌ ma bay nabud, yaꞌ du tahati na bong pooy meꞌ da sulig. 28Tanaꞌ looy na mismu kasulig ni bani looy. Duhuꞌ takita yana tomoꞌ. Song hallom, pasapput na buwaꞌ da sampay katting na isi da. 29Pag tahak na banahan, ilooy ma kinattom na meꞌ jama looy sabap taabut na timpu na.”
Pamarinta Tuhan ndalil pa bigi mustard tinanom
(Matiyu 13.31-34; Lukas 13.18-19)
30Maka yuk si Isa, “Ngandalil gi ku pamarinta Tuhan 31pa bigi mustard bay tinanom njawom huma. Minsan lannik bigi looy man sikamimon, 32pag sulig na, iya gi pinakamehe man mimon jambangan sampay lay na dari kayu. Ngangkang na engas na sampay pinagsangan na meꞌ manuk-manuk.”
33Sarī man ga ilooy siꞌ, meka gi dalil man si Isa bay masaplag umanat Tuhan ni baanan jama ndooy, gantaꞌ ma takaya pangahati da. 34Tuktuk na noan sila, wā ya ngandalil. Sugaꞌ pag taabut sila-sila sa ka ga mulit na, lay du passaꞌ na kamaatunan siga dalil looy labbasakayi.
Si Isa mataddoꞌ libut
(Matiyu 8.23-27; Lukas 8.22-25)
35Pag taabut deꞌ kohap, yuk si Isa ni ga mulit na, “Palintas doꞌ kitabi pa dambilaꞌ danaw.” 36Dari lay du mbanan ga mulit na baanan jama ndooy sampay lay na sila mmeꞌ dutai pa taꞌ kumpit ma ndang man si Isa bay pauwan. Pag tuwak da, luu gi kasohean kumpit bay pahaboy ninsila. 37Sasang da siꞌ ngalē pa dambilaꞌ, takka na libut. Ni kabasag baliyu, sinakat na ga kumpit da meꞌ lamba sampay adak na ga tumallob. 38Libut looy siꞌ takka sasang si Isa tuli ni buliꞌ kumpit. Dari lay ya binatiꞌ meꞌ mulit na, yuk da, “Tuwan, yaꞌ san bitu ko maruli! Matoy limbo na situ kitabi!”
39Dari ilooy ma bangun du si Isa, boꞌ na nohoꞌ baliyu looy patagong. Maka yuk na ni lamba looy, “Ddong na! Banti na ko!” Dari lay du patagong baliyu looy sampay tud taddoꞌ na lahat saꞌ alang-alang.
40Pag-anu, yuk na ni ga mulit na, “Ongoy tu biddaꞌ na baw tawu bi? Yaꞌ gi kitu luu pangando bi niyaku?”
41Ga mulit na siꞌ tu, tud bay kahimattaan. Dari sitilaw-tilaw na ga sila, yuk da, “Jama oy doꞌ tu meꞌ tuu? Sampay baliyu ka lamba ngasip jaꞌ du niiya!”
5Si Isa malakka siga seytan man jawom baran disu lalla
1Takka jaꞌ siꞌ sila pa dambilaꞌ danaw, lay sila parungguꞌ ndooy ni Gerasa. 2Pag duwai si Isa man taꞌ kumpit, luu na baw pasōng pa mman na disu lalla sineytan bay lakka man kakubuhan 3man na patannaꞌ. Yaꞌ na luu dapat jama ngingkotan iya 4batan san ya daran na bay pinusas ka karina battis-tangan na, bakkat jaꞌ du leꞌ na, boꞌ yaꞌ luu jama kasapad iya. 5Sangom-llaw bbuwatan na maglanan ni tagan kakubuhan sampay ni kapunu-punuhan magkillahapan sampay makatan dī na na ga ka batu tawom.
6Pag takita na jaꞌ siꞌ si Isa ni katāhan, ilooy ma lay ya sonse pa mman na boꞌ na sujud ni awpan na. 7-8Dari lay sohoꞌ si Isa seytan na pōꞌ man jawom baran na. Pag-anu, magti ngahowap seytan looy, yuk na, “Batōy nu itu ku, Isa? Katoonan ku du bina kau Anak Tuhan Mahatinggi! Junjung ku na ningkau ni awon Tuhan, baan nu na ku yaꞌ ko midjalaꞌ aku.”
9Tilaw si Isa niiya, “Soy ina awon nu?”
Pag tampung seytan looy, “Aku tu si Libuhan, batan biddaꞌ na situ eka kami njawom lalla tuu.” 10Pag-anu siꞌ, tinuyuan na pin meꞌ seytan looy nganjunjung si Isa pin yaꞌ jaꞌ sila nohoꞌ lahi man lahat looy.
11Na ndooy siꞌ, luu baanan bawi inipat magkakanan ni tabbis punu. 12Dari siꞌ, bbuwatan siga seytan njawom baran lalla looy siꞌ nganjunjung ni si Isa, yuk da, “Bong dari ningkau, pasayin na jaꞌ kami pa jawom baran baanan bawi looy.” 13Dari lay na sila nduwan sampay lay na du sila pōꞌ, boꞌ da paasok pa jawom baanan bawi looy. Pag-anu siꞌ, ilooy ma magti magsonsehan baanan ga bawi looy palūd pa jawom danaw sampay lay na katis limbo. Eka bawi looy siꞌ, luu ga duwa libu.
14Pag takita meꞌ siga tukang ngipat bawi looy meꞌ looy, magti sila sonse pa daira sampay pa siga kawum ni bihing na nuntutan jama mimon ma bay tasakup da. Dari meka na jama bay bahuklud pilay ngandaꞌ. 15Takka jaꞌ siꞌ sila pa mman si Isa, takita da na lalla looy ma bay inasok meꞌ libuhan seytan ningkōꞌ sampay lay na ga mamakoy maka basanayan na pamiki na. Dari takkahan tawu na ga sila. 16Pag-anu siꞌ, lay na sila tinuntutan meꞌ sagannap ma bay kasakup bong oy bay katuwaꞌ ni lalla looy siꞌ sampay na ga bawi looy. 17Sugaꞌ pag lay jaꞌ siꞌ kabaan ga jama looy, ilooy ma lay sila nganjunjung si Isa nohoꞌ na lakka man lahat da.
18Pag dutai ga si Isa pa taꞌ kumpit lān da na siꞌ lakka, kuwan lalla looy siꞌ ma bay sineytan, lay na muhun mmeꞌ. 19Sugaꞌ yaꞌ bay kuhi si Isa, gam pin yuk na, “Gam na ko ba moleꞌ pa mman ga lūng-kampung nu boꞌ da baan nu mimon bay pabuwat Tuhan ningkau sampay ehe timbang na ni jataꞌ nu.”
20Dari lay na lakka lalla looy sampay lay na ya ngalataan lahat ndooy ni Dekapolis nuntut mimon bay pabuwat si Isa niiya. Dari sagannap ma bay kabaan, tud bay mehe meꞌ da inu-inu.
Anak si Jayrus maka disu danda ma katumpahan lahaꞌ
(Matiyu 9.18-26; Lukas 8.40-56)
21Pag-anu, lay na baw balik ga si Isa palintas pa dambilaꞌ danaw. Pag duwai da ni tapiyan, yaꞌ na baw taambat manusiyaꞌ nampang iya. 22Yaꞌ hallom, takka na baw disu pa-mmean langga inawnan si Jayrus. Takita na jaꞌ si Isa, ilooy ma lay ya magti sujud ni awpan na 23sambayan na maku junjung niiya, yuk na, “Tuwan, luu la anak ku magkamatoy-matoy na, boꞌ isu-isu du silay anak ku danda. Bong siꞌ kadarihan ningkau, mmeꞌ doꞌ ko niyaku boꞌ tappakun doꞌ bumbunan na mari kaulian.” 24Dari lay du mmeꞌ si Isa. Kuwan ga jama ndooy siꞌ tu, tud meka patuhut sampay magdogsog-dogsog na ga.
25Njawom baanan ga jama looy siꞌ, luu disu danda sapu-duwan taun na halloman na daran katumpahan lahaꞌ. 26Minsan meka na duktul man na bay nguliꞌ, yaꞌ du ya bay kaulian, gam pin magdaruhun lagi. Sampay lay na ga katis altaꞌ na man na bay nguliꞌ. 27-28Dari pagka ndang bay taaka na habal pasal si Isa, honaꞌ-honaꞌ na, “Bong tu lay jaꞌ tapurut ku san lasa juba na, kaulian na situ ku.” Dari lay ya magtuyuꞌ papassūt pa dambulihan si Isa boꞌ na murut juba na. 29Pag-anu siꞌ, sarunduun du lay banti lahaꞌ na tumpa, sampay takissa na na parasahan na kaulian.
30Kuwan si Isa baw siꞌ tu, takissa na na luu kawasa bay pōꞌ man jawom baran na. Dari lay ya pateleꞌ pa dambulihan ngandaꞌ ni baanan looy siꞌ sambayan na nilaw, yuk na, “Soy lay siꞌ bay murut juba ku?”
31Yuk ga mulit na baw siꞌ tu, “Uy Tuwan, meꞌ tuu na eka manusiyaꞌ magdogsogan na, nilaw gi ko bong soy bay murut kau!”
32Sugaꞌ si Isa baw siꞌ tu amu-amu maglinga-linga miha bong soy bay murut iya. 33Kuwan danda looy siꞌ tu, pagka katoonan na lay na ya kaulian, ilooy ma pasōng na ya sujud ni awpan si Isa mipig na ni katawu na. Maka lay na ya magsabanna iya bay murut. 34Dari yuk si Isa ni danda looy, “Nang, ilooy ilay siꞌ man nu lay na kasay sabapan pangando nu. San ko moleꞌ na. Pasannangun na atay nu. Lay na du lakka saki nu.”
35Sasang si Isa masi mitsala ni danda looy, luu na takka siga jama man lumaꞌ si Jayrus. Yuk da ni si Jayrus, “Daa na ba pahusaan tabi Tuwan Guru naa. Lay na la taabut anak nu.”
36Sugaꞌ pag takale si Isa bay halling da, yuk na ni si Jayrus, “Daa ko ba hanggaw. Mangando jaꞌ ko niyaku.” 37Pag-anu, ilooy ma lay jaꞌ sohoꞌ si Isa baanan ga jama looy tamban ndooy. Kuwan sila ka si Jayrus lay na palanja. Ilooy du bay boo da si Pitel maka ilooy ma duwa magdanganakan yana si Yaꞌkub ka si Yahiya. 38Takka jaꞌ siꞌ sila pa lumaꞌ si Jayrus, takita da na jama maghiposan nangis sampay killahap mag-ulawi. 39Lay jaꞌ siꞌ ga si Isa paasok, yuk na ni ga jama looy, “Ongoy doꞌ tu kam hipos sampay nangis? Yaꞌ du bilay matoy anak-anak looy, arapun tuli jaꞌ silay.”
40Pag takale da meꞌ looy, lay jaꞌ ya pinatattohan meꞌ da. Dari lay doꞌ sila sohoꞌ si Isa pōꞌ sikamimon, boꞌ na moo ga induꞌ-mmaꞌ anak-anak looy ka ga mulit na ilooy siꞌ ma tallu pa jawom bilik man anak-anak looy. 41Pag-anu, inantanan na meꞌ si Isa tangan anak-anak looy sambayan na halling niiya ni pallun Yahudi, “Talita, kum.” Hatiyan na, “Nang, bangun na ko.” 42Boꞌ magti du bangun anak-anak looy sampay lay na ga magliputan lumān. Umu na ilay siꞌ, sapu-duwan taun. Dari siꞌ tud bay kahimattaan siga induꞌ-mmaꞌ na. 43Sugaꞌ lay sila inamay-amayan meꞌ si Isa yaꞌ nohoꞌ māꞌ ni jama bong oy bay pabuwat na. Maka lay na sohoꞌ na anak-anak looy pinakan ninsila.
6Jama Nasaret yaꞌ pitsayaꞌ ni si Isa
(Matiyu 13.53-58; Lukas 4.16-30)
1Pag-anu, lay na ga si Isa bbeleng ka ga mulit na pa Nasaret, yana kawum man na bay sulig. 2Pag taabut Llaw Pahali, lay na baw ya pa langga magnasihat. Pag lay jaꞌ takale ga jamaa ndooy, meka sila bay inu-inu. Yuk dangan pa dangan, “Ninggai na la man lalla naa bay koleꞌ pangahati lawom meꞌ naa ka kawasa na buwat pakaradjaan kahaylan-haylan? 3Tukang kayu jaꞌ bina ya. Saꞌ ba, anak si Mariyam ya? Maka saꞌ ba, danganakan na yana ga si Yaꞌkub, si Joses, si Judas ka si Saymon? Sampay ga danganakan na ma danda, dambuwaꞌ du tabi lahat.” Dari yaꞌ sila kuhi pitsayaꞌ niiya.
4Dari yuk si Isa ninsila, “Bong inawnan nabi, mastiꞌ binantug jaꞌ sina paninggai-paninggai jaꞌ ya. Sugaꞌ bong kinawnan jama ni daira man na bay sulig, minsan lūng-kampung na yaꞌ du magmaltabat niiya.”
5-6Dari eleng-eleng na si Isa pagka yaꞌ kuhi pitsayaꞌ siga jama ndooy. Sangkon yaꞌ na meka pakaradjaan kahaylan-haylan bay tapōꞌ na ndooy. Kamasaꞌ luu gi du baw disu-disu jama saki bay kaulian poonan na bay nappak bumbunan da. Pus meꞌ looy, lay na ya ngalataan kakawum-kawman sarī masaplag umanat Tuhan.
Siga mulit si Isa sikasapu-duwa sinohoꞌ masaplag
7Na disu llaw, lay linganan si Isa ga mulit na sikasapu-duwa pa bihing na. Luu jaꞌ siꞌ, lay sila sohoꞌ na ngalataan lahat masaplag duwa-duwa maglimbang paninggai-paninggai jaꞌ tiluꞌ da. Maka lay gi sila buwanan na kawasa-kapatut malakka siga seytan. 8Tugun na ninsila, “Pag lumān bi, daa na kam moo oy maka oy na. San lutuꞌ, bāg, atawa sīn, daa na du. Dari baw kam moo tungkud 9sugaꞌ bong sinilas, ngkod ilooy jaꞌ ma ndang lay na patuk bi. Badjuꞌ pasaynan pun, daa na du kam moo.
10“Na bong mintu kam bay hinasi leꞌ jama nohoꞌ pahantiꞌ ni lumaꞌ da, ndooy na jaꞌ mman bi halloman bi yaꞌ gi palakka man daira da. 11Sugaꞌ bong baw kam bay takka ni disu daira boꞌ bi yaꞌ hinasi atawa yaꞌ pinaruli umanat bi, lakka na kam mandooy. Sugaꞌ papasan bi doꞌ duhuꞌ momok tanaꞌ lahat da ma ngakkot ni sinilas bi tandaꞌ yaꞌ na luu lamud bi ninsila.”
12Dari siꞌ, lay na sila ngalataan lahat masaplag ni jama nohoꞌ nawbatan dusa da. 13Lay gi sila malakka jinisan seytan man jawom baran jama. Maka meka gi jama sakihan lay na du kaulian meꞌ da pag lay jaꞌ puusan da bumbunan da ka insallan.
Kapatoy si Yahiya ma Tukang Mandi
14Na yaꞌ gi siꞌ hallom, lay na baw kaakahan Gubnul Herod pasal si Isa batan song patanyag na pin awon na. Habal takka pa mman na, baꞌ-bāꞌ kasohean, “Iya na wapat si Yahiya ma Tukang Mandi llum na baw pabalik. Ilooy na silay kon na luu kawasa na mōꞌ pabuwatan kahaylan-haylan.” 15Tanggap kasohean baw, Nabi Eliyas konoꞌ ya luu na kaluwa pabalik. Kuwan kasohean māꞌ iya disu nabi sarī meꞌ karuha kanabi-nabihan kasohean mattoꞌ.
16Dari pag tahabal Gubnul Herod halling ga jama meꞌ looy, yuk na, “Ilooy na silay Yahiya ma bay sohoꞌ ku pinonggolan kallong na! Luu na hati llum pabalik!”
17Ngkon ilay Gubnul Herod bay mitsala meꞌ looy sabapan ilooy ma bay pabuwat na ni si Yahiya. Batan iya bay nohoꞌ si Yahiya sinungkuban sampay iningkotan boꞌ njīl. Kon na ilay bay nungkub sabap bay ya sinahawi meꞌ si Yahiya pasal kalaatan na bay ngagaw nda si Pilip, yana si Herodiyas. Boꞌ si Pilip ilay yana ariꞌ Gubnul Herod mismu. 18Daran yuk si Yahiya ni Gubnul Herod, “Tagga bina ni saraꞌ bong ko sitampu ka nda danganakan nu.”
19Dari sabap si Yahiya bay halling meꞌ looy, tud maat atay si Herodiyas niiya sampay kainagon na nohoꞌ na ya pinapatoy. Sugaꞌ yaꞌ gi bay luu dapat na 20sabap lay sohoꞌ Gubnul Herod si Yahiya njagahan mari yaꞌ kongoy-kongoy. Mehe maltabat Gubnul Herod ni si Yahiya batan katoonan na si Yahiya jama intong sampay sutsiꞌ pa Tuhan. Sarī gi, tigiꞌ ya pakale ni tōꞌ si Yahiya. Sat na jaꞌ, daran na baw ya takkahan hanggaw bila ya pakale.
21Sugaꞌ song hallom, luu na dapat si Herodiyas ngahawasan paddi inansong na. Dari meꞌ tuu silay: Pag taabut haliyan buwan man Gubnul Herod bay pinamaddihan, lay ya ballang mehe. Lay kaddoꞌ na ga kunsihal na, siga komandel sundalu na sampay ilooy kasohean ma balkanan ndooy ni Jalil.
22Pag-anu siꞌ, paasok na baw anak si Herodiyas budjang mayla ni awpan Gubnul Herod ka ga soheꞌ na ma bay ngaluruk. Boꞌ tud bay kasulutan sila sikamimon. Dari yuk Gubnul Herod ni budjang looy, “Maku jaꞌ ko oy-oy karomanan nu, basta dean ku jaꞌ sina kau.” 23Pag-anu siꞌ, lay gi duhunan na bay bitsala na siꞌ, yuk na, “Oy-oy paku nu Nang, sapahan ku baw basta dean ku jaꞌ sina kau san gi gantaꞌ tongaꞌ sakup ni pamarinta ku!”
24Bbuwatan budjang looy baw siꞌ tu, lay doꞌ pōꞌ nilaw nneꞌ na, yuk na, “Oy tu la Neꞌ paku ku?”
Pag tampung nneꞌ na, “Pakuhun kōk si Yahiya ma Tukang Mandi.”
25Dari magti du budjang looy pabeleng pa mman ga Gubnul Herod boꞌ na māꞌ, “Tuwan Gubnul, paku ku ningkau, deanun na aku deꞌ-dēꞌ takōk si Yahiya ma Tukang Mandi inannaꞌ taꞌ tām.”
26Pag takale jaꞌ meꞌ Gubnul Herod paku na, tud bay sasso ya. Sugaꞌ yaꞌ na bay luu dapat na mawiꞌ bay bitsala na batan lay gi sapahan na ni pag-awpan mimon jama ma bay ngaluruk. 27Dari lay du magti Gubnul nohoꞌ disu sundalu monggolan kallong si Yahiya, boꞌ nohoꞌ binoo kōk na pa mman budjang looy. Takka jaꞌ siꞌ sundalu looy pa jawom jīl, lai na ponggolan na kallong si Yahiya. 28Pag-anu, lay na boo na kōk na pilay taꞌ tām sampay lay na songan na pa mman budjang looy. Luu jaꞌ siꞌ mman na, lay na dean na pa mman nneꞌ na.
29Taaka jaꞌ siꞌ meꞌ siga mulit si Yahiya, ilooy ma lay na kaddoꞌ da mayat na sampay lay na kinubu.
Si Isa makan jama labi lima libu
(Matiyu 14.13-21; Lukas 9.10-17; Yahiya 6.1-14)
30Na balik ta pa siga rasul si Isa, pag beleng da bay ngalataan lahat, nuntut na sila ni si Isa mimon bay pabuwat da sampay ilooy ma bay tōꞌ da. 31Pag lupus, yuk si Isa ninsila, “Sūng tabi. Pilay doꞌ tabi pa lahat yaꞌ magjama pahali-hali, kita-kitabi jaꞌ.” Ngkon na ilay bay halling meꞌ looy sabap meka jama salin-sunuꞌ na pa mman na ngabut sampay yaꞌ na san ga luu masa man da mangan ka ga rasul na.
32Dari siꞌ, sila-sila du bay dutai taꞌ kumpit pilay pa lugar yaꞌ magjama. 33Sugaꞌ meka du bay ngita sila lakka sampay taatag da du bong song paninggai tiluꞌ da. Dari sakiyan du jama man siga kawum lahat looy bay sonse nusu bihing sampay duhuꞌ gi bay takka pilay man sila. 34Pag duwai ga si Isa man taꞌ kumpit, pag ndaꞌ na, ndang sakiyan na jama ngagad iya. Iya siꞌ tu kapaluuy na ninsila sabap subay ga sila baanan bili-bili ma yaꞌ luu tukang ngipat sila. Dari ilooy ma nagnaꞌ na baw ya noan sila kajinisan.
35Pag taabut kohap, pasōng na ga mulit si Isa pa mman na, yuk da, “Tuwan, kohap na bitu la lahat. Boꞌ lahat tuu bitu lau-lau. 36Daa busung, sohoun na ga jama looy pilay pa kakawum-kawman lahat tuu mallihan dī da kinakan.”
37Sugaꞌ yuk si Isa, “Kaam sa ba makan sila.”
Pag halling da, “Noy baw tu la Tuwan man tabi koleꞌ sīn man mallihan baanan ga jama naa meꞌ naa na eka da? Daa busung, san bitu kitabi bay kaballi tinapay hagaꞌ gadji wawum buwan, masi du yaꞌ sukup man makan sila.”
38Pag tampung si Isa, “Ndaun bi teꞌ bong dangom batang tinapay tabi.”
Pag ndaꞌ da, yuk da, “Limam batang du bitu ka duwa lisu du daying.”
39Pag-anu siꞌ, lay na si Isa nohoꞌ ga mulit na nappuk-nappuk baanan ga jama ndooy, boꞌ nohoꞌ ningkōꞌ taꞌ kuhun. 40Pag tingkōꞌ da, kasohean baanan dahatus-dahatus, kuwan kasohean lima-limampūꞌ.
41Pag-anu, lay na kaddoꞌ si Isa tinapay looy sikalimam batang ka daying looy sikaduwa, boꞌ na pahangad pa taꞌ langit sambayan na muwan pagsukuhan pa Tuhan. Pag lupus, pinong-pōng na meꞌ na ga tinapay looy ka ga daying looy boꞌ sinongan na pa mman siga mulit na nohoꞌ man makan ga baanan jama looy. 42Dari siꞌ, lay na sila sikamimon mangan sampay sso na ga sila. 43Pag lupus, luu gi bay pumpung da sapu-duwa bakaꞌ pannoꞌ leꞌ pisan tinapay ka daying bay takapin. 44Boꞌ eka ga jama looy siꞌ bay mangan, luu ga lima libu kalallahan, sarī gi karandahan ka ga anak-anak.
Si Isa lumān taꞌ kuwit boheꞌ
(Matiyu 14.22-33; Yahiya 6.15-21)
45Paddus na pin sila mangan, lay na baw sohoꞌ si Isa ga mulit na dutai taꞌ kumpit nohoꞌ duhuꞌ man iya palintas pa Betsayda. Kuwan iya, lay doꞌ tamban mapoleꞌ ga baanan jama looy. 46Lay jaꞌ siꞌ moleꞌ siga jama looy, lay na baw si Isa patukad pa taꞌ punu maku duwaa pa Tuhan. 47Iya siꞌ tu, ngabut sampay lawom na bahangi, masi na pin ya ndooy dangan-dangan na. Kuwan ga mulit na taꞌ kumpit looy siꞌ, lay na nakka pa tangngaꞌ danaw.
48Pag deꞌ subu, takita na meꞌ si Isa ga mulit na man katāhan kaawran pasōng sabap nugguꞌ sila baliyu landos. Dari lay na ya patuhut ninsila lumān jaꞌ taꞌ kuwit boheꞌ. Na adak jaꞌ siꞌ ya paruhuꞌ man sila, 49takita da na ya lumān taꞌ kuwit boheꞌ, sugaꞌ kanna da ga tubangkit. Dari kakillahapan na sila 50sinawan niiya.
Sugaꞌ magti mitsala si Isa ninsila, yuk na, “Daa kam ba tawu. Aku bitu la. Njawom iman teꞌ kam ba.” 51Pag-anu, lay na ya dutai pa taꞌ kumpit da sampay sarunduun du lay patagong baliyu looy. Dari tud bay kahimattaan sila. 52Batan ni kabilod da, masi yaꞌ tabistu da bong soy ya san bay na tasakup da ga tinapay looy bay pinaekahan meꞌ na.
Si Isa ngulian jama ndooy ni Genesaret
53Takka jaꞌ siꞌ sila pa dambilaꞌ danaw, lay sila parungguꞌ ndooy ni Genesaret. 54Pag duwai si Isa man taꞌ kumpit, magti ya takila meꞌ siga jama ndooy. 55Dari lay sila sonse ngalataan lahat mahati luu na takka si Isa. Dari jama siꞌ tu, lay du bahuklud pilay pa mman na ngalanggung jama sakihan taꞌ patulihan da. 56Maka paninggai-paninggai jaꞌ ya, ni kakawum-kawman, ni siga daira atawa ni siga tabuꞌ, luu jaꞌ jama ngannaꞌ siga soheꞌ da sakihan ni bihing lān mehe. Dari pag pingkaꞌ si Isa, bbuwatan da maku junjung niiya nohoꞌ mapurutan ga soheꞌ da ma sakihan san lasa ni bihing-bihing juba na. Boꞌ lay jaꞌ du kaulian soysoy bay kapurut.
7Si Isa nahawi siga Parisi
1Na disu llaw, luu na baw bay pilay pa mman si Isa baanan ga Parisi ka ga guru saraꞌ agama lakka man Jerusalem. 2Ndooy siꞌ, takita da na baw kasohean mulit si Isa yaꞌ san bay ngikut aturan agama meꞌ ngosoan tangan bong sila mangan. Dari ni bandingan da, yaꞌ sutsiꞌ tangan da ni mata Tuhan. 3Batan aturan siga Yahudi awla na siga Parisi, yaꞌ dari mangan bong yaꞌ bay duhuꞌ ikut da lanan kabboꞌ-bboan da bay ngosoan tangan da. 4Damikiyan, bong sila bay man tabuꞌ, yaꞌ du sila kakakan bong sila yaꞌ doꞌ bay duhuꞌ ngosoꞌ man da ngikut aturan kabboꞌ-bboan da. Maka meka gi silay jinisan aturan kabboꞌ-bboan da ikut da ni hāl meꞌ ngosoan ga sawan, karilu sampay ga siliꞌ.
5Dari tilaw ga Parisi ka ga guru saraꞌ agama ni si Isa, “Ongoy lay ga mulit nu yaꞌ san ngikut aturan kabboꞌ-bboan tabi? Ndaꞌ kami, mangan jaꞌ sila san yaꞌ gi sutsiꞌ tangan da ni mata Tuhan.”
6Pag tampung si Isa, “Kaam tu, magbawuꞌ-bawuꞌ jaꞌ kam sutsiꞌ. Tud lay du bana tuwaꞌ pa kaam palman ma bay sinuwatan meꞌ Nabi Isaya mattoꞌ, ilooy ma yuk Tuhan,
‘Ga jama tuu, bong ni bitsala pōꞌ man jawom behe da, maehe sila aku. Sugaꞌ njawom atay da, yaꞌ san hagaan ninsila kahandak ku. 7Sumba da niyaku yaꞌ du luu pūs na, batan siga panohoan ma tinōꞌ meꞌ da, lay jaꞌ pinabuwat-buwat meꞌ manusiyaꞌ, saꞌ ga lakka man aku.’ ”(7.6-7) Kitab Nabi Isaya 29.13.
8Dari yuk si Isa ninsila, “Kaam pun ilay meꞌ looy du. Batan bbuwatan bi mogbogan siga aturan manusiyaꞌ, boꞌ siga panohoan Tuhan tikutan bi na. 9Tud alistu kam buwat daawa man bi nunggud ga panohoan Tuhan bong pin tabogbogan bi jaꞌ siga aturan kabboꞌ-bboan bi. 10Saꞌ ba, luu panohoan Tuhan bay sinuwatan meꞌ Nabi Musa, ilooy ma yuk na, ‘Pag-aratan bi induꞌ-mmaꞌ bi?’ Maka yuk na, ‘Soysoy bay mitsala pangka ni mmaꞌ na atawa nneꞌ na subay pinapatoy.’
11“Boꞌ ningkaam, tōꞌ bi sarī. Pamāꞌ bi, bong induꞌ-mmaꞌ maku tulung man anak da, dari san anak da maan sila, ‘Yaꞌ luu sīn ku man nabangan kaam batan ituu ma luu niyaku, lay na pasarī ku para ni Tuhan.’ 12Dari sabapan tōꞌ bi, sat bi saꞌ māꞌ, san tabi yaꞌ na nulung induꞌ-mmaꞌ tabi. 13Sangkon, saꞌ ga bina oy, talloban bi na panohoan Tuhan bong pin tapaantup bi jaꞌ aturan kabboꞌ-bboan bi. Boꞌ meka gi sarī man naa pabuwat bi ma nulang ni kahandak Tuhan.”
Oy mattan makatamak ni jama?
14Pag-anu siꞌ, lay na baw sohoꞌ si Isa baanan ga jama ndooy patapit. Luu jaꞌ siꞌ, yuk na ninsila, “Pakale doꞌ kam ka hatiyun bi banahan bitsala ku. 15Oy-oy ina makanan ma isi jama pa jawom behe da, yaꞌ sina makatamak ninsila ni mata Tuhan. Arapun ilooy ya makatamak yana kalaatan ma pōꞌ man jawom atay da. 16Kaam ma pakale ni bitsala ku, pahamun bi paayad.”
17Lay jaꞌ siꞌ lakka si Isa ka ga mulit na man baanan ga jama looy, lay sila paasok pa jawom lumaꞌ. Pag-anu siꞌ, ilooy ma tinilaw du ya meꞌ siga mulit na pasal bay tōꞌ na siꞌ.
18Yuk si Isa ninsila, “Hati, sampay kaam, yaꞌ gi du kina kam kahati? Subay siꞌ tahati bi na, oy-oy kakan jama, yaꞌ du luu katamak ninsila pa Tuhan 19batan yaꞌ du sina tuwaꞌ pa jawom atay da. Oy-oy ina paasok pa jawom behe tuwaꞌ pa jawom battong ta sadjaꞌ, boꞌ na pinōꞌ du.” Na hantak bitsala si Isa ilay siꞌ, oy-oy jaꞌ makanan, yaꞌ luu haram.
20Yuk si Isa lagi, “Inaa ya ina katamak ni manusiyaꞌ yana jinisan kalaatan ma pōꞌ man jawom atay da. 21Batan man jawom atay, luu pōꞌ jinisan pamiki maat meꞌ sapantun buwat kasabuhan danda-lalla, nangkaw, mapatoy, 22magjina ka magnapsu mulakab. Damikiyan, luu du pōꞌ man jawom atay jama ngandahulakaꞌ, nipu, magkamuklahan, ngandangkiꞌ, mitna, ngabbu sampay buwat jinisan karupangan. 23Mimon kalaatan meꞌ looy ilay siꞌ, poonan da mastiꞌ lakka man jawom atay manusiyaꞌ. Siga pabuwatan meꞌ looy ilay, ilooy na silay bana katamak ni jama ni mata Tuhan.”
Pangando disu danda bangsa Sayropinisya ni si Isa
24Pag-anu, lay na baw ga si Isa lakka man Jalil song pilay pa disu lahat tapit pa daira Tayil. Takka ndooy siꞌ, lay doꞌ sila pahantiꞌ ni disu lumaꞌ. Na si Isa siꞌ tu, kainagon na, yaꞌ ya tasayu ga luu na ya ndooy. Sugaꞌ san meꞌ looy, masi du bay taaka jama. 25Ndooy siꞌ, luu disu danda anakan danda sineytan. Pag lay jaꞌ taaka na luu na si Isa ni lahat da, magti ya pilay pa mman na, boꞌ na sujud ni awpan na. 26Pag-anu, boꞌ na maku junjung niiya nohoꞌ llakkahan seytan anak na. Danda looy siꞌ tu bangsa Sayropinisya, saꞌ ya Yahudi. 27Dari pagka doman si Isa nongkad bong pooy basag pangando danda looy niiya, yuk na, “Subay bangsa Yahudi doꞌ paruhuꞌ ku tinabang. Bong ina kau ya paruhuꞌ ku, sibuꞌ du ka bay kaddoꞌ ku kinakan sinukuꞌ ni siga anak ku, boꞌ ndean na baw siga idoꞌ.”
28Pag tampung danda looy, “Bana sina Tuwan, sugaꞌ minsan ina ga idoꞌ, masi gi du dari mangan san lasa mimis ma bay talabuꞌ meꞌ siga anak-anak man lamisahan.”
29Yuk si Isa niiya, “Pagka meꞌ naa tampung nu, tumatandaꞌ luu pangando nu niyaku. San ko moleꞌ na. Lay na du silay pōꞌ seytan man jawom baran anak nu.”
30Pag poleꞌ danda looy, tud mattan du lay na lakka seytan man baran anak na, batan ndaꞌ na sannang na anak na pabāk taꞌ bangkuꞌ.
Lalla bisu ka yaꞌ tattas bitsala na kaulian meꞌ si Isa
31Na pag lakka ga si Isa man tagan Tayil, lay sila pingkaꞌ man jawom daira Saydon sampay lay na sila nakka Danaw Jalil ndooy ni Dekapolis. 32Ndooy siꞌ, luu lalla bisu maka yaꞌ tattas bitsala na bay binoo pa mman si Isa. Dari lay sila maku junjung ni si Isa nohoꞌ nappak bumbunan lalla looy mari kaulian.
33Dari lay binoo meꞌ si Isa lalla looy palawak dangkitiꞌ man baanan ga jama ndooy. Pag-anu, boꞌ lay sallokan na siga timbōꞌ na pa jawom lowang tinga lalla looy sikaduwambilaꞌ. Pag lupus, lay na baw luraan na timbōꞌ na, boꞌ na murut dallaꞌ lalla looy. 34Pus meꞌ looy, lay na baw pahangad si Isa taꞌ langit sambayan na ngahelaꞌ inansong na, boꞌ na halling, “Eppata.” (Hatiyan na, “Bukaꞌ na kam!”) 35Dari ilooy ma magti kale du lalla looy sampay tattas na ga bitsala na.
36Pus meꞌ looy, lay gi si Isa ngamay-ngamayan baanan jama ndooy yaꞌ nohoꞌ māꞌ pasal ilooy ma bay tasakup da. Sugaꞌ minsan sila bay sinupali, mangkin lay gi tinanyagan meꞌ da. 37Dari siꞌ, sagannap ma bay kaaka, biddaꞌ na haylan da sampay yuk da, “Mimon ma pabuwat na, yaꞌ luu saꞌ yaꞌ mahap. Minsan jama ma yaꞌ kale atawa yaꞌ kabitsala, kaulian na du meꞌ na.”
8Si Isa makan jama mpat libu
1Na yaꞌ hallom, sakiyan na baw balik manusiyaꞌ pilay pa mman si Isa. Pag lay jaꞌ katis lutuꞌ da, lay linganan si Isa ga mulit na, boꞌ na halling, 2“Luuy ku la ni ga jama naa. Luu na tallu ngallaw halloman da ntuu mman ku, boꞌ yaꞌ na san luu takakan-kakan da. 3Gampang ku la mapoleꞌ sila ni kalingantu da, taggahaꞌ lay na baw sila mintu kappisan ni tangngaꞌ lān. Kasohean tu, tā paglahat da llān.”
4Pag tampung siga mulit na, “Noy baw tu la man tabi ngaddoꞌ sukup man makan sila meꞌ naa na eka da, boꞌ ni lahat yaꞌ maglumaꞌ lagi?”
5Tilaw si Isa, “Dangom batang gi tinapay tabi?”
Pag tampung da, “Pituꞌ sa.”
6Pag-anu, lay sohoꞌ na baanan ga jama looy ningkōꞌ. Pag-anu, kinaddoꞌ na meꞌ na ga tinapay looy sikapitum batang boꞌ pinagsukuhan pa Tuhan. Pag lupus, pinong-pōng na meꞌ na, boꞌ sinongan pa mman ga mulit na nohoꞌ man makan baanan ga jama looy. 7Maka luu gi du baw daying da dangkitiꞌ lay du pinagsukuhan meꞌ si Isa pa Tuhan, boꞌ sohoꞌ na man makan ga jama looy.
8Dari siꞌ, lay na sila sikamimon mangan sampay sso na ga sila. Pag lupus, luu gi bay pumpung ga mulit na pituꞌ bakaꞌ mehe pannoꞌ leꞌ pisan tinapay ka daying bay takapin. 9Boꞌ eka ga jama looy siꞌ bay mangan, luu ga mpat libu. Pag sso jaꞌ sila, lay na sila papoleꞌ si Isa, 10boꞌ na dutai taꞌ kumpit ka ga mulit na pilay pa Dalmanuta.
Si Isa sinohoꞌ mōꞌ sipat kawasa Tuhan
11Takka da ndooy, luu na baw pasōng siga Parisi nual si Isa. Maksud da nuway-nuwayan iya. Dari lay sila nohoꞌ pinakitahan sipat kawasa bong bana-bana du ya bay lakka man Tuhan.
12Pag takale si Isa bitsala da, ilooy ma ngahelaꞌ ya inansong na, maka yuk na, “Kaam tu angkat-angkatan batnaa, ongoy tu subay na pin kam nohoꞌ pinakitahan sipat kawasa boꞌ bi pitsayaꞌ niyaku? Baan ta kam banahan, basta yaꞌ baw sina kam pakitahan ku.”
13Pag-anu siꞌ, lay na ga si Isa ka ga mulit na palakka man ga Parisi looy. Maka lay na sila dutai balik taꞌ kumpit da palintas pa dambilaꞌ danaw.
Arat-tabiat siga Parisi ka Gubnul Herod ndalil pa pasulig
14Na sila siꞌ tu palintas, lay takupan ga mulit na moo tinapay lutuꞌ da. Boꞌ tinapay taꞌ kumpit dambatang du. 15Na sasang da masi ngalē, lay sila binandaan meꞌ si Isa, yuk na, “Paayad-ayad kam. Iyakinan bi pasulig siga Parisi ka Gubnul Herod.”(8.15) Hatiyan na, subay sila iyakin taggahaꞌ kalakkotan na baw sila meꞌ arat-tabiat siga Parisi ka Gubnul Herod.
16Na siga mulit na siꞌ tu yaꞌ tabista da iya ngandalil. Dari yuk da padisu-padisu, “Marean ta la ngkon na halling meꞌ naa sabap yaꞌ tabi bay kaboo tinapay.”
17Na si Isa siꞌ tu, tasayu na du bong oy binitsala meꞌ da. Dari yuk na ninsila, “Ongoy subay na pin kam hanggaw pasal tinapay yaꞌ luu? Yaꞌ gi bitu hati kam kahati pasal aku! Tud awod kam la tinoan. 18Ndaꞌ ku, luu baw mata bi, sugaꞌ yaꞌ du kam ngita. Luu baw tinga bi, sugaꞌ yaꞌ du kam kale. Yaꞌ na kilay taintom bi 19waktu ku bay mong-mōng tinapay looy limam batang du man bay makan baanan ga jama looy lima libu? Dangoy bakaꞌ gi bay kumpo bi, ilooy ma bay takapin?”
Pag tampung da siꞌ, “Sapu-duwa gi.”
20Maka yuk si Isa lagi, “Waktu ku bay mong-mōng tinapay looy pitum batang du man bay makan ga jama looy mpat libu, dangoy bakaꞌ gi bay kumpo bi, ilooy ma bay takapin?”
Yuk da, “Pituꞌ gi.”
21Dari yuk si Isa ninsila, “Bong meꞌ looy, ongoy baw taggahaꞌ masi gi kam yaꞌ kaindan?”
Si Isa ngulian jama buta
22Na pag takka ga si Isa pa Betsayda ni dambilaꞌ danaw, luu na baw baanan jama moo disu lalla buta pa mman na. Pag-anu, lay sila maku junjung niiya nohoꞌ murut lalla looy siꞌ mari ya ngita na. 23Sugaꞌ lay doꞌ tondaꞌ si Isa lalla looy man tangan binoo palawak-lawak man kalumaan ndooy. Tā-tā jaꞌ siꞌ sila, ilooy ma lay luraan si Isa mata lalla looy. Pag-anu, boꞌ tinappak meꞌ na. Tilaw na ni lalla looy, “Ngita na ko?”
24Pag-anu, ilooy ma maglinga-linga na lalla looy boꞌ na halling, “Ngita na ku la ga jama lumān, sugaꞌ meꞌ bantuk poon kayu sila!”
25Dari ilooy ma tinappak na baw balik mata na meꞌ si Isa. Pag kallat lalla looy mata na, ilooy ma kaulian na ya sampay tallak na pangandaan na. 26Pag lupus, lay na ya sohoꞌ si Isa moleꞌ. Maka yuk na ni lalla looy, “Daa na ko pahās pa jawom daira nuntutan jama ga lay na ko kaulian.”
Si Pitel māꞌ bong soy si Isa
(Matiyu 16.13-20; Lukas 9.18-21)
27Pag-anu, lay na baw pawus si Isa ka ga mulit na pa siga kawum ndooy ni Sesariya Pilipi. Sasang da lumān, tilaw na ni ga mulit na, “Bong ni bitsala jama, soy itu ku?”
28Tampung da, “Pamāꞌ kasohean, kau konoꞌ yana si Yahiya ma Tukang Mandi; yuk kasohean baw, kau konoꞌ Nabi Eliyas atawa disu nabi sarī man maruhuꞌ-ruhuꞌ luu na bay pinakallum.”
29“Na bong kaam,” yuk si Isa, “soy baw itu ku?”
Tampung si Pitel, “Kau na bina Almasi, tukang nalamat ma bay njanjiꞌ meꞌ Tuhan.”
30Pag-anu siꞌ, lay na sila supali si Isa yaꞌ nohoꞌ māꞌ ni soysoy bong soy ya.
Si Isa nunaꞌ kapatoy na
(Matiyu 16.21-28; Lukas 9.22-27)
31Na puwas mandooy, lay na baw si Isa mahati siga mulit na bong oy katuwaꞌ niiya ni sinōng, yuk na, “Ndang lay na situ ginantaꞌ niyaku, yana Anak Manusiyaꞌ, natasan jinisan kabinsanaan. Boꞌ tinuwak lagi ku meꞌ siga matatoa ni agama ka ga imam langkaw sampay ga guru saraꞌ agama. Maka pinapatoy lagi ku. Sugaꞌ pag ina mintu taabut ni katallu ngallaw, llum na du sina ku pabalik.” 32Na bay bitsala si Isa ilay siꞌ, tud lay na tinumlang meꞌ na. Dari pag takale si Pitel, ilooy ma lay doꞌ boo na si Isa palawak-lawak boꞌ na naggong, yuk na, “Uy Tuwan, daa ko ba halling meꞌ naa!”
33Sugaꞌ lay doꞌ pateleꞌ si Isa ngandaꞌ ni siga mulit na, boꞌ na mahallingan si Pitel, yuk na, “Lakka na ko man bihing ku Ibilis! Pamiki nu ina kahandak manusiyaꞌ, saꞌ ga kahandak Tuhan.”
34Pag-anu, lay na baw linganan si Isa baanan ga jama ndooy ka ga mulit na pa mman na boꞌ na halling, “Soysoy doman mmeꞌ niyaku subay tikutan na kahandak na bong pin taduwan na jaꞌ kahandak ku. Subay atas na manangkit tehang halliꞌ man na nilansang, boꞌ na patuhut niyaku. Hati na, subay atas na lumingkaꞌ njawom jinisan katiksaan ka kabinsanaan kalnaꞌ aku san man na matoy, boꞌ na kapa-mmeꞌ niyaku. 35Soysoy ina yaꞌ mean kahandak na kalnaꞌ aku ka umanat mahap, mastiꞌ sampulnaꞌ jaꞌ nyawa na labba man junyaꞌ sampay pa ahirat. Sugaꞌ soysoy ina numbul satu niiya meꞌ na nulut dī na halloman na ntuu ni junyaꞌ, tiksaꞌ nyawa na saumu. 36Jama meꞌ naa ina, san gi sina lay na takoleꞌ na mimon altaꞌ njawom junyaꞌ tuu, yaꞌ du luu pūs na bong tiksaꞌ du nyawa na. 37San du ina dangoy pilak bay tapumpung na, yaꞌ du sina sukup man na ngalakkat nyawa na man jawom katiksaan.
38“Jama ni angkat-angkatan batnaa ina tinagi buwat dusa. Yaꞌ sila kanaalla pa Tuhan. Sugaꞌ indanan bi. Soysoy ina iyaꞌ mangaku mmeꞌ niyaku atawa pun iyaꞌ mōꞌ tōꞌ ku, malaingkan iyaꞌ du ku mangaku iya sukuꞌ ku pag beleng ku, yana Anak Manusiyaꞌ, ddas ka kabantugan Mmaꞌ ku ka siga malaikat man sulgaꞌ.”
91Yuk si Isa lagi, “Baan ta kam banahan, kasohean kam ma nangge ntuu, yaꞌ gi situ kam mintu bay matoy, ndang takita bi na katakka pamarinta Tuhan ddas ka kawasa na.”
Halin bantuk si Isa taꞌ punu
(Matiyu 17.1-13; Lukas 9.28-36)
2Na luu jaꞌ siꞌ nnom ngallaw bay pingkaꞌ, lay na baw boo si Isa ga si Pitel, si Yaꞌkub ka si Yahiya pa taꞌ punu langkaw, sila-sila jaꞌ. Lay jaꞌ siꞌ sila ndooy, halin na bantuk si Isa ni pag-awpan da. 3Pakayan na lay na ga papoteꞌ malaas na maka nahayaꞌ na. San gi pooy poteꞌ kakanaꞌ junyaꞌ tuu, basta lay gi kalabihan meꞌ poteꞌ pakayan na. 4Maka pag ndaꞌ ga mulit na, luu na tulun duwa jama mattoꞌ magbitsala ka si Isa, yana Nabi Eliyas maka Nabi Musa.
5Pag-anu, yuk si Pitel ni si Isa, “Tuwan Guru, kahapan la luu kami ntuu. Bong anu, buwatan kami doꞌ kam bawung-bawung tallu, disu ningkau, disu ni Nabi Musa, maka disu ni Nabi Eliyas.” 6Na ngkon si Pitel bay mitsala meꞌ looy sabap ni kaehe tawu na, yaꞌ na katoon-toonan na bong oy pataꞌ halling na ninsila.
7Mindangoy ko, luu na baw duwai tayiꞌ baliyu ngaliput sila. Maka luu gi suwara pōꞌ man jawom tayiꞌ baliyu looy, yuk na, “Inaa ina Anak ku, kakasi ku. Indanan bi bitsala na.”
8Pus meꞌ looy, sasang ga si Pitel magliling-liling, sarunduun du dangan-dangan si Isa sa takita da ndooy.
9Na pag lūd da man taꞌ punu looy, lay doꞌ sila inamay-amayan meꞌ si Isa, yuk na, “Daa kam māꞌ ni soy maka soy na pasal ilooy ma bay tasakup bi siꞌ. Noy mintu ku, yana Anak Manusiyaꞌ, bay na matoy sampay pinakallum pabalik boꞌ bi māꞌ.” 10Dari lay na du asip da bay tugun na. Sugaꞌ papiha-piha na pin baw sila bong oy hiyak bitsala na pinakallum ya pabalik.
11Pag-anu, tilaw da ni si Isa, “Ongoy lay la baꞌ-bāꞌ ga guru saraꞌ agama talpaksaꞌ doꞌ duhuꞌ Nabi Eliyas pōꞌ boꞌ takka Almasi?”
12-13Tampung si Isa ninsila, “Bana du baw bilay ninsila mastiꞌ duhuꞌ doꞌ Nabi Eliyas pōꞌ manyap labbasakayi boꞌ takka Almasi. Sugaꞌ baan ta kam banahan, luu na silay Nabi Eliyas(9.12-13) Si Yahiya ma Tukang Mandi inawnan meꞌ si Isa Nabi Eliyas. Ndaun Matiyu 11.13-14; 17.10-13. bay pōꞌ. Sugaꞌ meꞌ jama bay buwat iya, lay jaꞌ sila madara kahandak da makaat iya meꞌ ndang bay tinunaꞌ njawom kitab. Damikiyan Anak Manusiyaꞌ pun, yuk njawom kitab, subay du lumingkaꞌ njawom jinisan kabinsanaan sampay tinuwak.”
Si Isa ngulian anak-anak sineytan
(Matiyu 17.14-21; Lukas 9.37-43)
14Luu jaꞌ siꞌ takka ga si Isa pa diyoan, pag ndaꞌ da, sinual na siga mulit na ilooy siꞌ ma bay tamban meꞌ siga guru saraꞌ agama. Boꞌ meka na jama ngaliput sila. 15Luu jaꞌ siꞌ si Isa takita meꞌ baanan jama looy, takurat sila sampay magti du sila sonse nampang iya.
16Tilaw si Isa ninsila, “Oy tu la pagjawapan bi?”
17Na yaꞌ gi siꞌ bay tatampungan da si Isa, yuk disu lalla ni baanan looy, “Tuwan Guru, luu situ siꞌ la anak ku umaw meꞌ seytan bay boo ku pitu. Bong siꞌ dari, junjung ku na ningkau, ulian doꞌ ya. 18Bila patakka na seytan na, sarunduun ya humantak sambayan na magkuweregan. Maka ngalappuꞌ na ga behe na sambayan na magkattop sampay ngatto na ga baran na. Dari lay na situ ku siꞌ maku tulung ni siga mulit nu nohoꞌ malakka seytan na, sugaꞌ yaꞌ du bay takoleꞌ da.”
19Yuk si Isa, “Uy la, angkat-angkatan batnaa tud kulang bitu pangando da pa Tuhan! Meꞌ noy na pin doꞌ tu hallom ku dambuwaꞌ ka kaam natasan arat bi boꞌ bi pitsayaꞌ?” Pag-anu, yuk na ni lalla looy siꞌ, “Bōn na pitu anak nu.”
20Pag-anu siꞌ, lay na boo da anak-anak looy pa mman si Isa. Pag takita si Isa meꞌ seytan njawom baran anak-anak looy, sarunduun du anak-anak looy magkuweregan sampay humantak, boꞌ na magligiran sampay ngalappuꞌ na ga behe na.
21Tilaw si Isa ni mmaꞌ na, “Meꞌ noy na tu hallom anak nu meꞌ tuu?”
Tampung na, “Man kadikiꞌ na gi sina Tuwan. 22Boꞌ daran gi ya pinatimbag meꞌ seytan na pa jawom api atawa pa jawom boheꞌ tandaꞌ seytan na doman mapatoy iya. Sugaꞌ bong siꞌ luu tarapat nu, panimbangan doꞌ kami. Tulungun doꞌ kami.”
23Yuk si Isa niiya, “Ongoy lay yuk nu, ‘bong siꞌ’ lagi? Yaꞌ bina luu tunmanūn basta ko pitsayaꞌ jaꞌ niyaku.”
24Pag tampung mmaꞌ anak-anak looy, “Pitsayaꞌ ku Tuwan! Sugaꞌ tabangun doꞌ ku supaya yaꞌ na ku duwa-duwa pitsayaꞌ.”
25Pag takita si Isa magsasōng na pin eka jama bahuklud pasōng pa mman na, padpad masi haluhaya, yuk na ni seytan looy njawom baran anak-anak looy, “Seytan, kau ma tukang maumawan jama, pōꞌ na ko! Maka daa na ko paasok pa jawom anak-anak naa bbalik!”
26Pag-anu, magti du killahap seytan looy sampay magkuweregan na anak-anak looy meꞌ na, boꞌ na pōꞌ. Dari siꞌ meꞌ hantang mayat na anak-anak looy sampay meka na ga bay kapahalling, “Lay na bitu matoy anak-anak naa.” 27Sugaꞌ lay na pin hinelaꞌ meꞌ si Isa tangan na sampay lay na du ya nangge.
28Paddus meꞌ looy, lay na ga si Isa moleꞌ. Pag taabut sila-sila sa njawom lumaꞌ, tilaw ga mulit na niiya, “Ongoy lay la yaꞌ siꞌ bay tapōꞌ kami seytan anak-anak looy?”
29Tampung si Isa, “Siga seytan meꞌ looy ilay yaꞌ takoleꞌ pinōꞌ bong kam yaꞌ makutuꞌ meꞌ bi maku duwaa.”
Kaminduwa si Isa nunaꞌ kapatoy na
(Matiyu 17.22-23; Lukas 9.43-45)
30Lakka mandooy siꞌ, lay na baw ga si Isa pingkaꞌ man jawom Jalil. Sugaꞌ yaꞌ ya doman tasayu meꞌ jama bong noy man da 31batan doman gi ya noan ga mulit na sila-sila jaꞌ. Yuk na ninsila, “Yaꞌ na hallom, tinipu na situ ku, Anak Manusiyaꞌ, boꞌ pina-ntan ni saraꞌ sampay pinapatoy. Sugaꞌ pag taabut ni katallu ngallaw, llum du ku pabalik.” 32Kuwan ga mulit na siꞌ tu, yaꞌ gi bay tahati da maksud bitsala na. Sarī gi, yaꞌ sila nawakka nilaw iya.
Jama ma patingkat man mimon
(Matiyu 18.1-5; Lukas 9.46-48)
33Pag-anu siꞌ, takka na sila pa Kapelniyum. Lay jaꞌ siꞌ sila taꞌ lumaꞌ, tilaw si Isa ni ga mulit na, “Oy lay siꞌ la pagjawapan bi ni tangngaꞌ lān?” 34Sugaꞌ diyam-diyam jaꞌ sila, batan iyaꞌ sila māꞌ lay sila magjawap pasal soy sila patingkat ni baanan da.
35Pag-anu siꞌ, ningkōꞌ na si Isa boꞌ na nohoꞌ ga mulit na sikasapu-duwa pa bihing na. Halling na ninsila, “Soysoy kam doman patingkat, subay magpadiyoꞌ, buwat dī na tindog sikamimon.” 36Pag-anu siꞌ, lay na baw ya ngaddoꞌ disu anak-anak boꞌ inannaꞌ ni tangngaan da. Pag-anu siꞌ, kinakkopan meꞌ na sambayan na mitsala, yuk na, 37“Soysoy ngahasi jama diyoꞌ pangkat na meꞌ karuha anak-anak tuu kalnaꞌ aku, sibuꞌ du ya ka bay ngahasi aku. Boꞌ na, soysoy ina bay ngahasi aku, saꞌ sina sat aku bay hasi na. Ilooy pun ma bay mapitu aku, hasi na du.”
Soysoy yaꞌ nguntra si Isa tabilang nanggehan iya
38Pag-anu siꞌ, yuk si Yahiya ni si Isa, “Tuwan Guru, lay kami la ngita disu lalla malakka siga seytan makoy awon nu. Sugaꞌ lay bay saggong kami sabap yaꞌ ya tabeꞌ ni baanan tabi.”
39Yuk si Isa, “Ongoy subay na pin saggong bi jama meꞌ looy? Tiyap-tiyap ilay jama makoy awon ku man na mōꞌ pabuwatan kahaylan-haylan, malaingkan yaꞌ baw ilay ya malaat aku. 40Maka tiyap-tiyap ina jama yaꞌ nguntra kitabi, tabilang du sina nanggehan kitabi. 41Baan ta kam banahan, soysoy ina mainuman kaam san lasa mbuwaꞌ sawan boheꞌ sabap meꞌ bi kinatoonan sukuꞌ ku, basta tinungbasan jaꞌ sina ya leꞌ Tuhan.”
42Pag-anu siꞌ, yuk si Isa lagi, “Soysoy ina moo-moo disu anak-anak meꞌ ituu ma pitsayaꞌ niyaku pagsiꞌ, basta bahaya mehe silay mintu niiya. Gam na bay ginantungan kallong na ka batu mehe, boꞌ na llabuhan ni tangngaꞌ sallang.
43-44“Sangkon, bong dambilaꞌ tangan bi bay kaboo-boo ningkaam buwat dusa, kurungan bi na. Gam na dambilaꞌ sa tangan bi bong pin sampulnaꞌ jaꞌ nyawa bi saumu, man bi nnaa taisi pa jawom api nalkaꞌ ma yaꞌ tapawman ddas ka tangan bi sikaduwambilaꞌ. 45-46Damikiyan, bong dambilaꞌ battis bi bay kaboo-boo ningkaam buwat dusa, kurungan bi na. Gam na dambilaꞌ sa battis bi bong pin sampulnaꞌ jaꞌ nyawa bi saumu man bi nnaa tahiyakan pa jawom api nalkaꞌ ddas ka battis bi sikaduwambilaꞌ. 47Atawa pun, bong dambilaꞌ mata bi bay kaboo-boo ningkaam buwat dusa, kuwirian bi na. Gam na dambilaꞌ sa mata bi bong pin kam tabeꞌ jaꞌ ni pamarinta Tuhan, man bi nnaa tahiyakan pa jawom nalkaꞌ ddas ka mata bi sikaduwambilaꞌ. 48Ndooy ilay ni nalkaꞌ, yaꞌ luu katapusan kamalasahiyan batan siga uwot ma ngeket ndooy yaꞌ na kuhi matoy. Damikiyan, api ndooy yaꞌ na du kuhi pawom saumu.”
49Yuk si Isa lagi, “Mimon ina manusiyaꞌ tinimusan jaꞌ ka api. Hatiyan na, mimon manusiyaꞌ mastiꞌ lumingkaꞌ jaꞌ njawom jinisan kamalasahiyan ma nongkad hāp-laat njawom atay da.
50“Bong inawnan timus, ndang mahap. Sugaꞌ bong meꞌ sapantun lay na lungay maasin na, niyaꞌ na sina tapabalik. Yaꞌ na luu kapansahaliyan na samasakali. Sangkon kuwan kaam, daa palungayun bi kapansahaliyan bi ni pagkahi bi manusiyaꞌ. Maka ngulihal na pin kam meꞌ bi njawom kasalassayan ka sila.”
10Hāl jama sapeꞌ
1Na lakka mandooy, lay na baw ga si Isa pilay pa Yahudiya sampay pa dambilaꞌ Sōng Juldan. Ndooy siꞌ, meꞌ sibuwa du, sakiyan manusiyaꞌ lay bahuklud pilay pa mman na. Sampay lay du sila toan na meꞌ ndang tabiat na du.
2Kuwan siga Parisi, luu du bay pilay nual si Isa man da niit iya. Dari tilaw da, “Tuwan, bong ni saraꞌ agama tabi, dari kilay lalla napean nda na?”
3Yuk si Isa ninsila, “Na oy baw ilay bay panohoan Nabi Musa ni kabboꞌ-bboan tabi sampay na ningkaam?”
4Tampung da, “Bāꞌ Nabi Musa dari lalla napean nda na basta bay jaꞌ ya buwat suwat pasa.”
5Yuk si Isa ninsila, “Nabi Musa bilay bay nuwat panohoan looy sabap landuꞌ tohas kōk kabboꞌ-bboan tabi sampay na kaam. Saliꞌ-saliꞌ du kam yaꞌ doman mmeꞌ ni kahandak Tuhan. 6Sugaꞌ bong siꞌ bay intom bi, jaman Tuhan mapayak mimon-mimon, meꞌ na bay mapayak manusiyaꞌ disu lalla ka disu danda supaya sila sitampu. 7Sangkon meꞌ halling sambat njawom kitab, ‘Subay lalla pasakkat man induꞌ-mmaꞌ na, boꞌ na nibuuk dī na ka nda na. 8Dari bay duwa gi sila, lay na dari disu baran sa.’ 9Sangkon, ma lay na tinibuuk meꞌ Tuhan, daa na sinalay meꞌ manusiyaꞌ.”
10Na pag takka ga si Isa pa lumaꞌ, lay na baw ya tinilaw balik meꞌ ga mulit na hāl meꞌ sapeꞌ. 11Dari yuk na ninsila, “Soysoy napean nda na boꞌ na handa na baw pa sarī, saliꞌ du ya ka magjina. 12Damikiyan, bong luu danda napean lla na boꞌ na halla na baw pa sarī, jina du ya.”
Si Isa nupaatan ga anak-anak
(Matiyu 19.13-15; Lukas 18.15-17)
13Pag-anu siꞌ, luu na baw ndooy kasohean moo siga anak da pa mman si Isa nohoꞌ tinappak niiya bumbunan da sinupaatan. Sugaꞌ kuwan ga mulit na baw siꞌ tu, bbuwatan da naggong ga jama looy.
14Pag ndaꞌ si Isa meꞌ looy, lasu ya ni siga mulit na. Dari yuk na ninsila, “Pabiyahun bi na ba pitu siga anak-anak naa pa mman ku. Daa na saggongun bi, batan pamarinta Tuhan ina ndang para ni jama diyoꞌ pangatayan meꞌ karuha ga anak-anak naa. 15Baan ta kam banahan, bong ina pangando jama pa Tuhan saꞌ meꞌ karuha pangando anak-anak ni induꞌ-mmaꞌ na, malaingkan yaꞌ ya kapatabeꞌ ni pamarinta Tuhan.” 16Pag-anu siꞌ, lay na kinakkopan meꞌ si Isa ga anak-anak looy boꞌ tinappak bumbunan da sinupaatan.
Awod jama dayahan koleꞌ kasampulnaan nyawa ma yaꞌ luu katapusan na
(Matiyu 19.16-30; Lukas 18.18-30)
17Na saddong ga si Isa siꞌ dak lumān, luu na baw disu lalla sonse pa mman na boꞌ na nangge ka tuut na ni awpan na. Yuk na, “Tuwan Guru, meꞌ kau jama mahap, oy tu la subay pabuwat ku mari sampulnaꞌ nyawa ku saumu-umu?”
18Yuk si Isa, “Oy na maksud nu ngawnan aku mahap? Yaꞌ luu mahap sarī man Tuhan. 19Boꞌ pasal tilaw nu ilay siꞌ, katoonan nu du bina siga panohoan Tuhan, ilooy ma yuk na, ‘Daa ko mapatoy jama, daa ko magjina, daa ko nangkaw, daa ko naksiꞌ bong yaꞌ bana, daa ko ngalupig, maka pag-aratan nu nneꞌ nu ka mmaꞌ nu.’ ”
20Pag halling lalla looy, “Tuwan Guru, man kaanak-anak ku gi bilay, ndang lay na bogbogan ku panohoan looy siꞌ sikamimon.”
21Na hangat si Isa ngandaꞌ lalla looy, ni kaehe aseꞌ na niiya, yuk na, “Sugaꞌ luu gi sina disu subay pabuwat nu mari yaꞌ na luu kulang nu. Moleꞌ na ko. Paballihan nu na altaꞌ nu boꞌ pagdeanun na jama miskin ballihan na. Bong siꞌ ina ko buwat meꞌ naa, luu na ladjikiꞌ nu mehe ni sulgaꞌ. Pag-lupus, boꞌ nu pabeleng pitu mmeꞌ niyaku.”
22Pag takale meꞌ lalla looy panohoan si Isa, lay halin parasahan na batan sēng ya ni altaꞌ na yaꞌ taambat. Dari lay na jaꞌ ya lakka ni kasusa na.
23Pag-anu siꞌ, ilooy ma tineleꞌ meꞌ si Isa siga mulit na sambayan na halling ninsila, “Awod la jama dayahan tumabeꞌ ni pamarinta Tuhan.”
24Kuwan ga mulit na baw siꞌ tu, tud bay jayip(10.24) Kanna ga mulit si Isa kon jama dayahan altaan sabap kasulutan Tuhan ninsila. ni bay bitsala na. Dari siꞌ nduhunan lagi meꞌ si Isa bitsala na ninsila, yuk na, “Siga anak ku, kaawran sina manusiyaꞌ lillaꞌ ni pamarinta Tuhan, 25labi na bong sila dayahan. Kamurahan gi sina untaꞌ papassūt ni lowang panahiꞌ man jama dayahan paasok pa jawom pamarinta Tuhan.”
26Siga mulit na siꞌ tu magdaruhun na meꞌ da jayip sampay kapanilaw na ga, yuk da, “Bong meꞌ naa, soy sa baw ilay kapaasok mari ya salamat?”
27Pag-anu siꞌ, ilooy ma lay si Isa ngandaꞌ ninsila sambayan na halling, “Ndang tunmanūn sina meꞌ manusiyaꞌ nalamat dī da, sugaꞌ tasalamat sila meꞌ Tuhan, batan yaꞌ luu tunmanūn niiya.”
28Pag-anu, yuk si Pitel, “Na meꞌ kami tu lay na ngambanan mimon-mimon supaya kami kapa-mmeꞌ ningkau, pooy baw tu la?”
29Yuk si Isa na baw, “Baan ta kam banahan, soysoy ina bay ngambanan lumaꞌ na, ga danganakan na, ga induꞌ-mmaꞌ na, ga anak na atawa tanaꞌ na sabap meꞌ na mmeꞌ niyaku ka masampay umanat mahap, 30malaingkan lipat min dahatus gi sina tungbas Tuhan ni jataꞌ na. Sasang na masi gi ntuu ni junyaꞌ, ndang binuwanan na sina ya siga lumaꞌ, siga danganakan, siga induꞌ-mmaꞌ, ga anak sampay ga tanaꞌ. Boꞌ na, pag mintu takka pa ahirat, koleꞌ gi sina ya kasampulnaan nyawa ma yaꞌ luu katapusan na. Sugaꞌ halloman na ntuu ni junyaꞌ, mastiꞌ lumangga doꞌ sina ya njawom laug sabapan pangando na niyaku. 31Indanan bi. Meka sina jama ma ni duhuan batnaa, pag taabut mintu ni ahirat, lay na sila ni dambulihan. Damikiyan, meka du sina jama ma ni dambulihan batnaa, pag ndooy mintu, lay na ni duhuan.”
Kamintallu na si Isa nunaꞌ kapatoy na
(Matiyu 20.17-19; Lukas 18.31-34)
32Na luu jaꞌ siꞌ daka dangoy ngallaw, palanja na ga si Isa ka ga mulit na song pilay pa Jerusalem. Sila siꞌ tu lumān, si Isa lay ni duhuan. Kuwan siga mulit na baw siꞌ tu, maglamud na hanggaw maka jayip ni kabahani si Isa patiluꞌ pa Jerusalem. Katoonan da du, ni katakka da, meka jama nulang iya ndooy. Jama pun, ilooy ma patuhut ninsila, hanggaw na du.
Pag-anu siꞌ, lay na baw llinganan meꞌ si Isa ga mulit na sikasapu-duwa pa bihing na, boꞌ na mahati sila pabalik bong oy katuwaꞌ niiya ni sinōng, 33yuk na, “Pakale kam. Kitabi itu patukad na pa Jerusalem. Ndooy ilay mintu, pina-ntan na ku, Anak Manusiyaꞌ, ni siga imam langkaw ka ga guru saraꞌ agama, boꞌ ku binotangan hukuman kapatoy. Pag-anu, boꞌ ku pina-ntan na baw ni bangsa Rom 34binuwat kalabbiyan, lluraan, llagpiꞌ, sampay pinapatoy. Sugaꞌ pag ina mintu taabut ni katallu ngallaw, pinakallum du sina ku pabalik.”
Paku si Yaꞌkub ka si Yahiya
35Pag-anu siꞌ, pasōng na baw si Yaꞌkub ka si Yahiya, ga anak si Sibidi, pa mman si Isa, boꞌ da halling, “Tuwan Guru, luu bitu siꞌ paku kami ningkau. Bong siꞌ ko kuhi, duwanun doꞌ kami.”
36Yuk si Isa ninsila, “Oy siꞌ tu paku bi?”
37Yuk da, “Kainagon kami Tuwan, pag taabut nu mintu magsultan ni mimon-mimon, bong siꞌ kadarihan ningkau, patingkoun na kami ni bihing nu, disu ni kawnan nu, disu ni kayli nu.”
38Pag halling si Isa, “Yaꞌ san bitu tasayu bi bong oy paku bi. Tatatas bi kina kabinsanaan maka kapatoy meꞌ ilooy mintu ma song lingkaan ku?”
39Yuk ga si Yaꞌkub ka si Yahiya, “Takaya, Tuwan.”
Yuk si Isa, “Bana sina, takissa bi du mintu katiksaan ka kabinsanaan meꞌ karuha ilooy ma sinōng meꞌ ku. 40Sugaꞌ bong baw hāl meꞌ meneꞌ bong soy ningkōꞌ ni kawnan ku ka kayli ku marinta, saꞌ inaa sukuꞌ ku. Ndang lay na silay ginantaꞌ meꞌ Mmaꞌ ku bong soy pinatingkōꞌ ndooy.”
41Pag takale jaꞌ siꞌ tu meꞌ siga pagkahi da mulit, ilooy siꞌ ma sapū, bay puhung si Yaꞌkub ka si Yahiya, tud bay lasu sila. 42Dari lay sila llinganan meꞌ si Isa pa bihing na sikamimon, boꞌ da binaan, yuk na, “Daa kam ba ngakig tabiat siga pa-mmean ni junyaꞌ ma yaꞌ ngisbat Tuhan. Sila ina, meꞌ da buwat raayat da subay ga ata da. Boꞌ na, labi na sagannap ma pinakalangkaw ntan da, mangkin na maat meꞌ da buwat raayat da. 43Sugaꞌ ningkaam, yaꞌ dari meꞌ looy. Arapun soysoy kam doman patingkat, subay buwat dī na tindog pagkahi na. 44Dan jinis meꞌ halling, soysoy kam doman pinaehe banahan, subay buwat dī na ata sikamimon. 45Minsan aku, yana Anak Manusiyaꞌ, yaꞌ du ga kon ku bay pitu muhung inintu. Arapun aku tu bay pitu ngintu manusiyaꞌ sampay nongan umu ku mari meka na jama pinaddusan man hukuman ni dusa da.”
Si Isa ngulian jama buta
(Matiyu 20.29-34; Lukas 18.35-43)
46Pag-anu siꞌ, takka na baw si Isa ka ga mulit na pa Jeriko. Lān da siꞌ pōꞌ man daira looy, meka na baw jama patuhut. Maka luu gi disu lalla buta ningkōꞌ ni bihing lān maku saraka. Awon na siꞌ si Baltimeyus, anak si Timeyus. 47Tasayu na jaꞌ siꞌ luu na pingkaꞌ si Isa, lalla looy man Nasaret, magti hinowapan meꞌ na, yuk na, “Ū Isa, panubuꞌ Sultan Daud,(10.47) Sultan Daud itu yana Nabi Daud. Tuktuk jama nganggalla si Isa panubuꞌ Sultan Daud, sat da sāꞌ māꞌ pitsayaꞌ sila iya Almasi ma bay tinunaꞌ meꞌ kanabi-nabihan. Njawom tunaꞌ da, luu konoꞌ mintu disu panubuꞌ Sultan Daud sinohoꞌ meꞌ Tuhan nalamat sukuꞌ na sampay magbayaꞌ ni mimon-mimon saumu. panimbangan doꞌ ku!”
48Sugaꞌ meka ni baanan looy bay naggong iya, yaꞌ nohoꞌ hibuk. Sugaꞌ gam pin pinabasag gi meꞌ na ngahowap, yuk na, “Ndūꞌ ba, panubuꞌ Sultan Daud, panimbangan doꞌ ku!”
49Pag-anu siꞌ, ilooy ma lay na patagong si Isa boꞌ na halling, “Sōn bi na ba ya pitu.”
Dari lay na binaan meꞌ da lalla looy siꞌ ma buta, yuk da, “Daa na ko susa. Nangge na ko. Alay na ko sohoꞌ na pilay pa mman na.”
50Pag-anu, magti urusan na siob na sambayan na nangge deꞌ-dēꞌ boꞌ na pilay pa mman si Isa.
51Yuk si Isa siꞌ tu niiya, “Luu kina karomanan nu pabuwat ku ningkau?”
Pag halling lalla looy, “Tuwan Guru, doman na ku la ngita.”
52Yuk si Isa niiya, “San ko ba moleꞌ na. Kaulian na ko sina sabapan pangando nu.” Dari siꞌ, sarunduun du ya ngita sampay lay na ya patuhut ni si Isa.
11Si Isa pinudji pag takka na pa Jerusalem
(Matiyu 21.1-11; Lukas 19.28-40; Yahiya 12.12-19)
1Na tapit jaꞌ siꞌ ga si Isa pa Jerusalem, takita da na ga kawum Betpaji ka Betani ni bihing Punu Jaytun. Pag-anu, lay si Isa maduhuꞌ mulit na duwa, 2yuk na, “Pilay doꞌ kam pa kawum looy ni duhuan. Ndooy mintu ngita sina kam kuraꞌ baddung iningkotan, yaꞌ gi bay pingkaꞌ binakuraan. Lakkahan bi ingkot na boꞌ boonun bi pitu. 3Bong luu nilaw kaam bong ongoy kam buwat meꞌ naa, yuk bi, ‘Gunahan bitu ni Papuꞌ. Yaꞌ du konoꞌ hallom tinuhiyan sa.’ ”
4Dari lai na sila lumān. Takka ni kawum looy, takita da na luu banahan ndooy kuraꞌ baddung bay iningkotan tapit pa lawang lumaꞌ ni bihing lān. Maka sasang da ngalakkahan ingkot na, 5luu du ndooy siga jama nangge-nangge. Pag tilaw da, “Batōy bi na llakkahan ingkot kuraꞌ naa?”
6Pag tampung da, lay jaꞌ asip da meꞌ bay tugun si Isa ninsila, sampay lay na sila pinadari moo kuraꞌ looy. 7Takka jaꞌ siꞌ sila pa mman si Isa, lay na ampihan da kuraꞌ looy ka sammek da, boꞌ lay na bakuraꞌ si Isa.
8Na sasang si Isa pasōng taꞌ kuraꞌ looy pa Jerusalem, meka na jama ni duhuan natag pakayan da ni lān man maehe iya. Kuwan kasohean, lay nappeꞌ engas katumbu-tumbuhan ndooy boꞌ lay du tinatag ni lān. 9Manusiyaꞌ siꞌ tu ni duhuan na sampay ilooy ni dambulihan na, labbasakayi maghowapan, gakan iya, yuk da,
“Pudji tabi Tuhan!(11.9) Ni pallun Yahudi meꞌ da ngahowap, “Hosanna!” Hatiyan na, “Pudji tabi Tuhan!” Sinupaatan jama naa ma pitu ni kawasa-kapatut Papuꞌ tabi Tuhan!
10Sinupaatan pamarinta jama naa ma pagantiꞌ ni pagkasultan bboꞌ tabi Sultan Daud! Pudji tabi Tuhan ni sulgaꞌ!”
11Takka jaꞌ siꞌ si Isa ni Jerusalem, lay ya patiluꞌ pa langga mehe. Pus na ngandaꞌ-ngandaꞌ mimon ndooy, lay na ya lakka sabap kohap na lahat. Pag-anu, lay ya pabeleng pa Betani ka ga mulit na sikasapu-duwa.
Si Isa numpaan poon kayu igira
12Pag meꞌ sumawung, lān ga si Isa pabeleng pa Jerusalem lakka man Betani, lingantu na ya. 13Pag-anu, ngita ya man katāhan poon igira labung dawun na. Dari lay ya pilay miha buwaꞌ na. Takka pilay, yaꞌ luu bay tatammu na sarī man dawun batan ndang saꞌ ilooy timpu igira buwaꞌ. 14Pag-anu, yuk na ni kayu looy, “Labba man batnaa yaꞌ na situ ko buwaꞌ pabalik.” Boꞌ lay gi takale ga mulit na bay halling na meꞌ looy.
Si Isa malakka siga padadagang man langga mehe
(Matiyu 21.12-17; Lukas 19.45-48; Yahiya 2.13-22)
15Takka jaꞌ siꞌ ga si Isa pa Jerusalem, lay na ya paasok pa haman langga mehe. Ndooy siꞌ, ngita na ya siga tukang dagang ka jama malli. Dari tud bay lasu ya, sampay lay na ga bulikad na ga lamisahan siga tukang nambian sīn. Maka lay gi bulikad na ga paningkoan siga jama dagang atsang man ngulban sambayan na malakka sila. 16Damikiyan, lay du pinara meꞌ na sagannap ma moo barang mari yaꞌ na patabbaꞌ pa jawom haman langga looy.
17Maka yuk na ninsila, “Luu bilay palman njawom kitab, ilooy ma yuk Tuhan,
‘Lumaꞌ ku ina yana lugar halliꞌ man mimon kabangsa-bangsahan maku duwaa.’
Sugaꞌ kaam baw tu, lay na pabuwat bi subay ga lumaꞌ baanan sugaru!”(11.17) Kitab Nabi Isaya 56.7 ka Kitab Nabi Jeremaya 7.11.
18Lay jaꞌ takale meꞌ siga imam langkaw ka ga guru saraꞌ agama bay bitsala si Isa siꞌ, tud bay dugahan sila. Dari miha na ga sila jalan man da mapatoy iya. Sugaꞌ hanggaw sila taggahaꞌ sinaggaꞌ na baw sila meꞌ baanan jama ndooy ma hangaꞌ na ni tōꞌ na.
Pamintangan takoleꞌ njataꞌ poon kayu igira
19Na pag taabut sangom, lay na ga si Isa palakka man daira. 20Pag meꞌ sumawung subu, lān ga si Isa bbeleng pabalik pa Jerusalem, lay sila pingkaꞌ man poon igira looy balik. Pag ndaꞌ da, matoy na kayu looy sampay layu na ga dawun na labbasakayi. 21Pag-anu, taintom na meꞌ si Pitel bay halling si Isa numpaꞌ. Dari yuk na, “Tuwan Guru, ndaun doꞌ ba poon igira ma bay sumpaan nu! Layu na ga!”
22Yuk si Isa ninsila, “Ndang sina. Pitsayaꞌ jaꞌ kam pa Tuhan. 23Baan ta kam banahan, minsan gi ina punu naa, bong yuk bi, ‘Pungkad ko, boꞌ nu ngahiyakan dī nu pa dilawut,’ mastiꞌ ngasip jaꞌ sina bong kam yaꞌ duwa-duwa pitsayaꞌ nduwan meꞌ Tuhan paku bi. 24Sangkon ituu jaꞌ meꞌ ku ka kaam: Bila kam maku duwaa pa Tuhan, oy-oy paku bi, subay kam manganna lai na takoleꞌ bi. Bong siꞌ ilay meꞌ looy jaꞌ pangando bi, mastiꞌ nduwan jaꞌ sina kam. 25Sugaꞌ bila kam maku duwaa, subay kam duhuꞌ ngampun soysoy dusahan ningkaam supaya inampun na du kam meꞌ Mmaꞌ bi ni sulgaꞌ. 26Batan bong kam ina yaꞌ ngampun jama, malaingkan yaꞌ du kam inampun meꞌ Mmaꞌ bi ni sulgaꞌ.”
Tinilaw si Isa bong lakka man ninggai kapatut na
(Matiyu 21.23-27; Lukas 20.1-8)
27Na takka jaꞌ siꞌ sila ni Jerusalem, lay si Isa pilay pa langga mehe pabalik. Sasang na maglan-lān ni haman langga, luu pasōng pa mman na siga imam langkaw ka ga guru saraꞌ sampay ga matatoa ni agama. 28Tilaw da niiya, “Soy doꞌ ina bay muwanan kau kapatut, taggahaꞌ lay na ga ko pabasa-basa dilaw buwat kajinisan ni langga tuu?”
29Iya tampung si Isa, “Doꞌ kam bi. Tilaw ta doꞌ kam duhuꞌ. Bong tatampung bi tilaw ku, boꞌ bi baan ku bong soy bay muwanan aku kapatut buwat mimon meꞌ looy siꞌ. 30Ituu tilaw ku. Soy ilay bay muwanan si Yahiya kapatut na mandi jama? Tuhan kilay atawa manusiyaꞌ sadjaꞌ?”
31Sila baw siꞌ tu, lay doꞌ duhuꞌ isun bong oy pataꞌ tampung da. Yuk da padisu-padisu, “Yaꞌ bitu la luu jalan man tabi tumanjataꞌ. Bong itu tabi māꞌ lakka man Tuhan, yuk na na baw, ‘Bong meꞌ looy, ongoy baw kam yaꞌ bay pitsayaꞌ ni umanat na?’ 32Bong baw itu yuk tabi kapatut na bay lakka man manusiyaꞌ, piligru ningkitabi.” Na ngkon da mista meꞌ looy sabap tawu sila pinaglupung-lupungan meꞌ baanan manusiyaꞌ ndooy. Batan labbasakayi manganna si Yahiya disu nabi. 33Dari siꞌ, tampung da niiya, “Yaꞌ la katoonan kami.”
Pag halling si Isa ninsila, “Bong meꞌ naa, yaꞌ du kam baan ku bong soy bay muwanan aku kapatut.”
12Dalil pasal siga panungguꞌ ma yaꞌ tapangandohan
(Matiyu 21.33-46; Lukas 20.9-19)
1Pag-anu, lay na baw si Isa ngandalil, yuk na, “Luu disu jama bay ngabbun anggul. Pag lupus, lay pinaga, boꞌ na lay buwat tapaggaꞌ buwaꞌ anggul man maggaan boheꞌ na. Maka lay gi ya buwat lumaꞌ-lumaꞌ langkaw man nganjaga. Pag-anu, boꞌ lay sohoꞌ na tinungguan ni jama boꞌ na lay lome pa lahat disu. 2Pag taabut kakattuan buwaꞌ anggul looy, lay ya nohoꞌ disu ata na pilay pa mman ga panungguꞌ kabbun na ngaddoꞌ bahagiꞌ na. 3Sugaꞌ bbuwatan siga panungguꞌ looy, lay ngahelaꞌ-helaꞌ ata na boꞌ na llagpiꞌ. Pag lupus, boꞌ na sinohoꞌ moleꞌ limboy-limboy tangan jaꞌ.
4“Pag-anu, lay na baw dapu kabbun looy nohoꞌ balik disu ata na sarī pilay. Sugaꞌ damikiyan, yaꞌ du bay luu takoleꞌ na. Gam pin lay gi kinaka meꞌ da man kōk boꞌ lay gi pinakiyaꞌ-kiyaꞌ.
5“Pag-anu siꞌ, lay gi ya nohoꞌ disu ata sarī, sugaꞌ lay na baw papatoy da. Sarī man ga ilooy siꞌ, meka gi du bay sohoꞌ na. Damikiyan, meꞌ looy du siꞌ, kasohean pinawu-pawu meꞌ da, kuwan kasohean, lay papatoy da.
6“Katapusan, disu sa takapin tasohoꞌ na, yana anak na na mismu, kakasi na. Honaꞌ-honaꞌ na, ‘Bong itu anak ku na mismu sohoꞌ ku, mastiꞌ magmaltabat na sila niiya.’ 7Sugaꞌ pag takita leꞌ ga panungguꞌ kabbun looy, yuk da padisu-padisu, ‘Inaa na sina lalla kapusakahan kabbun tuu. Tu kam, papatoy tabi na mari kapakitabi na kabbun tuu.’ 8Dari lay du ya bay sinungkuban, boꞌ na papatoy da. Sampay lay gi hiyakan da mayat na pa poan kabbun looy.
9“Na,” tilaw si Isa, “bong kaam, binatōy ilay mintu sila meꞌ ilooy ma dapu kabbun? Saꞌ ba, mastiꞌ pilay jaꞌ ya pa mman siga panungguꞌ looy, boꞌ na mapatoy sila? Pag-lupus, boꞌ pina-ntan meꞌ na kabbun na man siga panungguꞌ sarī.”
10Yuk si Isa lagi, “Kahalan anak dapu kabbun looy ilay siꞌ magtuntun du ka suwat njawom kitab ma pinagbatsa meꞌ bi, ilooy ma yuk na,
‘Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon.
11Ilooy ilay siꞌ man gantaan Tuhan, boꞌ tud kainu-inu ningkitabi.’ ”(12.10) Kitab Jabul 118.22-23.
12Na kuwan ga pa-mmean Yahudi baw siꞌ tu ndooy, agon dak na nungkuban si Isa batan tabista da na sila na bay awnan na panungguꞌ ni bay dalil looy siꞌ. Sugaꞌ yaꞌ gi bay luu dapat da ngusik iya sabap hanggaw baw sila taggahaꞌ hiluhalaꞌ na baw baanan ga jama ndooy. Dari lay jaꞌ sila lakka.
Pataꞌ kina binayaran sukay parinta bangsa Rom atawa niyaꞌ?
(Matiyu 22.15-22; Lukas 20.20-26)
13Pag-anu siꞌ, lay na baw ga pa-mmean Yahudi looy nohoꞌ kasohean Parisi ka ga raayat Gubnul Herod pa mman si Isa nohoꞌ nallok-nallok iya ni bitsala na. 14Pag takka da, yuk da niiya, “Tuwan Guru, katoonan kami du situ kau jama bonto. Yaꞌ ko minig jama maka yaꞌ ko loman ni jama san gi pooy langkaw ntan da. Maka ilooy puntukan ningkau noan jama kabanahan pasal kahandak Tuhan. Pagka meꞌ naa Tuwan Guru, luu situ siꞌ la tilaw kami. Bong ningkau, sikatuwaꞌ kilay ni saraꞌ bangsa tabi mayaran sukay pa mman panghuluꞌ sultan bangsa Rom, atawa niyaꞌ?”(12.14) Maksud da nilaw, man da niit bitsala si Isa, batan bong yuk na, “San niyaꞌ na,” mura ya sinumbung pa saraꞌ sampay sinungkuban sabap meꞌ na bay naggaꞌ parinta Rom. Na bong hati yuk na subay sila mayad, kinagigitan na baw ya meꞌ mimon Yahudi ndooy pagka ndang dugahan sila ni bangsa Rom bay ngagaw lahat da.
15Na si Isa baw siꞌ tu, tasayu na du maksud da. Dari yuk na, “Kaam tu, magbawuꞌ-bawuꞌ jaꞌ bina kam hilas nilaw. Ongoy kam nallok-nallok aku? Boonan bi teꞌ ku pitu disu pilak mari ta-ndaꞌ ku.” 16Luu jaꞌ siꞌ, yuk na, “Limbagan soy tu ni sīn tuu ddas ka awon na?”
Tampung da siꞌ, “Sultan Sisal, panghuluꞌ sultan bangsa Rom.”
17Dari yuk si Isa ninsila, “Pagka meꞌ naa, oy-oy sukuꞌ Sultan Sisal, deanun bi iya. Damikiyan, oy-oy sukuꞌ Tuhan, deanun bi du Tuhan.”(12.17) Inawnan sukuꞌ Sultan Sisal ina, yana sīn sabap inaa puhung na njataꞌ siga raayat na. Boꞌ inawnan sukuꞌ Tuhan, yana aseꞌ sabap inaa puhung na njataꞌ manusiyaꞌ.
Pag takale da bitsala na, tud bay haylan sila ni tampung na.
Sinual si Isa pasal jama pinakallum
(Matiyu 22.23-33; Lukas 20.27-40)
18Pag-anu, luu na baw pasōng pa mman si Isa baanan paki ni palhimpunan inawnan Saddusi. Na mimon Saddusi manganna bong jama lay na matoy, yaꞌ na luu masa da pinakallum bbos-bbos. Dari yuk da, 19“Tuwan Guru, njawom suwat Nabi Musa, bong luu lalla ndahan, boꞌ lay na matoy yaꞌ gi bay anakan, talpaksaꞌ konoꞌ pinūt bawu na meꞌ danganakan na. Kon meꞌ looy supaya tabangunan na awon danganakan na bong sila bay hanak. 20Na ntuu konoꞌ, bay luu pituꞌ lalla magdanganakan. Pag-anu siꞌ, kuwan ma siyaka, lay duhuꞌ ndahan, sugaꞌ yaꞌ gi san sila anakan, lay na ya matoy. 21Dari lay na baw pinūt bay nda na meꞌ danganakan na ma pasunuꞌ niiya. Sugaꞌ yaꞌ gi siꞌ sila bay anakan, lai na du matoy lla na. Damikiyan, ni katallu na 22ngabut sampay ilooy ni kapituꞌ na sibuꞌ du karuha da. Yaꞌ gi du san bay hanak sampay lay na jaꞌ matoy sikamimon. Song hallom, sampay danda looy lay na du bay matoy. 23Na bong mattan luu gi masa jama matoy pinakallum bbos-bbos, pagka sila sikapituꞌ bay pingkaꞌ sitampu ka danda looy, mamooy na lay mintu lla na?”
24Dari yuk si Isa ninsila, “Tud magsāꞌ kam la. Yaꞌ san bina tahati bi suwat jawom kitab hāl meꞌ looy siꞌ. Maka yaꞌ du katoonan bi kawasa Tuhan. 25Pag ilay mintu taabut masa jama matoy pinakallum, yaꞌ na sila halla atawa handa. Sibuꞌ na du karuha da ka siga malaikat ni sulgaꞌ. 26Na buktiꞌ man tabi mindoga jama matoy pinakallum lagi, mamintang jaꞌ kam ni ilooy ma bay tabatsa bi njawom suwat Nabi Musa. Saꞌ ba, lay ya kale suwara Tuhan pōꞌ man poon kayu-kayu noleyab na meꞌ api? Yuk Tuhan niiya,
‘Aku na situ Tuhan ma sinumba meꞌ ga Nabi Ibrahim, Nabi Isahak ka Nabi Yaꞌkub.’(12.26) Kitab Tawrat, Kalakka 3.6.
27“Na mandooy siꞌ tumatandaꞌ na luu gi masa jama matoy pinakallum. Batan jaman Tuhan ilay bay magpalman ni Nabi Musa, ndang hallom na banahan ga Nabi Ibrahim bay matoy. Sugaꞌ hantak bitsala njawom palman Tuhan, san sila bay matoy, llum na du batnaa. Batan yaꞌ sina luu jama matoy kasumba Tuhan. Ilooy du kasumba, sagannap ma llum. Inaa na tandaꞌ tud mattan du kam magsāꞌ.”
Panohoan numbul satu
(Matiyu 22.34-40; Lukas 10.25-28)
28Pag-anu siꞌ, luu na baw pasōng disu guru saraꞌ agama ma bay kale pagbitsalahan da. Pag ndaꞌ na tud hantap bay tampung si Isa ninsila, tilaw na ni si Isa, “Tuwan, bong kau, mamooy lay la panohoan patingkat man sikamimon?”
29Tampung si Isa niiya, “Panohoan patingkat man sikamimon, yuk na meꞌ tuu: ‘Kaam bangsa Israil, pakale kam. Tuhan ina, yana Papuꞌ tabi, disu du. 30Subay ya kaasean bi ni pupus hilas atay bi sampay pa bigi-bigi jantung bi. Maka mimon pamiki bi ka mimon hulas-sangsāꞌ bi subay magbēꞌ ka aseꞌ bi niiya.’ 31Panohoan puntukan ni kaduwa na meꞌ tuu: ‘Kaasean bi pagkahi bi manusiyaꞌ sibuꞌ du ka aseꞌ bi ni dī bi.’ Yaꞌ na sina luu panohoan Tuhan mas hagaan man ituu siꞌ sikaduwa.”
32Pag halling guru saraꞌ agama looy siꞌ, “Katuwaꞌ ko Tuwan Guru. Bana sina bitsala nu, disu du Tuhan, yaꞌ luu sarī. 33Maka bana du subay ya kaasean ta ni pupus hilas atay ta sampay pa bigi-bigi jantung ta. Maka mimon pamiki ta ka mimon hulas-sangsāꞌ ta subay magbēꞌ ka aseꞌ ta niiya. Maka subay kaasean ta pagkahi ta manusiyaꞌ sibuꞌ du ka aseꞌ ta ni dī ta. Siga panohoan tuu itu siꞌ mas hagaan pa Tuhan man mimon kulban ka jakat sinongan pa mman na.”
34Na pag ndaꞌ si Isa mahap tampung guru looy, yuk na niiya, “Tapit na sina ko tumabeꞌ ni pamarinta Tuhan.” Pus meꞌ looy, yaꞌ na luu bay nawakka nual si Isa pabalik.
Papuꞌ Sultan Daud yana panubuꞌ na
(Matiyu 22.41-46; Lukas 20.41-44)
35Na sasang si Isa masi ndooy nōꞌ ni langga mehe, yuk na, “Pamāꞌ siga guru saraꞌ agama Almasi yana disu panubuꞌ Sultan Daud. Boꞌ bana du. 36Sugaꞌ sasang Sultan Daud ssob meꞌ Rū Sutsiꞌ mattoꞌ, bay ya ngawnan panubuꞌ na Papuꞌ na. Batan saꞌ ba, yuk Sultan Daud njawom kitab,
‘Yuk Tuhan ni Papuꞌ ku: Ningkōꞌ ko ni bihing ku huwin pa kawnan, boꞌ nnaꞌ ku mimon banta nu ni diyoꞌ pāt battis nu.’(12.36) Kitab Jabul 110.1.
37“Na bong lay awnan Sultan Daud Almasi yana Papuꞌ na, baan bi teꞌ ku bong pooy meꞌ Almasi dari Papuꞌ Sultan Daud magsabtan ka iya panubuꞌ na? Pamikihan bi teꞌ.”
Na kuwan baanan manusiyaꞌ baw siꞌ tu ndooy, tud bay tinagi pakale ni tōꞌ si Isa.
Bandingan si Isa pasal siga guru saraꞌ agama
(Matiyu 23.1-36; Lukas 20.45-47)
38Pag sunuꞌ tōꞌ si Isa, yuk na, “Iyakin kam taggahaꞌ lay na baw kam mintu kalakkotan meꞌ tabiat siga guru saraꞌ agama. Sila ina bong lumān, tigiꞌ sila magparorog ka juba ayad. Kainagon da subay sila inalak ni mayran. 39Bong ni jawom langga, kainagon da subay sila ni lugar patingkat ni duhuan. Luu-luu paballangan, kainagon da subay sila pinaehe nohoꞌ ningkōꞌ ni paningkoan numbul satu. 40Ni kabasag napsu da, nawakka sila ngalupig siga bawu danda supaya takoleꞌ da mimon altaꞌ da. Boꞌ patahaꞌ da lagi duwaa da ni mayran mari jama manganna tud basag sila ngisbat Tuhan. Ga jama meꞌ sila ilay, tud bohat sina mintu hukuman Tuhan njataꞌ da.”
Saraka bawu danda
41Pag-anu siꞌ, lay na baw si Isa ningkōꞌ ni tagan pangannaan santiliꞌ ndooy ni langga mehe. Na sasang na siꞌ maimanan baanan manusiyaꞌ ngalabuꞌ santiliꞌ da, takita na na meka jama dayahan, mehe-mehe jaꞌ pilak bay labuꞌ da. 42Yaꞌ hallom, luu bay pasōng disu bawu danda miskin ngalabuꞌ duwa sīn du.
43Pag-anu, lay linganan si Isa ga mulit na pa bihing na, boꞌ na halling, “Baan ta kam banahan, san ilay siꞌ ga jama looy bay ngalabuꞌ sīn paeka, bong baw pa Tuhan, kalabihan gi sila meꞌ bawu danda naa ma miskin. 44Batan sila ilay ma bay muwan paeka, yaꞌ san takissa da batan bohoꞌ silay labi-labi sīn da. Boꞌ ni bawu naa ina, san ya miskin, lay na katis pamuwan na mimon sīn na halliꞌ man na magbalanjaꞌ.”
13Langga mehe ni Jerusalem tinunaꞌ lluntu
1Na pag pōꞌ ga si Isa man langga mehe, yuk disu mulit na, “Tuwan Guru, ndaun doꞌ ba ehe siga batu man bay buwat langga naa ka ga lumaꞌ ni bihing na! Tud kainu-inu na lingkat da!”
2Pag halling si Isa, “Ohoꞌ, pakaruwan na kam ngandaꞌ batan luu sina waktu ni sinōng lluntu na labbasakayi. Yaꞌ na sina mintu luu takapin nangge san lasa duwa batu magpangkat.”
Si Isa nunaꞌ kahalan ni sinōng
(Matiyu 24.3-14; Lukas 21.7-19)
3Pag-anu siꞌ, lay na baw patukad ga si Isa pa taꞌ Punu Jaytun boꞌ da ningkōꞌ paawop pa langga mehe ni dambilaꞌ labbak. Pag-anu siꞌ, lay pasōng ga si Pitel ka si Yaꞌkub, si Yahiya ka si Andru, sila-sila jaꞌ, pa mman si Isa, yuk da, 4“Tuwan, bong siꞌ dari, baan doꞌ kami bong sumilan binakbul ilooy ma bay bitsala nu siꞌ. Maka oy lay la mintu sipat na man jama mindoga tapit na binakbul?”
5Tampung si Isa, “Iyakin kam mari kam yaꞌ takoleꞌ binoo magsiꞌ. 6Batan bbos-bbos, meka sina mintu pasunuꞌ bahasa sila na Almasi ma bay sinohoꞌ meꞌ Tuhan nalamat manusiyaꞌ. Boꞌ meka jama taboo da magsiꞌ.
7“Pag taabut bi ina mintu kaakahan meka na bonoꞌ mehe ni kalahat-lahatan matā-matapit, daa doꞌ gundalaꞌ pamiki bi. Ndang bay silay ginantaꞌ meꞌ looy, sugaꞌ saꞌ gi baw lay katapusan junyaꞌ. 8Bbos-bbos ina meka na kabangsa-bangsahan ka ga sultan sibonoꞌ-bonoꞌ. Maka meka na sina mintu kalahat-lahatan tuwaꞌ linug maka gotom. Sugaꞌ mimon balaꞌ meꞌ looy ilay mintu bohoꞌ panagnaan kamalasahiyan ma magkadarihan ni manusiyaꞌ bbos-bbos. Bong siꞌ dalil ta pa danda maddi, bohoꞌ nagnaꞌ paddi battong na.
9“Na kuwan kaam ina, iyakin kam batan luu sina mintu masa bi sinungkuban sampay binoo gi sina kam pa mman baanan kapakihan nohoꞌ hinukum. Boꞌ llagpiꞌ gi kam ni pag-awpan siga jamaa ni siga langga da. Kasohean ina kam binoo gi pa awpan siga gubnul ka ga sultan nohoꞌ hinukum ninsila sabap meꞌ bi mmeꞌ niyaku. Sugaꞌ sabap meꞌ looy, luu na dapat bi masaplag umanat mahap ninsila. 10Umanat mahap tuu itu ndang bay na ginantaꞌ subay duhuꞌ pinasampay ni mimon kabangsa-bangsahan, boꞌ taabut llaw kiyamat.
11“Na bila kam mintu tasungkub sampay pina-ntan pa huwis sinumariya, daa na kam hanggaw bong oy subay halling bi man ngandaawa. Luu du Rū Sutsiꞌ ngunungan kaam sampay muwanan kaam bitsala pataꞌ man nampung. Dari bitsala bi ina mintu lakka man Rū Sutsiꞌ, saꞌ na lakka man pamiki bi dī bi.
12“Ni sinōng, luu sina jama ma yaꞌ pitsayaꞌ niyaku taaku da minsan danganakan da langgung nohoꞌ pinapatoy sabap meꞌ da mmeꞌ niyaku. Damikiyan, luu du sina mintu siga induꞌ-mmaꞌ ma yaꞌ pitsayaꞌ niyaku taaku da minsan anak da mismu nohoꞌ pinapatoy. Kasohean anak pun, bong tasayu da induꞌ-mmaꞌ da mmeꞌ niyaku, mastiꞌ binanta du meꞌ da sampay taaku da lagi nohoꞌ pinapatoy. 13Kaam ina kinalammisan jaꞌ sina mintu meꞌ jama sikamimon sabap mmeꞌ kam niyaku. Sugaꞌ soysoy ina natas pangando na ngabut sampay pa katapusan, salamat jaꞌ ya.”
Ilooy ma tud sinukang meꞌ Tuhan
14Yuk si Isa lagi, “Ni sinōng, luu sina takita bi ilooy ma kabinasa ma tud sinukang meꞌ Tuhan pinatangge ni lugar ma tinagga niiya. Maruhuꞌ-ruhuꞌ ilooy siꞌ ndang bay tinunaꞌ njawom kitab.(13.14) Ndaun Kitab Nabi Danyel 9.27, 11.31, 12.11. (Soysoy matsa tunaꞌ looy, pahamun bi paayad.) Pag mintu kam ngita meꞌ looy, kuwan sagannap ma maglahat ni Yahudiya, subay magti lahi deꞌ-dēꞌ pa kapunu-punuhan. 15Maka soysoy lay ni taꞌ pantān lumaꞌ, daa na san paasok pa jawom ngaddoꞌ oy maka oy na. 16Damikiyan, sagannap ma buwat ni huma, daa na sila san moleꞌ ngaddoꞌ badjuꞌ da. 17Pag ina mintu tinakdil na meꞌ looy, tud kaluuy-luuy sina jama awla na sagannap karandahan ma battong atawa ma anakan dikiꞌ masi gi duruꞌ.
18“Sangkon, maku kam duwaa pa Tuhan, kamura-murahan yaꞌ du magsabtan ka timpu tanne. 19Batan biddaꞌ na silay mintu kamalasahiyan ma labuꞌ taꞌ manusiyaꞌ pag taabut meꞌ looy. Kamalasahiyan meꞌ looy ilay mintu, yaꞌ gi luu manusiyaꞌ bay ngissa labba man jaman Tuhan bay mapayak junyaꞌ tuu sampay batnaa. Kahapan yaꞌ na du baw lay kabalikan saumu. 20Bong siꞌ ilay mintu yaꞌ bay kulangan Tuhan halloman balaꞌ looy, mastiꞌ katis jaꞌ manusiyaꞌ man taꞌ babaw junyaꞌ. Sugaꞌ kalnaꞌ sagannap ma bay peneꞌ na sukuꞌ na, kulangan na du sina mintu halloman kamalasahiyan looy.”
21Maka yuk si Isa, “Ni waktu looy ilay mintu, bong luu maan kaam, ‘Ndaun ba, atu na Almasi,’ atawa ‘Alay na ndooy,’ amay-amay daa kam pitsayaꞌ. 22Luu sina mintu pōꞌ mangaku bahasa sila na Almasi atawa disu nabi. Boꞌ mōꞌ gi sina mintu sila siga pabuwatan kahaylan-haylan mari luu jama takoleꞌ da binoo mmeꞌ ni tōꞌ da ma yaꞌ tuwaꞌ. Bong siꞌ ina mintu takaya da, sampay sagannap ma bay pineneꞌ meꞌ Tuhan sukuꞌ na boo da du magsiꞌ. 23Ngkon ku itu ndang maan kaam na mimon pakaradjaan looy ma magkadarihan ni sinōng mari taiyakin bi.
Katakka Anak Manusiyaꞌ pa junyaꞌ pabalik
(Matiyu 24.29-31; Lukas 21.25-28)
24“Pasunuꞌ man kamalasahiyan meꞌ looy, ngalindom gi sina mataallaw maka buwan pun, yaꞌ na du ninag. 25Kuwan ga potean, maglatakan na sina mintu sampay mimon-mimon taꞌ langit njogjog na du.
26“Pus meꞌ looy, takita na sina Anak Manusiyaꞌ duwai njawom tayiꞌ baliyu ni kaehe kawasa na ddas ka sahayaꞌ na. 27Pag-anu, boꞌ na magpanohoꞌ ni siga malaikat na mumpung sagannap ma bay peneꞌ na sukuꞌ na man sika-mpat pidju alam.”
Pamintangan ni poon kayu igira
(Matiyu 24.32-35; Lukas 21.29-33)
28Yuk si Isa lagi, “Na ni kapasal katakka ku ina mintu, ngaddoꞌ jaꞌ kam pamintangan man poon igira. Pag takita bi pasapput na dawun na, inaa na sipat man bi toon tapit na timpu pangallaw. 29Damikiyan, pag takita bi mintu taabut na siga pakaradjaan ma bay sabbut ku siꞌ, malaingkan katoonan bi na du tapit na banahan katakka ku.
30“Baan ta kam banahan, yaꞌ gi sina mintu katis matoy jama angkat-angkatan batnaa, ndang nagnaꞌ na binakbul ilooy ma bay sabbut ku siꞌ. 31Indanan bi. Lanyap jaꞌ sina mintu gumi ka langit, sugaꞌ bong bitsala ku, yaꞌ baw situ kuhi baluba saumu-umu.
Yaꞌ kinatoonan bong sumilan takka Papuꞌ Isa
(Matiyu 24.36-44; Lukas 17.26-36)
32“Katakka ku ina mintu, yaꞌ kinatoonan meꞌ manusiyaꞌ bong llaw oy atawa lisag dangoy. San ga malaikat ndooy ni sulgaꞌ sampay aku, Anak Tuhan, yaꞌ du toon. Ilooy du toon yana Mmaꞌ ku. 33Sangkon iyakin kam. Subay ndang saddiya na kam, batan yaꞌ tatunaꞌ bi bong sumilan katakka ku ni sinōng. 34Subay kam meꞌ karuha siga ata wā saddiya ni katakka papuꞌ da ma bay lome. Yaꞌ gi bay patuwak papuꞌ da, lay doꞌ ya ngahalap lumaꞌ na ninsila, boꞌ lay gi sila sinukuan saliꞌ-saliꞌ ka pabuwatan da. Kuwan ilooy ma tukang jaga lawang, lay tugun na nohoꞌ iyakin.
35“Damikiyan, kaam pun, subay du kam iyakin mari kam saddiya sabap yaꞌ katoonan bi bong sumilan Papuꞌ bi, yana aku, pabeleng. Yaꞌ tatunaꞌ bi bong deꞌ kohap ka, tangngaꞌ bahangi ka, deꞌ subu ka sasang manuk tingkauk, atawa noy kallat subu na ka. 36Boꞌ katakka ku ina mintu talkadjut. Ilooy ilagan bi, taggahaꞌ lay na baw kam meꞌ karuha jama tuli takosa-kosa ni katakka ku. 37Sangkon batnaa ndang baan ta na kam sampay na sikamimon, basta subay kam iyakin.”
14Siga Yahudi bagaraꞌ mapatoy si Isa
1Na paddus meꞌ looy, duwa ngallaw sa taabut na paballangan Ngalingkaꞌ ka paballangan Tinapay Yaꞌ Magpasulig. Kuwan siga imam langkaw ka ga guru saraꞌ agama, ndang miha na pin lawang man da nungkuban si Isa gantaꞌ yaꞌ tasayu jama supaya tapapatoy da na. 2Sugaꞌ yuk da, “Bong ya sinungkuban, yaꞌ dari sinabuhan ni paballangan taggahaꞌ hiluhalaꞌ na baw manusiyaꞌ.”
Disu danda numpahan battis si Isa insallan hamut
(Matiyu 26.6-13; Lukas 7.36-50; Yahiya 12.1-8)
3Na waktu looy siꞌ, lay ga si Isa ndooy ni Betani ni lumaꞌ disu lalla inawnan si Saymon ma bay pingkaꞌ inipu. Pag-anu siꞌ, sasang ga si Isa mangan ndooy, luu na baw pasōng pa mman na disu danda moo katsaꞌ-katsaꞌ dorogan pannoꞌ meꞌ insallan hamut landuꞌ hagaan inawnan nalda. Pag-anu, lay pongan na kallong katsaꞌ-katsaꞌ looy boꞌ tumpahan na insallan hamut looy taꞌ kōk si Isa.
4Pag takita leꞌ jama ndooy, kasohean tud yaꞌ bay kasulutan sampay yuk da padangan-padangan, “Uy, ongoy doꞌ ilay subay na pin pinasensengan jaꞌ insallan hamut looy? 5Bong siꞌ bay pinaballihan, subay ga hagaꞌ gadji labi dantaun. Gam na bilay bay pinaballihan boꞌ ndean ga jama miskin ballihan na.” Pag-anu, ilooy ma lay sinahawi meꞌ da danda looy.
6Sugaꞌ yuk si Isa siꞌ tu, “Bbiyahun bi na ba. Ongoy doꞌ ina kam ngalingog danda tuu? Tud mahap bitu bay pabuwat na niyaku. 7Jama miskin ina, mastiꞌ luu jaꞌ ninggai-ninggai mman bi. Sumilan-sumilan kam doman nulung sila, dari jaꞌ. Boꞌ aku tu, yaꞌ na ku humallom ntuu mman bi. 8Tuwaꞌ na du situ siꞌ danda tuu bay numpahan baran ku insallan hamut batan sibuꞌ na du ya ka bay manyapan baran ku duhuꞌ para ni llaw ku kinubu. 9Baan ta kam banahan, nnoy-nnoy jaꞌ ina mintu man umanat mahap pinasaplag ni sikaliput junyaꞌ, tasabbut jaꞌ du sina bay pabuwatan danda tuu niyaku. Tud yaꞌ sina ya takupan meꞌ manusiyaꞌ pangkat-mamangkat.”
Si Judas nipu si Isa
(Matiyu 26.14-16; Lukas 22.3-6)
10Na ni waktu looy du siꞌ, kuwan si Judas Iskariyut, san ya tabeꞌ ni mulit si Isa sikasapu-duwa, lay pilay pa mman siga imam langkaw muwan tipu-akka bong pooy meꞌ na katabang ninsila nungkuban si Isa. 11Pag bay takale da halling si Judas meꞌ looy, tud bay gāk sila. Sampay lay na ga ya njanjian binuwanan sīn. Dari labba mandooy, bbuwatan si Judas, miha na jaꞌ lawang man na ma-ntan si Isa ninsila gantaꞌ yaꞌ tasayu jama.
Siga mulit si Isa manyap ni paballangan Ngalingkaꞌ
(Matiyu 26.17-19; Lukas 22.7-13)
12Pag-anu siꞌ, taabut na llaw sibuwa ni paballangan Tinapay Yaꞌ Magpasulig. Maka ndooy na du llaw man bangsa Yahudi magsumbaliꞌ siga anak bili-bili para paballangan Ngalingkaꞌ. Dari lay na ga mulit si Isa pa mman na nilaw, yuk da, “Tuwan, nnoy tu la karomanan nu man kami manyap leꞌ tabi mangan para ni paballangan Ngalingkaꞌ?”
13Dari siꞌ, lay na ya nohoꞌ mulit na duwa, yuk na ninsila, “Pilay kam pa jawom daira. Takka jaꞌ kam ndooy, sitammu kam sina ka lalla manangkit kibut bohean. Patuhut jaꞌ kam niiya pa lumaꞌ man na paasok. 14Yuk bi ni jama ma dapu lumaꞌ looy, ‘Tugun Tuwan Guru nohoꞌ ko tinilaw bong ninggai man bilik halliꞌ man na mangan ka ga mulit na para ni paballangan Ngalingkaꞌ?’ 15Pag-anu, pinakitahan du sina kam bilik mehe ni jataꞌ ndang langkap na maka tahan buwat sa. Dari ndooy na man bi buwatan kitabi leꞌ mangan.”
16Pag-anu siꞌ, lay na pilay mulit na ilooy siꞌ ma duwa pa jawom daira. Pag ndaꞌ da, tuwaꞌ bana labbasakayi bay bāꞌ si Isa. Dari siꞌ, lay na sila buwat kohap halliꞌ paballangan Ngalingkaꞌ.
17-18Pag taabut sangom, sasang ga si Isa ka ga mulit na sikasapu-duwa mangan, yuk si Isa, “Baan ta kam banahan, kaam ntuu ma soheꞌ ku mangan, luu situ kam mintu disu nipu aku.”
19Lay jaꞌ takale meꞌ mulit na, tud susa sila sampay magsing-sīng na sila nilaw, yuk da, “Uy Tuwan, saꞌ bilay aku awnan nu, saꞌ ba?”
20Pag tampung si Isa, “Awnan ku ilay siꞌ disu ningkaam sikasapu-duwa ma soheꞌ ku sawu mangan. 21Anak Manusiyaꞌ itu ndang bay tinunaꞌ njawom kitab, mastiꞌ pinapatoy jaꞌ. Sugaꞌ tud siya-siya silay mintu ilooy ma nipu iya. Gam na ya yaꞌ bay pinamaddihan.”
Katapusan waktu si Isa siharung-harung mangan ka ga mulit na
(Matiyu 26.26-30; Lukas 22.14-20; 1 Korin 11.23-25)
22Na sasang da siꞌ mangan, lay si Isa ngaddoꞌ dambatang tinapay boꞌ pinagsukuhan pa Tuhan. Pag lupus, pinong-pōng meꞌ na boꞌ sinongan ni siga mulit na sambayan na halling, “Atu, ngaddoꞌ kam boꞌ kakanun bi. Ingatun bi ituu baran ku.”
23Pag-anu, lay na baw ya ngaddoꞌ mbuwaꞌ sawan tubaꞌ anggul, boꞌ lay du pinagsukuhan pa Tuhan. Pag-anu, lay du sinongan ni ga mulit na sampay lay na sila nginum sikamimon. 24Yuk si Isa ninsila, “Ingatun bi inaa lahaꞌ ku song tinumpahan supaya meka na jama koleꞌ kaampunan. Batan lahaꞌ ku ina, inaa na muwan kasāhan ni pagsulutan bahau antaraꞌ Tuhan ka manusiyaꞌ.”
25Yuk si Isa lagi, “Baan ta kam banahan, ituu na situ katapusan ku nginum tubaꞌ anggul meꞌ tuu ka kaam. Sakayi ku nginum meꞌ tuu balik, noy bahau na kahalan tabi njawom pamarinta Tuhan.”
26Pag-anu, lay sila ngalang kalangan pudji pa Tuhan, boꞌ da pōꞌ song pilay pa Punu Jaytun.
Si Isa nunaꞌ si Pitel song maylu
(Matiyu 26.31-35; Lukas 22.31-34; Yahiya 13.36-38)
27Lān da pilay, yuk si Isa ninsila, “Yaꞌ hallom, sikamimon kam ngambanan aku na sina. Song binakbul na situ suwat njawom kitab, ilooy ma yuk Tuhan,
‘Ndang bay na silay gantaꞌ ku ilooy ma tukang ngipat baanan bili-bili pinapatoy. Kuwan siga bili-bili na, magkanatan na sonse.’(14.27) Kitab Nabi Zekaraya 13.7
28“Sugaꞌ,” yuk si Isa, “pag mintu lay na ku pinakallum pabalik, pilay sa ku pa Jalil duhuꞌ man kaam. Ndooy sa kitabi sitammu.”
29Sugaꞌ kuwan si Pitel baw siꞌ tu, yuk na, “San sila sikamimon ngambanan kau Tuwan, bong aku, basta niyaꞌ baw la.”
30Sugaꞌ yuk si Isa, “Baan ta ko banahan Pitel, sangom tuu du situ, yaꞌ gi sina mintu bay taabut tingkauk kaminduwa na manuk, ndang min tallu na ko sina mintu bay maylu bahasa yaꞌ ku takila nu.”
31Sugaꞌ si Pitel siꞌ tu, gam pin amu-amu magsambatan, yuk na, “San gi man ku matoy, basta yaꞌ du ku maylu!” Damikiyan, ga mulit si Isa siꞌ tu ilooy kasohean, meꞌ looy du halling da.
Si Isa maku duwaa ndooy ni Getsemani
(Matiyu 26.36-46; Lukas 22.39-46)
32Pag-anu, lay na ga si Isa palanja pa disu lugar inawnan Getsemani ndooy du taꞌ Punu Jaytun. Takka ndooy, yuk na ni ga mulit na, “Ningkōꞌ doꞌ kam ntuu. Pilay doꞌ ku ndē maku duwaa.” 33Sugaꞌ lay gi baw boo na ga si Pitel, si Yaꞌkub, ka si Yahiya. Pag-anu, takkahan susa na si Isa maka yaꞌ na katoon-toonan na parasahan na. 34Dari yuk na ninsila ma tallu, “Biddaꞌ na baw tu susa jawom atay ku. Agon dak kapatoy na niyaku. Ntuu jaꞌ doꞌ kam maka iyakin kam. Daa kam tuli.”
35Pag-anu siꞌ, lay na ya palawak-lawak dangkitiꞌ mman da boꞌ na pahangkop taꞌ tanaꞌ. Pag-anu siꞌ, boꞌ na maku duwaa pa Tuhan supaya bong siꞌ luu dapat, hinawasan na man jataꞌ na kabinsanaan ma bay ginantaꞌ niiya. 36Yuk na, “Maꞌ, katoonan ku du yaꞌ luu tunmanūn ningkau. Bong siꞌ luu dapat, hawasan nu na kabinsanaan ma bay gantaꞌ nu njataꞌ ku. Sugaꞌ subay kahandak nu binean, saꞌ ga niyaku.”
37Pag-anu siꞌ, lay na ya pabeleng pa mman ga mulit na ilooy ma tallu. Pag ndaꞌ na, tuli jaꞌ sila. Dari yuk na ni si Pitel, “Saymon, ongoy kam tuli? Yaꞌ san kam kina katatas magpajaga san lasa danjām? 38Daa kam ba tuli, arapun maku na pin kam duwaa pa Tuhan mari yaꞌ tungkas iman bi. Batan san ina njawom atay bi doman kam buwat kahandak Tuhan, yaꞌ baw takaya bi ni dī bi.”
39Pag-anu siꞌ, lay na baw si Isa bbeleng balik maku duwaa meꞌ kadari ilooy du siꞌ ma sibuwa. 40Pag beleng na pa mman mulit na, ndaꞌ na, lay gi du sila tuli pabalik batan tud tintōꞌ na sila. Pag binatiꞌ, yaꞌ na ga luu tapahalling da ni kaiyaꞌ da niiya.
41Pag-anu, lakka na baw si Isa pabalik maku duwaa. Pag beleng na ni kamintallu na, yuk na ninsila, “Uy, amu-amu bitu hati kam tuli! Ddong na kam ba pahali. Taabut na situ waktu man Anak Manusiyaꞌ tinipu boꞌ pina-ntan pa mman siga baldusa. 42Bangun na kam! Alu na lalla ma nipu aku! Sūng bi, sampang tabi na sila!”
Si Isa sinungkuban
(Matiyu 26.47-56; Lukas 22.47-53; Yahiya 18.3-12)
43Yaꞌ gi siꞌ lupus si Isa mitsala, ilooy ma takka du si Judas, yana disu mulit ni ilooy ma sikasapu-duwa. Maka luu na du bay boo na baanan jama ddas ka kataliꞌ da maka takaka da. Sila siꞌ tu bay pilay nungkuban si Isa man panohoan siga imam langkaw, ga guru saraꞌ ka ga matatoa ni agama.
44Na si Judas siꞌ tu, ndang bay isun ka ga soheꞌ na muwanan sila sinyal, yuk na, “Lalla ma ūk ku, ilooy na mintu sungkuban bi, boꞌ jagahan bi sa paayad.”
45Dari magti pasōng si Judas pa mman si Isa sambayan na halling, “Tuwan Guru.” Pag-anu, boꞌ na ngūk si Isa.
46Pag-anu siꞌ, lay na du sungkuban da si Isa. 47Sugaꞌ kuwan disu soheꞌ si Isa, lay magti ngurus bariꞌ na sampay lay tigad na tindog panghuluꞌ imam, boꞌ lay na ga latak tinga na.
48Pag-anu, halling si Isa ni baanan jama looy, “Ongoy doꞌ kam ina, itu na pitu ka ga kataliꞌ sampay ga takaka nungkuban aku? Ongoy kanna bi, mundu kitu ku? 49Aku bitu, llaw pa dangallaw na ku magpanoan kaam ni langga mehe. Ongoy taggahaꞌ yaꞌ gi ku bay sungkuban bi ndooy? Sugaꞌ biyahun na, nduwan jaꞌ du sina kam mari binakbul na siga tunaꞌ ma bay sinuwatan njawom kitab.”
50Na ga mulit na baw siꞌ tu sikamimon, magsaw-simpāk na sonse ngambanan iya.
51Sugaꞌ luu baw disu subul(14.51) Baꞌ-bāꞌ kasohean, lalla looy yana si Malkus ma bay nuwat kitab tuu. ndooy patuhut na pin ni si Isa, lay jaꞌ tadjung. Pag-anu, lay du ya sinungkuban. 52Sugaꞌ pag lay jaꞌ ya ta-ntan man dikat na, lay jaꞌ ya paurus, boꞌ na sonse nantang jaꞌ.
Si Isa binoo pa mman baanan Sanhidrin sinumariya
(Matiyu 26.57-68; Lukas 22.54-55; 22.63-71; Yahiya 18.13-14; 18.19-24)
53Na si Isa siꞌ tu, lay na binoo pa lumaꞌ panghuluꞌ imam. Ndooy siꞌ, ndang luu na siga imam langkaw ka ga guru saraꞌ sampay ga matatoa ni agama lay kumpo. 54Kuwan si Pitel baw siꞌ tu, luu na pin bay patuhut man katāhan sampay lay gi paasok pa jawom haman panghuluꞌ imam looy. Pag-anu, lay gi ya mmeꞌ ningkōꞌ ni bihing api mapasuꞌ-pasuꞌ baran na ka ga tukang jaga ndooy.
55Na kuwan siga imam langkaw baw siꞌ tu sampay na mimon pagkahi da paki ni baanan Sanhidrin, miha na pin danan man da malkalaꞌ si Isa mari tasohoꞌ da na pinapatoy. Sugaꞌ yaꞌ luu tatammu da sangdanan pataꞌ man na kalabuan hukuman kapatoy. 56Maka meka du baw ndooy bay buwat-buwat palkalaꞌ njataꞌ si Isa, sugaꞌ yaꞌ san bay mag-uyun bitsala da.
57Kasohean mitnahan iya meꞌ tuu, yuk da, 58“Bay situ takale kami lalla tuu magsambatan, bbos-bbos langkat na konoꞌ langga mehe ma bay pinaghulas-sangsaan meꞌ manusiyaꞌ. Pag-anu, boꞌ na konoꞌ matangge sarī njawom tallu ngallaw du ma saꞌ man pabuwatan manusiyaꞌ.” 59Sugaꞌ san meꞌ looy halling da, yaꞌ baw bay mag-uyun bitsala da ka ilooy kasohean.
60Pag-anu siꞌ, ilooy ma lay na nangge panghuluꞌ imam ni awpan sikamimon nilaw si Isa, yuk na, “Oy tapahalling nu ni sumbung da njataꞌ nu? Yaꞌ kina luu daawa nu?” 61Sugaꞌ yaꞌ san ya bay nampung.
Dari lay tinilaw balik meꞌ panghuluꞌ imam, yuk na, “Bana kina kau Almasi, Anak Tuhan Mahatinggi?”
62Pag tampung si Isa, “Bana, aku na situ. Maka luu gi sina masa ni sinōng takita bi aku, Anak Manusiyaꞌ, ningkōꞌ huwin pa kawnan ni bihing Tuhan Sangat Kawasa. Maka takita bi du sina ku duwai man sulgaꞌ njawom tayiꞌ baliyu.”
63Dari bbuwatan panghuluꞌ imam, lay nganggeret juba na mismu ni kalasu na sambayan na halling, “Uy, san bitu yaꞌ na tabi miha jama bay kasakup ni bitsala na pangka pa Tuhan! 64Ndang-ndang lai na du takale tabi pōꞌ man behe na mismu! Hantak bitsala na, saliꞌ du ya ka Tuhan! Bong ningkaam, pooy bandingan bi?”
Dari ilooy na siꞌ bay pinagtaayunan meꞌ da sikamimon subay du ya pinapatoy. 65Dari labba mandooy, bbuwatan kasohean, ngaluraan iya, boꞌ da makkos mata na maka nuntuk iya sambayan da halling, “Tunaun teꞌ bong soy na pin bay nuntuk kau.” Pag-anu, sigi-sigi gi ya bay tinampa meꞌ siga tukang jaga ndooy.
Si Pitel maylu bahasa saꞌ iya soheꞌ si Isa
(Matiyu 26.69-75; Lukas 22.56-62; Yahiya 18.15-27)
66Na beleng ta pa si Pitel ni haman looy, luu na baw disu danda tindog panghuluꞌ imam bay pingkaꞌ man bihing na. 67Pag takita na si Pitel mapasuꞌ-pasuꞌ baran na ni api, ilooy ma lay ya pasōng ngaliling sambayan na halling, “Kau bitu siꞌ bay du haboy ka si Isa, lalla looy man Nasaret.”
68Sugaꞌ bbuwatan si Pitel baw, magti maylu, yuk na, “Tau ta la kau. Yaꞌ bina tahati ku bong oy binitsala meꞌ nu!” Paddus meꞌ looy, lay ya pilay pa behe lawang haman looy. Maka ilooy ma tingkauk na manuk.
69Pag takita na baw siꞌ ya balik meꞌ danda looy, lay na baw ya māꞌ ni ga jama ma nangge-nangge ndooy, yuk na, “Lalla looy ilay, lay du siꞌ bay tabeꞌ ninsila.” 70Sugaꞌ lay du si Pitel maylu balik.
Yaꞌ gi hallom, kuwan kasohean ma nangge-nangge ndooy, yuk da ni si Pitel, “Mattan du bitu hati ko lamud ni baanan ga lalla looy, batan jama Jalil du ko.”
71Dari siꞌ, ilooy ma yuk si Pitel, “Ilu na Tuhan pakale-kale, yaꞌ san katoonan ku bong soy jama looy. Minulkaan na ku meꞌ Tuhan bong yaꞌ bay bana bitsala ku.”
72Pag-anu siꞌ, ilooy ma tingkauk ni kaminduwa na na manuk. Sampay taintom na meꞌ si Pitel bay tunaꞌ si Isa, ilooy ma yuk na, “Yaꞌ gi san ina mintu bay tingkauk kaminduwa na manuk, ndang min tallu na ko bay maylu bahasa yaꞌ ku takila nu.” Dari siꞌ, lassa hansu na atay na sampay lay na ga kapanangis.
15Si Isa binoo pa mman Gubnul Pilatu
(Matiyu 27.1-2,11-14; Lukas 23.1-5; Yahiya 18.28-38)
1Pag kallat llaw, kuwan ga imam langkaw ka ga guru saraꞌ agama ka ga matatoa ni agama, sampay na mimon pagkahi da njawom baanan Sanhidrin, lay na isun bong pooy meꞌ da buwat si Isa. Pag lupus, lay na ya iningkotan meꞌ da, boꞌ na binoo pa mman Gubnul Pilatu.
2Takka ndooy, tilaw Gubnul Pilatu ni si Isa, “Bana kina kau sultan bangsa Yahudi?”
Tampung si Isa, “Meꞌ bay halling sambat nu na siꞌ.”
3Kuwan kaimaman langkaw baw siꞌ tu ndooy, kajinisan na sumbung ni jataꞌ si Isa bay pinōꞌ meꞌ da. 4Dari lay tinilaw si Isa meꞌ Gubnul Pilatu, yuk na, “Ongoy yaꞌ na luu tapahalling nu? Yaꞌ kina tasayu nu bong meꞌ noy eka sumbung njataꞌ nu?”
5Sugaꞌ yaꞌ na san bay nampung si Isa. Dari tud bay jayip gubnul niiya.
Si Isa binotangan hukuman kapatoy
(Matiyu 27.15-26; Lukas 23.13-25; Yahiya 19.16)
6Na jaman looy siꞌ, taun-taun, tuktuk luu paballangan Ngalingkaꞌ, ndang luu tabiat gubnul mapeneꞌ siga raayat na disu pilisu pinōꞌ meꞌ na. 7-11Na pag taabut si Isa hinukum, lay du bay mag-atag ka paballangan Ngalingkaꞌ. Maka ni waktu looy du, luu na baw baanan Yahudi bay pilay mogos gubnul nohoꞌ mōꞌ disu pilisu meꞌ ndang tabiat na.
Pag tilaw Gubnul Pilatu, “Pooy bong sultan bangsa Yahudi looy na pōꞌ ku?” Ilooy man na doman mōꞌ si Isa sabap tabistu na ngkon siga imam langkaw bay ma-ntan si Isa niiya, ni kadangkiꞌ da sadjaꞌ. Sugaꞌ bbuwatan siga imam langkaw baw siꞌ tu, amu-amu ngoyo-ngoyohan baanan jama ndooy nohoꞌ meneꞌ si Barabas pinōꞌ ni gubnul. Mingkan siꞌ, si Barabas ilay bay mapatoy jama sasang na naggaꞌ parinta Rom.
12Tilaw Gubnul na baw siꞌ tu, “Hati, batōy ku na baw ilooy ma awnan bi sultan bangsa Yahudi?”
13Pag tampung da, lay ngahowap, yuk da, “Lansangun na taꞌ tehang!”
14Tilaw Gubnul baw, “Ongoy, oy tu dusa na?”
Sugaꞌ amu-amu hinowapan meꞌ da pa haddo, yuk da, “Lansangun na taꞌ tehang!”
15Dari pagka Gubnul Pilatu doman nulut baanan jama ndooy mari yaꞌ hiluhalaꞌ, lay na pōꞌ na man jawom jīl si Barabas. Kuwan si Isa, lay na sohoꞌ na llagpiꞌ, boꞌ lay na pa-ntan na pa mman siga sundalu na nohoꞌ llansang taꞌ tehang.
Si Isa binuwat kalabbiyan meꞌ siga sundalu
(Matiyu 27.27-31; Yahiya 19.2-3)
16Pag-anu siꞌ, lay na si Isa binoo meꞌ siga sundalu looy pa jawom haman astanaꞌ gubnul. Takka ndooy, lay tinawag meꞌ da mimon pagkahi da sundalu nohoꞌ kumpo ndooy. 17Luu jaꞌ siꞌ sila kumpo, bbuwatan da lay mapatukan si Isa juba tawuk bahasa juba sultan. Maka lay gi sinangonan taꞌ kōk na bahasa karuna bay pabuwat da ka bahan itingan. 18Pag-anu, boꞌ da maghowapan bahasa ngalak iya, yuk da, “Kamura-murahan lanjut du umu nu Ampun Sultan bangsa Yahudi.” 19Pag-anu, lay lubak da kōk na ka pongan buway, boꞌ lay gi lluraan. Pag-anu, boꞌ da nangge ka tuut da bahasa numba iya. 20Paddus da bay buwat iya kalabbiyan, lay na urusan da juba tawuk looy, boꞌ lay pinapatuk meꞌ da balik bay ndang pamakoy na. Pag lupus, lay na ya boo da pōꞌ lān llansang na taꞌ tehang.
Si Isa llansang taꞌ tehang
(Matiyu 27.32-44; Lukas 23.26-43; Yahiya 19.17-27)
21Na lān si Isa siꞌ binoo meꞌ siga sundalu pōꞌ man daira, sitammu na baw sila ka disu lalla man Sayrin inawnan si Saymon lakka man kabuntuꞌ-buntuan Yahudiya. Pag-anu siꞌ, lay ya pinaggos meꞌ siga sundalu nohoꞌ ningan si Isa manangkit tehang na. (Saymon looy ilay yana mmaꞌ ga si Aleksandel ka si Rupus.) 22Man da bay moo si Isa, pa taꞌ buntuꞌ inawnan Golgota, hatiyan na, Lugar Baung Kōk. 23Takka ndooy, lay na baw si Isa sinongan tubaꞌ anggul bay llamuran uliꞌ inawnan mira man ngulangan paddi. Sugaꞌ yaꞌ ya bay ngaddoꞌ. 24Pag-anu, ilooy ma lay na ya llansang taꞌ tehang. Kuwan pakayan na, lay na pinagsarī-sarī meꞌ siga sundalu, boꞌ pinagkimbuan meꞌ da bong mamooy sukuꞌ ni dangan.
25Na si Isa siꞌ bay llansang taꞌ tehang ga lisag siyam subu. 26Pa jataꞌ man takōk na luu papan bay llansang. Ni papan looy luu suwat man mahati bong oy palkalaꞌ njataꞌ na. Batsahan na, “Ituu itu Sultan bangsa Yahudi.”
27Na sarī man si Isa, luu gi duwa mundu bay du llansang taꞌ tehang ndooy, disu huwin pa kawnan man si Isa, kuwan ilooy disu, huwin pa kayli. 28Dari sabap meꞌ looy, lay na binakbul bay tunaꞌ njawom kitab pasal Almasi, ilooy ma yuk na, “Initung ya tabeꞌ ni sagannap ma ngalangga saraꞌ.”(15.28) Kitab Nabi Isaya 53.12
29Jama baw siꞌ tu, luu-luu pingkaꞌ, bbuwatan da eleng-eleng sambayan da ngaludjum iya, yuk da, “Baꞌ-bāꞌ nu, talangkat nu langga mehe, boꞌ patangge nu du bbalik njawom tallu ngallaw du! 30Bong mattan takaya nu meꞌ looy, tabangun teꞌ dī nu. Duwai na ko man taꞌ tehang naa.”
31Damikiyan, ga imam langkaw pun sampay ga guru saraꞌ agama, lay du bay buwat si Isa kalabbiyan, yuk da padisu-padisu, “Bay baw ya katabang jama, pagka dī na, niyaꞌ san tatabang na. 32Bong siꞌ ina mattan iya Almasi, Sultan bangsa Israil, subay siꞌ duwai na ya man taꞌ tehang naa mari takita tabi kawasa na, boꞌ tabi pitsayaꞌ niiya.” Kuwan ga mundu looy baw siꞌ tu ma bay du llansang haboy ka si Isa, lay du mmeꞌ-mmeꞌ ngaludjum iya.
Kapatoy si Isa
(Matiyu 27.45-56; Lukas 23.44-49; Yahiya 19.28-30)
33Na pag tangngaꞌ llaw, ngalindom na ni sikaliput lahat ngabut sampay lisag tallu kohap. 34Taabut lisag tallu, ilooy ma ngingan na si Isa pahaddo, yuk na, “Eli, Eli, lama sabaktani?” Hatiyan na siꞌ, “Tuhan ku, Tuhan ku, ongoy ku lay mbanan nu?”
35Kuwan kasohean jama ma nangge-nangge ndooy, magsāꞌ meꞌ da kale. Sangkon yuk da, “Pakale doꞌ kam ba. Ngalinganan Nabi Eliyas na bilay ya!”
36Pag-anu, magti lay sonse disu ninsila ngaddoꞌ sammek boꞌ iningkotan ni tōng kayu-kayu. Pag-anu, boꞌ tinalloban ni jawom tubaꞌ anggul bahal boꞌ inangkat pa behe si Isa pinasassop. Yuk jama looy, “Agad tabi doꞌ. Ndaꞌ tabi teꞌ bong tulun du Nabi Eliyas maduwai iya.”
37Pag-anu siꞌ, ilooy ma killahap na baw si Isa pahaddo sampay lay na makkat. 38Waktu looy du siꞌ, kuwan kultina kapa ndooy ni langga mehe, sarunduun du salik duwa man jataꞌ pa diyoꞌ.(15.38) Kultina looy ilay man ngagpangan bilik ni kaduwa ni langga mehe ma ginalla Bilik Pinakasutsiꞌ, yana bilik man Tuhan patannaꞌ. Na isu-isu panghuluꞌ imam dari paasok pilay, boꞌ sakayi du njawom dantaun. Dari pag lay jaꞌ salik duwa kultina looy man kawasa Tuhan, ilooy na sipat bukaꞌ na lawang man manusiyaꞌ patapit pa Tuhan sumilan-sumilan karomanan da. Kon meꞌ looy sabapan lahaꞌ si Isa bay tumpa man muwasan dusa da.
39Na kuwan kapitan sundalu, luu na pin ndooy nangge ni awpan si Isa. Pag takita na hantang si Isa bay makkat, yuk na, “Tud bana du la lalla tuu Anak Tuhan.”
40Ndooy siꞌ, luu gi baanan karandahan maiman man katāhan. Tabeꞌ ninsila yana ga si Mariyam man Magdala, si Salome, ka si Mariyam, yana nneꞌ si Joses ka si Yaꞌkub ma inawnan Siyali. 41Siga karandahan looy ilay siꞌ, ndang biyasa magpa-mmeꞌ ni si Isa sampay daran gi nulung iya bay jaman na ndooy ni Jalil. Sarī man sila, meka gi ndooy karandahan ma bay du magpa-mmeꞌ ni si Isa pa Jerusalem.
Si Isa kinubu
(Matiyu 27.57-61; Lukas 23.50-56; Yahiya 19.38-40)
42Na llaw man si Isa siꞌ bay llansang, magsabtan ka llaw man bangsa Yahudi manyap para Llaw Pahali. Pag sumaddop llaw, yaꞌ na sila dari buwat njawom dambahangi-dangallaw. 43Dari padpad luu gi waktu, luu disu lalla man Aramatiya inawnan si Yusup lay nawakkahan dī na pilay pa mman Gubnul Pilatu muhunan mayat si Isa kinubu. Si Yusup ilay siꞌ, iya disu paki ni baanan Sanhidrin. Pinagmaltabatan ya banahan meꞌ pagkahi na bangsa Yahudi. Maka ndang ngagad ya ni pamarinta Tuhan pinatangge.
44Na kuwan Gubnul Pilatu siꞌ tu, tud bay jayip ni puhung si Yusup batan kanna na yaꞌ gi bay matoy si Isa. Dari lay linganan na kapitan sundalu na man na pakiyaka bong mawjud du lay na matoy si Isa. 45Pag lay jaꞌ ya kabaan meꞌ kapitan looy tud mawjud du, ilooy ma lay na tugutan na si Yusup ngaddoꞌ mayat si Isa.
46Dari siꞌ, bbuwatan si Yusup, lay malli kuku poteꞌ sampay lay na paduwai na mayat si Isa boꞌ tinungkus. Pag-anu, boꞌ na tinampat ni kubu ma bay pinabuwat ni battisan pampang. Pag-lupus, lay na baw sohoꞌ na lligiran batu mehe man bay nambo behe kubu looy. 47Kuwan si Mariyam man Magdala ka si Mariyam yana nneꞌ si Joses, lay du mmeꞌ pilay ngindanan tampat man na bay kinubu.
16Si Isa pinakallum
(Matiyu 28.1-8; Lukas 24.1-12; Yahiya 20.1-10)
1Na paddus jaꞌ Llaw Pahali, kuwan si Mariyam man Magdala ka si Salome ka si Mariyam, yana nneꞌ si Yaꞌkub, lay malli uliꞌ hamut man da ngintu mayat si Isa. 2Dari siꞌ, pag taabut llaw Ahad, subu alab lagi, lay na sila pilay pa kubu. Lān da siꞌ pilay, 3bbuwatan da sitilaw-tilaw bong soy tasohoꞌ da ngaligiran batu mehe looy man bay nambo behe kubu looy. 4Takka ndooy, pag ndaꞌ da, batu mehe looy ndang lay na bay lligiran. 5Pag asok da pa jawom kubu looy, ngita na sila disu lalla anak-anak bahau jubahan poteꞌ ningkōꞌ huwin pa kawnan. Dari tud bay kinoblaꞌ sila.
6Sugaꞌ yuk lalla looy, “Daa kam ba kinoblaꞌ. Si Isa ilay, jama Nasaret looy ma piha bi, ma bay llansang taꞌ tehang, yaꞌ na luu ntuu. Lay na ya pinakallum. Ndaun bi na limpaꞌ man na bay pinabāk. 7Batnaa pilay na kam mahati ga mulit na awla na si Pitel. Baan bi sila pilay sa si Isa pa Jalil duhuꞌ man kaam. Ndooy sa kam sitammu meꞌ ndang bay halling na du ningkaam.”
8Dari siꞌ, magti ga danda looy pōꞌ sampay lay na sila sonse palakka man kubu looy. Mipig na ga sila maka tud haylan sila. Lān da siꞌ pilay, yaꞌ na san sila bay māꞌ ni soy maka soy na tandaꞌ ni katawu da.
Si Isa nammuhan si Mariyam man Magdala
(Matiyu 28.9-10; Yahiya 20.11-18)
9Na si Isa siꞌ tu bay llum balik, tuwaꞌ ni llaw Ahad subu alab lagi. Pag-anu, duhuꞌ bay tammuhan na yana si Mariyam man Magdala. Iya na silay bay pingkaꞌ luu seytan na pituꞌ bay llakkahan meꞌ si Isa. 10Pus si Mariyam siꞌ bay tinammuhan, lay na ya pilay pa mman siga mulit si Isa. Takka ndooy, ndaꞌ na, masi gi sila magkarukkaan sampay magtangisan na pin. Pag-anu siꞌ, lay na sila baan na lay ya tinammuhan meꞌ si Isa. 11Sugaꞌ san siꞌ sila lay na binaan llum na si Isa pabalik sampay lay na ga konoꞌ takita na, amu-amu sila yaꞌ kuhi pitsayaꞌ.
Si Isa nammuhan mulit na duwa
12Pag-anu, llaw looy du siꞌ, lay na baw si Isa patammu ni mulit na duwa lān da song pa dile, sugaꞌ sarī bantuk na. 13San meꞌ looy, song hallom, lay du ya takila meꞌ da sampay lay na sila bbeleng nuntut ni siga pagkahi da mulit. Sugaꞌ masi du sila yaꞌ kuhi pitsayaꞌ.
Si Isa nammuhan ga mulit na
(Matiyu 28.16-20; Lukas 24.36-49; Yahiya 20.19-23)
14Yaꞌ hallom, si Isa na mismu bay patammu ni ga mulit na sikasapu-dambuwaꞌ sasang da mangan. Sampay lay gi sila sinahawi meꞌ na sabap ni katohas kōk da yaꞌ sila kuhi pitsayaꞌ ni siga pagkahi da ma bay ngita iya pus na bay pinakallum.
15Pag-anu, lay gi sila sinohoꞌ meꞌ si Isa, yuk na, “Lataan bi na junyaꞌ maka pasaplagun bi na umanat mahap pasal aku ni sikamimon manusiyaꞌ. 16Soysoy ina pitsayaꞌ niyaku sampay bay pinandi, malaingkan salamat na ya. Sugaꞌ soysoy ina yaꞌ pitsayaꞌ, kalabuan du sina hukuman Tuhan.
17“Na sagannap ma pitsayaꞌ niyaku, meka sina mintu sipat kawasa tapōꞌ da. Kapalakka na sina sila siga seytan man jawom baran jama makoy awon ku. Maka kabitsala gi sina sila ni jinisan pallun ma yaꞌ san bay pingkaꞌ kapandoyan da. 18Maka san ina mintu sila bay kapūt sō atawa pun lay kainum latsun, yaꞌ du sina sila kongoy-kongoy. Maka bong sila bay nappak ga baran jama sakihan, kaulian jaꞌ sina meꞌ da.”
Si Isa inangkat pa sulgaꞌ
(Lukas 24.50-53; Salsila siga Rasul 1.9-11)
19Paddus Papuꞌ Isa bay mitsala ninsila, ilooy ma lay na ya inangkat pa sulgaꞌ. Pag-anu, boꞌ na ningkōꞌ ni bihing Tuhan huwin pa kawnan. 20Dari kuwan siga mulit na siꞌ, lay na ngalataan kalahat-lahatan masaplag umanat mahap pasal Papuꞌ Isa. Man kawasa na njataꞌ da, meka na sipat kahaylan-haylan bay tapōꞌ da bilang buktiꞌ ni sikamimon tud bana du umanat da.