Jūd

Suwat Lakka man si

Jūd

Pahati

Si Jūd ilay ma bay nuwat suwat tuu magdanganakan ka si Yaꞌkub. Si Yaꞌkub ilay yana pa-mmean baanan sukuꞌ si Isa Almasi ndooy ni Jerusalem. Kaekahan jama mista si Jūd ka si Yaꞌkub siga siyali si Isa Almasi. Sibuꞌ-sibuꞌ nneꞌ da si Mariyam, sugaꞌ kuwan si Isa, saꞌ manusiyaꞌ mmaꞌ na sabap bay ya pinamaddihan man kawasa Rū Sutsiꞌ. Boꞌ si Jūd ka si Yaꞌkub ilay, mmaꞌ da si Yusup.

Maksud si Jūd bay nuwat man na ngawalan siga sukuꞌ si Isa mari sila yaꞌ takoleꞌ pinagsian meꞌ siga guru palsu. Kon meꞌ looy batan bay taaka na luu siga guru palsu bay pasalluk ni siga baanan sukuꞌ si Isa.

Meka situ bitsala ni suwat tuu dak sibuꞌ ka bitsala ni suwat si Pitel ni kaduwa. Batan njawom suwat tuu pun lay du bay pinaintoman siga sukuꞌ Tuhan yaꞌ nohoꞌ ngalabbahan pangando da ni Papuꞌ Isa. Maka lay gi sila nohoꞌ sēng ni aseꞌ Tuhan ninsila sampay maasean mimon pagkahi da manusiyaꞌ.

Ituu bay sinuwatan meꞌ si Jūd luu na ga tallumpuꞌ-mpat taun paddus si Isa Almasi bay inangkat pa sulgaꞌ.

JŪD

Si Jūd ngawalan sukuꞌ si Isa

¹Aku itu si Jūd, disu ata si Isa Almasi. Maka aku itu danganakan si Yaꞌkub. Itu suwat ku pa mman bi, sagannap ma bay lliyun meꞌ Mmaꞌ tabi Tuhan binuwat sukuꞌ na, yana kaam ma kinaasean meꞌ na sampay inayaran meꞌ si Isa Almasi. ²Kamura-murahan lipat man lipat na pin timbang ka aseꞌ sampay kasannangan man Tuhan ningkaam.

³Siga kakasi ku, sibuwa ilay, tud doman ku nuwat ningkaam pasal kasalamatan ma lay na takoleꞌ tabi saliꞌ-saliꞌ. Sugaꞌ bistahan ku gam na ku nuwat nohoꞌ kaam ngandapitan siga tōꞌ ayad ma kinapitsayaan meꞌ tabi. Batan siga tōꞌ naa ina, si Isa mismu bay masampay ni siga sukuꞌ na. Boꞌ saumu na sina yaꞌ na baluba samasakali. ⁴Kon ku itu ngawalan kaam sabap luu na sina nnaa bay pasalluk ni siga baanan bi ga jama yaꞌ mahap. Yaꞌ san luu tawu da pa Tuhan. Boꞌ tinabid lagi meꞌ da kabanahan pasal aseꞌ Tuhan ni manusiyaꞌ. Baꞌ-bāꞌ da, dari na konoꞌ san kitabi buwat oy-oy kasabuhan ma kinanapsuhan meꞌ tabi. Ndang-ndang mehe du konoꞌ aseꞌ Tuhan ngampun. Na man sabapan laat kawul-piil da ina, tumatandaꞌ yaꞌ sila kuhi mangaku isu-isu si Isa Almasi yana Papuꞌ sikamimon. Sugaꞌ ndang luu na sina mulkaꞌ hinalliꞌ ninsila meꞌ ndang bay tinunaꞌ jawom kitab maruhuꞌ-ruhuꞌ.

Pamintangan ni mulkaꞌ Tuhan ni sagannap ma maat maruhuꞌ

⁵Siga danganakan, san katoonan bi na pakaradjaan tuu siꞌ sikamimon, paintoman ta na pin kam. Mastiꞌ luu jaꞌ sina mintu masa Tuhan midjalaꞌ siga baldusa. Pamintangan bi na jaman bangsa Yahudi bay pinahata ndooy ni Ejip mattoꞌ. San sila bay pinaddusan meꞌ Tuhan mandooy, song hallom, adak na sila bay katis sikamimon matoy sabap yaꞌ sila bay pitsayaꞌ ni janjiꞌ Tuhan.

⁶Maka pamintangan bi na siga malaikat mattoꞌ ma bay ngalabbahan ntan da sampay ngambanan paglahat ma bay sinukuꞌ ninsila ndooy ni sulgaꞌ.(1.6) Ndaun Panagnaan ni Awwal Jaman 6.1-5. Pagka sila yaꞌ bay mean kahandak Tuhan, lay du sila tinalungkuꞌ njawom tahanan lindom, boꞌ bay gi pinusas ka karina ma yaꞌ tapaddusan. Maka ndooy na jaꞌ sila halloman yaꞌ gi takka llaw hukuman Tuhan.

⁷Damikiyan, pamintangan bi na palas ni siga daira Sodom ka Gomora(1.7) Ndaun Panagnaan ni Awwal Jaman 19.1-24. ka ga daira ma ngaliput sila mattoꞌ. Sabapan kajinahan jama ndooy ka kasabuhan kalallahan ubay ka pagkahi da lalla, lay na ampud siga daira looy meꞌ api pinalabuꞌ meꞌ Tuhan man taꞌ langit. Dari labba mandooy, luu na matakaddam ningkitabi bong oy palas njataꞌ baldusa bbos-bbos. Ndang luu na silay hinalliꞌ ninsila api ma yaꞌ na kuhi pawom saumu.

⁸Na siga jama naa ina siꞌ ma pasalluk ni baanan bi sampay nabid kabanahan, sila pun ina buwat kasabuhan du. Baꞌ-bāꞌ da, ilmuꞌ da bay pinalahil ninsila njawom ga upihan da. Boꞌ ko, ilmuꞌ da ilay yana daawa jaꞌ man da buwat jinisan kasabuhan ma katamak ni baran da. Tud yaꞌ sila kuhi maglillaꞌ ni kahandak Papuꞌ. Boꞌ nawakka lagi sila madiyoꞌ sagannap ma pataꞌ pinaehe, ma ngantanan kawasa-kapatut langkaw. ⁹Minsan baw Mikail yana disu malaikat langkaw banahan kawasa-kapatut na, yaꞌ du bay nawakka buwat meꞌ sila. Batan jaman Mikail ilay bay magsaggaꞌ ka Ibilis pasal mayat Nabi Musa, yaꞌ du ya bay nawakka madiyoꞌ Ibilis. Ilooy du bay halling na niiya, “Papuꞌ sa bahalaꞌ naggong kau.” ¹⁰Boꞌ ga jama naa ina siꞌ ma pasalluk ni baanan bi, oy-oy pakaradjaan ma yaꞌ tahati da inudjuꞌ jaꞌ meꞌ da. Sibuꞌ du sila ka siga sattuwa yaꞌ luu honaꞌ-honaꞌ da. Ilooy du paabak da meꞌ da nganduwan oy-oy kinanapsuhan meꞌ baran da. Boꞌ ilooy na silay mintu poonan man da binasa.

¹¹Tud siya-siya silay sila bbos-bbos batan iya inikut meꞌ da arat-tabiat si Kayin(1.11a) Si Kayin ilay anak Boꞌ Adam ma siyaka. Ndaun salsila na ni Kitab Tawrat, Panagnaan ni Awwal Jaman 4.1-8. ni awwal jaman. Maka iya inakig meꞌ da arat-tabiat bay jaman si Balaam(1.11b) Ndaun salsila si Balaam ni Kitab Tawrat, Siga Numbul juran 22-24 ka 31.13-16. ma bay nulang kahandak Tuhan ni kamulakab napsu na ni sīn. Maka sibuꞌ du akka da ka Imam Kora(1.11c) Ndaun salsila Imam Kora ni Kitab Tawrat, Siga Numbul 16.1-35. ma bay nulang kapatut Nabi Musa mattoꞌ. Sugaꞌ ngagad na sila, meꞌ Imam Kora du sina mintu sila binasa.

¹²Siga jama naa ina ma nabid kabanahan sibuꞌ du karuha da ka tamak ni badjuꞌ poteꞌ. Tuktuk bi ina kumpo-kumpo mangan-mangan, mmeꞌ sina sila ningkaam bahasa dambuwaꞌ mukalnaꞌ sila ka kaam sikaaseꞌ-kaaseꞌ. Boꞌ ko, maksud da ina ngulihal kasongan para ni dī da sadjaꞌ. Yaꞌ luu tawu da pa Tuhan. Kaap-apan jaꞌ jama meꞌ da. Sibuꞌ du karuha da ka andom ma pingkaꞌ jaꞌ bay tinuran meꞌ baliyu yaꞌ san uwan ni huma. Maka sibuꞌ du karuha da ka poon kayu yaꞌ kuhi buwaꞌ san taabut na timpu na, atawa meꞌ karuha poon kayu tud matoy na ma lay na pungkad. ¹³Pabuwatan da ina kaiyaꞌ-iyaꞌ. Sibuꞌ du karuha da ka lamba dilawut ma sigi-sigi nuran boboꞌ ma kasabu jaꞌ ni tapiyan. Hangat sila magsian jama, subay ga sila potean gaga yaꞌ taasahan man mindoga. Sugaꞌ ndang luu na silay lugar lindom saꞌ na gantaꞌ na bay hinalliꞌ ninsila. Boꞌ yaꞌ na silay mintu sila kapōꞌ mandooy saumu-umu. ¹⁴Kasongan jama meꞌ looy ilay ndang luu bay tinunaꞌ meꞌ Nabi Idris, lalla ma pituꞌ pangkatan owangan na ka Boꞌ Adam. Yuk na, “Indanan bi. Pitu du sina mintu Papuꞌ ddas ka libu-libuhan malaikat na ¹⁵ngahukum mimon manusiyaꞌ. Ngalabuꞌ na sina mintu ya hukuman njataꞌ siga baldusa sabapan mimon tagga pa Tuhan bay pabuwat da sampay mimon bitsala da pangka pasal iya.”

¹⁶Na sila ilay siꞌ ma bay inawnan baldusa ni bay tunaꞌ Nabi Idris, yana sagannap ma nabiat magdubdub ka nusunan jama. Boꞌ na, nabiat gi sila nganduwan napsu da ma maat. Basag sila malangkaw dī da. Maka tigiꞌ gi sila malambu tinga jama supaya luu tahīs da, meꞌ naa, meꞌ naa.

¹⁷Sugaꞌ kaam, siga kakasi ku, intomun bi jaꞌ bay tunaꞌ siga rasul Papuꞌ tabi si Isa Almasi. ¹⁸Saꞌ ba, ndang lay sila halling ningkaam, luu ni sinōng pōꞌ siga pangaludjum ma nganduwan napsu da sadjaꞌ ni jinisan hāl tagga pa Tuhan? ¹⁹Na siga jama ma bay inawnan meꞌ siga rasul looy ilay siꞌ yana sagannap ma mōꞌ pagsaggaan ni baanan bi. Mas hagaan ninsila kahandak da man kahandak Tuhan batan yaꞌ luu Rū Sutsiꞌ njawom atay da.

²⁰Kahapan kaam, siga kakasi ku, saꞌ du meꞌ naa. Sangkon sibuwansang-buwansang na pin kam mari patakkoꞌ na pin pangando bi pa Tuhan. Daa labbahan bi tōꞌ sutsiꞌ ma kinapitsayaan meꞌ tabi. Maka maku na pin kam duwaa pa Tuhan man tabang Rū Sutsiꞌ njataꞌ bi. ²¹Maka subay kam sēng ni aseꞌ Tuhan ningkaam sasang bi ngagad timbang Papuꞌ tabi si Isa Almasi moo kaam pa jawom kasampulnaan nyawa ma yaꞌ luu katapusan na.

²²Na bong luu nnaa pagkahi bi mangando saꞌ mangando ni Papuꞌ Isa, bitsalahan bi sila. Maka daa kam jamu makitahan sila aseꞌ. ²³Kuwan sagannap ma bay magsiꞌ, paintoman bi sila. Bong ina mintu tud bay du sila takoleꞌ mmeꞌ ni bitsala bi, sibuꞌ du sina sila ka bay dagmit bi man jawom api mari salamat. Bong luu pagkahi bi amu-amu buwat dusa, daa du kam jamu makitahan sila aseꞌ. Sugaꞌ iyakin kam taggahaꞌ lay na baw kam mintu kalakkotan meꞌ dusa da. Dusa da ina meꞌ karuha tamak mehe ni badjuꞌ poteꞌ.

Katapusan bitsala si Jūd

²⁴Pudji tabi Tuhan. Iya na sina katabang ningkitabi supaya yaꞌ na kitabi taboo-boo buwat dusa. Damikiyan, iya na du sina kapuwasan dusa tabi supaya yaꞌ na luu sutsutan njataꞌ tabi pag mintu taabut tabi nangge ni awpan sahayaꞌ na. Ndooy ilay mintu ni pag-awpan na, tud gāk na kitabi saꞌ alang-alang. ²⁵Isu-isu iya Tuhan. Maka iya na sina bay nalamat kitabi man sabapan pabuwatan Papuꞌ tabi si Isa Almasi. Kaayaran Tuhan ina yaꞌ luu sibuꞌ sabanding na. Pudji tabi ya. Iya ina Tuhan Mahatinggi, Sangat Kawasa ma magbayaꞌ ni mimon-mimon labba man kapayak alam ngabut batnaa sampay saumu-umu ni sinōng. Amin!

Wassalam