Yaꞌkub

Suwat Lakka man si

Yaꞌkub

Pahati

Kaekahan mista si Yaꞌkub ilay ma bay nuwat kitab tuu, yana disu siyali si Isa Almasi. Sibuꞌ-sibuꞌ nneꞌ da si Mariyam, sugaꞌ kuwan si Isa, saꞌ manusiyaꞌ mmaꞌ na sabap iya bay pinamaddihan man kawasa Rū Sutsiꞌ. Boꞌ si Yaꞌkub, mmaꞌ na si Yusup. Si Yaꞌkub ilay disu pa-mmean baanan sukuꞌ si Isa Almasi ndooy ni Jerusalem.

Katiluan suwat tuu yana mimon sukuꞌ si Isa, awla na bangsa Yahudi ma magkanatan ni kalahat-lahatan.

Ni suwat tuu, luu bay binitsala meꞌ si Yaꞌkub arat-tabiat ga jama ma sabana-bana ngantanan agama. Maka māꞌ du ya bong kitabi mangaku pitsayaꞌ ni Papuꞌ Isa, subay luu buktiꞌ takita ni kawul-piil tabi.

Ni suwat tuu, meka sinabbut pasal jama miskin ka dayahan. Maka binaan du kitabi subay pantay-pantay meꞌ buwat sila. Maka luu gi jinisan palbiatan ni kitab tuu ma kasampulnaꞌ ni nyawa ta.

Ituu bay sinuwatan meꞌ si Yaꞌkub luu na ga sapū pa duwampūꞌ taun paddus si Isa Almasi bay inangkat pa sulgaꞌ.

YAꞌKUB

¹Ituu itu aku, si Yaꞌkub, disu ata Tuhan ka Papuꞌ tabi si Isa Almasi. Itu suwat ku pa mman bi siga sukuꞌ Tuhan ma magkanatan ni kalahat-lahatan, yana kaam ma meꞌ aku du tabeꞌ ni panubuꞌ siga anak Nabi Yaꞌkub sikasapu-duwa. Salam duwaa ningkaam sikamimon.

Palbiatan ni jama njawom kasusahan

²Siga danganakan, bila kam tumabbaꞌ njawom jinisan kasusahan, bilangun bi jaꞌ kagakan. ³Batan kaam pun ina, katoonan bi du katabang ningkaam. Batan luu-luu kasusahan bi ma nuwayan pangando bi pa Tuhan, bong kam amu-amu mangando niiya, malaingkan pataggu na pin sina iman bi natasan oy-oy kamalasahiyan. ⁴Sangkon tatasan bi jaꞌ san gi oy katuwaꞌ ningkaam. Bong siꞌ ina kam natas, pag toklas na, taggu na iman bi ngabut sampay yaꞌ na luu salla ni kawul-piil bi samasakali.

Subay kitabi maku pangahati pa Tuhan

⁵Bong luu ni baanan bi kulang pangahati, maku jaꞌ kam pa Tuhan. Kabuwanan jaꞌ sina kam batan Tuhan ina gāk nabangan mimon jama ma maku niiya. Boꞌ yaꞌ sina luu loog-loog atay na bong kitabi maku. ⁶Sugaꞌ bila kam maku, subay kam tattap manganna nduwan meꞌ Tuhan. Batan jama hawal-hawalan ina, sibuꞌ du karuha na ka parang maghapoy-hapoy meꞌ baliyu. ⁷Jama meꞌ looy ilay, san niyaꞌ na ya ngaholat koleꞌ oy maka oy na man Tuhan, ⁸batan duwa-duwa jaꞌ pamiki na. Bosbos ya mangando pa Tuhan, bosbos niyaꞌ. Oy-oy pabuwat na, yaꞌ luu katantuhan na.

Palbiatan ni jama miskin ka dayahan

⁹Siga danganakan, kaam ma miskin, luu du baw sina man bi gāk san kam miskin batan bong pa Tuhan, kaam jama balkanan.(1.9) Kon da ilay taawnan balkanan sabap sukuꞌ si Isa na sila maka lay na sila inaku meꞌ Tuhan anak.

¹⁰Kuwan kaam ma sawraga, luu du baw sina man bi gāk, batan meꞌ kaam siga sukuꞌ si Isa na, lay na kam magpadiyoꞌ mangasa pa Tuhan, saꞌ na altaꞌ bi asahan bi. Katoonan bi na kaallum bi ka altaꞌ bi sibuꞌ du karuha da ka sumping jambangan, samantalaꞌ du tatas da. ¹¹Boꞌ inawnan jambangan ina, bong kapasuan kalanduꞌ leꞌ mataallaw, mastiꞌ layu jaꞌ sina sampay maglatakan na sumping da. Maka mimon lingkat da lungay du. Siga sawraga pun ina, meꞌ naa du sina karuha da. Njawom da magtuyuꞌ ngusaha, song hallom mastiꞌ matoy du sila, boꞌ yaꞌ du taboo da altaꞌ da.

Pasal kasusahan ka siga sasat

¹²Na sagannap ma amu-amu natas njawom kasusahan ma nuwayan pangando da ni si Isa, mastiꞌ sinupaatan jaꞌ sina. Batan pagka tumatandaꞌ na takkoꞌ pangando da, koleꞌ jaꞌ sina sila kasampulnaan nyawa saumu-umu ma ndang bay njanjiꞌ meꞌ Tuhan ni sagannap ma maaseꞌ niiya.

¹³Na bong luu sasat moo-moo kam buwat dusa, daa kam halling man Tuhan. Batan Tuhan ina yaꞌ nasat manusiyaꞌ. Boꞌ na, niyaꞌ du ya tasasat. ¹⁴Arapun ilooy ya moo sasat ni manusiyaꞌ yana napsu da mismu moo-moo sila buwat kalaatan. ¹⁵Bong ina duwan da napsu da buwat kalaatan, malaingkan dari dusa ninsila. Maka bong kala meꞌ da buwat dusa, pag toklas na, tiksaꞌ nyawa da.

¹⁶Sangkon siga danganakan, kakasi ku, tud magsāꞌ sina kam bong kam mista luu lamud Tuhan ni siga sasat njataꞌ bi. ¹⁷Mmaꞌ tabi Tuhan ina tattap mahap. Mimon ladjikiꞌ sampay kaayaran ma takoleꞌ manusiyaꞌ lakka man ilooy ma bay mapayak mimon sūꞌ taꞌ langit, yana Tuhan. Yaꞌ luu meꞌ na baluba san dangkitiꞌ. ¹⁸Man kahandak na, lay na ya muwanan kitabi kaallum bahau sabap meꞌ tabi pitsayaꞌ ni umanat kabanahan pasal Almasi. Maksud na supaya tumatandaꞌ na kitabi patingkat niiya man mimon-mimon ma bay pinapayak meꞌ na.

Palman Tuhan subay binean

¹⁹Na siga danganakan, kakasi ku, indanan bi. Kitabi itu subay badja pakale. Daa hangat kitabi na jaꞌ mitsala. Maka daa kitabi os-os lasu. ²⁰Batan bong ina jama lasu, yaꞌ luu tapōꞌ da arat-tabiat intong ma nulut ni kahandak Tuhan. ²¹Sangkon labbahan bi na mimon ma katamak ningkaam ka mimon kalaatan ma pinaabak meꞌ jama, boꞌ bi magpadiyoꞌ na pa Tuhan. Maka ngasip na kam ni palman na ma lay na bay inannaꞌ njawom atay bi. Batan palman na ina kasalamat ningkaam. ²²Daa sat pakale jaꞌ kam ni palman na, arapun bean bi du. Batan bong ina yaꞌ bean bi, ngandupang jaꞌ kam dī bi bong kam mista salamat kam. ²³Batan soysoy ina pakale ni palman Tuhan, boꞌ yaꞌ du bean na, sibuꞌ du karuha na ka jama bay jaꞌ nanding dī na ni sammin ²⁴boꞌ yaꞌ san bay intu na. Boꞌ lay jaꞌ ya pōꞌ lumān sampay takupan na na salla ni dagbos na. ²⁵Sugaꞌ soysoy ina maliksaꞌ palman Tuhan paayad sampay tattap mean iya, malaingkan mehe supaat njataꞌ na. Batan palman Tuhan ina, yaꞌ luu salla na samasakali. Boꞌ na, kaboo jama lagi pa jawom kasumunsayaan soysoy ngasip. Daa jaꞌ kita meꞌ kasohean, pus da bay kale palman Tuhan, magti lay du takupan.

Agama sabanna

²⁶Na bong ina kam luu mangaku mag-agama boꞌ yaꞌ san pandoy ngagak behe bi, ngandupang jaꞌ kam dī bi. Agama meꞌ looy ilay yaꞌ luu kapuspusan na. ²⁷Ilooy ya binilang meꞌ Mmaꞌ tabi Tuhan agama sabanna ma yaꞌ luu tamak na, meꞌ tuu: Subay kita nulung ga iluꞌ-iluꞌ iyatin ka ga bawu danda ma njawom tiksaꞌ. Maka subay kita patā man mimon kalaatan ma pinaabak meꞌ siga jama ma yaꞌ ngisbat Tuhan.

Siga sukuꞌ si Isa subay yaꞌ minig

¹Siga danganakan ku, bong kam bana-bana pitsayaꞌ na ni Papuꞌ tabi si Isa Almasi ma tawop pinudji, daa kam minig jama. ²Nnaꞌ ta na, luu duwa jama takka pa langga bi. Disu, lakkop na tangan na meꞌ simsim mmas ka ayad banahan pamakoy na. Boꞌ ilooy disu, miskin maka tud daan pamakoy na. ³Na adakala ilooy du magti hasi bi yana ma ayad pamakoy na. Yuk bi, “Ningkōꞌ ko ntuu ni duhuan.” Boꞌ ilooy ma miskin, sohoꞌ bi jaꞌ ningkōꞌ ni bukutan. ⁴Na bong ina kam sipais, buwat meꞌ looy, saꞌ ga bina oy, minig jaꞌ kam jama. Tud maat pamiki bi batan bandingan bi ilooy ma dayahan mas hagaan man ilooy ma miskin.

⁵Siga danganakan ku, kakasi ku, pakale doꞌ kam niyaku. Siga jama miskin ina subay du pinagmaltabatan batan sila bay pineneꞌ meꞌ Tuhan ngantanan pangando basag niiya. Boꞌ na, tabeꞌ du sina sila ni mimon kaayaran pamarinta Tuhan ma bay njanjiꞌ meꞌ na ni sikamimon ma maaseꞌ niiya. ⁶Sugaꞌ kaam ina, gam pin madiyoꞌ siga jama ma miskin, boꞌ siga sawraga angkat bi. Hati, saꞌ ba, siga sawraga na nakkon kaam sampay malkalaꞌ kaam pa saraꞌ? ⁷Saꞌ ba, sila na nabiat mitsala awon ma patingkat mahap pa kalaatan, yana awon si Isa Almasi ma binean meꞌ tabi? ⁸Sangkon sapatut na subay bogbogan bi na panohoan Tuhan njawom kitab ma puntukan banahan, ilooy ma yuk na, “Kaasean bi pagkahi bi manusiyaꞌ sibuꞌ ka aseꞌ bi ni dī bi.” Na bong siꞌ ina tabogbog bi meꞌ naa, katuwaꞌ na kam. ⁹Sugaꞌ bong ina kam minig jama, malaingkan ndusa sina kam sabap tumatandaꞌ lay langga bi panohoan looy siꞌ.

¹⁰Na siga saraꞌ Tuhan ina tibuuk. San ina jama magtuyuꞌ mogbogan mimon saraꞌ Tuhan, bong luu jaꞌ disu bay talangga na, initung du ya bay ngalangga saraꞌ Tuhan labbasakayi. ¹¹Batan meꞌ tuu situ hantang na, yuk Tuhan, “Daa kam mapatoy jama,” maka yuk na, “Daa kam magjina.” Na san sawpama jama yaꞌ magjina sugaꞌ mapatoy baw ya jama, masi du ya binilang bay ngalangga saraꞌ Tuhan labbasakayi batan tibuuk siga saraꞌ na. ¹²Sangkon labba man bitsala bi sampay tangge-tingkōꞌ bi subay kam mmeꞌ ni panohoan Tuhan looy siꞌ pasal aseꞌ. Panohoan looy ilay, kapaddusan kitabi man hukuman Tuhan. Batan panohoan looy ilay yana pindoga man manusiyaꞌ kalabuan hukuman meꞌ Tuhan atawa niyaꞌ. ¹³Batan pag ina mintu taabut llaw hukuman, soysoy yaꞌ bay manimbang ni pagkahi na manusiyaꞌ, yaꞌ du ya pinanimbangan meꞌ Tuhan. Sugaꞌ sagannap ma bay manimbang, yaꞌ na luu katawuhan da ni llaw hukuman.

Bong kita pitsayaꞌ ni Papuꞌ Isa, subay luu buktiꞌ na

¹⁴Siga danganakan ku, san ina kitabi mangaku pitsayaꞌ ni Papuꞌ Isa, bong yaꞌ du luu buktiꞌ na ni tangge-tingkōꞌ tabi, oy pūs na? Kumpas bi, sinalamat kina meꞌ Tuhan jama ma mangaku pitsayaꞌ minsan yaꞌ luu kaayaran pabuwat da? ¹⁵Nnaꞌ ta na ngita kam disu danganakan bi sukuꞌ si Isa yaꞌ sukup balanjaꞌ maka kulang pamakoy na. ¹⁶Boꞌ ilooy du halling bi, “Kamura-murahan njawom kasannangan du ko. Kamura-murahan sukup du pamakoy nu sampay balanjaꞌ nu.” Na bong meꞌ looy du, oy pūs na bong yaꞌ du kam nulung iya? ¹⁷Damikiyan, bong ina kitabi mangaku pitsayaꞌ ni si Isa, boꞌ yaꞌ du luu kaayaran pabuwat tabi ni pagkahi tabi tandaꞌ hilas meꞌ tabi pitsayaꞌ, malaingkan yaꞌ du luu pūs meꞌ tabi pitsayaꞌ.

¹⁸Na adakala luu na baw halling, “Yaꞌ bina sibuꞌ pamiki jama. Kasohean mista sukup na basta pitsayaꞌ jaꞌ kitabi ni si Isa, boꞌ kasohean mista subay du luu tabeꞌ pabuwatan mahap.”

Na bong aku bay soheꞌ na magbitsala, yuk ku niiya, “Pooy meꞌ ku toon mattan ko pitsayaꞌ bong yaꞌ luu buktiꞌ na ni tangge-tingkōꞌ nu? Boꞌ aku itu, tapakitahan ta ko buktiꞌ ku pitsayaꞌ ni tangge-tingkōꞌ ku.” ¹⁹Maka baan ku ya, “Bong ina sat pitsayaꞌ, yaꞌ sukup. Pamikihan doꞌ paayad. Saꞌ ba, pitsayaꞌ ko disu du Tuhan? Mahap sina. Sugaꞌ minsan ina siga seytan, pitsayaꞌ du meꞌ looy sampay mipig na sila ni katawu da minulkaan bbos-bbos.”

²⁰Na kaam ina, bong kam mista sukup pitsayaꞌ jaꞌ ni si Isa, tud kulang pangahati bi. Subay siꞌ soysoy pitsayaꞌ niiya, mastiꞌ subay gapiꞌ ka siga pabuwatan mahap. Bong ina niyaꞌ, yaꞌ du luu pūs meꞌ na pitsayaꞌ. ²¹Pamintangan bi na bboꞌ tabi Nabi Ibrahim ma bay initung meꞌ Tuhan intong. Saꞌ ba, talbuktiꞌ ya intong sabapan pabuwatan na ngasip ni panohoan Tuhan jaman na bay sinohoꞌ numbaliꞌ anak na si Isahak taꞌ pangulbanan?(2.21) Ndaun Panagnaan ni Awwal Jaman 22.1-14.²²Mandooy ilay tabista tabi na bay jaman Nabi Ibrahim pitsayaꞌ pa Tuhan, lay du bay gapiꞌ ka siga pabuwatan na. Sampay ilooy na man tabi toon tud bana-bana ya pitsayaꞌ. ²³Ilooy ilay siꞌ hatiyan suwat looy njawom kitab, ilooy ma yuk na, “Lay pitsayaꞌ si Ibrahim ni palman Tuhan sampay ilooy na man na bay initung meꞌ Tuhan intong.”(2.23a) Panagnaan ni Awwal Jaman 15.6; Rom 4.3. Boꞌ lay gi ya ginalla bagay Tuhan.(2.23b) Ndaun Kitab Nabi Isaya 41.8.²⁴Dari mandooy siꞌ, tabista tabi na, siga jama ma initung meꞌ Tuhan intong yana sagannap ma luu tangge-tingkōꞌ da muwan buktiꞌ bana-bana meꞌ da pitsayaꞌ. Saꞌ sat sabap sila pitsayaꞌ.

²⁵Pamintangan bi na salsila si Rehab mattoꞌ. Sibuwa ilay, puta ya. Sugaꞌ lay na baw ya initung meꞌ Tuhan intong sabapan bay pabuwatan na nabangan bangsa Yahudi. Batan saꞌ ba, lay na ga ya narapan umu na napuk siga Yahudi ma bay sinohoꞌ mayu-mayuhan daira man na maglahat? Sampay pag taabut da moleꞌ, lay gi sila pakitahan na lān tinūs man da yaꞌ tasungkub.(2.25) Ndaun Kitab si Jasuwa 2.1-21.

²⁶Sangkon, hantak bitsala ku ilay siꞌ, bong inawnan pitsayaꞌ ka tangge-tingkōꞌ ayad, tadalil ta pa baran ka napas. Baran ina, bong yaꞌ magnapas, yaꞌ du luu kapuspusan na. Damikiyan, bong yaꞌ luu tangge-tingkōꞌ tabi ayad, yaꞌ du luu kapuspusan tabi pitsayaꞌ.

Subay agak ta behe ta

¹Siga danganakan ku, mas mahap gi sina bong yaꞌ kalanduꞌ eka bi dari guru. Batan kitabi itu siga guru, mas adil hukuman Tuhan njataꞌ tabi man sagannap ma saꞌ guru. ²Kamasaꞌ kitabi itu manusiyaꞌ, meka jaꞌ du jalan man tabi magsāꞌ, labi na ni bitsala tabi. Bong siꞌ ina luu jaꞌ jama yaꞌ kuhi magsāꞌ mitsala, malaingkan iya jama yaꞌ luu sutsutan niiya. Batan bong ina takaya na ngagak behe na, mastiꞌ takaya na du ngagak baran na labbasakayi. ³Behe ta ina, minsan dikiꞌ, mehe kawasa na. Pamintangan bi na kakkang. Minsan ina dikiꞌ, bong sangon ta ni behe kuraꞌ, malaingkan tapagbayaan ta na baran na labbasakayi batan tapaling ta na paninggai-paninggai karomanan ta. ⁴Damikiyan, sibuꞌ du sina karuha na ka adjung. San mehe kasku adjung sinugan leꞌ baliyu landos, ilooy man maling iya, bbuwatan dikiꞌ du, yana bansān. Dari tapaling na adjung looy paninggai-paninggai karomanan tukang mansān. ⁵Meꞌ naa du sina hantangan behe manusiyaꞌ. Minsan ya kalangkapan dikiꞌ ni baran, ni kabasag na ngabbu, baꞌ-bāꞌ na takaya na buwat jinisan pakaradjaan mehe. Behe ina meꞌ karuha api dikiꞌ. Bong api yaꞌ njagahan, ngalelet na sampay tutung na guwangan mehe. ⁶Damikiyan behe ta pun, bong yaꞌ du njagahan, subay ga api nalkaꞌ ma kabinasa ningkita sampay ni pagkahi ta manusiyaꞌ. Yaꞌ taambat kalaatan tapabuwat meꞌ behe ta. Boꞌ inaa na katamak ni pagkajama ta labbasakayi.

⁷Kitabi itu manusiyaꞌ, takaya tabi magbayaan mimon jinisan sattuwa ka manuk-manuk ka balnyawa ma maglelehan taꞌ gumi sampay mimon balnyawa ni dilawut. ⁸Sugaꞌ kinawnan behe manusiyaꞌ, yaꞌ luu jama bay kapagbayaan behe na supaya yaꞌ mitsala maat. Behe ina os-os jaꞌ mōꞌ kalaatan sampay kabinasa ni jama meꞌ karuha latsun makapatoy. ⁹Bosbos kita makoy behe ta man mudji Mmaꞌ ta Tuhan; bosbos man ta numpaan pagkahi ta manusiyaꞌ ma bay pinapayak ni limbagan arat-tabiat Tuhan. ¹⁰Dari poonan disu du behe, mandooy na pōꞌ pudji ka sumpaꞌ. Sugaꞌ siga danganakan ku, tud yaꞌ silay dari meꞌ looy.

¹¹Pamintangan bi na poon boheꞌ. Yaꞌ sina luu haboy pōꞌ boheꞌ langngin ka boheꞌ maasin. ¹²Damikiyan, yaꞌ sina luu poon igira magbuwaꞌ jaytun, atawa poon anggul magbuwaꞌ igira. Maka yaꞌ du luu jama koleꞌ boheꞌ langngin man dilawut. Damikiyan behe ta pun, yaꞌ du dari bosbos mitsala mahap, bosbos maat.

Arat-tabiat jama halul-akka

¹³Na soysoy kam mista dī bi halul-akka saltaꞌ na ngantanan pangahati lawom, subay buktian bi ka kawul-piil ayad. Boꞌ na, subay diyoꞌ pangatayan bi meꞌ ndang tabiat jama halul-akka. ¹⁴Sugaꞌ bong ina luu dangkiꞌ atawa gigit njawom atay bi atawa pun isu-isu parasahan bi du pinaruli meꞌ bi, daa na kam ngabbu saula-ula luu pangahati bi lawom. Yaꞌ du sina luu kabanahan ni bitsala bi. ^15-16Batan bong ina kita dangkiꞌ atawa baran ta jaꞌ kagampangan ta, mastiꞌ luu jaꞌ paantup kalingogan maka jinisan kalaatan. Akka meꞌ looy ilay, saꞌ ga lakka man Tuhan, arapun lakka man seytan. Maka ilooy ilay akka manusiyaꞌ ma mandang jaꞌ hāl junyaꞌ. ¹⁷Boꞌ jama ma luu pangahati da lawom man Tuhan, duhuꞌ-duhuꞌ, sutsiꞌ kawul-piil da. Pasunuꞌ, tiggo sila ngulihal kasalassayan. Boꞌ na, gampang gi sila ni parasahan jama. Kuhi sila tinoan. Basag sila manimbang ni jama maka mōꞌ sila jinisan kaayaran. Yaꞌ sila minig jama maka arat-tabiat da wā magbēꞌ ka kabanahan ma kinapitsayaan meꞌ da. ¹⁸Boꞌ na, jama meꞌ looy ilay ma tiggo ngulihal kasalassayan, bong dalil ta pa pahuhuma, pagka sila bay naburan kasalassayan, pag toklas na, meka du kaintongan tomoꞌ ni paglahat da.

Poonan pagsaggaan

¹Na ni kapasal pagsaggaan ka pagjawapan ni siga baanan bi, oy ilay bistahan bi poonan na? Saꞌ ba sabap luu napsu bi maat ma magsaggaꞌ ka pamiki bi ma mahap? ²Bila ina luu karomanan bi, boꞌ ya takoleꞌ bi, ilooy ma dangkiꞌ na kam sampay tomoꞌ na dawom bi mapatoy. San ina kam magsaggaꞌ sampay sasaꞌ-manasaꞌ, masi du yaꞌ takoleꞌ bi ilooy ma kinailohan meꞌ bi. Padahal, kon ina yaꞌ takoleꞌ bi bbuwatan ma karomanan bi sabap yaꞌ kam bay maku pa Tuhan. ³Pun sakali lay na kam maku, boꞌ kam yaꞌ bay kabuwanan, pin ilay meꞌ looy sabap yaꞌ mahap niyat atay bi maku. Iya paku bi yana isu-isu pakaradjaan ma masannang dī bi sadjaꞌ. ⁴Bong ina pakaradjaan meꞌ naa paabak bi, yaꞌ kam magkanaalla pa Tuhan. Ilooy ya meꞌ punu njawom atay bi hāl junyaꞌ. Bong yaꞌ katoonan bi, tiyap-tiyap ina pakaradjaan junyaꞌ inisbat meꞌ bi, malaingkan nikutan kam Tuhan maka sibuꞌ du kam ka manta iya. ⁵Daa kam mista suwat njawom kitab meꞌ baliyu pingkaꞌ jaꞌ, ilooy ma yuk na, “Rū ma bay pinaasok meꞌ Tuhan pa jawom atay tabi pangimbu. Kainagon na subay Tuhan numbul satu kinaasean meꞌ tabi.”

⁶Na sasat ni junyaꞌ tuu itu tud basag, sugaꞌ mas basag gi aseꞌ-tabang Tuhan njataꞌ tabi. Sat na jaꞌ, subay diyoꞌ pangatayan tabi. Batan yuk suwat njawom kitab, “Kinuntra meꞌ Tuhan sagannap ma abbuhan, sugaꞌ tabangan na sagannap ma diyoꞌ pangatayan da.”(4.6) Sambatan Jama Halul-akka 3.34.

⁷Sangkon, subay kam wā lillaꞌ ni kahandak Tuhan. Maka saggaun bi siga sasat Ibilis, boꞌ na palakka na mman bi. ⁸Patapit na kam pa Tuhan, boꞌ na patapit pa mman bi. Kaam ma amu-amu buwat dusa, labbahan bi na dusa bi. Kaam ma duwa-duwa pikilan bi, patattogun bi na pamiki bi mmeꞌ ni Papuꞌ. ⁹Man bi nnaa tatto-tatto, gam na kam magtangisan ka magkarukkaan sabapan dusa bi. Man bi nnaa gāk, gam na kam sasso ni dusa bi. ¹⁰Maka magpadiyoꞌ na kam pa Tuhan, boꞌ bi inangkat meꞌ na.

Daa kita os-os manding jama pa kalaatan yaꞌ san luu buktiꞌ ga dusahan sila

¹¹Siga danganakan, daa kam mitsala pagkahi bi pa kalaatan. Bong ina kam buwat meꞌ naa atawa pun os-os manding pagkahi bi pa kalaatan, sat bi saꞌ māꞌ yaꞌ luu pūs saraꞌ Tuhan pasal meꞌ sikaaseꞌ-kaaseꞌ. Sibuꞌ du karuha bi ka bay buwat dī bi magpandoy-pandoy manding saraꞌ Tuhan bong tuwaꞌ atawa niyaꞌ. Boꞌ saꞌ sina sukuꞌ bi manding saraꞌ na. Kaam ina, sukuꞌ bi tinggal ngasip jaꞌ. ¹²Disu du sina poonan saraꞌ maka isu-isu iya huwis sabanna, yana Tuhan. Damikiyan, iya du ngantanan kawasa-kapatut nalamat manusiyaꞌ atawa ngahansu sila. Sangkon subay kam yaꞌ os-os manding pagkahi bi pa kalaatan batan yaꞌ luu kapatut bi ngahukum.

Yaꞌ tatantu ta kaadaan ta ni sinōng

¹³Na adakala mintu ngabbu na baw kam pasal kaadaan bi ni sinōng. Pakale doꞌ kam. Kasohean ina, yuk da, “Sumawung atawa murambuwaꞌ lome doꞌ kami pa disu daira ngusaha. Ndooy na doꞌ kami dantaun maglitu, boꞌ kami magkadayahan.” ¹⁴Na salla na, yaꞌ san katoonan bi bong oy katuwaꞌ kaam sumawung-sumilan. Kaallum bi ina meꞌ karuha humbu du, batan samantalaꞌ du luu, pag-anu, lanyap du. ¹⁵Subay siꞌ gam na meꞌ tuu halling bi, “Bong malaingkan mintu kami tinugutan du meꞌ Tuhan sampay binuwanan umu, meꞌ tuu, meꞌ tuu pabuwat kami.” ¹⁶Sugaꞌ kasohean baw kam ina, ngabbu jaꞌ kam saula-ula kaam magbayaꞌ ni mimon-mimon. Boꞌ ko, maat silay ngabbu meꞌ looy.

¹⁷Indanan bi. Soysoy ina toon bong oy pataꞌ subay pabuwat na, boꞌ yaꞌ isbat na, ndusa sina ya.

Kasusahan ni jama dayahan

¹Na kuwan kaam ma dayahan ma mumpung altaꞌ para ni dī bi sadjaꞌ, ituu bitsala ku ningkaam. Subay kam magtangisan sampay mag-ulawi sabapan kamalasahiyan ma song takka pa mman bi bbos-bbos. ²Altaꞌ bi ina ma bay nnaꞌ bi, gabuk jaꞌ. Siga pamakoy bi pun ma bay nnaꞌ bi, kineket jaꞌ meꞌ mananap. ³Damikiyan, mmas ka pilak porol ma bay pumpung bi, ginahaꞌ jaꞌ du. Boꞌ inaa na sina mintu tandaꞌ bi bay magnapsu mulakab pag taabut llaw hukuman bbos-bbos. Lagiꞌ na, napsu mulakab bi ina mintu kabinasa na ni baran bi meꞌ karuha api katutung ni oy-oy taabut na. ⁴Kaam ina, saꞌ ba, yaꞌ san pinōꞌ meꞌ bi gadji sagannap jama ma bay buwat ni tanaꞌ bi, labba man siga ilooy ma ngalabas pa ilooy ma ngattom? Daa kam mista ga yaꞌ takale Tuhan Sangat Kawasa bitsala da magdubduban kaam. ⁵Kaam ina, lay jaꞌ ngumpohan dī bi altaꞌ ka nganduwan oy-oy jaꞌ ma kinanapsuhan meꞌ bi ntuu ni junyaꞌ. Sibuꞌ du karuha bi ka sapiꞌ pinalammok yaꞌ san tabista na song sinumbaliꞌ na ya. ⁶Luu gi sina kam bay kaaku malkalaꞌ jama ma yaꞌ san luu dusa da sampay man da pinapatoy sabapan bi. Boꞌ yaꞌ san luu dapat da ngatu.

Siga sukuꞌ Papuꞌ Isa subay natasan kabinsanaan

⁷Na kuwan kaam siga danganakan, bong hati kam bininsanaꞌ, tatasan bi jaꞌ halloman bi ngagad katakka Papuꞌ. Akigun bi jaꞌ pasensiya siga pahuhuma ngagad buwaꞌ tinanom da. Pus da bay tanom, agad da jaꞌ du uwan sibuwa ngabut sampay katapusan panguwan, boꞌ da ngattom. ⁸Kaam pun, subay du luu pasensiya bi ngagad. Patagguhun bi iman bi mmeꞌ ni Papuꞌ tanne-pasuꞌ batan tapit na sina katakka na.

⁹Siga danganakan, daa kam mitsala pagkahi bi pa kalaatan taggahaꞌ kalabuan na baw kam mintu hukuman. Batan tapit na sina katakka Huwis looy ma Patingkat. Dari ko ngawon, luu na ya nangge ni poan lawang bi.

¹⁰Na siga danganakan, ni kapasal tatas njawom kabinsanaan, ikutun bi jaꞌ bay kadarihan siga kanabi-nabihan ma bay malahil palman Tuhan mattoꞌ. Atas da bay natasan jinisan kabinsanaan kalnaꞌ Tuhan. ¹¹Siga sukuꞌ Tuhan meꞌ sila ilay ma bay natas njawom kabinsanaan, katoonan tabi na du, pag toklas na, sinupaatan sila. Pamintangan bi na Boꞌ Job. Bay du taaka bi bong pooy ehe tatas na naggaan jinisan kamalasahiyan mattoꞌ. Damikiyan, tasayu bi na du bong pooy ehe supaat bay hinudhuran meꞌ Tuhan niiya ni katapusan. Dari mandooy, tabista tabi na, basta pannoꞌ atay Tuhan leꞌ luuy ka timbang ningkitabi.

Katapusan palbiatan si Yaꞌkub

¹²Siga danganakan, luu gi situ bāꞌ ku puntukan banahan ningkaam. Subay kam yaꞌ napa. Meꞌ kitabi itu sukuꞌ si Isa, pagka kitabi bonto, san kitabi yaꞌ na napa batan yaꞌ kitabi maluba bitsala tabi. Sangkon, daa na kam napa ni awon sulgaꞌ atawa junyaꞌ atawa awon oy maka oy na. Bong yuk bi, “Ohoꞌ,” saddong ohoꞌ sadjaꞌ. Bong yuk bi, “Niyaꞌ,” saddong niyaꞌ sadjaꞌ. San daa na kam napa, taggahaꞌ dari laat bi na baw ni bandingan Tuhan.

¹³Bong luu ni baanan bi tuwaꞌ kasusahan, subay ya maku tabang pa Tuhan. Kuwan kaam baw ma njawom kagakan, subay kam ngalang pudji pa Tuhan. ¹⁴Bong luu kam bay tuwaꞌ saki, subay nohoꞌ kinaddoan siga pa-mmean langga nohoꞌ makuhan iya duwaa pa Tuhan. Njawom da maku duwaa, subay sila muusan bumbunan na ka insallan ni awon Papuꞌ Isa. ¹⁵Na bong ina tud mangando du siga pa-mmean bi pa Tuhan ngabbul duwaa da, malaingkan kaulian jaꞌ sina jama looy ma saki. Maka pinabalik na sina anggawtaꞌ na meꞌ Papuꞌ. Maka bong luu dusa na lay na akuhan na ni pag-awpan da, inampun na du sina ya meꞌ Papuꞌ. ¹⁶Sangkon bong kam bay kapabuwat dusa, subay du kam mangaku ni pagkahi bi sampay sipaku-paku duwaa supaya kam kaulian meꞌ Tuhan.

Na bong ina jama intong maku duwaa pa Tuhan, mastiꞌ kawasahan jaꞌ duwaa na. ¹⁷Pamintangan bi na bay jaman Nabi Eliyas. Iya ilay meꞌ kitabi du manusiyaꞌ sadjaꞌ. Ni kaintong na, jaman na bay maku duwaa pa Tuhan yaꞌ nohoꞌ uwan, yaꞌ du bay uwan lahat njawom tallun taun ka nnom buwan. ¹⁸Pag-anu siꞌ, lay na baw ya maku duwaa pabalik mari uwan na lahat. Dari lai du bay uwan palandos sampay lay na tomoꞌ pabalik katumbu-tumbuhan maka luu na balik balanjaꞌ ni lahat da.

¹⁹Siga danganakan ku, bong luu ni baanan bi bay magsiꞌ man kabanahan, boꞌ luu kam disu bay moo iya mmeꞌ ni kabanahan pabalik, tud mahap sina. ²⁰Batan subay katoonan bi, bong ina luu jama bay takoleꞌ bi nohoꞌ ngalabbahan siga dusa na, lay na ya paddusan bi man jawom katiksaan nyawa. Dari san bay meka dusa na, lay na puwas.

Ngkod tuu jaꞌ bitsala ku. Wassalam