Hibrani

Suwat pa mman siga

Hibrani

Pahati

Kitab tuu tu yaꞌ kinatoonan bong soy bay nuwat. Sugaꞌ katoonan tabi baw ituu bay pinokonan pa mman disu baanan bangsa Yahudi ma pitsayaꞌ ni si Isa Almasi. Jaman kitab tuu bay sinuwatan, siga Yahudi pinag-awnan bangsa Hibrani. Maka pinag-awnan du sila bangsa Israil.

Jaman looy ilay, kuwan siga Hibrani ma pitsayaꞌ ni si Isa, wā nilaugan meꞌ pagkahi da Hibrani ma yaꞌ pitsayaꞌ. Dari lay sila pinokonan suwat tuu man mataggu iman da sampay man maintoman sila yaꞌ luu lān pa Tuhan sarī man si Isa Almasi.

Njawom suwat tuu, duhuꞌ-duhuꞌ pinaintoman sila si Isa Almasi yana Anak Tuhan. Yaꞌ luu panagnaan na maka yaꞌ luu katapusan na. Maka pagka iya Anak Tuhan, mastiꞌ patingkat ya man mimon kanabi-nabihan sampay siga malaikat. Maka njawom kitab tuu, binaan du sila si Isa Almasi yana panghuluꞌ imam ma asahan tabi. Damikiyan, iya du poonan man manusiyaꞌ luu na dapat da mahap na pa Tuhan.

Maka njawom suwat tuu, min lima na siga Hibrani ma mmeꞌ ni si Isa bay inamay-amayan yaꞌ nohoꞌ ngalabbahan pangando da ni Papuꞌ Isa.

Kitab tuu itu, yaꞌ tatantu ta bong sumilan bay sinuwatan. Meꞌ kaekahan mista, yaꞌ gi ngabut tallumpuꞌ-siyam taun paddus si Isa Almasi bay inangkat pa sulgaꞌ.

HIBRANI

Anak Tuhan patingkat man mimon malaikat

¹Maruhuꞌ, njataꞌ kanabi-nabihan man Tuhan bay masampay siga umanat na ni kabboꞌ-bboan tabi. Boꞌ kajinisan na jalan man Tuhan bay masampay siga umanat na ninsila kaniya-kaniya ka masa da. ²Sugaꞌ ni masa batnaa, yana ni ahil jaman, Anak na na mismu man Tuhan bay masampay umanat na ningkitabi. Anak na ilay, ilooy na man Tuhan bay mapayak alam sikamimon. Damikiyan man gantaan Tuhan, Anak na du dapu mimon-mimon. ³Maka njataꞌ Anak na, takita tabi na kawasa ka kaayaran Mmaꞌ na Tuhan, batan iya sabana-bana limbagan arat-tabiat Tuhan. Pooy-pooy kadari Tuhan, meꞌ naa du sina Anak na. Boꞌ Anak na ina magbayaan mimon-mimon ni sikaliput alam man kawasa palman na mari yaꞌ pulak-palik. Maka iya ilay bay muwasan dusa tabi mari kitabi sutsiꞌ na pa Tuhan. Pus meꞌ looy, lay na ya pabeleng pa sulgaꞌ boꞌ na ningkōꞌ ni bihing Tuhan Sangat Kawasa huwin pa kawnan. ⁴Sangkon tumatandaꞌ na langkaw kapatut na man siga malaikat. Boꞌ ginalla gi ya meꞌ Tuhan ka awon mas langkaw man ninsila. ⁵Buktiꞌ na langkaw gi ya man siga malaikat, luu palman njawom kitab, ilooy ma yuk Tuhan ni Almasi,

“Kau ina Anak ku. Labba man llaw tuu tumatandaꞌ na aku Mmaꞌ nu.”(1.5a) Kitab Jabul 2.7.

Boꞌ siga malaikat ina, yaꞌ luu san disu bay pingkaꞌ ginalla meꞌ looy. Damikiyan, saꞌ du silay malaikat awnan Tuhan jaman na bay magpalman, ilooy ma yuk na,

“Aku na Mmaꞌ na, maka iya na Anak ku.”(1.5b) Kitab ni Kaduwa Lakka man Nabi Samwel 7.14.

⁶Lagiꞌ na, taabut Tuhan bay mapitu Anak Tungga na pa junyaꞌ, yuk na,

“Mimon malaikat ku subay numba iya.”

⁷Boꞌ pasal siga malaikat, yuk Tuhan,

“Siga malaikat ina sosohoan ku sadjaꞌ ma tasohoꞌ ku padari baliyu landos atawa pun api ngallab bong ku doman.”(1.7) Kitab Jabul 104.4.

⁸Boꞌ ni Anak na ina, yuk Tuhan,

“Meꞌ kau ina Tuhan, mastiꞌ natas saumu-umu pagkasultan nu. Maka intong jaꞌ meꞌ nu marintahan siga raayat nu.

⁹Tud kasulutan ko ni kaintongan, sugaꞌ dugahan ko ni mimon kalaatan. Sangkon aku itu, yana Tuhan nu, bay muwanan kau kagakan ka kabantugan labi man sikamimon.”(1.9) Kitab Jabul 45.6-7.

¹⁰Maka luu gi bay halling njawom kitab pasal Anak Tuhan, ilooy ma yuk na,

“Papuꞌ, ndang katoonan ku kau bay mapayak junyaꞌ ka mimon taꞌ langit ka tangan nu.

¹¹Tabista ku du ilooy siꞌ sikamimon meꞌ karuha badjuꞌ song padaan na. Bbos-bbos lanyap jaꞌ du. Sugaꞌ kau wā luu saumu-umu.

¹²Bbos-bbos, llogoran na meꞌ nu gumi ka langit meꞌ karuha badjuꞌ daan llogoran sampay tinimanan, boꞌ ginantian ka bahau. Sugaꞌ kau, yaꞌ ko halin saumu maka yaꞌ luu katapusan umu nu.”(1.12) Kitab Jabul 102.25-27.

¹³Maka disu gi tandaꞌ Anak Tuhan patingkat man siga malaikat meꞌ tuu: Sila ilay, yaꞌ luu san disu bay baan Tuhan meꞌ bay halling na ni Anak na, ilooy ma yuk na,

“Ningkōꞌ na ko ni bihing ku huwin pa kawnan boꞌ nnaꞌ ku mimon banta nu ni diyoꞌ pāt battis nu.”(1.13) Kitab Jabul 110.1.

¹⁴Boꞌ siga malaikat ina sosohoan Tuhan sadjaꞌ sinohoꞌ ngayaran mimon manusiyaꞌ ma koleꞌ kasalamatan man Tuhan.

Ehe hagaꞌ kasalamatan

¹Na pagka meꞌ looy na ehe hagaꞌ Anak Tuhan, subay kanna tabi umanat na, taggahaꞌ lay na baw mintu kitabi patā man kabanahan. ²Mamintang kam ni siga saraꞌ Tuhan ma bay pinasampay meꞌ siga malaikat ni Nabi Musa. Saꞌ ba, talpaksaꞌ binogbogan meꞌ kabboꞌ-bboan tabi? Batan soysoy ilay bay ngalangga saraꞌ, lay du pinidjalaꞌ pinagsitawop ka bay dusa da. ³Na bong meꞌ looy bay katuwaꞌ ninsila, pooy meꞌ tabi kailag mulkaꞌ Tuhan bong pabiya tabi umanat kasalamatan, meꞌ naa na ehe hagaꞌ na? Umanat looy ilay, Papuꞌ Isa mismu bay duhuꞌ masaplag. Pag-anu, kuwan sila ma bay kale niiya balharapan, sila na baw bay masaplag sampay muwanan kitabi buktiꞌ tud bana bitsala na. ⁴Batan lay sila binuwanan meꞌ Tuhan kawasa mōꞌ jinisan pabuwatan kahaylan-haylan tandaꞌ mawjud umanat da pasal Almasi. Sampay lay gi sila binuwanan ladjikiꞌ man Tuhan, yana jinisan kapandoyan man Rū Sutsiꞌ gantaꞌ ma numan ni kahandak Tuhan.

Ehe kabantugan si Isa Almasi

⁵Na ni kapasal junyaꞌ bahau ma bay sabbut ku nsiniꞌ, saꞌ silay mintu siga malaikat binuwanan meꞌ Tuhan kapatut marinta ndooy, arapun manusiyaꞌ du. ⁶Boꞌ sikatuwaꞌ du ka suwat njawom kitab, ilooy ma yuk na,

“Tuhan, meꞌ noy doꞌ tu hagaꞌ manusiyaꞌ, taggahaꞌ subay na pin kami kinagampangan meꞌ nu? Jayip ku wā kami kinanna meꞌ nu.

⁷Bana na, ndang bay ginantaꞌ meꞌ nu subay manusiyaꞌ diyoꞌ dangkitiꞌ man siga malaikat samantalaꞌ. Sugaꞌ pag batnaa, lay na sila buwanan nu sanglit ka kabantugan meꞌ kadari sultan.

⁸Boꞌ lay gi nnaꞌ nu mimon-mimon ndiyoan kawasa-kapatut da.”(2.8) Kitab Jabul 8.4-6.

Na tiyap-tiyap halling njawom kitab mimon-mimon inannaꞌ ndiyoan kawasa-kapatut manusiyaꞌ, hati na, yaꞌ luu saꞌ yaꞌ tapagbayaan meꞌ da. Bana na, yaꞌ lagi baw bay manyatakan mimon-mimon ndiyoan kawasa-kapatut da san sila pinamāꞌ magbayaꞌ ni mimon-mimon. ⁹Sugaꞌ mindoga doꞌ kitabi ni si Isa. Iya ilay bay du ginantaꞌ diyoꞌ man siga malaikat samantalaꞌ. Kon na ilay meꞌ looy supaya ya lumingkaꞌ doꞌ njawom kabinsanaan sampay matoy kalnaꞌ manusiyaꞌ sikamimon, tandaꞌ aseꞌ Tuhan ninsila. Dari sabap bay ya nongan umu na man na nanggung dusa tabi, lay na hinudhuran njataꞌ na pudji ka kabantugan mehe.

¹⁰Na Tuhan ina bay mapayak mimon-mimon maka iya dapu mimon-mimon. Boꞌ na, iya du bay bagaraꞌ subay meka manusiyaꞌ dari anak na hampit ni ehe kabantugan na. Pag-anu, man na majatu garaꞌ na, bay ya mapitu Anak na. Boꞌ lay gi bay ginantaꞌ meꞌ Tuhan subay Anak na ngalingkaan kabinsanaan supaya ya tawop binuwat pa-mmean tabi ka poonan kasalamatan tabi. ¹¹Dari pagka si Isa bay nutsiꞌ atay tabi, tibuuk na kitabi ka iya. Sangkon Mmaꞌ na ina, yana Mmaꞌ tabi na du. Dari ilooy na silay kon si Isa yaꞌ iyaꞌ ngawnan kitabi ga danganakan na. ¹²Buktiꞌ na, luu njawom kitab bay halling na ni Mmaꞌ na, ilooy ma yuk na,

“Baan ku siga danganakan ku pasal ehe kaayaran nu. Bila kami kumpo-kumpo, ngalang ku siga kalangan pudji ningkau.”(2.12) Kitab Jabul 22.22.

¹³Maka bay gi ya halling,

“Tikmod ku pangando ku njataꞌ Tuhan.”(2.13a) Kitab Nabi Isaya 8.17.

Damikiyan, lay du ya halling,

“Itu na kami ka siga anak Tuhan ma bay hinalap meꞌ na niyaku.”(2.13b) Kitab Nabi Isaya 8.18.

¹⁴Na sila ilay siꞌ ma bay awnan Almasi siga anak Tuhan yana manusiyaꞌ. Dari Almasi ilay bay du padari manusiyaꞌ supaya tapaglillaꞌ na baran na pinapatoy kalnaꞌ kitabi. Dari atas na bay matoy supaya talangkat na kawasa Ibilis njataꞌ tabi. Batan Ibilis ilay ndang man panagnaan lagi poonan kapatoy ni manusiyaꞌ. ¹⁵Maka Almasi ilay bay matoy supaya talakkahan na na tawu tabi ni kapatoy, yana tawu ma meꞌ sapantun bay mahata kitabi halloman tabi llum. ¹⁶Sangkon tumatandaꞌ na saꞌ silay maksud Almasi bay pitu nabang siga malaikat. Arapun iya bay pitu nabang kitabi ma initung anak Nabi Ibrahim.(2.16) Njawom kitab, soysoy pitsayaꞌ ni si Isa initung anak Nabi Ibrahim. Ndaun Galatiya 3.29 ka Rom 4.16-17.¹⁷Sangkon talpaksaꞌ ya bay dari manusiyaꞌ meꞌ karuha kitabi du siga danganakan na. Maka talpaksaꞌ du ya ngalingkaan jinisan kamalasahiyan manusiyaꞌ supaya takissa na parasahan tabi. Boꞌ na, bay tinakdil niiya meꞌ looy supaya ya tawop binuwat panghuluꞌ imam ma kanaalla ni hāl Tuhan, maka supaya tasongan na umu na man muwasan mimon dusa tabi. ¹⁸Sarī gi, sabap bay ya lumingkaꞌ njawom jinisan katiksaan ka siga sasat seytan, ilooy na man na pandoy nabang mimon manusiyaꞌ ma sinasat.

Si Isa Almasi patingkat man Nabi Musa

¹Na siga danganakan ku, yana sukuꞌ Tuhan, kaam ina, meꞌ aku na du, lay na lliyun meꞌ Tuhan pa jawom okoman na. Sangkon kannahun bi na si Isa ma pinagbāꞌ meꞌ tabi ni manusiyaꞌ iya rasul Tuhan ka panghuluꞌ imam ma asahan tabi. ²Iya ilay bay magkanaalla majatu mimon ma bay hinalap meꞌ Tuhan niiya. Dansusun du karuha na ka bay jaman Nabi Musa bay magkanaalla ngayaran mimon ma ginalla jama lumaꞌ Tuhan. ³Sugaꞌ kuwan si Isa, tawop pinaehe labi man Nabi Musa meꞌ karuha tukang buwat lumaꞌ mas tawop pinaehe labi man lumaꞌ bay patangge na. ⁴Yaꞌ sina luu lumaꞌ bong yaꞌ luu tukang matangge. Damikiyan, yaꞌ du luu oy maka oy na bong saꞌ Tuhan bay mapayak ka palman na.

⁵Na kuwan Nabi Musa ilay, kanaalla bay ngayaran siga sukuꞌ Tuhan meꞌ karuha tindog ngayaran jama lumaꞌ bōs na. Bay pabuwatan na ilay yana sipat ni siga pakaradjaan ma pinalahil meꞌ Tuhan ni batnaa. ⁶Boꞌ Almasi baw ilay, saꞌ ya tindog meꞌ karuha Nabi Musa, arapun iya ilay tud Anak Tuhan mismu kanaalla magtakōk ni siga jama lumaꞌ Mmaꞌ na. Boꞌ kitabi na situ initung jama lumaꞌ Tuhan basta tattap jaꞌ pangando tabi ni Almasi, maka basta yaꞌ jaꞌ kitabi jamu ngagad ni mimon ma bay njanjiꞌ meꞌ Tuhan ni siga sukuꞌ na.

Sagannap ma yaꞌ doman pitsayaꞌ ni si Isa, mehe kalugian da

⁷Sangkon subay kanna tabi suwat njawom kitab, yana panohoan Rū Sutsiꞌ ningkitabi, ilooy ma yuk na,

“Llaw tuu, bong kam kale suwara Tuhan, ⁸daa na patohasun bi kōk bi meꞌ kadari jaman kabboꞌ-bboan bi bay nulang kahandak Tuhan. Bbuwatan da sigi-sigi malasu iya ndooy ni lahat lau-lau, batan yaꞌ sila kuhi ngasip niiya.”

⁹Yuk Tuhan pasal sila,

“San meka na pabuwatan kahaylan-haylan bay pinōꞌ meꞌ ku ninsila, masi sila bay nuway-nuwayan pasensiya ku meꞌ da yaꞌ ngasip.

¹⁰Sangkon tud bay lasu ku ninsila. Mpatpūꞌ taun na ku bay natasan arat da meꞌ looy ndooy ni lahat lau-lau. Ndaꞌ ku, jawom atay da, doman jaꞌ sila magsiꞌ. Tud bay awam sila ni kahandak ku ka arat-tabiat ku.

¹¹Dari ni kalasu ku, lay na ga sila subalihan ku, basta yaꞌ na sila padari ku paasok pa jawom pahaliyan ku.”(3.11) Kitab Jabul 95.7-11. Pahaliyan Tuhan ma yaꞌ bay taasok meꞌ kabboꞌ-bboan bangsa Yahudi yana Kanan, disu lahat ayad ma bay hinalliꞌ meꞌ Tuhan ninsila ni bay jaman Nabi Musa. Sugaꞌ Kanan ilay yana sipat sadjaꞌ ni pahaliyan sabanna ma taasok na ni batnaa leꞌ sagannap ma mmeꞌ ni si Isa Almasi. Meꞌ kasohean ngahati pahaliyan sabanna looy, yana kagakan ka kasannangan jawom atay ma takoleꞌ meꞌ sagannap ma pitsayaꞌ ni palman Tuhan ka mean kahandak Rū Sutsiꞌ.

¹²Sangkon siga danganakan, iyakin kam taggahaꞌ luu laat njawom pamiki bi moo kam yaꞌ pitsayaꞌ ni kabanahan sampay man bi na nikutan Tuhan sabanna ma llum saumu. ¹³Sangkon llaw pa dangallaw, padpad luu gi waktu, sipaintom-paintom na pin kam supaya kam yaꞌ tadupang meꞌ napsu bi sampay man bi kapagdusa. Ilagan bi dī bi taggahaꞌ patohas na baw kōk bi sampay man bi yaꞌ na kuhi mean kahandak Tuhan. ¹⁴Basta ina yaꞌ jaꞌ labbahan tabi pangando tabi ni Almasi ngabut sampay pa katapusan, mastiꞌ hampit jaꞌ kitabi ni mimon supaat na.

¹⁵Sangkon, daa na takupan tabi ilooy ma bay sabbut ku siꞌ man jawom kitab, ilooy ma yuk na,

“Llaw tuu, bong kam kale suwara Tuhan, daa na patohasun bi kōk bi meꞌ kadari jaman kabboꞌ-bboan bi bay nulang kahandak Tuhan.”(3.15) Kitab Jabul 95.7-8.

¹⁶Kitabi itu, ndang katoonan tabi na du, tud lay takale kabboꞌ-bboan tabi suwara Tuhan jaman da bay binoo meꞌ Nabi Musa palakka man Ejip. Salla na, yaꞌ sila kuhi mean kahandak Tuhan. ^17-18Sangkon tud bay lasu Tuhan ninsila njawom mpatpūꞌ taun jaman looy. Dari man sabapan bay kadarihan da yaꞌ bay ngasip ni kahandak Tuhan, lay na sila subalihan Tuhan yaꞌ na dari paasok saumu pa jawom pahaliyan ma bay halliꞌ na ninsila. Pag toklas na, lay na jaꞌ sila matoy ndooy ni lahat lau-lau yaꞌ maglumaꞌ. ¹⁹Maka tabista tabi na du, poonan da yaꞌ bay kapaasok sabap yaꞌ sila pitsayaꞌ ni palman Tuhan ninsila.

Luu pahaliyan ni sagannap ma pitsayaꞌ

¹Na san meꞌ looy bay katuwaꞌ ni kabboꞌ-bboan tabi, masi du situ luu pahaliyan ni timpu batnaa ma bay njanjiꞌ meꞌ Tuhan ndean siga sukuꞌ na. Sugaꞌ paliksaun bi doꞌ dī bi bong tud luu na kam njawom pahaliyan looy, taggahaꞌ luu na pin kam yaꞌ gi bay paasok. ²Batan kitabi pun itu, lay na du kale umanat mahap pasal pahaliyan bay hinalliꞌ ningkitabi meꞌ karuha umanat bay takale leꞌ kabboꞌ-bboan tabi. Sat na jaꞌ kuwan ninsila, yaꞌ sila bay kapaasok sabap yaꞌ sila bay pitsayaꞌ ni umanat Tuhan ninsila. ³Boꞌ ningkitabi, sagannap ma pitsayaꞌ, kapaasok na pa jawom pahaliyan ma bay hinalliꞌ meꞌ Tuhan ni sukuꞌ na. Boꞌ sagannap ma yaꞌ pitsayaꞌ ina, niyaꞌ luu dapat da paasok. Mamintang jaꞌ kam ni bay halling Tuhan pasal kabboꞌ-bboan tabi ma yaꞌ bay pitsayaꞌ, yuk na,

“Ni kalasu ku ninsila, lay na ga sila subalihan ku, basta yaꞌ na sila padari ku paasok pa jawom pahaliyan ma bay hinalliꞌ meꞌ ku ninsila.”(4.3) Kitab Jabul 95.11.

Ni sabana na, inawnan pahaliyan ilay, ndang luu na bay pinanyap jaman Tuhan bay mapayak mimon-mimon. ⁴Batan yuk njawom kitab,

“Pag taabut ni kapituꞌ ngallaw, lay na Tuhan pahali, batan lay na magjatu mimon pabuwatan na.”(4.4) Panagnaan ni Awwal Jaman 2.2.

⁵Sangkon, indanan bi na palman ma bay sabbut ku siꞌ pasal jama ma yaꞌ pitsayaꞌ, ilooy ma yuk Tuhan,

“Basta yaꞌ na sila padari ku paasok pa jawom pahaliyan ma bay hinalliꞌ meꞌ ku ninsila.”

⁶Kon ilay Tuhan bay magpalman meꞌ looy batan kabboꞌ-bboan tabi ilay, san lay na binaan umanat mahap pasal pahaliyan looy sampay sinohoꞌ paasok, yaꞌ du sila bay ngasip. Sugaꞌ ni masa batnaa, luu na pahaliyan sarī. Maka bukaꞌ na lawang na man manusiyaꞌ paasok. ⁷Sangkon, amay-amay bean tabi na suwat njawom kitab, ilooy ma yuk na,

“Llaw tuu, bong kam kale suwara Tuhan, daa na patohasun bi kōk bi.”

Bitsala looy ilay siꞌ bay sinuwatan meꞌ Nabi Daud hatusan taun na paddus bay jaman kabboꞌ-bboan tabi yaꞌ ngasip ni Tuhan. Maksud suwat Nabi Daud ilay man mahati ni jama luu gi masa sarī bay ginantaꞌ meꞌ Tuhan man manusiyaꞌ kapaasok pa jawom pahaliyan na, yana batnaa na situ.

⁸Dari katoonan tabi na, pahaliyan sabanna saꞌ silay ndooy ni Kanan man si Jasuwa(4.8) Si Jasuwa ilay bay kawakilan meꞌ Tuhan magtakōk ni bangsa Israil, gantiꞌ Nabi Musa. bay moo kabboꞌ-bboan tabi. Bong siꞌ ilay ndang lahat looy pahaliyan sabanna bay awnan Tuhan, mastiꞌ yaꞌ na ya bay mahati ni jama ga luu gi masa bay ginantaꞌ meꞌ na man manusiyaꞌ paasok pa jawom pahaliyan na. ⁹Sangkon pag batnaa, tabista tabi na luu na pahaliyan sarī man siga sukuꞌ Tuhan paasok ni timpu batnaa. Dari luu na du dapat tabi pahali meꞌ karuha Tuhan bay pahali ni kapituꞌ ngallaw pus na bay mapayak mimon-mimon. ¹⁰Na soysoy ina bay paasok pa jawom pahaliyan sabanna ma bay hinalliꞌ meꞌ Tuhan ni sukuꞌ na, malaingkan patagong na sila mangasa ni hulas-sangsāꞌ da magtaat man da initung intong. Dari ko ngawon, bohoꞌ da kapahali ni bay pabuwatan da meꞌ karuha Tuhan bay pahali pus na bay mapayak mimon-mimon. ¹¹Sangkon, daa na kitabi paagak paasok pa jawom pahaliyan looy. Daa na kitabi ngakig kabboꞌ-bboan tabi ma yaꞌ bay pitsayaꞌ ka yaꞌ bay ngasip ni palman Tuhan taggahaꞌ sampay kitabi pun yaꞌ na du kapaasok.

¹²Na palman Tuhan ina kawasahan boꞌ kabuwan gi kaallum bahau. Dari ko ngawon, palman na tawom gi man kataliꞌ batan ngassob sina pa jawom atay tabi sampay pa nyawa tabi. Maka palman na ina, inaa na man tabi mindoga bong mahap atawa maat pamiki tabi ka niyat atay tabi. ¹³Tuhan ina yaꞌ talimbuhan. Mimon-mimon mastiꞌ takita na jaꞌ. Boꞌ na, iya na sina mintu man tabi paawop magsabanna ni mimon bay pabuwat tabi.

Si Isa panghuluꞌ imam tabi ma asahan tabi

¹⁴Lipara luu du panghuluꞌ imam asahan tabi ma yaꞌ luu sibuꞌ sabanding na, lay na duhuꞌ pilay pa sulgaꞌ, yana si Isa Almasi, Anak Tuhan. Sangkon, subay yaꞌ labbahan tabi ilooy ma kinapitsayaan meꞌ tabi pasal iya. ¹⁵Meꞌ iya ina panghuluꞌ imam tabi, tahati na kulang kawasa manusiyaꞌ man naggaꞌ siga sasat seytan. Takissa na parasahan tabi sabap iya mismu lay du lumingkaꞌ ni jinisan sasat seytan meꞌ karuha ningkitabi du. Sat na jaꞌ kuwan niiya, yaꞌ luu dusa na samasakali. ¹⁶Dari pagka luu na panghuluꞌ imam asahan tabi ma yaꞌ luu sibuꞌ sabanding na, daa na kitabi loman maku tabang pa Tuhan yana poonan aseꞌ. Batan iya ina manimbang ningkitabi maka iya du muwanan kitabi tabang sumilan-sumilan gunahan ningkitabi.

¹Na maruhuꞌ, tuktuk luu panghuluꞌ imam bay pineneꞌ binuwat wakil bangsa Yahudi, iya na bay utusan da pa Tuhan. Iya tukang nong jakat ka siga kulban pa Tuhan supaya taampun Tuhan na siga Yahudi ni bay dusa da. ²Maka panghuluꞌ imam ina, takissa na parasahan siga raayat na bong luu bay magsiꞌ ni kaawam da, batan iya pun luu du salla na. ³Maka pagka dusahan du ya, sarī man nong siga kulban para ni siga raayat na, talpaksaꞌ du ya nong kulban para ni dī na.

⁴Ni hāl meꞌ meneꞌ panghuluꞌ imam, yaꞌ dari jama meneꞌ dī na ni ntan bantug meꞌ looy. Ilooy du dari meneꞌ yana Tuhan mismu meꞌ bay karuha jaman na bay meneꞌ Imam Harun.(5.4) Imam Harun ilay yana kakaꞌ Nabi Musa. Iya bay duhuꞌ-duhuꞌ pineneꞌ meꞌ Tuhan binuwat panghuluꞌ imam ni bangsa Hibrani.⁵Damikiyan Almasi pun, yaꞌ du ya bay meneꞌ dī na panghuluꞌ imam man na maehe dī na. Ilooy ya bay meneꞌ iya yana Tuhan, batan bay magpalman Tuhan niiya,

“Kau ina Anak ku. Labba man llaw tuu tumatandaꞌ na aku Mmaꞌ nu.”(5.5) Kitab Jabul 2.7.

⁶Maka yuk Tuhan niiya,

“Kau ina imam saumu-umu. Pagkaimam nu meꞌ karuha pagkaimam si Melkisedek.”(5.6) Kitab Jabul 110.4. Si Melkisedek ilay panghuluꞌ imam ni bay jaman Nabi Ibrahim. Ndaun Panagnaan ni Awwal Jaman 14.18-20.

⁷Na jaman si Isa ntuu ni junyaꞌ, daran ya maku duwaa maka tamūd njawom duwaa na ngattap na ga boheꞌ mata na sambayan na killahap. Bbuwatan na nganjunjung pa Tuhan batan isu-isu Tuhan kasalamat iya man kapatoy na. Dari sabap iya jama lillaꞌ jaꞌ pa Tuhan, lay du bay pinaruli duwaa na.(5.7) Hati na, pag patoy si Isa, lay du ya pinakallum pabalik tandaꞌ lay du pinaruli duwaa na. Ndaun Kitab Jabul 21.2-5.⁸Iya ilay, san ya Anak Tuhan, lay du ya lumingkaꞌ njawom jinisan kabinsanaan supaya takissa na parasahan manusiyaꞌ mean kahandak Tuhan tanne-pasuꞌ. ⁹Dari pagka wā ya mmeꞌ ni kahandak Tuhan, tandaꞌ yaꞌ luu salla na, lay du ya dari poonan kasalamatan ma natas saumu-umu para ni sikamimon ma ngasip niiya. ¹⁰Sampay lay gi ya pineneꞌ meꞌ Tuhan binuwat panghuluꞌ imam meꞌ karuha pagkaimam si Melkisedek.

Palbiatan ni sagannap ma yaꞌ gi taggu iman da

¹¹Sarī man naa, meka gi situ siꞌ karomanan ku tinōꞌ ningkaam, sugaꞌ yaꞌ mura-mura meꞌ mahatiyan kaam sabap bilod kam. ¹²Bistahun bi doꞌ, hallom looy na kam bay mmeꞌ ni si Isa, subay siꞌ pandoy na kam noan jama. Boꞌ kaam itu, subay na pin pinagbalik-balik tinoan hāl Tuhan ma subay siꞌ ndang katoonan bi na. Sibuꞌ du karuha bi ka anak-anak ma subay na pin pinaduruꞌ, yaꞌ gi kakakan sumbalian. ¹³Jama ina ma masi kulang pangahati da ni palman Tuhan pasal kaintongan, sibuꞌ du karuha da ka anak-anak dikiꞌ subay na pin pinaduruꞌ. ¹⁴Boꞌ jama ma nganna sampay tattap mean kabanahan, malaingkan biyasa na sila nilang tōꞌ ma mahap ka tōꞌ palsu. Sila ilay meꞌ sapantun jama mehe na ma takaya da na mangan sumbalian.

¹Sangkon, ddong na kitabi kataddasan ni tōꞌ ma ndang lay na takoleꞌ tabi jaman tabi bahau bay mmeꞌ ni Almasi. Palanja na kitabi pa pangahati lawom mari pataggu na iman tabi. Ibaratan buwat lumaꞌ, bong kita lay na matangge tehang, san kita yaꞌ na matangge pabalik. Hati na, san yaꞌ na pagsibalik-balik tabi tōꞌ ma ndang katoonan tabi na. Awnan ku ilay siꞌ yana hāl meꞌ sapantun nawbatan dusa, pangando pa Tuhan, ²ka hāl mandi, hāl nappak bumbunan jama maka hāl meꞌ manusiyaꞌ pinakallum pabalik sampay hāl meꞌ Tuhan motangan hukuman ma natas saumu-umu njataꞌ manusiyaꞌ. ³Sangkon, bong siꞌ nugut jaꞌ Tuhan, sampunan tabi na pangahati tabi ni hāl Tuhan ^4-6mari song patakkoꞌ na pin pangando tabi ni Almasi. Batan bong ina jama lay na ngalabbahan pangando da niiya, siya-siya sila.

Bistahun bi doꞌ, lay na sila pingkaꞌ pinadantaan pamiki da, maka lay na takissa da kaayaran ladjikiꞌ(6.4-6) Ladjikiꞌ ma inawnan yana si Isa Almasi atawa Rū Sutsiꞌ atawa kasalamatan njataꞌ si Isa Almasi. (Ndaun Yahiya 4.10 maka Salsila siga Rasul si Isa Almasi 1.4 ka Epesus 2.8.) man sulgaꞌ ma yaꞌ luu sibuꞌ sabanding na. Sampay lay na sila pinaasokan Rū Sutsiꞌ. Sarī gi, lay na sila ngissa kaayaran ma bay njanjiꞌ njawom palman Tuhan. Sampay lay na sila ngissa kawasa njataꞌ da sasang da njawman pamarinta Tuhan ma bahau jaꞌ takka ni masa tuu. Na bong ilay ga jama meꞌ looy lay na patatak, tunmanūn na silay meꞌ da pinatawbat balik sabap sibuꞌ du sila ka bay ngalansang Anak Tuhan taꞌ tehang pabalik. Batan man sabapan da, awon si Isa binuwat na ga kalabbiyan.

⁷Na kitabi itu manusiyaꞌ meꞌ kadari huma njawom panguwan. Kasohean tanaꞌ ni huma looy mura jaꞌ inassob. Boꞌ na, tinanom na buwaꞌ jaꞌ paayad. Tanaꞌ meꞌ looy ilay mehe kapansahaliyan na ni jama ma bay tanom. Boꞌ na, sinupaatan gi meꞌ Tuhan. ⁸Sugaꞌ kasohean tanaꞌ ni huma looy gam pin katomoan lumput itingan. Tanaꞌ meꞌ looy ilay yaꞌ luu pūs na. Pag toklas na, sinumpaan sampay tinunu na ddas ka tinanom na.

⁹Siga kakasi ku, san ku ilay siꞌ bay halling meꞌ looy, ni bistahan ku, saꞌ baw lay tuwaꞌ pa kaam meꞌ karuha tanaꞌ looy ma yaꞌ luu pūs na. Batan tatantu ku iya pabuwat bi kaayaran ma sikatuwaꞌ ka jama ma salamat na. ¹⁰Tuhan ina intong. Sangkon mimon kaayaran bay pabuwat bi yaꞌ luu takupan na. Takita na du sina aseꞌ bi niiya sabap meꞌ bi nabang ni siga pagkahi bi sukuꞌ si Isa ngabut sampay batnaa. ¹¹Kainagon kami itu tiggohan bi na pin buwat meꞌ naa halloman bi llum supaya tantu takoleꞌ bi mimon ma hinolat meꞌ bi man Tuhan. ¹²Ngkon ina kam paintoman ku supaya kam yaꞌ jamu makutuꞌ kahandak Tuhan. Akigun bi jaꞌ sagannap ma yaꞌ jamu mangando pa Tuhan sampay natasan jinisan kasusahan kalnaꞌ iya. Jama meꞌ sila ina, takoleꞌ da siga supaat bay janjiꞌ Tuhan ni sukuꞌ na.

Janjiꞌ Tuhan siguru tinuman

¹³Intomun bi bay jaman Tuhan nganjanjiꞌ ni Nabi Ibrahim. Taabut Tuhan napa, pagka yaꞌ luu awon langkaw labi man niiya, lay na jaꞌ ya napa makoy awon na mismu. ¹⁴Janjiꞌ na ni Nabi Ibrahim, yuk na,

“Supaatan ta ko maka buwanan ta ko panubuꞌ lipat man lipat.”(6.14) Panagnaan ni Awwal Jaman 22.16-17.

¹⁵Dari siꞌ, pagka yaꞌ bay kuhi jamu Nabi Ibrahim pitsayaꞌ san ya bay hallom ngagad, lay du bay takoleꞌ na ilooy ma bay njanjiꞌ niiya.

¹⁶Na tabiat manusiyaꞌ bong sila doman kinapitsayaan, napa sila ni awon Tuhan batan basag gi kawasa na man ninsila. Dari pus da napa, yaꞌ na luu pagjawapan da. ¹⁷Tuhan pun, kainagon na subay tumatandaꞌ du yaꞌ kuhi baluba bay janjiꞌ na ni siga sukuꞌ na. Sangkon lay du ya bay napa. ¹⁸Dari luu duwa pakaradjaan ma yaꞌ tabaluba saumu, yana janjiꞌ Tuhan ka sapa na. Batan tunmanūn meꞌ Tuhan karapatan. Sangkon kitabi ma lay na paasok pa jawom okoman Tuhan, yaꞌ na maglumba meꞌ tabi ngaholat koleꞌ mimon ma bay janjiꞌ Tuhan ningkitabi. ^19-20Holat tabi ina meꞌ karuha bahudjiꞌ ngagot ni tanaꞌ diyoꞌ mari kitabi yaꞌ usik man okoman Tuhan. Kon luu holat tabi batan luu na pag-asa tabi, yana si Isa Almasi. Iya ilay panghuluꞌ imam tabi. Boꞌ pagkaimam na ina sibuꞌ karuha na ka ni si Melkisedek, yaꞌ luu katapusan na. Si Isa ilay lay na duhuꞌ man kitabi paasok pa jawom Lugar Pinakasutsiꞌ ni pag-awpan Tuhan mari kitabi mahap na pa Tuhan. Sangkon yaꞌ na kitabi alang-kapalang paawop pa Tuhan.

Pagkaimam si Melkisedek

^1-2Na si Melkisedek ilay yana sultan ndooy ni disu daira inawnan Salam mattoꞌ. Maka imam du ya man kahandak Tuhan Mahatinggi. Iya na silay bay nampang ga Nabi Ibrahim lān da moleꞌ bay maā siga sultan ka baanan sundalu da ni bonoꞌ mehe. Boꞌ iya gi man Nabi Ibrahim bay muwan sabahagiꞌ sapū ni mimon altaꞌ ma bay takoleꞌ na paddus bonoꞌ looy. Maka lay gi ya nupaatan Nabi Ibrahim.

Na hatiyan awon Melkisedek ilay yana “sultan intong”. Maka ginalla du ya “Sultan Kasannangan” sabap awon daira na yana Salam, hatiyan na kasannangan. ³Si Melkisedek ilay saꞌ meꞌ kaimaman ilooy kasohean. Yaꞌ luu induꞌ-mmaꞌ na atawa usuwan kabboꞌ-bboan na. Damikiyan, kaallum na yaꞌ du luu panagnaan na maka yaꞌ du luu katapusan na. Batan meꞌ Anak Tuhan du ya mag-imam saumu-umu.

⁴Bistahun bi doꞌ ehe kapatut si Melkisedek. Minsan Nabi Ibrahim pinakatanyag ni kabboꞌ-bboan tabi bangsa Yahudi, lay gi ya nong sabahagiꞌ sapū ni mimon altaꞌ bay takoleꞌ ni bonoꞌ looy ni si Melkisedek.

⁵Na bong ni saraꞌ Nabi Musa, ilooy du bay inuwakilan mag-imam yana sagannap siga panubuꞌ si Libay.(7.5) Si Libay ilay yana disu njawom sikasapu-duwa anak Nabi Yaꞌkub ma lalla. Kuwan Nabi Yaꞌkub, yana anak Nabi Isahak, yana anak Nabi Ibrahim. Maka sila du bay inuwakilan nambut sabahagiꞌ sapū ni bay usaha siga pagkahi da panubuꞌ Nabi Ibrahim. ⁶Sugaꞌ ni waktu ga Nabi Ibrahim ka si Melkisedek bay sitammu, kuwan pagkaimam si Libay, yaꞌ gi luu sabap lawak kaduhuan jaman ga Nabi Ibrahim man si Libay. Dari san si Melkisedek saꞌ panubuꞌ si Libay, ndang iya na mman Nabi Ibrahim bay nong sabahagiꞌ sapū. Pag-anu, lay gi ya nupaatan Nabi Ibrahim.

Na Nabi Ibrahim ilay, san iya na bay njanjian meꞌ Tuhan, ⁷tumatandaꞌ patingkat gi si Melkisedek man iya. Batan tiyap-tiyap ina jama ngantanan kapatut nupaat, mastiꞌ langkaw gi ya man ilooy ma supaatan na.

⁸Sarī gi, ni kapasal siga panubuꞌ si Libay ma bay binuwat imam sampay magpanambut sabahagiꞌ sapū man siga raayat da, luu gi du masa da matoy. Boꞌ si Melkisedek, yuk njawom kitab, llum ya saumu-umu. ⁹Lagiꞌ na, dari ko ngawon, minsan si Libay mismu, yana bboꞌ kaimaman ma magpanambut sabahagiꞌ sapū, tabilang du ya bay tabeꞌ ni Nabi Ibrahim bay nong sabahagiꞌ sapū ni si Melkisedek. ¹⁰Batan jaman Nabi Ibrahim bay sitammu ka si Melkisedek, san yaꞌ gi bay pinamaddihan si Libay, bilang ndang isi Nabi Ibrahim na du ya batan Nabi Ibrahim yana bboꞌ tuut na.

Pagkaimam siga panubuꞌ si Libay ginantian ka pagkaimam meꞌ ni si Melkisedek

¹¹Na ni bay jaman saraꞌ bay ndean Nabi Musa, si Harun ka ga pagkahi na panubuꞌ si Libay bay inuwakilan mag-imam. Maka bay sinukuꞌ ninsila noan siga raayat da saraꞌ. Sugaꞌ pagkaimam da yaꞌ bay kasutsiꞌ ni pangatayan siga raayat da. Bong siꞌ ilay bay na takaya meꞌ pagkaimam ga si Harun nutsiꞌ pangatayan jama, san Tuhan yaꞌ na bay nganggantian pagkaimam da ka pagkaimam meꞌ ni si Melkisedek. ¹²Sangkon pagka lay na ginantian pagkaimam siga panubuꞌ si Libay, damikiyan saraꞌ da pun subay du ginantian.

^13-14Na pagkaimam man bay nganggantiꞌ yana pagkaimam Papuꞌ tabi si Isa Almasi. Pagkaimam na ilay, tumatandaꞌ sarī na batan panubuꞌ si Juda ya, saꞌ ya panubuꞌ si Libay. Boꞌ halloman kabboꞌ-bboan tabi njawman saraꞌ, yaꞌ bay luu san disu panubuꞌ si Juda bay pingkaꞌ mag-imam. Sarī gi, jaman Nabi Musa mitsala hāl imam, yaꞌ du bay sabbut na paglūng si Juda. ¹⁵Lagiꞌ na, tumatandaꞌ gi lay na ginantian pagkaimam siga panubuꞌ si Libay sabap luu na bay pōꞌ panghuluꞌ imam bahau ma sibuꞌ du karuha na ka si Melkisedek. ¹⁶Awnan ku Papuꞌ tabi si Isa. Maka meꞌ na bay dari imam, saꞌ man poonan usuwan meꞌ ilooy ma bay tinaat njawom saraꞌ. Arapun iya bay dari imam sabapan kaallum na ma yaꞌ luu katapusan na, tandaꞌ ehe kawasa na. ¹⁷Boꞌ sikatuwaꞌ du ka palman njawom kitab pasal Almasi, ilooy ma yuk Tuhan,

“Kau ina imam saumu-umu. Pagkaimam nu sibuꞌ du karuha na ka pagkaimam si Melkisedek.”(7.17) Kitab Jabul 110.4.

¹⁸Sangkon subay tahati tabi, bong inawnan pagkaimam maruhuꞌ ddas ka jinisan saraꞌ na, lay na ginantian meꞌ Tuhan sabap yaꞌ luu kawasa na nalamat manusiyaꞌ. Maka yaꞌ na luu kapansahaliyan na. ¹⁹Batan yaꞌ luu njawom saraꞌ ma kasutsiꞌ ni pangatayan manusiyaꞌ supaya sila mahap na pa Tuhan. Sangkon lay na Tuhan muwanan kitabi pag-asa mas mahap man saraꞌ man tabi mahap na niiya. ^20-21Pag-asa tabi ina yana si Isa Almasi. Iya ilay, taabut na bay inuwakilan magpanghuluꞌ imam ma asahan tabi, lay gi Tuhan napa, yuk na ni Almasi,

“Aku itu Magbayaꞌ. Sapahan ku na, basta kau na imam saumu-umu. Boꞌ yaꞌ na situ baluba ku.”

Boꞌ siga imam lakka man panubuꞌ si Libay ilay, yaꞌ bay pingkaꞌ sapahan Tuhan meꞌ looy jaman da bay binuwat imam. ²²Dari sabapan sapa Tuhan, lay na si Isa dari poonan man tabi katantu luu na pagsulutan bahau antaraꞌ Tuhan ka siga sukuꞌ na. Boꞌ tā biddaꞌ kaayaran na man pagsulutan sibuwa.

²³Na maruhuꞌ, meka panubuꞌ si Libay bay pingkaꞌ mag-imam, batan tuktuk luu disu matoy, luu na baw pasunuꞌ gantiꞌ na. ²⁴Boꞌ pagkaimam si Isa ilay, yaꞌ na luu gantiꞌ na sabap llum ya saumu-umu. ²⁵Sangkon, tapajatu na na banahan nalamat sagannap ma doman mahap na pa Tuhan, basta sila pitsayaꞌ jaꞌ niiya. Iya ilay llum saumu-umu maka wā ya makuhan sila timbang pa Tuhan.

²⁶Danan si Isa ilay tawop binuwat panghuluꞌ imam ma asahan tabi sabap sutsiꞌ ya. Yaꞌ luu sutsutan njataꞌ na maka yaꞌ luu tamak na. Yaꞌ ya bay pingkaꞌ mmeꞌ meꞌ uwahan siga baldusa. Maka sa langkaw-langkaw langit, mas langkaw gi kabantugan na ka kapatut na. ²⁷Yaꞌ ya sibuꞌ ka kaimaman panubuꞌ si Libay ma subay na pin nongan kulban pa Tuhan llaw-llaw. Bbuwatan da duhuꞌ nong para ni dusa da mismu, boꞌ da nong para ni dusa siga raayat da. Boꞌ ni si Isa ilay, sakayi labba du ya bay nongan umu na bilang kulban para ni dusa mimon manusiyaꞌ. San yaꞌ na binalikan saumu. ²⁸Boꞌ sagannap ma bay inuwakilan magpanghuluꞌ imam njawman saraꞌ Nabi Musa, saliꞌ-saliꞌ sila manusiyaꞌ sadjaꞌ ma ndang dusahan pa Tuhan. Kahapan, hallom maka hallom na, lay na baw Tuhan napa subay Anak na inuwakilan magpanghuluꞌ imam saumu. Boꞌ Anak na ina yaꞌ luu dusa na atawa salla na samasakali.

Panghuluꞌ imam ma asahan tabi ka pagsulutan bahau antaraꞌ Tuhan ka sukuꞌ na

¹Na hantak bitsala ku ilay siꞌ, luu na panghuluꞌ imam asahan tabi ma lay na ningkōꞌ ni bihing Tuhan Sangat Kawasa huwin pa kawnan ndooy ni sulgaꞌ. ²Ndooy na ya mag-imam ni Lugar Pinakasutsiꞌ, yana langga sabanna ma bay pinatangge meꞌ Tuhan, saꞌ bay pinatangge meꞌ manusiyaꞌ. ³Dari pagka ndang tinaat ni soysoy panghuluꞌ imam nong siga jakat ka ga kulban pa Tuhan, malaingkan subay du luu sinongan pa Tuhan meꞌ panghuluꞌ imam ma asahan tabi.

⁴Na bong siꞌ ilay Almasi masi gi luntuu taꞌ junyaꞌ, yaꞌ du ya kapag-imam batan bay tinaat njawom saraꞌ Nabi Musa, isu-isu panubuꞌ si Libay dari mag-imam ni langga sampay nong siga jakat pa Tuhan. ⁵Sugaꞌ langga looy ilay ni junyaꞌ sampay siga taat kaimaman mattoꞌ yana bay sipat sadjaꞌ man nabangan kitabi ngahati hāl Tuhan. Sangkon, yaꞌ gi ga Nabi Musa bay buwat langga da ndooy ni lahat lau-lau yaꞌ maglumaꞌ, yuk Tuhan niiya,

“Amay-amay subay sibuꞌ banahan hātan na ka mimon bay pakitahan ku kau ndooy taꞌ punu.”(8.5) Kitab Tawrat, Kalakka 25.40.

⁶Na inawnan pabuwatan ma bay hinalap meꞌ Tuhan ni si Isa mag-imam, mas hagaan man pabuwatan kaimaman maruhuꞌ. Damikiyan, pagsulutan ma bay pinōꞌ meꞌ si Isa antaraꞌ Tuhan ka sukuꞌ na, mas hagaan du man pagsulutan sibuwa. Batan siga pakaradjaan bay janjiꞌ Tuhan ni pagsulutan tuu ma bahau, mastiꞌ mas mahap man siga ilooy ma bay njanjiꞌ ni pagsulutan sibuwa. ⁷Bong siꞌ ilay yaꞌ bay luu kulang pagsulutan sibuwa, malaingkan yaꞌ na silay bay ginantian ka pagsulutan bahau. ⁸Sugaꞌ ndang katoonan Tuhan luu kulang pagsulutan sibuwa. Sangkon yuk na,

“Luu sina masa ni sinōng buwanan ku siga panubuꞌ si Israil ka siga panubuꞌ si Juda(8.8) Si Israil meꞌ Tuhan ngawnan Nabi Yaꞌkub. Kuwan si Juda ilay, disu anak na. Boꞌ si Isa yana panubuꞌ si Juda. Soysoy mmeꞌ ni si Isa initung siga panubuꞌ si Israil ka si Juda. pagsulutan bahau.

⁹Boꞌ yaꞌ na sina mintu sibuꞌ hantang na ka pagsulutan kami ka kabboꞌ-bboan da jaman da bay pagmundaan ku pōꞌ man Ejip. Jaman looy ilay, yaꞌ sila bay kanaalla mogbogan pagsulutan kami. Sangkon bay sila tikutan ku.

¹⁰Na pagsulutan kami ina mintu ka siga panubuꞌ si Israil meꞌ tuu karuha na: Nnaꞌ ku na sina mintu siga saraꞌ ku njawom pamiki da. Maka suwatan ku na njawom atay da.(8.10) Hatiyan na, bbos-bbos pinaasokan na sila Rū Sutsiꞌ ma muwanan sila pangahati ni kahandak Tuhan sampay gaos ka dawom mean kahandak na. Aku na sina mintu Tuhan da maka sukuꞌ ku na sila.

¹¹Dari yaꞌ na sina mintu sila husaꞌ noan pagkahi da atawa ga danganakan da pasal aku. Batan labbasakayi sila ndang lungbid na sina mintu ka aku, balkanan saꞌ balkanan.

¹²Ni waktu looy, panimbangan ku na sina mintu sila san meka kalaatan da. Yaꞌ na intom ku dusa da.”(8.12) Kitab Nabi Jeremaya 31.31-34.

¹³Na pagka Tuhan bay māꞌ luu pagsulutan bahau pasunuꞌ bbos-bbos, hatiyan na, sōng katis na timpu pagsulutan sibuwa. Dari yaꞌ na luu kapansahaliyan na.

Langga bangsa Israil mattoꞌ

¹Na njawom pagsulutan sibuwa ilay, luu siga aturan bong pooy meꞌ kabboꞌ-bboan tabi numba. Maka luu du langga ma bay pabuwat da ka kuwit hayop. ²Na njawom langga looy ilay siꞌ, luu duwa bilik na. Kuwan ilooy ma duhuꞌ inasok, ginalla Bilik Sutsiꞌ. Ndooy ilay, luu palitaan ka lamisahan man da magpangannaꞌ tinapay ma sinongan pa Tuhan. ³Man jama paasok pa jawom bilik looy luu kultina. Maka ndooy ni kokan bilik looy luu du kultina ni sallangan bilik looy ka bilik ni kaduwa na ma ginalla Bilik Pinakasutsiꞌ. ⁴Njawom Bilik Pinakasutsiꞌ luu lamisahan mmas man nunu bbūg. Maka luu du ndooy baul ginalla Baul Pagsulutan bay nilangkupan ka mmas pa jawom pa poan. Njawom baul looy luu disu katsaꞌ mmas isihan makanan inawnan manna.(9.4a) Manna yana makanan meꞌ dagbos bastilaꞌ kayu ginigi bay llabuꞌ meꞌ Tuhan man taꞌ langit man makan bangsa Israil ni palanan da mattoꞌ. Maka luu du tungkud Imam Harun ma bay pingkaꞌ pinasuring meꞌ Tuhan.(9.4b) Tungkud Imam Harun yana disu njawom sapu-duwa tungkud siga pa-mmean bangsa Israil bay inannaꞌ njawom langga da dambahangi. Yuk Tuhan ni Nabi Musa, “Soysoy tungkud na nuring, iya na lalla ma peneꞌ ku binuwat panghuluꞌ imam bangsa Israil.” Pag sayu, takita da na tungkud si Harun du bay nuring, boꞌ ddas gi ka buwaꞌ na tahak lagi. Maka luu du njawom baul looy siga batu pepan looy ma duwa bay man nuwatan siga panohoan Tuhan ni Nabi Musa. ⁵Ni tangkop baul looy luu duwa jama-jama siawop ginalla Serabim Sahayaꞌ Tuhan. Sila ilay yana sipat luu Tuhan ndooy. Saliꞌ-saliꞌ luu pikpik da bay pinabakkut pa duhuan da man namingan tangkop baul looy ma ginalla Lugar Kaampunan. Tangkop looy ilay, ndooy na man mesekan lahaꞌ kulban supaya inampun na meꞌ Tuhan bangsa Israil ni bay dusa da. Sugaꞌ ddong na doꞌ ku nuntutan kaam hāl meꞌ looy batnaa.

⁶Dari meꞌ looy na silay siꞌ kadari njawom langga looy mattoꞌ. Kuwan siga imam, bbuwatan da llaw-llaw paasok pa jawom bilik looy ma duhuꞌ buwat ma bay tinaat ninsila. ⁷Sugaꞌ bong ni bilik ni kaduwa, yana Bilik Pinakasutsiꞌ, bāꞌ njawom saraꞌ Nabi Musa, yaꞌ luu dari paasok sarī man panghuluꞌ imam, boꞌ sakayi du njawom dantaun. Maka taabut na paasok, subay luu boo na lahaꞌ kulban sinongan pa Tuhan para ni dusa na mismu ka dusa siga raayat na, dusa ma tasayu sampay ma niyaꞌ.

⁸Dari sabap meꞌ looy siꞌ, pinalahil na meꞌ Rū Sutsiꞌ ningkitabi inaa halloman jama njawman pagsulutan sibuwa, yaꞌ luu dapat da paasok pa jawom Lugar Pinakasutsiꞌ ni awpan Tuhan. ⁹Sarī gi, langga looy ilay mattoꞌ sampay mimon ma tinaat ndooy yana siga sipat sadjaꞌ ni siga pakaradjaan ma bay binakbul njataꞌ Almasi bbos-bbos. Batan ni sabana na, san jama bay nong siga jakat ka kulban pa Tuhan, masi du yaꞌ bay kasutsiꞌ ni atay da. Sangkon masi luu njawom honaꞌ-honaꞌ da ga dusahan gi sila pa Tuhan. ¹⁰Sarī gi, siga aturan ma bay bogbogan da ilay tuwaꞌ pa hāl ma yaꞌ ngotab pa jawom atay, meꞌ sapantun aturan hāl makanan ka inuman sampay jinisan pandihan. San pooy meꞌ mogbogan siga aturan meꞌ looy, yaꞌ du kasutsiꞌ ni atay. Sugaꞌ talpaksaꞌ baw ninsila mogbog ngkod-ngkoran yaꞌ gi bay pinasampay pagsulutan bahau.

Lahaꞌ si Isa yana kasāhan ni pagsulutan bahau antaraꞌ Tuhan ka manusiyaꞌ

¹¹Lipara, bay na pitu Almasi sampay lay ya dari panghuluꞌ imam ma asahan tabi. Dari takissa tabi na siga supaat poonan pagsulutan bahau ma bay pinasampay meꞌ na. Kuwan langga man na bay paasok mag-imam, patingkat man langga kabboꞌ-bboan tabi. Langga ma bay asok na, yaꞌ luu kulang na sabap saꞌ manusiyaꞌ bay matangge. Intong na, saꞌ silay meꞌ siga pakaradjaan ni junyaꞌ tuu. ¹²Dari meꞌ Almasi bay paasok ni Lugar Pinakasutsiꞌ ndooy ni sulgaꞌ, yaꞌ na ya bay moo lahaꞌ kambing atawa lahaꞌ sapiꞌ lalla. Iya bay boo na, yana lahaꞌ na mismu. Maka iya bay paasok, sakayi labba du, saꞌ na meꞌ karuha siga panghuluꞌ imam mattoꞌ talpaksaꞌ taun pa taun paasok ni Bilik Pinakasutsiꞌ. Maka man sabapan lahaꞌ na bay tumpa, lay ya nanggung mimon dusa manusiyaꞌ supaya luu na lawang man da salamat saumu-umu.

¹³Maruhuꞌ, njawman aturan pagsulutan sibuwa, bila baran jama tamakan sabap meꞌ da bay kasagid mayat atawa bay buwat haram, subay sila sinutsiꞌ. Meꞌ nutsiꞌ sila, subay pinesekan baran da meꞌ imam ka lahaꞌ kambing ka lahaꞌ sapiꞌ lalla sampay abu sapiꞌ danda ma bay tinunu. ¹⁴Na bong lahaꞌ hayop kasutsiꞌ, labi na bong lahaꞌ Almasi saꞌ kasutsiꞌ. Batan lahaꞌ Almasi ina kasutsiꞌ sampay ni honaꞌ-honaꞌ tabi ma bay tamakan sabap meꞌ tabi bay maabak jinisan ma katiksaꞌ ni nyawa tabi. Dari man kawasa Rū Sutsiꞌ ma luu saumu-umu, lay na Almasi nongan umu na pa Tuhan bilang kulban ma yaꞌ luu salla na. Kon na buwat meꞌ looy supaya bean tabi na kahandak Tuhan.

¹⁵Sangkon Almasi ilay, iya na bay mōꞌ pagsulutan bahau antaraꞌ Tuhan ka sukuꞌ na. Batan ni jataꞌ kapatoy na, lay na puwasan na mimon dusa tabi bay ngalangga siga saraꞌ ni pagsulutan sibuwa. Dari sagannap ma bay lliyun pa jawom okoman Tuhan, takoleꞌ da na mimon supaat ma ndang bay njanjiꞌ meꞌ Tuhan ni sukuꞌ na. Sila ina meꞌ sapantun jama bay koleꞌ pusaka mehe ma natas saumu.

¹⁶Na jama altaan ina, bong bay buwat suwat pusaka, meꞌ tuu aturan na: Subay lai na ya matoy boꞌ takoleꞌ pusaka na meꞌ jama ma bay pineneꞌ pinusakahan njawom suwat. ¹⁷Batan yaꞌ gi sina llum kapatut suwat wakil pusaka ngkod-ngkoran yaꞌ gi bay matoy jama ma dapu altaꞌ.

¹⁸Damikiyan, ni hāl pagsulutan sibuwa antaraꞌ Tuhan ka ga sukuꞌ na ni bay jaman Nabi Musa, subay du luu bay matoy boꞌ na sā pagsulutan looy. Dari siꞌ, luu du bay matoy, yana hayop bay sinumbaliꞌ supaya sā pagsulutan looy. Meꞌ tuu salsila na: ¹⁹Pag lupus Nabi Musa bay matsahan siga raayat na saraꞌ ni pagsulutan sibuwa, kitab saraꞌ looy sampay mimon raayat na lay bay pesekan na ka lahaꞌ siga sapiꞌ lalla ka lahaꞌ siga kambing bay sinakotan boheꞌ. Man na bay mesek, batang jambangan hisop bay llagotan bū bili-bili bay inakket. ²⁰Njawom Nabi Musa mesekan sila, yuk na, “Lahaꞌ tuu tu yana kasāhan ni pagsulutan ma bay sohoꞌ Tuhan binogbogan ningkaam.” ²¹Pag-anu siꞌ, lay gi pesekan na langga looy ma bay pinabuwat ka kuwit hayop sampay mimon kalangkapan na ma pinagpakoy jawom da numba Tuhan. ²²Batan sabana na, bong ni saraꞌ Nabi Musa, agon mimon-mimon subay pinesekan lahaꞌ boꞌ taawnan sutsiꞌ pa Tuhan. Maka bong ina yaꞌ luu lahaꞌ bay pinaduwai, malaingkan yaꞌ luu dapat manusiyaꞌ koleꞌ kaampunan ni bay dusa da.

Si Isa Almasi yana kulban tabi sinongan pa Tuhan

²³Na siga taat kaimaman ni langga jaman looy sipat sadjaꞌ ni siga pabuwatan Almasi ndooy ni sulgaꞌ. Dari yana meꞌ langga looy mattoꞌ ka ga kalangkapan na talpaksaꞌ sinutsiꞌ ka lahaꞌ kulban, damikiyan siga sukuꞌ sulgaꞌ pun, talpaksaꞌ du sinutsiꞌ ka lahaꞌ. Sugaꞌ subay lahaꞌ mas hagaan gi man lahaꞌ hayop pinaduwai boꞌ siga sukuꞌ sulgaꞌ takoleꞌ sinutsiꞌ. ²⁴Sangkon na ilay lahaꞌ Almasi na bay tumpa. Pag-anu, lay na ya paasok pa jawom sulgaꞌ. Pag batnaa, ndooy na ya ni awpan Tuhan kalnaꞌ kitabi. Yaꞌ na ya bay paasok ni langga bay pinatangge meꞌ manusiyaꞌ meꞌ ilooy ma bay asok panghuluꞌ imam mattoꞌ. Batan langga looy ilay sipat sadjaꞌ ni Lugar Pinakasutsiꞌ ni sulgaꞌ. ²⁵Maruhuꞌ, taun pa taun subay panghuluꞌ imam paasok pa jawom Bilik Pinakasutsiꞌ nongan lahaꞌ hayop pa Tuhan. Boꞌ ni Almasi, ilooy ya bay songan na lahaꞌ na mismu, boꞌ tasakup na meꞌ lahaꞌ na man muwasan dusa manusiyaꞌ sakayi labba du. ²⁶Batan bong siꞌ ilay yaꞌ bay tasakup lahaꞌ na muwasan dusa sakayi labba du, malaingkan talpaksaꞌ ya min meka malasahi labba man waktu junyaꞌ bay pinapayak. Sugaꞌ iya ilay bay pitu pa junyaꞌ ni masa batnaa ma pinag-awnan ahil jaman supaya tasongan na na umu na man ngalakkahan dusa tabi sakayi labba du.

²⁷Na bong inawnan manusiyaꞌ, ndang lay na sina ginantaꞌ ninsila matoy sakayi du. Pag-anu, boꞌ da hinukum meꞌ Tuhan. ²⁸Damikiyan Almasi pun, sakayi du bay matoy mari tatanggung na dusa manusiyaꞌ. Pabeleng gi du ya ni sinōng, sugaꞌ saꞌ na maksud na mintu nanggung dusa. Arapun ilooy sa kon na lahil pabalik supaya tasalamat na sagannap ma ngagad ni katakka na.

Lahaꞌ hayop yaꞌ kapuwas ni dusa

¹Na siga saraꞌ Nabi Musa ilay mattoꞌ, yana pattaꞌ sadjaꞌ man mahati pasal kaayaran ma song takka ni sinōng njataꞌ Almasi. Sangkon minsan siga Yahudi bay nong siga kulban taun pa taun man mean saraꞌ, yaꞌ du bay luu ndooy kasutsiꞌ ni atay da gantaꞌ man yaꞌ na luu sutsutan njataꞌ da pa Tuhan. Noy takka na Almasi boꞌ da tasutsiꞌ. ²Bong siꞌ ilay tud ndang lay na sila tasutsiꞌ leꞌ siga kulban da, malaingkan hallom na sila bay patagong nong kulban batan yaꞌ na luu njawom honaꞌ-honaꞌ da ga dusahan gi sila pa Tuhan. ³Boꞌ ilooy, pagka tinaat na pin ninsila taun pa taun nong kulban, ilooy na maintoman sila masi sila dusahan pa Tuhan. ⁴Batan ndang tunmanūn baw silay meꞌ lahaꞌ sapiꞌ ka lahaꞌ kambing kapuwas ni dusa.

⁵Sangkon, pag pitu Almasi pa junyaꞌ, yuk na ni Tuhan,

“Katoonan ku du saꞌ siga hayop kinulban atawa siga jakat hagaan ningkau. Sangkon bay takdil nu baran tuu niyaku sinongan pa mman nu.

⁶Batan bong sat siga hayop tinunu atawa sinumbaliꞌ para ni dusa, yaꞌ du nulut ni kahandak nu.”

⁷Sangkon yuk Almasi lagi pa Tuhan,

“Sugaꞌ itu na du ku nganduwan kahandak nu meꞌ ndang bay tinunaꞌ njawom kitab pasal aku.”(10.7) Kitab Jabul 40.6-8.

⁸Na ni hāl siga taat njawom saraꞌ, bana du silay subay luu sinongan pa Tuhan siga jakat maka subay du luu siga hayop tinunu atawa sinumbaliꞌ para ni dusa. Sugaꞌ meꞌ bay halling sambat Almasi, saꞌ silay ilooy hagaan pa Tuhan maka saꞌ du ilooy bay nulut ni kahandak na. ⁹Sangkon yuk Almasi siꞌ pa Tuhan, “Itu na du ku nganduwan kahandak nu.” Na hantak bitsala na ilay siꞌ, lay ya pitu ngalakkahan pagsulutan sibuwa ddas ka siga kulban na, supaya ni jataꞌ kapatoy na, kapatangge na ya pagsulutan bahau. ¹⁰Dari pagka lay na si Isa Almasi nongan umu na man na nganduwan kahandak Tuhan, ilooy na bay poonan tabi initung sutsiꞌ pa Tuhan. Boꞌ kapatoy na ilay, san yaꞌ na binalikan, batan tasakup na na saumu-umu para muwasan dusa manusiyaꞌ.

¹¹Boꞌ siga kaimaman maruhuꞌ, llaw pa dangallaw bbuwatan da wā nangge ni pangulbanan magbalik-balik nongan kulban pa Tuhan meꞌ ndang bay tinaat ninsila. Salla na, yaꞌ du bay kapuwas ni dusa. ¹²Boꞌ ni panghuluꞌ imam ma asahan tabi ilay, yana si Isa Almasi, ilooy ya bay songan na yana baran na mismu sakayi labba du man muwasan dusa manusiyaꞌ. Boꞌ tasakup na na silay saumu-umu. Pag-anu, boꞌ na lay na ningkōꞌ ni bihing Tuhan huwin pa kawnan. ¹³Sampay ndooy na ya batnaa ngagad masa man mimon banta na inannaꞌ ndiyoꞌ pāt battis na. ¹⁴Dari siꞌ, man sabapan Almasi bay nongan umu na sakayi labba du, puwas na dusa sagannap ma sinutsiꞌ meꞌ na. Boꞌ tasakup na na sina saumu-umu.

¹⁵Na bay pabuwatan Almasi ilay, magtuntun du ka ilooy ma bay sohoꞌ Rū Sutsiꞌ sinuwat njawom kitab, ilooy ma yuk Tuhan,

¹⁶“Ituu tu yana pagsulutan bahau pōꞌ ku ninsila bbos-bbos: Nnaꞌ ku na siga saraꞌ ku njawom atay da maka suwatan ku na du njawom pamiki da.”

¹⁷Maka yuk Tuhan lagi,

“Yaꞌ na intom ku dusa da atawa kalaatan da.”(10.17) Kitab Nabi Jeremaya 31.33-34.

¹⁸Dari pagka lay na kitabi inampun meꞌ Tuhan sampay lay na puwas dusa tabi, san sina yaꞌ na luu kulban sinongan niiya para ni dusa.

Dari na kitabi lungbid ka Tuhan sabapan Almasi

¹⁹Na siga danganakan, pagka lay na bay pinaduwai lahaꞌ si Isa man muwasan dusa tabi, luu na kapatut tabi paasok pa jawom Lugar Pinakasutsiꞌ ni awpan Tuhan. ²⁰Yaꞌ na kitabi meꞌ kabboꞌ-bboan tabi ma yaꞌ dari pasōng pa dambilaꞌ kultina ma bay man ngagpangan jama man awpan Tuhan. Batan sabapan kapatoy si Isa, luu na lān bahau man tabi patapit pa Tuhan. Lān tuu itu yana si Isa na mismu ma llum saumu-umu. Iya ilay moo kitabi pa awpan Tuhan. ²¹Sangkon, pagka luu na panghuluꞌ imam asahan tabi ma yaꞌ luu sibuꞌ sabanding na, ma magtakōk ningkitabi ma ginalla jama lumaꞌ Tuhan, oy agad tabi? ²²Patapit na kitabi pa Tuhan ni kahilas atay tabi ka ni kabasag pangando tabi niiya. Tatantu tabi na hinasi jaꞌ kitabi meꞌ Tuhan batan lay na sinutsiꞌ atay tabi ka lahaꞌ si Isa. Baran tabi pun, lay na du bay pinandi ka boheꞌ sutsiꞌ.(10.22) Hatiyan na, lay sila pinandi tandaꞌ da mmeꞌ ni si Isa. Maka yaꞌ na du luu jawom honaꞌ-honaꞌ tabi ga masi kitabi dusahan pa Tuhan. ²³Sangkon daa na labbahan tabi holat tabi ma pinagbāꞌ meꞌ tabi ni manusiyaꞌ. San kitabi yaꞌ na hawal-hawalan. Ndang-ndang kanaalla du Tuhan numan mimon janjiꞌ na.

²⁴Sarī man naa siga danganakan, subay kitabi basag sipaintom-paintom mari pasōng na pin meꞌ tabi sikaaseꞌ-kaaseꞌ sampay buwat kaayaran. ²⁵Daa kitabi ngakig kasohean ma nabiat yaꞌ mmeꞌ bila pagkahi da kumpo-kumpo numba. Arapun subay kitabi mmeꞌ sampay sibuwansang-buwansang pa kaayaran, labi na ni timpu batnaa pagka song patapit na pin llaw man Papuꞌ Isa pabeleng.

²⁶Na bong ina lay na kitabi pitsayaꞌ ni kabanahan pasal si Isa, pag-anu boꞌ tabi nahadjaꞌ na baw amu-amu buwat dusa, yaꞌ na sina luu tasongan pa Tuhan man muwasan dusa tabi. ²⁷Ilooy sa katiluan tabi yana hukuman katawu-tawu ka api noleyab ma ngatisan siga banta Tuhan. ²⁸Mamintang kam ni bay jaman Nabi Musa. Soysoy ilay bay nuwak siga saraꞌ na boꞌ luu duwa-tallu jama bay kasaksiꞌ, malaingkan yaꞌ luu timbang njataꞌ na, mastiꞌ pinapatoy jaꞌ ya. ²⁹Na bong meꞌ naa bohat pidjalaꞌ ni jama ma bay nuwak saraꞌ, labi na saꞌ bohat pidjalaꞌ ni sagannap ma nikutan Anak Tuhan saula-ula puus boboꞌ sadjaꞌ ya. Sat da saꞌ māꞌ yaꞌ na luu kapansahaliyan lahaꞌ si Isa bay pinaduwai. Padahal, lahaꞌ na ilay bay man da pingkaꞌ sinutsiꞌ sampay muwan kasāhan ni pagsulutan bahau antaraꞌ Tuhan ka manusiyaꞌ. Ga jama meꞌ looy ilay, sibuꞌ du sila ka bay mahinaꞌ Rū Sutsiꞌ ma bay masampayan sila aseꞌ. ³⁰Jama meꞌ sila ilay, yaꞌ na du kitabi awam, mastiꞌ pinidjalaꞌ jaꞌ sabap yuk Tuhan njawom kitab,

“Aku sa makissahan sila hisab ni bay kalaatan da. Aku sa bahalaꞌ mawos.”

Maka luu gi bay sinuwatan njawom kitab ilooy ma yuk na,

“Papuꞌ sa ngahukum siga raayat na.”(10.30) Kitab Tawrat, Duteronomi 32.35-36.

³¹Boꞌ katawu-tawu sina mintu ni soysoy bay kalabuan hukuman Tuhan sabanna ma llum saumu-umu.

³²Intomun bi doꞌ bay kahalan bi sibuwa bi bay mmeꞌ ni si Isa, jaman pamiki bi bohoꞌ bay pinadantaan. Saꞌ ba, biddaꞌ na ehe kabinsanaan bay tatasan bi? ³³Maka bay gi kam pingkaꞌ pinahinaꞌ sampay nilaugan ni mayran. Tamūd san saꞌ kaam mismu kinalasuhan, lay gi du kam talapay pinapaddihan sabap meꞌ bi nabang pagkahi bi ma bininsanaꞌ. ³⁴Maka lay gi kam nulung siga pagkahi bi ma njawom jīl. Minsan bay inagaw altaꞌ bi, yaꞌ du bay lungay kagakan bi. Batan tasayu bi na luu na siga supaat njataꞌ bi mas hagaan man altaꞌ ni junyaꞌ, boꞌ natas lagi saumu-umu.

³⁵Sangkon daa na labbahan bi pangando bi ni Papuꞌ, batan pangando bi ina, inaa na poonan man bi koleꞌ tungbas ayad saꞌ alang-alang. ³⁶Subay kam natas njawom kabinsanaan supaya tapabuwat bi kahandak Tuhan sampay pa katapusan. Meꞌ looy ilay, takoleꞌ bi na sina mintu mimon ma bay njanjiꞌ meꞌ Tuhan ni sukuꞌ na. ³⁷Batan luu palman Tuhan njawom kitab, ilooy ma yuk na,

“Yaꞌ na hallom, takka na du ilooy ma agad bi. Yaꞌ na du ya ngalantan katakka na.

³⁸Kuwan sagannap ma initung meꞌ ku intong, magbēꞌ kawul-piil da ka pangando da niyaku. Sugaꞌ bong sila patatak, yaꞌ na ku kasulutan ninsila.”(10.37-38) Kitab Nabi Isaya 26.20; Kitab Nabi Habakuk 2.3-4; Rom 1.17; Galatiya 3.11.

³⁹Kahapan kuwan kitabi baw itu, yaꞌ tabeꞌ ni sagannap ma patatak. Jama meꞌ sila ilay, song hallom minulkaan du. Boꞌ kitabi itu tabeꞌ ni sagannap ma salamat sabap takkoꞌ pangando tabi.

Hatiyan pangando pa Tuhan

¹Na bong ina luu pangando tabi pa Tuhan, tatantu tabi takoleꞌ tabi jaꞌ mimon ma agad tabi ma bay njanjiꞌ meꞌ Tuhan. Minsan yaꞌ lagi takita tabi ilooy ma hinolat meꞌ tabi, pagka luu pangando tabi, yaꞌ na tabi hawal-hawalan mastiꞌ luu jaꞌ masa na takoleꞌ tabi. ^2-3Sabapan pangando tabi, manganna kitabi mimon-mimon ni sikaliput alam bay pinapayak meꞌ palman Tuhan. Dari mimon ma takita tabi batnaa bay pinaluu meꞌ ilooy ma yaꞌ takita, yana palman.

Tud hagaan pangando pa Tuhan. Sabapan pangando siga kabboꞌ-bboan tabi, ilooy na man Tuhan kasulutan ninsila. ⁴Pamintangan bi na si Habil ni awwal jaman. Sabapan pangando na pa Tuhan, kuwan ilooy ma bay songan na pa Tuhan mas mahap man ilooy ma bay songan kakaꞌ na si Kayin. Man tabi tau sabap ilooy bay songan si Habil bay hinasi meꞌ Tuhan. Maka sabapan pangando na, lay na ya awnan Tuhan jama intong. Sangkon minsan hallom na si Habil lay matoy, luu na pin pamintangan lay mbanan na ningkitabi sabapan pangando na.(11.4) Ndaun Panagnaan ni Awwal Jaman 4.1-5.

⁵Damikiyan si Idris, sabapan pangando na pa Tuhan, lay ya inangkat pa sulgaꞌ yaꞌ san bay pingkaꞌ matoy. Lataꞌ na lahat man na bay piniha, yaꞌ na san ya bay tatammu sabap lay na ya kinaddoꞌ meꞌ Tuhan. Boꞌ na, yuk njawom kitab, ndang iya jama bay kasulut ni Tuhan.

⁶Na bong inawnan nulut ni kahandak Tuhan, tunmanūn meꞌ jama kasulut niiya bong yaꞌ luu pangando da niiya. Sarī man naa, soysoy doman patapit pa Tuhan subay pitsayaꞌ luu ya. Maka subay ya pitsayaꞌ Tuhan nupaatan sagannap ma magkainagon lungbid ka iya.

⁷Damikiyan Nabi Nū, sabapan pangando na pa Tuhan, pag lay jaꞌ ya binaan leꞌ Tuhan luu takka dunuk mehe bbos-bbos, lay du ya pitsayaꞌ. Dari lay du ya ngasip ni Tuhan nohoꞌ buwat bahitlaꞌ man nalamat ga paglūng na. Maka sabapan pangando na, lay ya initung meꞌ Tuhan intong. Sugaꞌ kuwan jama lahat na, yaꞌ kuhi pitsayaꞌ pag binaan meꞌ Nabi Nū luu takka dunuk. Batan inawnan dunuk, yaꞌ gi san bay pingkaꞌ takita leꞌ manusiyaꞌ. Dari sabap yaꞌ sila mmeꞌ pitsayaꞌ ni Nabi Nū, ilooy na man da bay kalabuan hukuman kapatoy ni bay dunuk looy.

⁸Damikiyan Nabi Ibrahim pun, sabapan pangando na pa Tuhan, lay jaꞌ du ya mmeꞌ ni panohoan Tuhan. Bay sohoꞌ Tuhan niiya, subay ya maglayin pa disu lahat ma bay njanjiꞌ meꞌ Tuhan pinamuwan niiya. Dari lay na jaꞌ ya ngambanan lahat na san yaꞌ gi bay tasayu na bong ninggai lahat looy man na bay tumiluꞌ. ⁹Pag takka ga Nabi Ibrahim pa lahat looy, sabapan pangando na, pitsayaꞌ du ya ni janjiꞌ Tuhan song hallom kapaiya du lahat looy sampay ni siga panubuꞌ na. Damikiyan ilooy na du silay lahat bay janjiꞌ Tuhan ni anak Nabi Ibrahim, yana si Isahak, sampay ni mpu na si Yaꞌkub. Sugaꞌ san lay sinukuꞌ ni ga Nabi Ibrahim lahat looy, lay jaꞌ sila meꞌ karuha jama sampi ndooy tamban ni siga lumaꞌ luna. ¹⁰Sugaꞌ ni katuwaan na bana, ilooy ya agad ga Nabi Ibrahim yana daira kakka bay pinatangge meꞌ Tuhan mismu. Boꞌ yaꞌ na kuhi langkat saumu-umu.

¹¹Sitti Sara pun, sabapan pangando na pa Tuhan, lay na ya pitsayaꞌ tattap tinuman meꞌ Tuhan janjiꞌ na muwanan iya ka Nabi Ibrahim anak. Dari lay du ya bay hanak san toa na ya banahan sampay tupa na ga. ¹²Maka Nabi Ibrahim pun, subay siꞌ yaꞌ na du bay hanak batan agon meꞌ anggawtaꞌ jama matoy na ya ni katoa na. Sugaꞌ sabap pitsayaꞌ ya ni janjiꞌ Tuhan, lay ya kabuwanan panubuꞌ meꞌ eka potean taꞌ langit ka ungus ni tapiyan.

¹³Na ga Nabi Ibrahim ilay ka ga anak-mpu na mangando na pin pa Tuhan ngabut sampay da bay matoy san yaꞌ gi bay takoleꞌ da ilooy ma bay njanjiꞌ meꞌ Tuhan ninsila. Sugaꞌ gāk baw sila batan tabista da bbos-bbos takoleꞌ da ilooy ma bay agad da. Sangkon meꞌ da ngingat, jama sampi sadjaꞌ sila pahās jaꞌ ni junyaꞌ tuu. ¹⁴Na tiyap-tiyap ilay jama mista meꞌ looy, tumatandaꞌ luu gi lahat sarī pagdautan da. ¹⁵Sugaꞌ saꞌ baw silay ndang bay lahat man ga Nabi Ibrahim maruhuꞌ pagdautan da. Batan bong tud ilay ilooy du lahat pinagdautan meꞌ da, sannang jaꞌ meꞌ da pabeleng. ¹⁶Sugaꞌ iya bay agad da yana paglahat mahap gi man mimon paglahat ni junyaꞌ, yana paglahat man sulgaꞌ. Dari sabapan kainagon da magdautan daira ma ndang bay pinanyap meꞌ Tuhan ninsila, gāk sina Tuhan inawnan Tuhan da.

^17-18Sarī gi, sabapan pangando Nabi Ibrahim pa Tuhan, pag bay ya sinuwayan meꞌ Tuhan nohoꞌ nongan umu anak na, yana si Isahak, lay du ya kuhi. Bistahun bi doꞌ, Nabi Ibrahim ilay bay njanjian meꞌ Tuhan binuwanan panubuꞌ paeka poonan man si Isahak. Sugaꞌ san meꞌ looy, lay gi Nabi Ibrahim kuhi nongan umu anak na pa Tuhan. ¹⁹Njawom atay na, san si Isahak bay matoy, mastiꞌ takaya Tuhan du makallum iya pabalik. Dari minsan Nabi Ibrahim yaꞌ bay tabawus nongan umu anak na sabap meꞌ Tuhan bay matagong iya, dari ko ngawon, lay du tabawiꞌ na umu anak na.

²⁰Na si Isahak pun, sabapan pangando na pa Tuhan, lay ya makuhan ga anak na si Yaꞌkub ka si Esaw supaat mari mahap kasongan da bbos-bbos.

²¹Si Yaꞌkub pun, sabapan pangando na pa Tuhan, pag tapit jaꞌ ya matoy, lay du ya makuhan siga mpu na anak si Yusup supaat. Pag-anu, boꞌ na mudji Tuhan sasang na patukod ni tungkud na.

²²Damikiyan si Yusup pun, sabapan pangando na pa Tuhan, pag tapit jaꞌ ya matoy, lay ya maintoman siga pagkahi na bangsa Israil pasal Tuhan moo sila palakka man Ejip ni sinōng. Sampay lay gi sila tugun na nohoꞌ moo siga towang mayat na pa lahat ma tiluꞌ da bbos-bbos.

²³Damikiyan siga induꞌ-mmaꞌ Nabi Musa, sabapan pangando da pa Tuhan, yaꞌ du sila bay tawu nunggud panohoan sultan bangsa Ejip, yana Pir-awun.(11.23) Pag ndaꞌ Pir-awun adak lumabi na eka bangsa Israil man siga raayat na, lay ya mōꞌ panohoan bisa. Panohoan na siꞌ, subay mimon anak lalla ma bahau pinamaddihan meꞌ bangsa Israil hiniyakan pa jawom sōng mari matoy. Ndaun Kalakka 1.22 ka 2.1-10. Sangkon pag taabut Nabi Musa bay pinamaddihan, lay ya tinapuk njawom tallum buwan. Tabistu meꞌ induꞌ-mmaꞌ na iya anak jalang-jalang.

²⁴Damikiyan Nabi Musa, sabapan pangando na pa Tuhan, minsan ya sannang jaꞌ njawman dayang-dayang,(11.24) Paddus man tallum buwan Nabi Musa bay tinapuk, lay ya inannaꞌ njawom bakaꞌ pinaatung njawom sōng, boꞌ luu na pin kakaꞌ na patuhut maiman. Pag-anu, ilooy ma lay tatammu Nabi Musa leꞌ anak Pir-awun, sampay lay na ga pabuwat na anak. yana anak Pir-awun, pag taabut na mehe, yaꞌ na ya doman binilang anak na. ²⁵Honaꞌ-honaꞌ na, gam na ya magpalapay ni kabinsanaan bangsa na sukuꞌ Tuhan man na nnaa magparasahan ayad maabak dusa ma moo kagakan samantalaꞌ du. ²⁶Maka honaꞌ-honaꞌ na, gam na ya natas pinadiyoꞌ sabapan holat na ni katakka Almasi(11.26) Tahati Nabi Musa luu pōꞌ man bangsa na Israil ni sinōng disu lalla pinag-awnan Almasi. Hatiyan Almasi, ilooy ma bay inuwakilan meꞌ Tuhan magsultan. Katakka na bay tinunaꞌ meꞌ kanabi-nabihan njawom kitab. Njawom tunaꞌ da, Almasi disu panubuꞌ Sultan Daud. Pag takka na, maā ya mimon banta sukuꞌ na sampay natas saumu pamarinta na. bbos-bbos man na nnaa lakkop leꞌ mimon altaꞌ ni Ejip. Batan ilooy ya pandang na supaat man Tuhan ni sinōng.

²⁷Dari sabapan pangando Nabi Musa pa Tuhan, lay du boo na mimon bangsa na lakka man Ejip. Boꞌ yaꞌ na ya tawu san biddaꞌ na lasu sultan niiya. San kajinisan katiksaan bay lingkaan na, lay jaꞌ tatasan na sabap takita-kita na na Tuhan ma yaꞌ takita ngunungan iya. ²⁸Maka sabapan pangando Nabi Musa, lay sohoꞌ na pagkahi na bangsa Israil mesekan siga papagan lawang lumaꞌ da ka lahaꞌ bili-bili. Kon na bay nohoꞌ meꞌ looy supaya yaꞌ talapay siga anak da pag pōꞌ malaikat Tuhan mapatoy mimon anak siyaka ma lalla ni sikaliput Ejip. Dari labba mandooy, luu na paballangan inawnan Ngalingkaꞌ bay tinagnaan meꞌ Nabi Musa, yana pangintoman ni bangsa Israil bay llingkaan meꞌ malaikat looy.(11.28) Ndaun Kalakka 12.1-30.

²⁹Maka sabapan pangando bangsa Israil pa Tuhan, lay sila kapalintas ni Dilawut Akket lumān ni tanaꞌ diyoꞌ lagguꞌ-lagguan. Subay ga lān taꞌ dile sadjaꞌ bay tinūs meꞌ da sabap lay bay sinihān meꞌ Tuhan boheꞌ dilawut looy. Sugaꞌ pag pauru ga sundalu bangsa Ejip bay ngonse sila, sarunduun du lay pinabalik boheꞌ looy pa bay limpaꞌ na. Dari lay na ga katis baanan sundalu looy matoy limbo.(11.29) Ndaun Kalakka 14.1-31.

³⁰Damikiyan sabapan pangando bangsa Israil pa Tuhan, lay na ga luntu kutaꞌ Jeriko jaman da ngaliput daira looy pituꞌ ngallaw.(11.30) Ndaun Kitab si Jasuwa 6.1-21.

³¹Maka si Rehab pun, sabapan pangando na pa Tuhan, yaꞌ ya bay talapay pinapatoy ni siga pagkahi na ma yaꞌ ngisbat Tuhan san iya disu puta. Tandaꞌ pangando si Rehab, pag takka siga sundalu bangsa Israil mayu-mayuhan daira na, lay gi ya nabangan sila sabap pitsayaꞌ ya ni Tuhan da.(11.31) Ndaun Kitab si Jasuwa 2.11-22 ka 6.22-25.

³²Na bong itu padara ku na pin meꞌ ku nuntut pasal basag pangando kabboꞌ-bboan tabi, hallom gi boꞌ lupus suwat tuu. Batan luu gi situ tatuntut ku pasal pangando ga si Gidyon, si Barak, si Samson, si Jepta, Sultan Daud, Nabi Samwel sampay na kanabi-nabihan ilooy kasohean. ³³Ga jama looy ilay, sabapan pangando da pa Tuhan, jinisan bay takaya da. Luu na bay maā siga sultan ka sundalu da man kalahat-lahatan. Maka luu du bay tanyag matangge kaintongan ni lahat da sampay koleꞌ jinisan supaat ma bay njanjiꞌ meꞌ Tuhan. Maka luu du bay hiniyakan pa jawom baanan halimaw, boꞌ yaꞌ san bay kongoy-kongoy. ³⁴Luu du bay hiniyakan pa jawom api mehe, boꞌ yaꞌ san bay lūs. Luu bay llān leꞌ banta da ka kataliꞌ, sugaꞌ lay du bay sinalamat. Maka luu gi kasohean ma lamma, sugaꞌ man sabapan pangando da pa Tuhan, lay du pinabasagan. Luu gi bay kabuwanan tawakka mehe ni bonoꞌ sampay man da bay malahi siga sundalu ma song ngagaw lahat da. ³⁵Maka luu gi karandahan bay kapatoyan, sugaꞌ sabapan pangando da, lay na llum pabalik kakasi da.

Sugaꞌ luu du baw silay sukuꞌ Tuhan bay sigi-sigi pinakissahan paddi ngabut sampay man da matoy sabap meꞌ da yaꞌ kuhi ngalabbahan pangando da pa Tuhan. Bong siꞌ ilay sila bay kuhi ngalabba, mastiꞌ lay jaꞌ sila pinōꞌ. Sugaꞌ honaꞌ-honaꞌ da, gam na tatasan da supaya sila sannang pag mintu taabut pinakallum pabalik mimon manusiyaꞌ. ³⁶Luu gi silay kasohean, sabapan pangando da, bay lumingkaꞌ binuwat kalabbiyan sampay llagpiꞌ. Kasohean pinusas na ga ka karina sampay tajīl gi. ³⁷Kasohean bay matoy hiniyak ka batu, kasohean bay sinebak duwa ka kehet-kehet, maka kasohean bay matoy tinigad ka kataliꞌ. Kasohean, yaꞌ san luu pamakoy da sarī man kuwit bili-bili atawa kuwit kambing ni kasigpit da. Kasohean, sabapan pangando da pa Tuhan, lay gi bininsanaꞌ sampay nilaugan. ³⁸Maka luu gi siga sukuꞌ Tuhan bay pinalahi. Dari lay na sila magpilulān ni siga lahat lau-lau sampay ni kapunu-punuhan. Patannaan man da tuli ni siga lowang pampang sadjaꞌ atawa lowang tanaꞌ. Mingkan sabana na, manusiyaꞌ ma mandang hāl junyaꞌ, yaꞌ san tawop palamud ni jama meꞌ sila ma mangando pa Tuhan.

³⁹Ga jama looy ilay labbasakayi, pagka basag pangando da, kasulutan banahan Tuhan ninsila. Sugaꞌ san meꞌ looy, halloman da llum, yaꞌ gi bay takoleꞌ da supaat ma bay janjiꞌ Tuhan ninsila. ⁴⁰Batan honaꞌ-honaꞌ Tuhan, mas mahap bong sila pinaagad ningkitabi ma dambuli supaya haboy na kitabi ka sila pinabuwat dambaanan ma yaꞌ na luu salla na pa Tuhan.

Subay akig tabi pangando siga sukuꞌ Tuhan mattoꞌ

¹Na pagka meka jama mattoꞌ bay dari suntuan ayad ningkitabi sabap meꞌ da mangando pa Tuhan, sabuli-buli tabi ngakig sila. Maka labbahan tabi na dusa tabi sampay oy-oy na pin ma kasanggalang ningkitabi buwat kahandak Tuhan. Bong dalil ta pa jama maglumbaꞌ sonse, subay lakkahan tabi oy-oy kahabo ningkitabi supaya kitabi katatas sonse ni lān ma bay sinukuꞌ meꞌ Tuhan ningkitabi. ²Maka subay kitabi tattap magpadduman njataꞌ si Isa. Batan iya suntuan numbul satu man tabi ngita pangando sukup pa Tuhan. Maka sabapan na, patakkoꞌ na pin pangando tabi. Bistahun bi doꞌ, atas na bay natasan kabinsanaan nilansang taꞌ tehang kalnaꞌ kitabi. Maka san kaiyaan niiya binuwat meꞌ looy, yaꞌ du bay paruli na. Batan pinandang meꞌ na kagakan ma takoleꞌ na ni sinōng pag taabut na ngita jama sakiyan salamat. Pag batnaa, lay na ya ningkōꞌ ni bihing Tuhan huwin pa kawnan ndooy ni sulgaꞌ.

³Na bila kam bininsanaꞌ, intomun bi jaꞌ katiksaan si Isa bay natasan siga baldusa sigi-sigi minsanaꞌ sampay naggaꞌ iya. Meꞌ naa ina, yaꞌ kam kuhi jamu atawa dallaꞌ mmeꞌ niiya. ⁴San ina kam malasahi hangat naggaꞌ kalaatan, masi du yaꞌ luu pangabut-ngabut bi ni bay kamalasahiyan si Isa. Intong na, kamalasahiyan bi yaꞌ du man lahaꞌ bi tumpa. ⁵Daa takupan bi palman njawom kitab, ilooy ma yuk Tuhan,

“Kaam, siga anak ku, kannahun bi adjalan ku. Daa kam jamu mmeꞌ niyaku bong kam sahawi ku. ⁶Batan ndang adjal ku jaꞌ sina sagannap ma kaasean ku. Maka ndang palingkaꞌ ku jaꞌ sina njawom kamalasahiyan sagannap ma inaku meꞌ ku anak.”(12.6) Sambatan Jama Halul-akka 3.11-12.

⁷Sangkon na, bila kam njawom kabinsanaan, tatasan bi jaꞌ sabap ndang meꞌ naa sina meꞌ Tuhan ngadjal sagannap ma initung anak na. Ndang bong ina inawnan anak, mastiꞌ inadjal jaꞌ meꞌ mmaꞌ na. ⁸Bong ina kam yaꞌ bay lumingkaꞌ ni adjalan Tuhan meꞌ ndang bay ginantaꞌ ni mimon anak na, malaingkan saꞌ kam anak na. Sibuꞌ du kam ka anak halambiyaraꞌ sadjaꞌ ma yaꞌ luu mangatas ngadjal sila. ⁹Bistahun bi doꞌ, san ina siga mmaꞌ tabi ntuu ni junyaꞌ bong ngadjal kitabi, pagmaltabatan tabi du. Labi na saꞌ kitabi subay lillaꞌ ni adjalan Mmaꞌ tabi ni sulgaꞌ mari sampulnaꞌ nyawa tabi. ¹⁰Siga mmaꞌ tabi ina bay ngadjal kitabi jaman tabi dikiꞌ para kaayaran ningkitabi. Tamūd magsāꞌ sila san bistahan da tuwaꞌ meꞌ da ngadjal. Boꞌ Mmaꞌ tabi Tuhan, tuktuk na ina ngadjal, tattap pa kaayaran jaꞌ ningkitabi supaya kitabi meꞌ iya na du sutsiꞌ. ¹¹Bana na, samantalaꞌ tabi inadjal, mastiꞌ yaꞌ jaꞌ mahap parasahan tabi sabap bisa. Sugaꞌ pag toklas na, hayang jaꞌ pamiki tabi sampay intong na kawul-piil tabi.

¹²Sangkon na, kaam ma lamma na natasan kabinsanaan, patagguhun bi na iman bi. Ibaratan jama maglumbaꞌ sonse, tohasan bi na balik tuut bi. ¹³Nūs jaꞌ kam lān intong supaya luu inuru meꞌ pagkahi bi ma yaꞌ gi takkoꞌ pangando da. Meꞌ looy ilay, yaꞌ sila magsiꞌ, gam pin pabasag pangando da sabapan bi.

¹⁴Pagbuli-bulihan bi miha kasalassayan ka mimon manusiyaꞌ. Maka subay kam sutsiꞌ. Batan yaꞌ sina mintu luu sikita ka Papuꞌ bong ya yaꞌ sutsiꞌ. ¹⁵Sipaintom-paintom na pin kam mari kam yaꞌ luu nikutan Tuhan sampay masensengan aseꞌ na. Paayad-ayad kam taggahaꞌ nganggamut na baw duga njawom atay bi. Batan bong ina luu ni baanan bi meꞌ naa, malaingkan kalingog sina ningkaam maka song hallom meka na kam kalakkotan ni arat na. ¹⁶Maka iyakin kam taggahaꞌ ubay na baw kam mintu ka jama ma saꞌ lla bi atawa nda bi. Maka daa pondok pamiki bi meꞌ kadari bay jaman si Esaw(12.16) Si Esaw kambahan Nabi Yaꞌkub. Ndaun salsila na ni Panagnaan ni Awwal Jaman 25.27-34, 27.1-41. yaꞌ ngisbat Tuhan. Bistahun bi doꞌ, subay siꞌ pagka si Esaw anak siyaka, lay na labuꞌ pa iya siga supaat ma bay njanjiꞌ meꞌ Tuhan ni mmaꞌ na. Salla na, lay jaꞌ sambian na supaat pagkasiyaka na ka lawuk sakayi kakan du. ¹⁷Dari siꞌ song hallom jaman looy, katoonan bi na du, pag taabut si Esaw bay doman koleꞌ supaat pagkasiyaka na, yaꞌ na ya bay nduwan. Maka san du pooy meꞌ na bay nangis mogos sinupaatan, yaꞌ na du bay luu dapat na mabalik bay kaadaan na. Sangkon ilagan bi dī bi.

Punu Saynay ka Punu Zayon

¹⁸Siga danganakan, meꞌ tabi itu patapit pa Tuhan, yaꞌ na sibuꞌ ka ni siga kabboꞌ-bboan tabi ni bay jaman Nabi Musa. Jaman looy ilay, lay sila patapit pa Punu Saynay. Ndooy siꞌ, takissa da na jogjog maka ngallab na ga leꞌ api punsak na. Boꞌ bay gi sila kalindoman sabap ngalikob na lahat looy sampay luu gi baliyu ngimpūs. ¹⁹Maka bay gi sila kale halling tabuliꞌ tiniyup pahaddo boꞌ pasunuꞌ suwara Tuhan katawu-tawu. Tandaꞌ da sinawan, lay na ga sila nganjunjung Tuhan nohoꞌ patagong magpalman.(12.19) Ndaun Kitab Tawrat, Kalakka 19.16-19; 20.18-19.²⁰Boꞌ tud bay tawu sila bay binandaan, ilooy ma yuk Tuhan,

“Labba man jama sampay na hayop, bong luu bay nabbaꞌ punu tuu, subay hiniyak ka batu ngabut sampay na matoy.”(12.20) Kitab Tawrat, Kalakka 19.12-13.

²¹Tandaꞌ katawu-tawu siga pakaradjaan bay tasakup da, minsan Nabi Musa mismu bay du māꞌ ngegkeg na ga ya ni katawu na.

²²Boꞌ ningkitabi itu batnaa, sarī na punu bay inabut meꞌ tabi. Awon na Punu Zayon, daira Tuhan sabanna ma llum saumu-umu, yana daira Jerusalem man sulgaꞌ. Ndooy ilay, libu-libuhan malaikat kumpo-kumpo njawom kagakan. ²³Maka ndooy ilay, lay na tabi takka pa jawom kumpohan sagannap ma ginalla siga anak Tuhan siyaka, yana sagannap ma pitsayaꞌ ni Almasi, ma lay na talista awon da ni sulgaꞌ. Maka lay na tabi takka pa jawom baanan siga rū jama intong mattoꞌ ma yaꞌ na luu salla na. Maka lay na tabi takka pa mman Tuhan, yana tukang ngahukum manusiyaꞌ sikamimon. ²⁴Maka lay na kitabi takka pa mman si Isa ma bay mōꞌ pagsulutan bahau antaraꞌ Tuhan ka manusiyaꞌ. Boꞌ toklas lahaꞌ na bay tumpa mas ayad man toklas lahaꞌ si Habil bay tumpa ni awwal jaman. Batan lahaꞌ si Habil bay moo sumpaꞌ, boꞌ lahaꞌ si Isa bay moo kasalamatan.(12.24) Ndaun Panagnaan ni Awwal Jaman 4.8-12.

²⁵Sangkon, amay-amay daa tuwakun bi umanat Tuhan ningkaam batnaa. Mamintang doꞌ kam ni bay jaman kabboꞌ-bboan tabi. Bong sila bay pinidjalaꞌ sabap meꞌ da nuwak bitsala lalla looy man junyaꞌ, yana Nabi Musa, labi na saꞌ kitabi pinidjalaꞌ bong tuwak tabi na baw bitsala lalla looy ma lakka man sulgaꞌ. ²⁶Jaman Tuhan magpalman man taꞌ Punu Saynay ni kabboꞌ-bboan tabi, lay ga pingkaꞌ jogjog gumi meꞌ suwara na. Sugaꞌ ni sinōng, sampay langit gi sina njogjog meꞌ na, batan ndang bay ya nganjanjiꞌ njawom kitab, yuk na,

“Luu gi situ masa ku nganjogjog sakayi gi, sugaꞌ saꞌ na sat gumi, sampay langit jogjog ku na du.”(12.26) Kitab Nabi Haggay 2.6.

²⁷Na Tuhan ilay māꞌ meꞌ looy mari tallak ningkitabi bong inawnan pakaradjaan ma bay pinapayak, luu sina masa da njogjog sampay man labbasakayi lanyap. Kon subay meꞌ looy supaya ilooy sa tamban, isu-isu siga pakaradjaan ma yaꞌ kuhi usik san pooy meꞌ njogjog.

²⁸Sangkon, pagka Tuhan bay matabeꞌ kitabi ni pamarinta na ma yaꞌ tajogjog, subay kitabi magsuku niiya sampay kinanna meꞌ tabi ehe aseꞌ na ningkitabi. Maka sumba tabi ya ni lanan magpataꞌ niiya, hati na, ni kaehe maltabat tabi ka tawu tabi niiya. ²⁹Batan Tuhan ma sumba tabi ina, subay ga api noleyab ngampud sikamimon bong lasu na.

Subay sukuꞌ si Isa maaseꞌ

¹Na meꞌ kaam ina magdanganakan pitsayaꞌ ni si Isa, daa maglumba meꞌ bi sikaaseꞌ-kaaseꞌ. ²Daa kam lupa. Minsan jama yaꞌ takila bi, bong pilu pa mman bi, subay hulmatun bi. Batan luu silay bay pingkaꞌ ngahulmat jama, yaꞌ san tasayu da ga malaikat hati bisita da. ³Maka daa takupan bi pagkahi bi njawom jīl atawa pun sagannap ma bininsanaꞌ ni poan. Ngaddoꞌ kam pa lassa ninsila ma njawom tiksaꞌ.

⁴Ni hāl sitampu, yaꞌ dari pinabuwat meꞌ sapantun kuli-kulihan sadjaꞌ. Sangkon kaam ma sitampu, yaꞌ dari ubay ka jama saꞌ lla bi atawa nda bi. Soysoy ina buwat kalalamaan meꞌ naa, kalabuan jaꞌ sina hukuman Tuhan.

⁵Ilagan bi magnapsu mulakab ni altaꞌ. Magsuku jaꞌ kam ni oy-oy ma luu ningkaam. Ndang-ndang bay du halling Tuhan jawom kitab,

“Yaꞌ na sina luu masa bi mbanan ku atawa pabiya ku.”(13.5) Kitab Tawrat, Duteronomi. 31.6.

⁶Sangkon yaꞌ situ kitabi alang-kapalang halling,

“Papuꞌ sa tukang nabangan aku. Sangkon yaꞌ na ku tawu san gi oy pabuwat manusiyaꞌ niyaku?”(13.6) Kitab Jabul 118.6.

⁷Sarī man naa, daa takupan bi siga pa-mmean bi ma bay noan kaam palman Tuhan. Kannahun bi ayad kawul-piil da maka akigun bi pangando da ni si Isa. ⁸Batan si Isa Almasi ilay, yaꞌ halin arat-tabiat na labba man awwal jaman ka batnaa sampay saumu. ⁹Sangkon, daa na kam kuhi binoo magsiꞌ ka jinisan tōꞌ ma yaꞌ sikatuwaꞌ ka kabanahan bay hasi bi. Kasohean ina nōꞌ luu lawuk haram. Tōꞌ meꞌ looy ilay yaꞌ du luu paluntungan na ninsila ma mogbog. Batan hāl makanan ina yaꞌ du kasambu ni nyawa tabi. Arapun iya kasambu yana aseꞌ-tabang Tuhan ningkitabi. ¹⁰Kitabi itu ma pitsayaꞌ ni Almasi, takoleꞌ tabi na siga supaat ma lakka man kapatoy na taꞌ tehang. Boꞌ sagannap ma mangasa ni siga taat da ni langga bilang kaintongan da pa Tuhan, yaꞌ luu lamud da ni siga supaat ma takissa tabi njawman Almasi.

¹¹Na njawman pagsulutan sibuwa, panghuluꞌ imam bay moo lahaꞌ kulban pa jawom Bilik Pinakasutsiꞌ sinongan pa Tuhan para ni dusa bangsa Israil. Kuwan baran kulban da, saꞌ ba, lay binoo pa poan daira boꞌ tinunu? ¹²Damikiyan si Isa pun, lay du bay binoo pa poan daira. Maka ndooy na ya bay naggaan paddi sampay makkat. Maka sabapan lahaꞌ na bay pinaduwai, ilooy na man na nutsiꞌ atay siga sukuꞌ na. ¹³Sangkon, meꞌ kitabi itu siga mulit si Isa, subay kitabi pilay pa mman na ni poan daira. Hati na, subay kitabi patuhut niiya minsan man tabi pinahinaꞌ sibuꞌ du ka bay lingkaan na. ¹⁴Ndang-ndang, yaꞌ du luu daira tabi kakka ni junyaꞌ tuu. Ilooy ya agad tabi yana daira ma natas saumu lakka man sulgaꞌ.

¹⁵Dari meꞌ kitabi itu tibuuk na ka si Isa, daa na tabi paagak mudji Tuhan. Maka baan tabi na jama pasal ehe kaayaran na. Batan pudji tabi ina meꞌ sapantun jakat songan tabi pa Tuhan. ¹⁶Maka daa na layam-layam tabi meꞌ tabi buwat mahap ni jama sampay meꞌ tabi nulung sagannap ma sigpit. Batan meꞌ naa ina, sibuꞌ du kitabi ka bay nongan jakat ma kasulut ni Tuhan.

¹⁷Asipun bi siga pa-mmean bi sukuꞌ si Isa. Lillaꞌ jaꞌ kam ninsila batan sila ina ngayaran kaam mari sambu nyawa bi. Maka katoonan da du sina, luu jaꞌ masa ni sinōng paawop na sila pa Tuhan magsabanna bong pooy meꞌ da bay buwat ilooy ma bay sinukuꞌ ninsila. Dari bong ina bean bi jaꞌ sila, mastiꞌ gāk du sila ngayaran kaam. Sugaꞌ bong ina niyaꞌ, susa sina sila. Boꞌ na, kalugian gi ningkaam.

¹⁸Siga danganakan, pakuhan bi na pin kami duwaa supaya wā kami moo kabantugan pa Tuhan man sabapan kawul-piil kami. Kamasaꞌ, san itu kami maku meꞌ tuu, katoonan kami du yaꞌ luu ni kawul-piil kami gantaꞌ pataꞌ man kami sinusunan. ¹⁹Maka bong anu, junjung ku na ningkaam, pakuhan bi du ku duwaa mari ku deꞌ-dēꞌ kapabeleng pa mman bi.

²⁰Tuhan ina poonan kasannangan. Ni kaehe kawasa na, lay ya makallum Papuꞌ tabi si Isa. Dari si Isa na sina numbul satu tukang ngipat kitabi ma awnan na siga bili-bili na. Man sabapan lahaꞌ na bay tumpa, inaa na kasāhan ni pagsulutan bahau ma yaꞌ luu katapusan na antaraꞌ Tuhan ka sukuꞌ na. ²¹Kamura-murahan pinalangkapan na pin kam meꞌ Tuhan ka mimon ma gunahan ningkaam supaya tapabuwat bi kahandak na. Kamura-murahan man sabapan pagkatibuuk bi ka si Isa Almasi, pinajatu du meꞌ Tuhan maksud na ni kaallum bi. Ilooy ilay siꞌ pamaehe sanglit niiya pangkat-mamangkat saumu. Amin.

²²Siga danganakan, junjung ku na ningkaam, daa kam jamu pakale ni bay palbiatan ku njawom suwat tuu siꞌ. Ndang-ndang, yaꞌ du situ tahaꞌ kalanduꞌ.

²³Na mari katoonan bi pasal danganakan tabi si Timuti, lay na ya pinōꞌ man jawom jīl. Bong ilay ya takka du pitu deꞌ-dēꞌ, malaingkan boo ku sa ya pilu ngandaꞌ-ngandaꞌ kaam.

²⁴Katapusan bitsala ku, pasampayun bi doꞌ salam duwaa ku ni siga pa-mmean bi sampay ni mimon sukuꞌ Tuhan nnaa. Damikiyan siga danganakan tabi pun man Itali, lay du bay nohoꞌ masampay salam duwaa da ningkaam.

²⁵Barakat man Tuhan ningkaam sikamimon.

Wassalam