Galatiya

Suwat si Pol pa mman siga Baanan Sukuꞌ si Isa ndooy ni

Galatiya

Pahati

Galatiya ilay yana disu lahat mehe man si Pol bay masaplag umanat mahap pasal si Isa Almasi. Jaman looy ilay, adak mimon jama ndooy ni Galatiya kapil jaꞌ, boꞌ numba lagi sila jinisan tuhan-tuhan. Sugaꞌ song hallom, pagka si Pol lay na ngalataan Galatiya masaplag, meka na pitsayaꞌ ni Papuꞌ Isa. Salla na, pag lakka si Pol, luu na baw ga guru palsu bay pasunuꞌ. Baꞌ-bāꞌ da, bong jama doman salamat sampay initung meꞌ Tuhan intong, yaꞌ konoꞌ sukup sat jama pitsayaꞌ jaꞌ ni si Isa. Pamāꞌ da, subay du jama mogbogan saraꞌ agama Yahudi, labi na saraꞌ hāl ngislam.

Dari pag taaka si Pol luu sukuꞌ si Isa ndooy ni Galatiya binoo-boo magsiꞌ meꞌ siga guru palsu, ilooy ma lay ya mokonan sila suwat tuu man maintoman sila kabanahan njawom umanat mahap pasal si Isa.

Dari njawom suwat tuu, halling si Pol, yaꞌ kitabi initung meꞌ Tuhan intong ni hāl meꞌ mogbogan saraꞌ. Ilooy ya man tabi initung intong, bong kitabi pitsayaꞌ si Isa bay pagantiꞌ ningkitabi minulkaan meꞌ Tuhan.

Njawom suwat tuu, lay du si Pol māꞌ kapatut na maka tōꞌ na saꞌ lakka man manusiyaꞌ arapun lakka man si Isa Almasi mismu ka Tuhan. Maka māꞌ du si Pol, ilooy du puntukan banahan yana pangando tabi ni Almasi ka aseꞌ tabi ni pagkahi tabi manusiyaꞌ (ndaun juran lima, ayat nnom).

Ituu bay sinuwatan meꞌ si Pol luu na ga sapu-pitun taun paddus si Isa Almasi bay inangkat pa sulgaꞌ.

GALATIYA

^1-2Ituu itu aku, yana si Pol, disu rasul si Isa Almasi. Itu suwat ku pa mman bi siga baanan sukuꞌ si Isa nnaa ni sikaliput Galatiya. Ni kapasal pagkarasul ku itu, saꞌ manusiyaꞌ bay nguwakilan aku nohoꞌ masaplag. Ilooy ya bay nguwakilan aku yana si Isa Almasi mismu ka Mmaꞌ tabi Tuhan ma bay makallum iya pabalik.

Duhuꞌ-duhuꞌ bitsala ku, salam duwaa ningkaam man kami ka mimon soheꞌ ku ntuu ma pitsayaꞌ ni si Isa. ³Kamura-murahan binuwanan na pin kam kasannangan ka barakat meꞌ Mmaꞌ tabi Tuhan ka Papuꞌ tabi si Isa Almasi ⁴ma bay nongan umu na man muwasan dusa tabi. Maksud na supaya kitabi tapaddusan na man jawom sakup kalaatan ntuu ni junyaꞌ. Boꞌ ndang ituu na situ bay garaꞌ Mmaꞌ tabi Tuhan man maruhuꞌ-ruhuꞌ lagi. ⁵Kamura-murahan pinudji du Tuhan saumu-umu. Amin.

Disu du umanat mahap man jama nammu kasalamatan

⁶Ngkon ku tu nuwat batnaa batan tud jayip ku ningkaam. Tud bay siglaꞌ kam nikutan Tuhan. Mingkan, iya gi silay bay ngaliyun kaam pa jawom okoman na man sabapan aseꞌ Almasi. Pag-anu, tatammu bi na baw ga mmeꞌ ni umanat sarī man umanat mahap ma ndang lay na kinapitsayaan meꞌ bi. ⁷Mingkan, disu du sina umanat mahap, yaꞌ luu sarī. Salla na, luu na pin nnaa ngalingu kaam. Bbuwatan da ina nabid umanat mahap pasal Almasi. ⁸Sugaꞌ baan ta kam banahan, san gi situ kami atawa malaikat man sulgaꞌ, bong masaplag umanat sarī man ilooy ma bay pasaplag kami ningkaam, minulkaan jaꞌ sina sila. ⁹Meꞌ halling sambat ku na siꞌ, san gi sina soy, bong luu nnaa masaplag umanat ma yaꞌ sikatuwaꞌ ka ilooy ma ndang lay na kinapitsayaan meꞌ bi, minulkaan jaꞌ sina.

¹⁰Na ni hāl bay halling ku ilay siꞌ, katoonan ku du luu nnaa kasohean yaꞌ kasulutan niyaku. Sugaꞌ basta lay jaꞌ ku nulut ni kahandak Tuhan, yaꞌ du dari oy na san ku yaꞌ na kinahopan meꞌ manusiyaꞌ. Bong siꞌ itu masi puhung ku subay na pin ku kinahopan leꞌ manusiyaꞌ, yaꞌ du ku pataꞌ inawnan sosohoan si Isa Almasi.

¹¹Siga danganakan, indanan bi. Inawnan umanat mahap ma bay pasaplag ku ningkaam, yaꞌ sina bay tinulun-tulun jaꞌ meꞌ manusiyaꞌ. ¹²Damikiyan, yaꞌ du bay takoleꞌ ku man manusiyaꞌ. Yaꞌ sina luu guru bay noan aku. Arapun umanat looy ilay bay pinalahil niyaku meꞌ si Isa Almasi mismu. ¹³Sugaꞌ saꞌ du baw lay ni kaayad ku. Saꞌ ba, lay na du bay taaka bi kadarihan ku jaman ku bay mogbogan agama Yahudi? Biddaꞌ na bay basag ku ngalaugan sukuꞌ si Isa. Wā ku bay magtuyuꞌ-tuyuꞌ minsanaꞌ sila pin labbahan da jaꞌ pangando da ni si Isa. ¹⁴Jaman looy ilay, tud bay ngamasag ku mogbogan jinisan taat kabboꞌ-bboan ku Yahudi. Maka tud bay ku magtuyuꞌ ngadjiꞌ. Bong inawnan siga pagkahi ku ma sibuꞌ-sibuꞌ umu ku du, tud bay meka tamban meꞌ ku.

¹⁵Sugaꞌ pag taabut gantaan Tuhan, lay na ku lliyun meꞌ na binuwat sosohoan na ni kaehe timbang na niyaku. Boꞌ ko hati, niyaꞌ gi san ku bay pōꞌ man jawom kūn induꞌ ku, ndang lay na ku peneꞌ Tuhan. ¹⁶Lay na palahil Tuhan Anak na niyaku supaya tapasampay ku na umanat mahap pasal iya ni kabangsa-bangsahan ma saꞌ Yahudi. Dari yaꞌ na san ku bay mangaruha ni soy maka soy na bong oy subay pabuwat ku. ¹⁷San luu jama ndooy ni Jerusalem ma bay pineneꞌ meꞌ Tuhan binuwat siga rasul si Isa duhuꞌ man aku, yaꞌ na san ku bay pilay maku palbiatan ninsila. Gam pin, lay ku magti pilay pa Arabiya. Song hallom, lay na baw ku pabeleng pa Damaskus.

¹⁸Paddus tallun taun halloman ku ndooy, bohoꞌ ku bay pilay pa Jerusalem sabap doman ku sikakila ka si Pitel. Dari lay doꞌ ku ndooy mman na sapu-lima ngallaw. ¹⁹Boꞌ sasang ku ilay siꞌ ndooy, yaꞌ san ku bay sitammu ka siga rasul si Isa kasohean sarī man si Yaꞌkub, yana danganakan Papuꞌ Isa. ²⁰Bana situ bitsala ku ni suwat tuu. Ilu na Tuhan pakale-kale. Yaꞌ ku pandoy ngandustaꞌ.

²¹Pus mandooy siꞌ, lay na baw ku pawus pa kakawum-kawman ndooy ni Siriya ka Silisiya. ²²Dari kuwan siga baanan sukuꞌ si Isa ndooy ni Yahudiya, yaꞌ gi bay pingkaꞌ ngita aku. ²³Sugaꞌ lay na baw taaka da yaꞌ na ku sibuꞌ ka maruhuꞌ, batan yuk da, “Lalla looy la ma magpangalaugan kitabi maruhuꞌ, batnaa masaplag na umanat mahap ma bay pagtuyuan na nilangkat!” ²⁴Dari sabap habal looy siꞌ, lay na ga sila mudji Tuhan sabapan ku.

Si Pol hinasi meꞌ siga pagkahi na rasul si Isa ni Jerusalem

¹Na ni bay kalakka ku man Jerusalem jaman looy, noy bay na pingkaꞌ sapu-mpat taun boꞌ ku bay pabeleng pabalik. Pag beleng ku pilay, haboy na kami ka si Balnabas. Maka luu gi si Taytus bay boo kami. ²Ngkon ku bay pabeleng sabap ilooy kahandak Tuhan bay pinalahil niyaku. Takka ndooy, lay ku nammuhan siga pa-mmean sukuꞌ si Isa ndooy. Dari sasang kami-kami du ndooy, lay na bakka ku ninsila isi umanat mahap ma pinasaplag meꞌ ku ni kabangsa-bangsahan ma saꞌ Yahudi. Maksud ku ilay siꞌ masā bong tud magbēꞌ du umanat ku ka ninsila. Batan bong ilay bay niyaꞌ, taggahaꞌ senseng jaꞌ bay hulas-sangsāꞌ ku masaplag. Kahapan, pag bāꞌ ku ninsila isi umanat ku, ³tabista da du tud bay sikatuwaꞌ isi umanat kami. Tandaꞌ yaꞌ luu man kami magsulemaꞌ, minsan katoonan da na soheꞌ ku si Taytus saꞌ bangsa Yahudi, yaꞌ na san ya bay llogos meꞌ da inislam. Katoonan da du tud tabeꞌ du ya ni sukuꞌ Tuhan san yaꞌ bogbogan na saraꞌ agama Yahudi. ⁴Sugaꞌ luu du baw kasohean pasalluk ndooy yaꞌ kasulutan ni umanat ku. Kahandak da, mimon ma pitsayaꞌ ni si Isa subay llogos nohoꞌ mogbogan saraꞌ agama Yahudi. Sugaꞌ tabistu kami na du saꞌ sila danganakan kami sabanna. Lay jaꞌ sila pasalluk ni baanan kami mayu-mayu bong kami mogbogan saraꞌ agama atawa niyaꞌ. Sugaꞌ tabista kami du bong pamiki da binean, mastiꞌ kalangkat jaꞌ ni kasumunsayaan tabi njawman si Isa Almasi. ⁵Sangkon yaꞌ kami bay kuhi mmeꞌ ninsila samasakali taggahaꞌ kasakotan na baw umanat mahap ma kinapitsayaan meꞌ bi ka tōꞌ palsu.

⁶Na san meꞌ looy kadarihan kasohean, bong siga pa-mmean sukuꞌ si Isa ndooy, yaꞌ san luu bay tatammu da njawom umanat kami ma subay na pin sinaup atawa pun sinampunan. Boꞌ na, minsan sila tanyag jama langkaw ntan da, yaꞌ du ku bay loman ninsila batan ndang katoonan ku Tuhan yaꞌ magsitingka manusiyaꞌ. ⁷Dari tabista du meꞌ siga pa-mmean ndooy sibuꞌ du kami ka si Pitel bay kawakilan leꞌ Tuhan masaplag umanat mahap pasal si Isa. Sat na jaꞌ niyaku, pa kabangsa-bangsahan ma saꞌ Yahudi. Kuwan niiya, pa bangsa Yahudi. ⁸Batan tabista da du, yana meꞌ Tuhan nampulnaꞌ pabuwatan si Pitel magrasul ni siga Yahudi, meꞌ looy du meꞌ na nampulnaꞌ pabuwatan ku ni siga bangsa ma saꞌ Yahudi.

⁹Dari sila siꞌ tu ma ndang tanyag pa-mmean sukuꞌ si Isa, yana ga si Yaꞌkub, si Pitel, ka si Yahiya, tabista da na lay du ku pineneꞌ leꞌ Tuhan binuwat rasul si Isa. Sangkon gāk na sila ngaku kami ka si Balnabas limbang da. Batan magtaayun na pamiki kami ni hāl meꞌ kami masaplag. Dari pagsulutan kami, kuwan kami ka si Balnabas pa kabangsa-bangsahan ma saꞌ Yahudi. Kuwan sila, pa bangsa Yahudi. ¹⁰Ilooy du bay amay-amayan da ningkami, subay kami yaꞌ mabiya siga jama miskin. Boꞌ ndang tigiꞌ du ku nulung ninsila.

Si Pitel sinahawi

¹¹Na hallom maka hallom na, kuwan si Pitel, lay pa Antiyok ngandaꞌ-ngandaꞌ kami. Sugaꞌ sasang na ndooy, tud bay magsāꞌ ya. Dari lay ya sahawi ku balharapan. ¹²Sibuwa na takka, tuwaꞌ arat na batan yaꞌ ya magsibiddaꞌ jama. Mmeꞌ ya siharung-harung mangan ka soysoy jaꞌ sampay siga jama ma saꞌ Yahudi. Sugaꞌ song hallom, luu na baw takka pagkahi na siga Yahudi man panohoan si Yaꞌkub lakka man Jerusalem. Dari bbuwatan si Pitel, lay tagongan na meꞌ na paharung mangan ni siga danganakan na ma saꞌ Yahudi. Kon na tagongan na batan tawu ya sinahawi meꞌ siga pagkahi na Yahudi sabap meꞌ na paharung mangan ni jama ma yaꞌ bay pingkaꞌ inislam.(2.12) Njawman saraꞌ agama Yahudi, yaꞌ sila dari paharung mangan ni siga bangsa ma saꞌ Yahudi sabap katamak konoꞌ ninsila. Yaꞌ gi tabista da njawman Almasi yaꞌ luu pagsitingkahan bangsa Yahudi ka kabangsa-bangsahan ma saꞌ Yahudi.¹³Dari pag takita siga Yahudi kasohean ndooy ni Antiyok kadarihan si Pitel, bbuwatan da ngakig na du yaꞌ paharung mangan ni siga danganakan da ma saꞌ Yahudi. Sampay si Balnabas, lay na du ga taboo-boo meꞌ da san katoonan na na yaꞌ tuwaꞌ pabuwatan meꞌ looy.

¹⁴Dari pag ndaꞌ ku bbuwatan da yaꞌ sikatuwaꞌ ka kabanahan ni umanat mahap, ilooy ma yuk ku ni si Pitel ni pag-awpan sikamimon, “Kau tu, hallang-hallangan tuu, yaꞌ na ko bay mogbogan saraꞌ agama bangsa ta Yahudi. Pag batnaa, sarī na la tikmas nu. Sat nu saꞌ māꞌ, subay na pin siga jama ma saꞌ Yahudi mean saraꞌ agama ta boꞌ da tahasi nu danganakan.”

¹⁵Maka yuk ku gi niiya, “Nges, meꞌ kita itu turunan bangsa Yahudi, kanna ta maruhuꞌ intong gi kita man kabangsa-bangsahan saꞌ Yahudi sukat bangsa ta ngantanan saraꞌ Tuhan. Boꞌ na, nabiat lagi bangsa ta ngawnan sagannap ma saꞌ Yahudi, siga baldusa. ¹⁶Sugaꞌ batnaa, labbahan ta na pamiki meꞌ looy. Batan katoonan ta na, ilooy ya man manusiyaꞌ initung meꞌ Tuhan intong yana sabap meꞌ da pitsayaꞌ ni si Isa Almasi, saꞌ ga sabap meꞌ da mogbogan saraꞌ. Inaa sina kon kita bay pitsayaꞌ niiya. Tabista ta na yaꞌ luu san disu jama koleꞌ kaintongan pa Tuhan meꞌ na bay mogbogan saraꞌ.

¹⁷“Sugaꞌ kuwan siga pagkahi ta Yahudi, awnan da na baw kita baldusa pagka kita pitsayaꞌ na isu-isu Almasi poonan kaintongan ta. Maka sukat yaꞌ na kita mogbogan saraꞌ da, bistahan da Almasi na baw moo-moo kita buwat dusa. Sugaꞌ katoonan ta du tunmanūn meꞌ Almasi buwat meꞌ looy. ¹⁸Arapun ilooy ya man ta tud bana-bana baldusa bong kita nanggehan tōꞌ ma lay na timanan ta, ilooy ma yuk na subay kita mogbogan saraꞌ bong kita doman intong pa Tuhan.

¹⁹“Boꞌ aku baw tu, tabista ku na, san pooy basag ku bay mogbogan saraꞌ, basta yaꞌ du tabogbog ku labbasakayi. Dari lay na tikutan ku saraꞌ mari tatūs ku lān ma bay ginantaꞌ meꞌ Tuhan man jama nulut ni kahandak na. Meꞌ ku ngingat, pagkajama ku maruhuꞌ lay na tabeꞌ matoy ni Almasi llansang taꞌ tehang. ²⁰Pag batnaa, Almasi na llum ni baran ku, saꞌ na aku. Sangkon kahandak na jaꞌ bean ku, saꞌ na kahandak ku. Maka batnaa, halloman ku llum, mangando jaꞌ ku ni Anak Tuhan. Batan maaseꞌ ya niyaku sampay lay na ga paglillaꞌ na dī na pinapatoy kalnaꞌ aku. ²¹Sangkon bong itu ku mangasa na baw ni hulas-sangsāꞌ ku mogbogan saraꞌ man ku initung intong, sibuꞌ na du ka bay tuwak ku aseꞌ Tuhan niyaku. Batan sat ku saꞌ māꞌ yaꞌ luu kapuspusan kapatoy si Isa.”

Lawak pagbiddaan mogbogan saraꞌ agama ka meꞌ pitsayaꞌ ni Almasi

¹Kuwan kaam baw nnaa ni Galatiya, subay ga kam jama yaꞌ luu panayu bi. Meꞌ bay na kam hinikmatan. Batan tatammu bi na baw ga mmeꞌ-mmeꞌ ni jama nnaa ma māꞌ subay bogbogan bi saraꞌ agama Yahudi boꞌ bi dari initung intong. Boꞌ ko, isu-isu kapatoy Almasi taꞌ tehang poonan manusiyaꞌ initung intong. Tud tallak na bilay la meꞌ ku bay mahatiyan kaam.

²Tilaw ta teꞌ kam. Pooy meꞌ bi bay koleꞌ Rū Sutsiꞌ? Man sabapan meꞌ bi kilay bay mogbogan saraꞌ? Mastiꞌ ssaꞌ silay! Arapun ngkon bi ilay bay pinaasokan Rū Sutsiꞌ sabap meꞌ bi bay pitsayaꞌ ni umanat mahap ma bay takale bi man kami. ³Kaam ina ma doman tabeꞌ njawman saraꞌ siga Yahudi, meꞌ ga yaꞌ luu panayu bi. Sibuwa bi mmeꞌ ni Almasi, lay na kam mangasa ni tabang Rū Sutsiꞌ man bi intong pa Tuhan. Pag batnaa, ongoy taggahaꞌ kanna bi subay na pin luu gi jinisan taat pabuwat bi man bi majatu kaintongan bi? ⁴Marean ta bistahan bi mimon kabinsanaan ma bay tatasan bi sabapan pangando bi ni Almasi yaꞌ na luu pūs na. Saꞌ silay meꞌ looy.

⁵Saꞌ ba, lay na dean Tuhan Rū na ningkaam, boꞌ lay gi ya makitahan kaam jinisan pabuwatan kahaylan-haylan? Sugaꞌ saꞌ silay sabap meꞌ bi bay buwat jinisan taat saraꞌ agama. Arapun iya ilay bay buwat meꞌ looy sabap meꞌ bi bay pitsayaꞌ ni umanat ma bay takale bi pasal si Isa.

⁶Pamintangan bi na suwat njawom kitab, ilooy ma yuk na,

“Lay pitsayaꞌ si Ibrahim ni palman Tuhan sampay ilooy na man na bay initung meꞌ Tuhan intong.”(3.6) Panagnaan ni Awwal Jaman 15.6.

⁷Sangkon pahamun bi banahan, sagannap ma pitsayaꞌ ni janjiꞌ Tuhan meꞌ karuha Nabi Ibrahim, sila na sina initung meꞌ Tuhan siga anak Nabi Ibrahim. ⁸Sarī gi, man maruhuꞌ-ruhuꞌ lagi, ndang luu na garaꞌ Tuhan ngitung manusiyaꞌ intong lakka man mimon kabangsa-bangsahan basta sila pitsayaꞌ ni Almasi. Umanat mahap looy ilay siꞌ bay pinalahil meꞌ Tuhan ni Nabi Ibrahim. Batan njawom kitab, yuk Tuhan niiya,

“Bbos-bbos kau ina poonan man mimon kabangsa-bangsahan taꞌ babaw junyaꞌ koleꞌ supaat.”(3.8) Panagnaan ni Awwal Jaman 12.3.

⁹Na palman looy ilay, lay na du bay binakbul, batan meka na jama man kabangsa-bangsahan lay na sinupaatan sabap meꞌ da pitsayaꞌ ni panubuꞌ Nabi Ibrahim, yana si Isa Almasi. Lay na sila initung intong meꞌ karuha Nabi Ibrahim du bay initung intong sabap meꞌ na bay pitsayaꞌ ni palman Tuhan. ¹⁰Boꞌ sagannap ma mangasa ni hulas-sangsāꞌ da mogbogan saraꞌ man da initung intong, yaꞌ sina sila koleꞌ supaat. Ilooy du takoleꞌ da mulkaꞌ batan yaꞌ tabogbog da labbasakayi. Boꞌ magbēꞌ du bana ka suwat njawom kitab, ilooy ma yuk na,

“Njawom mulkaꞌ soysoy yaꞌ mogbogan mimon saraꞌ njawom kitab.”(3.10) Kitab Tawrat, Duteronomi 27.26.

¹¹Sangkon tarang-tarang na yaꞌ luu jama initung meꞌ Tuhan intong sabap meꞌ da mogbogan saraꞌ agama. Boꞌ sikatuwaꞌ du ka suwat njawom kitab, ilooy ma yuk na,

“Sagannap ma initung meꞌ Tuhan intong sabapan pangando da niiya, mastiꞌ koleꞌ kasampulnaan nyawa saumu-umu.”(3.11) Kitab Nabi Habakuk 2.4; Hibrani 10.38; Rom 1.17.

¹²Boꞌ sila ina ma mista intong sila pa Tuhan sabap meꞌ da mogbogan saraꞌ, ilooy jaꞌ pakutuꞌ da meꞌ da magtaat, saꞌ ga pangando pa Tuhan. Batan yaꞌ kuhi lakka man jawom pamiki da bitsala Nabi Musa, ilooy ma yuk na,

“Soysoy mogbogan siga saraꞌ tuu labbasakayi koleꞌ kasampulnaan nyawa ma yaꞌ luu katapusan na.”(3.12) Kitab Tawrat, Libitikus18.5.

¹³Boꞌ kitabi itu, ndang katoonan tabi na mimon manusiyaꞌ ngalangga saraꞌ Tuhan. Sangkon pataꞌ kitabi minulkaan bbos-bbos. Lipara, luu na Almasi bay nongan umu na llansang taꞌ tehang supaya tapaddusan na na kitabi man mulkaꞌ Tuhan. Iya ilay gantiꞌ tabi minulkaan. Boꞌ magbēꞌ du silay ka suwat njawom kitab, ilooy ma yuk na,

“Soysoy pinapatoy siniitan taꞌ tehang, tumatandaꞌ lay minulkaan meꞌ Tuhan.”(3.13) Kitab Tawrat, Duteronomi 21.22-23.

¹⁴Na si Isa Almasi ilay bay maglillaꞌ pinapatoy supaya takoleꞌ meꞌ mimon kabangsa-bangsahan supaat ma bay njanjiꞌ ni Nabi Ibrahim, maka supaya kitabi ma pitsayaꞌ, pinaasokan na Rū Sutsiꞌ ma bay njanjiꞌ meꞌ Tuhan.

Saraꞌ agama yaꞌ luu kabigiꞌ-bigian na ni janjiꞌ Tuhan

¹⁵Siga danganakan, buwanan ta doꞌ kam pamintangan. Bong sawpama luu duwa jama buwat pagsulutan, boꞌ luu gi kasuwatan bay sinaynan meꞌ da, mastiꞌ yaꞌ dari sinampunan atawa kinulangan bitsala da. Bong ina lai, mastiꞌ yaꞌ na sina sā pagsulutan da. ^16-17Meꞌ naa du sina karuha bay pagsulutan Tuhan ka Nabi Ibrahim. Yaꞌ du dari sinampunan atawa kinulangan. Hati na, janjiꞌ Tuhan ni pagsulutan da ka Nabi Ibrahim yaꞌ du tasampunan ka saraꞌ Nabi Musa ma bay pasunuꞌ paddus mpat hatus tallumpūꞌ taun. Na bong ina lay na baw sinampunan ka saraꞌ, malaingkan yaꞌ na sā pagsulutan Tuhan ka Nabi Ibrahim.

Na njawom janjiꞌ Tuhan ni Nabi Ibrahim, yuk na, “Bbos-bbos mimon kabangsa-bangsahan sinupaatan man sabapan panubuꞌ nu.”(3.16-17) Panagnaan ni Awwal Jaman 22.18. Na jaman Tuhan ilay bay halling, “man sabapan panubuꞌ nu,” saꞌ silay ga panubuꞌ Nabi Ibrahim ma meka bay awnan Tuhan, arapun tuwaꞌ pa disu du panubuꞌ na, yana Almasi. ¹⁸Dari ni kapasal janjiꞌ Tuhan ilay siꞌ nupaatan mimon kabangsa-bangsahan, saꞌ ga meꞌ mogbogan saraꞌ man jama koleꞌ supaat looy. Batan bong subay na pin jama mogbogan saraꞌ, malaingkan yaꞌ na luu pūs bay janjiꞌ Tuhan ni Nabi Ibrahim. Arapun kon ilay tabi bay koleꞌ supaat meꞌ ilooy ma bay takoleꞌ Nabi Ibrahim sabap meꞌ tabi bay ngikut iya pitsayaꞌ ni janjiꞌ Tuhan.

Maksud saraꞌ agama

¹⁹Na adakala yuk kasohean na baw mintu, “Bong meꞌ naa, ongoy baw lay lagi Tuhan malahil saraꞌ na?” Bong yaꞌ katoonan bi, ngkon ilay saraꞌ bay pinalahil supaya tumatandaꞌ ni manusiyaꞌ dusahan sila pa Tuhan. Sugaꞌ saraꞌ ina, luu ka ngkoran na. Batan pag luu jaꞌ bay takka panubuꞌ looy disu ma bay njanjiꞌ meꞌ Tuhan, saꞌ na saraꞌ padduman tabi.

Saraꞌ Tuhan ilay, bay sinohoꞌ meꞌ na pinalahil ni siga malaikat pa mman Nabi Musa. Pag-anu, boꞌ pinasampay na baw meꞌ Nabi Musa ni kabboꞌ-bboan kami. ²⁰Boꞌ janjiꞌ Tuhan ni Nabi Ibrahim ilay, yaꞌ na ya bay mag-utusan. Iya na mismu bay nganjanjiꞌ ni Nabi Ibrahim.

²¹Na adakala bistahan kasohean magsaggaꞌ saraꞌ Tuhan ka janjiꞌ na. Sugaꞌ saꞌ silay meꞌ looy. Sat na jaꞌ, yaꞌ sibuꞌ maksud da. Maksud saraꞌ ina man makitahan manusiyaꞌ dusa da. Boꞌ janjiꞌ Tuhan ina yana poonan man dusa pinuwasan. Bong siꞌ ina luu saraꞌ ma kapuwas ni dusa atawa kabuwan kaallum bahau, malaingkan initung na sina kitabi intong sabap meꞌ tabi mogbogan saraꞌ. ²²Sugaꞌ tallak na silay njawom kitab mimon manusiyaꞌ takawum leꞌ dusa. Sangkon yaꞌ takaya da mogbogan saraꞌ. Dari lay na Tuhan nganjanjiꞌ muwasan dusa da basta sila pitsayaꞌ jaꞌ ni si Isa Almasi.

²³Na maruhuꞌ ilay, yaꞌ gi bay pinalahil meꞌ Tuhan bong pooy meꞌ manusiyaꞌ koleꞌ kaallum bahau. Jaman looy, kami siga Yahudi meꞌ sapantun tinalungkuꞌ jaꞌ meꞌ saraꞌ. Sakayi kami paddus, noy lay na kami pitsayaꞌ ni si Isa Almasi. ²⁴Dan jinis meꞌ halling, saraꞌ ilay meꞌ sapantun tukang jaga bay magbayaan kami ngkod-ngkoran yaꞌ gi bay takka Almasi. Noy takka na Almasi boꞌ kami sumunsayaꞌ sampay initung na intong sabap meꞌ kami pitsayaꞌ niiya. ²⁵Dari pagka luu na bay takka Almasi sampay kinapitsayaan na meꞌ kami, yaꞌ na kami njawman tukang jaga looy, yana saraꞌ.

²⁶Kaam pun ina labbasakayi, anak Tuhan na du kam sabap meꞌ bi pitsayaꞌ ni si Isa Almasi. ²⁷Maka pag lay jaꞌ kam pinandi tandaꞌ bi mmeꞌ na ni Almasi, sibuꞌ na du kam ka lay na nibuuk dī bi ka iya. Arat Almasi ina bong nnaꞌ ta pa juba, lay na patuk bi. ²⁸Sangkon yaꞌ na kitabi magsitingka jama bong sila Yahudi atawa ssaꞌ, bong sila ata atawa ssaꞌ, bong sila danda atawa lalla. Sibuꞌ-sibuꞌ na kitabi sabap tibuuk na du kitabi saliꞌ-saliꞌ ka si Isa Almasi. ²⁹Maka pagka sukuꞌ Almasi na kam, malaingkan initung na sina kam anak Nabi Ibrahim. Boꞌ na, kapakaam na mimon ma bay njanjiꞌ meꞌ Tuhan.

¹Batnaa buwanan ta doꞌ kam dalil. Bong luu disu anak sawraga lay na matoy mmaꞌ na, minsan mimon altaꞌ mmaꞌ na pamusaka niiya, halloman na dikiꞌ lagi, saꞌ gi du iya ngantan. Sibuꞌ du kapatut na ka ata ma yaꞌ luu dapat na ngantanan oy maka oy na. ²Lagiꞌ na, subay luu na pin nganjagahan iya sampay magpandoyan iya halloman yaꞌ gi bay taabut waktu bay ginantaꞌ meꞌ mmaꞌ na man na koleꞌ pusaka na. ³Damikiyan, meꞌ naa du sina bay karuha tabi halloman yaꞌ gi bay takka Almasi. Sibuꞌ du karuha tabi ka anak-anak ma subay na pin njagahan. Batan maruhuꞌ, ilooy du katoonan tabi meꞌ mogbogan jinisan aturan ka tōꞌ siga kabboꞌ-bboan tabi. ⁴Sugaꞌ pag taabut na gantaan Tuhan, lay na papitu na Anak na pa junyaꞌ, boꞌ na dari manusiyaꞌ pinamaddihan leꞌ danda meꞌ karuha kitabi du. Maka iya ilay bay du lumingkaꞌ njawman sakup saraꞌ Nabi Musa. ⁵Ngkon na ilay bay pinapitu supaya tapaddusan na kitabi man jawom sakup saraꞌ maka supaya kitabi taaku na meꞌ Tuhan anak na ma koleꞌ mimon supaat na.

⁶Dari pagka anak Tuhan na kitabi, lay na kitabi pinaasokan leꞌ Tuhan Rū Anak na pa jawom atay tabi. Maka ilooy na poonan tabi dari na ngawnan Tuhan Mmaꞌ tabi. ⁷Maka saꞌ na kitabi meꞌ sapantun ata ma yaꞌ luu kapatut na, batan anak Tuhan na kitabi. Boꞌ na, tiyap-tiyap ina jama lay na dari anak Tuhan, mastiꞌ takoleꞌ na jaꞌ mimon ma bay hinalliꞌ meꞌ Tuhan ni siga anak na.

Sukuꞌ si Isa ni Galatiya kinasusahan meꞌ si Pol

⁸Kaam ina nnaa ma saꞌ turunan bangsa Yahudi, saꞌ ba, bay jaman yaꞌ gi katoonan bi Tuhan, bay jaꞌ kam ngisbat siga tuhan-tuhan? Waktu looy ilay, subay ga kam ata siga tuhan-tuhan bi hangat bi numba sila. ⁹Lipara batnaa katoonan bi na Tuhan sabanna. Boꞌ na, kaayaran labi man naa, batnaa iya na mismu ngahasi kaam. Sugaꞌ pag batnaa, ituu baw tu man ku jayip, meꞌ ga doman na baw kam pabeleng pa bay kahalan bi maruhuꞌ mogbogan jinisan aturan. Mingkan, yaꞌ san silay katabang ningkaam man bi kinahopan meꞌ Tuhan. Ongoy baw taggahaꞌ pabalik na baw kam buwat dī bi ata siga aturan? ¹⁰Habal takka niyaku, bbuwatan bi konoꞌ magtuyuꞌ mogbogan siga aturan bangsa Yahudi. Tatammu bi na baw ga ngakig siga Yahudi maehe siga llaw ka buwan, sampay siga musim ka ga taun saula-ula inaa na katabang man nalamat kaam. ¹¹Ituu kahanggawan ku, taggahaꞌ lai jaꞌ lopas mimon bay sangsāꞌ ku noan kaam.

¹²Sangkon siga danganakan, junjung ku na ningkaam, akigun bi jaꞌ ku mari kam meꞌ aku na du paddus na man sakup saraꞌ bangsa Yahudi. Bong siꞌ taintom bi jaman ku nnaa mman bi, lay jaꞌ ku buwat dī ku meꞌ karuha kaam ma yaꞌ ngantanan saraꞌ Yahudi.

Siga danganakan, yaꞌ situ takupan ku ayad meꞌ bi bay buwat aku jaman ku nnaa. ¹³Sibuwa ku bay pilu masaplag umanat mahap ningkaam, adak yaꞌ san bay taboo ku baran ku ni kalamma ku. ¹⁴Sugaꞌ san ku bay kasasat ningkaam, yaꞌ du ku bay padiyoꞌ bi, gam pin lay gi ku hasi bi. Meꞌ bi buwat aku, subay ga ku malaikat man Tuhan atawa pun tud dī si Isa Almasi mismu. ¹⁵Tud bay gāk kam niyaku. Sugaꞌ pag batnaa sarī na la meꞌ bi ka aku. Maruhuꞌ jaman ku nnaa mman bi, bong siꞌ luu bay paku ku ningkaam, sarunduun du kam muwan. Kumpas ku, san gi mata bi, bong bay paku ku, atas bi nguwiriꞌ boꞌ ndean aku. ¹⁶Pag batnaa, meꞌ bantuk binanta na ku la meꞌ bi sukat ku maan kaam kabanahan.

¹⁷Bong siꞌ ina bay tasayu bi, kuwan siga jama nnaa ma ngalogos kaam mogbogan saraꞌ Yahudi, san bantuk doman sila ngayaran kaam, bong niyat atay da, basta sarī sina. Kainagon da ina yaꞌ na kam palamud ningkami mari kam tiggo nanggehan sila. ¹⁸Kamasaꞌ, mahap du baw silay bong kam tiggo nanggehan jama, luu-yaꞌ ku luu nnaa, basta sikatuwaꞌ jaꞌ tōꞌ da ka umanat mahap ma bay lakka man Almasi.

¹⁹Siga anak, halloman ku ilay bay ngagad kaam pitsayaꞌ ni Almasi, tud bay gampang ku ningkaam. Sibuꞌ du parasahan ku ka danda magkamaddi-maddi ngagad anak na pōꞌ. Pag batnaa, meꞌ ga pabalik na baw gampang ku ningkaam, batan kahalloman ku la ngagad kawul-piil Almasi tumatandaꞌ ni jataꞌ bi. ²⁰Kainagon ku luu na ku nnaa supaya kitabi kapagbitsala balharapan. Kawu-kawu yaꞌ na kam subay na pin sinahawi meꞌ ku. Ni batnaa, yaꞌ na ku pandoy bong pooy meꞌ ku mamikihan kaam.

²¹Tilaw ta teꞌ kam. Kaam ma doman njawman sakup saraꞌ agama Yahudi, tasayu bi kina bong oy halling njawom kitab? ²²Njawom kitab ilay, luu bay sinuwatan pasal Nabi Ibrahim bay anakan duwa lalla. Disu yana anak na ka ata na. Kuwan ilooy disu, yana anak na ka nda na poon ma saꞌ ata. ²³Kuwan anak Nabi Ibrahim ka ata na, bay pinamaddihan meꞌ kabiyasahan mimon danda du. Boꞌ anak na ka nda na ma saꞌ ata, tud kahaylan-haylan meꞌ na bay pinamaddihan. Iya bay pinamaddihan man Tuhan bay numan janjiꞌ na ni Nabi Ibrahim.

^24-25Na ga danda looy ilay siꞌ sikaduwa tabilang sipat ni duwa pagsulutan antaraꞌ Tuhan ka manusiyaꞌ. Pagsulutan sibuwa ilay yana saraꞌ ma bay dean Tuhan ni Nabi Musa taꞌ Punu Saynay ndooy ni Arabiya. Danda looy ma ata, yana si Hajal, yana sipat ni pagsulutan looy. Batan yana meꞌ si Hajal ka anak na siga ata, damikiyan, mimon jama ma njawman saraꞌ Nabi Musa meꞌ karuha ata du. Maka si Hajal ilay tabilang du sipat ni daira bangsa Yahudi, yana Jerusalem. Batan yana meꞌ si Hajal nneꞌ ata, Jerusalem pun tabilang du nneꞌ bangsa ata, batan siga jama ni daira looy pinahata meꞌ saraꞌ. ²⁶Boꞌ nda Nabi Ibrahim, ilooy ma saꞌ ata, yana Sitti Sara, yana sipat ni daira sarī yana Jerusalem ni sulgaꞌ. Batan yana meꞌ Sitti Sara ka anak na saꞌ ata, damikiyan, siga raayat ni daira looy pun saꞌ du ata. Dari pagka mimon kitabi ma pitsayaꞌ ni Almasi bay dari siga raayat ni daira looy, dari ko ngawon, inaa na daira ma tabilang nneꞌ tabi. ²⁷Boꞌ luu gi bay sinuwatan njawom kitab disu tunaꞌ, ilooy ma yuk na,

“Pagakun atay nu, Nang, minsan ko danda yaꞌ bay pingkaꞌ hanak. Ngalang ko pahaddo san ko yaꞌ bay pingkaꞌ maddi. Batan san ina ko bay pinabiya, meka gi sina mintu siga anak nu man danda looy ma llahan.”(4.27) Kitab Nabi Isaya 54.1. Kuwan danda ma lay pinabiya, tuwaꞌ pa kabangsa-bangsahan ma saꞌ Yahudi batan maruhuꞌ saꞌ sila sukuꞌ Tuhan. Sugaꞌ meka sila pitsayaꞌ na ni Almasi sampay bay dari anak Tuhan. Kuwan danda looy siꞌ ma llahan, tuwaꞌ pa bangsa Yahudi batan sila bay peneꞌ Tuhan binuwat sukuꞌ na mattoꞌ. Salla na, pag takka Almasi, yaꞌ sila meka pitsayaꞌ niiya. Dari yaꞌ du sila meka taaku meꞌ Tuhan anak.

²⁸Na siga danganakan, kitabi itu lay dari anak Tuhan man sabapan janjiꞌ Tuhan bay kinapitsayaan meꞌ tabi. Sibuꞌ du karuha tabi ka si Isahak ma bay pinamaddihan man sabapan janjiꞌ Tuhan bay kinapitsayaan meꞌ Nabi Ibrahim. ²⁹Jaman looy ilay, si Ismail, yana anak looy ma biyasa jaꞌ meꞌ na bay pinamaddihan, wā ngalaugan ariꞌ na si Isahak ma bay pinamaddihan man kawasa Rū Sutsiꞌ. Meꞌ naa du sina batnaa karuha tabi batan nilaugan du kitabi meꞌ siga jama ma ngalogos nohoꞌ mogbogan saraꞌ agama. ³⁰Sugaꞌ pindogahan bi doꞌ bay halling jawom kitab, ilooy ma yuk na,

“Palahiyun danda looy ma ata ka anak na sabap anak ata yaꞌ luu kabigiꞌ-bigian na ni pusaka ma bay hinalliꞌ ni anak danda looy ma saꞌ ata.”(4.30) Panagnaan ni Awwal Jaman 21.10.

³¹Dari siga danganakan, kitabi itu yaꞌ meꞌ karuha anak si Hajal ma ata, arapun kitabi itu initung anak Sitti Sara ma sumunsayaꞌ. Batan pag lay jaꞌ tabi dari anak Tuhan, lay na kitabi pinaddusan man siga aturan ka taat ma bay mahata kitabi.

Sagannap ma tibuuk ka si Isa paddus na man sakup saraꞌ

¹Na siga danganakan, kon ilay Almasi bay maddusan kitabi man jawom sakup saraꞌ supaya kitabi sumunsayaꞌ na. Sangkon amay-amay daa na kam kuhi pinahata meꞌ saraꞌ pabalik. Takkoan bi na kasumunsayaan bi.

²Indanan bi bitsala ku. Bong ina kam nohoꞌ inislam sabap kanna bi inaa man bi initung meꞌ Tuhan intong, malaingkan yaꞌ sina luu pūs Almasi ningkaam samasakali. ³Maka baan ta kam banahan, sagannap ina ma nohoꞌ inislam man da initung intong, talpaksaꞌ ninsila mogbogan saraꞌ Nabi Musa labbasakayi. ⁴Lagiꞌ na, bong luu nnaa doman mangasa ni sangsāꞌ da mogbogan saraꞌ man da initung intong, sibuꞌ du sina sila ka bay palabba man si Isa Almasi. Maka tinuwak gi meꞌ da aseꞌ-tabang Tuhan ninsila. ⁵Boꞌ kitabi baw itu ma pitsayaꞌ sampay mangasa ni gaos Rū Sutsiꞌ, holat tabi arat-tabiat tabi sigi-sigi hinalin ngkod-ngkoran yaꞌ gi kitabi intong gi man intong. ⁶Dari meꞌ kitabi itu tibuuk na ka si Isa Almasi, katoonan tabi na yaꞌ luu pagbiddaan pa Tuhan bong jama bay inislam atawa niyaꞌ. Ilooy du puntukan banahan yana pangando tabi niiya ma takita ni aseꞌ tabi ni pagkahi tabi manusiyaꞌ.

⁷Kaam la maruhuꞌ, tud bay mahap meꞌ bi mmeꞌ ni kabanahan. Sugaꞌ pag batnaa, soy na baw ina bay moo-moo kaam magsiꞌ? ⁸Tōꞌ da bina, tud saꞌ sina lakka man Tuhan. Batan Tuhan ina bay ngaliyun kaam mari kam paddus man jawom sakup saraꞌ agama. ⁹Bong ina luu san disu jaꞌ tōꞌ bingkok timaꞌ bi, song hallom pasampun boꞌ pasampun na pin. Bong dalil ta pa pasulig, song hallom, lataꞌ na man na ngassob. ¹⁰Kamasaꞌ, pagka ina kam ndang luu na njawman Papuꞌ Isa, tatantu ku mastiꞌ pabeleng du sina kam pa kabanahan ma bay tōꞌ ku ningkaam. Boꞌ ga jama looy ilay ma ngalingog pamiki bi ka tōꞌ palsu, soy maka soy na, basta kalabuan jaꞌ sina sila hukuman meꞌ Tuhan.

¹¹Siga danganakan, bong luu nnaa māꞌ aku magnasihat talpaksaꞌ subay binogbogan hāl meꞌ ngislam man ta initung intong, daa kam hidjab. Bong ina bana bitsala da, ongoy taggahaꞌ masi ku llaugan meꞌ siga pagkahi ku Yahudi? Maka bong ina bana ninsila, yaꞌ na lammis siga Yahudi niyaku san ku masaplag pasal kapatoy si Isa taꞌ tehang. ¹²Bong para niyaku, kuwan sila ma ngalingog kōk bi nnaa nanggehan hāl meꞌ ngislam, gam na sohoꞌ da na kinehetan sampay awpan da labbasakayi.

¹³Kaam ina siga danganakan, lay na kam lliyun meꞌ Tuhan pa jawom okoman na supaya kam paddus na man jawom sakup saraꞌ. Sugaꞌ amay-amay daa pakoyun bi kasumunsayaan bi bilang daawa man nganduwan napsu bi. Arapun pakutuun bi na meꞌ bi sikaaseꞌ-kaaseꞌ sampay sitabang-tabang. ¹⁴Batan mimon ina saraꞌ Nabi Musa, lay na tinikmod pa disu panohoan sa, ilooy ma yuk Tuhan,

“Kaasean bi pagkahi bi manusiyaꞌ sibuꞌ du ka aseꞌ bi ni dī bi.”

¹⁵Na bong ina kam yaꞌ sikaaseꞌ-kaaseꞌ sampay wā kam sasaꞌ-manasaꞌ, malaingkan buwat jaꞌ kam dī bi subay ga idoꞌ sitokob-tokob. Song hallom, sikalangkat-kalangkat na sina kam dambaanan.

Bong kita mean kahandak Rū Sutsiꞌ, yaꞌ kita nganduwan oy-oy napsu maat

¹⁶Sangkon ituu na bāꞌ ku ningkaam: Mmeꞌ jaꞌ kam ni kahandak Rū Sutsiꞌ. Bong ina pakutuꞌ bi du meꞌ bi mean iya, malaingkan yaꞌ na luu masa bi taboo-boo meꞌ napsu bi buwat kalaatan. ¹⁷Napsu ta ina wā nguntra kahandak Rū Sutsiꞌ. Rū Sutsiꞌ pun wā du nguntra napsu ta. Magsaggaꞌ jaꞌ sila. Sangkon mamooy-mamooy ina paruli ta, luu na pin ilooy disu naggaꞌ. ¹⁸Sugaꞌ bong ina maglillaꞌ na kitabi ni Rū Sutsiꞌ, malaingkan iya na padduman tabi, saꞌ na saraꞌ agama.

¹⁹Na bong ina jama pinagbayaan meꞌ napsu da, tumatandaꞌ jaꞌ sina ni kawul-piil da, batan kajinisan kalaatan da, meꞌ sapantun magjina, buwat kasabuhan, yaꞌ ngagak dī da, ²⁰numba kajinisan sarī man Tuhan, ka makoy ilmuꞌ seytan.(5.20) Bong jama makoy ilmuꞌ seytan, bbuwatan da, buwat palkataan, nunaꞌ kulis, manggi seytan, nilik, ngammahan panggiyas, meꞌ naa, meꞌ naa. Boꞌ na, daran sila lammis, sasaꞌ, dangkiꞌ ka pasuꞌ kōk da. Tabiat da ina ngulihal kaayaran ni dī da sadjaꞌ. Maka mōꞌ sila pagsaggaan atawa magsisasaꞌ pagkahi da dambaanan. ²¹Maka jama ina ma pinagbayaan meꞌ napsu da, kainagon da kapasila na altaꞌ pagkahi da, maka panginum sila, sampay mmeꞌ sila ni buwatan baanan danda ka lalla buwat kalalamaan, meꞌ naa, meꞌ naa. Sugaꞌ ndang bay kam silay baan ku maruhuꞌ, jama ma buwat meꞌ looy, yaꞌ luu kabigiꞌ-bigian da ni okoman Tuhan.

²²Boꞌ jama ma pinagbayaan meꞌ Rū Sutsiꞌ ina, sibuꞌ karuha da ka poon kayu ayad jaꞌ buwaꞌ na. Batan jinisan kahapan takita ni kawul-piil da, yana aseꞌ, kagakan, sannang atay, pasensiya, bbuwatan ayad ni pagkahi da ka arat mahap. Tapangandohan sila ²³ka lammaꞌ pangatayan da sampay pandoy ngagak dī da. Ga jama meꞌ naa ina, san yaꞌ na luu saraꞌ maintong sila.

²⁴Meꞌ kitabi itu tibuuk na ka si Isa Almasi, bong kinawnan pabuwatan tagga pa Tuhan, timanan tabi na. Meꞌ tabi ngingat, pagkajama tabi maruhuꞌ ma wā pinagbayaan meꞌ napsu tabi, lay na tabeꞌ matoy ni si Isa Almasi llansang taꞌ tehang. ²⁵Maka pagka lay na kitabi binuwanan kaallum bahau meꞌ Rū Sutsiꞌ, sapatut na subay bean tabi na kahandak na. ²⁶Sangkon daa na kitabi takabbu. Maka daa na kitabi siparuga-paruga atawa sikadangkiꞌ-kadangkiꞌ.

Sitabang-tabang kitabi

¹Siga danganakan, bong luu nnaa disu pagkahi bi sukuꞌ si Isa bay taboo-boo buwat dusa, kuwan kaam ma tattap mean Rū Sutsiꞌ, subay kam maintoman iya kawu-kawu ya takoleꞌ bi pinaintong. Sugaꞌ subay hanunut-hanunut meꞌ bi mitsalahan iya. Maka ilagan bi dī bi, taggahaꞌ kaam na baw mintu takoleꞌ sinasat. ²Pakutuun bi meꞌ bi sitabang-tabang mari tumatandaꞌ ngasip na kam ni panohoan Almasi sikaaseꞌ-kaaseꞌ. ³Bong luu kam nnaa yaꞌ nabangan pagkahi bi sabap meꞌ bi mista lumabi kam man kasohean, ngandupang jaꞌ kam dī bi. Tud yaꞌ baw sina kam hagaan man pagkahi bi. ⁴Gam na pindogahan tabi doꞌ dī tabi bong tuwaꞌ pabuwatan tabi atawa niyaꞌ. Bong ina tud tuwaꞌ du, inaa ya pataꞌ man tabi gāk. Daa jaꞌ kitabi meꞌ kasohean ma tigiꞌ manding bong sila lumabi man pagkahi da. ⁵Batan taabut ina mintu kitabi siawop ka Tuhan, sibuꞌ-sibuꞌ na du kitabi magsabanna ni mimon bay gulaꞌ-gariꞌ tabi.

⁶Kaam ma tinoan kitab, sapatut na subay kam nulung guru bi sampay ngahampitan sila balanjaꞌ bi.

⁷Daa kam ngandupang dī bi saula-ula talimbuhan bi Tuhan. Oy-oy ina bay pabuwat tabi, mastiꞌ moleꞌ du pa kitabi. Bong ibaratan tanom, oy-oy bay tanom tabi, inaa du sina kattom tabi. ⁸Na hantak bitsala ku ilay siꞌ, bong kita nganduwan napsu ta, pag toklas na, binasa kita. Sugaꞌ bong kita mmeꞌ ni kahandak Rū Sutsiꞌ, sampulnaꞌ nyawa ta saumu-umu. ⁹Sangkon daa kita jamu buwat kaintongan, batan mastiꞌ luu jaꞌ sina masa ta koleꞌ tungbas ayad. ¹⁰Sangkon na, bong luu dapat bi buwat mahap ni jama awla na ni siga danganakan bi sukuꞌ si Isa, daa kam paagak.

Katapusan bitsala si Pol

¹¹Na ni katapusan suwat tuu, aku na situ nuwat ka tangan ku mismu. Paehe ku na batang suwat ku supaya kinanna meꞌ bi banahan. ¹²INDANAN BI, SAGANNAP MA MOGOS KAAM NOHOꞌ INISLAM, INAA DU INA PUHUNG DA SINANGLITAN SABAP MEꞌ DA MOGBOGAN SARAꞌ. YAꞌ SILA DOMAN MANGAKU ISU-ISU KAPATOY SI ISA ALMASI TAꞌ TEHANG YANA JALAN MAN JAMA INITUNG INTONG. ILOOY ILAGAN DA, TAGGAHAꞌ NILAUGAN NA BAW SILA MEꞌ SIGA PAGKAHI DA YAHUDI. ¹³Mingkan, sila ilay ma nohoꞌ kaam inislam, sila mismu yaꞌ du san bogbogan da mimon saraꞌ Nabi Musa. Kon da ina mogos kaam inislam, man da jaꞌ magpaabbu bong kam bay takoleꞌ-koleꞌ da mmeꞌ ninsila. ¹⁴Boꞌ aku tu, ilooy du pinag-abbu meꞌ ku yana kapatoy Papuꞌ tabi si Isa Almasi taꞌ tehang kalnaꞌ kitabi. Meꞌ ku ngingat, bay pagkajama ku maruhuꞌ lay na tabeꞌ ni si Isa nilansang taꞌ tehang. Pag batnaa, sarī na pagkajama ku. Sangkon lay na matoy kainagon ku ni kalaatan ma pinaabak meꞌ jama ma mandang hāl junyaꞌ. Boꞌ jama ma mandang hāl junyaꞌ ina, yaꞌ du luu kainagon da ni siga pakaradjaan ma hagaan niyaku.

¹⁵Meꞌ kitabi itu mmeꞌ ni Almasi, yaꞌ na puntukan bong kitabi bay inislam atawa niyaꞌ. Ilooy ya puntukan bong luu na pagkajama tabi bahau.

¹⁶Kamura-murahan sagannap ma pitsayaꞌ ni bay bitsala ku jawom suwat tuu, binuwanan du kasannangan ka timbang meꞌ Tuhan. Batan sila na sina bangsa Israil sabanna. Hati na, sukuꞌ Tuhan na sila san gi oy bangsa da.

¹⁷Katapusan bitsala ku, kainagon ku yaꞌ na kam kagundalaꞌ ni pamiki ku. Yaꞌ sina sikatuwaꞌ bong luu nnaa māꞌ yaꞌ ku bay buwanan Almasi kapatut noan jama. Aku tu, tandaꞌ ku sosohoan Almasi, lapat na baran ku meꞌ pawut hangat llagpiꞌ sampay hiniyak ka batu sabap meꞌ ku nanggehan kabanahan pasal iya.

¹⁸Siga danganakan, dambuli man inaa, kamura-murahan binuwanan na pin kam barakat meꞌ Papuꞌ tabi si Isa Almasi.

Wassalam