Epesus

Suwat si Pol pa mman Baanan Sukuꞌ si Isa ndooy ni

Epesus

Pahati

Epesus ilay yana daira mehe ni disu lahat inawnan Asiya Dikiꞌ yana Turkey ni batnaa. Ni bay jaman si Pol, tanyag Epesus sabap luu ndooy langga man siga kapil numba tuhan-tuhan da inawnan Altemis (ndaun Salsila siga Rasul si Isa Almasi 19.27).

Dari lay pilay si Pol pa Epesus masaplag umanat mahap pasal si Isa Almasi ni ga jama ndooy. Boꞌ lay gi ya tamban ndooy ga duwan taun. Sasang na ndooy, meka jama lay taboo na pitsayaꞌ ni si Isa (ndaun Salsila siga Rasul si Isa Almasi 19.1-20; 20.17-38).

Ni waktu si Pol bay nuwat ituu, sasangan na njawom jīl ndooy ni Rom sabap meꞌ na masaplag.

Njawom suwat tuu malahil si Pol garaꞌ Tuhan. Garaꞌ Tuhan ilay nibuuk mimon-mimon labba man junyaꞌ sampay pa sulgaꞌ pa jawom sakup si Isa Almasi.

Bāꞌ si Pol njawom suwat tuu si Isa yana takōk; kuwan sagannap ma pitsayaꞌ niiya yana baran na. Maka yuk si Pol, sagannap sukuꞌ si Isa meꞌ sapantun siga kalangkapan man Tuhan buwat langga man Rū na patannaꞌ. Kuwan si Isa meꞌ sapantun batu pepan luha man matangge langga looy. Sarī gi, bāꞌ si Pol, mimon ma pitsayaꞌ ni si Isa ginalla pangantin ma danda. Kuwan si Isa, yana pangantin ma lalla.

Njawom suwat tuu mahati si Pol bong oy arat pataꞌ ni siga jama sitampu maka oy arat pataꞌ ni antaraꞌ anak-anak ka ga induꞌ-mmaꞌ. Damikiyan, mahati du ya bong oy arat pataꞌ ni antaraꞌ siga ata ka ga papuꞌ da.

Ni katapusan suwat tuu pinahatiyan du kitabi pasal siga pakakas ma pamuwan Tuhan ni sukuꞌ si Isa supaya sila yaꞌ takoleꞌ meꞌ sasat Ibilis ka ga pagkahi na seytan.

Ituu bay sinuwatan meꞌ si Pol luu na ga tallumpuꞌ-dambuwaꞌ taun paddus si Isa Almasi bay inangkat pa sulgaꞌ.

EPESUS

¹Ituu itu aku, yana si Pol, disu rasul si Isa Almasi man kahandak Tuhan. Itu suwat ku pa mman bi siga sukuꞌ Tuhan, yana kaam ma magkanaalla mmeꞌ ni si Isa Almasi nnaa ni Epesus. ²Kamura-murahan binuwanan na pin kam kasannangan ka barakat meꞌ Mmaꞌ tabi Tuhan ka Papuꞌ tabi si Isa Almasi.

Njawom supaat sagannap ma tibuuk ka si Isa Almasi

³Pudji tabi Tuhan, Mmaꞌ Papuꞌ tabi si Isa Almasi. Meꞌ kitabi itu tibuuk na ka Almasi, lay na dean Tuhan ningkitabi mimon supaat man sulgaꞌ ma kasampulnaꞌ ni nyawa.

⁴Bistahun bi doꞌ, yaꞌ lagi san bay pinapayak junyaꞌ, ndang lay na kitabi pineneꞌ meꞌ Tuhan binuwat sukuꞌ na njawman Almasi. Maksud Tuhan ilay, subay kitabi sutsiꞌ sampay yaꞌ na luu sutsutan njataꞌ tabi ni mata na. Ni kaehe aseꞌ Tuhan, ⁵man maruhuꞌ lagi, ndang lay na ginantaꞌ meꞌ na subay kitabi dari anak na man sabapan pabuwatan si Isa Almasi, batan ndang ilooy nulut ni kahandak na. ⁶Sangkon tud pataꞌ Tuhan pinudji. Biddaꞌ na ehe aseꞌ na njataꞌ tabi ma tibuuk ka kakasi na, yana si Isa Almasi. ⁷Sabapan lahaꞌ Almasi bay tumpa, ilooy na silay bay maddusan kitabi man pidjalaꞌ ni dusa tabi. Sangkon luu na kaampunan ningkitabi tandaꞌ landuꞌ ehe aseꞌ Tuhan ningkitabi. ⁸Aseꞌ na ina lay na hinudhuran njataꞌ tabi. Lay gi ya muwanan kitabi kapandoyan ka pangahati supaya tahati tabi garaꞌ na. ⁹Boꞌ garaꞌ na ilay, ndang bay ginantaꞌ pinajatu njataꞌ si Isa Almasi, batan ndang inaa nulut ni kahandak na. Kamaatunan garaꞌ na ilay yaꞌ gi bay tasayu meꞌ manusiyaꞌ maruhuꞌ. Sakayi na pinalahil noy ningkitabi na ni timpu batnaa. ¹⁰Na garaꞌ Tuhan ilay meꞌ tuu: Pag mintu taabut waktu bay ginantaꞌ meꞌ na, labba man junyaꞌ sampay pa sulgaꞌ subay tinibuuk mimon-mimon pa jawman sakup Almasi.

^11-12Na bangsa kami itu bay duhuꞌ ngaholat ni katakka Almasi. Maka kami du bay ginantaꞌ meꞌ Tuhan binuwat sukuꞌ na ma subay moo sanglit ka kabantugan niiya. Labba man tagnaꞌ junyaꞌ lagi, ndang ilooy na silay bay garaꞌ Tuhan. Boꞌ garaꞌ Tuhan ina labbasakayi mastiꞌ pinajatu jaꞌ sina ni jalan ma sikatuwaꞌ ka kahandak na.

¹³Na kaam pun nnaa, meꞌ kami na du sina kam bay lliyun binuwat sukuꞌ Tuhan. Batan pag lay jaꞌ takale bi kabanahan, yana umanat mahap pasal kasalamatan, lay na du kam pitsayaꞌ ni Almasi. Pag-anu, boꞌ bi bay pinaasokan Rū Sutsiꞌ meꞌ ndang bay njanjiꞌ meꞌ Tuhan, tandaꞌ sukuꞌ na na kam. ¹⁴Boꞌ Rū Sutsiꞌ ina yana katakkoan man tabi katantu takoleꞌ tabi mimon ma bay hinalliꞌ meꞌ Tuhan ni sukuꞌ na. Maka tatantu tabi na bbos-bbos puhu na kasalamatan tabi takoleꞌ tabi pamaehe sanglit ka kabantugan pa Tuhan.

Si Pol makuhan sukuꞌ si Isa duwaa

¹⁵Siga danganakan, lay du silay taaka ku habal pasal pangando bi ni Papuꞌ Isa ka aseꞌ bi ni mimon pagkahi bi sukuꞌ Tuhan. ¹⁶Sangkon yaꞌ na situ bay bakkat meꞌ ku magsuku pa Tuhan sabapan bi. Maka wā kam pakuhan ku duwaa. ¹⁷Maku na pin situ ku duwaa pa Mmaꞌ tabi ma yaꞌ luu sibuꞌ sabanding na, yana Tuhan Papuꞌ tabi si Isa Almasi. Kamura-murahan binuwanan du kam pangahati lawom ni hāl Tuhan supaya magsasōng na pin meꞌ bi lungbid ka iya. ¹⁸Maka pakuhan ta na pin kam duwaa, kamura-murahan binuwanan du kam meꞌ Tuhan pangahati supaya tasayu bi na bong oy taholat bi pagka lay na kam lliyun pa jawom okoman na. Maka kamura-murahan pinalahil du ningkaam siga supaat hagaan saꞌ alang-alang ma bay hinalliꞌ meꞌ Tuhan ni sukuꞌ na. ¹⁹Maka pakuhan ta du kam pangahati supaya katoonan bi na bong pooy ehe kawasa Tuhan para ningkitabi ma pitsayaꞌ niiya. Kawasa na ilay, ²⁰lay na tumatandaꞌ njataꞌ Almasi jaman na bay pinakallum sampay inangkat pa sulgaꞌ. Pag-anu, boꞌ na pinatingkōꞌ ni bihing Tuhan huwin pa kawnan. ²¹Ndooy ilay, Almasi ngantanan kawasa-kapatut langkaw banahan. Patingkat ya man mimon anakkuraꞌ ka sultan sampay ga malaikat ka seytan. Bong inawnan sagannap ma magkawasa, yaꞌ luu awon langkaw lumabi man niiya labba man siga angkat-angkatan sibuwa sampay saumu-umu, labba man junyaꞌ tuu sampay pa ahirat. ²²Batan Almasi ilay bay inuwakilan meꞌ Tuhan magbayaꞌ ni mimon-mimon sampay magtakōk ningkitabi sikamimon ma pitsayaꞌ niiya, ²³yana kitabi ma binilang baran na. Baran na ina, ginaosan leꞌ na malahil mimon arat-tabiat na, batan iya nganggaosan mimon-mimon nnoy-nnoy jaꞌ.

Luu na kasampulnaan nyawa tabi sabapan si Isa Almasi

¹Na maruhuꞌ, kaam ina, bong pa Tuhan, matoy jaꞌ kam sabapan dusa bi hangat ngalangga kahandak na. Yaꞌ gi luu kaallum bi bahau. ²Jaman looy ilay, bbuwatan bi mandang hāl junyaꞌ jaꞌ sabap bay kam pinagmundaan meꞌ panghuluꞌ siga seytan, yana Ibilis. Iya ilay ndang magbayaan sagannap ma yaꞌ doman mmeꞌ ni kahandak Tuhan. ³Kamasaꞌ, mimon ilay kitabi lay jaꞌ du bay lumingkaꞌ meꞌ looy jaman tabi bay maabak meꞌ nganduwan napsu tabi. Bay jaꞌ du kitabi buwat oy-oy kalaatan bay talangga pamiki tabi. Dari pagka meꞌ looy bay tabiat tabi, mastiꞌ tumiluꞌ jaꞌ kitabi pa jawom mulkaꞌ Tuhan meꞌ karuha mimon manusiyaꞌ ma yaꞌ ngisbat iya.

⁴Lipara, biddaꞌ na ehe timbang ka aseꞌ Tuhan ningkitabi. ⁵Batan minsan kitabi meꞌ karuha jama matoy sibuwa ni mata Tuhan sabapan dusa tabi, lay na du kitabi tabeꞌ ni Almasi pinakallum. Dari salamat na kitabi isu-isu sabapan aseꞌ Tuhan. ⁶Maka pagka kitabi lay na tabeꞌ ni Almasi pinakallum, meꞌ tabi ngingat, lay na du kitabi pinatabeꞌ niiya pinatingkōꞌ ndooy ni sulgaꞌ. ⁷Kon ilay Tuhan bay buwat meꞌ looy supaya tabista meꞌ mimon angkat-angkatan ma pasunuꞌ bong pooy ehe aseꞌ na ka timbang na njataꞌ tabi. ⁸Ni kaehe aseꞌ Tuhan, lay na kitabi sinalamat meꞌ na sabap meꞌ tabi pitsayaꞌ ni Almasi. Sugaꞌ kasalamatan tabi ina, saꞌ ga tungbas ni bay hulas-sangsāꞌ tabi buwat mahap, arapun ladjikiꞌ man Tuhan. ⁹Sangkon, yaꞌ sina luu dapat tabi ngabbu saula-ula tawop kitabi sinalamat meꞌ Tuhan man sabapan hāp pabuwatan tabi. ¹⁰Sugaꞌ saꞌ baw ina ga yaꞌ na puntukan hāl meꞌ buwat mahap. Arapun Tuhan bay muwanan kitabi kaallum bahau njawman si Isa Almasi supaya tabi buwat siga pabuwatan mahap. Batan ndang inaa bay garaꞌ na ningkitabi.

Tibuuk bangsa Yahudi ka siga bangsa ma saꞌ Yahudi sabapan si Isa

¹¹Na kaam nnaa ma saꞌ bangsa Yahudi, intomun bi doꞌ bay kahalan bi. Maruhuꞌ, kaam ina bay pinag-awnan meꞌ bangsa Yahudi kapil sabap yaꞌ kam bay ngikut saraꞌ da inislam. Padahal, bila jama inislam, ilooy du bay halin, kuwit awpan da. Bong pangatayan da, sibuꞌ du ka maruhuꞌ. ¹²Sibuwa, yaꞌ san bay katoonan bi bong soy Almasi. Maka yaꞌ bay luu lamud bi ni bangsa Israil ma bay peneꞌ Tuhan sukuꞌ na. Jaman looy, masi kam awam ni siga janjiꞌ Tuhan ninsila. Yaꞌ bay luu holat bi maka yaꞌ san bay katoonan bi bong soy Tuhan. ¹³Lipara batnaa, pagka kam luu na njawman si Isa Almasi, san kam bay lawak man Tuhan, tapit na kam sabapan lahaꞌ Almasi ma bay tumpa ni kapatoy na.

^14-15Maruhuꞌ, ndang katoonan bi du, bong inawnan kami siga Yahudi ka kaam siga bangsa saꞌ Yahudi, wā magsaggaꞌ. Boꞌ poonan pagsaggaan tabi ilay yana saraꞌ agama kami. Sangka kami hagaan gi kami man kaam sabap kami bay peneꞌ Tuhan sukuꞌ na. Boꞌ kami lagi man Tuhan bay ma-ntan saraꞌ na. Sangkon dari ko ngawon, saraꞌ agama kami yana agpang man tabi yaꞌ kapagdambuwaꞌ. Kahapan, lay na nilangkat meꞌ Almasi agpang looy njataꞌ kapatoy na taꞌ tehang. Kon na bay buwat meꞌ looy supaya bay duwam baanan tapagsitibuuk na na kitabi pa disu baanan sa. Dari sabapan kapatoy Almasi, bilang disu bangsa bahau na kitabi. Maka luu na kasalassayan tabi batan bukaꞌ na lawang bahau man mimon manusiyaꞌ taitung sukuꞌ Tuhan. Sangkon bong inawnan saraꞌ Yahudi ddas ka jinisan aturan tinaat, yaꞌ na luu kabigiꞌ-bigian na ni hāl meꞌ jama initung sukuꞌ Tuhan. ¹⁶Dan jinis meꞌ halling, sabapan kapatoy Almasi taꞌ tehang, labba man kaam ma saꞌ Yahudi sampay na kami siga Yahudi, lay na pinagsitibuuk pa disu baran sa. Dari lay na matoy pagsaggaan tabi. Damikiyan, sabapan kapatoy Almasi, mahap na kitabi pa Tuhan. ¹⁷Dari maksud Almasi ilay bay pitu pa junyaꞌ masaplag umanat mahap supaya luu na lawang man manusiyaꞌ mahap na pa Tuhan. Boꞌ umanat na ina, lay na pinasampay ni bangsa Yahudi ma milang dī da tapit pa Tuhan sampay na ningkaam ma bay lawak man Tuhan. ¹⁸Dari sabapan Almasi, labba man kami siga Yahudi sampay na kaam ma saꞌ Yahudi, saliꞌ-saliꞌ na kitabi kapatapit pa mman Mmaꞌ tabi Tuhan. Batan saliꞌ-saliꞌ na kitabi lay pinaasokan Rū na, yana Rū Sutsiꞌ. ¹⁹Sangkon kaam ma saꞌ bangsa Yahudi, yaꞌ na kam jama sampi pa Tuhan. Tabeꞌ na du kam ni siga sukuꞌ na maka anak na na du kam njawom okoman na.

²⁰Na kitabi itu sukuꞌ Almasi tadalil pa siga kalangkapan lumaꞌ pinatangge meꞌ Tuhan man Rū na patannaꞌ. Kuwan si Isa Almasi, yana batu pepan luha man lumaꞌ looy pinatangge mari pagon. Sangkon iya patingkat hagaan man mimon kalangkapan lumaꞌ looy. Kuwan tōꞌ siga rasul si Isa ka ga kanabi-nabihan, yana siga tehang lumaꞌ looy. ²¹Dari njataꞌ Almasi, mimon kalangkapan lumaꞌ looy nilangkit paayad mari pagon banahan. Maka hangat sigi-sigi sinampunan siga kalangkapan na, paayad na pin lumaꞌ looy ngabut sampay dari lumaꞌ tawop pa Tuhan. ²²Dari meꞌ kaam ina tibuuk na du ka Almasi, lay na du kam nilangkit ni lumaꞌ looy man Rū Tuhan patannaꞌ.

Si Pol yana sosohoan Almasi masaplag pa kabangsa-bangsahan saꞌ Yahudi

¹Dari kalnaꞌ kaam siga bangsa saꞌ Yahudi, itu na ga ku lay tajīl sabap meꞌ ku bay masaplagan kaam kabanahan pasal si Isa Almasi. ²Kira ku katoonan bi na du ngkon ku masaplag pasal aseꞌ Tuhan sabap ndang inaa pabuwatan bay hinalap meꞌ na niyaku pa kaayaran ningkaam.

³Sarī gi, lay na pinalahil niyaku pakaradjaan pasal garaꞌ Tuhan ma yaꞌ gi bay pinalahil maruhuꞌ. Sabahagiꞌ lay na bay sabbut ku siꞌ ni panagnaan suwat tuu. ⁴Bong itu mintu lay na katis batsa bi suwat tuu, malaingkan tabista bi na du sina tud tahati ku garaꞌ Tuhan ma bay pinajatu njataꞌ Almasi. ⁵Meꞌ halling sambat ku na siꞌ, kamaatunan garaꞌ Tuhan ina bay llimbuhan ni siga angkat-angkatan maruhuꞌ. Noy batnaa na boꞌ lay na pinalahil meꞌ Rū Sutsiꞌ ni siga rasul si Isa ka ga jama ma kaladjikian masampay siga umanat man Tuhan. ⁶Na garaꞌ ma bay awnan ku ilay siꞌ yana ituu: Mimon ma bay hinalliꞌ meꞌ Tuhan ni sukuꞌ na, saꞌ du silay sat para ni bangsa Yahudi, arapun sampay ni mimon kabangsa-bangsahan. Batan sikamimon ma pitsayaꞌ ni umanat mahap tabilang na dambuwaꞌ baran sabap meꞌ da tibuuk ka si Isa Almasi. Maka saliꞌ-saliꞌ na sila hampit ni mimon bay njanjiꞌ meꞌ Tuhan.

⁷Dari man sabapan aseꞌ Tuhan niyaku, lay ku kaladjikian binuwat sosohoan na masaplag umanat mahap ni kaehe kawasa Tuhan njataꞌ ku. ⁸Sabana na, ni mimon sukuꞌ Tuhan, aku ya labi yaꞌ tawop inawnan sukuꞌ na. Lipara, lay gi baw ku tapeneꞌ nohoꞌ masaplag ni siga bangsa saꞌ Yahudi pasal siga supaat mehe saꞌ taangan-angan ma takoleꞌ da bong sila tibuuk na ka Almasi. ⁹Boꞌ lay gi ku sinohoꞌ meꞌ ilooy ma bay mapayak mimon-mimon, yana Tuhan, mahatiyan jama garaꞌ na ma bay llimbuhan maruhuꞌ. ¹⁰Maksud Tuhan ina, njataꞌ kawul-piil sagannap ma pitsayaꞌ ni Almasi, pakitahan na mimon malaikat ka siga seytan bong pooy lawom akka na ka pangahati na majatu garaꞌ na. ¹¹Ilooy na silay siꞌ bay garaꞌ Tuhan man awwal jaman lagi. Boꞌ lay na pinajatu man sabapan mimon bay pabuwat Papuꞌ tabi si Isa Almasi. ¹²Dari sabap tibuuk na kitabi ka Almasi sampay mangando na niiya, kapatapit na kitabi pa Tuhan. San tabi yaꞌ na alang-kapalang mangaruha niiya batan tatantu tabi na mastiꞌ hinasi jaꞌ kitabi.

¹³Siga danganakan, san itu ku batnaa njawom jinisan kabinsanaan, junjung ku na ningkaam, yaꞌ dari man tungkas iman bi. Batan aku tu bay magka meꞌ tuu pa kaayaran du ningkaam.

Si Pol maku duwaa pabalik

¹⁴Bila tapanambung ku na mimon supaat ma lay na takoleꞌ bi sabapan Almasi, magti ku doman sujud pa Tuhan maku duwaa niiya. Iya ina Mmaꞌ ¹⁵sikamimon sukuꞌ na, yana sagannap ma inawnan meꞌ na rahasiyaꞌ na ni lumaꞌ na, labba man taꞌ babaw junyaꞌ sampay pa sulgaꞌ. ¹⁶Paku ku duwaa pa Tuhan Sangat Kawasa, kamura-murahan ni kaehe kawasa na ka aseꞌ na, binuwanan du kam leꞌ Rū na gaos mari magsasōng na pin taggu iman bi. ¹⁷Maka kamura-murahan luu na pin Almasi patannaꞌ njawom atay bi man sabapan pangando bi niiya. Maka kamura-murahan tattog na pin aseꞌ bi pa Tuhan sampay pa manusiyaꞌ meꞌ karuha kayu nganggamut palawom njawom tanaꞌ. ¹⁸Pakuhan ta na pin kam duwaa sampay na mimon sukuꞌ Tuhan, kamura-murahan tahati bi na bong pooy ehe aseꞌ Almasi ningkitabi. Aseꞌ na ina ningkitabi yaꞌ luu hād gantaꞌ na. ¹⁹Kamura-murahan pasampun boꞌ pasampun na pin pangahati bi ni aseꞌ na supaya taakig bi na ngabut sampay sumibuꞌ na arat-tabiat bi ka Tuhan.

²⁰Pudji tabi Tuhan batan biddaꞌ na situ ehe kawasa na ni kaallum tabi. Ni kaehe kawasa na, takaya na nganduwan san labi gi man oy-oy paku tabi atawa oy-oy tapiki tabi. ²¹Kamura-murahan pinudji na pin Tuhan saumu-umu sabapan si Isa Almasi sampay man sabapan siga sukuꞌ na. Amin.

Sagannap ma pitsayaꞌ ni si Isa dambuwaꞌ baran

¹Na meꞌ aku itu disu sosohoan Papuꞌ njawom jīl sabap meꞌ ku masaplag, junjung ku na ningkaam, bogbogan bi kawul-piil ma tawop ni jama ma bay lliyun meꞌ Tuhan binuwat sukuꞌ na. ²Subay diyoꞌ ka lammaꞌ pangatayan bi sampay tahaꞌ pasensiya bi. Pagka kam sikaaseꞌ-kaaseꞌ, tatasan bi jaꞌ salla arat siga pagkahi bi. ³Kaam ina, lay na pinagsidambuwaꞌ atay meꞌ Rū Sutsiꞌ. Sangkon sabuli-buli bi wā miha kasalassayan mari yaꞌ langkat pagkatibuuk bi. ⁴Batan mimon itu kitabi ma tibuuk ka si Isa binilang disu baran sa. Maka disu du Rū magmundaan kitabi saliꞌ-saliꞌ, yana Rū Sutsiꞌ. Maka sibuꞌ du kasongan ayad hinolat meꞌ tabi sabap meꞌ tabi saliꞌ-saliꞌ lay na lliyun pa jawom okoman Tuhan. ⁵Maka kabanahan ma kinapitsayaan meꞌ tabi sibuꞌ du. Papuꞌ tabi pun disu du. Damikiyan, pandihan tabi pun disu du. ⁶Maka Mmaꞌ tabi Tuhan disu du. Iya ina magbayaꞌ ningkitabi sikamimon. Iya nganggaosan kitabi sikamimon. Maka iya du patannaꞌ njawom baran tabi sikamimon.

⁷Sugaꞌ san itu kitabi disu baran sa, yaꞌ sibuꞌ-sibuꞌ kapandoyan ma ndean meꞌ Almasi ningkitabi. Boꞌ mimon kapandoyan ma bay dean na kitabi saliꞌ-saliꞌ, mastiꞌ sikatuwaꞌ jaꞌ ka gantaan na. ⁸Boꞌ magbēꞌ du ka suwat njawom kitab, ilooy ma yuk na,

“Pag lay ya pabeleng pa sulgaꞌ, meka na jama ma bay pinalisu(4.8) Siga jama ma bay pinalisu tuwaꞌ pa sagannap ma bay njawom komkoman Ibilis. Pag batnaa, lay na sila pinaddusan meꞌ si Isa. taboo na. Maka lay gi ya muwan jinisan ladjikiꞌ ni manusiyaꞌ.”

⁹Na pagka yuk njawom kitab, “Lay na Almasi pabeleng pa sulgaꞌ,” mastiꞌ tabista tabi na lay doꞌ ya duhuꞌ bay lakka man sulgaꞌ duwai pitu pa junyaꞌ. ¹⁰Maka subay tahati tabi iya bay duwai pa junyaꞌ sampay pabeleng pa sulgaꞌ supaya tumatandaꞌ sinakup meꞌ na sikaliput alam.

¹¹Na ni kapasal jinisan kapandoyan bilang ladjikiꞌ ma ndean meꞌ Almasi, kasohean jama pineneꞌ binuwat rasul na. Kasohean binuwat tukang masampay siga umanat bay pinalahil meꞌ Rū Sutsiꞌ ninsila. Kasohean binuwat tukang masaplag umanat mahap. Kasohean pineneꞌ binuwat pa-mmean ngayaran siga baanan sukuꞌ si Isa. Maka kasohean binuwat guru. ¹²Sila ilay bay binuwanan ladjikiꞌ meꞌ looy man da malangkapan siga sukuꞌ Tuhan majatu oy-oy sinukuꞌ meꞌ Tuhan ninsila, maka supaya pasōng na pin hāp sambuhan nyawa sikamimon ma binilang baran Almasi. ¹³Pag toklas na, dambuwaꞌ atay na kitabi mmeꞌ ni umanat mahap. Maka pasōng na pin meꞌ tabi toon Almasi, yana Anak Tuhan. Dari song hallom, sukup iman na tabi ngabut sampay sumibuꞌ na du arat-tabiat tabi ka Almasi.

¹⁴Bong ina kitabi sukup iman na, yaꞌ na kitabi meꞌ anak-anak os-os pitsayaꞌ ni oy-oy bitsala jama. Yaꞌ na kitabi meꞌ sapantun kumpit umatung kuhi jaꞌ tinuran leꞌ lamba ka baliyu. Intong na, yaꞌ na kitabi takoleꞌ llingu meꞌ siga guru palsu ma alistu moo-moo jama magsiꞌ. ¹⁵Gam pin mmeꞌ jaꞌ kitabi ni tōꞌ sabanna ka maaseꞌ ni jama ngabut sampay sumibuꞌ na du mimon arat-tabiat tabi ka Almasi. Iya ina takōk tabi. ¹⁶Kuwan kitabi ma pitsayaꞌ niiya meꞌ karuha baran na. Na tiyap-tiyap baran manusiyaꞌ, mimon kalangkapan na langkit ka tibuuk. Maka baran ina, bong siga kalangkapan na saliꞌ-saliꞌ buwat ilooy ma bay sinukuꞌ ninsila, mastiꞌ paehe jaꞌ sina maka pabasag na pin. Damikiyan, meꞌ naa du sina baran si Isa bong kitabi sikaaseꞌ-kaaseꞌ ka sama-sama buwat ilooy ma bay sinukuꞌ meꞌ na ningkitabi.

Sukuꞌ si Isa Almasi subay ngalabbahan bay kadarihan da

¹⁷Na ni kapatut bay dean Papuꞌ Isa niyaku, ituu halap ku ningkaam: Amay-amay daa na kam mmeꞌ meꞌ uwahan siga kapil batan yaꞌ sina luu sōng pamiki da. ¹⁸Yaꞌ luu pangahati da pasal Tuhan. Ibaratan lumān, bagagap jaꞌ sila njawom lindom ni kaawam da, batan tohas kōk da. Sangkon yaꞌ sina luu sukuꞌ da ni kaallum bahau ma pinamuwan meꞌ Tuhan. ¹⁹Bong inawnan sasso ni bay kalaatan da, yaꞌ san luu njawom pamiki da. Gam pin basagan da lagi meꞌ da maabak jinisan kasabuhan ka napsu mulakab.

²⁰Boꞌ ningkaam baw ina, yaꞌ luu arat-tabiat meꞌ ninsila bay takoleꞌ bi man tōꞌ pasal Almasi. ²¹Saꞌ ba, lay na takale bi umanat mahap sampay lay na kam tinoan kabanahan lakka man si Isa? ²²Maka ndang lay na kam binaan ni hāl pagkajama bi maruhuꞌ, bong ibaratan badjuꞌ lamaꞌ, urusan bi na, batan kabinasa sina ni kaallum bi. Maruhuꞌ ilay, bay jaꞌ kam taboo-boo meꞌ napsu bi buwat jinisan kalaatan. ²³Sugaꞌ pag batnaa, bean bi na Rū Sutsiꞌ mari tahalin na pamiki bi ka pangatayan bi. ²⁴Sangkon ni hāl pagkajama bi ma bahau, ndang lay na du kam binaan, bong ibaratan badjuꞌ sutsiꞌ, patukun bi na. Batan lay na kam buwanan Tuhan kaallum bahau supaya kam meꞌ karuha iya na du sabana-bana intong ka sutsiꞌ.

²⁵Sangkon ddong na kitabi ngandustaꞌ. Arapun subay kabanahan sadjaꞌ bitsala tabi ni pagkahi tabi. Batan tibuuk na kitabi bilang siga kalangkapan baran Almasi.

²⁶Bong luu lasu bi, njawom iman kam taggahaꞌ dapat dusa na baw kam. Sangkon lasu batnaa, daa na pinagsumawung lagi, ²⁷taggahaꞌ luu gi lawang man Ibilis nasat kaam.

²⁸Bong kam luu nnaa tangan-tanganan, tagongan bi na. Arapun miha na kam usaha halal mari luu sampay man bi nulung jama miskin. ²⁹Timanan bi na mimon bitsala maat atawa lakaꞌ-lakaꞌ. Ilooy ya poun bi yana bitsala ma katabang atawa ma kasambu ni nyawa sagannap ma kale. ³⁰Maka daa pasusahun bi Rū Sutsiꞌ ka kawul-piil ma naggaꞌ ni kahandak na. Iya ina yana katakkoan man tabi katantu sukuꞌ Tuhan na kitabi. Maka iya du sina katakkoan man tabi katantu mastiꞌ pinaddusan jaꞌ kitabi man mimon kalaatan junyaꞌ bbos-bbos.

³¹Sangkon sapatut na, labbahan tabi na mimon kato tabbuk tabi ka lasu tabi sampay lammis tabi. Ddong na tabi ngalebeꞌ-lebean jama atawa mitna. Intong na, mimon kalaatan tabi ni pagkahi tabi manusiyaꞌ, labbahan tabi na. ³²Batan meꞌ kitabi itu sukuꞌ Tuhan, subay kitabi sikaaseꞌ-kaaseꞌ maka sikaluuy-kaluuy sampay siampun-ampun. Akig tabi na Tuhan bay ngampun kitabi man sabapan pabuwatan Almasi.

Subay akig tabi Tuhan maaseꞌ

¹Na pagka kitabi anak Tuhan kinaasean meꞌ na, sapatut na akig tabi na arat-tabiat na. ²Subay kitabi wā maasean pagkahi tabi manusiyaꞌ meꞌ karuha Almasi bay maasean kitabi. Tandaꞌ aseꞌ na, lay na ga ya nongan umu na kalnaꞌ kitabi. Yana meꞌ jama bay numbaliꞌ bili-bili man ngulban maruhuꞌ, Almasi pun lay na du bay pinapatoy binuwat kulban kalnaꞌ kitabi. Bay pabuwatan Almasi ilay nulut ni kahandak Tuhan. Bong ibaratan bawu, tud kahamutan ya.

³Sangkon meꞌ kaam anak Tuhan na, daa na kam buwat oy maka oy na man bi kaawnan lamud ni hāl jina, kasabuhan atawa napsu mulakab. ⁴Maka yaꞌ du sina pataꞌ bong kam mōꞌ bitsala lakaꞌ-lakaꞌ ka bitsala karupangan atawa mōꞌ paglatahan tampalasa. Arapun inaa ya pataꞌ ningkaam meꞌ bi muwan pagsukuhan pa Tuhan. ⁵Katoonan bi na du sina, sagannap ma magjina atawa buwat kasabuhan yaꞌ tumabeꞌ ni pamarinta Almasi ka Tuhan. Damikiyan, sagannap ma magnapsu mulakab ni altaꞌ yaꞌ du tumabeꞌ, batan bbuwatan ma kinanapsuhan meꞌ da subay ga papuꞌ da sinumba meꞌ da.

⁶Daa kam kuhi ndupang meꞌ jama ma māꞌ yaꞌ du maat siga kalaatan meꞌ looy siꞌ. Basta mehe baw silay laat na. Batan siga kalaatan meꞌ looy ilay yana poonan man Tuhan mōꞌ mulkaꞌ na ni mimon ma amu-amu nulang kahandak na. ⁷Sangkon, daa na kam mmeꞌ ninsila palamud ni kalaatan da.

⁸Bana na, maruhuꞌ sibuꞌ du kam ka sila njawom kalindoman, boꞌ batnaa luu na kam njawom karantaan sabap tibuuk na kam ka Papuꞌ Isa. Sangkon subay sikatuwaꞌ tangge-tingkōꞌ bi ka jama ma tattap njawom karantaan. ⁹Batan tiyap-tiyap ina jama njawom karantaan, mastiꞌ tumatandaꞌ ni tangge-tingkōꞌ na kaayaran, kaintongan ka kabontohan.

¹⁰Sangkon, wā paliksaun bi niyat atay bi bong sikatuwaꞌ ka kahandak Papuꞌ atawa niyaꞌ. Bong ina tud ayad du niyat atay bi, mastiꞌ kasulutan jaꞌ sina Papuꞌ ni tangge-tingkōꞌ bi. ¹¹Daa kam mmeꞌ-mmeꞌ meꞌ uwahan jama njawom kalindoman buwat jinisan ma yaꞌ pataꞌ pinabuwat. Arapun pakitahan bi sila kaintongan kawul-piil bi mari tumatandaꞌ kalaatan da. ¹²Tandaꞌ ina ehe laat pabuwatan da ma sinipuk, san sinabbut, kaiyaꞌ-iyaꞌ. ¹³Sugaꞌ bong ina kam maintoman sila ni bay kalaatan da, sibuꞌ du kam ka sūꞌ ninag na, batan tumampak na ninsila dusa da. ¹⁴Yaꞌ sina luu oy maka oy na tumampak bong yaꞌ luu dantaꞌ. Sangkon indanan bi palman, ilooy ma yuk na,

“Matiꞌ na teꞌ kam. Ddong na kam tuli-tuli buwat dī bi subay ga mayat. Bangun na teꞌ kam boꞌ bi karantaan na meꞌ Almasi.”

¹⁵Ilagan bi dī bi mari ayad jaꞌ tangge-tingkōꞌ bi. Daa kam mmeꞌ-mmeꞌ meꞌ uwahan jama dupang, arapun ilooy ya akigun bi jama ma halul-akka. ¹⁶Subay kam wā miha lawang man bi buwat mahap ni jama sampay mahatiyan sila kabanahan padpad luu gi waktu. Batan batnaa tu, yaꞌ na taambat kalaatan ntuu ni junyaꞌ.

¹⁷Sangkon, daa papondokun bi pamiki bi, arapun hatiyun bi bana bong oy kahandak Papuꞌ Isa ningkaam, boꞌ pabuwatun bi. ¹⁸Daa kam maglangohan batan inaa na sina poonan jama buwat jinisan kasabuhan. Arapun lillaꞌ jaꞌ kam pinagbayaan meꞌ Rū Sutsiꞌ. ¹⁹Maka bila kam kumpo-kumpo, subay kam sipataggu-pataggu iman bi makoy bitsala man kitab ka jinisan kalangan pudji ni Papuꞌ. Maka kalangan bi Papuꞌ ni kaehe gāk atay bi. ²⁰Subay kam wā magsuku ni Mmaꞌ tabi Tuhan sabapan mimon supaat na njataꞌ tabi njawman Papuꞌ tabi si Isa Almasi. ²¹Maka magpadiyoꞌ kam saliꞌ-saliꞌ ni pagkahi bi man bi ngisbat Almasi.

Tōꞌ ni jama sitampu

²²Ni hāl jama sitampu, kuwan kaam siga karandahan, subay kam lillaꞌ ni lla bi meꞌ karuha meꞌ bi maglillaꞌ ni Papuꞌ Isa. ^23-24Batan lla bi ina yana takōk bi meꞌ karuha Almasi yana takōk mimon kitabi ma pitsayaꞌ niiya, ma binilang baran na. Boꞌ iya ina, saꞌ sina ya sat takōk tabi, arapun tukang nalamat kitabi lagi. Sangkon, yana meꞌ kitabi ma pitsayaꞌ niiya maglillaꞌ jaꞌ niiya, damikiyan kaam pun siga karandahan, subay du maglillaꞌ ni lla bi.

²⁵Na kuwan kaam baw siga kalallahan ma ndahan, subay kam maasean nda bi. Akigun bi jaꞌ aseꞌ Almasi ningkitabi ma pitsayaꞌ niiya. Tandaꞌ aseꞌ na, lay na ga ya bay nongan umu na kalnaꞌ kitabi ²⁶supaya kitabi dari sukuꞌ na. Pag batnaa, lay na baw kitabi sinutsiꞌ meꞌ na sabap meꞌ tabi bay pitsayaꞌ ni umanat na sampay bay pinandi. ²⁷Kon na nongan umu na supaya tahasi na kitabi bilang pangantin ma danda lingkatan saꞌ na tapandang, ma sutsiꞌ sampay yaꞌ luu salla na atawa tamak na. ²⁸Sangkon, yana meꞌ Almasi maasean kitabi, damikiyan kalallahan pun, subay du maasean nda da sibuꞌ ka aseꞌ da ni dī da. Soysoy ina maasean nda na, sibuꞌ du ya ka maasean dī na. ²⁹Yaꞌ sina luu jama yaꞌ maasean baran na, gam pin umiran na lagi paayad sabap tud sēng ya. Almasi pun ina, mastiꞌ ngumiran kitabi du ma pitsayaꞌ niiya ³⁰sabap kitabi itu yana siga kalangkapan baran na.

³¹Ni hāl jama sitampu, mindoga jaꞌ kam ni suwat njawom kitab, ilooy ma yuk na,

“Bila lalla ndahan na, pasakkat na ya man induꞌ-mmaꞌ na, boꞌ na nibuuk dī na na ka nda na. Dari bay duwa gi sila, lay na dari disu baran sa.”(5.31) Panagnaan ni Awwal Jaman 2.24.

³²Na suwat looy ilay siꞌ, luu gi kamaatunan na lawom ma yaꞌ gi bay kinatoonan maruhuꞌ. Batan ilooy ilay tuwaꞌ du pa Almasi ka kitabi sikamimon ma pitsayaꞌ niiya, batan tibuuk na kitabi ka iya meꞌ karuha jama sitampu. ³³Sugaꞌ ayat looy ilay tuwaꞌ pa kaam du baw silay ma sitampu. Sangkon kaam, siga kalallahan, pooy-pooy aseꞌ bi ni baran bi, subay meꞌ naa du aseꞌ bi ni nda bi. Kuwan kaam baw, siga karandahan, amay-amay subay kam magmaltabat ni lla bi.

Tōꞌ ni siga anak-anak maka induꞌ-mmaꞌ

¹Na kuwan kaam, siga anak, asipun bi induꞌ-mmaꞌ bi, batan inaa sina pataꞌ pinabuwat meꞌ siga anak-anak ma mmeꞌ ni Papuꞌ Isa. ²Kannahun bi panohoan njawom kitab, ilooy ma yuk na,

“Mag-arat kam ni induꞌ-mmaꞌ bi.”

Na panohoan looy ilay tabeꞌ ni panohoan Tuhan sikasapū. Boꞌ inaa na sina panohoan ma bay duhuꞌ-duhuꞌ ddas ka janjiꞌ na. Batan yuk Tuhan bong bean tabi panohoan looy, ³mahap kaallum tabi maka humallom kitabi taꞌ junyaꞌ.(6.3) Kitab Tawrat, Duteronomi 5.16.

⁴Na kuwan kaam baw siga induꞌ-mmaꞌ, daa pasuan bi anak bi. Arapun anarun bi jaꞌ sila paayad maka pabadjahun bi sila mmeꞌ ni tōꞌ Papuꞌ Isa.

Tōꞌ ni siga ata ka papuꞌ da

⁵Na kuwan kaam ma ata, asipun bi siga papuꞌ bi. Mag-arat kam ni kaloman bi ninsila. Ni mimon pabuwatan bi ninsila, subay kam magtuyuꞌ buwat ni kahilas atay bi. Meꞌ bi ngingat, sibuꞌ du kam ka maghulas-sangsāꞌ kalnaꞌ Papuꞌ Isa. ⁶Daa subay na pin ni awpan papuꞌ bi boꞌ bi buwat paayad. Arapun takita kam atawa niyaꞌ, subay kam magkanaalla buwat. Ingatun bi dī bi ata Almasi tiggo buwat kahandak Tuhan. ⁷Sangkon buwat kam paayad ni kagāk atay bi, batan meꞌ bi ngingat, kaam maghulas-sangsāꞌ kalnaꞌ Papuꞌ Isa, saꞌ ga kalnaꞌ manusiyaꞌ. ⁸Katoonan bi du sina, oy-oy jaꞌ kaayaran pabuwat tabi, mastiꞌ tinungbasan du meꞌ Papuꞌ Isa, saꞌ biddaꞌ bong kitabi ata atawa ssaꞌ.

⁹Na kaam pun baw siga papuꞌ, subay du mahap meꞌ bi ka ata bi. Daa sila pasuan bi batan Papuꞌ da ina ni sulgaꞌ yana Papuꞌ bi du. Boꞌ yaꞌ du sina ya magsitingka manusiyaꞌ.

Kalangkapan man ngatuhan Ibilis

¹⁰Na katapusan bitsala ku, pabasag kam mangasa ni kawasa Papuꞌ nganggaosan kaam mari taggu iman bi. ¹¹Yana meꞌ sundalu makoy jinisan kalangkapan man na ngatuhan banta na njawom bonoꞌ, kaam pun, subay pakoyun bi du mimon kalangkapan pamuwan Tuhan man bi ngatuhan banta bi Ibilis ma wā ngulihal meꞌ na magsian kaam. ¹²Banta ta ina saꞌ manusiyaꞌ, arapun siga seytan ni antalaan ma moo-moo jama buwat maat. Sila ilay ngantanan kawasa-kapatut magbayaan mimon manusiyaꞌ ma masi njawom lindom ntuu ni junyaꞌ. ¹³Sangkon, pakoyun bi na mimon kalangkapan ma bay pamuwan Tuhan supaya kam kaatu ni siga seytan tuktuk luu nasat. Dari san gi oy katuwaꞌ kaam, basta yaꞌ baw sina kam ā meꞌ da.

¹⁴Na siga kalangkapan man bi ngatuhan siga seytan ina meꞌ tuu: Duhuꞌ-duhuꞌ subay kam wā nanggehan kabanahan. Batan kabanahan ina bong dalil ta pa kalangkapan sundalu, yana kambot bi. Pasunuꞌ, subay kam wā paintong. Batan kaintongan bi ina binilang ampi bassi para dakan bi. ¹⁵Pasunuꞌ, subay kam wā sakap masampay umanat mahap ma moo kasalassayan man jama mahap na pa Tuhan. Inaa ina binilang tumpaꞌ bi. ¹⁶Maka sarī man mimon ilooy siꞌ, subay luu du pangando bi ni si Isa Almasi batan inaa binilang taming bi. Batan bong ina basag pangando bi, yaꞌ na kam tuwaꞌ leꞌ siga anak panaꞌ akket meꞌ api, hati na, yaꞌ na kam takoleꞌ meꞌ siga sasat Ibilis. ¹⁷Pasunuꞌ, pahamun bi paayad kabanahan pasal kasalamatan bi mari kam yaꞌ magsiꞌ. Batan pangahati bi ina ni kasalamatan bi binilang saruk bassi bi ma namingan kōk bi. Maka kannahun bi palman Tuhan ma ndean meꞌ Rū Sutsiꞌ ningkaam. Batan palman Tuhan ina, yana kataliꞌ bi man bi ngatuhan banta bi. ¹⁸Maka njawom bi makoy siga kalangkapan ma bay sabbut ku siꞌ, maku na pin kam duwaa pa Tuhan. Maka bean bi jaꞌ Rū Sutsiꞌ magmundaan kaam njawom bi maku tabang pa Tuhan. Meꞌ kaam ina sundalu Almasi, iyakin kam. Maka daa kam jamu makuhan siga pagkahi bi sukuꞌ Almasi duwaa pa Tuhan.

¹⁹Damikiyan aku pun, pakuhan bi du baw ku duwaa supaya ku binuwanan meꞌ Tuhan bitsala hantap bila ku magnasihat. Maka pakuhan bi ku duwaa supaya ku tawakka masaplag umanat mahap ma yaꞌ gi bay kinatoonan meꞌ jama maruhuꞌ. ²⁰Ituu tu man ku halling meꞌ tuu batan luu situ ku ntuu tatalungkuꞌ njawom jīl sabap meꞌ ku masaplag. Pakuhan bi na pin ku duwaa mari ku nawakka mitsala batan ndang inaa pataꞌ subay pabuwat ku.

Katapusan suwat si Pol

^21-22Na mari katoonan bi bong oy na pin bbuwatan ku maka mimon kahalan ku ntuu, sohoꞌ ku sa pilu danganakan tabi si Tikikus, disu kakasi tabi ma magkanaalla maghulas-sangsāꞌ kalnaꞌ Papuꞌ Isa. Iya sa nuntutan kaam mari gamgām pamiki bi pasal kami.

²³Siga danganakan, kamura-murahan binuwanan na pin kam kasannangan meꞌ Mmaꞌ tabi Tuhan ka Papuꞌ tabi si Isa Almasi. Maka pakuhan ta na pin kam duwaa mari magsasōng na pin aseꞌ bi ni pagkahi bi sampay pangando bi pa Tuhan. ²⁴Maka kamura-murahan luu na pin barakat man Tuhan ni jataꞌ sagannap ma yaꞌ kuhi maglumba aseꞌ da saumu-umu ni Papuꞌ tabi si Isa Almasi.

Wassalam