Suwat ni Katallu Lakka man si Yahiya
Pahati
Ituu tu suwat si Yahiya pa mman disu bagay na inawnan si Gayus. Sinanglitan si Gayus meꞌ si Yahiya sabap wā ya nulung siga sosohoan si Isa ma ngalataan lahat masaplag umanat mahap.
Suwat tuu yaꞌ tatantu tabi bong taun oy man na bay sinuwatan meꞌ si Yahiya. Sugaꞌ kaekahan mista labi man mpatpuꞌ-mpat taun paddus si Isa Almasi bay inangkat pa sulgaꞌ.
13 YAHIYA
1Ituu itu aku, yana si Yahiya, disu pa-mmean sukuꞌ si Isa. Itu suwat ku pa mman nu Gayus. Kau ina bagay ku ma kaasean ku banahan.
2Gayus, kakasi ku, kamura-murahan sampulnaꞌ jaꞌ kaallum nu. Maka kamura-murahan sambu baran nu meꞌ karuha nyawa nu du. 3Tud bay gāk ku ni katakka kasohean danganakan ta pitu batan bay sila nuntut pasal kau magkanaalla mmeꞌ ni kabanahan. Intong na, kawul-piil nu magbēꞌ jaꞌ ka kabanahan. 4Gāk ku banahan tuktuk ku kale aka pasal siga anak ku njawman Almasi mmeꞌ ni kabanahan. Bong niyaku, yaꞌ luu kagakan labi gi man naa.
5Bagay ku, kakasi ku, tumatandaꞌ na kanaalla ko pa Tuhan. Batan bong luu siga danganakan ta pahās ni kawum bi, basag ko ngayaran sila san kam yaꞌ sikakila. 6-7Sila ina, bbuwatan da ngalataan lahat masaplag pasal si Isa. Boꞌ bay gi sila nuntut ni baanan sukuꞌ si Isa luntuu pasal aseꞌ nu ninsila ka meꞌ nu bay nulung sila ni bay palanan da. Darahan nu na meꞌ naa sabap inaa pataꞌ meꞌ buwat siga sosohoan Tuhan. Sila ina yaꞌ kuhi nambut oy-oy tulung man siga jama ma saꞌ sukuꞌ si Isa. 8Sangkon subay kita nulung sila supaya kita taitung limbang da masampay tōꞌ sabanna.
9Hallang-hallangan looy, lay na situ ku nuwat pa mman baanan sukuꞌ si Isa nnaa, sugaꞌ bitsala ku yaꞌ san bay pinaruli meꞌ si Deotrepes batan doman jaꞌ ya magpatingkat nnaa. 10Bong ku mintu takka pilu, basta bungka ku du sina kalaatan na. Tuntutan ta du sina kam bong pooy meꞌ na bay mitnahan kami. Yaꞌ lagi ya sarang-suku meꞌ looy, sampay niyaꞌ san ya ngahasi siga danganakan ta ma pilu noan jama kabanahan. Sarī gi, soysoy doman ngahasi sila, sinaggong gi meꞌ na sampay pinōꞌ gi man baanan sukuꞌ si Isa.
11Bagay ku, kakasi ku, daa kita ngakig kalaatan jama meꞌ looy, arapun iya pakutuꞌ ta kaayaran. Batan soysoy ina buwat kaayaran, tumatandaꞌ sukuꞌ Tuhan sila. Boꞌ sagannap ma buwat maat, yaꞌ katoonan da Tuhan.
12Disu danganakan ma arat na mahap inakig, yana si Demetiri. Mimon danganakan ta nanglitan iya batan kawul-piil na magbēꞌ jaꞌ ka kabanahan. Kami pun ntuu kabāꞌ du mawjud iya jama mahap. Boꞌ bong itu kami māꞌ, katoonan nu na du, yaꞌ kami ngandustaꞌ.
13Meka gi situ karomanan ku bināꞌ ningkau sugaꞌ yaꞌ na doꞌ patabeꞌ ku ni suwat tuu. 14Bong yaꞌ luu baya-baya, yaꞌ na du hallom sitammu na du kita, boꞌ ta kapagbitsala balharapan.
15Kamura-murahan luu na pin kasannangan njawom atay nu. Sarī man naa, mimon kabagayan nu ntuu lay du nohoꞌ masampay salam duwaa da ningkau. Maka pasampayun doꞌ salam duwaa ku ni mimon kabagayan ta nnaa.
Wassalam