Suwat ni Kaduwa pa mman si Timuti
Pahati
Kitab tuu itu bay sinuwatan meꞌ si Pol sasang na njawom jīl ndooy ni Rom. Meꞌ na mista, yaꞌ na hallom pinapatoy na ya sabap meꞌ na bay masaplag pasal si Isa Almasi. Ilooy silay man na bay nuwat pabalik pa mman si Timuti. Meꞌ na ngingat, si Timuti sibuꞌ du ka anak na. Karomanan si Pol si Timuti na mintu gantiꞌ na madara pabuwatan na masaplag sampay mabasagan pangando pagkahi da sukuꞌ si Isa.
Njawom suwat tuu, lay gi pinaintoman si Timuti yaꞌ dari magsiꞌ man kabanahan ma bay tinōꞌ niiya. Lay gi ya nohoꞌ buwat suntuan ayad ni mimon manusiyaꞌ, maka subay taggu na pin iman na.
Ituu bay sinuwatan meꞌ si Pol luu na ga tallumpuꞌ-mpat taun paddus si Isa Almasi bay inangkat pa sulgaꞌ.
12 TIMUTI
1Ituu itu aku, yana si Pol, disu rasul si Isa Almasi man kahandak Tuhan. Aku itu bay sinohoꞌ meꞌ Tuhan masaplag pasal kaallum bahau ma bay njanjiꞌ meꞌ Tuhan ni soysoy ma tibuuk ka si Isa Almasi. 2Itu suwat ku pa mman nu Timuti, kakasi ku. Kau ina sibuꞌ na du ka anak ku. Kamura-murahan binuwanan na pin ko kasannangan ka timbang saltaꞌ na barakat meꞌ Mmaꞌ ta Tuhan ka Papuꞌ ta si Isa Almasi.
3Mehe pagsukuhan ku pa Tuhan ma bay inisbat meꞌ kabboꞌ-bboan ku sampay na aku. Meꞌ aku itu ngisbat Tuhan, sannang na atay ku, batan katoonan ku yaꞌ na luu pabuwat ku ma nulang ni honaꞌ-honaꞌ ku. Magsuku ku pa Tuhan sabapan nu. Sangkon, tuktuk ku maku duwaa pa Tuhan, sangom na ka, llaw na ka, yaꞌ situ lipas meꞌ ku nabbut awon nu. 4Timuti, tud basag situ kainagon ku sikita ka kau pabalik. Yaꞌ na pin situ takupan ku boheꞌ mata nu ngattap waktu ta bay sakkat. Bong siꞌ itu kita nduwan gi sitammu pabalik, landuꞌ na ehe kagakan ku. 5Niyaꞌ takupan ku hilas pangando nu ni Papuꞌ Isa. Pangando nu ina, sibuꞌ du hantang na ka pangando bboꞌ nu Daꞌ Lowis ka nneꞌ nu si Yunis. Tumatandaꞌ na niyaku meꞌ bay na sinaynan pangando da ni jataꞌ nu. 6Sangkon, pagka meꞌ looy na du basag pangando nu, sapatut na subay ko paintoman ku pasal kapandoyan ma bay dean Tuhan ningkau llaw looy jaman ku bay nappak bumbunan nu. Ladjikiꞌ looy ilay siꞌ ma luu na ningkau subay pakoyun, daa pasensengan nu. Bong dalil ta pa bā api, diripan nu lagi mari llum banahan. 7Daa ko tawu buwat ma bay sinukuꞌ meꞌ Tuhan ningkau. Batan Tuhan ilay bay matannaꞌ Rū na njataꞌ ta supaya luu na gaos ta ka aseꞌ sampay tabang ngagak dī ta. Saꞌ ga silay supaya kita subay na pin tawu.
8Sangkon daa na ko tawu maan jama pasal Papuꞌ ta. Damikiyan, daa na du ko tawu mangaku ga aku soheꞌ nu sukat ku njawom jīl. Gam pin, magpalapay na ko niyaku natasan oy-oy kamalasahiyan kalnaꞌ umanat mahap pasal Papuꞌ ta. Ndang-ndang luu du kawasa Tuhan nganggaosan kita. 9Maka ndang-ndang, iya du bay nalamat kita sampay ngaliyun kita supaya kita dari sukuꞌ na ma sutsiꞌ halloman ta llum. Sugaꞌ iya ilay bay nalamat kita, saꞌ baw ga man sabapan ni lilingan na mahap arat-tabiat ta. Arapun kon na ilay bay nalamat kita sabap ndang inaa garaꞌ na yaꞌ gi san junyaꞌ bay pinapayak. Ndang luu na garaꞌ na makitahan manusiyaꞌ aseꞌ-tabang na njataꞌ pabuwatan si Isa Almasi. 10Boꞌ lai na situ pinalahil aseꞌ-tabang na pag taabut na bay mapitu si Isa Almasi pa junyaꞌ, yana tukang nalamat kitabi. Batan lay langkat si Isa kawasa kapatoy pag taabut na pinakallum pabalik. Maka lay gi ya masampay umanat mahap supaya soysoy pitsayaꞌ niiya koleꞌ kasampulnaan nyawa ma yaꞌ luu katapusan na.
11Kuwan aku, lay na ku peneꞌ Tuhan binuwat disu rasul ka guru supaya tapasaplag ku umanat mahap. 12Boꞌ ituu na situ kon ku tiksaꞌ ntuu njawom jīl. Kamasaꞌ, yaꞌ du tu ku iyaꞌ batan katoonan ku ilooy ma asahan ku, yana si Isa Almasi. Boꞌ na, tatantu ku du mastiꞌ takaya na jaꞌ ngayaran ma bay pa-ntan ku niiya ngabut sampay llaw katapusan.(1.12) Atawa: Boꞌ na, tatantu ku du mastiꞌ takaya na jaꞌ ngayaran ma bay pa-ntan na niyaku ngabut sampay llaw katapusan.
13Na Timuti, bila ko noan jama, amay-amay daa sihinan nu san dangkitiꞌ tōꞌ sabanna ma bay takoleꞌ nu man ku. Maka meꞌ kau tibuuk na ka si Isa Almasi, subay tattap pangando nu niiya. Maka subay du tattap aseꞌ nu ni siga pagkahi nu manusiyaꞌ. 14Siga tōꞌ naa ina ma bay hinalap ningkau, hagaan jaꞌ sina. Sangkon, man tabang Rū Sutsiꞌ ma tattog njawom atay ta, jagahan nu paayad mari yaꞌ kalamuran leꞌ jinisan tōꞌ palsu.
15Na ndooy ilay ni Asiya, katoonan nu na du, adak katis na mimon danganakan ta nikutan aku. Sampay ga si Pijilus ka si Helmojinis, lai na du.
16-17Sugaꞌ kuwan si Onesiporus ka ga paglūng na, kamura-murahan pinanimbangan du sila meꞌ Papuꞌ. Batan takdang na ilay bay takka pitu pa Rom, yaꞌ bay luu katagong na miha ngkod-ngkoran ku yaꞌ gi bay tatammu na. Yaꞌ san ya bay iyaꞌ takita magpangandaꞌ aku san ku bay taingkot ka karina. Daran ya bay magamgaman aku. 18Kau pun ina, katoonan nu du, yaꞌ taambat bay tabang na niyaku bay jaman ku nnaa ni Epesus. Kamura-murahan pinanimbangan du ya meꞌ Papuꞌ ni llaw hukuman.
2Kitabi meꞌ sapantun sundalu ndiyoan si Isa Almasi
1Na Timuti, anak, mangasa jaꞌ ko ni aseꞌ-tabang si Isa Almasi nganggaosan kau. 2Siga tōꞌ ma bay takale nu man ku, yana tōꞌ ma bay pasaplag ku ni pag-awpan siga baanan jama, pasampayun na ni kalallahan ma taasahan nu, ma pandoy noan jama sarī.
3Magpalapay ko niyaku natasan jinisan katiksaan kalnaꞌ si Isa Almasi meꞌ karuha sundalu kanaalla natas njawom bonoꞌ mehe. 4Indanan nu bitsala ku. Bong ina sundalu kanaalla, yaꞌ ya palamud ni jinisan hāl ma pinandang leꞌ siga sibilyan. Iya pandang na, meꞌ na nulut kahandak komandel na. 5Maka ngaddoꞌ ko suntuan njataꞌ jama maglumbaꞌ sonse. Bong ina ya yaꞌ mmeꞌ ni siga aturan lumbaan, malaingkan yaꞌ luu haddiya takoleꞌ na. 6Damikiyan ngaddoꞌ du ko suntuan njataꞌ tukang huma. Pagka iya bay maghulas-sangsāꞌ tanom, sapatut na iya du sina duhuꞌ mangan buwaꞌ tinanom na. 7Na tōꞌ ku ilay siꞌ ningkau, pamikihan nu sa paayad. Binuwanan du sina ko meꞌ Papuꞌ pangahati supaya takoleꞌ nu hantak bitsala ku siꞌ.
8Kannahun na pin kabanahan pasal si Isa Almasi. Numbul satu, pus na bay pinapatoy, lay du ya pinakallum pabalik. Maka iya na Sultan bay tinunaꞌ mattoꞌ, ma panubuꞌ Sultan Daud. Inaa ina yana umanat mahap ma ndang pinasaplag meꞌ ku. 9Salla na, sabap meꞌ ku masaplag, daran na ga ku bininsanaꞌ. Sampay lay na ga taabut man ku tatalungkuꞌ njawom jīl binuwat subay ga jama tukang ngalangga saraꞌ. Sugaꞌ san itu ku pinusas ka karina, bong inawnan umanat Tuhan, basta yaꞌ baw sina takoleꞌ kinarinahan. 10Umanat Tuhan ilay siꞌ kaboo kasalamatan ni soysoy pitsayaꞌ. Sangkon atas ku na natasan oy-oy jaꞌ kamalasahiyan kalnaꞌ sagannap ma bay pineneꞌ meꞌ Tuhan. Kainagon ku koleꞌ jaꞌ sila kasalamatan njataꞌ si Isa Almasi sampay tumabeꞌ ni kabantugan na saumu-umu.
11Na ituu tu bitsala kanaalla:
Bong itu kitabi bay ngingat dī tabi lay na tabeꞌ ni kapatoy Almasi, malaingkan tabeꞌ na du kitabi ni kaallum na.
12Bong itu kitabi natas na pin njawom kamalasahiyan kalnaꞌ iya, mastiꞌ kapatabeꞌ du kitabi niiya magsultan ni sinōng.
Sugaꞌ bong kitabi yaꞌ kuhi mangaku sukuꞌ na kitabi, malaingkan yaꞌ du kitabi aku na sukuꞌ na.
13Bong itu kitabi yaꞌ kanaalla, basta iya, mastiꞌ kanaalla jaꞌ batan ndang inaa tabiat na. Boꞌ tunmanūn sina meꞌ na maluba tabiat na.
14Na pasal ilooy ma bay sabbut ku siꞌ, pasampayun sa ni sukuꞌ si Isa nnaa man nu maintoman sila. Maka baan nu sila, ilu na Tuhan pakale-kale, subay sila yaꞌ na palamud ni pagjawapan jama pasal hatiyan siga bitsala. Yaꞌ du sina luu sōng na. Gam pin, inaa na kaboo sagannap ma bay pakale magsiꞌ man kabanahan.
15Timuti, pagbuli-bulihan nu meꞌ nu makitahan Tuhan kau disu sosohoan ma tawop niiya. Umanat kabanahan ma pinasampay meꞌ nu, daa pabiyahun sinakotan ka tōꞌ palsu. Bong siꞌ ina takaya nu meꞌ naa, yaꞌ luu meꞌ nu hinaꞌ ni mata Tuhan. 16Ilagan nu pagbitsalahan pasal tōꞌ ma yaꞌ luu kapuspusan na, ma yaꞌ san luu kabigiꞌ-bigian na ni hāl ma puntukan pa Tuhan. Siga tōꞌ meꞌ looy ilay malawak jama na pin man Tuhan. 17Sibuꞌ du karuha tōꞌ meꞌ looy ka saki kansel ngalelet njawom baran jama ngabut sampay man na binasa. Boꞌ meꞌ naa na du sina tōꞌ si Haymeneyus ka si Pilitus. 18Tud lay na silay sila magsiꞌ man kabanahan. Baꞌ-bāꞌ da, lai na bay pingkaꞌ masa jama matoy pinakallum pabalik. Dari sabapan tōꞌ da, lay na ga jadjuꞌ pangando kasohean sukuꞌ si Isa. 19Sugaꞌ san du ina dangoy tōꞌ palsu pinaantup, bong inawnan kabanahan man Tuhan, mastiꞌ taasahan jaꞌ. Sibuꞌ du sina karuha na ka pananggehan lumaꞌ ma yaꞌ takoleꞌ inusik. Maka luu gi sina duwa kabanahan bay sinuwatan ma subay iningat meꞌ ta. Disu, “Kinatoonan du sina meꞌ Tuhan bong soy sukuꞌ na,” kaduwa na, “Soysoy mangaku sukuꞌ Tuhan, subay tagongan da na buwat dusa.”
20Na ni kapasal Tuhan ka siga sukuꞌ na, meꞌ tuu situ karuha na: Ni lumaꞌ sawraga, magjinisan manganan na. Kasohean manganan na pilak porol atawa pun mmas bay binaba halliꞌ man motang ni siga llaw mulliya. Kuwan kasohean, yana manganan biyasa, ma binasaanan sadjaꞌ. 21Na mimon manganan looy siꞌ tuwaꞌ pa siga sukuꞌ Tuhan. Sagannap ma lay na ngalabbahan mimon kalaatan, sibuꞌ na sina karuha da ka ga manganan looy ma hinalliꞌ ni siga llaw mulliya. Sutsiꞌ sila maka kaboo kabantugan pa Tuhan. Tawop na sila pinakoy meꞌ na man majatu jinisan pabuwatan ayad.
22Sangkon, san meka meꞌ pag-umuhan nu taboo-boo meꞌ napsu da buwat jinisan karupangan, bong kau, basta palawak ko man arat-tabiat meꞌ looy. Iya pakutuun, yana kaintongan, pangando ni si Isa, aseꞌ ni jama maka kasalassayan. Sagannap ma ngisbat Papuꞌ ni kasutsiꞌ atay da, ndang meꞌ naa sina angan-angan da. 23Maka daa ko palamud ni pagjawapan ma yaꞌ luu kapuspusan na meꞌ ilooy ma pinaabak meꞌ jama awam ni kabanahan. Tasayu nu du sina, inaa na poonan jama sasaꞌ-manasaꞌ. 24Boꞌ inawnan sosohoan Papuꞌ ina, yaꞌ dari sasaꞌ. Subay ya magpahāp ni sikamimon maka pandoy noan jama. Maka subay du tahaꞌ pasensiya na. 25Bong ya sinulang meꞌ jama, pag tampung na, subay hanunut-hanunut jaꞌ meꞌ na naup sila. Meꞌ naa ina, balangkali binukaꞌ na meꞌ Tuhan puad da nawbat sampay koleꞌ pangahati ni kabanahan. 26Ilooy puhung ta mari sila katuwaꞌ na mamiki, boꞌ da lumappa na man komkoman Ibilis ma bay magbayaan sila nohoꞌ buwat kahandak na.
3Arat-tabiat jama ni ahil jaman
1Na Timuti, indanan nu bitsala ku. Ni ahil jaman, yaꞌ na sina mintu taambat katiksaan njawom junyaꞌ. 2Batan kaekahan na sina mintu manusiyaꞌ, dī da du kaasean da. Maka magnapsu mulakab na sila ni sīn. Pangabbu gi sila ni kalangkaw atay da. Boꞌ meka gi sina yaꞌ paagak mitsala jama pa kalaatan. Yaꞌ sila ngasip ni induꞌ-mmaꞌ da, yaꞌ ngintom buddi maka yaꞌ tawu pa Tuhan. 3Bbos-bbos meka na sina yaꞌ manimbang ni jama atawa pun yaꞌ kuhi miha kasalassayan, maka yaꞌ kuhi ngampun. Gam pin sipitna-pitna gi sila. Meka na sina mintu yaꞌ pandoy ngagak dī da. Maka meka na dahulakaꞌ sampay yaꞌ na luu dawom da ni kaintongan. 4Meka na sina mintu panipu ka os-os buwat karupangan ni kapondok pamiki da sampay takabbu lagi. Ilooy du ina mintu hagaan ninsila meꞌ da nganduwan jaꞌ oy-oy kinanapsuhan meꞌ da. Sugaꞌ bong aseꞌ pa Tuhan, yaꞌ luu ninsila. 5Bong ndaꞌ mata, meꞌ bantuk ngisbat sila Tuhan. Sugaꞌ sabana na, tuwak da Tuhan ka kawasa na ngahalin pangatayan da. Sangkon daa ko samod ka ga jama meꞌ looy. 6Kasohean ina sila dutai pa taꞌ lumaꞌ jama mōꞌ tōꞌ palsu. Boꞌ luu gi takoleꞌ da pitsayaꞌ ni tōꞌ da kasohean danda ma kulang iman da, yana sagannap danda ma yaꞌ na taambat dusa da sabap takawum sila meꞌ napsu da ni jinisan. 7Ga danda meꞌ naa ina, inaa katagihan da pakale ni jinisan tōꞌ bahau. Salla na, yaꞌ sila pandoy nilang mamooy tōꞌ palsu ka mamooy tuwaꞌ.
8Kuwan sila ina ma tukang masampay siga tōꞌ palsu, ndang bingkok na pamiki da. Yaꞌ hilas pangando da pa Tuhan. Nulang sila kabanahan meꞌ bay jaman ga si Jannes ka si Jambres(3.8) Si Jannes ka si Jambres ilay, bangsa Ejip ma bay mōꞌ majik ni awpan Nabi Musa ka sultan bangsa Ejip mattoꞌ. Maksud da ilay siꞌ makitahan sultan looy luu du kawasa da langkaw gi man kawasa bay dean Tuhan Nabi Musa. Ndaun Kitab Tawrat, Kalakka 7.11-22 ka 8.7-19. bay nulang Nabi Musa mattoꞌ. 9Sugaꞌ tōꞌ jama meꞌ looy ilay, yaꞌ du sina hallom tatasan na. Batan tabista du sina mintu meꞌ sikamimon karupangan da, meꞌ bay karuha jaman ga si Jannes ka si Jambres.
10Sugaꞌ kuwan kau Timuti, akigun jaꞌ ku. Kau ina, ndang hallom na du bay taindan nu tōꞌ ku sampay kawul-piil ku. Katoonan nu na du maksud ku. Lay na du tasakup nu pangando ku ni Papuꞌ maka pasensiya ku sampay aseꞌ ku. Maka tasayu nu na du bong pooy tatas ku njawom jinisan katiksaan kalnaꞌ Tuhan. 11Yaꞌ na du ko awam pasal kabinsanaan maka laug bay talingkaꞌ ku jaman ku ndooy ni Antiyok ka ni Ikoniyum sampay ndooy ni Listra. Kahapan song hallom, lay du ku bay pinaddusan meꞌ Papuꞌ. 12Sugaꞌ ni sabana na, mimon jama ma tibuuk ka si Isa Almasi, ma doman buwat kahandak Tuhan, mastiꞌ luu jaꞌ du sina masa da nilaugan. 13Batan jama maat ina ka jama pangakka, magsasōng na pin sina mintu kalaatan da. Ngakkahan sila jama, sugaꞌ sila pun inakkahan du.
14Sugaꞌ kau, Timuti, subay ko kanaalla mmeꞌ ni kabanahan ma bay tinōꞌ ningkau. Ndang-ndang sikabiyasa du ko banahan ka ga jama ma bay noan kau. Katoonan nu du tapangandohan nu sila. 15Man kadikiꞌ nu lagi, ndang lay na ko tinoan kabanahan njawom kitab. Inaa na sina man nu bay koleꞌ pangahati pasal kasalamatan para ni soysoy pitsayaꞌ ni si Isa Almasi. 16Sikamimon ina njawom kitab yana palman Tuhan bay pinalahil meꞌ na ni manusiyaꞌ. Mehe kapansahaliyan na man noan jama kabanahan maka man makitahan sila dusa da sampay man maintoman sila lān tuwaꞌ bong luu kasaan da, maka man noan sila arat-tabiat intong. 17Bong ina tud kinanna du meꞌ siga sukuꞌ Tuhan isi kitab, malaingkan yaꞌ na luu kulang da man da majatu mimon pabuwatan mahap bay sinukuꞌ ninsila.
4Si Timuti sinohoꞌ masaplag
1Na pag bbeleng Papuꞌ Isa ina mintu pa junyaꞌ magsultan, ngahukum na ya manusiyaꞌ sikamimon, llum-matoy. Sangkon, itu na ni pag-awpan Tuhan ka si Isa Almasi, sohoꞌ ta na ko 2masaplag umanat Tuhan. Pagbuli-bulihan nu na noan jama kabanahan, doman-yaꞌ sila doman mmeꞌ. Paintoman nu na pin sagannap ma magsāꞌ atawa amu-amu buwat dusa. Bitsalahan nu sila nohoꞌ nawbat. Patagguhun na pin iman da. Maka bila ko noan sila, subay tahaꞌ jaꞌ pasensiya nu.
3Kon nu ina sohoꞌ ku na masaplag batnaa batan luu sina mintu masa kaekahan manusiyaꞌ yaꞌ na doman pakale ni tōꞌ sabanna. Ilooy du ina mintu katagihan da pinakale, yana tōꞌ ma magbēꞌ ka kainagon da buwat oy-oy kinanapsuhan meꞌ da. Dari bbuwatan da ina mintu miha siga guru ma mōꞌ bitsala ma lassa ni tinga da. 4Sugaꞌ bong hāl kabanahan, tuwak da na. Ilooy ya pinakale meꞌ da, yana pali-pali ma bay jaꞌ tinulun-tulun meꞌ manusiyaꞌ.
5Na kuwan kau Timuti, subay ko wā ngagak dī nu ni mimon kahalan nu. Bong ko tumabbaꞌ njawom kamalasahiyan kalnaꞌ Papuꞌ, tatasan nu jaꞌ. Pagbuli-bulihan nu masaplag umanat mahap pasal si Isa. Pajatuhun na mimon ma bay hinalap meꞌ Tuhan ningkau.
6Kuwan aku tu, yaꞌ na meꞌ noy tahaꞌ umu ku. Tapit na situ waktu man ku limbu man junyaꞌ tuu. 7Sugaꞌ san situ ku matoy na, ndang-ndang lay na du ku bay magtuyuꞌ matangge kabanahan san du pooy meꞌ bay naggaꞌ aku. Ibaratan sundalu ni bonoꞌ mehe, lay na du pupusan ku basag ku ngatu. Ibaratan jama maglumbaꞌ sonse, lay na pulan ku basag ku sampay lay na taabut ku tōng lumbaan. Tud lay na silay bogbogan ku kabanahan ma kinapitsayaan meꞌ tabi. 8Dari pag batnaa, ndang luu na silay haddiya ginalla karuna kaintongan hinalliꞌ niyaku. Boꞌ ndean du silay mintu aku meꞌ huwis looy ma patingkat intong, yana Papuꞌ Isa pag taabut llaw hukuman. Sugaꞌ saꞌ du baw sina mintu sat aku kabuwanan haddiya meꞌ looy, arapun sampay mimon ma bay magkainagon ni katakka Papuꞌ, mastiꞌ kabuwanan du.
9Timuti, pagbuli-bulihan nu na magdeꞌ-dēꞌ pitu. 10Gunahan niyaku tabang, batan si Demas lay na pilay pa Tesaloneka. Lay na ku mbanan na sabap hagaan niiya nganduwan napsu na ni hāl junyaꞌ. Kuwan si Keresen, lay pa Galatiya. Kuwan si Taytus, lay pa Dalmatiya. 11Ituu sa soheꞌ ku tamban ntuu yana si Lukas. Bong anu, kaddoun doꞌ si Malkus, boꞌ boonun pitu, batan katabang mehe sina ya ni pabuwatan ku. 12Kuwan si Tikikus, lay sohoꞌ ku pilu pa Epesus.
13Doꞌ ko beꞌ, bong ko pitu, boonun doꞌ badjuꞌ kapa ku. Lay mbanan ku man si Kalpus ndooy ni Troas. Siga būk ku pun, boonun du. Maka amay-amay daa takupan nu siga logoran suwat ku.
14-15Sarī man naa, iyakin ko ni si Aleksandel, lalla looy ma tukang maba tumbagaꞌ, batan tud bay basag sina ya bay nulang umanat kami. Maka meka sina kalaatan bay pabuwat na niyaku. Sugaꞌ biyahun na, hinisab du sina ya meꞌ Papuꞌ sikapataꞌ ka bay pabuwatan na.
16Ni kapasal palkalaꞌ ku ntuu, sibuwa ku bay sinumariya meꞌ huwis, yaꞌ luu san disu danganakan ta bay pasabu nanggehan aku. Lay jaꞌ ku pabiya da dangan-dangan ku. Sugaꞌ kamura-murahan inampun du sila meꞌ Tuhan. 17Para na pin, jaman ku bay sinumariya, lai du ku bana inunungan meꞌ Papuꞌ Isa. Boꞌ bay gi ya nganggaosan aku masaplag umanat na labbasakayi ni mimon jama saꞌ Yahudi ndooy. Sat na jaꞌ, sasang ku ilay siꞌ bay sinumariya, parasahan ku subay ga ku hayop liput na meꞌ baanan halimaw. Kahapan, lay du ku sinalamat meꞌ Papuꞌ man bahaya looy. 18Maka katoonan ku du mastiꞌ sinalamat du sina mintu ku meꞌ Papuꞌ man mimon kalaatan ma song tumiluꞌ njataꞌ ku. Maka boo na du sina ku pa jawom pamarinta na ndooy ni sulgaꞌ. Pudji mehe niiya pangkat-mamangkat saumu-umu! Amin.
19Dambuli man inaa, pasampayun doꞌ salam duwaa ku pa mman ga si Prisila ka si Akila sampay pa mman jama lumaꞌ ga si Onesiporus.
20Doꞌ ko beꞌ la, mari tahati nu, si Erastus lay tamban ni Korin. Kuwan si Tropimus lay saki. Dari lay doꞌ ya mbanan ku ndooy ni Miletus nohoꞌ inintu.
21Na meꞌ halling sambat ku na siꞌ, pagbuli-bulihan nu na magdeꞌ-dēꞌ pitu padpad yaꞌ gi taabut timpu tanne. Luu gi beꞌ ga si Yubulas, si Pudens, si Linus ka si Kladiya sampay mimon danganakan ta ntuu bay du nohoꞌ masampay salam duwaa da pa mman nu.
22Katapusan bitsala ku, kamura-murahan inunungan na pin ko meꞌ Papuꞌ sampay binuwanan barakat.
Wassalam