Suwat ni Kaduwa Lakka man si Pitel
Pahati
Ituu tu suwat ni kaduwa na man si Pitel pa mman sagannap ma mmeꞌ ni si Isa Almasi ndooy ni lahat ma inawnan Turkey ni batnaa. Jaman si Pitel nuwat ituu, katoonan na yaꞌ na hallom matoy ya batan ndang bay na pinalahil meꞌ Papuꞌ Isa niiya (ndaun 2 Pitel 1.13-14).
Ngkon si Pitel bay nuwat ituu sabap gampang ya ni siga baanan pagkahi na sukuꞌ si Isa. Ni jaman looy ilay, luu na siga guru palsu mōꞌ jinisan tōꞌ ma kalingu ni jama. Bong ninsila, yaꞌ na konoꞌ Almasi pabeleng pa junyaꞌ sabap hallom looy na, yaꞌ na san luu kaluwa. Mingkan ilay, ilooy man Papuꞌ Isa yaꞌ gi bay pabeleng batan doman gi ya muwanan siga baldusa lawang man da nawbat supaya sila yaꞌ tanalkaꞌ (ndaun 2 Pitel 3.9).
Hagaan situ kitab tuu batan tinantu meꞌ si Pitel ningkitabi mastiꞌ tinuman jaꞌ meꞌ si Isa Almasi bay janjiꞌ na pabeleng.
Njawom suwat tuu lay du si Pitel maintoman kitabi inaa mimon tunaꞌ kanabi-nabihan mastiꞌ lakka man Rū Tuhan, saꞌ lakka man pamiki manusiyaꞌ.
Ituu bay sinuwatan meꞌ si Pitel luu na ga tallumpuꞌ-mpat taun paddus si Isa Almasi bay inangkat pa sulgaꞌ.
12 PITEL
1Ituu itu aku, si Saymon Pitel, disu ata si Isa Almasi. Maka aku itu disu rasul na. Itu suwat ku pa mman bi ma pitsayaꞌ na du ni si Isa Almasi, yana Tuhan tabi ka tukang nalamat kitabi. Ni kaintong na, yaꞌ ya minig jama, batan kaam pun ina, meꞌ kami na du, bay kaladjikian saliꞌ-saliꞌ buwatan hagaan, yana pangando tabi niiya.
2Kamura-murahan lipat man lipat na pin kasannangan ka barakat ningkaam sabap meꞌ bi lungbid ka Tuhan saltaꞌ na Papuꞌ tabi si Isa.
3Ni kaehe kawasa Tuhan, luu na bay dean na kitabi kaallum bahau sampay mimon ma gunahan ningkitabi man ngikut arat-tabiat na. Lay na dean na kitabi ilooy siꞌ sikamimon pag lay jaꞌ tabi lungbid ka iya. Maka lay na kitabi liyun na pa jawom okoman na supaya kitabi tumabeꞌ ni kabantugan na ka kaayaran na. 4Dari man sabapan ehe kabantugan na ka kaayaran na, lay na kitabi buwanan na siga supaat tud hagaan ka ayad banahan ma ndang bay janjiꞌ na. Maksud Tuhan ilay bay ngandean siga supaat meꞌ looy supaya taikut tabi arat-tabiat na. Maka maksud na supaya yaꞌ na tabi pinagbayaan meꞌ napsu tabi buwat dusa ma kabinasa ningkitabi.
5Sangkon subay pagbuli-bulihan bi meꞌ bi matabeꞌ kawul-piil ayad ni pangando bi ni Papuꞌ Isa. Maka subay du pagbuli-bulihan bi meꞌ bi koleꞌ pangahati pasal kahandak Tuhan ningkaam. 6Subay du kam ngagak dī bi. Maka subay taggu iman bi. Maka pakutuun bi meꞌ bi ngikut arat-tabiat Tuhan. 7Njawom bi ngikut arat-tabiat Tuhan, kaasean bi du siga pagkahi bi sukuꞌ si Isa sampay na mimon manusiyaꞌ.
8Na bong siꞌ ina tabogbog bi na mimon arat meꞌ naa boꞌ duhunan bi lagi, malaingkan meka na sina kaayaran takita ni tangge-tingkōꞌ bi. Maka tumatandaꞌ na mehe kapansahaliyan bi ni manusiyaꞌ sabap meꞌ bi lungbid ka Papuꞌ tabi si Isa Almasi. 9Sugaꞌ sagannap ma yaꞌ mogbogan arat-tabiat meꞌ naa, sibuꞌ du sina karuha da ka jama buta ni kaawam da. Tumatandaꞌ landuꞌ pondok pamiki da batan yaꞌ na san taintom da mimon dusa da lay na pinuwasan maka pangatayan da bay sinutsiꞌ. 10Sangkon siga danganakan, pagbuli-bulihan bi na meꞌ bi mean bay halap ku siꞌ mari luu buktiꞌ lay na kam lliyun sampay pineneꞌ meꞌ Tuhan binuwat sukuꞌ na. Meꞌ naa ina, yaꞌ na luu masa bi kapagdusa. 11Boꞌ na, hinasi na sina kam mintu paayad pa jawom sulgaꞌ, ndooy man Papuꞌ tabi si Isa Almasi, yana tukang nalamat kitabi, magsultan saumu-umu.
12Na minsan ina ndang katoonan bi na mimon ma bay sabbut ku siꞌ, sampay tattog na kam mmeꞌ ni kabanahan, masi na pin situ ku maintoman kaam. 13-14Kon meꞌ looy batan tasayu ku yaꞌ na ku humallom ni junyaꞌ tuu. Man ku kasayu meꞌ looy batan bay pinalahil meꞌ Papuꞌ tabi si Isa Almasi niyaku. Dari padpad yaꞌ lagi ku bay limbu, sapatut na, paintoman ta na pin kam tōꞌ sabanna man ku mangun pamiki bi. 15Sangkon itu na pin ku magtuyuꞌ nuwat pa mman bi. Kainagon ku, san ku mintu lay na limbu, yaꞌ na lungay saumu man jawom pamiki bi kabanahan ma bay bāꞌ ku ningkaam.
Si Pitel mahati bong ongoy bitsala na subay kinapitsayaan
16Na mimon ilay bay bāꞌ kami ningkaam maruhuꞌ pasal kawasa Papuꞌ tabi si Isa Almasi maka ni bay kalahil na pa junyaꞌ, bana jaꞌ silay labbasakayi. Saꞌ silay ga aka bay jaꞌ pinabuwat-buwat meꞌ jama ma alistu buwat kana-kana. Arapun tud mata kami mismu bay ngita ehe kawasa-kapatut na ma yaꞌ luu sibuꞌ sabanding na. 17-18Kami mismu bay soheꞌ na taꞌ punu jaman Mmaꞌ na Tuhan bay matannaan iya sahayaꞌ sampay muwanan iya kabantugan mehe. Bay gi takale kami suwara Tuhan Sangat Kawasa ndooy pōꞌ man taꞌ langit jaman na magpalman, ilooy ma yuk na, “Inaa ina Anak ku, kakasi ku. Kasulutan ku banahan niiya.”
19Dari pagka lay takita kami sampay lay na takale kami ilooy siꞌ sikamimon, magdaruhun na meꞌ kami kasiguru tud bana du siga tunaꞌ kanabi-nabihan pasal Almasi. Suwat da ilay njawom kitab meꞌ sapantun sūꞌ ninag njawom lindom. Sangkon subay indanan bi bitsala da ngabut sampay ninag na Kababbasan njawom atay bi sampay pakallat na mataallaw. Hati na, ngabut sampay takka na Almasi marantaan mimon pamiki bi.
20Ilooy puntukan subay tahati bi, inawnan siga tunaꞌ kanabi-nabihan njawom kitab, saꞌ lakka man pamiki da dī da 21atawa pun lakka man bistahan manusiyaꞌ. Arapun Rū Sutsiꞌ mismu bay magmundaan kanabi-nabihan masampay siga umanat man Tuhan.
2Si Pitel mahati siga sukuꞌ si Isa pasal guru palsu
1Na kanabi-nabihan looy ilay siꞌ intong. Sugaꞌ ni jaman looy, luu du baw ndooy ni Israil jama magnabi-nabihan. Damikiyan, luu na du sina mintu siga guru palsu ni baanan bi masalluk tōꞌ bingkok ma kabinasa ningkaam. Boꞌ tuwak da lagi Papuꞌ tabi. Padahal, lay na ga ya nongan umu na bong pin tapaddusan na jaꞌ sila man jawom komkoman Ibilis. Sangkon, saꞌ ga bina oy, miha jaꞌ sila man da deꞌ-dēꞌ binasa. 2Meka na sina mintu ni baanan bi takoleꞌ binitsalahan meꞌ da sampay mmeꞌ meꞌ uwahan da buwat jinisan kasabuhan. Dari pag toklas na, binitsala na sina mintu pa kalaatan kabanahan ma inantanan meꞌ tabi. 3Ni kamulakab napsu ga guru meꞌ looy ilay, bbuwatan da ina mintu nulun-nulun siga dustaꞌ bong pin koleꞌ jaꞌ sila sīn mman bi. Sugaꞌ jama meꞌ sila ina, man maruhuꞌ lagi ndang bay sinukuꞌ meꞌ Tuhan minulkaan. Boꞌ kabinasahan da ina mintu, ndang luu na bay sinaddiya.
4Tattap jaꞌ sina sila minulkaan. Mindoga jaꞌ kam ni palas siga malaikat ma bay buwat dusa mattoꞌ. Yaꞌ du sila bay pinabiya meꞌ Tuhan amu-amu buwat dusa. Sangkon lay na sila tinahan pa njawom lowang tangob ngkod-ngkoran yaꞌ gi taabut llaw hukuman bbos-bbos. 5Damikiyan, manusiyaꞌ ma yaꞌ tawu pa Tuhan ni bay jaman Nabi Nū, yaꞌ du bay pinabiya meꞌ Tuhan amu-amu buwat dusa. Saꞌ ba, palas njataꞌ da, lay sila katis matoy ndunukan? Ilooy du bay sinalamat meꞌ Tuhan yana Nabi Nū ma bay masaplag lān kaintongan ninsila. Maka luu gi soheꞌ na pituꞌ lay du salamat.
6Damikiyan luu lagi silay siga jama ndooy ni Sodom ka Gomora lay du kalabuan hukuman Tuhan mattoꞌ. Saꞌ ba, lay jaꞌ sila ampud leꞌ Tuhan, sampay ga daira da pun, bay du dari abu sadjaꞌ. Dari njataꞌ da, ndooy na kitabi ngaddoꞌ matakaddam bong oy palas jama ma yaꞌ luu tawu da pa Tuhan. 7-8Sugaꞌ ndooy ilay ni Sodom, luu gi baw disu lalla, yana si Lut, lay sinalamat meꞌ Tuhan. Iya ilay jama intong. Halloman na maglahat ka ga jama jahat ni daira looy, ndang tud kamaatan ya lassa ngandaꞌ kadarihan da. Batan llaw pa dangallaw, takita na sila buwat jinisan kasabuhan sampay takale na jinisan bitsala da lakaꞌ-lakaꞌ.
9Sangkon ni mimon bay sabbut ku siꞌ, tumatandaꞌ na pandoy Tuhan maddusan jama ma ngisbat iya man jawom kasusahan. Damikiyan, pandoy du baw ya niksaꞌ jama ma yaꞌ intong njawom tahanan ngabut sampay sila pinidjalaꞌ ni llaw hukuman. 10Maka tud bohat sina pidjalaꞌ na ni sagannap ma amu-amu nganduwan napsu da buwat jinisan kasabuhan sampay ni sagannap ma yaꞌ kuhi lillaꞌ ni kapatut na. Boꞌ meꞌ looy na du silay bana kadari siga guru palsu ma bay sabbut ku siꞌ. Tud takabbu sila sampay nawakka buwat oy-oy karomanan da san tagga pa Tuhan. Yaꞌ san sila tawu madiyoꞌ sagannap ma ngantanan kawasa-kapatut mehe, ma subay pinaehe. 11Minsan siga malaikat ma ngantanan kawasa-kapatut langkaw banahan man siga guru palsu, yaꞌ du sila mitsala siga guru meꞌ looy pa kalaatan ni pag-awpan Tuhan. 12Boꞌ siga guru palsu meꞌ looy ilay, minsan pakaradjaan ma yaꞌ tahati da, binitsala du meꞌ da pa kalaatan. Sibuꞌ du sila ka sattuwa tawun, yaꞌ luu honaꞌ-honaꞌ da. Boꞌ sattuwa ina, ilooy du kasongan da sinungkuban sampay pinapatoy. Damikiyan, siga guru meꞌ looy ilay, sabap kabinasa tōꞌ da ni jama, mastiꞌ binasa jaꞌ du sila mintu meꞌ Tuhan. 13Kalaatan bay pabuwat da, tinungbasan du sila ka kalaatan. Tud yaꞌ luu kaiyaan da. Bbuwatan da nganduwan napsu da jaꞌ mōꞌ kasabuhan ni mayran. Tigiꞌ sila maglaw-lamud ka kaam mangan-mangan bahasa dambuwaꞌ atay sila ka kaam. Boꞌ ko, sarī maksud da. Sila ina meꞌ sapantun tamak ni badjuꞌ poteꞌ. 14Bila sila ngita danda, lanji jaꞌ njawom pamiki da. Tud yaꞌ luu dohong da buwat dusa. Bbuwatan da ngaliboy jama ma kulang iman mmeꞌ ni kalaatan da. Maka alistu sila ngulihal altaꞌ jama ni kamulakab napsu da. Jama meꞌ sila ilay minulkaan meꞌ Tuhan. 15Lay na sila magsiꞌ man lān intong. Lay na sila ngikut tabiat si Balaam,(2.15) Si Balaam ilay disu jama bangsa Aram. Tanyag awon na ni jaman maruhuꞌ sabap meꞌ na pandoy buwat palkataan. Ndaun salsila si Balaam ni Kitab Tawrat, Siga Numbul juran 22-24 ka 31.13-16 sampay Siga Pakaradjaan bay Pinalahil 2.14. anak si Beyol mattoꞌ. Si Balaam ilay, ni kaehe kainagon na ni sīn, kuhi jaꞌ ya buwat kalaatan bong pin ya ndugangan jaꞌ paeka. 16Sugaꞌ yaꞌ na bay darahan na niyat na buwat karupangan sabap bay ya tapampan leꞌ bitsala kuraꞌ na. San hayop yaꞌ kabitsala, luu na ga suwara manusiyaꞌ bay pōꞌ man behe kuraꞌ na.
17Balik ta pa siga guru palsu, tud yaꞌ luu pūs da. Kaap-apan jaꞌ jama meꞌ da. Sibuꞌ du karuha da ka tagaꞌ yaꞌ magboheꞌ. Maka sibuꞌ du karuha da ka andom ma pingkaꞌ jaꞌ bay tinuran meꞌ baliyu yaꞌ san uwan ni huma. Jama meꞌ sila ilay, ndang luu na bay hinalliꞌ ninsila kasusahan njawom lugar lindom. 18Basag sila ngabbu saula-ula pandoy sila, boꞌ ko, karupangan jaꞌ bitsala da. Baꞌ-bāꞌ da, san gi oy kinanapsuhan meꞌ jama, dari jaꞌ nduwan. Sabapan tōꞌ da meꞌ looy, kasohean jama ma bahau jaꞌ pitsayaꞌ ni Papuꞌ Isa, ma bahau jaꞌ bay ngalabbahan napsu da ma maat, lay na baw taboo-boo bbeleng pabalik pa bay kalaatan da. 19Baꞌ-bāꞌ ga guru meꞌ looy, bong sila binean, nammu konoꞌ kita kasumunsayaan buwat oy-oy karomanan ta. Mingkan, sila na mismu yaꞌ sumunsayaꞌ sabap takawum sila meꞌ napsu da ni kalaatan ma makaat sila. Yaꞌ tasayu da, oy-oy ina napsu ma yaꞌ agak ta, inaa na baw magbayaan kita subay ga papuꞌ ta. 20Na sibuwa ilay, siga guru palsu looy siꞌ bay ngahasi kabanahan pasal tukang nalamat kitabi, yana Papuꞌ tabi si Isa Almasi. Pag toklas na, lay na labbahan da mimon kawul-piil da maat ma katamak ni manusiyaꞌ. Pag batnaa, meꞌ ga takawum na baw sila balik meꞌ napsu da buwat dusa. Dari mas maat gi kaadaan da ni batnaa man jaman da yaꞌ gi bay mmeꞌ ni si Isa. 21Sagannap ma toon lān intong, gam na yaꞌ bay katoonan da bong papagsiꞌ du sila sampay yaꞌ na ngasip ni siga panohoan Tuhan ma bay pinasampay ninsila. 22Jama meꞌ looy ilay, tud lay bana tuwaꞌ pa sila sambatan ilooy ma yuk na, “Tiyap-tiyap idoꞌ ina, pabeleng mangan utaꞌ na,” atawa yuk kasohean, “Tiyap-tiyap bawi ina, san sawpama bay na pinandi, pabeleng du tugub pa jawom pesak.”
3Llaw katakka Papuꞌ
1Na siga kakasi ku, ituu itu suwat ku ni kaduwa na ningkaam. Ngkon ku itu nuwatan kaam ni kaduwa na man ku maintoman kaam kabanahan pabalik mari tattog na pamiki bi. 2Yaꞌ ku doman takupan bi bay bitsala kanabi-nabihan ka siga panohoan Papuꞌ Isa, yana tukang nalamat kitabi. Boꞌ ilooy na silay siga panohoan ma bay pinasampay ningkaam meꞌ kami siga rasul na.
3Sugaꞌ ilooy duhuꞌ subay tahati bi meꞌ tuu: Ni ahil jaman, meka sina mintu pangaludjum. Ilooy du meꞌ punu njawom atay da nganduwan napsu da sadjaꞌ. 4Yuk da ina mintu ningkaam, “Saꞌ ba, Papuꞌ bi bay nganjanjiꞌ pabeleng? Bong mattan, ongoy yaꞌ gi luu? Labba man jaman kabboꞌ-bboan tabi bay matoy ngabut sampay batnaa, masi du sibuꞌ kaadaan lahat. Junyaꞌ tuu yaꞌ bay halin labba man jaman na bay pinapayak.” 5Sugaꞌ siga pangaludjum meꞌ looy ilay, tahadjaꞌ da lupa. Ndang katoonan da du ngkon luu langit sabap Tuhan bay magpalman. Damikiyan, katoonan da du ngkon gumi bay mantuk sampay timbul man jawom boheꞌ man sabapan palman Tuhan du. 6Maka mimon-mimon taꞌ babaw junyaꞌ mattoꞌ bay pingkaꞌ binasa meꞌ dunuk mehe man sabapan palman Tuhan du. 7Damikiyan, gumi ka langit ma luu ni batnaa, ampud leꞌ api bbos-bbos man sabapan palman Tuhan du. Sugaꞌ nilantan gi sina ngkod-ngkoran yaꞌ gi taabut llaw hukuman, yana llaw man Tuhan makaat sagannap ma yaꞌ luu tawu da niiya.
8Sugaꞌ siga kakasi ku, yaꞌ baw sina tatunaꞌ tabi bong sumilan binakbul mimon ituu siꞌ. Ingatun bi, bong pa Tuhan, dalibu taun sibuꞌ du ka dangallaw. Damikiyan, dangallaw sibuꞌ du ka dalibu taun. 9Sangkon sagannap ma mista Papuꞌ lawun numan janjiꞌ na pabeleng, magsāꞌ sila. Arapun lantan na jaꞌ silay katakka na sabap tahaꞌ pasensiya na ngagad manusiyaꞌ, kawu-kawu nawbat sila. Batan kainagon na ina yaꞌ luu san disu jama tanalkaꞌ. 10Sugaꞌ lantan yaꞌ lantan, mastiꞌ luu jaꞌ sina mintu llaw Papuꞌ pabeleng. Boꞌ kakuratan jaꞌ sina mintu jama ni katakka na meꞌ karuha jama kakuratan meꞌ sugaru. Ni llaw looy ilay mintu, luu gi ngallub boꞌ magti ampud mimon-mimon taꞌ langit sampay lanyap na du langit. Damikiyan gumi pun sampay na mimon-mimon taꞌ babaw junyaꞌ ampud na du sina leꞌ api. 11Na pagka mimon-mimon hinansu bbos-bbos, subay paliksaꞌ tabi dī tabi bong pooy tangge-tingkōꞌ tabi ni batnaa. Subay sutsiꞌ kawul-piil tabi. Maka subay kitabi lillaꞌ pa Tuhan 12halloman tabi ngagad sampay magdautan katakka Almasi ni llaw ma bay ginantaꞌ meꞌ Tuhan.(3.12) Meꞌ kasohean ngahati, subay sampunan tabi meꞌ tuu: “Maka sasang tabi ngagad, subay kitabi tiggo buwat kahandak Tuhan mari tapasiglaꞌ tabi katakka llaw looy.” Ni llaw looy ilay mintu, meꞌ halling sambat ku na siꞌ, ampud na sina langit maka tunaw ga mataallaw, buwan ka siga potean leꞌ hawa api. 13Sugaꞌ san meꞌ looy, luu gi agad tabi pinasunuꞌ langit bahau ka junyaꞌ bahau ma bay njanjiꞌ meꞌ Tuhan para ni sukuꞌ na.(3.13) Kitab Isaya 65.17; 66.22. Ndooy ilay mintu, isu-isu kaintongan sa pinabuwat.
14Sangkon, siga kakasi ku, halloman bi ngagad siga pakaradjaan looy mintu binakbul, subay kam tattap paintong. Maka subay yaꞌ luu sutsutan njataꞌ bi supaya mahap na jaꞌ kam pa Tuhan. 15Ingatun bi, tud tahaꞌ pasensiya Papuꞌ tabi. Llantan meꞌ na katakka na sabap muwanan na pin ya manusiyaꞌ dapat man da nawbat, boꞌ da salamat. Na siga pakaradjaan tuu itu siꞌ, lay na du bay sinabbut meꞌ danganakan tabi si Pol njawom suwat na ningkaam. Iya bay nuwatan kam man sabapan pangahati bay dean Tuhan niiya. 16Tuktuk na nuwat, mastiꞌ patabeꞌ na jaꞌ siga pakaradjaan meꞌ ilooy ma bay sabbut ku siꞌ. Sugaꞌ luu baw silay bitsala njawom siga suwat na awod hinati. Dari kasohean jama ma kulang pangahati da saltaꞌ na yaꞌ luu katattogan pangando da ni si Isa, bbuwatan da nabid bitsala na. Boꞌ ndang ilooy na silay tabiat da minsan ni kitab ilooy kasohean. Miha jaꞌ sila man da binasa.
17Sangkon, siga kakasi ku, pagka katoonan bi na mimon bay sabbut ku siꞌ, iyakinan bi tōꞌ jama ma yaꞌ ngisbat Tuhan, taggahaꞌ lay na baw kam mintu takoleꞌ da binoo magsiꞌ sampay man bi na ngalabbahan ntan bi.
18Katapusan bitsala ku: Duhunan bi na pin meꞌ bi ngikut arat-tabiat Papuꞌ tabi si Isa Almasi, yana tukang nalamat kitabi. Maka mangasa na pin kam ni aseꞌ-tabang na ningkaam. Songan bi lagi meꞌ bi lungbid ka iya. Kamura-murahan pinudji na pin ya labba man batnaa sampay saumu-umu! Amin.
Wassalam