Suwat ni Kaduwa Lakka man si Yahiya
Pahati
Suwat tuu itu bay pokonan si Yahiya pa mman disu danda ka ga anak na. Danda looy ilay, adak mimon na jama ma lahal ni kitab mista iya yana sumping bitsala tuwaꞌ pa disu baanan sukuꞌ si Isa. Kuwan siga anak danda looy, tuwaꞌ pa siga jamaa ni baanan looy.
Minsan yaꞌ tahaꞌ suwat tuu, luu baw kabanahan hagaan takoleꞌ tabi njataꞌ na. Batan yuk si Yahiya subay sikaaseꞌ-kaaseꞌ sukuꞌ si Isa sampay iyakin ni siga guru palsu ma magsian jama.
Suwat tuu yaꞌ tatantu tabi bong taun oy man na bay sinuwatan meꞌ si Yahiya. Sugaꞌ kaekahan mista labi man mpatpuꞌ-mpat taun paddus si Isa Almasi bay inangkat pa sulgaꞌ.
12 YAHIYA
1Ituu itu aku, yana si Yahiya, disu pa-mmean ni sukuꞌ si Isa. Itu suwat ku pa mman danda looy ma bay pineneꞌ meꞌ Tuhan sampay pa mman siga anak na. Maaseꞌ ku banahan ningkaam. Sarī man aku, sampay mimon ntuu ma toon kabanahan, maaseꞌ du ningkaam. 2Kaasean kami kam sabap saliꞌ-saliꞌ kitabi pitsayaꞌ ni kabanahan, boꞌ kabanahan naa ina, yaꞌ na kuhi lakka man jawom atay tabi saumu-umu.
3Kamura-murahan tattap na pin timbang ka barakat saltaꞌ na kasannangan ningkitabi man Mmaꞌ tabi Tuhan ka Anak na si Isa Almasi. Kinabbul jaꞌ situ njataꞌ kitabi ma sikaaseꞌ-kaaseꞌ maka mmeꞌ ni kabanahan.
4Tud bay gāk ku sitammu ka kasohean anak nu batan ndaꞌ ku mmeꞌ du sila ni kabanahan ma bay sohoꞌ Mmaꞌ tabi Tuhan ningkitabi. 5Na kuwan kau Nang, paku ku ningkau subay kitabi sikaaseꞌ-kaaseꞌ. Inaa ina saꞌ panohoan bahau, batan ndang bay na takale tabi man maruhuꞌ lagi, jaman tabi bohoꞌ bay mmeꞌ ni si Isa. 6Bong ina kitabi maaseꞌ ni Tuhan ka siga pagkahi tabi manusiyaꞌ, mastiꞌ bean tabi jaꞌ oy-oy sohoꞌ Tuhan ningkitabi. Boꞌ man maruhuꞌ lagi, ndang bay na kitabi sohoꞌ na sikaaseꞌ-kaaseꞌ.
7Batnaa tu, meka na guru palsu ni junyaꞌ magsian jama. Baꞌ-bāꞌ da, si Isa saꞌ Almasi bay pitu pa junyaꞌ magbaran manusiyaꞌ. Pangandustaꞌ sila maka tukang nguntra Almasi. 8Sangkon iyakin kam mari yaꞌ senseng mimon bay hulas-sangsāꞌ kami noan kaam maka supaya takoleꞌ bi du mimon supaat ma bay hinalliꞌ meꞌ Tuhan ningkaam. 9Batan soysoy yaꞌ tattap mmeꞌ ni tōꞌ Almasi, boꞌ magsiꞌ lagi, mastiꞌ yaꞌ ya tibuuk ka Tuhan. Sugaꞌ soysoy tattap mmeꞌ ni tōꞌ Almasi, malaingkan tibuuk ya ka Tuhan sampay Anak na.
10Na bong luu jama pilu pa mman bi nōꞌ sarī man tōꞌ Almasi, daa na padutaihun bi maka daa san gallakun bi. 11Batan bong ina sila bay hinasi meꞌ bi, malaingkan binilang du kam bay tabeꞌ ni kalaatan da.
12Meka gi situ karomanan ku pinamāꞌ ningkaam, sugaꞌ yaꞌ na doꞌ patabeꞌ ku ni suwat tuu. Bong yaꞌ luu baya-baya, pilu sa ku ngandaꞌ-ngandaꞌ kaam, boꞌ tabi kapagbitsala balharapan mari pannoꞌ na atay tabi leꞌ kagakan saliꞌ-saliꞌ.
13Dambuli man inaa, siga anak danganakan nu ma bay du pineneꞌ meꞌ Tuhan nohoꞌ masampay salam duwaa da ningkau.
Wassalam