2 Korin

Suwat ni Kaduwa pa mman Baanan Sukuꞌ si Isa ndooy ni Korin

Pahati

Suwat tuu itu bay sinuwatan meꞌ si Pol, yana disu rasul si Isa Almasi. Iya ilay bay duhuꞌ masaplag umanat mahap pasal si Isa ndooy ni daira Korin. Dari sabap meꞌ na bay masaplag, meka na jama Korin bay pitsayaꞌ ni si Isa.

Pag-anu, lay gi palanja si Pol masaplag pa kalahat-lahatan sarī. Sugaꞌ sasang na masaplag, hallom maka hallom na, lay na baw taaka na luu kasohean magsian sukuꞌ si Isa ndooy ni Korin. Dari lay si Pol nuwatan sukuꞌ si Isa man maintoman sila kabanahan.

Na song hallom, sabap gampang si Pol ninsila, lay sohoꞌ na si Taytus pilay pa Korin masā bong tud bay du sila mmeꞌ ni palbiatan na ni bay suwat na sibuwa. Dari sasang si Pol ndooy ni Masidunya, ilooy ma takka na si Taytus moo habal pasal sukuꞌ si Isa ndooy ni Korin. Bāꞌ na, tud lay du bay kinanna meꞌ da palbiatan na sampay lay na du halin pangatayan da. Salla na, ni tuntut si Taytus, luu na baw konoꞌ bay pasalluk siga guru palsu pa jawom baanan sukuꞌ si Isa sampay lay gi mitnahan si Pol. Baꞌ-bāꞌ da, yaꞌ luu kapatut si Pol magrasul. Boꞌ na, yaꞌ ya konoꞌ taasahan.

Dari sabapan bay tuntut si Taytus, lay du si Pol nuwatan ga sukuꞌ si Isa ni Korin pabalik, yana suwat tuu na ni kaduwa na. Njawom suwat tuu, si Pol nuntut jinisan kabinsanaan bay talingkaan na bong pin tapasampay na jaꞌ umanat mahap pasal si Isa ni manusiyaꞌ, awla na ninsila ndooy ni Korin.

Maka luu gi njawom suwat tuu si Pol maintoman sukuꞌ si Isa ndooy ni Korin pasal garaꞌ da nulung siga pagkahi da ma sigpit banahan ndooy ni Yahudiya.

Ituu bay sinuwatan meꞌ si Pol luu na ga duwampuꞌ-liman taun paddus si Isa Almasi bay inangkat pa sulgaꞌ.

2 KORIN

¹Ituu itu aku, yana si Pol, disu rasul si Isa Almasi man kahandak Tuhan. Suwat tuu lakka man kami ka danganakan tabi si Timuti pa mman bi ma mmeꞌ ni si Isa, yana sukuꞌ Tuhan nnaa ni Korin sampay ni sikaliput Akaya.(1.1) Ni batnaa, Akaya yana lahat inawnan Greece.

²Kamura-murahan binuwanan na pin kam kasannangan ka barakat meꞌ Mmaꞌ tabi Tuhan ka Papuꞌ tabi si Isa Almasi.

Tuhan tukang magamgaman atay tabi

³Pudji tabi Tuhan, Mmaꞌ Papuꞌ tabi si Isa Almasi. Iya ina Mmaꞌ tabi du ma basag manimbangan kitabi maka magamgaman atay tabi. ⁴Iya ina tukang magamgaman atay tabi tuktuk luu kasusahan tabi supaya kitabi na baw pandoy magamgaman siga pagkahi tabi ma njawom kasusahan. Dari pamiki ayad ma takoleꞌ tabi man Tuhan, man tabi na baw magamgaman jama.

⁵Na meꞌ kitabi itu sukuꞌ Almasi, mastiꞌ meꞌ iya du kitabi lumingkaꞌ njawom jinisan kabinsanaan. Sugaꞌ sa basag-basag binsanaꞌ njataꞌ tabi, mas basag gi meꞌ tabi pinagamgaman meꞌ Tuhan sabap meꞌ tabi tibuuk ka Almasi. ⁶Sangkon san itu kami bininsanaꞌ sabap meꞌ kami masaplag, pa kaayaran du ningkaam sampay man bi na salamat. Batan pagka wā kami pinagamgaman meꞌ Tuhan, ilooy na kon kami pandoy na magamgaman kaam. Pag toklas na, katatas na du kam ni kabinsanaan meꞌ ilooy ma daran talingkaan kami. ⁷Sangkon yaꞌ kami gawa pasal kaam. Batan katoonan kami bila kam bininsanaꞌ meꞌ karuha kami, mastiꞌ meꞌ kami na du kam pinagamgaman meꞌ Tuhan.

⁸Siga danganakan, tuntutan ta doꞌ kam pasal kabinsanaan ma bay talingkaan kami ndooy ni Asiya. Tud bay landuꞌ basag laug njataꞌ kami. Agon yaꞌ na tatatas kami sampay yaꞌ na san kami bay ngaholat ga llum gi kami. ⁹Kanna kami ndooy na bay katobtoban umu kami. Sugaꞌ ilooy na man kami bay mamintang subay Tuhan jaꞌ asahan kami, saꞌ na dī kami. Batan iya Tuhan Sangat Kawasa ma tukang makallum jama matoy. ¹⁰Ni kaehe kawasa Tuhan, lay ya maddusan kami man bahaya looy ma adak na kapatoy ningkami. Dari iya sa sina asahan kami maddusan kami sumawung sumilan. ¹¹Na kuwan kaam, bong ina kam makuhan kami na pin duwaa, tabang mehe sina ningkami. Boꞌ na, meka na du sina mintu jama muwan pagsukuhan pa Tuhan pag taaka da kinabbul na duwaa bi ningkami.

¹²Siga danganakan, ituu itu kagakan kami: Tatantu kami sutsiꞌ jaꞌ niyat atay kami ni mata Tuhan. Maka katoonan kami yaꞌ luu pabuwat kami man kami taawnan yaꞌ bonto ni mimon jama, awla na ningkaam. Ni mimon pabuwatan kami, yaꞌ kami mangasa ni akka kami dī kami. Ilooy ya asahan kami yana aseꞌ-tabang Tuhan.

^13-14Na suwat kami itu sikamimon ningkaam, mastiꞌ tahati bi jaꞌ sina pag batsa bi. Tud yaꞌ luu maksud kami nindi-nindi. Kamura-murahan tuktuk bi matsa siga suwat kami, tabista bi du tud hilas aseꞌ kami ningkaam. Batnaa tu, bohoꞌ sabahagiꞌ njawom atay kami katoonan bi. Sugaꞌ kainagon ku, song hallom, katoonan bi du labbasakayi. Boꞌ na, ilooy banahan puhung ku, pag taabut ni llaw tabi saliꞌ-saliꞌ siawop ka Papuꞌ tabi si Isa, tapag-abbu bi na du kami meꞌ karuha kami mag-abbu ningkaam.

Garaꞌ si Pol yaꞌ tabawus

^15-16Na pagka ndang tatantu ku gāk kam sitammu ka aku, min duwa na ku bay bagaraꞌ pahās pilu pa mman bi. Sibuwa, niyat ku pahās lān ku pa Masidunya, pag balik ni lān ku pabeleng mandooy. Bong siꞌ ilay bay tabawus, min duwa na kam bay tabuwanan ku supaat. Pag lupus, boꞌ ku tatulung bi lān ku palanja pa Yahudiya. ¹⁷Sugaꞌ san baw tu ku yaꞌ na bay tabawus pilu, yaꞌ baw sina sikatuwaꞌ bong luu kasohean nnaa mista aku jama yaꞌ taasahan. Yaꞌ ku meꞌ jama ma yaꞌ ngisbat Tuhan, os-os ngohoꞌ pilu sa ku san yaꞌ luu niyat njawom atay ku. ¹⁸Kami tu, akig kami jaꞌ Tuhan magkanaalla. Sangkon bitsala kami ningkaam mastiꞌ bana jaꞌ mimon. ¹⁹Damikiyan Anak Tuhan, yana si Isa Almasi, ma bay pinasaplag meꞌ kami ka ga si Saylas ka si Timuti ningkaam, mastiꞌ kanaalla du. Mimon bitsala na bana sadjaꞌ, yaꞌ kuhi baluba. ²⁰Boꞌ na, mimon ma bay njanjiꞌ meꞌ Tuhan, lay du bana tinuman njataꞌ Anak na. Sangkon kabāꞌ kitabi mattan du Tuhan kanaalla mmeꞌ ni lapa na. Boꞌ ilooy na silay kaboo kitabi mudji iya. ²¹Lagiꞌ na, Tuhan ina tattap nabangan kitabi mari kitabi tattog mmeꞌ ni Almasi. Maka iya na du sina bay meneꞌ kitabi binuwat sukuꞌ na. ²²Damikiyan iya na du sina bay maasok Rū Sutsiꞌ pa jawom atay tabi tandaꞌ sukuꞌ na na kitabi. Boꞌ Rū Sutsiꞌ ina yana buktiꞌ man tabi kasiguru koleꞌ mimon ma bay njanjiꞌ meꞌ Tuhan ni sukuꞌ na.

²³Na danan ku ilay yaꞌ na bay tabawus pilu pa Korin, ilu na Tuhan pakale-kale, man ku jaꞌ ngilagan paddi atay bi bong luu gi kam nnaa ma subay na pin sahawi ku. ²⁴Kamasaꞌ, yaꞌ du baw tu ga subay na pin kam pastul kami ni hāl pangando bi ni Almasi. Ndang katoonan kami na du hallot na pangando bi niiya. Kami tu, doman jaꞌ nabangan kaam supaya yaꞌ maglumba kagakan bi.

¹Dari njawom atay ku, gam na ku yaꞌ na doꞌ pilu bong gantaan man bi gi magkasusahan meꞌ karuha waktu ku bay pilu maruhuꞌ. ²Batan bong ina kam buwanan ku na baw kasusahan, soy sa nnaa takapin magāk aku? ³Sangkon lay na doꞌ bay paruhuꞌ ku suwat ku man mitsalahan kaam, taggahaꞌ pag pilu ku, susa na baw ku leꞌ bi. Boꞌ kainagon ku ilay siꞌ, tuktuk ku pilu, subay ku koleꞌ jaꞌ kagakan njataꞌ bi. Batan katoonan ku, tiyap-tiyap ku gāk sabapan kadarihan bi, malaingkan gāk du kam. ⁴Jaman ku bay nuwatan kaam, lassa hansu na ga atay ku susahan kadarihan bi nnaa, sampay lay na ga ngattap boheꞌ mata ku. Kamura-murahan tabista bi du maksud ku bay nuwat man makitahan kaam ehe aseꞌ ku ningkaam, saꞌ ga man masusahan kaam.

Kaampunan ni lalla ma bay buwat dusa

⁵Na ni kapasal lalla looy ni baanan bi ma bay buwat dusa,(2.5) Meꞌ kasohean mista, jama looy ilay ma awnan si Pol yana disu pagkahi da sukuꞌ si Isa ni Korin ma bay magjina. Ndaun salsila na ni 1 Korin 5.1-5. bana lay du silay ku pingkaꞌ magkasusahan sabapan na. Sugaꞌ bistahan ku, sa susa-susa ku, mas mehe gi susa bi sikamimon. Sangkon ni hāl inaa, yaꞌ na ku doman mitsala paeka taggahaꞌ landuꞌ meꞌ bi susa. ⁶Saddong na du silay meꞌ bi bay mainsapan iya. ⁷Sangkon batnaa, ampunun bi na ya. Pagamgaman bi na atay na, taggahaꞌ lay na baw ya mintu patatak hangat ngandung kasusahan. ⁸Junjung ku na ningkaam, pakitahan bi na ya buktiꞌ masi kam maaseꞌ niiya.

⁹Aku ilay bay nuwatan kaam maruhuꞌ pasal lalla looy man ku jaꞌ mindoga bong kam bana-bana du mmeꞌ ni kallong ku atawa niyaꞌ. Kahapan lay du kam mmeꞌ. ¹⁰Dari batnaa tu, bong kam ngampun lalla looy, mastiꞌ ampun ku na du ya. Maka bong bistahan bi luu dusa na niyaku, ilu na Almasi pakale-kale, mastiꞌ ampun ku na du ya kalnaꞌ kaam, ¹¹supaya kitabi yaꞌ tumandiyoꞌ meꞌ Ibilis. Batan katoonan tabi na du angan-angan Ibilis ngalangkat pagkatibuuk tabi.

Gampang si Pol ni si Taytus

¹²Na ni bay palanan ku masampay umanat mahap pasal Almasi, lay ku bay nakka Troas. Ndooy siꞌ, lay na ku binuwanan lawang meꞌ Tuhan masaplag. ¹³Sugaꞌ san meꞌ looy, gampang na pin ku sabap danganakan tabi si Taytus yaꞌ bay kaluwa ni waktu man kami bay tugun. Dari lay na ku muwan salam duwaa ni siga pagkahi ku ndooy ni Troas, boꞌ ku lay na pawus pa Masidunya miha iya.

Umanat mahap meꞌ sapantun bawu insallan hamut

¹⁴Sugaꞌ san meꞌ looy, magsuku ku pa Tuhan sabap luu na pin ya magmundaan kami supaya wā kami tumanjataꞌ san gi oy katuwaꞌ ningkami. Kon meꞌ looy sabap tibuuk na kami ka Almasi. Batnaa pinakoy na pin situ kami meꞌ Tuhan ngalataan kalahat-lahatan masampay umanat mahap pasal Almasi. Umanat mahap ina meꞌ sapantun bawu insallan hamut ma muhag-muhag ni sikaliput lahat. ^15-16Boꞌ kasulutan banahan Tuhan ni bawu na. Salla na, yaꞌ saliꞌ pangukan manusiyaꞌ. Ni sagannap ma song pa nalkaꞌ, umanat kami subay ga bawu sumpatoy. Dari pagka yaꞌ sila pitsayaꞌ, ilooy du takoleꞌ da katiksaan nyawa. Boꞌ ni sagannap ma song sinalamat, umanat kami subay ga bawu insallan hamut ninsila ma moo sila pa jawom kaallum bahau.

Sugaꞌ inawnan moo jama ma song tanalkaꞌ pa jawom kasalamatan, tud yaꞌ sina takaya leꞌ manusiyaꞌ ni dī da. ¹⁷Kahapan, man tabang Tuhan, takaya kami na. Salla na, meka na batnaa yaꞌ kanaalla masaplag umanat Tuhan. Ilooy du puhung da sīn. Boꞌ ningkami itu, yaꞌ baw tapiki kami meꞌ naa. Ilu na Tuhan pakale-kale, tud hilas situ meꞌ kami masaplag. Meꞌ kami itu sosohoan Tuhan sampay tibuuk ka Almasi, mastiꞌ kanaalla sadjaꞌ umanat kami.

Sukuꞌ si Isa ndooy ni Korin binilang suwat man makila si Pol

¹Na adakala luu na baw kasohean nnaa mista bitsala ku nsiniꞌ man ku jaꞌ mantug dī kami. Sugaꞌ oy tud kami buwat meꞌ looy? Ndang katoonan bi na du bong soy kami, saꞌ ba? Saꞌ situ kami meꞌ guru kasohean, subay na pin moo suwat pa mman bi man nanglitan sila supaya sila hinasi. Damikiyan, bong itu kami pa lahat disu, san kami yaꞌ na maku suwat mman bi pin kami hinasi jaꞌ meꞌ jama. ²Batan kaam na sina mismu bilang suwat ma nanglit sampay makila kami. Batan tumatandaꞌ na sina ehe pagbiddaan arat-tabiat bi batnaa ka maruhuꞌ sabap meꞌ bi bay pitsayaꞌ ni umanat kami. Sangkon sibuꞌ du sina kam ka suwat ma moo kabantugan ningkami binatsa meꞌ sikamimon. Boꞌ yaꞌ na sina kam kuhi lakka man jawom atay kami. ³Dan jinis meꞌ halling, sabap lay na kam pitsayaꞌ ni umanat kami, tadalil na kam pa suwat bay sinuwatan meꞌ Almasi pa mman sikamimon. Batan tuktuk liling jama kawul-piil bi, sibuꞌ du ka bay na sila matsa kaayaran Almasi njataꞌ bi. Sugaꞌ saꞌ baw ina kam meꞌ karuha suwat ma bay sinuwatan ka īng. Arapun kaam ina meꞌ sapantun suwat ma bay sinuwatan ka Rū Sutsiꞌ lakka man Tuhan sabanna ma llum saumu-umu. Maka panohoan Tuhan ina lay na sinuwatan njawom atay bi, saꞌ na meꞌ maruhuꞌ bay gi sinuwatan taꞌ siga batu ni bay jaman Nabi Musa.

⁴Na kami itu, yaꞌ kami duwa-duwa, tud bay situ kami pineneꞌ meꞌ Almasi binuwat sosohoan na kalnaꞌ Tuhan. ⁵Boꞌ na, katoonan kami na du bong inawnan kapandoyan kami, saꞌ situ lakka man dī kami, arapun lakka man Tuhan. ⁶Maka Tuhan du sina nganggaosan kami masaplag pagsulutan bahau ni antaraꞌ iya ka manusiyaꞌ mari jama mahap na niiya. Ni pagsulutan bahau ina, Rū Sutsiꞌ ndean meꞌ Tuhan ni manusiyaꞌ. Boꞌ ni pagsulutan sibuwa, saraꞌ bay ndean ni manusiyaꞌ. Ni pagsulutan sibuwa ina, bong jama doman mahap na pa Tuhan, subay bogbogan da sara. Salla na, ilooy du takoleꞌ jama man saraꞌ yana katiksaan nyawa batan yaꞌ luu kabogbog labbasakayi. Boꞌ ni pagsulutan bahau ina, koleꞌ na kitabi kaallum bahau sampay kasampulnaan nyawa saumu-umu man sabapan Rū Sutsiꞌ.

⁷Paintoman ta doꞌ kam jaman saraꞌ ma bay sinuwatan ni batu bay pinasampay ni Nabi Musa. Lay na ga pingkaꞌ ninag luwa Nabi Musa meꞌ sahayaꞌ Tuhan. Boꞌ kasilawan na ga bangsa Israil ma bay ngandaꞌ ni luwa na. Sugaꞌ lay du baluba sinag looy sampay lay na lakka. Na bong bay kainu-inu katakka saraꞌ san ilooy na sabapan man jama tiksaꞌ nyawa da, ^8-9labi na saꞌ kainu-inu katakka Rū Sutsiꞌ ma poonan kaallum bahau maka kasampulnaan nyawa. Boꞌ na, njataꞌ pagsulutan bahau ina, inaa na man manusiyaꞌ initung intong. Boꞌ njataꞌ pagsulutan sibuwa, inaa na sabapan man manusiyaꞌ kalabuan hukuman. ¹⁰Dari minsan ina ayad saraꞌ, pag takka jaꞌ pagsulutan bahau, san du pooy bay ehe kaayaran saraꞌ, lay na pababas leꞌ ehe kaayaran pagsulutan bahau. ¹¹Dan jinis meꞌ halling, bong ayad pagsulutan sibuwa ma sandaꞌ-sandaꞌ jaꞌ, labi na saꞌ ayad banahan pagsulutan bahau ma natas saumu-umu.

¹²Dari pagka biddaꞌ na ehe kaayaran taholat tabi njataꞌ pagsulutan bahau, yaꞌ na situ kami alang-kapalang masaplag. ¹³Saꞌ kami meꞌ bay jaman Nabi Musa lay gi nambunan luwa na supaya yaꞌ takita leꞌ pagkahi na bangsa Israil sinag luwa na baluba sampay lakka.(3.13) Ndaun Kalakka 34.29-35.^14-15Salla na, kuwan pagkahi ku bangsa Israil, labba man maruhuꞌ ngabut sampay batnaa, tud tohas kōk da. Sangkon tuktuk da matsa saraꞌ Nabi Musa, masi du yaꞌ tahati da kamaatunan na. Dari ko ngawon, tambun ni luwa Nabi Musa meꞌ lay na sinaynan pa jataꞌ pamiki da. Bong ina saꞌ Papuꞌ ngalakka, yaꞌ na kuhi lakka tambun ni pamiki da.

¹⁶Kamasaꞌ bong baw ina paling da na mundaꞌ da pa Papuꞌ, mastiꞌ kinaddoan na du sina tambun looy. ¹⁷Na ilooy ilay siꞌ ma bay awnan ku Papuꞌ, yana Rū Papuꞌ. Dari soysoy ina pinaasokan Rū Papuꞌ, malaingkan sumunsayaꞌ na ya batan paddus na ya man sakup saraꞌ. ¹⁸Dari kitabi itu batnaa, pagka lai na kinaddoan tambun ni pamiki tabi, tumampak na ningkitabi ehe kaayaran Papuꞌ. Maka hangat kinanna meꞌ tabi kaayaran na, hinalin na pin sina pagkajama tabi leꞌ Rū na ngabut sampay sumibuꞌ na kitabi ka arat-tabiat na.

¹Ni kaehe timbang Tuhan, lay kami peneꞌ na masaplag umanat mahap. Sangkon yaꞌ kami jamu maghulas-sangsāꞌ kalnaꞌ iya. ²Lay na labbahan kami mimon pabuwatan kaiyaꞌ-iyaꞌ ma subay na pin tinapuk. Dari yaꞌ situ kami ngandupang jama atawa pun nabid isi umanat mahap ma bay hinalap ningkami meꞌ Tuhan. Isu-isu kabanahan pasampay kami. Bong siꞌ ina jama bonto, basta tabista da jaꞌ situ bana bitsala kami. Lagiꞌ na, katoonan Tuhan du sina.

³Salla na, kasohean baw yaꞌ tahati da umanat mahap ma pinasaplag meꞌ kami. Sugaꞌ sabana na, kon da ina yaꞌ kahati sabap yaꞌ sila doman pitsayaꞌ. Sangkon lān tinūs meꞌ da song pa nalkaꞌ. ⁴Yaꞌ sila pitsayaꞌ sabap pikilan da lay na tinambunan meꞌ Ibilis ma buwat dī na tuhan ni junyaꞌ tuu. Sangkon yaꞌ tapadantaan pamiki da meꞌ umanat mahap pasal ehe kaayaran ilooy ma pulnaꞌ limbagan Tuhan, yana Almasi.

⁵Na kami tu masaplag, saꞌ ga man kami maehe dī kami, arapun man kami maehe si Isa Almasi. Sangkon pinasaplag meꞌ kami iya yana Papuꞌ. Maka kami tu, tukang ngintu kaam sadjaꞌ sabapan aseꞌ kami ni si Isa.

⁶Na jaman junyaꞌ ilay bay pinapayak, lay Tuhan nohoꞌ dantaꞌ ninag njawom lindom.(4.6) Ndaun Panagnaan ni Awwal Jaman 1.3 Pag batnaa, sibuꞌ du ka lay balikan na batan lay na baw ya marantaan pamiki tabi. Dari tahati tabi na ehe kaayaran na man sabapan pabuwatan na bay mapitu si Isa Almasi pa junyaꞌ.

Altaꞌ njawom siga kibut

⁷Kami itu meꞌ sapantun kibut ma mura jaꞌ passaꞌ bay inisihan altaꞌ hagaan saꞌ alang-alang. Altaꞌ ma awnan ku ilay siꞌ yana ladjikiꞌ ningkami bay kawakilan masaplag umanat mahap. Kami itu bay peneꞌ Tuhan san yaꞌ luu kawasa kami supaya oy-oy pabuwat kami, tumatandaꞌ man kawasa na, saꞌ ga lakka man kawasa kami. ⁸Dari man kawasa Tuhan, minsan kami daran tumabbaꞌ njawom kabinsanaan kayli-kawnan, yaꞌ du kami takoleꞌ llappiꞌ. San tamūd sobot pamiki kami, yaꞌ du tungkas iman kami. ⁹San kami nilaugan, luu na pin Tuhan ngunungan kami. San kami binonoꞌ, yaꞌ du baw man kami binasa. ^10-11Paninggai-paninggai kami masaplag, wā kami nontongan umu kami. Batan ndang bong ina kitabi tibuuk ka si Isa, lumingkaꞌ jaꞌ sina kitabi ni kabinsanaan meꞌ bay talingkaan na. Sugaꞌ atas kami binuwat meꞌ looy bong pin takita jama jaꞌ kaallum Almasi njataꞌ kami. ¹²Dari san tu kami wā nontongan kapatoy, lay du bay pa kaayaran ningkaam sabap pag toklas na, lay na kam koleꞌ kasampulnaan nyawa ma yaꞌ luu katapusan na.

¹³Yaꞌ kami jamu masaplag sabap pitsayaꞌ kami ni umanat ma bay hinalap ningkami. Ikut kami jaꞌ suwat njawom kitab, ilooy ma yuk Nabi Daud,

“Pitsayaꞌ ku, ngkon ku bay mitsala.”(4.13) Kitab Jabul 116.10.

¹⁴Dari masaplag na pin kami san gi man kami matoy. Batan katoonan kami pagka Tuhan lay makallum Papuꞌ Isa, mastiꞌ pakallum na du kami sabap tibuuk na kami ka iya. Sarī man kami, sampay ina kaam, pinakallum du sina mintu supaya kam tabeꞌ na ningkami binoo meꞌ Tuhan pa awpan na. ¹⁵Dari san meka laug bay talingkaan kami, pa kaayaran du sina ningkaam. Boꞌ na, mangkin pasōng laug njataꞌ kami, mangkin pasōng ehe tabang Tuhan ningkami. Pag toklas na, meka na sina jama muwan pagsukuhan pa Tuhan, pamaehe kabantugan niiya. ¹⁶Sangkon yaꞌ kami kuhi jamu maghulas-sangsāꞌ kalnaꞌ Tuhan. Kami itu, san palamma na pin anggawtaꞌ baran kami, magsasōng na pin baw taggu iman kami llaw pa dangallaw.

¹⁷Na siga kabinsanaan ma tatasan tabi itu batnaa, tabilang maggaan du bong binista ka ehe kabantugan ma ngagad kitabi. Kabantugan looy ilay mintu natas samumu-umu, boꞌ kabinsanaan njataꞌ tabi batnaa pingkaꞌ jaꞌ du. ¹⁸Dari kitabi itu, kon tabi natas batan ilooy pinandang meꞌ tabi ma yaꞌ takita, yana hāl Tuhan. Batan siga pakaradjaan ma takita ina ntuu ni junyaꞌ, sandaꞌ-sandaꞌ jaꞌ. Boꞌ siga ilooy ma yaꞌ takita natas saumu-umu.

Baran bahau

¹Na baran tabi itu meꞌ sapantun lumaꞌ sandaꞌ-sandaꞌ jaꞌ man tabi pahantiꞌ halloman tabi taꞌ junyaꞌ. Maka katoonan tabi du, bong lay na langkat, mastiꞌ luu du gantiꞌ na lumaꞌ bahau ndooy ni sulgaꞌ. Intong na, baran bahau. Boꞌ lumaꞌ looy ilay mintu saꞌ na meꞌ hantang lumaꞌ ma pinabuwat meꞌ manusiyaꞌ, batan lakka man Tuhan ka natas saumu-umu. ²Batnaa tu, dari ko ngawon, ngandahing na kitabi ni kaehe kainagon tabi koleꞌ lumaꞌ looy. Awnan ku ilay siꞌ yana baran bahau man sulgaꞌ. ³Baran tabi ilay mintu man sulgaꞌ tadalil pa juba nyawa tabi mari kitabi yaꞌ taawnan nantang. ⁴Halloman tabi itu pahantiꞌ ni baran tabi batnaa, dari ko ngawon, ngandahing na kitabi sabap meka kasusahan tabi. Sugaꞌ saꞌ baw tu ga hatiyan na doman na kitabi matoy. Sat na jaꞌ, agon yaꞌ na kitabi kaagad masa man baran tabi ma kuhi gi matoy ginantian ka ilooy ma llum saumu-umu. ⁵Kitabi itu, ndang lay na sinaddiya meꞌ Tuhan koleꞌ baran lakka man sulgaꞌ. Lagiꞌ na, Tuhan du sina bay maasok Rū Sutsiꞌ ningkitabi, yana buktiꞌ man tabi kasiguru koleꞌ mimon bay sinukuꞌ ningkitabi bbos-bbos.

⁶Sangkon tatantu tabi mastiꞌ luu jaꞌ sina kasongan tabi ayad banahan. Kamasaꞌ, katoonan tabi du, halloman tabi itu yaꞌ gi bay ngambanan baran tabi ma biyasa ntuu ni junyaꞌ, yaꞌ gi kitabi kapagdambuwaꞌ ka Papuꞌ Isa. ⁷San meꞌ looy, halloman tabi itu llum ni junyaꞌ tuu, mangando jaꞌ kitabi ni Papuꞌ Isa san yaꞌ gi takita tabi ilooy ma bay hinalliꞌ ningkitabi. ⁸Sannang na pamiki tabi batan tatantu tabi mastiꞌ luu jaꞌ kaayaran ngagad kitabi. Batan katoonan tabi na, mas mahap gi kitabi sakkat ka baran tuu supaya kitabi kapagdambuwaꞌ na ka Papuꞌ Isa. ⁹Dari sabagay lay na kitabi ngambanan baran tuu atawa niyaꞌ, pakutuꞌ tabi na jaꞌ meꞌ tabi nulut kahandak Almasi. ¹⁰Batan ndang bay sina ginantaꞌ ningkitabi sikamimon pinaawop ni Almasi hinukum. Pag-anu, boꞌ tabi tinungbasan na sabapan mimon ma bay pabuwat tabi mahap-maat.

Angan-angan si Pol moo jama pa jawom okoman Tuhan

¹¹Na pagka katoonan kami katawu-tawu hukuman Papuꞌ Isa, sabuli-buli kami na situ mitsalahan jama nohoꞌ pitsayaꞌ niiya. Katoonan Tuhan du sina yaꞌ luu sarī niyat njawom atay kami. Kamura-murahan kaam pun, tabista bi du. ¹²Bitsala ku ilay siꞌ ni suwat tuu, yaꞌ luu maksud ku muhung sinanglitan. Arapun lay jaꞌ ku maan kaam kabanahan supaya luu man bi ngandapitan kami ni siga guru palsu nnaa ma tigiꞌ madiyoꞌ kami. Sila ina, ilooy du hagaan ninsila mantug ntan da, boꞌ yaꞌ san paruli da bong oy niyat njawom atay da. ¹³Kasohean ina nnaa, pag ndaꞌ da biddaꞌ na ehe tuyuꞌ kami kalnaꞌ Tuhan, baꞌ-bāꞌ da, lungay kami man panganna. Sugaꞌ yaꞌ dari oy na bong bistahan da lungay kami man panganna atawa niyaꞌ. Ilooy du puhung kami bong pin sinanglitan jaꞌ Tuhan maka bong pin koleꞌ jaꞌ kam kaayaran njataꞌ kami. ¹⁴Ngkon kami itu magtuyuꞌ kalnaꞌ Almasi sabap tabista kami ehe aseꞌ na ni manusiyaꞌ. Inaa sina muwansangan kami masaplag. Tandaꞌ ehe aseꞌ Almasi, lay na ga ya nongan umu na gantiꞌ manusiyaꞌ sikamimon. Dari meꞌ tabi ngingat, mimon kitabi lay na du tabeꞌ matoy niiya. ¹⁵Kon na ilay Almasi bay matoy gantiꞌ sikamimon supaya sagannap ma koleꞌ kaallum bahau makutuꞌ kahandak na, saꞌ na kahandak da. Boꞌ pataꞌ du baw lay batan iya bay matoy sampay pinakallum pabalik kalnaꞌ manusiyaꞌ sikamimon.

¹⁶Sangkon batnaa, pagka pakutuꞌ tabi na kahandak Almasi, yaꞌ na sibuꞌ meꞌ tabi manding jama ka bay jaman tabi yaꞌ gi pitsayaꞌ ni Almasi. Jaman looy ilay, sampay Almasi sarī du bandingan tabi niiya.(5.16) Maruhuꞌ meꞌ ga si Pol manding manusiyaꞌ, hagaan sila bong luu pangadjiꞌ da, bong luu ntan da atawa balkanan sila. Pag batnaa, tabista da na mimon manusiyaꞌ hagaan pa Tuhan. Maruhuꞌ meꞌ da bay manding Almasi, manusiyaꞌ jaꞌ ya. Pag batnaa, tabista da na Anak Tuhan ya.¹⁷Pag batnaa, tabista tabi na, soysoy tibuuk ka Almasi, sibuꞌ du karuha da ka jama bahau bay pinapayak. Pagkajama da maruhuꞌ ma nabiat nulut dī da, yaꞌ na luu. Yaꞌ na sibuꞌ ka maruhuꞌ batan luu na pagkajama da bahau ka kaallum da bahau. ¹⁸Na ilooy ilay siꞌ, sikamimon man gantaan Tuhan.

Bistahun bi doꞌ, san kitabi bay ndusa pa Tuhan sibuwa, lay gi ya buwat jalan man tabi mahap na niiya njataꞌ pabuwatan Almasi. Boꞌ lay gi Tuhan nguwakilan kitabi nohoꞌ mahati jama bong pooy meꞌ da mahap na niiya. ¹⁹Dari meꞌ tuu situ umanat bay sohoꞌ Tuhan pinasampay ningkitabi: Njataꞌ kapatoy Almasi, ilooy na man Tuhan muwanan sikamimon manusiyaꞌ lawang man da mahap na niiya sampay yaꞌ na initung meꞌ na dusa da.

²⁰Kitabi itu yana siga wakil Almasi. Sangkon bila kitabi mitsalahan jama, sibuꞌ du karuha tabi ka Tuhan mitsalahan sila. Halling tabi ninsila, “Junjung kami na ningkaam kalnaꞌ si Isa Almasi, tusun bi na lān man bi mahap na pa Tuhan. ²¹Bistahun bi doꞌ, san yaꞌ luu dusa Almasi samasakali, lay na ga ya binuwat meꞌ Tuhan subay ga baldusa batan mimon dusa tabi lay na tinanggung meꞌ na. Kon na bay buwat meꞌ looy supaya dari jama intong na kitabi meꞌ karuha kaintongan Tuhan man sabapan pagkatibuuk tabi ka Almasi.”

¹Na meꞌ kitabi tu saliꞌ-saliꞌ limbang Tuhan ngaliyun manusiyaꞌ pa mman na, junjung kami na ningkaam, daa na pasensengan bi aseꞌ Tuhan ningkaam. ²Intomun bi palman njawom kitab, ilooy ma yuk Tuhan,

“Pag mintu taabut waktu bay gantaꞌ ku, kabbul ku na duwaa bi. Tabang ta sa kam mari kam salamat.”(6.2) Kitab Nabi Isaya 49.8

Siga danganakan ku, baan ta kam banahan, ituu na situ waktu bay awnan Tuhan. Hati na, ituu na situ masa man manusiyaꞌ koleꞌ kasalamatan.

³Sangkon kami itu, sabuli-buli kami ngilagan oy-oy kawul-piil gantaꞌ man kami tasahawi. Ilooy ilagan kami taggahaꞌ luu gi sabapan man jama nuwak umanat kasalamatan ma pinasaplag meꞌ kami. ⁴Kainagon kami ni mimon tangge-tingkōꞌ kami tumatandaꞌ ni jama bana-bana kami sosohoan Tuhan. Inaa sina kon kami natasan jinisan kabinsanaan, kamalasahiyan ka kasusahan. ⁵Tamūd llagpiꞌ kami sampay njīl. Tamūd llān kami meꞌ siga baanan jama hiluhalaꞌ nguntra kami. Sarī gi, daran yaꞌ luu kahali kami hangat kami maghulas-sangsāꞌ masampay umanat mahap. Tamūd natas na jaꞌ kami yaꞌ tuli timpus dambahangi sampay naggaan lingantu. ⁶Maka tandaꞌ kami sosohoan Tuhan, yaꞌ luu pabuwat kami oy maka oy na man kami taawnan sabu. Boꞌ na, tumatandaꞌ du luu pangahati kami ni kitab. Sarī gi, tahaꞌ pasensiya kami maka manimbang kami ni jama. Maka tumatandaꞌ du pinagmundaan kami meꞌ Rū Sutsiꞌ. Maka hilas jaꞌ aseꞌ kami ni mimon manusiyaꞌ. ⁷Bila kami magnasihat, kabanahan jaꞌ mimon ma pinōꞌ meꞌ kami, boꞌ tumatandaꞌ luu jaꞌ kawasa Tuhan njataꞌ kami. Kaintongan kawul-piil kami yana pakakas kami man ngatuhan soysoy nguntra kami. ⁸Dari kami itu, sinanglitan na ka kami atawa pinadiyoꞌ, pinitnahan na ka kami atawa binitsala pa kaayaran, basta buwat jaꞌ kami kaintongan. Salla na, san kami bonto, baꞌ-bāꞌ kasohean, pangandupang lagi kami. ⁹Meꞌ kasohean buwat kami, subay ga jama yaꞌ takila. Mingkan, kinatoonan kami meꞌ sikamimon. Daran gi kami nontongan kapatoy. Kahapan masi gi du baw kami llum. Damikiyan, daran kami binonoꞌ. Kahapan yaꞌ gi du baw kami bay matoy. ¹⁰San yaꞌ taambat kamalasahiyan talingkaan kami, yaꞌ du baw bay maglumba kagakan njawom atay kami. San kami miskin, meka na baw jama magkadayahan meꞌ kami ka altaꞌ ma natas saumu-umu. San yaꞌ luu oy maka oy na ni junyaꞌ tuu ma taawnan kami dapu, pagka kami tibuuk na ka Almasi, mimon ma luu niiya, ningkami na du.

¹¹Na siga danganakan kami nnaa ni Korin, kami itu mitsala, yaꞌ luu sinipuk njawom atay kami, batan tud maaseꞌ kami ningkaam. ¹²Bong sabagay lay na maglumba meꞌ tabi sikaaseꞌ, saꞌ na situ man kami. ¹³Dari pagka meꞌ ku ngingat anak ta na kam, bong siꞌ dari, sibuan bi na aseꞌ kami ningkaam.

Yaꞌ dari sukuꞌ si Isa tibuuk ka jama ma yaꞌ pitsayaꞌ

¹⁴Siga danganakan, daa kam nibuuk dī bi ka jama ma yaꞌ pitsayaꞌ ni si Isa. Batan yaꞌ sina dari jama intong maglimbang ka jama ma ngalangga saraꞌ Tuhan. Dan jinis meꞌ halling, pooy meꞌ dantaꞌ kapagtibuuk ka lindom? ¹⁵Yana meꞌ Almasi yaꞌ luu kabigiꞌ-bigian na ni tabiat Ibilis, damikiyan, kitabi pun ina ma pitsayaꞌ ni Almasi yaꞌ du sina luu kabigiꞌ-bigian tabi ni tabiat jama ma yaꞌ pitsayaꞌ niiya. ¹⁶Lagiꞌ na, yana meꞌ lumaꞌ Tuhan yaꞌ dari llamuran siga tuhan-tuhan, damikiyan kitabi pun, yaꞌ du dari mmeꞌ meꞌ uwahan jama ma yaꞌ pitsayaꞌ ni si Isa. Batan kitabi na situ binilang lumaꞌ Tuhan sabap Tuhan sabanna ma llum saumu-umu patannaꞌ njawom baran tabi. Meꞌ halling sambat palman Tuhan njawom kitab, yuk na,

“Patannaꞌ na sina ku mintu njawom baran da maka luu na pin ku ngunungan sila. Aku na sina mintu Tuhan da maka sukuꞌ ku na sila.”(6.16) Kitab Nabi Jeremaya 32.38

Maka lay gi magpalman Tuhan, yuk na,

¹⁷“Palawak na kam man sagannap ma buwat maat. Pasakkat na kam mman da. Maka daa na kam palamud ni oy-oy kalalamaan, boꞌ bi hasi ku.(6.17) Kitab Nabi Isaya 52.11

¹⁸Aku na Mmaꞌ bi, maka anak ta na kam.”

Dari ilooy na silay siꞌ palman Tuhan Sangat Kawasa.

¹Na siga kakasi ku, siga janjiꞌ Tuhan ilay para ningkitabi. Sangkon, labbahan tabi na mimon pamiki maat ka mimon pabuwatan ma katamak ningkitabi. Maka pakutuꞌ tabi na meꞌ tabi mōꞌ kawul-piil sutsiꞌ ma nulut ni kahandak Tuhan, pamaehe maltabat niiya.

²Siga danganakan, junjung ku na ningkaam, pasallopun bi na ba kami njawom atay bi. Ndang-ndang yaꞌ du kam luu san disu man kami bay kapagdusa atawa pun bay boo kami magsiꞌ. Maka yaꞌ du luu nnaa bay pingkaꞌ kinugut meꞌ kami. ³Aku tu mitsala meꞌ tuu, saꞌ ga tu man ku malaat kaam, batan meꞌ halling sambat ku na nsiniꞌ, maaseꞌ kami ningkaam. Kaallum-kapatoy kami, tattap kam njawom atay kami. ⁴Tud kasulutan ku ningkaam sampay daran gi kam pinagbantug meꞌ ku. San yaꞌ taambat kabinsanaan njataꞌ kami, mehe meꞌ ku kagamgaman sabapan bi. Kaam ina poonan kagakan mehe niyaku.

Gamgām atay si Pol ni katakka si Taytus

⁵Baan ta kam, sibuwa kami takka pitu pa Masidunya, agon yaꞌ na bay luu dapat man kami kapahali sampay tud lamma na ga kami. Waktu looy ilay, paninggai-paninggai kami, luu na jaꞌ sasat pa jawom pa poan. Ni poan, meka jama bay nguntra kami. Maka njawom atay kami, kajinisan na kinagampangan meꞌ kami. ⁶Kahapan lay du bay pinagamgaman atay kami meꞌ ilooy ma tukang magamgaman atay manusiyaꞌ, yana Tuhan, sabap meꞌ na bay mapitu si Taytus pa mman kami. ⁷Sarī man katakka si Taytus, lay gi pasampun kagakan kami pag lay jaꞌ kami tabaan na pasal meꞌ bi bay magāk atay na. Lay gi kami tuntutan na ehe kainagon bi sitammu ka aku pabalik. Maka biddaꞌ na konoꞌ bay sasso bi pag lay jaꞌ batsa bi bay suwat ku nahawi kaam. Maka lay gi ku tuntutan na tud lay du kam konoꞌ bana ngasip ni panohoan ku.

⁸Ni kapasal bay suwat ku ningkaam, tud bay sasso du silay ku sabap tabista ku kasusahan ningkaam pag lay jaꞌ tabatsa bi. Sugaꞌ pag lay jaꞌ ku kabaan tud lay du kam ngasip, kagamgaman na du ku. Njawom atay ku, san kam bay susa samantalaꞌ, tuwaꞌ na du ku bay nuwat batan lay du bay pa kaayaran ningkaam. ⁹Sangkon gāk situ ku. Sugaꞌ saꞌ baw lay ngkon ku gāk sabap meꞌ bi bay susa. Arapun ituu man ku gāk sabap lay tapakoy Tuhan kasusahan bi man moo kaam nawbat. Sangkon san ilay bay bisa suwat ku, yaꞌ du kam bay kasaniyaan, gam pin lay gi kam koleꞌ kaayaran. ¹⁰Batan bong ina kita susa sabapan dusa ta, boꞌ kasusahan ta lay dari poonan man ta nawbat, inaa ina susa pinagpiha meꞌ Tuhan. Maka susa meꞌ looy ilay moo kita pa jawom kasalamatan sampay kalakkahan sasso ta lagi. Boꞌ siga jama ma niyaꞌ ngisbat Tuhan ina, minsan tamūd magkasusahan sila ni bay dusa da, yaꞌ du kuhi nawbat. Dari toklas na, tiksaꞌ nyawa da.

¹¹Boꞌ kaam ina, sabapan kasusahan bay takissa bi man sabapan bay suwat ku, meka na njawom atay bi lay tahalin meꞌ Tuhan pa kaayaran. Batan sabapan susa atay bi, basag na kam makutuꞌ kaintongan. Maka lay na ga kam dugahan ni dī bi sabapan bay kadarihan bi. Maka lay gi pasōng meꞌ bi tawu pa Tuhan. Sarī gi, lay na kam magtuyuꞌ magpahāp ningkami awla na pa Tuhan. Boꞌ na, lay du kam magti deꞌ-dēꞌ naup bay kasaan bi, batan lay na kam magti midjalaꞌ jama looy ma bay buwat dusa ni baanan bi. Sangkon tumatandaꞌ na yaꞌ na luu susun njataꞌ bi.

¹²Aku ilay bay nuwat ningkaam, saꞌ du sat kalnaꞌ lalla looy ma bay buwat dusa atawa jama looy man na bay ndusa. Arapun ngkon ku ilay bay nuwat, ilu na Tuhan pakale-kale, supaya tabista bi na ehe aseꞌ kami ningkaam.

¹³Dari pagka lay na halin kadarihan bi, mehe meꞌ kami kagamgaman pasal kaam. Ilooy gi man magsasōng kagakan kami, pag ndaꞌ kami tud bay gāk si Taytus sabapan bi. Batan lay konoꞌ lungay susa atay na pag ndaꞌ na mahap meꞌ bi bay ngahasi suwat looy. ¹⁴Boꞌ ndang lay na silay kam pinag-abbu meꞌ ku ni si Taytus halloman na yaꞌ gi bay pilu pa mman bi. Kahapan yaꞌ du ku bay parapatan bi, batan lay na du tasakup meꞌ si Taytus ayad kawul-piil bi nnaa. Dari yana meꞌ mimon tōꞌ kami ningkaam bana sadjaꞌ, damikiyan, tumatandaꞌ na du ni si Taytus bana du bay sanglit ku pasal kaam. ¹⁵Maka ndaꞌ ku, pag luu jaꞌ si Taytus bay pabeleng pitu, tud lay na pasōng ehe aseꞌ na ningkaam. Maka tud gāk ya konoꞌ tuktuk taintom na lay ya hinasi meꞌ bi paayad sampay inasip ni palbiatan na. Boꞌ hanggaw gi kam konoꞌ taggahaꞌ yaꞌ kam kinahopan meꞌ na. ¹⁶Sangkon aku pun, gāk na du ku ningkaam sabap katoonan ku na taasahan ta kam buwat kahandak Tuhan.

Tulung ni sukuꞌ si Isa ma bay tuwaꞌ leꞌ gotom ni Yahudiya

¹Batnaa siga danganakan, tuntutan ta doꞌ kam pasal kaayaran bay pabuwat siga baanan sukuꞌ si Isa ntuu ni Masidunya man tabang Tuhan ninsila. ²San sila njawom kamalasahiyan mehe sabapan kabinsanaan njataꞌ da, masi du yaꞌ kuhi lakka ehe kagakan njawom atay da. Dari san sila miskin banahan, amu-amu sila magtuyuꞌ nulung pagkahi da(8.2) Pagkahi da ma awnan si Pol yana siga Yahudi ma mmeꞌ ni si Isa ndooy ni Jerusalem ka ni sikaliput Yahudiya. Tud bay sigpit sila sabap bay tuwaꞌ gotom. Ndaun Salsila siga Rasul si Isa Almasi 11.27-30 ka Rom 15.25-27. ma sigpit. ³Kabiyasahan jama, bong sila nulung, ngkod takaya-kaya da sadjaꞌ. Boꞌ ninsila, baan ta kam banahan, san sila sigpit, pinagtuyuan gi meꞌ da. Tud basag banahan kainagon da nulung ⁴batan sila gi mismu bay pa mman kami mogos mmeꞌ nulung ni pagkahi tabi sukuꞌ Tuhan. ⁵Sarī mandooy, luu gi bay pabuwat da ma yaꞌ bay holat kami. Batan yaꞌ gi sila bay nulung, lay doꞌ duhuꞌ suhuran da dī da pa Tuhan. Pag-anu, boꞌ da maglillaꞌ mmeꞌ ni oy-oy karomanan kami tandaꞌ da doman mmeꞌ jaꞌ ni oy-oy kahandak Tuhan ninsila.

⁶Dari pag ndaꞌ kami meꞌ looy, honaꞌ-honaꞌ kami, subay sohoꞌ kami si Taytus pabeleng pa mman bi nnaa ni Korin. Subay ya nabangan kaam majatu bay bbuwatan bi ngumpo sīn kalnaꞌ pagkahi tabi ndooy ni Yahudiya. Ndang-ndang iya du bay soheꞌ bi bagaraꞌ nulung jaman bi bohoꞌ bay kalangga piki mokon sīn. ⁷Katoonan ku du yaꞌ kam tamban ni hāl ma hagaan pa Tuhan, batan basag pangando bi ni si Isa maka alistu kam noan jama pasal iya. Boꞌ lawom gi pangahati bi ni kabanahan. Tiggo gi kam nabangan jama maka basag aseꞌ bi ningkami. Sangkon sapatut na, subay du kam yaꞌ tamban ni hāl nulung pagkahi bi ma tiksaꞌ batnaa ndooy ni Yahudiya.

⁸Sugaꞌ san ku tu siꞌ bay mitsala meꞌ tuu, yaꞌ du ku tu ngalogos kaam. Arapun doman jaꞌ ku toon bong kam bana-bana du maaseꞌ ni pagkahi bi. Inaa sina kon ku bay nabbut pasal pagkahi bi ntuu ni Masidunya magkainagon nulung, kawu-kawu kam ngakig sila. ⁹Ngaddoꞌ jaꞌ kam pamintangan ni Papuꞌ tabi si Isa Almasi. Katoonan bi na du ehe aseꞌ na ningkitabi. San ya dayahan ni sulgaꞌ, lay na ga ya pitu pa junyaꞌ niksaꞌ dī na njawom miskin supaya luu na lawang man tabi koleꞌ ladjikiꞌ ma natas saumu-umu.

¹⁰Ni kapasal garaꞌ bi nulung, saꞌ ba, ni taun tuu ma bay pingkaꞌ, ndang kaam bay duhuꞌ man mimon pagkahi bi magkainagon nulung? Boꞌ lay na ga kam nagnaꞌ ngumpo sīn. Dari pagka meꞌ naa, ¹¹darahan bi na bay garaꞌ bi. Dangoy-dangoy takaya bi, kumpohun bi na. Pagka kam bay gāk magkainganon nagnaꞌ nulung, subay du kam gāk mupus. ¹²Basta kam ina tinagi nulung, kasulutan jaꞌ sina Tuhan ni saraka bi, dangoy-dangoy jaꞌ takaya bi. Tuhan ina yaꞌ du nohoꞌ siga sukuꞌ na muwan san yaꞌ luu pangabut da.

¹³Lagiꞌ na, yaꞌ situ luu maksud kami nohoꞌ kaam masannang jama bong gantaꞌ man bi na baw tiksaꞌ. Arapun ilooy du puhung kami bong pin luu jaꞌ balanjaꞌ mimon sukuꞌ si Isa saliꞌ-saliꞌ. ¹⁴Sangkon padpad maglabi gi balanjaꞌ bi batnaa, gam na hampitan bi siga pagkahi bi ma sigpit. Dari bong mintu kaam na baw talangga sigpit, boꞌ magsabtan ka maglabi balanjaꞌ da, sila na baw sina mintu pasīng muwanan kaam mari saliꞌ-saliꞌ luu balanjaꞌ bi. ¹⁵Bong ina tapabuwat bi meꞌ naa, magbēꞌ na ka suwat njawom kitab, ilooy ma yuk na,

“Kuwan ilooy ma bay ngumpo paeka, yaꞌ luu labi niiya; kuwan ilooy ma bay ngumpo dangkitiꞌ, yaꞌ luu kulang niiya.”

Ga si Taytus sinohoꞌ pilay pa Korin

¹⁶Magsuku kami pa Tuhan batan lay ya muwanan si Taytus kainagon ngayaran kaam meꞌ karuha ningkami du. ¹⁷Batan magti ya bay ngohoꞌ pag tilaw kami bong ya kuhi pilu pa mman bi. San kami yaꞌ gi bay nohoꞌ iya, ndang basag na du kainagon na ngandaꞌ-ngandaꞌ kaam pabalik.

¹⁸Sarī man si Taytus, luu gi situ sohoꞌ kami mmeꞌ niiya disu danganakan tabi. Iya itu sinanglitan meꞌ mimon baanan sukuꞌ si Isa sabap meꞌ na tiggo masaplag umanat mahap. ¹⁹Lay gi situ ya pineneꞌ meꞌ siga baanan sukuꞌ si Isa nohoꞌ mmeꞌ ningkami pag mintu taabut kami masampay tulung tabi pa Jerusalem. Kamura-murahan pinudji du mintu awon Papuꞌ sabapan tulung looy. Maka kamura-murahan tabista du meꞌ siga danganakan tabi ndooy ehe kainagon tabi nulung sila. ²⁰Kon na ilay sohoꞌ kami na doꞌ mmeꞌ ni si Taytus pilu sabap sabuli-buli kami ngilag man kami sinusunan ni hāl tulung bi, meꞌ naa na eka na. ²¹Kainagon kami itu saꞌ sat ni mata Tuhan man kami buwat kaintongan, arapun sampay ni mata manusiyaꞌ.

²²Sarī man ga si Taytus, luu gi situ disu danganakan tabi sohoꞌ kami du mmeꞌ pilu. Min meka na situ ya bay takita kami tiggo maghulas-sangsāꞌ kalnaꞌ Papuꞌ. Boꞌ na, pag bay ya binaan pasal kaam, lay gi pabasag kainagon na nabangan kaam sabap tatantu na kanaalla du kam pa Tuhan. ²³Na bong sawpama luu pakiyaka bong soy si Taytus, baan bi sila iya limbang ku ngayaran kaam. Maka kuwan siga danganakan tabi ilooy siꞌ sikaduwa ma song mmeꞌ pilu ni si Taytus, baan bi jama nnaa sila ina wakil siga baanan sukuꞌ si Isa Almasi luntuu. Ni lilingan kami, arat-tabiat da ina mōꞌ kabantugan ni Almasi. ²⁴Dari bong anu, pag takka da pilu, kaasean bi sila supaya tumatandaꞌ ni siga baanan sukuꞌ si Isa tud mattan du bay sanglit kami pasal kaam.

¹Na ni hāl meꞌ bi mokonan sukuꞌ si Isa tulung, san situ siꞌ yaꞌ na kam bay paintoman ku njawom suwat tuu. ²Batan katoonan ku du ndang mehe kainagon bi nulung. Boꞌ lay gi kam sinanglitan meꞌ ku ni siga danganakan tabi ntuu ni Masidunya. Yuk ku ninsila, kaam nnaa ni Akaya, bay taun tee lagi ma bay pingkaꞌ, ndang sakap na kam nulung. Pag taaka da meꞌ looy, adak mimon na du sila magkainagon mmeꞌ nulung.

³Batnaa, sohoꞌ ku na pilu ga si Taytus nabangan kaam mari tahan hinās tulung bi. Meꞌ looy ilay, pag mintu takka kami, yaꞌ kami karapatan bay nanglitan kaam bong ndang sakap na tulung bi. ⁴Batan bong ina mintu luu bay mmeꞌ niyaku siga danganakan mantuu ni Masidunya ngahās tulung bi, boꞌ yaꞌ gi kam bay sakap, labba man aku sampay kaam, hinaꞌ sina kitabi. ⁵Sangkon honaꞌ-honaꞌ ku, subay sohoꞌ ku na duhuꞌ pilu siga danganakan ilooy ma bay sabbut ku siꞌ. Meꞌ looy ilay, luu nabangan kaam mupus ngumpo tulung ma ndang bay njanjiꞌ meꞌ bi. Dari pag mintu takka na kami, tahan bi nong. Bong ilay kam mintu bay muwan awwal-awwal, tumatandaꞌ ni gasad bayaꞌ bi. Ilooy ilagan ta taggahaꞌ meꞌ bantuk subay na pin kam nilogos.

Sagannap ma nulung tadalil pa jama naburan bani

⁶Hāl muwan ina, papaham kam. Sibuꞌ du sina karuha na ka jama naburan bani. Soysoy ngumit meꞌ na bay naburan bani, pag kattom na, dangkitiꞌ du. Sugaꞌ soysoy ina bay nabud paeka, pag kattom na, mastiꞌ meka du. ⁷Sangkon, kaam na mag-atas piki bong dangoy karomanan bi pinamuwan, boꞌ deanun bi na ni gasad bayaꞌ bi. Yaꞌ sina mahap bong kam muwan san kam yaꞌ doman atawa sabap meꞌ bi bay nilogos. Arapun subay hilas meꞌ tabi muwan, batan kasulutan sina Tuhan banahan ngita jama gāk muwan. ⁸Intomun bi, takaya du sina meꞌ Tuhan muwanan kaam san labi gi man balanjaꞌ bi supaya wā luu man bi nulung ka buwat jinisan kaayaran ni jama. ⁹Meꞌ bay sinuwatan njawom kitab, yuk na,

“Jama intong ina, basag nulung ni sagannap ma miskin. Kaintongan da yaꞌ takupan saumu.”

¹⁰Na bong kam hanggaw kabus, mamintang jaꞌ kam ni siga tukang huma. Binuwanan jaꞌ sina sila meꞌ Tuhan bani sinaburan supaya pag taabut da ngattom, sarī man balanjaꞌ da, luu gi labi na pinabuwat bani sinaburan pabalik. Damikiyan ningkaam, binuwanan du sina kam meꞌ Tuhan sukup man bi magbalanjaꞌ sampay labi gi. Boꞌ llipat lagi sina meꞌ na supaya meka jama tatulung bi ni kaintong bi. ¹¹Binuwanan du sina kam meꞌ Tuhan jinisan supaat supaya wā kam katulung ni jama. Pag ina mintu pasampay kami tulung bi, meka na sina jama magsuku pa Tuhan sabapan bi. ¹²Dari duwa sina mintu kaayaran man sabapan tulung bi. Disu, kabuwan kam balanjaꞌ ni sukuꞌ Tuhan ma sigpit. Kaduwa na, inaa na poonan meka muwan pagsukuhan pa Tuhan. ¹³Batan pag ina mintu takita siga danganakan tabi ndooy ni Yahudiya hāp arat bi bay basag nulung ninsila sampay ni mimon jama, mudji na sila Tuhan. Boꞌ ilooy na silay mintu buktiꞌ mehe ninsila tud bana-bana du kam mean umanat mahap pasal Almasi. ¹⁴Maka haylan sina mintu sila ni kaehe aseꞌ Tuhan njawom atay bi bay moo-moo kaam nulung meꞌ looy. Dari tomoꞌ na sina mintu dawom da makuhan kaam duwaa ni kaehe aseꞌ da ningkaam.

¹⁵Magsuku pa Tuhan lay na dean na kitabi ladjikiꞌ mehe ma yaꞌ luu sibuꞌ sabanding na.

Si Pol ngandapitan dī na

^1-2Na baꞌ-bāꞌ kasohean nnaa, bahani jaꞌ ku bong njawom suwat man katāhan, sugaꞌ bong ni pag-awpan, tammon jaꞌ ku konoꞌ. Maka baꞌ-bāꞌ kasohean nnaa, ilooy du mehe ningkami meꞌ kami nganduwan napsu kami. Sugaꞌ aku tu, akig ku na doꞌ arat-tabiat Almasi meꞌ ku nganjunjung ningkaam. Sangkon magpadiyoꞌ na doꞌ ku maka hanunut-hanunut mitsalahan kaam. Junjung ku na ningkaam, ilagan bi man ku talpaksaꞌ mōꞌ bahani ku naggong sagannap ma māꞌ nganduwan jaꞌ kami napsu kami.

³Bana du baw situ luu napsu kami meꞌ karuha mimon manusiyaꞌ. Sugaꞌ iya bean kami kahandak Tuhan, saꞌ ga napsu kami. Dari bong luu pamiki ma yaꞌ nulut ni kahandak Tuhan, wā situ lobloban kami. Dari ko ngawon, wā njawom sibonoꞌ jaꞌ situ kami ka pamiki maat. ⁴Sugaꞌ siga pakakas(10.4) Siga pakakas lakka man Tuhan ina yana palman na ka pangando tabi ni si Isa Almasi sampay kabanahan ma wā pōꞌ man jawom behe tabi. Maka tabeꞌ du kaintongan tabi ka umanat mahap pasal si Isa. Pangahati tabi pun ni kasalamatan tabi ka siga duwaa tabi pa Tuhan, binilang du pakakas tabi. Ndaun Epesus 6.11-17. kami itu saꞌ situ meꞌ pakakas biyasa ntuu ni junyaꞌ, batan pakakas kami lakka man Tuhan maka mehe kawasa da man nalloban pamiki maat. Boꞌ kabinasa gi ni oy-oy pamiki bingkok ma pinakoy meꞌ Ibilis man magsian manusiyaꞌ ka ngomkoman sila. ⁵Maka mimon abbu, yana poonan man manusiyaꞌ yaꞌ toon Tuhan, talangkat du meꞌ siga pakakas kami. Dari mimon pamiki maat atawa yaꞌ tuwaꞌ, mastiꞌ halin kami supaya magbēꞌ ka kahandak Almasi.

⁶Na kuwan kaam nnaa, pag takka kami pilu, ndaꞌ ta sa bong ngasip du kam ni kahandak Almasi. Bong ina mintu tumatandaꞌ ngasip du kam, mahap sina. Sugaꞌ bong ina mintu amu-amu luu nnaa yaꞌ ngasip, mastiꞌ malasahi jaꞌ sina meꞌ kami.

⁷Kaam ina kasohean, meꞌ bi manding jama, mindoga jaꞌ kam ni hāl ma takita bi ni poan, boꞌ niyat njawom atay, niyaꞌ san paruli bi. Baꞌ-bāꞌ kasohean nnaa, sila du bay binuwanan kapatut meꞌ Almasi binuwat sosohoan na. Sugaꞌ subay siꞌ tabista da, bong sila sosohoan Almasi, kami pun iyadu. ⁸Na bong sawpama landuꞌ meꞌ ku magpabantug pasal kapatut ma bay ndean kami meꞌ Papuꞌ, yaꞌ du silay mintu man ku hinaꞌ. Ndang-ndang kapatut ku itu lay du pakoy ku man ku masambu nyawa bi, saꞌ ga man makaat kaam. ⁹Kon ku mitsala meꞌ tuu batan bistahan kasohean nnaa maksud ku ni siga suwat ku ningkaam man ku jaꞌ makitawu kaam. ¹⁰Batan baꞌ-bāꞌ bi kasohean nnaa, bong njawom suwat, bantuk bahani ku nahawi ka naggong, sugaꞌ bong ni pag-awpan, lammaꞌ gi ku konoꞌ man obak maka yaꞌ du meꞌ noy pintal ku mitsala. ¹¹Sugaꞌ indanan bi. Oy-oy ina bay halling kami njawom suwat, pag taabut ni pag-awpan, mastiꞌ ilooy du sina mintu pabuwat kami.

¹²Na jama ina ma tigiꞌ malaat kami, saꞌ ga oy, doman jaꞌ sila ngangkat dī da batan ndang nabiat sila sibanding-banding bong soy patingkat. Padahal, mangkin da ina sibanding-banding sampay maglangkaw-langkawan, mangkin tumatandaꞌ na yaꞌ luu akka da. Boꞌ kami itu, yaꞌ kami biyasa buwat meꞌ looy. ¹³Bong sawpama doman kami magpabantug pasal pabuwatan kami, basta yaꞌ baw tu kami nawakka ngalabihan kabanahan. Ilooy du tinuntut meꞌ kami isu-isu pabuwatan ma bay sinukuꞌ meꞌ Tuhan ningkami. Bbuwatan ma awnan ku ilay siꞌ, yana hāl meꞌ kami masaplag ngabut sampay pa lahat bi. ¹⁴Bong siꞌ ilay kami yaꞌ bay nakka lahat bi masaplag umanat mahap pasal Almasi, boꞌ kami mangaku lai, malaingkan taawnan kami kalanduꞌ magpabantug. ¹⁵Yaꞌ kami biyasa magpabantug ni pabuwatan jama sampay mangaku saula-ula kami ya bay maghulas-sangsāꞌ. Yaꞌ kami muhung sinanglitan, arapun puhung kami, bong pin pahallot jaꞌ pangando bi ni si Isa. Kainagon kami, hallot na pangando bi mari kami sumunsayaꞌ na ngaliput lahat bi masaplag supaya song paeka na pin jama pitsayaꞌ ni si Isa. ¹⁶Pus meꞌ looy, dari na kami palanja masaplag umanat mahap ni kalahat-lahatan pa dambilaꞌ man lahat bi. Angan-angan kami itu, yaꞌ kami niluꞌ kalahat-lahatan ma lay na man jama masaplag. Yaꞌ kami doman taawnan magpabantug ni pabuwatan ma yaꞌ san bay luu kabigiꞌ-bigian kami. ¹⁷Ni sabana na, bong kita doman mantug, gam na bogbogan ta halling njawom kitab, ilooy ma yuk na, “Soysoy doman mantug, subay pabuwatan Papuꞌ binantug meꞌ na.” ¹⁸Na san du sina pooy meꞌ tabi nanglitan dī tabi, bong yaꞌ du Tuhan kasulutan ningkitabi, oy pus na? Sangkon ilooy ya banahan subay mehe ningkitabi, basta kitabi sinanglitan jaꞌ meꞌ Tuhan.

Siga sukuꞌ si Isa subay iyakin ni siga jama ma mangaku rasul si Isa

¹Batnaa, tatasan bi na doꞌ samantalaꞌ pakale niyaku ngakig jama dupang meꞌ ku mantug dī ku. ²Aku itu, meꞌ Tuhan na du sēng ningkaam. Batan meꞌ ku ka kaam, sibuꞌ du kam ka budjang bay pinagsitunang meꞌ ku ka disu lalla, yana Almasi. Sangkon subay kam jagahan ku paayad. ³Ilooy kahanggawan ku, taggahaꞌ lay na baw kam mintu inakkahan meꞌ karuha jaman Sitti Hawa bay takoleꞌ inakkahan meꞌ sō mattoꞌ. Hanggaw ku taggahaꞌ takoleꞌ na baw kam pinagsian sampay man lungay na kasutsian bi ka hilas atay bi ngisbat Almasi. ⁴Gampang ku la ningkaam. Bong luu jama pilu moo tōꞌ sarī pasal si Isa ma yaꞌ magbēꞌ ka tōꞌ kami, kuhi-kuhi jaꞌ kam pitsayaꞌ. Damikiyan, bong luu noan kaam pasal Rū Sutsiꞌ atawa pasal umanat mahap, kuhi-kuhi jaꞌ du kam pitsayaꞌ san yaꞌ sikatuwaꞌ tōꞌ da ka ningkami.

⁵Sugaꞌ bistahan ku, san gi soy guru bi nnaa ma kanna bi rasul si Isa ninggi taꞌ mimon rasul, basta yaꞌ baw tu ku tamban leꞌ da. ⁶Marean ta yaꞌ du situ ku pintal mitsala meꞌ sila, sugaꞌ ni hāl pangahati pasal Tuhan, basta yaꞌ baw tu ku tamban meꞌ da. Kaam pun ina, katoonan bi na du, batan lay na du takale bi tōꞌ ku.

⁷Bay jaman ku noan kaam nnaa umanat mahap pasal Almasi, yaꞌ ku bay pingkaꞌ maku hasil. Bay jaꞌ ku magpadiyoꞌ para kaayaran ningkaam. Bong ningkaam, dari dusa kilay niyaku sukat ku yaꞌ bay maku hasil? ⁸Halloman ku nnaa ni lahat bi, iya bay malanjaan aku yana siga baanan sukuꞌ si Isa man siga lahat sarī. Inaa ko ngawon, lay jaꞌ ku mangan hulas-sangsāꞌ da bong pin kam tatoan ku. ⁹San ku bay kakatisan balanjaꞌ hallang-hallangan looy, yaꞌ du ku bay pingkaꞌ maku hasil mman bi, batan luu na baw bay takka siga danganakan tabi lakka man Masidunya bay nulung aku. Dari labba man sibuwa sampay batnaa, sabuli-buli ku naggaꞌ yaꞌ maku hasil bong pin yaꞌ jaꞌ kam sigpit sabapan ku. Damikiyan, sumawung-sumilan, masi du sina meꞌ naa meꞌ ku ka kaam. ¹⁰Meꞌ aku itu disu jama mogbogan kabanahan pasal Almasi, kanaalla situ bitsala ku siꞌ. Basta yaꞌ baw sina luu san disu jama ni sikaliput Akaya kabāꞌ ngandustaꞌ ku bong sawpama ku magpabantug ni hāl meꞌ ku yaꞌ bay maku hasil mman bi. ¹¹Ni bistahan bi, yaꞌ kina kam kaasean ku sukat ku yaꞌ koleꞌ tulung lakka mman bi? Katoonan Tuhan du sina bong pooy ehe aseꞌ ku ningkaam.

¹²Boꞌ darahan ku gi situ meꞌ ku yaꞌ maku hasil ningkaam. Meꞌ looy ilay, sagannap ma mangaku rasul si Isa nnaa yaꞌ luu dapat da ngabbu saula-ula sibuꞌ du pabuwatan da ka kami. ¹³Sila ina rasul palsu. Pandoy sila ngandustaꞌ sampay buwat dī da subay ga rasul Almasi. ¹⁴Sugaꞌ daa na kitabi haylan, batan Ibilis pun ina ngakka du sampay manyalupa gi pa malaikat nahayaꞌ na bahasa lakka man Tuhan. ¹⁵Sangkon san tabi yaꞌ na haylan bong siga sosohoan Ibilis mangaku sosohoan Tuhan saula-ula matangge sila kaintongan. Sugaꞌ ngagad na sila, basta hinisab du sina sila ni bay kalaatan da.

¹⁶Na kamura-murahan yaꞌ du kam luu mista aku jama dupang. Sugaꞌ bong sabagay luu, meꞌ bay halling sambat ku na siꞌ, tatasan bi na doꞌ pakale niyaku san ku magpabantug samantalaꞌ. ¹⁷Kamasaꞌ bila ku tu magpabantug, saꞌ ga arat Papuꞌ Isa akig ku. Iya akig ku jama dupang. ¹⁸Honaꞌ-honaꞌ ku, pagka meka nnaa ngakig arat jama ma mandang hāl junyaꞌ meꞌ da mantug pabuwatan da, akig ku na doꞌ sila samantalaꞌ. ¹⁹Ndang-ndang ni katahaꞌ akka bi, tinagi jaꞌ du kam pakale ni siga jama dupang. ²⁰Ndaꞌ ku, san kam binuwat meꞌ kasohean nnaa subay ga ata da sampay kinugut lagi, kuhi-kuhi jaꞌ kam. San sila ngandakag ka malangkaw dī da, sampay nampa luwa bi lagi, sinaggaan na sadjaꞌ meꞌ bi. ²¹Bong bay aku meꞌ sila, tud iyaꞌ ku. Tud yaꞌ ku kasogsog buwat kaam meꞌ naa.

Si Pol nabbut siga kamalasahiyan na kalnaꞌ Papuꞌ Isa

Dari pagka ndang tigiꞌ du kam pakale ni jama nnaa ma bahani ngabbu, akig ku na doꞌ sila magdupang-dupang mitsala. Yaꞌ baw sina luu tapag-abbu meꞌ da ma yaꞌ tapag-abbu meꞌ ku. ²²Bong pinag-abbu meꞌ da sila bangsa Hibrani, aku pun bangsa Hibrani du. Bong yuk da sila panubuꞌ si Israil(11.22) Si Israil yana Nabi Yaꞌkub. ka Nabi Ibrahim, aku pun iyadu. ²³Bong yuk da sosohoan Almasi sila, labi na aku.

Na bong siꞌ itu yaꞌ talpaksaꞌ, subay ga ku jama yaꞌ luu honaꞌ-honaꞌ na magpabantug meꞌ tuu. Para na pin, bana du bitsala ku. Pooy-pooy jaꞌ ina meꞌ guru bi bay maghulas-sangsāꞌ kalnaꞌ Almasi, basta yaꞌ baw ina sila lumabi man aku. San du sila min dangoy bay tajīl kalnaꞌ iya, basta yaꞌ baw sina lumabi man niyaku. Maka bong ni hāl lagpiꞌ, basta min meka gi niyaku. Kansang gi ku nontongan kapatoy ku. ²⁴Min lima na ku bay llagpiꞌ meꞌ siga Yahudi ma nguntra kami. Boꞌ lay lagi ikut da tabiat da ngalagpiꞌ min tallumpuꞌ-siyam sakayi labba. ²⁵Min tallu na ku bay kinaka. Sakayi, lay gi ku pingkaꞌ pinagbaan-baanan hiniyak ka batu. Min tallu na ku bay kabahayān ni tangngaꞌ dilawut tumande taꞌ adjung. Sampay lay na ga ku pingkaꞌ dambahangi dangallaw magpilampung jaꞌ ni tangngaꞌ dilawut. ²⁶Hangat ku ngalataan kalahat-lahatan masaplag, wā ku njawom bahaya. Lay na ga ku lumingkaꞌ njawom bahaya ngalintas sōng maka njawom bahaya meꞌ mundu ka njawom bahaya meꞌ bangsa ku mismu sampay meꞌ siga bangsa ma saꞌ Yahudi. Pa dile, pa dilawut sampay njawom daira, njawom bahaya na sadjaꞌ ku. Boꞌ lay gi ku tuwaꞌ bahaya leꞌ siga jama ma magbawuꞌ-bawuꞌ mmeꞌ ni Almasi. ²⁷Min meka na situ ku bay lumingkaꞌ lamma banahan hangat magtuyuꞌ kalnaꞌ Tuhan. Daran ku bay pingkaꞌ yaꞌ tuli timpus dambahangi. Kansang gi ku bay naggaan lingantu sampay tohoꞌ kallong. Daran gi ku bay kakatisan balanjaꞌ sampay natasan tanne, boꞌ kulang pamakoy gi ku. ²⁸Sarī man katiksaan baran ku, tiksaꞌ gi sampay pamiki ku llaw pa dangallaw ni kagampang ku ni siga baanan sukuꞌ si Isa sikamimon. ²⁹Bong luu danganakan tabi yaꞌ basag pangando na ni si Isa, tud susa ku. Damikiyan, bong luu taboo magsiꞌ, paddi du pamiki ku.

³⁰Ni hāl magpabantug, yaꞌ du situ ku tanam, sugaꞌ bong talpaksaꞌ, gam na ku magpabantug ni hāl gaos ku yaꞌ luu. ³¹Bay bitsala ku ilay siꞌ, tud bana silay. Tasayu du sina meꞌ ilooy ma tawop pinudji saumu-umu, yana Tuhan, Mmaꞌ Papuꞌ tabi si Isa.

³²Batnaa tuntutan ta doꞌ kam disu waktu bay tumatandaꞌ yaꞌ luu gaos ku. Bay jaman ku ndooy ni Damaskus, luu ndooy gubnul ndiyoan Sultan Aretas lay bay magpanohoꞌ nganjagahan mimon lawang kutaꞌ daira looy supaya ku tasungkub pag pōꞌ ku. ³³Lipara lay ku bay tinonton njawom bakaꞌ mehe man taꞌ panandawan kutaꞌ looy supaya ku kapalahi.

Pakaradjaan kainu-inu bay pinalahil meꞌ Tuhan ni si Pol

¹Na inawnan magpabantug, san katoonan ku yaꞌ luu pūs na, gam pin talpaksaꞌ darahan ku gi sabapan bi. Sangkon tuntutan ta doꞌ kam siga pakaradjaan bay pinalahil meꞌ Papuꞌ niyaku ^2-3luu na sapu-mpat taun bay pingkaꞌ. Jaman looy, luu disu lalla katoonan ku ma pitsayaꞌ ni Almasi bay inangkat pa katallu pangkat sulgaꞌ. Yaꞌ baw katoonan ku bong nyawa na sadjaꞌ ka, atawa lay tabeꞌ sampay baran na. Isu-isu Tuhan tau. Sugaꞌ katoonan ku baw, basta mattan ya bay nakka pa sulgaꞌ. ⁴Ndooy siꞌ, luu bay takale na pakaradjaan kainu-inu ma yaꞌ luu bitsala tatammu man mahati. Boꞌ na, yaꞌ dari sinabbut meꞌ manusiyaꞌ. ⁵Na siga pakaradjaan ma bay talingkaan lalla looy ilay siꞌ, pataꞌ binantug. Sugaꞌ pagka aku na lalla looy siꞌ, yaꞌ du ku doman magpabantug hāl meꞌ looy. Ituu du tu binantug meꞌ ku yana hāl yaꞌ luu kawasa ku ni dī ku. ⁶Sugaꞌ bong siꞌ ku ilay bay doman magpabantug ni hāl ma bay pinalahil niyaku, san ku yaꞌ na magdupang-dupang ngalabihan bitsala batan yaꞌ ku mitsala bong saꞌ kabanahan. Sugaꞌ agak ku gi situ dī ku nuntut hāl ma bay pinalahil niyaku. Karomanan ku bong ku binantug, subay yaꞌ labi man ilooy ma bay tasakup jama ni jataꞌ ku.

⁷Dari supaya ku yaꞌ takabbu sabapan jinisan pakaradjaan bay pinalahil meꞌ Tuhan niyaku, lay na Tuhan mabiya disu sosohoan Ibilis niksaꞌ aku. Boꞌ ndang ituu na situ kasanggalang niyaku meꞌ sapantun sisib njawom isi ku.(12.7) Yaꞌ tatantu ta bong oy awnan si Pol sosohoan Ibilis ni ayat tuu. Meꞌ kasohean mista, sosohoan looy yana jinisan kabinsanaan ka laug ma talingkaan si Pol. Kasohean mista disu saki.⁸Min tallu na situ bay njunjung meꞌ ku nohoꞌ llakkahan ni Papuꞌ. ⁹Sugaꞌ yaꞌ ku bay nduwan. Iya tampung na, “Mangasa jaꞌ ko ba ni aseꞌ-tabang ku. Mangkin na ina yaꞌ luu kawasa nu, mangkin tumatandaꞌ na basag kawasa ku njataꞌ nu.” Sangkon mas gāk gi ku magpabantug ni hāl yaꞌ luu kawasa ku. Batan tuktuk yaꞌ luu kawasa ku, patakka na baw kawasa Almasi ni jataꞌ ku.

¹⁰Sangkon, magsuku na du ku san yaꞌ luu kawasa ku ni dī ku, san ku pinadiyoꞌ, nilaugan, sampay njawom katiksaan kalnaꞌ Almasi. Batan mangkin yaꞌ luu kawasa ku, mangkin na takka kawasa Almasi njataꞌ ku.

¹¹Na man sabapan kadarihan bi, lay na ga ku talpaksaꞌ mōꞌ dupang ku magpabantug. Subay siꞌ bay ku dapitan bi tuktuk ku pinitnahan. Minsan yaꞌ luu pūs ku, yaꞌ baw tu ku samasakali tamban meꞌ sagannap ma buwat dī da subay ga rasul si Isa patingkat man kasohean. ¹²Bong siꞌ taintom bi bay jaman ku nnaa natasan kabinsanaan, tumatandaꞌ na pagkarasul ku. Batan jinisan pabuwatan kahaylan-haylan maka sipat kawasa Tuhan bay takita bi njataꞌ ku. ¹³Sugaꞌ oy tu la bay dusa ku ningkaam taggahaꞌ yaꞌ na kam gakan aku? Napi ku ni dī ku, oy-oy bay pabuwat ku kalnaꞌ siga baanan sukuꞌ si Isa ni lahat sarī, meꞌ looy du meꞌ ku bay buwat kaam. Ilooy du pagbiddaan na, kuwan ningkaam, yaꞌ kam bay pakuhan ku hasil taggahaꞌ tiksaꞌ na baw kam sabapan ku. Na bong baw gantaan dari dusa niyaku meꞌ looy, ampunun bi lasa ku.

Aseꞌ si Pol ni sukuꞌ si Isa ndooy ni Korin

¹⁴Batnaa tu, song pilu na ku ngandaꞌ-ngandaꞌ kaam. Bong itu ku bay tabawus, kamintallu tuu na situ ku nakka lahat bi. Sugaꞌ san baw tu ku mintu pilu, masi du ku yaꞌ maku hasil sabap kaam ya mehe niyaku, saꞌ ga sīn bi. Ndang-ndang saꞌ du sina sukuꞌ ga anak malanjaan induꞌ-mmaꞌ, arapun induꞌ-mmaꞌ ya subay malanjaan ga anak. ¹⁵Gāk du situ ku magtuyuꞌ-tuyuꞌ kalnaꞌ kaam san gi man sīn ku katis sampay anggawtaꞌ ku bong pin sambu jaꞌ nyawa bi. Sugaꞌ tilaw ta teꞌ kam, meꞌ tuu na tamba-manamba na aseꞌ ku ningkaam, sikatuwaꞌ kina bong subay gi maglumba aseꞌ bi niyaku? ¹⁶Sugaꞌ biyahun na luu, basta yaꞌ jaꞌ kam patiksaan ku pinakuhan hasil. Ilooy baw man ku jayip, baꞌ-bāꞌ kasohean, alistu ku konoꞌ ngandupang kaam supaya luu tahīs ku njataꞌ bi. ¹⁷Doꞌ kam bi, sila ma bay sohoꞌ ku pilu maruhuꞌ, luu kilay bay pabuwat da man ku taawnan bay ngugut kaam? ¹⁸Tasiguru ku, bong ilay ga si Taytus ka danganakan tabi ilooy disu ma bay sohoꞌ ku pilu mmeꞌ niiya, basta yaꞌ baw luu bay pabuwat da gantaꞌ man da mangan hāk bi. Ndang katoonan bi du bong inawnan si Taytus ka aku, sibuꞌ-sibuꞌ du arat kami maka saliꞌ-saliꞌ du kami mean kahandak Rū Sutsiꞌ.

¹⁹Na kanna bi mareꞌ maksud ku nuwat meꞌ tuu man ku jaꞌ ngandapitan dī kami. Sugaꞌ siga kakasi ku, saꞌ sina meꞌ naa maksud ku. Meꞌ kami tu tibuuk ka Almasi, ilu na Tuhan pakale-kale, mimon pabuwat kami ka bitsala kami ningkaam, numbul satu maksud kami masambu nyawa bi. ²⁰Ituu baw tu kahanggawan ku taggahaꞌ pag takka ku pilu, sarī holat ku, sarī na baw kadarihan bi. Boꞌ yaꞌ du sina mintu kam kamahapan bong subay na pin ku nahawi kaam. Ilooy kagampangan ku taggahaꞌ luu na pin kam nnaa sasaꞌ-manasaꞌ, sikadangkiꞌ-kadangkiꞌ, sikalasu-kalasu sampay yaꞌ ngaddoꞌ-ngaddoꞌ pa lassa. Maka gampang ku taggahaꞌ bbuwatan bi mitna, ngalimut, maglangkaw-langkawan sampay buwat kahiposan nnaa. ²¹Bong ina sipais, meꞌ naa na pin kadarihan bi pag takka ku pilu, mehe meꞌ ku hinaꞌ pa Tuhan sabapan bi. Maka mehe sina mintu meꞌ ku magkasusahan bong luu gi nnaa yaꞌ gi bay nawbatan dusa da sampay masi buwat jinisan kalalamaan ka kasabuhan sampay kajinahan.

Si Pol mandaan sagannap ma pitsayaꞌ ni si Isa ndooy ni Korin

¹Na bong itu yaꞌ du luu baya-baya, kamintallu tuu na ku mintu pilu pa mman bi. Kuwan kaam, bong luu nnaa pinalkalaꞌ, intomun bi, subay sina luu duwa-tallu jama bay kasakup ni kalaatan na meꞌ ndang bay sinuwatan njawom kitab. ²Na ni kaminduwa ku bay pilu, ndang lay na bay saggong ku sagannap ma bay buwat dusa. Pag batnaa, ndang bandaan ta na kam pabalik padpad yaꞌ gi ku takka pilu. Bong ina mintu ndaꞌ ku masi luu yaꞌ bay ngalabbahan dusa da, yaꞌ na du sina sila agak ku; basta sasso jaꞌ sina sila meꞌ ku. ³Ndang-ndang doman du kam ngita buktiꞌ aku rasul Almasi mitsala ningkaam. Ma yaꞌ kuhi nawbat, pakissahan ku na sina mintu kawasa Almasi njataꞌ ku. Daa kam ngaholat lammaꞌ kawasa na mainsapan kaam. ⁴Bana na, jaman Almasi llansang taꞌ tehang, bantuk yaꞌ luu kawasa na, sugaꞌ man kawasa Tuhan njataꞌ na, lay du ya llum pabalik. Kami pun, siga rasul Almasi, meꞌ bantuk yaꞌ du tu meꞌ noy kawasa kami. Sugaꞌ mastiꞌ takita du sina mintu kawasa Tuhan njataꞌ kami mainsapan kaam nnaa ma amu-amu buwat kalaatan.

⁵Sangkon na ina, pindogahan bi bana kawul-piil bi bong sikatuwaꞌ du ka umanat mahap ma kinapitsayaan meꞌ bi. Bong ina tud bana-bana du si Isa Almasi patannaꞌ njawom atay bi, mastiꞌ tumatandaꞌ jaꞌ sina ni ayad kawul-piil bi. Bong ina niyaꞌ, saꞌ ga bina oy, meꞌ bi pitsayaꞌ ni kuwit tōng bi sadjaꞌ. ⁶Boꞌ kami tu, kamura-murahan tabista bi du yaꞌ kami pitsayaꞌ ni kuwit tōng kami sadjaꞌ.

⁷Maku na pin kami duwaa pa Tuhan, kamura-murahan yaꞌ na kam luu buwat oy maka oy ma maat. Saꞌ baw tu kon kami makuhan kaam meꞌ tuu supaya kami sinanglitan inawnan guru alistu nōꞌ. Arapun binilang kami pandoy atawa niyaꞌ, ilooy ya puhung kami bong pin kam nūs jaꞌ lān intong. ⁸Sugaꞌ sinanglitan kami atawa niyaꞌ, basta yaꞌ baw tu kami buwat oy maka oy na ma nguntra kabanahan. Ilooy du angan-angan kami matangge kabanahan. ⁹Dari basta hallot jaꞌ pangando bi ni Almasi, gāk du situ kami san kami pinamāꞌ na yaꞌ luu gaos kami. Sarī man naa, paku kami duwaa pa Tuhan, kamura-murahan magsasōng na pin hāp kawul-piil bi ngabut sampay yaꞌ na luu salla na samasakali. ¹⁰Ngkon ku tu nuwat meꞌ tuu halloman ku yaꞌ gi bay pilu, kawu-kawu nawbat na sagannap ma buwat kalaatan nnaa. Dari pag takka ku pilu, yaꞌ na ku talpaksaꞌ mainsapan kaam. Ndang-ndang kapatut bay dean Tuhan aku itu para man mabasagan pangando bi ni Almasi, saꞌ ga man mabinasa kaam.

Katapusan bitsala si Pol

¹¹Katapusan bitsala ku, siga danganakan, pagakun bi atay bi. Pagbuli-bulihan bi mogbogan kawul-piil ayad. Kannahun bi banahan palbiatan ku maka tuyuan bi meꞌ bi dambuwaꞌ atay. Miha kam jalan man bi wā njawom kasalassayan ka pagkahi bi. Bong siꞌ ina bean bi jaꞌ, inunungan jaꞌ sina kam meꞌ Tuhan, yana poonan aseꞌ ka kasannangan.

¹²Bila kam sitammu-tammu, jara-jara kam meꞌ ndang tabiat jama sikaaseꞌ-kaaseꞌ.

Dambuli man naa, mimon sukuꞌ si Isa ntuu lay nohoꞌ masampay salam duwaa da pa mman bi.

¹³Kamura-murahan luu na pin tabang Papuꞌ tabi si Isa Almasi maka aseꞌ Tuhan njataꞌ bi. Maka kamura-murahan tattap meꞌ bi lungbid ka Rū Sutsiꞌ.

Wassalam