1 Tesaloneka

Suwat Sibuwa pa mman Baanan Sukuꞌ si Isa ndooy ni Tesaloneka

Pahati

Ituu itu bay sinuwatan meꞌ disu rasul Papuꞌ Isa inawnan si Pol. Katakkahan suwat tuu pa mman baanan jama ma mmeꞌ ni si Isa Almasi ni daira Tesaloneka ndooy ni Masidunya, lahat pinag-awnan Greece ni timpu batnaa. Tesaloneka ilay, ndooy na man si Pol ka ga soheꞌ na si Saylas ka si Timuti bay pilay pus da bay masaplag umanat mahap pasal si Isa ndooy ni daira Pilipi.

Sasang da ndooy ni Tesaloneka, meka na jama bay pitsayaꞌ ni si Isa, labba man bangsa Yahudi sampay pa siga bangsa saꞌ Yahudi. Salla na, kuwan siga Yahudi ma yaꞌ pitsayaꞌ, tud bay dangkiꞌ ni si Pol pag ndaꞌ da meka na jama pōꞌ pakale niiya. Dari bbuwatan da lay na ga ngalingog ni sikaliput daira looy. Pagka meꞌ looy, lay na baw ga si Pol pilay pa daira Bereya. Tabatsa bi du sina mimon salsila tuu siꞌ ni Salsila siga Rasul si Isa Almasi 17.1-15.

Na song hallom, taaka na meꞌ si Pol basag laug njataꞌ sukuꞌ si Isa ndooy ni Tesaloneka. Dari pagka gampang ya ninsila, lay sohoꞌ na si Timuti pabeleng ngandaꞌ-ngandaꞌ sila.

Sasang ga si Pol ni Korin, takka na si Timuti bay man Tesaloneka. Tuntut na ni si Pol, masi du konoꞌ hallot pangando sukuꞌ si Isa ndooy. Dari kon si Pol bay nuwat ituu man na nanglitan sila haboyan maintoman sila.

Ni jawom suwat tuu, bāꞌ si Pol yaꞌ bakkat meꞌ na magsuku pa Tuhan sabapan basag pangando da ni Papuꞌ Isa maka sabap mahap meꞌ da sikaaseꞌ-kaaseꞌ. Lay gi ya makitau sila pasal katakka Papuꞌ Isa pa junyaꞌ pabalik ni sinōng. Maka luu gi palbiatan si Pol njawom suwat tuu ma katabang ni sukuꞌ si Isa nulut kahandak Tuhan.

Ituu bay sinuwatan meꞌ si Pol luu na ga duwampūꞌ taun paddus si Isa Almasi bay inangkat pa sulgaꞌ.

1 TESALONEKA

¹Ituu itu aku, yana si Pol. Itu suwat kami ka ga si Saylas ka si Timuti pa mman bi baanan sukuꞌ si Isa nnaa ni Tesaloneka. Meꞌ kaam tabeꞌ na njawom sakup Mmaꞌ tabi Tuhan ka Papuꞌ tabi si Isa Almasi, kamura-murahan binuwanan na pin kam kasannangan ka barakat meꞌ Tuhan.

Si Pol nanglitan sukuꞌ si Isa ndooy ni Tesaloneka

^2-3Tuktuk kami itu maku duwaa pa mman Mmaꞌ tabi Tuhan, wā kami muwan pagsukuhan niiya sabapan bi. Kon kami magsuku batan taintom kami kaayaran bay pabuwat bi sabapan pangando bi ni Papuꞌ Isa maka ehe tabang bi ni jama sabapan aseꞌ bi ni Papuꞌ. Maka yaꞌ du takupan kami meꞌ bi yaꞌ kuhi ngalabbahan holat bi koleꞌ mimon ma bay njanjiꞌ meꞌ Papuꞌ tabi si Isa Almasi ni sukuꞌ na.

⁴Siga danganakan, kakasi Tuhan, katoonan kami du lay na kam pineneꞌ meꞌ Tuhan binuwat sukuꞌ na. ⁵Batan jaman kami ilay bay masampay umanat mahap pasal si Isa Almasi ningkaam, lay na kam pitsayaꞌ. Boꞌ kaam ilay bay pitsayaꞌ, saꞌ du ga sat man sabapan bitsala kami; luu du kawasa Rū Sutsiꞌ bay mukaꞌ puad bi. Sarī gi, lay du bay tabistu bi bana halling kami batan lay na bay tasakup bi arat-tabiat kami nnaa. Maka katoonan bi na du, mimon bay pabuwat kami nnaa, yaꞌ luu saꞌ yaꞌ bay pa kaayaran ningkaam. ⁶Kaam ilay bay ngahasi umanat kami, tud gāk kam man sabapan Rū Sutsiꞌ san bay basag laug njataꞌ bi. Dari sabap meꞌ bi amu-amu natas ni laug ka kabinsanaan, tumatandaꞌ na lay na kam ngakig kadarihan kami ka Papuꞌ Isa. ⁷Pag toklas na, lay na kam dari suntuan ayad ni sikamimon pagkahi tabi ma pitsayaꞌ ni si Isa nnaa ni Masidunya ngabut sampay ntuu ni Akaya. ⁸Maka sabapan bi, lataꞌ na man umanat mahap pasal Papuꞌ Isa pinasaplag ni sikaliput Masidunya ka Akaya sampay pa kalahat-lahatan ni katāhan. Batan paninggai-paninggai jaꞌ kami, ndaꞌ kami luu na jaꞌ jama bay kaakahan pasal pangando bi ni Tuhan. Dari san kami yaꞌ na bay magtuyuꞌ mahati ninsila oy maka oy na. ⁹Gam pin sila na ya bay nuntutan kami pasal meꞌ bi bay ngahasi umanat kami. Maka lay gi kami kabaan pasal kaam lay na ngalabbahan siga tuhan-tuhan bi supaya isu-isu Tuhan sabanna ma llum saumu-umu inisbat meꞌ bi. ¹⁰Maka lay gi sila māꞌ ngagad na kam ni Anak na, yana si Isa, pabeleng pa junyaꞌ man sulgaꞌ. Maka yuk da, pitsayaꞌ kam pus si Isa bay pinapatoy, lay na ya pinakallum meꞌ Mmaꞌ na Tuhan. Maka pitsayaꞌ na du kam iya tukang maddusan siga sukuꞌ na man mulkaꞌ Tuhan ma takka bbos-bbos.

Jaman si Pol ni Tesaloneka

^1-2Siga danganakan, katoonan bi na du, jaman kami yaꞌ gi bay pilu, bay kami pingkaꞌ bininsanaꞌ sampay hininaꞌ ndooy ni Pilipi. Sugaꞌ sabap Tuhan bay nganggaosan kami, lay gi du baw kami nawakka pilu pa mman bi masaplag umanat mahap man Tuhan. Maka san meka jama bay nulang kami nnaa, ndang katoonan bi na du, yaꞌ du bay senseng hulas-sangsāꞌ kami bay pilu. ³Kami ilay bay masaplagan kaam, yaꞌ bay luu njawom umanat kami gantaꞌ man magsian jama. Damikiyan, yaꞌ du bay luu niyat kami maat maka yaꞌ du bay luu maksud kami ngandupang jama. ⁴Ni sabana na, kami itu masaplag, saꞌ ga man nulut kahandak manusiyaꞌ. Iya maksud kami nulut kahandak Tuhan pagka iya bay ngahalapan kami umanat na. Tuhan ina, tasayu na du kami jama kanaalla, batan mastiꞌ katoonan na jaꞌ mimon niyat njawom atay manusiyaꞌ. ⁵Kami ilay, tamasa bi na du, san sakayi yaꞌ kami bay pingkaꞌ ngabbu-ngabbu kaam. Maka ilu na Tuhan pakale-kale, yaꞌ du bay luu niyat kami ngulihal altaꞌ bi. ⁶Maka yaꞌ du kami bay muhung subay na pin pinaehe meꞌ bi atawa pinaehe meꞌ jama sarī. ⁷Kamasaꞌ, bong siꞌ ilay kami bay ngakig arat manusiyaꞌ, dari san kami bay ngaholat inintu pagka kami rasul Almasi. Sugaꞌ gam pin, bay jaꞌ kami buwat dī kami meꞌ karuha jama ma yaꞌ luu kapatut na. Boꞌ lay gi kami ngayaran kaam meꞌ saparati induꞌ ngipat siga anak na. ⁸Tandaꞌ ehe aseꞌ kami ningkaam, sarī man umanat mahap man Tuhan bay pasampay kami ningkaam, lay gi du atas kami narapan umu kami kalnaꞌ kaam. Tud maaseꞌ kami ningkaam.

⁹Siga danganakan, tamasa bi na du silay bay jaman kami masaplag umanat mahap man Tuhan ni daira bi, yaꞌ du bay man bi tiksaꞌ. Batan sangom-llaw na kami bay magtuyuꞌ ngusahān dī kami bong pin yaꞌ jaꞌ kam paya malanjaan kami. ¹⁰Labba man Tuhan sampay na kaam, lay na du tasakup bi bay kadarihan kami nnaa. Kaam ina sikamimon ma pitsayaꞌ ni si Isa nnaa, mastiꞌ lay jaꞌ tasakup bi kaintongan ka kasutsian tangge-tingkōꞌ kami. Damikiyan, yaꞌ du bay luu pabuwat kami man kami tasahawi. ¹¹Meꞌ kami bay buwat kaam subay ga kami mmaꞌ ngayaran siga anak na. ¹²Batan sigi-sigi kami bay maintoman kaam ka muwansangan kaam pa kaayaran. Maka bay gi kam tugun kami subay pagsitawpun bi kawul-piil bi ka kaam inawnan siga sukuꞌ Tuhan. Ndang-ndang Tuhan du bay ngaliyun kaam supaya kam tabeꞌ ni pamarinta na sampay ni ehe kabantugan na.

¹³Tud yaꞌ na situ bakkat meꞌ kami magsuku pa Tuhan pasal meꞌ bi bay ngahasi umanat na ma bay pinasampay meꞌ kami ningkaam. Ndaꞌ kami, pag lay takale bi, magti bay tabista bi ilooy na palman Tuhan, saꞌ ga umanat bay jaꞌ tinulun-tulun meꞌ manusiyaꞌ. Boꞌ palman Tuhan ina, yaꞌ luu hantiꞌ na ngahalin pangatayan bi, sagannap ma pitsayaꞌ.

¹⁴Siga danganakan, sibuꞌ na du sina kadari bi ka siga baanan pagkahi bi sukuꞌ si Isa ndooy ni Yahudiya. Batan lay na du kam bay nilaugan leꞌ bangsa bi meꞌ bay karuha sila du bay nilaugan leꞌ pagkahi da bangsa Yahudi.

¹⁵Na siga Yahudi ma maat, sila na bay mapatoy kanabi-nabihan maruhuꞌ-ruhuꞌ. Damikiyan, sila na du silay bay mapatoy Papuꞌ Isa. Pag ni timpu batnaa pun, sila na du sina basag ngalaugan kami. Tud yaꞌ sila doman nulut kahandak Tuhan. Boꞌ na, tigiꞌ sila manta mimon manusiyaꞌ. ¹⁶Batan pag ndaꞌ da kami masaplag supaya luu dapat kabangsa-bangsahan saꞌ Yahudi salamat, buwatan da nulang kami. Tamba-manamba na pin eka dusa da sampay man da na song kalabuan mulkaꞌ Tuhan.

Doman si Pol ngandaꞌ-ngandaꞌ baanan sukuꞌ si Isa ni Tesaloneka pabalik

¹⁷Siga danganakan, san itu kami lay pinaggos ngambanan kaam, bong atay kami, luu na jaꞌ du nnaa mman bi. Sangkon maglogtoꞌ na pin situ kami doman sikita pabalik ka kaam balharapan. ¹⁸Ni sabana na, bay na situ kami maru pilu ngandaꞌ-ngandaꞌ kaam, awla na aku, yana si Pol. Boꞌ saꞌ na ku sat sakayi bay magniyat pilu. Sugaꞌ yaꞌ kami bay tabawus batan luu na pin sasat Ibilis kasanggalang ningkami. ¹⁹Kainagon kami sitammu na kitabi pabalik batan pangando bi ni Papuꞌ tabi si Isa poonan kagakan mehe ningkami. Maka sabapan pangando bi, tatantu kami magsasōng na pin meꞌ bi nulut kahandak Tuhan ngabut sampay pa katapusan. Meꞌ kami ngingat, kaam ina meꞌ sapantun karuna dorogan ma bay sinangon taꞌ kōk kami man kami koleꞌ kabantugan pag beleng Papuꞌ Isa. ²⁰Intong na, kaam ina sabana-bana poonan kagakan ka kabantugan mehe ningkami.

Si Timuti sinohoꞌ meꞌ si Pol pa Tesaloneka

^1-2Na pagka yaꞌ na bay tasaggaꞌ kami gampang kami ningkaam, ilooy na silay kon kami bay mapilu danganakan tabi si Timuti. Kuwan kami, bistahan kami mas mahap lagi lay na doꞌ kami bay tamban ni Aten. Si Timuti itu yana limbang kami masampay umanat mahap pasal Almasi kalnaꞌ Tuhan. Bay ya sohoꞌ kami maintoman kaam mari pahallot na pin pangando bi ni Papuꞌ, ³taggahaꞌ takoleꞌ na baw njadjuꞌ pangando bi hangat kam nilaugan. Kamasaꞌ, tasayu bi du sina, ndang bay ginantaꞌ ni sagannap ma mmeꞌ ni Papuꞌ Isa, mastiꞌ lumingkaꞌ jaꞌ njawom kabinsanaan. ⁴Jaman kami masi nnaa ni lahat bi, saꞌ ba, ndang bay kam baan kami mastiꞌ song nilaugan jaꞌ kitabi? Pag batnaa, tasayu bi na du, lay na du bana binakbul bay bitsala kami. ⁵Sangkon, pagka yaꞌ na bay tasaggaꞌ ku gampang ku ningkaam, lay na bay sohoꞌ ku si Timuti pilu ngandaꞌ bong masi hallot pangando bi ni Papuꞌ. Ilooy kagampangan kami, taggahaꞌ senseng jaꞌ bay hulas-sangsāꞌ kami bong mintu lay na baw kam patatak sabapan sasat Ibilis.

Kagamgaman ga si Pol ni katakka si Timuti man Tesaloneka

⁶Pag batnaa, yaꞌ na luu kagampangan ku sabap bahau jaꞌ si Timuti bay takka moo habal mahap pasal kaam. Bāꞌ na, masi hallot pangando bi, maka masi kam basag sikaaseꞌ-kaaseꞌ. Maka bāꞌ na, tud gāk kam tuktuk kami tapanambung bi. Maka yuk na, meꞌ kami na du kam konoꞌ wā maglogtoꞌ doman sitammu ka kami pabalik. ⁷Pag lay jaꞌ kami katuntutan masi hallot pangando bi, siga danganakan, inaa na man kami kagamgaman. Dari san kami njawom jinisan kasusahan ka kabinsanaan ntuu, tud gāk kami. ⁸Dari ko ngawon, lassa sulig dahakka na ga kami pag lay jaꞌ katoonan kami yaꞌ bay kuhi maglumba pangando bi ni Papuꞌ Isa.

⁹Tud mehe meꞌ kami magsuku pa Tuhan sabapan bi. Ilu na Tuhan pakale-kale, biddaꞌ na situ ehe kagakan kami ni kadarihan bi. ¹⁰Dari sangom-llaw na situ tiniggohan meꞌ kami maku duwaa pa Tuhan. Kamura-murahan nduwan na kami meꞌ na sitammu ka kaam pabalik. Batan kainagon kami luu na kami nnaa muwansangan kaam mari magsasōng na pin hallot pangando bi. ¹¹Kamura-murahan pinatakka du kami pilu meꞌ Mmaꞌ tabi Tuhan ka Papuꞌ tabi si Isa. ¹²Maka kamura-murahan pinabasag na pin meꞌ Papuꞌ aseꞌ bi ni pagkahi bi sukuꞌ si Isa sampay ni jama mimon meꞌ karuha basag aseꞌ kami ningkaam. ¹³Meꞌ looy ilay, tattap na pin kasutsian bi maka yaꞌ luu sutsutan njataꞌ bi ni pag-awpan Mmaꞌ tabi Tuhan pag beleng Papuꞌ tabi si Isa ka siga malaikat na.(3.13) Ni ayat tuu, meꞌ kasohean ngahati “siga malaikat na” yana “siga sukuꞌ na sutsiꞌ.” Kon meꞌ looy sabap ni pallun Greek dari du sikaduwa.

Kawul-piil ma sikatuwaꞌ ka siga sukuꞌ Papuꞌ Isa

¹Na siga danganakan, kaam ina ndang lay na toan kami pasal kawul-piil ma kasulut ni Tuhan, sampay lay na du bean bi. Na meꞌ kitabi itu saliꞌ-saliꞌ na tibuuk ka Papuꞌ Isa, junjung kami na ningkaam, duhunan bi lagi. ²Yaꞌ na du sina kam awam ni bay tōꞌ kami ningkaam, yana tōꞌ ma bay pasampay kami ni kapatut Papuꞌ tabi si Isa.

³Kahandak Tuhan ina subay kitabi sutsiꞌ. Sangkon bong kinawnan jina, basta palawak kam. ⁴Subay kam saliꞌ-saliꞌ njawom iman ka ngilagan hāl meꞌ naa. Subay bogbogan tabi kasutsian tabi. Maka daa kitabi buwat oy maka oy na ma kadiyoꞌ ni awon tabi. ⁵Daa na kam mmeꞌ meꞌ uwahan jama ma yaꞌ toon Tuhan, ma nganduwan jaꞌ napsu baran da sampay man da na magkamuklahan. ⁶Daa kam buwat dusa ni siga pagkahi bi, labi na hāl jina. Saꞌ ba, ndang lay na kam bandaan kami, soysoy ina buwat meꞌ naa, mastiꞌ pinidjalaꞌ jaꞌ meꞌ Tuhan.

⁷Kitabi ilay bay lliyun meꞌ Tuhan pa jawom okoman na supaya kitabi mōꞌ kawul-piil sutsiꞌ, saꞌ ga buwat kalalamaan. ⁸Na bong luu kam nnaa nuwak tōꞌ tuu siꞌ pasal kasutsian, saꞌ ga silay tōꞌ manusiyaꞌ tuwak bi, arapun iya tuwak bi Tuhan mismu, batan iya bay ngandean Rū Sutsiꞌ ningkitabi supaya kitabi sutsiꞌ.

⁹Na ni hāl meꞌ bi maasean siga danganakan bi sukuꞌ si Isa, san yaꞌ na patabeꞌ kami ni suwat tuu. Ndang-ndang lay na du kam tinoan meꞌ Tuhan sikaaseꞌ-kaaseꞌ. ¹⁰Boꞌ tumatandaꞌ du, batan maaseꞌ na du sina kam ni mimon danganakan bi ni sikaliput Masidunya. Sugaꞌ siga danganakan, junjung kami na ningkaam, duhunan bi lagi.

¹¹Sarī man naa, pagbuli-bulihan bi mogbogan kasalassayan ka pagkahi bi manusiyaꞌ. Daa kam hangat nganjagahan kaadaan jama. Maka meꞌ bay tugun kami na maruhuꞌ, subay kam ngusahān dī bi sikamimon. ¹²Dari bong siꞌ tu bean bi jaꞌ palbiatan tuu siꞌ, yaꞌ luu meꞌ bi diyoꞌ ni mata jama ma yaꞌ pitsayaꞌ ni si Isa. Maka san kam yaꞌ na ngaholat binalanjaan meꞌ jama.

Pahati pasal sukuꞌ si Isa ma lay na matoy

¹³Siga danganakan, doman kami mahati ningkaam pasal siga pagkahi tabi sukuꞌ si Isa ma lay na matoy. Kon kami mahati, taggahaꞌ kalanduꞌ na baw kam susa meꞌ karuha siga jama ma saꞌ sukuꞌ si Isa bila sila kapatoyan. Meꞌ sila ilay, kon da susa, batan yaꞌ luu kaayaran hinolat meꞌ da ni ahirat. ¹⁴Boꞌ ningkitabi itu, luu holat tabi, batan lay na kitabi mindoga ni bay kadarihan si Isa. Lay jaꞌ siꞌ ya matoy, lay du ya llum pabalik. Dari manganna na kitabi, pagka si Isa bay pinakallum meꞌ Tuhan, malaingkan siga sukuꞌ na pun ma lay na matoy, mastiꞌ pinakallum du, boꞌ da binoo meꞌ Tuhan pa mman si Isa.

^15-16Batnaa pasampay ku na ningkaam umanat bay pinalahil meꞌ Papuꞌ Isa ningkami pasal katakka na bbos-bbos. Meꞌ tuu situ hantang na: Duwai ya sina mintu man sulgaꞌ sambayan na ngahowapan panohoan. Maka luu gi sina takale suwara disu anakkuraꞌ malaikat ngingan sampay luu du halling tabuliꞌ Tuhan tiniyup. Sugaꞌ kitabi ma masi llum ni masa looy mintu yaꞌ dari paruhuꞌ pilay nampang Papuꞌ Isa. Subay lay na doꞌ mintu duhuꞌ pinakallum siga pagkahi tabi sukuꞌ si Isa ma lay na matoy. ¹⁷Pag-anu, boꞌ kitabi ma masi llum haboy-haboy na ka sila inangkat pa jawom tayiꞌ baliyu nampang iya ni antalaan. Dari labba mandooy ilay mintu, dambuwaꞌ na kitabi ka iya saumu-umu. ¹⁸Na ni bay bitsala ku ilay siꞌ, inaa na pakoyun bi man bi sipaintom-paintom mari kagamgaman pamiki bi saliꞌ-saliꞌ.

Sukuꞌ si Isa subay saddiya ni katakka na

¹Na siga danganakan, ni kapasal llaw atawa masa ni katakka Papuꞌ, san situ kami yaꞌ na nuwatan kaam. ²Batan katoonan bi na du, llaw katakka na ina mintu yaꞌ tatunaꞌ. Yana meꞌ katakka sugaru sangom yaꞌ kinatoonan bong sumilan, damikiyan, katakka Papuꞌ meꞌ looy du. ³Ni masa looy ilay mintu, meka sina kapahalling sannang jaꞌ lahat ka yaꞌ luu piligru. Sugaꞌ sakayi da ina mintu kasayu, katakkahan na sila balaꞌ ma yaꞌ na katangkisan. Sibuꞌ du sina mintu kahalan da ka danda battong. Sakayi na kasayu, paddi na battong na, boꞌ yaꞌ na tatangkisan na.

⁴Boꞌ kaam baw ina, siga danganakan ku, yaꞌ na kam awam meꞌ saparati jama bagagap njawom lindom. Sangkon yaꞌ du sina mintu kam kakuratan ni katakka llaw looy meꞌ hantang jama takurat meꞌ sugaru. ⁵Meꞌ kaam ina sukuꞌ si Isa, lay na pinadantaan pamiki bi. Sangkon pataꞌ kam ginalla siga sukuꞌ dantaꞌ atawa siga sukuꞌ llaw. Yaꞌ na kam meꞌ sagannap ma yaꞌ toon Tuhan ma pataꞌ ginalla sukuꞌ lindom atawa sukuꞌ sangom. ^6-8Batan jama sukuꞌ sangom ina, katanaman da wā tuli atawa maglangohan. Sangkon pagka kitabi siga sukuꞌ llaw, daa na kitabi ngakig sagannap ma meꞌ sapantun wā tuli. Arapun subay kitabi iyakin, wā saddiya buwat kahandak Tuhan. Maka subay kitabi papatong.

Kitabi itu meꞌ karuha sundalu njawom bonoꞌ mehe. Tiyap-tiyap sundalu langkap, luu ampi bassi na para dakan na ka saruk bassi para kōk na mari ya yaꞌ binasa. Kuwan kitabi baw itu, ilooy ya tabilang ampi dakan tabi, yana pangando tabi pa Tuhan ka aseꞌ tabi niiya. Maka saruk bassi tabi yana holat tabi pa Tuhan majatu kasalamatan tabi. ⁹Boꞌ pataꞌ du silay ningkitabi ngaholat meꞌ looy batan ndang garaꞌ Tuhan ina nalamat kitabi. Inaa sina kon na bay mapitu Papuꞌ tabi si Isa Almasi pa junyaꞌ. Saꞌ kahandak na ngalabuan kitabi mulkaꞌ. ¹⁰Si Isa ilay, atas na bay nongan umu na kalnaꞌ kitabi supaya pag beleng na, kapagdambuwaꞌ na kitabi ka iya saumu-umu, labba man siga sukuꞌ na ma masi llum sampay sagannap ma lay na matoy. ¹¹Sangkon sipaintom-paintom kam mari kagamgaman pamiki bi saliꞌ-saliꞌ. Maka patagguhun bi iman pagkahi bi meꞌ ndang kabiyasahan bi.

Katapusan bitsala si Pol

¹²Sarī man naa, siga danganakan, junjung kami na ningkaam, magmaltabat kam ni siga pa-mmean bi sukuꞌ si Isa. Sila ina, mehe meꞌ da maghulas-sangsāꞌ noan kaam ka maintoman kaam. ¹³Tud subay sila pag-aratan bi maka kaasean bi banahan sabapan pabuwatan da ngayaran kaam. Maka pagbuli-bulihan bi meꞌ bi mogbogan kasalassayan bi dambaanan.

¹⁴Maka siga danganakan, tugun kami na ningkaam, sohoun bi na buwat sagannap ma hūk nnaa. Kuwan siga pagkahi bi ma hanggaw, buwansangan bi mari pahallot pangando da ni Papuꞌ. Sagannap ni baanan bi ma yaꞌ gi taggu iman da, tabangan bi na pin. Maka subay tahaꞌ pasensiya bi ni sikamimon. ¹⁵Luu-luu buwat maat ningkaam, daa subay na pin kam mawos. Gam pin, buwat na pin kam mahap ninsila sampay ni mimon manusiyaꞌ, mmeꞌ, yaꞌ mmeꞌ ni Papuꞌ Isa.

¹⁶Ni mimon kahalan bi, pagakun bi atay bi. ¹⁷Wā tiggohan bi maku duwaa pa Tuhan. ¹⁸Maka mahap-maat kahalan bi, daa dohongan bi meꞌ bi muwanan Tuhan pagsukuhan. Batan ndang inaa sina kahandak Tuhan ningkitabi ma tibuuk na ka si Isa Almasi.

¹⁹Siga danganakan, daa saggaun bi pabuwatan Rū Sutsiꞌ. ²⁰Bila luu danganakan bi māꞌ luu umanat karomanan na pinasampay lakka man Rū Sutsiꞌ, padarihun bi na ya. Daa ya sohoun bi diyam-diyam. ²¹Sugaꞌ pus na masampay, pindogahan bi doꞌ bong pataꞌ hinasi umanat na atawa niyaꞌ.(5.21) Meꞌ da mindoga, bista da doꞌ paayad bong sikatuwaꞌ bitsala na ka tōꞌ si Isa ka kabanahan njawom kitab. Bong hati bistahan bi tud mattan lakka man Rū Sutsiꞌ, malaingkan kannahun bi; bong niyaꞌ, san daa na. ²²Maka ilagan bi na mimon kalaatan.

²³Kamura-murahan tinabangan du kam meꞌ Tuhan, yana poonan kasannangan, supaya sutsiꞌ na banahan mimon kawul-piil bi. Kamura-murahan inayaran na pin meꞌ na nyawa bi, pamiki bi, sampay baran bi supaya yaꞌ luu sutsutan njataꞌ bi pag beleng Papuꞌ tabi si Isa Almasi. ²⁴Tuhan ina kanaalla. Dari pagka iya na mismu bay ngaliyun kaam pa jawom okoman na, mastiꞌ kinabbul jaꞌ sina meꞌ na mimon ma bay paku ku siꞌ para ningkaam.

²⁵Siga danganakan, kaam pun, pakuhan bi du kami duwaa.

²⁶Maka pasampayun bi doꞌ salam duwaa kami ka aseꞌ kami ni mimon danganakan kami nnaa.

²⁷Maka tugun ku ningkaam ni kapatut Papuꞌ Isa, amay-amay batsahun bi sa suwat tuu ni siga danganakan tabi sikamimon nnaa.

²⁸Dambuli man inaa, kamura-murahan binuwanan na pin kam barakat meꞌ Papuꞌ tabi si Isa Almasi.

Wassalam