1 Pitel

Suwat Sibuwa Lakka man si Pitel

Pahati

Si Pitel ilay yana disu ni sikasapu-duwa mulit bay pineneꞌ meꞌ si Isa Almasi binuwat siga rasul na. Iya disu mulit ma bay kasakup ni mimon kahalan si Isa Almasi labba man waktu si Isa bay nagnaꞌ masaplag pasal pamarinta Tuhan ngabut sampay na inangkat pa sulgaꞌ. Bong batsa bi kitab Salsila siga Rasul si Isa Almasi juran disu pa juran sapu-lima, meka bay sinabbut pasal si Pitel ndooy.

Si Pitel ilay disu pa-mmean sukuꞌ si Isa ndooy ni Jerusalem. Basag ya noan jama kabanahan pasal si Isa sampay bay na ga ya pingkaꞌ tajīl sabap meꞌ na masaplag.

Suwat tuu pinokonan meꞌ si Pitel pa mman siga pagkahi na sukuꞌ si Isa ni lima probins ndooy ni lahat mehe ma inawnan Turkey ni batnaa. Maksud na bay nuwat man na magamgaman atay da ka mataggu iman da, batan daran sila bininsanaꞌ ka nilaugan sabap meꞌ da pitsayaꞌ ni si Isa.

Ituu bay sinuwatan meꞌ si Pitel luu na ga tallumpuꞌ-duwan taun paddus si Isa Almasi bay inangkat pa sulgaꞌ.

1 PITEL

¹Ituu itu aku, si Pitel, disu rasul si Isa Almasi. Itu suwat ku pa mman bi ma bay pineneꞌ meꞌ Tuhan, yana kaam ma sampi ni junyaꞌ tuu magkanatan nnaa ni Pontus, ni Galatiya, ni Kapadosiya, ni Asiya sampay ni Bitiniya. ²Halloman tabi yaꞌ gi bay lahil pa junyaꞌ, ndang katoonan Tuhan na pitsayaꞌ kitabi ni si Isa bbos-bbos. Dari man gantaan Tuhan, lay na kitabi sinutsiꞌ meꞌ Rū na. Maksud na supaya kitabi ngasip ni si Isa Almasi, maka supaya puwas na dusa tabi sabapan lahaꞌ si Isa bay pinaduwai kalnaꞌ kitabi.

Kamura-murahan lipat man lipat na pin kasannangan ningkaam ka barakat man Tuhan.

³Pudji tabi Tuhan, Mmaꞌ Papuꞌ tabi si Isa Almasi. Ni kabasag timbang na, lay na ya bay muwanan kitabi kaallum bahau. Lay na kapakitabi kaallum bahau sabap meꞌ tabi tabeꞌ ni Almasi pinakallum pabalik. Sangkon tatantu tabi na ⁴koleꞌ kitabi mimon ma ndang luu na bay hinalliꞌ meꞌ Tuhan ni sulgaꞌ para ni siga sukuꞌ na. Boꞌ ilooy na silay tabilang pusaka ma yaꞌ luu masa na, yaꞌ luu salla na, sampay yaꞌ kuhi baluba. ⁵Maka man sabapan pangando bi ni si Isa, agpangan Tuhan na pin sina kam ni kaehe kawasa na ngkod-ngkoran yaꞌ gi bay takoleꞌ bi kasalamatan ma song pinalahil ni llaw dambuli.

⁶Dari sabap meꞌ looy, yaꞌ du lakka kagakan bi minsan kam tuwaꞌ kamalasahiyan ka jinisan kabinsanaan samantalaꞌ ntuu ni junyaꞌ. ⁷Kamalasahiyan meꞌ looy ilay nuwayan pangando bi ni si Isa bong bana atawa niyaꞌ. Pangando bi ina meꞌ karuha mmas. Sugaꞌ saehe-ehe hagaꞌ mmas ma luu gi ngkoran na, mas mehe gi hagaꞌ pangando bi. Yana meꞌ mmas subay doꞌ bay pingkaꞌ njawom api man ngalakkahan sakot na mari porol maka hagaan, damikiyan, subay du kam lumingkaꞌ njawom kamalasahiyan mari tumatandaꞌ na porol pangando bi. Dari bong ina mintu bana-bana du pangando bi, mastiꞌ koleꞌ jaꞌ sina kam sanglit ka kabantugan mehe pag beleng si Isa Almasi. ⁸Minsan ina kam yaꞌ bay pingkaꞌ ngita si Isa ngabut sampay batnaa, maaseꞌ du kam niiya maka tattap du pangando bi niiya. Sangkon pannoꞌ atay bi meꞌ kagakan saꞌ alang-alang, ⁹batan magsasōng na pin meꞌ bi pinaddusan man bay arat-tabiat bi buwat dusa. Mimon ituu siꞌ yana toklas pangando bi ni si Isa Almasi.

¹⁰Ni kapasal aseꞌ Tuhan nalamat kitabi, ndang bay silay tinunaꞌ meꞌ kanabi-nabihan. Sugaꞌ yaꞌ gi bay tumampak banahan ninsila. Sangkon wā sila papiha-piha bong oy kamaatunan bay tunaꞌ da. ¹¹Bana na, ndang bay silay tahati da luu tukang nalamat lakka man Tuhan takka bbos-bbos. Sugaꞌ papiha-piha na pin baw sila bong soy ilooy ma bay tinunaꞌ meꞌ da maka sumilan ya lahil. Bay baw pinalahil ninsila meꞌ Rū Almasi,(1.11) Rū Almasi inawnan ni ayat tuu yana Rū Sutsiꞌ ma inawnan du Rū Tuhan atawa Rū si Isa. pag pōꞌ tukang nalamat looy bbos-bbos, duhuꞌ doꞌ ya lumingkaꞌ njawom kabinsanaan boꞌ na koleꞌ kabantugan mehe. ¹²Boꞌ lay gi pinalahil meꞌ Tuhan ni kanabi-nabihan siga tunaꞌ da yaꞌ gi binakbul ni jaman da. Sakayi da binakbul, noy ni sinōng na, yana ni angkat-angkatan tabi na situ batnaa. Batan bohoꞌ luu bay pinapitu pa junyaꞌ tukang nalamat looy siꞌ, yana Almasi. Pag-anu, luu na umanat mahap pasal iya bay pinasaplag ningkaam meꞌ siga jama ma ginaosan meꞌ Rū Sutsiꞌ, yana Rū Tuhan bay pinapitu man sulgaꞌ. Siga pakaradjaan ma bay sabbut ku siꞌ, minsan siga malaikat magkainagon du kahati banahan.

¹³Dari pagka lay na kam sinalamat leꞌ Tuhan, patattogun bi na pamiki bi makutuꞌ kahandak na, maka agakun bi dī bi. Maka daa kam jamu ngaholat ni supaat ma ndean kaam pag beleng si Isa Almasi. ¹⁴Meꞌ kaam ina anak Tuhan na ma ngasip niiya, daa na padarahun bi bay kadarihan bi maruhuꞌ. Waktu looy ilay awam lagi kam pasal Tuhan. Sangkon lay na jaꞌ duwan bi napsu bi ma maat. ¹⁵Sugaꞌ batnaa, yana meꞌ Tuhan ma bay ngaliyun kaam sutsiꞌ, subay du kam sutsiꞌ ni mimon tangge-tingkōꞌ bi. ¹⁶Batan luu silay bay sinuwatan jawom kitab, ilooy ma yuk Tuhan, “Aku itu sutsiꞌ. Sangkon subay meꞌ aku du kam sutsiꞌ.”(1.16) Kitab Tawrat, Libitikus 11.44-45; 19.2; 20.7.

¹⁷Na san ina kam magmmaꞌ na ni Tuhan, ingatun bi masi du sina ya tukang ngahukum. Iya du sina mintu nungbasan manusiyaꞌ saliꞌ-saliꞌ magbēꞌ ka pabuwatan da mahap-maat. Yaꞌ ya minig jama. Sangkon, halloman tabi magsampihan ni junyaꞌ tuu, subay luu tawu tabi pa Tuhan. ¹⁸Intomun bi doꞌ bong pooy ehe gastus man Tuhan bay maddusan kaam man arat-tabiat bi maruhuꞌ. Yaꞌ silay luu sōng na arat-tabiat bi maruhuꞌ ma bay labuꞌ pa kaam man kabboꞌ-bboan bi. Kahapan, lay na kam pinaddusan man arat-tabiat looy. Sugaꞌ saꞌ ga silay mmas atawa pilak porol ma yaꞌ natas saumu bay man maddusan kaam. ¹⁹Arapun gastus bay man maddusan kaam ilay yana lahaꞌ Almasi bay pinaduwai, boꞌ hagaan saꞌ alang-alang. Man maruhuꞌ lagi ilay ndang luu na sipat ni lahaꞌ na pinaduwai song hallom, yana lahaꞌ bili-bili ma bay kinulban meꞌ imam taun pa taun sabapan dusa. Yana meꞌ bili-bili looy yaꞌ dari luu salla na atawa tamak na, damikiyan Almasi pun yaꞌ du luu salla na. Hati na, yaꞌ luu dusa na.

²⁰Halloman junyaꞌ yaꞌ gi bay pinapayak, ndang lay na bay ginantaꞌ meꞌ Tuhan Almasi maddusan kitabi man komkoman Ibilis. Sugaꞌ noy ni timpu batnaa na, ni ahil jaman, boꞌ luu na Almasi bay pinalahil meꞌ Tuhan ningkaam. ²¹Dari sabapan pabuwatan Almasi, pitsayaꞌ na kam pa Tuhan ma bay makallum Almasi pabalik sampay lay muwanan iya kabantugan mehe. Dari tattog na pangando bi pa Tuhan maka luu na pag-asa bi koleꞌ mimon ma bay janjiꞌ Tuhan ni sukuꞌ na.

²²Na pagka lay na du kam mmeꞌ ni tōꞌ sabanna, pasutsiꞌ na pin sina pangatayan bi. Sangkon pakutuun bi na meꞌ bi sikaaseꞌ-kaaseꞌ. Maka subay hilas aseꞌ bi meꞌ karuha jama magdanganakan. ²³Batan sibuꞌ du sina kam ka lay na pinamaddihan pabalik. Sugaꞌ kaallum bi ina ma bahau saꞌ na meꞌ kaallum bi sibuwa ma lakka man induꞌ-mmaꞌ bi ma kuhi gi matoy. Arapun kaallum bi ina ma bahau lakka man Tuhan sabanna ma llum saumu-umu. Danan bi ilay bay koleꞌ kaallum bahau sabap meꞌ bi pitsayaꞌ ni palman Tuhan. Batan palman na ina muwan kaallum bahau maka yaꞌ kuhi baluba saumu-umu. ²⁴Meꞌ bay sinuwatan njawom kitab, yuk na,

“Kaallum manusiyaꞌ sandaꞌ-sandaꞌ jaꞌ meꞌ karuha parang jaꞌ ngalayu. Damikiyan, kabantugan manusiyaꞌ pun sandaꞌ-sandaꞌ jaꞌ du meꞌ karuha sumping ma ngalatak.

²⁵Sugaꞌ bong palman Tuhan, natas saumu-umu.”

Boꞌ na, palman ina yana umanat mahap ma bay pinasaplag ningkaam.

¹Na pagka luu na kaallum bi bahau, timanan bi na mimon pabuwatan maat maka mimon dustaꞌ. Daa dan jinis bitsala bi, boꞌ sarī na baw pabuwat bi. Daa na kam dangkiꞌ atawa mitnahan pagkahi bi manusiyaꞌ. ^2-3Pagka lay na takissa bi kaayaran Tuhan, kannahun bi na palman na. Yana meꞌ anak-anak bahau pinamaddihan magkainagon ni boheꞌ duruꞌ, kaam pun subay du meꞌ naa kainagon bi ni palman Tuhan. Batan palman Tuhan ina balanjaꞌ pulnaꞌ para ni nyawa bi. Sangkon kannahun bi na supaya magsasōng na pin meꞌ bi ngikut arat-tabiat Tuhan ngabut sampay magjatu na kasalamatan bi.

Si Isa meꞌ karuha pananggehan lumaꞌ Tuhan

^4-5Na kitabi itu ma pitsayaꞌ ni si Isa ginalla lumaꞌ Tuhan sabap luu na Rū Tuhan bay pinaasok pa jawom atay tabi. Dari ko ngawon, kitabi itu meꞌ sapantun batu llum man Tuhan buwat lumaꞌ na. Kuwan si Isa, meꞌ sapantun batu lambu ma llum man lumaꞌ Tuhan pinatangge mari pagon. Sugaꞌ minsan ya hagaan saꞌ alang-alang sampay bay pineneꞌ meꞌ Tuhan, bay gi du ya tinuwak meꞌ manusiyaꞌ. Boꞌ kitabi baw itu, lay na kitabi nibuuk dī tabi ka iya. Pag toklas na, lay na kitabi dari siga imam sutsiꞌ. Dari yana meꞌ siga imam maruhuꞌ nongan kulban pa Tuhan, kitabi pun luu du songan tabi pa Tuhan, yana dī tabi buwat kahandak na.(2.4-5) Ndaun Rom 12.1. Boꞌ hinasi jaꞌ kitabi meꞌ Tuhan sabap lay na kitabi sinutsiꞌ meꞌ si Isa Almasi.

⁶Na bitsala ku ilay siꞌ pasal si Isa magtuntun du ka palman Tuhan njawom kitab, ilooy ma yuk na,

“Ndaun bi sa. Luu sina mintu batu lambu ma hagaan banahan bay peneꞌ ku binuwat pananggehan lumaꞌ ku. Nnaꞌ ku ya ndooy ni Zayon. Soysoy ina pitsayaꞌ niiya, yaꞌ luu masa na kaap-apan.”(2.6) Kitab Nabi Isaya 28.16. Zayon yana gallahan ni daira Jerusalem.

⁷Sangkon na ina, bong inawnan Almasi, mastiꞌ hagaan banahan ningkitabi ma pitsayaꞌ niiya. Boꞌ sagannap ma yaꞌ pitsayaꞌ, niyaꞌ san ya gunahan ninsila. Subay siꞌ mamintang doꞌ sila ni halling njawom kitab, ilooy ma yuk na,

“Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon.”(2.7) Kitab Jabul 118.22; Lukas 20.17.

⁸Maka luu gi suwat njawom kitab pasal Almasi, ilooy ma yuk na,

“Iya na sina batu man jama sumantuk sampay habbaꞌ.”(2.8) Kitab Nabi Isaya 8.14.

Na ngkon da ilay binilang sumantuk niiya sabap yaꞌ sila kuhi pitsayaꞌ ni umanat mahap pasal iya. Mingkan man maruhuꞌ lagi, ndang ilooy na bay ginantaꞌ ni soysoy yaꞌ pitsayaꞌ.

⁹Boꞌ kaam ina ma pitsayaꞌ ni Almasi, lay na kam pineneꞌ meꞌ Tuhan binuwat baanan siga imam ka sultan njawman pamarinta na. Boꞌ lay gi kam pabuwat Tuhan bangsa sutsiꞌ(2.9) Inawnan sila bangsa sutsiꞌ sabap puwas na dusa da man sabapan lahaꞌ Papuꞌ Isa bay tumpa. ma inaku leꞌ na sukuꞌ na. Kahandak na masaplag na kam kaayaran na. Batan lay na kam pinōꞌ meꞌ na man jawom kalindoman, sampay lay na kam lliyun pa jawom karantaan na ma yaꞌ luu sibuꞌ sabanding na. ¹⁰Sibuwa ilay, saꞌ gi kam sukuꞌ Tuhan, pag batnaa sukuꞌ na na kam. Maka sibuwa ilay, yaꞌ gi bay takissa bi aseꞌ Tuhan, pag batnaa lai na.

¹¹Siga kakasi ku, junyaꞌ tuu itu saꞌ lahat tabi sabanna. Sampi jaꞌ kitabi ntuu. Sangkon junjung ku na ningkaam, daa na duwanun bi napsu maat ma pinaabak meꞌ jama ma nabiat mandang hāl junyaꞌ. Batan siga napsu meꞌ looy ilay, meꞌ karuha banta bi ma niksaꞌ nyawa bi. ¹²Tamūd ina, sagannap ma yaꞌ pitsayaꞌ ni si Isa mitsala kaam pa kalaatan san yaꞌ luu dusa bi. Sangkon, amay-amay subay kam mogbogan kawul-piil ayad ni pag-awpan da. Kawu-kawu bukaꞌ na puad da pitsayaꞌ hangat sila ngita hāp tangge-tingkōꞌ bi. Dari pag taabut masa man Tuhan marantaan pamiki da, pudji da na du sina ya.

Sukuꞌ Papuꞌ Isa subay maglillaꞌ ni siga pa-mmean parinta

¹³Na ni kapasal mimon jama ma marintahan kaam, subay kam maglillaꞌ ninsila supaya kam kaboo kabantugan ni Papuꞌ Isa. Labba man sultan ma langkaw banahan kapatut na ¹⁴pa siga gubnul sampay pa siga saraꞌ ndiyoan da, subay sila inasip meꞌ bi. Ndang-ndang sila ilay bay binuwanan kapatut para kaayaran du ni lahat supaya tapidjalaꞌ da sagannap ma buwat maat, maka supaya tabuwanan da kabantugan sagannap ma buwat mahap. ¹⁵Kainagon Tuhan ina, sabapan kaayaran bi, tapampan bi na behe jama ma kulang akka mitsala kaam pa kalaatan ni kaawam da. ¹⁶Kaam ina, lay na kam pinaddusan man mulkaꞌ Tuhan. Sugaꞌ daa jaꞌ buwatun bi kasumunsayaan bi subay ga katarangan man bi buwat kalaatan. Gam pin, bogbogan bi arat-tabiat ma ndang hinolat ni siga ata Tuhan. ¹⁷Mag-arat kam ni mimon manusiyaꞌ maka maaseꞌ kam ni pagkahi bi ma pitsayaꞌ ni si Isa Almasi. Subay kam tawu pa Tuhan sampay magmaltabat ni panghuluꞌ ni lahat bi.

Palbiatan si Pitel ni siga ata

¹⁸Kuwan kaam ma ata, mahap-maat meꞌ siga papuꞌ bi ka kaam, bong lammaꞌ pangatayan da atawa bangis, lillaꞌ jaꞌ kam ninsila. Maka magmaltabat kam ninsila. ^19-20Meꞌ naa ina nulut kam ni kahandak Tuhan. Na bong sawpama luu laat bay pabuwat bi man bi pataꞌ pinidjalaꞌ, boꞌ tinatasan na jaꞌ meꞌ bi, daa na kam ngaholat sanglit man Tuhan. Sugaꞌ bong baw kam ina buwat jaꞌ kaayaran, boꞌ bi bininsanaꞌ lagi, bong ina lillaꞌ na jaꞌ kam sabap pasando jaꞌ kam pa Tuhan, ilooy ya nulut ni kahandak na. ²¹Batan lay na kam bay lliyun meꞌ Tuhan pa jawom okoman na supaya kam buwat kaayaran san gi man bi bininsanaꞌ. Sangkon tusun bi na limpaꞌ Almasi ma bay natasan kabinsanaan kalnaꞌ kitabi. ²²Bistahun bi doꞌ, yaꞌ san ya bay buwat dusa samasakali. Dustaꞌ pun, yaꞌ du luu bay pōꞌ man jawom behe na san sakayi. ²³San ya bay pinadiyoꞌ, yaꞌ du ya bay ngumbang. San ya bay bininsanaꞌ, yaꞌ du ya bay nanggup mawos. Gam pin, lay jaꞌ suhuran na pa Tuhan, yana huwis ma patingkat intong. ²⁴Boꞌ lay gi paglillaꞌ na baran na llansang taꞌ tehang bong pin tatanggung na jaꞌ dusa tabi. Kon na buwat meꞌ looy supaya patagong na kitabi buwat dusa boꞌ tabi makutuꞌ meꞌ buwat kaintongan. Dari meꞌ halling njawom kitab, “Man sabapan siga bakat bisa ni baran na, kaulian na kitabi.”(2.24) Kitab Nabi Isaya 53.5.

²⁵Maruhuꞌ, sibuꞌ du karuha bi ka siga bili-bili magsiꞌ. Boꞌ batnaa, lay na kam pabeleng pa mman tukang ngipat kaam, yana Almasi ma ngayaran nyawa bi.

Palbiatan ni siga karandahan ma llahan

¹Na kuwan kaam karandahan, subay kam maglillaꞌ ni lla bi. Meꞌ naa ina, san sawpama lla bi nuwak umanat mahap pasal si Isa, balangkali taboo bi na sila pitsayaꞌ sabapan hāp arat-tabiat bi. Minsan ina kam yaꞌ na mitsalahan sila, kawu-kawu pitsayaꞌ na du sila ni si Isa ²pag takita da na hāp arat bi maka ehe maltabat bi pa Tuhan. ³Daa subay na pin isu-isu lingkat bi ni poan pakutuꞌ bi meꞌ kasohean ma wā magdanda-danda ka matuk pamakoy hagaan sampay magmmas-mmas. ⁴Arapun iya pakutuun bi, meꞌ bi malingkat njawom atay bi meꞌ sapantun magpadiyoꞌ sampay pahatu-hatu. Lingkat meꞌ naa ina yaꞌ na kuhi baluba. Boꞌ na, hagaan lagi banahan pa Tuhan. ⁵Maka inaa na sina arat-tabiat bay pinakutuꞌ meꞌ karandahan ma mangando pa Tuhan mattoꞌ. Meꞌ da bay malingkat dī da, lay sila maglillaꞌ ni lla da. ⁶Disu danda meꞌ looy ilay yana bay jaman Sitti Sara. Saꞌ ba, ngasip jaꞌ ya ni lla na, yana Nabi Ibrahim, sampay bay gi bilang na subay ga papuꞌ na? Na kaam karandahan ni batnaa, bong kam pauru ni hāp arat-tabiat Sitti Sara sampay yaꞌ kam kuhi takawum leꞌ tawu, malaingkan binilang na sina kam siga anak Sitti Sara.

⁷Na bitsala tuu ma pasunuꞌ para ningkaam kalallahan. Subay kam pandoy mogbogan kasalassayan ka nda bi. Maka isbatun bi meꞌ bi nabangan sila batan yaꞌ sibuꞌ anggawtaꞌ da ka lalla. Magmaltabat kam ninsila, batan sibuꞌ-sibuꞌ du kam bay kapusakahan ladjikiꞌ man Tuhan, yana kasampulnaan nyawa saumu-umu. Bong ina yaꞌ mahap meꞌ bi buwat nda bi, malaingkan yaꞌ du kinabbul duwaa bi meꞌ Tuhan.

Siga sukuꞌ si Isa subay sikaaseꞌ-kaaseꞌ

⁸Na dambuli man inaa, meꞌ kaam sukuꞌ si Isa sikamimon, subay kam dambuwaꞌ atay maka sikaddoꞌ-kaddoꞌ parasahan. Subay kam sikaaseꞌ-kaaseꞌ meꞌ karuha jama magdanganakan. Sipanimbang-panimbang kam maka subay diyoꞌ pangatayan bi saliꞌ-saliꞌ. ⁹Sagannap ma buwat maat ningkaam, daa na tungbasan bi ka maat. Damikiyan, bong luu madiyoꞌ kaam, san daa na umbangan bi. Gam pin buwat gi kam kaayaran ninsila, batan ndang inaa sina kahandak Tuhan ningkaam. Bong siꞌ inaa bean tabi, mastiꞌ sinupaatan jaꞌ kitabi meꞌ Tuhan. ¹⁰Meꞌ halling sambat njawom kitab,

“Soysoy doman kaallum mahap ka doman njawom kagakan, subay niyaꞌ mitsala pagkahi na pa kalaatan maka subay ya yaꞌ ngandustaꞌ.

¹¹Subay timanan na mimon kalaatan supaya isu-isu kaayaran pabuwat na. Maka subay pagbuli-bulihan na miha kasalassayan ka jama.

¹²Batan Tuhan ina ngayaran sagannap ma intong maka wā ya saddiya pakale ni duwaa da. Sugaꞌ bong kinawnan sagannap ma buwat maat, kinuntra meꞌ na.”(3.12) Kitab Jabul 34.12-16.

¹³Na bong ina kam tigiꞌ buwat mahap, jalangan sina jama makaat kaam. ¹⁴Sugaꞌ sawpama kam bay bininsanaꞌ sabap meꞌ bi paintong, mastiꞌ luu supaat Tuhan njataꞌ bi. Sangkon daa kam hanggaw atawa tawu ni manusiyaꞌ. ¹⁵Arapun ituu ya kannahun bi: Almasi yana Papuꞌ bi. Sangkon isbatun bi ya. Maka bila luu nilaw kaam bong oy kamumpaatan hinolat meꞌ bi taggahaꞌ ilu na kam mmeꞌ ni Almasi, subay kam ndang wā saddiya ka tampung ayad. ¹⁶Maka bila kam nampungan jama, subay bitsala hanunut-hanunut man bi magmaltabat ninsila. Maka ilagan bi buwat oy maka oy na ma nulang ni honaꞌ-honaꞌ bi. Meꞌ naa ina, bong luu bay mitsala kaam pa kalaatan, iyaꞌ jaꞌ sina sila pag takita da hāp tangge-tingkōꞌ bi njawman Papuꞌ Isa. ¹⁷Sangkon, bong hati ginantaꞌ meꞌ Tuhan subay kam ngalingkaan kabinsanaan, gam na sabap ni kaintong bi; daa jaꞌ sabap meꞌ bi bay buwat maat.

¹⁸Mamintang jaꞌ kam ni Almasi. San ya intong gi man intong, lay du ya bininsanaꞌ. Sampay lay na ga ya matoy sakayi labba du kalnaꞌ mimon baldusa pangkat-mamangkat. Lay na tanggung na mimon dusa tabi supaya kitabi mahap na pa Tuhan. Dari siꞌ, bay na pinapatoy jasad na, sugaꞌ lay na baw ya pinakallum ka jasad bahau ma yaꞌ na kuhi matoy. ¹⁹Sugaꞌ sasang jasad na masi matoy, kuwan Rū na bay pilay pa tahanan siga nyawa pinalisu. Ndooy siꞌ, lay ya masampay umanat ninsila. ²⁰Sila ilay siꞌ yana nyawa sagannap ma yaꞌ bay kuhi ngasip ni Tuhan ni jaman Nabi Nū buwat bahitlaꞌ. San tahaꞌ pasensiya Tuhan ngagad ga jama looy nawbat, yaꞌ du sila kuhi. Dari lay jaꞌ sila katis matoy leꞌ dunuk sampay lay na pinalisu nyawa da ni tahanan jama matoy. Ilooy du bay salamat wawuꞌ jama, yana ga Nabi Nū batan lay sila taꞌ bahitlaꞌ inangkat meꞌ boheꞌ dunuk.

²¹Kasalamatan da ilay ni boheꞌ dunuk looy mattoꞌ, tadalil tabi pa boheꞌ man tabi bay pinandi tandaꞌ tabi lay na salamat man hukuman Tuhan. Kitabi ilay bay pinandi, saꞌ ga pandihan man ngalakkahan lumut ni baran tabi. Arapun pandihan tabi ina yana sipat lay na kitabi maku ampun man Tuhan mari hayang na pamiki tabi. Boꞌ kasalamatan tabi itu mawjud na batan lay na pinakallum pabalik si Isa Almasi.

²²Na si Isa ilay, lay na inangkat pa sulgaꞌ sampay luu na ya ni bihing Tuhan huwin pa kawnan. Ndooy ilay, iya magbayaan mimon malaikat ka mimon ma ngantanan kawasa-kapatut mahap-maat.

Arat-tabiat sukuꞌ Papuꞌ Isa yaꞌ na sibuꞌ ka maruhuꞌ

¹Na pagka Almasi bay lumingkaꞌ njawom kabinsanaan jaman na ntuu ni junyaꞌ, subay du kam ngingat mastiꞌ luu jaꞌ du kabinsanaan takka pa jataꞌ bi. Sugaꞌ san ilay mintu meꞌ looy, pa kaayaran du ningkaam. Batan soysoy ina natas bininsanaꞌ kalnaꞌ si Isa, tumatandaꞌ lay na labbahan na tabiat na buwat dusa. ²Honaꞌ-honaꞌ na, ddong na ya nganduwan napsu na ma maat. Ilooy sa karomanan na sinulut yana kahandak Tuhan halloman na masi llum. ³Sangkon kuwan kaam, ddong na kam malātan waktu bi ngakig uwahan jama ma yaꞌ ngisbat Tuhan. Sila ina maabak jinisan kalaatan meꞌ sapantun magjina, maka nganduwan oy-oy napsu ma maat sampay maglangohan. Boꞌ mmeꞌ gi sila ni baanan danda ka lalla buwat kasabuhan. Maka luu gi sarī pabuwat da ma tagga pa Tuhan meꞌ sapantun numba siga tuhan-tuhan. ⁴Boꞌ jayip gi sila pag ndaꞌ da yaꞌ na kam mmeꞌ ninsila buwat kalaatan meꞌ looy siꞌ. Sangkon binitsala gi kam meꞌ da pa kalaatan. ⁵Sugaꞌ luu du sina mintu masa da tinanya pasal bay kadarihan da ni awpan Tuhan. Batan Tuhan ina tukang ngahukum mimon manusiyaꞌ llum-matoy pag taabut llaw dambuli.

⁶Na manusiyaꞌ ina sikamimon ndang bay ginantaꞌ matoy sabapan hukuman bay llabuꞌ ninsila. Dari sabapan dusa da, tiksaꞌ na nyawa da. Lipara luu na umanat mahap bay pinasaplag. Dari sagannap ma pitsayaꞌ, san sawpama lay na matoy jasad da, sampulnaꞌ du nyawa da saumu-umu njawom okoman Tuhan.

⁷Na katapusan junyaꞌ ina, yaꞌ na hallom. Sangkon paayarun bi na pamiki bi maka ilagan bi dī bi supaya yaꞌ na luu kasanggalang ningkaam maku duwaa pa Tuhan. ⁸Maka numbul satu isbatun bi meꞌ bi sikaaseꞌ-kaaseꞌ ni kahilas atay bi. Batan bong ina kam maasean siga pagkahi bi, mastiꞌ ampun bi jaꞌ sila san du pooy eka dusa da ningkaam. ⁹Bong luu pagkahi bi sukuꞌ si Isa pahās pa lumaꞌ bi, hulmatun bi. Daa kam magdubdub.

¹⁰Na meꞌ kaam ina lay na kabuwanan jinisan kapandoyan bilang ladjikiꞌ man Tuhan, pakoyun bi na. Subay kam kanaalla sitabang-tabang makoy kapandoyan bay dean Tuhan ningkaam. ¹¹Sawpama lay kam kaladjikian kapandoyan magnasihat, subay kam magnasihat du. Sugaꞌ subay kabanahan jaꞌ pōꞌ man behe bi meꞌ saparati Tuhan mismu mitsala. Maka kaam ma luu kapandoyan bi sarī, subay pakoyun bi man nabangan jama. Maka ingatun bi, mimon anggawtaꞌ man bi nabang lakka man Tuhan. Meꞌ naa ina, man tabang si Isa Almasi, mimon pabuwat bi kaboo kabantugan pa Tuhan. Pudji tabi ya sabap tud tawop ya magbayaꞌ saumu-umu! Amin.

Kabinsanaan njataꞌ sukuꞌ Papuꞌ Isa

¹²Siga kakasi ku, daa kam jayip ni kamalasahiyan ka kabinsanaan bisa tuwaꞌ njataꞌ bi ma nuwayan pangando bi. Maka daa bistahun bi ga jalang-jalang meꞌ naa. ¹³Gam na kam gāk sabap meꞌ bi bay tabeꞌ ni kabinsanaan bay lingkaan Almasi. Batan pag beleng na ina mintu sampay pinalahil na ehe kabantugan na, magdaruhun gi sina kagakan bi. ¹⁴Bila kam pinadiyoꞌ-diyoꞌ sabap meꞌ bi pitsayaꞌ ni Almasi, njawom supaat kam sabap luu na pin Rū Sangat Kawasa nabangan kaam, yana Rū Tuhan ma bay pinatannaꞌ ningkaam. ¹⁵Daa jaꞌ baw kon bi bininsanaꞌ sabap luu maat bay pabuwat bi, meꞌ sapantun bay mapatoy, bay nangkaw atawa bay palamud ni hāl ma yaꞌ luu kabigiꞌ-bigian bi. ¹⁶Sugaꞌ bong baw kam bininsanaꞌ sabap pitsayaꞌ na kam ni Almasi, daa kam iyaꞌ. Gam pin pudjihun bi lagi Tuhan sabap sukuꞌ Almasi na kam.

¹⁷Batnaa tu, taabut na masa man Tuhan ngahukum manusiyaꞌ. Boꞌ nagnaꞌ na ya ka kitabi siga sukuꞌ na. Na bong kitabi ma intong subay lumingkaꞌ njawom kamalasahiyan, bistahan bi oy na baw mintu katuwaꞌ ni sagannap ma yaꞌ kuhi mmeꞌ ni umanat mahap man Tuhan? ¹⁸Yuk suwat njawom kitab,

“Bong jama intong mastiꞌ lumingkaꞌ jaꞌ njawom jinisan katiksaan boꞌ da salamat, pooy na baw lay mintu basag katiksaan ma tuwaꞌ njataꞌ siga baldusa ma yaꞌ san ngisbat Tuhan?”(4.18) Sambatan Jama Halul-akka 11.31.

¹⁹Sangkon bong kaam batnaa njawom kabinsanaan man gantaan Tuhan, suhuran bi na jaꞌ dī bi pa Tuhan, ilooy ma bay mapayak kaam saltaꞌ na tapangandohan. Maka darahan bi na meꞌ bi buwat kaayaran.

Halap si Pitel ni siga pa-mmean sukuꞌ Papuꞌ Isa

¹Na kaam, siga pa-mmean baanan sukuꞌ si Isa, luu situ halap ku ningkaam batan aku pun disu pa-mmean meꞌ kaam du. Boꞌ bay gi ku kasakup ka mata ku ma duwa kabinsanaan njataꞌ Almasi. Maka meꞌ aku pun disu ma tabeꞌ ni kabantugan Almasi ni sinōng, junjung ku na ningkaam, ²basta ayaran bi banahan siga sukuꞌ Tuhan ma njawman bi. Ipatun bi sila paayad meꞌ karuha baanan bili-bili inayaran meꞌ tukang ngipat sila. Daa kam magmaksud ngayaran sila supaya meka sīn takoleꞌ bi atawa man sabapan bay jaꞌ kam llogos. Meꞌ bi ngayaran sila, subay man gasad bayaꞌ bi ni kagāk bi saltaꞌ na ni katagi bi nulut kahandak Tuhan. ³Maka daa kam buwat sagannap ma njawman bi subay ga tindog bi, saula-ula kaam na papuꞌ da. Arapun subay kam makitahan sila kawul-piil ayad mari luu suntuan taakig da. ⁴Meꞌ naa ina, koleꞌ jaꞌ sina kam mintu kabantugan ma yaꞌ kuhi baluba saumu yana tungbas ndean kaam ni katakka panghuluꞌ siga tukang ipat, yana Almasi.

⁵Na kuwan kaam ma masi baddung, subay kam lillaꞌ ni siga matatoa ni baanan bi. Maka kitabi sikamimon subay magpadiyoꞌ saliꞌ-saliꞌ ni pagkahi tabi, batan yuk njawom kitab,

“Kinuntra meꞌ Tuhan sagannap ma abbuhan, sugaꞌ tabangan na sagannap ma diyoꞌ pangatayan da.”

⁶Sangkon, magpadiyoꞌ jaꞌ kam pa Tuhan Sangat Kawasa, boꞌ bi buwanan na kabantugan pag taabut masa bay ginantaꞌ meꞌ na. ⁷Suhuran bi na mimon kasusahan bi pa Tuhan sabap hagaan kam niiya.

⁸Iyakin kam maka papatong kam mamiki sabap Ibilis ina, yana banta bi, doman jaꞌ nasat supaya kam patatak man si Isa. Sibuꞌ du sina karuha Ibilis ka halimaw ngallong, parampong-parampong miha sabbatan na. ⁹Sangkon subay tattap meꞌ bi mangando ni Papuꞌ Isa man bi naggaꞌ Ibilis. Ingatun bi, meka du sina pagkahi bi sukuꞌ si Isa ni sikaliput junyaꞌ tuwaꞌ kabinsanaan meꞌ ningkaam du batnaa. ¹⁰Sugaꞌ pus bi bay natas samantalaꞌ njawom kabinsanaan, tinabang du sina kam meꞌ Tuhan. Pahallotan na sina pangando bi maka pinataggu meꞌ na iman bi supaya kam meꞌ karuha poon kayu ma yaꞌ kuhi habbaꞌ sabap lawom gamut na. Bistahun bi doꞌ, ni kaehe aseꞌ-tabang Tuhan, lay na kam liyun na pa jawom okoman na. Maksud na supaya kam tumabeꞌ ni kabantugan na man sabapan pagkatibuuk bi ka si Isa Almasi. Boꞌ kabantugan na ina yaꞌ luu katapusan na. ¹¹Pudji tabi ya sabap tud tawop ya magbayaꞌ saumu-umu! Amin.

Katapusan bitsala si Pitel

¹²Na ni kapasal suwat tuu, luu situ bay sohoꞌ ku nuwatan bitsala ku, yana si Saylas, disu danganakan tabi kanaalla. Suwat tuu itu man ku mataggu iman bi maka man ku maintoman kaam pasal ehe aseꞌ-tabang Tuhan ningkaam mari kasengan bi.

¹³Sarī man naa, luu situ ntuu ni Babilon(5.13) Daira man si Pitel ilay bay nuwat ituu yana daira Rom. Sugaꞌ ntuu ginalla meꞌ si Pitel Babilon, yana awon daira mattoꞌ ma tanyag jahallis jama na ka yaꞌ ngisbat Tuhan. Kon si Pitel ilay bay nganggalla Rom Babilon sabap meka jama ni Rom sibuꞌ du arat da ka jama maruhuꞌ ni Babilon. siga pagkahi tabi ma pitsayaꞌ du ni Papuꞌ Isa lay nohoꞌ masampay salam duwaa da ningkaam. Meꞌ kaam du situ sila bay pineneꞌ meꞌ Tuhan. Si Malkus pun, ma binilang na meꞌ ku anak ku, lay du bay nohoꞌ masampay salam duwaa na ningkaam.

¹⁴Na bila kam sitammu-tammu, jara-jara kam meꞌ ndang tabiat jama sikaaseꞌ-kaaseꞌ. Dambuli man naa, sikamimon kam ma tibuuk ka Almasi, kamura-murahan binuwanan na pin kam meꞌ Tuhan kasannangan njawom atay bi.

Wassalam