1 Yahiya

Suwat Sibuwa Lakka man si Yahiya

Pahati

Si Yahiya ilay yana disu mulit si Isa bay tabeꞌ ni ilooy ma sikasapu-duwa bay peneꞌ si Isa binuwat siga rasul na. Jaman si Yahiya bay nuwat ituu ndang toa na ya. Njawom Kitab Injil luu lima eka suwat si Yahiya.

Suwat tuu itu bay sinuwatan pa mman siga baanan sukuꞌ si Isa ni jinisan daira ndooy ni Asiya Dikiꞌ. Kon si Yahiya bay nuwat sabap lay taaka na luu siga guru palsu nabid kabanahan pasal si Isa Almasi. Baꞌ-bāꞌ da, Almasi saꞌ konoꞌ Anak Tuhan. Boꞌ na, sarī man tōꞌ da bingkok, sampay kawul-piil da bingkok du. Batan bong ninsila, inawnan siga sukuꞌ Tuhan, bahasa san yaꞌ na patagong buwat dusa.

Sangkon njawom suwat tuu, lay pinamāꞌ meꞌ si Yahiya si Isa Almasi yana Anak Tuhan ma bay dari manusiyaꞌ. Maka yuk si Yahiya bong jama bana-bana maasean Tuhan, subay du sila maaseꞌ ni pagkahi da manusiyaꞌ ka ngasip ni siga panohoan Tuhan.

Njawom suwat tuu meka kaayaran takoleꞌ tabi. Sinohoꞌ kitabi sikaaseꞌ-kaaseꞌ ngakig arat-tabiat Tuhan maaseꞌ. Maka yuk si Yahiya, soysoy tibuuk ka Anak Tuhan, luu kasampulnaan nyawa da saumu-umu. Sugaꞌ soysoy yaꞌ tibuuk ka Anak na, yaꞌ luu ninsila kasampulnaan nyawa.

Suwat tuu yaꞌ tatantu tabi bong taun oy man na bay sinuwatan meꞌ si Yahiya. Sugaꞌ kaekahan mista labi man mpatpuꞌ-mpat taun paddus si Isa Almasi bay inangkat pa sulgaꞌ.

1 YAHIYA

Palman Tuhan muwan kaallum bahau

^1-2Itu suwat ku ningkaam pasal si Isa Almasi, yana Palman Tuhan ma nampulnaꞌ nyawa manusiyaꞌ saumu-umu. Yaꞌ gi luu oy maka oy na, ndang luu na ya mman Mmaꞌ na Tuhan. Pag-anu, lay ya dari manusiyaꞌ sampay bay maglahat ntuu ni junyaꞌ. Maka lay gi ya takita kami ka mata kami ma duwa. Damikiyan, lay du ya takale kami mitsala. Maka lay gi ya tapurut kami ka tangan kami mismu. ³Dari tuntutan kami na kam ilooy ma bay tasakup kami niiya supaya dambuwaꞌ atay na kitabi maka supaya saliꞌ-saliꞌ na kitabi dambuwaꞌ atay ka Tuhan sampay Anak na si Isa Almasi. ⁴Maka kon ku itu nuwatan kaam supaya pannoꞌ na atay tabi leꞌ kagakan saliꞌ-saliꞌ.

Katattogan tabi yana njawom dantaꞌ

⁵Batnaa pasampay ku na ningkaam umanat ma bay takale kami man si Isa Almasi, yana meꞌ tuu: Tuhan ina sūꞌ dantaꞌ. Yaꞌ luu lindom niiya samasakali. ⁶Dari bong itu kitabi mangaku lungbid ka Tuhan, boꞌ kitabi masi njawom lindom buwat kalaatan, malaingkan ngandustaꞌ kitabi. Maka yaꞌ kitabi mmeꞌ ni kabanahan. ⁷Sugaꞌ bong itu kitabi tattog njawom dantaꞌ meꞌ karuha Tuhan, dambuwaꞌ atay na kitabi. Maka puwas na dusa tabi sabapan lahaꞌ Anak Tuhan, yana si Isa. Sangkon sutsiꞌ na kitabi.

⁸Na bong yuk tabi yaꞌ luu dusa tabi, ngandupang jaꞌ kitabi dī tabi maka lawak kitabi man kabanahan. ⁹Sugaꞌ bong kitabi magsabanna pa Tuhan ni bay dusa tabi, mastiꞌ inampun jaꞌ kitabi meꞌ na. Maka sinutsiꞌ na pin pangatayan tabi meꞌ na mari yaꞌ na luu kalaatan tabi. Batan Tuhan ina intong ka kanaalla numan bay janjiꞌ na.

¹⁰Sugaꞌ bong itu kitabi māꞌ yaꞌ bay pingkaꞌ buwat dusa, sibuꞌ du kitabi ka bay madustaꞌ Tuhan batan bay halling Tuhan mimon manusiyaꞌ magdusa. Boꞌ na, bong ilay kitabi māꞌ meꞌ looy, yaꞌ du luu pūs palman na ningkitabi.

Si Isa tukang makuhan kitabi timbang pa Tuhan

¹Na kon ku tu nuwat ningkaam, siga anak, supaya kam yaꞌ buwat dusa. Sugaꞌ bong sipais, luu kam bay sumilap buwat dusa, luu du sina tukang nganjamin kitabi pa mman Mmaꞌ tabi Tuhan. Awnan ku ilay siꞌ ilooy ma intong saꞌ alang-alang, yana si Isa Almasi. ²Ni gasad bayaꞌ na, lay na sambut na mulkaꞌ Tuhan mari tatanggung na mimon dusa tabi supaya tabi taampun na meꞌ Tuhan. Boꞌ saꞌ sat mimon dusa tabi bay tanggung na, arapun sampay dusa manusiyaꞌ labbasakayi, lai du tanggung na.

³Na bong itu kitabi ngasip ni siga panohoan Tuhan, malaingkan tatantu tabi na katoonan tabi Tuhan. ⁴Sugaꞌ soysoy mangaku katoonan na Tuhan, boꞌ yaꞌ baw ngasip ni siga panohoan na, malaingkan ngandustaꞌ ya, maka bong inawnan kabanahan, yaꞌ du binean meꞌ na. ⁵Sugaꞌ soysoy ngasip ni siga panohoan Tuhan, tumatandaꞌ tattap aseꞌ na pa Tuhan. Maka sabap meꞌ tabi ngasip, inaa na man tabi katantu tibuuk kitabi ka Tuhan. ⁶Na soysoy mangaku tibuuk ka Tuhan, subay nabiat mōꞌ arat-tabiat meꞌ kadari ni si Isa Almasi.

Panohoan pasal sikaaseꞌ-kaaseꞌ

⁷Siga kakasi ku, bila kam sohoꞌ ku sikaaseꞌ-kaaseꞌ njawom suwat tuu, saꞌ sina ga panohoan bahau jaꞌ. Batan ndang lay na takale bi jaman bi bahau jaꞌ bay mmeꞌ ni si Isa. ⁸Sugaꞌ kon na tabilang panohoan bahau batan bahau jaꞌ tahati tabi bong oy aseꞌ sabanna. Aseꞌ sabanna ina, lay na takita njataꞌ si Isa. Batnaa pun, takita na du njataꞌ bi batan luu na kam jawom dantaꞌ. Yaꞌ na kam njawom lindom batan ninag na sūꞌ sabanna ningkaam.

⁹Na soysoy mangaku njawom dantaꞌ, boꞌ lammis baw ni pagkahi na, malaingkan masi du ya njawom lindom. ¹⁰Sugaꞌ soysoy maasean pagkahi na, tattap njawom dantaꞌ. Maka yaꞌ luu ni arat-tabiat na man na ndusa. ¹¹Sugaꞌ soysoy ina lammis ni pagkahi na, malaingkan masi ya njawom lindom. Ni kaawam na, meꞌ karuha jama buta ya bagagap njawom lindom. Yaꞌ san katoonan na luꞌ paninggai ya.

¹²Siga anak ku, suwatan ta kam batan lay na kam inampun meꞌ Tuhan ni mimon dusa bi man sabapan pabuwatan si Isa Almasi.

¹³Kaam ma matatoa, kon bi ina suwatan ku sabap katoonan bi na ilooy ma ndang luu man awwal tagnaꞌ. Maka kaam ma anak-anak bahau, suwatan ta du kam batan lay na kam tumanjataꞌ man ilooy ma poonan mimon kalaatan, yana Ibilis.

¹⁴Siga anak, kon bi suwatan ku sabap katoonan bi na Mmaꞌ tabi Tuhan. Kaam pun siga matatoa, meꞌ halling sambat ku na siꞌ, suwatan ta na kam sabap katoonan bi ilooy ma ndang luu man awwal tagnaꞌ. Maka kaam ma siga anak-anak bahau, suwatan ta du kam sabap basag pangando bi ni si Isa maka lay na nganggamut palman Tuhan njawom atay bi. Boꞌ na, lay na kam tumanjataꞌ man ilooy ma poonan kalaatan.

¹⁵Sangkon bong kinawnan hāl junyaꞌ atawa pabuwatan ma kinasengan meꞌ jama ma mandang hāl junyaꞌ, daa na meꞌ punu njawom atay bi. Batan bong hāl junyaꞌ numbul satu njawom atay bi, malaingkan saꞌ na Tuhan numbul satu. Intong na, yaꞌ kam maasean Tuhan. ¹⁶Bong hāl junyaꞌ numbul satu ningkita, ilooy du puntukan ningkita, meꞌ ta nganduwan napsu ta ni jinisan ma karomanan ta ka takita ta. Maka hagaan du ningkita meꞌ ta koleꞌ bantug para ni dī ta man sabapan altaꞌ ta. Boꞌ mimon hāl meꞌ naa, saꞌ sina lakka man Mmaꞌ ta Tuhan, arapun lakka man pikilan jama ma mandang hāl junyaꞌ. ¹⁷Lagiꞌ na, mimon ma kinanapsuhan meꞌ manusiyaꞌ ntuu ni junyaꞌ sampay junyaꞌ tuu na mismu, lungay jaꞌ du bbos-bbos. Sugaꞌ sagannap ma buwat kahandak Tuhan, mastiꞌ sampulnaꞌ jaꞌ nyawa da saumu-umu.

Ilooy ma Tukang Nguntra Almasi

¹⁸Na siga anak, saꞌ ba, ndang lay na kam binaan maruhuꞌ, pag mintu tapit na llaw dambuli, luu disu pōꞌ inawnan Tukang Nguntra Almasi? Boꞌ ni sabana na, meka na sina pōꞌ nguntra Almasi ni batnaa. Sangkon katoonan tabi na bong inawnan llaw dambuli, basta tapit na. ¹⁹Ga jama ma nguntra ilay, lay du bay pingkaꞌ tabeꞌ ningkitabi, sugaꞌ lay na pasakkat. Bong ilay siꞌ tud bay dambuwaꞌ atay sila ka kitabi, yaꞌ du sila bay pasakkat. Sugaꞌ pagka lay na du sila pasakkat, tumatandaꞌ na saꞌ du sila pagkahi tabi sukuꞌ si Isa.

²⁰Sugaꞌ kaam ina yaꞌ sibuꞌ ka sila. Lay na kam pinaasokan Rū Sutsiꞌ ma tattap muwanan kaam pangahati. Sangkon katoonan bi na kabanahan. ²¹Dari aku tu nuwat ningkaam, saꞌ ga sabap meꞌ ku mista awam kam ni kabanahan pasal Almasi. Tabista ku du katoonan bi kabanahan. Maka katoonan bi du tiyap-tiyap dustaꞌ, yaꞌ luu kabigiꞌ-bigian na ni kabanahan.

²²Sangkon bong luu māꞌ si Isa saꞌ Almasi bay njanjiꞌ meꞌ Tuhan pinapitu nalamat, malaingkan pangandustaꞌ ya. Siga jama meꞌ looy ilay nguntra Almasi. Sarī man Almasi, sampay Mmaꞌ na Tuhan, tuwak da du. ²³Maka soysoy māꞌ yaꞌ ya pitsayaꞌ Almasi yana Anak Tuhan, lawak ya man Mmaꞌ Almasi. Sugaꞌ soysoy mangaku Almasi yana Anak Tuhan, mastiꞌ lungbid ya ka Mmaꞌ Almasi.

²⁴Sangkon amay-amay kannahun bi na pin tōꞌ ma bay takale bi jaman bi bahau jaꞌ bay pitsayaꞌ. Meꞌ looy ilay, mastiꞌ yaꞌ maglumba meꞌ bi lungbid ka Mmaꞌ tabi Tuhan ka Anak na. ²⁵Maka kannahun bi na pin janjiꞌ Anak Tuhan muwanan sagannap ma pitsayaꞌ niiya kasampulnaan nyawa saumu-umu.

²⁶Na kon itu ku siꞌ nuwatan kaam supaya kam iyakin ni jama ma doman moo-moo kaam pitsayaꞌ ni tōꞌ da palsu. ²⁷Boꞌ ni sabana na, san sina kam yaꞌ na pinagpandoyan meꞌ soy maka soy na. Ndang-ndang lay na du kam bay pinaasokan Rū Sutsiꞌ meꞌ Almasi. Rū Sutsiꞌ ina tattog njawom atay bi. Maka iya magpandoyan kaam ni oy-oy ma talpaksaꞌ subay katoonan bi. Boꞌ na, oy-oy jaꞌ ina pamāꞌ na ningkaam bana jaꞌ, yaꞌ sina luu palsu. Sangkon bean bi jaꞌ suwara na mari yaꞌ maglumba meꞌ bi lungbid ka Almasi.

²⁸Siga anak, darahan bi na pin meꞌ bi dambuwaꞌ atay ka Almasi supaya pag takka na, yaꞌ luu kinatawuhan meꞌ bi maka yaꞌ luu danan man bi iyaꞌ siawop ka iya. ²⁹Almasi ina, ndang katoonan tabi du, wā intong. Sangkon tatantu tabi soysoy buwat kaintongan, malaingkan anak Tuhan du ya.

Siga anak Tuhan

¹Bistahun bi doꞌ ehe aseꞌ Mmaꞌ tabi Tuhan njataꞌ tabi. Lay na ga tabi awnan na anak na. Boꞌ tud bana du baw situ kitabi anak na. Sugaꞌ kuwan siga jama ma mandang jaꞌ hāl junyaꞌ, yaꞌ tahati da ga anak Tuhan na kitabi batan yaꞌ katoonan da Tuhan. ²Siga kakasi ku, batnaa anak Tuhan na situ kitabi, sugaꞌ yaꞌ gi baw bay pinalahil ningkitabi bong pooy kadari tabi bbos-bbos. Ilooy du katoonan tabi, pag beleng Almasi, meꞌ iya na du kitabi batan takita tabi na sina mintu bong pooy kadari na banahan. ³Dari sagannap ma ngagad kajatuhan meꞌ looy bbos-bbos, malaingkan labbahan da na mimon kawul-piil ma yaꞌ mahap mari sila meꞌ Almasi na du sutsiꞌ.

⁴Na sagannap ma buwat dusa ina ngalangga saraꞌ Tuhan sabap hatiyan dusa, ngalangga saraꞌ. ⁵Sugaꞌ ndang katoonan bi na du, Almasi bay pitu pa junyaꞌ supaya tapuwasan na dusa manusiyaꞌ. Boꞌ iya ilay, yaꞌ luu dusa na samasakali. ⁶Sangkon sagannap ma tibuuk ka iya, tagongan da na meꞌ da buwat dusa. Sugaꞌ sagannap ma amu-amu buwat dusa, tumatandaꞌ yaꞌ tahati da bong soy Almasi batan yaꞌ san ya katoonan da.

⁷Siga anak, daa kam kuhi pinagsian meꞌ jama bong sila māꞌ bahasa dari san kitabi buwat dusa. Arapun ituu ya kannahun bi: Sagannap ma tattap buwat kaintongan, sila na jama intong meꞌ karuha Almasi. ⁸Sugaꞌ sagannap ma amu-amu buwat dusa, tumatandaꞌ anak Ibilis sila. Kon sila taawnan anak Ibilis batan Ibilis ndang nabiat buwat dusa labba man awwal tagnaꞌ lagi. Lipara bay na pinapitu Anak Tuhan pa junyaꞌ ngalangkat kawasa Ibilis ma moo-moo manusiyaꞌ buwat dusa.

⁹Dari sagannap ma lay na dari anak Tuhan, labbahan da na sina meꞌ da buwat dusa sabap luu na ninsila pangatayan bahau man Tuhan. Maka pagka Mmaꞌ da na Tuhan, yaꞌ sila kasogsog buwat dusa. ¹⁰Na meꞌ tabi ngila bong soy siga anak Tuhan maka soy siga anak Ibilis meꞌ tuu: Soysoy yaꞌ buwat kaintongan maka yaꞌ maasean siga pagkahi na manusiyaꞌ, saꞌ ya anak Tuhan.

Siga anak Tuhan sikaaseꞌ-kaaseꞌ

¹¹Na pagka anak Tuhan na kam, yaꞌ dari yaꞌ bean bi panohoan njawom umanat bay takale tabi labba man sibuwa. Panohoan ma awnan ku ilay siꞌ yana subay kitabi sikaaseꞌ-kaaseꞌ. ¹²Daa na kitabi mmeꞌ meꞌ uwahan jaman si Kain.(3.12) Si Kain ilay yana anak Boꞌ Adam ka Sitti Hawa ma siyaka. Iya ilay sukuꞌ Ibilis, boꞌ tumatandaꞌ du ni buwatan na bay mapatoy ariꞌ na si Habil. Kon na ilay bay buwat meꞌ looy sabap nabiat ya buwat kalaatan, boꞌ dugahan ya ni ariꞌ na buwat kaintongan. ¹³Sangkon siga danganakan, daa kam jayip bong kam kinalammisan meꞌ siga jama ma yaꞌ pitsayaꞌ ni si Isa.

¹⁴Kitabi itu, katoonan tabi na lay na kitabi pinaddusan man katiksaan nyawa, sampay lay na tabi koleꞌ kaallum bahau sabap maaseꞌ na kitabi ni siga pagkahi tabi. Sugaꞌ soysoy ina yaꞌ maaseꞌ, tumatandaꞌ masi tiksaꞌ nyawa na. ¹⁵Boꞌ na, soysoy ina lammis ni pagkahi na, initung meꞌ Tuhan pamonoꞌ. Boꞌ katoonan bi na du, tiyap-tiyap ina pamonoꞌ, yaꞌ luu kasampulnaan nyawa na.

¹⁶Na man tabi toon bong oy aseꞌ sabanna, mindoga jaꞌ tabi ni si Isa, batan lay na ga ya nongan umu na kalnaꞌ kitabi. Sangkon kitabi pun subay du mangatas nongan umu tabi kalnaꞌ siga pagkahi tabi sukuꞌ si Isa. ¹⁷Damikiyan, subay du kitabi nulung siga pagkahi tabi ma njawom sigpit. Bong luu pangabut tabi, boꞌ yaꞌ san kitabi nulung ninsila, pooy meꞌ tabi kabāꞌ maaseꞌ kitabi pa Tuhan? ¹⁸Sangkon siga anak, daa kita maaseꞌ ni bitsala jaꞌ atawa ni kuwit tōng sadjaꞌ. Arapun subay du takita aseꞌ ta ni tangge-tingkōꞌ ta batan inaa aseꞌ sabanna.

¹⁹Bong ina kita maaseꞌ ni pagkahi ta manusiyaꞌ, inaa na man ta toon tud mmeꞌ kita ni kabanahan. Dari sannang atay ta pa Tuhan sabap katoonan ta pabuwatan ta nulut ni kahandak na. ²⁰Sugaꞌ bong ina honaꞌ-honaꞌ ta māꞌ luu laat ta pa Tuhan, labi na Tuhan saꞌ kabāꞌ batan katoonan na mimon-mimon. ²¹Dari siga kakasi ku, bong yaꞌ du māꞌ honaꞌ-honaꞌ tabi ga luu laat tabi pa Tuhan, malaingkan sannang atay tabi sabap mahap jaꞌ kitabi niiya. ²²Boꞌ na, oy-oy paku tabi pa Tuhan, nduwan jaꞌ sina kitabi batan asip tabi jaꞌ siga panohoan na maka pabuwat tabi ilooy ma kasulut niiya. ²³Ga panohoan na ina meꞌ tuu: Subay kitabi pitsayaꞌ ni Anak na si Isa Almasi. Maka subay kitabi sikaaseꞌ-kaaseꞌ batan ndang inaa bay sohoꞌ si Isa ningkitabi. ²⁴Soysoy ngasip ni siga panohoan Tuhan, tattog ya ni Tuhan maka Tuhan pun tattog du niiya. Man tabi toon tattog Tuhan ningkitabi man sabapan Rū na ma bay patannaꞌ na njawom atay tabi.

Subay iyakin sukuꞌ si Isa ni guru palsu

¹Siga kakasi ku, daa kam os-os pitsayaꞌ sukat jama mangaku bahasa tōꞌ na lakka man Rū Tuhan. Arapun pindogahan bi doꞌ duhuꞌ tōꞌ na mari katoonan bi bong mattan ya sosohoan Tuhan atawa niyaꞌ. Batan meka na sina guru palsu njawom junyaꞌ. ²Man bi ngila guru ma pinagmundaan meꞌ Rū Tuhan meꞌ tuu: Soysoy māꞌ si Isa Almasi yana Anak Tuhan bay dari manusiyaꞌ, tumatandaꞌ bana-bana ya sosohoan Tuhan. ³Sugaꞌ sagannap ma nuwak kabanahan pasal si Isa, yaꞌ sina luu Rū Tuhan mman da. Pikilan da ina sibuꞌ du ka pikilan ilooy ma Tukang Nguntra Almasi. Man maruhuꞌ lagi, saꞌ ba, ndang bay na takale bi bbos-bbos luu takka disu Tukang Nguntra Almasi magsian jama? San pun batnaa, luu na du siga jama meꞌ karuha iya nguntra kabanahan pasal Almasi.

⁴Boꞌ kaam ina, siga anak, sukuꞌ Tuhan na kam. Lay na sina kam tumanjataꞌ man siga guru palsu batan yaꞌ kam bay takoleꞌ pinagsian. Kon meꞌ looy sabap mas mehe gi kawasa Rū Tuhan ningkaam man kawasa Ibilis ma magbayaan siga jama ma saꞌ sukuꞌ Tuhan. ⁵Boꞌ siga guru palsu ina, tabeꞌ ni sagannap ma saꞌ sukuꞌ Tuhan. Tōꞌ da ina lakka man akka manusiyaꞌ sadjaꞌ. Sangkon sagannap ma yaꞌ pitsayaꞌ ni si Isa tigiꞌ pakale ninsila. ⁶Boꞌ kitabi baw tu, anak Tuhan na kitabi. Sangkon bong ina bana-bana jama toon Tuhan, mastiꞌ pakale jaꞌ ningkitabi. Sugaꞌ kuwan sagannap ma saꞌ sukuꞌ Tuhan, yaꞌ sina doman pakale ningkitabi. Dari inaa na sina man tabi mindoga bong soy pinagbayaan meꞌ Rū Sutsiꞌ ma malahil kabanahan maka soy pinagbayaan meꞌ Ibilis ma magsian jama.

Tabiat Tuhan yana maaseꞌ

⁷Siga kakasi ku, subay kitabi sikaaseꞌ-kaaseꞌ sabap inaa tabiat Tuhan. Jama ma maaseꞌ ina, tarang-tarang anak Tuhan maka katoonan na Tuhan. ⁸Soysoy yaꞌ maaseꞌ, tumatandaꞌ yaꞌ katoonan na Tuhan sabap tabiat Tuhan yana maaseꞌ. ⁹Man Tuhan bay makitahan aseꞌ na ningkitabi meꞌ tuu: Lay papitu na Anak Tungga na pa junyaꞌ supaya luu na dapat tabi koleꞌ kaallum bahau njataꞌ na.

¹⁰Na inawnan aseꞌ sabanna, saꞌ ga aseꞌ tabi pa Tuhan, arapun aseꞌ Tuhan ningkitabi. Batan atas na bay mapitu Anak na nohoꞌ nanggung mulkaꞌ ma subay siꞌ bay labuꞌ pa jataꞌ tabi. Dari puwas na dusa tabi maka lay na kitabi inampun meꞌ Tuhan.

¹¹Na siga kakasi ku, pagka meꞌ naa aseꞌ Tuhan ningkitabi, subay du kitabi sikaaseꞌ-kaaseꞌ. ¹²Man awwal tagnaꞌ lagi yaꞌ luu manusiyaꞌ bay ngita Tuhan. Sugaꞌ bong ina kitabi sikaaseꞌ-kaaseꞌ, tumatandaꞌ tattog Tuhan njawom baran tabi. Maka njataꞌ tabi pasampay na na aseꞌ na ni manusiyaꞌ.

¹³Na man sabapan Rū Sutsiꞌ bay dean Tuhan kitabi, tatantu tabi na tattog na kitabi ni Tuhan maka Tuhan pun tattog na du ningkitabi. ¹⁴Kami situ mismu bay ngita Anak Tuhan. Sangkon kabāꞌ kami tud mawjud Mmaꞌ na bay mapitu iya nohoꞌ nalamat manusiyaꞌ. ¹⁵Dari soysoy ina mangaku si Isa yana Anak Tuhan, malaingkan tattog Tuhan niiya maka iya pun tattog du ni Tuhan. ¹⁶Kitabi itu, katoonan tabi maka manganna kitabi tud kinaasean kitabi meꞌ Tuhan.

Na meꞌ halling sambat ku na siꞌ, tabiat Tuhan ina yana maaseꞌ. Sangkon soysoy ina tattap maaseꞌ, mastiꞌ tattog Tuhan niiya, maka iya pun tattog du ni Tuhan. ¹⁷Bong ina tattap aseꞌ tabi ni manusiyaꞌ, tumatandaꞌ du tattap aseꞌ tabi pa Tuhan. Maka tatantu tabi na pag mintu taabut llaw hukuman, yaꞌ na luu katawuhan tabi sabap lay na taakig tabi tabiat si Isa ntuu ni junyaꞌ. ¹⁸Bong kita maasean Tuhan ka pagkahi ta manusiyaꞌ, yaꞌ na sina luu tawu ta pa Tuhan. Ilooy ya ilay man jama tawu bong bistahan da luu pidjalaꞌ Tuhan ngagad sila. Sangkon soysoy tawu pinidjalaꞌ, tarang-tarang kulang meꞌ na maaseꞌ.

¹⁹Kitabi itu maaseꞌ sabap Tuhan bay duhuꞌ maasean kitabi. ²⁰Bong luu halling, “Maaseꞌ ku pa Tuhan,” boꞌ lammis baw ni pagkahi na manusiyaꞌ, malaingkan ngandustaꞌ ya. Batan bong ina ya yaꞌ pandoy maasean pagkahi na ma takita, labi na Tuhan saꞌ niyaꞌ kaasean na ma yaꞌ san takita. ²¹Sangkon na, luu panohoan Almasi ningkitabi meꞌ tuu: Bong ina jama bana-bana maaseꞌ pa Tuhan, subay du ya maasean pagkahi na manusiyaꞌ.

Pangando ni si Isa yana poonan man tabi tumanjataꞌ man Ibilis

¹Na sagannap ma pitsayaꞌ si Isa yana Almasi,(5.1) Hatiyan Almasi, ilooy ma bay inuwakilan meꞌ Tuhan magsultan saumu-umu. sila na bay dari anak Tuhan. Maka bong ina kitabi maasean Mmaꞌ tabi Tuhan, mastiꞌ maaseꞌ du kitabi ni siga pagkahi tabi anak Tuhan. ²Sangkon man tabi katantu maaseꞌ kitabi pa Tuhan ka mean siga panohoan na, bong kitabi maaseꞌ ni siga pagkahi tabi anak Tuhan. ³Meꞌ tabi makitahan Tuhan aseꞌ tabi niiya, bean tabi jaꞌ siga panohoan na. Boꞌ siga panohoan na ina yaꞌ du bohat binogbogan ⁴batan lay na kitabi dari anak Tuhan. Boꞌ tiyap-tiyap siga anak Tuhan ina, mastiꞌ luu na gaos da nuwak sasat mimon njawom junyaꞌ. Boꞌ poonan gaos da yana pangando da ni Almasi. ⁵Dari sagannap ma pitsayaꞌ si Isa yana Anak Tuhan, sila du sina ngantanan gaos nuwak siga sasat njawom junyaꞌ.

Siga sipat si Isa Anak Tuhan

⁶Na si Isa ilay, luu buktiꞌ man tabi toon iya Anak Tuhan bay pinapitu pa junyaꞌ. Disu buktiꞌ yana jaman na bay tasakup meꞌ jama pinandi ka boheꞌ. Kaduwa na, jaman lahaꞌ na bay pinaduwai. Dari siꞌ, sarī man jaman si Isa bay pinandi, kapatoy na pun, buktiꞌ du iya yana Anak Tuhan. Katallu na, luu gi Rū Sutsiꞌ makitau ningkitabi. Boꞌ mimon ina ma pinakitau meꞌ Rū Sutsiꞌ, mastiꞌ bana sadjaꞌ. ⁷Dari luu tallu buktiꞌ si Isa yana Anak Tuhan. ⁸Disu, yana Rū Sutsiꞌ, kaduwa na, jaman si Isa pinandi, katallu na yana lahaꞌ na bay pinaduwai. Ilooy ilay si sikatallu mag-uyun mōꞌ kabanahan si Isa yana Anak Tuhan.

⁹Na bong kitabi pitsayaꞌ ni tuntut manusiyaꞌ ni hāl ma bay tasakup da, labi na kitabi saꞌ subay pitsayaꞌ ni bay halling Tuhan pasal si Isa. Batan bay ya magpalman si Isa yana Anak na. ¹⁰Soysoy ina pitsayaꞌ ni Anak Tuhan, katoonan da njawom atay da tud bana du si Isa Anak Tuhan. Sugaꞌ sagannap ma yaꞌ pitsayaꞌ ni bay halling Tuhan pasal Anak na, malaingkan madustaꞌ sila Tuhan, batan yaꞌ sila kuhi pitsayaꞌ ni palman na. ¹¹Palman Tuhan ina ningkitabi meꞌ tuu: Lay na ya muwanan kitabi kaallum bahau, yana kasampulnaan nyawa ma yaꞌ luu katapusan na. Boꞌ kaallum looy ilay lakka man Anak na. ¹²Sangkon soysoy tibuuk ka Anak na, luu na kaallum looy mman na. Sugaꞌ soysoy yaꞌ tibuuk ka Anak na, yaꞌ du luu kaallum looy mman na.

¹³Ituu tu siꞌ man ku nuwat pa mman bi ma pitsayaꞌ ni Anak Tuhan supaya katoonan bi na tud luu na kasampulnaan nyawa bi ma yaꞌ luu katapusan na. ¹⁴Dari tatantu tabi na oy-oy paku tabi man Tuhan, bong ina saꞌ du paku ma nguntra ni kahandak na, mastiꞌ pinakale jaꞌ sina kitabi meꞌ na. ¹⁵Dari pagka katoonan tabi na Tuhan pakale ni paku tabi, mastiꞌ katoonan tabi du nduwan jaꞌ kitabi.

¹⁶Na katapusan bitsala ku, bong kita ngita disu danganakan ta sukuꞌ si Isa buwat dusa, subay ya pakuhan ta duwaa supaya ya pinanimbangan meꞌ Tuhan sampay sinampulnaꞌ nyawa na pabalik. Sugaꞌ bong baw dusa na yana ilooy disu ma katiksaꞌ ni nyawa saumu-umu, san kita yaꞌ na mahusaan dī ta makuhan iya duwaa. ¹⁷Bana na, oy-oy pabuwat ta ma yaꞌ intong yana dusa. Sugaꞌ masi gi du tapuwasan basta saꞌ jaꞌ dusa looy disu ma niksaꞌ nyawa saumu-umu.(5.17) Meꞌ kasohean ngahati dusa ma yaꞌ tapuwasan bong jama nikutan si Isa Almasi ka kabanahan pasal iya. Ndaun Hibrani 6.1-6. Kasohean baw ngahati dusa looy yana bong jama māꞌ pabuwatan Rū Sutsiꞌ yana pabuwatan seytan. Ndaun Matiyu 12.31-32.

¹⁸Na kitabi itu, katoonan tabi na sikamimon jama ma bay dari anak Tuhan, patagong na sila buwat dusa batan luu na pin Anak Tuhan nganggaosan sila buwat kaintongan. Sangkon yaꞌ na sila tumandiyoꞌ meꞌ Ibilis. ¹⁹Maka katoonan tabi du san mimon manusiyaꞌ ma yaꞌ pitsayaꞌ ni si Isa lay na takawum leꞌ Ibilis, bong kitabi, niyaꞌ na, batan sukuꞌ Tuhan na kitabi.

²⁰Damikiyan, katoonan tabi na du luu na bay pitu Anak Tuhan pa junyaꞌ. Maka lay na ya muwanan kitabi pangahati supaya dari na kitabi lungbid ka Tuhan sabanna. Pag batnaa tibuuk na kitabi ka Tuhan sabanna sabap meꞌ tabi tibuuk na ka Anak na si Isa Almasi. Iya ina Tuhan sabanna maka poonan kasampulnaan nyawa ma yaꞌ luu katapusan na.

²¹Na siga anak, ilagan bi dī bi mari kam yaꞌ magtuhan ni oy maka oy na ma saꞌ Tuhan sabanna.

Wassalam