Tìɛlɛ

Tìɛlɛ Sɛbɛ ŋáà Zan ’sɛbɛ wè

Tìɛlɛ

Sɛbɛ wi tìɛdiʔɛ gè

Wurɔmiyé kùlofɔgbuɔwɔ ŋáà pe ’puu nɛ ye Nɛro wè, wire fànʔa lɛ̀lɛ nī lè, tɛ́ngɛfɔlilɔ pe cé wuʔɔgɔ suɔ kpuʔɔ kátii pe tɛ́ngɛlɛ lire kɛnmɛ nɛ̄ bè. Fànʔafɔgbuɔwɔ wáà cé ń’nɛ̀ kɛ́nì yɛ̀, pe ’puu nɛ wi ye Domisiɛn. A wire míɛni wuʔɔgɔ taʔa tɛ́ngɛfɔlilɔ nɛ̄ bèle kpuʔɔ. Ki ’nyaa wire ’puu nɛ caa peri wire gbùʔɔrɔ́ bɛ̀ Kulocɛliɛ tíɛlɛ. A wi sí tí a pe ’Zezi tundunwɔ cò wè Zan wè, nɛ̀ sɛ́nì wi wáa dàala láà nī. Ki tiʔɛ ki ’puu kuʔɔjii sunʔɔmɔ nī, pe ki dàala ye lè Patimɔsi. Kire tiʔɛ nī Zan wi ’puu, nɛ́ sí Tìɛlɛ Sɛbɛ wi siɛnrɛ sɛbɛ dè, bè ŋɔri nyɔ́gɔ tɛ́ngɛfɔlilɔ nī bèle bɛ̀ piyē nɛ wuʔɔ wè.

Ki sélimɛ nɛ̄ bè, Zan wi ’sɛbɛ nɛ̀ tórigo Azii tɛ́ngɛfɔlilɔ gbuʔulo kɔlisiin mɛ́ gèle. Ki siɛnrɛ tiī baa sɛbɛ wi nyùgo pélige nī gè, bèri waa nyùyɔ taanriwuʔu mɛ́ gè.

Bè ki líɛ nyùyɔ 4 wuʔu nɛ̄ gè bèri waa sɛbɛ wi láʔala mɛ́ lè, tire nɛ nyu kele gílì ke bága pa kpíʔile gèle. Kulocɛliɛ wi cé wi yiʔɛ múgu gè a wi ’ki kele gálì nyaa gèle. Ki kele gálì keli ’nyaa Setɛni nɛ́ wi baakuɔlɔ ní bèle, pe ’cúro nɛ̀ cíi Kulocɛliɛ nɛ̄ wè; nɛ̀ pínɛ Kulocɛliɛ kàyuʔu ki bága tuu pe nɛ̄. Kulocɛliɛ bága siɛnpiile pe woli cúʔɔ lè. Nɛ̀ pínɛ siɛnrɛ tiī nɛ nyu nyìʔɛnɛ fɔnnɔ nɛ́ dàala fɔnnɔ wori nɛ̄ dè, nɛ́ Zerizalɛmi kàfɔngɔ wori ní dè. Tiī nɛ Kulocɛliɛ wuulo pe yanyige nɛ́ pe fundaanra lɛ̀lɛ wori nyu dè, nɛ́ bɛ̀ Kulocɛliɛ wi bága siɛnpiile cúʔɔ bèle bè yige baa wè.

Sɛbɛ wi nyùgboliyo yè

Tunduro dáà Zezi wi ’kɛn Zan mɛ́ wè (1.1-8)

Tundundiɛyɛ nyáà yi ’tórigo tɛ́ngɛfɔlilɔ gbuʔulo kɔlisiin mɛ́ gèle (1.9–3.22)

Nyìʔɛnɛkaʔa wuulo piyē nɛ Kulocɛliɛ nɛ́ Zezi Kirisi gbùʔɔrɔ́ wè (4.1–5.14)

Yasuʔɔgɔlɔ kɔlisiin sɛbɛkuruwo wè (6.1–8.1)

Kàkpaanya kɔlisiin yè (8.2–11.19)

Yapiʔi wori dè nɛ́ yajuuyo siin ní yè (12.1–13.18)

Siɛnnɛ siramuʔɔyɔ togo nɛ́ kpɔrigɔ nɛ́ kɔlini bálì pe ’suɔ bèle (14.1-20)

Kulocɛliɛ funyɛrigɛ yagbuʔɔlɔ kɔlisiin gèle (15.1–16.21)

Babilɔni kàʔa ki ’tuu, nɛ̀ pínɛ yajuʔu gè, nɛ́ káfinɛrɛfɔli siɛnjuuwo ní wè, nɛ́ Setɛni ní wè, pe ’ti jáa (17.1–20.10)

Nyìʔɛnɛ fɔnnɔ, dàala fɔnnɔ nɛ́ Zerizalɛmi fɔnwɔ wori dè (21.1–22.5)

Ki ’kò cɛ̀ Zezi wi bé pɛn (22.6-21)

Siɛnrɛ ti sélimɛ tiʔɛ gè

¹Kele gálì mi je juu gèle, Zezi Kirisi wi ’ke tìɛ mi nɛ̄; ki ’nyaa Kulocɛliɛ wi ’ke kɛn mi mɛ́ mi- ke tìɛ wi baakuɔlɔ nɛ̄ bèle. Ki kele gálì ke bága tóri sìfuugo wī. A Zezi wi ’wi tundunwɔ tórigo wè, nyìʔɛnɛ tundunwɔ wè, a wi sɛ́nì ti yiʔɛ juu nɛ̀ tìɛ mi nɛ̄ mi Zan wè, wi baakuɔwɔ wè. ²A mi sí tɔ̀ni nɛ̀ ti juu nɛ̀ láʔa, nɛ́ jo dí gìi ki mìɛni mi ’nyaa gè, Kulocɛliɛ siɛnrɛ dī, nɛ̀ pínɛ Zezi Kirisi wori dī ŋíʔɛgɛ.

³A siɛn ŋíì nɛ Kulocɛliɛ kajuulo siɛnrɛ dáà wéli dè nɛ ti nyu dè, á bìli nɛ ti lúru níɛ tári ti nɛ̄ dè, dàa dī baa sɛbɛrɛ dè, ki siɛnnɛ bèle, pe wuʔu kiī tànʔa; nɛ̀ taʔa gíi nɛ̄, lɛ̀lɛ ni ’kò túɔn.

Síɛrilɛ lè tɛ́ngɛfɔlilɔ gbuʔulo kɔlisiin mɛ́ gèle

^4,5Mi Zan wè, mi mi nyɛ́ni siɛnrɛ dáà nyu dè tɛ́ngɛfɔlilɔ gbuʔulo kɔlisiin mɛ́ gèle gàli gīɛlɛ baa Azii tɛ́nimɛ nī bè; ki siɛnrɛ ti n’dɛ: Kulocɛliɛ wè, ŋàa wi yē wè, nɛ́ kíni yē baa wè, nɛ́ wi bága pɛn wè, nɛ́ pìgele kɔlisiin gálì gīɛlɛ baa wi kùlofɔlilɔ kácunʔɔ ki yiʔɛ mɛ́ gè, nɛ́ Zezi Kirisi ní wè wire ŋáà wī kijuufɔli wè nɛ́ yéri wi nyayerigele nī gèle wè, pe- kpuʔɔrɔ nɛ́ yanyige kɛn ye mɛ́.

Zezi Kirisi wire wī péliwe wè nɛ̀ nyɛ́ nɛ̀ yiri kúbilo sunʔɔmɔ nī bè, nɛ̀ pínɛ wire wī duniya kùlofɔlilɔ pe kàfɔli wè. Wire ŋáà wī weli ’wi dɛ́ni á wi ’weli suɔ nɛ̀ yige weli kapiʔile nī gèle wi sìsiɛn kire fànʔa nɛ̄ gè, ⁶nɛ̀ weli kpíʔile kùlofɔligɔ wuulo, a weli ’kò kacuɔnrilɔ Kulocɛliɛ mɛ́ wè, wi Tuu wè. Kpuʔɔrɔ dè nɛ́ fànʔa ní gè, ti ’yɛli wi nɛ̄ lɛ̀gɛlɛ ke mìɛni nī. Ki- taa ki puu bɛ̀.

⁷Ye nyaa, wi bága de báan kàsadibarɛ nī dè

dí siɛnnɛ pe mìɛni bèle,

nɛ́ bìli pe cé wi súbulo bèle pe sí de wi nyaʔa.

Duniya siɛnnɛ feliye yi mìɛni bága de nyɛni de ki yáa kire lɛ̀lɛ nī lè.

ʔaan díɛ, ki- taa ki puu bɛ̀1.7 Wéli baa Dan 7.13; Zaka 12.10. !

⁸«Mi wī Alifa wè nɛ́ ní Omega1.8 Alifa wè nɛ́ ní Omega: Girɛki yasɛbɛgɛlɛ nī gèle, alifa wire wī sélimɛ nɛ̄ bè, omega wire sí wī kúɔmɔ nɛ̄ bè. Kire kɔri wi ’jo Zezi wire wī sélimɛ bè nɛ́ ní kúɔmɔ nɛ̄ bè. wè», Kàfɔli Kulocɛliɛ wi ’jo bɛ̀, wire ŋáà wi yē wè, nɛ́ ŋàa wi kíni nɛ yē wè, nɛ́ ŋàa wi bága pɛn wè, ŋàa wī Fànʔa ki mìɛni Kàfɔli wè.

Kulocɛliɛ wi ’Zan yiʔɛ mugu gè a wi ’Zezi nyaa wè

⁹Mi Zan wè, yeli siinyɛni wè, mi yē nɛ pínɛ nɛ wuʔɔ nɛ́ yeli ní kùlofɔligɔ nī gè, weli ’ki kpàri nɛ̀ cò nɛ́ kò pínɛnyɛnigɛ nɛ̄ gè nɛ́ Zezi ní wè. Mi ’puu dàala láà nɛ̄ kuʔɔjii sunʔɔmɔ nī bè, pe ni ye Patimɔsi, Kulocɛliɛ siɛnrɛ ti juʔu kire kɛnmɛ nɛ̄ bè nɛ́ Zezi wori ti jáarigɛ kɛnmɛ nɛ̄ bè. ¹⁰Kàfɔli wi cɛngɛ gè, a Kulocɛliɛ Pìle ni ’mi yiʔɛ múgu gè, a mi kɛ́nì juumɔ páà lúʔu kpuʔɔ mi kàduʔumɛ gè, majo kàkpanʔa pe ’wíi. ¹¹Juumɔ pi siɛnrɛ ti n’dɛ: «Gàa muɔ nɛ nyaʔa gàa gè, -ki sɛbɛ ma tórigo tɛ́ngɛfɔlilɔ gbuʔulo kɔlisiin mɛ́ gèle baa kàaya nyáà mɛ́ yè, yi n’yɛ: Efɛzi, Simirini, Pɛrigami, Tiyatiiri, Saridi, Fiiladɛlifii, nɛ́ Lawodise.»

¹²A mi ’yiʔɛ bè wéli, ŋáa wi ’puu nɛ nyu nɛ́ mi ní wè. Bà sí mi ’yiʔɛ wè, nɛ̀ ki ’nyaa tiɛ fètindaʔaya kɔlisiin. ¹³Fètindaʔaya nyáà yi kɔlisiin sunʔɔmɔ nī bè, wàa ’puu baa nɛ ní Siɛn Pùɔ tíɛlɛ1.13 Wéli baa Dan 7.13.. Wi cé burugbuʔɔ le, nɛ́ ki puɔ sìndinge nī gè nɛ́ tiɛ màʔana ní. ¹⁴Wi nyùgo gè nɛ́ wi nzìire ní dè, ti ’puu nɛ fíligi pérepere, wi nyapigele ní gèle majo kàsunnyige gī. ¹⁵Wi tɔliyɔ yi ’puu nɛ nyíʔɛnɛ nɛ́ ní wɔligiyɔ bɛ̀ kányiɛrɛ tíɛlɛ cɛ̀nrɛ bɛ̀ pe cî ti nyɛgɛ vúguro kàsun nī gè, wi yékpoli ní lè muɔ bé jo lakpoliyo yi nyɛ́ni cuulo. ¹⁶Wi cé ŋɔgɔlɔ kɔlisiin cò wi kàliige nī gè. Yiɛyɛ siin ŋɔsii tàanwa wáà ’puu wi nyuɔ nī gè sìɛnwɛ. Wi kɛnmɛ pi ’puu majo bɛ̀ cɛngɛ ki cî nɛ wáari nɛ́ ki ŋɔri ti mìɛni ní dè.

¹⁷Bà mi ’wi nyaa wè, a mi ’tuu wi tɔliyɔ láara yè nɛ̀ kò bɛ̀ kpúu tíɛlɛ. A wi sí wi kàliige taʔa gè mi nɛ̄ nɛ́ jo: «Fàri fìʔɛ́ʔ, mi wī péliwe wè nɛ́ ní sɛnwɛ wè. ¹⁸Mi yē sìi nɛ̄. Mi cé kùu, ki sí n’gɛ, mi yē sìi nɛ̄ súuri kúɔmɔ fùn, nɛ̀ pínɛ kùu kɔ̀rikaanna lè nɛ́ kusiʔi kɔ̀rikaanna ní lè, mi mɛ́ ke yē.

¹⁹«Ma sí ki sɛbɛ, gàa muɔ ’nyaa gè, nɛ́ kele gílì gīɛlɛ baa gèle, nɛ́ gàa ki bága kpíʔile gè. ²⁰Gìi gī kalarilɛ lè ŋɔgɔlɔ kɔlisiin wori dè, gàli muɔ ’nyaa mi kiyɛ nī yè, nɛ́ tiɛ fètindaʔaya kɔlisiin ní yè, ki n’gɛ: ŋɔgɔlɔ kɔlisiin keli ’nyaa tɛ́ngɛfɔlilɔ gbuʔulo kɔlisiin ke nyìʔɛnɛ tundunminɔ bèle; fètindaʔaya kɔlisiin yire sí yī tɛ́ngɛfɔlilɔ gbuʔulo kɔlisiin gèle.»

Efɛzi kàʔa tɛ́ngɛfɔlilɔ gboli sɛbɛ wè

¹«-Ki sɛbɛ ma tórigo Efɛzi kàʔa tɛ́ngɛfɔlilɔ gboli ni nyìʔɛnɛ tundunwɔ mɛ́ wè, ma wi yɛ: Ŋàa wi ’ŋɔgɔlɔ kɔlisiin cò gèle wi kàliige nī gè, níɛ tári tiɛ fètindaʔaya kɔlisiin sunʔɔmɔ nī bè, wi ’jo:

²«Mi ’muɔ kakpiʔiligele cɛ́n gèle nɛ́ muɔ fùrɔgɔ ní gè, nɛ̀ muɔ lèbaanna wuʔu cɛ́n gè nɛ̀ pínɛ. Mi ’ki cɛ́n muɔ sì ki yaʔa nɛ̀ kɛn siɛnpiile mɛ́ bèleʔ. Nɛ̀ pínɛ bìli pe ’jo peli yē tundunminɔ bèle, muɔ ’pe siʔɛ nɛ̀ wéli nɛ̀ ki ’nyaa pe wè kireʔ; muɔ ’pe nyaa káfinɛrɛfɔlilɔ bīɛlɛ. ³Muɔ yē nɛ́ lèbaanna ní, muɔ ’ki kpàri nɛ̀ cò mi míʔɛ kire kɛnmɛ nɛ̄ bè, muɔ sì kɛ́nì fùrɔ nɛ̀ láʔaʔ.

⁴«Kaala níì sí mi ’cò muɔ kúrugu lè, kire ’nyaa dɛ́nigɛ gáà ki ’kíni nɛ̀ puu muɔ mɛ́ gè, muɔ ’ki yaʔa. ⁵Ma sí muɔ tuugɛnmɛ sɔ̀ngi bè, má sí làa yiʔɛ, ma koli mari kele kúu gèle bɛ̀ muɔ cé séli nɛ ki kpínʔini gè. Á kire ’laa wè, a muɔ sì làa yiʔɛ wèʔ, m’bé kɛ́ baa muɔ kúrugu bè sa muɔ fètindaʔaga sìʔɛrɛ gè ki tiʔɛ nī gè. ⁶Làa sí yē baa, muɔ ’pɔ́ri kire tiɛlɛ nɛ̄ lè, ki ’nyaa Nikola wuulo pe kakpiʔiligele ke ’muɔ biɛn bɛ̀ ke ’mi biɛn nɛ̀ pínɛ gèle.

⁷«A ngbóli yē ŋìi nɛ̄, siɛn wi- ti lúʔu dàa Kulocɛliɛ Pìle niī nɛ nyu tɛ́ngɛfɔlilɔ gbuʔulo mɛ́ gèle. A ŋìi pɛ́nì fànʔa taa nɛ̀ fori wè, m’bága sìi tiige ki yasɛngɛ kɛn gè ki siɛn mɛ́ wè wi- ki káa; kiī baa Kulocɛliɛ tiɛcɛ̀ngɛ nī gè.»

Simirini kàʔa tɛ́ngɛfɔlilɔ gboli sɛbɛ wè

⁸«-Ki sɛbɛ ma tórigo Simirini kàʔa tɛ́ngɛfɔlilɔ gboli ni nyìʔɛnɛ tundunwɔ mɛ́ wè, ma wi yɛ: Ŋàa wī péliwe wè nɛ́ ní sɛnwɛ wè, wi cé kùu wè nɛ́ sí yē sìi nɛ̄ wè, wi ’jo:

⁹«Mi ’ki cɛ́n wuʔɔgɔ gáà gī muɔ nɛ̄ gè, nɛ́ muɔ fɔ̀ngɔ ní gè; nɛ̀ sí ki taa lɔri yē muɔ mɛ́. Nɛ̀ pínɛ bàli pe ’jo peli yē Zuufulo nɛ̀ sí ki yaʔa pe wè kire wèʔ, níɛ muɔ míʔɛ córi gè, mi ’pe cɛ́n. Setɛni gboli wuulo cɛ bīɛlɛ. ¹⁰Fàri fìʔɛʔ wuʔɔgɔ gáà ki báan muɔ mɛ́ gèʔ.

«Ki ’nyaa gbòdolilo kàfɔli wiī nɛ ki caa bè yeli pálì wáa kasuu nī bè yeli siʔɛ bè wéli; yeli bé wuʔɔgɔ suɔ bè taa cɛnyɛ kiɛ. Kò baa muɔ nyayerigele nī gèle bè taa muɔ pa kùu, bà m’bága kpuʔɔrɔ ndɔ̀ngɔ kɛn gè muɔ mɛ́ sìi wuʔu gè.

¹¹«A ngbóli yē ŋìi nɛ̄, siɛn wi- ti lúʔu dàa Kulocɛliɛ Pìle niī nɛ nyu tɛ́ngɛfɔlilɔ gbuʔulo mɛ́ gèle. A ŋìi pɛ́nì fànʔa taa nɛ̀ fori wè, kùu siinwuu wiǐ gbɛ̀ yafiɛn kpíʔile wi nɛ̄ʔ.»

Pɛrigami kàʔa tɛ́ngɛfɔlilɔ gboli sɛbɛ wè

¹²«-Ki sɛbɛ ma tórigo Pɛrigami kàʔa tɛ́ngɛfɔlilɔ gboli ni nyìʔɛnɛ tundunwɔ mɛ́ wè, ma wi yɛ: Ŋàa mɛ́ yiɛyɛ siin ŋɔsii tàanwa wi yē wè, wi ’jo:

¹³«Mi ’muɔ kòridiʔɛ cɛ́n gè: baa Setɛni kácunʔɔ ki yē kire tiʔɛ nī. Nɛ̀ pínɛ muɔ ’fàan mi míʔɛ nɛ̄ gè, muɔ sì kɛ́nì yiri tɛ́ngɛlɛ nī lè mi koligo nī gèʔ, fúɔ nɛ̀ pɛ́nì taa cɛngɛ gíì pe cé kɛ́nì Antipasi kpúu wè; wi cé yéri wi nyayerigele nī gèle nɛ mi wori nyu dè. Kire ’kpíʔile baa yeli sunʔɔmɔ nī bè baa Setɛni wi kòrí wè.

¹⁴«Tiʔɛlɛ kálì sí yē náʔa, fúɔ mi ’yɛli bè ke juu muɔ nɛ̄: ki ’nyaa baa muɔ tiʔɛ nī gè, pàli yē baa, pe ’Balaami tɛnmɛnɛ cò lè nɛ tári ni nɛ̄, bà wi cé juu nɛ̀ le Balaki nī wè nɛ́ wi yɛ wi- pɛnnɛ cáan Isirayɛli pìile yiʔɛ mɛ́ gè, nɛ́ pe kɛn a pe ’yasunro kaara káa dè nɛ́ kanuʔɔrɔ kele kpíʔile gèle2.14 Wéli baa Tɔ́r 25.1-2..

¹⁵«Nɛ̀ pínɛ, pàli yē baa muɔ tiʔɛ nī gè pe ’Nikolayé tɛnmɛnɛ cò lè nɛ tári ni nɛ̄. ¹⁶Ma sí yiʔɛ muɔ fungo nī gè, á kire ’laa wè m’bága fuu bè pɛn muɔ kúrugu, m’bé sí pa kapiɛnnɛ tún nɛ́ pe ní nɛ́ ŋɔsii ní wè, ŋàa wī náʔa mi nyuɔ nī gè.

¹⁷«A ngbóli yē ŋìi nɛ̄, siɛn wi- ti lúʔu dàa Kulocɛliɛ Pìle niī nɛ nyu tɛ́ngɛfɔlilɔ gbuʔulo mɛ́ gèle. A ŋìi kɛ́nì fànʔa taa nɛ̀ sɛ́nì fori wè, mana ŋáà wī làriwɛ wè, m’bé wi kɛn ki siɛn mɛ́ wè. Nɛ̀ pínɛ m’bé sìndɛnibifiile kɛn ki siɛn mɛ́ wè. Míɛfɔngɔ káà yē baa sɛbɛgɛ ki sìndɛnibile nɛ̄ lè; siɛn sì ki cɛ́nʔ nɛ̀ yiri ŋàa wi ’ki míʔɛ taa gèʔ.»

Tiyatiiri kàʔa tɛ́ngɛfɔlilɔ gboli sɛbɛ wè

¹⁸«-Ki sɛbɛ ma tórigo Tiyatiiri kàʔa tɛ́ngɛfɔlilɔ gboli ni nyìʔɛnɛ tundunwɔ mɛ́ wè, ma wi yɛ: ‹Ti n’dɛ dàa Kulocɛliɛ Jaa wi ’juu dè; wi nyapigele kiyē majo kàsunnyige gī, á wi tɔliyɔ ní yè bɛ̀ kányiɛrɛ tíɛlɛ bɛ̀ pe sî ti nyɛgɛ á ti nìɛ nyíʔɛnɛ dè.

¹⁹« ‹Mi ’muɔ kakpiʔiligele cɛ́n gèle, nɛ́ muɔ dɛ́nigɛ ní gè, nɛ́ muɔ tɛ́ngɛlɛ ní lè, nɛ́ muɔ baara ní dè, nɛ́ muɔ kpàricogo ní gè, nɛ́ kakuʔɔlɔ gálì muɔ nɛ kúu píra ŋáà nī wè á ke ’niʔɛ nɛ̀ tóri péligele nɛ̄ gèle.

²⁰« ‹Kaala láà sí yē náʔa, m’bé ni juu muɔ nɛ̄: Ki ’nyaa cɛliwɛ ŋáà pe ye Zezabɛli wè, wi ’jo wire yē Kulocɛliɛ siɛnjuuwo wè, muɔ ’wi yaʔa wìimɛ wi- mi baakuɔlɔ tɛnmɛ bèle nɛ pe fáanni nɛ pùunní pe kanuʔɔrɔ kele kúu níɛ yasunro kaara káa dè. ²¹Mi nyɛ́nì lɛ̀lɛ yaʔa wi mɛ́ gìi ki bé tí wi- yiʔɛ wi fungo nī gè, nɛ̀ sí ki taa wi wè caa bè láʔa wi kanuʔɔrɔ nɛ̄ dèʔ. ²²Ma sí nyaa, m’bé yaabiimɛ wáa wi nɛ̄ wi- kò yaala yasinɛgɛ nɛ̄, nɛ̀ pínɛ m’bé wuʔɔgbuʔɔ taʔa pe nɛ̄ bàli pe nyɛ́ni cúʔɔmɔ kele kúu gèle nɛ́ wi ní wè, a piyè láʔa wi kakpiʔiligele nɛ̄ gèleʔ. ²³Nɛ̀ pínɛ m’bé wi pìile pe sìi kúɔ wè, bɛ̀ tɛ́ngɛfɔlilɔ gbuʔulo ke mìɛni bé ki cɛ́n mi mi nyɛ́ni nyaʔa siɛn sɔ̀ngirɔ nī dè nɛ́ siɛn fungo nī gè. M’bága ye mìɛni nigbe nigbe sàri bè yɛli nɛ́ ye kakpiʔiligele ní gèle.

²⁴« ‹M’bé sí ki juu yeli mɛ́ yeli sɛnminɛ bálì bīɛlɛ baa Tiyatiiri kàʔa mɛ́ gè yiyè taʔa ki cuɔ ŋáà wi tɛnmɛnɛ nɛ̄ lèʔ, nɛ̀ pínɛ yeli sì ki cɛ́nʔ gàa pe ye Setɛni kalarikpoliyo yèʔ, kire nɛ̄ mi sǐ ní tugoro táà taʔa yeli nɛ̄ʔ. ²⁵Gìi gī yeli mɛ́ nɛ̀ kúɔ gè, ye- ki cò kpuʔɔ fúɔ bè taa mi ga pɛn.

²⁶« ‹A ŋìi kɛ́nì fànʔa taa nɛ̀ pɛ́nì fori wè, níɛ mi nyɛ́ni kele kúu gèle fúɔ nɛ̀ pɛ́nì nɔ̀ láʔala nɛ̄ lè, m’bé ki fànʔa kɛn gè siɛn mɛ́ wè wi- puu kùlogolo ke nyùgo nɛ̄ gè.

²⁷Bɛ̀ wi béri kùlogolo nári gèle

nɛ́ timɔri kàgbiile ní,

majo bɛ̀ pe sî cuʔu yakpiʔilige

muʔɔrɔ gè kɛnmɛ bíì nɛ̄ bè2.27 Wéli baa Ŋún 2.8-9..

²⁸« ‹Kɛnmɛ bíì nɛ̄ mi ’ki taa mi Tuu mɛ́ wè, bɛ̀ míɛni m’bága kpìɛnduumɛ ŋɔnɔ̀ kɛn lè ki siɛn mɛ́ wè.

²⁹« ‹A ngbóli yē ŋìi nɛ̄, wi- ti lúʔu dàa Kulocɛliɛ Pìle niī nɛ nyu tɛ́ngɛfɔlilɔ gbuʔulo mɛ́ gèle.› »

Saridi kàʔa tɛ́ngɛfɔlilɔ gboli sɛbɛ wè

¹«-Ki sɛbɛ ma tórigo Saridi kàʔa tɛ́ngɛfɔlilɔ gboli ni nyìʔɛnɛ tundunwɔ mɛ́ wè, ma wi yɛ: Ŋàa mɛ́ Kulocɛliɛ pígele kɔlisiin ke yē gèle nɛ́ ŋɔgɔlɔ kɔlisiin ní gèle, wi ’jo:

«Mi nyɛ́nì muɔ kakpiʔiligele cɛ́n gèle, muɔ míʔɛ ki ’yiri a pe ’jo muɔ yē wiiwe, nɛ̀ sí ki taa muɔ yē kùuwo wī. ²Yɛ̀ ma yéri díɛ, má sí ŋɔri nyɔ́gɔ bìli sɛnminɛ nī bèle pe ’kò cɛ̀ri bè kùu bèle. Á kire ’laa wè, mi ’ki nyaa muɔ kakpiʔiligele kiyè nyuɔ nɛ̀ fori mi Kulocɛliɛ yiʔɛ mɛ́ gèʔ.

³«Kire nɛ̄, ma sí sɔ̀ngi ma taa tɛnmɛnɛ náà muɔ ’taa lè nɛ́ gìi ’muɔ lúʔu gè; -ti cò má sí làa yiʔɛ. Á kire ’laa wè, a muɔ sì yɛ̀ nɛ̀ yéri wèʔ, m’bága pɛn bɛ̀ kàyuuwo tíɛlɛ; muɔ sǐ ki cɛ́nʔ lɛ̀lɛ níì nī m’bága pa muɔ fuu wèʔ. ⁴Nɛ̀ sí ki taa siɛnnɛ pálì cɛ̀ri yē baa muɔ mɛ́ Saridi kàʔa nī gè, piyè pe burudo núʔɔ dèʔ. Peli bèle, pe bága de tári nɛ́ mi ní nɛ́ yafiire ní, nɛ̀ taʔa gíi nɛ̄, pe nyɛ́nì yɛli nɛ́ ki ní.

⁵«A ŋìi kɛ́nì fànʔa taa nɛ̀ jáa nɛ̀ pɛ́nì fori wè, bɛ̀ wi bé yafiire le; miǐ wi míʔɛ kurugo gè bè láʔa sìi sɛbɛ nī wèʔ, nɛ̀ pínɛ m’bé wi wori juu dè mi Tuu wi yiʔɛ mɛ́ gè nɛ́ wi nyìʔɛnɛ tundunminɔ pe yiʔɛ mɛ́ gè.

⁶«A ngbóli yē ŋìi nɛ̄, siɛn wi- ti lúʔu dàa Pìle niī nɛ nyu tɛ́ngɛfɔlilɔ gbuʔulo mɛ́ gèle.»

Fiiladɛlifii kàʔa tɛ́ngɛfɔlilɔ gboli sɛbɛ wè

⁷«-Ki sɛbɛ ma tórigo Fiiladɛlifii kàʔa tɛ́ngɛfɔlilɔ gboli ni nyìʔɛnɛ tundunwɔ mɛ́ wè, ma wi yɛ: Ŋàa wī tiɛlɛ fùn wè, wiī kányiʔɛ gè, Dawuda kɔ̀rikaanna niī wi mɛ́; a wi ’kɔ̀ri múgu gè siɛn sǐ gbɛ̀ ki tɔ́nʔ, a wi ’ki tɔ́n, siɛn sǐ gbɛ̀ ki múguʔ, wire ’wi jo:

⁸«Mi ’muɔ kakpiʔiligele cɛ́n gèle. Nyaa, mi nyɛ́nì kɔ̀ri káà yérige muɔ yiʔɛ mɛ́ gè; kiī múguyaʔaga, siɛn sǐ gbɛ̀ jáa bè ki tɔ́nʔ. Muɔ ŋɔri ti ’tɔ̀ni nɛ̀ cɛ́ri, kire nɛ́ ki mìɛni ní a muɔ ’mi siɛnrɛ cò dè, muɔ sì mi míʔɛ cíi gèʔ. ⁹Nyaa, m’bé Setɛni gboli wuulo pálì kɛn muɔ mɛ́, bàli pe ’jo peli yē Zuufulo bèle nɛ̀ sí ki yaʔa pe finɛnɛ wī, pe wè kireʔ. Pe bé pa pìye cáan muɔ tɔliyɔ láara yè bèri muɔ gbùʔɔrɔ́, bɛ̀ pe bé ki cɛ́n muɔ woli ni ’mi dɛ́ni.

¹⁰«Bɛ̀ muɔ ’lèbaanna le nɛ̀ mi siɛnrɛ cò dè wè, bɛ̀ mìɛni m’bága de muɔ wéli a puuwelige lɛ̀lɛ ni kɛ́nì nɔ̀ lè. Ki lɛ̀lɛ niī nɛ báan, ni bága pa tuu duniya wuulo pe míɛni nɛ̄ bèle, bè wuʔɔgɔ cáan dàala wuulo nɛ̄ bèle. ¹¹Ki ’kò cɛ̀ mi nɛ báan baa. Tɛnmɛnɛ náà muɔ ’taa lè, -ni cò cɛ̀ngɛ; siɛn fǎga muɔ kpuʔɔrɔ ndɔ̀ngɔ suɔ gè muɔ mɛ́ʔ.

¹²«A ŋìi kɛ́nì jáa nɛ̀ pɛ́nì paʔa wè, m’bé wi kpíʔile mi Kulocɛliɛ Gbùʔɔrɔsaʔa ki gèdinnɛ lè; wiǐ ní ga yiri kpànʔanɛ cíginiʔ. Nɛ̀ pínɛ m’bága mi Kulocɛliɛ wi míʔɛ sɛbɛ gè ki siɛn nɛ̄ wè nɛ́ mi Kulocɛliɛ kàʔa ki míʔɛ ní gè bè pínɛ, kire ’jo Zerizalɛmi kàfɔngɔ gáà ki je ga kɔ́n baa nyìʔɛnɛ nī lè mi Kulocɛliɛ wi tiʔɛ nī gè bè tìgi gè; m’bága mi míɛfɔngɔ sɛbɛ gè ki siɛn nɛ̄ wè bè pínɛ.

¹³«A ngbúʔulo yē ŋìi nɛ̄, siɛn wi- ti lúʔu dàa Kulocɛliɛ Pìle niī nɛ nyu tɛ́ngɛfɔlilɔ gbuʔulo mɛ́ gèle.»

Lawodise kàʔa tɛ́ngɛfɔlilɔ gboli sɛbɛ wè

¹⁴«-Ki sɛbɛ ma tórigo Lawodise kàʔa tɛ́ngɛfɔlilɔ gboli ni nyìʔɛnɛ tundunwɔ mɛ́ wè, ma wi yɛ: Ŋàa pe ye Kitaabuubɛ wè, nɛ́ ní kijuufɔli wè, nɛ́ ní tɛ́ngɛmɛ siɛn kányiʔɛfɔli wè, wire wī Kulocɛliɛ yafaanra ti nyùgo gè, wi ’jo:

¹⁵«Mi ’muɔ kakpiʔiligele cɛ́n gèle, nɛ̀ ki cɛ́n muɔ wè nyíwɛʔ, muɔ sí ní wè sícaʔawaʔ. Kire kaala sî ní cɛ pɔ́ri ma cé puu nyíwɛ, á kire ’laa ma cé puu sícaʔawa.

¹⁶«Bɛ̀ sí muɔ ’kò wúlɔmiwulɔmi wè, muɔ wè sícaʔawaʔ, muɔ sí ní wè nyíwɛ wèʔ, kire nɛ̄ m’bé muɔ tùbu bè yige. ¹⁷Nɛ̀ taʔa gíi nɛ̄, muɔ nɛ ki nyu nɛ́ jo muɔ yē yakaafɔli, dí lɔri yē muɔ mɛ́, muɔ màakuu wè yafiɛn nɛ̄ʔ. Nɛ̀ sí ki taa muɔ sì ki cɛ́n muɔ yē fuunmɔ nī wīʔ, muɔ yē nyinimɛ wuu. Fɔ̀ngɔfɔli muɔ yē, nɛ ní fúɔn, nɛ ní bòribiɛ. ¹⁸Tí m’bé muɔ yɛri yo: pa tiɛ suɔ mi mɛ́ ŋàa pe ’nyɛgɛ kàsun nī a wi ’cìile wè, bɛ̀ muɔ bé kò lɔrifɔli. Má sí yafiire suɔ ma le mìɛ nɛ̄ ma muɔ fìɛrɛ tiʔɛ tɔ́n gè, má sí nyapigele tiiluʔɔ suɔ ma le muɔ nyapigele nɛ̄ gèle, bɛ̀ muɔ béri nyaʔa.

¹⁹«Mi wè, bìli pe mìɛni bīɛlɛ pe ’mi dɛ́ni bèle, mi nìɛ pe cɔ̀rí nɛ pe nii koligo nī. Ma sí cáʔara ma làa yiʔɛ díɛ ! ²⁰Nyaa, mi yē náʔa yériwe kɔ̀ri ki wìile nɛ̄ lè, níɛ ki kóli. A ŋìi kɛ́nì mi juumɔ lúʔu bè nɛ́ kɔ̀ri múgu gè, bɛ̀ m’bé jíin ki siɛn kúrugu wè bè lìi nɛ́ wi ní; wire míɛni wi bé lìi nɛ́ mi ní.

²¹«A ŋìi kɛ́nì jáa nɛ̀ sɛ́nì nɔ̀ ki kúɔmɔ nɛ̄ bè, bɛ̀ m’bága tɛ́nidiʔɛ kɛn wi mɛ́ wi- puu nɛ́ mi ní mi kùlofɔligɔ kácunʔɔ nɛ̄ gè, majo bɛ̀ mi mìɛni wè mi ’fànʔa taa nɛ̀ jáa wè, nɛ́ tɛ́ni nɛ́ mi Tuu ní wè wi kùlofɔligɔ kácunʔɔ nɛ̄ gè.

²²«A ngbúʔulo yē ŋìi nɛ̄, wi- ti lúʔu dàa Kulocɛliɛ Pìle nii nɛ nyu tɛ́ngɛfɔlilɔ gbuʔulo mɛ́ gèle.»

Piyē nɛ Kulocɛliɛ gbùʔɔrɔ́ wè baa nyìʔɛnɛkaʔa nī gè

¹Bà tire ’tóri dè, a mi ’kɔ̀ri káà nyaa múguyaʔaga baa nyìʔɛnɛ nī lè; a ki ’nyaa juumɔ báà mi cé kíni nɛ̀ lúʔu bè, ki ní bɛ̀ kàkpanʔa wíimɛ tíɛlɛ bè, a ki yékpoli ni ’juu nɛ́ mi ní nɛ́ jo: «Te tári náʔa; kele gílì ke bága tóri gàa kàduʔumɛ gè, m’bé ke tìɛ muɔ nɛ̄.»

²A Kulocɛliɛ Pìle ni ’fali nɛ̀ mi yiʔɛ múgu gè, a mi ’kùlofɔlilɔ kácunʔɔ káà nyaa wálilɛ baa nyìʔɛnɛ nī lè, siɛn wáà ní tɛ́niwɛ ki nɛ̄. ³Ŋàa wi ’puu tɛ́niwɛ kùlofɔlilɔ kácunʔɔ nɛ̄ gè, wi ’puu nɛ nyíʔɛnɛ bɛ̀ jasipi kàdɛnigɛ tíɛlɛ nɛ́ bɛ̀ sariduwani kàdɛnigɛ tíɛlɛ, á kàsaŋɔnɔ láà ’kácunʔɔ màʔa gè nɛ̀ suʔu, ni ’puu bɛ̀ ɛmɛrɔdi kàdɛnigɛ tíɛlɛ.

⁴Kùlofɔlilɔ kácuɔnyɔ togo nɛ́ sicɛri cé ki kácunʔɔ gáà màʔa gè nɛ̀ suʔu, liɛlɛ togo nɛ́ sicɛri ní tɛ́ninɛ ki kácuɔnyɔ nɛ̄ yè nɛ́ buruviire ní, kpuʔɔrɔ ndɔ̀nyɔ ní pe nɛ̄ nyùyɔ nɛ̄ yè, tiɛ ndɔ̀nyɔ yi ’puu. ⁵Nyìʔɛnɛ ni ’puu nɛ nyíʔɛnɛ, tùnmɔ páà ’puu baa, kàsakpɛnigɛ ’puu nɛ kpɛ̀ní baa kùlofɔlilɔ kácunʔɔ ki tiʔɛ nī gè. Nɛ̀ pínɛ kàsunnyige fètingele kɔlisiin ’puu nɛ nyí baa kácunʔɔ ki yiʔɛ mɛ́ gè; Kulocɛliɛ pígele kɔlisiin keli gīɛlɛ. ⁶Kùlofɔlilɔ kácunʔɔ ki yiʔɛ mɛ́ gè kuʔɔjii wáà ’puu baa cìiliwe yéliyeli nɛ wéli nɛ sùurí ki nī bɛ̀ kirisitali kàdɛnigɛ tíɛlɛ. Yawiiye sicɛri ’puu kácunʔɔ ki laamɛ nī bè nɛ̀ ki màʔa nɛ̀ suʔu, nyapigele ní yi nɛ̄ nɛ̀ màʔa yiʔɛmɛ gè nɛ́ kàduʔumɛ gè.

⁷Yawiʔi pélige ki ’puu bɛ̀ jàri tíɛlɛ, siinwuʔu ní gè bɛ̀ nɛ̀piɛyɛlilɛ tíɛlɛ, taanriwuʔu ki ’puu nɛ́ siɛn yiʔɛ ní, yawiʔi sicɛriwuʔu ki ’puu bɛ̀ nyùɔ tíɛlɛ wi ní nɛ lali. ⁸Yawiiye sicɛri yi mìɛni ’puu nɛ́ fíkɛnyɛ kɔlini kɔlini ní, nyapigele ní fíkɛnyɛ nɛ̄ yè tiɛyɛ yi mìɛni nī, kàli ní fíkɛnyɛ láara yè. Pìlige nɛ́ cɛnvugo, yiì ’puu nɛ pìirí nɛ nyaʔaʔ, yi ’puu nɛ ki nyu níɛ waa:

«Wiī tiɛlɛ fùn !

Wiī tiɛlɛ fùn !

Wiī tiɛlɛ fùn !

Kàfɔli Kulocɛliɛ,

wire wī Fànʔa

ki mìɛni Kàfɔli wè !

Wire wi ’kíni yē baa !

Wiī bile !

Wiī nɛ báan baa !»

⁹Ŋàa wī baa tɛ́niwɛ kùlofɔlilɔ kácunʔɔ nɛ̄ gè, nɛ ní sìi nɛ̄ lɛ̀gɛlɛ ke mìɛni nī gèle, a yawiiye nyáà yi sí gbɛ̀nɛ wi gbùʔɔrɔ́ níɛ wi kpóri wè, nɛ wi síɛri wè, ¹⁰liɛlɛ togo nɛ́ sicɛri bálì pe nɛ̂ tìgi nɛ̀ yiɛyɛ cúbulo yè dàala nɛ̄ lè wi yiʔɛ mɛ́ gè nɛ wi gbùʔɔrɔ́, wire ŋáà wī sìi nɛ̄ lɛ̀gɛlɛ ke mìɛni nī súuri wè, níɛ̀ pe ndɔ̀nyɔ láʔala yè nɛ̀ cáan kùlofɔlilɔ kácunʔɔ ki yiʔɛ mɛ́ gè níɛ̀ nɛ ki nyu níɛ̀ jo:

¹¹«Weli Kàfɔli Kulocɛliɛ, muɔ ’yɛli weri muɔ gbùʔɔrɔ́,

weri kpuʔɔrɔ tari muɔ nɛ̄;

muɔ ’yɛli we- fànʔa kɛn gè muɔ mɛ́.

Nɛ̀ taʔa gíi nɛ̄, muɔ ma yɛrɛ ti mìɛni faan,

nɛ̀ pínɛ muɔ nyɛ́ni kaala lire ni ’ti yige bile,

kire ki ’tí a ti ’faan.»

Sìnbapile náà ni ’sɛbɛ sáʔala wè kpuʔɔrɔ ti ’yɛli ni nɛ̄

¹Ŋàa wi ’puu tɛ́niwɛ kùlofɔlilɔ kácunʔɔ nɛ̄ gè, a mi ’sɛbɛkuruwo wáà nyaa wi mɛ́ kàliige nī gè, yasɛbɛrɛ ní baa wi laamɛ nī bè, tàa ní wi kàduʔu nɛ̄ gè, á yasuʔɔgɔlɔ kɔlisiin ní wi nɛ̄. ²A mi ’fali nɛ̀ nyìʔɛnɛ tundunwɔ wáà nyaa, wi ’puu nɛ́ fànʔa ní. A wire ’ki jáari yékpogbuɔlɔ nī nɛ́ jo: «Ŋáasiɛn wi ’nyuɔ nɛ̀ yɛli bè gbɛ̀ jáa bè sɛbɛkuruwo ŋáà wi yasuʔɔgɔlɔ múgolo gèle, bé sí wi sáʔala wè ?»

³Ki siɛn wiì taaʔ, ma ’jo nyìʔɛnɛ nī yo, dàala nɛ̄ yo, dàala laamɛ nī yo, siɛn sì taaʔ ŋàa wi bé gbɛ̀ sɛbɛkuruwo sáʔala wèʔ, bé nɛ́ ga cɛ jo bè wéli baa wi laamɛ nī bèʔ.

⁴A kire mi ’kɛn a mi ’nyɛni nìʔɛgɛ, bɛ̀ ki ’nyaa siɛn sì taaʔ ŋàa wi ’nyuɔ nɛ̀ yɛli bè gbɛ̀ sɛbɛkuruwo sáʔala wèʔ, bé nɛ́ ga jo bè nyaa wi laamɛ nī bèʔ. ⁵Liɛlɛ nī bèle, a wàa ’mi yɛ: «Fǎri nyɛniʔ. Nyaa, jàri ŋáà wi ’yiri Zuda saʔa tùlugo nī gè, Dawuda siimɛ tùlugo wuu wè, wi nyɛ́nì fànʔa taa nɛ̀ jáa5.5 wi nyɛ́nì fànʔa taa nɛ̀ jáa: Tiɛlɛ náà ni siɛnrɛ tiī nɛ nyu bɛ̀ Zezi ’kùu tiiparigɛ nɛ̄ gè, nɛ́ koli nɛ̀ nyɛ́ wè, wi ’kùu jáa wè., wi bé sɛbɛkuruwo sáʔala wè nɛ́ wi yasuʔɔgɔlɔ kɔlisiin ní gèle.»

⁶A mi ’Sìnbapile láà nyaa yérile kùlofɔlilɔ kácunʔɔ ki sunʔɔmɔ nī bè, yawiiye sicɛri sunʔɔmɔ nɛ́ liɛlɛ pe sunʔɔmɔ nī bè, ni ’puu majo pe cé kíni nɛ̀ ni kpúu wī. Nyɛgɛlɛ kɔlisiin ’puu ni nɛ̄, nɛ́ nyapigele kɔlisiin ní; nyapigele kɔlisiin keli gīɛlɛ Kulocɛliɛ pígele gàli wi ’tórigo duniya wi mìɛni nī wè.

⁷Ŋàa wi ’puu tɛ́niwɛ kùlofɔlilɔ kácunʔɔ nɛ̄ gè, a Sìnbapile ni ’pɛn nɛ̀ pɛ́nì sɛbɛkuruwo suɔ wè wi mɛ́ wi kàliige nī gè.

⁸Bà wi ’sɛbɛ suɔ wè, a yawiiye sicɛri yè, nɛ́ liɛlɛ togo nɛ́ sicɛri ní bèle, a pe ’tuu nɛ̀ yiɛyɛ cúbulo yè Sìnbapile ni yiʔɛ mɛ́ gè. Gɔrilɔ ’puu pe mìɛni nigbe nigbe mɛ́ bèle nɛ́ tiɛ yagbuʔɔlɔ ní, nùdaanna wusuna ’puu ke nī nɛ̀ ke nyì; Kulocɛliɛ wuulo pe náariyɛ yire yī. ⁹A pe ’yɛ̀ nɛ̀ ŋúnugo káà le nɛ ŋú ŋúnuvɔngɔ ki ’puu, níɛ waa:

«Muɔ wī

ma ’nyuɔ nɛ̀ yɛli

bè gbɛ̀ sɛbɛ suɔ wè

bé sí wi yasuʔɔgɔlɔ múgolo gèle.

Nɛ̀ taʔa gíi nɛ̄, muɔ cé kùu,

a kire ’ki kɛn

muɔ sìsiɛn kire fànʔa nɛ̄ gè

a muɔ ’siɛnnɛ suɔ

nɛ̀ kɛn Kulocɛliɛ mɛ́ wè,

siɛnnɛ feliye yi mìɛni yè,

siɛnrɛ felide

ti mìɛni wuulo bèle,

nɛ́ kùlogolo

ke mìɛni ní gèle,

nɛ́ duniya siɛnfeliye

yi mìɛni ní yè.

¹⁰Muɔ pe ’kpíʔile

kùlofɔligɔ wuulo

pe ní kacuɔnrilɔ

Kulocɛliɛ mɛ́ wè;

pe bága de fànʔa kpúɔn

dàala wuulo nɛ̄ bèle.»

¹¹A mi ’kire gáà nyaa gè, nɛ́ ń’nɛ̀ nyìʔɛnɛ tundunminɔ yékpuʔulo lúʔu; pe ’puu nìʔɛnɛ wī nɛ̀ kùlofɔlilɔ kácunʔɔ màʔa gè, nɛ́ yawiiye ní yè, nɛ́ liɛlɛ ní bèle. Pe yé niʔɛ nɛ̀ siramuʔɔyɔ nyuɔ kúɔ, ¹²níɛ ki nyu kpuʔɔ níɛ waa:

«Sìnbapile náà pe ’kpúu lè,

fànʔa ki ’yɛli ni nɛ̄, nɛ́ lɔri ní dè,

nɛ́ sícilige ní gè, nɛ́ ŋɔri ní dè,

nɛ́ kpuʔɔrɔ ní dè nɛ́ kpuɔmɔ ní bè,

nɛ́ gbùʔɔrigɔ ŋúnudo ní dè.»

¹³Yafaanra díì ti mìɛni dī baa nyìʔɛnɛ nī lè, nɛ́ dàa dī dàala nɛ̄ lè, nɛ́ dìi dī dàala laamɛ nī bè, nɛ́ dìi dī kuʔɔjiile nī bèle, ki ’nyaa duniya yafaanra ti mìɛni dè, a mi ’ti juumɔ lúʔu bè a ti ’jo:

«Ŋàa wī tɛ́niwɛ kùlofɔlilɔ kácunʔɔ nɛ̄ gè, wire nɛ́ Sìnbapile ní lè,

gbùʔɔrigɔ ŋúnudo ti ’yɛli pe nɛ̄, nɛ́ kpuʔɔrɔ ní dè,

nɛ́ kpuɔmɔ ní bè, nɛ́ fànʔa ní gè lɛ̀gɛlɛ ke mìɛni nī súuri.»

¹⁴A yawiiye sicɛri yi ’jo: «Ki- taa ki puu bɛ̀ !» A liɛlɛ pe ’tìgi nɛ̀ yiɛyɛ cúbulo yè nɛ̀ wi gbùʔɔrɔ.

Yasuʔɔgɔlɔ kɔlini wori dè

¹Kire kàduʔumɛ gè, a mi ’Sìnbapile nyaa lè lɛ̀lɛ níì nī ni ’sɛbɛ wi yasuʔɔlɔ pélile múgu lè yasuʔɔgɔlɔ kɔlisiin nī gèle. A mi ’yawiʔi káà nigbe juumɔ lúʔu yawiiye sicɛri sunʔɔmɔ nī bè, muɔ bé jo kàsakpɛnigɛ gī, a ki ’jo: «Te báan !»

²Bà mi je wéli wè, nɛ̀ suɔnfiige nyaa. Ŋàa wi ’puu ki nɛ̄ tánʔadɛniwɛ wè, sandaligɛ ’puu wi mɛ́ á pe sí kpuʔɔrɔ ndɔ̀ngɔ kɛn wi mɛ́. Bà wi sí yē jáafɔli wè, a wi ’kɛ́ kapiɛnnɛ mɛ́ lè bè sa ni jáa.

³Bà Sìnbapile ni kɛ́nì yasuʔɔlɔ siinwoli múgu lè, a mi ’lúʔu yawiʔi siinwuʔu mɛ́ gè a ki ’jo: «Te báan !»

⁴A sunʔɔ káà ń’nɛ̀ yiri, nyìʔɛ sɛ́nisɛni. Ŋàa wi ’puu ki nɛ̄ tánʔadɛniwɛ wè, pe cé wi kɛn nɛ́ ŋɔsii kpuɔwɔ ní, nɛ̀ pínɛ fànʔa ’puu ki siɛn mɛ́ wè wi- gbɛ̀ jáa bè yanyige yige gè dàala nī lè dí siɛnnɛ pe sí de pìye kpúu.

⁵Bà Sìnbapile ni kɛ́nì yasuʔɔlɔ taanriwoli múgu lè, a mi ’lúʔu yawiʔi taanriwuʔu mɛ́ gè a ki ’jo: «Te báan !»

Bà mi je wéli wè, nɛ̀ ki ’nyaa suɔnwuʔɔ, ŋàa wi ’puu ki nɛ̄ tánʔadɛniwɛ wè, culo ’puu wi mɛ́ còwo kɔli nī gè.

⁶A mi ’juumɔ páà lúʔu bɛ̀ yékpoli tíɛlɛ, baa yawiiye sicɛri sunʔɔmɔ nī bè, a ki ’jo: «Bíle yalenyɛnɛ, kire ’nyaa baakuɔwɔ cɛnbogo sàri6.6 baakuɔwɔ cɛnbogo sàri: Girɛki siɛnrɛ nī dè ti ’jo «denari». ! Yaliire táà yalenyiʔɛnɛ taanri, baakuɔwɔ cɛnbogo sàri wáà ! Gìi sí ki ’sùnmɔ kúɔ bè, nɛ́ diviɛn ní wè, fǎga ti cúʔɔʔ.»

⁷Bà Sìnbapile ni kɛ́nì yasuʔɔlɔ sicɛriwoli múgu lè, a mi ’yawiʔi sicɛriwuʔu ki juumɔ lúʔu bè a ki ’jo: «Te báan !»

⁸Bà mi je wéli wè, nɛ̀ sunʔɔ káà nyaa ki ní nyàpirige céri. Ŋàa wi ’puu ki nɛ̄ tánʔadɛniwɛ wè, wi míʔɛ gè: Kùu; ŋàa pe ye Kusiʔi gè, á wire ’taʔa wi nɛ̄. Fànʔa ki cé kɛn ti mɛ́ ti- gbɛ̀ jáa dàala tílaya sicɛri tiʔɛ nigbe wuulo nɛ̄ bèle, bè pe kpúu nɛ́ ŋɔsii ní, nɛ́ funduuro ní, nɛ́ yaabiimɛ ní, nɛ́ nyàʔa yajuupiire ní dè dàala nɛ̄ lè.

⁹Bà Sìnbapile ni kɛ́nì yasuʔɔlɔ kogunɔwoli múgu lè, bìli pe cé kpúu Kulocɛliɛ siɛnrɛ ti kɛnmɛ nɛ̄ bè, nɛ́ pe wojuuro ti kɛnmɛ nɛ̄ bè, a mi ’pe pìgele nyaa gèle baa gbùʔɔrɔdiʔɛ yafanʔa láara gè. ¹⁰A pe ’ki juu kpuʔɔ nɛ́ jo: «Kàfɔli, muɔ yē tiɛlɛ fùn nɛ́ ní kányiʔɛ wuu wè ! Gáa lɛ̀lɛ nī muɔ bága pa kàyuʔu juu gè, bé sí ki fuʔɔ tɔ́n gè dàala wuulo mɛ́ bèle bɛ̀ pe ’weli kpúu wè ?»

¹¹A pe ’pe mìɛni nigbe nigbe kɛn nɛ́ burugboliyo fìiye ní, nɛ́ sí pe yɛ pe- ŋɔ́ pe taa cɛ̀, fúɔ bè taa bìli pe ’yɛli bága kpúu bɛ̀ pe tíɛlɛ bèle, pe baakuɔnyɛninɛ nɛ́ pe siinyɛninɛ bèle, pe nyuɔ ki- pa nyì.

¹²A mi ’ki nyaa bà Sìnbapile ni cé yasuʔɔlɔ kɔliniwoli múgu lè, a dàala ni ’cúngo kpuʔɔ, a cɛngɛ ki ’yiʔɛ nɛ̀ wúɔ bɛ̀ fɛ̀ni wuʔɔ tíɛlɛ, á yege ki mìɛni yiʔɛ nɛ̀ ’kò bɛ̀ sìsiɛn tíɛlɛ. ¹³A ŋɔgɔlɔ ke ’tìgi nyìʔɛnɛ nī lè nɛ̀ tuu dàala nɛ̄ lè, majo káfaligbuʔɔ ki nyɛ́ni sàanfiidiige yasɛnrɛ gbègbere kɔni nɛ ŋu. ¹⁴A nyìʔɛnɛ ni ’kúlolo nɛ̀ láʔa nɛ̀ fali majo bɛ̀ pe sî kaliwɛgɛ kùru nɛ̀ tɔ́n wè. Nɛ̀ pínɛ nyagurugo ó nyagurugo, nɛ́ dàala ó dàala luʔɔ sunʔɔmɔ nī bè, a ti mìɛni ’yɛ̀ ti yéridiɛyɛ nī yè.

¹⁵Píra ŋáà nī wè, kùlofɔlilɔ bèle, nɛ́ siɛnkpolilo ní bèle, nɛ́ kapiɛngbuɔnnɔ kàfɔlilɔ ní bèle, nɛ́ lɔrifɔlilɔ ní bèle, nɛ́ bìli bīɛlɛ ŋɔri ní dè, sùkulolo yo, bìli bīɛlɛ pìyemɛ yo, a pe sɛ́nì làri kàwiiye nī nɛ́ nyaguruyo sìndɛnigbaʔala sunʔɔmɔ nī. ¹⁶Nɛ́ juu nɛ́ nyaguruyo ní yè nɛ́ sìndɛnigbaʔala ní gèle nɛ́ ti yɛ: «Ye- tìgi ye tuu weli nɛ̄, ye- weli làrigɛ, ŋàa wī tɛ́niwɛ kùlofɔlilɔ kácunʔɔ nɛ̄ gè wi fǎga weli nyaaʔ, nɛ̀ pínɛ Sìnbapile ni funyɛrigɛ ki fǎga nɔ̀ weli nɛ̄ʔ. ¹⁷Nɛ́ ki cɛ́n pe funyɛrigbuʔɔ cɛngɛ kire ki ’nɔ̀; ŋáasiɛn sí wi bé gbɛ̀ yéri bè ki sige ?»

Pe ’fìɛlɛ tɛ́ngɛ Kulocɛliɛ wuulo gbɛgɛlɛ nɛ̄ gèle

¹Bà kire ’kúɔ gè, a mi ’nyìʔɛnɛ tundunminɔ sicɛri nyaa yérile dàala kàluʔulo sicɛri nī gèle. Pe cé dàala káfaliyɛ sicɛri cò yè nɛ̀ yérige gìi ki bé tí káfaligɛ fǎga de wáari dàala nɛ̄ lèʔ, ki fǎga de wáari kuʔɔjii nɛ̄ wèʔ, ki fǎri wáari tiige káà fáala nɛ̄ʔ.

²A mi ní nɛ̀ nyìʔɛnɛ tundunwɔ wáà wiiyɛ nyaa wi yɛ̀gí baa cɛngɛnyɛnifoligɔli mɛ́ gè, Kulocɛliɛ wewiiwe fìɛtaʔayɛgɛ ki ’puu wi mɛ́ cògo.

A wi ’kòkuulo wáa kpuʔɔ nɛ̀ tórigo nyìʔɛnɛ tundunminɔ sicɛri mɛ́ bèle, bàli mɛ́ fànʔa ki cé kɛn pe- kapiʔi kpíʔile dàala nɛ̄ lè nɛ́ kuʔɔjii ní wè. ³Wire cé jo: «Ye fǎga kapiʔi kpíʔile dàala nɛ̄ lèʔ, nɛ́ kuʔɔjii ní wèʔ, nɛ́ tiire ní dèʔ fúɔ bè taa weli ga fìɛlɛ taʔala bèle kúɔ weli Kulocɛliɛ wi baakuɔlɔ pe gbɛgɛlɛ nɛ̄ gèle !»

⁴Píra ŋáà nī wè, bìli nɛ̄ fìɛlɛ pe cé taʔala bèle, a pe ’pe nyuɔ juu gè nɛ̀ tìɛ a mi ’ki lúʔu: pe ’puu siɛnnɛ siramuʔɔyɔ togo nɛ́ kpɔrigɔ nɛ́ kɔlini (144 000), pe mìɛni ní Isirayɛli pìile saaya tùlugo wuulo, bàli nɛ̄ pe cé fìɛlɛ tɛ́ngɛ bèle.

⁵Zuda saʔa tùlugo nī gè,

a pe ’fìɛlɛ tɛ́ngɛ bèle

siɛnnɛ siramuʔɔyɔ

taanri (12 000) nɛ̄;

Wurubɛni saʔa tùlugo nī gè,

siɛnnɛ siramuʔɔyɔ

taanri (12 000);

Gadi saʔa tùlugo nī gè,

siɛnnɛ siramuʔɔyɔ

taanri (12 000);

⁶Azɛri saʔa tùlugo nī gè,

siɛnnɛ siramuʔɔyɔ

taanri (12 000);

Nafitali saʔa tùlugo nī gè,

siɛnnɛ siramuʔɔyɔ

taanri (12 000);

Manase saʔa tùlugo nī gè,

siɛnnɛ siramuʔɔyɔ

taanri (12 000);

⁷Simɛyɔ saʔa tùlugo nī gè,

siɛnnɛ siramuʔɔyɔ

taanri (12 000);

Levii saʔa tùlugo nī gè,

siɛnnɛ siramuʔɔyɔ

taanri (12 000);

Izakari saʔa tùlugo nī gè,

siɛnnɛ siramuʔɔyɔ

taanri (12 000);

⁸Zabulɔn saʔa tùlugo nī gè,

siɛnnɛ siramuʔɔyɔ

taanri (12 000);

Yusufu saʔa tùlugo nī gè,

siɛnnɛ siramuʔɔyɔ

taanri (12 000);

Bɛnzamɛ saʔa tùlugo nī gè,

a fìɛ wi ’tɛ́ngɛ siɛnnɛ siramuʔɔyɔ

taanri (12 000) nɛ̄.

Kulocɛliɛ siɛnniʔɛmɛ bè

⁹Bà tire ’tóri dè, mi kɛ́nì je wéli wè, nɛ̀ siɛnniʔɛmɛ páà nyaa siɛn sì cî gbɛ̀ pi tɔ́ri bè pi nyuɔ cɛ́nʔ. Siɛnfeliye yi mìɛni ’puu pe nī, nɛ́ kùlogolo ke mìɛni wuulo ní bèle, nɛ́ siɛnrɛ felide ti mìɛni wuulo ní bèle. Pe ’puu yérile kùlofɔlilɔ kácunʔɔ yiʔɛ mɛ́ gè nɛ́ Sìnbapile ni yiʔɛ mɛ́ gè, nɛ́ burugboliyo fìiye le, siʔɛgbari ní pe mɛ́ còro kiyɛ nī yè. ¹⁰Á pe nɛ yékpuʔulo wáari kpuʔɔ níɛ waa:

«Weli Kulocɛliɛ

wire mɛ́ suɔlɔ ni yē,

wire ŋáà wī tɛ́niwɛ

kùlofɔlilɔ kácunʔɔ nɛ̄ gè,

nɛ́ Sìnbapile ní lè nɛ̀ pínɛ !»

¹¹A nyìʔɛnɛ tundunminɔ pe mìɛni ’yɛ̀ nɛ̀ yéri nɛ̀ kùlofɔlilɔ kácunʔɔ, nɛ́ liɛlɛ, nɛ́ yawiiye sicɛri màʔa yè, nɛ́ tuu nɛ̀ cúbulo kùlofɔlilɔ kácunʔɔ ki yiʔɛ mɛ́ gè nɛ Kulocɛliɛ gbùʔɔrɔ́ wè. ¹²Pe ’puu nɛ nyu níɛ wáa:

«Ki- taa ki puu bɛ̀ !

Gbùʔɔrigɔ gè,

nɛ́ kpuɔmɔ ní bè,

nɛ́ sícilige ní gè,

nɛ́ kacɛ̀ngɛcɛ́n síɛrigɛ ní gè,

nɛ́ kpuʔɔrɔ ní dè,

nɛ́ fànʔa ní gè,

nɛ́ ŋɔri ní dè,

weli Kulocɛliɛ wire wori dī

lɛ̀gɛlɛ ke mìɛni nī súuri !

Ki- taa ki puu bɛ̀ !»

¹³A liɛwɛ wáà nigbe kɛ́nì juu baa nɛ́ mi ní, nɛ́ mi yɛ: «Bàli pe ’burugboliyo fìiye le yè, báli bīɛlɛ peli bèle, sé pe ’kɔ́n ?» ¹⁴A mi ’wi yɛ: «Mi kàfɔli, muɔ ma nyɛ́nì kire cɛ́n.» A wi ’jo: «Bàli peli bīɛlɛ pe ’kɔ́n baa wuʔɔgbuʔɔ nī gè, nɛ́ pɛ́nì pe burugboliyo jíge yè a yi ’fílige Sìnbapile ni sìsiɛn nī gè. ¹⁵Kire nɛ̄ piyē baa Kulocɛliɛ wi kùlofɔlilɔ kácunʔɔ ki yiʔɛ mɛ́ gè nɛ wi gbùʔɔrɔ́ pìlige nɛ́ cɛnvugo baa wi Gbùʔɔrɔsaʔa nī gè; ŋàa sí wī baa tɛ́niwɛ kùlofɔlilɔ kácunʔɔ nɛ̄ gè, wire wi nyɛ́ni nyúmɔ tɔ́ngi pe nɛ̄. ¹⁶Fungo sì ń’nɛ̀ je ga pe taaʔ, luʔɔwuʔɔ míɛni sì ń’nɛ̀ je ga pe taaʔ, cɛngɛ míɛni sì je gari pe wáariʔ, cɛngɛ káfugo sì je ga pe nyíʔɛriʔ7.16 Wéli baa Eza 49.10.. ¹⁷Ki ’nyaa Sìnbapile náà nī baa kùlofɔlilɔ kácunʔɔ ki sunʔɔmɔ nī bè, lire ni béri pe nári, bèri pe tìí sìi luʔɔ lawiʔile nɛ̄ gèle, dí Kulocɛliɛ wi sí yéturo ti mìɛni pàari pe yiɛyɛ nī yè7.17 lire ni béri pe nári: Wéli baa Ŋún 23.1; Ezek 34.23; Zan 10.11,14. sìi luʔɔ lawiʔile: Wéli baa Ŋún 23.2; Eza 49.10; Zer 2.13; Zan 4.14. yéturo...pàari pe yiɛyɛ nī yè: Wéli baa 21.4; Eza 25.8; 65.19..»

Sìnbapile ni ’yasuʔɔlɔ kɔlisiinwoli múgu lè

¹Bà Sìnbapile ni kɛ́nì yasuʔɔlɔ kɔlisiinwoli múgu lè, a tiʔɛ ki ’pìiri sémi baa nyìʔɛnɛ nī lè nɛ̀ taa liɛri tílaga felige.

²Nyìʔɛnɛ tundunminɔ kɔlisiin bálì pe ’puu yérile Kulocɛliɛ yiʔɛ mɛ́ gè, a mi ’pe nyaa, pe cé pe kɛn nɛ́ kàkpaanya kɔlisiin ní.

³A nyìʔɛnɛ tundunwɔ wáà wiiyɛ ’pɛn nɛ̀ pɛ́nì yéri baa gbùʔɔrɔdiʔɛ yafanʔa táanni gè, tiɛ tingbopile ’puu wi mɛ́, á pe ’wi kɛn nɛ́ wusuna ní nìʔɛwɛ8.3 Wéli baa Yir 30.1., wi- sa wi kɛn bè fàri Kulocɛliɛ wuulo pe mìɛni náariyɛ nɛ̄ yè gbùʔɔrɔdiʔɛ yafanʔa mɛ́ gè tiɛ wuʔu gè, baa kùlofɔlilɔ kácunʔɔ ki yiʔɛ mɛ́ gè. ⁴A Kulocɛliɛ wuulo pe náariyɛ yè, nɛ́ wusuna wírige ní gè nyìʔɛnɛ tundunwɔ wi kiyɛ nī yè, a ti ’yɛ̀ nɛ yɛ̀gí Kulocɛliɛ yiʔɛ mɛ́ gè. ⁵A nyìʔɛnɛ tundunwɔ wi ’tingbopile líɛ lè, nɛ̀ gbùʔɔrɔdiʔɛ yafanʔa kàsun káà kɔ̀n nɛ̀ ki le ki ’nyì, nɛ́ ki wo dàala nɛ̄ lè. A kàsakpɛnigɛ ’kpɛ̀ni, a yékpuʔulo kálì ’juu baa, a nyìʔɛnɛ ni ’nyíʔɛnɛ, a dàala ni ’cúngo.

Kàkpaanya kɔlisiin wori dè

⁶Nyìʔɛnɛ tundunminɔ kɔlisiin bálì mɛ́ kàkpaanya kɔlisiin yi ’puu yè, a pe ’gbòbori nɛ̀ yaʔa bèri yi wíi.

⁷A péliwe wi ’wi kàkpanʔa wíi gè. A kàsasindari nɛ́ kàsun a ti ’pínɛ nɛ̀ nyaʔami sìsiɛn nī, nɛ̀ pɛ́nì tuu dàala nɛ̄ lè. A dàala tílaya taanri tiʔɛ nigbe ’cò kàsun nɛ̀ súʔu, nɛ̀ pínɛ a tiire tílaya taanri tiʔɛ nigbe ’cò kàsun nɛ̀ súʔu, a wariyɛrɛ dè nɛ́ nyàʔa ní gè, a ti mìɛni ’súʔu.

⁸A nyìʔɛnɛ tundunwɔ siinwuu wi ’wi kàkpanʔa wíi gè. A ki ’kpíʔile majo kàsunnyige nyagurukpuʔɔ gī ki sɛ́nì tuu kuʔɔjii nī wè. A kuʔɔjii wi tílaya taanri tiʔɛ nigbe ’yiʔɛ nɛ̀ kò sìsiɛn. ⁹A kuʔɔjii yawiire ti tílaya taanri tiʔɛ nigbe ’kùu, nɛ̀ pínɛ kɔ́riyɔ nyáà yi ’puu baa luʔɔ nī gè, a yi tílaya taanri tiʔɛ nigbe ’cúʔɔ péwu.

¹⁰A nyìʔɛnɛ tundunwɔ taanriwuu wi ’wi kàkpanʔa wíi gè. A ŋɔnɔ̀ láà ’tìgi nyìʔɛnɛ nī lè nɛ̀ tuu, ni ’puu kpuɔlɔ níɛ nyí majo kàsunnyige gī. Ni cé tuu lakpoliyo yi tílaya taanri tiʔɛ nigbe nɛ̄ gè, nɛ́ lawiʔile ní gèle. ¹¹Ŋɔnɔ̀ ni míʔɛ gè, pe ki ye Sìsorimɔ. A luɔyɔ yi tílaya taanri tiʔɛ nigbe ’kò sìsorigo, nɛ̀ pínɛ a siɛnniʔɛmɛ ’kùu luɔyɔ nyáà yi kɛnmɛ nɛ̄ bè bɛ̀ yi cé yiʔɛ nɛ̀ kò sìsorigo gè.

¹²A nyìʔɛnɛ tundunwɔ sicɛriwuu wi ’wi kàkpanʔa wíi gè. A pe ’cɛngɛ tílaya taanri tiʔɛ nigbewuʔu kpúɔn gè nɛ́ yege tílaya taanri tiʔɛ nigbewuʔu ní gè, nɛ́ ŋɔgɔlɔ tílaya taanri tiʔɛ nigbewuʔu ní gè, gìi ki bé tí ti tílaya taanri tiɛyɛ nigbe nigbe yi- kò yebilige, dí kpìɛnmɛ tílaya taanri tiʔɛ nigbe ki- sí kò ki fǎri càannáʔ. Ki- puu kanugo pìlige nī gè pìlige tílaya taanri tiʔɛ nigbewuʔu nɛ̄ gè.

¹³Mi kɛ́nì je wéli wè, nɛ̀ nyùɔ lalimɛ tùnmɔ lúʔu baa nyìʔɛnɛ nī lè mi nyùgo nī gè téwu; wi ní nɛ ki nyu kpuʔɔ níɛ wáa: «Kapiile ! Kapiile ! Kapiile bé dàala wuulo taa bèle ! Ki ’nyaa kàkpanʔa kiī nɛ tíin pe ní ki wíi wī, nɛ̀ ki cɛ́n nyìʔɛnɛ tundunminɔ taanri nɛ tíin bè pe kàkpaanya wíi yè díɛ !»

Nyìʔɛnɛ tundunwɔ kogunɔwuu wi ’wi kàkpanʔa wíi gè

¹A nyìʔɛnɛ tundunwɔ kogunɔwuu wi ’wi kàkpanʔa wíi gè, a mi ’ŋɔnɔ̀ láà nyaa a ni ’kɔ́n baa nyìʔɛnɛ nī lè nɛ̀ tuu dàala nɛ̄ lè. Pe cé láʔalafun kàtiʔɛ ki kɔ̀rikaanna kɛn lè ni mɛ́. ²A ŋɔnɔ̀ ni ’láʔalafun kàtiʔɛ múgu gè, a wírige ’yɛ̀ nɛ yigi ki nī muɔ bé jo dìbige kpuʔɔ wírige gī. A tiʔɛ ki ’yiʔɛ nɛ̀ kò yebilige wírige kire kɛnmɛ nɛ̄ bè. ³A kàbarirɛ ’yiri wírige gáà nī gè nɛ̀ cɛ̀ri dàala nɛ̄ lè, a ti ’fànʔa taa bɛ̀ dàala náana tíɛlɛ bèle.

⁴A pe ’ki juu ti mɛ́ ti- fǎga kaala kpíʔile dàala ni nyàʔa nɛ̄ gèʔ, nɛ́ wariyɛrɛ felide ti mìɛni ní dèʔ, nɛ́ tiire ní dèʔ, fúɔ macɛn siɛnnɛ bílì bīɛlɛ Kulocɛliɛ fìɛ wi wè pe nɛ̄ gbɛgɛlɛ nɛ̄ gèleʔ. ⁵A ki ’kpíʔile kàbarirɛ dáà ti fǎga gbɛ̀ siɛnnɛ kpúu bèleʔ, fúɔ macɛn tiri pe wuʔɔ kpuʔɔ bè taa yeye kogunɔ. Ki wuʔɔgɔ gáà ki bé puu bɛ̀ náa nɔgɔ tíɛlɛ. ⁶Kire cɛnyɛ nyáà nī yè, siɛnnɛ pe bága de kùu caa wè, kùu wiǐ sí nɔ̀ pe nɛ̄ʔ; kùu láa bé pe taa, nɛ̀ sí ki yaʔa kùu wi béri fé pe nɛ̄.

⁷Kàbarirɛ dáà dè, pe cé kapiɛngbuɔn yɛrɛ le ti nɛ̄ nɛ̀ ti gbòbori nɛ̀ yaʔa. Ndɔ̀nyɔ ’puu ti nɛ̄ nyùyɔ nī yè bɛ̀ tiɛ ndɔ̀nyɔ tíɛlɛ, ti yiɛyɛ ní yè bɛ̀ siɛnnɛ yiɛyɛ tíɛlɛ. ⁸Ti nzìire ti ’puu bɛ̀ cɛlilɛ nzìire tíɛlɛ, gànʔana ní gèle bɛ̀ jàri wuʔulo tíɛlɛ. ⁹Timɔzigeyɛrɛ ’puu ti nɛ̄ lere sìndinyɛ nī yè, pe fíkɛnyɛ yi tùnmɔ pi ’puu muɔ bé jo suɔnniʔɛyɛ wotorilo pe fé nɛ wáa kapiɛngbuɔndiʔɛ nī. ¹⁰Ti ’puu nɛyɛ ní yè sífiriye bɛ̀ náana tíɛlɛ, nɛ̀ pínɛ fànʔa káà ’puu ti nɛyɛ nī yè bè gbɛ̀ siɛnnɛ wuʔɔ bèle bè taa yeye kogunɔ. ¹¹Ŋàa wi ’puu pe kùlofɔli wè, wire ’nyaa láʔalafun kàtiʔɛ ki nyìʔɛnɛ tundunwɔ wè; eburu siɛnrɛ nī dè wi míʔɛ gè, pe nɛ̂ jo «Abadɔni», girɛki siɛnrɛ nī dè, pe ki ye «Apoliyɔn», ki kɔri wi ’jo Yacuʔɔwɔ.

¹²Kapiile pélile lire ’tóri, píra ŋáà nī wè kapiʔile kálì siin nɛ báan nɛ tíin gàa kàduʔumɛ gè.

¹³A nyìʔɛnɛ tundunwɔ kɔliniwuu wi ’kàkpanʔa wíi gè, a mi ’yékpoli láà juumɔ lúʔu baa nyɛgɛlɛ sunʔɔmɔ nī bè, tiɛ yafanʔa gbùʔɔrɔdiʔɛ tiʔɛ nī gè gàa ki ’puu Kulocɛliɛ yiʔɛ mɛ́ gè. ¹⁴Wi ’puu nɛ ki nyu nyìʔɛnɛ tundunwɔ kɔliniwuu mɛ́ wè ŋàa wi cé kàkpanʔa cò gè, nɛ́ wi yɛ: «-Nyìʔɛnɛ tundunminɔ sicɛri sáʔala bèle, bàli bīɛlɛ puɔlɔ Efirati cáʔa nɛ̄ gè !» ¹⁵A pe ’nyìʔɛnɛ tundunminɔ sicɛri sáʔala bèle, peli bálì pe ’puu yériyaʔala nɛ ki lɛ̀lɛ siri lè, ki cɛngɛ gáà gè, ki yege gáà gè, ki yiɛlɛ náà lè, bè siɛnnɛ pe tílaya taanri tiʔɛ nigbe kpúu gè.

¹⁶Suɔnyɔ kapiɛngbuɔnnɔ tòyo yi ’puu mininyuɔnɔ sirakeli (200 000 000), a pe ’pe nyuɔ juu gè a mi ’ki lúʔu. ¹⁷Bà mi ’suɔnyɔ nyaa yè kire kɛnmɛ nɛ̄ bè nɛ́ bàli ní pe ’puu tɛ́ninɛ yi nɛ̄ bèle. Timɔzigeyɛrɛ ’puu ti nɛ̄ sìndinyɛ nī yè nyìɛrɛ kàsun tíɛlɛ, nɛ́ namiige céri bɛ̀ siʔɛ tíɛlɛ, nɛ́ bɛ̀ bulɔ tíɛlɛ. Suɔnyɔ yi nyùyɔ yi ’puu bɛ̀ jàri nyùyɔ tíɛlɛ. Kàsun nɛ́ wírige nɛ́ siʔɛ ’puu nɛ yigi pe nyuɔyɔ nī yè. ¹⁸A siɛnnɛ pe tílaya taanri tiʔɛ nigbe ki ’kùu wuʔɔgboliyo nyáà taanri yi kɛnmɛ nɛ̄ bè, kàsun nɛ́ wírige nɛ́ siʔɛ tire kɛnmɛ nɛ̄ bè, bɛ̀ ti ’puu nɛ yigi pe nyuɔyɔ nī yè. ¹⁹Ki ’nyaa suɔnyɔ yi fànʔa kiī yi mɛ́ nyuɔyɔ nī nɛ́ nɛyɛ nī yè nɛ̀ pínɛ. Nɛ̀ taʔa gíi nɛ̄, pe nɛyɛ yiī bɛ̀ wɔ̀burɔ nyùyɔ tíɛlɛ; pe nìɛ kapiʔi kpínʔini gè nɛ́ yi ní.

²⁰Píra ŋáà nī wè, siɛnsɛnminɛ bálì pe ’kò wuʔɔgboliyo nyáà yiì pe kpúu bèleʔ, a pe sí kò piyè làa yiʔɛ pe kakpiʔiligele nī gèle wèʔ, nɛ́ sí kò nɛ gbòdolilo gbùʔɔrɔ́ bèle, nɛ́ yasunro ní dè tiɛ wori dè, nɛ́ wali wori dè, nɛ́ káfiire wori dè, nɛ́ kàdɛnigɛ wori dè, nɛ́ tiige wori dè, tire dáà ti wè gbɛ̀nɛ nyaʔa dèʔ, ti wè gbɛ̀nɛ lúru dèʔ, ti wè gbɛ̀nɛ tári dèʔ. ²¹Kire siɛnnɛ pe ’cíi piyè làa yiʔɛ pe siɛnkpuʔu nī gèʔ, piyè làa yiʔɛ pe dìʔɛ nī gèʔ, piyè làa yiʔɛ pe kanuʔɔrɔ kele nī gèleʔ, piyè làa yiʔɛ pe kàyuuro nī dèʔ.

Nyìʔɛnɛ tundunwɔ nɛ́ sɛbɛpile wori dè

¹A mi ń’nɛ̀ nyìʔɛnɛ tundunwɔ wáà nyaa wi tíri nyìʔɛnɛ nī lè; wi ’puu nɛ́ fànʔa ní. Kàsadibagɛ káà cé wi màʔa nɛ̀ suʔu, kàsaŋɔnɔ ’puu wi nyùgo nī gè. Wi yiʔɛ ki ’puu muɔ bé jo cɛngɛ gī, wi tɔliyɔ ní yè bɛ̀ kàsunnyige tùluyo tíɛlɛ. ²Sɛbɛpile láà ’puu wi mɛ́ kɔli nī gè múguyaʔala, á wi ’kàliige tɔligɔ taʔa gè kuʔɔjii nɛ̄ wè, nɛ́ sí kàmɛgɛ wuʔu taʔa gè dàala nɛ̄ lè. ³A wi ’kòkuulo wáa kpuʔɔ muɔ bé jo jàri wi ’cuulo. Bɛ̀ wi ’kòkuulo wáa lè mmɛ gè, a kàsakpɛniyɛ kɔlisiin yi ’kpɛ̀ni.

⁴Bà kàsakpɛniyɛ kɔlisiin yi ’kpɛ̀ni yè, mi ’puu nɛ caa bè ki siɛnrɛ sɛbɛ dè. Kire lɛ̀lɛ nī lè, a mi ’juumɔ páà lúʔu baa nyìʔɛnɛ nī lè, a siɛnrɛ ti ’jo: «Siɛnrɛ dáà kàsakpɛniyɛ kɔlisiin yi ’juu dè, -ti yaʔa ti kò siɛnlaridɛ ! Fǎga ti sɛbɛʔ !»

⁵Nyìʔɛnɛ tundunwɔ ŋáà mi cé nyaa wí ní yériwe kuʔɔjii nɛ̄ wè nɛ́ dàala ní lè, a wi ’wi kàliige yɛ̀gɛ gè nyìʔɛnɛ nī lè, ⁶nɛ́ kàli Kulocɛliɛ nɛ̄, wire ŋáà wī sìi nɛ̄ súuri kúɔmɔ fùn wè. Wire wi ’nyìʔɛnɛ yige lè nɛ́ ni yɛrɛ ti mìɛni ní dè, nɛ́ dàala faan lè nɛ́ ni yɛrɛ ti mìɛni ní dè, nɛ̀ lakpoliyo yige yè nɛ́ yi yɛrɛ ti mìɛni ní dè. A wi ’kàli Kulocɛliɛ nɛ̄ wè, nɛ́ jo: «Lɛ̀lɛ láà sì ń’nɛ̀ je kɛn cíginiʔ ! ⁷Cɛngɛ gíì sí nyìʔɛnɛ tundunwɔ kɔlisiinwuu wi bága wi kàkpanʔa wíi gè, dí pe sí ki wíimɛ lúʔu bè, kire cɛngɛ gè, Kulocɛliɛ kalarilɛ ni bé yiri kpànʔanɛ bè yɛli nɛ́ tunduro díì wi cé kɛn wi baakuɔlɔ mɛ́ bèle, wi siɛnjuulo bèle.»

⁸Cígini, yékpoli níì mi cé lúʔu baa nyìʔɛnɛ nī lè, a ni ń’nɛ̀ juu nɛ́ mi ní nɛ́ mi yɛ: «Te waa ma sa sɛbɛ suɔ wè sɛbɛ múguyaʔawa wè nyìʔɛnɛ tundunwɔ mɛ́ wè n’ŋɛ yériwe baa kuʔɔjii nɛ̄ wè nɛ́ dàala ní lè.»

⁹A mi ’kɛ́ nyìʔɛnɛ tundunwɔ kúrugu wè, nɛ̀ sɛ́nì wi yɛ: «-Sɛbɛpile kɛn lè mi mɛ́ !»

A wi ’mi yɛ: «Suɔ, -ni káa. Ni bé tanʔana muɔ liyɛ nī yè, bé sí puu tàanna muɔ nyuɔ nī gè bɛ̀ sárigɛ tíɛlɛ.»

¹⁰A mi ’sɛbɛpile suɔ lè nyìʔɛnɛ tundunwɔ wi kɔli nī gè, nɛ̀ ni káa. Ni ’puu tàanna bɛ̀ sárigɛ tíɛlɛ. Bɛ̀ mi sì kɛ́nì ni káa nɛ̀ kúɔ lè, a ni ’tanʔana mi liyɛ nī yè.

¹¹A mi ’lúʔu: «Ki ’yɛli ma ní koli ma kele kálì nyaa ma juu kùlogolo ke wori nɛ̄ dè, nɛ́ siɛnfeliye wori dè, nɛ́ siɛnrɛ felide wori ní dè, nɛ́ kùlofɔlilɔ wori ní dè, tiī nìʔɛrɛ.»

Kulocɛliɛ wori ti juufɔlilɔ siin bèle

¹A pe ’kàgɛnigɛ káà kɛn mi mɛ́, ki ní bɛ̀ yatɔnminɔ kàgbiile tíɛlɛ, nɛ́ mi yɛ: «Yɛ̀ ma Kulocɛliɛ Gbùʔɔrɔsaʔa tɔ́nminɔ gè nɛ́ ki gbùʔɔrɔdiʔɛ yafanʔa ní gè, má sí pe tɔ́ri bìli pe nyɛ́ni Kulocɛliɛ gbùʔɔrɔ baa wè. ²Gbùʔɔrɔsaʔa ki dàligɛ gè, ma fǎga kire tɔ́nminɔʔ; ki ’nyaa, mi nyɛ́nì kire kɛn kùlogolo kálì siɛnnɛ mɛ́ bèle. Gìi ki ’kàʔa wàlidɛngɛgɛ kúɔ gè, kùlogolo kálì siɛnnɛ bálì pe bé ki tánʔana bè ki fórigo bè taa yeye togosiin nɛ́ siin. ³Bɛ̀ ’m’bága tí mi wori ti juufɔlilɔ siin pe gari ki nyu gàa ki báan gè bè taa cɛnyɛ sirakɔlini nɛ́ cɛnyɛ togotaanri (1 260), gbànvaʔara bururo ti bé puu pe nɛ̄ lere.»

⁴Peli bīɛlɛ wolivi tiiye siin nɛ́ fètindaʔaya siin yè, nɛ́ ní yérile duniya Kàfɔli wi yiʔɛ mɛ́ gè. ⁵A siɛn ’jo wi bé kapiʔi kpíʔile pe nɛ̄ bèle, kàsun káà bé yiri pe nyuɔ nī gè bè pe leguulo sórigo bèle. ʔaan díɛ, a siɛn je sìpiʔi kpíʔile pe nɛ̄ wè, kire kɛnmɛ pire nɛ̄ siɛn wi bé kùu ! ⁶Kijuufɔlilɔ bálì pe siin bèle, ki fànʔa kiī pe mɛ́ bè gbɛ̀ nyìʔɛnɛ tɔ́n lè, kàsaʔa fǎga tuuʔ cɛnyɛ nyíì nī piyē nɛ Kulocɛliɛ kajuulo siɛnrɛ nyu dèʔ, kele gílì ke bága tóri gèle. Nɛ̀ pínɛ pe fànʔa yē bè gbɛ̀ luɔyɔ yiʔɛ yè yi- kò sìsiɛn, bé sí wuʔɔgboliyo feliye yi mìɛni cáan dàala nɛ̄ lè, bè taa tɔliyɔ nyuɔ gíì ki ’pe dɛ́ni wè.

⁷A peli kɛ́nì pe juumɔ juu bè nɛ̀ kúɔ wè, píra ŋáà nī wè dí nyàʔayɛgɛ ki sí yiri láʔalafun kàtiʔɛ nī gè, bèri kapiɛnnɛ kpúɔn pe nɛ̄; ki bé sí pe jáa, bè pe kpúu. ⁸Kijuufɔlilɔ bálì pe wokuuyo yi bé kò cáanya baa kàkpuʔɔ ki koligo nī gè, kire kàkpuʔɔ gáà ki kɛnmɛ pi ’ki kɛn pe ki ye Sodɔmi nɛ́ Ezipiti. Kire tiʔɛ nī pe cé pe Kàfɔli kóri wè tiiparigɛ nɛ̄ gè.

⁹Kùlogolo ke mìɛni gèle, nɛ́ siɛnnɛ feliye yi mìɛni yè, nɛ́ siɛnrɛ felide ti mìɛni wuulo bèle, nɛ́ duniya siɛnfeliye yi mìɛni ní yè, pe béri báan de kúbilo bálì wéli bèle bè taa cɛnboyo taanri nɛ́ tílaga, piyě sí yéri ki nɛ̄ pe- pe tɔ́nʔ. ¹⁰Nɛ̀ pínɛ duniya siɛnnɛ pe béri fundaanra kpínʔini bèri pe tìʔɛ́, bé sí de kpuʔɔrɔ yɛrɛ tórigi pìye mɛ́, nɛ̀ taʔa gíi nɛ̄, siɛnjuulo bálì pe siin pe cé fùrɔgɔ taʔa siɛnnɛ nɛ̄ bèle dàala nɛ̄ lè.

¹¹Bà cɛnyɛ taanri nɛ́ tílaga nyáà yi kɛ́nì tóri yè, a sìi ŋɔ́nɔ láà ’kɔ́n baa Kulocɛliɛ mɛ́ wè nɛ̀ pɛ́nì jíin pe nī, a pe ’yɛ̀ nɛ̀ yéri pe tɔliyɔ nɛ̄ yè. Bìli pe ’puu nɛ pe wéli bèle, a fíɛrɛ ’pe cò kpuʔɔ.

¹²A kijuufɔlilɔ siin pe ’yékpoli láà lúʔu baa nyìʔɛnɛ nī lè a ni ’juu kpuʔɔ nɛ́ pe yɛ: «Yeri yɛ̀gí náʔa !» A pe ’yɛ̀ kàsadibarɛ nī dè nɛ̀ kɛ́ nyìʔɛnɛ nī lè pe leguulo pe nyɛ́ni nɛ̄ lè. ¹³Ki lɛ̀nunɔ nī lè, a dàala ni ’cúngo kpuʔɔ, a kàʔa ki tílaya kiɛ tiʔɛ nigbe ’tìgi nɛ̀ tuu, a siɛnnɛ siramuʔɔ sirakiɛ nɛ́ kogunɔ (7 000) ’kùu baa ki dàala cúngulo náà nī lè. Bìli sɛnminɛ bálì pe cé kò bèle, a fíɛrɛ ’pe cò a pe ’yɛ̀ nɛ kpuʔɔrɔ tari nyìʔɛnɛ Kulocɛliɛ nɛ̄ wè.

¹⁴Kapiile siinwoli ni ’tóri, ki sí n’gɛ taanriwoli niī nɛ báan baa píra píra.

Kàkpanʔa kɔlisiinwuʔu gè

¹⁵A nyìʔɛnɛ tundunwɔ kɔlisiinwuu wi ’wi kàkpanʔa wíi gè, a yékpuʔulo kálì ’juu baa kpuʔɔ nyìʔɛnɛ nī lè nɛ́ jo:

«Píra ŋáà nī wè,

duniya kùlofɔligɔ

ki ’kò weli Kàfɔli wi wuʔu,

wire nɛ́ wi Siɛnnyiɛnɛgɔnwɔ

ní wè !

Wi bé tɛ́ni fànʔa nɛ̄ gè súuri,

wi fànʔa kiǐ je ga kúɔ

bè nyaaʔ !»

¹⁶Liɛlɛ togo nɛ́ sicɛri bèle, bàli bīɛlɛ Kulocɛliɛ wi yiʔɛ mɛ́ gè nɛ́ ní tɛ́ninɛ pe kùlofɔlilɔ kácuɔnyɔ nɛ̄ yè, a pe ’tìgi nɛ̀ pe yiɛyɛ kíri yè dàala nɛ̄ lè níɛ Kulocɛliɛ gbùʔɔrɔ́ wè, ¹⁷níɛ ki nyu nɛ́ jo:

«Weli nɛ muɔ síɛri

Kàfɔli Kulocɛliɛ,

Fànʔa ki mìɛni Kàfɔli wè !

Muɔ yē baa,

nɛ̀ pínɛ muɔ ’kíni yē baa.

Ki ’nyaa,

bɛ̀ fànʔa yē muɔ mɛ́ kpuʔɔ wè,

a muɔ ’ki fànʔa gáà líɛ gè

nɛ̀ tɛ́ni kùlofɔligɔ nɛ̄ gè !

¹⁸Kùlogolo siɛnnɛ pe funyɔ yi ’yɛ̀,

a muɔ fundanʔanigɛ ki ’pɛn.

Kúbilo pe kàyuʔujuu lɛ̀lɛ

ni ’nɔ̀.

A muɔ baakuɔlɔ pe sàri

wi kɛn lɛ̀lɛ ni ’nɔ̀:

siɛnjuulo bèle nɛ́ bìli bīɛlɛ

Kulocɛliɛ wuulo bèle,

nɛ́ bìli pe muɔ fìʔɛ́ bèle,

yìrile bèle

nɛ́ kpolilo ní bèle.

Bìli sí pe nyɛ́ni dàala córi lè,

muɔ bé pe cúʔɔ bè pínɛ.»

¹⁹A Kulocɛliɛ Gbùʔɔrɔsaʔa ki ’múgu baa nyìʔɛnɛ nī lè, a wi nyakungɛngɛ finʔɛgɛ ki ’múgu baa Gbùʔɔrɔsaʔa nī gè. A nyìʔɛnɛ ni ’nyíʔɛnɛ, a yékpuʔulo kálì ’juu baa, a kàsakpɛnigɛ kpɛ̀ni, a dàala ni ’cúngo, kàsasindari ’puu nɛ tíri kpuʔɔ.

Cɛliwɛ wori dè nɛ́ yapiʔi ní gè

¹A fìɛkpuɔwɔ wáà ’yiri baa nyìʔɛnɛ nī lè ! Cɛliwɛ wáà cé cɛngɛ le gè wìi nɛ̄ burugo, á yege ní gè wi tɔliyɔ láara yè, ŋɔgɔlɔ kiɛ nɛ́ siin kpuʔɔrɔ ndɔ̀ngɔ ’puu wi nɛ̄ nyùgo nī gè. ²Laala ’puu wi nɛ̄, a cesiʔi liyɛ yi ’yɛ̀ wi mɛ́ nɛ wi yáa; wi kòkuulo wáari;

³A fìɛkpuɔwɔ wáà ń’nɛ̀ yiri baa nyìʔɛnɛ nī lè: yapiʔi káà ki ’puu, kpuʔɔ nɛ́ ní nyìʔɛ. Ki ’puu nɛ́ nyùyɔ kɔlisiin ní, nyɛgɛlɛ kiɛ ní ki nɛ̄, kùlofɔlilɔ ndɔ̀nyɔ kɔlisiin ’puu ki nyùyɔ nɛ̄ yè. ⁴Ki nɛgɛ ki ’puu nɛ nyìʔɛnɛ ŋɔgɔlɔ ke tílaya taanri tiʔɛ nigbe wuʔulo píi gèle nɛ wáari dàala nɛ̄ lè. A yapiʔi ki ’yéri cɛliwɛ wi yiʔɛ mɛ́ gè ŋàa wi yé je sii wè, níɛ siri a wi ’wi pùɔ sii wè, dí kire sí wi cò bè káa.

⁵A cɛliwɛ wi ’nàgabile sii, wire wi je ga kùlogolo siɛnnɛ pe mìɛni nàʔa nɛ́ timɔri kàgbiile ní12.5 Wéli baa Ŋún 2.9; Tìɛ 2.27; 19.15.. A pe ’pùɔ fàa wè nɛ̀ líɛ nɛ̀ kɛ́ nɛ́ wi ní Kulocɛliɛ kúrugu wè baa wi kùlofɔlilɔ kácunʔɔ mɛ́ gè. ⁶A cɛliwɛ wire ’fɛ̀ nɛ̀ kɛ́ waama kùlo nī. Kulocɛliɛ wi cé tiʔɛ káà gbòbori wi mɛ́ baa, wi sari taʔa de líi baa kire tiʔɛ nī gè bè taa cɛnyɛ sirakɔlini nɛ́ cɛnyɛ togotaanri (1 260).

⁷A kapiɛnnɛ kɛ́ni yɛ̀ baa nyìʔɛnɛ nī lè: Mikayɛli nɛ́ wi nyìʔɛnɛ tundunminɔ ní bèle pe ’puu nɛ túngu nɛ́ yapiʔi ní gè. Yapiʔi míɛni gè nɛ́ ki tundunminɔ ní bèle pe ní ki kapiɛnnɛ nɛ̄ lè. ⁸Yapiʔi kiì kɛ́nì jáa kapiɛnnɛ nɛ̄ lèʔ. Tiʔɛ sì cé ń’nɛ̀ puu pe mɛ́ baa nyìʔɛnɛ nī lèʔ. ⁹A pe ’yapiʔi kpuʔɔ cìra gè. Kire gī wɔ̀biliʔɛ12.9 Wéli baa Sél 3.1-15. gè, pe ki ye gbòdolilo kàfɔli wè nɛ́ Setɛni wè. Wire wi nyɛ́ni duniya wuulo pe mìɛni fáanni nɛ pe pùunní, a pe ’wi cìra nɛ̀ tìrige dàala nɛ̄ lè nɛ́ wi tundunminɔ ní bèle.

¹⁰A mi ’yékpoli láà lúʔu baa nyìʔɛnɛ nī lè, a ni ’juu kpuʔɔ nɛ́ jo:

«Píra ŋáà nī wè,

we ’suɔlɔ nyaa lè, nɛ́ fànʔa ní gè,

nɛ́ weli Kulocɛliɛ wi Kùlofɔligɔ ní gè,

nɛ́ wi Siɛnnyiɛnɛgɔnwɔ

wi fànʔa ní gè !

Nɛ̀ taʔa gíi nɛ̄,

ŋàa wi ’puu nɛ kele nyu nɛ tari

weli siinyɛninɛ nɛ̄ bèle,

pe ’wi cìra nɛ̀ tìrige dàala nɛ̄.

Wire wi ’puu nɛ kele nyu

nɛ tari pe nɛ̄

pìlige nɛ́ cɛnvugo

Kulocɛliɛ yiʔɛ mɛ́ gè.

¹¹Pe sí nyɛ́nì wi jáa

Sìnbapile lire sìsiɛn fànʔa nɛ̄ gè

nɛ́ pe siɛnrɛ ti juʔu ní gè

nɛ̀ pínɛ,

piyè pe sìi woli yaʔa lè

a ni ’kpúʔɔ pe mɛ́ʔ,

a ki nɛ́ yé cɛ́nì nyaa pe- kùu wè.

¹²Kire nɛ̄ nyìʔɛnɛ lè,

nɛ́ bìli bīɛlɛ baa bèle,

ye- puu fundaanra nɛ̄.

Kapiile bé sí dàala taa lè

nɛ́ kuʔɔjii ní wè !

Nɛ̀ taʔa gíi nɛ̄,

gbòdolilo kàfɔli wi ’tìgi

baa yeli kúrugu,

wi fungo ki sí yē yɛ̀rigɛ kpuʔɔ.

Ki ’nyaa wi ’ki cɛ́n

wire lɛ̀lɛ niì ń’nɛ̀ kò sáaʔ.»

¹³Bà yapiʔi ki kɛ́nì ki nyaa pe ’kire cìra nɛ̀ tìrige dàala nɛ̄ lè, a ki ’líɛ nɛ̀ taʔa cɛliwɛ nɛ̄ wè nɛ wi cìrá, ŋàa wi cé nàgabile sii lè. ¹⁴A nyùɔ kpuʔɔ fíkɛnyɛ siin ’yiri cɛliwɛ nɛ̄ wè, wi- gbɛ̀ jáa bè lali bè kɛ́ wi tiʔɛ mɛ́ gè waama kùlo nī lè. Baa wi ’puu níɛ taʔa nɛ líi nɛ̀ lɛ̀lɛ láà kúɔ, nɛ́ lɛ̀gɛlɛ siin nɛ́ lɛ̀lɛ tílaga ní. Wi- lali wi kɛ́ liʔi wɔ̀bugɔ nɛ̄ gè.

¹⁵A wɔ̀bugɔ ki ’luʔɔ yige ki nyuɔ nī gè, nɛ̀ ki wáa cɛliwɛ kúrugu wè, ki ní lakpuʔɔ wī, gìi ki bé tí ki- cɛliwɛ fúu wè bè líɛ. ¹⁶Nɛ̀ sí ki taa a dàala ni ’cɛliwɛ suɔ wè: a dàala ni ’múgu nɛ̀ lakpuʔɔ júɔ gè, luʔɔ gáà yapiʔi ki cé yige ki nyuɔ nī gè. ¹⁷A yapiʔi ki fungo ki ’yɛ̀ cɛliwɛ kúrugu wè, a ki ’koli nɛ̀ kɛ́ cɛliwɛ wi cesiʔi wuulo bílì sɛnminɛ kúrugu bèle nɛ̀ sɛ́nì tuu kapiɛnnɛ nɛ̄ nɛ́ peli bálì pe nyɛ́ni lúru Kulocɛliɛ kajuʔulo mɛ́ gèle nɛ́ Zezi wi nyasiɛnrɛ cò dè. ¹⁸A ki ’yéri kuʔɔjii dàrimiʔɛ nɛ̄ gè.

Yajuupiʔi nɛ́ nyàʔayɛgɛ ní gè

¹A mi ’yajuʔu káà nyaa ki yigi kuʔɔjii nī wè. Ki ’puu nɛ́ nyɛgɛlɛ kiɛ ní, nɛ́ nyùyɔ kɔlisiin ní; kùlofɔlilɔ ndɔ̀nyɔ kiɛ ’puu ki nyɛgɛlɛ nɛ̄ gèle. Kulocɛliɛ míɛcuʔɔgɔ míɛyɛ ’puu ki nyùyɔ nɛ̄ yè. ²Nyàʔayɛgɛ gíì mi cé nyaa gè, ki ’puu bɛ̀ sàndiɛn tíɛlɛ, ki tɔliyɔ yi ’puu bɛ̀ kàdafiige woyo tíɛlɛ, ki nyuɔ ní gè bɛ̀ jàri nyuɔ tíɛlɛ. A yapiʔi ki ’ki ŋɔri kɛn dè nɛ́ ki kùlofɔlilɔ kácunʔɔ ní gè nyàʔayɛgɛ mɛ́ gè, nɛ̀ fànʔa kɛn nyàʔayɛgɛ mɛ́ gè kpuʔɔ. ³Ki nyùgo káà nigbe ’puu majo pe cé ki kɔni bè ki kpúu wī, nɛ̀ sí ki taa a ki nɔmigɔ ki ’koli nɛ̀ puʔɔ.

A dàala wuulo pe mìɛni ’yɛ̀ nɛ cúru nyàʔayɛgɛ gáà nɛ̄ gè, nɛ́ taʔa ki kúrugu. ⁴A pe ’tìgi nɛ̀ yiɛyɛ cúbulo yè nɛ yapiʔi gbùʔɔrɔ́ gè, bɛ̀ ki cé fànʔa kɛn gè nyàʔayɛgɛ mɛ́ gè. A pe sɛ́nì tìgi nɛ̀ yiɛyɛ cúbulo yè nɛ̀ pínɛ nyàʔayɛgɛ ki yiʔɛ mɛ́ gè níɛ nyu nɛ́ jo: «Ŋáasiɛn wi bé gbɛ̀ wúɔ bè yɛli nɛ́ nyàʔayɛgɛ ní gè ? Ŋáasiɛn wi bé gbɛ̀ cáan nɛ́ ki ní ?»

⁵A nyàʔayɛgɛ ki ’larigɛ taa nɛ nyu nɛ̀mɛ ní, nɛ Kulocɛliɛ míɛ cuʔɔgɔ wori nyu ki nyuɔ nī gè. Ki cé fànʔa taa nɛ ki kele kúu gèle fúɔ nɛ̀ taa yeye togosiin nɛ́ siin.

⁶A ki ’ki nyuɔ múgu gè nɛ Kulocɛliɛ míɛcuʔɔgɔ siɛnrɛ nyu dè, nɛ wi míʔɛ córi gè nɛ́ wi kòridiʔɛ ní gè, nɛ́ bìli bīɛlɛ baa kòrilo nyìʔɛnɛ nī lè. ⁷A nyàʔayɛgɛ ki ’larigɛ taa nɛ kapiɛnnɛ kpúɔn Kulocɛliɛ wuulo nɛ̄ bèle nɛ̀ pe jáa. A pe ’fànʔa kɛn gè ki mɛ́ ki de fànʔa kpúɔn siɛnnɛ feliye yi mìɛni nɛ̄, kùlogolo ke mìɛni nɛ̄, siɛnrɛ felide ti mìɛni nɛ̄, nɛ́ duniya siɛnfeliye yi mìɛni nɛ̄ yè. ⁸Dàala wuulo pe mìɛni pe béri ki gbùʔɔrɔ́, siɛn ó siɛn ŋáà wī nɛ̀ líɛ bà duniya wi ’séli wè, siɛn wi míʔɛ ki wè baa sɛbɛgɛ Sìnbapile ni sìi sɛbɛ nī wèʔ, Sìnbapile náà pe ’kpúu lè.

⁹A ngbúʔulo yē ŋìi nɛ̄, wi- ti lúʔu !

¹⁰A siɛn ŋíì sìi kɛ́nì nyaa wi ’yɛli pe- wi cò bè kɛ́ wè, pe bé wi cò bè kɛ́ wī; a ŋìi yē ŋɔsii ga wi kpúu wè, ŋɔsii wi bága wi kpúu. Kulocɛliɛ wuulo pe kpàricogo nɛ́ pe tɛ́ngɛlɛ tiɛlɛ lire nī nàa lè.

Nyàʔayɛgɛ gáà ki ’yiri dàala nī lè

¹¹A mi ń’nɛ̀ nyàʔayɛgɛ káà nyaa ki yigi dàala nī lè. Ki ’puu nɛ́ nyɛgɛlɛ siin ní bɛ̀ sìnbapile tíɛlɛ, á ki ní nɛ nyu bɛ̀ yapiʔi tíɛlɛ. ¹²Ki ’puu nɛ nyàʔayɛgɛ pélige ki fànʔa kakpiʔiligele feligele ke mìɛni kúu ki ’nyaamɛ nɛ̄ bè, nɛ́ sí nɛ dàala wuulo cɔ̀rí bèle peri nyàʔayɛgɛ pélige gbùʔɔrɔ́ gè, gàa ki ’puu nɔmigɔ ní gè nɛ waa bè kùu wè, nɛ́ sí kɛ́nì puʔɔ gè. ¹³A ki ’yɛ̀ nɛ kanyuʔɔnigɔlɔ kpoliyo kpínʔini, fúɔ nɛ̀ cɛ́ni kàsun tìrigí nyìʔɛnɛ nī lè nɛ cáanri dàala nɛ̄ lè, siɛnnɛ pe ki nyaʔa. ¹⁴Kiī nɛ dàala wuulo fáanni bèle nɛ́ ki kanyuʔɔnigɔlɔ ní gèle gàli kiī nɛ kpínʔini nyàʔayɛgɛ ki yiʔɛ mɛ́ gè, níɛ ki nyu dàala wuulo mɛ́ bèle dí pe- jènyinɛ yafanʔa káà kpíʔile nyàʔayɛgɛ mɛ́ gè gàa gī nɛ́ ŋɔsii luɔdiʔɛ ní gè nɛ́ sí ní wiʔi gè.

¹⁵A nyàʔayɛgɛ siinwuʔu ki ’jáa nɛ̀ sìi nyɔ́gɔ nyàʔayɛgɛ pélige ki jènyinɛ yafanʔa nī gè, kire míɛni ki gbɛ̀ri nyu, nɛ̀ pínɛ a siɛn ŋíì wè nyàʔayɛgɛ ki jènyinɛ yafanʔa gbùʔɔrɔ́ gèʔ, nyàʔayɛgɛ jènyinɛ yafanʔa ki- ki siɛn kpúu wè.

¹⁶A nyàʔayɛgɛ siinwuʔu ki ’pe mìɛni cɔ̀ri fànʔa, yìrile yo, kpolilo yo, lɔrifɔlilɔ yo, fɔ̀ngɔfɔlilɔ yo, bàli bīɛlɛ pìye mɛ́ yo, bàli bīɛlɛ sùkulolo yo, nɛ́ jo pe- fìɛ tɛ́ngɛ pe kàliige kɔli nɛ̄ gè á kire ’laa gbɛlɛ nɛ̄ lè. ¹⁷Gìi ki bé tí siɛn fǎga gbɛ̀ yakaa suɔʔ, bé nɛ́ ga jo bè yaparigɛ páriʔ, fúɔ macɛn a fìɛ ŋáà wiī siɛn nɛ̄ wè, kire ’jo nyàʔayɛgɛ ki míʔɛ gè, á kire ’laa ki míʔɛ ki tɔ́rilɔ nyuɔ gè.

¹⁸Sìnjilige ki tiʔɛ kire gī náʔa gè: a ŋìi yē síciliwe, siɛn wi- nyàʔayɛgɛ ki nyuɔ tɔ́ri gè, siɛn wi bé gbɛ̀ ki tɔ́rilɔ nyuɔ wi kɔri cɛ́n wè. Ki tɔ́rilɔ nyuɔ kiī nɛ siɛn míʔɛ kɛnmɛ tìí; ki nyuɔ kiī sirataanri togotaanri nɛ́ kɔlini (666).

Siɛnnɛ siramuʔɔyɔ togo nɛ́ kpɔrigɔ nɛ́ kɔlini pe ŋúnugo gè

¹A mi ga wéli wè, nɛ̀ Sìnbapile nyaa yérile Siyɔn nyagurugo nɛ̄ gè, nɛ́ siɛnnɛ siramuʔɔyɔ togo nɛ́ kpɔrigɔ nɛ́ kɔlini ní (144 000), ni míʔɛ gè nɛ́ Tuufɔli míʔɛ ní gè, yi ’puu sɛbɛyɛ pe gbɛgɛlɛ nɛ̄ gèle. ²A mi ’tùnmɔ páà lúʔu baa nyìʔɛnɛ nī lè bɛ̀ lakpoliyo nìʔɛyɛ tùnmɔ tíɛlɛ, kpuʔɔ bɛ̀ kàsakpɛnigɛ tùnmɔ tíɛlɛ. Nɛ̀ pínɛ ki tùnmɔ pi ’puu muɔ bé jo gɔrikpuɔnnɔ pe nyɛ́ni pe gɔrilɔ kpúɔn bèle. ³Pe ’puu nɛ ŋúnugo káà ŋú ki ní bɛ̀ ŋúnuvɔngɔ tíɛlɛ kùlofɔlilɔ kácunʔɔ ki yiʔɛ mɛ́ gè nɛ́ yawiiye sicɛri yiʔɛ mɛ́ gè, yire nɛ́ liɛlɛ ní bèle. Siɛn sì puu bè gbɛ̀ ki ŋúnugo gáà tɛnmɛ gèʔ, nɛ̀ yiri siɛnnɛ siramuʔɔyɔ togo nɛ́ kpɔrigɔ nɛ́ kɔlini (144 000) peli nī bèleʔ, bàli pe ’suɔ dàala nɛ̄ lè. ⁴Peli bálì bèle, piyè pìye le fuɔnrɔ nī nɛ́ cɛlilɛ níʔ, ki ’nyaa piyè cɛlilɛ kele cɛ́nʔ. Peli bèle, piyē Sìnbapile kúrugu lè tiʔɛ ó tiʔɛ nī ni waa wè. Peli bálì bèle, peli cé suɔ siɛnnɛ nī bèle bè puu yasɛnpelide dè Kulocɛliɛ mɛ́ wè nɛ́ Sìnbapile mɛ́ lè. ⁵Peli bèle, káfinɛrɛ fáala sì kɛ́nì yiri nɛ̀ nyaa pe nyuɔyɔ nī yèʔ. Piyē tuudiɛlɛ fùn.

Nyìʔɛnɛ tundunminɔ taanri bèle

⁶A mi ń’nɛ̀ ’nyìʔɛnɛ tundunwɔ wáà nyaa wi lali mi nyùgo nī gè baa nyìʔɛnɛ laamɛ nī bè; Kataanna Siɛnrɛ táà ’puu wi mɛ́ dàa tiǐ je ga kúɔ bè nyaa dèʔ, bè juu dàala wuulo mɛ́ bèle, nɛ́ siɛnnɛ feliye yi mìɛni yè, nɛ́ saaya tùluyo yi mìɛni yè, nɛ́ siɛnrɛ felide ti mìɛni wuulo mɛ́ bèle, nɛ́ kùlogolo ke mìɛni ní gèle.

⁷Wi ’puu nɛ nyu kpuʔɔ níɛ waa: «Yeri Kulocɛliɛ fìʔɛ́ wè, yéri wi kpóri ! Ki ’nyaa lɛ̀lɛ níì nī Kulocɛliɛ bè kàyuʔu juu gè siɛnnɛ nɛ̄ bèle, kire lɛ̀lɛ lire ni ’nɔ̀. Ye- tuu ye yiɛyɛ cúbulo yè yeri wi gbùʔɔrɔ́; wire wi ’nyìʔɛnɛ nɛ́ dàala faan lè, nɛ́ kuʔɔjii ní wè, nɛ́ lawiʔile ní gèle.»

⁸A nyìʔɛnɛ tundunwɔ wáà ń’nɛ̀ pɛ́nì fàri péliwe nɛ̄ wè, a pe ’kúɔ siin, a wire ’jo: «Ki ’tuu ! Je ki ’tuu wī ! Babilɔni kàkpuʔɔ gè je ki ’tuu wī14.8 Wéli baa Eza 21.9. ! Ki ’kùlogolo siɛnnɛ feliye yi mìɛni kɛn a pe ’gbuɔ ki kanuʔɔrɔ diviɛn gbɛ̀nwɛ nɛ̄ wè.»

⁹A mi ń’nɛ̀ nyìʔɛnɛ tundunwɔ wáà nyaa, a wi ’taʔa bìli kúrugu bèle, a pe ’kúɔ taanri.

A wi ’yɛ̀ nɛ nyu kpuʔɔ níɛ wáa: «A siɛn ŋíì ’tìgi nɛ̀ yiʔɛ cúbulo nɛ́ nyàʔayɛgɛ gbùʔɔrɔ́ gè, kire nɛ́ ki jènyinɛ yafanʔa ní gè, nɛ́ ki fìɛ tɛ́ngɛ wè wi gbɛlɛ nɛ̄ lè, á kire ’laa kɔli nɛ̄ gè, ¹⁰kire siɛn míɛni wi bé taa bè gbuɔ Kulocɛliɛ funyɛrigɛ diviɛn nɛ̄ wè, diviɛn ŋáà wi ’le fundanʔanigɛ yabuɔlɔ nī lè, wiì luʔɔ nyaʔami wi nī wèʔ. Kire siɛn wi bága de wuʔɔ kàsun nī gè, siʔɛ kàsun gè nyìʔɛnɛ tunduncɛ̀nminɛ pe nyaamɛ nɛ̄ bè, peli nɛ́ Sìnbapile ní lè !

¹¹«Pe wuʔɔgɔ ki wírige kiī nɛ yɛ̀gí súuri bànguɔ nī wī, pìlige nɛ́ cɛnvugo. Ŋɔ́daala wè pe mɛ́ʔ peli bálì pe nyɛ́ni yiɛyɛ cúbulo yè dàala nɛ̄ lè nɛ nyàʔayɛgɛ gbùʔɔrɔ́ gè, kire nɛ́ ki jènyinɛ yafanʔa ní gè, nɛ̀ pínɛ siɛn ó siɛn ŋáà nɛ̄ wi míʔɛ ki fìɛ wi yē wè.»

¹²Kulocɛliɛ wuulo pe kpàricogo tiʔɛ kire gī náʔa gè, bàli pe nyɛ́ni lúru Kulocɛliɛ kajuʔulo mɛ́ gèle nɛ́ sí tɛ́ngɛ Zezi nɛ̄ wè.

¹³A mi ń’nɛ̀ juumɔ páà lúʔu baa nyìʔɛnɛ nī lè a ki ’jo: «-Ki sɛbɛ: ‹Bɛ̀ ki yē ŋɔ̀ wè, bàli pe nyɛ́ni kúu nɛ́ ní pínɛnyɛnigɛ nɛ̄ nɛ́ Kàfɔli ní wè, pe wuʔu kiī tànʔa›. ʔaan, Kulocɛliɛ Pìle lire ni ’ki juu bɛ̀, ‹ki ’nyaa pe bé ŋɔ́ bè taa pe wuʔɔgɔ nī gè, nɛ́ ki cɛ́n pe kakpiʔilijɛ̀ngɛlɛ kiyē nɛ́ pe ní› ».

Pe ’dàala yaliire kún dè nɛ́ ti koli

¹⁴A mi ga wéli wè, nɛ̀ kàsadibagɛ káà nyaa fìige; siɛn wáà ’puu tɛ́niwɛ ki naamɛ gè, wi ’puu bɛ̀ Siɛn Pùɔ14.14 Wéli baa Dan 7.13. tíɛlɛ. Kùlofɔlilɔ ndɔ̀ngɔ ’puu wi nɛ̄ nyùgo nī gè tiɛ wuʔu, á wi ’nyàkɔnigɔ cò kɔli nī gè; ki nyuɔ ki ’puu tànʔa.

¹⁵A nyìʔɛnɛ tundunwɔ wáà ń’nɛ̀ yiri baa Gbùʔɔrɔsaʔa nī gè, níɛ kòkuulo wáari kpuʔɔ ŋìi mɛ́ wè ŋàa wi ’puu tɛ́niwɛ kàsadibagɛ naamɛ gè nɛ́ jo: «Muɔ nyàkɔnigɔ tíʔɛ gè ma kɔni ! Nɛ́ ki cɛ́n yaliire kún lɛ̀lɛ ni ’nɔ̀, dàala yaliire ti ’liɛ.»

¹⁶Ŋàa wi ’puu tɛ́niwɛ kàsadibagɛ naamɛ gè, a wi ’wi nyàkɔnigɔ tíʔɛ gè nɛ dàala yɛrɛ kɔni dè.

¹⁷A nyìʔɛnɛ tundunwɔ wáà ń’nɛ̀ yiri baa Gbùʔɔrɔsaʔa nī gè, nyìʔɛnɛ wuʔu gè; nyàkɔnigɔ káà ’puu wire míɛni mɛ́ wè nɛ̀ pínɛ, ki nyuɔ ki ’puu tànʔa. ¹⁸A nyìʔɛnɛ tundunwɔ wáà ’yiri baa gbùʔɔrɔdiʔɛ yafanʔa nī gè; wire fànʔa ki cé kàsun jáa gè. A wi ’kòkuulo wáa kpuʔɔ ŋàa mɛ́ nyàkɔnigɔ ki ’puu gè nyuɔ ní gè tànʔa gè, nɛ́ wi yɛ: «Muɔ nyàkɔnigɔ tíʔɛ gè ma dàala ɛrɛzɛn kàtoyo kún yè ma gbuʔulo, nɛ́ ki cɛ́n yasɛnrɛ ti ’liɛ.»

¹⁹A nyìʔɛnɛ tundunwɔ wi ’wi nyàkɔnigɔ tíʔɛ gè nɛ̀ dàala ɛrɛzɛn kàtoyo kúnminɔ yè nɛ̀ le ɛrɛzɛn yaforigo nī gè, Kulocɛliɛ funyɛrigbuʔɔ wuʔu gè. ²⁰A pe ’ɛrɛzɛn tánʔana wè yaforigo nī gè kàʔa kúrugu gè. A sìsiɛn ’yiri ɛrɛzɛn yaforigo nī gè nɛ̀ nyì nɛ̀ nɔ̀ suɔnyɔ yi gàrifiile nɛ̄ bèle, nɛ̀ fúu nɛ̀ kɛ́ culolo sirakeli dabataan (300) felige.

Wuʔɔgboliyo kɔlisiin sɛnyɛ yè

¹A mi ń’nɛ̀ fìɛkpuɔwɔ wáà nyaa baa nyìʔɛnɛ nī lè, wi ’tɔ̀ni nɛ̀ puu siɛn de cúru wi nɛ̄: nyìʔɛnɛ tundunminɔ kɔlisiin ’puu nɛ́ wuʔɔgboliyo kɔlisiin ní còyo; sɛnyɛ yire yi ’puu. Ki ’nyaa yire yi cé kò Kulocɛliɛ funyɛrisɛngɛ woyo yè. ²A mi ’kuʔɔjii wáà nyaa cìiliwe wi nyíʔɛnɛ bɛ̀ dibale tíɛlɛ, nyaʔamiwɛ kàsun nī. Bìli pe cé nyàʔayɛgɛ jáa gè nɛ́ ki jènyinɛ yafanʔa ní gè, nɛ́ ki míʔɛ tɔ́rilɔ nyuɔ ní gè nɛ̀ pínɛ bèle, pe ’puu baa yérile ki kuʔɔjii ŋáà nɛ̄ wè, á Kulocɛliɛ gɔrilɔ ní pe mɛ́ còbilo. ³Pe ’puu nɛ Kulocɛliɛ baakuɔwɔ Misa wi ŋúnugo15.3 Wéli baa Yir 15. ŋú gè nɛ́ Sìnbapile ni ŋúnugo ní gè, níɛ wáa:

«Kàfɔli Kulocɛliɛ, muɔ wī

Fànʔa ki mìɛni Kàfɔli wè,

muɔ kakpiʔiligele kiyē

kakpoliyo, siɛnnɛ nɛ cúru ke nɛ̄.

Muɔ koliyo yiī sìɛnyɛ

nɛ́ ní kányiʔɛ,

muɔ wī kùlogolo ke Kùlofɔli wè.

⁴Ŋáasiɛn wi bé kò

wi fǎri muɔ fìʔɛ́ʔ, Kàfɔli,

wi fǎri kpuʔɔrɔ tari

muɔ míʔɛ nɛ̄ gè wèʔ ?

Nɛ́ ki cɛ́n muɔ nigbe wī

tiɛlɛ fùn wè.

Kùlogolo ke mìɛni

béri báan de tun

muɔ yiʔɛ mɛ́ gè

bèri muɔ gbùʔɔrɔ́,

nɛ̀ taʔa gíi nɛ̄,

pe mìɛni nyɛ́nì

muɔ kàyuʔujuugɛnmɛ

nyaa bè, piī sìɛnbɛ.»

⁵Bà tire ’tóri dè, a mi ’ki nyaa Kpàlidiʔɛ Kpátaʔa gáà gī baa Kulocɛliɛ Gbùʔɔrɔsaʔa nī gè a ki ’múgu baa nyìʔɛnɛ nī lè. ⁶Nyìʔɛnɛ tundunminɔ kɔlisiin bílì pe ’puu nɛ́ wuʔɔgboliyo kɔlisiin ní yè, a pe ’yiri Gbùʔɔrɔsaʔa nī gè. Pe cé lɛn fɛ̀ni cɛ̀nwɛ yɛrɛ le ti ní nɛ nyíʔɛnɛ, nɛ́ tiɛ màʔagɛlɛ puɔ sìndinyɛ nī yè.

⁷Yawiiye sicɛri sunʔɔmɔ nī bè, a kàa nigbe sɛ́nì tiɛ yagbuʔɔlɔ kɔlisiin kɛn nyìʔɛnɛ tundunminɔ kɔlisiin mɛ́ bèle. Ki yagbuʔɔlɔ ke ’puu nyìgele Kulocɛliɛ funyɛrigɛ nɛ̄ gè, wire ŋáà wī sìi nɛ̄ yiʔɛlɛ ke mìɛni nī gèle súuri wè. ⁸A wírige ’yɛ̀ nɛ̀ Gbùʔɔrɔsaʔa nyì gè Kulocɛliɛ kpuɔmɔ pire kɛnmɛ nɛ̄ bè nɛ́ wi fànʔa ní gè. Siɛn sì puu bè gbɛ̀ jíin baa Gbùʔɔrɔsaʔa nī gèʔ, fúɔ nɛ̀ taa a nyìʔɛnɛ tundunminɔ kɔlisiin pe wuʔɔgboliyo kɔlisiin yi pɛ́nì kpíʔile nɛ̀ tóri.

Kulocɛliɛ funyɛrigɛ yagbuʔɔlɔ gèle

¹A mi ’juumɔ páà lúʔu baa Gbùʔɔrɔsaʔa nī gè, a ki ’juu kpuʔɔ nɛ́ nyìʔɛnɛ tundunminɔ kɔlisiin ní bèle nɛ́ pe yɛ: «Yeri waa ye sa Kulocɛliɛ funyɛrigɛ yagbuʔɔlɔ kɔlisiin sùʔu gèle ye wo dàala nɛ̄ lè !»

²A péliwe wi ’kɛ́ nɛ̀ sɛ́nì wi wuʔu sùʔu gè nɛ̀ wo dàala nɛ̄ lè, a ki ’yiʔɛ nɛ̀ kò fìnibiʔi siɛnnɛ nɛ̄ bèle, bìli nɛ̄ nyàʔayɛgɛ ki fìɛ wi ’puu bèle, á pe ní nɛ tun nɛ yiɛyɛ cúbulo yè nɛ ki yafanʔa gbùʔɔrɔ́ gè gàa gī wi liɛrɛ dè.

³A nyìʔɛnɛ tundunwɔ siinwuu wi sɛ́nì wi yagbuɔlɔ sùʔu lè nɛ̀ le kuʔɔjii nī wè, a ki ’yiʔɛ nɛ̀ kò sìsiɛn bɛ̀ kpúu sìsiɛn tíɛlɛ. A yawiʔile ke mìɛni ’kùu baa kuʔɔjii nī wè.

⁴A taanriwuu wi ’wi yagbuɔlɔ sùʔu lè nɛ̀ le lakoliyo nī yè nɛ́ luɔyɔ yi lawiʔile ní gèle, a ki ’yiʔɛ nɛ̀ kò sìsiɛn. ⁵Nyìʔɛnɛ tundunwɔ ŋáà wi ’puu luʔɔ kàfɔli wè, a mi ’lúʔu wi mɛ́ a wi ’jo:

«Muɔ yē sìɛnwɛ,

muɔ ŋáà wī baa wè,

nɛ́ kíni yē baa,

nɛ́ ní tiɛlɛ fùn wè,

bà muɔ ’kele gálì

ke kàyuʔu juu gè.

⁶Ki ’nyaa

peli pe ’Kulocɛliɛ wuulo

kpúu bèle nɛ́ siɛnjuulo ní bèle.

A muɔ sí pe sìsiɛn kɛn gè

pe mɛ́ pe- ki gbuɔ,

kire ki ’yɛli nɛ́ pe ní.»

⁷A mi ’lúʔu gbùʔɔrɔdiʔɛ yafanʔa mɛ́ gè a ki ’jo:

«ʔaan Kàfɔli Kulocɛliɛ,

muɔ wī Fànʔa ki mìɛni Kàfɔli wè.

Muɔ nɛ kàyuuyo nyu yè

nɛ́ kányiʔɛ ní,

muɔ nɛ̂ ki juu ki nɛ̂ sìɛn.»

⁸A nyìʔɛnɛ tundunwɔ sicɛriwuu wi ’wi yagbuɔlɔ sùʔu lè nɛ̀ wo cɛngɛ nɛ̄ gè, a kire ’ki kɛn a ki gbɛ́nɛ siɛnnɛ sórigi bèle nɛ́ ki kàsun ní gè. ⁹A siɛnnɛ pe ’súʔu kpuʔɔ, a pe ’yɛ̀ nɛ nyu nɛ Kulocɛliɛ míʔɛ córi gè, wire ŋáà mɛ́ fànʔa ki yē a wi ’ki wuʔɔgboliyo nyáà jáa yè. Piyè pe funyɔ yiʔɛ yèʔ bé sí kpuʔɔrɔ taʔa Kulocɛliɛ nɛ̄ wèʔ.

¹⁰A kogunɔwuu wi ’wi yagbuɔlɔ sùʔu lè nɛ̀ wo nyàʔayɛgɛ ki kùlofɔlilɔ kácunʔɔ nɛ̄ gè, a ki kùlofɔligɔ ki ’kò yebilige, a siɛnnɛ pe ’yɛ̀ nɛ pe nyigele nɔgi gèle bà ki yáʔa ki cé cíi pe nɛ̄ bèle. ¹¹A pe ’yɛ̀ nɛ siɛncuʔɔrɔ nyu nɛ nyìʔɛnɛ Kulocɛliɛ wi míʔɛ córi gè pe yayaara tire kɛnmɛ nɛ̄ bè, nɛ́ pe fìnide ní dè; piyè fɔ̀li nɛ̀ pe funyɔ yiʔɛ yè nɛ̀ láʔa pe kakpiʔiligele nɛ̄ gèleʔ.

¹²A nyìʔɛnɛ tundunwɔ kɔliniwuu wi ’wi yagbuɔlɔ sùʔu lè nɛ̀ le Efirati cáʔa nī gè, a ki luʔɔ ki ’lìri, gìi ki bé tí kùlofɔlilɔ bílì pe yɛ̀gí cɛngɛnyɛnifoligɔli mɛ́ gè pe- tóridiʔɛ taa. ¹³A mi ’gbòdolilo taanri nyaa pe ni bɛ̀ kpìile tíɛlɛ, a pe ’yiri yapiʔi ki nyuɔ nī gè, nɛ́ nyàʔayɛgɛ nyuɔ nī gè, nɛ́ jànvaa siɛnjuuwo wi nyuɔ nī gè. ¹⁴Ki ’nyaa gbòdolilo bīɛlɛ, piyē nɛ fìɛlɛ kpínʔini, nɛ́ sí nɛ waa dàala kùlofɔlilɔ kúrugu bèle nɛ pe pínɛ níɛ cɛngbuʔɔ siri gè, kapiɛnnɛ cɛngɛ gè. Fànʔa ki mìɛni Kàfɔli Kulocɛliɛ wi cɛngɛ kire gī.

¹⁵Kàfɔli wi ’jo: «Nyaa, m’bága pɛn bɛ̀ kàyuuwo cî siɛn fuu mmɛ. A siɛn ŋíì yē nyɛwɛ nɛ́ kò nɛ́ wi bururo ní dè, kire siɛn wi wuʔu kiī tànʔa, nɛ́ ki cɛ́n wiǐ de tári bè puu yalere fùnʔ peri wi fìɛrɛ tiʔɛ nyaʔa gèʔ.»

¹⁶A gbòdolilo pe sɛ́nì dàala kùlofɔlilɔ pínɛ bèle tiʔɛ gíì nī pe ye eburu siɛnrɛ nī dè Arimagedɔn16.16 Arimagedɔn: Kire kɔri wi ’jo: Megido nyagurugo. wè.

¹⁷A nyìʔɛnɛ tundunwɔ kɔlisiinwuu wi ’wi yagbuɔlɔ sùʔu lè nɛ̀ wáa káfaligɛ nī gè, a yékpoli láà ’juu kpuʔɔ baa Gbùʔɔrɔsaʔa nī gè, baa ni cé kɔ́n kùlofɔlilɔ kácunʔɔ tiʔɛ nī gè nɛ́ jo: «Ki ’kpíʔile nɛ̀ kúɔ !»

¹⁸A nyìʔɛnɛ ni ’nyíʔɛnɛ, a tùnmɔ páà ’tun, a kàsakpɛnigɛ ki ’kpɛ̀ni nɛ̀ taʔala, a dàala ni ’cúngo kpuʔɔ, dàala niì fìɛ cúngo kpuʔɔ nɛ̀ nyaa kire felige mmɛ gèʔ nɛ̀ líɛ bɛ̀ siɛnnɛ piyē bile duniya nī wèʔ. ¹⁹A kàkpuʔɔ ki ’wáligi tiɛyɛ taanri, a kùlogolo ke kàaya yi ’tuu nɛ̀ màʔa. A Kulocɛliɛ wi ’sɔ̀ngi nɛ̀ taa nɛ́ Babilɔni kakpuʔɔ kɛnmɛ nī bè, a wi ’wi funyɛrigɛ diviɛn yagbuɔlɔ kɛn lè ki mɛ́ a ki ’gbuɔ. ²⁰A luʔɔ sunʔɔmɔ dàʔala ke mìɛni ’fɛ̀, a nyaguruyo yi ’pùunni. ²¹A kàsasindari kpolido táà ’tìgi nyìʔɛnɛ nī lè nɛ̀ tuu siɛnnɛ nɛ̄ bèle, ti sìlubumɔ pi ’puu nɛ waa bè culolo togosiin kúɔ ki nigbe gè. A pe ’yɛ̀ nɛ nyu nɛ Kulocɛliɛ míʔɛ córi gè, kàsasindari dáà tire wuʔɔgbuʔɔ kɛnmɛ nɛ̄ bè. Ki ’nyaa ki wuʔɔgbuʔɔ gáà ki ’tɔ̀ni nɛ̀ puu sìpiʔi kátii.

Nàjaacuɔ wori dè

¹Nyìʔɛnɛ tundunminɔ kɔlisiin nī bèle, bàli mɛ́ yagbuʔɔlɔ kɔlisiin ke ’puu gèle, a wàa ’yiri baa pe nī, nɛ̀ pɛ́ni nyu nɛ́ mi ní nɛ́ jo: «Te báan náʔa, m’bé pa ki tìɛ muɔ nɛ̄ kàyuʔu gáà ki je ga tuu nàjaacuɔ nɛ̄ wè, wi míʔɛ ki ’yiri tiɛyɛ yi mìɛni nī yè, wiī tɛ́niwɛ lakpoliyo nɛ̄ yè. ²Dàala kùlofɔlilɔ pe ’pe kanuʔɔrɔ kpíʔile dè nɛ́ ki nàjaacuɔ ŋáà ní wè, a dàala wuulo pe ’kanuʔɔrɔ diviɛn gbuɔ wè nɛ̀ tín nɛ́ wi ní.»

³A nyìʔɛnɛ tundunwɔ wi ’mi yiʔɛ múgu gè, a mi ’mìɛ nyaa waama tiʔɛ káà nī. A mi sɛ́nì cɛliwɛ wáà nyaa tɛ́niwɛ nyàʔayɛgɛ káà nɛ̄; ki ’puu nyìʔɛ níɛ nyíʔɛnɛ. Kulocɛliɛ míɛcuʔɔgɔ míɛyɛ yi ’puu ki nɛ̄ nɛ̀ ki tɔ́n nɛ̀ màʔa, nyùyɔ kɔlisiin ní ki nɛ̄, nɛ́ nyɛgɛlɛ kiɛ ní. ⁴Cɛliwɛ ŋáà wi cé yɛrɛ le kábebe céri wori, tàa ní nyìɛrɛ kpólokpolo; nɛ́ wìi fèri nɛ́ tiɛ ní, nɛ́ lagbɛnrɛ yatoro ní, nɛ́ kofii ní wè. Tiɛ yagbuɔlɔ láà ’puu wi mɛ́ còlo, ni ’puu nyìnɛ tètii yɛrɛ nɛ́ kanuʔɔrɔ fuɔnrɔ ti yɛrɛ ní dè. ⁵Míʔɛ káà ’puu sɛbɛgɛ wi mɛ́ gbɛlɛ nɛ̄ lè, kalarilɛ míʔɛ gī, ki ’jo:

«Babilɔni kàkpuʔɔ,

nàjaacɛlilɛ nɛ́ dàala tètii yɛrɛ

ti yàa wè.»

⁶Mi cé cɛliwɛ ŋáà nyaa wè wi ní gbuɔdinwɛ Kulocɛliɛ wuulo pe sìsiɛn nɛ̄ gè, peli nɛ́ Zezi wori ti juufɔlilɔ sìsiɛn ní gè. A ki ’tɔ̀ni nɛ̀ mi fungo wúɔ kpuʔɔ bà mi ’wi nyaa wè.

⁷A nyìʔɛnɛ tundunwɔ wi ’mi yɛ: «Gáa nɛ̄ muɔ ’ki yaʔa a ki ’fungo wúɔ muɔ nī ? Cɛliwɛ ŋáà wè nɛ́ nyàʔayɛgɛ gáà nɛ̄ wi yē tɛ́niwɛ wè, nyùyɔ kɔlisiin nɛ́ nyɛgɛlɛ kiɛ nyàʔayɛgɛ gè, m’bé pe kalarilɛ juu lè muɔ mɛ́. ⁸Nyàʔayɛgɛ gáà muɔ ’nyaa gè, ki yé puu, ki sí ní wè tíinʔ. Píra ŋáà nī wè, ki bé sí yiri láʔalafun kàtiʔɛ nī gè bé sí kɛ́ cúʔɔgoligo nī wī.

«Dàala wuulo pe béri cúru ki wori nɛ̄ dè, peli bálì bèle pe míɛyɛ yi wè baa sɛbɛyɛ sìi sɛbɛ nī wèʔ nɛ̀ líɛ bà duniya wi ’faan wè. Pe béri cúru nyàʔayɛgɛ ki nyaʔa nɛ̄ gè, nɛ̀ taʔa gíi nɛ̄, ki ’puu bile, nɛ́ sí kɛ́nì yē ki ní wè bileʔ, nɛ̀ sí ki taa ki bé ní ga pɛn.

⁹«Náʔa gè, siɛn ’yɛli wi- puu síciliwe wi siɛnrɛ dáà ti kɔri cɛ́n wè: nyùyɔ kɔlisiin yè, nyaguruyo kɔlisiin yī, yire nɛ̄ cɛliwɛ wi yē tɛ́niwɛ wè. Kùlofɔlilɔ kɔlisiin bīɛlɛ nɛ̀ pínɛ. ¹⁰Pàli kogunɔ nyɛ́nì tuu pe nī, wàa nigbe nɛ tíin baa, ŋìi sɛnwɛ wiì fìɛ pɛnʔ. A wi kɛ́nì pɛn wè, wiǐ je mɔgɔʔ, lɛ̀lɛ cɛ̀ri wi bé kúɔ.

¹¹«Nyàʔayɛgɛ gíì ki cé kíni nɛ̀ puu gè, nɛ́ kɛ́ni yē ki ní wè baa gèʔ, kire gī kùlofɔli kataanriwuu wè nɛ́ ní baa kɔlisiin nī bèle, ki sí yē nɛ waa cúʔɔgoligo nī wī.

¹²«Nyɛgɛlɛ kiɛ gálì muɔ ’nyaa gèle, kùlofɔlilɔ kiɛ bīɛlɛ; piyè fìɛ tɛ́ni kùlofɔligɔ nɛ̄ gèʔ. Nɛ̀ sí ki taa pe bága liɛri nigbe taa bè puu fànʔa nɛ̄ gè bɛ̀ kùlofɔlilɔ tíɛlɛ nɛ́ nyàʔayɛgɛ ní gè. ¹³Peli bèle, pe ’pe wuʔu cáan gè nigbe nɛ̄: pe ŋɔri dè nɛ́ pe fànʔa ní gè, bè ti kɛn nyàʔayɛgɛ mɛ́ gè. ¹⁴Pe bága tuu kapiɛnnɛ nɛ̄ nɛ́ Sìnbapile ní lè; Sìnbapile ni bé sí pe jáa. Nɛ́ ki cɛ́n wire wī kàfɔlilɔ pe Kàfɔli wè, nɛ́ kùlofɔlilɔ pe Kùlofɔli wè. Nɛ̀ pínɛ bìli bīɛlɛ nɛ́ wi ní bèle, bàli wi ’yeri bèle nɛ́ bìli wi ’nyíɛnɛ nɛ̀ kɔ̀n bèle, nɛ̀ fàri bìli bīɛlɛ tɛ́ngɛmɛ siɛnnɛ bèle, pe bé ’kapiɛnnɛ jáa lè nɛ́ wi ní.»

¹⁵A nyìʔɛnɛ tundunwɔ wi ń’nɛ̀ mi yɛ: «Luɔyɔ nyáà muɔ ’nyaa yè, á nàjaacuɔ ní wè tɛ́niwɛ yi nɛ̄ yè, kùlogolo gīɛlɛ nɛ́ siɛnniʔɛmɛ ní, siɛnfeliye yī nɛ́ siɛnrɛ felide ní. ¹⁶Nyɛgɛlɛ kiɛ gálì muɔ ’nyaa gèle, nɛ́ nyàʔayɛgɛ ní gè, nàjaacuɔ wi bága pe biɛn, pe bé wi kari bè wáa bè wi yɛrɛ fòlilo dè wi nɛ̄ wi- kò fòribiɛ. Pe bága wi kaara káa dè bé sí sɛnrɛ sórigo dè kàsun nī. ¹⁷Ki ’nyaa Kulocɛliɛ wi ’ki le pe funyɔ nī yè pe wire nyɛ́ni kaala kúɔ lè; pe bé pe funyɔ cáan yè nigbe nɛ̄ bé pe fànʔa kɛn gè nyàʔayɛgɛ mɛ́ gè, fúɔ bè taa Kulocɛliɛ siɛnrɛ ti pa fori.

¹⁸«Cɛliwɛ ŋíì sí muɔ ’nyaa wè, kàkpuʔɔ kire gī, kire ki nyɛ́ni fànʔa kpúɔn dàala kùlofɔlilɔ nɛ̄ bèle.»

Babilɔni kàʔa ki tuu wori dè

¹Bà tire ’tóri dè, a mi ’nyìʔɛnɛ tundunwɔ wáà nyaa cígini, wi tíri nyìʔɛnɛ nī lè; fànʔa ’puu wi mɛ́ kpuʔɔ. Wi nyíʔɛnimɛ pi kpìɛnmɛ pi ’puu nɛ dàala càanná lè. ²A wi ’kòkuulo wáa nɛ̀ juu kpuʔɔ nɛ́ jo:

«Ki ’tuu ! Babilɔni kàkpuʔɔ ki ’tuu !

Ki ’kò gbòdolilo súɔndiʔɛ,

nɛ̀ pínɛ ki ’kò yakanʔara felide ti mìɛni kòridiʔɛ,

nɛ́ sínjinʔɛnɛ gálì kiyè nyuɔ gèleʔ ke feligele ke mìɛni kòridiʔɛ,

[yajuuro dáà tiì nyuɔʔ ti felide ti mìɛni kòridiʔɛ], dìi ti ’siɛn biɛn dè.

³Ki ’nyaa kùlogolo siɛnnɛ feliye yi mìɛni nyɛ́nì wi kanuʔɔrɔ diviɛn gbɛ̀nwɛ gbuɔ wè,

a dàala kùlofɔlilɔ pe ’pe kanuʔɔrɔ kele kpíʔile gèle nɛ́ wi ní.

Nɛ̀ pínɛ lagbɛnrɛ nàbuɔrɔ yē wi nɛ̄, ti sí yē fànʔa ní,

a dàala yasuɔbarilɛ pe ’tire tíʔɛ nɛ̀ pe lɔri caa dè nɛ̀ kò lɔrifɔlilɔ.»

⁴A mi ń’nɛ̀ yékpoli láà lúʔu baa nyìʔɛnɛ nī lè a ni ’jo:

«Mi kùlo wuulo, yeri yigi baa wi tiʔɛ nī gè,

gìi ki bé tí yeli fǎga fàri wi nɛ̄ bèri wi kapiʔile kpínʔini gèleʔ,

dí wi wuʔɔgboliyo nyáà yi wi siri yè yi fǎga yeli taaʔ.

⁵Nɛ̀ taʔa gíi nɛ̄, wi kapiʔile ke ’taʔala kìye nɛ̄

fúɔ nɛ̀ sɛ́nì nɔ̀ baa nyìʔɛnɛ nī lè.

A Kulocɛliɛ wi sí ’sɔ̀ngi nɛ̀ taa nɛ́ wi kacuʔɔrɔ ní dè.

⁶Ye- ki felige núgo gè wi mɛ́ gìi wire tíimɛ ’puu nɛ kpínʔini bìli nɛ̄ bèle,

ye- ki feliye siin kpíʔile wi nɛ̄, gìi wi ’puu nɛ kpínʔini gè.

Wi yagbuɔlɔ níì ní wi ’puu nɛ bìli wuʔu kíri gè nɛ kanʔa wè,

ye- ki feliye siin kíri ye le wi mɛ́.

⁷Kɛnmɛ bíì nɛ̄ wi ’puu nɛ wìi nyíɛnɛ wè, níɛ wi lagbɛnrɛ nàbuɔrɔ tìí dè,

ye- wuʔɔgɔ taʔa wi nɛ̄ kpuʔɔ kire felige, wi de fuunmɔ kɔngɔ wáari.

Nɛ̀ taʔa gíi nɛ̄, wi ’puu nɛ ki sɔ̀ngí baa wi fungo nī gè níɛ̀ jo:

‹Mi yē tɛ́niwɛ nɛ ní kùlofɔli, lakicuɔ bɛ̀ʔ mi wèʔ,

nɛ̀ pínɛ mi sì ń’nɛ̀ je ga fuunmɔ kɔngɔ wáa bè nyaa púloʔ.›

⁸Kire nɛ̄, wuʔɔgboliyo nyáà yi ’yɛli nɛ́ wi ní yè,

yi bé wi pínɛ bè taa cɛnnugo nī:

kùu nɛ́ fuunmɔ kɔngɔ,

nɛ́ funduuro, nɛ̀ pínɛ wi bága súʔu kàsun nī.

Nɛ̀ taʔa gíi nɛ̄, fànʔa yē Kàfɔli Kulocɛliɛ mɛ́ wè,

wire ŋáà wi ’wi kàyuʔu juu gè.»

⁹Duniya kùlofɔlilɔ bílì pe ’kanuʔɔrɔ kpíʔile nɛ́ wi ní wè, nɛ́ cé puu nɛ pe lagbɛnrɛ nàbuɔrɔ ti nàgbuʔɔrɔ kpínʔini dè, pe bága de nyɛni de wi wuʔu yáa gè, a pe kɛ́nì wi sórigi a wírige kiī yɛ̀gí pe ki nyaʔa gè. ¹⁰Pe bága yéri liʔi fíɛrɛ tire kɛnmɛ nɛ̄ bè bɛ̀ wiī nɛ kàlí wè, bé sí de nyu bé jo:

«ʔé, kiī fuunmɔ wuʔu ! ʔé, je kiī fuunmɔ wuʔu !

Cí, kàkpuʔɔ gè, Babilɔni kàʔa gè, ŋɔri kàʔa gè lé !

Kàyuʔu ki ’fali nɛ̀ tuu muɔ nɛ̄ círɛcirɛ mmɛ gè lé ?»

¹¹Duniya yasuɔbarilɛ pe ’yɛ̀ nɛ nyɛni nɛ fuunmɔ kɔngɔ wáari, ki ’nyaa siɛn sì cé ń’nɛ̀ puu nɛ yafiɛn suu pe yaparirɛ nī dèʔ. ¹²Tiɛ tugolo, nɛ́ walifiiwe, nɛ́ lagbɛnrɛ sìndari, nɛ́ kofii, nɛ́ lɛn fɛ̀ni cɛ̀nwɛ, nɛ́ kábebe céri fɛ̀ni ŋáà wi nyíʔɛnɛ wè, nɛ́ kɔ̀rimiimɛ fɛ̀ni ŋáà pe ye suwa wè, nɛ́ fɛ̀ni nyìɛwɛ ŋáà wi nyíʔɛnɛ wè, nɛ́ nùdaanna kásɛnrɛ, nɛ́ soli gàanya yakpiʔiligele ní, nɛ́ lagbɛnrɛ tiicɛ̀nrɛ yakpiʔiligele ní gèle, nɛ́ kányiɛrɛ, nɛ́ timɔri, nɛ́ sìndɛnigɛ gáà pe ye mabiri wè, ¹³nɛ́ nùdaanna yasuuro dáà pe ye kanɛli wè, nɛ́ yasuʔɔrɔ dáà pe ye amɔmi wè, nɛ́ nùdaanna yɛrɛ, nɛ́ miiri sùnmɔ, nɛ́ wusuna, nɛ́ diviɛn, nɛ́ sùnmɔ, nɛ́ míivuɔnimɔ, nɛ́ bíle, nɛ́ yajuuro tòyo, sìnbaara, suɔnyɔ, nɛ́ suɔnyɔ wotorilo, nɛ́ sùkulolo nɛ̀ fàri siɛnwarilɛ nɛ̄. ¹⁴Ki sí n’gɛ, yɛrɛ díì kúrugu muɔ ’puu nɛ yaʔala dè, ti ’suɔ muɔ mɛ́. Nɛ̀ pínɛ muɔ yacɛ̀nrɛ dè nɛ́ muɔ lɔri ní dè, ti mìɛni ti ’cúʔɔ muɔ kiyɛ nī yè, tiǐ ń’nɛ̀ je ga nyaa cíginiʔ. ¹⁵Yasuɔbarilɛ bílì wi cé kpíʔile a pe ’kò lɔrifɔlilɔ nɛ́ ki yɛrɛ dáà ní dè. Pe bága yéri liʔi fíɛrɛ tire kɛnmɛ nɛ̄ bè bɛ̀ wiī nɛ kàlí wè; bèri nyɛni de yobilo, ¹⁶béri wáa:

«ʔé kapiile ! ʔé kapiile !

Kàkpuʔɔ gè, gàa ki ’puu nɛ lɛn fɛ̀ni cɛ̀nwɛ bururo nii dè,

nɛ́ kábebe céri fɛ̀ni bururo ní dè, nɛ́ dìi ti sî puu nyìɛrɛ dè,

nɛ́ tiɛ wori ní dè, nɛ́ lagbɛnrɛ sìndari ní dè, nɛ́ kofii ní wè !

¹⁷Ki ’nyaa lɔri dáà ti mìɛni ti ’fali nɛ̀ cúʔɔ círɛcirɛ mmɛ gè lé ?»

Kɔ́rikpoliyo yi fɛ̀vɔlilɔ bèle, nɛ́ yasuɔbarilɛ bílì pe nyaari kɔ́riyɔ nī yè, nɛ́ bìli pe baara kɔ́riyɔ nī yè, nɛ́ bìli pe nyɛ́ni pe nyalii tari wè kuʔɔjii luʔɔ nī gè, a pe ’yéri baa liʔi. ¹⁸A pe ’yɛ̀ nɛ kòkuʔulo wáari bà pe ’kàʔa nyaa gè ki sóri níɛ wírigi gè. Pe ’puu nɛ ki nyu níɛ wáa: «Kàʔa gíi ki cé wúɔ nɛ̀ yɛli nɛ́ kàkpuʔɔ ní gè ?» ¹⁹A pe ’yɛ̀ nɛ tárigɛ kunu nɛ wáari pìye nɛ̄ nyùgo nī gè, níɛ kòkuʔulo wáari nɛ nyɛni nɛ fuunmɔ kɔngɔ wáari, níɛ wáa:

«ʔé, kapiile ! ʔé kapiile !

Je kàkpuʔɔ kire gī !

Kuʔɔjii kɔ́rikpoliyofɔlilɔ pe mìɛni bèle,

kàkpuʔɔ kire nī pe ’pe lɔri nìʔɛrɛ taa dè.

Cí ! Kire kàʔa kire gī lé

ki ’kò nɛ waa kpànʔa sɛni mmɛ gè lé ?

²⁰Nyìʔɛnɛ yo, ma puu fundaanra nɛ̄ ki wori nɛ̄ dè !

Yeli míɛni bèle Kulocɛliɛ wuulo bèle, nɛ́ wi tundunminɔ ní bèle,

nɛ́ Kulocɛliɛ wi siɛnjuulo ní bèle, ye- puu fundaanra nɛ̄.

Nɛ̀ taʔa gíi nɛ̄, Kulocɛliɛ wi ’kàyuʔu juu gè kàʔa gáà nɛ̄ gè nɛ̀ yeli kɛn.»

²¹A nyìʔɛnɛ tundunwɔ wáà, ŋàa wī ŋɔri ní kpuʔɔ wè, a wi ’sìndɛnigbuʔɔ líɛ ki ní bɛ̀ tírɛ sìndɛnigbuʔɔ tíɛlɛ, nɛ̀ ki wáa kuʔɔjii nī wè nɛ́ jo:

«Kayaʔa gáà kire felige ní pe bága Babilɔni kàkpuʔɔ wáa gè !

Kiì ń’nɛ̀ je ga nyaa púlo cígini wīʔ.

²²Gɔrikpuɔnnɔ tùnmɔ, nɛ́ yakpuɔnrɔfɔlilɔ,

nɛ́ maʔanafɔlilɔ, nɛ́ kàkpanʔa wíifɔlilɔ,

tire táà sì ń’nɛ̀ je lúʔu baa muɔ tiʔɛ nī gè cíginiʔ.

Nɛ̀ pínɛ yakpiʔiliwe wáà fáala sì ń’nɛ̀ je nyaa baa muɔ tiʔɛ nī gè cíginiʔ;

tírɛ tùnmɔ míɛni sì ń’nɛ̀ je lúʔu baa muɔ tiʔɛ nī gè cíginiʔ.

²³Fètinnɛ kpìɛnmɛ sì ń’nɛ̀ je nyaa muɔ tiʔɛ nī gè cíginiʔ,

nɛ̀ pínɛ nàgapɔrivɔnwɔ nɛ́ cefɔnwɔ yékpoli sì ń’nɛ̀ je lúʔu muɔ tiʔɛ nī gèʔ.

Nɛ̀ taʔa gíi nɛ̄, muɔ yasuɔbarilɛ peli pe ’puu duniya siɛnkpolilo bèle,

nɛ̀ pínɛ muɔ dìʔɛ kire ki ’siɛnnɛ feliye yi mìɛni fáanni nɛ̀ le kobuunnigo nī gè.

²⁴Baa muɔ tiʔɛ nī gè, Kulocɛliɛ siɛnjuulo pe sìsiɛn kiī baa,

nɛ́ Kulocɛliɛ wuulo pe sìsiɛn ní gè,

nɛ́ siɛnnɛ bílì pe mìɛni pe ’kpúu dàala nɛ̄ lè.»

¹Bà tire ’tóri dè, a mi ’juumɔ páà lúʔu kpuʔɔ baa nyìʔɛnɛ nī lè, bɛ̀ siɛnniʔɛmɛ kàgbaaligɛ tíɛlɛ; pe nyu níɛ wáa:

«Ye- Yewe gbùʔɔrɔ wè ! Kpuʔɔrɔ ti ’yɛli Kulocɛliɛ nɛ̄ !

Suɔlɔ lè, nɛ́ kpuɔmɔ ní bè, nɛ́ ŋɔri ní dè, tiī weli Kulocɛliɛ wori !

²Ki ’nyaa wi kàyuʔujuuro tiī kányiʔɛ nɛ́ ní sìɛnrɛ.

Wi ’nàjaacuɔ wi kàyuʔu juu gè,

ŋàa wi ’puu nɛ dàala siɛnnɛ fáanni bèle nɛ́ wi nàjaara ní dè.

Kulocɛliɛ wi ’wi kayaʔa fuʔɔ tɔ́n gè,

wi baakuɔlɔ bálì nàjaacuɔ wi yé kpúu bèle.»

³A pe ń’nɛ̀ ki juu tɔliyɔ siin nɛ́ jo:

«Ye- Yewe gbùʔɔrɔ wè ! Kpuʔɔrɔ ti ’yɛli Kulocɛliɛ nɛ̄ !

Kàkpuʔɔ ki wírige kiī nɛ yɛ̀gí súuri, kiì je ga kúɔʔ.»

⁴A liɛlɛ togo nɛ́ sicɛri bèle nɛ́ yawiiye sicɛri ní yè, a pe ’tìgi nɛ̀ tuu Kulocɛliɛ yiʔɛ mɛ́ gè wi ní tɛ́niwɛ kùlofɔlilɔ kácunʔɔ nɛ̄ gè, nɛ wi gbùʔɔrɔ́, níɛ wáa:

«Ki- taa ki puu bɛ̀ !

Ye- Yewe gbùʔɔrɔ wè !»

Sìnbapile cepɔrigɔ lìile lè

⁵A juumɔ páà ’yiri baa kùlofɔlilɔ kácunʔɔ tiʔɛ nī gè nɛ̀ jo:

«Yeri weli Kulocɛliɛ gbùʔɔrɔ́ wè,

yeli ye mìɛni bèle wi baakuɔlɔ bèle,

nɛ́ yeli ye mìɛni bálì ye wi fìʔɛ́ bèle,

yìrile yo, kpolilo yo !»

⁶A mi ’tùnmɔ páà lúʔu bɛ̀ siɛnniʔɛmɛ tùnmɔ tíɛlɛ, ki ní bɛ̀ lakpuʔɔ tùnmɔ tíɛlɛ nɛ̀ pínɛ; ki ’puu nɛ̀ pínɛ muɔ bé jo kàsakpɛnigɛ ki kpɛ̀ní kpuʔɔ nɛ taʔala. Pe ’puu nɛ nyu níɛ wáa:

«Ye- Yewe gbùʔɔrɔ wè !

Nɛ́ ki cɛ́n weli Kàfɔli Kulocɛliɛ wi ’tɛ́ni fànʔa nɛ̄ gè,

wire wī Fànʔa ki mìɛni Kàfɔli wè !

⁷Ye- puu weri fundaanra kpínʔini weri muguri,

weri kpuʔɔrɔ tari wi nɛ̄.

Ki ’nyaa Sìnbapile ni cepɔrigɔ cɛngɛ ki ’nɔ̀;

ni cuɔ wi ’wìi gbòbori nɛ̀ yaʔa.

⁸Pe ’wi ’kɛn nɛ́ fɛ̀nicɛnwɛ ní a wi ’le,

lɛn fɛ̀ni ŋáà wi nyíʔɛnɛ wè.»

Ki ’nyaa lɛn lagbɛnrɛ wuu wè, Kulocɛliɛ wuulo pe kasingele keli gīɛlɛ.

⁹A nyìʔɛnɛ tundunwɔ wi ’mi yɛ: «-Ki sɛbɛ ma jo: Bàli pe ’yeri Sìnbapile ni cepɔrigɔ suro lìidiʔɛ nī gè, pe wuʔu kiī tànʔa.» A wi ń’nɛ̀ mi yɛ: «Siɛnrɛ dáà dè, Kulocɛliɛ wire tíimɛ nyasiɛnrɛ dī.»

¹⁰A mi ’tìgi nɛ̀ tuu wi tɔliyɔ láara yè bè kpuʔɔrɔ taʔa wi nɛ̄. A wi sí mi yɛ: «Fǎga ki puu bɛ̀ʔ ! Mi yē muɔ baakuɔnyɛni wī, nɛ́ muɔ siinyɛninɛ ní bèle nɛ̀ pínɛ, bílì pe ’fɔ̀li Zezi wori nɛ̄ dè; Kulocɛliɛ wire muɔ ’yɛli bèri gbùʔɔrɔ́, nɛ̀ taʔa gíi nɛ̄, gìi ki nyɛ́ni nyu Zezi wori nɛ̄ dè, kire gī Kulocɛliɛ kajuulo siɛnrɛ ti nyùgo gè.»

Suɔnfiige fɛ̀vɔli wè

¹¹A mi ’nyìʔɛnɛ nyaa lè a ni ’múgu, nɛ́ fali nɛ̀ suɔnfiige káà nyaa. Ŋàa wi ki fé gè, pe wi ye Tɛ́ngɛmɛ Siɛn nɛ́ Kányiʔɛfɔli, nɛ̀ pínɛ wiī nɛ kàyuʔu nyu gè níɛ kapiɛnnɛ kpúɔn lè nɛ́ sínmɛ ní. ¹²Wi nyapigele kiyē muɔ bé jo kàsunnyige gī, á kùlofɔlilɔ ndɔ̀nyɔ nìʔɛyɛ ní wi nɛ̄ nyùgo nɛ̄ gè. Míʔɛ káà ’puu wi nɛ̄ sɛbɛgɛ; siɛn sì ki cɛ́nʔ, nɛ̀ yiri wire nigbe nī.

¹³Burugbuʔɔ káà ’puu wi nɛ̄ lege, ki mìɛni ’puu sìsiɛn. Wi míʔɛ gè, pe ’puu nɛ wi ye Kulocɛliɛ Siɛnrɛ. ¹⁴Nyìʔɛnɛ kapiɛngbuɔn tòyo yi ’puu nɛ nyaari wi kúrugu, pe ní tɛ́ninɛ suɔnfiiye nɛ̄; lɛn fɛ̀ni fìiwe wi wecɛ̀nwɛ pe cé le. ¹⁵Ŋɔsii tàanwa wáà ’puu wi mɛ́ nyuɔ nī gè sìɛnwɛ wè bè kùlogolo siɛnfeliye kpúɔn yè nɛ́ wi ní, bé sí de pe nári wire tíimɛ wè nɛ́ timɔri kàgbiile ní19.15 Wéli baa Ŋún 2.9.. Nɛ̀ pínɛ, wire tíimɛ wi béri ɛrɛzɛn yaforigo tánʔana gè, gàa nī Kulocɛliɛ funyɛrigbuʔɔ diviɛn wiī nɛ yigi wè, wire wī Fànʔa ki mìɛni Kàfɔli wè. ¹⁶Míʔɛ káà ’puu sɛbɛgɛ wi burugbuʔɔ nɛ̄ gè nɛ́ wi cekpuɔlɔ ní lè, ki míʔɛ gè:

Kùlofɔlilɔ Kùlofɔli

nɛ́ Kàfɔlilɔ Kàfɔli.

¹⁷A mi ’nyìʔɛnɛ tundunwɔ wáà nigbe nyaa yériwe baa cɛngɛ laamɛ nī bè. Wi kòkuulo wáari kpuʔɔ sínjiɛnyɛ yi mìɛni mɛ́ yè nyàa yi lali naamɛ gè, níɛ wáa: «Yeri báan ye pa gbuʔulo, ye- Kulocɛliɛ lìigbuɔlɔ lìi lè ! ¹⁸Ye- kùlofɔlilɔ pe kaara káa dè, nɛ́ kapiɛngbuɔnnɔ kàfɔlilɔ kaara ní dè, nɛ́ ŋɔrifɔlilɔ kaara dè, nɛ́ suɔnyɔ kaara nɛ́ yi fɛ̀vɔlilɔ pe kaara dè, nɛ́ siɛnnɛ pe mìɛni kaara ní dè: bìli bīɛlɛ pìyemɛ yo, sùkulolo yo, yìrile yo, nɛ̀ kpolilo pínɛ !»

¹⁹A mi ’nyàʔayɛgɛ nyaa gè nɛ́ dàala kùlofɔlilɔ ní bèle, nɛ́ pe kapiɛngbuɔnnɔ ní bèle; pe cé pìye pínɛ bè tuu ŋàa nɛ̄ wi ’puu tɛ́niwɛ sunʔɔ nɛ̄ gè wire nɛ́ wi kapiɛngbuɔnnɔ ní bèle.

²⁰Nɛ̀ sí ki taa a pe ’nyàʔayɛgɛ cò gè nɛ̀ fàri jànvaa siɛnjuuwo nɛ̄ wè, wire ŋáà wi ’puu nɛ fìɛkpolilo kpínʔini bèle ki yiʔɛ mɛ́ gè, níɛ siɛnnɛ fáanni bèle nɛ pùunní wè, bìli nɛ̄ nyàʔayɛgɛ ki fìɛ wi ’puu wè, nɛ́ bìli pe ’puu nɛ tun ki yafanʔa yiʔɛ mɛ́ gè gàa gī ki líɛrɛ dè nɛ ki gbùʔɔrɔ́ wè. A pe ’pe wewiile siin líɛ bèle nɛ̀ wáa siʔɛ kàsunnyige kpuʔɔ nī gè. ²¹Bìli pe cé kò bèle, a sunʔɔ fɛ̀vɔli wi ’pe kpúu nɛ́ wi ŋɔsii ní wè, ŋɔsii tàanwa ŋáà wi ’puu wi mɛ́ nyuɔ nī gè sìɛnwɛ wè; a sínjiɛnyɛ yi mìɛni ’káa nɛ̀ tín pe kaara nɛ̄ dè.

Yiʔɛlɛ sirakogunɔ wori dè

¹A mi ’nyìʔɛnɛ tundunwɔ wáà nyaa wi tíri nɛ báan nyìʔɛnɛ nī lè; láʔalafun kàtiʔɛ ki kɔ̀rikaanna ni ’puu wi mɛ́ nɛ́ nyùʔɔdirige síkpilige káà ní wi mɛ́ kiyɛ nī yè. ²A wi ’yapiʔi cò gè, wɔ̀biliʔɛ gè, kire gī gbòdolilo kàfɔli wè nɛ́ ní Setɛni wè. A nyìʔɛnɛ tundunwɔ wi ’wi puɔ nɛ̀ cáan nɛ̀ taa yiʔɛlɛ sirakogunɔ (1 000). ³Nɛ́ kúɔ nɛ́ wi wáa láʔalafun kàtiʔɛ nī gè nɛ́ ki sùʔɔ nɛ̀ tɔ́n wi nɛ̄ naamɛ gè, nɛ́ fìɛ tɛ́ngɛ ki nɛ̄, gìi ki bé tí wi fǎga ní de kùlogolo siɛnnɛ fáanni bèle de pùunníʔ, fúɔ bè taa yiʔɛlɛ sirakogunɔ (1 000) ke- pa nyì. A tire kɛ́nì tóri dè, fúɔ ki ’yɛli pe- wi múgu bè wáa wi- lɛ̀lɛ cɛ̀ri kúɔ.

⁴A mi ’kùlofɔlilɔ kácuɔnyɔ yáà nyaa. Bìli pe ’puu tɛ́ninɛ yi nɛ̄ yè, a pe ’kàyuʔu ki siɛnrɛ kɛn dè pe mɛ́. Siɛnnɛ bílì nyùyɔ pe yé celile nɛ́ kágbaʔa ní gè Zezi wire wori ti juʔu kɛnmɛ nɛ̄ bè nɛ́ Kulocɛliɛ Siɛnrɛ ti kɛnmɛ nɛ̄ bè, nɛ́ bìli piyè cé fɔ̀li nɛ̀ nyàʔayɛgɛ gbùʔɔrɔ gèʔ nɛ́ ki yafanʔa gáà gī wi líɛrɛ dèʔ, nɛ́ bìli pe ’puu fìɛ wiì cé tɛ́ngɛ pe gbɛgɛlɛ nɛ̄ gèle nɛ́ pe kiyɛ ní yè wèʔ, a mi ’pe nyaa a pe ’nyɛ́ nɛ̀ yiri, nɛ̀ tɛ́ni fànʔa nɛ̄ gè nɛ́ Kirisi ní wè nɛ̀ taa yiʔɛlɛ sirakogunɔ (1 000). ⁵Kúbilo sɛnminɛ bèle, peli sì nyɛ́ʔ, fúɔ nɛ̀ taa a yiʔɛlɛ sirakogunɔ ke pɛ́nì nyì. Kire ’nyaa nyɛ́yirile pélile lè. ⁶A siɛn ŋíì ’nyaa baa nyɛ́yirile pélile náà nī lè, wi wuʔu kiī tànʔa, nɛ̀ pínɛ Kulocɛliɛ wuu wī. Peli bálì bèle, kùu siinwuu wi fànʔa wè pe nɛ̄ʔ. Ki ’nyaa pe bé puu Kulocɛliɛ nɛ́ Kirisi kacuɔnrilɔ wī, pe bé tɛ́ni fànʔa nɛ̄ gè nɛ́ Kirisi ní wè bè taa yiʔɛlɛ sirakogunɔ gálì gèle.

Setɛni wi fànʔa ki ’cúʔɔ

⁷A yiʔɛlɛ sirakogunɔ (1 000) ke kɛ́nì nyì gèle, pe bé Setɛni yige wè wi kasuu nī wè. ⁸Wi bé kɛ́ bè sari kùlogolo siɛnnɛ feliye fáanni yè de pùunní dàala láʔagɛlɛ tiɛyɛ sicɛri nī yè, peli bīɛlɛ Gɔgi nɛ́ Magɔgiyé20.8 Gɔgi nɛ́ Magɔgiyé: Yerigɛnmɛ báà pire nɛ̄ pe ’puu nɛ Kulocɛliɛ leguulo yeri bèle, kùlogolo siɛnfeliye nyíì yiì puu nɛ Kulocɛliɛ caa wèʔ (wéli baa Ezek 38–39). bèle, bè pe kɔ́ri bè gbuʔulo kapiɛnnɛ lire míʔɛ nɛ̄. Pe bé puu nìʔɛbɛlɛ bɛ̀ kuʔɔjii dàrimiʔɛ tíɛlɛ gè. ⁹A pe ’yiri nɛ̀ cɛ̀ri dàala nɛ̄ lè, nɛ̀ Kulocɛliɛ wuulo tiʔɛ màʔa gè nɛ̀ suʔu nɛ́ Kulocɛliɛ kàʔa gáà ki ’wi dɛ́ni wè nɛ̀ pínɛ gè. A kàsun káà ’tìgi nyìʔɛnɛ nī lè nɛ̀ pe sórigo péwu. ¹⁰Píra ŋáà nī wè, gbòdolilo kàfɔli wè, pe fáannivɔli wè, a pe ’wi wáa kàsunkpuʔɔ nī gè siʔɛ kàsun gè, baa nyàʔayɛgɛ kúrugu gè nɛ́ jànvaa siɛnjuuwo ní wè. Pe béri wuʔɔ de kàlí baa pìlige nɛ́ cɛnvugo, súuri kúɔmɔ fùn.

Kàyuʔu sɛngɛ gè

¹¹A mi ’kùlofɔlilɔ kácunʔɔ káà nyaa kpuʔɔ fìige nɛ́ siɛn ŋáà wi ’puu ki nɛ̄ tɛ́niwɛ wè. Dàala nɛ́ nyìʔɛnɛ ní lè ti cé fɛ̀ nɛ̀ sìʔɛrɛ wi yiʔɛ mɛ́ gè; ti tiʔɛ kiì cé ń’nɛ̀ cɛ́nʔ. ¹²A mi ’kúbilo nyaa bèle, kpolilo bèle nɛ́ yìrile ní bèle, yérile kùlofɔlilɔ kácunʔɔ ki yiʔɛ mɛ́ gè. Á pe ’sɛbɛlɛ pálì múgolo, nɛ́ ń’nɛ̀ sɛbɛ wáà múgu, wire wi ’puu sìi wuu wè. Píra ŋáà nī wè, a pe ’kúbilo pe kàyuʔu juu gè nɛ̀ yɛli nɛ́ gìi ki ’puu sɛbɛgɛ baa sɛbɛlɛ nī bèle, wàa ó wàa, nɛ̀ yɛli nɛ́ wi kakpiʔiligele ní gèle.

¹³A kuʔɔjii wi ’wi kúbilo kɛn bèle, kùu wè nɛ́ kusiʔi ní gè, a pe ’pe kúbilo kɛn bèle. A pe ’pe kàyuʔu juu gè, wàa ó wàa nɛ̀ yɛli nɛ́ wi kakpiʔiligele ní gèle. ¹⁴Kùu wè nɛ́ kusiʔi ní gè, a pe ’ti wáa kàsunkpuʔɔ nī gè, kire gī kùu siinwuu wè, kàsunkpuʔɔ gè. ¹⁵A siɛn ŋíì míʔɛ sì cé nyaa baa sìi sɛbɛ nī wèʔ, pe nɛ̂ cé wi wáa baa kàsunkpuʔɔ nī gè.

Nyìʔɛnɛ fɔnnɔ nɛ́ dàala fɔnnɔ lè

¹A mi ’nyìʔɛnɛ láà nyaa fɔnnɔ nɛ́ dàala fɔnnɔ ní, ki ’nyaa nyìʔɛnɛ pélile lè nɛ́ dàala pélile ní lè, tire cé pùunni, kuʔɔjii míɛni wiì cé ń’nɛ̀ puu baaʔ. ²Nɛ̀ pínɛ Kulocɛliɛ kàʔa wàlidɛngɛgɛ gè, Zerizalɛmi kàfɔngɔ gè, a mi ’ki nyaa a ki ’kɔ́n baa nyìʔɛnɛ nī lè Kulocɛliɛ tiʔɛ nī gè nɛ tíri, nɛ̀ kìi gbòbori majo bɛ̀ cefɔnwɔ cî wìi fèri nɛ̀ yaʔa wi pɔli mɛ́ wè.

³A mi ’yékpoli láà lúʔu a ni ’juu kpuʔɔ baa kùlofɔlilɔ kácunʔɔ tiʔɛ nī gè, nɛ́ jo: «Nyaa, Kulocɛliɛ kòridiʔɛ kiī siɛnnɛ sunʔɔmɔ nī bè ! Je wi bága puu nɛ́ pe ní wī ! Pe bága puu wi wuulo, dí Kulocɛliɛ wire tíimɛ wi sí puu nɛ́ pe ní, bè puu pe Kulocɛliɛ wè. ⁴Wi bága pe yéturo ti mìɛni pàari pe yiɛyɛ nī yè. Kùu sì ń’nɛ̀ je puu baaʔ, fuunmɔ kɔnwaara sì ń’nɛ̀ je puu baaʔ, kòkuulo sǐ ní puu baaʔ, yayaʔa sì ń’nɛ̀ je puu baaʔ. Ki ’nyaa kaliʔɛlɛ keli ’tóri wī.»

⁵Ŋàa wi ’puu tɛ́niwɛ kùlofɔlilɔ kácunʔɔ nɛ̄ gè, a wi ’jo: «Nyaa, mi ’kele ke mìɛni kpíʔile fɔngɔlɔ !» A wi ń’nɛ̀ jo: «-Ti sɛbɛ ! Nɛ́ ki cɛ́n mi siɛnrɛ ti ’yɛli nɛ́ tɛ́ngɛlɛ ní, tiī kányiʔɛ.»

⁶A wi ’mi yɛ: «Ti n’dɛ, ti sí nyɛ́nì kpíʔile ! Mi wī Alifa wè nɛ́ Omega21.6 Alifa wè nɛ́ Omega: Girɛki yasɛbɛrɛ nī dè, «alifa» wire wī yasɛbɛlɛ pélile lè, «omega» wire sí yē yasɛbɛlɛ sɛnnɛ lè. wè, mi wī sélimɛ nɛ̄ bè nɛ́ ní láʔala nɛ̄ lè. Mi wè, a luʔɔwuʔɔ yē siɛn ŋíì nɛ̄, m’bé wi kɛn wi- gbuɔ sìi lawiile ni luʔɔ nɛ̄ gè waʔanɛ. ⁷A siɛn ŋíì kɛ́nì jáa wè, wi bé yɛrɛ dáà taa dè kɔrigɔ. M’bé puu wi Kulocɛliɛ dí wi sí puu mi pùɔ.

⁸«Bìli sí bīɛlɛ fíɛrɛfɔlilɔ bèle, nɛ́ sìndɛngɛlɛ bèle, siɛncuʔɔlɔ bèle nɛ́ siɛnkpuulo ní bèle, kanuʔɔrɔfɔlilɔ bèle nɛ́ dìɛlɛ ní bèle, yasunzunminɔ bèle nɛ́ káfinɛvinɛnɛ pe mìɛni bèle, peli liɛlɛ ni bé nyaa baa siʔɛ21.8 Piyē nɛ siʔɛ tíʔi wè nɛ fìɛligɛ gbari. Wi nɛ̂ puu bɛ̀ sìndɛnigɛ tíɛlɛ, náà puu namiige céri. Wi ’muʔɔrɔ madɛni, nɛ̀ pínɛ wi ’cò madɛni kàsun nī. Siʔɛ kàsunnyige ki nɛ̂ puu wuʔɔ bulɔ céri, wi nugo ki nàa súbulo fínawiʔile nī gèle náà nɛ ŋɔ́nɔ celile siɛn nɛ̄. Siʔɛ wi nyɛgɛ madɛni a wi gbɛ́nɛ yē kàsun táanni gè.kàsun nī gè. Kire gī kùu siinwuu wè.»

Zerizalɛmi kàfɔngɔ gè

⁹Nyìʔɛnɛ tundunminɔ kɔlisiin bílì mɛ́ yagbuʔɔlɔ kɔlisiin ke ’puu cògolo gèle nɛ́ ní nyìgele wuʔɔgboliyo kɔlisiin nɛ̄ yè, a wàa nigbe ’pɛn nɛ̀ pɛ́nì juu nɛ́ mi ní nɛ́ mi yɛ: «Te báan, m’bé pa cefɔnwɔ tìɛ wè muɔ nɛ̄, Sìnbapile ni cuɔ wè.»

¹⁰A Kulocɛliɛ Pìle ni ’mi yiʔɛ múgu gè, a mi ’mìɛ nyaa nyagurukpuʔɔ káà naamɛ, kpàʔaligɛ, nɛ̀ sɛ́nì Kulocɛliɛ kàʔa wàlidɛngɛgɛ tìɛ gè mi nɛ̄, Zerizalɛmi wè, ki cé kɔ́n nyìʔɛnɛ nī lè Kulocɛliɛ tiʔɛ nī gè nɛ tíri nɛ báan. ¹¹Kulocɛliɛ nàjɛnrɛ ti ’puu kàʔa nɛ̄ gè, ki ní nɛ nyíʔɛnɛ bɛ̀ lagbɛnrɛ sìndɛnigɛ tíɛlɛ majo jasipi sìndɛnigɛ gī, nɛ wéli nɛ sùuri kirisitali tíɛlɛ.

¹²Gungbaʔaligɛ lìrige káà cé ki màʔa nɛ̀ suʔu, nɛ̀ pínɛ kɔ̀rikpoliyo kiɛ nɛ́ siin ’puu baa; nyìʔɛnɛ tundunminɔ kiɛ nɛ́ siin ’puu ki kɔ̀riyɔ nyáà nɛ̄ yè. Míɛyɛ kiɛ nɛ́ siin ’puu sɛbɛyɛ kɔ̀riyɔ nɛ̄ yè; ki míɛyɛ nyáà yè, Isirayɛli pìile saaya tùluyo kiɛ nɛ́ siin míɛyɛ yire yī. ¹³Cɛngɛnyɛnifoligɔli mɛ́ gè, kɔ̀riyɔ taanri; cɛngɛnyɛnifoligɔli kàmɛgɛ mɛ́ gè, kɔ̀riyɔ taanri; cɛngɛnyɛnifoligɔli kàliige mɛ́ gè, kɔ̀riyɔ taanri; cɛngɛnyɛnijiingɔli mɛ́ gè, kɔ̀riyɔ taanri.

¹⁴Kàʔa ki gunliriye yè, pe cé yi tɛ́ngɛ kàdɛniyɛ kiɛ nɛ́ siin nɛ̄ yire yi ’puu kàkpuɔnnɔ bèle, nɛ́ sí Sìnbapile ni tundunminɔ kiɛ nɛ́ siin pe míɛyɛ kiɛ nɛ́ siin sɛbɛ yè kàdɛniyɛ nɛ̄ yè.

¹⁵Ŋàa wi ’puu nɛ nyu nɛ́ mi ní wè, tiɛ yatɔnminigɔ kàgbiile ’puu wi mɛ́ còlo, bè kàʔa tɔ́nminɔ gè nɛ́ kɔ̀riyɔ ní yè, nɛ́ kàʔa ki gunlirige ní gè. ¹⁶Kàʔa ki ’puu gɔ̀ninɔ sicɛri, ki sìtɔnimɔ ní bè nubo nɛ́ ki píɛlimɛ ní bè. A wi ’ki tɔ́nminɔ nɛ́ kàgbiile ní lè, a ki ’yɛ̀ culolo sirakiɛ nɛ́ nigbe nɛ́ culolo togo (2 200); ki tɔnigɛnmɛ nɛ́ ki píɛlimɛ, nɛ́ ki kpàʔalimɛ ní bè, ti mìɛni ’puu nuro. ¹⁷A wi ’kàʔa ki gunlirige tɔ́nminɔ gè, a ki kpàʔalimɛ pi ’yiri kabuunyiʔɛnɛ tekɔlisiin nɛ́ kabuunyiʔɛnɛ sicɛri (144)21.17 Kabuunyiʔɛnɛ 144 gálì ke ’bìɛ miɛtirele togotaanri nɛ́ kogunɔ mɛ́., siɛnnɛ tɔ́rigɛnmɛ nɛ̄ bè; kire nyìʔɛnɛ tundunwɔ wi ’tɔ́nminɔ nɛ̀ taa. ¹⁸Gunlirige ki ’puu fanʔa nɛ́ jasipi sìndɛnigɛ ní, kàʔa gè pe cé kire faan nɛ́ tiɛ cìiliwe ní, tiɛ ŋáà wi ’puu cìiliwe nɛ wéli nɛ sùurí wè. ¹⁹Pe cé kàʔa ki gunliriye kàkpuɔnnɔ kpíʔile bèle nɛ́ lagbɛnrɛ sìndɛnicɛnyɛ feliye yi mìɛni ní. Kàkpuɔn péliwe wè, wire ’puu jasipi; siinwuu wè, safiiri; taanriwuu wè, kaliseduwani; sicɛriwuu wè, emerɔdi; ²⁰kogunɔ- wuu wè, saridonisi; kɔliniwuu wè, sariduwani; kɔlisiinwuu wè, kiriso- liti; kataanriwuu wè, berili; kacɛri- wuu wè, topazi; kiɛwuu wè, kirizo- pirazi; kiɛ nɛ́ nigbe wuu wè, yasɛnti; kiɛ nɛ́ siinwuu wè, amɛtiisi.

²¹Kɔ̀riyɔ kiɛ nɛ́ siin yi ’puu kofii woyo, yi mìɛni nigbe nigbe yi cé kpíʔile nɛ́ kofii nigbe ní. Kàʔa ki kogbuʔɔ gè, kire ’puu tiɛ cìiliwe wuʔu nɛ wéli nɛ sùurí.

²²Mi sì cé Gbùʔɔrɔsaʔa nyaa gè baa kàʔa nī gèʔ. Ki ’nyaa Kàfɔli Kulocɛliɛ wè, Fànʔa ki mìɛni Kàfɔli wè, wire wī kàʔa ki Gbùʔɔrɔsaʔa gè, wire nɛ́ Sìnbapile ní lè.

²³Nɛ̀ pínɛ kàʔa ki màakuu sì cé puu cɛngɛ nɛ̄ʔ nɛ́ yege níʔ bèri kpìɛnmɛ cáanri ki nɛ̄ʔ. Ki ’nyaa Kulocɛliɛ wi nàjɛnrɛ ti ’puu nɛ càanná nɛ kúu, nɛ̀ pínɛ kàʔa ki fètinnɛ lire nī Sìnbapile lè.

²⁴Kire kpìɛnmɛ pire nɛ̄ kùlogolo siɛnnɛ pe bága de nyaʔa de tári, nɛ̀ pínɛ wire mɛ́ dàala kùlofɔlilɔ pe bága de waa nɛ́ pe kpuʔɔrɔ yɛrɛ ní dè. ²⁵Nɛ̀ pínɛ kàʔa ki kɔ̀riyɔ yiì je ga tɔ́n bè nyaa cɛngɛ káà fáala nīʔ, nɛ́ ki cɛ́n pìlige sì je ga wúɔ baaʔ. ²⁶Kire tiʔɛ nī kùlogolo siɛnnɛ pe bága de waa nɛ́ pe nàjɛnrɛ ní dè nɛ́ pe kpuʔɔrɔ ní dè. ²⁷Siɛn ŋáà wi wè cìiliwe wèʔ, nɛ́ ŋàa wi nyɛ́ni tètii kele kúu gèle, nɛ́ ŋàa wi finɛnɛ wè, peli wáà sì je ga jíin baa kàʔa nī gèʔ, nɛ̀ yiri bìli míɛyɛ yi ’sɛbɛ Sìnbapile ni sìi sɛbɛ nī wè.

¹A nyìʔɛnɛ tundunwɔ wi ’sìi luʔɔ cáʔa tìɛ gè mi nɛ̄. Ki ’puu nɛ nyíʔɛnɛ cìilige nɛ wéli nɛ sùurí, níɛ kɛ́ngi nɛ yigi kùlofɔlilɔ kácunʔɔ nī gè, Kulocɛliɛ wuʔu gè nɛ́ Sìnbapile ní lè, ²nɛ fúu kàʔa ki kogbuʔɔ sunʔɔmɔ nī bè. Sìi tiige22.2 Wéli baa Sél 2.9; 3.22-24. káà ’puu baa cáʔa ki kayɔbiyɔ siin nɛ̄ yè, nɛ sɛngi sɛngɛlɛ kiɛ nɛ́ siin; yege ó yege ki nɛ̂ sɛn, nɛ̀ pínɛ ki wɛrɛ tiī nɛ kùlogolo siɛnnɛ gbari bèle.

³Yakaa fáala sì ń’nɛ̀ je puu baa dɛ́ngɛ yɛgɛʔ. Kulocɛliɛ nɛ́ Sìnbapile pe kùlofɔlilɔ kácunʔɔ gè, kire ki bé puu baa, dí Kulocɛliɛ wi baakuɔlɔ pe sí de wi gbùʔɔrigɔ kele kúu gèle. ⁴Pe bé wi yiʔɛ nyaa gè, nɛ̀ pínɛ wi míʔɛ ki bé puu sɛbɛgɛ pe gbɛgɛlɛ nɛ̄ gèle. ⁵Pìlige sì ń’nɛ̀ je puu baaʔ, nɛ̀ pínɛ pe màakuu sì ń’nɛ̀ je puu fètinnɛ kpìɛnmɛ nɛ̄ʔ nɛ́ cɛngɛ kpìɛnmɛ níʔ. Ki ’nyaa Kàfɔli Kulocɛliɛ wire wi béri kpìɛnmɛ cáanri bè wi baakuɔlɔ bálì nɛ̄ bèle, dí pe sí puu fànʔa nɛ̄ gè súuri lɛ̀gɛlɛ ke mìɛni nī.

Ki ’kò cɛ̀ Zezi wi bé pɛn

⁶A nyìʔɛnɛ tundunwɔ wi ’mi yɛ: «Siɛnrɛ dáà ti ’yɛli nɛ́ tɛ́ngɛlɛ ní, tiī kányiʔɛ. Kàfɔli wè, siɛnjuulo pe pígele Kulocɛliɛ wè, wi ’wi nyìʔɛnɛ tundunwɔ tórigo wè wi- pa ki tìɛ wi baakuɔlɔ nɛ̄ bèle dí ki ’kò cɛ̀ kele gílì ke ’yɛli bè tóri gèle.»

⁷A Zezi wi ’jo: «Ma sí ti lúʔu, ki ’kò cɛ̀ m’bé pɛn. Siɛn ŋíì wi ’Kulocɛliɛ kajuulo siɛnrɛ cò dè, dàa dī náʔa sɛbɛ ŋáà nī wè, wire wuʔu kiī tànʔa.»

⁸Mi Zan wè, mi mi ’kele gálì lúʔu gèle, nɛ́ ke nyaa nɛ̀ pínɛ. Bà sí mi ’ti lúʔu nɛ́ ti nyaa dè, nyìʔɛnɛ tundunwɔ ŋáà wi ’puu nɛ ki kele gálì tìí gèle mi nɛ̄ gèle, a mi ’tìgi nɛ̀ yiʔɛ cúbulo wi yiʔɛ mɛ́ gè bè wi gbùʔɔrɔ.

⁹A wi ’mi yɛ: «Fǎga ki puu bɛ̀ʔ, mi yē baakuɔwɔ bɛ̀ muɔ tíɛlɛ, nɛ́ bɛ̀ muɔ siinyɛninɛ tíɛlɛ bèle bìli bīɛlɛ Kulocɛliɛ siɛnjuulo bèle, nɛ́ bìli ní pe ’tári sɛbɛ ŋáà wi siɛnrɛ nɛ̄ dè. Te Kulocɛliɛ wire gbùʔɔrɔ́ !»

¹⁰A wi ń’nɛ̀ mi yɛ: «Kulocɛliɛ kajuulo siɛnrɛ dáà dī sɛbɛ ŋáà nī wè, fǎga ti làrigɛʔ, ma ki cɛ́n lɛ̀lɛ ni ’kò túɔn wī. ¹¹Siɛn ŋáà wī koliwo wè, wi- kàa taʔa wi kolimɔ nɛ̄ bè; ŋìi wi nyɛ́ni wìi nɔ́ri wè, wi- ní kàa taʔa wi núʔɔmɔ nɛ̄ bè. Ŋìi wī sínwɛ wè, wi- ní kàa taʔa wiri sínmɛ kakpiʔiligele kúu. Ŋìi wī Kulocɛliɛ wuu wè, wi- yiʔɛ le wi- wìi wàli wi tɛ́ngɛ Kulocɛliɛ mɛ́ wè.»

¹²A Zezi wi ’jo: «Ma ti lúʔu, ki ’kò cɛ̀ m’bé pɛn. Sàri ŋáà mi bága kɛn wè, wiī náʔa mi mɛ́ bè kɛn siɛn ó siɛn mɛ́ bè yɛli nɛ́ wi kakpiʔiligele ní gèle. ¹³Mi wī Alifa wè nɛ́ Omega wè, péliwe wè nɛ́ sɛnwɛ wè, sélimɛ bè nɛ́ láʔala lè.

¹⁴«Bìli pe nyɛ́ni pe burugboliyo jíri yè bé sí taa bè pe liɛlɛ taa lè sìi tiige nī gè, nɛ̀ pínɛ bé sí taa bè tóri kɔ̀riyɔ nī yè bè jíin kàʔa nī gè wè, peli wuʔu kiī tànʔa.

¹⁵«Pɔ̀nminɔ bèle, nɛ́ dìɛlɛ ní bèle, nɛ́ kanuʔɔrɔfɔlilɔ ní bèle, nɛ́ siɛnkpuulo ní bèle, nɛ́ yasunzunminɔ ní bèle, nɛ́ bìli pe mìɛni bīɛlɛ káfinɛrɛ ti ’pe dɛ́ni á piyē nɛ ti tári dè, peli yē baa kpànʔanɛ.

¹⁶«Mi Zezi wè, mi ’mi nyìʔɛnɛ tundunwɔ tórigo wè wi- sa kele gálì juu gèle yeli mɛ́ tɛ́ngɛfɔlilɔ gbuʔulo ke wori nɛ̄ dè. Mi wī Dawuda siimɛ wuu wè nɛ́ ní wi saʔa tùlugo wuu wè; mi wī kpìɛnduumɛ ŋɔnɔ̀.»

¹⁷Kulocɛliɛ Pìle lè nɛ́ cefɔnwɔ ní wè, pe ’jo: «Te báan !»

Ŋìi míɛni wi ti lúru dè, wi- jo: «Te báan !» A luʔɔwuʔɔ yē ŋìi nɛ̄, wiri báan. A ŋìi nɛ ki caa bè gbuɔ wè, wi- pa sìi luʔɔ suɔ gè waʔanɛ.

Ki ’kò cɛ̀ Kàfɔli wi bé pɛn

¹⁸M’bé sí ki juu bè láʔa, siɛn ó siɛn wi nyɛ́ni Kulocɛliɛ kajuulo siɛnrɛ dáà lúru dè, dàa dī náʔa sɛbɛ ŋáà nī wè, a siɛn ’tàa taʔa ti nɛ̄ dè, Kulocɛliɛ bága wuʔɔgboliyo taʔa ki siɛn nɛ̄ wè, wuʔɔgboliyo nyáà yī baa sɛbɛyɛ sɛbɛ ŋáà nī wè. ¹⁹A siɛn sí ń’nɛ̀ tàa yige Kulocɛliɛ kajuulo siɛnrɛ dáà nī dè, dàa dī sɛbɛ ŋáà nī wè, Kulocɛliɛ bága wi liɛlɛ yige lè sìi tiige nī gè, nɛ́ kàʔa wàlidɛngɛgɛ nī gè bè pínɛ, tire dáà dī baa sɛbɛrɛ sɛbɛ ŋáà nī wè.

²⁰Ŋàa wi nyɛ́ni kele gálì nyu gèle nɛ láʔala wè, wi ’jo: «ʔaan, ki ’kò cɛ̀ m’bé pɛn.»

Ki- taa ki puu bɛ̀ ! Te báan, Kàfɔli Zezi !

²¹Kàfɔli Zezi wi kpuʔɔrɔ ti- puu siɛnnɛ pe mìɛni nɛ̄.