Filɛmɔ

Sɛbɛ ŋáà Pɔli ’tórigo Filɛmɔ mɛ́ wè

Filɛmɔ

Sɛbɛ wi tìɛdiʔɛ gè

Filɛmɔ yé puu tɛ́ngɛfɔli; pe ’puu nɛ tɔ́ri nɛ́ wi ní tɛ́ngɛfɔlilɔ gboli nī lè, Kolɔsi kàʔa nī gè. Pɔli wi yé sɛbɛ ŋáà tórigo wè wi nàgori Filɛmɔ mɛ́ wè, wi sùkulowo Wonɛzimu wuʔu nɛ̄ gè, ŋàa wi yé fɛ̀ nɛ̀ yiri wi mɛ́ wè (wéli baa koligo 1). Wonɛzimu wi ’Pɔli cɛ́n wè kasuu nī wī, Wurɔmi kàʔa mɛ́ gè; baa wi ’tɛ́ngɛ Zezi nɛ̄ wè. A Pɔli ’koli nɛ̀ wi tórigo wi kàfɔli Filɛmɔ kúrugu wè nɛ́ wi náari wi- koli wi sùkulowo líɛ wè, wi sí wi cò bɛ̀ siinyɛni tíɛlɛ tɛ́ngɛlɛ kɛnmɛ nɛ̄ bè. A wi ’kire kpíʔile gè, Wonɛzimu sì cî ní wuʔɔgɔ taaʔ majo bɛ̀ ki ’puu nɛ kpínʔini peli lɛ̀lɛ nī lè.

Pɔli séli nɛ kacɛ̀ngɛcɛ́n siɛnrɛ nyu dè wi mɛ́, nɛ́ Kulocɛliɛ síɛri Filɛmɔ tɛ́ngɛlɛ wuʔu nɛ̄ gè (wéli baa koliyo 4-7). Kire kàduʔumɛ, a Pɔli ’funnyige siɛnrɛ juu nɛ́ wi yɛ̀ wi- fɔ̀li Wonɛzimu nɛ̄ wè, wi- ki yaʔa wi nɛ̄ gàa wi ’kpíʔile gè. Pɔli ’ki cɛ́n ki bé puu kpuʔɔrɔ, kire nɛ̄ wi ’Filɛmɔ náari wè nɛ́ jo a fuʔɔ yē Wonɛzimu nɛ̄ wè wi- ki yaʔa, wire Pɔli wè wire bága ki tɔ́n. Kire lànunɔ nī lè, a wi ’jo: «Nyùgo ní cɛ wè ki nɛ̄ʔ mi- muɔ sɔ̀ngirɔ tìrige dè bé jo muɔ tíimɛ sìi wiī fuʔɔ mi kɔli mɛ́ gèʔ» (wéli baa koliyo 18-19).

Pɔli nɛ kàsuluwo baara kúu sɛbɛ ŋáà nī wè, majo bɛ̀ Zezi Kirisi wi ’ki kpíʔile weli we mìɛni mɛ́ wè, wi Tuu yiʔɛ mɛ́ gè. Sɛbɛ ŋáà wiī nɛ ki tìí dɛ́nigɛ kire gī tɛ́ngɛlɛ nyùgo gè; kiī nɛ siɛnnɛ kaliɛmɛ yiʔi bè pi- puu cɛ̀nbɛ.

Sɛbɛ wi nyùgboliyo yè

Síɛrilɛ lè (1-3)

Filɛmɔ wi dɛ́nigɛ gè nɛ́ wi tɛ́ngɛlɛ ní lè (4-7)

Pɔli ’kàsulugo kpíʔile Wonɛzimu wuʔu nɛ̄ gè (8-22)

Síɛrilɛ sɛnnɛ lè (23-25)

Síɛrilɛ lè

¹Mi Pɔli wè, kasuulewe wè Zezi Kirisi baara kɛnmɛ nɛ̄ bè, nɛ́ Timote weli siinyɛni wè, weli nɛ sɛbɛ ŋáà tórigi wè muɔ mɛ́, Filɛmɔ, muɔ ŋáà wī weli baakuɔnyɛni wè nɛ́ weli dɛ́ni wè. ²Sɛbɛ ŋáà míɛni wiī weli siinyɛjuɔ Apia wuu, nɛ́ sí yē míɛni Arisipi wuu1.2 Apia: Ki bé gbɛ̀ nyaa Filɛmɔ cuɔ wi yé puu.Arisipi: Ki bé gbɛ̀ nyaa Filɛmɔ jaa wi yé puu. Wéli baa Kol 4.17., wire ŋáà wi cáanjɛ̀nrɛ cáanri dè nɛ́ weli ní wè. Sɛbɛ ŋáà míɛni wiī tɛ́ngɛfɔlilɔ gboli wuu, nàa nī baa muɔ saʔa nī gè. ³Weli Tuu Kulocɛliɛ wè, nɛ́ Kàfɔli Zezi Kirisi ní wè, pe- kpuʔɔrɔ nɛ́ yanyige kɛn gè yeli mɛ́.

Filɛmɔ wi dɛ́nigɛ gè nɛ́ wi tɛ́ngɛlɛ ní lè

⁴Mi nɛ Kulocɛliɛ síɛri wè muɔ wuʔu nɛ̄ gè lɛ̀lɛ ó lɛ̀lɛ nī a mi nɛ náari muɔ mɛ́ wè. ⁵Nɛ́ ki cɛ́n mi nɛ muɔ tɛ́ngɛlɛ wuʔu lúru gè nàa nī muɔ mɛ́ Kàfɔli Zezi nī wè, nɛ́ muɔ dɛ́nigɛ ní gè gàa gī muɔ mɛ́ Kulocɛliɛ wuulo pe mìɛni kɔli mɛ́ gè. ⁶Mi nɛ Kulocɛliɛ náari wè nɛ́ jo, weli pínɛnyɛnigɛ gáà gī weli mɛ́ tɛ́ngɛlɛ nī lè ki- baara muɔ fungo nī gè kire ga buu muɔ- kacɛ̀ngɛlɛ ke mìɛni cɛ́n gàli weli ’taa bɛ̀ weli yē pínɛnɛ nɛ́ Zezi Kirisi ní wè. ⁷Mi siinyɛni, muɔ dɛ́nigɛ ki nyɛ́nì fundaangbuɔrɔ nɛ́ lèbaanna nyɔ́gɔ mi fungo nī gè, nɛ́ ki cɛ́n muɔ nyɛ́nì Kulocɛliɛ wuulo funyɔ gbiʔɛlɛ yè.

Pɔli ’kàsulugo kpíʔile Wonɛzimu wuʔu nɛ̄ gè

⁸Kire nɛ̄, bɛ̀ weli yē pínɛnyɛnigɛ nɛ̄ nɛ́ Kirisi nī wè, mi bé gbɛ̀ jáa bè juu nɛ́ muɔ ní bè muɔ yɛ gàa muɔ ’yɛli bè kpíʔile gè, ⁹nɛ̀ ki yaʔa ki ’pɔ́ri mi mɛ́ bè muɔ fiɛn wìyedɛnigɛ kɛnmɛ nɛ̄ bè. ʔaan, mi Pɔli wè, nàgaliɛwɛ wè, nɛ́ ní píra ŋáà nī wè kasuu nī wè Zezi Kirisi kɛnmɛ nɛ̄ bè, ¹⁰mi nɛ muɔ fiɛn wī mi jaa Wonɛzimu1.10 Wéli baa Kol 4.9. wuʔu nɛ̄ gè. Mi ’kò wi tuu náʔa kasuu nī wè. ¹¹Faʔa gè, wiì ’puu nɛ yakaa nyuʔɔ muɔ nɛ̄ʔ, nɛ̀ sí ki yaʔa píra ŋáà nī wè, wi bé gbɛ̀ jáa bè baara bè kaala nyuɔ1.11 Wonɛzimu míʔɛ ki kɔri wire wī kanyuɔnɔ siɛn. muɔ nɛ̄ nɛ́ mi ní.

¹²Mi bé ní koli wi tórigo muɔ mɛ́, majo mi tíimɛ fungo mi bé tórigo muɔ mɛ́. ¹³Ki cî mi dɛ́ni bè wi yaʔa náʔa nɛ́ mi ní, wi de baara mi mɛ́ muɔ sìndiʔɛ nī, bɛ̀ mi yē kasuu nī wè Kataanna Siɛnrɛ kɛnmɛ nɛ̄ bè. ¹⁴Nɛ̀ sí ki yaʔa, kiì mi dɛ́niʔ bè yakaa kpíʔile gàa kiì yɛli muɔ mɛ́ gèʔ, kire ga buu muɔ fǎga ki ’nyaa ŋàʔanigɛ kaala bè kacɛ̀ngɛ kpíʔile mi mɛ́ʔ. Ki ’yɛli bè kɔ́n muɔ fungo nī. ¹⁵Dùʔɔ ki bé sí gbɛ̀ nyaa wi yé líili muɔ nɛ̄ bè lɛ̀lɛ láà cɛ̀ri kúɔ wī, dí muɔ sí koli wi taa wi- puu muɔ wuu súuri, ¹⁶wi fǎga ní puu muɔ mɛ́ sùkulowoʔ; wi ’pɔ́ri nɛ̀ tóri sùkulowo nɛ̄, wi- puu muɔ mɛ́ siinyɛni ŋáà wi ’muɔ dɛ́ni wè. Wi ’tɔ̀ni yē mi mɛ́ siinyɛni kpuɔwɔ, nɛ̀ sí ki yaʔa wi bé ní puu muɔ mɛ́ siinyɛni kpuɔwɔ bè tóri mi nɛ̄, céri kɔli mɛ́ gè nɛ́ bɛ̀ ki ’nyaa wi ’tɛ́ngɛ Kàfɔli nɛ̄ wè.

¹⁷A ki yē muɔ nɛ tɔ́ri nɛ́ mi ní bɛ̀ muɔ baakuɔnyɛni tíɛlɛ wè, ma wi kpàli majo mi tíimɛ wī. ¹⁸A ki sí nyaa wi ’yakaa kpíʔile muɔ nɛ̄ wè, á kire bɛ̀ʔ a muɔ fuʔɔ yē wi nɛ̄ wè1.18 Dùʔɔ Wonɛzimu cé yakaa yùu wi kàfɔli mɛ́ wè wī nɛ́ fɛ̀., ma ki tɛ́ngɛ mi wuʔu. ¹⁹Mi tíimɛ kɔli ní mi nyɛ́nì nyasiɛnkɛniyɛ nyáà sɛbɛ yè: mi Pɔli wè, mi bé ki tɔ́n muɔ mɛ́. Nyùgo ní cɛ wè ki nɛ̄ʔ mi- muɔ sɔ̀ngirɔ tìrige dè bé jo muɔ tíimɛ sìi wiī fuʔɔ mi kɔli mɛ́ gèʔ. ²⁰ʔaan, mi siinyɛni, mi nɛ muɔ fiɛn wī, ma kpuʔɔrɔ dáà kɛn dè m’mɛ́ Kàfɔli kɛnmɛ nɛ̄ bè, ma mi fungo nyígi gè bɛ̀ weli yē pínɛnyɛnigɛ nɛ̄ nɛ́ Kirisi ní wè.

²¹Bɛ̀ mi ’tɛ́ngɛ ki nɛ̄ muɔ bé lúʔu mi mɛ́ wè, mi ’sɛbɛ ŋáà tórigo wè muɔ mɛ́. Mi ’ki cɛ́n muɔ bé ki kpíʔile fúɔ bè tóri gàa mi ’náari muɔ mɛ́ gè1.21 Weli nɛ sɔ̀ngí Pɔli nɛ caa bè ki juu Filɛmɔ mɛ́ wè wi- Wonɛzimu láʔa wi sùkulomɔ nɛ̄ bè. Pàli ki ’juu nɛ́ jo Wonɛzimu wi ’kò wìimɛ, nɛ́ kò Efɛzi kàʔa tɛ́ngɛfɔlilɔ gboli ni yiɛginiwɛ wáà.. ²²Lɛ̀nunɔ náà nī lè, mari saasinɛgɛ káà gbòborí m’mɛ́, nɛ́ ki cɛ́n mi sɔ̀ngirɔ yē ki nɛ̄ ki ’kò cɛ̀, Kulocɛliɛ bé ki yaʔa mi- koli bɛn yeli kúrugu, yeli náariyɛ kɛnmɛ nɛ̄ bè.

Síɛrilɛ sɛnnɛ lè

²³Epafirasi1.23 Epafirasi: Epafurodiiti míɛwerige kire gī. Wéli baa Filip 2.25; 4.18; Kol 1.7; 4.12. yē náʔa nɛ́ mi ní kasuu nī wè, Zezi Kirisi baara kɛnmɛ nɛ̄ bè. Wiī nɛ muɔ síɛri baa, ²⁴nɛ́ siɛnnɛ bálì ní bèle, mi baakuɔnyɛninɛ bèle, pe mìɛni nɛ muɔ síɛri míɛni: Mariki wè, nɛ́ Arisitariki ní, nɛ́ Demasi ní wè, nɛ́ Luku ní wè1.24 Mariki: Wéli baa Kakpi 12.12; Tim2 4.11. Arisitariki: Wéli baa Kakpi 19.29. Demasi: Wéli baa Kol 4.14. Luku: Wéli baa Kol 4.14..

²⁵Kàfɔli Zezi Kirisi wi kpuʔɔrɔ ti- puu yeli nɛ̄.