Zan taanriwuu

Sɛbɛ taanriwuu ŋáà Zan ’sɛbɛ wè

Zan taanriwuu

Sɛbɛ wi tìɛdiʔɛ gè

Zan Sɛbɛ taanriwuu wè, ŋàa wi ’wi sɛbɛ wè wiī nɛ wìi yeri Liɛwɛ; wire míʔɛ kire sí gī Zan wè. Wi ’sɛbɛ tórigo wè ŋàa mɛ́ pe ye Gayusi wè; wi ’puu nɛ tári kányiʔɛ koligo nī gè, wi sìi wi ’puu nɛ ki tìí dɛ́nigɛ yē wi mɛ́ tɛ́ngɛfɔlilɔ kɔli mɛ́ gè. Wi ’puu nɛ nabɔnminɔ tìrigí bèle cɛ̀ngɛ, bàli pe ’puu nɛ Kulocɛliɛ Siɛnrɛ jáari dè (wéli baa koliyo 1-8).

Nɛ̀ ki yaʔa, wàa wiiyɛ ’puu baa, pe wi ye Diyotirɛfu. Wire ’puu nɛ wìi kpóri nɛ Liɛwɛ wi míʔɛ córi gè. Wiì puu míɛni nɛ nabɔnminɔ tìrigí bèleʔ (wéli baa koliyo 9-10). Zan ’puu nɛ tɛ́ngɛfɔli wáà míɛtanʔa yeri, ŋàa pe ye Demɛturusi wè (wéli baa koliyo 11-12).

Sɛ́ni Zan wi- wi kári wori juu dè pe mɛ́ dè, a wi ’wi nàgorilo síɛri bèle gbínʔɛnɛ (wéli baa koliyo 13-15).

Sɛbɛ wi nyùgboliyo yè

Síɛrilɛ lè (1-4)

Siinyɛninɛ pálì sáʔala wori dè (5-8)

Diyotirɛfu nɛ́ Demɛturusi kaala lè (9-12)

Siɛnsɛnrɛ dè (13-15)

Síɛrilɛ lè

¹Mi ŋáà wī Liɛwɛ wè, mi nɛ sɛbɛ ŋáà tórigi wè muɔ mɛ́, mi nàgoricɛnwɛ Gayusi, muɔ ŋáà ma ’mi dɛ́ni kányiʔɛ nɛ̄ gè.

²Mi nàgoricɛnwɛ, mi nɛ ki caa muɔ kele keri nyuʔɔ, dí muɔ sí puu cériwiimɛ nɛ̄ majo kɛnmɛ bíì nɛ̄ muɔ fungo ki yē gè. ³Mi nyɛ́nì fundaangbuɔrɔ kpíʔile bà siinyɛninɛ pe ’pɛn náʔa weli mɛ́ wè nɛ́ pɛ́nì muɔ wori juu dè mi mɛ́ wè, nɛ́ jo kɛnmɛ bíì nɛ̄ muɔ yē puɔwɔ kányiʔɛ nɛ̄ gè, kire ’jo muɔ yē nɛ tári kányiʔɛ koligo nī gè. ⁴Yakaa ní wè fundaanra kanʔa m’mɛ́ nɛ̀ tóriʔ bè ki lúʔu dí mi pìile piyē nɛ tári kányiʔɛ koligo nī gè.

Siinyɛninɛ pálì sáʔala wori dè

⁵Mi nàgoricɛnwɛ, muɔ yē nɛ tári nɛ kacɛ̀ngɛ sɔ́migi nɛ kpínʔini weli siinyɛninɛ mɛ́ bèle, nɛ̀ sí ki taa piyē nabɔnminɔ. ⁶Pe pɛ́nì muɔ wori juu dè tɛ́ngɛfɔlilɔ gboli mɛ́ lè nàa nī náʔa gè kɛnmɛ bíì nɛ̄ muɔ ’dɛ́nigɛ tìɛ gè peli nɛ̄ wè. Kire nɛ̄ mari waa yiʔɛmɛ mari kacɛ̀ngɛ kpínʔini gè bè pe sáʔa kɛnmɛ páà nɛ̄ bàa pi ’Kulocɛliɛ dɛ́ni wè, peri waa pe tánʔana nī lè. ⁷Ki ’nyaa piyē tánʔana nɛ̄ lè bè Kirisi míʔɛ jáari gè, kire nɛ̄ piyè fɔ̀li nɛ̀ yakaa suɔ sìndɛngɛlɛ mɛ́ bèleʔ. ⁸Weli bèle, weli ’yɛli bè fɔ̀li bè kire siɛnnɛ bálì tìrige bèle, kire ga buu weli- puu pe baakuɔnyɛninɛ bèri kányiʔɛ siɛnrɛ jáari dè.

Diyotirɛfu nɛ́ Demɛturusi kaala lè

⁹Mi yé sɛbɛ wáà tórigo wè tɛ́ngɛfɔlilɔ gboli mɛ́ lè, nɛ̀ ki yaʔa Diyotirɛfu wè, wire ŋáà ki ’wi dɛ́ni bè puu siɛnnɛ pe mìɛni yiʔɛmɛ gè, a wire ’cíi weli siɛnrɛ nɛ̄ dè dàa weli ’juu dè. ¹⁰Kire kɛnmɛ nɛ̄, a mi kɛ́nì kɛ́ yeli mɛ́ wè, m’bé wi kapiʔile wori juu dè gàli wi ’kpíʔile gèle, wire ŋáà wiī nɛ siɛnpiire nyu dè weli wuʔu nɛ̄ gè. Nɛ̀ ki yaʔa, kire yákuɔ sí bɛ̀ʔ ! Wi nɛ̂ cíi bè siinyɛninɛ nabɔnminɔ tìrige bèle. Bàli sí bīɛlɛ piyē nɛ caa bè pe tìrige bèle, wi nɛ̂ cíi níɛ̀ pe cìra nɛ̀ yige tɛ́ngɛfɔlilɔ gboli nī lè.

¹¹Mi nàgoricɛnwɛ, fǎga de kapiʔi tɛnmɛ gèʔ, te kacɛ̀ngɛ kire tɛnmɛ. Siɛn ŋáà wi kacɛ̀ngɛ kpínʔini gè, wire yē Kulocɛliɛ wuu. Ŋìi sí wiī nɛ kapiʔi kpínʔini gè, wire sì Kulocɛliɛ cɛ́n wè wīʔ1.11 Wéli baa Zan1 2.29; 3.6..

¹²Gàa sí ki ’Demɛturusi kúɔ wè, siɛnnɛ pe mìɛni yē nɛ wire míɛtanʔa yeri gè; wi tánʔagɛnmɛ pi ’nyuɔ súuri nɛ̀ yɛli nɛ́ kányiʔɛ ní gè. Weli míɛni nɛ wi míɛtanʔa yeri gè; muɔ nyɛ́nì ki cɛ́n weli siɛnjuuro tiī kányiʔɛ.

Siɛnsɛnrɛ dè

¹³Siɛnniʔɛrɛ yē m’mɛ́ bè sɛbɛ, nɛ̀ ki yaʔa mi wè nɛ caa bè ki sɛbɛ nɛ́ gòsiige nɛ́ tùnmu luʔɔ1.13 Wéli baa Zan2 12kaliwɛgɛ ki táanmɛ gè. níʔ. ¹⁴Mi sɔ̀ngirɔ yē ki nɛ̄ náʔanɛ lɛ̀lɛ láà cɛ̀ri ní we bé wìye nyaa, bà we bé juu nyuɔ nɛ́ nyuɔ.

¹⁵Yanyige ki- puu nɛ́ muɔ ní ! Muɔ nàgorilo piyē nɛ muɔ síɛri. Ma weli nàgorilo pe mìɛni nigbe nigbe síɛri baa.