Zan siinwuu

Sɛbɛ siinwuu ŋáà Zan ’sɛbɛ wè

Zan siinwuu

Sɛbɛ wi tìɛdiʔɛ gè

Zan Sɛbɛ siinwuu wè, Zan nɛ wìi yeri «Liɛwɛ.» Nɛ̀ yɛli nɛ́ wi juugɛnmɛ ní bè, kire nɛ ki tìí siɛnnɛ pe ’puu nɛ wi nyaʔa tɛnmɛfɔgbuɔwɔ. Lɛ̀lɛ náà nī lè wi ’puu nɛ nyu nɛ tìí cɛliwɛ wáà nɛ̄, wire ŋáà Kulocɛliɛ ’nyíɛnɛ nɛ̀ kɔ̀n nɛ́ wi pìile ní bèle. Ki bé gbɛ̀ nyaa tɛ́ngɛfɔlilɔ gboli láà nī.

Kire sɛbɛ nī wè, kasɔminɔ siɛnrɛ ti ’puu jànvaa tɛnmɛfɔlilɔ wuʔu nɛ̄ gè, bàli wori wi ’kíni nɛ̀ juu Zan sɛbɛ péliwe nī wè.

Sɛbɛ ŋáà wiī nɛ ki tìí weli ’yɛli bè puu puɔlɔ kányiʔɛ nɛ̄ gè bèri lúru Kulocɛliɛ fànʔa kajuʔulo mɛ́ gèle, bè kò pínɛnyɛnigɛ nɛ̄ nɛ́ wi ní (wéli baa koliyo 3-6). Siɛnnɛ pálì pe ’puu nɛ ki nyu nɛ siɛnnɛ tɛnmɛ bèle nɛ́ jo dí Zezi wiì cé pɛn siɛn céri nīʔ, nɛ́ míɛni wiì cé puu Kulocɛliɛ Siɛnnyiɛnɛgɔnwɔʔ. A Zan ’pe yɛ̀ dí tɛ́ngɛfɔlilɔ piyè cɛ́nì yɛli bè siɛnnɛ bálì tìrige bèle pe saaya nī yèʔ (wéli baa koliyo 7-11). Bè wi ’siɛnrɛ kúɔ dè, a wi ’jo wire nɛ caa bè sa pe wéli bé sí de waa yiʔɛmɛ tɛnmɛnɛ nī lè a wire sɛ́nì nɔ̀ baa wè (wéli baa koliyo 12-13).

Sɛbɛ wi nyùgboliyo yè

Síɛrilɛ lè (1-3)

Kajuudiɛlɛ lè, wìyedɛnigɛ woli lè (4-6)

Ye- kò puɔlɔ kányiʔɛ nɛ̄ gè (7-11)

Siɛnsɛnrɛ dè (12-13)

Síɛrilɛ lè

¹Mi ŋáà wī Liɛwɛ wè, mi ’sɛbɛ ŋáà tórigo wè muɔ mɛ́, cɛliwɛ, muɔ ŋáà Kulocɛliɛ ’nyíɛnɛ nɛ̀ kɔ̀n wè, nɛ́ muɔ pìile ní bèle1.1 Liɛwɛ: Zan wi cé sìi taa nɛ̀ tóri Zezi tundunminɔ nɛ̄ bèle, kire nɛ̄ pe ’kò nɛ̀ wi yeri «Liɛwɛ.» A wi ’jo cɛliwɛ, ki bé gbɛ̀ nyaa tɛ́ngɛfɔlilɔ gboli wuʔu wiī nɛ nyu; gboli wuulo bèle, wi nɛ pe yeri pìile., yeli bálì ye ’mi dɛ́ni bèle kányiʔɛ nī gè. Mi yákuɔ bɛ̀ʔ, nɛ́ ki cɛ́n bàli pe mìɛni pe ’kányiʔɛ cɛ́n gè, yeli ’pe dɛ́ni míɛni. ²Yeli ’weli dɛ́ni kányiʔɛ kire kɛnmɛ nɛ̄, kányiʔɛ gáà gī weli nī gè, nɛ́ ki bé puu nɛ́ weli ní súuri gè.

³Tuufɔli Kulocɛliɛ nɛ́ wi Jaa Zezi Kirisi wè, pe bé kpuʔɔrɔ nɛ́ nyinimɛ nɛ́ yanyige kɛn gè weli mɛ́, kire ga buu weri tári kányiʔɛ nɛ̄ nɛ́ dɛ́nigɛ ní gè.

Kajuudiɛlɛ lè wìyedɛnigɛ woli lè

⁴Ki yé buu fundaangbuɔrɔ mi mɛ́ bè ki ’nyaa muɔ pìile pálì yē baa nɛ tári kányiʔɛ nī gè, majo bɛ̀ Tuufɔli wi ’ki juu nɛ̀ gbɛ̀ngɛ weli mɛ́ gè. ⁵Píra ŋáà nī wè, mi nàgori cɛliwɛ, kajuudiɛlɛ fɔnnɔ bɛ̀ʔ mi nɛ nyu muɔ mɛ́ʔ, nɛ̀ ki yaʔa kajuudiɛlɛ láà nī nàa weli ’kíni nɛ̀ taa ki sélimɛ nɛ̄ bè. Mi nɛ yeli náari wī, ye mìɛni nigbe nigbe ye- yìye dɛ́ni1.5 Wéli baa Zan1 2.7; 3.11..

⁶Ki n’gɛ gàa gī dɛ́nigɛ gè: weli nɛ tári nɛ̀ yɛli nɛ́ Kulocɛliɛ kajuudiʔɛlɛ ní gèle. Kajuudiɛlɛ náà ni ’jo weri tári dɛ́nigɛ koligo nī gè, yeli yé kíni nɛ̀ ni lúʔu ki sélimɛ nɛ̄ bè1.6 Wéli baa Zan 14.15,23-24; Zan1 3.23; 5.3.

Ye- kò puɔlɔ kányiʔɛ nɛ̄ gè

⁷Mi ’tire juu wī nɛ́ ki cɛ́n káfinɛvinɛnɛ sáamɛ nyɛ́nì cɛrigɛ nɛ̀ màʔa duniya nī wè, bàli bīɛlɛ pe ’cíi, piyè yéri ki nɛ̄ nɛ̀ jo Zezi Kirisi wi nyɛ́nì pɛn siɛn céri nī dèʔ. A siɛn ó siɛn ’nyaa pe tíɛlɛ wè, kire siɛn wi yē káfinɛvinɛwɛ wī nɛ́ ní Kirisi leguuwo1.7 Wéli baa Mat 7.15; Zan1 2.18-19,22,26; 4.1-3; Piɛ2 2.1.. ⁸Yeri yìye ciʔige díɛʔ yeli tíimɛ bèle, kire ga buu yeli fǎga sa fɔ̀n weli baara ti yasɛnrɛ nī dèʔ. Nɛ́ ki cɛ́n weli nɛ ki caa yeli sa tɔ̀ni foriwo taa.

⁹Bàli pe mìɛni bīɛlɛ piyè kò puɔlɔ Kirisi tɛnmɛnɛ nī lèʔ, níɛ pe woli fàrí lè baa wè, pe wè pínɛnyɛnigɛ nɛ̄ nɛ́ Kulocɛliɛ ní wèʔ. Ŋàa wi sí kò puɔwɔ tɛnmɛnɛ nɛ̄ lè, wire yē pínɛnyɛnigɛ nɛ̄ nɛ́ Tuufɔli nɛ́ Jaafɔli ní wè1.9 Wéli baa Zan1 2.23.. ¹⁰A siɛn wáà sí pɛn yeli mɛ́ wè nɛ́ sɛ́ni tɛnmɛnɛ láà niiyɛ kanʔa wè, ye fǎga wi tìrige yeli saaya nī yèʔ, ye fǎga cɛ wi síɛriʔ. ¹¹Nɛ́ ki cɛ́n a yeli nɛ wi síɛri wè, yeli nɛ liɛlɛ líi wi kakpiʔiligele nī gèle gàli ke ’pii gèle.

Siɛnsɛnrɛ dè

¹²Siɛnniʔɛrɛ nɛ tíin mi mɛ́ bè juu yeli mɛ́, nɛ̀ ki yaʔa mi sí wè caa bè ki sɛbɛ kaliwɛgɛ nɛ̄ gè nɛ́ tùnmu luʔɔ1.12 Kire lɛ̀lɛ nī lè, a siɛn wi ’puu nɛ caa bè sɛbɛ sɛbɛ wè, wi ’puu nɛ gòsiige líi gè nɛ́ ki nii tùnmu luʔɔ ní gè bèri ki kpínʔini. níʔ. Mi nɛ caa bàga kɛ́ baa yeli mɛ́ bè sa juu nɛ́ yeli ní nyuɔ nɛ́ nyuɔ, kire ga buu weli fundaanra ti sí fori. ¹³Muɔ siinyɛjuɔ ŋáà Kulocɛliɛ ’nyíɛnɛ nɛ̀ kɔ̀n wè, wi pìile piyē nɛ muɔ síɛri.