Korɛntiyé siinwuu

Sɛbɛ siinwuu ŋáà Pɔli ’tórigo Korɛntiyé mɛ́ bèle

Korɛntiyé siinwuu

Sɛbɛ wi tìɛdiʔɛ gè

Sɛbɛ siinwuu ŋáà nī wè, Pɔli nɛ́ Korɛnti kàʔa tɛ́ngɛfɔlilɔ ní bèle, siɛnrɛ ti wè jíin pe mɛ́ cɛ̀ngɛ cɛ̀ngɛʔ. Pàli cé siɛnrɛ juu nɛ̀ laamɛ piɛn wi nī kpuʔɔ; peli ’puu nɛ ki nyu nɛ́ jo dí Pɔli wi wè Zezi tundunwɔ kányiʔɛʔ, kire nɛ̄ piyè ’puu nɛ wi kpóri kire feligeʔ. A Pɔli wi ’juu gbɛ̀ngɛ ki wori nɛ̄ dè. Kire nɛ́ ki mìɛni ní a wiī nɛ ki caa peri nyu peri lúru pìye nɛ̄, nɛ̀ ki tìɛ pe woli ni ’wire dɛ́ni (wéli baa 7.5-15).

Sɛbɛ wi nyùgboliyo yè

Síɛrilɛ nɛ́ barigɛ kɛnnɛ (1.1-11)

Pɔli wori dè nɛ́ Korɛnti wuulo sunʔɔmɔ ní bè (1.12–7.16)

Kɔli yakɛnrɛ wori dè (8.1–9.15)

Pɔli wi ’wi baara ti wuʔu juu gè (10.1–12.10)

Pɔli siɛnsɛnrɛ dè nɛ́ wi diba ní wè (12.11–13.13)

Pɔli nɛ́ Timote síɛrilɛ lè

¹Pɔli ŋáà wī Zezi Kirisi tundunwɔ wè nɛ̀ yɛli nɛ́ Kulocɛliɛ nyɛ́ni kaala ní lè, wire nɛ́ siinyɛni Timote ní wè, peli pe ’sɛbɛ nɛ̀ tórigo Kulocɛliɛ gboli wuulo mɛ́ bèle Korɛnti kàʔa mɛ́ gè, peli nɛ́ tɛ́ngɛfɔlilɔ pe mìɛni ní bèle bàli bīɛlɛ Akayi tɛ́nimɛ pi mìɛni nī bè. ²Kulocɛliɛ wè, wire ŋáà wī weli Tuu wè, nɛ́ Kàfɔli Zezi Kirisi ní wè, pe- kpuʔɔrɔ taʔa ye nɛ̄, pe- yanyige kɛn ye mɛ́.

Pɔli wi ’síɛrigɛ kɛn Kulocɛliɛ mɛ́

³Kpuʔɔrɔ ti ’yɛli Kulocɛliɛ nɛ̄, wire ŋáà wī weli Kàfɔli Zezi Kirisi Tuu wè. Wire wī Tuufɔli ŋáà wi nyɛ́ni nyinimɛ tari wè, nɛ̀ pínɛ wire wī Kulocɛliɛ wè ŋàa wi sî siɛn fungo nyígi gè feliye yi mìɛni wè. ⁴A yawuʔɔ ó yawuʔɔ ’weli taa wè, wire wi nɛ̂ weli funyɔ nyígi yè. Kire nɛ̂ ŋɔri kɛn weli mɛ́ weli gbɛ̀ jáa bè pàli funyɔ nyígi a yawuʔɔ ’wàa taa wè, kɛnmɛ bíì nɛ̄ Kulocɛliɛ wi ’weli funyɔ nyígi yè. ⁵Ki ’nyaa bɛ̀ Kirisi wi ’wuʔɔgɔ suɔ kpuʔɔ weli kɛnmɛ nɛ̄ bè, bɛ̀ míɛni weli funyɔ yi nɛ̂ nyígi kpuʔɔ Kirisi wire fànʔa nɛ̄ gè. ⁶A fùrɔgɔ sí weli taa wè, kire ki bé nàzɔnnɔ lìri bèle yeli nī dí yeli sí suɔ. A ki sí yē weli funyɔ yi ’nyígi yè, kire ki bé tí yeli funyɔ yi nyígi bínɛ, dí yeli sí ŋɔri taa bè yeli wuʔɔyɔ kpàri yè bè cò, kire wuʔɔyɔ feliye yire yī weli nɛ̄. ⁷Sɔ̀ngirɔ taʔadiʔɛ gáà gī weli nī yeli kɔli mɛ́ gè, yafiɛn sǐ gbɛ̀ ki láʔaʔ. Nɛ́ ki cɛ́n bɛ̀ yeli yē nɛ pínɛ nɛ wuʔɔ nɛ́ weli ní wè, yeli funyɔ yi bága nyígi pínɛ bɛ̀ weli tíɛlɛ.

⁸Siinyɛninɛ, ki ’nyaa wuʔɔgɔ gíì ki ’weli taa baa Azii tɛ́nimɛ nī bè, weli sǐ ki làrigɛ yeli nɛ̄ʔ. Ki wuʔɔgɔ gáà ki ’tɔ̀ni nɛ̀ weli fùrɔ kátii fúɔ nɛ̀ weli fànʔa kúɔ gè a weli tíimɛ ’kò nɛ kaala weli sìi wi wori nɛ̄ dè. ⁹Ki ’nyaa weli tíimɛ cé tɛ́ngɛ ki nɛ̄ nɛ̀ láʔa weli bé kùu wī; sɔ̀ngirɔ táà sì cé ní nɛ̀ puu weli nīʔ, nɛ̀ yiri Kulocɛliɛ ŋáà wi nyɛ́ni kúbilo nyɛ́gi bèleʔ. ¹⁰Wire wi ’weli suɔ ki kùu piiwe ŋáà wi feliwe mɛ́ wè, wire sí wi bé ní de weli suu. Kulocɛliɛ wire nɛ̄ weli ’weli sɔ̀ngirɔ taʔa dè, nɛ̀ tɛ́ngɛ ki nɛ̄ wire wi bé ní koli bè weli suɔ. ¹¹A yeli míɛni wúɔ nɛ́ weli ní wè, níɛ náari weli mɛ́ wè, kire ki bé ki kɛn weli bé kpuʔɔrɔ taa siɛnniʔɛnɛ náarigɛ kɛnmɛ nɛ̄ bè. Ki bé sí kacɛ̀ngɛ kpíʔile pàli nìʔɛnɛ nɛ̄.

Pɔli wi ’wi tánʔana lɛ̀lɛ yiʔɛ lè

¹²N’gɛ weli bé gbɛ̀ sìndinge kpúɔn bé ti juu, weli funyɔ yi ’tɛ́ngɛ tire nɛ̄: ki ’nyaa weli ’puu nɛ weli sìi tári wè nɛ wìye cɛ́rigi nɛ́ kányiʔɛ ní siɛnnɛ yiʔɛ mɛ́ gè nɛ́ yeli mìɛni ní bèle. Kiì sí kò majo weli ’ki kpíʔile nɛ́ weli sícilige ní wīʔ. ʔéʔe, Kulocɛliɛ kpuʔɔrɔ dī. ¹³Siɛnrɛ dáà weli nɛ sɛbɛ nɛ tórigi yeli mɛ́ dè, tàa tìiyɛ bɛ̀ʔ tire dèʔ, yeli sì kò yeli sì ti cɛ́n wīʔ. Mi sí tɛ́ngɛ ki nɛ̄ yeli bé ti sɔ́migɔ bè cɛ́n cɛ̀ngɛ. ¹⁴Bɛ̀ yeli sí ki cɛ́n nɛ̀ cɛ́n weli yē yeli nàgbuʔɔrɔ ti kɔri wè, bɛ̀ míɛni yeli bága puu weli mɛ́ weli nàgbuʔɔrɔ ti kɔri wè weli Kàfɔli Zezi Kirisi wi pɛnjɛngɛ gè.

¹⁵Mi cé sí tɛ́ngɛ kire nɛ̄, a mi sí nɛ ki caa bè kɛ́ baa yeli tiʔɛ nī gè, gìi ki bé tí yeli kpuʔɔrɔ taa tɔliyɔ siin. ¹⁶A mi kɛ́nì yiri baa yeli tiʔɛ nī gè, m’bé tóri Maseduwani tɛ́nimɛ mɛ́. A mi ní nɛ̀ kɛ́nì kɔ́n baa kire tiʔɛ nī gè, m’bé tóri baa yeli mɛ́. Yeli nɛ̄ mi tánʔana ni tugoro ti bé sí puu a mi kɛ́nì je kɛ́ Zude tɛ́nimɛ nī bè. ¹⁷A mi sí kire kpíʔile gè, kire ’ki tìɛ lé mi ’ti juu nɛ́ káaliyɛ ní wī lé ? Á kire ’laa, gàa mi je kpíʔile gè, mi ’ki sɔ̀ngi lé bɛ̀ duniya wuulo kɛnmɛ tíɛlɛ bè wī lé, bè jo «ʔaan, ʔaan», bé ní yiʔɛ bè jo «ʔéʔe, ʔéʔe» lé ? ¹⁸Kulocɛliɛ wiī tɛ́ngɛmɛ siɛn, wi ’ki cɛ́n nyasiɛnrɛ dáà weli ’juu yeli mɛ́ dè, káaliyɛ wè baa ti nīʔ. ¹⁹Nɛ̀ taʔa gíi nɛ̄, Kulocɛliɛ Jaa wè, Zezi Kirisi wè, wi wori dáà weli ’jáari yeli mɛ́ dè, mi nɛ́ Silivɛn nɛ́ Timote ní wè, káaliyɛ wè ti nīʔ; gìi ki ’cɛ́n gè, tiī kányiʔɛ wī. ²⁰Nɛ́ ki cɛ́n Kulocɛliɛ nyafɛniyɛ yi mìɛni yi ’fori nɛ́ Zezi Kirisi ní wè, níɛ ní kányiʔɛ. Kire nɛ̄ weli sî «ki- taa ki puu bɛ̀» juu wè nɛ́ Zezi wire míʔɛ ní gè nɛ̀ kpuʔɔrɔ taʔa Kulocɛliɛ nɛ̄ wè. ²¹Kulocɛliɛ wire sí wi ’ŋɔri kɛn weli mɛ́, yeli nɛ́ weli ní bèle Kirisi pínɛnyɛnigɛ nī gè, nɛ̀ weli tɛ́ngɛ wìyeyɛ wi wuulo. ²²Wire wi ’wi fìɛ tɛ́ngɛ wè weli nɛ̄, nɛ́ sí Kulocɛliɛ Pìle le lè weli funyɔ nī yè bè ki tìɛ weli yē wire wuulo.

²³M’bé sí ki juu, Kulocɛliɛ wire wi ’ki cɛ́n nɛ́ mi ní, a mi ’finɛ wi- mi sìi líɛ wè. Ki ’nyaa bɛ̀ miì koli nɛ̀ kɛ́ baa Korɛnti kàʔa mɛ́ gèʔ, mi ’kire kpíʔile bè yeli ŋɔ́ bè taa wī. ²⁴Kiì nyaa majo weli je de yeli cɔ̀rí yeli tɛ́ngɛlɛ nī lè wīʔ. Weli nɛ pínɛ nɛ baara, gìi ki bé tí yeli fundaanra taa, nɛ́ ki cɛ́n yeli ’sɔ́migɔ nɛ̀ yéri tɛ́ngɛlɛ nī lè.

¹Kire nɛ̄ mi ’ki kɔ̀rirɔ mi tíimɛ wè nɛ́ jo mi sǐ ní kɛ́ baa yeli tiʔɛ nī gèʔ nɛ́ funbiɛnrɛ níʔ. ²Nɛ́ ki cɛ́n a mi ’laamɛ piɛn yeli nī bèle, ŋáasiɛn wi béri fundaanra nyɔ́gi dè mi nī wè ? Ŋàa nī mi ’laamɛ piɛn bè wire bɛ̀ʔ lé ? ³Kire nɛ̄ mi ’siɛnrɛ dáà sɛbɛ dè, gìi ki bé tí a mi kɛ́nì kɛ́ yeli tiʔɛ nī gè mi fǎga sa yiri nɛ́ laabiɛnmɛ níʔ, yeli bálì ye ’yɛli bè fundaanra nyɔ́gɔ mi nī wèʔ. Mi ’tɛ́ngɛ ki nɛ̄ yeli ye mìɛni bèle, a mi yē fundaanra nɛ̄ wè, kire ki bé fundaanra kɛn yeli mɛ́. ⁴Fùrɔgɔ ’tɔ̀ni nɛ̀ puu mi nɛ̄ kpuʔɔ, nɛ̀ pínɛ laamɛ pi cé tɔ̀ni nɛ̀ piɛn mi nī; kire sunʔɔmɔ báà pire nī mi cé sɛbɛ nɛ̀ tórigo yeli mɛ́, ki ní mi mɛ́ yéturo kpuʔɔ. Kiì sí kò majo mi ’puu nɛ ki caa bè laamɛ piɛn yeli nī wīʔ. ʔéʔe, kire bɛ̀ʔ, ki ’nyaa mi nɛ ki caa ye- ki cɛ́n dɛ́nigɛ gáà gī mi nī yeli kɔli mɛ́ gè, ki ’kpúʔɔ nɛ̀ tóri.

A siɛn ’tánʔa nɛ̀ tuu wè we wi cò mɛni

⁵A wàa ’kaala kpíʔile nàa ni bé gbɛ̀ siɛn laamɛ piɛn wè, mi nī bɛ̀ʔ siɛn wi ’laamɛ piɛn bèʔ; yeli pàli nɛ̄ wi ’ki kpíʔile. A we je ti juu wè, ye mìɛni nɛ̄ siɛn wi ’ni kpíʔile. ⁶Kire siɛn feliwe wè, gìi gboli ni ’juu wi wori nɛ̄ dè ye- ki yaʔa kire nɛ̄. Ki fǎga tóri kire nɛ̄ʔ. ⁷Gìi cɛ ki ’pɔ́ri gè, ye- ki yaʔa wi nɛ̄, ye- juu ye wi fungo nyígi gè, gìi ki bé tí wi tuulo wuʔu ki fǎga wi fùrɔ bè tóriʔ, bè laamɛ piɛn wi nī bè wi ŋɔri kúɔ dèʔ. ⁸Kire nɛ̄, mi ye fiɛn wī, ye- wi cò nɛ́ dɛ́nigɛ fungo ní. ⁹Ki ’nyaa mi ’sɛbɛ nɛ̀ tórigo yeli mɛ́ bè ki wéli a ki yē yeli ’fɔ̀li bè yéri bè lúʔu kele ke mìɛni nī gèle. ¹⁰A yeli ’ki yaʔa siɛn ó siɛn nɛ̄ wè, mi mìɛni mi ’ki yaʔa. Nɛ̀ taʔa gíi nɛ̄, a kaala yē baa dí ki sí nyaa mi ’yɛli bè ki yaʔa siɛn nɛ̄ wè, yeli kɛnmɛ nɛ̄ mi ’ki yaʔa, Kirisi wire yiʔɛ mɛ́ gè. ¹¹Gìi ki bé tí we fǎga larigɛ kɛn Setɛni mɛ́ wèʔ, nɛ́ ki cɛ́n sɔ̀ngirɔ dáà dī wi nī dè, wiyè kò wiyè ti cɛ́n wīʔ.

Pɔli wi ’yiri Turowasi nī gè nɛ̀ kɛ́ Maseduwani mɛ́

¹²Bà mi cé kɛ́ Turowasi kàʔa mɛ́ gè KirisiKataanna Siɛnrɛ ti jáaridiʔɛ nī gè, a Kàfɔli wi ’koligo múgu gè mi mɛ́. ¹³Nɛ̀ sí ki taa mi laamɛ piì puu mi nī tàanbaʔ, bɛ̀ mi sì cé mi siinyɛni Tiiti nyaa wèʔ. Bà mi ’yiri baa peli tiʔɛ nī gè, a mi ’kɛ́ Maseduwani tɛ́nimɛ nī bè.

Pɔli wi ’ki juu nɛ̀ láʔa Kulocɛliɛ baara wire nɛ kúu

¹⁴Kpuʔɔrɔ ti ’yɛli Kulocɛliɛ nɛ̄, wire ŋáà wi nyɛ́ni ki kpínʔini á weli nɛ fànʔa tari kele nī gèle lɛ̀lɛ ó lɛ̀lɛ nɛ́ Kirisi ní wè, nɛ̀ pínɛ Kulocɛliɛ wire wi ’ki kpíʔile a weli ’kacɛ́nnɛ taa nɛ wi kɛnmɛ tìí bè tiɛrɛ ti mìɛni nī, majo nùdaanna nī. ¹⁵Ki ’nyaa siɛnnɛ bílì bīɛlɛ suɔlɔ koligo nī gè, nɛ́ bìli bīɛlɛ cúʔɔgoligo nī gè, weli yē pe sunʔɔmɔ nī bè bɛ̀ Kirisi nùdaanna tíɛlɛ Kulocɛliɛ mɛ́ wè. ¹⁶Weli yē pàli mɛ́ kùu nùgo, gàa ki kùu kanʔa wè; weli sí yē sìi nùgo pàli mɛ́ gàa ki sìi kanʔa wè. Ŋáasiɛn sí wi ’nyuɔ nɛ̀ yɛli nɛ́ kire gáà ní gè ? ¹⁷Weli sí wè majo bɛ̀ pàli kpuɔmɔ yē bèleʔ, pe nàa jaʔa wáari nɛ́ Kulocɛliɛ siɛnrɛ ní dè. Weli bèle, weli funyɔ yiī fìiye; Kulocɛliɛ wire tunduro nɛ̄ weli yē, nɛ ti kúu Kirisi wire fànʔa nɛ̄, Kulocɛliɛ yiʔɛ mɛ́ gè.

Nyakungɛngɛ fɔngɔ baakuɔlɔ weli yē

¹Yeli ’jo lé weli ’koli nɛ weli tíimɛ wori nyu wī lé bè míɛtanʔa taa ? Á kire bɛ̀ʔ, dùʔɔ yeli sí nɛ sɔ̀ngí weli màakuu yē ki nɛ̄ bɛ̀ pàli tíɛlɛ, we- sɛbɛ kpíʔile we kɛn bè weli kɛnmɛ tìɛ bè lé ? Á kire ’laa we- sɛbɛ kpíʔile yeli kɛnmɛ nɛ̄ bè lé ? ²Weli sɛbɛ wè, yeli bīɛlɛ; ki sɛbɛ wiī sɛbɛwɛ náʔa weli funyɔ nī yè. Siɛnnɛ pe mìɛni nyɛ́nì wi cɛ́n, pe mìɛni nɛ wi wéli. ³Yeli wuʔu kiī cɛ́ngɛ, nɛ̀ taʔa gíi nɛ̄, yeli bīɛlɛ Kirisi sɛbɛ wè; weli we ’baara nɛ̀ yeli kɛn. Yeli wè sɛbɛlɛ nɛ́ tùnmu luʔɔ ní wīʔ. ʔéʔe, ki ’nyaa Kulocɛliɛ wewiiwe wire Pìle lire ní wi ’yeli sɛbɛ, wiì yeli sɛbɛ kàdɛnitɛnyɛ nɛ̄ wīʔ. ʔéʔe, ki ’nyaa yeli yē céri yasɛbɛgɛ weli funyɔ nī yè wī.

⁴Kire tɛ́ngɛlɛ lire nī weli mɛ́ Kulocɛliɛ yiʔɛ mɛ́ gè Kirisi wire fànʔa nɛ̄ gè. ⁵Kiì nyaa majo weli nɛ ki sɔ̀ngí weli ’ki kpíʔile nɛ́ weli tíimɛ ŋɔri ní wīʔ; ʔéʔe, weli ŋɔri ti ’taadiʔɛ kiī Kulocɛliɛ mɛ́ wī. ⁶Wire míɛni wi ’weli líɛ nɛ̀ ki kpíʔile a weli ’yɛli nɛ́ ki ní bè gbɛ̀ puu wi nyakungɛngɛ fɔngɔ3.6 Wéli baa Zer 31.31-34; 32.40. ki baakuɔlɔ bèle. Ki nàgorigo gè, kiì nyaa majo Misa Fànʔa Siɛnrɛ wori dīʔ; ʔéʔe, ti ’kɔ́n Kulocɛliɛ Pìle mɛ́ wī. Nɛ́ ki cɛ́n Misa Fànʔa siɛnrɛ tiī nɛ siɛn kpúu, Kulocɛliɛ Pìle lire nɛ̂ sí sìi nyɔ́gɔ siɛn nī.

⁷A ki sí yē baara díì bìli pe ’kúɔ dè, ki siɛnrɛ ti ’puu a pe ’ti gbógo nɛ̀ sɛbɛ kàdɛniyɛ nɛ̄ wè, ti sí cé puu nɛ́ kùu ní; nɛ̀ sí ki taa nàjɛnrɛ táà ’puu ti nɛ̄, fúɔ a kire ’ki kɛn Isirayɛli siɛnnɛ piyè cé gbɛ́nɛ̀ jáa nɛ̀ Misa wéli wè yiʔɛ nī gèʔ, ki nàjɛnrɛ ti nyíʔɛnimɛ pire kɛnmɛ nɛ̄ bè, bɛ̀ wi yiʔɛ ki ’puu nɛ nyíʔɛnɛ gè3.7 Wéli baa Yir 34.29-35., nɛ̀ sí ki taa tire ti mìɛni ti kɛ́nì tóri. ⁸Á Kulocɛliɛ Pìle lire baara dè do, tire kpuɔmɔ piǐ sí ní ga kpúʔɔ bè tóri lé ? ⁹A ki sí yē Misa Fànʔa Siɛnrɛ dáà ti sî nɛ kàyuʔu cáanri siɛn nɛ̄, tire yē nɛ́ kpuɔmɔ ní wè, Kulocɛliɛ Pìle baara dè, tire kpuɔmɔ piǐ sí ní kpúʔɔ bè tóri wīʔ lé ? ¹⁰Kire nɛ̄ we bé gbɛ̀ ki juu bé jo, kpuɔmɔ báà pi kíni nɛ̀ puu faʔa gè, piǐ gbɛ̀ tɔ́nminɔ nɛ́ bàa ní pi ’pɛn bèʔ, pire ’nyuɔ nɛ̀ fáala. ¹¹Kire nɛ̄, a ki yē kele gílì ke cî ga tóri gèle, ke ’puu nɛ́ kpuɔmɔ ní wè, á gìi sí ki je ga puu bile súuri gè, kire kpuɔmɔ piǐ sí kpúʔɔ bè tóri wī lé ?

¹²Bɛ̀ kire sɔ̀ngirɔ taʔadiʔɛ cɛ̀ngɛ gáà ki sí yē weli mɛ́ gè, a weli sí weli funyɔ tɛ́ngɛ yè yanyige nɛ̄. ¹³Weli wè ki kpínʔini bɛ̀ Misa tíɛlɛ wèʔ, wire ŋáà wi ’puu nɛ fɛ̀ni tɔ́ngi wi yiʔɛ nɛ̄ gèʔ, gìi ki bé tí Isirayɛli siɛnnɛ pe fǎga cé nyíʔɛnimɛ báà pi kúɔmɔ nyaa bèʔ, nyíʔɛnimɛ báà piì yé je ga mɔgɔ bèʔ. ¹⁴Fúɔ nɛ̀ pɛ́nì taa pàngɛ, a pe gbɛ́nɛ nyakungɛngɛ liʔɛ siɛnrɛ wéli dè, pe funyɔ yi nìɛ tíin puɔdɔnyɔ; ki fɛ̀ni nuwɔ wiī nɛ tíin pe yiɛyɛ nī yè. Nɛ̀ taʔa gíi nɛ̄, siɛn ’yɛli bè puu nɛ́ Kirisi ní pínɛnyɛnigɛ nɛ̄ wī, dí kire fɛ̀ni wi sí nɛ́ péli láʔa.

¹⁵Nɛ̀ sí ki taa pàngɛ cɛnyɛ nyáà nī yè, a pe gbɛ́nɛ Misa sɛbɛlɛ pe siɛnrɛ wéli dè, fɛ̀ni wáà nɛ̂ pe funyɔ tɔ́n yè. ¹⁶A siɛn ŋíì nɛ Kàfɔli wire wéli wè, fɛ̀ni wi nɛ̂ nɛ́ péli nɛ̀ láʔa3.16 Wéli baa Yir 34.34.. ¹⁷Nɛ́ ki cɛ́n Kàfɔli wè, wire wī Kulocɛliɛ Pìle lè; a Kulocɛliɛ Pìle ni sí yē tiʔɛ gíì nī gè, siɛnnɛ pe nɛ̂ puu pìyemɛ. ¹⁸Kire nɛ̄, weli we mìɛni bálì bīɛlɛ yiɛyɛ ní yè múguyo yè, weli nɛ Kàfɔli wi kpuɔmɔ wéli bè ki ní majo we ki wéli dibale nī wī. Bɛ̀ Kàfɔli wi sí yē Kulocɛliɛ Pìle lè, wiī nɛ weli kàrigí nɛ weli kpínʔini bɛ̀ wìi tíɛlɛ, nɛ kàa taʔala nɛ waa weli kpuɔmɔ nɛ̄ bè.

Kulocɛliɛ wi ’weli kpíʔile lɔri yɛrɛ

¹Kire kɛnmɛ nɛ̄, bɛ̀ Kulocɛliɛ wi ’nyinimɛ taa weli nɛ̄ nɛ́ ki baara kɛn dè weli mɛ́ dè, weli wè céri yɛri dè ti kúu weli nɛ̄ʔ. ²Kele gílì ke sî nɛ kpínʔini làrimɛ nī bè, níɛ̀ puu fìɛrɛ wuʔulo gèle, weli ’cíi ke nɛ̄. Weli wè tári jànvaa nɛ̄ʔ, bé nɛ́ ga jo bè Kulocɛliɛ siɛnrɛ yiʔɛ dèʔ. Gìi ki ’pɔ́ri gè, weli nɛ tári nɛ kányiʔɛ tìí gè, níɛ ki caa siɛnnɛ pe mìɛni pe- ki cɛ́n weli siɛnrɛ tiī kányiʔɛ Kulocɛliɛ yiʔɛ mɛ́ gè. ³Nɛ̀ sí ki taa Kataanna Siɛnrɛ dáà weli ’jáari dè, tiī nɛ tíin fuudɔnrɔ bìli mɛ́ pe waa cúʔɔgoligo nī gè. ⁴Kire siɛnnɛ bálì bèle, tɛ́ngɛlɛfun siɛnnɛ bèle, Setɛni wè, duniya ŋáà wi kàfɔli wè, wi ’pe sìnjilige fuu gè nɛ̀ tɔ́n pe nī, pe fǎga gbɛ̀ jáa bè Kirisi kpuɔmɔ Kataanna Siɛnrɛ ti kpìɛnmɛ nyaa bèʔ, Kirisi wire ŋáà wī Kulocɛliɛ líɛrɛ dè.

⁵Weli wè weli tíimɛ míɛtanʔa nyu nɛ mári wīʔ; ki ’nyaa Zezi Kirisi ŋáà wī Kàfɔli wè, wire wori weli nɛ nyu. Weli tíimɛ bèle, weli nɛ wìye tɔ́ri yeli baakuɔlɔ wī Zezi wire kɛnmɛ nɛ̄ bè. ⁶Nɛ̀ taʔa gíi nɛ̄, Kulocɛliɛ ŋáà wi cé ki juu nɛ́ jo: «Kpìɛnmɛ pi de càanná yebilige sunʔɔmɔ nī bè4.6 Wéli baa Sél 1.3.», wire wi nyɛ́ni wi kpìɛnmɛ cáanri bè weli funyɔ nī yè, gìi ki bé tí we- wire kpuɔmɔ cɛ́n bè, bàa pi nyíʔɛnɛ Zezi Kirisi yiʔɛ nī gè.

⁷Kire lɔri cɛ̀nrɛ dáà tiī weli nī a weli ’ti le wìye nɛ̄, á weli ní bɛ̀ puuro yakpiʔilide tíɛlɛ, gìi ki bé tí Kulocɛliɛ fànʔa gáà ki ’kpúʔɔ nɛ̀ tóri gè ki- cɛ́n, ki fǎga puu weliʔ. ⁸Weli yē cɔ̀rilɔ feliye yi mìɛni nɛ̄ʔ, nɛ̀ sí ki taa weli ŋɔri tiì kúɔʔ. Weli sɔ̀ngirɔ ti nàa curugu, nɛ̀ sí ki taa ki nɛ̌ weli funyɔ kpúu yèʔ. ⁹Piyē nɛ weli wuʔɔ, nɛ̀ sí ki taa Kulocɛliɛ wiì fɛ̀ nɛ́ weli wáaʔ. Piyē nɛ weli kpúɔnri nɛ cáanri, nɛ̀ sí ki taa weli woli niì cúʔɔʔ. ¹⁰Lɛ̀lɛ ó lɛ̀lɛ piyē nɛ weli caa nɛ́ kpúumɔ ní bɛ̀ Zezi tíɛlɛ wè, kire sí ki bé tí pe- ki cɛ́n dí Zezi sìi wiī weli nī. ¹¹Ki ’nyaa weli bálì bīɛlɛ bile sìi nɛ̄ wè, piyē nɛ weli caa súuri nɛ́ kpúumɔ ní Zezi kɛnmɛ nɛ̄ bè. Kire sí ki bé tí pe- ki cɛ́n dí Zezi sìi wiī weli nī, bè weli yaʔa nɛ́ weli céri dáà ní dè dàa dī kùu wi ’ti jáa dè. ¹²Bɛ̀ ki yē kire kɛnmɛ nɛ̄ bè á kùu wiī ní weli kúrugu. Yeli bèle sìi sí yē yeli mɛ́.

¹³Bɛ̀ ki ’juu baa Kulocɛliɛ siɛnsɛbɛrɛ nī dè nɛ́ jo: Mi tɛ́ngɛ, kire nɛ̄ mi nɛ ki nyu4.13 Ŋún 116.10 tire ti ’juu náʔa gè nɛ̀ yɛli nɛ́ girɛki siɛnliɛrɛ ní dè., kire tɛ́ngɛlɛ lire míɛni nī weli mɛ́, Kulocɛliɛ Pìle tɛ́ngɛlɛ lè. Weli ’tɛ́ngɛ, kire nɛ̄ weli nɛ ki nyu. ¹⁴Weli ’ki cɛ́n Kulocɛliɛ ŋáà wi ’Kàfɔli Zezi nyɛ́ wè nɛ̀ yige kúbilo nī bèle, wi bága weli míɛni nyɛ́ bè yige nɛ́ Zezi ní wè, dí weli sí pínɛ bè yiri nɛ́ yeli ní wi yiʔɛ mɛ́ gè. ¹⁵Nɛ́ ki cɛ́n, gàa ki mìɛni ki nyɛ́ni weli tari gè, kiī nɛ kpínʔini yeli kɛnmɛ nɛ̄ wī, gìi ki bé tí Kulocɛliɛ kpuʔɔrɔ ti- kpúʔɔ bè taʔala siɛnniʔɛnɛ mɛ́, dí we sí de wi síɛri de taʔala, de wi kpuɔmɔ wuʔu nyu gè.

Weri bànguɔ sìi wire caa

¹⁶Kire nɛ̄ weli sì ki yaʔa a ki ’weli céri kpúu dèʔ. A ki nɛ́ cɛ́nì nyaa kpànʔanɛ gè weli céri tiī nɛ córi dè, laamɛ nī bè, weli nɛ fùngú fɔnminɔ cɛngɛ ó cɛngɛ wī. ¹⁷Nɛ́ ki cɛ́n wuʔɔgɔ gáà gī weli nɛ̄ ŋɔ̀ wè, a we je ki tɔ́nminɔ gè, ki ’cɛ́ri nɛ̀ fáala kpuɔmɔ báà nī weli bága pa puu bè, bànguɔ kpuɔmɔ bè, kpuɔmɔ báà wuʔɔgɔ kiī nɛ kpínʔini nɛ yɛri weli mɛ́ bèle. ¹⁸Kele gálì ke nyɛ́ni wéli nɛ nyaʔa nyapile nɛ̄ lè, keli bɛ̀ʔ weli nɛ wéliʔ; gìli ke wè nyaʔa nyapile nɛ̄ lè, keli weli nɛ wéli. Nɛ̀ taʔa gíi nɛ̄, kele gílì ke wéli nɛ nyaʔa nyapile nɛ̄ lè, keli bága kúɔ wī. Nɛ̀ sí ki taa gìli ke wè nyaʔa nyapile nɛ̄ lèʔ, keli yē bànguɔ nī wī.

¹Ki ’nyaa weli ’ki cɛ́n weli céri dáà dī weli nɛ̄ bɛ̀ bùguro saʔa5.1 bùguro saʔa: Cetinnɛ náà nī we nɛ̄ bɛ̀ wiyē náʔa duniya nī wè, lire wi pun. tíɛlɛ náʔa duniya nī wè, a ki kɛ́nì tuu gè, Kulocɛliɛ saafanʔa káà yē baa weli mɛ́ nyìʔɛnɛ nī lè, kire saʔa gè siɛn kɔli wofanʔa bɛ̀ʔ, kiì je ga tuu bè nyaaʔ. ²Bɛ̀ sí wiyē náʔa bùguro saʔa nī gè, weli yē nɛ yiʔile weli saʔa kúrugu gè gàa gī baa nyìʔɛnɛ nī lè; ki láa yē weli nɛ̄ bè jíin ki nī. ³A we sí jíin baa kire saʔa nī gè, weli sǐ puu náboriloʔ. ⁴Nɛ́ ki cɛ́n bɛ̀ wiyē náʔa bùguro saaya nī yè, tugoro yē we nɛ̄ we cíɛn ti láara. Ki ’nyaa weli wè ki mɛ́ bè puu náboriloʔ. ʔéʔe, weli nɛ ki caa bururo- puu weli nɛ̄ wī, bè sìi céri le dàa ti bé dìi ti larigɛ líɛ gè, céri dáà kùu wi ’jáa wè. ⁵Kulocɛliɛ wire ŋáà sí wi ’weli faan kire kɛnmɛ nɛ̄ bè, wi ’wi Pìle kɛn lè weli mɛ́ bè ki tìɛ wire bé ki kpíʔile.

⁶Kire nɛ̄ kiī nɛ ŋɔri nyɔ́gi weli nī súuri; weli sí nyɛ́nì ki cɛ́n, bè weli yaʔa nɛ́ weli céri dáà ní dè, weli yē liilile Kàfɔli nɛ̄ wè wī. ⁷Ki ’nyaa tɛ́ngɛlɛ sɔ̀ngirɔ ní weli nɛ tári; gàa nyapile nɛ nyaʔa, kire nɛ̄ bɛ̀ʔ weli nɛ táriʔ. ⁸Kiī nɛ lèbaanna nyɔ́gi weli nī kpuʔɔ, nɛ̀ sí ki taa weli ’ki nyaa ki bé pɔ́ri weli mɛ́ we- yiri céri dáà nī dè we- kɛ́ Kàfɔli kúrugu wè. ⁹Kire nɛ̄, ki láa yē weli nɛ̄ weli kɛnmɛ pi- wi dɛ́ni, a ki nɛ́ nyaa weli yē nɛ́ weli céri dáà ní dè yo, á kire ’laa a weli ’yiri ti nī dè. ¹⁰Nɛ́ ki cɛ́n ki ’kàri fànʔa we mìɛni bèle we ga sa yéri Kirisi kàyuʔujuudiʔɛ ki yiʔɛ mɛ́ gè, dí we mìɛni nigbe nigbe sí we liʔɛlɛ taa gèle bè yɛli nɛ́ we kakpiʔiligele ní gèle, gìi we ’puu nɛ kpínʔini nɛ́ weli cetinnɛ ní lè, a ki yē cɛ̀ngɛ yo, a ki yē sìpiʔi yo.

Weri siɛnnɛ nyu de taʔala peli nɛ́ Kirisi ní wè

¹¹Bɛ̀ Kàfɔli wi fíɛrɛ ti sí yē weli nī bèle, weli nìɛ ti nyu nɛ láʔala. Nɛ́ ki cɛ́n Kulocɛliɛ wiī nɛ weli wéli nɛ nyaʔa wálilɛ. Mi nɛ sɔ̀ngí yeli míɛni yeli ’weli kɛnmɛ cɛ́n bè yeli funyɔ nī yè. ¹²Weli wè nɛ weli tíimɛ wuʔu nyu gè yeli mɛ́ cíginiʔ; gìi weli nɛ caa gè, kire gī ye- puu nyùyɔ ní yè yɛ̀riyɛ weli baara ti wuʔu nɛ̄ gè. Gìi ki bé tí ye- siɛnnugoro taa ye kɛn bìli mɛ́ pe nyɛ́ni pìye nyíɛnɛ siɛnnɛ pe nyaamɛ nɛ̄ bè, nɛ̀ sí ki taa pe funyɔ nī yè pe wè kireʔ. ¹³Nɛ́ ki cɛ́n a ki cɛ́nì nyaa weli ’kele kálì kúɔ ke ní nyùgo fùn yo, Kulocɛliɛ wire mɛ́ weli ’ti kúɔ. A ki sí yē weli sɔ̀ngirɔ tiī cɛ̀nrɛ dè, weli ’kire kpíʔile yeli kɛnmɛ nɛ̄ wī. ¹⁴Ki ’nyaa Kirisi dɛ́nigɛ kire ’ki weli funyɔ nyì yè. Kire sí weli ’cɛ́n, nɛ̀ ki cɛ́n dí siɛn nigbe wi ’kùu siɛnnɛ pe mìɛni kɛnmɛ nɛ̄; kire ki ’tìɛ siɛnnɛ pe mìɛni kùu wī. ¹⁵Nɛ̀ pínɛ wi ’kùu siɛnnɛ pe mìɛni kɛnmɛ nɛ̄, gìi ki bé tí bìli bīɛlɛ wiile bèle, pe fǎri pe sìi tári wè peli tíimɛ kɛnmɛ nɛ̄ʔ, peri wi tári ŋàa wi ’kùu pe kɛnmɛ nɛ̄ bè nɛ́ koli nɛ̀ nyɛ́ nɛ̀ yiri wè.

¹⁶Kire kɛnmɛ nɛ̄, bɛ̀ ki yē píra ŋáà nī wè, weli ní wè nɛ siɛnnɛ kɛnmɛ wéli bè nɛ yɛligi nɛ́ siɛnnɛ funzɔngirɔ níʔ. Gbíɛn wè, weli ’puu nɛ Kirisi kɛnmɛ nyaʔa bè nɛ́ siɛnnɛ funzɔngirɔ ní wī, bɛ̀ sí ki yē píra ŋáà nī wè, weli ní wè wi nyaʔa kire kɛnmɛ nɛ̄ bèʔ. ¹⁷Kire nɛ̄, a siɛn yē pínɛnyɛnigɛ nɛ̄ nɛ́ Kirisi ní wè, wi ’kò siɛnfɔnwɔ wī; kaliɛmɛ pi ’tóri, píra ŋáà nī wè kanvɔnmɔ pi ’pɛn. ¹⁸Kire ki mìɛni ki ’yɛ̀ Kulocɛliɛ mɛ́, wire ŋáà wi ’ki kpíʔile a we ’koli nɛ̀ bìɛ wire nɛ́ weli ní bèle Kirisi wire kɛnmɛ nɛ̄ bè, nɛ́ sí ki baara kɛn dè weli mɛ́ weri siɛnnɛ nyu bèle de taʔala peli nɛ́ Kirisi ní wè. ¹⁹Nɛ́ ki cɛ́n Kulocɛliɛ wi cé fàri Kirisi nɛ̄ wè, nɛ̀ ki kpíʔile a wire tíimɛ ’koli nɛ̀ bìɛ nɛ́ duniya wuulo ní bèle. Wi wè nɛ pe kacuʔɔrɔ tɔ́ri dè pe kúruguʔ, nɛ́ sí siɛnrɛ le dè weli nī, weri siɛnnɛ nyu bèle de taʔala peli nɛ́ Kirisi ní wè.

²⁰Kirisi tundunminɔ weli yē, á Kulocɛliɛ wi sí nɛ weli tíʔi nɛ nyu nɛ siɛnnɛ yɛrigi bèle. Weli nɛ ye fiɛn wī Kirisi wire míʔɛ nɛ̄ gè, ye- ki yaʔa ye koli ye bìɛ yeli nɛ́ Kulocɛliɛ ní wè. ²¹Zezi wire ŋáà wiì kapiile kpíʔile nɛ̀ nyaa wèʔ, a Kulocɛliɛ wi ’wi tɔ́ri kapiigbiʔiliwe weli larigɛ nī, gìi ki bé tí Zezi wire kɛnmɛ nɛ̄ bè, a Kulocɛliɛ wi ’weli tɔ́ri siɛnsinminɛ.

¹Bɛ̀ sí wiyē nɛ pínɛ nɛ baara wè, weli nɛ ye fiɛn wī, ye fǎga Kulocɛliɛ wi kpuʔɔrɔ tɔ́ri dè majo yafiɛn bɛ̀ʔ. ²Nɛ̀ taʔa gíi nɛ̄, wi ’jo:

Bɛ̀ ki ’puu ki lɛ̀lɛ nī lè, mi cé muɔ náarigɛ suɔ gè.

Suɔlɔ cɛngɛ gè, a mi ’pɛn nɛ̀ pɛ́nì muɔ sáʔa6.2 Eza 49.8 tire ti ’juu náʔa gè..

Píra ŋáà nī wè, lɛ̀jɛnnɛ lire ni ’nɔ̀; suɔlɔ cɛngɛ ki ’nɔ̀6.2 Wéli baa Luk 21.24; Wurɔ 11.25-32; Efɛ 2.12-18..

³Weli wè caa bè kpíʔile kaala kɛnmɛ páà fáala nɛ̄ʔ bé siɛn kɛn wi- tuuʔ, kire fǎga tí wàa ga siɛncuʔɔrɔ juu weli baara ti wuʔu nɛ̄ gèʔ. ⁴Ki ’nyaa weli nɛ ki tìí feliye yi mìɛni nī dí weli yē Kulocɛliɛ wi baakuɔlɔ, nɛ̀ ki kpàri nɛ̀ cò kpuʔɔ kagbɛngɛlɛ sunʔɔmɔ nī bè, fuunmɔ nī bè, nɛ́ fùrɔgɔ ní gè, ⁵kpuɔnrɔ dè, kasuulere dè, siɛnnɛ pe tùnnɔ lè, baagbɛnrɛ dè, bè kò nɛ́ ŋɔ́nimɔ ní bè, nɛ́ bè kò nɛ́ fungo ní gè. ⁶Nɛ́ sí kò cìilimɛ nī bè, nɛ́ kacɛ́nnɛ ní lè, nɛ́ funnyige ní, nɛ́ funjɛ̀ngɛ, Kulocɛliɛ Pìle lire fànʔa nɛ̄ gè, nɛ́ dɛ́nigɛ ní gè funviige wuʔu gè, ⁷nɛ́ kányiʔɛ siɛnjuuro ní dè, nɛ́ Kulocɛliɛ ŋɔri ní dè. Nɛ̀ pínɛ sínmɛ kakpiʔiligele keli gīɛlɛ weli yakpuɔnrɔ dè, dàa ní weli nɛ weli leguulo túngu bèle, níɛ wìye kpɔni nɛ yɛri wè.

⁸Làa nɛ̄ pe nàa weli kpóri, làa nɛ̄ pe nàa weli faʔa. Làa nɛ̄ weli nɛ̂ míɛpinʔɛ taa, làa nɛ̄ weli nɛ̂ míɛtanʔa taa. Pe nàa weli nyaʔa bɛ̀ jànvaafɔlilɔ tíɛlɛ, nɛ̀ sí ki taa kányiʔɛ kire weli nɛ nyu. ⁹Weli nɛ̂ puu majo siɛnnɛ bálì piyè cɛ́n bèleʔ, nɛ̀ sí ki taa weli yē cɛ́nminɛ.

Piyē nɛ weli kanʔa kùu mɛ́, weli sí m’bɛlɛ sìi nɛ̄. Pe tɔ̀ni nɛ weli wuʔɔ, weli sì sí kùuʔ. ¹⁰Pe nìɛ ki sɔ̀ngí weli bè puu funbiɛnrɛ nɛ̄, níɛ̀ sí weli nyaa fundaanra nɛ̄; piyē nɛ weli nyaʔa bɛ̀ fɔ̀ngɔfɔlilɔ tíɛlɛ, nɛ̀ sí ki taa weli nɛ pàli nìʔɛnɛ kpínʔini lɔrifɔlilɔ. Piyē nɛ weli nyaʔa nɛ̀ jo yakaa wè weli mɛ́ʔ, nɛ̀ sí ki taa weli ’yɛrɛ ti mìɛni taa.

¹¹Korɛnti wuulo, weli juu nɛ́ yeli ní funviige ní, nɛ̀ weli funyɔ múgu yè yeli mɛ́. ¹²Weli sì yeli kari nɛ̀ wáa weli funyɔ nī yèʔ, yeli ye yeli ’funyɔ tɔ́n yè. ¹³M’bé sí juu bè yeli tɔ́ri bɛ̀ mi pìile tíɛlɛ: ye- sí weli sàri kɛn wè náʔa ! Yeli míɛni bèle, ye- yeli funyɔ múgolo yè weli mɛ́ kpuʔɔ.

Tɛ́ngɛfɔli wi fǎga wìi taʔa sìndɛngɛwɛ nɛ̄ wèʔ

¹⁴Ye fǎga yìye puɔ sìndɛngɛlɛ nɛ̄ bèleʔ, a yeli ’kire kpíʔile, yeli ’ki pùngo wī. Á kire ’laa wè, gáa ki bé gbɛ̀ sínmɛ nɛ́ sìnzinmɛ pínɛ bè pìi nɛ̄ ? Nɛ̀ pínɛ, mɛni kpìɛnmɛ nɛ́ yebilige ti bé gbɛ̀ri pínɛ de tári de sii ? ¹⁵Bìɛni ŋíi wī baa Kirisi nɛ́ Setɛni sunʔɔmɔ ní bè ? Á kire bɛ̀ʔ, gíi ki ’pe pínɛ tɛ́ngɛfɔli wè nɛ́ sìndɛngɛwɛ ní wè ? ¹⁶Gáa ki ’ti pínɛ Kulocɛliɛ Gbùʔɔrɔsaʔa gè nɛ́ yasunro ní dè ? Ki ’nyaa weli bèle, Kulocɛliɛ wewiiwe wi Gbùʔɔrɔsaʔa weli yē, nɛ̀ yɛli nɛ́ gìi Kulocɛliɛ wi ’juu gè, wi ’jo:

M’bága puu kòriwo pe nī,

nɛ̀ pínɛ m’béri tári nɛ́ pe ní.

M’bé puu pe Kulocɛliɛ wè, dí peli sí puu mi kùlo wuulo bèle6.16 Lev 26.12 tire ti ’juu náʔa gè..

¹⁷Kire nɛ̄ Kàfɔli wi ’jo:

Ye- yiri pe sunʔɔmɔ nī bè !

Ye- láʔa pe nɛ̄.

Ye fǎga cò fuɔnrɔ nɛ̄ dèʔ, bɛ̀ m’bé fɔ̀li yeli nɛ̄6.17 Eza 52.11 tire ti ’juu náʔa gè. Wéli baa Ezek 20.34,41..

¹⁸A Kàfɔli wi ní nɛ̀ ki juu, wire ŋáà wī Ŋɔri ti Mìɛni Kulocɛliɛ wè, nɛ́ jo:

M’bé puu yeli Tuu wè,

dí yeli sí puu mi jaala bèle nɛ́ mi pórilo bèle6.18 Wéli baa Sam2 7.14; Eza 43.6; Lev 26.12; Zer 31.9; Ezek 37.27; Oze 2.1..

¹Mi siinyɛninɛ, yeli bálì ye mi dɛ́ni bèle, bɛ̀ kire nyafɛnigɛ ki siɛnrɛ dáà ti sí juu weli mɛ́ dè, ye tí we- wìye cìile we céri fuɔnrɔ ti mìɛni láʔa dè nɛ́ dìi dī pìle wori dè, we- ti láʔa wìye nɛ̄, wé sí wìye wàli we tɛ́ngɛ we láʔa, we- Kulocɛliɛ fíɛrɛ yaʔa ti- puu weli nī.

Pɔli fundaanra kɔri wè

²Ye- larigɛ yaʔa weli mɛ́ baa yeli funyɔ nī yè; weli sì sìpiʔi kpíʔile siɛn nɛ̄ʔ, weli sì siɛn woli cúʔɔʔ, weli sì siɛn nùʔɔrɔʔ. ³Mi wè tire nyu bè kàyuʔu cáan yeli nɛ̄ wīʔ. Mi ’ki juu nɛ̀ kúɔ nɛ́ yeli yɛ dí yeli woli niī náʔa weli funyɔ nī yè. Sìi ŋáà wiǐ gbɛ̀ we láʔala wìye nɛ̄ʔ, kùu míɛni sǐ gbɛ̀ we láʔala wìye nɛ̄ʔ. ⁴Mi tɛ́ngɛrɛ yē yeli nɛ̄ kpuʔɔ, nɛ̀ pínɛ mi nɛ fíkɛnyɛ wúʔuro yeli kɛnmɛ nɛ̄ bè. Mi laamɛ pi mìɛni yē nyíbe, nɛ̀ pínɛ fundaanra yē mi nī kpuʔɔ fùrɔyɔ nyáà yi mìɛni yī weli nɛ̄ bèle.

⁵Nɛ́ ki cɛ́n bɛ̀ weli ’kɛ́ Maseduwani tɛ́nimɛ nī bè, weli sì kɛ́nì larigɛ taa púlo nɛ̀ weli césɛngɛ ŋɔ́ gè nɛ̀ taaʔ, ga laa yawarirɛ felide ti mìɛni bɛ̀ʔ dè: a kiì nyaa cáanraʔ, fíɛrɛ ti nɛ̂ puu. ⁶Kire gáà ki mìɛni láara gè, Kulocɛliɛ wire ŋáà wi nyɛ́ni siɛnfurɔlɔ funyɔ nyígi yè, wire wi ’weli funyɔ tɛ́ngɛ yè tiɛnugo nī, bɛ̀ Tiiti cé kɛ́nì pɛn wè. ⁷Wi pɛnnɛ lire yákuɔ sí bɛ̀ʔ, ki ’nyaa funnyige siɛnrɛ dáà wire tíimɛ wi ’taa yeli mɛ́ bèle nɛ̀ pínɛ wè. Wi ’ki juu weli mɛ́ bɛ̀ mi nyaa láa kiī yeli nɛ̄ bèle, a wi ’yeli yéturo wori juu dè nɛ̀ pínɛ, nɛ́ bɛ̀ mi woli ni ’kpúʔɔ yeli nàzɔnnɔ nī bèle. A kire ki mìɛni ki ’fundaanra kɛn mi mɛ́ kpuʔɔ.

⁸A ki sí nyaa mi sɛbɛ wi siɛnrɛ ti ’laamɛ piɛn yeli nī bèle, kire sì kàa cúʔɔʔ. Ki funbiɛnrɛ ti sî gbɛ̀ jíin mi nī yoʔ, nɛ́ ki cɛ́n mi ’ki nyaa sɛbɛ ŋáà wi ’pɛn nɛ́ funbiɛnrɛ ní yeli mɛ́ lɛ̀lɛ láà nī. ⁹Píra ŋáà nī wè, mi yē fundaanra nɛ̄, kiì sí kò majo bɛ̀ yeli yē funbiɛnrɛ nɛ̄ wèʔ, kire kɛnmɛ nɛ̄ʔ. ʔéʔe, ki ’nyaa bɛ̀ yeli funbiɛnrɛ ti ’yeli kɛn a yeli ’làa yiʔɛ yeli funyɔ nī yè wè. Ki ’nyaa ti ’laamɛ piɛn yeli nī nɛ̀ yɛli nɛ́ Kulocɛliɛ nyɛ́ni kaala ní lè, a kire ’ki kɛn weli kɛnmɛ piì kapiʔi kpíʔile yeli nɛ̄ʔ.

¹⁰Nɛ́ ki cɛ́n funbiɛnrɛ dáà ti ’yɛ̀ Kulocɛliɛ mɛ́ wè, tire yē nɛ baara nɛ siɛn fungo yiʔi wī, dí wi sí suɔlɔ taa lè; siɛn wi fǎri ki yáaʔ. Nɛ̀ sí ki taa funbiɛnrɛ díì ti sî puu siɛn nī duniya wire kɛnmɛ nɛ̄ bè, kire funbiɛnrɛ tiī nɛ báan nɛ́ kùu ní wī.

¹¹Ye sí ki wéli mɛni Kulocɛliɛ wi ’wi nyɛ́ni kaala fori lè nɛ́ funbiɛnrɛ ní dè. Ki funbiɛnrɛ ti ’ki kɛn a kayaʔa jíin yeli nī, yeli nɛ ki caa bèri kányiʔɛ koligo tári gè. A ti ń’nɛ̀ fíɛrɛ nyɔ́gɔ yeli nī a mi láa ’kò yeli nī kpuʔɔ. Ki funbiɛnrɛ dáà ti ’ki kɛn a yeli ’kapiigbiʔiliwe le wè koligo nī. Kire gáà ki mìɛni ki ’ki tìɛ yeli wè baa ki kele gálì nī gèleʔ.

¹²A yeli ’mi nyaa mi ’sɛbɛ ŋáà tórigo wè yeli mɛ́ wè, kiì nyaa majo ŋàa wi ’kapiile kpíʔile lèʔ, á kire ’laa ŋàa nɛ̄ pe ’ni kpíʔile lè, peli kɛnmɛ nɛ̄ mi wi tórigoʔ. Bè ki juu Kulocɛliɛ yiʔɛ mɛ́ gè, mi ’sɛbɛ tórigo wè bè ki tìɛ mɛni yeli cé ki láa yaʔa weli nī bɛ̀ weli cé kɛ́ baa yeli mɛ́ bèle. ¹³A ki ’ŋɔri nyɔ́gɔ weli nī, kire yákuɔ sí cɛ bɛ̀ʔ. Ki ’fundaanra kɛn weli mɛ́ bɛ̀ ki ’nyaa Tiiti wi cé fundaanra taa yeli tiʔɛ nī gè. Nɛ̀ taʔa gíi nɛ̄, wi fungo ki cé nyígi yeli ye mìɛni kɛnmɛ nɛ̄ bè.

¹⁴M’bé gbɛ̀ de fíkɛnyɛ wúʔuro yeli kɛnmɛ nɛ̄ bè. Ki ’nyaa kɛnmɛ bíì nɛ̄ mi cé yeli míɛtanʔa yeri gè Tiiti yiʔɛ mɛ́ gè, yeli sì fìɛrɛ tɔ́n mi nɛ̄ ki tiɛlɛ nī lèʔ. Bɛ̀ weli ’dàli nɛ kányiʔɛ nyu gè yeli mɛ́ gè, bɛ̀ sí ki yē, dìi weli cé juu Tiiti mɛ́ wè yeli wori nɛ̄ dè, ti sɛ́nì yiri kányiʔɛ. ¹⁵Ye- ki cɛ́n, yeli woli ni ’kpúʔɔ Tiiti mɛ́ wè bɛ̀ ki caa mmɛ. Ki ’nyaa bɛ̀ ye mìɛni ye ’wi siɛnrɛ lúʔu dè, nɛ́ wi kpàli nɛ́ fundaanra díì ní dè, nɛ́ kpuʔɔrɔ taʔa dè wi nɛ̄ fúɔ nɛ̀ cɛ́nì yìye cɛ́rigɛ wi yiʔɛ mɛ́ gè, wiì fìʔɛ nɛ́ ki tiɛlɛ ní lèʔ.

¹⁶Kiī mi mɛ́ fundaanra, nɛ̀ taʔa gíi nɛ̄, mi ’tɛ́ngɛ yeli nɛ̄ kele ke mìɛni nī gèle.

Maseduwani wuulo pe walikɛnrɛ wori dè

¹Nɛ siinyɛninɛ, weli nɛ caa ye- ki cɛ́n kpuʔɔrɔ dáà Kulocɛliɛ wi ’kpíʔile tɛ́ngɛfɔlilɔ gbuʔulo mɛ́ gèle Maseduwani tɛ́nimɛ nī bè. ²Ki ’nyaa fùrɔgɔ ’puu pe nɛ̄ kpuʔɔ. Nɛ̀ sí ki taa, pe nɛ́ pe fɔ̀ngɔ ki mìɛni ní gè, a pe ’fundaanra taa, nɛ̀ pe kiyɛ sáʔala yè bɛ̀ ki caa mmɛ, nɛ̀ kàa kɔ̀n nɛ̀ kɛn nìʔɛgɛ. ³Ki ’yɛli mi kàa juu pe wuʔu nɛ̄ gè. Pe ’ki kpíʔile a ki ’tóri gìi nɛ̄ pe cî gbɛ̀ jáa gè, nɛ́ pe fungo ní gè, siɛn sì pe cɔ̀riʔ. ⁴Pe yé cɛ́nì weli fiɛn, we- fǎga peli kúnʔ kɔ̀nnɔ níì ni ’yɛli bè kɔ̀n Kulocɛliɛ wuulo mɛ́ bèleʔ. ⁵Gìi cɛ weli sì puu nɛ sɔ̀ngí gèʔ, a pe kíni nɛ̀ pìye kɛn gbíɛn Kàfɔli mɛ́ wè peli tíimɛ bèle, nɛ́ sí pìye cáan weli tɛ́ngɛmɛ nɛ̄, nɛ̀ yɛli nɛ́ Kulocɛliɛ nyɛ́ni kaala ní lè. ⁶A kire tí a weli ’ŋɔri nyɔ́gɔ Tiiti nī wè, baacɛ̀nrɛ dáà wi ’séli baa yeli tiʔɛ nī gè wali kɔ̀nnɔ koligo nī gè, wi- ti kúɔ wi láʔa.

⁷Yeli ’tɔ̀ni nɛ̀ jáa kele ke mìɛni nɛ̄ gèle: tɛ́ngɛlɛ lè yo, siɛnrɛ dè yo, á kire ’laa kacɛ́nnɛ lè yo, bè puu sícaʔawa kakpiʔiligele ke mìɛni nī gèle yo; nɛ̀ pínɛ weli woli ni ’kpúʔɔ yeli funyɔ nī yè. Kire nɛ̄ yeri kanʔa yeri láʔala. ⁸Miì jo ye ki kpíʔile fànʔa wīʔ. Ki ’nyaa bɛ̀ bìli sɛnminɛ piyē sícaʔala nɛ kanʔa wè, mi je ki wéli a ki yē yeli dɛ́nigɛ kiī baa kányiʔɛ wè. ⁹Yeli tíimɛ bèle yeli nyɛ́nì we Kàfɔli Zezi Kirisi wi kpuʔɔrɔ wori cɛ́n dè. Wiī yakaafɔli, nɛ̀ sí ki taa wi ’wìi kpíʔile fɔ̀ngɔfɔli yeli kɛnmɛ nɛ̄ bè, gìi ki bé tí wire fɔ̀ngɔ láara gè, yeli gbɛ̀ jáa bè kò yakaafɔlilɔ.

¹⁰M’bé mi fungo sɔ̀ngirɔ juu dè tiɛlɛ náà nī lè. Ki ’pɔ́ri yeri waa yiʔɛmɛ nɛ́ baara ní dè dàa yeli ’séli yalaa gè. Yeli ye ’puu siɛnpelile bèle nɛ̀ baara dáà ti nyuɔ kún gè. ¹¹Píra ŋáà nī wè, ye sí ti kúɔ ye láʔa. Ye- yìye kɛn ti mɛ́ majo mɛni ti láa ki ’puu yeli nī bèle. Ye- ti kúɔ ye láʔa ye yɛli nɛ́ gìi ní yeli bé jáa gè. ¹²Nɛ́ ki cɛ́n a siɛn ’kpuʔɔrɔ kpíʔile Kulocɛliɛ mɛ́ wè nɛ́ funviige ní gè, gàa siɛn wi ’taa nɛ̀ kɛn gè, kire Kulocɛliɛ wiī nɛ wéli. Gàa ki wè siɛn mɛ́ wèʔ, wi wè kire wéliʔ.

¹³Kiì nyaa majo weli nɛ ki caa ye- kò fɔ̀ngɔfɔlilɔ wīʔ, yé sí pàli sáʔaʔ. ʔéʔe, gìi ki ’yɛli gè, weri kire caa. ¹⁴Bɛ̀ ki yē ŋɔ̀ wè, gìi yeli ’taa a ki ’niʔɛ nɛ̀ tóri gè, ki bé gbɛ̀ pàli woli nyuɔ bàli mɛ́ ki ’laa wè, gìi ki bé tí cɛngɛ káà a peli míɛni kɛ́nì taa a ki ’niʔɛ nɛ̀ tóri gè, pe- yeli kɛn a ki ’yeli laa wè. Kire gī ki yɛlimɛ bè. ¹⁵Kire Kulocɛliɛ siɛnsɛbɛrɛ ti ’juu nɛ́ jo:

Ŋàa wi cé jó nɛ̀ taa nìʔɛgɛ wè,

wi wori tiì cé niʔɛ nɛ̀ tóriʔ.

Ŋàa sí wiì cé jó nɛ̀ taa sáa wèʔ,

wi wori tiì wi kóligoʔ8.15 Yir 16.18 tire ti ’juu náʔa gè..

Tiiti nɛ́ wi kobinɛnyɛninɛ wori dè

¹⁶Kpuʔɔrɔ ti ’yɛli Kulocɛliɛ nɛ̄, wire wi ’ki kɛn a yeli woli ni ’kpúʔɔ Tiiti fungo nī gè bɛ̀ mi tíɛlɛ wè. ¹⁷Nɛ̀ taʔa gíi nɛ̄, wi ’fɔ̀li nɛ̀ weli náarigɛ lúʔu gè. Bɛ̀ sí ki woli ni ’puu wi nàzɔn nɛ̄ wè, a wi ’ki yɛ̀gɛ wire tíimɛ wè nɛ̀ kɛ́ baa yeli tiʔɛ nī gè. ¹⁸Weli ’pe pínɛ nɛ̀ tórigo wire nɛ́ siinyɛni ŋáà wori pe nyu nɛ wi míɛtanʔa yeri gè tɛ́ngɛfɔlilɔ gbuʔulo ke mìɛni nī gèle, Kataanna Siɛnrɛ baara ti wuʔu nɛ̄ gè. ¹⁹Kire yákuɔ sí cɛ bɛ̀ʔ, ki ’nyaa wire tɛ́ngɛfɔlilɔ gbuʔulo ke ’tìɛ wi- puu weli kobinɛnyɛni wè, wali kɔ̀nnɔ baara dáà nī dè. Weli ’wìye cáan kire baara nɛ̄ dè bèri Kàfɔli wire kpuɔmɔ tìí bè, bé sí de ki tìí weli nɛ baara nɛ́ weli funyɔ yi mìɛni ní. ²⁰Weli sí yē nɛ ciʔige, ki fǎga ga nyaa siɛn ga yakaa juu ti- weli còʔ, wali nìʔɛwɛ ŋáà pe ’kɛn weli mɛ́ weli de baara yeli sunʔɔmɔ nī bè. ²¹Ki ’nyaa weli nɛ ki caa weli tánʔagɛnmɛ pi ’puu cɛ̀nbɛ Kàfɔli wi yiʔɛ mɛ́ gè. Ki fǎga cɛ yéri Kàfɔli wire yákuɔ nɛ̄ʔ, weli nɛ ki caa nɛ pínɛ weli tánʔagɛnmɛ pi- puu cɛ̀nbɛ siɛnnɛ yiʔɛ mɛ́ gè wī.

²²Weli ’pe pínɛ nɛ̀ tun nɛ́ weli siinyɛni wáà ní, weli ’tɔ̀ni nɛ̀ wi kakpiʔiligele siʔɛ gèle nɛ̀ wéli kele nìʔɛgɛlɛ nī, nɛ̀ wi sícaʔama wori cɛ́n dè. Bɛ̀ sí ki yē ŋɔ̀ wè, wiī nɛ ki caa ki de waa yiʔɛmɛ bè tóri kire nɛ̄, ki ’nyaa wi ’tɛ́ngɛ yeli nɛ̄ nɛ̀ láʔa. ²³Tiiti wire wè, mi kobinɛnyɛni wī, nɛ́ ní yeli baakuɔnyɛni nɛ̀ pínɛ. Gìi sí ki we siinyɛninɛ kúɔ bèle, peli bīɛlɛ tɛ́ngɛfɔlilɔ gbuʔulo ke ’tórigo; piyē nɛ baara nɛ pínɛ Kirisi wi kpuɔmɔ wori nɛ̄ dè. ²⁴Kire nɛ̄, ye tí pe- ki cɛ́n peli woli ni ’yeli dɛ́ni kányiʔɛ; bɛ̀ pe bé tɛ́ngɛ ki nɛ̄ weli tànʔa gī bɛ̀ weli yē fundaanra nɛ̄ yeli kɛnmɛ nɛ̄ bè.

Kpuʔɔrɔ dáà pe ’tórigo Zude wuulo mɛ́ bèle

¹Píra ŋáà nī wè, gìi ki kpuʔɔrɔ wori kúɔ dè, dàa ti ’yɛli bè tórigo Kulocɛliɛ wuulo mɛ́ bèle, mi ’ki nyaa nyùgo ní wè ki nɛ̄ʔ mi ní de yakaa nyu yeli mɛ́ tire nɛ̄ dèʔ. ²Nɛ̀ taʔa gíi nɛ̄, mi ’yeli sɔ̀ngijɛnrɛ cɛ́n dè ki wuʔu nɛ̄ gè. Mi ’tɔ̀ni nɛ yeli síɛri kire tiɛlɛ nɛ̄ lè Maseduwani wuulo yiʔɛ mɛ́ gè. Mi ’ki juu pe mɛ́ dí Akayi tɛ́nimɛ wuulo pe ’gbòbori nɛ̀ yaʔa yalaa kátii kaala. Yeli sícaʔama pi ’ki láa yɛ̀gɛ pàli nìʔɛnɛ nī. ³M’bé sí siinyɛninɛ tórigo bèle baa yeli mɛ́, ye- gbòbori ye yaʔa nɛ́ yeli kpuʔɔrɔ ní dè bɛ̀ ki ’juu gè. Bɛ̀ mi nɛ nàgbuʔɔrɔ kpínʔini yeli kɛnmɛ nɛ̄ bè, ye fǎga tí pe sa kò waʔanɛʔ, a pe sɛ́nì nɔ̀ baa wèʔ. ⁴Á kire ’laa, a Maseduwani wuulo pe ’kɛ́ nɛ́ mi ní bèle, a ki sɛ́nì nyaa yeli sì gbòbori nɛ̀ yaʔa wèʔ, ki bé kpíʔile majo tɛ́ngɛrɛ dáà weli ’taʔa yeli nɛ̄ dè, ki bé kò yeli fìɛrɛ wī, bè cɛ tóri weli nɛ̄. ⁵Kire nɛ̄ a mi sí ki nyaa ki ’pɔ́ri a mi siinyɛninɛ fiɛn bèle peri waa mi yiʔɛ nɛ̄ yeli tiʔɛ nī gè, pe sa yeli kpuʔɔrɔ suɔ dè, dàa yeli ’kɛn nɛ́ funviige ní gè, bɛ̀ yeli ’nyafɛnigɛ líɛ ki wori nɛ̄ dè. Ye sí ti kɛn nɛ́ funviige ní, ye fǎri kúnʔɔriʔ.

A ŋìi nɛ kanʔa Kulocɛliɛ nìɛ kacɛ̀ngɛ kpínʔini wi mɛ́

⁶Ye- sí ki cɛ́n: a siɛn ŋíì ’yatanʔara tánʔa dè cɛ̀ dè, bɛ̀ míɛni wi bága yaliire líɛ dè ti- puu cɛ̀. A ŋìi sí yatanʔara tánʔa dè nìʔɛrɛ dè, wi bága yaliiniʔɛrɛ líɛ. ⁷Siɛn ó siɛn, a gìi ’yɛ̀ wi fungo nī gè, wi- kire kɛn; wi fǎga ki kpíʔile nɛ́ funbiɛnrɛ níʔ, macɛjo dùʔɔ pe ’wi cɔ̀ri wīʔ. Nɛ̀ taʔa gíi nɛ̄, siɛn ŋíì wi nyɛ́ni kanʔa nɛ́ fundaanra ní dè, wire wi ’Kulocɛliɛ dɛ́ni. ⁸Ye- ki cɛ́n Kulocɛliɛ wi bé gbɛ̀ yeli kɛn bè yeli funyɔ nyígi yè nɛ́ kpuʔɔrɔ felide ti mìɛni ní, gìi ki bé tí lɛ̀gɛlɛ ke mìɛni nī gèle, ye- yɛrɛ felide ti mìɛni taa yìye fungo, dí tàa ní kò yeli mɛ́ yeri kacɛ̀ngɛlɛ kpínʔini nɛ́ tire ní. ⁹Nɛ́ ki cɛ́n Kulocɛliɛ siɛnsɛbɛrɛ ti ’ki juu nɛ́ jo:

Wi ’kpuʔɔrɔ liɛlɛ,

nɛ̀ fuunmɔfɔlilɔ

kɛn bèle nìʔɛgɛ;

wi sínmɛ pi wè kúu

nɛ nyaʔaʔ9.9 Ŋún 112.9 tire ti ’juu náʔa gè..

¹⁰Kire nɛ̄, Kulocɛliɛ wire ŋáà wi nyɛ́ni yatanʔara kanʔa dè yatanʔarafɔli mɛ́ wè, nɛ́ ní siliire ti kɛnfɔli wè, wi bága yatanʔara kɛn dè yeli mɛ́ bé sí ti kpíʔile ti niʔɛ. Wi bága yeli sínmɛ kakpiʔiligele kɛn gèle ke- kɛ́ yiʔɛmɛ.

¹¹Wi bé yeli kpíʔile ye- puu lɔrifɔlilɔ kacɛ́nmɛ pi mìɛni nɛ̄, bɛ̀ yeli béri kanʔa kɛnmɛ pi mìɛni nɛ̄. Kire bé tí a weli sɛ́nì yiri nɛ́ weli kpuʔɔrɔ ní dè yeli wori dè, siɛnnɛ pe béri Kulocɛliɛ síɛri wè.

¹²Nɛ̀ taʔa gíi nɛ̄, yeli kpuʔɔrɔ dáà ti kɛnnɛ ni wè nyuʔɔ Kulocɛliɛ wuulo peli yákuɔ nɛ̄ wīʔ, ki ’nyaa tiī nɛ ki kpínʔini nɛ pínɛ siɛnnɛ pe síɛrigɛ kanʔa kpuʔɔ Kulocɛliɛ mɛ́ wè wī. ¹³Kire kpuʔɔrɔ dáà tire kɛnmɛ nɛ̄ bè, pe béri Kulocɛliɛ míɛtanʔa yeri gè, bɛ̀ yeli ’fɔ̀li nɛ̀ yéri ki nɛ̄ nɛ̀ Kirisi wi Kataanna Siɛnrɛ juu dè, nɛ̀ pínɛ yeli ’yeli kɔliyɛrɛ kɛn dè peli mɛ́ nɛ̀ kɔli láʔa peli nɛ́ bìli pe mìɛni ní bèle. ¹⁴Pe béri náariyɛ kpínʔini yeli mɛ́, bɛ̀ yeli wuʔu kiī pe mɛ́ kpuʔɔ pe funyɔ nī yè, nɛ́ ki cɛ́n Kulocɛliɛ wi nyɛ́nì kpuʔɔrɔ taʔa yeli nɛ̄ ti felige wèʔ. ¹⁵Kpuʔɔrɔ ti ’yɛli Kulocɛliɛ nɛ̄, nɛ̀ taʔa gíi nɛ̄, kpuʔɔrɔ dáà wi ’kɛn yeli mɛ́ dè, ti ’nyuɔ jáa juʔu nɛ̄.

Pɔli wi ’siɛngbɛnrɛ juu nɛ̀ kɛn pe mɛ́

¹Mi Pɔli tíimɛ wè, mi nɛ yeli fiɛn wī, Kirisi funnyige nɛ́ wi kacɛ̀ngɛ kire kɛnmɛ nɛ̄ bè, mi ŋáà wī, pàli nìɛ ki nyu níɛ̀ jo dí a mi gbɛ́nɛ yē baa yeli yiʔɛ mɛ́ gè, mi nɛ̂ puu nyíwɛ, nɛ̀ sí ki taa a mi yē liʔi wè, mi nàa nyu gbɛ̀ngɛ. ²Mi ye fiɛn wī, ye fǎga tí a mi kɛ́nì yē baa yeli tiʔɛ nī gè, mi sari nyu gbɛ̀ngɛʔ; kire sí mi nɛ caa bè kpíʔile yoʔ. Bàli pe ti nyu nɛ́ jo dí weli nɛ ki kpínʔini bɛ̀ siɛnnɛ kɛnmɛ tíɛlɛ bè, m’bé sa siɛngbɛnrɛ táà juu pe mɛ́. ³A weli cɛ yē nɛ́ siɛnnɛ kɛnmɛ ní wè, weli sí wè nɛ weli cáanra cáanri dè nɛ́ siɛnnɛ sɔ̀ngirɔ ní wīʔ. ⁴Nɛ́ ki cɛ́n weli kàsiitunyɛrɛ dè, céri wori bɛ̀ʔ. Ti fànʔa kiī nɛ kɔ́ngi Kulocɛliɛ mɛ́ wī, ti bé làridiɛyɛ lìriye cáan yè. Weli nɛ siɛnnɛ pe kacinʔɛjuumɔ siɛnrɛ kúu dè. ⁵Nɛ̀ pínɛ nàgbuʔɔrɔ sɔ̀ngirɔ dáà ti mìɛni tiì Kulocɛliɛ cɛ́n wèʔ, weli nɛ̂ ti mìɛni cúʔɔ. Weli nɛ̂ sɔ̀ngirɔ felide ti mìɛni yiʔɛ, siɛn wi nɛ̂ fulɔ nɛ̂ yéri Kirisi wori nɛ̄ dè. ⁶Nɛ̀ pínɛ, weli ’gbòbori nɛ̀ yaʔa bè siɛnciile felile pe mìɛni wuʔɔ bèle, a yeli kɛ́ni yē nɛ́ ngbóluʔulo ní nɛ lúru cɛ̀ngɛ yeli tíimɛ bèle.

⁷Gìi yeli nɛ wéli nɛ nyaʔa nyapile nɛ̄ lè, ye fǎri kire tɔ́riʔ. A siɛn ’tɛ́ngɛ ki nɛ̄ wire yē Kirisi wuu wè, siɛn wi- ki cɛ́n weli míɛni bèle, kire weli yē. ⁸A ki cɛ́nì nyaa mi nɛ nàgbuʔɔrɔ kpínʔini kpuɔmɔ larigɛ gíì nī Kàfɔli wi ’weli tɛ́ngɛ wè, kire wè fìɛrɛ tɔ́ngi mi nɛ̄ʔ. Ki ’nyaa wi ’weli tɛ́ngɛ kire larigɛ nī gè yeli nyuɔmɔ pire kɛnmɛ nɛ̄ wī, kiì kò majo weli ’yɛli bè yeli woli cúʔɔ lè wīʔ. ⁹Ki wè mi sɔ̀ngirɔ nī dèʔ mi sɛbɛlɛ pe siɛnrɛ ti de fíɛrɛ cògí yeli nɛ̄ wīʔ. ¹⁰Nɛ́ ki cɛ́n, pe ’jo mi sɛbɛlɛ pe siɛnrɛ tiī sìluburo nɛ́ ní gbɛ̀nrɛ. Nɛ̀ sí ki taa, dí a mi tíimɛ gbɛ́nɛ yē baa wè, mi nɛ̂ puu ŋɔri fùn, mi siɛnrɛ ti nɛ̌ puu nɛ́ pìle níʔ. ¹¹Siɛn ŋáà wi nyɛ́ni tire nyu dè, wi- ti lúʔu cɛ̀ngɛ: kɛnmɛ bíì nɛ̄ weli sɛbɛlɛ pe siɛnrɛ ti juugɛnmɛ pi yē bè, bɛ̀ weli nɛ̌ puu baa wèʔ, kire kanumɔ nɛ̄ weli yē nɛ̀ pínɛ weli kakpiʔiligele nī gèle, a weli ’kɛ́ baa wè.

¹²Ki sɔ̀ngirɔ ti cɛ wè weli nī bèri ki caa bè wúɔ yɛli nɛ́ pàli ní wèʔ, á kire ’laa bèri wìye tɔ́nminɔ nɛ́ pàli níʔ, bàli pe cî nɛ pìye tìí bèleʔ. Pe- ki cɛ́n peli bīɛlɛ laamɛfunfɔlilɔ, níɛ pìye tɔ́nminɔ nɛ́ peli tíimɛ kɛnmɛ ní bè. ¹³Weli bèle, weli wè caa bèri wìye nyíɛnɛ de tóriʔ. Yéridiʔɛ gíì Kulocɛliɛ wi ’tìɛ gè, kire nī weli yē, níɛ wi baara kúu dè dàa wi ’le weli kiyɛ nī yè. Kire baara tire sí ti ’kpúʔɔ fúɔ nɛ̀ kɛ́ baa yeli tiʔɛ nī gè. ¹⁴Weli sì weli yéridiʔɛ fɛ́nigɛ gèʔ, wàa fǎga ki nyaa majo dùʔɔ weli sì nɔ̀ baa yeli tiʔɛ nī gè wīʔ. Nɛ́ ki cɛ́n weli cɛ we sɛ́nì yiri pélile bèle yeli tiʔɛ nī gè nɛ́ Kirisi wi Kataanna Siɛnjaarirɛ ní dè.

¹⁵Weli wè nàgbuʔɔrɔ kpínʔini nɛ ki líi nɛ tórigi pàli baara kúɔguɔrɔ nɛ̄ʔ. A ki ’taa yē yeli tɛ́ngɛlɛ lire nɛ kpóri nɛ waa yiʔɛmɛ wè, kire tiɛlɛ lire nɛ̄ weli sɔ̀ngirɔ ti yē: weli baara ti de waa yiʔɛmɛ yeli sunʔɔmɔ nī bè, bè yɛli nɛ́ weli láʔala ní lè.

¹⁶Bɛ̀ weli bé gbɛ̀ sa Kataanna Siɛnrɛ jáari dè tiɛyɛ nyíì yī baa yeli kúrugu bèle, dí weli fǎri wìye nyíɛnɛ nɛ́ pàli baara kúɔguɔrɔ ní dèʔ. ¹⁷A siɛn ŋíì je de wìi nyíɛnɛ, wiri wìi nyíɛnɛ gàa Kàfɔli wi ’kpíʔile gè10.17 Wéli baa Zer 9.22-23.. ¹⁸Nɛ́ ki cɛ́n, ŋàa wi nyɛ́ni wi tíimɛ míɛtanʔa yeri gè, wire bɛ̀ʔ Kàfɔli wi nyɛ́ni tɔ́riʔ, fúɔ macɛn siɛn ŋáà wire ’tìɛ wè.

Jànvaafɔlilɔ tundunminɔ wori dè

¹ʔé, ye- mi kpàri ye cò cɛ̀ ! Mi nɛ nyu bɛ̀ kàalafɔli tíɛlɛ wī. Ye- tɔ̀ni ye mi kpàri ye cò. ²Yeli wuʔu kiī mi mɛ́ fungo nī gè fúɔ mi nɛ yejaʔa kpínʔini yeli wori nɛ̄ dè, majo mɛni ki yejaʔa kiī Kulocɛliɛ nī wè. Nɛ́ ki cɛ́n mi ’yeli cò nɛ̀ kɛn kɔnimɔ nɛ̄ nàguɔ nigbe mɛ́ wī, wire sí wī Kirisi wè. Nɛ̀ pínɛ mi ’yeli kɛn Kirisi mɛ́ wè bɛ̀ sinboriwo tíɛlɛ ŋàa wiì fìɛ nàguɔ cɛ́n wèʔ. ³Kɛnmɛ bíì nɛ̄ wɔ̀bugɔ ki cé Awa fáanni wè nɛ́ ki sìnjiligele siɛnrɛ ní dè, mi nɛ fìʔɛ́ wàa fǎga sɔ̀ngibiire le yeli funyɔ nī yèʔ, yeli fǎga ní sìɛn tɛ́ngɛlɛ nī lèʔ bèri tári cìilimɛ nī bè Kirisi kɔli mɛ́ gèʔ. ⁴Mi sí ki nyaa, a wàa pɛ́nì Zezi wáà wiiyɛ wori juu yeli mɛ́, nɛ̀ yiri ŋàa wori weli ’juu yeli mɛ́ dè, á kire ’laa a yeli ’fɔ̀li pìle láà niiyɛ nɛ̄ lè, nɛ̀ yiri nàa ni kíni nɛ̀ puu yeli mɛ́ lè, á kire ’laa a yeli ’tɛ́ngɛ Kataanna Siɛnrɛ táà tìiyɛ nɛ̄ wè, nɛ̀ yiri dàa nī yeli ’kíni nɛ̀ tɛ́ngɛ dè, tire dáà ti mìɛni dè, yeli nɛ̂ fɔ̀li cɛ̀ngɛ tire nɛ̄ dè.

⁵Kire tundunminɔ míɛkpoliyofɔlilɔ bálì piyè tóri mi nɛ̄ kaala láà fáala nīʔ. ⁶A ki cɛ́nì nyaa ye ’jo miì siɛnrɛ cɛ́n dèʔ, kacɛ́nnɛ lire lè, miì fɔ̀li tire nɛ̄ dèʔ. Nɛ́ ki cɛ́n weli nyɛ́ni ti mìɛni tìɛ dè yeli nɛ̄ feliye yi mìɛni.

⁷Kapiile mi ’kpíʔile lé kire gè, bɛ̀ mi ’mìɛ cɛ́rigɛ nɛ́ sí yeli yɛ̀gɛ wè, bɛ̀ ki nyaa mi ’Kulocɛliɛ Kataanna Siɛnrɛ jáari dè yeli mɛ́ waʔanɛ wè ? ⁸Mi ’kɔ̀nnɔ cáan tɛ́ngɛfɔlilɔ gbuʔulo kálì nɛ̄, nɛ́ sɛ́nì baara yeli mɛ́. ⁹Nɛ̀ pínɛ bɛ̀ mi ’puu baa yeli tiʔɛ nī gè, bɛ̀ yakaa cé mi fɔ̀n wè, mi sì ki tugoro tugo dè yeli wáà nɛ̄ʔ. Nɛ́ ki cɛ́n gìi ki cé mi laa gè, siinyɛninɛ bílì pe cé kɔ́n Maseduwani tɛ́nimɛ nī bè, a pe ’ki kɛn mi mɛ́. A kire ’ki kɛn, feliye yi mìɛni, a mi ’mìɛ kpàri nɛ̀ cò, mi sì mi tugoro taʔa dè yeli nɛ̄ʔ. M’bé sí tɔ̀ni bè mìɛ cò kire tiɛlɛ nɛ̄ lè. ¹⁰Kirisi kányiʔɛ kire mi je juu: náʔa Akayi tɛ́nimɛ nī bè, míɛtanʔa gáà mi ’taa náʔa gè, siɛn sǐ gbɛ̀ kire suɔ mi mɛ́ʔ. ¹¹Nɛ̀ taʔa gíi nɛ̄ ? Siɛn bé gbɛ̀ ki juu lé bé jo yeli sì mi dɛ́niʔ lé ? Kulocɛliɛ wire wi ’ki cɛ́n.

¹²Gàa mi nɛ kúu gè, m’béri ki kúu de tíin. Bìli pe ki caa bèri kele kálì kúu béri pìye nyíɛnɛ de ki sɔ̀ngí peli yē numinɔ nɛ́ weli ní bèle, piyě kire larigɛ taa gèʔ. ¹³Kire siɛnnɛ bèle, jànvaafɔlilɔ tundunminɔ bīɛlɛ, káfinɛrɛ kakuʔɔlɔ baakuɔlɔ bīɛlɛ, tire ní pe nìɛ siɛnnɛ fáanni bèle níɛ̀ pìye kpíʔile peli yē Kirisi tundunminɔ. ¹⁴Kire sí wè funwuɔrɔwuʔuʔ, nɛ́ ki cɛ́n Setɛni tíimɛ wi nɛ̂ gbɛ̀nɛ wìi yiʔɛ nɛ̀ wìi kpíʔile kpìɛnmɛ nyìʔɛnɛ tundunwɔ. ¹⁵Kire nɛ̄, we fǎga ki nyaa kafɔnnɔʔ, bɛ̀ wi baakuɔlɔ pe sî pìye yiʔɛ nɛ̀ pìye kpíʔile peli yē sínmɛ baakuɔlɔ bèleʔ. Pe kúɔmɔ pi bága pa puu bè yɛli nɛ́ pe kakpiʔiligele ní gèle.

Pɔli wi ’fùrɔ Zezi baara ti koliyo nī yè

¹⁶M’bé ní koli ti juu, siɛn fǎga de ki sɔ̀ngí mi yē kàalafɔli wīʔ. Á kire sí bɛ̀ʔ, ye- mi líɛ bɛ̀ kàalafɔli tíɛlɛ, dùʔɔ mi míɛni béri nàgbuʔɔrɔ cɛ̀ri kpínʔini. ¹⁷Dàa mi nɛ nyu dè, mi wè ti nyuʔ nɛ̀ yɛli nɛ́ Kàfɔli wire kɛnmɛ ní wīʔ, mi nɛ ti nyu kàalafɔlilɔ siɛnrɛ tíɛlɛ wī, nɛ nìɛ nyíɛnɛ nɛ́ ti ní. ¹⁸Bɛ̀ ki ’nyaa pàli nìʔɛnɛ nɛ pìye nyíɛnɛ siɛnnɛ funyɔ kɛnmɛ ní bè, mi míɛni m’bé sí de nìɛ nyíɛnɛ kìɛ. ¹⁹Nɛ̀ taʔa gíi nɛ̄, yeli yē sícilile nɛ̀ kaala yiʔɛ cɛ́n, níɛ̀ sí fɔ̀li nɛ kàalafɔlilɔ siɛnrɛ lúru dè. ²⁰A siɛn nɛ yeli kpínʔini sùkulolo wè, nɛ yeli kɔliyɛrɛ suu dè nɛ líi wè, nɛ yeli fùʔuró wè, nɛ wéli nɛ sùuri yeli nī wè, nɛ yeli kpúɔn yiʔɛ nī gè, yeli nɛ̂ ki kpàri nɛ̀ cò. ²¹Kiī m’mɛ́ fìɛrɛwuʔu bè ki juu, bɛ̀ weli ’wìye yaʔa majo weli yē ŋɔri fùn wè. A siɛn ’ti nyaa ti ’yɛli baa yo, mi míɛni ’fɔ̀li ti nɛ̄, mi nɛ nyu kàalafɔli tíɛlɛ wī.

²²Eburulo bīɛlɛ lé ? Mi yē wàa nɛ̀ pínɛ. Isirayɛli wuulo bīɛlɛ lé ? Mi yē wàa nɛ̀ pínɛ. Birayima siimɛ wuulo bīɛlɛ lé ? Mi yē wàa nɛ̀ pínɛ. ²³Kirisi baakuɔlɔ bīɛlɛ lé ? Ao, m’bé kàalafɔlilɔ siɛnrɛ juu: mi ’pe jáa nɛ̀ tóri tire nɛ̄ dè. A ki ń’nɛ̀ nyaa wuʔɔgɔ gè, mi wuʔu kire ’wìɛ; kasuulere dè, mi ’ti kúɔ nɛ̀ tóri pe nɛ̄; a pe ń’nɛ̀ jo kpuɔnrɔ dè, mi wori ti ’tóri péwu. Mi ’píle nɛ̀ suɔ kùu mɛ́ wè tɔliyɔ nyuɔ. ²⁴Zuufulo pe ’mi kpúɔn nɛ̀ taa tɔliyɔ kogunɔ: kpúɔnnɔ ó kpúɔnnɔ ki nɛ̂ nyaa sápinyiʔɛnɛ togo nɛ́ kpɔrigɔ nɛ́ kacɛri. ²⁵Pe ’mi kpúɔn kàgbiile ní nɛ̀ taa tɔliyɔ taanri; nɛ̀ mi wáa nɛ́ sìndari ní tɔligɔ nigbe. Tɔliyɔ taanri a kɔ́ri ki ’pùunni nɛ́ mi ní luʔɔ nī gè. Mi ’pìlige nɛ́ cɛnbogo kúɔ luʔɔ sícuugo sunʔɔmɔ nī.

²⁶Mi ’tánʔagɛlɛ kpíʔile nìʔɛgɛlɛ tɔliyɔ nɛ̄. Tɔliyɔ sáa, luʔɔ cé kò cɛ̀ bé mi lìi. Tɔliyɔ sáa, kàyuulo ’tuu mi nɛ̄. Tɔliyɔ sáa, mi tíimɛ kùlo wuulo pe ’puu nɛ mi túngu. Tɔliyɔ sáa, sìndɛngɛlɛ pe ’puu nɛ mi túngu. Tɔliyɔ sáa, kiì puu mi nɛ̄ nyíge kàaya nī yèʔ. Tɔliyɔ sáa, kiì puu mi nɛ̄ nyíge waama kùlo nī lèʔ. Tɔliyɔ sáa, mi ’puu nɛ waa bè kò ni nī kuʔɔjii nī wè. Tɔliyɔ sáa, kiì puu mi nɛ̄ nyíge siinyɛninɛ jànvaafɔlilɔ sunʔɔmɔ nī bèʔ.

²⁷Mi ’baagbɛnrɛ kúɔ nɛ̀ wuʔɔgɔ suɔ kátii. Mi ’kò nɛ́ ŋɔ́nimɔ ní tɔliyɔ sáa, nɛ̀ fungo nɛ́ luʔɔwuʔɔ kpàri gè nɛ̀ cò. Mi ’kò sìnlii nī tɔliyɔ sáa, nɛ̀ wiire suɔ, nɛ ní burulere fùn. ²⁸Nɛ̀ kire liɛlɛ yige baa, cɛngɛ ó cɛngɛ tɛ́ngɛfɔlilɔ gbuʔulo ke mìɛni sɔ̀ngirɔ ti nɛ̂ puu mi nɛ̄. ²⁹A tɛ́ngɛfɔli wáà ŋɔri cé kúɔ, ki nɛ̂ cé nyaa majo mi ŋɔri tire ti ’kúɔ nɛ̀ pínɛ. A wàa ’kúrugo nɛ̀ tuu, je ki yáʔa ki nɛ̂ puu mi nɛ̄ bɛ̀ kàsun tíɛlɛ wī !

³⁰A ki yē siɛn ’yɛli bèri wìi nyíɛnɛ wè, m’béri nìɛ nyíɛnɛ, nɛ́ ki cɛ́n mi yē ŋɔri fùn. ³¹Kulocɛliɛ wè, wire ŋáà wī Kàfɔli Zezi Tuu wè, wire ŋáà wiyē nɛ tòbiló súuri lɛ̀gɛlɛ ke mìɛni nī gèle, wi ’ki cɛ́n mi wè nɛ finɛnɛ wīʔ. ³²Damasi kàʔa mɛ́ gè, fànʔafɔli ŋáà wi ’puu baa nɛ baara kùlofɔli Arɛta mɛ́ wè, wi cé puu nɛ kàʔa wéli gè, bága mi taa bè mi cò. ³³Nɛ̀ sí ki taa pe cé mi le juʔɔ nī nɛ́ mi yige kàlii nī, nɛ̀ mi tìrige gungo sɔrigɔ nī gè, a mi ’fɛ̀ nɛ̀ suɔ pe kiyɛ nī yè.

Pɔli wi ’kele kálì nyaa

¹Ki ’yɛli mi de nìɛ nyíɛnɛ, nɛ̀ sí ki taa nyùgo wè ki nɛ̄ʔ. Kàfɔli wi ’mi yiʔɛ múgu gè a mi ’kele kálì nyaa.

²Mi ’siɛn wáà cɛ́n, Kirisi wuu wáà wī, ki yiʔɛlɛ kiɛ nɛ́ sicɛri wī ŋɔ̀ wè, a Kulocɛliɛ wi ’wi líɛ nɛ̀ yɛ̀gɛ fúɔ nyìʔɛnɛ taanriwoli nī lè. Wi ’kɛ́ nɛ́ wi céri ní dè wī yo, á kire ’laa Kulocɛliɛ wire wi ’wi yiʔɛ múgu gè a wi ’ki nyaa yo, mi sì cɛ́nʔ; Kulocɛliɛ wire wi ’ki cɛ́n. ³Mi nyɛ́nì ki siɛn ŋáà cɛ́n wè, dùʔɔ wi céri tire ní wi ’kɛ́ yo, á kire ’laa Kulocɛliɛ wire wi ’wi yiʔɛ múgu gè a wi ’ki nyaa yo, mi sì cɛ́nʔ; Kulocɛliɛ wire wi ’ki cɛ́n. ⁴Ki ’nyaa, wi ’kɛ́ kusiʔi tiɛcɛ̀ngɛ mɛ́ gè, nɛ̀ sɛ́nì siɛnrɛ táà lúʔu, tiǐ gbɛ̀ cɛ́n bè juuʔ, nɛ̀ pínɛ siɛn sì yɛli bè ti juuʔ. ⁵Kire siɛn ŋáà wire kɛnmɛ nɛ̄ m’béri nàgbuʔɔrɔ kpínʔini dè. Á ki ’yéri mi tíimɛ kɛnmɛ nɛ̄ bè, miǐ de nàgbuʔɔrɔ kpínʔini kire nɛ̄ʔ, macɛn bɛ̀ mi yē ŋɔri fùn wè kire kɔri wire nɛ̄ m’béri nàgbuʔɔrɔ kpínʔini dè. ⁶A ki ’tɔ̀ni nɛ̀ nyaa mi yé je de nìɛ nyíɛnɛ wè, siɛn sǐ cî ki juu bé jo mi nyùgo ki wè baaʔ; kányiʔɛ kire mi cî de nyu. Nɛ̀ sí ki taa m’bé nìɛ kpàri bè cò, kire ga buu siɛn fǎga mi le larigɛ káà nīʔ bè tóri kɛnmɛ bíì nɛ̄ siɛnnɛ piyē nɛ mi nyaʔa wèʔ, nɛ́ gàa pe lúru mi nyasiɛnrɛ nī dèʔ.

⁷Kele gálì nɛ̄ Kulocɛliɛ wi ’mi yiʔɛ múgu gè, á mi ’ke nyaa gèle, bɛ̀ ke ’nyuɔ kacɛ́nmɛ fùn nɛ́ ní kafɔnnɔ wuʔulo gèle, wi wè caa mi de nìɛ nyíɛnɛ de wìi ke wori nɛ̄ dèʔ. Kire nɛ̄, a wi ’wíige le mi céri nī dè, bɛ̀ Setɛni tundunwɔ tíɛlɛ, ki de mi súnminɔ, gìi ki bé tí mi fǎri nìɛ nyíɛnɛ de wìiʔ.

⁸Mi ’Kàfɔli fiɛn wè ki wíige wori nɛ̄ dè nɛ̀ taa tɔliyɔ taanri, wi- ki kɔ́n mi nɛ̄. ⁹A wi ’mi yɛ: «Mi kpuʔɔrɔ tire bé yɛli nɛ́ muɔ ní. Nɛ́ ki cɛ́n mi fànʔa ki nɛ̂ kìi tìɛ, a siɛn ŋíì yē ŋɔri fùn wè.» Kire nɛ̄, ki cɛ́nì mi dɛ́ni mi de nìɛ nyíɛnɛ bɛ̀ mi yē ŋɔri fùn wè, dí Kirisi fànʔa ki sí tìgi mi kúrugu. ¹⁰Kire kɛnmɛ nɛ̄, a mi yē ŋɔri fùn wè, nɛ́ a pe cɛ́ni mi teri wè, nɛ mi cɔ̀rí wè, nɛ mi wuʔɔ wè, nɛ́ a kagbɛngɛlɛ ’mi taa Kirisi wire kɛnmɛ nɛ̄ bè, m’bé puu fundaanra nɛ̄. Nɛ́ ki cɛ́n a mi gbɛ́nɛ yē ŋɔri fùn wè, kire lɛ̀lɛ nī lè, mi nɛ̂ fànʔa taa.

Pɔli wiì yakaa suɔ Korɛntiyé mɛ́ bèleʔ

¹¹Mi ŋɛ, mi ’kò kàalafɔli. Yeli ye ’mi ŋɔrigɔ fànʔa a mi ’kò bɛ̀ kire kɛnmɛ nɛ̄ bè. Yeli sí ye cé yɛli bèri mi míɛtanʔa yeri gè, nɛ̀ taʔa gíi nɛ̄, a ki nɛ́ cɛ́nì nyaa mi wè yafiɛn wèʔ, yeli tundunminɔ míɛkpoliyofɔlilɔ piyè tóri mi nɛ̄ʔ. ¹²Kele gílì ke ki tìí dí mi yē Zezi tundunwɔ wè yeli sunʔɔmɔ nī bè, ki kele ke ’kpíʔile nɛ̀ tóri yeli sunʔɔmɔ nī bè nɛ́ kpàricogo ní kpuʔɔ. Ki kele ke n’gɛlɛ: fìɛlɛ, nɛ́ kafɔngɔlɔ, nɛ́ kakpoliyo ní yè. ¹³Ye- ki juu wêli, gáa ki ’kò gàa yeli sì taaʔ bɛ̀ tɛ́ngɛfɔlilɔ gbuʔulo sɛngɛlɛ tíɛlɛ gèle ? Dùʔɔ bɛ̀ ki ’nyaa mi wè, mi sì yeli fùʔuroʔ nɛ̀ yakaa suɔ yeli mɛ́ wè, kire lé ? A ki yē kire gè, ye- kire kolimɔ wuʔu yaʔa gè mi nɛ̄.

¹⁴Ki tɔliyɔ taanriwoli lire nī nàa lè, mi nɛ gbòborí bè kɛ́ baa yeli tiʔɛ nī gè. Miì sí je ki tugoro taʔa dè yeli nɛ̄ʔ. Kiì nyaa majo yeli kɔliyɛrɛ tire mi nɛ caaʔ; ʔéʔe, yeli tíimɛ mi nɛ caa. Nɛ̀ taʔa gíi nɛ̄, pìile peli bɛ̀ʔ pe ’yɛli bèri wali caa de tɛ́ngi pe siifɔlilɔ mɛ́ bèleʔ, siifɔlilɔ peli pe ’yɛli bèri wi caa pe pìile mɛ́ bèle. ¹⁵Mi wè, ki ’mi dɛ́ni mi de mi wali líi wè bèri nìɛ fùʔuró de nii yeli nī bèle. A mi nɛ kàa taʔala mi dɛ́nigɛ nɛ̄ gè yeli kɔli mɛ́ gè, kire bé ki kɛn lé yeli kàa yige yeli dɛ́nigɛ nī gè mi kɔli mɛ́ gè ?

¹⁶Mi sì mi tugoro taʔa dè yeli nɛ̄ʔ, nɛ̀ ki yaʔa pàli ’ki nyaa majo miì fílige wīʔ, dí mi síciligele kele mi ’kúɔ. ¹⁷Bìli mi ’tórigo baa yeli tiʔɛ nī gè, mi ’yakaa suɔ nɛ̀ lìi yeli mɛ́ lé pe kiyɛ nī yè ? ¹⁸Mi cé Tiiti fiɛn wè nɛ̀ wi tun nɛ́ siinyɛni ní wè. Tiiti wi sɛ́nì yeli fùʔuro nɛ̀ yakaa suɔ yeli mɛ́ lé ? Kire tánʔagɛnnumɔ pire nɛ̄ túʔu bɛ̀ʔ weli ’puu nɛ kele kúu gèle nɛ́ yeli ní ? Kire tánʔagɛnnumɔ pire nɛ̄ bɛ̀ʔ weli nɛ tári lé ?

¹⁹Yeli ’ki séli kiī faʔa, níɛ ki sɔ̀ngí weli nɛ nyu bè tànʔa kɛn wìye mɛ́ yeli yiʔɛ mɛ́ gè. Kire sí bɛ̀ʔ, Kulocɛliɛ wire yiʔɛ mɛ́ weli nɛ weli siɛnrɛ nyu dè, Kirisi fànʔa nɛ̄. Mi siinyɛninɛ, weli nɛ kire gáà ki mìɛni kpínʔini gè, gìi ki bé tí yeli tɛ́ngɛlɛ ni- nìre wáa. ²⁰Kiī nɛ sànviige wáari mi nɛ̄, a mi kɛ́nì kɛ́ baa yeli tiʔɛ nī gè, mi fǎga sa yeli nyaa kɛnmɛ bíì nɛ̄ mi nɛ ki caa wèʔ, nɛ̀ pínɛ yeli míɛni fǎga mi nyaa kɛnmɛ bíì ní yeli nɛ ki caa mi puu wèʔ. Kiī nɛ sànviige wáari mi nɛ̄, mi fǎga sa kàsii caʔara nyaa baa yeli sunʔɔmɔ nī bèʔ, nyabiɛnnɛʔ, fundanʔanigɛʔ, yejaʔaʔ, míɛcuʔɔgɔ siɛnrɛʔ, pàli kacaajuumɔʔ, nìɛnyiɛnigɛʔ, kanyaʔamirɛʔ. ²¹Kiī nɛ sànviige wáari mi nɛ̄, a mi kɛ́nì kɛ́ baa yeli tiʔɛ nī gè, Kulocɛliɛ wi fǎga tí fìɛrɛ ní koli bè tɔ́n mi nɛ̄ yeli kɛnmɛ nɛ̄ bèʔ, mi ní de nyɛni nìʔɛgɛʔ, bɛ̀ ki ’nyaa bìli pe cé kíni nɛ̀ tuu kapiʔile nī gèle, piyè láʔa pe núʔɔmɔ kele nɛ̄ gèleʔ, nɛ́ pe kanuʔɔrɔ ní dèʔ, nɛ́ pe kolimɔ kakpiʔiligele ní gèleʔ dàa pe kúu dè.

Pɔli wi ’juu nɛ̀ tìɛ Korɛnti tɛ́ngɛfɔlilɔ nɛ̄ bèle

¹Ki tɔliyɔ taanriwoli lire nī nàa lè bɛ̀ mi nɛ waa baa yeli mɛ́ wè. Nɛ̀ yɛli nɛ́ bɛ̀ Kulocɛliɛ siɛnsɛbɛrɛ ti ’ki juu dè, kele ke mìɛni ke ’yɛli ke- cuɔnri kinyaafɔlilɔ siin, á kire ’laa kinyaafɔlilɔ taanri siɛnjuuro nɛ̄13.1 Fàn 19.15 tire ti ’juu náʔa gè.. ²Bɛ̀ mi cé kɛ́ taziinwoli nɛ̄ lè, mi cé kíni nɛ̀ ti juu nɛ̀ kúɔ. Píra nī wè m’bé ní koli ti juu bɛ̀ mi wè baa wèʔ: bìli pe cé kíni nɛ̀ tuu kapiʔile nī gèle, nɛ́ sɛnminɛ pe mìɛni bèle, a mi ’kɛ́ nàa nɛ̄ lè, wàa sǐ kò díɛʔ. ³Yiyè jo lé dí mi ’yɛli bèri mi siɛnrɛ nyu dè ki- cɛ́n Kirisi wire wi ’ti le mi nī lé ? Wire wè, wi wè ŋɔri fùn yeli kɔli mɛ́ gèʔ; wiī nɛ wi fànʔa tìí gè yeli sunʔɔmɔ nī bè. ⁴Pe ’tɔ̀ni nɛ̀ wi kóri tiiparigɛ nɛ̄ gè, wi ’puu ŋɔri fùn. Nɛ̀ sí ki taa wi sí yē sìi nɛ̄ Kulocɛliɛ fànʔa nɛ̄ gè. Weli míɛni bèle, yeli bága weli nyaa weli puu sìi nɛ̄ Kulocɛliɛ wire fànʔa nɛ̄ gè.

⁵Ye- yìye siʔɛ ye wéli yeli tíimɛ bèle, a ki yē yeli nɛ tári tɛ́ngɛlɛ nī lè; yeri yìye cinʔɛ yeli tíimɛ bèle. Dùʔɔ yeli sì ki cɛ́nʔ Zezi Kirisi wiī yeli nī lé ? Masicɛn siʔɛwelile ni ’ki tìɛ tɛ́ngɛlɛ wè baa yeli nīʔ. ⁶Mi sí nɛ sɔ̀ngí yeli ’yɛli bè ki cɛ́n, kádii weli bèle, siʔɛwelile niì tuu weli nɛ̄ʔ. ⁷Weli sí yē nɛ Kulocɛliɛ náari wè, yeli fǎga kapiʔi káà fáala kpíʔileʔ. Weli wè caa bè ki tìɛ weli we ’jáa wèʔ. Gìi weli nɛ caa wè, yeri kacɛ̀ngɛlɛ kpínʔini, ale ki nɛ́ cɛ́nì nyaa pe ’jo weli wè yafiɛn wèʔ. ⁸Nɛ́ ki cɛ́n, weli sǐ gbɛ̀ yafiɛn yige Kulocɛliɛ kányiʔɛ nī gèʔ, nɛ̀ yiri weli de baara kányiʔɛ ki koligo nī gè. ⁹A yeli gbɛ́nɛ̀ ŋɔri taa, á weli ní ŋɔri fùn wè, weli nɛ̂ puu fundaanra nɛ̄. Weli náarigɛ ki nyùgo kire gī, ye- liɛ ye fori tɛ́ngɛlɛ nī lè. ¹⁰Kire kɛnmɛ nɛ̄ mi nɛ mi siɛnrɛ sɛbɛ dè níɛ tíin náʔa liʔi wè. Mi wè caa bága sa puu siɛngbɛliwɛʔ a mi kɛ́nì kɛ́ baa yeli tiʔɛ nī gèʔ, nɛ́ ki cɛ́n Kulocɛliɛ wi ’mi tɛ́ngɛ ki larigɛ nī gè bè ŋɔri kɛn yeli tɛ́ngɛlɛ mɛ́ lè, ki fǎga nyaa mi- yeli tɛ́ngɛlɛ cúʔɔ lèʔ.

Síɛrilɛ sɛnnɛ lè bè siɛnrɛ kúɔ dè

¹¹Gìi ki ’kò gè nɛ siinyɛninɛ, ye- puu fundaanra nɛ̄, yeri kele kúu gèle ye- liɛ ye fori, yeri nyu yeri ye funyɔ nyígi yè, ye- bìɛ, ye- puu yanyige nɛ̄ nɛ́ yìye ní. Bɛ̀ Kulocɛliɛ wè, wire ŋáà wī dɛ́nigɛfɔli wè nɛ́ ní yanyigefɔli wè, wi bé kò nɛ́ yeli ní.

¹²Ye- yìye síɛri nɛ́ dɛ́nigɛ ní. Tɛ́ngɛfɔlilɔ pe mìɛni piyē nɛ yeli síɛri.

¹³Kàfɔli Zezi Kirisi wi kpuʔɔrɔ dè, nɛ́ Kulocɛliɛ dɛ́nigɛ ní gè, nɛ́ pínɛnyɛnigɛ gáà ki ’kɔn Kulocɛliɛ Pìle mɛ́ lè, ti- puu nɛ́ ye mìɛni ní.