TIITI

TIITI

¹ Masɛ Pooli n Lawa a bɛ̀rɛ lɛa, Yezu Krita a dia dí‐a wole lɛa. Dí na á n kɔ ma la, mà Lawa min mɛnɛn bɔ, mà man dɔ bɛn lɛ ǹ goleemali yɛ. Wɔa Lawa a zii bɛ́ minin darɛɛ sonbore mɛn ganaa, mà ma bɛ nyaa ǹ nɛ, ² ń giɛ yiri doa nyin nyabaã ganaa kɛ á goɛ̃ ǹ li. Lawa mɛn bɛ́ a soɛ boe wa, a din na á lɛ kɔ wɔ la ka bɛa nyin nyabaã kɛ lɛ nɛ, bɛ̀ kanaa tɔn nə n giala kɔ wa. ³ Sɛnɛ, a biikoo bɛ́ á dɔ kanna, a na á nyaa wɔ nɛ, ka a din a boo ne. Bɛa boo lɛ n ke á n kɔ masɛ Pooli la, wɔ Kirisibaali Lawa din ma dia a laakalɛɛ. ⁴ Tiiti, goleemali bɛ́ wɔa lɛ kaa kun màn lɛa, n nə́ maa nɛ sonbore lɛa a gɔ́ɔ̃ nɛ, man sɛ́wɔ kɛ diɛ n la. Wɔ Di Lawa laanka wɔ Nyin‐sili Yezu Krita a bǐɛ̃ die a dɔ n ganaa, ǹ là nyantoro kɔ n la. ⁵ Man má n toa Krɛti gána nɛ, ń giɛ, dí gialakun mɛn goã, n bɛ yɔrɔ bɔ sɔnbɔraanɛ. Ń giɛ, n ga Lawa a sɔmɔ walan wolen dɔn bɔ, n nə ǹ koa kiwi gogoonmaa nɛ. Ma yiri mɛn kɔ n la, n die n nə n yiri koa bɛ li. ⁶ Ga Lawa a sɔmɔ walan wole doamaa nɛ, a goã lɛ pɔrɔ ǹ bǎã ná a ba a ganaa wa. A goã lɔ goon toto zuũ lɛa, a nɛnyaanan doamaa nɛ, ǹ goã golee sii li wolen lɛa, ǹ tɔ baran goã ziziɛ̃‐n wa, ǹ lɛ‐silin baa. ⁷ Lawa a sɔmɔ nyɛɛnaan‐bɔle doamaa nɛ, a ga Lawa a sɔmɔ mànan walan. Bɛ lɛ n toɛ, a doamaa bie lɛ pɔrɔ ǹ bǎã kɔ́n yɛ a wɔ paǹ li wa. A nyan din gole‐kɔle baa wa, a nyan foo yoo fufuu wole baa wa, a nyan yɔ‐mili baraa baa wa, a nyan zia‐dali baa wa, a nyan ga là babaraa li wole baa wa. ⁸ Yǎa ǹ dɛnaa goɛ̃ tiin kũ doɛ̃ wole lɛa, á n sii sonbore narɛ. Yǎa á goɛ̃ mìiwedɛnaa lɛa, min pepere lɛa, Lawa wɔ lɛa, a boo la a n din kũ doɛ̃. ⁹ Boo taãn mɛn bɛ́ kɔnpii ka wɔa daraa ǹ yiri kɛ nɛ, a doamaa nɛ a n paraa bɛ ganaa taãn‐taãnɛ. Bɛa yɔrɔ kɛ la, á re boe la, a min kɔsɔn foo taã ka minin daraa ǹ yiri taãn kɛ nɛ, min mɛnɛn bɛ́ a liere koe, a bɛn sã nyaa ǹ nɛ. ¹⁰ Sonbore, min mɛnɛn bɛ́ ǹ ba bɔlɔ sii wa, ǹ nə́ boo kooro‐dalin lɛa, ka minin yiri‐sãlin ni, bɛn tá mɔnaa nɛ, sanparɛ Zuifun dinin bii kəni. ¹¹ N doa n nə ǹ lɛ tã. A giala, mà ǹ tá sumu tumun lɔlɛkɔn, ka ǹ daraan nɛ, ǹ ga wɔrɔ li ǹ gɔn kɔkɔrɔ kɛ a lɛa. ¹² Ǹ dinin Krɛtin bɛ́ min mɛnɛn bíi Lawa a boo gii dalin, bɛn goon na á pɛ mà Krɛtin man soɛ‐bɔlen lɛa lɛlɛndun, ǹ nə́ don màn babaraan lɛa. Mà maǹ yoobaalin lɛa, ǹ nə́ n taasɛ màn‐bii din sɔɔ̃ ganaa. ¹³ A boo mɛn da ke, sonbore ne. Bɛ lɛ a lɛa, boo woɛ̃ ǹ ganaa ka n parsii ni, ń giɛ ǹ tá goleemali pepere yii. ¹⁴ Màn mɛn bɛ́ toɛ, ǹ nə n na, ǹ nə n bɔ kɔn ka Zuifun boo zizin ni, min mɛnɛn bɛ́ ǹ nə́ n dɔ̀ɔ̃ kɔ sonbore ne, ǹ bɛn dɔn dí‐pɛn toa walan. ¹⁵ Min mɛnɛn bɛ́ yoreen ne, màn tumaa n yoreen bɛn gɔn. Sɛnɛ, min mɛnɛn bɛ́ gɔgɔrɛ, ǹ nə́ ǹ ba lɛ koe goleemali dɔ ganaa wa, màn kɔ́n ba yoreen bɛn gɔn wa. A giala, mà gɔgɔrɛbaa nə́ ǹ yiri tã, á ǹ taasiɛ dɔ si. ¹⁶ Maǹ pii mà ǹsɛn tá Lawa doɛ̃, sɛnɛ, ǹ sii‐zɛnaan man piã ka Lawa nɛ ǹ siin lɛa. Ǹ tìĩ n boe ne, maǹ piã wolen lɛa, ǹ ba boe la ǹ tá sii sonbore kɔ́n zɛnɛɛ wa.

¹ Sɛnɛ, nsɛ toa n minin daraa, a kɔnpɛ ka daraa ǹ yiri pepere kɛ nɛ. ² A pɛ giĩ zizin manɛ, mà ǹ toa ǹ boo ǹ dinin la, ǹ gugurubaa yɛ, ǹ nə́ mìiwedɛnan lɛa. Ǹ toa ǹ goã piɛ̃‐n ka goleemali sonbore ne, ka minin‐narɛɛ nɛ, ka foo‐kũ ni. ³ A din goon ne, a pɛ lɔ zizin dɔn manɛ, mà ǹ nə n dinin kũ ka min sonboren wɔ bɛ́ lɔn. Ǹ doamaa bie ǹ minin yiri ziziɛ̃ ǹ boon pɛsɛ̃ wa, ǹ nyan duvɛ̃ a bɛ̀rɛn baa wa. Ǹ doamaa nɛ, ǹ yiri sonbore kɔ ǹ miãn la, ⁴ ń giɛ ǹ tá lɔ tenən darɛɛ ǹ zuũn narɛɛ ganaa ka ǹ nɛnyaanan nɛ. ⁵ Ń giɛ dɔn ǹ tá boe la ǹ goã mìiwedɛnan lɛa, ǹ nə́ yoreen ne, ǹ lɔ baa ǹ dí‐nyali sonboren baa kion, ǹ sii n siĩni, ǹ nə ǹ zuũn lɛ si. Màn mɛn bɛ́ toɛ, min kɔ́n baran boo ziziɛ̃ da Lawa a boo wɔ paǹ li wa. ⁶ A din goon ne, nɛ tenən dɔn foo taã, ǹ goã mìiwedɛnan lɛa. ⁷ N dinmaa lɛ kəni, n doamaa nɛ, n goã dí sonboren giala‐nyaali lɛa sii tumaa gɔ́ɔ̃ nɛ. N goã parsiidɛnaa lɛa, n boo ná a giala la, n minin‐daraa gɔ́ɔ̃ nɛ. ⁸ Boo peperen da, ǹ nə́ ǹ ba boe la ǹ lɛ pɔrɔ ǹ ganaa wa. Ń giɛ n zɔ́ɔn tá goɛ̃ ka sìi ni, ǹ yii ná a ba baraa kɔ́n ganaa, ǹ tá diɛ wɔa wɔ paǹ li wa. ⁹ Bɛ̀rɛn dɔn doamaa nɛ, ǹ nə ǹ mìinaan lɛ si sii din tumaa gɔ́ɔ̃ nɛ. Ǹ toa ǹ sii kɔɔ̃n kɔ ǹ ganaa bɛ̀ ǹ nə́ ǹ ba ǹ lɛn boboe wa. ¹⁰ Ǹ doamaa bie ǹ nə ǹ mìinaan màn kɔ́n koã wa. Ǹ doamaa nɛ ǹ nə n dinin nyaa min sonboren lɛa, bɔlɔgoondɛnan lɛa, biikoo tumaa li. Bɛa yɔrɔ kɛ lɛ la, daraa ǹ yɔrɔ mɛn bɛ́ wɔ Kirisibaali Lawa wɔ gɔn la, ǹ tá re gugurubaa koe bɛ la sii tumaa gɔ́ɔ̃ nɛ. ¹¹ A giala, Lawa ná a bǐɛ̃ nyaa mà minbuiin din tumaa a kirisibaa bɔ a nɛ. ¹² Bɛa bǐɛ̃ kɛ lɛ n wɔ darɛɛ, mà wɔ piã ka Lawa‐n tii, ka kanaa dùũ sii babaraan kɛn nɛ, ń giɛ wɔ á goɛ̃ kanaa kɛ nɛ, mìiwedɛnan lɛa, min peperen lɛa, wɔ n bɔlɔgoondɛnan lɛa Lawa nɛ. ¹³ A n wɔ darɛɛ mà wɔ goã miɛ̃, wɔ nə́ n yii diɛ foo kɔɔ̃n kɛ la, wɔ foo n doa‐n a ganaa, wɔa Lawa gole Minin Nyin‐sili Yezu Krita a wusoo a daa pinaa kɛ lɛ, a gugurubaa gɔ́ɔ̃ nɛ. ¹⁴ A na á n din kɔ wɔa lɛa, mà a wɔ si sii baraa tumaa la. A na á bɛ zɛnaa mà a wɔ baa zaman yoreen lɛa, wɔ na a din sɔɔ̃ wɔn lɛa, wɔ goã din kɔ sii ganaa wolen lɛa, wɔ dí sonboren nya nɛ. ¹⁵ N doamaa nɛ n minin daraa bɛa yɔrɔ kɛ lɛ la. N nə ǹ foo taã, n zɛ̀rɛdɛnan zɛ̀rɛ baa. Bɛ zɛnaa ka n parsii din tumaa nɛ. Min kɔ́n dɔ nyan sàn kɔ n nɛ wa.

¹ Lawa nyankɔlen tumaa yiri da a nɛ, mà ǹ doamaa nɛ, ǹ nə n doro nyɛɛnaan‐bɔlen laanka pàãdɛnan manɛ. Mà ǹ doamaa nɛ ǹ nə ǹ lɛ si, ǹ goã dí sonbore tumaa nya a lɛa. ² Mà ǹ nyan boo baraa da min kɔ́n ganaa wa, ǹ nə n bɔ zia wɔlɔ li. A pɛ ǹ nɛ, mà ǹ nə n dinin nyaa yiri koa minin li wolen lɛa, ǹ nə ǹ min basiɛ̃baa nyaa min tumaa wɔ paǹ li biikoo tumaa li. ³ A giala, lɛlɛ, wɔsɛn dɔn man wɔ goã yiri wɛɛnaan lɛa, lɛ‐tiilin lɛa, sã wolen lɛa. Wɔ dɔn man wɔ́ goã taasiɛn laanka foo sii baraa tɔrɔ gigiã a bɛ̀rɛn lɛa. Wɔ ǹ wɔ́ goã wɔa yiikoonaabaa zɛnɛɛ baraabaa gɔ́ɔ̃ nɛ, ka yiri koa sii ganaa nɛ. Wɔ goã bɔnɛɛ taãn‐taãnɛ, wɔ n kɔn biɛ zɔ́ɔ. ⁴ Sɛnɛ, wɔ Kirisibaali Lawa bɛ́ a ná a sonborebaa laanka a minin narɛ ǹ sii zɛnaa minbuiinin ni, ⁵ a na á wɔ kirisibaa ka bɛ nɛ. A bie á zɛnaa mà wɔ ǹ wɔ́ dí peperen nya wa, sɛnɛ, a na á zɛnaa a giala, mà wɔ makara na á bɔ a ganaa. Wɔ bɛ́ wɔ́ batɛmu mɛn yɛ, Lawa a Yiri Fu bɛ́ n toɛ bɛ gɔ́ɔ̃ nɛ, a wusoo a yɛ ka nyin dii‐n mɛn kɔ wɔ la, a na á wɔ kirisibaa bɛ a lɛa. ⁶ Lawa na á bɛa Yiri Fu lɛ gisĩ wɔ la gigiã, wɔ Nyin‐sili Yezu Krita barka nɛ. ⁷ Bɛ na á n zɛnaa, màn mɛn bɛ́ toɛ, a bǐɛ̃ kɛ wɔ baa min peperen lɛa a din yɔrɔ‐a. Wɔ bɛ́ n yiri koɛ nyin‐nyabaã wole mɛn ganaa, wɔ boo la wɔ bɛ yɛ. ⁸ Bɛ lɛ n boo taãn lɛa, min nə́ boe la, a n foo doa a ganaa. Man giɛ li, máa n bɛ lɛ pɛ n laa parsiini, ń giɛ golee Lawa li wolen tá n tele, ǹ dí sonboren nyali taãnan baa. Màn mɛn bɛ́ siĩni, a là n minbuiinin ganaa, bɛ lɛ n ka bɛ nɛ. ⁹ Sɛnɛ, ga sii giala li kooron kɛn, ka digolo damata boo diɛ nɛ, ka zian nɛ, ka yɔ‐bɔ landa siin lɛa nɛ, n die n nə n bɔ bɛn tumaa wɔlɔ li. Bɛn kɔ́n là banban, sii kooron manɛ. ¹⁰ Min mɛn bɛ́ na kɔn‐a ǹ dí nyɛɛ, n nə n dan da bɛ nɛ a dɔ gunyin paa, n tɔn yɛ n toa. ¹¹ N tá doɛ̃, mà bɛa min kɛ lɛ miã na á n dɔ̀ɔ̃ kɔ zii pepere ne, mà a n sii baraa zɛnaali lɛa, mà a n dɔlɔ diɛ a din mìi ni. ¹² Bɛ̀ má Artemaasi hinlaa Tisiki dia n li biikoo mɛn li, n doa, n da ma yaa Nikopolisi kiwi. Sonbore má n yɔrɔ bɔ, man die bɔ̀nɔn zɛnɛɛ walan. ¹³ N doa, n nə n dɔ boo da minin lɛa wole Zenaasi lɛ ka Apolɔɔsi ni, ǹ zii tɔ wɔ kɛ a lɛa, ń giɛ màn kɔ́n baran nyaabaa ǹ ganaa wa. ¹⁴ Wɔ dɔn Lawa nyankɔlen lɛn doamaa nɛ ǹ nə n daraa dí sonbore nyali taãn baa lɛ ganaa. Màn mɛn bɛ́ toɛ, ǹ boo la ǹ laadoo taãnan saa ǹ bɔ kɔn la. Bɛa yɔrɔ kɛ la, ǹ tá kanaa ba re goɛ̃ là ná a ba a ganaa wa. ¹⁵ Min mɛnɛn tumaa bɛ́ kun ka ma nɛ, ǹ tá fòo diɛ n nɛ. Min mɛnɛn bɛ́ wɔa giaáran lɛa goleemali gɔ́ɔ̃ nɛ, n dɔ maa fòo da bɛn manɛ. Lawa a bǐɛ̃ die a goã ka tumaa li.